تحميل رواية «ذنوب لاتغفر» PDF

#البارت العشرون

#ذنوب لاتغفر

#للكاتبه《روزاية》

لا اعلم ماذا افعل امضي قدمآ ام ابقى...

اقاتل ام استسلم.. اختبئ ام اظهر..

الم داخلي ام خارجي...

ظاهر او غير مرئي...

من منهم سيشعر بجرح مخفي...

تشعر بأنك في غرفه مظلمه لا نوافذ ولاباب..

تتخبط بين جدرانهه ولا احد يستشعر وجودك..

شعور مخزي انك بخير صحيآ..

وانت لست كذلك داخليآ...

الم الضياع مؤلم وفضيع...

حسيت بألم قوي اريد اكوم ما اكدر ..

كوه لزمت الكرسي زاد الالم واحس شي يمشي على رجليه صحت بعلو صوتي فاطمه....

اجت تركض وراهه لقاء الدم واكع على الكاشي وما اكدر امشي..

اخذتني من ايدي ودخلتني الحمام حسيت على شي وكع...

فاطمه كامت تصيح لقاء تعالي اركضي...

حالتي مأساويه ..

من هاي اللحظه عرفت فقدت طفلي ...

الظاهر ثابت مايريد يخلي شي يخصه عندي..

اسوء مامر بحياتي هاي الايام بجيت بجي لحدما ورمت عيوني...

غسلت وطلعني مددت بغرفه الحجيه بس شافتني كامت تبجي...

كتلهه خاله حتى ابنه ماقبل يثبت وابو ماموجود...

كالت ابتهال ادعيله يرجع سالم وبدل الواحد يسوي عشره...

كلشي مانريد لادنيا ولامال بس يرجع خيمتنه وعزنه والله احس روحي ذليله من دونه..

من تزوجت لسه محد كالي ولج..

يخافون من اخويه..

انكلبت مناحه والكل يبجي..

ايام قاسيه مرت ببطئ الساعه عبالك سنه

يوميه يجي الليل وثابت ماكو...

عيني على الباب انتظر ابو طول الحلو..

بليل جنت نايمه بصف فاطمه وشفت ثابت عبالك حقيقه...

لابس قميص ابيض وواكفين لازمين سره على الجوازات نريد نسافر...

وصل السره النه وطلع بس جواز ثابت واني ماطلع..

كتله ماعليه الا اسافر وياك...

كال لا انتي بعدج صغيره ماطالع جوازج ..

اني راح اسافر قبلج وضليت اتوسل اسافر ويا وزعلت...

وشفته راح يريد يصعد بطياره واني اركض ورا واصيح لاتروح...

لزمته من قميصه كتله اروح وياك..

كال يله بطلت ما اروح بس خلي اكمل الشغل وارجع...

كعدت مرعوبه مجرد ماتذكرت الحلم مدري شصار بيه كمت ابجي واشهك معقوله ثابت صاير علي شي...

فزت فاطمه على صوتي كالت شبيج؟؟

كتلهه هيج حلمت...

كالت الله لايكولهه من عمري على عمره

ضلت تهدي بيه ماكدرت انام كمت صليت وقريت قران ...

احس كلبي نار ماجاي يهدء ابد...

طول ثابت بغيبته صار 15 يوم ضبط واحنه لا ليل ليلنه ولانهار ....

حتى اليأس سيطر علينه وصار البيت مابي طعم الراحه والفرح حته خلال هاي الايام ماسمعت واحد ضحك ...

بيوم منهن اجو الولد وياهم ولد عمهم كالو طلعت تسجيلات المكالمات بهذاك اليوم

وطلع مخابره واحد ومتواعد ويا ...

وثابت يكله اريد اخلي حد لهاي المهزله...

ومتفقين على مكان هنا ببغداد بس شوداهم للعامريه ؟؟

والمصيبه هذا المخابره ميت لكوا مكتول والضابط يكول خاف ثابت كتله ..

كالتلهم فاطمه مايفتحون تحقيق شنو رجال طول بعرض اختفى ومحد يحقق..

لعد عليمن حاطين ضباط ومراكز...

كال عامر شوف هاي هي وينهه الحكومه حايره تنهب وتقتل اغلب هاي العصابات راجعه الهم...

بس الفقير اله الله ...

كالعاده مثل كل يوم تجمع الزلم ويتناقشون وجيب ورجع ومايوصلون للحل..

خيم الحزن على البيت طعم الراحه والفرح ماكوو...

كل واحد كاعد بجهه ويبجي لو مدمعه عيونه...

غرفتي ماصعدتلهه ابد مخلصتهه يم الحجيه...

ثابت راح واخذ كل فرحتنه ويا ...

بيوم منهم بليل اجه عمي استأذن من علي يريد يسوي مشيه غسق يكول الناس مستعجلين...

صدك مايستحي بكل عين صلفه اجه وفوك مانطاهه للي لعب على عرضه...

الموت ياخذ الزين ومايلف هاي العارات

صارت مشية غسق واجت نعيمه ثاني يوم تمدح بيهم بكل وقاحه...

ما الي خلك احجي البيه مكفينه فقدت طفلي وثابت لسه ماكو خبر عنه...

وهاي بطرانه هلكد جابو فلوس وهلكد ذهب...

مر على غياب ثابت 18 يوم ....

الحجيه حالتهه ساءت ليل نهار تبجي على ثابت...

بيتنه مافرغ من الهوسه وضع الأنبار موزين وعماتهم وعمامهم اجو يمهم...

بليوم اموت الف موته واني افكر بمصيري واخاف يشيلوني ويرجعوني لنعيمه ...

وين راح عزي ونعيمي رغم هاي الاشهر زعلان عليه بس ابد ما اذاني ...

بيتهم جبير حيل620 متر وبنيان ضخم غير الحديقه شكبرهه...

والناس مجودره عليهم هم بحجه ثابت ماكو ويواسونن بيهم..

وغير الي اجه معزوم من الانبار ..

بس هوسه الجهال وانسام المسمومه ليل نهار تعلج وتمكيج ولاعبالك الغايب عمود البيت...

خلال هاي الايام خسرت 5 كيلوات صرت جلد على عظم....

الذنب اكلني غلطت بحق ثابت وماخليته يعيش ايام زواجه مثل البقيه..

ومن سمعت قصته تأثرت علي ..

ذنوبنه ماتنغفر ..

اني سويت الذنب بارادتي وطاوعت نفسي..

بس هو طفل وانجبر على هيج ذنب وحمله على اكتافه طول عمره...

بيوم منهن جانت الساعه ب2 الظهر ونسمع الباب تكسر ركض علي فتحه...

فراس ابن عمهم طب يركض ويلهث ويصيح خاله

وينكم ...ولج خاله كومي هلهلي رجع ثابت....

من كال هيج صار مراكضنه ماله كمت ادور ورا فراس وعبالك ضامه ...

علي وعامر يهزون بي يريدون يفتهمون الحجي...

الوجوه فرحانه بس مانفتهم شي...

كاله علي ولك احجي وينه ...

كال هسه صديقي بالمستشفى خابر وكال هذا ابن عمك يريد يحجي وياك ...

من حاجاني وكال اني ثابت ماصدكت عبالك بحلم بس صوته تعبان حيل...

وابوي والولد كلهه راحت واني اجيت اكلكم...

..كاله علي ولك ماخابرتنه انروح احنه بلاول...

وين جان وخوما بي شي؟؟

... والله ياخوي ماعندي رصيد سويت الدرب طفرتين واجيتكم...ماادري ماقبل يحجي كال من اجي...

كام تصيح عمته صلوات على محمد محمود مشكور ربي...

الوجوه استبشرت والفرحه عمت البيت دموع الفرح كامت تمطر...

اني واكفه واباوع واكرص بنفسي خاف حلم...

عبالك فقدت الذاكره بهاي اللحظه اخاف اطلع حلمانه وانصدم

جرتني لقاء ودكلي قره عينج برجعته...

شوي شوي استوعبت الي يصير

ركضت على خالتي ذبيت نفسي بحضنهه وابجي وياهه...

خاله ثابت عدل وراح يجي...

اي وليدي مايعوفني يدري بيه اموت ورا....

كلنه ركضنه توضينه وسجدنه سجده الشكر على رجعة ثابت...

شفت دنيا تبجي وتشكر برب العالمين...

كالت خالتي كومي تلكي بمنظر حسن لا هيج اطلعيله...

رحت غيرت ملابسي بس التعب مبين على وجهي ...

ضلينه ننتظر وماكو كلما نسمع صوت سياره نطلع برا وتخيب امالنه...

صارت ب5 عمامهم وكرايبهم كلهه اجت ...

كلبي يدك سريع راح اشوف حبيبي وشلون حالته

دموعي ماترضى توكف ...

هاي المره دموع الفرح ...

اذن الأذان وماكو لسه...

نخابر عليهم كالوا بالطريق...

سمعنه صوت السيارات بالباب ركضنه نتلكا وهو مايقبل النسوان تطلع برا ...

كلنه تجمعنه بالمطبخ بس الحجيه برا...

طبو الولد وعيوني ادور ثابت ...

زلم هواي وكلشي ما اشوف ...

شفت علي سانده من جهه لان رجله متصوبه ...

وايده على كتف علي ولابس قميص غير قميصه الطلع بي...

كامت تهلهل الحجيه وعماته والصلوات وجكليت...

اريد اركض احضنه بس وين اكدر اطلع ...

خالتي حضنته هو طويل وهي قصيره دنك عليهه ويبوس براسهه ...

لحظات لقاء تبجي الحجر ...

حاضن امه حيل وهي تمسد على ضهره...

اباوع من الشباك...

تعبان حبيبي ملامحه تعبانه ورجله مضمده وكتفه...

دخلوا بلاستقبال ماخلوني اشوفه هواي زلم ويا وكرايبهم...

لزمت خالتي من ايدهه كتلهه اريد اشوفه ارحميني ..

كالت هسه شوي واصيحه لهنا بس خلي يكعدون...

كامن البنات على المطبخ يكملن العشا...

واني كاعده انتظر شوفة حبيبي...

الكل يباوع لحالتي ويكولن خطيه شوفو مرته..

راحت خالتي كالت لعلي خلي يجيبه لهنا مرته كلبهه انشلع علي...

كاعده بالهول واسمع بواجي فاطمه كمزت من مكاني ...

دفعت شكو وحده كدامي ...

احس المسافه بين المطبخ والصاله صارت شكبرهه..

ركضت مثل الطفل لحضن ابو...

مثل العطشان وشافله بركه ماء وركض عليهه...

حضنته حيل ورفعت نفسي وحاوطت ركبته ..

حسيت بأيده ضمتني لصدره رغم جرحه....

كمت ابجي بكل قوتي احس البواجي البجيتهه بهذيج الايام ماكفتني...

هستوهه ردت بيه الروح اريد احاجي بس ماجاي اكدر من الشهكه مال البواجي...

هو ماحجه اي شي خلاني ابجي براحتي...

حسيت على ابتهال تسحب بيه كالت ولج جرحه خطيه والنسوان تباوع....

ابتعدت منه وباوعتله تعبان حيل بس همسلي كافي بجي هاي اني كدامج....

اجاني صوت دنيا كالت...

الحمدلله على السلامه ثابت...

... كالهه الله يسلمج..

يله راح ارجع يم الزلم فشله وانتي كافي بجي شصاير بحالج...

اجه علي اخذه بدون ما احجي...

احس ردت بيه الروح جانت غايبه عني

مسحت دموعي وضحكت بوجه ابتهال ...

كالت فدوه لعصفوره ثابت الله يحفظه الج ومايشوف مكروه...

كمت اشتغل وياهن بكل حماس بس اريد العالم تتعشى وتروح اريد اشوفه واشبع منه ...

ورا العشا الي بيوتهم قريبه راحو وضلوا بس الي من الانبار ام بسمه وانسام وخالتهه وبيت عمهم وعماتهم 2

بس البيت هوسه وخطار هواي..

كالت خالتي تقوى اخذي غرفتي ناموا بيهه واني انام يم فاطمه...

كتلهه لا خاله ليش انام بغرفتنه..

... لايمه مايكدر يصعد من رجله ...

.. رحت لغرفه الحجيه نزلت فرشه من فوك ورتبتهه وسبحت وبدلت...

كعدت بالصاله يم النسوان انتظر شوكت يجي...

كالت عمته ام باسم ولج يمه ديري بالج على الولد ترى يكولون جرحه عميق مو تلبسين وتتدلعين وتخلي حاير بزمانه...

ضحكت كتلهه لا خاله لاتخافين...

ضلينه كاعدين صارت ب11 اجه علي كال حضرتو غرفه لثابت كتله اي...

كال راح اجيبه ينام لان تعبان...

رحت فرشت البطانيه وحضرتهه ..

اجه علي سانده وكوه يمشي..

كعده على الجربايه واني واكفه بعيد عنهم ..

خالتي واكفه وياهم هي تريد واحد يسندهه...

التفت عليه علي كال اذا احتاج شي كليلي...

وطلعوا ...

ضلينه بس اني والحجيه...

تقربت علي فتحلي ايده الصاحيه كعدت بصفه وضمني لصدره باسني من راسي ...

ما اتحملت بسرعه بجيت مثل الطفل كمت امسح بدموعي...

كال لاحبيبتي لاتبجين هاي اني كدامج بعد عليمن هاي الدموع...

كالتله الحجيه يمه شصار بيهه انسلت عليك دشوفهه جلد على عظم صارت...

بين ايديه اني واحس نفسي بحلم

واخاف اصحه وما الكه ثابت...

كالت الحجيه يمه راح اروح انام تعبت اليوم وباوعتلي ديري بالج على وليدي...

كمت بستهه من راسهه ..

كالت الله يرضى عليج بنيتي..

سديت الباب واجيت كعدت يمه هو منزل رجلي للكاع ...

كال تقوى مامرتاح اريد اسبح...

... كتله شلون موكال علي مايصير...

.. ما ادري احس جسمي يلزك من التعقيم...

.. هسه اجيبلك مي دافي واني امسح الاماكن مال التعقيم مايصير تسبح وجرحك يلتهب...

.. لا خلي تنام هاي الجيوش واسبح ..

تعالي ساعديني امدد..

ساعدته مدد على الجربايه وانداريت من الجهه الثانيه كعدت يمه ولزمت ايده...

.. كالي هاي شصاير بيج ليش هيج مسويه بحالج؟؟

.. ثابت انت امي وابوي واخوي وزوجي شلون ما اموت نفسي عليك تمنيت الموت بهاي الايام...

.. تنهد وكال عدت على خير عدت..

.. وين جنت ثابت ومنو سوه بيك هيج؟؟

.. كل الي يشوفني يدخلني تحقيق بنتي خليني ارتاح مابيه احجي حرف..

.. لاثابت سولفلي اني مرتك هم تريدني اطلع اسأل وبلكي واحد يحجيلي..

.. احجيلج ميخالف بس خلي اسبح وارتاح...

.. تعالي انتي احجيلي شسويتي شصار ماصار بغيابي؟؟

.. ماصار شي لان كلهه ملتهيه تدعي وتبجي ...

حتى دنيا شكد بجت عليك..

حجيتهه على نيتي..

.. تنهد واخذ نفس كال دنيا اااخ يادنيا...

.. من كال هيج حسيت كلبي انخمط من جر حسره مبين شكد يحبهه..

كتله هاي شنو ثابت شو اجر حسرات على دنيا...

.. لا ما اجر حسره تعالي بحضني اريد اشمج مشتاقلج حيييل....

.. خليت راسي على صدره واخاف الجم جرحه بالجهه الثانيه بكتفه...

يلعب بشعري ويهمسلي كلام حلوو...

بس مزاجي تعكر من شفته شلون جر حسره على دنيااا مبين الحب الي بيناتهم جبير من شفتهه شكد بجت علي ...

.. كال كومي شوفيهم نامو اريد اطلع؟؟

.. شتريد منهم واذا كاعدين؟؟

.. لا ياتقوى ما اريد اشوف اهل الأنبار...

.. ليش؟؟

.. شكد سألتي لوكايم اني احسلي...

.. لاكمت راح اشوف..

فتحت الباب ماكو احد بالصاله كلهه نايمه الساعه ب12 ونص والكل تعب من الهوسه وناموا...

رحت حضرتله الحمام ورجعت سندته بس ثكيل ما اكدرله رحت جبتله عكازة الحجيه وكومته...

اخذته للحمام خليتله الكرسي وكعد...

ركضت للغرفه جبت ملابسه والخاولي...

كال فتحي المي وسدي الباب..

كتله ترى ما اطلع اني؟؟؟

.. لا تقوى اني اسبح ترى موطفل اني !!

.. ميخالف اساعدك ...

.. لا بنيتي من احتاجج اصيحج ...

ماحجيت اعرف ثابت مايحب واحد يشوفه ضعيف..

طلعت وعفته يسبح...

توضيت ورحت للغرفه اصلي تعودت اصلي هيج وقت ركعتين...

كملت وكمت كلت خلي اشوف ثابت شو تأخر ...

طلعت صار بوجهي المنظر خلاني ما اعرف شسوي...

ضليت واكفه واحس سجاجين وتنغرز بكلبي..

دموعي بللت خدي..

عيوني ضلت تراقب ومارمشت ابد...

حتى برجعة ثابت ماكملت فرحتي...

#يتبع......

مشتاقتلكم حبايبي

تصويتكم احبكم❤

الحادي والعشرون

لاتغفر

《روزاية》

من طلعت من الغرفه صار كبالي ثابت وحاضن دنيا ...

هي محاوطه ركبته بثنين اديهه وايده تتحرك على ضهرهه..

هذا المنظر هز كياني هز اتمنيت اني بحلم وافز منه ضليت واكفه حته مارمشت عيوني ..

رجلي وحبيبي الي عميت عيوني علي بأحضانه حبيبته السابقه...

بعدهه من ايده والتفت صرت بوجهه..

من الصدمه ماكدرت حتى انطي اي ردة فعل..

اجه يمشي باتجاهي حتى ماساعدته لازم الدرج ويمشي...

دخلت كدامه للغرفه بس الغصه ابلعومي لا اكدر ابجي ولا اكدر ابلعهه...

رحت فتحت الكنتور واشيل بالملابس مال الحجيه وارجع بمكانهه ما اعرف شريد وشجاي اسوي...

اجاني صوته شبيج شداسوين؟؟؟

.. ماجاوبته ولاحتى درت وجهي ...

..تعالي ساعديني اريد امدد..

.. حجيت بكل الم واحس سجاجين بكلبي..

كتله خلي اصيحلك دنيا تساعدك...

.. بدون حجي زايد تقوى وتعالي ساعديني..

.. التفتت علي كتله ليش بدون حجي زايد اشوفك كدامي وبعيني ماخذهه بلأحضان وتكلي لاتحجين حجي زايد...

.. تقوى تعالي شبيج وافتهمي بلأول يله تحجين..

.. شتحجيلي عن مبررات الحضنه لو تشرحلي احساسك بهاي اللحظه؟؟؟

..نسه هو مصاب ونسه مايكدر يتحرك اجاني مثل الطلقه جرني من ايدي ...وكال

ولج شنو هالحجي الماصخ...

سلمت عليه وشمرت نفسهه بحضني حالهه حال اخواتي هذا عقلج اليابس شغلي..

.. جريت ايدي منه كتله عوفني ثابت لا تراعي مشاعري ترى عادي متعوده على كسرة الخاطر ..

تعال اساعدك تمدد بفراشك..

.. ماخلاني اساعده راح وحده واشوفه شلون متأذي بس شقوات عينه ضغط على نفسي ومدد وحده حته صار دم بالضماد الي بكتفه...

كلبي حيل متأذي منه رغم فرحتي بي ..

بس ما احس غير بس بلألم ومنظره وهو حاضنهه ويمسد على ظهرهه ابشع مايكون..

مانمت يمه جريت مخده وبطانيه ونمت بالكاع بس خليت راسي على المخده استسلمت لدموعي..

بجيت واني كاتمه انفاسي بالجذب ما اعتذرلي وماكال انجرحت مشاعرهه..

ضليت اتكلب بفراشي وهو بسابع نومه ...

ما ادري شلون خلص الليل واني بوسط دموعي...

المفروض اليوم فرحانه برجعته تالي خوش جازه دموعي...

كعدت من الصبح عيوني وارمه من البجي شافتني الحجيه ...

كالت شبيج يمه ليش هيج عيونج..

كتلهه مابيه شي بس تعبانه...

سويتله ريوك ورحت اريد اكعده امشي بس جسد لحظه ماراح المنظر من بالي..

طبيت لكيته كاعد وحته منزل رجلي من الجربايه..

شكد عنيد وراسه يابس فوكاهه هو الزعلان...

كتله صباح الخير.

.. كال صباح النور..

.. دكوم تغسل وتتريك هنا لوبالمطبخ...

.. راح اكوم واتريك بالمطبخ ...

.. ماساعدته ولاتقربت علي..

كام وحده وراح للمغسله شافته خالتي كامت تحجي عليه..

كتلهه هومايقبل..

.. خليتله كرسي بالمطبخ وكعد جبت الريوك خليته كدامه ما اكل بس شرب جاي..

اجت دنيا كال صباح الخير..

الفرحه مبينه بعيونهه ..

ماكدرت اوصف هاي اللحظه اريد احط نفسي واملخه ..

حسيت نفسي لعبه ومالهه اي قيمه لا اعتذرلي ولا بررلي..

ما جاي اتحمل هاي الضغوطات احس نفسي اريد انفجر..

اجه علي واخذ ثابت للاستقبال كامت تجيهم ناس ولسه ماعرفت وين جان وكلهه تسألني عبالهم حجالي..

مايدرون شلون خلص الليل...

انتبهت عليه الحجيه صاحتني كالت شبيج يمه موعلى بعضج؟؟

.. ما اتحملت بسرعه بجيت ..

.. ليش بنيتي منو وياج مافرحانه برجعة ثابت؟؟

.. سولفتلهه الشفته وشلون عاملني ثابت..

.. مسحت دموعي وكالت لاتبجين المفروض ماتخلين ثغره ولاتنطي مجال حتى ينذكر اسمهه كدامه..

يجوز مثل ماكالج هي حضنته ومافشلهه..

تحجي وتواسي بيه بس اني بعالم ثاني عنهه داخلي متحطم اشوف دنيا لابسه وردي وجنهه كمر والفرحه مالامتهه ..

واني حتى ملابسي ماغيرتهم...

صار الظهر اجه ثابت للغرفه وويا خالتي وفاطمه وابتهال ..

اني عدلت الجربايه عبالي يمدد كال لا اريد اكعد تعبت من النوم...

كلما يسألن وين جنت وشلون يكول ما الي خلك احجي..

داتحجيله ابتهال عن وضع البيت وشصار بينه...

كالتله حتى تقوى سوده عليه صار عدهه اسقاط من القهر..

.. من كالت هيج التفت عليه وفاتح عينه على وسعهن كال شنووو؟؟

.. كالتله الحجيه .. اي يمه ورا غيبتك بشكم يوم طلعت حامل..

وماتاكل وبس تبجي لمن صار عدهه اسقاط مامقسوم الله يعوضكم..

.. باوعلي وكال شو ماكلتيلي؟؟؟؟

.. باوعتله بنظره متروسه الم

كتله مو فرحانه برجعتك ما اريد اضوجك وانغص فرحتك...

.. سكت ماحجه شي...

.. ضلن شوي يمه وطلعن اول ما سدن الباب..

..كال شبيج كالبه وجهج؟؟

.. بعدك تسأل ليش ؟؟ المفروض اني اسألك ..

.. تقوى شفتيني هيج بس ماداز عليهه

ولاتضلين تحجين بنفس الموضوع..

.. ماشي ما احجي..

فرشت فراشي وكعدت كتله تريد شي مني..

.. راح تنامين ماتريدين تعرفين وين جنت ؟؟

.. لا عادي اسمعهه من البنات ..

اني ماعرف شي عن حياتك وراح ابقه اسمع من غيرك..

.. ولج صاير السانج طويل يرادله كص..

.. طلعتله لساني وكتله هاك كصه انت عباره عن اوامر وعقوبات...

كام من مكانه واجه عليه مايكدر يدنك كال كومي..

ماكمت كتله شتريد؟؟

.. مسويه شعري ذيل حصان جرني من عنده ..

كتله اااخ راح اكوم شبيك؟؟

.. كمت صرت مقابيله عاف شعري ودفعني على الحايط لزمني من فكي بأيده والثانيه معلكه بركبته..

لا اكدر ادفعه اخاف على جرحه..

كتله شبيك ثابت وخر عني...

بسرعه اخذ شفايفي بقوه احس شفتي اتجرحت..

ضغطت على زنده ابتعد عني..

رفع وجهي ليفوك كال اروح فدوه للي يغار...

درت وجهي عنه..

فرني من فكي صارت عيني بعينه ..

حرك اصبعه الجبير على شفايفي..

صابتني قشعريره وغمضت عيوني اصبعه يتحرك بي شفايفي وانفاسه تلفح بوجهي ...

سحبني من راسي على صدره بهدوء..

تعبانه حيل بجيت وكمت اشهك ماسكتني خلاني ابجي على راحتي..

اخذني من ايدي وكعدنه على الجربايه..

لازم ايدي واني منزله راسي وامسح بدموعي....

كال كافي تقوى الصار مو متعمد لايروح بالج بعيد ..

سكتت ماحجيت بس احساسي يكلي

بعده يحبهه لان حضنته توحي بهذا الشي ...

كال تعالي نامي يمي...

.. لا نام انت خاف اضايقك..

.. انتي شكد فطيره ولج شلون بيج ...

سكتت بس مالي خلك نمت بصفه ويلعب بشعري

بس احس العبره خانكتني

ثابت باله مو وياي ومتأكده كام يحن لدنيا...

ضلت ايده تغلغل بشعري غفيت بسرعه وماحسيت بنفسي...

ثاني يوم كال علي اليوم نسوي عشا وعزمت كرايبنه على سلامة ثابت ..

التهيت بالشغل بس كلبي نار وخاصه من اشوف دنيا كدامي...

صار العصر وبدت الناس تجي واحنه ملتهين بالشغل وثابت ماشفته ضل بلاستقبال...

من ضمن المعزومين بيت عمي ..

اجت نعيمه وغاده وغسق...

اجت غاده وغسق يمي باركت لغسق وشفت الحلقه بيدهه..

شافني كالن انريد نحجي وياج ...

صعدت بغرفتي ..

.. كالن زعلانه علينه مو؟؟

.. طبعا زعلانه كدامكم اني ماوحده بيكم كالت خلي نشوفهه وتعرفن الضروف الي تزوجت بيهه شنو...

..كالت غاده حقج بس انتي تعرفين امي شلون حاكمتنه والله شكد حاولنه نجيج وماقبلت وبابا واكف بجانبهه...

.. التفت على غسق كتلهه بيهه الخير بنت عمي

خوش ولد موو؟؟ نفسه الي لعب على بنت عمج وسلمهه لبسام...

.. بسرعه بجت غسق وكالت تقوى لاتحمليني الذنب اتمنى اموت وما اتزوجه اصلا اكرهه بس امي وابوي جبروني..

.. شنو جبروج انتي بنت نعيمه منو يجبرج؟؟

.. كالت غاده اسمعي القصه..

انتي قبل موتعرفتي على هاي الكلبه انس وتذكرين شكم مره اجت امهه وياهه وصارت صديقة امي..

صارت السالفه مالتج وتزوجتي...

بس امي ضلت علاقتهه قويه بيت ام انس..

ومن زمان اجت خطبت غسق لأبن اخوهه وغسق ماقبلت لان اكو شخص بالكليه يريد يتقدملهه...

اني ضلت تضغط على غسق لحدما اجه الولد خطببهه وبوقتهه امي تخبلت وماقبلت وشحنت بابا عليهه وكتلهه وبطلهه من كليتهه..

وضلت امي تحجي براس بابا ينطيهه لابن اخو ام انس لأن متمكنين والولد مخلصهه بالخارج...

وبابا كال لغسق اتبرى منج اذا ماوافقتي سألت على الولد وخوش ناس وغصبا عليج تقبلين..

امي منطيه الموافقه لام انس واجو خطبوا وبوقتهه غسق حته كالت لام انس اني ماقابله ولوتشوفين امي شسوت بيهه ولج نفس الكتله مالتج كتلوهه ..

ولا عبالك بتهم..

وبعدين عرفنه االولد نفسه احمد يصير ابن اخوهه وتخبلت غسق حتى اني رحت لبابا كتله شلون تقبلهه تنطي لهيج شخص حاول يدنس عرضك...

وتعرفين عمج ما اله كلمه كدام امي..

وطلب مهر غالي مثل ماسوه بيج وهاي غسق كدامج ليل نهار تبجي ماتريده بس شنو الي نكدر نسوي..

لاتلوميهه ياتقوى يوميه تنكتل وحرموهه من دراستهه...

من حجتلي هيج غاده تخبلت زاد الالم فوك المي ضعفين...

كله من جوا راسي جبت هالكلبه انس وعرفتهه على نعيمه ..

مراح ينغفر ذنبي وابقه عايشه بي طول عمري..

شسويتي ياتقوى مادمرتي نفسج بس دمرتي هالمسكينه وياج...

نزلنه جوا والدنيا طالعه من عيني المشاكل ماتعوفني وحضي مصخم...

اشتغل من لاجاره وهاي انسام عقرب وكاعد تذب بسمهه عليه ...

وبس تقلد على شغلي طكت مرارتي منهه واني منا اعصابي تلفانه..

كلت بس تحجي وياي الا اتعارك وشيصير خلي يصير...

صار صب العشا ومن الهوسه مااشوف دربي بعد

جانت انسام شايله ماعون بي تمن واني اجيت مستعجله ما انتبهت وضربتهه بكتفهه

لو صارت يوم القيامه كامت تغلط وتصيح ماسكتت اني كمت ارادد بيهه واجت فاطمه سكتتنه..

ورا العشا كمنه نغسل مواعين واني اخذ النظيف ارجعه فوك ....

اكو غرفتين فوك وحده منهم بيهه غراض والثانيه انطوهه لام بسمه وبناتهه ...

مريت من يم الباب سمعت دنيا تحجي وي وحده...

دكلهه لج طايره من الفرح ثابت تقريبآ

رجع مثل قبل ولوتشوفين

شلون حضني وباسني من راسي

وكال ما اجه احد ابالي بس انتي...

وكال بس اصير زين اخطبج ونتزوج ...

سمعت البنيه الثانيه كالتلهه ومرته يطلكهه؟؟

كالتلهه لا مايطلكهه يكول يتيمه وعمهه يذبهه بشارع تبقى بالبيت ومالي علاقه بيهه...

الي سمعته عبالك موكلمات لا طلقات وتزرف بكلبي..

كل هذا جاي يصير وثابت عاشك من جديد واني ما ادري شكو؟؟؟

فوكاهه يكول عمهه يذبهه بشارع ..

امشي بطولي واني مخدوعه وكل هاي التخطيطات من وراي...

...

حبيايبي اسفه البارت قصير

بس دا امر بظروف صعبه حيل..

اتمنى تعذروني اذا فديوم مانزلت

والله اضغط على نفسي واكتبلكم...

احملكم امانه تدعولي اطلع من هاي المحنه ...

ادعولي دعوه صادقه من قلبكم الله يفرج عني..

احبكم❤

الثاني والعشرون

لاتغفر

《روزاية》

مساء الخير ياحلوين ...

اسفه جدآ ما احب اخذلكم بس غصبآ عليه ظروفي صعبه ودا اضغط على نفسي واكتبلكم..

حتلو البارت قصير اعذروني...

""""""""""""""""""""""""""""""""""""""""

الي سمعته جان كافي بتحطيمي قطعه قطعه

لا اكدر ارجع ولا اكدر اضل بمكاني..

الكلمات رصاصات وتزرف براسي..

اسمع ضحكتهن والحجي ما اعرف شسوي..

بسرعه فتحت غرفتي ودخلت ...

كعدت الجربايه ودموعي احسهن تيزاب وينزلن..

ليش مكتوبلي الحزن بشنو توحمت بيه امي..

ليش ثابت كلما اتقدم خطوه يرجعني للصفر..

اذا مايريدني ليش يكولي احبج واريدج...

الافكار تضارب براسي ...

اسمع صوت لقاء تصيح تقوى...

شلون انزل بيا حال خاف يبين عليه...

لقاء تصيح وينج تقوى؟؟

كمت غسلت ونزلت اجر بذيال الخيبه..

نزلت ولكيتهن كلهن بالمطبخ ودنيا تعلج وتضحك وعيونهه تلمع..

كالت لقاء وينج ولج بيت عمي ابو سامر يردون يرحون ويسلمون عليج...

.. الغصه ابلعومي كوه احجي كتلهه الله يسلمهم...

ضحكات الفرح والسوالف تضرب براسي ..

ما اكدر اوكف احس نفسي مختنكه...

معقوله اني مغفله ويجي يوم واشوف دنيا ضرتي ويبادلهه الحب ثابت؟؟

معقوله ثابت اعتبرني وسيله للنسيان ومن رجعت دنيا حن الهه؟؟

انتبهت عليه ابتهال كالت شبيج تقوى شو حتى مافرحانه برجعه ثابت؟؟

.. كتلهه لا بالعكس بس شوي تعبانه..

ضحكت انسام وبسمه نرفزتني...

عفتهن ورحت للغرفه كمت ابجي ما اتحمل هلكد تعبت والله ...

صارت ب10 اجت فاطمه كالت راح يجي ثابت حضريله المكان...

طب ثابت كوه يمشي وكتفه مأذي وحته دم صاير على الشاش...

كمت اتلكيته وكعدته على الجربايه بس عيوني تحجي الف كلمه ....

كال تقوى متأذي والدم لازك على كتفي ...

.. حجيت ببرود كتله هسه اعقمه الك..

.. شبيهه مريتي بعدهه زعلانه عليه؟؟

.. من كال هيج واتذكرت الحجي وشلون عايشه بكذبه بسرعه بجيت...

.. تفاجأ هو !!

كال ليش حبيبتي منو وياج؟؟

.. ما احجي بس ابجي...

.. سحبني من ايدي وكعدني بصفه بعد ماجنت واكفه..

رفع خصله من شعري وكال...

ليش تبجين منو وياج احجيلي؟؟

.. كتله ثابت اذا ماتحبني ليش تزوجتني؟؟

لو مخلي عمي يذبحني ولا تشوفني الذله...

.. ولج ياذله شبيج انتي منو محسسج بالذل اني؟؟؟

.. كتله اليوم صعدت اودي المواعين وسمعت دنيا تسولف وي وحده وهيج كالت..

احجي وابجي ...

ملامحه تغيرت واعرفه من يعصب يضغط على اسنانه...

.. جرني على صدره وايده على راسي..

كال اسمعي تقوى وخلي كلامي ترجيه بأذنج...

دنيا لو اخر يوم بحياتي ماتصيرلي مره..

خانتني وتريديني احبهه؟؟

موشفتيني بهذا المنظر عبالج حنيت الهه..

اسنين ضليت وراهه لحدما شفتج وحبيتج..

ودنيا وانسام واخواتهه اول اعدائي ..

ياتقوى هذني متحلفات بيج ويريدن يسوون مشاكل...

وعادي عند انسام حتى تلفق تهمه عليج بسبيل تتطلكين...

خلي ابالج مدام دنيا هنا وانسام راح تسمعين اشكال بس اني هنا اي كلمه تجين تسمعيهه تحجيلي..

مسح دموعي وباسني من راسي كال انتي مريتي وبنيتي..

صحيح غلطتي واني صعب اسامح بس اعتبرتج طفله وعلمتج الصح من الغلط ...

واكثر الغلط جان مني لان ما احتويتج وخليت الخوف مسيطر عليج..

يابنوتي اريدج قويه ترى عائلتي عباره عن وحوش انسام تفرح اذا وكع ثابت وراح تحاول توكعج..

.. كتله يعني انت ما كايل لدنيا هيج؟؟

.. كرصني من خدي وكال اموت على الثول مالتج..

صار ساعه شحجي ولج...

كل عقلج اكلب وحده خاينه وتزوجت واطلكت ...

ادري بيهه تحبني ..

وادري غلطت بسبب امهه وانساك بس ما اسامحهه للموت لان جبيره وواعيه ودارسه ومشت بهيج طريق..

هذا ما اسمي غلط ..

هذا يسمى استهتار وعدم تربيه وعلى ذمتي وخانتني وي صديقي...

..نزلت راسي من كال هيج...

.. انتي نفس الغلط بس فرق بينكم انتي زغيره ويتيمه وماكو من نصحج وعلمج..

وكلشي جان ممنوع عليج ودائما الممنوع مرغوب..

بس مومعناتهه نسيت الصار ..

.. شمرت نفسي بحضنه..

صاح اااخ ااخ ...

ابتعدت عنه وخفت خاف لجمت جرحه ..

كتله تعال اعقمه الك ..

كمت وكفت كباله ونزعته القميص ...

اول مانزعته شهكت ولطمت صدري..

عزا بعيني يمه يمه سوده عليه ايده زركه من الضماد والدم راجع على زنده وكل هذا مايشكي من الالم وجان يطيب بخاطري..

كمت جبت مي دافي وتعقيم ومسحت الدم ومسحت وغيرت الضماد اشوفه يسد بيده ويفتح معناتهه دايتألم ...

بسته من كتفه بوسات خفيفه..

كال ولج ابتعدي ترى يسويلي عمليه ثانيه..

ضحكت وكملت لف الضماد...

كتله لاتبرد لان جان الجو بي بروده لبسته قميصه واسدله بالدكم وايدي تلامس صدره..

مد ايده على خصري وسحبني علي ..

رفعت راسي باوعت بعيونه ..

اخذ شفايفي وصار يبوسني بكل لهفه وحب واني مندمجه ويااا...

بعده على نفس طبعه وتعامله بعنف بس احاول اخلي يهدء وما ادفع بي لان يزود..

ابتعد من عندي واخذني بحضنه ..

ساعدته يمدد على الجربايه ونمت على ايده الغير مصابه...

كتله ثبوتي سولفلي وين جنت ؟؟؟

كال صرت عن الموت شعره والله نجاني ..

يجوز دعوه امي لو دعواتج كتبتلي عمر جديد...

كال...

قبل شهر تقريبا واحد اعرفه دائما يسببلي مشاكل يهدد ويتوعد طكت روحي منه ..

كام يتجرأ ويجي لشركه حجايه منا وحجايه منا وتعاركنه...

وضربته بوكس وطردته ضل يغلط ويصيح وطلع...

بيومهه طلعت ولكيت سياره واكفتلي طول ما اني امشي بالطريق هم وراي عرفتهم من جماعه ضامن ..

غيرت مسار السياره وطلعت بطريق ترابي وهم وراي..

فجاه صارت سيارتين وراي...

كاموا يرمون عليه واني ارمي اعتقد تصوب واحد بيهم...

بس بنجروا السياره...

ووكعت بكمين منهم ...

الجبان ضامن ما اجه برجله دز هاي الفيران...

اخذو السياره وتليفوني وسلاحي...

واخذوني وياهم وطلعوا على طريق العامريه جزيره وحتى سيطرات ماكو...

ناوين الكلاب يكتلوني ويشمروني بالجزيره...

ما ادري شلون رب العالمين حماني منهم...

لابيت لا مكان كعده بس التراب عامينه ضلينه بالسياره ومخلين المسدس بخاصرتي ..

شكد دافعت وضربت بس عددهم هواي بحدود 20 وسلاح ماعندي ...

اقل تصرف يخسرني حياتي...

ماادري شلون واحد منهم فتح ايدي يريد يخلي بدل الحبل كلبجات عود...

الوقت الي اختاره خاطئ جماعته ابتعدوا عنه مخبوصين مدري شعدهم لان تجيهم اوامر من الكلب...

اول مافتح ايدي ضربته دفره وكع مبين خايف وجاي مجبور كام يتوسل عوفني وما اريد اموت واني مجبور اشتغل وياهم...

ماسويتله شي بس اخذت السياره والسلاح...

هذولاك شافوني ووراي...

السياره خفيفه مامتعلم اسوقهه تروح منا وترجع منا مواجهه قويه نفر واحد وهم كومه..

لحدالان مامستوعب شلون طلعت منهم...

نجيت بأعجوبه رمي من كل مكان والسياره عبالك كاعد بدولاب هوا...

ارمي وما اعرف تجي وين ...

ابتعدت عنهم بمسافه وهم وراي...

كامو يتقربون واني لاحول ولاقوه...

تالي تصوبت بكتفي...

بعد فقدت السيطره على السياره نهائيا..

نزلت منهه وخلصتهه ركض ماحسيت غير الطلقه برجلي بس اني ارمي عليهم ....

عافوني ومشوا عبالهم متت مدري غيروا رائيهم..

الجزيره خاويه وين اروح واني مصوب والسياره اخذوهه وتليفون ماعندي..

مشيت مسافه ورجلي احسهه انفصلت عن الركبه...

هذا كله بيومين...

مر رتل مال جيش وشافوني عبالهك ارهابي والا صيحت يمعودين والله موارهابي...

يله نقذوني...

كتله لعد ليش ماخابرت من الجنود...

ماحافظ ولارقم حتى رقمي ماحافظه ...

جان عدهم انذار داووني شلون ماجان وطلعوا الطلقات لان اكو طبيب عسكري

وكالو من ننزل نزلك ويانه...

ومن نزلت اخذوني للمسشفى

ولكيت صديق فراس كتله خابرلي علي...

.. حضنته وبوسته من خده كتله شفت الموت بغيابك..

.. تصدكين تقوى والله من تصوبت صرتي بين عيوني انتي وامي وفطومه..

ماتوقعت هلكد احبج ومسامحج...

حتى ورا مانقذوني ...

كلساع واكول تقوى شصار بحالهه؟؟

.. ياحبيبي انتهيت وراك للصبح ابجي وانوبه راح الطفل زاد حالتي سوء..

.. خلي اصير زين وبدل الواحد عشره...

.. هههه لا تخوف انت...

.. ها بعدج تخافين موكتلج احاول اسيطر على نفسي...

.. ثابت اني خالتي حجتلي كولشي عن حياتك واني وياك لحدما تتجاوز هاي المحنه..

.. انتفض مثل الاسد وعدل نفسه كال ومنو سمحلهه تحجيلج وشحجتلج بالضبط...

.. لزمت وجهه بأثنين اديه كتله ثابت اني مرتك يعني سندك مثل ما انت سندي...

ما انطاني مجال اكمل كلامي

كال كافي تقوى سدي الموضوع وماينفتح حتى وي نفسج ...

هزيتله راسي وابتسمت كتله ماشي...

شفت ملامحه انطعنت طعن وتغيرت معقوله هذا الموضوع صار سنين ياكل ويشرب ويا ؟؟

نمت بحضنه بس مزاجه متعكر حتى ما حجيت حرف...

كعدنه الصبح كالعاده خطار وهوسه وثابت بلاستقبال...

ورا الغدا غسلت ملابس واريد اروح اشرهن بالممر...

بباب الممر من يم الدرج...

شفت ثابت لازم دنيا من زندهه...

وهي تباوع بعيونه...

صرت دون الدرج اريد اسمعه شيحجي وياهه..

ماسمعت شي

بس فاهمه لواعيد براسج بعد؟؟

#البارت الثالث والعشرون

#ذنوب لاتغفر

#للكاتبه《روزاية》

ماخليت ثابت يشوفني بس ماسمعت شحجه بس هاي الكلمتين...

وهي رافعه راسهه وتباوع بنظرات جريئه وعينهه بعينه..

اجيت اروح اقلع عيونهه من مكانهن..

وقريبه علي كولش...

اشتعلت بنار الغيره شوكت اخلص منهه...

شفت ثابت هد ايده وراح على الغرفه ...

عفت الملابس على الدرج..

ورحت ورا ثابت لان شفته كوه يمشي...

لكيته كاعد ومدنك راسي يفرك برجله..

..كتله حبيبي شبيك شو تعبان؟؟

.. كال لامابيه شي بس رجلي مأذيتني...

.. كعدت فركتهه اله جرني من ايدي وكعدني بصفه ..

كال خليني انام شويه راسي دايخ من الخطار..

... ماشي نام واني اكمل شغلي واجي..

.. شعندج شغل عوفي وتعالي نامي وياي..

.. بس اشر الملابس واجي لان عفتهم على الدرج..

رحت كملت الملابس واجيت لكيته مخلي ايده على عيونه وتقريبا غافي...

غيرت ملابسي لبست دشداشه سمائي ربع ردن وقصيره...

مددت بصفه حس عليه شال ايده من عيونه نومته مايرتاح بيهه لازم مايطخ كتفه ...

كعدت خليت راسه بحضني وكمت افرك بي..

والعب بشعره ...

بلمسات خفيفه اسوي مساج لكتفه من يم ركبته..

وهو مغمض عيونه...

اباوع على ملامحه ...

رموشه طوال وبشرته سمره...

لحيته طولانه ...

اتمعنت بي زين واتخيلت لو لسه ما رجع جان شصار بحالي...

بنص افكاري فتح عيونه فززني...

كال بشنو تفكرين؟؟

.. كتله افكر لو ما راجع اسم الله جان شصار بيه؟؟

..خله ايده جوا راسي وسحبني علي

هو راسه بحضني ورافع عيونه عليه..

من سحب راسي تلاقت شفايفنه...

بسته بوسه طويله وهو بوسته مال واحد محروم..

حسيته جرح شفتي ابتعدت عنه..

جريت الكلينس مسحتهه قطره دم بيهه..

.. كتله ليش هيج ثابت شلون راح اطلع مبينه؟؟

.. شسويلج تدرين بيه اني شنو وانتي مطلعتلي هاي الزنود البيض تستاهلين..

.. رجع باسني بوسه خفيفه ...

كال تعالي انام ترى اتمادى وما اضمن الي يصير وتنفتح كل الخياطات...

... ههههه عاد محد يكول هو السبب يكولون هي ماتكعد راحه..

.. قابل جذب انتي ماتكعدين راحه مطلعتلي هالرجلين والزنود وتعال ياثابت صوم..

والله مال الزمج هسه اخليج زركه وحمره من كل مكان..

.. ياااا عزااا تريد تعتدي عليه؟؟

.. يارب العالمين شمسوي بدنياي وانطيتني هيج وحده ثوله..

ولج مرتي انتي شنو اعتدي عليج..

.. ضحكت واستحيت صدك ثوله اني...

يله تعال ننام لايصير بيك شي..

.. شيصير بيه مثلا؟؟ اشو حركتيني حرك اني وعشيرتي..

كومي خلي اشبع منج والي يصير يصير...

... لا ثابت اكعد راحه جرحك خطير وانوب يلتهب..

.. قرب وجهه عليه وانفاسه حاره دليل على وصوله الحد الاقصى..

كال تقوى ما اتحمل بعد على كيفي وياج...

... لا فدوه ثابت والله جرحك يهيج عليك ولسه مافتحت خياطاتك...

.. اشششش ما اتعمق بس خفيف..

.. شلون خفيف ماترهم ؟

.. لا ترهم بس سدي حلكج...

ايده كامت تتجول على جسمي وشفايفه تتفنن وتطبع اثار ملكيته على كل جزء...

رفعني ليفوك وصار راسي على صدري مثل الطفل الجائع بحضن امه...

رغم اللهفه والرومانسية بس معاملته بيهه نوع من القساوه ..

كل مكان يلزمه اكول ااخ ...

وهو يزداد يكول لاتثيريني ...

خليته براحته حته يرتاح...

اثنينه عطاشنين ونريد نروي اجسادنا..

ماكدرنه بسبب جروحه غير نرويهه برشفه ماء قليله...

اخذني بحضنه ونمنه ماكعدنه غير الساعه ب8 حتى محد دك الباب علينه.

كعدت لميت شعري وكعدته ثابت اكعد الساعه ب8..

طلعت لكيت الكل مجتمع وسوالف وضحك..

اريد اسبح بس استحي شلون الحمام صاير كدام الصاله ..

هسه شيكولون كعدت من نومتهه للحمام...

رجعت لثابت كتله شلون اسبح استحي...

كال اصعدي بحمامنه فوك ...

صدك صعدت سبحت ونزلت...

كالتلي خالتي احنه تعشينه وخلينالكم عشا..

سويت العشا وبس اني وثابت...

حيل مرتاحه بهذا اليوم...

مر شكم يوم صحه ثابت بدت تتحسن دنيا ابد ما تواجه ثابت ووين ماتشوفه تنهزم...

حته اني ماتحجي وياي لاهي ولا انسام..

اعتقد ثابت محذرهن...

فراس وعلي يركضون بالدعوه ضد ضامن..

والحمدلله من خلال اقوال ثابت كدروا يلزمون العصابه..

وطلعت عصابه جبيره كلهه تسليب واختطاف...

رجع ثابت لشغله وكلشي تمام اجواء البيت هادئه رجع البيت نظامي ويخافن من ثابت يحجن...

علاقتي بفاطمه طبيعيه...

خلال هاي الايام ثابت عرف بخطبه غسق وبوقتهه رجع عليه وعبالك اني الي زوجتهه..

حتى غلط على عمي ...

ماحجيت ولاجاوبته لان من يعصب يفقد ماكو شي كدامه مايكسره...

ورا اسبوع اجت نعيمه تعزمنه على حنه غسق...

وكال ثابت ممنوع وحده تروح وانعل ابو نعيمه لا ابو كل واحد بدون غيره على عرضه..

اخذله شكم يوم هو نار عصبي ..

اقل شي ينتر بيه...

حقه عمي انطى لعائله ساقطه ومافكر بالسوا احمد ...

بس سلمتهم بيد الله ياخذ حقي منهم...

بهاي الايام الوضع بلبيت تأزم صار محطه للخطار..

ما اعرف الوفود منين تجي ..

كلهم من الانبار ولهجتهم تختلف وكل الي يجي يسأل على مرت ثابت...

دنيا ساكته بس اخواته يضايقني ..

انسام شنت حرب وياي وتغلط وتصيح بس ما احجي لثابت خالتي ماتقبل دكول يكتلهه وتصير مشاكل...

ضليت ساكته وماحجيت...

لحد ما اجه يوم صاحتني انسام اجيبلهه مي ...

وماسمعتهه لان يمي جهال ...

واجتني مثل الثور الهايج تجر بشعري وكعتني بالكاع..

ادفع بيهه وهي تجر بي احس شعري يتكطع من جذوره..

كمت اصيح اريد واحد ينقذني ...

اجت فاطمه وافراح يسحبني منهه صرت عصفور بين اديهه..

ادور على راسهه اريد اكفشهه ماكو جنهه عملاق ...

كوه فكني من ايدهه ...

بوقتهه عصبت عليهه كتلهه انتي صدك وقحه وماتستحين خلي يجي ثابت وشوفي شيسوي بيج..

اعرفج مال مهانه مومال احترام..

اني احجي وهي تهد عليه وافراح وفاطمه بنص يحامني...

ودنيا واخواتهه واكفات يضحكن ويكللهه عوفيهه يمعوده صلفه...

وخرت فاطمه ودفعتهه على الكاونتر ورحت لغرفتي وشعري مكفوش...

وهي تغلط وتصيح وتسب بيه طلعتني من بنات الشوارع...

تحلفت بيهه بس يجي ثابت اسوي يوم الاسود عليهه هاي ام الوسخ وجهه بي الف عقجه جنهه جوب ضاربته الشمس...

مانزلت ابد ولاشفت احد ولا وحده صعدتلي

الحجيه يم اختهه وبليل تجي...

سمعت صوت السياره مال ثابت انتظرته يصعد...

تأخر جوااا..

شوب وصعد وجهه مايتفسر يمكن سبقني وحجن...

.. تلكيته كتله الله يساعدك

.. ويساعدج ..

.. نزع الستره اخذتهه اعلكهه..

كال شكو تقوى شصاير ؟؟

.. كتله حجتلك قبلي مو؟؟؟

.. سألتج اني اريد اسمع منج..

.. حجيتله كولشي وهو يلبس بالتشيرت..

.. رفع راسه وتقرب عليه باوع لشعري شلون منكوش بس لزمه كتله ااخ..

.. انزلي تعشي واني اعلمهن الظاهر نست وين هي؟؟؟

نزلت ويا وماحجيت ابد حتى ماكمت ساعدتهن

كعدنه تعشينه ورا ماكملنه ...

صاح تقوى تعالي اكعدي ..

وصاح بصوت عالي انسام تعالي...

كعدنه والكل كاعد بس عامر بالدوام..

كال اي احجيلي انسام شبيهه تقوى وياج؟؟

.. كالتله والله ماكتلهه شي بس هي بالمطبخ كتلهه تقوى بدون زحمه كلاص مي وياج..

وهي انهدت بيه وتغلط وحتى عيرتني برجلي دكول عايفج ويدور نسوان عليج...

تحجي وتبجي عقلي طار من التمثيل...

ثابت اني بنت ابوك مومعناتهه تشمرني على حساب مرتك اذا ماتصدك اسأل بسمه جانت شاهده...

اشو هاي الططوه بسمه كالت اي ثابت تقوى غلطت على انسام...

اني متت قهر كمزت من مكاني اريد ادافع عن نفسي كتله والله ماغلطت ليش تجذبن ...

كال ثابت اكعدي وخزرني...

كاعده والنار شابه بيه وخالتهه دكله هيج لكمتنه ثكيله عليك من باجر نطلع ندور بيت احنه وام بسمه لو حجي عقيل عدل ماخله بنته تنذل...

.. كالهه شنو ذل منو ذالهه بله

منو كايلهه على عينج حاجب ..

التفت على انسام ولج انسام اسمعي زين لا اكوم اشوفج يومج ...

اذا عدتي هاي السوالف البايخه اطيح حظج وحظ الي يطلع وراج ...

سبق وكتلج مالج علاقه بتقوى لولا؟؟

سكتت...

صاح بصوت عالي اني مو وياج كتلج لولا؟؟

عبالج هاي السوالف تعبر عليه ..

راح تبقين طول عمرج هيج الا تخليني اجرم بيج يله تتأدبين...

وانتي بسمه صايره شاهده حضرتج ماتستحين تجذبين لو هذا مرض بيجن لازم تمشين بالطريق اللأعوج..

ما الي سلطه عليجن بس مدام كاعدات ابيتي اكسر ضهرهه الي تمشي بالغلط وتجذب

كال عامر على كيفك ثابت هسه انت ذبيت الصوج بانسام وماحاسبت مرتك...

اني مو طرطور ولا رجل كرسي بالبيت وما اعرف شجاي يصير...

اعرف منو الغلطان ومنو الي على الصح...

اتجفي شري يا بنت ابوي ولا تخليني اطلع من طوري..

وللمره الالف اعيد واكول مالكم علاقه بتقوى...

التفت على ام بسمه كالهه ام بسمه لزمي بناتج ..

لاتخليني ارجع لنقطه الصفر وهذيج الساعه يصير غير حجي...

كام طلع واني رحت بغرفه الحجيه وفاطمه وياي..

كالت شفتي شلون دافعلج ..

اياج تغلطين بحقه مره ثانيه...

كالت اجه عليه وسألني منو الي سوه المشكله وحجيتله ...

عرفت ثابت موغشيم وماتفوته فايته ومحد يكدر يضحك علي لو يحجي براسه...

مر شهر ضبط الوضع تمام واني بزودي ومحد يحاجيني علاقتنه اني وثابت حلوه ويوميه نسهر ودلع وولع...

بيوم منهن اجونه بليل بيت عمهم ابو فراس...

كالو احنه جاينيكم نطلب ايد فاطمه لفراس...

جان هذا الخبر صدمه للكل وفاطمه انهزمت للغرفه كال ثابت ..

الرأي الاول والاخير لفاطمه اذا قبلت يصير حقير عود نحجي ...

ورا يومين رجعوا الخبر فاطمه موافقه وجان شرط ثابت الا بيت وحدهه وفراس كال ماعندي امكانيه..

كال ثابت اجرلهه البيت الي بصفنه وعلما تكون نفسك..

لان ثابت يكول ما اريد اعيد نفس المأساه القديمه مال فاطمه ويدري ابيت عمه صعبين وامهم حاكمتهم وكاعدين اجار لان مهجرين من الانبار. ..

على الرغم فاطمه عدهه مشكله ماتخلف وفراس شاب مامتزوج وبالجيش بس حب فاطمه وهو وياهه نفس العمر...

ثابت جان يكول اخاف عليهه خاف ورا سنه هم يتزوج وفاطمه تنكسر مره ثانيه...

قرب عرس فاطمه وملتهين وياهه وكرايبهم كلهه يمنه...

كال ثابت بيت عمي ماعدهم مكان وحالتهم موشي لان عافوا املاكهم بلانبار وهم عايشين على الزرع والحقول...

قررو يسوون العرس ابيتنه ...

فراس عند اخ واحد اسمه براق متزوج وعنده جهال...

اجه موعد الحنه بس اني قلقه واحس شي راح يصير اعرف مايدوملي الفرح..

على الرغم ماعايشه الفرحه وياهن والبيت هوسه بس بداخلي شي ما اعرفه...

#يتبع

#البارت الرابع والعشرون

#ذنوب لاتغفر

#للكاتبه《روزاية》

مساء الخير حبايب قلبي...

مشتاقتلكم...

اعذروني على عدم تواصلي وياكم انترنيت ماعندي والله كنكت على الخط علمودكم..

اشكر كلمن سأل عليه واعتذر على عدم ردي على تعليقاتكم بس ما افتح نت قليل...

ان شاء الله اعوضكم عن انقطاعي بس ادعولي...

/////////////////////////////////////

بيوم الحنه الصبح البيت هوسه صرنه اهل العروس واهل العريس بنفس الوقت ..

فاطمه مبينه الفرحه عليهه والدنيا مالامتهه...

صارت الساعه ب11 راحت فاطمه لصالون هي وابتهال وبنت عمهن سوسن..

وكل وحده من البنات لازمه مرايه والي تسوي بشعرهه والي تقيس بالملابس ...

اول مره اشوف لمه عرس لان ماعندي كرايب واحضر اعراس...

عايشه الاجواء وياهن اجتي مريم كالت عفيه تقوى سويلي شعري بيرمن مااسيطر علي..

كعدت اسويلهه وجانت دنيا لافه شعره بالماشات حتى يحافظ على ترتيبه ...

شفتهن كل وحده محضره فستان راقي واني لحد الان ما اعرف شلبس ..

حتى ملابس نيشاني كلهن على ذوق نعيمه وموكلش حلوات ..

كملت مريم وصعدت لغرفتي فتحت الكنتور وصافنه شلبس ياربي ..

هم اوكع بلسان انسام وتضل تقلد عليه وبنات خالتهه يضحكن...

بعدني حايره وافكر انفتح الباب ...

باوعت ثابت...

كال ها شو صافنه شعندج؟؟

.. باوعتله ومبرطمه كتله ثابت ماعندي شي البسه والبنات فساتينهن تخبل..

.. كعد على الجربايه وينزع بساعته..

كال لعد وين جنتي ماكلتي قبل يوم اخذج اشتريلج..

.. شمدريني ماعبالي كلهه مشتريه وعبالي حنه بسيطه ما ادري هلكد كرايب عدكم..

.. كام من مكانه وكال البسي بسرعه واخذج اشتريلج يله...

.. فرحت حيل بسرعه ركضت حضنته..

.. كال يله وراي شغل واستعجلي ..

.. بسرعه بدلت شلون ماجان وهو عينه على الساعه ...

طلعنه تلكتنه الحجيه كالهه يمه شويه ونجي..

وعينج على الغرفه وانطاهه المفتاح...

.. حسيت نفسي ملكه بهاي اللحظه رغم شغله والهوسه بس انطاني من وقته وماكسر بخاطري..

.. اخذني للمول قريب علينه واختاريت فستان طويل بي لفه على الصدر ومستور..

طبعا ما خلاني اختار دلع وقصير..

وحذاء بلون الفستان...

من ردنه نطلع صارت عيني على نفنوف قصير واردانه ركلان كلش نازك..

استحيت اكله اريده بس شافني اباوعله..

كال حلو مو؟؟

كتله اي نازك..

عامل ابو المحل واشتراليا...

كلساع اريد احضنه بنص السوك...

اجه على بالي اروح لصالون بس اخاف مايقبل..

كلت اجرب حضي واكله...

.. كتله ثابت حبيبي..

.. كال ها صار بيهه حبيبي..

.. لا انت دوم حبيبي بس خليني اروح لصالون حتى حواجبي ماعدلتهن..

.. التفت عليه وهو يسوق اكعدي راحه تقوى كلشي مابيج هن 4 شعرات عندج لزكيهن بالجل وروحي..

.. لا عيني شنو الزكهن بالجل مرت ثابت على سن ورمح وشعرهه لاطش على كصتهه ..

.. ابتسم .. ااااخ من السانج يرادله عض..

.. لزمت ايده كتله ثابت حباب خليني اروح ويا فاطمه...

.. ماشي راح اوديج بس اياج وبالج اسمع حجايه منا منا وموتجيني ملطخه مكياج...

.. لا والله ما اخلي هواي..

وصلني للصالون الساعه ب12 ونص وانطاني فلوس وكال من تكملون خابروني اجيكم..

طبيت لكيت فاطمه يسوون بشعرهه تفاجأت من شافتني..

كالت ها ولج منو جابج بسلا شردتي؟؟

.. لا وين شردت جابني ثابت..

.. صاحت ثابت جابج يمعوده كولي غيرهه والله جنج بطل بيبيسي وشاله حال اخوي..

حتى النسوان الي بصالون ضحكن وابتهال متعجبه اكثر من فاطمه..

عبالهم بس هم متعجبين مايدرون حتى اني واكف عقلي ..

سوتلي ام الصالون شعري ورفعت نص منه ومكياج خفيف ...

خابرت ثابت اجانه..

طلعنه فاطمه تسحل ببدلتهه واني وراهه مطلعه بس عين وحده اخاف من ثابت وتسريحتي عاليه رافعه العبا طالعه جني الملويه..

صعدت بالصدر وابتهال صعدت فاطمه ..

كال ثابت هاي شبيج جنج حرامي؟؟

..كتله موكلت لا احد يشوفج..

.. عفيه تسمعين الكلام..

اندار على فاطمه كالهه هافطومه شلونج..

.. كالتله ولك ثابت التسريحه عبالك بلوكه والحمره كلهه ريحه اجلاب...

خرب ضحك عليهه كالهه هو انتن تذبحن نفسجن على هاي السوالف...

خلصنه الطريق سوالف واني جوعانه..

.. كتله ثابت ماخليتولي غده؟؟

.. اي شلون مانخليلج حتى الخطار كل واحد رجع ماعونه كالو هذا غدا ست تقوى!

بس اريد افتهم عقل عندج لوتنكه وين راح الاكل واضملج ..

.. اني لازمه العبا ومطلعه عين وحده التفتت علي كتله يااا شجاك غير جوعانه...

.. ابتهال خربانه ضحك..

كالتله ثابت خوش تونس تقوى..

كالهه اي عدهه طلعات عاطله ...

وصلنه للبيت ودخل السياره جوا ونزلت العروس تلكنهه بالهلاهل والصلوات ..

وصانه ثابت ممنوع التصوير وابتعد عن الكاميرا...

دخلت جوا واشكال والوان احمر وازرك العيون كامت تسورب ..

اكو منهن لابسات طفي الضوه والحكني...

بدت الحفله واغلب الانظار عليه ويأشرن ويحجن..

كالت افراح سمعت وحده دكول معقوله هاي مرت ثابت شوصغيرونه وهو الشيب تارس راسه..

خلصت الحفله وركضت غسلت ولبست دشداشه لان راح يبدي الكراب بعد ساعه عن العشا والحجيه خبصت الدنيا لان تأخرت الحفله ..

كمت اشتغل وملتهيه ...

من ضمن المعازيم جانت نعيمه محد عزمهه بس لان عزموا عمي اجت هي وغاده وغسق...

مافرغت اكعد وياهن واسولف ..

لان عدهم عاده اهل العريس يسوون حنه للعريس بليل ولان ابيتنه يعني اكو حفله ثانيه بليل وهم تعال بدل..

جان شغلنه كله ركض بركض حتى نخلص من وقت ونستعد للحفله..

صار وقت العشا اجه ثابت كال يله صبن..

واشرلي اطلعي ..

مادخلت للمطبخ لحدما خلصوا...

بسرعه لمينه المواعين وغسلناهن..

واكفه على السنك اغسل..

سمعت صوت وراي انتي مرت ثابت؟؟

التفتت شفته براق كتله اي...

كال خوش يصيد صيدات ثابت...

جانت واكفه بسمه وانسام بوقتهه اجيت اركعه بالماعون على راسه..

بسرعه عفت المواعين وطلعت شكد سخيف عرض ابن عمه وكاعد يتغزل والله لويدري ثابت جان خلا شذر مذر...

بدت الحفله المسائيه ودك وركص ولبست النفنوف القصير ودنيا حارت شلبست بس والله حلوه عليهه جسم خرافي...

بدت تخلص الحفله...

صعدت لغرفتي اريد ابدل كلت لا اريد ثابت يشوفني بس شلون اصيحه...

طلعت من الغرفه اريد اشوف جاهل يصيحه لكيته واكف على الدرجه الاخيره يعني صاعد...

واكفه دنيا كدامه ..

والله اني مرته واستحيت لابسه بدله قصيره لركبه وبس من جهه بيهه ورد والجهه الثانيه ماكو شي ...

صدرهه مبين وقماش الفستان لازك يعني تخلي الأعمى يفتح...

شفت ثابت واكف يباوعلهه وهي ساده الطريق علي..

المنظر حركني حرك صحت هاثابت اجيب هستوني ردت ادز واحد عليك؟؟

.. اشرلهه بيده معناتهه وخري...

واجه للغرفه ينافخ ...

كلبت وجهي اني...

كال ها شتردين تصيحيني...

.. ماجاوبته اني لابسه عبايه اسلاميه كمت افتح بيهه اريد ابدل..

نسيت اريد اشوفه الفستان...

من نزعتهه كال ماشاء الله طالعه حلوه لاكيلج..

.. كتله منو اني؟؟؟

.. لا اذاني...

.. شعندك واكف تبحلق بدنيا لازم عجبك لبسهه...

.. بسرعه اجه جرني من ايدي حسيتهه تريد تنخلع كال...

ولج اكص السانج واخلص شكم مره كتلج اذا ماتعرفين تسولفين الصمي...

شكم مره كتلج ماتعنيلي شي غير وحده تافهه تعرض بنفسهه ليش تخليني اطلع من طوري واحجي عليهه...

شفته صار عصب واني ماعرفت احجي واكسب الموقف لصالحي ...

بسرعه حضنته اريده يهدء...

سكت وابتعد كعد على الجربايه خفت اتقرب علي لان من يصير عصبي ما اكدر احجي..

رحت بدلت وسبحت لكيته مبدل ومدد بس مبين العصبيه بعيونه...

التزمت بالصمت...

بس الوضع مايطمن على ساعه ينفجر...

ردت اطلع صاح بيه كال وين رايحه؟؟

.. كتله اريد انزل يم فاطمه..

.. تعالي نامي وسدي الباب ..

.. كتله الساعه ب10 وبعد اكو خطار وين انام...

.. سدي الباب وتعالي نامي ولاتحجين حجي زايد..

.. سديت الباب وطفيت الضوه ورحت نمت بصفه

حسيت علي سحبني لحضنه دكات كلبه سريعه ومبين معصب شوكت يتخلص من هاي الحاله...

حسيت بي كام يهدء شوي شوي ...

وغط بالنوم...

باوعتله ضوه خافت عاكس على وجهه..

شكد حامل قهر وضيم ...

ثابت واسمك عليك ماتنهز وشلون هدء بحضني وغط بالنوم..

ضليت اتمعن بي وقررت ابذل كل وسعي حتى يخلص من هاي الحاله..

اسمع الهوسه جوا واحنه نمنه من وقت ..

ثابت تعب وعلاجه بي منوم استسلمت ويا للنوم وغفيت...

كعدت الصبح باوعت ماموجود كمت غسلت ونزلت ..

نفس الهوسه مال البارحه وبعد اكثر لان اليوم العرس ...

شوي واجه ثابت نفس حالته مال البارحه وعصبي بس كوه ضاغط على نفسه...

صار العصر وبده موعد الزفه يقترب...

كالت الحجيه تروحين وي ابتهال للزفه؟؟

كتلهه ماكلت لثابت...

رحت كتله وماقبل كال لا ماترحين...

رجعت كلت لابتهال ثابت مايقبل اروح ..

ضلينه ننتظر الزفه اني كلساع اجيب مي لنسوان شفت بسمه وي براق هي وانسام بس مامنتبهه...

اثناء ما احضر بالمي..

كال براق يله تقوى اجت الزفه وثابت يكول انتي وابتهال ترحن وياهه...

كتله لا مايقبل اروح...

كال لا هسه هو كالي روح كولهه لاتعوف فاطمه وحدهه انتي وابتهال وامي بس الي يرحن...

كتله لعد هو وين ما اجه وكالي؟؟

كال راح عنده شغله مستعجل...

رحت كلت للحجيه نفس الكلام..

كالت يمه مدام كايل لابن عمه

روحي هي خطوتين ولاتعوفين فطومه وحدهه..

ومالج علاقه اني اكله وديتهه ..

كتلهه خاله كلبي لاعب خاف مايقبل وشيخلصني؟؟

.. لايمه شنو السالفه مو وياج ابتهال وقابل براق يجذب غير ثابت كالع هاي تلكين فراس لح علي حتى تروحين وياهه

اني مبدله اجت الزفه ورحت وياهم ماشفت ثابت بالزفه صعدنه وي براق كتله شو ثابت ماموجود بالزفه ..

كال اخو العروس مايصير يروح...

وصلناهه للفندق ورجعنه موبايل ابتهال ماسكت وتباوعلي بنظرات غريبه...

كلبي اوجعني وما اعرف ليش مامرتاحه وخايفه كلساع اتعوذ من الشيطان ...

كالتلي ابتهال تقوى ثابت يدري بيج اجيتي...

كتلهه هو كال لاترحين بس دز براق وكال خلي تروح والحجيه كالت روحي واني اكله ...

رجعنه للبيت وثابت ماموجود النظرات كلهه عليه جرتني لقاء كالت امشي صعدي بغرفتج ولاتنزلين ثابت يموتج اليوم شلون ترحين وهو كايلج لاترحين...

هي كالت هيج واني وكف الدم بعروقي كتلهه براق كال ثابت يكول خلي تروح..

امشي ياثوله اليوم يصلخ جلدج يابراق ابو النسوان ذيل انسام ودنيا...

كتلهه فدوه لقاء شسوي حته الحجيه كالت روحي ماعليج اني اكله...

ماتعرفين ثابت محد يوكف بوجهه امشي صعدي بغرفتج ولو يطلع الدم منح لاتصيحين ترى كلهه كاعده مشمته ...

كمت ابجي ووجهي صار اصفر كتلهه ولج لقاء ضموني بمكان والله يموتني ...

اخذتني للغرفه وكالت اكعدي واسكتي ولاتصيحين وادافعين ترى يزود ولا تخليهن يسمعن صراخج...

يمه جانت كلمات لقاء عبالك تيزاب وينزل على جروحي...

واني اروح وين اضم نفسي هو منا عصبي شراح يسوي بيه..

اني شعليه غير براق كالي والحجيه كالت روحي...

افكر شلون ابرر نفسي وشلون اخلص من هاي الورطه والله رحت بدون نفس حته ماتونست ضايجه وروحي طالعه....

اندك الباب كمزت اجاني صوت افراح ...

فتحته وشبكتني كالت اهدئي راح تموتين..

كتلهه افراح والله ماسويت شي غير براق كالي...

ولج تعالي يمعزايه..

احنه جنه كاعدين ننتظر الزفه تدرين عشا ونحضر اجه ثابت يضحك كال ها شو كاعدات مارحتن للزفه..

كالتله انسام لا البركه بمرتك وابتهال بس هذني راحن...

ولج عينج لاتشوفي شلون صار عروقه برزت ويمكن لوكدامه حايط يهده...

ماصيح كدامهن بس راح على امه وتعارك وياهه وكالتله موانت دزيت براق عليهه وكلت خلي تروح وكالتلي وكتلهه روحي...

وهو تخبل كال شنو وادز براق واني وين رايح واجي اكلهه اليوم اذا اجت الا اذبحهه..

وكون نسكت بي ونكله لايسمعنك هذني العكارب..

طلع خابر براق والكلب كايله لا اني شعليه بسوالف النسوان علي كال اخذ النسوان لزفه ومن صعدت شفت مرتك...

لعد انت ماتدري بيهه؟؟ والله اني تعجبت كلت ثابت مايقبل بالعيبه ومرتك الله يستر عليهه مكياج صارخ وسيارات الزفه تركض وراي...

ورجع ثابت متخبل عبالك بركان وهايج وكال راح اطلع من تخلص الهوسه اجي..

من كالت هيج شكت ولطمت على صدري وابجي كتلهه افراح عليكم الله خلصوني من ثابت والله اليوم يموتني لاتعوفني وحدي...

كالت عامر خابرع وحاجي ويا لاتخافين ..

ثابت عصبي حتلو يكتلج لاتراددي ترى يزود ومايعرف الكدامه...

عافتني وطلعت واني دموعي تمطر مطر ياربي ساعدني ماسويت شي ...

ليش هيج مكتوبلي ماردت اروح والحجيه دزتني سوده بوجهج تقوى االيوم ثابت يطلعلج جلد ثاني..

كمت توضيت وفرشت سجادتي وصليت وطول الصلاه ادعي كون يهدء كلب ثابت..

سمعت خطواته على الدرج حسيت ساعه الصفر اقتربت موبس كلبي يرجف كلي يرجف ...

ربي استرني لاتفضحني واتفشل كدام العقارب الجوا ..

كالت لقاء كلهه منتظره شراح يسوي بيج ...

ابتسامه بسمه وانسام مافاركتني شلون مشمتات...

كمت اردد بأيه الكرسي واستغفر ...

انفتح الباب صرت بوجهه واني لابسه المحرم مال الصلاه....

#يتبع

الخامس والعشرون

لاتغفر

《روزاية》

انفتح الباب صرت بوجهه واني لابسه المحرم مال الصلاه....

باوعتله شفت بركان كدامي سد الباب بلحظه ما اذكر تفاصيل كولشي..

ضربني راشدي وكعت بالكاع...

اريد اكوم ادافع عن نفسي ماحسيت غير الدفرات اتوالت عليه ..

ويه كل دفره تطلع روحي ..

ماطلعت صوت بس احجي على كيفك ..

كتله ثابت خلي افهمك..

بس الظاهر ثابت صم بكم لايسمعون..

سحبني من ايدي احس توزاني مختل اروح منا وارجع منا...

خله ايده بركبتي ورفعني ليفوك

صاك على اسنانه ويضغط على ركبتي لازمه ايديه اثنينهم اريده يفل عني

وجهي انطعن صار ازرك بس اريد اخذ النفس ..

بلحظه تشاهدت بكلبي لان ضاق الهوه عليه..

دموعي نزلت على خدي واني معلكه بيده..

حتى ما اكدر اصيح انقذوني...

لحظات بشعه ما اكدر اوصفهه بأي كلمه...

شفت الموت قريب بدت يتلاشى كلشي كدامي..

حتى اصوات الهوسه برا ماعدت اسمعهه..

من حلاة روحي كمت ادفر برجله ..

تركني وشمرني بكل قوته..

اضرب كتفي بالحافه مال الجربايه..

كمت اكح واخذ النفس كوه واشهك..

وهو واكف على راسي مثل ملك الموت..

اشهك بكل قوتي اريد اتنفس بس الاوكسجين ما يوصل لرئاتي ...

لحظات مرت مثل الافلام ..

هذا الواكف كدامي موثابت ..

الي شفته مجرم كل رحمه ماكو بكلبه..

عيونه اطاير شرر وتحرك شكو كدامهه..

التفت عليه وكال بعصبيه ويلهث كأنو جان بسباق...

اني شكتلج ولج بكد القندره وتكسرين كلامي..

كتله بصوت متقطع ..

والله براق كال ثابت ...

ماخلاني اكمل جرني من شعري ويفر براسي..

ويحجي..

شنو براق كالج منو رجلج؟؟ واذا كالج نعال ليش ما سألتيني صدك لوجذب؟

وشعندج واكفه ويا؟؟

ترك شعري وكام يضرب بيه راشديات كل راشدي يخليني اسمع طنين اذني...

كل هذا وماطلعت صوت اسمع صوت دنيا وانسام والضحك بالغرفه الفوك..

بكل قوتي حافظت على ماتبقى من كرامتي وحتى مايشمتن بيه..

يمكن سكوتي ثار غضبه وعباله ماجاي اتألم..

نزع حزامه ..

بس رفعه بالهوه وسمعت صوت الوشه مالته ..

انهارت قواي..

كام يضرب بيه بكل قوته بي طبيعه من يضرب ما يصيح ولايعلي صوته..

من كد الهدوء الي بلغرفه بس صوت الضربه ينسمع..

عضيت ايدي وي كل ضربه احس روحي تغيب وترجعلي...

انهد حيلي حتى ما اكدر احامي نفسي..

والي واكف كدامي عشر زلم مايكدرون يلزمو..

فد بركان. .. اعصار ما اعرف شوصفه ..

هاي حالته شفتهه بيوم من عرف بخيانتي وبعد اكثر...

اكثر ضرب حصلته على ضهري وافخاذي...

خارت قواي واستسلمت للضربه الثانيه ..

شفت الحزام يفر بالهوه حتى يوصلني..

كلشي غوش عندي ومادريت بنفسي ووكعت..

ما اعرف شكد مر وشلون عافني بس انتبهت من ذب عليه مي بارد..

فتحت عيوني والالم يكطع بيه ..

نفس عصيبته وعيونه دكلي بعد ماكمل حسابي وياج..

عافني وطلع وسد الباب..

حاولت قدر الامكان اتماسك واكوم..

ما اريد يجن ويشوفني مشموره بالكاع..

وجهي احمر واثار اصابعه مطبوعه على خدي..

كوه كمت بعدما لزمت الجربايه بس الضرب الي اكلته رجليه جان كفيل يخليني ازحف..

ماكدرت ابد رغم اضغط على نفسي بس باءت محاولتي بتصنع القوه بالفشل..

كمت ازحف واني كاعده حتى اوصل للباب الحمام...

دخلت واني استند على الحايط ومدنكه مثل العجوز الي عمرهه 80 سنه

فتحت مي دافي وغسلت كلما يلامسني المي احس جروحي تنتفض ماباوعت لجسمي ولاشفته..

بس غسلت وجهي وطلعت ..

رحت كعدت على الجربايه واني ما اعرف شسوي ووين جانن مضموتلي هاي...

اندك الباب ماكلت منو لان العبره خانكتني..

بس اجاني صوت بسمه وينج تقوى شو ماطلعتي تعالي سولفينه عن الزفه اتونستي..

حلوه لولا؟؟؟

جان كلامهه بي شماته واكيد عرفن لان مانزلت بعد...

كلما اسمع حركه الزم كلبي اكول هسه يجي يكتلني...

ما ادري بنفسي من الالم والتعب مددت وغفيت...

فزيت على صوت القفل مال الباب..

نسيت الالم بسرعه عدلت كعدتي وانتظر اصدار الحكم ...

ماباوع بوجهي...

طب سبح وطلع واني على كعدتي..

كال كومي من وجهي لا ابتلي بيج ولمي غراضج ورجعي لنعيمه لان اذا ضليتي حرام اطلعج جنازه...

كتله وين اروح لنعيمه تريدهه تشمت بيه وهذني الكاعدات جوا..

ثابت تريد تكتلني اكتلني هنا طلعه ما اطلع من البيت واصير فرجه لليسوه والمايسوه..

اشو هذا طفر عليه جنه كنغر وكعلي راشديات..

راسي يلعب بين ايديه ..

ويسب ويغلط وهم الج عين وتحجين ...

ما ادري منين اجتني القوه وحجيت..

كتله موبس تحاسبني روح حاسب ابن عمك العار الي هو جذب عليه وكال ثابت دزني..

ليش تحملني مسوؤليه سخافه وحقاره كرايبك..

انجبي لا ابتلي بيج ابن عمي نكر ويكول شعليه واكول هيج موانتي رايحتله كايلتله ثابت مايقبل روح حاجي..

من كال هيج ضربت على صدري..

كتله ما اكول بس حسبي الله ونعم الوكيل على كلمن ضلمني...

دموعي كامت تنزل وما اسيطر عليهه..

دار وجهه وراح نام وطفه الضوه واني على وكفتي ..

جريت فراش ونمت بالكاع اشهك وابجي ..

ما اعرف الوم نفسي لو الوم حضي الاغبر...

ليش هيج ربي قاسملي بس الحزن والكتل والله حته جسمي تملخ حسبي الله عليجن ماتشوفن الراحه ياظالمات...

ضليت ابجي لحدما غفيت كعدت الصبح

ثابت ماكو ...

كمت غسلت بس عيوني وارمه من البجي..

كلت ما اخليجن تشمتن بيه يا حقيرات

اريد اشوفهن منو الي كادن الهه مكيده..

لبست كلابيه خليجيه لونهه وردي فاتح وخليت مكياج خفيف وخفيت الاثار ...

من ضربني ثابت اجت ضربه على شفتهه طرفهه صار ازرك ...

مشطت شعري ورشيت عطر..

لبست ذهبي ونزلت...

لكيت السعالوا كلهه مجتمعه كلت صباح الخير بس بكل اريحيه..

قسم رد وقسم لا...

لقاء وافراح صافنات على وجهي ...

وهذني القروده صارن بالونات بس يردن ينفجرن...

صبيتلي كوب جاي وسويت لفه جبن وتريكت..

ماكو بس النسوان...

وحده من المتفاجئات الحجيه تباوعلي وعبالك اليوم شافتني...

كالت بسمه وينج البارحه شو صعدتي وبعد ماشفناج..

.. كتلهه تعبانه ونمت..

.. مو شفنه ثابت صعد عصبي وهو مايدري بيج رايحه لزفه وكلنه يجوز اخذت المقسوم..

.. ضحكت بصوت.. كتلهه لا هو ماعنده اعتراض بس كال اغار عليج وما اريد واحد يشوفج ..

.. فرت حلكهه وباوعت لانسام..

كالت انسام مامبين عليج حلكج ازرك يجوز البارحه واحد من البوكسيات اجه على حلكج..

.. خليت ايدي على شفتي وكتلهه..

ياا همزين نبهتيني هاي سوالف اخوج من يريد يعاقبني يعاقبني ببوسه ..

شكد عيب هسه الي يشوفهه شيكول...

من حجيت هيج حسيتهن على دقيقه ينفجرن ويسممنه ..

لقاء وافراح كوه حابسات الضحكه...

واني اتكطع من جواي..

جسمي يحركني وكلبي يوجعني..

بس ما انطيتهن مجال يشمتن بيه...

صاحتني الحجيه ورحت لغرفتهه...

كالت تقوى كتلج ثابت..

ماتحملت بسرعه بجيت شلتلهه ثوبي وشوفتهه فخذي شلون ازرك..

ماكدرت تحجي بس كالت الصوج بيه يايمه اني قنعتج المفروض امنعج بس شمدريني بهالكلب هيج يسوي وشنو مصلحته؟؟

كتلهه غير انسام وبسمه دفعنه عليه بس هو عار لان اني اعتبر عرض اخو ...

وكلي امرج لله واسكتي اتجنبي ثابت واحمدي ربج ما انفضحتي ودرن بيج جان فوك الحمل تعلاوه..

خاله انتو شكو قابلين يبقن يمنه خلي يطلعن لو احنه نطلع ثابت موعنده بيت؟؟

يابيت يمه باعه من زمان ثابت مو فتح فرع للشركه وباعه وهاي شوفه عينج متحملين وساكتين...

وهسه ثابت داخل بمشروع مايكدر يشتري بيت ..

ولا نكدر انطردهن فشله من علي وعامر تعتبر خالتهم..

سمعت صوت ثابت بسرعه كمت ما اريد يستفردن بي...

شافني واكفه بالباب مال الغرفه فتح عيونه على وسعهن مامتوقعني هيج البس وانزل ولاكأنو البارحه لعب بيه شامريوا...

يحجي وي ابتهال وعينه عليه ابده يجي ياكلني..

كلت خلي اصعد واتجفه الشر..

صعدت لغرفتي شويه واجه وراي..

كال شعندج مكيجه ونازله مافادت بيج كتله البارحه لو صلافه هاي..

كتله شتريد انزل مزروكه حتى تكيف بسمه واخواتها..

لا ست تقوى لبسي ضيك وتمكيجي ونزلي ..

ما اعرف شنو السويته والله بلاني بيج

والله لوعندج اهل من الصبح شمرتج يمهم ولاعين التشوف ولا اذن تسمع..

من كال هيج حسيت بخنجر ونبت بكلبي شكد كلامه ذلني وحسسني رخيصه...

كتله جاي تعيرني ثابت باهلي ..

اي ماعندي اهل وانت مستقوي عليه ..

لصمي حلكج واسكتي..

بشنو مستقوي عليج لو لان احاسبج حقج متعلمه على الدياحه وكسرت الكلام..

تقوى مليت منج وكلما انعل الشيطان واكول مااحملج ذنب اكتشفج ماتستاهلين ...

شغله وحده بيه مدمرتني وماتخليني اعرف اتصرف..

هي غيرتي على عرضي..

وانت من يوم الي عقدت عليج صرتي بأسمي ..

واتندمت ارتبطت ببيج وياريت لويرجع الزمن وما اخطي هيج خطوه...

كلجن نفس الطينه بس تشوفن عين من واحد دكومن تسرحن وتمرحن ...

عليت صوتي وصحت كتله لا تجاوز ثابت من يوم الي تزوجتك لسه ما واصله الباب لا تجمعني وي الساقطات المرن بحياتك...

غير واكف على راسج يله احترمتي نفسج وبس حصلتي مجال ركضتي...

كمت ابجي كتله ثابت لاتتهمني باخلاقي حرام عليك ماسويت شي غير الصار وتدري بيه مظلومه بس مايعجبك تصدك..

كافي تقوى لاتسمعيني صوتج ولاتشوفيني شكلج حاولي قدر الامكان تبعدين عني لان ما اتحملج ابد وتسوين فضل اذا رحتي لاهلج ...

عافني وطلع واني كعدت بالكاع كلمات ثابت جانت صاعقه..

مثل الي واصل لبر الامان ويتسلق وفجأه داسوا على ايده ووكع بالوادي...

يجوز لو كاتلني واموتني ولا حاجي هيج

شكد جنت بعازه الاهل بس هسه اكثر بالف مره..

لوعندي اهل جان رحت معززه مكرمه واخلي يعضعض اصابعه ندم..

وين اروح يم نعيمه حتى اطيح حضي ...

ربي ساعدني ضاق الحال وماعدت اتحمل بعد...

مرت 3 ايام كارهه روحي فاطمه قريبه وكلساع يمنه حته الحجيه تحجي عليهه ودكلهه اكعدي ابيتج..

هذني السعالوا يدورن فرصه حته يحتكن بثابت ...

بسمه وبان احسهم ساقطات ...

دنيا مالهه علاقه بس تركض ورا ثابت..

براق صارت رجله طويله واني ابد ما انزل من يجي

نعيمه كلساع الله بالخير...

وين النطيحه والمترديه الله يذبهه بطريقي...

ثابت مايباوع بوجهي ابد وحته بلبيت عصبي محد يحاجي...

اني انام بالكاع وهو على السرير

مر اسبوع الوضع لايطاق الجذب والنفاق واشوف بعيني شلون يتقربن لثابت بس هو مامنطيهن مجال ..

حته الحجيه ماعاجبهه الوضع بس ما اعرف شنو الجابرنه نتحملهن...

بيوم منهن تعاركت افراح وبان اخت دنيا صار دمايه وكوه فكيناهن...

افراح انفعلت وكامت تغلط وتسب ببان وكالتلهه انتي ساقطه وك...

ولو بيجن خير وعدجن ذره مسحه ما كعدتن كل هاي المده يمنه...

وعامر يصيح على افراح يريد يسكتهه وهي تخبلت..

كالتله هسه الم غراضي واخذ جهالي وادز ورقه طلاكي وراي اذا بقت خالتج وبناتهه هنا...

ام بسمه صافنه على الوضع والحجيه تهدي بافراح..

بس الظاهر افراح مشكلتهه جبيره...

راحت لمت ملابسهه واخذت جهالهه وعامر تخبل كالهه اذا طلعتي بعدما تصيريلي مره...

كالتله اني اكلك اذا بقت خالتك هنا ماتشوف وجهي للموت ...

مانعرف شصاير بس الواضح العركه من ورا بان...

كالت ام بسمه رجعي يمه اني راح اطلع اني اعرف بناتي صاحبات مشاكل واذنكم...

وانتو ماقصرتوا ...

صاحت عليهن لمن غراضجن وعامر ضل حاير بين افراح وبين خالته...

طلعت ام بسمه والدمعه بعينهه مخليه الشيله على وجهه واشوف اكتافهه تهتز من البواجي...

انقهرت على المنظر بس خلصنه من بناتهه المره ماشفنه شي منهه بس الله يسلمهن بناتهه شالعات ناب..

رجع عامر على افراح يصيح ويغلط وراد يضربهه كالتله جرب تمد ايدك عليه وشوف ياعامر للموت ما اخليك تلمح طرف مني ..

تريد تكتلني من ورا بان الساقطه ولك تعب السنين انت وتريدني اصفكلهه والله وامانه الله لو ماطالعه الا ادير نفط على روحي واحركهه...

خالتي سكتت افراح واخذتهه للغرفه نريد نفتهم شكو ..

بعدين عرفنه افراح كامشه بان وهي تحضن بعامر وتبوس بي ودكله حتلو تتزوجني بالسر وما اطالبك بحقوق وعامر جان رافضهه بس مارادهه تكبر ..

عجبتني افراح ما خافت من عامر لان اكو اهل بضهرهه ويخاف تروح وابوهه مايقبل ترجع لان مره يكولون زعلانه وابوهه مخليهه 4 اشهر

حتى عامر مامخلي مشيه ما دازهه عليهم..

شكد حلو الي عدهه اب يسندهه والي عدهه اخو يحاميلهه...

الا انتي ياتقوى تاكلين الكتله وتكومين لان ماعندج مكان تزعلين بي....

مر شهر ضبط على طلعه ام بسمه البيت رجع مثل قبل الا انسام ضلا تحوم ومحد ينفذ خططهه بس تخاف من ثابت وساكته...

اني وثابت وضعنه عادي بس احضر ملابس واقوم بواجبه وهو على نفس وضعه ...

بس الحجيه تهدي بيه ودكلي اصبري..

واني حته الصبر مل مني...

بيوم بليل تاخر ثابت وضليت افتر بالي قلق علي ..

سمعت صوت السياره تلكيته على الدرج جانت الساعه ب12 ونص

شافني واكفه كال شعندج كاعده؟؟

كتله ضل بالي عليك...

خله ايده ورا ضهري وصعدنه اول ماطب شمر نفسه على الجربايه ونام ما اعرف شبي ولايحجي ..

كلش غريب كلما اتقرب يبتعد..

مرت هاي الايام ملل وروتين ...

يحجي وياي ثابت على شغله شي بس مايتقربلي ...

ولا عبالك يشوفني ما اعرف شغيره

معقوله من سالفه براق ؟؟

بيوم منهن جنه نتعشه ودك موبايل علي ..

جاوب كال ها خاله شلونج؟؟

بس اسمع صوت مريه من كدما عالي تبجي وما اعرف شتحجي...

بس انخطف لون علي ..

وهو يكلهه ليش خاله شوداكم للانبار بهالوضع...

الشبكه يمهم تعبانه الظاهر انكطع الخط..

وكام علي من الاكل...

كاله عامر شكو شبيهه خالتي؟؟

كال خالتي بلانبار وبدون رجال وداعش ماخذ دنيا بس مافهمت ليش وشلون؟؟

من كال علي هيج كلنه بهتنه الخبر صاعقه ..

كام ثابت وطلعوا هو واخوته واحنه حته ماكملنه العشا...

صح دنيا عدوتي بس خطيه شابه وداعش كلنه نعرفهم شنو؟؟

كمنه ندعيلهه وانسام تبجي خابرت على بيت خالهه تريد تعرف السالفه شنو؟؟؟

اجو الولد كاعدين ووجوهم صفر حقهم عرضهم وصار بسببهم لان طردوهن...

باوعت على ثابت شفت كل نظرات الحزن بعيونه وكلساع يبلع ريكه ويضغط على ايده..

ما اعرف ليش بهاي اللحظه عذرته لان مهما تكون يبقى تسمى عرض

اشوف ثابت صافن..

ياترى ثابت بشنو تفكر؟؟ وشكال كلبك ؟؟

اكثر واحد تأثر وبين علي ثابت كلساع اباوعله شلون يضغط على ايده يريد يسيطر على اعصابه..

اجت انسام بعد مانهت المكالمه وهي تبجي...

كلنه نسمع لأنسام وهي تحجي بحرقه...

الكلام الي كالته انسام جان كفيل بأستيقاظ جروح ثابت واحد واحد...

#البارت السادس والعشرون

#ذنوب لاتغفر

#للكاتبه《روزاية》

بارت هديه لعيونكم....

اشكركم واشكر دعمكم حبايبي

القصه بالمركز الاول ..

فرحتي بيكم جبيره وشكرآ لكل وحده سألت عليه حسيتكم عائلتي والله..

اريد انبه على فد ملاحظه صغيره..

.... هواي منكم دايكولون القصه صارت موحلوه واحداث مابيهه والبارت قصير شبعت منهه هاي...

يابنات ترى القصه اسردهه مثل ماوصلتني يعني اطرق لكل الشخصيات ..

دانتقدون هواي وبهاي الحاله راح تخلوني اختصرهه باقصى سرعه واخلص..

الي معاجبتهه لاتابعهه حبيبتي انتي..

واكثر من مره كتلكم لاتغلطون البطله اتابع واكو شخصيات ميته والله قبل شوي كالت اذا لزم الامر وضلت هاي المسبه انهيهه باقرب وقت...

فدوه لعيونكم ناقشوا بدون غلط وسب لان الميت ماتجوز علي غير الرحمه.. احبكم❤❤

///////////////////////////////////

اجت انسام بعد مانهت المكالمه وهي تبجي...

كالت خابرت بيت خالي وحجتلي جنتهم ..

دكول من طلعوا منكم اجو يمنه بس خالي مو اصطلاح ويه ام بسمه علمود الورث مال جدي..

وشايل بكلبه عليهه ضلن يمنه اسبوع..

وشدو وياهه كالولهه شوفيلج بيت واطلعي لو ننطيج غرفه بس ادفعين اجار عليهه ...

ودنيا مدوره على شغل شكد ومامحصله لان الوحيده بيهن خريجه ...

وتالي ماحصلت ولاعدهن يدفعن اجار

وخالتي عافت كلشي بلانبار كاع رجلهه وخيرهم كله هناك منيلهه بعد تدفع حتى راتب ماعدهه غير راتب الرعايه ..

ودنيا متعاركه وي امهه وكايلتله كل اهلج تبرو من عدنه خلي نرجع بكاعنه نموت بكرامتنه ولا هالذله يوميه ابيت ..

وراجعات للانبار وكايله خالتي شيصير خلي يصير لان شبعنه ذل من ورا لكمه الخبز....

وطلعت ناسنه موخوش ناس..

وبيومهه خالتي ماخذه البنات ومخابره على حمامهه الي ضل بلانبار وهو مرجعهن لبيتهن...

وضاله بان كل مده تخابر على مرت ابن خالي وتحجيلهه...

دكلهه تورطنه طلع عمي منظم للداعش ومخلينه نشتغل خدم بس نطبخ ونغسل ملابسهم بس دنيا اكثر وحده متأذيه ماتقبل تخدم وعمي يكتل بيهه ويكلهه ابيعج للأمير ...

واحنه ماعدنه احد..

بالعين المهانه وساكتين وعلى

بيتنه حمايه لان عمي وولده كلهم وي داعش..

واحنه نطبخ الهم وعمي يدك فوك راسنه...

وضاله بان تخابرهه بس قليل وتخاف حته ماتذكر اسم داعش لان يراقبون ..

واليوم مخابرتهه كايلتلهه الله لاينطي خالي شالنه وشمرنه واحنه بنات..

دنيا راحت من ادينه واخذوهه داعش ومانعرف خبرهه وين؟؟

بان دكول اجه عمي يريد غدا الهم وكايل لدنيا سويلنه وكايلتله لوتصلخ جلدي ما اخدمكم انتو متبري الاسلام منكم وكلكم سفله وارهابيه وعمي انهد عليهه وضاربهه ودنيا ما طاخه راس وما اشتغلت ابد...

وهاد عليهه بالسلاح وكايلتله دنيا يله اكتلني

"من مات دون عرضهه فهو شهيد"

وهو متخبل وكايلهه الا اخليج تشوفين الويل..

دكول بليل واجوا مسلحين داهموا البيت واخذوا دنيا وسوه نفسه عمي ما اله علاقه بس هو اكيد باعهه ..

ومن كناله كله من وراك يكول حته اني ما اعرفهم؟

تسولف انسام وتبجي والحجيه تبجي كلنه نعرف قذاره داعش شراح يسوي بيهه ..

وين راح يلكوهه وشلون؟؟

حتى اتصالات ماكو كوه يخابرون...

خابر علي على خاله لان هوبس خال واحد عنده

ضلوا يتناقشون ...

شفت ثابت كام طلع...

صار عندي فضول اروح ورا...

شفته واكف بالحديقه يدخن ويفرك بوجهه...

ما الومه صعبه جانت بيوم خطيبته وعرضه وبيد الدواعش..

بغض النظر عن مكانه دنيا بس لو وحده غريبه هم ينقهر عليهه...

كلهم العراقين صاحبين نخوه ومايقبلون على عرضهم ينداس..

اجه خال علي ابو فارس هو وابنه وكعدوا يحجون شلون ينقذوهه ..

وعبالك جاي يحجون بحلم منو يكدر يوصل للانبار وفوكاهه بنص داعش ينقذون بنيه...

صدك العرض غالي حتى وجوهم صارت صفر...

مهما تكون ومهما صار تبقى شابه وبيت الدواعش الله يكون بعونهه...

خابرو على سامر وفراس اجو لان عدهم معارف بجيش..

اباوع لثابت قبل شوي مابي شي ..

هسه مهزوز حتى مايكدر يحجي بس هم يناقشون...

ما اعرف خوفه على دنيا لو هاجت جروحه لو اكو شي ثاني؟؟

ضلت عيوني تراقب بثابت وين مايروح...

بعدهم يسولفون...

ودك تليفون علي باوع لرقم غريب...

فتحه كال الووووو....

ماسمعنه غير صاح بصوت عالي...

شنوووووووووو؟؟؟

من صاح علي شنوووو؟؟

كلنه ننتظر يسد التليفون ونفهم شكو...

الصوت مو واضح وانقطع الاتصال ..

كاله ثابت شكو علي؟؟

كال هاي خالتي دكول باعهه عمهه واليوم وزوجهه للامير الي يشتغل جوا ايده...

واريد افتهم هي وين بيا منطقه وشلون ..

الشبكه يمهم ماكو...

ياربي صبرك...

مابعرفون شيسوون خطيه ام بسمه ماعدهه احد ..

هو اخ وواحد وشمرهه بنص النار واخواتهه وحده ماتت ماعدهه اطفال وام علي وام سرمد هي كاعده يمنه...

حموات ماعدهه بس حمويين 2 ومنظمين لداعش..

شنو ذنبهه هاي الشابه..

تنباع لأقذر خلق الله ..

افراح حست بتأنيب الضمير وضلت تبجي دكول اني طردتهن ...

خالتي كامت تصلي وتدعي دكول عرضنه وهم بلاساس كرايبنه ام بسمه بنت عم حجي عقيل..

يعني بنات عم وكلهم من دم واحد..

عيني على ثابت اباوعله شلون وجهه انطعن..

اتذكرت كلامه من كال العرض غالي...

تبقه دنيا عرضهم ...

علي دز على عمامه وولد عمه بلكي يساعدو..

اجه براق وياهم شفت ثابت اشرلي براسه معناتهه اصعدي..

صعدت لغرفتي ومانزلت لحدما راحوا...

بيومهه ثابت مانام للصبح كلما اكعد اشوفه كاعد بالحديقه يدخن...

كلت خلي اطلع ورا ...

فتحت باب المطبخ وصحت ثابت التفت عليه شافني...

شمر الجكاره واجه..

كال شعندج كاعده؟؟

.. كتله مو كلما افز ماكو انت !!

.. خله ايده ورا ضهري وكال امشي نصعد..

.. مدد على الجربايه وما اعرف شحجي ويا..

كعدت يمه ..

.. كال ها ماتنامين؟؟

.. كتله ثابت حقك تنقهر وتضوج كلنه مقهورين بس لاتسوي بنفسك هيج...

.. باوعلي وكال تقوى روحي نامي ولاتحجين..

.. كتله شلون انام واشوفك هيج..

.. شبيه قابل طفل كلشي مابيه مقهور لان عرضنه بيد هذوله الانجاس ..

وشلون عمه باعهه..

جر حسره شكبرهه وسكت...

.. كتله حقكم بس غلط يرحن للانبار وهن بس بنات...

.. تدرين اني السبب ؟؟

.. استغربت كتله ليش انت شعليك كلنه نعرف افراح طردتهن..

.. لا صح افراح طردتهن وراحن يم خالهن..

وهم طردهن خالهن..

بوقتهه اجتني دنيا للشركه كالت اريد اشتغل يمك حتى ندفع اجار لخالي وحجتلي عن خالهه...

بس ماصدكتهه عبالي لعبه منهه لان ماتوقعت خالهه بهالنذاله..

وماقبلت كتلهه ماعندي مكان شاغر وسديته بوجهه

شكد حاولت ادبرلهه شغله بس ماحبيت وجودهه بشركه وكلت ورا تصرفهه غايه..

ورا يومين خابرتني ام بسمه كالت خاله والله ماعدنه مكان وهذا اخوي هيج سوه بينه ليش ماتشغل دنيا حتلو بنص راتب عاد بس ندفعله اجار على الغرفه واللكمه الله يدبرهه...

كتلهه خلي تجي باجر اداوم ...

ثاني يوم ما اجت خابرتني ام بسمه تعتذر كالت خاله ماترضى دنيا لان رفضت بلبدايه ودكول كافي نصير عاله على غيرنه...

كتلهه براحتهه اذا احتاجيتي شي خابريني..

واذا ردتي بيت اني اجرلكم واحد ..

وبعدهه ماعرفت اخبارهم عبالي استقرو يم خالهم ما ادري راجعات للانبار...

لزمت ايده كتله لاتذب الصوج بيك هذا قدر ومكتوب وان شاء الله ترجع سالمه...

ماحجه شي مدد وكال راح انام وتعالي نامي انتي...

بوقتهه نمت يمه من عرس فاطمه مانمت بصفه بس احس النايم يمي جبل مال هموم...

حتى نفسه مامستقر والله اعلم بشنو يفكر واكيد محمل نفسه الذنب ..

كلش صعبه اشوف زوجي باله يم وحده ثانيه لومايحبهه ماينقهر عليهه..

تجمعت الدموع بعيني وبجيت اعرف ثابت لسه يحبهه بس مايريد يقربهه...

اني مجرد زوجه وتلبيه واجب..

حسيت على ايده انمدت جوا راسي وخلاني على صدره...

نزل ايده على عيوني ومسح دموعي ...

يمكن سمع صوتي من ابجي..

كال ليش تبجين؟؟ سكتت

كال تقوى لا يروح بالج بعيد ما عندي شي اتجاه دنيا بس موبيدي ما انقهر الصار اني السبب لو مشغلهه ماراحن برجليهن للموت...

ما ادري شلون طلعت مني شهكه وكتله ثابت انت ماتحبني؟؟؟

.. شلون ما احبج بنيتي انتي لاتفكرين بهيج شي اذا مااحبج شلون اتزوجتج...

اي شي احجي واني عصبي لاتصدكي ..

من اعصب اكوم اخربط شيش بيش ..

شعندي غيرج انتي حبيبتي ...

ضل يلعب بشعري وغفيت ...

عفته هت وافكاره كافي الحمل الي عليه...

ثاني يوم ثابت راح للدوام بس علي وعامر يدورون بلكي يلكون خيط شي ولو هذا بلاحلام...

مرت 4 ايام ماكو شي جديد وثابت على نفس حالته مااعرف هذا الرجال شنو مضموم ورا....

اجت نعيمه عزمتنه على عرس غسق بس محد راحت الحجيه ماقبلت...

فاطمه بهاي الفتره طلعت حامل....

اي اخبار عن دنيا ماكو....

عصريه جنه كاعدين ونسولف...

ونسمع الباب انفتح

الصوت موغريب وحده ضلت تباوع بوجه الثانيه

عبالك وحده دكل لثانيه خاف اذني بيهه شي...

# يتبع

#البارت السابع والعشرون

#ذنوب لاتغفر

# الكاتبه 《 روزاية 》

سمعنه الباب انفتح والصوت موغريب ...

ركضنه نشوف منو...

شفت ام بسمه لازماتهه بناتهه منا ومنا وحلكهه اعوج وايدهه مشلوله...

وعباره عن جسد خاوي..

باوعت على بسمه وبان الوجه اسود ولاعبالك هذني الجميلات...

منظر ام بسمه يكطع الكلب ...

تلكتهن انسام ولقاء والحجيه تصيح اهلا وسهلا....

كعدن على التخم وام بسمه ماتحجي بس الدموع تجري...

اباوع لبسمه منزله راسهه ومن كدما باجيه الجوا عينهه مورم...

دخل علي وراهن وعلامات الدهشه والسؤال متوجهه اله...

كال لقاء كومي حضري الغرفه لخالتي ترى صحتهه موتمام ..

كامت لقاء واحنه بس نباوع ماحجينه شي...

اخذن امهن للغرفه ...

التمينه على علي نريد نفهم شكو؟؟

كال شحجيلكم بمعجزه الهيه طالعات من عمهن مساعدهن الجيش ودنيا محد يعرف شي عنهه...

وهاي خالتي صحتهه موتمام ...

كال للحجيه يمه صح غلط اجيبهن وما اعرف رد فعل ثابت شنو بس والله ما هان عليه اعوف عرضنه بنص داعش...

كالتله الحجيه لا يمه حرام الله مايرضى بيتنه مفتوح ومالك علاقه بثابت واصلا ماراح يكول شي...

كمنه نسوي عشا ووحده دكول لثانيه شراح يصير...

اجه ثابت تلكيته بالمطبخ ..

كتله ترى يمنه خطار...

كال اي ادري ...

حضريلي الحمام اريد اسبح...

صعدت حضرتله ...

سبح وطلع وهو ساكت...

كعد على الجربايه ينشف بشعره..

واني واكفه اباوعله...

التفت عليه كال تعالي ...

اجيت بصفه كال تقاوي اريد اخذج للطبيب تراجعين نشوف شنو هالتأخير بالحمل...

دنكت كتله ما ادري بس خالتي دكول خاف لان صار عندج اسقاط..

اي نروح ونشوف راح يصير سنه واحنه ماكو...

باوعتله ورفعت حاجبي كتله هسه الي يسمعك يوميه نسوي اشو صار شهرين ماكو...

ابتسم وكال ام السان اشايف منج مخلصتهه متلفلفه بلبطانيه ...

صار شهرين ماشفتج لبستي شي ولاخليتي مكياج..

المفروض ازوج عليج واخلص...

.. ثابت اصلا احسك بارد ولا تريد هذا الشي ..

.. لا مو بارد بس شفتيني شلون افقد سيطرتي وشكم مره تأذيتي...

طبعي هيج وعندي نوع من العنف ما اريد اذيج واني منا عصبي وزعلان ..

يجوز اخليج تزحفين...

.. عزاااا ثابت لاتخوفني شنو هاي؟؟

.. اي لعد صيري حبابه ولاتسوين غلط ترى ما انسى بسهوله وكلشي يموت عندي..

.. باوعت بعيونه ما ادري ليش احس باله مو وياي...

وكلامه مجرد تخدير وقتي..

احتمال يعزني او يحبني شي قليل بس الحصه الاكبر اعتقد مسيطره علي دنيا...

ورا العشا كعدنه ولمه حلوه ام بسمه بغرفتهه بس علي صاح بناتهه كال تعالن احجن منين هاي المصيبه...

بان كامت تحجي ...

كالت خالي دمرنه حتى اكل ماكو ولايخلينه ندور شغل ...

عود يتغدون وعلى الزايد ينطونه بحيث من الذله والمهانه ما نحس بالجوع...

ماما كالت خلي نرجع لبيتنه على الاقل ناكل من زرعنه هي موته وحده...

خابرنه عمي كال تعالن الوضع زين واني اشتغل بلكاع ماكال ترى اني ويه داعش....

من رجعنه تفاجأنه بحال الانبار البيوت مهدمه بس بيوت الي منظمين بالدوله باقيه...

وعمي على بيته حمايه ومرته عبالك اميره..

وعمي الثاني ماخذ عائلته ورايح للموصل وياهم...

من اول يوم بده العذاب صرنه خدامات لمرت عمي ولازم يوميه نطبخ لداعش غدا وعشا ونخبز...

جانت دنيا ماتقبل ما اشتغلت ابد وعمي يكتل بيهه وهي تعاند ...

حتى تسب بيهم كدامه وهو يتخبل ...

يتكابلون عليهه هو وابنه يموتهه وتبقى مصره ماتشتغل...

ومن تشوفنه نشتغل تضل ترزل بينه بس من خوفنه نخدم ونسكت...

عمي بلفتره الاخيره كام يتقرب لماما ويكلهه ازوجج بالسر بدون علم مرته...

وخطيه امي تبقى للصبح كاعده تخاف يهجم عليهه...

من كامت تصده كام يضرب بيهه ويكلهه اخذج لداعش يعذبوج بس جانت دنيا الوحيده توكف بوجهه حتى مره ضربت ابن عمي بالسجينه...

لحدما اخذوهه ومانعرف ووين ومن تعاركنه وي عمي كال اني بعتهه للامير ..

لان شايفهه وعجبته وانطاني خوش مبلغ بيهه وانتن هم جايجن الدور...

امي تخربطت وهذا حالهه وماعدنه احد ...

كلنه نشرد والي يصير يصير وساعدتنه بنت عمي وطلعنه ولكينه سيطره جيش وهم نقذونه...

رغم الي سونه بس حالهن يصعب على الكافر بنات وانسبن ماعدهن سند ام بسمه حبابه ماتستاهل ...

عيني على ثابت اراقب بي مدنك راسه اكيد من ينذكر اسم دنيا تهيج جروحه...

كال اذا دفعنه افلوس لعمج يكدر يطلعهه ؟؟؟

من كال هيج الكل التفت علي ..

كالتله بان اي يجوز لان عمي مستعد يبيع بنته علمود الفلوس...

كال انطيني رقم عمج ونشوفه شكد يريد حتى يطلعهه...

اني ما اعرف بهاي اللحظه ماعندي كل احساس يعني شفسر تصرفه حب لو غيره على عرضه...

مستعد يدفع فلوس وتعب كلبه بسبيل ينقذ دنيا..

بعدين كلت لا خطيه يعتبرهن صدقه ماعدهه احد ويجوز الله يعوضه بأكثر...

بهاي اللحظه افكاري متضاربه وما اعرف شنو الي افكر بي...

طلعوا الولد واني اباوع على البنات الظاهر ماراح اخلص من العذاب طول عمري...

شافتني الحجيه مبين عليه التفكير صاحتني...

كالت يمه تقوى لاتاخذين تصرف ثابت بغير شي ترى من زمان ثابت ينطي من ايده للغريب شحال وهاي كرايبه ...

كتلهه لاخاله الله يسهل علي وترجع...

..عفيه بنيتي صيري سباعيه واحوي رجلج ...

مرت يومين ثابت على اتصال وي عم دنيا...

والي عرفنا طالب مبلغ جبير حتى يسلمهه ...

وثابت قابل ...

بيوم الموعد راح علي وسامر يجيبوهه ويسلمون الفلوس...

كلساع اندك عليهم نخاف ..

بس جانت الاتفاقيه هو عمهه يطلعهه من الانبار...

خابرناهم المغرب كالو اي جبناهه واخذ الفلوس وحته ويا مسلحين ماكدرنه كلشي نحجي الظاهر عمهه عنده مكان بالدوله...

صارت الساعه ب10 وعلى اساس يوصلون...

عيوني مافاركت ثابت اشوفه شلون قلقان وما اعرف شبي ...

اجوا وجان شكل دنيا صدمه...

لحد الان ابالي ...

ذاك الجمال وين؟؟ صدك بجيت عليهه...

من دخلت تجر بنفسهه كوه ومنزله راسهه تلكنهه اخواتهه يحضنن بيهه وهي ماتنطي اي ردة فعل...

شفت ثابت واكف وعينه تتفحصهه من فوك ليجوه وعبالك يريد يطمئن على كل جزء بيهه...

كالتلهه بسمه تعالي اسبحي ...

جان ردهه عنيف دفعت ايد بسمه حيل...

باوعت لشكلهه ...

اكو خياطات يم حاجبهه..

وحرك مدري جكاره حافره نص خدهه هي عدهه غمازه بمكان الغمازه...

انتبهت عليهه ضامه اديهه وصايره جلد على عظم..

كامتلهه الحجيه بوستهه واخذتهه للغرفه هي تحب خالتي...

رجعوا كعدوا الولد وعلي يحجيلهم على عمهه الحقير شمسوي بيهم ويكلهم الا استلم الفلوس يله وخطيه من خوفهم منطيهن ومنهزمين يكولون كومه مسلحين وياهم كلنه على ساعه يكتلنه ...

كالتلهم انسام دنيا ماحجت شي...

كال لا طول الطريق ساكته الظاهر مصدومه اذا ضلت هيج نعرضهه على طبيب نفسي...

طلعوا الولد وضلينه بس احنه اخواتهه راحن يمهه وامهه ...

والحجيه كالت الظاهر البنيه مصدومه لان موطبيعيه ويجوز معذبيهه...

ما ادري ليش من يحجون يجي ابالي ثابت ميه بالميه هسه باله عليهه...

هو اني الغريبه واضوج منهه وانقهرت عليهه...

شحال هو؟؟؟

رجع ثابت بليل لكاني احضر بملابسه..

كال باجر ما اداوم اريد اخذج للمركز مال الاطفال نشوف شكوماكو..

.. كتله ماكو داعي للمركز اروح لطبيبه نسائيه..

.. لا المركز احسن صديقي بي يداوم وبي دكتورات زينه..

رحت بدلت واجيت لكيته مدد اول ماشافني فتحلي اديه رحت مددت بحضنه وايده تلعب بشعري...

باسني من راسي كال ...

تقوى اذيتج مو؟؟؟

.. هزيت راسي اااي...

.. اعذريني تصرفج طلعني من طوري نبهت عليج ماترحين ودكليلي براق كالي

منو براق وحته تاخذين كلامه...

وزحمه من اسأل رجال شكبره ويكول ماكتلهه والحجي كله ينعكس...

.. شمدريني اني غلطت ما اعرف براق شنو وليش هيج سوه؟؟

.. اني هم ما اعرف شنو غايته من هذا كله...

بس اعرف اذيتج وقسيت عليج بس استفزيتيني وعبالك دكليلي ما اهتم ...

.. لعد تريدني انزل مزوركه ويشمتن بيه لو اموت رغم الالم الجواي بس ضغطت على نفسي ونزلت واسولف واضحك بس جنت اتكطع من داخلي...

.. ياحبيبتي ان شاء الله الأيد الي تنمدلج تنكسر وياريت الله يستجاب وكلما امد ايدي اضربج تنكسر...

والله كله خارج عن سيطرتي اني عشت طفوله معنفه ولسه اعاني...

صوره عمتي مافاركتني مرات احلم بيهه تعاتبني ومرات تمشي وراي تريد تاخذ حيفهه مني...

رغم شكد اصليلهه واقرالهه قران والله حتى شاركت ببناء جامع بثوابهه...

بس مالهه ذنب وانقتلت وبعدهه طفله وركبوا ذنبهه براسي...

لاتلوميني تقوى خلصت عمري بنص الالم والعذاب...

ضامن الكلب وابو سعيد عذبوني اشكال العذاب خلو كلبي يموت...

ما اريد اخسرج بيوم اعرف اذيتج بكلامي بس والله ماطلع من كلبي من اعصب اكوم اخبط ..

حضنته واكتفيت بلسكوت...

ضل يلعب بشعري كتله ثابت منو يروح وياي باجر ؟؟

كال فاطمه تروح وياج...

كتله صدك ثابت مو على اساس فاطمه ماتخلف شلون صارت حامل من اول شهر...

... والله ياتقوى علمي علمج احنه راجعنه بيهه هواي وكالوا مايصير عدهه طفل وضلت سنين وي زوجهه وماصار لحدما اطلكت...

بس رزق ربج يجوز لان فراس راضي بقدر رب العالمين وتزوجهه رغم يدري بيهه ...

والله راد يجبر خاطرهم...

.. الله يتمم الهه ودكوم بالسلامه...

.. رفع راسي بيده وكال وانتي ياحلوه يوم الالنه واشوفج بطه كدامي ...

واريد يطلع على روحج الحلوه بس ما اريده يطلع مثل الثول مالتج...

.. ضربته على صدره كتله لا ثابت اني موثوله...

رفعني وصرت فوكا...

بدون مقدمات ولاسابق انذار كامت شفايف تجول بكل مكان..

وتقوى استستلمت ورفعت الرايه البيضه

صار عندي انصهار ذوبان تميء ..

كل العمليات الكيميائيه مريت بيهه...

ثاني يوم فتحت عيني واني نايمه على صدر ثابت العاري..

بوسته من صدره ضربني خفيف على ضهري..

كال اكعدي راحه لا ابدي بيج بشوط جديد...

ما اكدر اكوم وجسمي عريان ...

كال كومي اسبحي حتى ننزل نتريك ونروح...

لفيت نفسي بالغطا كتله ما اكوم انت كوم..

... كومي ولج البارحه ترعشين بحضني وهسه مستحيه...

ضميت راسي جوا الغطا..

كام كدامي للحمام واني ركضت ادور على ملابسي واحد بشام واحد بحلب

سبحنه ونزلنه...

لكينه الكل مجتمع ومتفاجأين بوجود ثابت لان مارايح للدوام..

كالتله خالتي ليش مامداوم يمه خوما بيك شي؟؟

.. لاحجيه اريد اخذ تقوى للطبيب لان تعبانه شويه..

.. الظاهر الحجيه ذكيه مثل ابنهه كالت الله يسهل يمه...

كلنه كاعدين ودنيا ماكو؟؟

كالت خالتي وين دنيا خلي تجي تتريك على لمتنه..

كالت بسمه خاله ماترضى تطلع من الغرفه والبارحه الليل كله تون وتبجي ..

.. اي يايمه الله يساعدهه موهين الصار ..

كام ثابت حتى اكل شي قليل الظاهر يتهرب من سيره دنيا...

كمت بدلت وهو بدل ينتظرني جوا...

طلعنه مرينه على فاطمه اخذناهه ويانه...

رحنه للمركز وتحاليل وفحوصات ورجعنه كال ثابت اني اجيب التحاليل بعدين لان كالو اسبوع وتعالو...

مرن يومين ودنيا حالتي للاسوء اكل ماتاكل ويوميه بليل تكوم تصيح عوفوني لحد ماتتخربط وينغمى عليهه...

يوم منهن بليل نايمين وفززنه صوت الدك على الباب انسام كسرت الباب وتصيح اكعد ثابت.....

كام ثابت فتحه عبالنه الحجيه بيهه شي...

كال شكو انسام امي بيهه شب؟؟

كالتله لا مابيهه شي ..

ثابت الحك على دنيا ذابه نفط على نفسه وراح تحرك روحهه ...

ركض ثابت واني ورا لكيناهه كلهه كاعده والريحه مال النفط منتشره بالبيت...

دنيا حابسه نفسهه جوا الدرج ولازمه الجداحه وايدهه ترجف وعلي وعامر يهدون بيهه ويكلولهه لا تسوين بنفسج هيج..

كلما يقترب عليهه علي لو عامر دكوم تصيح ودكلهم خلوني اطلع برا احرك روحي لاتحتركون وياي...

تقرب عليهه ثابت وهي بيهه وماتلزك بنفسهه بالحايط وعيونهه على ثابت..

ماتحجي بس تأشر بيدهه عود روح ابتعد...

خفت على ثابت خاف تجدح الجداحه ونحترك...

صار ثابت قريب عليهه وهي منهاره اشوفهه تريد تضغط على الجداحه كلنه نصيح لا دنيا..

ما ادري شلون طفر عليهه ثابت وجر ايدهه شمر الجداحه ...

وهي بكل قوتهه تدافع وي ثابت ..

جرهه حيل لحظنه وهي تقاتل بحضنه تريد تنفذ مخططهه ...

بلحظه هدءت وهي بحضنه اباوعلهه شلون وكعت بالكاع...

والتمن عليهه اخواتهه شالنهه اخواتهه ..

وثابت تشيرته كله نفط صعد سبح ...

صعدت ورا بس المنظر اوجعني شلون يحضن بيهه...

ماحجه شي ثابت تعوذت من الشيطان ونمت...

ما اريد افكر واضل اعيد بالمشهد...

ثاني يوم ثابت راح للدوام ودنيا ماطلعت ولاعرفنه شبيهه...

بس انسام تدري ورا شكم يوم عرفنه...

سمعنه بأن دنيا معذبيهه الدواعش لان عمهه كايلهم مرتده ...

وحسب السمعنا مغتصبيهه اكثر من مره ...

محد يعرف بالسالفه بس النسوان ماوصلت للزلم

بيوم رجع ثابت المغرب ووجهه مطعون طعن صعدت ورا ...

لكيته يبدل كتله شبيك ثابت شو ضايج..

ما اعرف شلون نظره باوعلي وكال مابيه شي...

اخذ الخاولي وراح للحمام ..

اجيت اعلك ملابسه ولكيت اوراق مكبوسه بسترته ..

طلعتهن مكتوب على اسم المركز مال الاطفال بس ما اعرف اقره وشمكتوب؟؟

ما اعرف ليش كلبي اوجعني ومن خلال وجه ثابت عرفت اكو شي لان نظرته غريبه جانت ..

خليت التحليل بيدي وكعدت انتظره..

طلع من الحمام كتله ثابت شكالولك على نتائج التحليل...

دار وجهه وملامحه توحي اكو شي...

كال.......

#يتبع

#البارت الثامن والعشرون

#ذنوب لاتغفر

#للكاتبه《روزاية》

من شفت ملامح ثابت اوجعني كلبي اريد اعرف شكو بالتحليل...

.. سألتهه كتله ثابت بشر شطلع بالتحليل؟؟

كال ماكو شي وحاول يتهرب بحجه العشا..

كال خلي ننزل هسه ينتظرونه...

نزلت ويا بس عقلي وكلبي ضل يم ورقه التحليل..

حاله ثابت ماتوحي بأن ماكو شي...

حته ما اكلت احسه الاكل يوكف ابلعومي ...

مثل الأيام العاديه ثابت يطلع واني اضل انتظره اليوم حتى ما كعدت يم البنات ..

ضليت بغرفتي والوب اريد اعرف شنو سبب تعكر مزاج ثابت وماصدكت ماكو شي..

صارت الساعه ب11 اجه نفس مزاجه ما اتحملت كتله ثابت بروح ابوك كول شطلع بالتحليل؟؟

.. تنهد وكال تحليلج يكول عندج ضعف بالمبايض وفرصه الانجاب عندج ضعيفه..

.. من كال هيج حسيت صاعقه وضربت راسي..

اتجمعت الدموع بعيني ..

جان الخبر كفيل بالصدمه ..

ماحجيت اي حرف بس خليت ايديه على عيوني وكمت ابجي...

سحبني لحظنه ويطبطب على ظهري ..

اسمع كلامه بس مابرد كلبي..

كال لاتبجين حبيبتي كلشي اله حل اخذج لأحسن دكتوره وتتعالجين ..

بعدج زغيره والعمر كدامج..

صح هذني جانن كلمات ثابت بس اعرف مو من كلبه ..

حيل مهتم بموضوع الطفل وعمره يتقدم وكل الي يشوفني وكال ماكو شي بالطريق..

كمت اشهك بحضنه واني اتخيل يتزوج عليه..

لو اطلك وارجع لنعيمه ..

بهاي اللحظه انهاريت كمت ابجي بدون وعي..

وهو حاضني ومثل الي يكولي ابجي وفرغي بحضني..

هدءت شويه وهو يمسح بدموعي..

كال ليش تبجين ابويه انتي؟؟

ما ابدلج بكنوز الدنيا كلهه اذا الله قاسملي طفل منج الحمدلله ..

واذا ما مقسوملي راضي بقدري..

ما اكسر بختج واجيب وحده عليج لو يبقى اخر يوم بعمري..

باسني من راسي ومن بين عيوني..

اخذني لحظنه ومددنه على الجربايه..

افكاري سلبيه بس اتخيل يزوج عليه واجت ابالي دنيا ..

اجه بالي يطلكني سنه من السنين وارجع خاويه لنعميه..

لمساته حسستني بحنيه ودكات كلبه دكلي اطمئني ما اعوفج..

كعدت على صوت الاذان واني نايمه على صدره..

كمت توضيت وصليت ودعيت ربي مايشمت بيه اعدائي ..

اني يتيمه وماعندي احد لا تذرني فردا وانت خير الوارثين..

كملت ورحت كعدته اول مافتح عيونه كتله صباح الخير حبيبي...

سحبني من ايدي وصرت بحضنه كال صباح النور شعندج كاعده من وقت؟؟

.. كعدت على صوت الاذان وصليت وهاي كعدتك ...

.. خليني نايم مابيه حيل اداوم...

.. دكوم مايفيدك النوم راح انزل اسويلك ريوك بين ما تصلي وتسبح..

.. لا رجعي نامي ما اتريك..

.. لا حبيبي اني وياك نتريك كل مره اضل نايمه..

بوسني وكام..

واني نزلت سويت ريوك كعدت الحجيه شافتني كاعده..

صبحت عليهه...

كالت شعندج كاعده اليوم ؟؟

ضحكت كتلهه انتي وثابت متفاجئين كعدت من وقت وكلت اسوي ريوك..

.. الله يرضى عليج يمه ..

خاله تقاوي ماكو منا منا ترى كلبي طافح على وليدي خلي اخذج للطبيب نشوف ليش تاخرتي وانتي صرتي حامل ...

من كالت هيج خنكتني العبره همزين واكفه يم الطباخ ووجهي مو عليهه اريد ابلع ريكي ما اكدر الغصه ابلعومي...

حسيت على لمست ثابت من خصري التفتت علي بس الدموع متجمعه بعيني..

ماحجه شي لان يدري بيه بسرعه ابجي..

اجانه صوت الحجيه ولك ثابت يمه اشو كدامي تتكمكش بمريتك..

ماكلت هاي امي كاعده..

.. ضحكت على سوالفهه ...

كالهه قابل شسويت يا امي واكفتلي سجينه خاصره...

كعدنه نتريك بس انقش ما اشتهي ومامتعلمه اكل بهيج وقت..

كمل وطلع ثابت واني لميت المواعين وصعدت لغرفتي كملت نومتي...

ماكعدت غير الساعه ب11

نزلت لكيت دنيا كاعده بالمطبخ ومكرفصه نفسهه ..

ولقاء تسوي كبه للعشا ...

كاعدين نسولف والكل مندمج...

بس دنيا بعالم ثاني وعيونهه تحجي الف كلمه ..

واني مو احسن من حالهه ...

تذكرت حالتي وشلون بيه وشلون راح اواجه الناس الي تسأل ماصار شي؟؟

اخاف من ثابت يجي يوم يتغير عليه ويتزوج بحجة الطفل...

مر اليوم عادي مابي اي تغير..

بليل من رجع ثابت شفته يحجي وي امه بس ضايج معناتهه اكو شي..

من صعدنه للغرفه سألته شبيك؟؟

كال مابيه شي بس ضجت على حاله دنيا..

امي دكول لاكيتهه ضامه السجينه بملابسهه هاي مخليه فكرة الانتحار براسهه..

كتله حقهه ثابت ترى المار عليهه مو سهل ومتعرضه للاغتصاب..

صاح بيه حيل اسكتي لاتفتحين هاي السيره..

حجاهه بغصب..

سكتت بعدين كتله اخذوهه لطبيب نفسي بلكي تتحسن..

كايلتلهه امي بس ماقابله...

غيرت الموضوع مااريده يذكر شي ولا يفكر بيهه..

رحت بدلت وبدت سهرتنه المعتاده ...

وثابت غامرني بحنيته ودلاله..

حتى احسه من يتقربلي احسن من قبل ..

لمساته العنيفه قلت ..

وصار اكثر رومانسيه بعيد عن العنف..

بعد مرور شهر الحال كما هو ..

كمت اراجع كل فتره وماكو تحسن..

كلما ارجع من الدكتوره اضل يومين ابجي..

بس ثابت عكسي يكول راضي بقسمه رب العالمين ...

بيوم منهن جانت الساعه ب2 والولد كلهم بالدوام بعدهم مارجعوا..

واحنه كل وحده بغرفتهه...

اني جنت متابعه مسلسل وكاعده اشوفه...

اسمع بس صوت الصياح وصوت عالي مال الصياح رج البيت رج...

رجليه ماعادت تشيلني اجه ابالي ثابت خاف صاير بي شي...

نزلت اتعثر واركض شفت الحجيه تركض  كدامي وصوت الصياح بي ومايقوى..

ياربي سترك ..

رجليه تمشي وراهن كلهن يركضن للحديقه...

جان المنظر مرعب مرعب ...

ما اكدر حتى اتخايله...

شفت دنيا مشتعله بيهه النار من فوك ليجوا...

اخواتهه يريدن يطفنهه ومايكدرن...

النار تلهب شكو شي قريب...

اشوفهه شلون تصارع بروحه حتى ..

جانت مستسلمه للموت وماحاولت حتى تنقذ نفسهه...

التمت علينه الجيران وطفوهه بس فد شي ماينوصف..

ما ادري شكد مر الوقت...

بس شفت الولد اجو يركضون ودنيا بمكانهه وبيهه روح وومغطيهه ببطانيه...

واخواتهه يم راسهه يبجن وامهه واكعه يم راسهه...

شفت ثابت اجه يركض وراح عليهه ...

اني جنت بس اباوع من بعيد خالتي ماخلتني اتقرب...

شال راسهه وخلا بحضنه ايده تتلمس المكان الي مالايحته النار...

عيونهه شابحه علي وهو يباوعلي...

بلحظه شهكت بحضنه وماتت...

نزل راسهه وغطا...

صار الصياح والبواجي ...

اني المنظر مال النار خلاني ارجف..

شفت ثابت تقرب عليه كال حضريلي ملابسي...

صعدت بسرعه حضرتله الملابس وسبح...

مرت ايام الفاتحه وثابت كلش متأثر ..

انقهرت عليهه الله يرحمهه ..

الله لاينطي الدواعش الي سوو بيهه هيج وخلوهه تقدم على هيج خطوه وخسرت حياتهه

هواي بنات راحن بسبب الظلم باعهه عمهه سبيه ورجع اشتراهه ثابت شكد انهانت وانحطت من كرامتهه ...

هذوله الانجاس دمرو بناتنه وشبابنه ..

اباوع على امهه منتهيه كلساع وتوكع...

اخواتهه وانسام مثل المخبلات املخات نفسهن..

صعبه شابه بعمر الورد راحت ضحيه وخسرت الدنيا والاخره...

خلصت ايام الفاتحه والحزن مخيم على البيت..

ثابت متأثر حيل واكثر منه اخوته ..

مقهورين على شبابهه وشلون خطت هيج خطوه ...

كل واحد التهى بنفسه وهي تعيش صراع بينهه وبين نفسهه...

مرت عشر ايام ضبط على وفاتهه...

واني استحقيت مراجعه اخذني ثابت ونفس الفحوصات والتحاليل وماكو شي جديد..

كل مره اطلع دموعي على خدي واشوف الحسره بعيونه...

يحاول يهون عليه وعود هو ما مهتم بس عيونه تحجي غير شي...

رجعنه بالطريق كال خلي نتعشه ونغير جوا ...

بعدنه نسولف دك تليفونه ...

جاوب كال هاااا عامر...

بس سمعت ثابت كال ..

لا اله الا الله انا لله وانا اليه راجعون...

جاي بطريق...

سد التليفون واني اترقب منو المات كلوبنه خلصت؟؟

.. كتله ثابت شكو؟؟

.. كال ام بسمه توفت هسه..

.. يمه الصبح مابيهه شي ..

.. لاكيهه ميته بفراشهه..

.. انقهرت حيل .. الله يرحمهه خلي ترتاح ضلت تون على بتهه وفوك كل هذا مريضه...

رجعنه للبيت ولكينه الهوسه ...

ياربي دخيلك ماكتوبلنه الفرح...

قاموا بالواجب وسوولهه فاتحه ...

الله يرحمهه برحمته ماشفنه شي موزين منهه ...

ضلن بناتهه مكسورات خاطر الله يساعدهن...

امهن واختهن بنفس الشهر صعبه عليهن الله يكون بعونهن...

مرت الايام وسوينه اربعين لدنيا وامهه..

وبدت الروح ترجع بالبيت ...

ثابت رجع طبيعي ومدللني...

فاطمه حملهه صعب واجت يمنه ونخلصهه ضحك وسوالف...

ورا فتره كمت اشوف ثابت متغير ...

ابد مايحجي وملتزم بالصمت ..

حتى وياي مايحجي وساكت على كد السؤال...

الكل لاحظ هدوءه ياترى شنو ورا؟؟

الحجيه دائما تسألني يمه شبي ثابت مو على بعضه؟؟

اكلهه علمي علمج ما اعرف شو ساكت..

بس ابتهال جانت دكول عوفو لاتضغطون علي..

هو من كيفه يهدء ...

شكد حاولت اعرف شبي بس غامض ولاعبالك زوجي..

اكثر من مره اسأله حبيبي شبيك ...

يكول مابيه شي..

حتى كمت اخاف منه خاف يعيط بيه...

حاجته الحجيه اكثر من مره ونفس الرد يكول مابيه شي...

جان تفكيري كله بسبب الطفل واكول يسوي هيج خاف يريد يتزوج ...

هواي ناس تسأل ليش ماكو حمل والحجيه دكلهم رزق الله شوكت مايجي هله بي....

بيوم طلع ثابت بليل واني ضايجه كلت خلي اكوم ارتب الملابس...

طلعتهم كلهم وخليتهم على الجربايه وبديت ارتب بيهم واحد واحد...

كملت كنتوري وانداريت على كنتور ثابت...

واني اعزل بيهم..

شفت ضرف بالكنتور ...

ما ادري ليش صار عندي فضول سحبته...

جان الضرف مشمور بالكنتور حتى مو مضموم لان يدري بيه ما امد ايدي على كنتوره بس ملابسه...

اخذ الظرف وكعدت على الجربايه باوعت بداخله رساله والظرف مفتوح...

فتحته وطلعت الرساله....

بديت اقره بيهه وي كل كلمه احس نفسي يضيق...

بدون شعور نزلت من الجربايه وكعدت بالكاع...

جانت كلمات الرساله عباره عن صدمه...

عرفت سبب حزن ثابت...

لازمه الرساله وايدي كامت ترجف....

#يتبع

اعذروني البارت قصير

هلاو حبايب كلبي شلونكم

كل عام وانتم بالف خير سنه سعيده عليكم يارب

اشتاقيتلكم هووايه

حاليا دا اكتب بقصه جديده واحداثهه متشعبه وما اكدر انزل هسه لان لازم التزم واني ماعندي فراغ..

بس اكمل شكم بارت انزلهه الكم ...

حبايبي منو الي عدهه مجال وتكدر تنشر بمكاني على الفيس لان ماعندي مجال ابد واريد وحده تكدر تتواصل وياي وتنشر القصص مالتي..

الي تكدر خلي تدخلي خاص ..

احبكم💋

اريد منكم متابعه لحسابي...