رواية ذنوب لاتغفر الفصل الرابع 4 - بقلم Rozaya1122

#البارت الثالث
#ذنوب لاتغفر
#للكاتبه《روزاية》

ماعندي حيل اكوم والمغذي بيدي
دموعي تجري ... امي حبيبتي اشتاقيتلهه
ماتت من الفقر والعوز ...
لوعدنه فلوس جان راجعنه بيهه..
جابتهه ضيم بقهر...
ماخلتني محتاجه شي هلكت نفسهه وصحتهه علمودي...
كل هاي السنين ماتزوجت من وراي خافت عليه..
ماودعتهه ولاوصتني ....
شلون راح اكمل حياتي من دونهه وين راح يشيلني عمي ويشمرني...
واني اباوع على ثابت وهو بعد منطيني ظهره...
التفت عليه شافني كاعده...
اجه هو وفاطمه طلعت هاي فاطمه الي تحجي ويا...

فاطمه مسحت على راسي...
كالت كلنه على هذا الطريق مو اجيتي بفاتحه ابوي كل واحد اله يوم بهاي الدنيا ويخلص...

كتلهه بصوت مبحوح ...
انتي عندج اخوان وام ووبيت اني ماعندي احد..
ماعندي اخ يحميني ولا بيت اكعد بي...
وعمي ابو صالح موعبالج يحبني هسه
اشوفين حده للاربعين ويشمرني...

... حبيبه انتي بنيتنه حتلو عمج
موخوش ادامي احنه وين رايحين
اذا ماشالتج الكاع تشيلج عيونه...

ثابت واكف ومرتجي على الباب ويباوعلنه
باوعتله ودرت وجهي...
كتلهه طلعوني غير احضر فاتحه امي..

موزين عليج الدكتور يكول عندج ربو بس تبجين تختنكين وعندج هبوط بالضغط...

لا حبابه خلي اروح للفاتحه علوا اموت
واروح وياهه المن عافتني...
حاولت فاطمه تهديني بس جانت اعصابي تلفانه

طلعنه من الطوارىء وصعدت بسيارته...
كلما ارفع راسي الكا يباوعلي ...
ما اهتميت ابد ولا كلبي يطير من يحس بقربه..
الحزن مخيم عليه...

خلصت القاتحه وفاطمه ابد ماعافتني هي وامهه ...

مرت ايام واني يوميه للصبح ابجي ...
ورا اربعين امي ... انعزلت ومالي خلك حتى اسولف...
بعد ماجنت اضحك على اي شي واكول
هي شبيهه الدنيا وواحد يخلصهه حزن...

عمي ابو صالح ماجنت متوقعته هيج...
جنت اكول هسه يشد وياي ويزوجني..
بس طلع العكس حسسني اكو منو يخاف عليه وبمثابه ابوي...
دائما يكول راح تبقين معززه مكرمه حالج حال بناتي...
وحتى نعيمه زينه وياي اصلا هي مستفاده مني
بس اكرفلهه شغل ...
بنات عمي غاده وغسق حيل حبابات وعبالك اختهن ...
حتى صالح وباقر يوميه يشترون ويجون يتوسلون بيه اكل...

بس كل هذا واكول الحمدلله من عمي زين
وياي.. لو مزوجني لاي واحد جان شسويت..
امي جانت خايفه من هذا الشي...
تخاف من قساوته وخاف اتأذى...

شوي تحسنت وحمدت الله وشكرته..
بس بعدني اشتاق لامي اني بحاجتهه اسولفلهه اشكيلهه وهي تنصحني...
اخاف اكمل حياتي واني ماعندي سند...

فاطمة دائما تجي يمنه ومرات اروح يمهه عصريه
بس ثابت ماموجود كالو مسافر...
صح جنت اراقب بي واحبه بس تأكدت
هاي سوالف مراهقه ...
حسيت نفسي كبرت ولازم الي كياني الخاص واحافظ على كرامتي ...

علاقتنه حيل قوت بيت حجي عقيل وخاصه نعيمه صرنه بيت واحد عبالك....

يوم منهن كالت فاطمه باجر اخوي علي عازم جماعته وتعالي ساعدينه...
رحت يمهم من الصبح واشتغل واسولف وي البنات حيل تعودت عليهن ويحبني...

ملتهين بالمطبخ نشتغل واجه علي وثابت...
علي يحجي وي مرته وفاطمه على التحضيرات..
وثابت اكلني اكل بنظراته
مانزلت عينه ابد وعبالك اليوم شافني..
انحرجت من نظراته ونزلت راسي...
بس هو مستمر يباوع ولا استحه...
بعدين طلعوا واني احس اطرافي ثلجت من نظراته ...

كملنه شغل واني تفكيري سارح بي...
ليش هيج باوعلي...
نظره متروسه حنيه وباوعلي من فوك ليجوه...
بعد ماشفته لحد ما صبو غدا...
اجه اخذ مي وراح بس ماباوعلي...

ورا الغدا كمنه نغسل مواعين وكلهه تسولف وتشاقه...
احس نفسي وحده منهم لان حيل يحبوني وخاصه بنات علي بعمري واكو اصغر مني ...
دمهن حلو وبسيطات حيل...

كملنه المواعين وردت اروح كالن ابقي للعصر..
كتلهم لا عمتي نعيمه متقبل لازم اروح..
فاطمه صاحت ..
ثابت تعال وصل تقوى دنيا الظهر وتخاف!!

هي كالت هيج واني فتحت عيوني
على وسعهن متفاجئه!!!!!!
ابتسمتلي وحركت حاجبهه ...

طلع كدامي ثابت واني مسطوره من
تصرف فاطمه...
طلعت للشارع لكيته واكف برا ينتظرني
مشيت ويا ...
كمت اتقرب بصفه اريد اشوف طولي شكد
اشر على كتفي واقيس...

التفت وصار قريب عليه...
كال ها شكد الفرق ؟؟
فد استحيت حيل دومي ثوله واخلي نفسي بمواقف بايخه...

... كال تقوى شكد عمرج؟
...كتله 20
... ممممم بعد كتكوته
... ابتسمت بخجل... وانت شكد؟؟
... 33
... يااا ... شايب البكدك جهالهم بالمدرسه
... ضحك بصوت عالي..
كال اي اريد اتزوج وحده كتكوته...

... يمه هو كال هيج واني كمت اصعد العالي والناصي ..
ماكو حجاره ماعثرت بيهه ..
وصلت للبيت انظربت بالباب واسمعه يضحك ..
واني هي فتحه باب هي كبل للغرفه ...

خليت ايدي على كلبي ينبض سريع..
شكد سخيف يدور كتاكيت..
منو كاله عدنه مفقس ام علي...
هم شايب وهم يشرط ويريد كتكوت..
ابو خزره هم طلع بي بله  ويحجي ...

ضليت طول اليوم افكر بكلامه ونظراته ...
بس جبير وضخم ولج ياتقوى..
هذا عملاق يمسحج وي الكاع...
بس ايده جزء مني...
كلشي بي اكس اكس اكس لارج...
يله ميخالف حتى نصير مثل حسناء والوحش..

ثاني يوم اجت فاطمه مدري ليش خجلت
من شفتهه...
كالت تقاوي تعالي احجي وياج...
رجليه كامت اطكطك ....
كتلهه شكو؟؟؟

...شبيج يولي مفزوعه؟؟
... لامابيه شي!!
... شوفي تقوى اني بنيه حالي من حالج
ولاتنكرين...
لان اني ملاحظتج من زمان!!

... كتلهه شكو شملاحظه؟؟؟
... انتي معجبه بثابت او تحبي مو؟؟؟
... هي كالت هيج واني حسيت روحي راح
اخرب...
عزا بعيني شحجي فاضحه روحي اني...
... كتلهه لاماكو هيج شي.. بس حجيتهه بتلعثم!!!

كرصتني من خدي ... ولج تقوى انتي عزيزه علينه لاتستحين مني احجيلي اني اساعدكم
اخوي تعب وتعذب ولعنه الحب القديم ملاحقته ...
صح عمرج صغير ومامناسب الج واحنه
اخوتي ابد مايتزوجون اصغار الا مقارب لعمرهم...
بس احتمال يطلع ثابت هم يحبج!!

... لا وين يحبني بس يخزر بيه وحته مايضحك...

... هههه شعندج سوالف ثابت هو هذا طبعه من زغره ... بس اني ملاحظته شكم مره باوعلج...

... واذا باوعلي قابل يحبني؟؟
... انتي بس اسكتي واسمعي كلامي وراح يجي يعترفلج ويخطبج...

من كالت يخطبج ضحكت كل عقلهه هاي تحجي؟؟

غيرت الموضوع واجت غاده بنت عمي وماحجينه بعد...

بس كلامهه ضل يرن بأذاني...
ومعقوله يخطبني؟؟
نامي ياتقوى خلصتي عمرج تحلمين احلام
مايحققهه بس الفانوس السحري..

مر شكم يوم مارحت لبيت حجي عقيل بعد استحي
احسهم كلهم يعرفون اني اباوعله...

بليل اجه عمي ابوصالح كال تقوى تعالي احجي وياج..
... خير شعنده ابو صلوحي...
... كتله هاعمو !!
... بنتي انتي كبرتي وجاي تجي ناس عليج وما اريد اوكف بطريقج ...
... لاعمو الله عليك ما اريد اتزوج!!
... بس يابنتي انتي كبرتي وهاي امور دنيا صار شي عليه وين ترحين؟؟
... عمي حباب بروح ابوي لاتزوجني!!
... هاهي بنيتي ما اجبرج على شي ماتريدي

لعد اليوم فاطمه كايله لعمتج تكدر تقوى تشتغل بشركتهم ...
احسلج من الكعده هم تعتمدين على نفسج وهم تخلصين وقت...

... تفاجات بكلام عمي ...
كتله ششتغل واني مخلصه ثالث بس...
... هسه اني اروح لثابت واشوفه شيكول ..

طلع عمي واني صافنه شنو جاي يصير
اشتغل معقوله واطلع واشوف ...
وفوكاهه بشركتهم ...

... شوي واجه عمي كال باجر اخذج لشركه ونروح..
... كتله شسوي شنو الشغل؟؟
... ثابت يكول احنه محتاجين على الحاسبه بس طبع واستنساخ وتسجيل معلومات...
كتله هي ماتعرف على الحاسبه ومخلصه ثالث بس!!
كال موشكال ندخلهه دوره اسبوع اذا تعلمت نخليهه على الحاسبه واذا متعلمت نشوفلهه غير شغله...

بسرعه ركضت بوست عمي وفرحانه حيل ..
ضليت احضر شلبس ووياي غاده تنسقلي على الرغم ملابسي قليله بس غاده ساعدتني..
بنات عمي غاده وغسق حيل يحبني وقريبات عليه... واحسهم يعرفون بيه معجبه بي....

ثاني يوم كعدت من الصبح سويتلهم ريوك وبدلت ...
لبست بنطرون اسود وعلي شي جوا الركبه زيتوني وشال مشجر ...
باوعت بالمرايه طالعه حلوه ملامحي صغار بس
عيوني كبار وسود ..
بشرتي حنطاويه...
انعجبت بنفسي ...
هلا هلا راح اطك اشتغل كله بالشيكات وبالورق..
اكعد ورا الميز وكدامي الحاسبه..
وافر بالكرسي ....
شنو انتي ياتقوى...
بعدني اتخيل سمعت صوت عمي يصيح يله وينج؟؟؟

لازم يخربهه ابوصلوحي مايكدر..
طلعنه اني وعمي ...
وصلنه لشركتهم موجبيره حيل ولازغيره وسط
بنايه شلون المدرسه تقريبآ...
نزلت واني مرتبكه حيل امشي واتعثر...
دخلنه للاستعلامات سألنه على ثابت...

كالو غرفه رقم 2 بالطابق الثاني...
وصلنه للباب ودكات كلبي سريعه...
عمي دك الباب....
سمعنه صوته كال تفضل!!!
دخل عمي واني ورا سلم علي ...
ثابت كام واستقبل عمي ...
اني ماسلمت ولاحجيت رجليه ترجف ...
كعدنه على التخم ووصالنه على جاي وعصير ...

بلأول حجه وي عمي هيج مواضيع عامه
وابو صالح ومايحب السوالف اندمج بالحجي...
يصفط بهالجاي ويدك سوالف....

واني اباوع لثابت شكد حلو ملامحه حلوه
عيونه سود وبشرته سمره ...
ابد ما ابتسم ونبره صوته تخبل...
اباوع اله بكل لهفه ماخليت شبر بي ماركزت علي..
لابس تشيرت بيجي وشعره حلو...
مبين يشرب جكاير لان يمه باكيت وجداحه...

عمي اخذله فوك النص ساعه هو يسولف عن وضع العراق التعبان..
لحدما اجه واحد على ثابت كاله وقع هاي الاوراق..

يله انتبه عمي هو عليمن جاي...
...كال والله اخذتنه السوالف ...
هاي تقوى بنت اخوي كتلك ماتعرف على الحاسبه...
... سهله احنه ننطي فرصه للموظف ندخله دوره على عمله مده اسبوع اذا شفتهه ما استجابت احولهه على غير قسم...

ضل عمي يشكر منه ويوصي بي عليه ....
وكال باشري اليوم وارجعلج الظهر ...
سلم على ثابت وراح...
ضليت وحدي افرك بأيدي...
منزله راسي واحسه يباوعلي شراح يخلصه هذا اليوم ياربي...

فززني صوته كال كومي وياي اعلمج على الشغل
وشوي صيري شاطره موتشلعين كلبي...

هزيتله راسي بقبول وكمت ورا...
اخذني لغرفه بيهه 2 بنات وحده شابه وحده جبيره يطلع عمرهه ب40
اول ماشافنه وكفن ... سلم عليهن...

كالهن هاي الموظفه الجديده بمكان ساره...
واذا احتاجت شي ساعدوهه...
كالن ميخالف....

كال تعالي وياي ....
مشيت ويا واحس باحساس حلو
فرحانه بوضيفتي الجديده...
دخلنه لقاعه جبيره كلهه حواسيب وطابعات ...
محد بيهه فارغه...
كال هاي ورا الظهر قاعه تعليم ...
اكو استاذ يعلمكم اني استاذن من عمج واخلي يقبل اداومين العصر علمود تتعلمين مده اسبوع...

كتله بس اني كلشي ما اعرف ..
الجك من البك ما اعرفه...
ضحك بصوت ... كال هاي شنو المصطلحات ؟؟
خجلت ونزلت راسي...
ساد الهدوء ووحدنه بلقاعه احسه قريب ويباوعلي بس شلون راح اخلص نفسي من هالموقف ..
شكول وضيفه اني... احس نفسي احتاجيت الحمام..

بعد دقايق من الصمت نطق ابو الهول...
كال تقوى ارفعي راسج خلي اشوف عيونج!!!

       ♡♡♡♡♡♡♡♡♡♡♡♡♡♡♡♡
#يتبع