رواية ☆ ذنـــــبٌ بـــلا ذنـــــب ☆ الفصل السادس 6 - بقلم Hend_AlBoor

- ابعديها عني
- شبيج هستوج جنتي طايرة بيها
- تعبانة ام سينا حيل تعبانة
- فضفضيلي سري حتى  ترتاحين ليش احسج ضامة علية هواي
- ما ارتاح لو احجي للعالم كله
- ليش شصار وياج
تصمت و هي بين تحجي الالم الي بيها او لا تباوع لطفلتها ثم تكمل - فجاء تلگين روحج بدون بيت و لا سند و لا لگمة تشبعج
تمسح على ظهرها - الله موجود سري لا تخلين القهر ياخذ من عمرج ارتاحي و رضعي الطفلة
تخليها بحضنها تصفن عليها و تبجي - مبين عيونها كبار
- اي دباعي قبغ عينها ماشاء الله شكبره على عيونج
تضحك و تمسح دموعها - اي
- هيج و تطلع عيونها سود مثل لون عيونج و بهذا الشگار فاگولج سري ضميها بقوطية
- اضمها بگلبي
- اي هيج فكي و اضحكي الله رزقج الجنة بيها
ترفعها و ترضعها - الحمدلله
- شراح تسميها
- جنة
- الله ،  يلوگلها
- من جنت صغيرة جنت اتمنى اسمي جنة
- فدوة لگلبج
تتألم - بطني دتوجعني
- عادي من الولادة ايام و تروح مو شوية قطعة منج انفصلت و صارت بحظنج
تنام الطفلة و الام بصفها نايمة ،  تطلع ام سيناء تتسوگ و ترجع تبدي تسوي شوربة ماش ،  تحبي سينا ليمها تشيلها امها
- ها ،  ها يگليبي جيتي تشوفين الدادا باعي باعي شكد حلوة
تفز سري تلزم بطنها
- همزين گعدتي سويتلج شورية و ماردت اصحيج لان تعبانة
- الالم مديخليني انام براحة
- هاج هاج اكلي حارة هسة ترتاحين
- تسلمين
- سري راح اروح اليوم ما اتاخر اجي من وقت
- ما اعرف شلون اجازيج
- لا تحجين هيج انتي اختي قابل خلصت الدنيا
- الله يفتلحج ابواب رزقه على نيتج الطيبة
- آمين عيوني ،  تحتاجين شي
- سلامتج گلبي
تلبس عبايتها و تروح ،  تباوع على جنة نايمة و سينا تلعب يمها ، تگوم تقفل الباب و ترجع تمدد تغفى ساعات تصحى على بجي جنة
- ها ها ماما شبيج جوعانة
تشوف سينا نايمة - اشش لا تفززين الطفلة هسة نشرب حليبه و نشبع
تفتح سحابة ثوبها و تنتبه على جنة فتحت عيونها تتحول ملامحها لغضب و هي تشوف عيونها الزرگ ترجف ايديها تهمس - نفسهن، عيونه
تنفعل و تبجي - ليش ماما ليش هيج ، راح تذكريني بي طول عمري
الله لا يوفقك شسويت بية الله ياخذ حقي منك
تنهار بالبجي تبجي الطفلة تحضنها - ماعليج يمة انتي مالج ذنب لا تبجين اني امج و ابوج جنة اني وياج ضحية

تسكن الطفله تندگ الباب ام سيناء - سري هاي اني
تگوم تفتح الباب - الله يساعدج
- و يساعدج عيوني ،  شلون صرتي
- الحمدلله على كل حال
- اوووي فتحت عيونها صدقة لمحمد هاي شنو سري اخذت گلبي
- فدوة لگلبج
- شنو هالعيون فهميني عليمن
- على ام ابوها
- اي هيج الوراثة التوب اللهم صل على محمد
- عليه الصلاة و السلام
- من تشوفين نفسج بيج حيل نروح للمستشفى
- ليش
- شنو ليش ؟ غير نطلعلها بين و نسويلها جنسية
- والله مو على بالي
- حقج هستوج گايمة من ولادة
- جيبي وياج جنسية ابوها
- يا جنسية؟
- شاكر سعيد شبيج نسيتي رجلج
بارتباك - ها ،  لا بس تعبانة

مرت الايام و رجعت قوتها سجلت جنة باسم شاكر لان مابيدها حل ثاني ،  ملت حياتها الطفلة نستها الهم
- ام سيناء
- عيوني
- تسلم عيونج ،  اگول هايهية گعدتي صارت عندي طفلة و العبئ عليج كبر
- شنو هالحجي يا سري
تقاطعها - هذا الحق لازم اعينج بشي و اشيل نفسي و بنتي
- و شتسوين ،  شنو ابالج؟
- اطلع وياج
- لا ام جنة لان اولا انتي متعرفين شي عن المدينة و ثانيا البنات منو يبقى يمهن
- ناخذهن ويانة و اذا علية مصيري اندل و الي يسأل ما يتيه
- ام جنه
- خلاص اني اخذت قراري وحدج يادوب تطلعين حليب بنتج و الاكل دتجي ايام مناكل

تسكت و تباوع عليها - ماشي على راحتج
- شبيج اول و تالي نلگي شغل خما نبقى نگدي كل حياتنا
- قلبج گلت هيج لحد ما تعودت ،  مليت لما دورت
- سبحانه ميقفلها هيج
- و نعم بالله

ثاني يوم باحد شوارع المدينة سري ملثمة وجهها و گاعده و بحضنها بنتها گدامها طاسة
تبجي   تحجي بهمس - يمة اني بنت العز گمت اگدي الدينار حتى  اعيش 

تمر السنين على گعدتها و تگبر جنة تدخلها مدرسة حتى  تكمل حلم امها الي اندفن
جنة - ماما المعلمة اليوم گالت باجر خلي يجون ابائكم
- اي يمة اجي تدللين
- لعد وين بابا كلهم راح يجون ابوهم
تلزمها من وجهها برفق - بابا صعد للسما تحول ملاك
- ليش عافنا
- مو بيده يمة مو بيده و بعدين اني بابا و اني ماما احنا مو هيج متفقين
- اي
تطلع تلعب وية سينا
ام سيناء - والله مالها داعي تبقيها سري عرفت تكتب و تقرا خلاص
- لا هذا مو كافي ام سيناء
- بنتج كبرت صارت بالرابع و بدت توعى و تقارن حالها لحال باقي الطلاب
- اول و تالي تقارن على الاقل بيدها شهادة سلاح تحارب بي و تثبت وجودها بالمجتمع
الفقر مو عيب بس الجهل اكبر عيب
- كسبي راحتج و راحة بنتج و بطليها شلون ما بطلت سينا
- ماما صار العصر شوكت نروح
- كملي واجباتج اني اليوم اروح وحدي
- كملتهن كلهن مو قريتيني انتي
- بس ماما عندج امتحان رياضيات
- مو امتحنتيني و گلتي عشرة من عشرة
- حتى لو اگعدي راجعي
- والله ماما من نرجع المغرب اقرا مرة لخ
ام سينا - سري خليها تجي شايلة عناد امها
تضحك - فدوة لعمرها
يطلعن كلهن يتفرقن باحد الشوراع يوم يم جامعة و يوم يم مشفى و يوم يم مسجد
تركض جنة على امها شايلة فلوس
- ماما هاج باعي شگد
- يمة اگعدي لا تفترين تعبتي
- لا ما اتعب المهم انتي مرتاحة
تحجي سري بهمس و تبجي - لو بيدي البسج و انومج على حرير بس كل الي بيدي دانطي الج يمة  ،  سامحيني
- ها
- هيج يمة هيج
احدهم - گومي دگومي منا تخلفن و تشمرن بالشوارع الجهال عدجن تجارة متخافن الله الله اعلم من كم واحد جبتيها
تصرخ - عوف ماما لا تصيح عليها انت خاف الله 
- انتي متخافين الله بنية بهيج وجه تخليها تگدي وياج ،  جهنم ما نملت منجن بنات الحرام
تخلي شيلتها على عيونها و تمسح دموعها ترفع اصبعها فوگ - الله العالم بحالنا الحمدلله مو انت على العرش
- اي الحمدلله انت مو الله
يفر ايده و يروح ،  تمسح عيون امها و تبوس بيها - لا تبجين معليج بي الله يباوع علينا
- و نعم بالله يمة
تحضنها - هاي دموع فرح يمة فرحانة بيج عوضي بالدنيا

توگف و تأشر على طلاب الجامعة دوام المسائي - ماما شوفيهم شكد حلوين
- مو بحلاتج گليبي
- اتمنى اصير مثلهم
- ان شاء الله تكبرين و تصيرين احسن منهم
تروح على استاذ جامعي
- عمو عمة فدوة انطيني من مال الله بابا ميت و ماعدنا بيت
يگعد لطولها - اليوم نورتي المكان
- اني
- اي كل اسبوع اشوفج تشبهين الملاك
بفرحة - تعرفني
- هو الي يشوف هيج عيون بربئة ينساج بنيتي
- شكرا عمو مثل روحك
يضحك و يگرص خدها- و لسان حلو بعد ،  شسمج عمو؟
- جنة شاكر
- اسم على مسمى زين بيا صف جنة الحلوة
- رابع
- عاد شطورة لو لا
- اي كولش شاطرة حتى  اشطر من بنت المعلمة
يضحك - عفية عفية
- انت همين معلم
- اي معلم
- لعد ليش متجي لمدرستنا
- لا اني ما اجي بس شنو رأيج نتفق على شي ؟
- شنو
يأشر على الجامعة - تكبرين و تجين هنا و اعلمج
تلتفت على امها البعيدة تگمز و تصفگ - اي اي
تمد اصبع ايدها الصغير - يلة عمو نتفق
يبتسم و يمد اصبعه يشبكه باصبعها الرقيق - انتظرج جنة
اصدق عهود هي عهود الصغار مليئة بالبراءة و الاصرار
تستمر باللحاق بالناس و ينطوها من مال الله تصيحها امها - جنة يمة يلة صار الليل
تركض على امها فرحانة تلزم ايدها و تمشي
تدخل للغرفة تگعد جنة تقرا بين ما هي تسوي العشا
- تحتاجين شي يمة
- لا ماما سهل
- ادري بفراشتي شطورة
- ماما من اكبر اروح للمدرسة الجبيرة
- نقرا و ننجح و نروح
- اي سوينا اتفاق اني و المعلم
- صدگ ،  شلون
- گال من تكبرين تعالي اعلمج
- ان شاء الله

ثاني يوم بوقت حلة المدرسة الاطفال بكل مكان ينشدون حلة المدارس الله يعين الحارس و يصفگون و البعض يتعاركون ،  و البعض يصيح و يصفگ - مجدية ،  مجدية
تركض جنة و تبجي تركض وراها رجاء تجرها من شعرها  تعيط جنة - عوفيني
- تعاالي يالوصخة المكروهة
- المكروها انتي حلي شعري
تحلها و تهتف - بنت المجادي ،  مجدية مجدية
توگف جنة بشعر منكوش تنهار بالبجي و تصرخ - ماما ،  وينج