رواية ☆ ذنـــــبٌ بـــلا ذنـــــب ☆ الفصل الثاني عشر 12 - بقلم Hend_AlBoor

- شنو هاي ربي ، جن وجهها لونين

شمرت ربطتها و رجعت امشي و فكري مخربط قاري هواي على الجن يتخذون هيئات بشر

ختلت بمكان اراقبه راح رجعت ركض اخذ الربطة لفلفت وجهي

خلف احد البيوت المتروكة فهد لزم سينا ترجع على الحايط يخلي ايدينه يقيد حركتها تصيح - عوفني ، داگول عوف

يصرخ - شبيج تركضين

- انت شبيك تركض وراية

- ادري مادام ممسوية شي ليش ركضتي هديتي حيلي

بانفعال - احد گالك اركض ، وخر عني ، دوخر لتتنفس بوجهي

يصرخ - نهد حيلي و داتنفس هيج انتي

- وخرر عاد شبيك انت

يصفن بعيونها يسكت يسحب الربطة من راسها يبتسم - بلة هذا وجه بنت شوارع؟

- الزم لسانك زين شتقصد

- شايلة جمال الفقر كله

بارتباك - شتريد مني ابتعد

- لا تخافين ابن ناس

يتركها تجر الربطة من ايده بقوة و تلفلف راسها و وجهها بعصبية

- ليش تلفين وجهج مابي شي

- حتى انت و امثالك مايضايقوني

- عجيب لو تريدين بهذا شكلج تملكين قصور

- هو هذا الهامكم الحرام و الغنى اذا جنت فقيرة فبشرف هذا يكفيني

- اسف داسوي مقلب بصاحبي و ركضت وراجن

باستغراب - مقلب ! انتو متخافون الله گطعت رزقي علمود ونستك انت و صاحبك

گلت اسف من الدراسة دافضي خلگي

تدفعه و تمشي

مجد بالسيارة دايخ بالي شافه يرجع فهد يدخل للسيارة
فهد - لزمتها؟

- منو

- البنية

- شباگن منك

- و لا شي

- نعم؟

- ضايج گلت اسوي بيك مقلب

بانفعال - نعلعلا ، لك ركضت ركض نهد حيلي

- انت لزمتها لو لا

- لا اختفت

- مو خوش صياد

- لزمت صاحبتها شلونها ، وجهها طبيعي

باستغراب - اي غير بشر مثلنا قابل لازم جن

رحت للمكان الي نلقتي بي ما لگيت امي شفت سينا جتي من بعيد رحت عليها
- وين صرتي ضل بالي يمج

- تكسرت جنة من غير الخوفة الله لا يوفقه

- خوما انلزمتي

بضوجة - اي ، و انتي

- لا ربج ستر على اخر لحظة نقذني

- الحمدلله جان ما عافج

- انتي خوما اذاج

- لا يمعودة واحد طلي ، وين امهاتنا؟

- مادري اول مرة يتأخرن

- ننتظرهن لابد يجن ، باعي ابدا لا تسولفين الصار هن منا قلقات والله يسجننا

- لا ماحجي

سرّي - يعني اكيد ميعاد يعني هايهية تمت

- ما سمعتي المرية گالت من باجر تبدون ، اصلا ما صدگوا

بفرحة - يالله يا كريم وين جانت هاي من قبل

- تغير الوضع ام جنة الخدم كلهم رجعوا لدولهم

- الحمدلله گلبي راح يطير من الفرحة ما مصدگة ، البنات وينهن

- هذولي گاعدات هناك

تمشي سريع و تصيح بفرح - جنة ، سيناا ولجن افرحن الله فرجها

- يالله شصاير

لزمتني من ايدي عيونها تدمع من الفرحة

- فرجت يمة فرجت

سينا - شصااير وين رحتن يمةة

ام سينا- لكيت شغل بعد منفتر بالشوارع

فرحنا گمنا نگمز اني و سينا - بعد منبيع سينو
- فدواتك ربي و اخيرا
تدور على امها - يمة شغليش شلون لگيتي

- مدبرات منزل ببيوت زناگين حضرن نفسجن باجر ننتقل

طرنا من الفرحة رجعنا مشي امي و خالتي گدامنا سينا لازمة ايدي ، بقيت اباوع على الشوارع اباوع على طفولتي بكل ركن هنا خليت حلم و دمعة نزلن دموعي

سينا - جنة

- بلي

- دتحسين بهذا الشعور ، كانو دتودعين عزيز

- رغم قسوتها بس فراگها يوجع

گمنا نبتسم و نمسح بدموعنا ، الذل و التعب اخذ مساحة جبيرة من حياتنا

لنص الليل ما نمت باوعت على سينا گلتلها بصوت ناصي - مخنوگة

- ليش

- راح نفترگ

لزمت ايدي و گامت تبجي - لا ابد نبقى نلتقي وعديني

- اكيد
معقولة سينا هاي نهاية الطريق

- اي بعد ما نركض ورا الناس و نتوسل و لا نعتذر من ناس اذونا تدرين اتخيل روحي محامية او مهندسة او مدرسة و اعرف ماضيي مجديه مادري استصعب خيالي

- نفس احساسي ، بس الصعب عبرناه سينا
كلما اتذكر الماضي كلما اعتز بنفسي اكثر

گعدنا اول فجرية بغير حال ما عدينا العدة حتى نطلع نبيع عدينا عدتنا حتى نعيش بغير مكان تفاؤل و حياة جديده و مجهولة

ام سينا - سرّي مو تگطعين نلتقي لازم

- انتي اختي ام سينا ابد ما انسى فضلج علية كل هالسنين بدونج ماعرف جان شصار بية و بجنة

- فدوة لعمرج طيبة گلبج و نيتج الصافية لاگتنا كلها تدابير ربج

- الحمدلله

بقيت حاضنة سينا و نبجي

ام سينا - الي يشوفجن يگول بعد متتشاوفن لوما اثنينجن بنفس الصف

ضحكنا بوسناهن و افترقنا رحنا اني و امي صعدنا كية نزلنا بباب البيت الي راح نشتغل بي ، بقيت اباوع على البناء قصر دخلنا من البوابة شارع داخل البيت و حدايق على الطرفين اخذن عقلي
- الله يزيدهم

ام اوس - الوو ، الوو ، ماما الصوت بعيد ، اووس تسمعني

- اسمعج ، اسمعج

- ماما كافي صياعة ارجع لبلدك مثل ولد هالعالم و كمل دراستك

- و شاحصل من الدراسة يمة الوضع مو مةل قبل بعد ماتفيد الشهادة

- تنفعك ارفع بيك راسي گدام الخلق لا تشلع گلبي دعوف السوالف المكسرة و ارجع

- يوو ليش ما تعوفيني اعيش حياتي يمةة

بعصبية - اوووس ارجع ترا والله اگول لابوك و يمنع عليك كل فلس من فلوسه

جنة : طببتنا خدامة بقينا واكفات و المرية تحجي بالموبايل ، قفلت خط بلغتها الخدامة دارت علينا

- اهلا اهلا و اخيرا ، عراقيات مو

سري - اهلا بيج ست ، اي

- هاي بنتج

ببتسامة - اي بنتي اسمها جنة

تضحك - والله عبالي اجانب من شفتها ادري بشنو توحمتي بيها

- الله يخليج ست

- ست شنو لا لا ماقبل گولي ام اوس هاي كافية

- الله يحفظلج اوس و يحرسه

ام اوس : و يحفظج عيوني
و انتي گوليلي خالة

كرصتني من خدي ابتسمت - ان شاء الله

- نجيبة ، يا نجيبة

- عيوني ام اوس

ام اوس : ودي ام جنة و بنتها لغرفتهن خلي يرتاحن و عود دليها بالبيت

- مو تدللين

تمشي ويانة و صافنة بوجهي و اني اوزع ابتسامات وصلتنا للغرفة

- تفضلن هنا ارتاحن هسة

- تسلمين تعبناج

- لا عيني ام جنة تدللين ارتاحي و من تحبين تعالي للمطبخ حتى ادليج بكل ركن

اول مرة اشوف هيج غرفة الارضية مرمر و جربايات و فراش عطر الجو و الاضوية بقيت مندهشة ، طلعت و سدت الباب رحت گعدت ع الجرباية تكمز گمت اضحك ، ركضت على التلفزيون درت بفرح على امي

- يمة تلفزيون

تبتسم - اي يمة ، شغلي

ضغطت دگمة جان يشتغل رجعت ليورا گعدت گباله فرحانة

- الله يديمها يمة

- علينا ماما

باوعت عليها تمسح دموعها گمت يمها - هسة عليمن تبجين ياعمري

- المفروض تعيشين هيج حياة من اول ما توعين على الدنيا ، هاي حياة امج الطبيعية ، ظلمتج و نحرمتي من كلشي بسيط

- لا يمة لا تحجين هيج انتي شنو ذنبج

گمت امسح بدموعها - لا تقهريني راح ابجي

- لا يمة فدوة لعيونج

- ماما

- عيونها

- شو بس يحجن وياج بالشغل

- الاتفاق هيج

- اتفاق

- اي بس اني اشتغل انتي هنا لان بنتي متشتغلين عدهم

- ماما ميصير هيج شلون اعوفج وحدج تشتغلين

- لا يمة انتي تعبتي هواي وياية و بعدين انتبهي لدراستج مبقى شي لاخر السنة

- لا ماكو هيج حجي اتعب من تتعبين انتي

- جنة انتي تعرفين شي و اني اعرف شي ما شغلتج عدهم خوفا عليج ماريد احد يستعبدج

- لعد و انتي مو يستعبدوج

- اني جبيرة مو بگدج محد يستغلني ..

- يمة

- ماشي ماشي ارتاحي هسة ، عليمن طالعة بعنادج هذا

رحت ثاني يوم للمدرسة عبالك مشايفة سينا سنين تحاضنا و بقينا نسولف على القصور بقت تحجيلي على الي يشتغلن بي
- زين يعني مو عائلة جبيرة

- داگولج بس شايب و عجوزته ولدهم كلهم متزوجين ، جنو ارتاحيت الهم كلش طيبين استقبلونا عبالك بناتهم

- الحمدلله على لطفه بينا

مرت الايام راحة و استقرار بعيدا عن ضوضاء الشوارع و الحر بالبرد ، بهاي الغرفة ماعرف الصيف من الشتا اجهزة تطلع هوا بارد و لا توقعت العراق واصل لهيج تطور كل فترة مراجعة البكالوريا امي مخلتني اساعدها حبستني بالغرفة

بمرور الايام قربت فهد من رونق صاروا اصدقاء ضحك و سوالف ، اسوف عيونه تلمع من يحجي وياها

خلصت الامتحانات و علنوا النتائج معدلها اعلى شبع قهر و هو يدعي يطلع نفس كليتها

- شلون مجد شلون اذا مطلعت وياها بنفس الكلية

- ما وگفت الدنيا تجي هنا و تشوفها

- اريد اصارحها قبل القبولات

- شكو بيها توكل على الله
- اليوم انطيني فرصة وياها

- ماشي هسة من تجي اطلعلي عذر و انسحب

نزلت رونق اجتي سلمت و گعدت

رونق - وين ام شريف

- مريضة

- هاا خطية الله يشافيها ، لعد شلون جوعانة

فهد يضحك- عادي انتي سويلج

- لا عيني ماخلي ايدي بمطبخ

- اووو عمي اسفين

مجد - اروح اشوف ام شريف

راح مجد ررنق دتگوم حجى فهد - رونق

- نعم

- اگدر احجي وياج دقايق

- تفضل

بتوتر - بصراحة

- اي

- احبج