رواية ☆ ذنـــــبٌ بـــلا ذنـــــب ☆ الفصل السادس عشر 16 - بقلم Hend_AlBoor

خفت حيل بسلا عرفني اني هي

- الي جذبني الها مو بس شدة جمالها لا و السانها الحلو تحسها جبل و واگف يطلب

گالت اني بالمدرسه طالبة و اريدك تجي بمدرستنا تصير معلمي ضحكت و گلتلها لا بابا ميصير بس شتگولين لو انتي تجين يمي من تكبرين گمزت من فرحتها حست انطيتها كارت الدخول لحلمها و عقدنا اتفاق

رغم اني عقدت الاتفاق وياها بس جنت منطي امل للاتفاق ان يتم بنسبة واحد بالمية
بس تدرون شنو صار 
يبتسم و يباوع على جنة - يگولون المعجزات راحت وية الرسل بس هي اثبتت انو لا زالت المعجزات الى يومنا هذا
التقيت بيها باحد اقسام كلية الطب لو بيدي اني اگعد باستولها و اخليها تقوم مقامي كبروف بالطب

العظمة ماتعرف صغير او جبير  و لا اصل و لا فصل و مو الشهادة و الاصل و العمر يصنع العظمة
داخلكم يصنعها مثل ما صنعت عظمتها هاي الطفلة المشردة

العالم كله مشرد و هي بوگفتها و بتسولها بركضتها ورا الناس بهدومها الممزقة بحفو اقدامها الصغار و بگعدت امها وراها بالشارع بقسوة العالم و الحياة عليها
هي القوة و العالم مشرد هي العز و العالم ذليل

عظيم اني من اصنع من الماكو اكو و نادر من افرض ذاتي على الحياة رغم اني محطم ظاهريا ، من الحياة تحكم علية بالذل و اني اذلها
ما عشتو ثانية من الي عاشته هاي الطفلة لا

انتو بحياة كريمة و عز و توصفون العلم بالضغط و التعب ، ماريد اصنع منك طبيب تشيل صدريتك البيضة و ترفع راسك كدام الناس و تتباهى

مداصنع منك انسان مغرور تتعالى على الناس بشهادتك الي انت المفروض تخدمهم انت خادم و المعلم خادم و المهندس و المحامي و و
ناخذ الشهادة حتى نخدم مو حتى ننظر للناس بعين صغيرة والله شنو فلان عامل و اني طبيب ، لييش هذا يا علم علمك هذا المبدأ

العلم للخدمة .. مو للتعالي و التباهي

داسلمك ارواح بيدك مسؤولية هذه هي مسؤوليتكم ارواح ناس اتعبوا و ابحثوا و اتعمق اكثر بعلمك بحب و شغف و اذا مو گدها غادر الطب الطب مامتوقف عليك و مراح يتوقف ع احد
اريدك من تشيل صدريتك بمينك تشيلها و انت تحس بانك خادم و مسؤول مو سيد و برستيج و كذا

مجد - اثر بينا كلام البروف لدرجة كل القاعه دمعت عيوننا .. فعلا لو نرجع للي سوينا بحياتنا نلگي لا شي گبال الـ انجزته الطفله صديقته

- على مر السنين درست اطباء هواي بس مو كلهم اطباء فعليا اذا احصيهم قليل الي خرجتهم فعلا يستحقون كلمة طبيب

مسحت دموعي و قبضت اصبعي الصغير بيدي ربي فدواتك شلون ارد هذا الاحسان  احسانك و نعمتك يالله
رجعني بالزمن هواي حمدت الله بداخلي وصلت لمكان جان من المستحيل اوصله 

يبتسم - اتاثرتوا بالطفلة

الطلاب - نعم استاذ

- ما نريد تأثر بدون فعل اريدكم تجاهدون بهالخمس سنين
نشوفكم بالمحاضرة القادمة باذن الله

طلع و بقيت  بمكاني دقايق  امسح بدموعي بنص هذا الضياع كله اكو انسان يثني حياة بائسة و يصفها بالعظمة انسان يقدرني من دون كل الي استصغروني

رامي - جنة البروف طالبج علمود التقرير  سلمتي لو لا

- اي انطيته الك من جمعتهن

- مادري گال علمود التقرير مامسلمته

- تمام اني هسه اروح اشوف شنو الموضوع

مظر - انت صدگت علمود التقرير

- شنو لعد

- لك بابة هاي اختصاصها اساتذه

- يعني؟ 

- يعني مضبطها امورها

مقداد - اتقي ربيك ميصير هيج تذمها

رامي - بطل هالسوالف مظر

- شدعوة تدافعون ما احجي من كيفي  شفت بعيني

مقداد - و شنو شفت

مظر - بنهاية الدوام جنة و استاذ ماهر

- اي

- اييي رجال و بنية وحدهم و محد اكو شتتوقعون يعني

مقداد - بكل الاحوال لا تحجي و باعراض الناس لا تروح بتهلكة

رامي -ماصدك اشو ممبين عليها من هالنوع دائما منعزله

مظر - هن كلهن هيج و خوفك من السكوتية الهادئة

يضوجون منه و يطلعون يروح وراهم 

فهد - سمعت

مجد - اي

- برايك شنو شاف

- والله مادري شعلينا

- اذا صدك كلامه بلة ماهر بيها مجال شاب  بربها بروف عوني شباقي بي

- هذا ظن فهد

- ادري مو اني و انت گبالها شنو متشوف جمال و ادب

-  هاي المدوخه الجامعة شايف منها بكل مكان بتركيا و فرنسا ، و بعدين اني اميل للحنطاويات بعيون بنية

- الحنطاويات معانيهن دافيه تحس بيهن دم بس ترا جنة حلوة

- على طاريهن وين وصلت وية رونق

- ما وصلت

- ليش

- الي مايردني ماريده ، و يرادلي ابتعد حتى انسى مجد

- شلون تبتعد يعني متجيني

- اي بعد الامتحانات اطلع للشمال حتى متاخذني رجليني غصب لبيتكم و تنداس كرامتي

- اشك بيك تجي من الشمال لبيتنا مشي علمودها

يضحك - اسويها من گلبي يحن

- دخلي اروح لرئاسة القسم تعال وياية

- و شعندك

- اسم جدي غلط بالقوائم شفته بلوحة الاعلانات

- اني انتظرك هنا ،  مابية اجي

- دقايق و اجي بس ابلغ السكرتيرة

- طبيت للقسم رحت لغرفة البروف حيلي كله يرجف ارتباك و توتر و قلق دگيت الباب و سلمت ردلي و رحب بية وگفلي و مد اصبعه الصغير ابتسمت و دموعي نزلت

- هلا بهذيج الطفلة الي عيونها كلها امل و حياة و شغف ،  وين عهدج ،  ما ناسي اتفاقنا

جنة : ربطت اصبعي الصغير باصبعه نفس الاحساس القديم بس المشاعر تغير الاعمار تغيرت و الامل تجدد

مجد : طبيت ماكو السكرتيرة افتريت على الغرف مريت من يم غرفة البروف شفتهم مترابطين بالاصابع مثل الاصغار ،  رجعت

- استغفر الله طلعت البنية اقاربه و ظلموها 

السكرتيرة - تفضل

- غلطانين باسم جدي بالقوائم

- هسة اصححه ممكن هويتك

- تفضلي

دگته بالحاسبة انطتني الهوية و طلعت

- جنة انتي معجزة ما لازم تبجين وجودج هنا وحده انجاز عظيم ما جنت اظن بيوم راح التقي بهذيج الطفله المشردة بهيج مكان و اعتذر على هذا الظن

- شلون عرفتني استاذ

- شكيت من قريت الاسم بس من شفت عيونج ما شفتج جبيرة  رجعتني لهذيج الطفله البريئة

- عبالي راح تگوللهم علية

- و ليش اهدم انسان بنى نفسه بنفسه و من المستحيل صنع معجزة ، بنتي انتي درس للعزيمة و مشروع دكتورة ناجح

- تسلم استاذ هاي شهاده اعتز بيها

- و اي شي تحتاجي اني ابوج تعالي و ماردج

- ان شاء الله

طلعت امشي و فرحانه احس مدني بقوة و عزيمة  رحت لكلية سينا دگيت عليها

- الو سينا

- ها وينج

- بحدايقكم 

- جايتج لا تتحركين

اجتي علية تهتف هلة بريم الفلا
- وج مشتاقتلج

- اني اكثر

- فد يوم مريلي شصار

- انتي مو تدللين ،  فهميني شنو قصته هذا ..؟

- هددني سينا علاقه مقابل افضحج

- زين انتي كلتي رايدج بالحلال يجوز صدك يريدج

- يريد وقت حتى  نفهم بعض طبة و طلعة سينو 

- هذا عباله انتي سهله لان بنت فقر  و تركضين ورا اول دينار مقابل نفسج

- اعوذ بالله منه

- و الحل شراح تسوين

- و لا شي شنو بيدي قابل هو استاذ ساندته العمادة

-  خلي يولي ابد لا تضعفين گدامه

- عوفج منه مو بحاله لو تدرين شصار يمكن ما تصدگين

- شصار

- بروف عوني من جنت صغيرة من جنا نجدي امي جانت تگعد اباب الجامعة و بوقتها التقيت بي

- اي

- بوقتها عقدت اتفاق وياه انو من اكبر اجي يدرسني هنا

- الله عليج

جنة : والله حتى اني ماداصدك

- ماكو شي مستحيل احنا حققنا الاكبر

- الحمدلله

رجعت للبيت ساعدت امي و رحت اقرا بالغرفة قربت الامتحانات

ام اوس - ام جنة، نجيبة وينجن

سرّي - عيووني

- گلبي اليوم يوصل اوس ماريدج تقصرين بالطبخ سوي كلشي من كل نوع

- تدللين يوصل بالسلامة يارب

- آمين

يدخل اوس يصيح - يمة ،  يمة
تنزل امه ترحب بي تحضنه و تبوسه يگعدون بالصالون يسولفون و يضحكون

- يمو شنو هالريحة الطيبة شطابخين ترا ميت جوع

- هسة ثواني و تاكل عمري

سري - الاكل جاهز تفضلوا

اوس - طباخه جديدة

- اي يمة هاي ام جنه راح يصيرلها سنة يمنا

- ام جنة مبين ايدج ذهب و نفسج طيبة

- الله يحفظك بالعافية

بعد الغدا رحت للمطبخ اساعدها

- اليوم المواعين هواي

- اي يمة مو ابنهم رجع من السفر

- اها

دخل يهتف - ام جنه نفسي بشربت من ايدج

- تدلل يمة

- ادري نص الخدم متغيرين ،  انتي هم جديدة
حجى ما رديت التهيت بالمواعين ما عبالي وياية فكري يم الي صار اليوم

- مو احاجيج

درت عليه - العفو معبالي وياية ،  شگلت

- اللهم صل على نبينا حتى  اني نسيت شگلت

- لا سيد اوس هذه بنتي مو من ضمن الخدم بس هي تحب تساعدني

- ها،  اهلا وسهلا

- اهلا بيك

بقى لازگ بالمطبخ على السريع كملتهن و رحت للغرفة

بنص الليل اوس يفتر بغرفته و يحجي وية نفسه

شنو هاي من بشر ، شلون اوصللها
بثقة - و شنو شلون اوصل هي اصلا خدامة عندي و ملكي