رواية ذنوب لاتغفر الفصل الخامس 5 - بقلم Rozaya1122

#البارت الرابع
#ذنوب لاتغفر
#للكاتبه《روزاية》

ماتجرأت ارفع راسي احس كلبي يريد يطفر
من صدري...
كلشي بيه اتخربط ...
عادهه مره ثانيه بس بهمس وانفاسه عاليه...

رفعت راسي اجت عيني بعينه ...
ضل يباوعلي واني كلساع ابعد نظري عنه
كلش ارتبكت ...
اريد اخلص من هذا الموقف بس شلون...

نقذني صوت الباب اندك ابتعد عني بعد ماكان قريب...
اجه موضف يفحص بالحاسبات ...

كال روحي يم البنات وحاولي تتعلمين واذا احتاجيتي شي انطيني خبر...
اني ملتزمه الصمت بس هزيت راسي...

خليته طلع ورحت للغرفه الي اخذني الهه ...
سلمت وكعدت بالمكان المخصص الي..
الوياي شو مدري شلونهن الشابه حبابه
بس العجوز ماعاجبهه الوضع...

ضليت كاعده وساكته اجت يمي الشابه
...كالت اني اسمي سؤدد ...
..كتلهه اهلا وسهلا اني تقوى..
... شيصير منج استاذ ثابت؟؟
... ميصير بس جيرانه..
... شكد عمرج؟؟
... 20
... ابتسمت.. اخذي راحتج حبي واي شي تحتاجي احنه يمج...
... شكرا..

ياربي غير يخلص الوقت شفتهن كامن يحضرن
يريدن يطلعن ...
كالن هاهي خلص الدوام ب2 ونص...

شكد ملعون هالثابت.. اذا ماكو شغل شكو
خلاني هلكد انتظر..
هم شايف نفسه شكول شكول....

طلعن الموضفات واني ضليت صافنه وين اروح لاعمي اجه عليه ولا اندل اروح...
ولاعندي تليفون اخابر...
خلي اروح لهذا ابو خزره واشوف....
رحت لغرفته دكيت الباب وواعدل بشالي...

كال تفضل ...
فتحت الباب ودخلت شفته واكف
ومتحضر يريد يطلع...
... كتله بس خابر عمي خلي
يجيني ماعندي تليفون....

... ولا باوعلي مدري شنو بيده اوراق يلم بيهه
كال اني اوصلج راح اطلع...
... لا لا اني اروح وحدي اندل شكرا!!
... وين تندلين؟ اني كلت لعمج اجيبج وياي...

ضليت ساكته ...
طلع وطلعت ورا كفخني عطره يخبل...
سد الباب وامشي ورا جني وحدي متيهه
بكراج العلاوي...
وين مايروح اروح ورا ...
شكول عليك من خليتني هنا جني قرد نايلون
لاشغله ولامشغله عساهه بختك...

وصلنه للسياره صعدت ورا ...
اول ماحرك السياره... كال اكلتي شي
... لا !!
... شلونه يومج جان؟؟؟
... زين بس ماكو شغل بس كاعده وساكته...
... اي بعدج غير تتعلمين شوي شوي ليش مستعجله؟؟ تلحكين على التعب...
... وهسه شلون راح ارجع العصر للدوره
عمتي ماتقبل اطلع صبح وعصر!!!
... لا من باجر اني اعلمج عوفيهه الدوره
صعبه عليج اطلعين وقتين...

... ضليت ساكته وصافنه هذا شو غريب
منه من الشيطان..
اتذكرت من رزلني بفاتحه ابو ومن خزرني...
لعد هسه شغيره؟؟

بعدني افكر شفته وكف اباب مطعم
للاكلات السريعه...
شوي واجه جايبلي لفه وبيبسي..
استحيت منه اخذتهه وتشكرته...

كلساع ارفع عيني واشوفه يباوعلي ...
حرارتي فولت ...
صار بيتنه شبعده ...
شغلت نفسي واني اباوع من الجامه ..
حتى ما انتبه علي ...
لحدما وصلنه بسرعه نزلت حته بدون ما اكله
شكرا ...
شلتهه ركضه للبيت ...
تلكتني نعيمه تسأل شلون ووين؟؟؟
سولفتلهه كلشي...
كالت الله يكثر من امثالهم...

بدلت وغسلت واكلت اللفه الي جابهه
شكد طيبه لان بيهه لمساته...
احس مشاعري مخربطه...
ما اعرف شريد بالضبط...
اجت غاده وغسق وسولفتلهن كولشي..
كالن خاف مخلي عينه عليج...
كتلهن ما ادري حته استحي اداوم باجر...

خلص اليوم واني فرحانه بوضيفتي الجديده
وما اعرف شنو المضموم بلايام الجايه..

ثاني يوم كعدت من وقت بدلت وبدون مكياج اصلا ماعندي...
ورحت وي عمي...
وصلني للشركه وراح ...
قريت ايات بكلبي ودخلت ...
رحت لمكان عملي لكيت بس سؤدد ..
... كتلهه صباح الخير..
... صباح النور ..
... كعدت بمكاني وما اعرف شسوي...
كالت تعالي نشتغل سوه بهاي الاوراق بين ماتتعلمين...

جريت الكرسي وكعدت يمهه التهينه بالشغل...
بسيط بس انقل معلمومات بالسجلات...
محد يدري بيه شهادتي ثالث لان سؤدد مبينه خريجه ...
والموضفين مبينين دارسين...

مندمجه بالشغل اجت بنيه كالت تقوى يصيحه استاذ ثابت...
شفت هاي العجوز يكلولهه ام سامي باوعتلي بحقد..
كالت سؤدد كومي شوفي ...

رحت واني رجليه تضرب وحده بالثانيه
شكد اخجل منه..
وصلت دكيت الباب اجاني صوته...
دخلت وسلمت ...
لكيته كاعد على ميز مال اجتماعات وكدامه لابتوب...
كال تعالي تقوى اعلمج شوي مدامني فارغ..

ترددت بلاول خفت ...
خاف الموضفين ياخذون غير نظره...
عبالك قره الي يدور براسي...
كال تعالي لاتخافين وهاي الافكار الي ابالج عوفيهه...
بس اعلمج اساسيات وبعدين اكلف سؤدد تعلمج..
حته ماتنحرجين وعبالهم اول مره تشتغلين...
ومحد يشك انتي مو خريجه...

استحيت من كال هيج ...
شكد انسان مثقف ...
كعدن يمه بيناتنه شوي مجال...
وبده يعلمني شغلات اساسيه ...
سهله بسرعه لكفتهه....
وعلى اساس هي فد شي ...
هي كلهه  وافتح واسد
بس لان اول مره اشوفهه ماعدنه بالبيت...

كال يله سويلي انشاء مجلد جديد شلون...
قرب عليه الحاسبه..
ضغطت كلك ايمن طلعتلي قائمه نسيت وين
اروح...
التفت علي كتله نسيت ...
يريد يحرك الماوس ايده لامست ايدي بحركه سريعه...
بسرعه سحبتهه وضميتهه بحضني...
هو ولا اهتم ضل يعلم بيه وانتبهي ولاتنسين...
بس اني تخربطت احوالي...
ياحاسبه يادنيا ...
بالي يعيد بلقطه ايده وكلبي محتفل...

...التفت عليه كال انتي وياي؟؟؟
... اا يي وياك حجيتهه بتعلثم...
... مامبين وياي وين سرحتي؟؟
... احس حرارتي وصلت لراسي اريد اكوم وانهزم ..
لا اريد اختفي ما اعرف شسوي...
واضح عليه الخجل والارتباك...

... شبيج تقوى؟؟؟
... مابيه شي!!
... عيونج ما ادكول هيج ..
... منزله راسي وافرك باصابيعي ...
لحظات وسمعت ضحكته... كال كومي يمعوده راح تموتين...
روحي لغرفتج واخلي سؤدد تعلمج...
هو كال هيج وعبالك اطلقو سراحي...
شلتهه ركضه للغرفه ...
همزين ماكو احد بيهه مدري وين رايحات
احس توازني اختل واشوف الدنيا كلهه قلوب الحب...
معقوله ثابت يحبني ..
اويلي خاف اتخربط ويشيلوني للمستشفى...

شوي واجت سؤدد تعلم بيه احتمال هو وصاهه
كمت اتعلم شوي شوي...

مر اسبوع كامل واني اتجنبه ابد ما اشوفه بس مرات صدفه بالطلعه وعمي يجي ياخذني...

تعودت على الشغل وكمت اتقوى شوي شوي..
كامو ينطوني ملفات ادخل بيناتهم ومرات اشتغل على الطابعه...

مره جان ازدحام بالشركه لان اكو سلف للمتقاعدين...
وهواي ناس تراجع على المعاملات...
قبلهه بيوم اني دخلت البيانات مال 40 متقاعد..
وحفظتهم...

هوسه وملتهين بالشغل اجه موضف
جبير بالعمر اسمه جابر
...كال استاذ ثابت يريد البيانات مال البارحه اسحبيهم ووديهن اله...
... فتحت الحاسبه ورحت على البيانات ماكو!!
طار عقلي دورت الحاسبه شبر شبر وماكو البيانات ...
صحت سؤدد وحجيتلهه...
كالت عزااا بعينج شيخلصج منه كولش
شديد بالعمل... وطرد ساره من ورا هاي الشغلات لان لا ابالي...

سمعته ام سامي وشفتهه طلعت ...
ورا شوي اجت تتمضحك كالت عيني تقوى
استاذ ثابت يريدج..
وحضري جنطتج وياج لان الظاهر اليوم اخر يوم الج..
واحنه تعودنه عليج خطيه يله خيرهه بغيرهه..

ما اعرف شجاوبهه بس باوعت لسؤدد
كالتلهه وشمدري استاذ ثابت...
نكدر نجمع المسودات وندخلهن مره ثانيه
ليش كلتيله؟؟؟

اني شعليه واكله وبعدين شكو ادافعيلهه
اشو من طرد ساره مادافعتيلهه هيج...

سؤدد كامت تحجي ووحده ترفع ووحده تكبس..
كتلهه اسكتي سؤدد اني راح اروح واشوفه

عفتهن وطلعت بس رجليه اطك
وحده بالثانيه صار كومه ماشايفته...
من اخر مره علمني على الحاسبه...
دكيت الباب كال تفضل....
دخلت سلمت جان يمه رجال ومرته
اعتقد على سلفه ...
اشرلي اكعد بين مايكمل...
كعدت على حافه التخم وضامه اديه بحضني
اريد الكاع تنشك وتبلعني ...
شراح يسوي بيه ابو خزره...

كمل الرجال ومرته وطلعو هو كام من مكانه واجاني..
اني مثل الطفل فزيت ووكفت على طولي
كتله والله حفظتهن بس ما ادري شلون راحن واكو مسودات وهسه اني وسؤدد ندخلهن مره ثانيه...
شفت وجهه موعصبي واكو ابتسامه ضامهه...

... كال شبيج خايفه؟؟ لهدرجه اني اخوف؟؟
... كالو عصبي وهسه يطردج وام سامي كالت حضري جنطتج اخر يوم الج هذا!!
... لا لتخافين متوقع هذا الشي منج ...
لان بعدج مبتدئه واكيد تواجهين مشاكل هواي وتتعلمين ...
بس مره ثانيه انتبهي ترى شغلنه مومال لا اباليه
يرادله انتباه ودقه بالعمل ...

هزيتله راسي واحس نفسي هدئت...
... كال شبيج وضعج موتمام؟؟
... مابيه شي!!
... اكيد؟؟؟
... اييي

يله اخذي راحتج وانتبهي مره ثانيه واتجنبي ام سامي خلي علاقتج محدوده بالموضفين...

كتله ماشي...
استأذنت منه وطلعت اخذت نفس قوي...
الحمدلله عدت على خير...
وهاي ام سامي الحيه العجيز الي بكدهه
شبع مي ورد وهي زاهيتلهه الدنيا وتفتن...

رجعت دخلت البيانات مره ثانيه لان نحتفظ بالمسودات ورا فترهه يله نهملهن...
ساعدتني سؤدد الله ينطيهه...
كملت شغل وضليت انتظر عمي يجيني...
ورا شوي اجه ...
وصلت للبيت تعبانه ونعيمه تريد شغل مني...
كلت انام شوي واكعد انظف...
مددت بفراشي وتذكرت الصار
ضليت اعيد يومي بتفاصيله لحدما غفيت...

كعدت العصر نظفت وطلعت الكبه حته اسوي عشا...
اندك الباب رحت فتحتهه طلعت فاطمه صار هواي ماشايفتهه بوستهه...
ودخلت جوا للمطبخ... صحت عمتي نعيمه..
اجت سلمت عليهه وكامن يدكن سوالف واني واكفه اكشر بالبتيته ...

كالت فاطمه ام صالح باجر نروح للنجف ولكربلاء اجرنه سياره عائلتنه جبيره وكلهه تروح ..
وامي خلتلكم مكان انتب وتقوى ...

كالت نعيمه يابعد كلبي ام ثابت الله ينطيهه طولة العمر بس اشوف ابو صالح ونروح...

كالت تقوى موماتروحين ازعل عليج وكولي لابو صالح وي فاطمه ومايكول...

نعيمه طارت من الفرح بيهه دياحه تكيف
كالت اودي البنات يم بيت جدهم ونروح ...

اجه عمي ونعيمه بطريقتهه الخاصه خلته يوافق كلش فرحت ...
رحت سبحت وحضرت ملابسي لان كالو ب6 الصبح يطلعون...

ثاني يوم كعدتني نعيمه ب5 بين ماصلينه وبدلنه اندك الباب ابن علي ...
كال يله راح نروح...
اني لبست عبايه اسلاميه بيهه حزام من ورا وبيهه ذهبي ...
طلعنه والسياره شكبرهه ماشاء الله هم هواي وعماتهم وخالاتهم هم ...

تلكتني فاطمه كالت يله تعالي يمي اكعدي...
وكالت لامهه...  الولد ورانه يجون بسياره ثابت وهناك نلكاهم...

اول مره اطلع سفره ومكان بعيد...
بس اباوع من الجامه واقره بلوحات الاعلانات ..
بعيد الطريق بس متونسه حيل ...

وصلنه للنجف بلاول نزلنه زرنه وصلينه
اني امشي وي فاطمه واباوع على هاي المحافظه ...
كل محافظه بالعراق بيهه ميزه شكد حلوه وبناءهه حديث ...
رجعنه كعدنه بمتنزهه ننتظر الولد يجون...
شوي وكالت فاطمه اجو...
التفتت شفت سياره ثابت نزلو منهه اخوته وهو وراهم...
شكد حلو لابس بنطرون اسود
وقميص مقفل بأزرك..
ضليت اباوعله من بعيد...
كالو انتظرونه هنا نزور ونجيكم...
ضلينه ننتظرهم ساعه تقريبا واجو...
كالو يله نروح لكربلاء حتى نرجع من وقت...
كل وحده صعدت بمكانهه وتحركت السياره...
واني اباوع من الجامه كلساع اشوف سيارتهم تمشي ويانه ...
بعدين طلعونه وضلينه وراهم....

صافنه على الشارع...
... كالت فاطمه تقوى شلونج بالشغل؟؟
... زينه الحمدلله...
... وثابت شلونه وياج؟؟
... سؤالهه احرجني دنكت.. كتلهه زين
... مممم هاي بسلا هيج تخجلين كدام
اخويه  اكول ماضال عقل براسه!!!
.... ابتسمت ودنكت.
.... تقوى حضري نفسج شكم يوم وراح يعترفلج بس بعده متردد..
يكول خاف ماتوالمني لان صغيره
وطبعه صعب حيل ... ولان متعرض للخيانه يخاف يضلمج ويا...

اني من خجلي مانطقت حرف بس مبتسمه ...
من شافتني هيج سكتت..

اريد اطلع من الجامه واصيح ثابت احبك...
كل الكلمات ماتوصف ذره من احساسي ..
معقوله حب طفولتي واباوعله من السطح
وتالي يحبني؟؟

خليت راسي على نهايه الجامه واتخيل
ثابت اذا كال احبج ...
شراح اجاوبه وشلون نعيش علاقه حلوه ونتزوج واصير جنه بيت ابو علي ...

ضليت افكر لحدما وصلنه لكربلاء..
وكفت السياره بالكراج ونزلنه هوسه ونسوان
وحده تجر بالثانيه
وابنهم علي كال راح نعوفج تكملن وترجعن لسياره...
مشيت وي فاطمه واحساس حلو يغمرني ...
طبيت زرت ودعيت واستنشق بالهوه
عبالك بي ريحه الجنه.. فدوه لاسمك يامولاي...
طلعت فاطمه وكالت خلي نفتر شوي ...
وكفنه يم محل مال عطور وساعات ..
اشتريت ساعه وهي اخذت عطر...

ملتهيه اباوع على المحلات وشفتهه تخابر كدامي ...
كتلهه اريد شال خلي اشتري...
اختاريت شال مشجر ...
ما احس غير فاطمه كالت اجه ثابت
باوعتلهه باستغراب ضحكت...

وصل يمنه  كالهه هافاطمه شتريدين ماسمعت من الهوسه...
الحياله كالتله مانندل اني وتقوى وتيهنه
وتقوى كالت خابري ثابت ...
التفت باتجاهي اني دنكت شلون بيج فاطمه وين كلت اني وين حجيت؟؟

كال يله امشن كملتن لوبعد؟؟؟
كالتله اي كملنه ...
مشينه ويا وهي كلساع تدفع بيه حته اصير بصفه ومن الازدحام اطخ بي وابتعد...
وترجع فاطمه تدفعني...
صارت خدودي حمر هسه شيكول الولد
هاي شبيهه لازكه بيه ...
اتقربت على فاطمه كتلهه فدوه
لاادفعيني فشله من ثابت...
كالتله ... هااا؟؟ ما اسمع شدكولين؟؟
وانطتني دفعه شكبره طخيت بكتفه حيل وصدك ازدحام ...
رفعت راسي اباوعله

#يتبع