رواية ☆ ذنـــــبٌ بـــلا ذنـــــب ☆ الفصل السابع 7 - بقلم Hend_AlBoor

- ماما ، وينج

يحبسوها الاطفال بدائرة و يهتفون مجدية ،  توصل امها تسمعهم من بعيد تركض تصرخ
- وخرو ، عوفو بنتي وخروو

تشيل جنة و تحضنها تبجي جنة - ماما ،  ماما كتلوني

- محد يكتلج يمة اني هنا

الطريق كله تمشي شايلتها و تبجي بحضنها
- يعيروني ماما لان اجدي وياج

- لا يمة لا تنقهرين يغارون منج لان اشطر منهم

- ما احبهم ماما اكرههم الله يموتهم كلهم

- لا يمة لا ميصير نكره الناس ،  الكره يهدم صاحبه

- كتلوني ماما شلعوا شعري هاي رجاء الحقيرة كتلني

- ميخالف يمة ميخالف علمي گلبج على الحب حتى اذا الناس اذوج،  اني شعلمتج حبيبتي

- ما احجي كلام محلو

- عفية بيج حبيبة روحي يكفي اني احبج اكثر من الكون كله

- اني هم احبج ماما

- ها سولفيلي شكد اخذتي بامتحان الرياضيات

بفرحة - عشرة و صفگولي الطلاب

تبوسها - و هاي بوسة لبنوتي الشطورة

- المعلمة انطتني هدية

- عفية عفية تستاهلين

- ماما باجر نختار قدوة الصف و المعلمة گالت انتي تصيرين لان اشطر وحدة

- فدوة لجناوي منو القدوة اذا مو انتي محد يستاهلها  و مو بس قدوة الصف انتي قدوتي

- اموت عليج ماما

ام سيناء - يا شبيها جنة هدومها متربة هيج شو باوعيلي شبيها عيونج مورمة بجي منو كاتلج
- الطلاب شبعوني كتل
يدخلن للغرفة و ام سينا وراهن تنزلها امها

- وليش يكتلوج

- لان مجدية

- الله يكسر ايديهم ان شاء الله

- لا خالة ما اكرههم ماما كالت ميصير نكره احد
بانفعال - هو محد طيح حظج غير امج
تدير على سري - سري المدرسة بعيده شلون عرفوا الجهال

- خالة رجاء بنت ام طالب گالتلهم و كتلتني

تطلع منفعلة و تصيح - والله لا اكسر راسها و راس امها الحية

سري - ميعاد تعالي ،  عوفيها

- لا ما اعوفها هذاك اليوم هم كاتله سينا و معيرتها و بطلتها

تركض جنة - خالة عوفيهم خطية اني ما زعلانة
- انتي امشي طبي اتغدي وية سينا

- ميعاد لا تسويلنا سالفة بالمنطقة احنا ما ناقصين

ام سيناء تجرها من ايدها و تمشي بانفعال - اليوم ما ارتاح سري اذا ما اهم الدنيا على راس عطية

- ميعاد استهدي بالله هم جهال

تصرخ - جهال و الجهال منين يجيبون هيج كلام رجاء منين جابت كل هالحجي غير من امها الحية

توصل لبيت ام طالب تصيح - عطية طلعي بنت الحسب و النسب طلعيلي

تفتح الباب - خير شكو ليش تصيحين

- لج ليش تعلمين بنتج الزرگة تكتل بناتنا و تخلي كل الطلاب يعيروهن

- والله رجاء ما مجذبة شكو مستحية من شغل تسوي كل يوم

- اجدي بشرف و لا اطبب رياجيل علية و اخذ فلوسهم بالحرام

تصرخ - شتقصدين ميعاد

تأشر باستهزاء على البيت - باعي لا عبالج هذا القصر الي بانيته بنص هالقرية الفگر و متباهية و تتهوبزين بفلوسج ترا ندري منين جايبتهن

- انجبي تخسين انتي و الي يحجي علية

- و شكو زعلتي عيني هاي مو الحقيقية بس العتب على رجلج الرجرجة گاعد مثل النسوان و انتي تشتغلين و تخلين بحضنه الفلوس ،  ولج اني رجلي جان يشتغل بشرف و ما يخلتي اوصل للباب  بس الوكت طايح حظ خلة امثالج تعلج بية

- يا بنت المجادي يا شرفسز

تنزللها من الباب و يتعاركن سري تصيخ - يبو ولجن كافي يا ناس يا عالم يبوو ،  ميعاد

تملخ شعرها و تمددها بالگاع تكتل بيها و سري تجر بيها تصيح - سري وخري عني لا اخليج فوگاها

تسحبها بقوة - كافي موتيها دكافي هايهية اخذتي حقج

تمشي و تهدد بصياح - باعي لج هذا حق بناتي و اسمع انوب رجاء الزرگة تندگ بيهن والله لاملص رگبتها زين

تصرخ - تفوو عليجن بنات المجادي

- كافي شبيج لزمتي المرة ملختيها

بانفعال - هي هم ما قصرت بية سري انتي وياها لو وياي

- وياج وياج يمعودة مابينا حيلها وراها زلم الله يعلم منين يجون و احنا بلا ستر

- النا الله اطمني متگدر تندگ بواحد من داخل القرية لان تنفضح محد يدري بوصاختها بس اني

- هم ماعليج بيها تولي ميعاد

توگف يم الغرفة و تنفعل- شفتي هاي نتيجة عنادج كتلج بطليها بطليها يا بشر

- ما ماتت ميعاد خلي تواجه و تصير قوية و بعدين اني يمها ما اعوفها

- راح تهدميها و عود اذكرج ،  شتتوقعين لحد وين تتحمل ، اعتقي البنية لا ترسميلها حلم اكبر من طاقتها

- مشامرتها بالنار اني داطلعها من هذا الحال ماريدها بالمستقبل تضيع خلي بيدها سلاح

- وج سلاحيش افهمي دنجدي اكثر من هذا كلان الوحل ماكو

- اذا الناس ظلمت الله ميظلم ميعاد و انتي بنفسج گلتي الله ينطيها الله يرزقها

- گلت گلت بس مو تدخليها مدرسة و هيج وضعنا دتعذبيها

- بنتي قوية لا تخافين

يدخلن للغرفة تگوم سينا - ماما

- عيون امج

- اريد ارجع للمدرسة

- اگعدي و اسكتي مابية حبل اطلع وراج

- ما ، ما اريد ارجع

سري - لا تكسرين بخاطرها رجعي البنية مستواها زين بالدراسة

تهمس - اول و تالي تكبر و تجي تبجي من حجي الناس

تصرخ - ما ابجي و رجاء اذا حجت اموتها كتل

سري - لا حبيبتي لا تكتلين احد ،  ترجعين اني اوديحن و اجيبجن

سينا بفرحة تركض يم جنه - جناوي قريني شاخذتو

- ماشي بس اني المعلمة و انتي الطالبة

سري - لا تباوعين علية هيج ،  تكبر و تفيدج ميعاد
- شبيدي عليج ،  بس ديري بالج عليها

- لا توصين حريص هاي اخت جنة

يطلعن بعد ربع ساعه يتفرقن بشوارع المدينة

- يمة جنة لا تروحين بعيد

- ميخالف ماما ،  يلة سينو

- اركضي و الي يسبق هو الفايز

يركضن مثل العصافير و ضحكاتهن عالية تجي ام سينا

- سري افتري على كم بيت الطحين خلص بلكي ينطوج

- ميعاد كولشي و لا اوگف وگفة الذل هاي و اطلب من البيوت ،  ادفنيني و لا هاي

- و الحل سري الحل شنو ،  اني هم مثلج لا عبالج ما عندي كرامة

- زين ما لگيتي شغل اي شي عسما خدامة

- دورت و تعبت خدمهم كله من الخارج مكتفين

- خبز محد يشتري ،  نخبز شكو بيها

- سري الناس بحصار شتدحجين منو يشتري خبز و هذولا كله صمون

باحد الشوراع جنة و سينا يمشن - صار المغرب امشي نرجع

-  اوگفي جنة شوفيني شگد لميتي
- هواي ،  و انتي

- اني هم هواي خلي فلوسج بجيبج لا يضيعن
- اي ،  سدي السحاب لا يوگعن

يهجمن جلاب من بعيد ينبحن و يركضن يصرخن و يركضن
سيناء تصرخ - يمة الحگيني

- اركضي بسرعة سينا راح ياكلنج

ترجعلها تلزمها من ايدها و يركضن
تصرخ ببجي - جنو لا تحلين ايدي فدوة

يطلع رجل من احد البيوت يشمر الجلاب بحجار - هشش ،  هشش

يگعدن بالگاع يتنفسن بعمق - يا يمة ولج جان انكالينا

جنة - شكرا عمو
جسمي كله يرجف سينو من الخوف

تضحك - بس كلش حلو جان انعضينا

- امشي لا يجن مرة لخ

- اخ اخ رجليني

تگومها و يمشن

ثاني يوم بالمدرسة

ست لمياء توزع قصاصات الورق لانتخاب القدوة
- نكتب اسماء على السبورة و الي تريدو قدوة اكتبو اسمه بالورقة ،  بس اسم واحد لا اسمين مفهوم

- نعم ست

تروح للسبورة و ترسم جدول تكتب اول خانة اسم بنتها - يلة نبدي بـمريم ،  بعد منو شاطر بالصف غير مريومة؟

- جنة شاطرة كلش

- اشش بلا كلام غير جنة

توگف جنة - ست اني شاطرة ، ليش

- اگعدي لج لا تحجين من مكانج ،  ماما رشحوا وحدة نظيفة

- ست سهام بهمس - لمياء البنية اشطر وحدة بالصف و مرتبة لا تكسرين بخاطرها

- يمعودة اسكتي مرتبتيش متشوفين هدومها مملخة صارلها سنتين بيهن

- الفقر مو عيب و القدوة ممقتصرة على اولاد المعلمين لمياء ،  جنة اشطر من مريم

- افتهمنا افتهمنا ،  اني المرشدة و اني اقرر و ما اخلي قدوة الا من عائلة زينة و بالحزب

- على گولتح انتي مرشدتهم ماعلية بس لا تعاملين التلاميذ هيج و تكسرين نفسياتهم حرام شوفي الطفلة ماتت بجي
تروح لجنة الي خالة راسها على الرحلة و تبجي بصوت ،  تسحب راسها و تخلى على بطنها و تمسح عليه
- لا تبجين ماما ميخالف

يرشحون القدوة تجمع القصاصات من التلاميذ و تسجل الاصوات بفوز مريم يدگ الجرس يهتفون الاطفال بفرح و يطلعون ، سينا گاعدة يمها تمسح على ظهرها
- لا تبجين تغار منج لان انتي اشطر من مريم

- ليش ما خلوني قدوة سينا ،  امنيتي هاي

- وج ياهو الاحسن شاطرة لو قدوة

تمسح دموعها - شاطرة

- و انتي اشطر من القدوة كل الصف و المعلمات يدرون

- صدك

- ايي ،  يلة گومي نغسل

قبل الحلة بربع ساعه تگعد سري اباب المدرسة تنتظر جنة و سينا خوفا من الاطفال عليهن ،  يحلون يركضن عليها جنة و سينا
جنة تبجي و تصيح - ماما ،  ماما

تحضنها - يمة بنيتي شبيها عيوني شبيج مو وياج
-  ما اختاروني قدوة اختاروا مريم بنت ست لمياء

- ياا ليش

- خالة و هي مريم مو اشطر من جنة ،  اصلا مكروها تضوج من عدنا

- عادي يمة ما عليجن بيها ،  لا تبجين حبيبتي المهم انتي اشطر وحدة  شنسوي بالقدوة

- گدام الصف گالت علية وصخة و الطلاب گامو كلهم ميحجون وياية

تدمع عيونها - ميهم ميهم ماما خلي تحجي انتي انظف وحده و اجملهم كلهم

ببكاء- ما اريد اداوم بعد ،  كلها تكرهني ،  ماما اريد ابطل

- جنة يمة

تصرخ و تبجي - اني مجدية كلهم طلاب بس اني مجدية ، ماما كرهت المدرسة بعد ما اروح اقرا بالبيت