رواية تل الذهب الفصل الرابع وستون 64 - بقلم Raghad Almoualy

تل الذهب
رغد الموالي

ـــــــــــــــــــــــــــــــــــــــــــــــــــــــــــــــ
قبل مانبدي بالقراءه اعزائي اتمنه الي ممتابعني يروح على حسابي يضغط على زر + متابعه ويتابعني حتى تقرون بقية القصص القادمه ان شاء الله
.....

سديم....  بيت محمد راحو
مر كم يوم واني وادم علاقتنه شبه جافه بسبب محمد والي سواه توترت العلاقه نوعا ما بيناتنه

ادم...  انتي شلون وياج حتبقين كالبه خلقتج علينه محمد وراح شنو بعد شتردين

سديم...  ساعدته بفلوس حرام وانت قابل شاركته يعني

ادم...  كافي الله يخليج هو هيج والا هيج جان اجه وباعها

سديم... ميعرف احد هنا اخوك من سنين مسافر
بس انت سهلت عليه الامور

ادم... اني صوجي اصلا واكعد احجيلج وابررلج
دروحييييي
وعافني وطلع بلحضة غضب
اصلا اني صوجي خليتهم يجون ويكعدون بيتي
مرته ليل نهار تتدلع براسي اكل ونوم لاشغل ولاعمل صرتلها خدامه وكلت ميخالف مرت حمايه ولخاطر زوجي اتحمل تاليها جايه تكضي مصلحه براسي
اني صوجي ياادم وافقتك بالراي
انيييي
لاااا ومن احاجي ينتر ومعاجبه الوضع
هذا محمد هسه يتعلم كل شهر شهرين يجي يبيع هنا خوش فلوس وادم بيك طبعا ميرفضله طلب اخوووووه هو بعد

بقيت بنار وكلبي محروك جان ليل اشتغلت ونضفت البيت وبدلت لارين ونامت
انتضر وماكو باوعت ساعه 1 منتصف الليل هو مو عوايده هيج يتأخر

...  اي الله ليعلم وين راح
تلكي رجع لسوالفه
والله ياادم اذا رجعت للنسوان مره ثانيه الا اشوفك سديم على اصولها
كلما نختلف على شي انت تروح وترجع لدروبك العوجه

انتضرت ساعه ومااجه باوعت ساعه 2 منتصف الليل
مابين تردد اتصل لو لا
اني زعلانه عليه
اتصل
لا مااتصل مااتنازل
لا خل اتصل اشوفه وين لازم اعرف
اي وهم اكشفه هو بالشارع لو بيت لو بسياره يبين من الصوت

اتصلت بقه يرن  ويرن ويرن ويرن حدما اجاني صوت غريب غير صوت ادم

...  الو ادم وينك

...  العفو اختي مسوي حادث صاحب الموبايل وهسه نقلناه للمستشفى

... دكيت على صدري بذعر شنووووو
وين يامستشفى

نطاني العنوان وصرت الوب وين وشسوي وشلون منو يوديني بهل الليل
اجه بالي ضرغام اتصلت ومباشرة جاوب

...  خير سديم متصله بهذا الوقت

...  ابو علي اروحلك فدوه ادم مسوي حادث وناقلي للمستشفى فدوه تعال وديني اروح اشوفه

...  انطيني عنوان المستشفى

... ابو علي مر عليه اريد اشوف شبي

...  نطيني اسم المستشفى هسه افتهم شنو وامرلج

...  اوك

نطيته اسم المستشفى وبقيت الوب اروح واجي بالبيت متوتره وقلقه
وضميري صار ياكل بيه اكل
كله منج بقيتي تلومي بقيتي تحجين عليه
ضوجتي وطلع مقهور وسواه للحادث

اني السبب اني بقيت الوم بي

طول ضرغام مااتصل ساعه 3 ونصف
اتصلت عليه

بشر ابو علي ادم بي شي

...  بنبرة صوت متطمن...  لا...... مابي شي

...  وينه نطينياه خل احاجي

...  لا هو هسه نايم يصير زين ونجيبو ليضل بالج

...  عفيه اريد اشوفه تعال اخذني

... جر نفس كال خل يطلع الصبح انتضري واول مايكعد اخابرج

... تمام... سديته منه وبقيت قلقه
خاف بي شي وضم عليه ضرغام
اي يمكن ميكدر يحجي
بي شي
شلون
شسوي
ياربي شطولها هالليله مداتخلصصصص
ياربي ياشافي يامعافي
صرت اندعيله
وحتى يطمأن قلبي فرشت سجادتي و فتحت القران وكعدت اقراله واندعيله
قريت هواي ايات من القران بعدها صدقت وصرت اسبح...
لا إله إلا انت سبحانك إني كنت من الضالمين...
فريت السبحه كلها بهذه التسبيحه
واسبح واندعيله
طولت هالليله كلش ياربي حسيتها سنه مو ليله
لاح الفجر كنت اغفي غلبني النعاس ولارين يمي بمهدها اهزه

فزيت على موبايلي يدك باوعت ضرغام

.... هلو ابو علي

....  احنه جايين بالطريق رتبي الوضع يمج

...  تمام

بقيت انتظرهم تقريبا نصف ساعه واجو دك هورن بسياره فتحتها للباب شويه شفت سيارة ضرغام
فتحت الباب ودخلت السياره داخل البيت

قفلت الباب واجيت عليه بلهفه

...  ها بشررر شبي ادم وينه
باوعت جان مدد بالخانه الوره وايده مجبسه
وجهه اثار الحادث كدمات وشطوب

نزل ضرغام كال اكو سرير نفر محضرتله

.... اي بالغرفه موجود

... تمام... راح من جهة ادم فتح باب السياره وسحب ادم لعنده ادم جان كاعد

ادم...  على كيفك ضرغام تره كل جسمي يوجعني

ضرغام...  هسه تمدد وترتاح بس عاوني حتى ماتتأذه

سحب ادم لعنده بهدوء وسنده عليه جان يعرج برجله ادم تمشو سويه متوجهين لداخل البيت ويحجون

ادم...  لك ااااخ يايابه شوجع

ضرغام...ادري شلون مشفتها

ادم...  لك لايت واحد عبالي دراجه

...همزين مامات الرجال وشلت خطيتو

... لك ااااخ شوجع نعل رسه هو من وراه حطلك لايت العالم شذنبهااا

وصله للسرير ومدد ادم بصعوبه اجيت يمه

... حمد لله على سلامتك حبيبي

ادم... الله يسلمج حبي جنت افكر بيج وندعمت

سديم..  معقوله

ادم..  وراس ضرغام

ضرغام...  بيش طالبني وتحلف براسي جذب

ادم... جنت افكر بيها شنو

سديم...  والله مااصدك

ادم...  براحتج

ضرغام...  شوفي عيني سديم
تعتمدين هسه بس سوائل سويله شوربه
عصائر وجبات خفيفه
اكل دسم ممنوع وجبات ثكيله هم ممنوع لحد ماشويه تتحسن حالته

سديم... اي تمام

ضرغام....  انه تأخرت على دوامي حروح واي شي تحتاجو اتصلو عليه

ادم...  ممنون منك متقصر

ضرغام..  ولو واجبنا تددلل

سديم.... طلع ضرغام واجيت لاادم

بهدوء... حبيبي اسويلك شي تاكله هسه

ادم...  لا.....  راح انام

سديم... تمام نوم العوافي

غطبته وطفيت الضوء وطلعت
سويتله شوربه على نومته وكملت شغلي اليومي
وي ال 1 تقريبا اتصل عليه

ادم..  وينج سديم مدااكدر اصيح

سديم...  جاين حبيبي داغيرلها لارين
خليت لارين بحجلتها ورحت اله

كول حبيبي...

ادم...  تعالي سنديني اريد اروح للحمام

اجيت يمه بصعوبه سندته يكعد
بقه شويه كاعد تكلم بألم....  لج جسمي تحسه متكسر وهو الكسر بس بإيدي

سديم...  هاي اثر الاصطدام سمك نرض

ادم...  حتى النفس احس بالقدره دااجره

سديم...  الحمد لله المهم كمت على حيلك

ادم...  سيارتي الله اعلم شصار بيها

سديم...  كلشي يتعوض المهم انت بخير

... باوع يمنه يسره... كال... سديم انتي متكدرين تسنديني رجلي مااكدر اوكف عليها زين جيبيلي كرسي استند عليه بين مااوصي على عكازه

رحت بسرعتي جبت كرسي واجيت وهو سند نفسه على كرسي وساعدته بتحريك الكرسي حدما وصل للحمام

حضريلي ملابسي سديم رااح اسبح

...  شلون تسبح وايدك

...  لج وسخ متشوفين حالي

...  حساعدك دقيقه احضر الملابس

مريم....

اتصل ضرغام.... خفت توقعت سندس خابرته وكلتله عليه
شلوننج مريم

مريم...  زينه انت شلونك

ضرغام... انه زين... ادم زوج سديم مسوي حادث خابريهم شوفي اختج اذا تحتاج شي خاف تستحي دكلي

مريم...  دكيت على صدري بخوف شنوووو وخو مابي شي

ضرغام...  لا مابي شي لتخافين

مريم...  ضرغام الله عليك

... خابري اختج داكلج مابي شي الصبح جنت يمهم

.... ماشي ماشي حخابرهم

سديته منه بخوف واتصلت على سديم متجاوب
مرتين وتلاثه مترد قلقت هوووواااي

اتصلت على ادم ميجاوب

وره نصف ساعه اتصلت سديم...

مريم..   حمد لله على سلامة ادم طمنيني خو مابي شي

سديم...  لامابي شي الحمد لله كسر بإيده

مريم...  سوده عليه وينه خل احاجي

... دقايق...  شويه وانطتني ادم كلمته....  حمد لله على سلامتك ابو لارين

...  الله يسلمج مريم شلونج

... شنو هاي مسوي حادث اسم الله عليك عين وصابتك

...  اي والله تدرين بيه حلو محسود

مريم...  ضحكت... حتى وانت بهل الحال تحشش

ادم...  شنو احشش ولج قابل مو حلو اني

مريم...  لا تخبل... وينها سديم

...  هاي اختج حاجيها

اخذته منه للتليفون وكلمتني...  سديم ضرغام وصاني اي شي تحتاجون كولي يكول خاف اختج تستحي

... تسلمين حبيبتي متقصرين مامحتاجين شي

... اوك حبيبتي حمد لله على سلامته مره ثانيه

...  الله يسلمج حبيبتي

سديته منها للخط
مر يومين جنه كاعدين عصريات  مسويتلهم كيك وعصير وكاعده اوكل الجهال  ونسولف اني والحجيه
ندكت الباب

ام ضرغام..  الباب تندك يمه شوفي منو بالباب

مريم..  تأمرين حجيه

كمت فتحت الباب باوعتها بنيه قصيره نوعا ما
حنطاويه بعيون صغيره وشفاه ملمومه
باوعتلي من فوك لجوه

عوجت حلكها وكالت...  هو انتي مرت ضرغام

مريم...  العفو منو انتي وشلون تحاجيني بهيج طريقه

...  عشتوووو هه دوخري وخري
ليكول جايه اشوف شكولج

فاتت تتمشى وحجت وهي تمشي...  لا وماخذها شطولها هه وين تريد توصل بيها

شافت الحجيه بوستها وكعدت يمها وتغيرت كل نبرة كلامها وصوتها صار بليونه وهدوء  وجهها للحضات صار بريء وحجت

... شلونج عمه شخبارج والله مشتاقتلج موووت

.. هله يمه شلونج وشلونها امج

...  بجت...  ومسحت دموعها بشالها
عمه شحجيلج اني اجيت احجيلج ضيمي

...  كولي شبيج

...  اخويه النذل الحقير يطبك وي مرته عليه
تكله اختك اكل ونوم وهو يصدكها تقبليها
بداعتج احكمي حجيه مو من اجيتكم سويته للبيت يخبل وكلمن يدخل يكول شنو هالنظافه والترتيب

ام ضرغام... انتي ماقصرتي يمه بس عبالك شويه بالغتي

مريم...  كوه كتمت ضحكتي وهي تخبلت

... شنو حجيه انتي شتحجين ضرغام مو جان يكلي عاشت ايد تعبناج هو ملاحظ شكد دااتعب ويحس بيه

والتفتت عليه ورجعت باوعت للحجيه وتكلمت بهدوء اكثر...  اني نسيت شغله بغرفة ضرغام واجيت اخذها

ام ضرغام... شنسيتي يمه

شيماء...  ميصير احجي حجيه اروح اجيبها مو هو وصاني وكالي ديربالج

مريم..   فتحت عيوني بوسعها وتخوصرت بيدي الاثنين اريدها بس تحجي زايد

شيماء... اروح اجيبها

مريم...  اذا تقصدين غرفة اختج فتركناها
والمفاتيح عند ضرغام مو عندي

...  حبيبتي واني وضرغام واحد هسه اخابره يدليني

...  طلعت موبايلها واتصلت على ضرغام وحجت برقه اكثر...  هلو ابو علي شلونك

...  هلو شيماء

...  ابو علاوي عيوني انت اريد تكلي على مفتاح غرفة  نور وينه

... شتسوين بي

...  مو نسيت شغله تتذكر هذاك اليوم الي جنه بي بالغرفه

... اي

... هو نسيتها لشغلتي الي جبتها وياي

...  هاااا تقصدين ملابس ابن حسين اخوج هو انه جم مره كتلج لاتخلين شي بغرفتي ولاتفوتين بيها اصلا

... باوعتلي وتكلمت مباشرة...  هاي شبيك ضرغام

...  مابيه شي اترخص عندي شغل وسده للخط

تلعثمت وتكلمت...  ا ا ا ا ا هو غير الموضوع على مايبدو عرف اني عدكم

مريم...  ضرغام مايكذب واتبسمتلها بااستهزاء ومشيت وعفتها
وهي ترخصت من الحجيه وطلعت

مرت الايام واشتاقيتله هواي لضرغام جان يتصل بيه كل يوم يطمأن علينه لحد ما نزل من الليل واني اعد الساعات شوكت ينزل وشوكت اشوفه
كعدت بيومها من الصبح انتظر جيته تقريب لل 10 وصل تلكيته بشوق ولهفه

....  حبيبيييي اشتاقيتلللك طولت علينه

... ابتسم...   تعودي منا وهيج... اجوي الجهال يركضون

... بابا...  بابااا.... باباااا

حظنهم وبوسهم كال..  وين امي

...  جوه تعال فوت

...  راح ونزل على الحجيه يقبلها

... شتاقيتلج يوم شلونج

... انه زينه يبعد امك شلونك انت
تلمست وجها ضعفان وليدي كل ماتنزل وجهك يذبل بالدوام

... كل متشوفيني جاي من الدوام تكليلي هيج عداوه عندج وي الدوام

... اااخ لو تسمع كلامي وتترك هالشغله

... ماشي يوم

انه رايح اسبح وانام تعبان

... ماشي وليدي ارتاح

مريم...  رحت وراه حضرتله ملابسه

باوعلي بشوق همس... متتصورين شكثر مشتاقلج مريم

مريم...  واني هم والله

احجيلي خو ماصار شي بغيابي احد ضوجج او شي

مريم..  لا لا ابد بالعكس كلش مرتاحه

... متأكده... كالها برفع الحاجب يأكد على كلامي

... اي ضرغام متأكده

... مسح على راسي وقبلني من جبيني اتمنه تكونين مرتاحه
حنام ب 1 كعديني

... تمام

طلعت من الغرفه وبيني وبين نفسي اتساىل
ليش يسألني معقوله سندس كلتله زين لو كلتله جان كلي ليش يسألني
طردت الافكار من راسي ورجعت اكمل شغل البيت
وي ال 12 سبحت الاولاد وكالعاده علي مايقبل اسبحه ويعاند

.. لاتبقين تسبحيني كل مره انه اعرف

...   بهمس متحذره...  علي ششش اسكت لابابا يسمعك مو مثل كل مره تصيح براحتك

... همس بخوف بس بنفس العناد...  كتلج متسبحيني

...  راح اكلها لبيبي عليك

... مااا

... نترت بي بهمس وخزرته...  تجي اسبحك لو اروح اكله لبابا

...  باوعلي وسكت خاف من ضرغام سبحته وبدلتله
رغم عمره 7 سنوات لكن يعاند وتصرفاته مال كبار
صارت ساعه 1 كعدت ضرغام واجه ويانه على صينية الغده وكعدنه نتغده وي ماكملنه كال

مريم تحضري

...  وين

... اخذج بمشوار

الحجيه...  خير يوم

ضرغام...  تروح على دكتوره نساىيه يوم اريد طفل

الحجيه...  كول بسم الله يمه مصارلكم 20 يوم من متزوجين

ضرغام...  احسن نشوف شنو الموضوع تحضري مريم

... باوعتله باارتباك...  اي صار هسه اتحضر

ضرغام...  يوم مانتأخر الاولاد يمج وراح ناخذ زهراء ويانه

.... ماشي

تحضرت ورحت ويا صعدنه بالسياره وتكلم

... انه حجزتلج يم الدكتور راح تبدين تتعالجين
تسولفين للدكتور اي شي مأذيج وشنو تحسين لما ماتخذين علاجج مريم لاخافين من شي لازم تساعدين نفسج حتى تتعالجين انه بظهرج وانه عندج لاتخافين من اي شي

... باوعتله بعيون دامعه من اثر كلامه...  تسلميلي ياأجمل شي صارلي بحياتي كلها

...  اتبسم ومسح على راسي وضمني لصدره وتكلم
لاتشيلين هم اي شي ولاتخافين ابد راح تتعالجين وراح ترجعين ورده مفتحه وتجيبيلي بنوته هيج حلوه تشبهج

... باوعت لزهراء...  لزهوره الجمال واكطع

... باوعلها واتبسم... قبلها... وكال... يله هسه لازم نطلع... يالله...  

مشينه بالسياره حدما وصلنه الدكتور ونزلنه
مسك بإيدي وباوعلي بنظرات تطمني يمكن لاحظ الخوف الي بعيوني
رحت ويا فتنه للعياده انتظرنه شويه وبعدها دخلنه للدكتور وبديت اشرحله حالتي رغم كل شويه اتلكأ واباوع لضرغام

بداية الامر غيرلي الدكتور علاجي وبعدها سوالي دوره اجي كل اسبوع علمود اتعالج
رجعنه واني ماكلني القلق والخوف

ضرغام...  شبيج مو على بعضج

مريم...  لا بس توترت

ضرغام... طبيعي هالشي الي صار وياج مو قليل مريم ونعاد عليج مثل الشريط

مريم...  اني اشكرك ضرغام

... على شنو هذا واجبي مريم لو تطلبين عيوني هم انطيها الج

...  دخلنه للبيت ومر يوم اعتيادي جميل بوجود الضرغام بالبيت ويانه

سديم.....

صرت اساعد ادم بحركته اوكله واغيرله ملابسه
كم مره ارتفعت حرارته وابقه مساهره عليه

ادم...  تسويلي كمادات سديم هو اني طفل

سديم...  مرتفعه حرارتك

ادم...  جر ايدي قبل باطن الكف همس
ربي لايحرمني منج سديم انتي گلبج طيب احسج تحبيني

سديم... لعد كم ادم عندي اني حبيبي وزوجي وابو بنتي

ادم...  اني هواي احبج ونوب تعالجيني يبووو

سديم...  ليش احسك دااتصنف ادم

ادم...  وعيونج صدك لا مدااصنف هالمره

سديم..   والله من كلولي مسوي حادث يمه متت مابقت بيه روح للحضات حسيت فقدتك للابد

ادم..   لاتخافين عليه اسد بشبع ارواح

سديم..   بزون بسبع ارواح

ادم...  وسفه اني اشبه روحي بالبزون

سديم...  اتبسمت بحب وصرت اهتم بي اكثرواكثر ويوم عن يوم تحسنت حالته صار يكدر يمشي زين وارتاح 

من اباوعله مرات وهو يلهي وي لارين وهي شقيه تحبه ومتعلقه بي تلهي وياها صارو يقضون وقت طويل سويه يكعدون وادم يلعبها
اباوعله اشوفه شكد يخاف عليها ويحاول يسعدخا دائما

سديم... شكد تحب لارين

...  هواي

... داشوفك هواي داتقضي وقت وياها هاي الفتره

...  جنت قبل ملتهي بالشغل بس هسه وين اروح ماعندي غير حبيبة ابوها

تنهد وتكلم... تدرين سديم اني بطفولتي محد جان هيج  حنين ويحبني ابويه مامهتم بينه واني مااريد اصير مثل ابويه

سديم...  خليك قريب منها لعد

ادم...  اني ابتعدت عنها وهالشي غلط
المفروض اكون قريب منها تدرين سديم اني هواي عرفت بنات  مره تعرفت على وحده دكلي اني اتمنه لو فد يوم ابويه ينطي فد 5 الاف ويكلي هاج بنيتي اشتريلج دشداشه
او يكون حنين عليه ويحبني

هي البنت من تحب ليش تحب مو علمود تزوج وبس لااااا لان هي حتى بعد الزواج تريد هذا الحب يبقه وتبقى المشاعر بس تلكين الرجال تغير مابقه نفسه هذاك الي جان معيشها بالاحلام الورديه

سديم... افهم من كلامك الاب اله دور... او الاهل بصوره عامه؟

ادم...  طبعا... الاهل والاب الهم دور جبير خصوصا على البنيه كلما تعلمها صح وتكون قريب منها راح تطلع مثل ماانت تتمنه بس كلما تغلق عليها راح تنجرف وتطلع عكس ماانت تريد

سديم.. جانت خاله خلود دائما تنصحني وتعلمني ابد مافد يوم شفتها قفلت علينه حتى من ردت اشتغل كالتلي اشتغلي ماشفتها مانعت
ولما حست انو اني ممكن يكون عندي شي وياك صارت تنصحني وتعلمني
بكل مره جانت تذكرني بهواي امور من خلال قصص تحجيها الي او نصيحه صغيره منها يمكن اكثر من تبارك بنتها جنت قريبه عليها

ادم...  لهسبب صرتي مثل مارادت هي لانها ماقفلت عليج اكو اهل للاسف فاهمين التربيه غلط التربيه عدهم الانغلاق زين انت الى متى حتغلق عليها
هل ياترى حتكدر تمنعها من دراستها؟
لو فرضا عقليتك السخيفه كلتلك لهنا وكافي دراسه بعد ياترى حتكدر تخفيها من المجتمع؟
حتمنعها تكون اصحاب... صديقات... يعني مراح تكتشف هواي امور انت مانعها عنها عن طريق صديقاتها وحتمشي برئيهم لان ببساطه هي حتتأكد هنا ان انت متخلف لانك منعت عنها وهي كتشفته من مصدر ثاني
تبدي تبتعد عنك وتبدي تكون كتومه اكثر ذويه شويه لحد ماتلكه من يطبطب على كتفها بحنيه ويحسسها هو دار الامان تبدي تتعلق بي وتحبه كلمة لا تنمحي من قاموسها يصير كله اي وشنو يطلب راح دكله صار
شويه شويه تبدي تنجرف وتروح وتغلط وتصحى بعد فوات الاوان زين هنا منو السبب هل ياترى السبب هي بس لو حضرتك الي ماوعيتها مانصحتها ماكنت قريب منها وكتلها بنتي هالشي صح وهالشي غلط
الي يشيل هالذنب مو فقط البنت لاااااا الاهل هم عليهم العاتق الاكبر

لهسبب اني اوصيج خليج قريبه من بنتج واذا عدها فشول حول اي شي اترسي فضولها انتي احسن ماغيرج يترس فضولها بطريقه يمكن تكون غلط

سديم...  ان شاء الله

ادم...  اكلمج عن تجاربي وتجارب هواي بنات عرفتهن
حتى الي صار قبل ايام وساعدت محمد انه تندمت مفروض مااسعيله بالحرام بس ارجع واكلج احنه ضعنا بعد امنه وابونا ماربانه لهسبب هيج امور عادي عنده
اني اعرف الله عاقبني لان بالحرام اخذنه فلوس بس والله رجعتها لمحمد كتله مالي علاقه اخذها انت

سديم...  لا لدكول هيج رب العالمين ان شاء الله يغفرلك ادم اتمنه متكرر هالشي بعد ومالك علاقه ب أخوك بهيج امور ساعده بغير شغلات بس الحرام ابتعد عنه

ادم...  ان شاء الله

مريم.... 

ثاني يوم ندكت الباب فتحتها واجت سندس
بدون سلام فاتت وحتى ماكلمتني

اجت على الحجيه... شلونج خاله لعد وين ابن خالتي

... طالع يوم خير شصاير

.... مصاير شي عندي جم حجايه ويا جايه اكولها واروح

.... احجيلنه

.... لاااا شحجييي يجي ونتفاهم
الا جهال اختي قبلت يجيب وحده تاخذ مكان اختي بس جهالها لااااا وشوفي داكلج خاله مو بس كلامي هذا اخوتي وخواتي كلهم نفس الحجايه وموافقين ودزوني اني بصفتي متكلمه واعرف احجي

.... هممم كلولج انتي تعرفين تحجين

... اي واعرف شلون اقنعه لضرغام

... اي بس من تحجين بلا هاي خبالاتج تعرفين ابن خالتج يتحمل يتحمل ومن تطبك براسو لابو مايعرفو

...  لا اطمني خاله هو بس خل يجي
خابري خاله خابري

مريم...  انتظرتها تخلص كلامها واجيت...
ياجهال وشتقصدين تاخذ جهال فهميني

سندس... وانتي شكو دفهمج دمشي ماما لعبي ليغاد

مريم...  شوفي تحترمين نفسج اخليج على راسي متحترمين نفسج لبسي عباتج وروحي لبيتج

سندس...  وكفت على حيلها وصيحت... وتطردينيييييي بيت اختي وتطردينيييي منه
شووووووفيييييي خااااااااله داتسمعييييييين

اريد اشوف العينين يسكتللللجججج

اجه علي والجهال على صياحها واجت يم علاوي بدموع
شوف خاله شوفها لمرت ابوووووك تطردني فوك مايتتها لامك تطردنيييييييي

مريم... خافي ربج تسممين بعقل طفل بالكذب مالج
لو محترمه نفسج ليش اطردج

سندس...  وانتي منو داتطرديني خلك وحده من الشوارع مادري منين جابها  سوالها قدر براسنه
والله فلا اصدك الكليشه مال فاقده الذاكره واذا مجنتي منتسبه عنده ولفتي عليه اني فلا سندس

مريم...  يجي ضرغام واكله على هذا كلامج واريد اشوفه يقبلج

... دمشي ماما امشششييي

مريم... عفتها وفتت جوه وهي حطت الجهال يمها وكعدت

بقيت بغرفتي كاعده انتظر يجي ضرغام ولازم يخليلها حد كل يومين تلاثه مسويتلنه طلابه

مر تقريبا نصف ساعه سمعت صوتهاوهي تحجي صوتها جان عالي

سندس...  تقبل ضرغاااااام تقبببللللل هيج تصيح وتسوي لان جيت اشوف الجهال

مباشرة طلعت وتكلمت بحرك اعصاب...  تكذب اني مصيحت

... تطردني وهاي خالتي اسألها

... باوعلي مستغرب متعجب

مريم...  ضرغام مو هيج تكذب

ضرغام...  يعني طردتيها لو لا

مريم...  هي فاتت تتدخل جهال اختي وجهال اختي حتى سلام ماسلمت

ضرغام...  اي وانتي ردتيها؟

سندس...  بدموع طردتني وتهددني دكلي يجي زوجي واني اعرف شلون اخلي يطردج من البيت
تقبلها ضرغام هاي كدامك احجي مو مثل هذيج المره من خابرتك دكلي سوالف نسوان  وجهالي وكحين ومصدكت من ضاربته لابنك ومقبلت تسمعني من هسه اكلك تشوفلي جاره وي مرتك

مريم...  نترت بيها... احترمي نفسج
لو محترمه نفسج متنطردين

ضرغام...  فتح عينه على وسعها وتكلم برفع الحاجب... يعني طردتيها؟  وترفعين صوتج وانه موجود؟ 

مريم...  بنبره تنتابها خوف...  بس هي ضرغام

ضرغام... خله سبابة ايده على شفته همس ششششش وتكلم بهمس وهو يخزرني ..   فوتي جوه

مريم...  بس افهمني ضرغام

ضرغام...  خزرني اكثر وتكلم وهو يقطع بحروف الكلمات...  ك تلج ف و تي جوه ( كتلج فوتي جوه)

..  باوعتلها بخزره وهي دمووووع مانشفت

فتت جوه والوب اطك ايد بإيد من شدة توتري

... مااشوف الا ضرغام فات للغرفه وطبك باب الغرفه بقوه فزززتني....

ليخاصمني العالم اجمع الا خصامك فإنه يتعب روحي وجعاً

للتواصل معي ومتابعة اعلانات القصص القادمه تابعوني في حسابي على الانستكرام الرابط موجود بالبايو وعلى منصة المحادثات

اما الان متابعه لكاتبه لم تأخذ حقها في التصويت والقراء وياكم الكاتبه.... 
alwtr_313

كنت معكم انا  رغد الموالي في امان الله ♥