رواية ☆ ذنـــــبٌ بـــلا ذنـــــب ☆ الفصل الثامن 8 - بقلم Hend_AlBoor

تصرخ و تبجي - اني مجدية كلهم طلاب بس اني مجدية ، ماما كرهت المدرسة بعد ما اروح اقرا بالبيت

سينا - اني هم مجدية عادي واذا

سرّي : لاا يمةة جناوي شنو تبطلين محد يكرهج

- ماتحملهم ديكتلوني و يضحكون علية و حتى المعلمات مايحبوني

- ما عليج بيهم يغارون لان شاطره و الشاطر ميعوف المدرسة

- لعد حوليني بغير مدرسة

- ماما ماكو هنا غيرهت و بعدلج سنتين خامس و سادس و تروحين للمدرسه البعيدة

- ماشوفهم بعد

- اي

- حتى ست لمياء متجي وياي

- لا متجي

سينا - خاله و نشتري جنط مثلهم مو ، ماريد اشيل گونية بالمدرسه الجديده

- اي جنط و هدوم جديدة و تشوفن غير طلاب و غير معلمين و راح يحبوجن و يكولون هاااي منووو؟ شنوو هالجمال يتخبلون عليجن

بفرحة - صدك

سرّي : اي صدك بس انتن صيري شاطرات و فوزن ع هذولا و معليجن بحجيهم

- ماما

- عيون ماما

- لو بابا عايش جان ماگدروا هيج يحجون علينا

تحضنها و تسكت دقيقه و ترد بالم - اني بابا و ماما جناوي

نمت على جتفها و لافة ايديني حول رقبتها
- ماما ..!

- عيوني

- الله ليش خلق الفقراء

- حتى يروحون للجنة

- يعني الله ما يكرهنا

- لاا يمةة الله يحب كل البشر

- و يحبني

- معقولة يخلق هيج وجه حلو و ما يحبه اكيد يحبج يمة هوواي يحبج لهذا السبب خلاج فقيرة حتى يشوفج قوية لو ضعيفة

سينا - و اني هم يحبني خالة

- اي يروحي انتي هم يحبج

- ماما اني هم احب الله

سينا- و اني هم احبه هواي

-كلنا نحبه يمة خسران الـي ميحب الله ..

- ماما لا تنقهرين لان هيج سوو بية بالمدرسة بعد ما ابجي راح اصير قوية

- سباعية بنيتي

مرت سنين و صرت بالثانوية وهم واجهت تنمر و عنصرية ماكو فرق و لا وحدة تتقرب مني و من سينا ، الفرق كبرت تمنيت لو باقية طفلة ازعل يوم و انسى
سينا - جنة اكيد اليوم راح يفترون ع الفقيرات

- ليش

- شنو نسيتي مو قبل يومين المديرة فرت علان بازار من الاغنياء للفقراء

بملل - اكثر شي اكرهه

- وج ليش

- ذل سينا ذل تخيلي البس شي راجع لوحدة من صفنا

جان درس عربي دخلت ست صبا ذاعت اسماء من ضمنهن اني و سينا رحنا لادارة المديرة طبينا وگفنا
- اگعدو يبنات

گعدت حذائي بوتين رياضي اشترته امي الي من جنت العام ماعندي غيرة مفتوح من يم اصبع  ضميت الحذاء المشگوگ برجلي الثانية انتبهت ع المديرة شافتني من ضميته نزلت راسي كرهت حالي اتمنيت اطلع و اشرد من الدنيا كلها

- حبيباتي الفقر مو عيب ما لازم نستحي و نخجل من حالنا، احنا منختار حياتنا ، غنانا او فقرنا كله بامر الله
اني راح اطلع و هاي الشغلات اي شي تحتاجنه اخذنه
يگومن البنات يختارن الي ينفعهن

سينا - جنة جربي هذا الحذاء

- ماريد

- شبيج

عفتها و طلعت رحت للصف

وديان باستهزاء - رجعتي؟

استندت على الرحلة الوراي و جتفت ايدي - اي ليش؟

-  شعجب ما اختاريتي شي ،  اتبرعت بحذاء مخصوص الج

سكتت و اني اباوع بوجهها حايرة شأرد - شكرا ما احتاج

-  بنت فگور و ما تلوگلج الكرامة

صابرين تضحك - عوفيها هذاك اليوم جانت تجدي بالشوراع

- لا هسة تطورت گامت تبيع علوجة و مصاص بالشوارع

يضحكن - اتذكر جنطتها بالابتدائية وج گونية طحين مخيطة

- الله عليج؟  شنو جنتي وياها بالمدرسة

- اي

عيوني دمعن لازمتهن لا يبجن طبت سينا للصف واگفة وراهن و تسمع گامن يضحكن
- شدعوة رغد و حلا بنات السيد الريس؟
وديان - هفف استلمي الخ
باستهزاء - ندري ندري يلة اذا خلصتن كلان وحل سون طريق
تدفعهن و تمر - شو شو وخرن
صابرين - لا تدفعين لج و لسانج ضمي بحلگج لا تتجاوزين

- شوفي صبورة بس تطخ براسي امسح بيج الصف زين ،
بثقة - بعد مجدية و كولشي يطلع مني

راحن جان تعبر من فوگ الرحلة و تگعد يمي

- شبيج گاعده مثل الصنم و عايفتهن حلوگهن تشمر زبالة عليج
- و شسوي؟  انكر
- اي مجديات مو حرام يكفي محترمات

- و منو يگلب الاحترام
- لا تخليهن يأثرن عليج ترا خالتي سري عدها امل جبير بيج

بانفعال - و محد هدمني غير امي ، تريد تصنع من الماكو معجزة تخليني بمجتمع نرجسي يهتم للمظاهر بس ،  و احنا حياتنا كلها بالشوراع نركض ورا الناس فدوة اشتروا

- اهدئي البنات انتبهن

تمر ايام الخنگة تذبحني ،  اختنگ من الدنيا و الناس گمت احس روحي لا شيء احبس روحي بالبيت و ماطلع وياهن ابيع

- شبيج يمة صار فترة مو على بعضج ذبلانة

- مابية يمة

- تضمين على امج وجعج لا يمة بيج

بانفعال - يمة شتريدين مني بعد

-  شبيج گليلي ماريد بس سلامتج

بانفعال و بجي - ما بقت سلامة و انتي شامرتني بنص مجتمع زبالة كل همه المظاهر ،  شتتوقعين اصير دكتورة ،  مهندسة لو مدرسة  يمة اني مجدية و راح تبقى الناس تباوعلي على هذا الاساس

- لا تمشين ورا حجي الناس جنة

- شلون ، احنا عايشين وية الناس بنصهم ،  يمة  ماتغير شي مو گتيلي تكبرين و يتغير كلشي الناس ،  الحال ، الكلام الجنت اسمعه بعد ما اسمعه

- جنة

تقاطعها - يمةة تعبانة ليش الفگر هذا ،  ليش هلگد بقى ،  سنين لا يوم و لا يومين اختباريش هذا فهميني ، تعبانة مرات اريد انتحر و اخلص
انفجرت بالبجي حضنتني

- لا يمة اموت وراج جنة لا تفكرين هيج ترا  تذبحيني ، شعندي غيرج بالدنيا

- تعبت حيل كافي من كل هذا فدوة

- اعرف هذا فوگ طاقتج اعرف يمة بس اتحملي

-  ليش مصرة اكمل خليني اگعد بالبيت على الاقل ماسمع الناس شتحجي ،  ليش داكمل و الناس ميهمها غير بس فگري

- يمة الناس ما تفيدج لا هسه و لا بعدين من توگعين

-  ما اوگع اكثر من هالوگعة

- لا يمة بعدج ،  بعدج واگفة و بيدج سلاح من تخسرين سلاحج الناس تزيد بذلج

سكنت بحضنها و هي تمسح براسي و ظهري

- اريد بنتي قوية ما يهمها كلام الناس ، عادي ننجرح من الناس بس لا بيدج تعمقين الجرح حياتج  بيدج يمةة مو بيدهم هم بس كلام ما يقدمون و لا ايأخرون

- و لشوكت يمة

- لابد يجي يوم ينصفج و ينطيج حقج بالدنيا

سكتت و يدور براسي ابوية الي ماشفته و لا امي تحجي بي

- شلونه ؟

- منو؟

- ابوية ،  طبعه قوي لو ضعيف فقير لو زنگين

سكتت حسيت بنبضها تسارع - ما سمعتج يوم تحجين بي ابد

- مات ،  و ما احب احجي بالاموات مراح يتغير الحال

ثاني يوم رجعنا من المدرسة دنمشي بالفرع ام طالب واگفة بالباب

- شرفنا الدكتورات

سينا - خيرج ام طالب خير ما ناقصيج ترة

- اي عيني حقجن شتصيرن دراسة و رمض بالشوارع الله يساعدجن

بسخرية - على الاقل احسن من رجاء بنت ناس و هالله هالله و فشلت دراسيا

- والله علم الي دياخذنه بنات تايهات ما يشرف رجوو تحصله

- هااا گتيلي هممم  ، جابر بن حيان بنتج مصقولة علم من ربها الزركة

-  لج ام لسانين لا تحجين ع بنتي مو على اساس انتن حلوات و الفايده شنو ، مجديات

- والله لو ناخذ طريق الي انتي ماخذته نبني قصور مو بس واحد من هذا بيتج

جنة - امشي سينا هم الج خلگ تتعاركين

تصرخ - يالضايعات الصايعات امهات الشوارع ع الاقل اعرف ابو رجاء منو مو مثل سرّي منعرف اصلها فصلها و جتي حامل بدون رجال

التفتت عليها

شتقصدين لا تجيبين طاري امي ع لسانج زين

- اقصد بنت حرام و ما الج اب

سينا بانفعال - كافي لا ياهي المات رجلها و جابت وراه طفل تهمتوها شهالتفكير الوصخ  انتو شياطين 
امشي جنة لا تسمعيلها هاي من غيرتها و حرگت گلبها

- الطريق كله يدور كلامها براسي جديد اول مرة اسمعه ،  تايهه بنت تايهه صايعة كذا كذا تشبعت بهيج كلام بس بنت حرام مستحيل

ليش امي ابد متحجي بابوية مثل خالتي ميعاد اربع و عشرين ساعه تحجي بزوجها و تندب حظها لان مات

رجعت للبيت رحت على فراشها اريد اشوف جنسيتها لازم مكتوب اسم ابوية بيها ، اخذت الجناسي من جوا المخدة مكتوب باكر و ابوية اعزب 
رحت على فراش خالتي طلعت جناسيهم كلشي مسجل بيها

سينا - شبيج شدتسوين

- و لا شي بس داشوفهن

انتظرت للليل افكاري و كلام عطية ياكلن براسي اجتي و خالتي
ام سينا - اني اروح لبيت سميرة شغلة ساعة و اجي
سري - ماشي عيوني

- گومي سينا بعدج گاعدة

- يو يا امي والله مابية اضوج منهم

- گومي بلا كلام

بالموت لازمة نفسي انتظرتهن يطلعن امي ملتهية تشعل الصوبة

- يمة

- عيوني

- ابوية منو؟

- جنة شنو هالكلام ابوج شاكر

بانفعال - يمة ليش تجذبين علية ليش داكولج شفت جنسيتج ما متزوجة وين اسم ابوية بجنسيتج وين اسمج بجنسيته
ابوية منو يمة  اني بنت منو يمة صح اني بنت حرام مثل ما ديگولون اهل القرية

تصرخ - جنة

استمريت بالحجي منفعلة و ابجي - جتي امها حامل بيها مدري من منو حامل

لا تجذبين  ماعرفتج من قبل هيج يمةة انتي ابد ماتجذبين ما ميت لا ما ميت يمة

بقت واگفة گبالي ساكته گامت تبجي و اني منهارة نسيت نفسي خليت الجناسي بيدها مسحت دموعها و حجت بهدوء
- اگعدي يمة
گعدت جان تگعد گبالي - احجي يمة الله يخليج ريحي بالي

- اي ابوج ما ميت و شاكر مو ابوج

وگفن دموعي - شنو يعني

- اسمعيني يمة و افهميني اني بنت ناس و عز جان عندي حلم و طموح  ، بلحظة كلشي انهدم ، هدمها انسان فاسد ، يمة انتي ذنب بريء مو الي ابالج و لا الي تحجي الناس

حجتلي الصار كله بالتفاصيل تحجي و تبجي اول اشوفها تبجي هيج  مسحت دموعها و كملت

- ما تعرفين شنو بين لحظة و لحظة حياتج كلها تنگلب تعيشين متشردة و ابطنج طفل انتي متردي تكرهي بگد كرهج للحياة الي دتعيشيها
بس صرتي  اجمل شي بحياتج حبيتج اكثر من روحج ،  يمة ذلتني الحياة و ظلمتج وياية اسفة لان جبتج لهيج دنيا و اني اعرف الحال الي راح اعيشه
حاولت شكد انزلج و انتي ابطني بس الله مراد ردت انقذج من هالذل العايشته امج

اني و گاعدة رجعت ليورا عنها و ابجي
- خلي الله يغضب علية خلي يزعل علية زين خلي يلعني بسماواته