رواية تل الذهب الفصل السادس وأربعون 46 - بقلم Raghad Almoualy

تــــــــــل الذهـــــــــــب
رغـــــــــد الموالــــــي
ـــــــــــــــــــــــــــــــــــــــــــــــــــــــــــــــ
-
- يومًا مَا سَتدرِك أنَّ أقسَى ما مررْت بهِ كَان خيرًا عظيمًا أَنقذَك ليجْعَلك أقْوى ممَّا كنْت علَيْه.

- جيفارا 📚.
ـــــــــــــــــــــــــــــــــــــــــــــــــــــــــــــــ
ســــــــديــــــــــــــم....

للصبح اجه فتح الباب جنت كاعده مانايمه

تفاجأ لما شافها لحنين يمي همس

هاي شتسوي هنا

باوعتله شرده حتى ميدري شنو سوه البارحه..

سديم... يعني متدري شنو سويت

ادم.... لا شنو

سديم... بهل الاثناء كعدت حنين واول ماشافته كامت وراحت تحجي عليه وتصيح

يالمتخاف ربك يامتستحي شسويت بالبنيه
شلون تسوي هيييج
وتحبسني اني شكلها لاامي هسه هاااااا

شكلهاااااا

ادم... شنو شصاير

حنين... البارحه حضرتك سكران وضربت سديم موتتها والله اعلم شصار بالطفل لاتكلي ماادري بروحي وتخبلنيييي

ادم... بخرعه... شنووو اني ضربتها والطفل

سديم... نترت بي... يطبه طووووب
ماريد منك اطفال عساه ميت وخلصانه ماريد منك طفللللللل حقييييير انت واحد حقييييير

حنين... توقعت هي مو زينه وياك وهاملتك بس طلع العكس اني مستحيل اكمل حياتي وي واحد المراهقين ماسوو سوايته

اخذت جنطتها وطلعت

وهو بقه يباوعلي متفاجىء مثل الي ممصدك

اجه يمي جنت كاعده على السرير

سديم يعني صدك الي صار اني ضربتج

رديت بهمس مليان خيبه... اي ضربتني جيت تكعد على بطني الا شويه متكول هاي حامل

ادم... كومي. كومي اوديج للدكتوره

سديم... يطبني طوب يادكتوره هاي الي اروحلها تحجي صدك تتشاقى انت

ادم... ماادري والله ماادري بروحي بارحه ثكلت بالشرب

سديم.. واني شنو ذنبي
ذنبي اتحمل واحد مثلك
كلشي.دااتحمل ادم كلشي بس انك تطلع وياي هالطلعه لا مستحيل
توديني لبيت خالي

ادم... وهم وينهم بيت خالج نهجم

سديم... وتستغل هالشي ادم

ادم... لا سديم والله مدااستغل مادري شلون صار هيج

سديم... من هااللحضه حتى ام لاابنك لاتعتبرني مجرد بطن شالت هالطفل وهاهيه

ادم... اسف سديم

سديم... خلي لااسفك الك

ادم... بارحه خلولي كبسله بدوت ماانتبه واني منا شارب صرت ماادري بتصرفاتي

سديم... كلشي حتوقع منا وجاي دام انت تمشي بهذا الطريق كلشي وارد مو بعيده تقتلني

ادم... لا سديم اني احبج توه يحضني بعدته عني

نترت.. وخرررر
ابتعد عني

ادم... اسف سديم مادري بروحي

سديم... اني حبتعد عنك ومن اولد الطفل انطي الك ونتطلك وكل واحد بطريقه

ادم... بس اني ماريد اطلكج اني احبج

سديم.... انت كذاب الي يحب ميسوي ربع تصرفاتك

ادم... لاتحمليني كل الذنب انتي هم تتمنين عليه ومحسستني ماخذج اجبار

سديم... من يوم الي تزوجنه لليوم انت بهاي علاقاتك مغيرتها شلون تريدني اتغير وياك

ادم... سديم مابيها شي الانسان من يراجع نفسه اني اعترف غلطان بس انتي هم راجعي نفسج

وعافني وكام طلع لحكته

توديني لبيت خالي ماابقه وياك

ادم... طلعه من البيت ماكو
وطلاك مااطلك ارتاحي من الاخير اجيبها الج

سديم... والله تره اطلع من تطلع انت وصلني بيدك افضل

ادم.. فوتي للغرفه

سديم... ماافوت

ادم... كتلج فوتي...... وشالني مباشرة وداني للغرفه
وقفل عليه الباب بالمفتاح وطلع
دكيت الباب بقوه
افتح الباب
افتحهااااااااااا

ادم... صرخ بيه... سكتييييييييييي

سديم... سكتت خفت لايسويلي شي وصل بي ياخذ حبوب مخدره هذا كلشي اتوقع منه
بقيت بالغرفه ساعه واجه فتح الباب جايب ريوك
خله الصمون والجبن والمربى بالصينيه ويمها ماعونين وملعقه شكلها مو مرتب بس رجال ماعليه عتب

نتر... كومي نتريك

نترت.. ماريد

ادم... ابقي عاندي وابقي لاتراجعين نفسج
سوالي لفه وقدها الي
اكلي

سديم.. كتلك مااريد

ادم... ثقي بالله اذا مكلتيها تعرفين شيصير

سديم... اخذتها منه اكلت شويه وجعتني بطني حيل
لزمت بطني
هو فز باوعلي بخوف عليه

ها شبيج

سديم.. بطني.... ااااخ بطني توجعني

مو كتلج اوديج للطبيب تعاندين
كومي لبسي وامشي
لبسني عبايه اسىلاميه بسرعه وجابلي الشال
لبسته
وطلعت اخذني للدكتوره

فحصتني وشافتني كالت الطفل سليم مابي شي بس عندج تقلصات اثر برد

.. اكلج شلونه

مباشرة جاوب ادم... متاكل دكتوره

... ميصير حبيبتي لازم تاكلين حتى يجي الطفل متعافي وسليم
عموما حكتبلج ادويه تاخذيهن وان شاء الله مابيكم الا العافيه

طلعنه من الدكتوره .. ورجعنه للبيت
كال انتي كعدي وارتاحي ابقي بغرفتج نايمه ودفيانه اني حخابر المنظفه تجي تنظف وتطبخ وتروح

مددت وتغطيت واخذني النعاس غفيت

حسيت على ريحة طبخ طيبه
ردت افتح الباب بس مقفول دكيت بالباب فتحووووهاااا

اجت وحده كالت استاذ ادم ميقبل افتح الباب

..نترت....انتي منو اريد افوووووت للحمااااام

...فتحت الباب جانت بنيه صغيره مو جبيره تطلع بحدود 27 سنه

سديم... منو حضرتج

... اني وداد اشتغل بتنظيف البيوت واجيت اشتغل هنا كملت بقه بس يصير الطبخ
رحت للمطبخ جانت الريحه تخبل

... شنو طبختي

وداد... طبخت مرك شيخ محشي وتمن

... اااالله من زمان مااكلته عاشت ايدج

وداد.. خطيه مبين متعبج الحمل استاذ ادم كال لاتروحين غرفتها ولاتكعديها خليها نايمه

اي نمت الصبح

... باوعت لبطني وركزت عليها كالت عندج بنت؟

... مااعرف مسويت سونار

وداد... لاعندج بنوته ان شاء الله

... شلون هيج عرفتي

... مرات من شكل البطن اعرف اذا دائريه عاديه هاي بنت اما اذا بويضه شكل صاير شويه متقدمه للامام هاي ولد

سديم.... حلو تعرفين هيج

وداد... اني كلشي اعرف احف... واقره فنجان...
وااقره كف...

سديم... حلووو

وداد... تحبين اقرالج الفنجان

سديم... بكيفج يعني الي تكولي صحيح

وداد... طبعا صحيح

سديم.... يله

وداد... راح اسويلج گهوه
سوت الگهوه وداد وجابته الي شربت شويه وبعدها قلبت الفنجان ونتظرته شويه تثبت الگهوه بالفنجان
كعدنه نسولف

سديم.. من شوكت تجين للبيت وتنظفين

وداد... من زمان صار تقريبا سنه اكثر بس انتي اول مره اشوفج هنا رغم بزواجه صالحي انظف بيته وراها مرتين اجيت ونظفت ماشفتج

سديم... اي اكون مريضه او تعبانه
وتجين وحدج لتفهميني غلط بس فضول يعني قصدي شلون جنتي تأمنين على نفسج تدخلين بيت واحد عزابي وانتي بعدج صغيره وحلوه هم الناس مترحم

وداد... استاذ ادم حباب بشكل اني بس بيته افوتله يعني ماروح على بيت واحد عزابي وحدي اروح بيوت عوائل لكن استاذ ادم لا عادي هو ولامره تصرف مو حلو اصلا يجي ينطيني مفاتيح البيت ويكلي اني طالع ارجع ساعه 6 او ساعه 2 حسب رجعته المهم يكلي الكه كلشي تمام

فااني اعرف وكت رجعته اخلص قبل وكته ومن يريد يجي يخابرني اذا اني بالبيت لو رجعت مرات اكون بعدني مامخلصه البيت ومرات اكون مكمله وراجعه لبيتنه

سديم... وشلون تعرفتي عليه

وداد... جنت دااشتري علاج من الصيدليه لاامي والعلاج بوقتها جان كلش غالي بوكتها طلب ابو الصيدليه 250ثمن العلاج اني كل الي عندي 100 الف معبالي هيج حيكلف هو جان موجود واكف دااياخذ علاج جان يشكي من راسه يكله عندي اثر ضربه ماعرف سمعته هيج يكله للصيدلاني المهم سمعني اكلم الصيدلاني

وداد... عادي اقسط العلاج بصراحه ماعندي هذا المبلغ

الصيدلاني... لا منبيع بالاقساط

وداد.. والله اني اجيبهن الك اني اشتغل بالبيوت انظف ومطلع اول كل شهر اجيبهن

الصيدلاني... اختي كتلج منبيع

ادم... شكد ثمن العلاج

الصيدلاني... ثمنه 250 الف

طلع ادم الفلوس ودفعها ونطاني العلاج

وداد... لا زحمه..... ليش تدفعه انت

ادم... ماكو اي زحمه
وطلع

رحت وراه مباشرة اني ارجعها الك وين عنوانك او رقمك

ادم... مااريدها المهم الحجيه تصير زينه

وداد... لا ابد والله على الاقل اقسطهن اني انظف بالبيوت اجي انظف ببتكم مقابيلها

سكت لدقائق بعدين وافق ودلاني على بيته وحتى بوقتها وصلني

سديم.... موقفه حلو حيل

وداد... اي والله ومن شافنه بس خوات احنه وامنه كال شتحتاجون اطلبو اني هم اخوكم
حتى اختي ميسم راحت كليه ومن عرف دز الها فلوس ويايه كال هسه تحتاج مصاريف ولبس

وعلى طول ينطيني فوك اليوميه فلوس

سديم... عاشت ايده

وداد... خل اقرالج الفنجان

باوعت بي وفرته يمنه يسره كالت

عندج فرحتين وحده بعيده شويه وحده قريبه دايطلعلي 5 ماعرف 5 ايام... 5 اسابيع... 5 اشهر
بس اكو فرحه والله اعلم
وعندج احد زعلان منج بس ميكول
عندج حزن هم بس هاي الفرحتين حتنسيج حزنج هذا

سديم... ابتسمت... يالله... الله يسمع منج

قد نتمسك بخيط من الامل نصنع الفرحه حتى لو اخذ الحزن منا مجراه نحن اقوى
نحن اقوى من ان يهزمنا الحزن....

ـــــــــــــــــــــــــــــــــــــــــــــــــــــــــــــــ
مــــــــــريـــــــــــــــــــــم.....

مرت تلاث ايام على وجودي بيتهم نور جانت تكمل شغلها وتروح تنام ويبقون الاولاد يم الحجيه ويمي
بالليل جانو الكل يمي سمعت صوت بجي بهمس
مشيت وره الصوت جان من غرفة نور

دكيت الباب... كالت تفضل

مريم... تبجين نور بيج شي

نور... مسحت دموعها واتبسمت كذب كالت لا جنت اتذكر عرسنه

مريم... وليش تبجين

نور.. لا هيج تعالي كعدي
ليش منايمه لساتج

مريم.. مااجاني نوم

نور... شوفي صور عرسنه شوفيني شلون جنت

مريم.. اخذت البوم الصور منها وصرت اتفرج
صور عرسهم جانت بالبدايه صور الحنه الخاصه بيها
بعدين طلعت صور الضرغام وياها وهو يحنيها
ومبتسمين

بعدين شفت صور زفافهم جانت بفستانها الابيض وكانت مو ضعيفه مثل هسه
كانت الفرحه واضحه على وجهها يمها واكف الضرغام ببدلته الي يطغي عليها اللون الاسود بقميص ابيض ورباط اسود
اختنكت وكفت الدمعه بعيني وكأنه اليوم زفتهم وداشوفهم حقيقه جاملتها بصوت تمتلكه غصه وخنكه... الله يسعدكم

نور... تسلمين

باوعت لغرفتهم جانت حلوه كلش كانت فاتحه باب الكنتور باوعت ملابسه مرتبه كلش باوعت للميز ساعاته مرتبه وهواي هم وياها محابس وعطور وعلى الحايط الي فوك سريرهم صورة عرسهم
اساسا غرفتهم كلش مرتبه وحلوه

نور... تزوجنه من 7 سنوات ضرغام يصير ابن خالتي
من احنه وصغار امي وخالتي سامونه لبعض اني كبرت وتعرفين البنيه يبين عليها الكبر بسرعه مو مثل الولد تقدمولي هواي وجنت ارفض لان احب ضرغام

مريم.. وهو

نور.. هو باوعتلي وسكتت
بعدين تكلمت وهي تباوع لاايدها تفرك وحده بالثانيه برجفه خفيفه وتكلمت بصوت مخنوك
هو حبني بعدين من عرفني زين حبني

مريم.. وقبلها

نور... ضرغام جان يحب وحده وعشكها مو بس حبها جانت جيرانهم بس ضرغام انخدع بيها

مريم... شلون يعني

نور... حبها واعدها يتزوجها جان بالكليه العسكريه بس الله يحبه وكشفها اله
طلعت صاحبة صديقه وهو من عرف هالشي تخبل كرها حيل وتركها صارت مشاكل وتعارك وي صاحبه واهلها عرفو

مريم.. يعني هو كللهم

نور... لا لا بس هي شنو مصاحبه الضرغام ومصاحبه صديقه لضرغام هم وثنينهم ميدرون فجأه عرفو لان هذوك جانو علاقتهم قويه مره راجعين على الدراجه صديقه كايله اني احب بنت جيرانكم وناوي اتزوجها فسأله منو هاي

مدلي على بيت جيرانهم الي يحبها ضرغام ومن سأله على اسمها طلعت نفس الاسم
ضرغام ماصدك وكله هاي حبيبتي ورايدها زواج وانت تكذب ومن هالحجي ثنينهم ماواحد مصدك الثاني لحد ماثنينهم دكو عليها واحد كشفها للثاني وهذاك الي كال لااهلها
ضرغام نصدم وتأذه حيل كلنه جنه شاهدين شلون تأذه مااعرف اوصفلج حجم الاذيه بس هو ادمن عليها وهي صدمته
كرها هواي وتأذه حتى صارت عنده مضاعفات بصحته اشكال
جان اخوه اليا ميدرس كله راح ادرس علمود اصير طبيب واداويلك گلبك اخترع علاج لليحبون حتى بسرعه ينسون

مريم... خطيه وتالي

نور... تالي بقه فتره مو ضرغام الي نعرفه تغير هواي
جيرانهم شالو من يمهم وهو وصديقه خربت علاقتهم
بقه فتره وحيد ومكتئب اني صرت اروح واجيهم على طول واحاول الفت نظره لظرغام رغم هو جان مو يمي
جنت حلوه ومربربه خدودي متفحات ورديات مو مثل هسه

اجي وي خالتي بحجة اساعدها بس جذب اني علموده هو

ادري بي بغرفته من ريحة الجكاير جان جكاره وره جكاره ومنعزل هاي وكت ماينزل من يروح مااعرف المهم اني اهتميت بي
افوت للمطبخ اسوي كيك والجاي واروحله الكاه على سريره كاعد

نور.. ضرغام سويتلك جاي يخبل يكعد الراس اشربه

ضرغام... تسلمين

نور... خالتي كالت شتو تريد على العشاء

ضرغام... مااريد اكلو انتو بالعافيه

نور... لخاطري

ضرغام... مااريد ياعيني

بقه فتره هيج خالتي صارت تشجعني ويوم الي مااكول خل اجي وياج خاله تكلي امشي نور ضرغام عاجبه كذا اكله وانه تعبانه تعالي سولهيا وهو طبعا جان الحجي مو صحيح بس حتى تقربني من الضرغام
لحد ما تكلمت بصراحه...

... نور بنيتي انه اريدج تلفتين نظره لضرغام تأنقي اكثر شويه وردي بخدودج كحل ابتسامه لطيفه
انه فرحت لان عافها لهذيج بس مقهوره عليه
مااريده هيج ينكسر گلبو ويتأذه انتي كل شوبه تعالي عليه او اكعدي يمه سولفي خل يتعود عليج

اخذت بكلام خالتي وردي شويه بخدي والحمره السحريه من الليل اخليها والصبح امسحها ابويه جان ميقبل نخلي مكياج بس اني بالبوكات اخلي
صرت اسولف ويا هواي
مره احسه مو وياي ومره احسه مندمج وياخذ وينطي بالكلام
يروح لدوامه ومن يرجع حاصر روحه بغرفته بقه هيج تقريبا شهرين

بعدها خالتي خطبتني اله وكالتله

نور تاخذها وان مااخذتها لاابني ولااعرفك

ضرغام... يوم الله يخليج خلص كرهت النسوان حتى زواج مااتزوج

ام ضرغام... صوجك انت عاشكلي بنت سميه تاليها طلعت مصاحبتلها زلم

ضرغام... كافي الله يخليج هسه الي صار صار عوفيني بحالي

... نور الك انه خطبتها تاخذها والجمعه الي تجي بعد هاي الجمعه خطوبتكم

خطبني بالبدايه جان هو مو وياي بغير عالم
بس اني احبه هواي كلت لو حتى هو ميحبني مهم اني احبه وبمرور الوقت وبالعشره راح ينساها
امي وخالتي كالو نفس الكلام

نخطبنه جان حيل معاملته كلامه حلوه حيل وحباب
ويكلي لتحطين بالج سالفتي الي صارت انه خلص كرهتها وطلعت من نفسي حتى اسمها صار لو احد يذكرو كدامي اضوج كثر ماضجت منها بس انه مقهور على كم الكذب الي كذبته عليه شكد لعد نخدعت بيها من متعرفه على صديقي
جنت اكله الله يحبك وكشفها الك ومن هالكلام

بقينه فترة شهرين مخطوبين هذا الحجي احنه نخطبنه وره ماخربت علاقته وي هذيج ب 8 اشهر تقريبا هو بده يتغير احس ارتاحلي نفسيته ارتاحت اني والله مو احمدلج بنفسي بس جنت فرفوشه واحب الحياة ودوم احجيله نكات اخلي يضحك
اكله اضحك الدنيا متسوه ننقهر

بده يحبني وصار يخابرني اكثر من مرتين وتلاثه باليوم حتى هو كلهم انه اريد اتزوجها وطولنه بخطوبتنه تزوجني وثنينه كنه حيل فرحانين بس اني طبعا فرحتي اكثر تعرفين شنو
احس قلبي هيج هيج طاير من فرحته ينبض ويدك سريع سريييييع وهو كلما يباوعلي يشوفني فرحانه يبتسم لفرحي يعرفني احبه هواي وعلى حبي اله حبني

ضرغام نعم الزوج وماتندمت لان حبيته ولان لفتت انتباهه او شي ثاني بالعكس اختاريت لنفسي الانسان المناسب الي اكون سعيده ويا طيلة فترة زواجنه من تزوجنه لليوم ماقاهرني صدك مرات يعصب من شي يضوجه صحيح بس ولا مره صيح عليه وخلاني اخاف منه او ضربني او مثلا سمعني كلام موحلو من يضوج يحجي بخشونه اكثر ويعوف البيت ويطلع يخاف عليه ويغار هواي تعرفين شيكول

ضرغام.... المره ورده متشوفين الله فرض عليها الحجاب الله حب يضم وردته

نواره اي شي تحتاجي لو انه وياج نروح للسوك لو انه وحدي اجيبلج مااقبل تروحين وحدج او وي احد عيون الزلم ماترحم واخاف عليج متعرفين بالشيطان الي مستوطن عقليتهم

نور..... وقت اكون حامل بالشهر الاولى حيل يدللني
الاشهر الاولى صعبه عليه وتلعب نفسي واتقيأ من اي شي يوكف يمي ويغسلي وجهي حتى ارتاح شويه ماابقه اتقيأ

نور.. رووح متلعب نفسك

ضرغام.... لا اكو واحد تلعب نفسه من روحه

يسألني على طول نور شنو عاجبج اجيبلج اشتريلج
لما يثكل حملي واكون تعبانه يكلي ارتاحي تصدكين مره جنت بشهري الاخير داالبس ترانشوز كعد هو يسويلي القيطان
بدلته والرتب على جتافه لو غيره يستصعبها ومستحيل يسويها اني بدون مااطلب منه هو بادر حتى وكت مااكون تعبانه يدلكلي يكلي رجليناتج تعبن من ثكل الحمل

تعرفين مريم يقبل ايدي ويكلي اسف

اكله على شنو

يكلي تحملين وتتعبين وتتعب اسنانج وعظامج علمود تولدين اطفال يشيلون اسمي

اني حتى لساني يعجز شرده والله
اكتفي ادعيله دائما جان يصلي ولما صار حادث ايليا تغير صار مايصلي ويشرب خالتي شكد تعاركت ويا وكالتله اتبره منك بس هو تعب ومايتحمل
كل مره اصلي اصليله قضاء نيابة عنه اقره قران واطلب اجرها لضرغام
مره استفسرت السيد بقه صافن يكلي معقوله اكو حب لهذه الدرجه
كالي لابأس ان تستغفرين وتهدين اجرها له لكن الصلاة والصيام لاتجوز عن الحي

صرت اسبح هواي بالاستغفار واهدي اجرها اله
ضرغام لحد هسه مايدري اني هيج اسوي

مريم... زين لعد ليش تبجين
ومن جنتي تقرين القران هم تبجين

نور... لان..... وسكتت اختنكت ولمعت الدمعه بعيونها
تكلمت بصوت مخنوك...
لان اني ويا راح نفترق
مريم اني راح اعوف الضرغام

مريم... بتفاجئ.... ليش

نور... اني مريضه بالكانسر ( سرطان الثدي)

تأخرت يله اكتشفت هالمرض ولما كشفته انهاريت بقيت فتره كاتمه وماكتله للضرغام بس هو كشفني وعرف ولما عرف زعل مني

ضرغام... وهو انه غريب حتى تضمين عليه هيج شي ليش نور

نور... ماردت اشغلك بيه

ضرغام... وانه عندي اهم منكم انتي وامي واولاددنه واحد تضمين عليه نوووور لييييش

نور... اني خلص ورقتي بدت تحترك

ضرغام... وتستلمين هيج بهذه السهوله... ماعرفج هيج ضعيفه

نور.... تعرفين مريم احساس بشع حسيته وكفت الدنيا بعيني وكرهت كلشي صرت انعزل وابجي هواي
الزم اولادي اشمهم وابوسهم اعرف راح اعوفهم
فكرة انك تعرف شوكت حتموت بحد ذاتها مؤلمه وقتل على البطيء فكرة انك تبتسم وبداخلك غصه مؤلمه وخزه هنا بگلبي بكل لحضه احسها
السرطان تغلب عليه واني استسلمت بسهوله اله
ضرغام هواي حفزني وهواي جان ينطني امل ويخليني اكون قويه بس اني لا استسلمت
تعرفين شوكت استسلمت
استسلمت لما اجرولي عمليه وقطعو احد اثدائي
من وكفت كبال المرايه وشفت جسدي المشوه هنا خلااااص انتهيت وتمنيت لو فعلا ميته مره بنصف انوثه او متجرده منها مريم

صرت احس بقيمة جسدي وبقيمة صحتي وانو رب العالمين طول هذيج السنوات الي عشتها جنت عايشه بنعمه لاتقدر بثمن
صرت اتسائل ليش جنت اضوج

ليش جنت اعصب على اولادي او ازعل من موقف او انقهر وكأنه هاي اكبر مشاكل الحياة

صرت اتمنه تعاد الايام الحلوه الي اني بيها بكامل صحتي واعيشها بصوره صحيحه لاازعل ولاانقهر
واعيش البس احلى لبس واطلع لااجمل الاماكن
ولاعمري حضوج لو اولادي وسخو البيت انضفه عشر مرات عادي مهم اني متعافيه
مريم العافيه نحس بيها وقت مانفقدها

لما سويت العمليه وبقيت بنصف انثى صرت ابتعد عنه واتصنع ويا مشاكل في سبيل انام بغرفة الاولاد مااريده يشوفني بهذا حالي
وهو جان يعرف اني لهسبب دااخلق مشكله واتركه
مع انو هو ولا نفرني ولا حسسني صار وياي شي بالعكس
بكل حب يتعامل وياي لما نكون سويه لكن اني احسه يشفق عليه تنحست هواي

نور... بدموع.... لاتشفق عليه ضرغام بطل تعاملني بشفقه اني مشوه جسدي لاتتعامل وكأنه ماكو شي

ضرغام... بس انه مافرق عندي شي مهم طولج اشوفه كدامي

نور.. حتى اني مره اكره نفسي بهذا جسدي لاتكذب

ضرغام... لاتكرهين نفسج حبيها شلون ما هي

نور... طلكني اني مااريد ابقه وياك

ضرغام.. وانه مااطلكج انتي مرتي وام علي وحسين
وزهراء شلون تهونين عليه واطلكج

نور... ربيهم انت ماريدكم

ضرغام.... واهون عليج

متحملت بجيت احبه مااريد ابتعد عنه بس مدااكدر اكمل ويا مدااكدر بهذا وضعي
كالي نور بس ترجع عافيتج اسويلج تجميل وترجعين احسن من الاول بعد هسه اخاف عليج ادخلج اي ماده وانتي مريضه خاف تزيد حالتج

وهسه اني استأصلتهن ثنينهن زهوره رغم بعدها صغيره مارضعتها كون مصابه

مريم... ان شاء الله تتعالجين وتصيرين زينه

نور... بعد فتره حتلقى علاج الكيمياوي يكون اخر مرحلة للشفاء

مريم...  لاتيأسين

نور...  خلص قدري هذا يكفيني ان عشت بضل الضرغام ولو فتره يكفيني شفت حبه وحنانه عليه
اتساىل واكول هم راح يحب بعدي

هم راح تثير اعجابه بمفاتنها وانوثتها
يعني هم حتسعده مثل مااني كرست حياتي اله
خايفه لايحبها بس اني متأكده مستحيل تجي وحده تحبه بكثر ما ااني حبيته ابد

اتمنه اوصي وصيه مايتزوج بعدي بس هم ارجع افكر بااطفالي منو يربيهم ضرغام مو بالبيت داىما
بس خاف تطلع مو زينه
خاف تطلع زوجة اب قاسيه وتأذيهم
هواي هيج افكر

اريده يبقه متذكر انو اني احبه وحبيته وراح ابقه احبه وانتظره بالجنه زوج الي

اللهم واني اخترته زوجا لي في الدنيا فجعله زوجا لي في الاخره

اللهم واني رضيت بقضائك وقدرك وحكمك فجعلني من الصابرين فااعفو عني يارب ان بكيت من بلاء ماانزلته بي الا رحمه لتختبر صبري يارب
فالحمد لك دائما وابدا.....

 إِنَّا وَجَدْنَاهُ صَابِرًا نِعْمَ الْعَبْدُ إنّه اوّابٌ...

كنت معكم انا رغد الموالي في امان الله ♥