تل الذهب
رغد الموالي
ـــــــــــــــــــــــــــــــــــــــــــــــــــــــــــــــ
سديم.... مر كم يوم على وجود بيت محمد بالبيت
محمد وادم كانو على طول يطلعون سويه ونتالي تبقه يمي بالبيت
نتالي... انتي على طول هيك بالبيت تقعدين
سديم.. اي
نتالي... am زهكانه تجي نطلع نشم هوى
سديم... وين نروح
نتالي... نطلع ناكل ايس كريم نشم هوى
سديم... من يجي ادم نكله ونطلع
نتالي... هو انت كلشي عندك راجل... راجل
راجل ان تزوجت مو معناها يتدخل فيني
سديم... بس من باب الاحترام اله علم بكلشي
نتالي... هاي عندكم لكن عندنا مافي مشكله
سديم... يعني متكليله لمحمد من تطلعين
... لا هو اله حريته وانا الي حريتي
... احنا لا مايصير المرأه لازم تكله لزوجها يله تطلع او اي شغله ثانيه اي علاقه زوجيه ناجحه لازم يكون بيها تفاهم على كل شي
... محمد كان متلك يفكر لكن انا خليته غير
انتي على طول هيك بتلبسي حجاب حتى وادم موجود وحدكم؟
.... ضحكت... لا بس لان زوجج هنا البس حجاب
... مافي مشكله لو شاف شعرك ليش تغطي وبعدين توبك هذا طويل وعريض ليش ماتلبسي جينز مثلنه بنطلون حلو ومعاه بدي يصير كلش حلو
... لا مايصير
... سديم انا زهكانه لازم اطلع اول مايجي ادم تكليله ونطلع... اشارت بالسبابه وراحت ... اوك
.. اوك
باوعتلها مااعرف تفكيرها وعاداتها غير يس يله عادي هي اجنبيه اكيد تختلف عن العرب
كملت شغلي والطبخ ورحت للحمام سبحت وغيرت ملابسي ماشفت الا ادم ومحمد اجو وياهم فلوس
وكعدو يحسبون ويتناقشون
اجت يمهم نتالي وصارت تناقشهم وتحسب الارباح وتدري بكلشي اني بقيت صافنه شنو الموضوع مدااعرف بعدها صبيتلهم الاكل كعدو يتغدون واني الف سؤال اجه بالي شنو هاي الفلوس
منين جابوها
وليش ادم ماحجالي اي شي
اكل وتفكيري كله اسأله
لحد ما صفينه بالغرفه وحدنه اني وادم وسألته
ادم شنو هاي الفلوس وبيت اخوك على شنو جايين بالظبط
ادم... عنده بضاعه وباعها هنا وربح من وراها فلوس حلوه
سديم... شنو هاي البضاعه وليش ماكلتو
ادم... ميخصنه هالموضوع
سديم... شنو ميخصنه ادم شنو الموضوع
ادم... كتلج ميخصنه سديم
سديم... باوعت بشك وهو تهرب وراح كعد يلاعب لارين بيني وبين نفسي كلت لازم اعرف شنو الموضوع تذكرت بطلب نتالي بالطلعه
سديم... ادم اني ونتالي نريد نطلع نغير جو شويه
ادم... شنو عيني هيج وحدجن
سديم... اي شكو بيها
ادم... لا ومااقبل تطلعين وي نتالي
سديم... ليش
ادم... افضل ولتسألين
سديم... اذا على الحجاب اني اخليها تتحجب ونطلع
ادم... سديم لتلحين وكتلج متطلعون سويه
سديم.. اوك
باليوم الثاني جنت كاعده اني ونتالي وفتحت الموضوع
سديم... محمد البارحه فرحان لازم كسب بالبضاعه
نتالي... كثييير بضاعه مربحه هنا بالعراق كلش
سديم... ليش شنو جانت بضاعته
نتالي... مشروب بكل الانواع
سديم... يعني مشروب قصدج الخمر
نتالي... ضحكت... اي هو
سديم... فتحت عيني بوسعها معقوله ادم شاركه ودخل فلوس حرام بجيبه
نار واشتعلت بيه انتظرت حدما اجه وسألته
... ادم انت شلون تعاون اخوك بهيج شغل ليكون شاركته بالشغل
... هاااا مارتحتي الا عرفتي
.... اي طبعا متريدني اعرف وان شاء الله هذا اخوك يريد يبقه هنا ويشتغل بالحرام براسي
... لا باجر رايح هو علمود شغلته اجه
... وانت هااااا وانت ساعدته واشتغلت ويا ودخلت فلوس حرام
.... لا سديم اتعصبيني وتخليني اصيح ويسمعون كتلج لا
... ومنو يكول
... اني اكول تصدكين متصدكين بكيفج بعد
... باجر يرحون وبعد متنطيهم وجه يجي هنا ويبيع ويشتغل بالحرام وزوجته ليل نهار مدده وتتطلب وامشي لخاطرك بس لهنا وكافي ادم
... ماشي ست بس سكتي لاتسمعج العالم
مريم....
اليوم موعد التحاق ضرغام لدوامه
حضرتله ملابسه من الليل ومن الصبح تحضر حتى يطلع
ضرغام... انه رايح مريم ديري بالج على امي وجهالي
مريم... بعيوني لاتوصيني
ضرغام... ريتها سالمه هالعيون
فات لغرفة الجهال بهدوء قبلهم وزهراء قبلها من ايدها واجه على امه قبلها من راسها وحست عليه
... رايح يوم ضرغام
... اي يوم
... تجي بالسلامه وليدي
... الله يسلمج... محتاجه شي قبل لااروح
... سلامتك وليدي
... يله يوم انه رايح مع السلامه
... الله وياك
.. طلع وطلعت وراه لبس البيريه وخله بخصره وتكلم... امي راجعيها بالليل مرات تكوم للحمام خاف تدوخ توكع انتبهي عليها
... حنام وياهم بالغرفه
... يكون افضل واي شي تحتاجون خابريني انه ادزلكم ابو الاسواق يجيبلكم شنو محتاجين
... ماشي
... يله رايح انه قبلني من جبيني واختنكت همست بعيون لامعه بيها الدمعه
لاتتأخر علينه ضرغام
.. اتبسم... راح اخابركم كل يوم انتي بس انتبهي على اهلي وهاهيه
... صار تدلل
... هاي العيون الحلوه ماريدها تدمع ليش اختنكتي
... اتبسمت ونزلت دمعتي الي جنت كاتمتها... انت شلون عرفت
... اتبسم وطبطب على خدي برقه... عايشه بيه تكليلي شلون عرفت
هسه فوتي جوه اريد اطلع السياره تصيرين كبال الباب عود لحد يشوفج
... هزيت براسي بمعنى اي... باي ابو علي
... باي عيني انتي
فتح الباب وصعد بسيارته طلعها خارج البيت ورجع نزل سد الباب وطلع
شعور كبير من الفراغ بداخلي ترك وراح رجعت مددت بسريري جان بعد وكت لكعدتنه
اخذتني الذكريات لطفولتي المرّه الي عشتها
لما كنت صغيره كنت احس بنفسي جبيره او اساسا ماحسيت بطفولتي ولا بنفسي لحد ما شفت ضرغام هسه واني زوجته احس بروحي طفله صغيره
يوم بعد يوم يزيد حبي اله وتعلقي بي
اتبسمت لما كان يحذرني مااتعلق بي
او مااحبه
مر وقت واخذتني النومه وغفيت لحد ماحسيت على حسين وعلي بالصاله يتعاركون وصوت حسين صراخ اااااخ وبجه
كمت فزيت رحت عليه ملهوفه
... شبيك حسوني شبيك حبيبي
... لازم جبينه ويبجي وعلي يكول ماسويتلو شييي
.. وخرت ايده باوعت اثر ضربه على جبينه مباشرة اتخذت لون مائل للازرق
هاي شلون هيج ضربته علاوي ليش
... نتر بيه... كتلج مسويتلو شيي
... هاي ليش ولك تحجي وياي هيج مو عيب
.. لا انتي مو ماما وانتي اخذتي بابا وخليتها لماما بالكبر الا اكلو لرب العالمين عليكم
... باوعتله مصدومه شنو شنو هذا الحجي
... اي طردتوها لعمه سندس وهي تحبنه
... انت شكبرك على هذا الكلام منو معلمك علاوي
... اجت الحجيه وحجت عليه... ولك منين جايب هالكلام هذا يجي ابوك وانه اكلو يكص لسانك علي
... بيبي انه شفتها كاعده يم بابا بغرفتهم وبابا نايم وهي تحجي ويا ويضحكون
... اي هي زوجته وليدي
.. لا هو متزوج ماما مو هي خاله سندس كالت هي ميتتها لماما انتي ميتيها لماما
... غوركت عيني بالدموع.. واجيت يمه لزمته وصلت لمستوى طوله... حجيت بصوت ناصي
انت منو علمك منو كلك اني ميتت امك
... خاله سندس
... باوعت للحجيه كتلها... سمعتي حجيه شفتي شمخليه بااذانه
الحجيه... لان تدري ابوك بالدوام ولك هديت لسانك يجي واكلو وانه اخلي يكص لسانك شلون تحجي عليها هيج
علي... بيبي خاله سندس متكذب هي تكذب
داتضربه بالعكازه صديتها عنه
لا حجيه لا عوفي هو طفل ميفتهم العتب مو عليه العتب على سندس
الحجيه... طول عمري اكول هذا ضرغام الصغير بس لا ابو ماشايل هيج صلافه
مريم... هو طفل ميعرف
الحجيه... لا يعرف وجان ضامها لحد ماطلع ابوه والله لو سامعك الا لايطيح حظك
مريم... تعالي حجيه اسويلج ريوك
اخذتها ورحت اسويلها الريوك هضمني هواي كلامه بيني وبين نفسي كلت
يله يمريم حتى الجهال ماخلصتي من لسانهم
جنت واكفه انتظر يخدر الجاي وافكر تكلمت الحجيه
... من تكعدين انتي ورجلج وحدكم سدي الباب بنيتي
... اني ادري طفل هيج حيفكر
... لاتنسين يفتقد مكان امه هو متعلق بيها ونور هواي تحبهم ومدللتهم جانت
... ماشي حجيه تأمرين
خليتلهم الريوك وبيومها مااشتهيت اكل اي شي
نقهرت هواي وحتى بالي تشتت وحسيت بتأنيب الضمير وحسيت فعلا اني السبب واني اخذت ابوهم منهم كرهت نفسي وحتى ضرغام اتصل مارديت
لهيت نفسي بالبيت وبالاطفال والشغل
بطبعي حتى لو مكمله الروتين اليومي ابقه ادقق بالبيت ارتب كنتور او ميز او كاونتر
لليل اكثر من مره اتصل ضرغام اخر شي رديت
ضرغام... هاي وينج صار كم مره اخابرج متجاوبين
مريم... جنت ملتهيه بالبيت
... خلي يمج للموبايل من تشتغلين اتصل عليج اريد اكلح شي شلون
... ان شاء الله
... امي شلونها
.... زينه
الاولاد
... زينين... انت شلونك
... انه زين مريم زين
.... الحمد لله
... كاعده وحدج عبالك شو هدوء يمج
... اي بالصاله ماجايني نوم
... انه هم كاعد وحدي مريم بالمكتب مدد اريد انام يس بالي يمكم
... احنه زينين المهم انت بخير
.... انه بخير زين مريم مرتاح
... ان شاء الله دومك
... الوقت متأخر روحي نامي لاتبقين كاعده اخاف عليج
... وانت هم روح نام
... ضحكه خفيفه... لا مريم انه ماانام خصوصا بالليل
... ليش
.... واجبنه هذا ميصير نام الشعب ينام واحنه نام لا هاهيه عمرت الدوله
.... ضحكت
... يفدوه لهل الضحكه هاي هو جنت منتظرها اسمعها قبل لااسد الخط
... اشتاقيتلك
... بعد وينج وين اليوم رحت
بعد كم يوم صدك تشتاقيلي مو هسه
... ديربالك على نفسك
... ماشي حبيبي تصبحين على خير
.... وانت بخير حبيبي
كلامه جان ضماد لجروحي بكلمتين منه انسى كل همي وتعبي وحزني لخاطره اتحمل كلشي واتحمل الدنيا كلها
ثاني يوم من الصبح كعدت اريكهم واتذكر بضرغام
كملنه الريوك وشلت الصينيه الحجيه كالت
يمه مريم اضافري طويلات واريدج تكصيها بلا زحمه عليج بنيتي ضرغام انشغل ونسى يكصها هالمره
... اي بعيني حجيه
... ريتها سالمه هالعيون
رحت جبتها للمقراضه وخليت قطعة قماش وجبت ايدها كعدت اقرضهن وبدت سوالفها الحلوه الحجيه
...لمن تزوجت ابو ضرغام جنت صغيره كلش اخذني وانه بنت 14 سنه هو جان عمرو ب 28 اكبر مني بهواي بس جان رجال زينة الزلم كلام ورزانه وشخصيه والكل تحترمو
حتى انه جنت استحي منو كبرت على ايدو وعلمني هواي شغلات
صار عندي حمل قبل ضرغام وسقط جنت صغيره وماادير بال لروحي بالحمل الثاني الي هو ضرغام
لا اهتميت بنفسي
جنت دوم اكلو اتمنه يجيني وليد مثلك يشبهك كون
.. يكلي الاصل السلامه
مريم... وهو ضرغام يشبه والده؟
... اي يشبهو هواي حتى طبعو مثل ابو
تشوفي هادىء ورزن وكت الغضب بس داخلو نار مشتعله لو طلعت راح تحرك الاخضر واليابس
ضرغام اكثر كتوم وغامض اكثر من ابوه
انه امو مرات مااعرف شنو بي بالضبط ولا من شنو يشكي شنو زاعجو
اعرفو ميحب يشارك الناس بهمومو ولا وجعو
لما ولدت ضرغام اجه للدنيه ولد جنه فلقة الگمر
حنطاوي على ابو ضرغام وعيون كبيره جنها مكحله برموشها الطويله شعرو كثيف اسود
اول ماشافو جدو كال بسم الله تبارك الرحمن ماشاء الله ولد يخبل وكلمن شافو جان يصلي على النبي
لان حتى من جبتو متعافي مو ضعيف ومنتهي
على عكس اخوه إليا جبتو سبيعي وصغير وانه نفسيتي تعبانه جنت ابوهم مستشهد جبتو وانه بالعده الي اسبوعين ومالي خلك اربي
ضرغام جان طفل صغير بس هو وصغير شلون ابنو علاوي ذكي وسبع وعليه الاعتماد
جنت انه عمري ب28 سنه تقريبا
فرق العمر بين ضرغام واخوه 10 سنوات
مريم... ليش
... جبت ضرغام وراها صار عندي ثنين واذبهم طرح مايعيشلي الجاهل بالقدره
فصار فرق عمر بينهم
مااطول عليج بنيتي ضرغام وهو صغير صار ايدي ورجلي عمرو 10 سنوات بس يطلع يشتغل
اول مااشتغل بالمخضر يبيع وي جيرانه يوكفو بالمحل يبيع
اتبسمت... اتكر اول مره استلم يوميتو اجه شايلها وفرحان
يوم يوم هاج شوفي شكد استلمت فلوس
... فدوه لحبيبي عاشت ايدك تعال اكل تلكيك جوعان شلون مسويتلك باميه راح تاكل اصابيعك وراها
وهيج صار يشتغل ضرغام يجيب اليوميه ويتسوكلنه منها ويجي صغير وطوله شبرين وساد حاجات البيت
جان كلمن يشوفو يكول هالولد مبارك
الله مبارك بي وربي يقر عينج بي
صرت اخاف عليه هواي من الحسد يروح ويجي وانه انشرلو واقرالو على راسو
محروس بالله وليدي يحفظك الي من كل عين وكل شر
جنت اقرالو اية الكرسي 7 مراتاعيدها وانفخ وراه من يطلع ولحد هاي اللحضه كلمايطلع ضرغام ابقه اقرالو اية الكرسي تحفظو من كل شر
مريم... وشلون لعد درس اذا هو يشتغل
... هذا مو مانع حتى ميدرس بنتي لي عندو هدف بالدنيه لازم يسعالو ولازم يشتغل حتى يوصل
ضرغام جان يشتغل بالنهار بس بالليل يكعد يدرس وين جان اكو مولد على الوطنيه بس اشغل الفانوس واكعد ادرسو وهو ذكي بالعجل يفهم ويحفظ ميول ساعه يخلص واجبتو وينام من الصبح اكعدو يروح للمدرسه
اتبسمت... مره اخذتني النومه وهو داومو صباحي
كعدت لكيتو ماكو بفراشو باوعت على الساعه 9 ونصف
روحي طارت اخذت اليا ورحنه لمدرستو سألتعنو كلت خاف مو بالمدرسه
كالو المدرسين موجود طلع من الصف وشفتو الا ردت روحي نطيتو المصرف ورجعت للبيت
لما جا وسألتو
... حبيبي ضرغام ليش ماكعدتني قبل لاتروح للمدرسه
... شفتج بالليل تصلين وراها صرتي تبجين ليش بجيتي
.... قبل لاتسأل جاوبني على سؤالي بالاول ضرغام
... لانج مانمتي شفتج كاعده رجعت نمت ورديت كعدت شفتج تبجين
تعبانه ماما؟
مريضه؟ انتي يوجعج شي وتبجين منو؟
انه اجيبلج فلوس وروحي عالجي ماما
.... لا حبيبي لا انه كنت مشتاقه لاابوك حلمت بي وكعدت ابجي
... بس انه مااقبل تبجين بعدين انتي مو تكلين هو ينتظرنه بالجنه وهناك عندو قصر جبير نلعب بي انه واليا
... هنا خنكتني العبره وحضنته
الله ينطيك طولة العمر وينور طريقك حبيبي
.... انه اوعدج بس اكبر راح اصير دكتور انه ادري توجعج رجلج ومتقبلين ترحين للدكتور
... وانت شلون عرفت
... انه شفتج وانتي تدهنيها واليا يدلكها جنتي متألمه منها
... لا حبيبي هيج وجع خفيف
... انه مو جاهل يوم صرت رجال وافهم لاتحاولين تضمين عليه
... يفهم حتى لو اضم عليه حتى لو اخفي الحقيقه هو يفهم
مرينه بضروف صعبه راتب ابوهم جان مايسد العيشه
ايجار ومصاريف البيت صرت اخيط للناس عبي
تعلمت الشيرازه وصرت اشيرز عبي الفلس كمت اخلي فوك الفلس وي شغل ضرغام والراتب العيشه صارت خير من الله صرت اصرف عليهم شنو يردون وشنو يحبون
كمل دراستو ضرغام وصار ضابط اول ماشفتو وهو بدلتو العسكريه والنجمه لامعه على جتفو بجيت دموع فرح وهلهلت وطشيت الجكليت
... الف مبروك وليدي
... يبارك بيج يوم هذا كلو بفضل الله وبفضلج
صرت افكرلو بمره وازوجو هاي تناسبو لاهاي لاهذيج وكل البنات شفتهم قليلات عليه يستاهل زينة البنات
... لعد مو انتي خطبيتله نور
.... جايتج بالحجي
... زين هو شلون حبها لبنت جيرانكم
... بنت جيرانه جنه احنه وياهم الحايط على الحايط
من هم وصغار يلعبون سوه جيران بعد
حدما كبرو صارت تستحي تطلع
كم مره ضرغام شايفها وهي على السطح لحد ماصارو يحبون بعضهم وبقو سنين انه ماجنت ادري
جان يجي من دوامو يركض للسطح
... ضرغام وين رايح تعال اكل لكمه اسبح
... اي يوم هسه جاي ويروح
ينزل والضحكه تارسه وجهو
مريم... هنا حسيت بالغيره من بدت تحجيلي عنهم
.... ضرغام جان مشبعها هدايا واشكال يجيبلها الله لايوفقها شسوت بي
لج بالليالي تكلو جوعانه يطلع على الماطور ( دراجه ناريه) يجيبلها لفات عصائر جبس حلويات شنو تطلب يروح مره الدنيا ثلج ومطر وعواصف كلتلو عاجبني حلويات ماجذبلها خبر لبس وراح اشترالها واجه
.... يعني جنتي تدرين انتي
.... انه بعدين كشفتهم هو كل مايجي بوجهو للسطح مره صعدت وراه وباوعت لكيتهم يسولفون ويحجون
من على الحايط
جان يجيب ويهديلها بهل ذهب
اشكال جابلها ماينزل مره مايشتريلها هدايا
ولمن شفتهم يحجون انه مااحبها ولااحب امها كتلو ضرغام هالبنيه تتركها انه لااقبل تحجي وياها ولا تواعدها بشي
ضرغام... يوم انه احبها ورايدها على سنة الله ورسوله
... كتلك متتزوجها تولي هاي متناسبنه
... انه اعلمها واخليها تصير مثلنه
... الا هاي البنيه متتزوجها
... احبها يوم افتهمي
... ضرغام لاتعاند
... انه معاندت
بقه وياها ورادها زواج وجنت معارضه مااخطبها اله لحد ما عرفها هي من صدك متناسبنه وهو عافها
مريم... غوركت عيوني وسألتها
... هي جانت حلوه؟
... زينه انه مااشوفها حلوه بس ضرغام يشوفها هي وبس
بداية ماعافها تأذه بس نواره رحتلخا فدوه ماعافته بقت صاده راده علينه انه كتلها اخذج لضرغام هي فرحت شفت ماكو احسن من نواره
ينزل ضرغام من الدوام اجيبها للبيت
هي صارت تنضفلو غرفتو تغسلو ملابسو تكويها تحضرها وشنو يطلب تكلو صار
شفتو بالو مو وياها ويفكر بهذيج مكصوفة الرگبه كتلو تعال انه اريد ازوجك
انه حجيتلج بسالفتو قبل
هو شلع گلبي يله قبل يتزوجها وهاي تزوجها وخلف منها 3 جهال
مريم... الحمد لله
... الحمد لله على كل حال
الانسان لازم يكون صبور ويرضي بلي الله قسمو الو بنتي
مرات الدنيا تقسى علينه هواي
احنه بهذه الدنيا نخلقنه حتى نعبد الله ورب العالمين راح يختبرنا بهواي امور
... يعني مثل شنو
... شوفي بداية رب العالمين مايحملنا فوق طاقتنه
يختبرنا على قدر تحملنا
اكو ناس الله يختبرها بصحتها انو يتمرض
وااكو ناس الله يختبرها بأولادها
ممكن يكونون عاق وممكن ياخذهم الى رحمته
واكو ناس الله يختبرهم بقلة الرزق
واكو ناس حتى بقلوبها الله يمتحنها
... شلون يعني
... يعني ممكن شخص يحب شخص ثاني
يشتد التعلق بعض العلاقات تنتهي بالنزوات هنا الانسان حيكون في اختبار
حيكتفي بالمشاعر لو حيعبر عنها
حيكتفي بحب هالانسان لو يستسلم للنزوات والرغبات ويبدي ينجرف والعذر ان مااكدر بدونه!
.. يعني قصدج ممكن الله يخليلنه شخص يحاول يجرنه للغلط واحنا هنا حيبين معدنه شنو
.. بالضبط... الانسان شنو راح يفضل طاعة المخلوق لو طاعة الخالق
العلاقات الي تبدي بحرام او تنتهي بحرام لمجرد يدخلها الحرام وتجاوزو حدود الله لاتصدكين يامريم راح تكون نهايتها سعيده حتى لو تزوجو بعد كم من الحرام بس مستحيل حيعيشون مرتاحين ولو عاشو مرتاحين وسعداء ف ممكن أمرين
الاول ممكن ثنينهم تابو واستغفرو توبا نصوحا وتصدقو وكفرو عن ذنوبهم الله يحب التوابين مريم
والثاني... من المغضوب عليهم... الله حتى ماعرفهم خطأهم لانهم من اهل النار مايستحقون حتى ان بعرفون خطأهم
... هو مذكور بالقران هيج
.. لا مريم لكن الي يسوي حرام تتوقعين الله ميعاقبه
اكو ناس تتعاقب عقاب دنيا
واكو ناس تتعاقب عقاب اخره
اخذيها نصيحه للعمر... طول ماانتي تعرفين خطأج او الله سبحانه وتعالى خله انسان يعرفج غلطج انتي في نعمه مريم
لكن الي يقهر الي مطرود من رحمة الله والي يغلط وماكو احد يذكره بغلطه
مريم .... الحمد لله على كل حال
... علمت ضرغام الصح والغلط الحرام والحلال
وكلشي علمتو والحمد لله صحيح احسو مرات يزاغل من ورايه ويمكن يغلط بس اعرفو ميروح زايد انه ربيتو وتعبت عليه
مريم... اخذت ايدها وقبلتها مباشرة وخرتها كالت استغفر الله ميصير بنيتي
اني اشكرج لانج ولدتي ضرغام ولانج ربيتي وعلمتي وصار بطريقي لو اكضي عمري كله اجازيج مراح اكدر اجازيج
ابتسمت... كالت... انه لو بس اعرف هالولد هذا شيسولهم لنسوانه وهيج يحبنه
مريم... ابتسمت... ماااهون عليه ولافد يوم كسرلي خاطري او زعلني
... وانتو شلحكتو تتزاعلون
... سكتت تداركت كلامي... يعني ا ا ا اقصد ان ضرغام مبين عليه شكد حنين ويحبني
... اريدج تسعدي مريم
ضرغام عزيز گليبي هذا
... بعيوني اخلي والله انتي وهو والاولاد
بهل الاثناء ندكت الباب رحت فتحتها جانت سندس
فاتت من دون كلام
وينها خالتي
... جوه
فاتت كعدت يم الحجيه
شلونج خاله شخبارج شلونها الجنه وياكم
... زينه خاله زينه
... اي خاله تقبليها ضرغام والي سواه
... وشسوه ضرغام اشو انتي فتي تصيحين وفضحتينه بمصباح عرسهم
.... يخابر على مجتبى اخويه يكله الزم اختك ولاتبقه كل يومين تلاثه جايه مسويتلنه مشاكل بالبيت مخليه المنطقه تتفرج علينه تقبليها خاله
مجتبى بالبدايه تخبل عليه من كتله تزوج على نور اختنه وبعدها مصارلها شي من ماتت تخبل غير تطلع السنه يله يتزوج
.... ولج يمه الرجال بتلاث جهال وانه هذا انه مااشوف وهو خفارات شلون يعوفنه
... اي مو شيماء تجيكم بعد شنو حجته
... دسكتي شيماء هي شيماء سطرت راسي بضرغام خاف عبالج ميته علينه
... شلون يعني
... رايدتو لضرغام واكل ونوم بالدفع يله تشتغل ضرغام اكثر من مره جرني على صفحه كلي يمه احجي وياها تخفف من مكياجها وتلبس عريض بنت خالج مكضيتها ثاري مكياج والاحمر بحلكها والاربعين مال اختج مطالعه انه عميه مااشوفها الناس شتكول علينه
.... هي هاي اعرفها طايحة حظ بس لو متزوها مو احسن من هاي الي مانعرف اصلها من فصلها
... البنيه بنت ناس مو عيب هالحجي بعدين هو اختارها وانه ماعارضت
... مو انتي متدرين هي التفت عليه من جتهم
... كافي وسكتي لاتسمعج هي وين
... ماادري
مريم... سمعتهم وهم يحجون شويه وصاحت على الجهال وطلعو اول ماشافت حسين دكت على صدرها
يبووووو هاي شبييييييك
منووووو وياااااااك
مرت ابوووووك
اييييي طبعاااا شفتي خاله شفتيييي
انتي متشوفين حقج متدرييييين تعالي شوفيها
شمسويه بحسييييييين
وينج نووووور منين اجيببببججج
مريم... شنو هالحجي مالتج شنو اني تقصدين الي ضربته وهيج سويت بي
... بصياح... لعد اكو غيرج
... لا مو اني ومااسملحج تتدخلين
... جهال اختييييي عينييييييي وهذا بيت خالتي ورجلج رجل اختي وابن خالتي انتي الي متتدخلييييين
... لا والله اشو اتدخل وشوفي دااكلج عيب عليج تلزمين طفل صغير تعبين براسه حجي مسموم مثلج
... اني مسمومه
اني اخابر ضرغام واكله على الي داتسوي بجهاله بغيابه يالمتخافين الله بسيطه
سديم.... اتصل على ادم مايجاوب
ررررن..... ررررن.... ررررن
... الو ادم وينك
... اختي صاحب الموبايل مسوي حادث تعالو عليه
حاليا نقلناه للمستشفى....
... كيد النساء ووساوس الشيطان مابين الكذب والحقيقه هنالك شيء مفقود
اما عن ادم فالمصير مجهول
كنت معكم انا رغد الموالي في امان الله ♥
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!