رواية ☆ ذنـــــبٌ بـــلا ذنـــــب ☆ الفصل التاسع 9 - بقلم Hend_AlBoor

- خلي الله يغضب علية .. خلي يزعل علية
خلي يلعني بسماواته

شكد ذلوني الناس من وعيت لليوم بس ماحسيت بوجع بگد وجعي على امي هسة ،  سجدتلها و ابجي بصوت طفرت علية تجر بية و تبجي و تحجي
- لا يمة گومي جنة گليبي لا

بستها من رجلها و هي تتمنع سحبتني و حضنتني ، نبجي حضنها دنيا

- شلون تتوقعين اعوفج ،  شلون تضمين علية و تتحملين وجع السر وحدج ماعوفج يمة فوگ الصار بيج بسببي و بسبب ابوية و تتوقعين اعوفج ، فوگ ظلم الدنيا تتوقعين اظلمج
انتي دنيتي يمة و ابوية و امي افتخر بيج و اذا تگعدين بالشارع تجدين والله افتخر بيج

سكنت و سحبت راسي من حضنها تمسح دموعي
- لا تبجين ،  كل حرف منج عالج كل جرح بية ،  كافي هاي العيون الحلوة حرام تبجي

- كرهتهن كرهتهن لان نفس عيونه

- لا يمة عيونه مليانات شر ، عيونج كل براءة الكائنات بيهن

گمت ابجي - جنت اتخيل ابوية و احلم بي طلعت بنت امريكي 

- لا انتي بنتي اني و بس جنة

گامت تمسح بدموعي - الله يخليج الي

-  ترا الي حجيته الج محد يدري بي بس اني وياج

- و خالتي ميعاد و سنو

- و لا هن الكل يعرف ابوج ميت ماعليج بالتهايم يمة محد سلم من كلام الناس

- اعرف ماما هم حتى على خالتي ميعاد هيج يحجون

نمت بالليل بحضنها براحة هم و نزاح عني و عن امي

سرّي : بهاي الليلة حسيت هم نزاح مني .. نامت جنة بحظني

ثاني يوم جان جمعة گعدت بنشاط و عزيمة ،  بعد ما اهتم و صرت اقوى شراح اشوف ظلم مو اكثر من العاشته امي كلشي مريت بي من الم حسيته ضاع گبال صبر امي

- گومي سينا

- بس ربع ساعه والله مشبعانة نوم

- لا دقيقة و لا ربع ساعه يلة كسلانة

ام سينا - گومي سينا كافي نوم و كسل

الشمس وصلت لهنا

- وينها وينها گاعدات قبل الديج

امي سوت طاوة طماطة اكلنا و طلعنا اني و سينا نلف وجههنا و راسنا بربطة  الطريق كله تحجي امي
-  الف مرة كلت لو تبقن بالبيت احسن ماكو داعي لجيتجن هاي

- يمة ماكدر اعوفج

ام سينا - ديربالجن على نفسجن و لا تتفرقن زين

- يمة حفظنا الاسطوانة مو كل يوم

عفناهن و مشينا  اني و سينا

- علگي الكارتونة برگبتج

- لا وج اطلع اشبه الزمال

- ديله تروحين فدوة للزمال علگيها لا تضيع

-  ثول ، تدرين سقط النظام يلة تطورنا و كمنا نبيع

- و مكيفة عبى هدمان الوطن

- لا هدمان و لا شي الله وكيلج قبل السقوط احنا مجادي و بعد السقوط احنا مجادي

- اي  والله الحال هو هو

نفتر بين السيارات - عمو كلينكس

- لا عمو ماريد

گمت افتر نص السيارات مابيها احد وگفت

- ها اغاتي

صار وراية ولد التفتت عليه
- تشتري

- دخيل الله شنو هالعيون اي اشتري

داخذ الفلوس جان يلزم ايدي صحت بي
- حل

بهمس - وداعتج انطيج ازيد بليلة

- شتقصد

- لا تبيع ثگل و شرف حبيبي نعرفجن بالنهار شغل و بالليل شغل

سحبت ايدي و دفعته
- طيح الله حظك

حصرني وية السيارة سحب الربطة من وجهي

- ناقصني وحده مثلج تستشرف هذا جمالج جايبلج خوش رزق

صحت بي - اشرف منك زين و محد مسني بحياتي كلها

- خلي يولن و تجين وياي تجين

- وخر نگس  ، يمة ،  يمة
اباوع على سينا من بعيد جتي تركض و نعالها بيدها و صلت يمة گامت تضرب بي بالنعال و تصيح

-  لك عوفها ،  عوفها

نسحب مني هلگد ما نعالها قوي گام يفرك براسه سحبتني من ايدي و ركضنا و هي تحجي فرحانه
- شفتيني  شفتيني شلوني

- اركضي بعدين نحتفل بيج

- اليوم عليج بطل ببسي و كيكة
گعدنا بمكان معزول نرجف و نضحك
- خرب عقلج شلون ذخت براسج هيج

- تخبلت من شفته لازمج ماعندي سلاح غير نعالي

- عاشت ايدج

- جنة الظاهر العالم هي هي تكتفي بس المظهر حتى  تحكم علينا ،  هيج عالم يتوصخ النعال بيهم

- نطلع من هذا الوضع صدگيني

- شبعنا ضيم جنة وصلت لمرحلة خلاص هذه قسمتنا بالدنيا و راح نبقى للموت هيج

جنة : سكتنا و كمنا نبجي ع حالنا معقولة كلامها صح ، منو الظلمنا هيج و ليش الفقير متدومله الضحكة ،  تمسح بدموعها و تضحك

- جنة مو تنسين نفسج بالمدرسه و تبيعين كلينكس

-شيفرق راح نخسر المكانة الرفيعة بين القوم

تضحك - يلة الشغل مو عيب

- سينا بعد منجي هنا صار خطر

- وجهج لم علينا المصايب

-  شسوي مو ضامته

- صخمي وجهج و تلثمي حتى  الي يشيلة ينخرع و يشرد

- خوش فكرة بس هم نغير المكان

- عادي اني هم مليت منه

- ديلة عيني گومي ،  ملت عالاساس جاية سياحة و سفر

تضحك - امشي ندور على الزعماء

مرت الايام سويت مثل ماگالت سينا صخمت وجهي ، شكلي هواي جاب مشاكل جان نعمة من جنت طفلة الناس تتعجب و تنطيني فلوس علمود وجهي مو لان فقيرة

سرّي - ميعاد

- عيوني

-  البنات كبرن احس ديواجهن شغلات محلوة  اخاف عليهن و اكو ناس تطمع بيهن

- ما عليهن شي سباعيات

- لا گلبي ممرتاح من جنة صخمت وجهها مديحجن ميعاد گلبي خايف

- اصبري مبقى شي

- شلون يعني ،  ميعاد لگيتي شغل

- اي رحت افتر يم بيوت الزناگين كلت اكيد يحتاجون خدم لان خدمهم ورا الحرب فلتو

بحماس و فرحة -  اي و شصار

- بعد من اضبط الوضع و تتم على خير نبلغ البنات

طلعت الم حطب من داخل القرية داجمع شكو غصن يابس شكو كراتين فاتت رجاء جان توگف

- هاي منو المجدية  اوو نسيت اقصد سالي

تجاهلتها و مشيت ضلت وراية و تحجي

- من صغيره تدورين بالزبايل كبرتي و بعدج على الزبايل

التفتت عليها - ترا مو ناقصتج زين

- شفادج جمالج لان بنت حرام تستاهلين الفگر و الله مراح يوفقج لان ذنب وصخ

باستهزاء - شكرا على اعادة اسطوانتج القديمة حافظتها رجاء خانم

- لان كلامي صح لو غلط جان طميتي نفسج ولو اني بمكانج ادفن روحي

-  غلطانه الزباله ما تطلع منها غير ريحة زباله مثلها و الناس الطيبه تحجي حجي طيب

بانفعال - ايا بنت التايهة امهات الزلم على الاقل العالم من تمشي علية ما تشرد لان امي كذا

باستغراب - مافهمت هاي الاسطوانة جديدة

- حبيبتي يتقدمولج شكد ناس حتى من المدينة بس يا خطية من يسمعون تاريخ امج المشرف و اصلج الضايع يشردون

- هاا قهرتيني والله راح ارجع ابجي عليهم ،  بلة اني اصلي ضايع و ماعرف ابوية انتي شبيج خو ابدال ميشردون ياخذوج بنت النسب

سكتت عفتها و مشيت گامت تصيح

- لا يا ادبسز يا عايقة بنت الشوارع 

جنة : تعودت على سم الناس و القال و القيل و على ازدواجية شخصيتي اشيل شعري ذيل حصان و اروح للمدرسه الاعدادية الي يشوف شكلي ميتوقع ابيع بالشوارع و جنت مجدية
الحياة فرضت علية الحجاب صارلي ستر من الناس و سافرة صارلي ستر من الناس و بكل الاحوال الستر ستر الروح

بمدرستي الاعدادية ابد ما واجهت مشاكل لان ابعد مدرسة عن القرية انقلنا بيها اني و سينا محد يعرف وضعنا

لو يمكن ما واجهت مشاكل لان اختلط الاخضر باليابس ورا الحرب ضاع الجاه  ضاعت طبقات اهل قبل لو يمكن كبرت و صرت اقوى