تل الذهب
رغد الموالي
ـــــــــــــــــــــــــــــــــــــــــــــــــــــــــــــــ
طلعت وداد وبقيت بالبيت اكول معقوله اكو فرحه تنتظرني يافرحه وادم نفسه ادم
مااشوفه الا اجه اتبسم جان شايل علاكه بيده
... شلونج
رديت بثكل.. زينه
اجه وكف يمي لزمني بطاارف اصابعه من خدي برهاوة ايده كال بعدج زعلانه
... لااااااااا ليش الزعل
... شوفي شنو جبتلج فتح العلاكه شوفي
باوعت حذاء لونه سمائي لطفل رضيع صغير اول ماشفته اتبسمت وفرحت حيل
هذا لطفلنه؟
.. اي شفته عجبني اخذته ماعرف شيلبسون للجهال هم وصغار جبتله هذا الحذاء يلبسه اكيد يحتاج حذاء
.. وشيسوي بالحذاء وهو صغير قابل حيمشي بي
عموما عاشت ايدك
.... ريحة طبخ طيبه واني جوعان رااح اصب غده جوعانه
... لا اني اصبلك
... لا مو انتي تعبانه
... محد متعبني غيرك
صبيتله الاكل خليته كدامه وتوجهت اروح لغرفتي صاح
تعالي ناكل
باوعتله مارديت توجهت لغرفتي كعدت وحدي
مثل سجينه وتنتظرفترة حكمها تخلص وتتحرر
شويه واجه كعد كبالي باوعلي من جوه حاجبه بعتب
... اني اعترف غلطت بحقج بس وضحتلج شنو السبب سديم اني اعرف نهايتنه لا بد منها بس على الاقل ماريدج تحقدين عليه
... مو حاقده عليك
... لا بقلبج عتب ومقهوره مني اني دااحاول وياج بس انتي باقيه حاصره روحج بدائره وتردين تفشلين زواجنه
.... والمطلوب
انسى ضربك واهانتك الي واتقبلك عادي ولاكأنه صاير شييييي هاااا
ادم اني مو حجر افهم اني بشر دم ولحم من حقي اعيش وي رجل يحبني ويسعدني
من حقي رجل يدللني ويكون الي فقط مو الف وحده تشاركني بي يااخلي مليتك كرهتك
... اعرفج تكرهيني اني مااجبرج على شي بعد تردين ترحين روحي وحتى الطفل الج اني مااصلح اكون اب زين
وعافني وراح لغرفته
بجيت وره ماطلع تعبت بس فرحت من كالي روحي
كلت اروح لبيت خالي بس قكرت هو منو بقه حتى اروح قابل اعيش اني وياهم بيت وحدنه شلون
لازم يتزوج حسن بااقرب وكت
خابرت تبارك...
... شسويتي على مود حسن
... سديم امي حول السنه بعدها مطلعت
... راح اتطلك افتهمي وين اروح
... ابقي بيتج نصيحه لوجه الله حسن مو ادمي الي راح تجي ادميه تبقين عدهم بصفتج شنو والله تهجج بليله سوده
... البيت بيتي لتنسين
.. اخذي وعيشي وحدج بطفل صغير بلا اب دشوفج تكدرين
سديم صحيح هسه انتي عندج فلوس بس تره مو كلشي بالحياة فلوس
رجلج اليوم اعوج باجر ينعدل وينصلح حاله وتصير اموركم طيبه سديم تصرفي بعقل ولتباوعين لغيرج غيرج رجلها وفي بس تلكي بخيل
غيرج رجلها وفي ويصرف بس تلكي ايده والضرب
رجلها مابي كل هالصفات تلكي ابن امه كلمه تودي وكلمه تجيبه ما ياخذلها حقها مامحسسها عدها رجال اصلا
وكاعده بنص عائله جبيره وليل نهار تشتغل
حامل مو حامل مريضه مو مريضه مايعترف بهذا الشي
.... بس تعبت
... كتلج شغلي عقلج مو عواطفج
... محتاجتها لخالتي هواي
... كلنه نحتاجها بس شنسوي هاي الحياة اني حروح علي هستوه رجع من دوامه
بقيت افكر الي كالته صحيح وادم من احجي ويا يجي ويستمع ويصغي
صحيح الطلعه الي طلعها صعبه بس راح احاول ويا
بقيت بالبيت وماطلعت مثل ماكال وهو بليلتها بغرفته جان ماطلع
كعدت اقره قران بتجويد واعرفه هو دايسمعني بغرفته تقصدت اسمعه اريده يحس بااغلاطه
جنت اقره الايات الي تتكلم عن النبي الله ادم ابو البشر لما رفض ابليس يسجد لادم...
وَإِذْ قُلْنَا لِلْمَلَائِكَةِ اسْجُدُوا لِآدَمَ فَسَجَدُوا إِلَّا إِبْلِيسَ أَبَى وَاسْتَكْبَرَ وَكَانَ مِنَ الْكَافِرِينَ ﴾
بهل الاثناء طلع ادم من غرفته واني كملت قراءه فقاطعني وتكلم...
هو لو مو ابليس جان احنه بلا هذا القهر والضيم
... باوعتله تكلمت
انت تعرف ابليس جان ملقب بطاووس الملائكه
... ههههههه والله واول مره بحياتي اشوف وحده مؤمنه وتنكت
... خخخخ متضحك
... والله يعني انتو المؤمنين دمكم جامد ومتضحكون
.... عفته للضحك للكافرين
.. شحلاتنه.... اي شيخه سديم ولمن هو طاووس الملاىكه ليش مسجد
... مو غار من عدنه كال لرب العالمين انا من نار وهو من طين انا افضل منه
... هاااا
... انت تعرف اكو كتب تكول انو اساسا رب العالمين اختبرهم بهذا السجود يعني لما ابليس عصى ربه احتج ووجه اسأله لرب العالمين
.. مثقفه وتقرين كتب هم
... الثقافه الحقيقه بالكتب هي قراءة القران اما البقيه مكملات بس راح اجيبلك الكتاب الي اقره بي واسمع
يگول الشهرستاني صاحب كتاب الملل والنحل
ان ابليس احتج على ربه ووجه اليه سبعة اسأله
اول سؤال هو... اذا كان الله قد علم قبل خلقي اي شيء يصدر مني ويحصل مني فلماذا خلقني اولا وما الحكمة من خلقه إياي؟
ثانيا... وهو قد خلقني على مقتضى ارادته ومشيته فلماذا كلفني بمعرفته وطاعته؟ ومالحكمه في هذا التكليف مع العلم انه لاينتفع بكاعته احد ولايتضرر بمعصيته
ثالثا... وهو حين خلقني وكلفني فالتزمت تكليفه بالمعرفه والطاعه فلماذا كلفني بطاعة ادم والسجود له؟ ومالحكمه في هذا التكليف على الخصوص؟
رابعا... وان لم ارتكب قبيحا سوى قولي ( لا اسجد الا لك وحدك) فلماذا لعنتني واخرجتني من الجنه ومالحكمة من ذلك؟
خامسا: وهو بعدما لعنني وطردني فتح لي طريقا الى ادم حتى دخلت الجنه ووسوست له فاأكل من الشجره المنهي عنها وهو لو كان منعني من دخول الجنه لااستراح ادم وبقي خالدا فيها... فما الحكمة من ذلك
سادسا... وهو بعد ان فتح لي طريقا الى ادم وجعل الخصومة بيني وبينه لماذا سلطني على اولاده حتى صرت اراهم من حيث لا يرونني وتؤثر فيهم وسوستي؟ فهو لو خلقهم على الفطره دون ان يحولهم عنها فعاشو طاهرين سامعين مطيعين لكان ذلك احرى بهم واليق بالحكمة.
سابعا... وهو بعد ذلك الهمني واخر اجلي الى يوم القيامه فلو انه اهلكني في الحال لااستراح ادم واولاده مني ولما بقي عند ذلك شر في هذا العالم اليس بقاء العالم على نظام الخير خيراً من امتزاجه بالشر...
يروي الشهرستاني والعهدة عليه... أن الله اجاب على حجج إبليس قائلا...
« لو كنت ياإبليس صادقاً مخلصاً في الاعتقاد بأني إلهك وإله الخلق ما احتكمت عليّ بكلمة لماذا؟
فأنا الله لا إاله إله إلا أنا غير مسؤول عمّا أفعل والخلقٌ كلهم مسؤولون!» ... من كتاب مهزلة العقل البشري للكاتب الدكتور علي الوردي....
.. بقه صافن لكلامي انتي....
انتي شلون هيج تعلمتي
... من الكتب
... يعني منو اشترالج او شجعج نصحج
... اني احب اقره بالعطله وجنت لمااروح مكتبه اشتري
... هز براسه بمعنى اي كال نعست وحروح انام
... اليوم ولا طلعت
.. مالي واهس
راح لغرفته واني هم رحت لغرفتي بقيت مدده حد ما نمت
حسيت بمنتصف الليل ضلمه وهدوء ضوه خافت يجي من الشباك البره عاكس ضوه شويه على الغرفه
حسيته يمي وريحة مشروب كلش قويه
التفتت لكيته يمي مدد ويمه بطل مشروب
فزيت...بخرعه.... ادم.... شتسوي هنا شبيك
... كعد وي كعدتي وحسيته دايبجي بس مدااشوفه
تلمست وجهه لكيته مبلل من دموعه
همست شبيك ادم ليش تبجي
..اني اسف كعدتج
.... ليش تشرب بهذا الوقت وليش تبجي شكعدك
.... اني مانمت اصلا
....ليش اليوم حتى ماطلعت من ضوجك
دقيقه خل اعلك الضوه
علكت الضوه واجيت يمه
.. ليش كل هالدموووع شبيك ادم
.... اني مو انسان سيء سديم صدكيني جنت احسن واحد بخوتي بس
بس
... بس شنو
... جنت احب وحده ومتأمل بس اعدل وضعي المالي اتزوجها هي ماعدها كلشي حب الفلوس اهم
صارحتها وكتلها صبريلي واني رايدج على سنة الله ورسوله كالتلي وياك
اني وياك حد الموت
بين ليله وضحاها مااسمع الا مخطوبه
سألتها شلون وليش وحبنا
كالت جبروني تزوجت غصب وابويه جبرني
كتلها اجي واخطبج من ابوج واكله احب بنتك
كالت انت بعدك ماكون نفسك وابويه مراح يقبل
صارت تبجي واني احبك واهلي زوجوني غصب ومن هالامور كتلها ننهزم لاتتزوجين غصب
كالت اهلي وسمعتهم شلون
عذرتها وكتلها يابنت الناس روحي تيسري وشوفي حياتج
قبل بيوم من زفتها خابرتني صديقتها كالتلي ادم اني اعرف انت متأذي على وديان بس تره هي كذابه ومامتزوجه غصب وتعال شوفها ضحك وركص لتبقه تأذي روحك
نار وحركتني بيها ماصدكت خابرتها بيوم زفتها لوديان كتلها هسه اشوفج كالتلي لا شلون وعرسي اليوم
كتلها اسألج سؤال واحد وهاهيه بس لازم اشوفج
مهم كالتلي تعال عود قبل لايزفوني اني حروح للصالون هسه وراح اشوفك على السطح
للعصر بقيت انتظرها على السطح اجت بدلة الزفه ومكياجها تخيلي سديم اني روحي متعلقه بيها وهي اجت هالجيه حركتني حرك بيها
كتلها جبروج لو باارادتج
وديان .. انت شرايد ليش تسألني
ادم... احجي
وديان... لا ماجبروني ادم هي مو كلشي حب
ادم... مارديتلها عفتها ومشيت
عفتها بس اني كاره الدنيا بليلتها جان اول مره اشرب وشربت هواي بوكتها اصدقائي رادو ينسوني
شربت وصادقت بنات بليلتها وصرت يوميه هيج حد ماتعودت صرت مهووس بالنساء بسببها واحسهن مايسون عندي وقيمتهن عندي جم فلس صرت انتقم منها بيهن وانتقم منهن هيج مثل حقد بداخلي اشتغلت وتعبت على نفسي وصرت
مرت سنوات رجلها طلكها اجت عليه كالتلي
اني اسفه اني غلطت سامحني ماسامحتها ابد
يوميه صارت تجي عليه سامحني الله يخليك اهلي اغروني بالفلوس اهلي ضغطو عليه جنت صغيره ومراهقه ومااعرف كتلها ابد مااسامحج
لحد مابيوم اجت واخوها ضاربها ومطعونه بصراحه سديم ماتحملت الها معزه بگلبي ماانكر اني ماكرهتها بس نقهرت منها حيل من شفتها هيج كتلها يمي جنت مأجر بيت نسهر بي اني والولد فخليتها بالبيت وكتلها واني اعلمه لااخوج
رحت وتعاركت وي اخوها وضربته وصارت عركات وشكاوي وسجون وعرفوها عندي ف اني وبالشغل
فاتو للبيت وقتلوها بيتي وبلغو على بنتهم مختطفه
ونطو اسمي ضمن الي شكو بيهم
مهم اجت الشرطه والقو قبض عليه تلبست بالجريمه
اخذتني الشرطه ونسجنت محاكم وسجون و ابويه ماسكت وصار يلومني ويحجي عليه اخوتي والدنيا كلها وجهت اصابع الاتهام عليه
وماعندي حجه ابرئ نفسي منها سكتت وتقبلت فكرة ان اني قاتل
بس الله ميكطع جيران البيت المؤجر شايفين اهلها وهم طابين للبيت امهم شايفتها واخوها الي كاتلها من السطح
اجو وشهدو على الحقيقه اني نحكمت اعدام ولحضة ماهم شهدو فورا القو القبض عليهم واشتغل التحقيق
وكشفوهم واتضح اني بريء خلصنه من سالفة السجون والقضاء طلعت سالفة العشاير....
سديم... وانت هيج حبيتها وضيعت نفسك من وراها
ادم... اي حبيتها جانت اول حب الي
سديم... بس هي غدرت بيك وكسرت گلبك
ادم... من اجت عليه وهي حالتها حاله متحملت سديم نقهرت عليها بالنهايه هاي جانت بيوم من الايام غاليه على گلبي اني كلبي مو حجر وحتى قسى صحيح تألمت وبجيت وتأذيت بس ماكرهتها
سديم... بس هم تأذيت لمن رجعتلك
ادم... هي اهلها لعبو بعقلها اخذيلج واحد. عنده فلوس ويسعدج ونطوها مقدمات حلوه هي بنيه اقتنعت كلتلك راح احبه بالعشره وانساه لاأدم
سديم... الي فضلت الفلوس على انسان ماعرف شكول عليها
ادم... هاهيه بعد راحت والله يرحمها كتلج حبيتها وبسببها صرت مهوووس بالبنات شكثر صاحبت وكان أملي أنسه بس مانسيت فجأه لكيت روحي غركان بالدرب الاعوج واكع بحر وماكدر اطلع منه ولا اريد اطلع لان هن الدرب الوحيد الي ينسيني كلشي
سديم... متعرف هالشي غلط وحرام
ادم... تربيتي غير تربيتج سديم انتي ربيتي بلا اهل بس الله خله بدربج خاله خلود علمتج ووعتج وصرتي كأنه مثل وحده عايشه بضل اهل واحسن هم اني عشت بلا ام امي ماتت واني صغير ابويه رجال حاير بشغله وبعمله مايلتفتت النه لايكللنه شنو محتاجين شنو نريد واخوتي الاكبر مني كذلك نفس طبع ابويه بيت خالي من مره تقوده مرات جانت تجي خالتي تتفكدنه تشوفنه شمحتاجين ابويه سمعها كلام غثها بعد مااجت بقينه بس ولد وابونه ابويه حتى ماتزوج
مرت عليه ايام وليالي اني طفل اتمرض محد يمي
اكور نفسي من البرد بداخل غرفتي وحتى مااكدر اجيب غطى اني من اتمرض فلاونزتي براسي بحيث مااكدر اكوم ابقه مصخن واتمرض واطيب وحدي محد يمي ابويه لو يمر ينطيني علاج لو
مرات اخويه الاكبر مني بشويه جان يفوتني للحمام يسبحني يبدلي جنت صغير ومااعرف اسبح يكعدني مرات يدرسني من جنت بصف الاول
ملابس المدرسه البسها واروح بيها يومين ثلالثه يله يغسلها اخويه بحيث تشبع وسخ وكل بين فتره وفتره المعلمه تبهذلني امك ماشافتك قبل لتطلع شهل الوسخ شنو انت واني اسكت
بدرس الاسلاميه عرفت الله خالقنا وخالق كلشي وعرفت نبينا محمد وعرفت اشياء تخص االاسلام لكن سديم اني هالامور ماشفتها بيت اهلي ابوي ماعلمنا مااعرف
ماشفت ابويه فد يوم واكف على سجاده ويصلي
اخويه الجبير جان كل يومين تلاثه مفوت صاحبته للبيت وكم مره شفته يكلي اذا حجيت لاابويه اضربك حتى اصلا تعودت على هالمشاهد
ضحك وحجه حتى مره وحده من صديقات اخويه شافتني هيج مبهذل غسلتلي ملابسي وحكمت على اخويه يسبحني وسوتلي اكل والله بوكتها سوتلي شوربه لحد الان طعمها ماغاب عني كثر ماشفتها طيبه
اني تربيتي غير تربيتج عكسج تماما
من جنت اغلط مالزمني ابويه وكلي ادم الي داتسوي غلط او حرام
لتلعب بااعراض الناس ماجان يكلي سديم جنت اعرف حرام بس ماجنت اعرف حرام واثمها جبير توقعت حرامها مثل واحد يكذب كذبه بيضه بمزح شي عادي حتى ماجنت احس بذنب الي اسوي
تدرين اني من اجي واشوفج تصلين او فاتحه قران بالبيت او انتي تقرين افرح اصلا اذا الي نيه لو واحد بالميه اطلك اتراجع سديم لهسبب اني ردتج وحبيتج واريد منج اطفال لان انتي طاهره ونظيفه واكيد اولادي حيكونون مثلج
سديم... قهرتني هواي قصته متوقعت هذا الالم كله كاتمه بداخله حضنته ومسحت على فروة شعره همست حبيبي كل هالالم هذا عايش بي مجنت متوقعه....
نحن لسنا سيئوون نحن اولاد الضروف السيئه....
مريم.....
مرض نور جان صادم بالنسبه الي يعني معقوله شلون وليش وشوكت وهواي اسأله اجت بالي نقهرت عليها رغم ماعرفتها الا من تلاث ايام
ثاني يوم كعدت من النوم لكيتها بالمطبخ هي وام ضرغام وزهراء سمعتها تخابره و فاتحه سبيكر وكفت يم الباب بدون ميشوفوني اسمع
ضرغام... يوم خو مداتشتغل هواي نور
ام ضرغام... لا والله هاي البنيه هم داتساعدها
ضرغام... هي يمكم
.... لا نايمه بعدها
ضرغام... نواره ماردت
حبيبي نواره
نور... بلي حبيبي كول
ضرغام..أمانه لاتبقين من شغله لشغله بالي يمج تره ومامرتاح
نور... هيج تخاف عليه
ضرغام... اذا عليج مااخاف لعد على منو اخاف
نور... اشتاقيتلك
ضرغام... انه هم.... يله راح اروح انه باعي شوفي مريم ليش نايمه لهسه خاف بيها شي
نور... هسه اشوفها
مباشرة رحت للغرفه سويت نفسي توني كعدت
نور... صح النوم قلقنه عليج
مريم... ابتسمت الها وكمت
نور... تعالي نتريك جبن وروبه ودبس وراشي والكليجه هم
مريم... كليجه شنو
نور... كليجه يعني معجنات شنو مماكلتها
مريم... لا
نور... تعالي لعد عمرج خساره لهسه مماكلتها
اجيت كعدت يمهم وقظمت الي ماعون الكليجه هاج جربي طعمها
اكلت قطعه جان طعمها طيب كلش
طعمها طيب
نور... اي كلش طيبه خصوصا من الجو بارد تصير طيبه
الحجيه... يمه نور ام نفس الطيبه الله لايحرمنه منج حبيبه
نور... ولايحرمني منكم حجيه
اباوعها يم العائله كلشي ماتبين على نفسها تبتسم وتقدم اطيب الاكلات وتحب الحياة وماتضوج ابد
على عكس خلوتها وعزلتها الي بس تبجي
مرت ايام وعدة العشر ايام
نور... باجر يجي ضرغام لازم احف وجهي
بس شحيطلعني
مريم تعرفين
مريم... اي
نور... تعالي فدوه
جابت الخيط واجت
كعدت حتى احفلها كم مره وينكطع الخيط تبتسم
اخر شي كالتلها لا ام ضرغام
خاله الخيط كل شويه ينكطع
الحجيه... ضرغام يحبج لعد
اتبسمت ودنكت بخجل كالت اي يحبني
جنت اباوعلها مااعرف انقهر عليها انقهر على روحي
سكتت وحفيتلها وكمت
ماتحملت ابقه كاعده تعبت اختنكت
كرهت الضرغام بساعتها
وهي خطيه اباوعلها حفت وسوت ماسكات لوجهها وترتب بنفسها حيجي باجر اريده يشوفني حلوه اريد ابقه بعيونه حلوه مايكول ذبلها المرض شوفيني بهذا النفنوف حلوه
كاعد عليه مو حيلوكلي مو
... جانت فرحانه الفرحه مو بس بوجهها بعيونها
ثاني يوم كعدت الصبح لكيت الحجيه بالمطبخ ونور تطبخ
صباح الخير...
... هلو صباح النور
...ردت اعرف اذا اجه ضرغام لو لا لان كالت الصبح يجي بس مسألت شكلها
بقيت كاعده صبيت الجاي وعيوني كلها تساؤولات عنه بس ماحجيت
اريد اعرف شسوه وين راح لكه بيت اهلي لا
بقيت الوب بصمت
ام ضرغام... دروحي يمو شعندج هنا
نور... لا خطيه اجه تعبان وكالي نواره لتخلين الجهال يهوسون يم الغرفه تعبان
خابت امالي الكاه اول مااكعد كمت وي نور نظفت البيت وياها وهي طبخت جانت ريحة الطبخ تسطر
واثناء مانشتغل اشوفه كل شويه تكعد مثل الي تدوخ وتلزم راسها بس تدوس على نفسها
للظهر كعد الضرغام من نومه جنه واكفين بالمطبخ اني ونور
نور جانت تجهز بالغداء واني اسوي سلطه
صباح الخير
نور... كول مساء الخير صار الظهر
ضرغام... بتوقيتي صباح الخير
اني بقيت ناطيته ظهري متحججه بفرم السلطه
ضرغام... شمسويه غده
نور... سويتلك مندي الي تحبه
تمام جهزي تره جوعان
وانتي مريم تعالي عندي حجي وياج انه بالصاله
باوعت لنور كالت روحي بلكت لكه اهلج
اجيت للصاله وجنت اتحاشى النظر اله مااباوعله جان هو كاعد على التخم
تكلم...
ضرغام... انه رحت لجامعة اختج
اول ماكال اختج رفعت راسي باوعتله مندهشه
مريم... اختي... انت تعرف اختي
ضرغام... اختج طالبه جامعيه رحتلها للجامعه بس للاسف مالكيتها وكالو تركت الدراسه انه ماعرف عنوانها
مريم... شلون عرفت اختي
ضرغام... شغلي عقلج هسه عرفت اختج على كلاً
تتحضرين العصر نروح لبيت خالج
.... وانت عرفت عنوانهم وين
.... رحت لاام محمود وعرفتهم وين العصر اوديج
روحي هسه يم نور
واخذ نفس جكاره وباوع للتلفزيون
رحت للمطبخ كالت نور
خطيه مالكه اختج بس ليش كال بيت خالج
مريم... اني يتيمة الابوين اهلي ماتو بالنظام السابق وعندي اخت تؤم وعايشين جنه بيت خالي
نور... باوعتلي متفاجأه.... تتذكريهم معناها تتذكرين عنوان اهلج
مريم.... ها.؟... ا.... ا.... لا.... يعني.... هو ضرغام كال هم عارفين.... توترت ومعرفت شنو احجي خليت خصلة شعري وره اذني بتوتر وهي بسرعه غيرت الكلام وكالت
يله مريم خل نصيحلهم يتغدون
.... اي.... اي .... رحت بسرعتي للحجيه حتى ضرغام جان بالصاله ماكتله لكيتها تصلي الحجيه كعدت يمها حد ما كملت
خاله صار الغده
... جايه يوم سبقيني انتي جايه وراج
كمت لكيتهم بالمطبخ ضرغام وزوجته واولادهم الثلاثه ملتمين على السفره ياكلون جان ضرغام وجهه على الصاله ونور عكسه بحيث ظهرها الي
شفتهم من كاعدين سويه وملتمين حسيت اني غريبه وكفت من بعيد شافني ضرغام دااباوعلهم
مو بكيفي ماانقهر لااتمنه لروحي هالالم ولا لنور
عفتهم ورجعت لغرفتي كعدت متحملت بجيت
خصوصا لما كالي حوديج العصر
كمت اني وابجي لبست ملابسي الي اجيت بيها وتحضرت حتى اروح
بقيت كاعده شويه واجت نور
تعالي مريم تغدي
... لا مااريد مو عاجبني
... شويه لكمه اكلي كال ضرغام حترحين وراج طريق
.... كمت وياها جان ضرغام كاعد بالصاله مكمل غداه
بيده الجكاره واول ماطلعت باوعلي
صار كلما يشوفني يبقه يباوعلي بس مايحجي اي شي ويتصرف برسميه وياي
رحت يم نور والحجيه كعدت اتغده اكلت من لاشهيه شويه بقيت بالمطبخ يم الحجيه كالت يمه حترحين
درب السلامه والله تعودنه عليج بهل الكم يوم
... اني هم حجيه حشتاقلكم هواي
.... اجت نور كالت يله يكول ضرغام
بوستهم وسلكت عليهم حتى اطلع كال ضرغام
جاهزه
... اي جاهزه
... ملابسج وين
... مااريدهن
... حضريها وامشي انتظرج بره
طلع واني رحت حضرتها وطلعت لكيته كاعد بسيارته
صعدت بالكشن الي وره نور جانت تباوعلنه
حرك السياره وطلع لما طلعنه من المنطقه ابتعدنا كال
ضرغام... ليش كعدتي وره
.... نور تباوعلنه تشوفها حلوه اكعد يم زوجها ونطلع سويه
... باوع بالمرايه... صايره تفكرين صح
... ماحبيت اتصرف مثل بنات النوادي موووو هذا كلامك لو غيره
... سكت ومارد
... صرنه نطلع من منطقه وندخل بمنطقه وصمت يسودنه طول الطريق حدما وصلنه منطقه وكفنه كدام بيت قبل لاينزل كال
راح انزل اتأكد ابقي هنا انتي
بقيت كاعده بالسياره وهو نزل باوع يمنه يسره تحير البيت نفسه لو لا
سأل ابو ماركت وبقه يحجي ويا شويه وصعد بالسياره شغلها
مريم... ها شسويت
ضرغام... مرت خالج توفت ولد خالج يوم هنا وعشره لا
مريم... شنو شلون لعد اختي وين
ضرغام... اختج متزوجه وكاعده بيت قريب على جامعتها مو هنا
مشى بسيارته وطلعنه
مريم... وهسه وين حنروح
ضرغام... باوعلي بالمرايه ومارد مشى بسيارته توقعت راح يودينه للبيت لكن اتضح من خلال الطريق جان مألوف طريق المزرعه
مريم ... هاي وين ضرغام وين موديني
ضرغام... ماتذكرتي من الطريق
مريم... شعدنه بالزرعه
باوعلي وسكت مارد
تكلمت... اذا جايبني حتى تسوي شي من الي براسك تحلم لاعبالك حنطيك مجال انت بعدك متعرفني
ضرغام... صحيح مريم الداكوكه
مريم... داكوكه شنو
... ماشايفه مناوي باشا
مريم... يامناوي باشا
ضرغام... لعد. محتعرفين شنو داكوكه
وصلنه المزرعه نزل فتح الباب ورجع صعد السياره ودخلها للمزرعه
نزل وكال نزلي
نزلت تمشى هو فتح باب الغرفه كال فوتي الجو بارد
... شعندك جايبني هنا لعد
... كتلج حسابي مخلص بعدو
... ياحساب بعد كل الي سويته تكلي عندي حساب وياج
ماكفاك الالم الي معيشني بي مكفاك انتقامك الي شتريد تسوي بعد
.... انتقام.... ألم.... هو انتي بعد شفتي شي
... ليش هااااافوك ماعيشتني بكذبه لشهووووور وقبلها تكذب عليه وتكلي اني من جماعتهم بالتالي تطلع ضابط وكل الي اعرفه عنك غللللط وكذب ضرغام اني ماشفت حقيقه منك الا وجهك كل الي حجيته وكلته كذب
... كتلج جنت بمهمه ولو حاجيلج الحقيقه جان حجيتي وجان اهلي راحو بيها
.. شلون احجي اني شلون انطي بيك
وهسه بعد الي صار تجيبني بيتك يم مرتك ضرغااااام
... وين أأمن عليج وين اوديج
... عسى ما بجهنم
تخليني يمها ضرغام تحرك بگلبي
... وانه اهمج يعني تردين تقنعيني مقهوره ومحترك دمج
.... اييييي اني كل يوم دايمر عليه واشوفكم سويه امووووت مااتحمل مو بيدي افهم مو بيدي
... انه خليتج هناك حتى احميج وين اوديج اساسا ماعندي ثقه بيج
دااحجي وخله ايده على حلكي كال اشششش
...اشششش صوتج فوتي جوه وتسدين هذا الموضوع جاي اسألج كم سؤال وبعدها نروح
...فتت ودااتكلم بعد مباشرة خله سبابة ايده يم شفته بمعنى اششششش همس كعدي ولتحجين شي بعد كعدت على السرير الي جنت قبل انام عليه وهو كعد على الكرسي كبالي
وصار يسأل مثل محقق ومجرم
... تحجيلي كل الي صار وره مااخذوج
... ليش احجيلك
... حتشلعين گلبي احجيلي
... اني اصلا ماعندي شي احجي
... وين اخذوج بعد ماصوبتيني
... انت منو نقذك سمعت ليو باقي يمك
... ابتسم وكأنه يكول اعرف ورد سأل وين اخذوج
لنفسها المنطقه مو الي لزموهم بيها
.. اي
... منو دورج هناك
... محد ابو غضب خلاني بيته
... اي وصرتي إلو مو
... لا ماكو بيناتنه شي
... بدينه نكذب
... الي حجته لمى عني باطل وافتراء
... والفيديو
... هو كلي بيني هيج حتى ماتشك البيكه
هو حذرني ماانطي مجال لااحد
...متفقين هيج تحجون ثنينكم شنو تستغفلوني انتو
.... لا
لا ضرغا
... نتر وصاح بيه اااااشششششش
كذابه انتي كذابه والله لااخيسو بالسجون وانتي مراح ارحمج
... صدكيني مصار شي
... والشرب... والنوادي... وملابسج هاي هم كذب
ونتر بصوت... هاي هم كذذذذذب
.... لا مو كذب بس بس لمى كلتلي عايش ضرغام وراجع لبيته ولمرته ومامهتملج وهسه اذا شافج مراح يرحمج يقتلج هو القى القبض على الحجي وجماعته وصعد براسج كذاب وكل الي شافته عينج كذب
... وصدكتيها
... لان شوفتلي الفيديو
... وتبيعين نفسج وتعرضيها للزلم ليش مريم ليييش
ليش هيج لج ليييييييييششششششش
... جنت بحالة غضب مقهوره اريد انتقم محترك گلبي منك وغرت لما عرفت عندك مره وعايشه وياك متحملت
... وان كان مزوج عشره متوصل بيج تبيعين نفسج
بس الرخيصات يمشون بدرب الي مشيتي
... واني رخيصه ضرغام
... سكت
.... احجي اني رخييييصه
سكت
نترت اني رخييييصــــــــــــه
صرخ... اييييييييي
باوعتله وكفت الدمعه بعيني اختنكت طكيت وهو كل مره يدوس عليه بطريقه وبكلام شكل
كمت حتى اطلع استوقفني بمدة رجله بطريقي
وووين
... باوعتله ومتحملت بجيت ماعليك بيه عوفني
... متطلعين
.... عوفنيييييييي
ودفرت رجله وطلعت اركض وابجي ....
لا تظن ان الخذلان أمر سهل
الخذلان هو الم في الروح لا الجسد....
كنت معكم انا رغد الموالي في امان الله ♥
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!