تحميل رواية «تل الذهب» PDF

بسم الله الرحمن الرحيم

سوف اكون معكم  برواية تل الذهب

اتمنى لكم قراءه ممتعه

الروائيه رغد الموالي

ـــــــــــــــــــــــــــــــــــــــــــــــــــــــــــــــ

الحياة ماهي الا غابه والبقاء فيها للاقوى

فكيف لغزالة صغيرة تتربى وسط الذئاب

لابد ان تكون كذئب بمكر الثعالب كي تأمن الوجود

لكن الى متى......

اتركني وشأني لست من عالمك

لاأنا أنتمي لك ولا أنت

لست اعرف من انا من اكون من اي بلد ومن اي ديانه

كفااك ترقب واهتمام لمن ليس لك

كفاك محاولة اقتحام قلبي اتركه مهجور ارجوك

فأنا لا أعرف الحب

لا اعرف العشق والاشتياق وكلمات التودد

لا اعرف غير سحب السلاح واطلاق الرصاص

ورؤية الدم

لا اعرف غير الموت ورائحته وصوت  تعذيب البشر  من داخل الحجر في الظلمات!

لا اصحو على صوت فيروز وكوب القهوه وصوت البلبل وجري المياه

صحوتي انا على طفل يأن من شدة المرض واطلاقات الرصاص واصوات الانفجارات

ولست انام على هدوء في الفراش الحرير الدافىء ووسادة ريش النعام بأحضان امي او من احب

نومي هو وسط المشردين وعلى اصوات الطرب القادم من الجوار وقهقهات الباغيات وفراش قد انهكته السنين

ولست اتناول مالذ وطاب من الطعام بعد يوم مدرسي في اعتقادكم كان سيء

كسرة خبز وربما بعض الطماطم بعد يوم كامل من التسول

ابتعد.عني ولا ترتجي مني حباااا فقد تركت الحب للمحبين والعاشقين المترفين......

بقلم رغد  الموالي....رواية تل الذهب....

الانستا Raghad almoualy

_______________________________________

من داخل صالة الولاده

الممرضه - مبروك اجاج بنات تؤم يخبلن

-بتعب وعرك الجبين:- الحمد لله

- اوديهن لابوهن وبيت جدهن خبصونه على الاطفال

بسم الله بنات اثنين يتربن بعزك

-الحمد لله يمه شوفي يخبلن مو

- مبارك يمه بس لو بنيه ولد

-شيجي نعمه يمه

شحتسميهن

- هذه الدبدوبه مريم والاضعف شويه سديم

- شنو هالاسم سديم شنو

- حلو عجبني

- هه اسماء اخر وكت سميها سميه على اسم بيبيتك

- يمه لخاطر الله هذا اسم

- لعد سديم اسم

- اي

- وانه شعليه شتسميها سميها

--------

بعد مرور سنه ونصف

سعد- يمه يمه لحكي

-شكو

- محمد اخذته المكافحه

- لطمت على خدها شنو ولك شداتحجي انت

- يمه لاكين بدفتره حجي على صدام سب وغلط واشكال وجروه علساس عو ضد النظام

- عزه ولك رحنه بالرجلين

- عمه شصاير

- ولج حماج محمد لاكين عنده كلام مو زين حاجي على الريس واخذته المكافحه   يمه ابني يمه وليدي

- عمه هسه يجرونه كلنه

هذا الهامج وانه وليدي راح

- عمه شلون

- اسمعي بناتج. وديهن يم سليمه جيرانه خل تبقيهن يمها واذا اجت المكافحه احنه مأمنين على البنات على الاقل مايصير عليهن شي

- عزه عمه شتحجين اني اروح لااهلي مستحيل ابقه بناتي يمه الا بناتي

- ولج يجروووووج يطلعوج ويجروج ويجرون اهلج استري على روحج.ودي جهالج لبيت سليمه

- اوديهن لاهلي

- وديهن وتعالي

- اخذت البنات وراحت

لج عيني منار المكافحه يمكن حتجينه ونروح بالرجلين بناتي امانه يمج خاف يصير عليه شي

- يمه عيني

واذا المكافحه جرتنه بسبب البنات شون

- لا لا ميجروكم فدوه ديربالج عليهن اروحلج فدوه

- والله يجي اخوج واكله انه مااحمل هيج مسؤوليه

- جاي اكلج مكافحه تكليلي اخوي ولج ميكول شي

انه لو امي عايشه مااذبهن عليج

- جيبيهن امري لله

- ان نكطعت اخبارنه معناها رحنه بيها مااوصيج عليهن

-لالتشيلين هم

  بعد مرور شهرين

- لاخبر عن والدة الطفلتين وبيت جدهم

منار:- الناس جاي تكول نعدمو

هاي تالي محمد وسوالفه شنو ذنب هالجهال هذوله

- شوف ارشد اني مابيه حيل اربي جهال غيري منا لشهر نوب اذا مابين عنهم خبر نوديهم لدار الايتام

- وشلون نوديهن ذني بنات اختي عرضي يعني

- اني شعليه مكافين عليه جهالي نوب حمل زايد

- يابنت الناس صارو ايتام تكسبين بيهن اجر

- اني ماعليه مااربي جهال مو جهالي

- ميخالف كل اسبوع يم احد مره يمنه ومره يم بيت اسعد ومره يم ريت احمد ارتاحيتي هسه

- اي هاهيه

كل اسبوع بيت واحد من الخوال

حمل ثقيل رغم انهن طفلتين صغيرتين جل قوتهما في المتطلبات صحن رز وفوقه القليل من المرق وثوبين يستران جسدهما

ماابشع بني ادم وجشعه وطمعه

مااقساه

الايام تجري يتبعها يوم بعدها يوم بعدها يوم وسنين

حتى ذاك اليوم الذي شائت الدنيا ان تفرق بين الاختين بااختطاف احداهما في عمر ال ٥ سنوات

،،،،،،،،

- عيون مشدوده وايد على فم الطفله طول الطريق

همس

اششششششش

- السايق:- فك العصبه عن عيونها سيطره ورانه

- صوت خشن مخيف:- لج راح افك عيونج اي حركه منج او بجي اقتلج واذبج للجلاب

افتهمتيييييي

- بدموع

اييي

- امسحي دموعج

انا راح اوديج لامج انتي مو كلتي وديني

- اي

- هاذ هو سكتي

مرت السياره بهدوء من السيطره وكأنه ماكو شي

وضلت تمشي طريق طويل

وطفله اصارت بين ايادي ليست برحيمه

انياب الذئاب ومخالب الضباع وخوف حمامة من ان تؤذيها قطه فكيف بالبشر!!!!

توقفت السياره عند احد البيوت

بيت بناء من الطين وسط البيت اطفال صغار ورضع

- هاج بدريه خلي هاي يمج

-ادري ماعدكم غير بنات تخطفولي جيبو ولد

- وبيش حيفدون الولد

- اكلك اكو واحد مريض صارله يومين وطكت حوصلتي منه الحجي كال التعبان دزو نبيعه اعضاء احسن مايموت ومانستفاد شي

- جيبي ياهو

- هسه جوه

- اخذو الطفل وراحو

شسمج لج

- مليم

- شنو

- ميم مليم

- يعني شنو وين اكو وحده اسمها ميم مدري مليم

- احد المتواجدات- خاله يعني مريم بس هي بعدها متعرف تحجي

- دمشي امشي شلون دلال هه

بيت شرقي بناء قديم مقسم الى غرف وسط هذا البيت حوش الترك الي يلعبون بي الاطفال

حسب ماكنت متوقعه!!

اليوم الثاني

صباحاا.....

الاطفال من السابعه فما فوق غير متواجدين في البيت بس الصغار وك اطفال مايفتهمون او يعرفون وين راحو وليش

مرت الايام وبدريه تكتل هذا وتجوي هذاك ويجي اخر النهار سعدي يلم الفلوس ويروح

مشت الايام هيج

ومرت سنتين وصار اليوم الاول للتسول!!!!!

بدريه- اسمعي مريم باجر ترحين وي صديقاتج تكدين

ترحين ا للهذوله الزناكين الي عدهم فلوس تكليله عمو انطيني انه يتيمه وجوعانه اريد اكل هسه ينقهر عليج وينطيج واذا احد كلج تعالي ويايه ابد لترحين واذا سألوج وين عايشه كليلهم وي بيبي عميه ومتشوف وماريد اروح وياكم خاف تقلق عليه

لتصدكين بحجيهم عود يبوكوج

- اي

- باعي لمي فلوس بهاي العلاكه انه خيطتها الج حتى متضيعيها الفلوس وكلما تجيبين اكثر كلما الحجي يجيبلج هديه افتهمتي

- اي

- يله روحي باجر واريد اشوف شطارتج بنيتي

- اي ماما

ربما اقنعوها باانها امك

  الكل صعد بالسياره البيكم اب ودكت بينه السياره الى مدينه مزدحمه بالسيارات والناس عكس الي بمنطقتنه مابيها شي فارغه وهادئه

نزلنه وبديت اسوي مثل مايسون الجهال

يرحون على السيارات يكدون

وانه مثلهم

عمو نطيني جوعانه واهلي ماتو كلهم

- صرت اخذ فلوس واضم بالجنطه وانه اتخيل شراح يجيبلي عمو الحجي هديه

لعابه مثل مال هاي الطفله الي بسياره

اباوعلها يم امها وابوها وتلعب بلعابه جبيره شعرها اصفر

لو راح يجيبلي لفه مال لحم مثل هذا الي دايبيع

زين اشتري من هاي الفلوس

اي خل اشتري انه جوعانه

رحت حتى اشتري واكل

اشتريت اللفه وكعدت حتى اكلها على جانب من الرصيف بكل شراها مااشوف الا سعدي بغضب

- ولج  منو كلج تشترين بالفلوس زقنبوت وتاكلين

-جوعانه

- جوعانه مو

وجرني من كصيبتي لواها ونفر اللفه من ايدي طاحت بالكاع وضربني وصرت ابجي بحركة

وجرني من اذني واني عيوني تصب دموع

اسمعي هاي جرة اذن الج حتى متعيديها نوب

مره ثانيه حسابج عسير يصير

امشي وي ربعج يلااااا

- مسحت دموعي من الخوف ورحت اركض

وكفت يمهم وكل شويه اتلفت لسعدي الي واكف بعيد ومخوصر يخوزرني

ارجع اباوع للشارع وللناس

ومشيت وي سراب وشتسوي اسوي اريد اتعلم وماريد اغلط وانضرب مره لخ

صرنه نلم الفلوس كل يوم وبااخر النهار ياخذونه بالسياره البيك اب

جانت بدريه تلم الفلوس وسعدي يمها يوكف يراقب

جان سعدي شايخ علينه بس لما يجي الحجي كلها تخاف وتخنس وسعدي الي جان نافش ريشه يصير جنه حشره ويخنس

يدخل الحجي جان رجال يطلع بنهاية الاربعينات 

يمشي بكل ثقه والجكاره جوزيه كبيره يدخنها اباوع لايده محابس باليمنه محبسين واليسره محبسين وزنجيل  فضه حول الرقبه

استغربت شنو كل هالاكسسوارات هو رجال مو مره

الحجي؛- سعدييييي

- وكف يمه طابك الايد على الايد مدنك خايف

امر حجي

- شخبار الشغل اليوم الويلاد خو مايتعبوكم

- حجي يشتغلون علمتهم انه

- عفيه  ( ويضرب على كتفه بهدوء)  عفيه عفيه سعدي

- اخذ. الفلوس من بدريه وراح

عبالي راح ينطينه فد شي هديه لعابه لان جبناله فلوس بس كلشي مانطانه

صاحت بدريه يله  تعالو نامو

- اجينه كلنه مددنه وكورت روحي مثل مامتعوده ونمت

الايام تمشي ويوميه على هذا الحال جنه بس يوم الجمعه منطلع بااعتبار الحركه خفيفه بالشوارع

الاطفال اليوم كلها تلعب الي جنت الاحظه انو كل بين فتره واخرى يختفي طفل ومحد يسأل وينه كلها تخاف بدريه جانت تجوي الي يسأل والي يضم فلوس جانو بالحي شباب هم جنت اشوفهم يطلعون شي مثل الطحين ويخلو على ايدهم ويقربون خشمهم منه مجنت اعرف شنو هذا

مره وثنين وتلاثه اني اراقب واشوف

لما كان مايجيني نوم اتسلل بعد مااشوف بدريه طلع صوت شخير بنومها اكوم على كيفي واطلع

طفله فضوليه مشيت وختلت وره براميل النفط وطلعت نصف وجهي حتى اشوف

الولد كلها كاعده وبنات يمهم ويشربون واغاني وضحك اتعجبت اول مره اشوف هيج شي

تدخين وناس تتمايل واشياء تقززت نفسي منها وخلتني ارجع من مكان ماااجيت بركضه وخوف

شمرت روحي على فراشي وكورت نفسي واني تنعاد عليه المشاهد الي شفتها

بس فضولي ماتوقف بعد هالليله صرت اتابعهم على طول اوكف نفس الوكفه واتفرج

مرات مااشوفهم يسهرون اشوفهم يفرغون صناديك التفاح ويطلعون اكياس بيضه منها والحجي واكف يمهم يوجههم

- يولد بسرعه خفو ايدكم

- حجي نتأكد من البضاعه لو الجماعه امان

- عود نطوني كيس اجرب واشوف

- استغربت ليش هاي الاكياس جوه التفاح  بالصندوك ليش؟

شويه وصار يحجي بالتليفون

- اي انه نطيتكم وكتلكم مريض

وانه شعليه   تتطابق ماتتطابق

اي انه الي علي ردتو وجبتلكم

لاهسه ماعدي واذا تردو عضمه گوي كلشي بسعره

هاذ هو

- باوع لسعدي وكله

انته ياهو نطيت الهم

- ابو الخمس سنين

- ابتسم بسخريه وخله ايده بجيبه والثانيه لازم بيها الجكاره ويشرب صار يروح ويجي بحيث مبقيت اركز ويا وركزت وي الولد وشلون يشتغلون

ماشفت غير احد لزمني من يم ركبتي من خلف بحيث تفززت لزمني من ثوبي كأنه معلكه بس بأيده

عاقد حاجبه بغضب عيونه حمرررر

حمرررررر تخوف

حجه من بين اسنانه

انتي شمكعدج

شتسوين هنااااااااااا

سديت اذاني من الصوت وارتعبت بجيت حجيت بخوف

م م ما كدرت انام ا ا ا ا ا عطشت اي

اي عطشت

- صاح بصوت هز المكان هز

سعدييييييييييييي

- اجه يركض طابك الايد على الايد امر حجي

- شتسوي هاي مكعديها لهسه

- باوعلي بغضب وباوعله

والله مادري انه عفتها على بدريه انه مو مهمتي هاي

- صيحها لبدريه

صاحها شويه واجت

بلي حجي امر

- نايمه وتعرفين شي عن الجهال نامو لو لا

-اي حجي نامو

- وهااااااااي

هاي شتسوي كاعده

- باوعتلي بودها تاكلني

والله تخلصين مني اليوم والله

- باوعلي بنظره من فوك لجوه همس جيبولي اني اخليلها اثر بعد متعيدها

امشي جيبلي شيش حامي

- بجيت وصرت اكمز وهو لازم ايدي

لا لا لا والله ماعيدها والله بعد مااسويها والله ابد والله توبه

- منو معلمج هيج توكفين وتباوعين شدراج احنه منايمين لهسه

- سمعت صوتهم والله

- بدريه:- هاي ماتفيد بعد انه اكول لو نتخلص منها

- باوعلي بتركيز وتكلم بهدوء

هز راسه بالرفض

لا تفيد. لمن تكبر خوش ربح يجي من وراها حليوه هاي

- سعدي جاب شيش حامي مبين من لونه مائل للحمار اني من شفته خفت وصرت ارتعش وابجي

عمو والله ماسويها بعد

والله ماعيدها

الله يخليك

واكمز واتلوى بين ايده هو ضاغط على ايدي بقوه همس

شششششششششش

اخذ الشيش من سعدي وخلاه على رجلي اني كمزت بصرخه صوت هو ضغط على حلكي

سكتييييي

اششششش

صم حلكي واني عيوني تجري دمع بألم بألم

وجع شاغت روحي

همس يم اذني

حتى متعيديها نوب

اخذتني بدريه وفوتتني جوه بالغرفه

واني الوب من الوجع

ابجي وعيوني جمر تصب وي الوجع ليلتها مانمت وابجي بسكوت واعض بالمخده من الالم خاف اطلع صوت ويجوني نوب

كعدو الكل حتى يكدون وانه ماكدر مكان الجويه وارم ويألم بيه وجع وجع

صرحت بيه صوت

كوووومييييي يله وياهن

- ماما حموت وجع

باوعتلي تنهدت راحت فاتت جوه شويه وطلعت بيدها شاش و ابره خياط غرزت المكان الي وارم طلع مي وجراحه خلت تعقيم عليه ولفته بالشاش

-يله هسه ترتاحين كومي

- ارتحت شويه احسن من السابق وكمت وياهم بس بعده الالم بعده الوجع

كضيت النهار بالتقاطعات نوبه اوكف ونوبه اكعد ماكدر ابقه واكفه ويومها مالميت هواي  فلوس عدنه سعدي يحاسب اكثر من الحجي ويدور ويانه

جنت لمن اوكف واشوف الناس دائما توكع عيني على الاطفال خصوصا لمن يرحون للمدرسه

اشوفهم مبدلين ونظيفين وحذاء نظيف واني لااروح ولااتعلم ولاشي كلشي ماكو

جنت اتمنه لو عندي ام واب واعيش مثلهم

شيصير لو مثل هاي الطفله الي امها تمشي وياها توديها مدرسه

دائما اعلق امال للمستقبل لمن اشوف الناس واكول معقوله يجي يوم واصير مثل هالناس

اخر اليوم نرجع ونام الي جنت الاحظها البنات الي حلوات كلش بعمر ال 14 يختفن ماعرف وين يروحن

جان عمو الحجي يحب البنات ويخاف علينه ماعرفت شنو السر وليش.

تمر بينه السنين وصار عمري 12 سنه وتعودت على الشوارع وعلى التسول وعلى الوكاحه

جريئه واتكلم مثل الولد شخصيتي شخصية ولد ماتحسها بنيه صرت اتصرف مثلهم والي يمسني بكلمه ارده بعشره

حتى الولد كانو يتجنبوني بالقاطع محد يندك بيه

عكس البقيه من البنات

تقاطع احد الشوارع.......

جنت واكفه لما صار حادث بالشارع والناس التمت وثنين يتعاركون اصحاب السيارات

شفت واحد طويل وضخم يريد يضرب واحد  والناس واكفه بينهم ولازمين الرجال الضخم عرفت هذوله اصحاب السياره الي مسوين الحادث

وكفت على مقربه منهم وسمعت الصياحات جان هذا الرجال الضخم يصيح ويغلط 

- اعمى انت متشوووف سايد مو سايدك شطببك بي

- شارع مال ابوك اني بكيفي

- بكيفك والله اليوم لاادفنك انت وعايش استهتار هو سيارتي فلشتها اليوم انعل رسك

-اذا انت رجال تعال

- نفر ايده عن الناس بقوه وراح دايكمشه ويضربه وردت الناس تحاجز والصياحات اشتغلت وهذاك يستفز بي اخر شي طلع مسدس وضرب طلقتين بالجو الناس ابتعدت

عرفت هذا مثل الحجي مبين

وراح على هذا ابو السياره الثاني بعد ماتجمد بمكانه وخنس مثل الخنفسانه بحركه خفيفه ضربه وبعدها كله براسه  ماعرف شلون هذا وكع بالكاع

اجت الدوريه بعد ماشبعو عركات وهو ماعرف وين اختفه وابو السياره الوكع اخذو ووهو متخربط والناس تطشرت كلمن راح بطريقه حتى السياره الي ندعمت مال رجال الضخم ماكو اختفت

صرت اشوف اشكال بالشارع يوميه حادث ويوميه مشاكل ومرات اتعاكس بس بطبعي ارد مااسكت

صافنه على السيارات 

واتذكر اختي هسه صارت بكدي زين تشبهني؟  لو لا؟

سديم.....

في عمر العشر سنوات استقريت بيت خالي الجبير

وعشت عدهم بعمر ال13 سنه توفه خالي وصرت شبه غريبه على بيت خالي مع ذلك بقيت عايشه وياهم مرت خالي مره طيبه وقبلت ابقه عدهم

جانت عدها ولد ثنين وبنيه واني وياهم

بعد وفاة خالي تعب الحال كلش صار حسره علينه المصرف ولدها عطاله بطاله لاشغل ولاعمل ومرت خالي ظهرها نحنى من كعدت المكينه والخياط دتعيشنه

مرات تتعب والحال بتعسر اكثر وتحجي على الولد الي لادراسه ولاشغل

- ولكم يمه شوفولكم شغله ميصير كاضيها نوم بالنهار سهر بالليل انه تعبت مابيه حيل بعد

- محد كلكم تجيبونه لهاي الدنيه

اذا متكدرون على مصاريفنه ليش خلفتونه

_ هذا شلون حجي وانه ادري هيج حيصير بينه انه ادري حيموت ابوكم ويعوفكم بهذا استهتاركم عليه

وين اروح وين انطي وجهي

فاتت للغرفه وسمعتها تبجي

فتت وراها

لكيتها مخليها ايدها على جبينها وتبجي

- خاله  لتبجين انه من باجر اشوف شغله واشتغل واساعدج

- يمه تاليتها النسوان تعيش الزلم هاي وين صايره

-  شنسوي قدرنه هذا

- واحدهم بسمن الثور مدد ونايم وانه ظهري انكسر من كعدة المكينه مايكول واحد منهم خطيه امي

- بعدهم شباب وميعرفون

- وانتي شكبرج على هذا كلامج توج 14سنه وهيج تحجين وتحسين

- خلص عمه انه اشوف شغله واشتغلها

- لا يمه انتي بعدج صغيره اخاف عليج

اهتمي بدراستج بلكت تفيدينه بشهادتج

- الله كريم ان شاء الله

- جرت نفس تنهدت

تدرين لو امج عايشه وتجي هسه تشوفج كبرتي وشلون صرتي جان مالمتها الدنيا من الفرحه

- هاهيه نصيب حتى اختي الي بقت من ريحة اهلي ماوعيت عليها

- اختج فص ملح وذاب منعرف وين ماوين هي

اوووووف لتذكريني يوم اسود جان

- شلون خاله  سولفيلي

- جانت بيت خالج ارشد داتلعب بالباب

تأخرت بيومها عن دون الجهال بقت بالشارع ومبتعده شويه عن البيت وانفقدت

بيومها دورنه الديره كلها ماكو ماهي خوالج كلبو الدنيا على روسنه ويصيحون عرضنه محافظنه عليه ياسوادة وجهنه من العشيره

واكلو كلوبنه اكل شبدينه يمه

- عمه منار عمرها ماحبتنه طبيعي يصير هيج

- للامانه بيومها جنتي انتي بالحمام جاي تسبحج  وهي وحدها بالدرب واختفت وندور عليها ايام واسابيع وشهور لاخلينه مستشفى تعتب لاخلينه مراكز كلشي ماكو ماهي

-    يعني عمه وين تعتقدين هي

- باارض الله هاي الواسعه لو ميته  ومندري عنها شي

««دائما يكولون الموت صعب بس الاصعب من الموت فراق الاحبه

قالها سيدي علي ابن ابي طالب

صعب من تفقد شخص ماتعرف شي عنه ميت او عايش جوعان اوشبعان بردان او دفيان وين راح وين صفه بي الدهر تبقه بحيره ومتعرف شنو تسوي

يمكن بكل دكة باب تتخيله هو

يفز كلبك وي كل دكه ويرجع بخيبته من جديد»» 

بدأنا في اول حلقه من روايتنا الجديده

اتمنى لكم متابعه طيبه

كنت معكم انا رغد الموالي في امان الله ♥ 

الغرق ليس السقوط بالماء

لا احد يصف السماء بالغارقه

لكنها تغرق في الهواء

الغرق معنى وصفف قاتل

الغرق ان تسقط بمكان ليس لك

أن تتقمس شخصية لاتعود لك لاتناسبك

الغرق أحيانا ألم

يوجع الروح لا الجسد

ـــــــــــــــــــــــــــــــــــــــــــــــــــــــــــــــ

مرريم.....

كلمة انو احنه دانكبر مو كلمه عاديه

نكبر معناها نتغير نتعلم نبدي من جديد صرت احس كل يوم اكبر سنين من الي اشوفه واسمعه صرت اعرف وين يروحن البنات الي بعمر ال 14 سنه

بعد ما سمعت بدريه تحجي وي سراب وتعلمها

- اسمعي انتي حتخلصين منا وترحين يم وحده حتعلمج شلون تشتغلين كلشي دكلج عليه سوي لاتكلين لا فكي عينج واذاناتج زين

- شنو راح اشتغل

- هي تعلمج راح تشتريلج ملابس تخص الشغل وراح الفلوس تكوم تطش عليج طش تصيرين مو بحال فلس هسه اتفقنه عرفتي شتسوين

- اي

استغربت شنو هذا الشغل الي راح يخلي الفلوس هيج تتناثر عليها اجه بالي الموقف لما مره شفت الولد سهرانين واحد منهم كام يركص والثاني طش عليه ويضحكون ويتشاقون

سألت دعاء

- اكلج سراب وين حتروح

- هاهيه حيجهزوها للشغل

- ياشغل

- تسكن بشقه تخبل

اووووف شوكت يجيني السره واخلص من بهذلة الشوارع

- كشت روحي وخفت

بس بس هيج يعني

- لا واشكال بعد

- زين انتي شمدريج

- سلام حجالي

- انتي محتبطلين وساختج ويا

- احبه ويحبني

- اي وتتزوجين وتجيبون جهال يكدون مثلنه

لا هيج بس حب

اكلج تطلعين نكعد يمهم بالليل

- وشنسوي

- نغير جو وهم ابد ميحجون ميكلون للحجي ابد

- انتي شنو رحتي بمهم وهيج تدرين

- اي مره اخذني سلام وسهرت يمهم

شلون اكل وشلون كعده تخبل

- لا. لا الحجي اذا اجه وشافنه يموتنه كتل

- ولج ميكلون وحتى اذا اجه يضموج عنه ميخلو يدري يدرون بي ميقبل

- ماعرف

- لتخافين وهذا الحجي اصلا فد واحد اناني ولئيم يريد يكرسنه لشغل توالي الليل مو حبا بينه ميقبل

- بلعت ريك وسكتت

- اصلا مره سولفلي سلام كالي لو تجين انتي وصديقاتج جان نطيتكم هواي فلوس وترحون ولج امشي قابل نبقه هنا مكابلين بدريه وناكل المرك التسوي جنه مي حار بس لون ولج لو تشوفين شياكلون كله مشاوي وفواكه وفلوس

- صدك

- اي والله

باعي اليوم اكله لسلام راح نجي يمهم وره متنام بدريه

- يله ماشي

خوش

انتظرنه الكل ينام وبدريه طلع صوت الشخير مالتها عرفنه غطت بنومه كمنه اني ودعاء وحده تهمس للثانيه

- يلا

يلا امشي

مشينه بهدوء وعلى كيفنه لحد ماطلعنه بره

وجان سلام واكف ينتظرنه اول مالمحته من بعيد حلت ضفيرتها كرصت خدها حتى يصير وردي واني صافنه عليها فاكه حلكي هاي شجاي تسوي

جان تلتفت عليه

امشي امشي

مشيت وياها ورحنه سلام ابتسم من شافها ومشينه سويه رحنه للبيت الي هم كاعدين بي جانو كاعدين بالطرمه ( الكراج)

الطرمه جانت جبيره توسع لهواي اشخاص وجانو

الكاعدين تقريبا كلهم عدا الحرس الي يفترون بالحي

بال30 واحد كاعد مابين كبار وصغار بالعمر جان اكبر واحد بيهم ب 40 سنه واصغر واحد ب 20 سنه

ريحة الدخان النراكيل والجكاير ماليه المكان بحيث من كثر الدخان حتى تحجب النظر

كعدنه يم سلام الي قدمنه الهم عبالك طبق فاكهه

وكلها فرحت من شافتنه

المكان جان كلش مقزز غير الامور الي قرفتني  متحملت كمت

- تعاي وين رحتي

- اني اركض وسلام ركض بسرعته لزمني

ولج

وين رايحه لايشوفج الحجي تردين تبلينه

- كمت ابجي

اريد اروح ما معليه وانتي دعاء اني اعلمج

- كبر شوفي شكد حصلت

- سلام. اوكفي خل اخابر الحرس اشوف الحجي خو ماجا للحي ابقي

- خابرهم وماجاي طلع كال

يله امشو ولتفت لدعاء

بعد لاتجيبيها لهاي الجبانه وياج

- اني مو جبانه ولتحجي عليه مااسمحلك

- شبيج مو مره شكو كمتي تتنعوصين

- مااجي والا لااكول للحجي

- التفت عليه وخزرني يريد ياكلني

اقسم بالله اذا حجيتي وكتيله وصار شي ماتلومين غير نفسج

- عفته وصرت امشي بهروله خفيفه وهم وراي

وصلنه لبيت بدريه ودخلنه جوه وبعدها على نومتها

مددت بفراشي وخليت الغطى على راسي رغم صيف وحاره

وكمت ابجي بخنسه لحد ماغفيت

وثاني يوم طلعت هم للشوارع من الصبح نكضيها وي الغروب الا نرجع لاريوك مثل البشر ولاغده ناكل خبز وطماطه هيج ب العشره هو غده هو ريوك وهاهيه

عيوني كمت احسها تغوش ماعرف من الجوع ماعرف من حرارة الشمس اتعب اكعد استظل الظهريات بالفياي عن الشمس والهوى اللاهب يضرب بينه عينه يمنه ويسره فد لايجي سعدي شيخلصنه

اباوع لهدومي هتكت من الحر وكثر ماابقه بيهن

امسح عرك الي على الجبين وارجع للشارع

وهيج اكضي اليوم صرت

مرات نرجع للقطاع من وكت نلكه الولد ماهم ماموجودين ومنعرف وين يروحون الا نص الليل نحس عليهم ونسمع صوت سيارات وبيها صناديك مخضر ومن تجي هاي السيارات الحراس ساحبه اسلحتها ويمنه ويسره يباوعون والحجي يفتر يمهم يروح ويجي وعينه على الساعه بهذا الوقت كمت اشوف الحجي لمن تجي هاي السيارات ومره شفت نزلو ثنين مربطين عيونهم مشدوده ودخلوهم جوه

صرت اتعود اشوف هيج مناظر فصارت عادي

مشاهد الخطف تتكرر هواي كمت اشوف شباب مربطين وعيونهم مشدوده ويدخلوهم لبيت من البيوت قطاع كامل كله تحت امرة الحجي

بيوت بس البيوت تابعه اله ومالته كم بيت نعرف شبي مابي بقية البيوت منعرف سرها شنو غموض خارق رغم ربيت بنصهم

مرت الايام والشهور صرت اتعلم من كل موقف من كل يوم من كل شخص

صحيح صغيره بس محد يكدر يتحارش بيه من الولد عكس البقيه وكلها تجفه شري ومتتقرب مني

من بعد الي صار هذاك اليوم صرت اذا احد يمد ايده اكسرها

صرت سليطة اللسان واليطخني بكلمه ارده بعشره حتى بالشارع لما مره تحارش بيه شاب كان يقود سياره مبينه فخمه وغاليه

- تعالي وياي اصعدي وانطيج فلوس شكد متردين

- جر منا مافيدك

- وعيونج تفيديني

- كتلك جر منا هوينه يله

- اموت بالحلوات وام لسان ولج ماالله يهديج وتصعدين

- باوعتله وهو منزل الجامه السياره خطيه عباله نعجبت بي فرح بصقت بالكاع ومشيت

باوعلي سعدي بتمنن مبتسم ومشيت

كمت احس روحي دااصير اكثر نباهه بحيث عن الاولاد الصغار اني ادافع عنهم مره ولد ضرب حمودي كان طفل صغير عمره 8 سنوات بقيت امشي وراه لحد مالزمته وضربته طيحت حظه رغم الولد جان بعمري لكن اني ابين اكبر بطولي وجسمي

واستمريت هيج لااحد من الولد بالقطاع يتدنالي ولا بالشارع عبالك رجال مو مره بيوم جنت طالعه من الحمام الي هو اساسا خارجي وبي ثقوب فلمحت عنتر يباوعلي من الثقوب طلعت وتعاركت ويا ضربني بكف رديته بخشبه على ضهره ودايردني تلكاه سعدي

عوفها

- هاي المسترجله اذا ماتربيها اربيها انه

- شجابك يم حمامها

- دااجيب الطير بحالها بحال خلقتها انه

- عوفها يله امشي

- سعديييييييي وخر عنيييي

- يجي الحجي واكله هي هم كبرت مالها مكان بينه بعد لما اجه الحجي للقطاع صاحلي

باوعلي من فوك لجوه مخلي رجل على رجل ويدخن وينفخ الجكاره فوك بالهوى يحجي برود

- هي هاي الكتولي عنها

- اي حجي

- لويش ضاربه الولد على ضهره

- جاوبته بحديه مخليه عيني بعينه ولاخفت

يباوعلي واني بالحمام

- صاح عليه

وين هذا العوينجي ولك وينك

- نعم حجي

- ليش تباوعلها من قحطت النسوان

- حجي جذابه جنت اجيب الطير

- التفت رد برود جان يجيب الطير ليش تتهمي

- واني شلون عرفت بي وره الحمام لو ماشفته دايباوعلي

- باوعله ونزل عينه ماحجه

بعدين حجه بنتره

انه مو كايل بنات القطاع تشيلون عينكم منهن نسوان داجيبلكم شنو التردو بعد

- سعدي:- حجي صارت بعد متصير

- شوف ولك اذا بعد دنيت يم الحمام اطير لوزتك البنات هنا مايقترب عليهم احد افتهمت

- سعدي:- حجي مو تشوف هي هم كبرت ومفروض مالها مكان هنا يعني القطاع كله زلم وهي حليوه هم اعذرهم

- باوعلي واحسه مو نظره طبيعيه

رد برود

لا بعدها هاي خليها

ويله روحو وصيح بدريه

- ماشي حجي

- رحنه واني فرحت لان مراح اطلع وياهم عرفت الي تروح منا يشتغلون عليها بتوالي الليل الجديه ارحم من هاي الدروب

شويه واجت بدريه وصارو يتهامسون هي وسعدي

كال الحجي اجهز الحديثات عدا مريم

- ليش مايقبل وفوكاها هي حلوه يعني خوش شغل تجيب

- مادري عجيب

- خاف حيخليها اله

- يمكن كلشي جايز لو لواحد من ولده

- هم ولده وينهم وين هذا الشغل ماعتقد

- هي تبين

بكلبي كلت عزه بس لاصدك يستكعدني الي وهذا بكد ابوي جبير خفت هواي وبليلتها منمت على عكس البنات الي مكيفات حيروحن منا ومن ضمنهم دعاء

- فرحانه دعاء حتروحين؟

- كلش كلش بس قاهرتني شغله

- شنو هي

- سلام بعد مااشوفه وراح اشتقاله وانتي هم

- دعاء ديري بالج على نفسج

- لتخافين عليه بس انتي شعجب ماقبل الحجي ترحين

- ماعرف دخت

- غمزت خاف مخلي عينه عليج

- لا فدوه شنو يخلي عينه عليه اموت روحي غير

- هههههه يله يولو شبيج غير تصير كلشي تحت امرتج وسيطرتج

صيري سبعه وجري خلي يتزوجج

- ولج يتزوجني شنو بكد ابويه بكد ابويه داتفتهمين شنو يعني

- ولج غبيه سلطته تخليج تشوفي زغير امداج

- ماعليج بيه عليج بروحج

- اني اوووووووف( باوعت لفوك وجرت نفس بفرحه بتأمل ) اني الا اوكع واحد ثكيل بشباكي واتزوجه واعيش

- وسلام

- منرهم نتزوج

ليش

...تردين نزوج ونخلف ونجيب جهال شيطلعون

- حيطلعون مكادي يالفهميه مكاااااااااااديييييي

- ليش خو تبنون حياتكم بحب وتخلفوهم وتعلمومهم الحب

- اي وشوكلهم شلبسهم الحب مالتج

بابا الحب مو كلشي انتي شبيييييج فكي لهذا هذاااا وتأشر على دماغي وتحجي بشمخره جنها ولد

- ااااخ هاي شبيج

- شوفي انه رايحه ويمكن نتشاوف مره ثانيه ويمكن لا بس حنصحج نصيحه

الحب مو كلشي مهم تزوجين رجال يعيشج عيشه براسها حظ

-دعاء منو يباوع لمثلنه حتى لو حلوات نبقه مكادي

- بيدج افتهمتي بيدج وانه حعرف شلون اخلص روحي عبالج انه حصير مثل المره الي جابتني للدنيه وذبتني بالشارع لاااااااا انه مو هيج

- وعيانه دعاء

- جنت انتظر هذا اليوم بفارغ الصبر اصطبري بس وتعرفين

- الله يوفقج دام امنيتج تستقرين وتعيشين

- ماكو وحده ماتتمنه تستقر وتعيش بس الظروف ااااخ الظروف

- تنهدت وجريت نفس

نامي باجر ترحين

- حنام تصبحين على خير

نامت وبقيت حايره وافكر وقلقه مرت عليه اوجاع الماضي والضياع وكأني اعيش اليوم الي خطفوني بي واني صغيره وفاركت اختي سديم الله اعلم هسه شلون عايشه وشنو ضروفها

سديم.....

ظروف صعبه نعيشها ومرت خالي تعب حيلها السكر والضغط مخليها تكون خامله حتى على المكينه مكاعد تكعد مثل قبل

ثالث متوسط والامتحانات على الابواب اروح وارجع للمدرسه افكر شلون حندبرها ولدها لااحساس ولاضمير هه ويكولون الولد عزوه

عزوتيش وهم اكل ونوم واستهتار اني بنيه وافكر احسن منهم

بيوم جنت كاعده يم البنات بالساحه وسمعتهم يحجون جانت وحده ابوها مدير دائرة

- اني بس اكمل ثالث اتوضف على شهادة الثالث

- معوده وين اكو وضيفه على شهادة الثالث

- اكوووو بابا عنده موضفين على شهادة الثالث

- ماعرف بس يعني تفيد

صفنت وسرحت بخيالي اييييي خوووش اشوفلي وضيفه على شهادتي واشتغل بقت الفكره مجلبه براسي خلصت امتحانات وكعدت كلشي ماعندي

والوضع يزداد سوء وافكر شلون اكضيها وشراح اسوي صرت الليل ماانامه افكر ششتغل شلون اروح اشتغل بالدائره مال ابو سهى واكلها اي اكلها ليش لا

ثاني يوم الصبح لبست ورحت لبيت سهى حتى اكللها

تكل لاابوها

- سهى اني جايتج بشغله

- كولي

- اني محتاجه شغل تعرفين صارت عندي شهادة ثالث وابوج مدير داىره ف بلكت يشوفلي شغل

- اي بعيني يجي واكله

زين انتي عندج موبايل اتصل لو شلون اردلج الخبر

- اني باجر امرلج

- ماشي تدللين

رجعت على امل الاكي شغله واشتغلها وثاني يوم من الصبح رحت الهم

- ها بشري

- والله ماعرف شكلح سديم بس ابويه ماقبل

كال انتي بعدج صغيره

بس اكدر اشتغل

- بس العمر يلعب دور

- ( بخيبه) ماشي اشكرج تعبتج

- اعتذر منج

- لا ولو مصار شي

مشيت وخيبه جبيره داهمتني حايره شسوي

شايله هم عائله هي بالاساس مو عائلتي بس ربيت عدهم كل هاي السنين لازم احير لازم اشتغل لازم نعيش

وكتتتت بنيه تحير بالعيشه وذكور دور مصرف من النسوان

تمشيت ولفت انتباهي صالون للحضه اجه بالي افوت واكللها اشتغل وياهم

اي ليش لا اروح واجرب الشغل مو عيب احسن من ما نمد ايدنه للعالم

رحت فتحت الباب جانت مره وهي ام الصالون لابسه برموده وكيمونه ورافعه شعرها مكياج مخليه وتعلج علج ويمها ثنتين عاملات يشتغلن وياها وزبائن بالمحل وكفت على جنب خجلانه خاف احجي وتفشلني كدام هاي الناس وخاف اسكت وارجع وماالكه شغل بقيت كاعده انتظر الناس تمشي وافرك ايد بأيد من توتري

اشتغلت اشتغلت بعدين حجت وهي تباوعلي بالمرايه بدون ماتلتفت لان اني صايره كبال المرايه

- كولي عيني ششتغلج عروسه وي العرايس تحفين تصبغين شو ماكلتي صار ساعه كاعده

- رفعت راسي واشرت على روحي اني

- اي انتي شنو حابه تسوين

- باوعت يمنه ويسره ودنكت باوعتلي بالمرايه وسكتت كملت شغلها وفرغ الصالون كعدت على الكرسي واني اجيت يمها قبل مااحجي تكلمت هي

- محتاجه مساعده مو عروس وماعندج تدفعين صح؟

- لا

- لعد

- اني جايه ادور على شغل اريد اشتغل

- وشنو تعرفين تشتغلين

- اشسور احف انظف الصالون لو تردين المهم تشغليني

- تغسلين شعر الزبائن وتشسورين بالشهر ٢٠٠ تفيدج

- فرحت) اي اي كلش تفيد من شوكت اشتغل

- من باجر تجين الصبح احنا ب 10 نفتح ونبقه للمغرب

- هاهيه باجر يمكم

- خوش هذا رقمي

- بس ماعندي موبايل

- هنيالي شلون اخابرج لعد اذا احتاجيتج تجين بوقت اجازه او مرات قبل ال10 شلون؟

- مرت خالي

اي مرت خالي عدها اجيبلج رقمها وخابريها

- ماشي

طلعت من الصالون فرحااااانه كلش كلش فرحانه

يالله والله خير من الله يعني 200 الف بالشهر وي الي تطلعه خالتي خير وزايد نعمه نعمه الحمد لله

- رجعت للبيت فرحانه لكيت عمه كاعده على المكينه تخيط حضنتها من خلف وعلى فرحتي

- عمه من اليوم بعد ماريدج تتعبين وتخيطين ابشري

- شنو عمه كولي

- لكيت شغل ومن باجر حشتغل

- شنو هو شغلج

- بصالون نسائي

- يالله

يافرج الله

- اي والله عمه الحمد لله تفرج ونرتاح

- شكد يحسبولج

- ٢٠٠بالشهر

- باعي لاتكلين كدام الولد يعتمدون عليج عود اني خابرت حمزه اخويه وكتله عليهم وراح يجي بالليل انتي لتحجين ولتبين داتشتغلين

- ماشي

شعور جميل من تبدي خطوه جديده خطوه نحو الافضل بيني وبين نفسي افكر شلون اشتغل ولازم اهتم ولازم مااتأخر حتى ماتبطلني حتى اتعلم المهنه هم اي لازم اتدرب على ايدها واكون قريبه منها

لليل اجه عمو حمزه وتلكته مرت خالي

- هله بااخويه هله زارتنه البركه

- هلا بيج شلونج

- الحمد لله الا والله ياحمزه هالولد حيجيبون اجلي

-- اني الهم وينهم

- جوه يلعبون بلي 2

- زعاطيط هم ويلعبون زعاطيط

فتح الباب وكف ويحجي وياهم بحديه بغضب

- متستحون مو عيب عليكم واحدكم بكد الثور كاعد مثل النسوان

- شبيك خالي صدك جذب شصاير

- اسكت

شوفو من باجر ب 6 الصبح امر عليكم تطلعون وياي للعماله

- ياعماله فدوه لكلبك خال وينه وين هالشغل هذا

- اي مو حضرتكم اكل ونوم وينكم وين هالشغل

باجر امرلكم والي مايطلع انعل رسه والله متخلصون مني وتعرفوني من اكلب على الوجه الثاني

- طلع من يمهم وعمه كلتله اكعد حمزه اشرب الجاي

- ممنون منج خويه

كعد واني رحت اسويلهم جاي وكفت بالمطبخ بين ما يصير الجاي

بيني وبين نفسي

والله خوش ظبهم بحجايتين واني كلت هسه يشمرله حجايه بالجذب ويمشي هاي اذا اجه

خدر الجاي صبيته الهم وخليته يم قطع الكيك بالصينيه.وديته الهم شفته ينطيها فلوس لعمه

زاد احترامي اله

بكلبي كلت

ماشاء الله ونعم الاخ بس كلتله اجه طاير اي شبيج ياعمه لو من الاول كايلتله

دااروح كالت عمه

تعالي سديم كعدي يمه

- اخذو راحتكم خاف تردون تسولفون

- مو غريبه انتي يمه كعدي

كعدت وتكلم هو

- كبرانه سديم صايره مره

- سكتت ودنكت راسي بخجل

- تنطيها خلود اذا احد رادها

- دااحجي هي حجت

بكيفها هي بس اذا قسمه زينه ليش لا

- باوعلي واني حجيت

لا عمو اصلا اني اريد ادرس واتخرج

- اكو واحد صاحبي مكلفني ادورله على بنيه يريد يتزوج وهو حالته زينه يعيشج عيشه مرفهه

- بعدني صغيره على هيج امور لو شتشوف

- اشوف تزوجين انتي حتى كعدتج وي ولد خالج غلط منو يتقدملج باجر عكبه وانتي تعيشين وي زلم ثنين

- صلي على النبي خال مو هايتها عمه ويانه وبنتها قابل وحدي

- الناس تغض نظرها عن عمتج وبنتها وتخليكم انتي والولد بين قوسين

- ميهمني الناس الله على اليحجي

- فكري وبقت يمج

- لا عمو مستحيل

- حالته الماديه زينه

- متهمني الفلوس

- احجي وياها خلود

يالله اترخص اني

كام وطلع واني ضجت كلش ضجت هذا صدك يحجي يتشاقه

باوعت الساعه 11 كلت انام باجر وراي كعده

رحت مددت حتى انام وبعد تفكير باجر وحماس نمت وكعدت ب 7 من حماسي

كمت نظفت البيت وحضرت الريوك على نومت عمه كعدت على ريحة الجاي

- يااا شنو هاي مخلصه شغل اليوم من وكت

-حتى اتحضر هم يله اطلع للشغل مااريد اتأخر هذا اول يوم

- ريحة الجاي وصلت للغرفه وكعدت

- ههههه يله لعد خلينه نتريك

الولد طلعو؟

- اي اجه حمزه قبل ال6 كعدهم اجبار واخذهم

- اي كون عاد يستمرون

- ان شاء الله

- تريكت ورحت للحمام سبحت وبدلت لبست فستان طويل ولفيت الشال والجنطه ورحت داامشي تذكرت برقم عمه ورجعت حتى اخذه

- عمه رقمج نسيت اخذه تريده ام الصالون

- اكتبي بورقه

- كتبته واخذته

ورحت

صباح الخير ست

- صباح الخير جايه من وكت حتى بعدها 9 ونص

- اول يوم كلت ماريد اتأخر وهم شويه البيت بعيد بين ماتمشيت

- مشي اجيتي لو بسياره

- لا تمشيت

- هزت راسها بمعنى اي وكعدت كالت

روحي بدلي هسه يجون زبائن حتى نكون جاهزين

- العفو ست بس اني هذا لابسه شبدل شلبس يعني

- كالت بتعجب فاتحه عينها

شنوووووو

يعني نفنوف طويل لابسه وشال وتردين تشتغلين هيج تحجين صدك

- اي لعد شلبس هذا لبسي

- واني مثلا لبسي هذا؟!! لو ابدل من اجي هنا

- مادري مجنت اعرف

- اوووف امري لله كومي كومي تعالي وراي

- تبعتها وفوتتني بغرفة التبديل نطتني بنطرون وبدي وي المحزم لبسته رغم استحي البس هيج جان ربع ردن وهاي اول مره هيج البس مرت خالي جانت متقبل البس قصير او يطلع شعري كدام ولد خالي فمتحجبه اكثر وقتي

طلعت امشي بخجل اعض شفتي مدنكه

- اي هسه تمام شو تعالي هاي الكصيبه شنوووووو

كعدتني على الكرسي فلته سرحته خفيف ورفعته كله فوك ورتبته

اخذت كحل جرت عيني ومسكاره وحمره وردي بناتي خفيف

واني بس ساكته مثل التمثال كلشي مااحجي

شويه وكامو يجون زبائن والعاملات الثنين هم اجن وبديت اول يوم اشتغل اغسل الشعر وانشفه بالخاولي وبعدين اشسور ولما يفرغ شويه الصالون انظفه بدون مادكلي ست سميره ام الصالون

وياها وياها على ايدها اشتغل مااتعاجز استمريت هيج يوميه وهي جانت مكيفه

ولد خالي صارو يوميه يطلعون للشغل وي خالو حمزه وعمه قللت من الخياط لان مريضه

وهيج مشت ايامنه ك بدايه..............

ان تكون قويا وتكسب المعارك رغم جراحك افضل من ان تكون شاكيا منهزما مثيرا للشفقه........

تابعو احداث الحلقه القادمه من تل الذهب كنت معكم انا رغد الموالي 

في امان الله ♥

ك حمامة في  قفص هي تضن انها تطير بداخله

بينما هي سجينه لاتعرف الحريه كي تعرف الطيران!

        __________________________

مريم....

البنات راحو واني بقيت يومين مرت على اعصابي وره هاليومين اجت شاحنه بالليل محمله خضراوات واجه الحجي عرفت مخدرات جايبين مثل العاده بس هالمره مو بس مخدرات خاطفين 3 شباب نزلوهم معصبين وايدهم وره وطببوهم جوه الحجي صاح

- يولـــــــــــــــد  وينكممم

- كول حجي

- البضاعه هاي غاليه اريدكم تخزنوها زين اسبوعين يله نتصرف بيها ماريد خدش تنخدش

- تامر حجي

وهبو الشباب يصفون بالشاحنه

ناس تعزل الخضراوات وناس تختبر البضاعه وناس تخزنها

وهو يروح ويجي يمهم

شويه وصاح على بدريه

- تامر حجي كول

- وينها الحديثه هاي الحليوه

- جوه حجي

- سمعتهم كلبي حسيته هبط بالكاع ونشف دمي ياربي هذا شيريد مني عزه

- صيحيها خل تجي

- اجت صاحتلي جنت اباوع من شباج المطبخ ولما اجت سويت روحي بالغرفه جنت

مريم كومي الحجي يريدج

- شيريد

- انه ادري كومي

- كمت ومشيت وراها

وكفت شابكه ايد باايد متوتره ومدنكه

حجه ونفخ جكارته

- رفعي راسج داحجي وياج

- باوعت

-: انه خليتج هنا لامرين تحبين تعرفينه لو نخليها بوكتها احسن

- كول حجي

-شوفي اول شي اريدج هنا ايدها لبدريه وعيونها هم شمامه وتعرفين كل صغيره وجبيره بدريه تعبت ومو مال هالشغل وكاحة الجهال اريدج انتي تلتزمين بهل المهمه

- باوعتله فتحت عيني بوسعها بكلبي كلت

عزه يعني يريدني اشاركه بقتل الاطفال

ابتسمت بخوف وكلت

حجي بس شون يعني من ناحية الجهال

- من يرجعون من الجداوه تلمين الفلوس انتي والمريض تكليلي عليه علمود اعالجه وضحك بحقاره

- عبست وجهي كلت

والثاني

-خلي للامر الثاني اكبري بعد هسه مو جاهزه زين 

- حتخليني اشتغل شغلتهم مو

- لاااا انتي غيررر

- مفهمت

-مو اكلج اكبري مو وكتها افهمج بعدين

روحي هسه

جر جكارته يتنفسها وويباوعلي

فكرة انو تكون اداة متعرف شوكت تستخدم متعبه

من تحس ماعندك احد يخاف عليك ماعندك احد يحس بيك ضايع متعرف باجر شنو يصير متعب متعب لدرجة اللاشعور.......!!

باشرت  بشغلي بدريه اخذت تعلمني...

مهمتج بس الجهال تلمين الفلوس منهم وره مايرجعون تنظيف البيت منا وجاي عليج الطبخ عليج هم انه وياج بس خليها بالج يوم الي مااكدر كل هذا انتي تسوي

- ماشي

- اليتمرض تنطي للحجي هو يكتلف بي

الي يبوك فلوس تجوي

تراقبين الجهال وكت  ماهم نايمين واحد منهم اذا طلع غير الوقت المسموح بي انتي تتحاسبين متخلصين من الحجي انه حذرتج

- ماشي

خوش انه اروح. اسبح

راحت باوعت للبيت العايشين بي عباره عن غرف داير مداير البيت يتوسطها حوش الترك

بناء شرقي قديم بعد

غرفتين بس شاغلين البقيه ياهي تفتحيها كلها اغراض زايده مكان للغراض المكسره واحنه صايرين ناس فوك ناس بغرفه

على فرغة البيت من الجهال فتحت البيبان وصرت اطلع بالغراض تراب وعجاج وحشرات طلعت بالغراض صارت كومه بالكراج

طلعت بره شفت الولد واكفين صحت عليهم يجون يطلعون الغراض واحد منهم حجه

- واحنا شعلينا مو مهمتنه هاي

- ستار  معود هاي تنوب بدريه الحجي خلاها هنا

- واذا مالي دخل

- مريم:- تحب انطي خبر للحجي

- باوعلي  وسكت كال ستار

هسه نجي عيني مريومه على كيفج تره كلها البارحه عينج وهم مو علينه على المزعطه

- يله لعد امشو ساعدوني

- اجو وصارو ينكلون بالغراض ويطلعون بره لموها كوم شي فوك شي

كال مناف

هسه هاي وين نوديها بالله ست مريم

- شمدريني شوفولها صرفه

- ستار:- روحي مريم هذا مناف ضايج اليوم

- لك عيني بس يدردم عبالك وحده دايشتغل مو ويا 4

- داكلج ضايج

- ماشي نشوف اخرت الضوجه

فتت جوه شغلت مي البير ( مياه جوفيه) 

ولزمت الغرف غسلتها وغسلت الحياطين والشبابيك صارت تلمع كهربائياتها عطلانه لا اضويه ولا بنكه والجو حار

دزيت خبر للحجي بخصوص هالموضوع

للمغرب دز سياره كهربائيات وشفت سعدي يحاجي بالتليفون

- اي حجي وصلت هذ هو

اي هسه اشدلهم واخليها

ماشي

ماشي

- اجاني عاوج حلكه معاجبه الوضع

بالله هاي شلج بيها نوب غرف ودازه كهربائيات هو الحجي فارغلج

- دز الغراض لو لا

- اي عيني ست

هه والله يالله ( ويفر بأيده)  وحده 15 سنه تمشينا تالي عمرنه

مارديت عليه

طببو الغراض وخلو اضويه شدو البنكات خلو مبردات يشتغلون ويدردمون

مناف - هييييي انتي لعبالج شيخج علينه تكومين تامرين وتحجين تره انتي متخوفين جلبي

ليو- متساعدينه شعندج واكفه متخوصره وتباعين يله جيبي الدرنفيس

ابو راهب:- انه بكد ابوج تاليتني اشتغل عندج

- وبقو يحجون هيج عرفتهم غيرانين واني اباوع واسكت  مارد

كملوها وطلعو ليو  طشر الكراتين بكل مكان المعدات وسخ الشبابيك حتى اعيده تنظيف

ليو جان صغير هم مو جبير بحدود العشرين سنه هذا تقريبا اصغر واحد بالولد ومدلل يحبو

دمه خفيف ويضحك ومطيرجي مال القطاع

شجابه على هالشغله ماادري

عدت تنظيف وبيومها فرشت الغرف وجبت الجهال كل واحد نيمته على فراش خاص بي وعلمتهم...

- منا وهيج كل واحد يكعد من النوم يرتب فراشه

والي مبلله يحجي حتى نطلعه ونغسله

قبل متنامون منا وجاي تغسلون ايديكم رجليكم يله تجون للفراش مو انتو وسخكم

اني اليوم حمشيها لان ممغسول بعد مينغسل لا لازم تحافضون على نظافته

الغرف جانت مقسمه

شي للصغار كلش

غرفه للوسط

- غرفه للكبار شويه

رغم صغر سني بس كمت افكر بشغلات اكبر من سني بهواي يعني كلت وي نفسي

اذا الحجي جاب هيج كهرباىيات ومامانع معناها اذا اطلب شي مراح يكول لا

اذا ردت ملابس للجهال مراح يرفض

اذا ردت احسن الطبخ ماعتقد يرفض

اني ليش مااغير كلشي هنا

ليش ماامشي مثل مااريد واعلمهم هم ابدي اخطط لنفسي واخلص منا ارجع لاهلي ارجع لااختي  اي ارتب وضعي واجر بيت ونكعد سويه اي لازم ابدي ارتب اموري واروح لااختي

سديم....

اليوم الي شهرين اشتغل بالصالون وشهريتي تمام

تعلمت اسوي تسريحات بسيطه للزباىن والعرايس على ست سميره

صرت احسن من الي عدها يشتغلون وهي كيفت عليه

طول فترة شغلي وياها جانت عاديه لحد مابيوم طولنه بالصالون بقينه نشتغل جنت بس اني وياها

اجاها اتصال

- اي

لا وحدنه اني والبنيه

-تعال اخذنه

- ماشي

خوش

خوش

- يله سديم البسي وامشي حيجي ادم

- منو هذا

- هذا ابن عمتي

استغربت ابن عمتها يعني شنو هالعلاقه القويه حتى يجي ياخذها ويوصلها هو وبينهم تليفونات

مهم اجه سياره عاليه فخمه رجل يطلع عمره 30 سنه مو جبير   

صعدت هي يمه واني وراهم

وصارو يسولفون حجه هو

ادم -  سميره عيني اريدج تحجين وياها تقنعيها هذه تريد تذبها براسي

- ياادم هسه غير لو مامتأكده متحددك انت

- وشترديني اخلف من وحده لاعبه لعب لو يبقى يوم من عمري ماعترف بالطفل مو مني جذابه هاي وتريد تذبه براسي علمود فلوسي كليلها ادم يكول شكد تريد فلوس يكتبلها بس تحل عني

-واني اسمع فتحت عيني بوسعها عزززه

طفل

يعني مسوين مثل الافلام من يدخلون بعلاقه وبعدين يتخاربون وتنتهي بنكران

سميره:- شوف ادم اذا الطفل ثبت منك لاابن عمتي ولااعترف بيك

- ولج شنو يثبت اني انتظر لحد ماتولد كليلها ادم يقتلج اذا متجرين عدل خل تحط عقلها براسها وتثكل

- هسه هي وينها

- بيتي اني حبقه انتظر بره وكليلها بس اني اجيت ماريد تدري تره تطلع وتسوي فضايح

- ماشي

- وصلنه كبل متنزل ست سميره التفت عليه وكالت

سديم انتظري هنا مااطول هسه اجي

باوعلي هو بالمرايه واني دنكت تأفف ومبين حيل ضايج نزلت ست سميره وهو نزل واني بقيت بالسياره

بقه يروح ويجي يم السياره وجكاره بااثر  جكاره

واني بس ساكته واباوع كل شويه يباوعلي ويرد يكمل مشيته

اجه اقترب من السياره فتح الباب من جهة الي اني كاعده  بيها

اني خفت كلش

- انزلي

باوعت ونزلت من دون كلام

وكفت على جنب

ادم - الي سمعتي بالسياره والي شفتي هسه ( واشر على بيته)  ينسي مفهوم ( كالها ورافع ثنين حواجبه بمعنى يأكد) 

سديم- مفهوم

ادم- عفيه

بقيت واكفه وهاي تأخرت

سديم- عفيه تأخرت وست سميره ماطلعت لهسه مرت خالي هسه قلقه عليه

- اي خابريها وكليلها حتأخر

- ماعندي موبايل

- ( رافع حواجبه ثنينها كال بخرعه)  شنوو

- ماعندي موبايل

- هز راسه بمعنى نعم هممممم

صفن لدقائق

بعدين حجه

- ليش مرت خالج امج وين

- توفت

- ابوج

- توفى

- اخوه خوات اهل ماعندج

- لا

- هز راسه بمعنى نعم ويورث بالجكاره بااعصاب ترجف اباوع بعيونه حزن عميق تلمع مشخطه بحمار

- شسمج انتي

- سديم

- شنو هالاسم هذا هه

استهزء ودار وجها

وصار يدردم

وتالي وياها يعني  الا تفرغ الي بكلبها عايشتلي دور المظلومه

هسه انتي ياسميره نمتي هي كلمتين ذبيها وارجعي

جر نفس وتأفف

بعدها بشويه طلعت

هو تلكاها فاتح ذرعانه ويحجي

اللهم صلي على محمد وال محمد

فرجت

اخيرااا

جان اخذتيلج بعد غفوه للصبح

- اجت وكفت يمه وحجت على الكيف

- ادم البنيه منهاره وخايفه من اهلها تكول ادم يخلصني من هالبلوه لو يتزوجني

- وشلون اخلصها اجهض بمكانها

- ولك تجهض معناها فتره ترتاح بيها حيبين عليها واهلها يكتلوها

ولك انت شلون هيج تسويييي شلوووون

- باعي مو وكت النك مالتج

امشي اوصلكم

- لا امشي احجي وياها هي عرفت انت بالباب

- كتيلها

- اي تفاهمو مو كلشي مشاكل

- شكتلج اااانيييييي

- يعني طول ماهي جايه على مزاجك تحبها من عوجت وياك صارت مو خوش

- متصيرلج جاره صوجي دخلتج

ومشى فات للبيت وبقينه واكفين  رجع علينه من الباب

متفوتون للبيت شكو واكفات

وراح جوه

واحنه فتنه

جانت هي بالصاله تبجي

شفتها بنيه حلوه كلش بيضه شعرها اصفر عيون خضر جميله من كلشي هاي هيج تصير لعبه بيد هذا وهذاك مع الاسف

تتوسل بي وتبجي وهو حجر تحسي واكف بعدين انتبه لوجودنه لزمها من زندها وفاتو للغرفه وسدو الباب يكملون كلامهم جوه

كالت ست سميره

اكعدي سديم

- كعدت جان بيته حديث يخبل جبير وحلو  من اثاث من بناء

سألتها لست سميره

- شنو هذا وحده عايش هنا؟

- اي

- ليش اهله وين

- مسافرين

- لعد هو ليش هنا كاعد

- لان شغله يتطلب هيج

- شيشتغل

- استيراد وتصدير وناوي يفتح شركه هنا بالعراق

- اكلج عفيه ست متدكين على عمه هسه قلقت عليه

- اتصلت وكتلها راح نتأخر عدنه شغل بالصالون

- خوش

- كعدت اباوع لكل زوايا البيت كلش عجبني

بعدها بشويه طلعو والبنيه تتبسم وتمسح بدموعها وهو ماعرف شنو يهمس بااذنها ويبتسم

وكف كبالنه كال

- يله تمشون لو حبيتو المكان

سميره:- يمعود ودينه تره متنه جوووع

- يله امشن

- مشينه وصعدنه بالسياره وكعدت يمي البنيه من اباوعلها ترجف وايدها من كثر الخوف تحسها قطعة بياض باوعتله بالمرايا وهو هم باوعلها

والدمعه بطارف عينها تلمع

- همست الها)  ترجفين؟  بردانه؟

- لا

ساد سكوت قليل بعدها سألت

- انتي شتصيرين من أدم؟ 

سديم:- مااقربله شي اني اشتغل وي ست سميره

-ست سميره شتشتغل؟ 

-  عدها صالون بشارع ال.......

- هاااا

( انتبهت هو يباوعلنه بالمرايا مركز ويانه)  

ست سميره:- ادم خل نودي سديم بالاول صرنه قريبين على منطقتهم

باوعلي بالمرايا زين ومارد اجتاز منطقتنه

-ست سميره:- مو داكلك نودي سديم ليش مترد

- باوعلها واندار للطريق هم مارد

- مشينه وصلنه لمنطقه كلش راقيه وكفنه كدام بيت عالي وراقي جان تنزل البنيه وكفت يمه من باب السياره الاماميه وهو كاعد من جهة السايق

لتعوفني ادم اموت والله

- مسح على راسها وابتسم

مااعوفج لتخافين روحي وبطلي هذا الخوف تره داترعشين

- ادم خايفه

- لتخافين وياج اني روحي ارتاحي

-راحت وحرك السياره طلعنه

ست سميره-:   انت شنو فلمك ادم كم وجه الك

- شكو

- رايدها للبنيه لو تلعب

- العب

- متخاف ربك

- مجبرتها

- العقده هاي الي عندك شوكت تتخلص منها انت بابا روح على طبيب نفس يعالجك البنيه شنو ذنبها تكسرها وتعوفها

- هي مسويه علاقات قبلي لتذبين الصوج بيه ولاحكتني على فلوسي مو على سواد عيوني

- وان كان

وان كان مفروض تصير واضح دور الشيطان ليش تلعبه وياهاااااا

- اني شيطان انييييييي وضرب على الستيرن

من يحرموني منها وهي مالها ذنب

منو بينه الشيطان

منوووووو

ويضرب على الستيرن بقوه ويصيح

سميره:- كافي كافي اهدأ

كافي

على كيفك

-( بصياح)  اسكتيييييي

مااسمع حسج

كله منج

كتلج روضيها بهدوء

تكليلها غضب بالباب

- كافي اهدأ بس على كيفك

- طبك السياره على صفحه ونزل وسد الباب بقوه

واني حمووووت الوقت تأخر يا هالليله الي مراح تخلص شون

دكت مرت خالي

- هاي مرت خالج تتصل

- شكلها ست

- كليلها بالطريق

- هلو عمه

اي بالطريق جايين

تأخرنه لان عرس باجر عدهم وجانت تسوي جسمها وتقشير واضافر وهالامور خليناها اخر شي

- ماشي

نامي انتي نامي

طريق ازدحام خاف اتأخر بالرجعه

ماشي

نطيته الموبايل وباوعتله

واكف يباوع لست سميره بغضب

- ست عفيه انزلي هدأي هذا خاف حيخلينه نبات للصبح هنا

- عوفي ميفيد اعرفه نوب حيضوج اكثر

- شون لعد

- تركي اعرفه ليش هيج تأذه

شويه وفتح باب السياره من الجهه الي اني كاعده بيها

- انزلي

سميره:- شنو تنزل شعليها هاي

- لاتدخليييييين

- خفت منه كلش

نزلت واني اباوع على ست سميره وست سميره تحجرت بمكانها

- باوعلي وجانت عيونه تجدح نار حجه على كيفه

شحجيتو انتي وياها

- منو

- انتي وعسل

- هيج عادي مو شي خاص

- كذب لتكذبين شحجيتو

- كالتلي انتي شتقربيله كتلها اشتغل وي ست سميره سألتها بردانه

كالت لا

هيج عادي يعني

- هز راسه بتفهم وباوع للشارع سكت

بقيت واكفه لابيه اصعد ولابيه اوكف وجودي ويا بهيج وقت مو حلو ناس مترحم واني مااعرفه

- حجيت على كيفي

عفيه متوديني واذا متكدر اخذ تكسي وارجع

- وين تولين بتكسي بهاليل

-دنكت ماحجيت شي

رفعت راسي لكيته يباوعلي

- شمر ابتسامه بااستهزاء وتعب جر نفس وكال يله بويه صعدي

صعدنه وشغل السياره ومشينه وصلني للبيت

باوعت للساعه 1 ونص حتصير.

وقت متأخر

لكيت مرت خالي وره الباب

فتحت عينها بغضب جرتني من زندي

- ولج منو هذا الي وصلج وتكليلي بالصالون

ضربت وجهها صخام الصخمج ياسواد وجهي

- هذا اخو ست سميره مابقت سيارات الوقت تأخر وهو وصلنه

- كذابه تكذبين عليه

- ليش اكذب مو اتصلتي وكتلج راجعين بالطريق وهي ويايه

- متروحين بعد للصالون الله اعلم هاي شنو من مله

- عمه فدوه لعينج شنو مااروح

- متروحين والله بعد هاهيه ابددددد فوتي جوه

فتت جوه وجنت حيل تعبانه شمرت روحي على الفراش ونمت وحتى كعدت متأخر ثاني يوم

طلعت من الغرفه لكيت عمه كاعده تحضره غده شافتني مبين عليها ضايجه كلش

صباح الخير

ماردت 

- دانكول صباح الخير

- باوعتلي بغضب ودنكت تكمل شغلها

- كعدت كبالها

ليش ضايجه

- تعبانه هاااااا

ليش تعبانه

- شتقصدين عمه

- سديم اني مو غشيمه

منو هذا الرجال الي وصلج البارحه

- مو كتلج اخو

- ( قاطعتني مباشرة)  اشششششش مااسمعلج حسسس لتكذبين

منو هذا الرجال منووووو

ولتكذبين احجيلي مراح اطير راسج

- ابن عمتها

- وليش تأخرتو وليش وصلج

- لان جانت عنده مشكله

- وانتو شعليكم

- بلعت ريك متردده من الي اكوله

- احجي شعليكم انتو

-  اني مالي علاقه هي وابن عمتها وجنه وحدنه بالصالون واجه حتى ياخذها ورحت وياهم

- شنو ياخذها شنو شو مدافتهم

- شوفي عمه هذا الرجال عنده علاقه بوحده..........

لهسبب رحنه

- دكت على صدرها

عزززززه ولج ليش مكتيلهم يوصلوج بالاول شوداج

- عمه ماعبالي هيج حنتأخر وبعدين اني استحي

- شوفي يمه احنه ناس على كدنه عايشين على كدنه

لابخير الناس ولابشرها

يمه هيج طبقه من الناس عدها المتاجره بالبشر مثل المتاجره بالبضاعه عادي عدها

ناس الزناكين مو مثل الي على كد حالها عايشه

ابتعدي عنه هذا يروح يخليج براسه تعجبي

يشوفج طول وجمال وحيده

يبقه يفتر وراج لحد مايوكعج ويتركج

لتامنين لهيج ناس ابد ابد سديم

- عمه يعني هسه مفتهمت اشتغل وياها لو لا

- مادام حجيتي الصحيح ماعندي مشكله بس ابن عمتها هذا مارتاحيتله اذا تشتغلين كون ابد مالج علاقه بي ابد ابد سديم

- لا لا عمه والله توبه

-  هاهيه لعد

هي خابرتني سميره وكتلها تعبانه اليوم متجي

- ماشي باجر اروح

- لتضوجين من كلامي اني اخاف عليج ماريد الي صار قبل سنين يتكررر

- تقصدين اختي

- اي.   يعني اختج راحت منعرف وين هي عايشه ميته وين ماوين مندري

- احس عايشه احسها تشبهني حلمت بيها مره

- شحلمتي

حلمت عايشه بقصر يخوف بس هي ملكه بي لابسه مال ملوك مثل هذوله الي تحسيهم ملوك الحرب

مثل ملكه وعدها جيش وهي حتى قاسيه هيج تشبهني بس مو كلش

ثنيناته طويلات وحنطاويات وعيون بنيه وشعر متوسط بس الملامح تختلف شويه يارب اشوف اختي تكون مثلي حتى اعرفها

انشاء الله يجي اليوم الي نكحل عيونه بشوفة مريم مو بعيده على ربج

مريم.... 

صرت اوجه البيت مثل مااريد وصيت الحجي من اجه على ملابس والحلو هو مجان يكول لا يدز ثاني يوم هالشي ثار حقد الموجودين بالحي وزاد فضولهم

ليش وشعجب وشنو هالتغيير

البيت صار نظيف ملابسهم نظيفه فراشهم نظيف

ولاعبالك مشردين ومكادي كدرت اسوي هالاكدر عليه

على الاقل لكمه طيبه بعد رجعتهم من يوم كامل من الشوارع

بعد مارتبت نظام البيت الي كاعدين بي عيني صارت على الحي جان عندي فضول اعرف شنو موجود بالبيوت البقيه الي مقفوله ومفاتيحها عند الحجي

معقوله بضاعه

لا اني شايفتهم وين يخلوها

- زين ناس مخطوفه

-لا بالبيت الثاني يجيبون

هاي لبيوت شنو بيها

معرفت وبقه الفضول يقتل

جنت مرات اضوج اطلع يمهم بالحي اكعد وسعدي يمي وين مااروح وصاية الحجي بيه

ليو:- اكلج مريم انتي متضوجين هنا

- ليش اضوج

- يعني الحجي مخليج هنا مدزج مثل النسوان لو معتبرج رجال هههههه

- اي رجال واليوصلني دااكسر رجله

- على كيفج ياب على كيفج شكلنه

- اكلك ليو

هذيج البيوت شنو بيها

- صفر وجها وارتبك

شبيها

لا لا

مابيها مقفوله

نتر سعدي

كومي يلااااا للحوش ارجعي

- ليش شتريد مني

-شي ميخصج لتسألين بي افتهمتيييي

- ماشي

يله كومي

- مشيت وهو وراي ومشت الايام والليالي

بيوم نايمه وافز على صوت صريخ مره

فزيت وكمت من فراشي

وكفت بوجهي بدريه

وين

مره تصرخ

ماعليج اكعدي

-  شنو اكعد منو هاي المره

- كتلج اكعدييييي

- بعدتها عني وطلعت اركض اشوف شكو اسمع الصوت يطلع من البيوت هاي المقفوله بدريه وراي دااروح جلبت باايدي

- لترحين مريم ولج استري على روحج

- شنو عمه شصاير ليش

- هاي داتولد عوفيها

- ليش تولد شنو

- اششششش ماعليج كتلج داتولد عوفيها

- استمر الصراخ ساعه وبعدها عم هدوء تام اريد اطلع اريد اشوف شكو بدريه متقبل واني الوب

شويه نوب وصوت رياجيل بره وصاح الحجي

- بدريه

- امر حجي

- اخذي هذا الطفل يمج

- جابو اباوع طفل ملفوف بحضينه توه مولود غرغرت عيوني

عمه امه وين ليش يمج

- اششششششش ليسمعج

الحجي:- امه بالمكان الصحيح لاتدخلين بشي ميخصج انتي

وراح

همست

عزه سمعج ولج اسكتي

- باوعت مخنوكه ومصدومه شنو ليش خطيه

ماتت يله جابت هالطفل

ليش

ليش هيج

وين ودوها

بدريه وين

وفرت وصرت اكمز

وين راحت وين اخذوها

حجت بهمس خايفه:- اسمعي هنا تكلين اي وبس لتحفرين تره اذا بقيتي تحفرين تلحكيها

- ليش هي وين راحت

- قتلوها

- شنووووو

ليش

ليش يقتلوها شمسويه

- ماكدر اكلج بس هاهيه يقتلوها ولتحجين بعد لتسألين

بقيت الوب وادك على رجلي شنو هاي اني وين عايشه شنو هالقساوه هاي

بقيت للصبح كاعده والطفل ماسكت كل شويه فاز يبجي بقيت مساهره عليه وابجي تيتم من اول يوم اجه للدنيا خطيه

صبح الصبح والجهال طلعو سعدي يكعدهم بالدفرات للي بعده نعسان كل مره اني اصد عنهم بس هالمره ماكمت بقيت ملازمه الطفل وكاعده مصدومه من الي شفته وسمعته

راحو وبقيت اني وكم طفل صغير اباوعلهم

هذوله شلون اجو خطف لو تشرد

قصتهم شنو

ولد منو

اهلهم منو

ليش

وشلون

مصير البنات معروف مصير الولد تجاره اعضاء صرت اعرف هالسالفه والي كمل صدمتي بارحه صرت اخاف اكثر مشكله ماكو احد تأمن بي وتفتحله كلبك وتحجي اخرس وغرك بنص بحر

اوووووووف اووووف

بهذاك اليوم لازمت الغرفه ماطلعت وبقيت كاعده

افكر شلون شحسوي اخذ الطفل وانهزم اسايس  واحد من الولد واخلي يطلعني ماعندي غير حل

الحرس لازم احد الحراس اسايسه واطلع منا

لليل واجه الحجي عيونه تجدح نار صاح بصوت مخيف بدريييييه

- امر حجي

- وين الطفل

- جوه حجي جوه يم مريم

- جيبي

جبته واجيت نطيته اله شاله باوع بوجه زين

جان يلتفت على سعدي

- كلبه هاي كلبه كلبه ويصيح

- حجي كله ابيعه الك

- ولك لزمنه من ايدنه التوجعنه شنو ابيعه عرف كلشي كلشيييييي

- الطفل نقطة ضعفه

- غير كون يعترف بييييييي غيرررررر

- شلون لعد

- لك قتلتها ومابرد دمي اقتل هذا هم

يصيح ويحجي وبيده الطفل يصرخ من حجه هيج فزيت

لا لا حجي لااااا خطيه هو ماله ذنب

- باوع بغضب نتر

وسحبني من زيك دشداشتي

اسمعيني زين

دور الحنيه هنا ميمشي عدي

هذا الولد تخلي يمج تليفون يجيج اكلج تقتلي تقتلي اكلج تحركي تحركي

غير هالشي ادزج وره امه

- صار صار حجي

اخذت الطفل وهو اندار دايطلع ولحكته الحمايه وراح

اجه سعدي تقرب حجه

ديربالج تره هذا ماعنده لحيه مسرحه كنالج لترحين زايد هه

لاتتعاطف مع من لا رحمة في قلبه لاترجو منه حبا فهم لايعرفون الحب.

تحياتي رغد الموالي

           نرجسي الهوى والهاويه

         لاتبالي بمن حولك لاتبالي بغيرك

      انانيُ مخادع مراوغ اي من الرجال انت

    قد تتخذ من القلوب لعبة تلهو بها وقت فراغك

وترميها حينما تمل منها قد حيرت الفكر والمنطق

لست رجل وعار ان تحسب من الرجال يوما ما

         لامن شيم الرجال الهوى واللهو

           ولا من شيم الاصيل التخلـــــــــي

             قد جسدت بفعلك عار الذكور

               واعلنت توبة الحب نسائنا

                     فأي الرجال أنت؟! 

~~~~~~~~~~~~~~~~~~~~~~~~~~~~~~

بقلم رغد الموالي.....

سديم....

رحت ثاني يوم للصالون اشتغل

سميره:- شلون صرتي مرت خالج كالت مريضه

- اي شويه تعبانه جنت

- معافاة

- اشكرج

مرت الايام اعتياديه وبيوم اجه للصالون جانت ظهريه ماكو احد وفات للصالون

وكعد يحجي وي سميره

واني ختلت بغرفة التبديل لان ملابسي شويه ضيقه وماردت يبين شي

واسمعهم يسولفون بشفرات لان البنات الي ويانه يمهم بس اني لان ادري بالسالفه افتهمت

ادم:- صارت زينه

سميره:- وشراح تسوي

ادم- القرار يمها هي تعرف كلش زين

سميره:- ادم هالله هالله

ادم:- مال يصير الي بالج انسي افتهمتي ان س ي ( حجاها بتقطع)

_ مبينه حبابه وضحت بنفسها لاجل تسعدك

- اكلج عوفج من هالحجي

هاي الحليوه الي جانت ويانه وينها شو ماكو

- شتريد منها هاي النوب

- شبييييج داسألج عليها

- ادم عوفك منها وخلينه بالمفيد تره اتبره منك والله

- اني هم اخوج افه يعني هيج تبيعيني

- لعد ركز من دااحجي

- مركز وداعت هذيج الحليوه

- وتالييييي

- بداعتي وينها

- والله جانت موجوده بس ماعرف وين راحت

- هاي خجلت مني اكيد حبتني لعد وخجلانه هسه

عوفيها عوفيها

- جاي تتشاقه وتتمضحك وانت بنص النار شبيك اصحى على روحك

- شصحى هاااااا

سميره

تره جاي اغير جو واحجي شويه واروح لتقلبين مواجع

- وغيرك شنو ذنبه هااااا شنوووو

- غيري ذنبه عقله صغير افتهمتي

- كلامي وياك بعدين هسه الكاع محضوره

- طالع اني بس خل اشوف منو بعد يجيبلج بضاعه مسافر هاليومين لدبي

- ليش متجيبلي بالله

- الحليوه وييين اريد اشوفها قبل مااروح

- ادم جوز عنها متفيدك مخطوبه لابن عمها

- كبر الج والها لعد

وراح شويه وصاحت سميره

سديم

سديييييييييييم

-كولي ست

- وين جنتي ولج

- بالغرفه

- علموده مطلعتي

- ملابسي ضيقه مترهم

- عفيه بيج

سمعتي؟

- ليش يسأل عليه

- باوعت وسكتت واني هم سكتت وكعدنه نتغده شويه واجو زبائن وبدينه نشتغل

للمغرب خلصنه ودااروح بعد ما فرغ الصالون صاحت ست سميره

- سديم تعالي دقايق

- كولي ست

- شوفي بنتي اني اعتبرج مثل بنتي مثل اختي الصغيره وراح احجي وياج كلمتين سمعيهم زين

- كولي ست

- هذا ابن عمتي فد واحد ملعب ومتعب اذا حاول يقترب منج لتنطي مجال ابد سديم ابد

- على بختج ست مستحيل

- اعتقد شفتي عسل وشفتي شلون صار وياها نذل

تره اني سايسته بس لان مصالحي ويا والا جان اخلاقي غير

- شسوه علمودها

- ك العاده يترك شيسوي يعني

- والي سواه

- هو رجال شصار عليه يطب ويطلع محد يكله انت شنو الي اكلتها هي

( خلت رجل على رجل وحجت برود) وبصراحه هي هم تستاهل اكلتها مربع اني مشايفه هيج غباء

- ليش مانسمي حب

- الي يوكعج هذا ميحبج

- ممكن هي تحبه

- وهو؟

هاااا هي حبته وهو؟ مثل ذئب اكل فريسه وشمرها

- يمكن هو استدرجها

- وهي ماعدها عقل؟ هذا هذااااا( وتأشر على عقلها) هذا مشغلته

تعرفين شيكلي

- شيكول

- يكلي اني مااصدك بس وياي علاقتها وباقي يدور وراها ومكتشف عدها ماضي من عرفها هيج وكعها ومارفله جفن

- ابن عمتج ليش وحده عايش اهله وين

- مسافرين

- اكيد

- شوفي سديم تساؤلاتج هاي بمعنى انه تردين تعرفين عنه امور

اني دااحذرج منه مدا ااعرفج عليه

ادم متعببببببب

متعببببب

- اني شجابني عليه هو جبير ومبين خايض الدنيه اني اول عمري

- لهسبب دااحذرج لان هاي صار ثاني مره يسألني عليج

- ليش سأل غير هالمره

- كالي شكد عمرها كتله نهاية ال 15 ماصدك كال هاي بنت ال20 سنه

كتله هي تبين هيج بس مو هيج صغيره

- وليش سأل

- واحد مثل ادم برأيج ليش يسأل

- احسج مقهوره منه بس مسايسته

- كتلج مصلحتي ويا

- تمام فهمتج

تولد عندي فضول قوي عن تفاصيل حياته الخاصه مثلا هو ليش عايش وحده اهله فعلا مسافرين لو حجه منو يقصد هذيج المره الي مالها ذنب

ليش هيج تحذرني منه شنو الشي الي خلاه مهووس بالعلاقات مثل ماكالت ست سميره

تفاصيل هواي صرت حابه اعرفها بس منعت نفسي عنها والتفتت لشغلي والحياتي العمليه

جنت اغسل شعر عروس صغيره بالعمر وجنت اسولف وياها

شعجب متزوجه هيج صغيره

- حب من الصغر

- كرايب

- اي ابن خالتي

- بعمرج؟

- لا اكبر بسنتين

- يعني انتي ١٥ هو ١٧

- اي

- شسمج انتي

-مريم

شعور مؤلم مر بلحضتها وتذكرت اختي مريم واخذني بالي لاختي وين هي ياترى

مريم....

صرت اعتني بالطفل الي حاليا مصيره مجهول ماعرف شراح يقرر الحجي مصيره

من اباوعله طفل صغير بريىء ميعرف شي من الدنيا

اووووف هالدنيا

خلت ناس لعبه بيد ناس

اباوعله وهو نايم ميدري بالدنيه شكو

حبيبي شنو ذنبك

اجيت ومتعرف منو يحبك منو يكرهك

منو امك منو ابوك

قصتك شنو

شلون اجيت

تشبه امك لو ابوك

كل هذني متعرفها

مرت الايام والحجي مااجه اختفى واللزمه صارت بيد ابو غضب هذا ايده اليمنه للحجي واقسى منه بعد ميتفاهم ولايتحجه وكلها تخاف منه

رجال ضخم متوسط الاربعينيات

يجي كل يوم يجيك الحي ويروح  

يوم بعدها يوم فزيت على صوت عركه بنص الليل

بدريه والحجي مانعين اطلع لو تحترك الدنيه اكتفيت اباوع من شباك المطبخ الي يطل على الحي بدون سياج خارجي البيت كان

واشوف الولد بيناتهم يتعاركون

ناس شايله سجاجين ناس تواثي وابو غضب كاعد برود مخلي رجل على رجل ويدخن ويباوعلهم

وهم مثل ديج هراتي واحد يريد يموت الثاني

ليو وسعدي ومناف وعنتر وعزوت وعمروش وابو عين وسلام وهواي بعد من الولد

العركه جانت بين عنتر وسعدي ناس صارت وي سعدي وناس وي عنتر وعلكت ناس تضرب ناس بنص الحي

الي شايل سجين والي شايل مكوار والي باايده يضرب واحد يغلط على الثاني

وليو اصغر واحد بيهم وضعيف وهم ضخام مو مثله اكل طن ضرب حتى ميلحك يضرب احد

وابو غضب يباوع برود خلص جكاره واشعل الثانيه ويباوعلهم لحد ماكمل جكارته الثانيه وكف بدون كلام طلع سلاحه وصار يرمي بالجو

انتبهو عليه وباوعوله

صرخ

كفووووو واحد عن الثاني يبتعد

توخرو وينهتون من كثر العركات وعيونهم تجدح غضب

- هسه احط بيكم طلقه واحد واحد ميارفلي جفن عليش هاي عركاتكم ماتستحون

سعدي:- استادي عنتر غدر بينا 

ابو غضب:- شبي

- استادي تقبلها يصور بينه

- باوع لعنتر شصورت ولك

- استادي ماصورت يتبلى علي

- باوعلهم ثنينهم حجه برود اكثر

تحجون لو هسه اطشر روسكم

- سعدي:- قبل فتره مصورنا احنه وبنات

- وشلون دريت

- بجهازه بالصدفه شفته

- جيب وين الجهاز

- اخذه وعنتر خرط من الخوف گلب گلب بالجهاز

عيونه جمر صارت حمر دم باوعله من جوه حاجبه لعنتر وخشمه صار يفتحه ويسده بنفس قوي صاح بعلو صوته رج المكان رج

لك عنترررررررر

لك كلللللببب

لك انت الداسوس هنااااا

وصار  يغلط وهذاك تجمد بمكانه لايحجي ولايرد

اخر شي متحمل طلع مسدسه من جيبه ضربه براسه وكع بالكاع والدم نافوره صار

اني خرطت من الخوف وجسمي كله صار يرجف

وصار يصيح

الي يلعب بذيله بعد هذا مصيره هذااااااا

ويأشر بسلاحه على عنتر

دفره برجله وكال ذبو للجلاب هذا مايستاهل يندفن

واحد يباوع بوجه الثاني ويبلعون ريك

اخذو شالو

واني اباوع عزه

عنتر

زين جاسوس هو وي منو ولمنو وليش

اني هذا من الاول مامرتاحتله

من الاول

فتت جوه ومرت الايام واجه الحجي عركاتهم داىما بنص الليل

وصياحات مالته هو وابو غضب ترج بالمكان

الحجي:- ولك شلون تقتلا شلوووووون

ابو غضب:- جاسوس خاييييين

- الحجي:- ولك غير تعرف لصالح منو يشتغل غير تفتهمممممممم

- لمنو يعني واضحه محد دزاه غير القبرص وجماعته

- وانه شضمني القبرص شضمنيييييي

- مادري هيج اجه بالي

رد عليه الحجي بوكس رجعه لوره لابو غضب رغم ضخامته وابو غضب مارد عليه

ويدفع الحجي باابو غضب ويغلط  عليه ويضرب وهذاك ساكت

اخر شي كال مالك طلعه منا مكانك هناااااا

هنااااااا بعد ورقتك نحركت يمي دام تاخذ شي من راسك

- يمسح الدم من خشمه ويباوعله مايرد

وراح الحجي وسندو لابو غضب وفوتو جوه

تحس روحك ماكاعد بنص بشر احس عبالك بنص غابه اسود وبينهم واحد يعارك الثاني واني مثل غزال اخاف على نفسي

صرت قليل اطلع واذا طلعت اروح يم ليو هذا اكثر واحد احبه وارتاحله ومايكبرني بهواي

طبعه هزلي وفكاهي رغم تشوفي يشم وبالليل غير عن النهار بس يبقه محبوب

عنده طيور ويطيرهن وملتهي بيهن وكت الي ماعنده شي

مريم:- ليو هذه طيورك من وين جبتهن

ليو:- وصيت عليهم وجابوهم الي

- منو سماك ليو اسمك غريب ومو عبالك عربي

- الحجي هههه

- شعجب

- لان ضعيف وصغير جنت جان يكول عليه هذا ابو عظمة اللينه الناعم جيبو جان يحبني انه شقي واضحكه ويكعد يضحك على تصرفاتي

بقو يصيحوني ابو عظمة اللينه ماعندي اسم

بجيت مره

كالي لاتبجي شنسميك

معرفت شيسميني كالي نصيحلك ليو على عظامك بس لتضوج

ومن يومها يصيحولي ليو هههه

- بس حلو

- اي حلو

- همست

انت هم باكوك (خطفوك)

- لا

- لعد

- انه لاكيني بالشارع ومربيني ماعرف اهلي

الحجي يبوك س البنات انتي باكوج مو

- اي

اني عندي ام واب واخت بس ماتو واختي عايشه

- شمدريج

- اتذكر صح صغيره بس اتذكر عندي اخت

- وتشتاقيلها

- كلش

- تدرين انه اتمنه عندي اهل جان هسه انه ادرس يمكن طبيب يمكن ادرس هم الي بكدي صارو لو بعدهم يدرسون

- شدراني مو وياك ربيت

- جنت اشوف من احنه وصغار يرحون كليات تدرين هاي الكليات حلوه حيل

مره صار عندي فضول ورحت شفتها

بيها بنات ولد يداومون سويه وميلبسون مثل المدارس وميشيلون جنطه

شكد تمنيت ادخل مدارس مريم مره تدرين شسويت

- شسويت

- مره رحت فتت وي الجهال للمدرسه ماعبالي حيعرفوني مو طالب كلت اشوف شكو بالمدرسه

فتت وانه حافي جنت ملابسي مبهذله مو مثلهم مرتبين ونضيفين

راحو طبو للغرف يسموها صف وطبو رياجيل يسموهم

يسموهم

نسيت شييسموهم

- اي

- فاانه وكفت لان مادري بيا غرفه ادخل

طردني رجال كالي انت شسوي هنا

سكتت ماعرفت شرده

كاله الي ويا هذا مكدي طلعو

وطلعوني بره

شكد نكسر خاطري بوكتها مريم وحقدت على هذا الرجال كلش

- حلوه جانت المدرسه؟

- كلش حلوه نظيفه ومرتبه وجهال نظيفين مو مثلنا ابد مريم ابد

بقه بنفسي ادخل مدارس هه

( وضحك بعيون دامعه مخنوكه)

وانتي شنو بنفسج

- اني

جريت نفس باوعت للسمه رجعت باوعتله

اني امنيتي اشوف اختي واعيش وياها يكون عندي ام اب هيج يعني

اما المدارس والله مادري عنها شي فمو بنفسي ماعتقد مهمه مو

- لا مهمه

- جنت اشوف بنات بكدي يرحون مدارس وجنت اتمنه مثلهم اصير بس مو كلش يعني

مرات اتمنه مثل هذا الطير اطيييييييييييير واروح ادور على اختي اشوف وين هي

- كمت وكفت وهو وكف وراح على طيوره يصفرلهن حتى ينزلن شفت خيال وراي التفتت ابو غضب رافع تك حاجب نظراته تخوف

- هه شجابج يحلوه هنا

- بلعت ريك معرفت شحجي

- قرب وجهه

شنوووو اول مره تشوفين رجال

- مباشره اجه ليو

استادي هاي للحجي راجعه تره

- عدل وكفته عقد حاجبه شون يعني

- يعني مخليها يم بدريه

- هاااااا

اامممممم

افهمت

روحي يابه روحي

-رحت واتلفت كل شويه وعثرت بالكاع

صاح

فتحي فتحييييي

مشيت وعفته

واحجي وي روحي

خرب

هذا شجابه منين طلع

الحجي مو كال يبقه هنا غير يبقه بيته

كبر

مشت الايام وهو ليل نهار يفتر بالمنطقه يلوب مرات يطلع تليفونه ويخابر من خلال كلامه مبين وي الحجي

- اختنكت بعد مابيه ابقه

- خلاص انه طالع

عسا مايلزموني احسن من العيشه تره طكت حوصلتي

هو نذل بنصنا وخاين مصورنا كلنا شتريدني اسوي

- هيج صارت يعني

ماشي

ماشي

وسده ضل متخوصر يروح ويجي يلوب

مشت الايام الحجي ماوصل وبدريه كالت متطلعين بعد حدج بالبيت وبس

مرات اسمع صوت ضحك وسهر بره  واغاني اعرف سهراتهم على طول هيج

ويوم الي تجي الشاحنات كلها تهم تشتغل وابو غضب صار يشرف الحجي ميجي

مره من المرات خاطفين 8 شباب طلاب جامعه

ابو غضب لعب بيهم جوله

يضربهم لو يطلعهم بنص النهار يشتغلون بالحر

رغم هم شباب بس وكت مايضربوهم صراخ يصرخون

جنت اسمع والوب ومرات انهزم من الصوت

تحسه سجن للتعذيب مو منطقه عايشين بيها بشر

وصلت مرحله جمد كلبي من كثر الي اشوفه واسمعه

صار عادي بالنسبه الي تعودت على هالمناظر والاصوات

يمكن شي بداخلي مات

الشعور؟؟!!!!

يمكن الشعور

يمكن الاحساس بالغير

يمكن الرحمه

يمكن خدرت اعصابي حتى اتعايش

اني نفسي مادري مصيري وين

تاليتي شنو

ليش كلها بس تعرف تابعه للحجي يبين غضب على عيونهم ويعوفوني

شنو معناها

ليش

شراح تكون نهايتي

يبعيني اعضاء؟

- لو حالي حال بدريه

نهايتي شنو مصيري وين

شلون ابقه هيج

ابقه اتاني

وانتظر

لشوكت؟؟؟؟؟؟

احيانا يكون الموت ارحم من مصير مجهول مصير انت لاتعرف ماهي نهايته

يكون الترقب في انتظار حسم امرك

امر متعب متعب جدا لدرجة الاابالي بينما انت تحترق من الداخل.....

سديم....

رجعت للبيت بيوم لكيت ناس بيتنه واول ماشافتني المره فرحت

سلام عليكم

عليكم السلام

فتت جوه عفتهم شويه واجت دعاء بنت خالي

سديم خطابه ذولي جاين عليج

- التفتت الها منزعجه ومندهشه

عليه؟

منو ذولي

- ماعرفتهم

طلعت بره سمعت الصوت من باب الاستقبال جاي

شوفو شتكول عروستنا احنه ننتظر منكم خبر

طلعو وبعدني بملابس الشغل وكفت انتظر مرت خااي تجي وتحجيلي

- ها يمه عندي الج بشاره

- عمه قبل كلشي لا

- شبيج يمه شنو لا هو اني شحجيت بعد

- خطابه مو

- اي والولد خوش ولد صايم مصلي

- بسسس

- لعد شنو اهم شي هذني

- ومنين اعيش بعدين

- محد كلج دايكدي

- شيشتغل

- ابو عنده محل غذاىيه

- وهو؟

- مرات يطلع وي ابو

- ومرات؟؟؟

- ماعرف

- لا ماريد اتزوج

- شتردين لعد

- اشتغل واكون نفسي

- رجال انتي؟

- لان مابيه حيل اصير رجال ويحكمني رجال

- شلون يعني شو مفتهمتج

- عمه عنده بيت

- لا

عنده شغله مستقله

- لا

- عنده شهاده ومتعين

- لا

- زواجيش لخاطر الله

- وانتي تفكيرج ماديات

- مثل ماتفكيره حلوه ومستوره

- كلتيها مستوره يعني هو هم خوش ولد وين تلكين هيج

-على عيني وراسي بس متعب يصير الزواج باجر عكبه منين اصرف على جهالي منين اعيش عامل يعني يادوب يسد الحاجات الضروريه

- متغير تفكيرج سديم مو هذا الي ربيتج عليه

- من باب المنطق والعقل اكلمج

- ومن باب الاصول والدين اكلمج

- الاعوج اصلحه

- ذيل الجلب ماينعدل

- هذا رأي عمه واتمنى تحترمين هالشي

- فتت جوه وكفت على المرايه واني ابدل باوعت لنفسي هي شبيه

ليش هيج حجيت معقوله اني صايره ماديه وادور ماديات لو حقي هالشي

شنو الي صار وليش هيج نزعجت

هففففف

يمكن لان تعبانه

غيرت ملاسي ومددت ونمت من تعب

كعدت على ريحة خبز

كمت لكيت مرت خالي تخبز بتنور الطين

- اساعدج

- ماردت

وكفت يمها حاولت اساعدها

- روحي

- زعلتي مو

- مو حقي؟

- عمه اسمعيني

هو جاي لاعنده شغله لا وضيفه لابيت كلشي ماعنده عايش على تعب ابوه اني شلون اتزوجه واعيش ويا

- يشتغل

اكيد حيشتغل وره ميتزوج

- الي مايتعب نفسه على نفسه مايتعبها على غيره

هذا عجوزي ويحب روحه اني مااتزوج هيج شخص

- ولج يمه اكثر الشباب هيج

- واني مامجبوره اتزوج من الاكثريه اتزوج من الاقليه

شناقصني واتزوج هيج زواج

- كعدج هنا مو حلوه ناس باجر عكبه مترحمج

- استثقلتي وجودي

- لا بس رايدتلج ستر

- يجي عمه يجي وصدكيني بس يطلع يشتغل ومعتمد على نفسه اتزوج اني هم ماعجبني كعدتي هنا

كملت خبز وياها ورحت خدرت الجاي وكعدت اكل خبز عروك وجاي

الايام تمشي وكضيتها مابين الشغل بين البيت تمشي الامور طيبه كدرت اوفر مصرف الي لبيت خالي ولد خالي هم صارو يشتغلون عمي حمزه ماعافهم

المدارس صارت على الابواب هالسنه اعداديه

حسيت بروحي كبرت

رابع اعدادي اشتريت ملابس مدرسه للدوام وكلت لازم ارتب وقت وي ست سميره علمود الدوام

ست الدوام تعرفين حيبدي شلون

- تردين تبطلين يعني سديم

- لا ست بس اكدر اداوم نص نهار وايام الي دوامي ظهري مااجي

- كم يوم دوامج

- 3 ايام صباحي ويومين ظهري عدا الجمعه والسبت معطلين

- يعني يومين متجين بيهن

- اي

- ماعندي اشكال بس كلشي بحسابه تره سديم

- اعرف ست وشتنطيني نعمه

- هاهيه لعد متفقين

رتبت وياها وبعد مرور كم يوم كمت اداوم جان ضغط الدراسه والشغل والدوام يرهقني كلش

اروح من الصبح للمدرسه ارجع على كد مااتغده واساعد مرت خالي بشغل البيت لان متكدر وحدها واحنه مقسمي للشغل وارد نوب اسبح واطلع للشغل

وارجع المغرب اتعشه واكعد ادرس

مرات اغفى على الكتاب من التعب

واكول تهون وتعدي وتصير سوالف

مشت الايام وحل الشتاء ومطر زخ جانت تزخ واني امشي مضلله روحي بالشمسيه ماشتني سياره صارت وياي بالمشي نزل الجامه صاح

- سديم تعالي اوصلج

- التفتت ادم

باوعت للطريق وكتله لا شكرا راح اوصل

- ولج طين الشارع متكدرين امشي

- عادي متعلمه

- لك هاي شلون تريدني انزل واصعدها بالكوه

- باوعتله ورديت باوعت للشارع اكمل طريقي مارديت

- ولج صعدي عيوني انتي قابل حاكلج

- نترت بي

كتلك مااصعد

مااصعد

ويلا روح منا

عرف ولف اصعد وياك

- هاااااا هيج صارت

طبج مرض

وشخط السياره ومشى بسرعه الطين تناثر بكل جهه وطاح على ملابسي وكأنه اتعمد

- فتحت عيني متعجبه هذا شسوه

عززززه هاي هسه شحيرجعني

باوعت ماباقي شي واوصل للمدرسه

كملت طريقي ورحت واول ماوصلت نظفت الصدريه على المغاسل الي بالمدرسه ودخلت جوه للصف

وقتها كلش نقهرت من ادم

وخفت هم بنفس الوقت

شجابه؟

وشيريد؟

والله بس يعيدها لااعرف شلون اعرفه حدوده

بسيطه.

لربما يكمن الخير في الشر

انت لاتعلم ماذا يخبئ لك القدر في الذي ظننته شرا

تحياتي رغد الموالي

تلك الجروح

تلك الاهات

جرح يتجدد لينزف من جديد

لتذرف الدموع ويعتصر القلب ...

ـــــــــــــــــــــــــــــــــــــــــ

بقلم... رغد الموالي....

~~~~~~~~~~~~~~~~~~~~~~~~~~~~~~

مثل كل يوم اروح للصالون لكن بيوم كان مختلف عن كل الايام

جنت دااشتغل ورن تليفون ست سميره

- اي بلي ام سديم كولي عيوني

ضروري تجي؟

تمام

تمام

باوعتلي بحيره كالت

سديم مرت خالج تكول تعالي هسه

-( سالتها باستغراب) صاير شي

- ماعرف كالت هسه خل تجي

- حروح اني ست

- تمام وطمنيني خاف صاير شي وياج

رحت طول الطريق افكر مستغربه شنو الي صار وليش خاف بيها شي عمتي وماقبلت تكلي حتى ماتخليني اقلق خاف صاير شي وي احد من الولد الف فكره اجت براسي والطريق حسيته شطوله حتى لمن يوكف شويه السايق بسبب الازدحام احاجي بنتره

( استعجل الله يخليك) ترافقها تأفف مني للحضات تغيرت كليا وصرت ماطيق شي غير افتهمشنو الشي المهم الي خلاها تكلي اجيها وصلت بعد نفاذ صبر

لكيت نسوان خالي هناك والجهال بالباب

ارتعبت اكثر سألت شصاير؟

شافوني صارو يبجون ميحجون

تكلمت بنتره وبنفاذ صبر متعب

غير احد يفهمنييي

تكلمت عمتي:- يمه لاكين اهلج( وصارت تبجي)

صدمه جانت مو كلمه بس عيوني تفتر تباوع تريد تفتهم تفاصيل ماصدر مني اي ردة فعل

حتى تكلمت مرت خالي ( منار)

- مقبره جماعيه لاكين واهلج من ظمنهم

- وشلون عرفوهم وين لكوهم

- هوية عمج محمد بجيبه وعارفي

يعني اهلج ويا وهسه بالطب العدلي يتعرفون على الهويات

- غرغرت عيوني وبجيت وكلها صارت تبجي وتجدد الحزن وكأنو اليوم ماتو

خوالي راحو يتابعون الموضوع وبقينه ننتظر بعد ايام عارفين هوياتهم شيعوهم من جديد وتخصص لكل واحد منهم قبر

مااعرف بهذه اللحضه

ابجي لان تجدد حزني والمي

لو افرح صار لأهلي قبر حالهم حال الناس

اصعب شعور يمر بي الانسان هو الفقدان

لما تفقد اعز ناسك اهلك

ليا تابوت اباوع

امي!

ابويه!

بيبي!

عمامي!

لمنوووووو؟؟؟؟

كبر بسد كبر صار ومن اروح احير دمعتي على ياقبر تطيح

لمن شفت الجنايز تولد حقد بداخلي على الدكتاتوريه وشلون سياسة حكم ضالمه على الكلمه دمرو حياة عوائل

زين اني شنو ذنبي

امي ابويه بيبي عمامي البقيه شنو ذنبهم

رب العالمين بالقران كال

( ولاتزرو وازرة وزر اخرى)

معقوله ماقرو القران

مايفهمون

مايعرفون

لو ظلم وطاغيه

نهظمت هواي بيومها وحتى مرت ايام للشغل مااروح وللمدرسه اروح حتى مااحظر دروسي ومرات اغيب

بقيت افكر شلون هيج صار منو سوه بيهم هيج

وليش

شكالت ارواحهم من ماتو

قتلوهم وذبوهم لو احياء ودفنوهم

تنفسو تراب ؟

زين امي خاف جانت عطشانه وماتت

خاف جوعانه؟

لا يمكن بالها يمنه تفكر بينه

سألت مرت خالي وحجت التفاصيل.....

امنتكم عدنه كالت عينكم على البنات وراحت

خطيه عبالك جانت تدري حتموت ومترجع بعد

سألتها ليش اخذهم وليش نفذ بيهم هيج جريمه تتجرد منها الانسانيه

صدام كان يحذف اي شخص يحس بي خطر على السياسه

- شلون يعني

- حريص جدا على سياسته ومنصبه لدرجه انه كان يعدم ويقتل اي شخص يحجي عليه او يعترض على سياسته لهسبب قتل هواي ناس بحيث صار ضالم

بفترة حكمه جان اكو احزاب سريه هذه الاحزاب تتفق وتحشد بطريقه مبطنه ضد السياسه والحكم

فلما يدري صدام عنهم يمحيهم هذوله راحو بيها بعد

ياخذو ومو بس هو

لا هو واهله لان يعتبرون كلهم ضد الحكم

-عمو محمد جان ضد الحكم

- عمج جان طالب وبسبب خلاف وي احد الاصدقاء سووله هيج خصوصا وسبق انه خاله جان ضد الحكم شيوعي يعني فلما بلغو عنه بلغو عنهم كلهم انه هم ضد الحكم وعلساس التجمع الشيوعي يصير بيتهم اغلب الاحيان هم مالهم ذنب الله على الظالم

- وشلون عرفت امي انه حيرحون بيها يعني ليش مثلا ما اجت يمكم او نهزمو

- الدوله قبل مو مثل هسه

ميكدرون ينهزمون لان الي يلفيهم يروح بيها هم ميخلص ولاكدرت تجي عدنه من هوياتهم حيعرفون ابوج متزوج ويجيبون امج وانتو واحتمال احنه هم امج بعدتنه وبعدتكم حتى لاتتأذون

جنتو صغار كلش وحرت بيكم بالبدايه جهالي هم صغار وماكدرت اربيكم انتو ثنين واني وحدي وعندي جان حسن ومحسن وكحين مينجرعون خالج هم جان روحه بخشمه ميتحمل حجايه

لهسبب صرتو يوم هنا ويوم هناك

لحد مااجه هذاك اليوم المشؤوم وفقدناها لمريم

دورنه عليها كومه ماكو اختفت لاخلينه مستشفيات لاخلينه دربونه دورنه بكل مكان اختفت وكأنه نفتحت الارض وبلعتها

بقيت يايمه ضميري يأنبني مابين الامانه الي ماحافظت عليها وبين مصير امج

الي خوالج بقو يصيحون اختنه وشرفنه والناس تلوم مترحم

سقط النظام كلنه ايييييي ياالله يافرج الله بلكت يطلعون بلكت بسجن ويبينون تابعنه اخبار السجناء ماكو

بالبدايه صارت فوضى عارمه

الامريكان دخلو بغداد والناس صارت تهوسلهم بالهتافات كل ظنه جايين يخلصونه من الدكتاتوريه لاجل سواد عيونه

هه ماعرفنه راح يخلونه نتحسر على نظام صدام رغم مرارته

بدت تماثيل صدام الي تارسه الشوارع يوكعوها والقصور نسرقت والدوله الي جانت بعزوتها وهيبتها بيوم وليله نتهت وصارت خبر كان

سبحان الله وكأنو رب العالمين ينطينه رساله انه

بس هو الي باقي على العرش وبس له الملك يدوم مايدوم لأحد

صدااااااااااام الي الكل تخاف تجيب اسمه

صدام الي الكل تخاف تهمس ببيوتها وتكول منحبه

صدام الي خافت منه دول

بيوم وليله اختفى

والي جان يخاف يجيب اسمه

صار ينزع النعال ويضرب بتمثاله

هم حقها الناس نكول

ناس شافت ظلم وفقر وحرمان بزمانه

رغم حكم قوي صارم

العراقي اله مكانته بين الدول البقيه

ينال احترام لمجرد هو عراقي ورئيسه صدام

لكن في بلده مهان!

هو يهان فقط ان اعترض على قانون واحد من قوانين الدوله

هو يهان ان خرج وطالب بالحريه

هو يهان ان خرج وهتف مطالب بالاصلاح

هو يهان ان قال الشعب يريد تغيير النظام

دكتاتوريه بمعنى الكلمه

الناس تعبت من سيطرة رجل متمرد متملك للشعب يحس الشعب ملكه عباره عن اداة للتنفيذ

متجرد من الاحساس من الاحلام!

رغم كل هذا جان الواحد من يمشي بالشارع على الاقل مأمن على نفسه

ميفكر يطلع ويمكن تجي مفخخه تفجره ويمووت يمكن يطلعون هويته ويذبحو على الهويه

ميفكر يقتل وماكو واحد يحاسبه

عشنه بحرمان بس على الاقل اكو امن

رغم الي نحذرها الدوله مو انفجار!

- يعني قبل احسن من هسه؟!

- جنه بسوء صرنه بالاسوء لاقبل ولاهسه زينين

العراق بعمره ماصار حاله حال الدول

منين نجيبها من زمن الملوك

حكمه فيصل الاول وتحالف وي برطانيا في سبيل تمشي مصالح العراق

ومات فيصل والبعض اتهم برطانيا بموت فيصل

وابنه اجه غازي وجان هذا الملك يكره برطانيا لان اعتبرهم هم قتلو لابوه!!

بعد فتره هم لكوه مقتول

كان ابنه فيصل الثاني صغير فتولى الوصيه عبد الاله خاله لحد مايكبر فيصل وهو يتولى الحكم

عبد الاله دمر الحكم بس محد قتله

قتلو فيصل وغازي لان دخلو اصلاحات من بعد ما كان العراق في مرحلة انهيااااااار تااااام

العثمانيين ماخلو بالعراق شي على حاله

دمرو

انتشر الجهل

المرض

الفقر

ف ملك مثل فيصل بالنسبه لهيج وضع هو نقطة امل تحيي شعب

بس ماخلو مايخلون واحد يشتغل حتى لما كان العهد العثماني وجابو حكام بالبلد 4 اشتغلو لصالح البلد لما عرفت السلطه الخارجيه الي خارج البلد بس مصير البلد بيدها حاربوهم

جان اكثر واحد اشتغل للبلد هو حاكم اسمه

مدحت باشا وهذا هواي هواي اشتغل وخله الشعب يرتاح بس حاربو ورجعو يدمرو وبعدها صار محطة اطماع برطانيا

واحتلت العراق

بعدها نشبت الحرب العالميه الثانيه

وتحالفت دول ضد دول اخر شي توصلو الى حل وهو عقد مؤتمر سان ريمو

هذا مثل المحاصصه لكل دوله مستعمره الها دول معينه وجنه احنه من نصيب برطانيا

طبعا برطانيا مستحيل تضحي بدوله مثل العراق

تخيلي بلد

اكبر مصدر للنفط

اكبر منتج للتمور

من اكثر الدول التي تحتوي على الكثيييير من المعادن

فوسفاات

حديد

كبريت

اسمنت

صناعة الطابوق

مياه تصلح لتجارة السفن والباخرات

حلقة صله مابين الهند والشرق الاوسط

وكثييييير كثيييير من الخيرات بهذا البلد

برأيج تترك بلد مثل العراق؟

- طبعا لا

- لهسبب جابو الملك فيصل حاكم للعراق

وبعده غازي وبعده عبد الاله هذا كان وصي بس صار لعبه بيد نوري سعيد وغيره لحد ماطيح حظ الدوله

بعدها تشكلت احزاب ودخلت شخصيات وصارت الكل تريد تحكم مىشت السنين واجه فيصل الثاني للحكم

هذا كان صغير الاكبر منه وخدمو لهذا البلد اعتبرو مكانه ك ملك مو مكانه واعتبرو نفسه هم احق بالحكم

لهسبب تأمرو على قتله

امه عاليه حلفتهم مايكتلو بااعتباره ملك وصغير وسيد هاشمي لكن فكرة انو يبقه عايش متقبلوها

فقتلو وقتلو اهله

من هذا اليوم انتهى الحكم الملكي

تعتبر هاي الظاهره انقلاب عسكري ضد الحكم

بعدها تعين عبد الكريم قاسم رئيس للجمهوريه

عبد الكريم قاسم ساعد الشعب هواي ونطاهم اراضي يزرعون ويبنون وحكمه كان سلمي

لكن مننسى الرئاسه على شنو نبنت!!!!

بعد عبد الكريم قاسم اجه عبد السلام عارف

ايضا صار رئيس انقلاب عسكري

بعد عبد السلام اجه عبد الرحمن عارف لكن هذا اجبر على تسليم الحكم

بعدها اجه صدام حسين

انتي بس تخيلي انه حكم نبنى على الغدر شلون يصير شعبه!!

وكأنه غابه فيها اسود والصراع هنالك على البقاء ومن منهم في النهاية ينتصر او يستحق ان يكون ملك!!

اما صدام فغدر في النهايه من قبل عدو ليس في الحسبان وتعاون الشعب مع المحتل في سبيل انه نتخلص من الدكتاتوريه

الناس في وقتها حقها ماتنلام

من هول الرعب الي جان ينزل عليها بخطأ صغير

كانت كل حركه

كل كلمه محسوبه

لان نهايتها الموت

جانت سجون والي يسجن تحت الاعمال الشاقه او التعذيب

اعدام او تعذيب قبل الاعدام او او او

والي جان يألم اكثر انه مو بس المذنب ينجر لاااااا

هو واهله لهسبب الناس تولد بداخلها حقد

ف محتل ضد نظام صدام هو بمثابة انقاذ لناس دمرها الخوف والصمت

وعدونا بالديمقراطيه

وكالو نظام يخليكم تعيشون بحريه

راح تكدر ترفع صوتك وتكدر تشيل لافته مكتوب عليها

( الشعب يريد تغير النظام) او

( كلا كلا فلان.... )

وتوكف امام مبنى رئاسة الوزراء محد يعتقلك وبالدستور تعتبر حق من حقوقك

راح تكدر تعبر عن رأيك تجاه الحكم سلبي او ايجابي

راح تكدر تقيم دعوى ضد اهلك اذا اذوك

راح تكدر وراح تكدر

والشعب يصفق

من هنا انقسم الشعب الى شطرين مابين مؤيد ومعارض مابين ناس تحب صدام وتتحسف على الي جاي يصير مابين ناس فرحانه وتطبل

انسرقت القصور والدوائر وعمت الفوضى واحتلت بغداد وانتشرت الدبابات الاميركيه بكل زاويه بالعراق

والحدود حرسها اميركان

صار الدخول للعراق اسهل من شرب كلاص المي

انتي تخيلي

سيطرة حدود دوله صارت بيها حراس تلاثه اميركان واحد عراقي بملابس مدنيه!

يختم على الجوازاات ويدخل بكل سهوله

دخل الارهاب

وصار التفجير بالمناطق السنيه والشيعيه

جنه قبل مانعرف اكو طائفيه

كلنه عراق واحد

سنه شيعه مسيح صائبه ايزيديه... الخ

شعب متعدد الديانات والقوميات اله تاريخ وحضاره عريقه

لما صار يصير تفجير يخلون ناس منهم بيهم تفتن بالمقاهي بالاماكن المزدحمه تبث سمها بعقول الناس الغشمه ( البريئه)

المناطق السنيه صارت تتهم الشيعه بالتفجير

والمناطق الشيعيه صارت تتهم السنه بالتفجير

وصار حقد بينهم

والذبح صار على الهويه

والتفجير بكل تجمع

وهاي احنه هسه نطلع ماندري نرجع لو لا

كالوها بداية سقوط النظام

( راح يخلوكم تتحسرون على ايام صدام)

وفعلا

كلها كامت تكول لو باقين على قبل احسن

قبل جان الدم خلف الكواليس

هسه صار للركاب

ودم البشر صار ارخص من المي

اقتل محد يكلك ليش

اسلب انهب شيل سلاح خلي بخصرك واتمشى بالشوارع محد يكلك طلع الرخصه وليش شايل

بعدها تشكلت حكوومه ديمقراطيه بحجة انتخابات

وانه انتو الكم الحريه في انتخاب الرئيس وطبعا مو رئيس جمهوريه

رئاسة وزراء انتخبو واحد من ضمن حزب الدعوه يعني ضد صدام

ههههه سبحان الله

عروش تنبني على المعاكسه

يعني الحاكم الي يستلم بعد الحاكم السابق هو من الذ اعداءه

تشكل برلمان وصارت محاصصه وهذا يكول جماعتي وهذوك يكولون جماعتنه

الي مرتب وضعه اموره تمشي والي لا

اله بس الله

- يعني عمرنا مراح يصير براسنه خير

- ولا نساوي الدول ابد

ابسط شي الستلايت الدول عدها من سنين احنه وره سقوط النظام يله دخل وعرفناه واجانه هسه الموبايل والناس فرحانه بالاستحداث الي جاي يصير

بس محد يصفن ويكول هاي من عدنه داتروح

- شلون يعني؟

- يعني فضلنه الديمقراطيه والديمقراطيه خلت الناس تستهتر والدم صار بكل مكان

والدكتاتوريه جانت مخليه الناس تخاف والدم خلف الكواليس

برأيج لو خيروج بين هالخيارين شتختارين؟

يفضل مااختار لان ثنينتها صعب

- وان افرضت نفسها الظروف على الاختيار؟

- الديمقراطيه

- عجيب!!

- لان اني بيدي التغيير راح اكدر اعبر عن رأيي

راح يجي يوم واصيح بعلو صوتي وياي ناس تحب البلد وتريده يصير وتريد تعيش ونشيل الفاسد

- وان خلو فاسد ثاني

- نتظاهر

دام اكو حرية تعبير معناها اكدر اغير

الدكتاتوريه هي اسكات للحق قص السن ناطقه وابادة ضمائر حيه اما الديمقراطيه فهي ك أم سيئه ماتعرف شلون تنظم بيتها

- الديمقراطيه ام سيئه

- سيئه لان اسائت لشعبها لان مافرضت عقوبات حقيقيه ومنصفه على الجميع

الي عنده ظهر محد يكله ليش

والي ماعنده راح بيها

- اسألج سؤال

ليش الامام علي كرهو ناس وليش عمر كرهو ناس وليش معاويه كرهو ناس

- ماعرف

- التلاثه كانو حكام لكن كل واحد حكم بطريقته

الامام علي ( عليه السلام)

لما لزم خزينة الدوله وزع على اساس المساواة

يعني ساوى بين الناس ماميز ناس على ناس

هذا الشي خله الوجهاء من الناس تكره الامام علي لان ساواهم مع الناس العاديه الي اقل منهم منزله

فكرهو وحرضو على كراهيته

اما عمر ( رضي الله عنه) فلما مسك خزينة الدوله وزع للناس العاديه وترك الوجهاء لان مو بحاجتها

فكرهو الوجهاء وحرضو الناس ايضا على كراهيته

اما معاويه فوزع الخزينه على الوجهاء فقط وترك الناس العاديه معاويه راد بهذا التصرف هو الحفاظ على منصبه واسكات الوجهاء امر مهم اما العاديين فما الهم تأثير على منصبه ميكدرون يسوون شي

لهسبب كرهو الناس العاديين

برأيج منو الاحق منهم او بالاحرى منو يستاهل نكرها

- من ناحية الاحق فما اكدر احكم لكن حسب وجهة نظري الامام علي اعدل واحد بيهم لان بالاسلام ماكو فرق بين المسلمين

اما الي يستحق انه يكره هو معاويه

- ليش

لان ماهتم للشعب واسكت الناس الى روسها كبار

- والي جاي يصير ويانه يشبه ياحكم

- معاويه

- اذن؟؟

- مراح نتغير

- انسي

العراق ضاع والي ضيعو ناسه مو حكومته!!

- بس يجي يوم ويتغير

- يمكن وكتها گبري شبعان مي ورد

- تعرفين الجواهري شيكول

- شيكول؟

-( سينهض من صميم اليأس جيل عنيد البأس جبار عنيد ويقايض ما يكون بما يرجى ويعطف مايراد بما يريد)

- قصدج ممكن يتصلح بشعبه

- اي

- ان شاء الله

حلم واشوف العراق بخير وعايش

- ان شاء الله مو حلم

- امين

- بس معلوماتج بالتاريخ قويه سياسيه طلعتي وماادري

- من جنت شابه من عمركم جنت كلش احب المدرسه بس ابويه الله يرحمه كالي ماتكملين

نجحت من السادس وبطلت وتزوجت

بقيت اتابع اخبار السياسه جنت كلش احب التاريخ

واحب اقراه

الاخبار يوميه تذكرك بالتاريخ والي دانشوفه حتى عيب نسمي تاريخ او يصبح تاريخ

كل يوم قتل كل يوم تفجير خلونه نحن لايام صدام الله لايوفقهم

- نحن لدكتاتوريه ظالم قتل ناس مالهم ذنب؟!!!

- والي دايموتون بالجمله الهم ذنب؟!!

- بس هذا مو مبرر حتى نحن للماضي

- شوفي اسألج كم سؤال

قبل الحزن مثل هسه؟

- لا

-قبل المغيسل لمن تروح تلزم سره؟!!

- لا

- القتل ناس تقتل ناس بيناتها مثل هسه؟

- لا

- جوازج هسه يسوه مثل قبل

- لا

- شلون لعد منحن؟؟؟؟؟

رغم اني راحولي ناس بالنظام السابق لكن لو باقين على خرابة الاول جان احسن

ام حامد شنو ذنبها تخبلت على الكبر؟ هاااا؟؟

-اوووي لاتذكريني عفيه

- لا اسألج

ام تشوف راس ابنها بعلاكه بالباب شيبقه بيها....؟!!!

- الله يساعدها

هم ليش كتلو حامد

- طائفيه

الدين يقبل بالذبح لمجرد هو من غير طائفه؟

-لا

- بزمن صدام جنه نعرف سني وشيعي

- لا

- حامد المعين الوحيد لأهله امه جابته على خمس بنات ربته بدمع العين ابوه شهيد حرب ايران تاليها لمن صار شاب بعمر الورد توه فتح ربيع عمره يخطفو ويذبحو ويذبولها راسه بالباب

وين صارت بيا دين بيا اسلام بيا شريعه

- حتى مره وحده بالصالون اجت وي عروس داتزوجه لابنها بس لابسه اسود ومبينه حزينه حتى ضحكه ماضحكت سألتها

خاله ليش لابسه اسود مو زين على ابنج هذا عرسه

- ( جرت نفس وكالت) عريس جوه التراب وعريس اليوم ازفنه

- الله يساعدج خاله بس هم ابنج حگه عليج

- يمه مو احق من ثار ابني

اذب الاسود وابني دمه ماطلع اذبه لون اشوفن الي كتلوه مكتولين ساعتها اذب الاسود والبس الاحمر

- منو كتله

- هالمايخافون الله خطفو ورادو عليه فديه

بعت البيت والذهبات وكلت ارد وليدي

تالي متالي يايمه يجيبوليا مذبوح

وصارت تضرب بثنين اديها على رجليها

عرسه جان بعدله اسبوعين دانجهز ومكيف فرحان خطبتله البنيه الي هواها گلبه

تاليها راح مثل شمعة ورد

- الله يرحمه

- البنيه كعدت وراه ماتزوجت والناس مترحم ياهو الي يجي يكلولها خطبها فلان منحوسه كرطته

والله اعلم شصار بينهم بالخطوبه وكلها عرفت على حب

اهلها طلع عليهم حجي بناتهم يصادقن ويدورن ولد

صارت جوه الايدين هذ يكتلها وهذاك صار رجال عليها كتله لابني تاخذ طيرت اخوك وتستر عليها

- وقبل

- لا كالي يمه ماكدر تدنه نفسي عليها هاي نفس اخوي بيها ماكدر

- كتله ياتخذها يااتبره منك وحتى بدفنتي ماريدك تحضر

-مقبل يايمه بقيت شهور اتوسل بي يتزوجها ماقبل لحد ماجانه خبر البنيه حاركه نفسها

- يبووو

- لحكته لابني هو نذبح وهي حتركت

انه هسه لمنو اذب الصوج

صوج ابني الي راح يسترزق ويجمع جم فلس بس حتى يتزوج

لو طيرته الي اهلها موتوها كتل لحد ماخلصت نفسها بالموت

لو ابني الي يكول حرمت اخوي هاي

انه باقيه بنار روحي لايبه يايمه والله من ضيك خلكي هجيت واجيت لهنا وي هاي مرت ابني

- هاي مرته الي ردتي تزوجي هذيج البنيه

- اي اختار هاي والله لو ماخذ هذيج ياحلاتها جنها بدر

العين كحليه وسيعه سود

الوجه جنه بدر كامل

الرصعات الحلك عبالك كرز

مربربه تخبل اشو راح اختارلي هاي اشوف نظراتها اتعوذ بالله منها

- خاله احسج يائسه من هالدنيه

- يأست من كلشي

اهلي ناس جتلهم صدام ولدي هسه يجتلوهم ولد الحرام لارتحنه هناك ولاهنا

كالو يروح صدام وترتاحون هه

جنتي بوحده صرتي بثنين ياام حامد

يقال ان لايجبرك على المر غير الامر منه

نحن الان نعيش في وضع مرير ترى

هل سابقا مر

ام الان

كلاهما مر

كلاهما تركا ألم وغصه

كلاهما نزفا لنا الدموع

نحن مجرد ضحيه

العوبة بيد السلطنه والحكم وصراع الكراسي

نحن لانحن على احد

لانمجد احد

نحن نحن للامان

نمجد للوطن

نموت لكي يعيش الحق

اتمنى ان لاتكون حلقه قد قلبت مواجع البعض لكن يجب ان نتذكر ما اوجعنا ما مررنا به

تقبلو تحياتي كنت معكم انا رغد الموالي

في امان الله

اليوم ماكو مريم....

بنات اخر اخبار الروايه تلكوها بكروبي على الفيس بوك

بأسم سيدات العراق للكاتبه رغد الموالي

            مساء الورد عليكم

ــــــــــــــــــــــــــــــــــــــــ 

مهلا ايها الليل حين تمر

مرّ على الحزين بصمت

لاتخيفه اكثر مما هو خائف

لاتثقل عليه اكثر من ثقله

مهلا ايها الليل الخائف... .

ـــــــــــــــــــــــــــــــــــــــــــــــــــــ

ربما تمشي بنا الايام دون ان نكترث كيف

دون ان تكون في الحسبان

نحن لاننتظر بشغف نهاية ذلك اليوم او بدايته

نحن صباحنا ك مسائنا

لايتغير شيء

لايتغير سوى الخوف.......

ـــــــــــــــــــــــــــــــــــــــــــــــــــــ

تمر الايام والاشهر

بيوم كعدت على صوت صياحات بالمنطقه وهوسه

جان ابو غضب قاتل الشباب الطلاب الي خطفوهم قبل شهور

طلعت اباوع وياريت ماشفت

مددين بالكاع ومربطين ايدهم جوه ظهرهم

وميتين والدم بالكاع وعلى قمصانهم البيض الي شبعت وسخ وصار لونها اسمر

هذه المشاهد تحديد صرت احسها تنطيني مثل جرعات قسوه من كثر مشاهدي الها احس شي دايموت تحجرت الدمعه بعيوني خنكه هيج احس شي يخنكني برگبتي دمعه وكفت ومداكدر ابجيها

او صوت ومداكدر اصيحه

تخايلت اني بمكانهم

ياترى هم راح اكون مثلهم

هذا شكد قاسي ابو غضب

زين هم شسوو حتى هيج

انتبهت للكلام والصياحات جان ابو غضب يصيح واحد ماعرفه جاي وشعره طويل نوعا ما واصل لكتافه

- ولللللللك انه هسه شكلااااااا كلييييي

- ابو غضب:- كله للحجي يرجعني ويا للشغل والا ابقه هيج شوكت ميحلالي اقتل

- شنو بكيفك تايهاااااااااا

- وصل كلامي للحجي ولتلغي اااااااانتت

تره حتى الضميمه اطلعها كله

( يأشر وبيده مسدس على اتجاه بيتنه)

- تهدد مو

- شلون متحسبوها حسبوها

- ماشي يصير خير اكل للحجي

راح وره ساعه طبت سياراات سوده من اباوع سيارات فخمه وراقيه ونظيفه كلش ونزل الحجي ولابس بدله رسميه قاط ورباط وكاشخ استغربت من منضره

بس جان ناااااار يجدح نار نزل ومباشرة تهجم على ابو غضب بصياح لزمه من زيكه بأيده الاثنين ويصيح

- ولك انت تكسر كلمتييييييييي

جبتك من الشوارع ولميتك سويتك ادمي

تسوي من راسكككككك

نتر ايده ابو غضب وحجه بنتره

- لشوكت ابقه هناااااااا

ضربني اذا جمدتني اقتلني لتخليني هنا محصور

- ولك تقتلهمممممممم

تقتلهمممممممم

ولك تحجي تعرف انت شسوييييييييييييت بهاي عملتككككككككك

- طلعني

- ضربه بوكس وهو تعبان ورجال جبير يروح وي البوكس

ولك واحدمنهم ابن شريكيييييي جبته حتى امشي صفقه تسوي هيجججججج

ولك خربتتتتتت الاول والتاااااااليييييييي

من اليوم تطلع بررررررررره

مالك مكان بيناتنااااااااااااا

- حجي وين اروح تريد احط إيدي باايدهم ترييييييد

-عساك محروك انت وياااااااهمممممم

مالي شغل بييييييك

سحب سلاحه وجها عليه

كال

تطلع لااافرغه براسككككككك

اطللللللللع

خلقتك ماشوفها

واذا رحتلهم حالك حال الجلاب يكتلوك ويذبووووك

ولك ادعيلهاااااااا

لمواقفك الزينه الي شفعتلللللللك

كتلك تطلبني تضحيه وضحييييت

واحد غيرك اطشر راسه ومايرفلي جفن

داتفهمممممممم

-رد بتعب وبهدوء

هيج صارت حجي

طالع واوعدك متشوف وجهي بعد

- اذا شفتك راح اقتلك

- جر منه السلاح الحجي وهو دار وجهه وطلع

التفت الهم الحجي  صاح بصوت

واريد اشوف بعد واحد يتصرف من راسه

واريد ينبر نبره مجرد نبره

قسما بالله لاااطشر راسه

هذا الي كدامكم الي خليته يروح ( ويأشر على مكان الباب الي طلع منها)

شفعله موقف واحد وياي سواه وكتله تطلبني روحك

واجا هاليووووووووم

وانتو

انتو اذا سويتو من راسكم اطشرااااااا افتهمتوووووو

وراح يمشي توجه للسياره صعدها وراح

كامو كل ثنين تلاثه يمشون سويه ويتبشبشون

اباوع اني مثل السجينه الي ماتشوف الا الدم والقتل ربت عليه

حتى الحياة الطبيعيه ماعرفها شلون

رحت تمشيت بخطوات بطيئه مليانه خيبه وقهر اصطدمت بدريه داتمشي تعبانه وتنهت

- محتاجه شي اشوفج تعبانه

-يمه حباية الخفقان جيبيها مناك وتأشر على الميز

رحت جبتها.واجيت كعدت يمها وهي تشرب بالمي

كملت التفت عليه

بعدج كاعده شعندج

- يمه هو انتي شلون هيج صرتي وياهم

- هيج لكيت نفسي وياهم

- يعني خطفوج

- لا

- لعد

- سالفتي سالفه شلج بدوخة الراس روحي نامي

- ماجايني نوم احجيلي

- انه قبل جنت عايشه حالي حال اي انسان بيت واهل وام واب جنت الصغيره بين خواتي خواتي الكبار متزوجات محافضات مو يمنه يعني

وانه بقيت وي امي وابويه وره سنه من زواج اخر وحده من خواتي توفه ابويه بقيت انه وامي جان بيتنه ايجار وماعدنه فلوس ناكل مو عاد ندفع ايجار

المهم رحنه لبيت خوالي فتره وماتحملوونه وصارت مشاكل وحارت امي بيه جنت بنيه توني صايره بعمر ال16 سنه بقينه من بيت لبيت لحد ماامي تزوجت وكعدنه بيت رجلها جان رجلها عنده ولد ثنين شباب واحد يدرس بالجامعه مامتواجد بالبيت بس بالعطل واحد لا جان طالب سادس اتذكر هيج شي هذا حط عينه عليه يتحارش بيه مره وثنين سكتت

هددته اذا تعيدها اكل لبوك يكلي ابويه مايصدكج

صدك وسويتها ورحت كتله

ابو فار عليه

وانتي جذابه

وانتي تتبلين على ابني

داهيه

وامي دافعتلي بس بيني وبينها كالت شلج بهل السالفه ليش مكتيلي

- يمه انتي متكدرين تسوين شي ابوه يكدرله

- سكتي اشششششش لتحجين شي ابد وسن ابد

- وسن منو

- انه اسمي وسن مو بدريه

-لعد ليش اس

- تكلمت قبل لااكمل كلامي

جايتج بالحجي

المهم امي كالتلي سكتي اول وتالي ياخذج لواحد من ولده احنه ماصدكنه نخلص من البهذله تردينه نرجعلها يمه سكتي

هه امي فضلت تعيش على حساب شرف بنتها!

المهم سكتت وخفت وهو زاد عليه نوب لو باقيه ساكته احسن

لحد مااجه هذاك اليوم المشؤوم جنت دااشتغل وحدي بالبيت وامي ورجلها طالعين اجه هو حاول يعتدي عليه

قاومت بالبدايه وصرخت خله ايده على حلكي وسحبني للغرفه مالته وقفل الباب واعتدى عليه

من صار الي صار

احس روحي نسلبت مني مو شرفي

مثل سجينه وغرزها بنص گلبي

سحكني وسحك برائتي وشرفي وروحي وعفويتي دمرني هنا بقيت مدده بالكاع مصدومه عيوني فاتحتها للسكف بس اباوع ودموعي تنزل وحدها لحد ماحسيت دايذب عليه مي حتى اصحى رغم فاتحه عيوني بس فصلت احس بالشي بس فاصله ماعرف شنو من احساس مؤلم وبشع حسيته

هنا باوعت لروحي ولجسدي الي صار قطعه مرميه بعد ماتناول منه كلب لاهث مسعور

كمت وصرخت وصدرت مني ردة فعل لااراديه اخذت مزهريه يمي وضربتها براسه واني جنت بهذيج الحاله المزريه هو تكوم بالكاع ماعرف مات عاش ماعرفت بس خفت كلش خفت بوكتها

مجان كدامي غير اني انهزم واتخلص من هالبلوه

لبست وطلعت قبل مايجون والشرده شرده

بقيت من فرع لفرع افتر وصار عليه اعتداء للمره الثانيه من شباب ثنين مخمورين هنا حسيت روحي من صدك ضعت وصرت مجرد قمامه متسوه شي

بقيت بهل الحال اسبوع وراها خالطت المكادي  بالشارع وبااخر الليل اخذونه ورحت وياهم جان الحجي بعده شاب وعنتر زمانه بس مو هو متزعم علينه جان واحد اكبر منه يسمو الريس هو اسمه الواوي وهو جوه ايده من الاول شغلهم مخدرات وتجارة اعضاء وبوك

اول مافتت كالو هاي جبيره شغلوها بالنوادي وشتغلت بس مادبرتها

مهم بقيت فتره اشتغل وياهم الواوي نقتل وبوكتها حتركت الدنيا حرك الحجي جانو يلقبو الذيب سبع جان كلش ومحد يلوحه وكلها تخاف منه من جابو الواوي مقتول غركان بدمه فقد الحجي وصار يصيح ويضرب الي جانو ويا

- ولللللككككككم ماواحد بيكم رجاااااااال وكدر يحميييييييي شلون مااااااات شلووووووووون

-( رد عليه واحد وهم بصياح) وانت جاي تصيح عليناااااا هو وزعنه وكال انه وسلمان هنا وانتو هناك وهناك

- وين سلمااان وييييين

- شرررررد شرد سلمااااان مانعرف بيييييييي

- منو قتله معرفتو

-منو يعني مكافحه يمكن شفناهم جون بمكان الحادث واحنه نهزمنه

- ولككككككك ولك شنووووو يمكن ولك بس لا صكبان وجماعته

- مادري مادرررريييييييييي

- صار يلوب ميعرف شيسوي اخر شي صرررخ وضرب طلق بالجوووووو بقه يرمي لحد ماخلص الشاجور

بعدها اخذو الريس الواوي يعني ودفنو ومرت ايام هدوء سنطه ماكو شي لحد ما بليله اجه الذيب جايب طفل صغير عرفت حفيد صكبان

هناااااا الحجي  هدأ خله رجل على رجل ورفع تليفون وخابر

- ابنكم ميرجعلكم اذا متدزولنه جتال الواوي

( وصرخ بقرف) ياباااااا لدوخنيييييي هي حجايه ورد غطاها ابنكم مقابل جتال الواوي

وسده ومىرت ايام وهو احسه ينتظر يلوب مجتف ايده وره رايح جاي ومتنرفز والطفل بينهم ويخاف ويبجي هذا يضربه هذاك يصيح بي

هم بلا رحمه البشر عدهم حاله حال اي شي مو مهم

المهم مرت الايام اجاه واحد من طرف صكبان وكاله اليوم نسلمكم جتال الواوي

- اسمع اذا لعبه منكم الولد بالرجلين اعتبره نداس

- مو كتلك اليوم نجيبلك جتاله

- كله الولد يبقه لما نشوف جتال الواوي

- وشيضمن يرجع

- يرجع انتو اوفو بوعدكم وانا اوفي بوعدي

- ماشي ذيب ماشي

بقه ينتظر ماشاف الا سيارات هواي اجت وزلم تحشدت جان حاسب حساب الحجي يهجمون قبل لايصير رمي لان قبل جانو يخافون بزمن صدام من جوه لجوه شغلهم واذا يصير رمي بالحالتين انتهو الطرف اليغلب هم حينداس بالرجلين ويروح سجون وتاليته اعدام

المهم صكبان من شاف متحضرين كالهم لاتهجمون وتفاوض وي الحجي وسلمه الي قتل الواوي ورجعو الولد

قبل لايضربه الحجي وياخذ بثار الواوي عرف انه صكبان مدبر قتله وهذا نفذ بس هو باعه وغدر بي مع ذلك الحجي ماوكل ولاشرب ويا الحجي قتله وبعد فتره قتل صكبان وهنا صارت كلها تهابه لان ميرفله جفن من يقتل والي براسه يسوي

بعد سقوط النظام صارت سرقه وناس باكت الدوله هم بوقتها باكو هواي سلاح هواااااي

والحجي بده يصعد ويختفي هم هواي وبوقتها خله ابو غضب ينوب عنه جانت علاقتهم قويه مو مثل هسه تخاربو

- يعني وين راح برأيج

- واحد من الاثنين

- الي هو؟

- اما صار وي القبرص لو لزم مطلوب هو

- ليش

- بالسيطره لاكين سلاح بسيارته هو اول ماشافهم حيلزمو حرك السياره وضرب السيطره ونهزم تسجل ارهابي وصار من ضمن المطلوبين

( نحن مشتتون بين ارواحنا واحلامنا وضروفنا

نحن ليس بنحن نحن ابناء الظروف ابناء قساوة الحياة)

سديم:.......

تعب النهار يمحي الليل لكن شلون لو داهمك التفكير وجعلك راسك

اتسائل بيني وبين نفسي ليش وراي وراي شيريد هذا مني اني لازم اصده لازم ماانطي مجال ابد

اختفى فتره وارتاحيت ومشت حياتي اعتياديه نوعا ما

الايام تمشي بصوره تقليديه بيت خالي الولد صارو يعتمدون على نفسهم يشتغلون وبنفس الوقت يخافون من خالو حمزه لهسبب اخذوها كباله يشتغلون وميكولون لا

ست سميره حولت صالونها وسوته احلى من الي قبله وسوت زي بالصالون عباره عن تيشيرت ربع ردن وردي وبنطرون جينز وبالشته بلوزه ورديه وميكياج خفيف وتسريح شعر وترتيب

صرت مثلهم البس واخلي مكياج وبصراحه تأقلمت وحسيت انو هذه هي هيج الحياة لازم تنعاش بحريه بدون هذا لا وهذاك عيب وهذا ميصير وهذا كذا

مشت الايام صارت تطورات اكثر صرت على طول اسمع اغاني كلما تفتح الباب مرت خالي تلكاني فاتحه اغنيه ومندمجه وياها والعلج ميوكع من حلكي لحد ما كعدت وحجت وياي

- سديم

- بلي عمه

- سديم وضعج هالايام مربك خيرج

- شلون يعني

-يعني لبس

مكياج

اغاني

شنو فلمج

( جاوبتها بتلكأ) م م مابيه شي ليش شبيه

- جانت لابسه ايزارها والسبحه بيدها بعد ماصدقت من القران التفت وكالت

كعدي يمي هنا وخليني اكلج هالكلمتين خليهم ترجيه بأذنج زين

- شوفي بنتي اني ربيتج مو بعتبارج بنت حماتي لااااا ربيتج بااعتبار امانه

تعرفين شنو يعني امانه

يعني خفت عليج اكثر من بنتي

لان عافتكم امج لنتي واختج امانه يمنه واني بالبدايه ضروفي صعبه جانت والله عالم بالحال وضاعت اختج من بين ايدينه ابويه شفته بالنوم زعلان مني وجها ثكيل كلش ثكيل عرفت واجاني حدس بسببكم وراها ضميتج وكلت هاهيه شلون متمشي الدنيا بينه خل تمشي هالبنيه ماعوفها

جنت صغيره ابونا ربانا على الحلال والحرام ومخافة رب العالمين بكلشي

كالي جمله لحد الان ترن بأذاني

كالي شوفي بنتي

الانسان من يكبر امه وابوه ميبقون يكلوله هذا غلط وهذاك صح

الانسان هو يربي نفسه هو يعلمها الصح والغلط

اني مااااكدر اراقب كل تصرفات ولدي اوبناتي او علاقاتهم بااصدقاىهم او او او اني رجال كبرت وشيبت ديربالج على شيبات ابوج بنيتي حتى وانه بكبري خليني نايم مرتاح لاتخلين الناس تسبني وانه ميت

- قشعر جسمي واني اسمع هالجمله باوعتلها من دون كلام

وكملت

وتعرفين ليش اهلنا ميبقون يعلمونه من نكبر

- ليش

- لان كبرنا وعرفنا الصح والغلط صار لازم نختار

الانسان لما يكبر يابنتي هو مسؤول عن نفسه

مثل ابونا ادم

ادم نطرد من الجنه لان اكل من شجره الله سبحانه وتعالى منعه عنها تعرفين ليش منعها؟

ليش

- لان هذه الشجره الي ياكل منها راح يعرف الخير والشر

- مفهمت؟

- الله سبحانه وتعالى لما خلق ادم

كان نضيف مايعرف الشر الي هو ( الحقد- الغيره- الحسد- القتل- الكذب........ الخ)

هذه كلها ماكان يعرفها لهسبب الله سبحانه وتعالى منعه عنها

لكن ابليس كان يعرف والدليل كذب وحلف بالله كذب

ادم صدكه لان مايعرف الشر فااكل لما اكل عرف الخير والشر وحل عليهم غضب رب العالمين

فبدت تتساقط منهم الحلي والملابس الي كانو لابسيها بالجنه لدرجة انه كامو يسترون عوراتهم بااوراق الجنه

الروايه دكول انه ادم سمع صوت اقدام الرب

ـــــــــــــــــــــــــــــــــــــــــــــــــــــ

ملاحضه: ( تقول التوراة  منقول من كتاب مهزلة العقل البشري للدكتور علي الوردي في الجزء الاول ولست مسؤوله عن مصداقية الروايه حول ادم وحواء لكن الاقرب ولكي تتزودو معلومات اكثر)

ـــــــــــــــــــــــــــــــــــــــــــــــــــــ

تقول التوراة:  إن الرب بعد ان رأى آدم يأكل من الشجره المحرمه:  « هو ذا الانسان قد صار كواحد منا عارفا للخير والشر» 

وتصف التوراة إن آدم وحواء عندما اكلا الشجره المحرمه انفتحت أعينهما وشعرو بالخجل من العري الذي كانا فيه فخيطو لانفسهم مآزر ( يعني لباس لستر الجسد)  من أوراق التين 

ثم سمع آدم وقع اقدام الرب إذ كان ماشيا في الجنه فخجل منه واختفى بين الاشجار فنادى الرب

ياآدم أين أنت؟ 

فأجابه آدم  لقد سمعت صوتك في الجنه فخجلت من عريي فأختبأت

فقال له الرب:  من ذا الذي أعلمك بأنك عريان؟ 

هل أكلت من الشجره التي أوصيتك أن لاتأكل منها؟

تضيف التوراة الى ذلك قاىله:

« قال لآدم لأنك سمعت لقول إمرأتك وأكلت من الشجره التي أوصيتك أن لاتأكل منها

ملعونة الارض بسببك.

بالتعب تأكل منها كل أيام حياتك

وشوكا وحسكاً تنبت لك وتأكل عشب الحقل بحرق وجهك تأكل خبزا حتى تعود الى الارض التي أخذت منها لأنك من تراب والى التراب تعود» 

شفتي بلحضه بغلطه متحملت ثواني قلبت مصير آدم رأسا على عقب

- افهم من كلامج؟ 

- يابنتي الله خلق النه الخير والشر الصح والغلط شياطين وملائكه الي علينا نميز الصح من الغلط ونختار

كلنا نحب نعيش ونحب الرفاهيه وانتي ك وحده بعمرج اكيد راح تحب تحس بنفسها بأنوثتها

عيشيها مابيها شي من حقج لكن اياج تخليها على حساب دينج ومبادئج اياج ياسديم

- لتخافين عليه عمه اني مستحيل اروح زايد

- الصداقه

اصدقاء السوء كفيلين بتدمير امثالج

- تقصدين المدرسه لو ست سميره؟

- شتشوفين

- ست سميره____صح؟ 

- مو من عمرج اساسا شغلج هذا كله معاجبني ماقابله عليه

- ليش

- نظره مو حلوه على الي تشتغل بصالون ولني مااريد احد يجيبج بحجايه هاي ان كان ماحجو

- من جعنه الناس نطتنه؟

- وان كان

- شوفي عمه اني رايحه بدربي جايه بدربي مالي علاقه حتى اذا اشوف اغلس علاقتي بست سميره وهاهيه حتى ابن عمتها كم مره حاول وياي منطيته مجال

- ابن عمتها  ؟.

شراد منج

- ( اعرف زل لساني هنا تلكأت وكلت)  م م حاول م مراد شي يعني بس مارتاحيتله

- لا سديم انتي  كلتي حاول وياي شحاول؟

- ( ضحكت بكذب وحكيت طرف جبيني بتوتر وكلت) يعني كالي انتي متزوجه مخطوبه دادورلي على مره وصديته

- يجوز يريد يتزوجج اذا خوش ولد وابن اوادم ليش لا

- عمه ماارتاحله

- كلهم هيج الزلم تلكي يوميه وي ومره بس من يتزوج يعقل ويصير التفاته على بيته ومرته

- ماعرف مهم كتلج رأي

- واني هم انطيج رأيي

- الله كريم اروح انام اني

⭕ بعد مرور سنتين

مثل كل يوم ابدي يومي بالشغل والحياة تمشي يوم بعد يوم وماتسرق الا اعمارنا وايامنه اليوم الي راح نعيشه

سواء عشته بفرح او حزن انت عشته بعد ونحسب يوم عليك ونقص من عمرك

مرات اصفن وي روحي اني مصيري تاليتها وين

اكضي عمري اشتغل بالصالون لو حكمل دراستي واتعين واتوضف لو اتزوج واعيش مدلله بجال زوجي

اختي هم حيجي يوم والكاها

هم يجي يوم وارتاح من صدك

لو مكتوب بالقدر بني ادم ماله راحه دائمه او حقيقيه

طفيت شمعتي ال١٨  وتخرجت من السادس بمعدل 89 علمي وهنا احس الحياة وكفت بيه يااختار الشغل يا الجامعه

نقبلت هندسه بالجامعه التكونولوجيا

ولازم اقسام داخليه يله اكدر اداوم اذا اروح ماعندي مصرف حتى اصرف واذا اترك الجامعه معناها هدمت  كل احلامي

مو مثل اي بنيه تخرجت وبدت امها تخيطلها وتشتريلها الملابس ولا ابوها الي راح يحجزلها بالاقسام ويقدملها حتى تدرس

عمتي ماتعرف شنو اقسام ولاشنو احتاج ولاشي فقيره من اهل الله عبالها مثل المدرسه يوزعون قرطاسيه وزينه موحد

حاولت انه اوفق بين الشغل والجامعه اروح وارجع كل يوم بس شلون نص النهار حكضي مواصلات ونص دوام شبقه شلون شنو راح اسوي

صرت استفسر عن موضوع الجامعه والاقسام وصديقاتي الي حيروحون

- اني اختي جانت داوم ونزلت اقسام دكول ذكرياتها حلوه والجامعه حلوه

سديم - زين اكلج مصرف هم جانت تاخذ؟

-طبعا لعد شلون

- شكد

- والله حسب مرات ابويه ينطيها جان 200 مرات اكثر وطبعا كل اسبوعين او عشرة ايام

-يعني مو بالشهر

- لا شسالفه ميكفن

مروه - اذا تلزم ايدها تكفي اختي هم جانت تروح 250 بالشهر كافيه امي تسويلها اكل وتفرّزه هناك هاي بالمجمده وتحمي وتاكل وتبقه مصاريف منا ومنا تكضي على كلامج جان محد درس

- اختي هم جانت تاخذ

- اي مال شكد يومين تلاثه

- انتو سألتو وجاوبتكم بعد شسويلكم

- سديم ششتريتي ملابس

- ( بتلكأ) بعد ههههه

- يمعوده شبقه ولتكلين مقدمتي

- هو هيج

- ليش ولج

- ضروف ومكدرت

- بقيت افكر شلون افرز اي شكو بيها

والم من فلوس الصالون وامشيها

رتبت وضعي هيج

وصىرت اذب نفسي على الشغل اشتغل واجمع ست سميره هم ساعدتني

- سديم قدمتي جامعه

- لا ست بعد

- ليش

- ( جاوبتها بخجل من دون مااباوعلها جنت دااسشور شعر زبونه)  ضروف وداحاول ارتب وضعي واقدم

- شنو عندج ضروف شنو محتاجه

- سلامتج ست

باوعتلي وسكتت واني سويت روحي منتبهت وره مخلصنه شغل وصار وكت نطلع استوقفتني

- سديم قدمي وداومي واني اساعدج

- بس

- سديم

اختج الجبيره اني اعرف طلعتلج هندسه واعرف اقسام داخليه حتىروحين 

روحي واني اساعدج

- ست اني مااقبل مساعده ولا راح اروح اقسام راح اسجل بخط واروح وجي يوميه

- طريق ومواصلات تتبهذلين

- مو كلها لازم نريدها ليريد شي يعوف شي

- براحتج بعد

زين هاج هاي فلوس اشتري ملابس

- مال شنو هاي

- اعتبريها مقدمه شغلج وشويه شويه اني اسدها من شغلج اخذيها سديم ولاتفشليني وترجعين ايدي

- ماشي ست

- يله امشي نروح

- مشينه واخذنه تكسي وصلنه للبيت وهي راحت

رجعت للبيت فرحانه واحس أمل تولد بداخلي من جديدصار عندي دافع معنوي اروح خليت الفلوس كبالي جانت 200 الف باوعتلها وجريت نفس بملئ الرئتين بفرحه هالمره وكلت بكلبي

- الله يوفقج ياست سميره وينور دربج ويرزقج

ثاني يوم اخذت الفلوس ورحت للسوك اشتري ملابس اخذت واشتريت كم قطعه ملابس على جنط على احذيه مكياج ولوازم بنت بجامعه

جنت مجمعه هم فلوس كلت هاي حتى اروح واقدم

بس منو حيروح وياي مرت خالي كلشي متعرف واني هم خل اكلها لست سميره

- ست اريد اقدم تروحين وياي للجامعه

- اي بعيوني شوكت تردين

- اني كلشي مااعرف

- هنيالي

اسمعي نروح الاحد حضري نفسج ومستمسكاتج كلشي يخص التقديم

-تمام

بعد جمعه منتظره انتهائها وسبت كذلك يوم الاحد الصبح كلي نشاط وحماس مامصدكه واخيرااااااا

اتصلت

- صباح الخير سديم احنه بالباب

- تمام ست جايه

- طلعت بسرعه فتحت الباب وانصدم ست سميره بالسياره ويمها ادم هو راح يودينه بسيارته

-( كلتها بشمئزاز) ست شنو ادم يوصلنه

ثم تظن انك امتلكت روحك فتخيب كل الظنون.

بقلمي رغد الموالي في امان الله

اخر اخبار الابطال والروايات في مجموعتنا على الفيسبوك

ضعنا وضاعت احلامنا في كل مرة كانت الحياة تصفعنا ونحن مقيدي الايدي

ــــــــــــــــــــــــــــــــــــــــ

مريم.....

سنتين مرت والحال نفسه بدريه تعبت صحتها هواي وب اخر فتره صارت تكح دم ومحد يعرف علتها شنو

ومتكدر تروح تداوي لان مطلوبه

المسؤوليه صارت كلها براسي المصيبه اطفال صغار يجيبوهم منييييييين مااعرف

وبدريه دكلي

يمه هذولي اولاد البنات الي يشتغلن بتوالي الليل وين يودون حملهن لعد

بس مرات يجيبون اطفال كبار يفتهمون وحتى مره جابو بنيه بالصدريه والقميص وخطيه كضتها بس تبجي

- يعمري انتي لاتبجين مراح يسوولج شي هاج هذه البسكوته اكليها

- هي تبجي وتريد امها جانت صف اول ابتداىي ونقهرت عليها هواي ماعرف شسوي شنو بإيدي ماعرف الحجي يجي بين فتره وفتره يجيك الوضع ويروح بس هالبنيه خبصتنه خبص ماتكف عن البجي وبس تصرخ تريد امها مرات يجي سعدي ويريد يضربها واصد عنها واهدده بالحجي لحد ماتعارك وياي

- بسسسسج انتي هي ابره اضربها وتنام نخلص من العوي صدعته لراسنه

- والله اذا تقربت منها لااكله للحجي

- وليش تكليله اني اكله

طلع موبايله واتصل على الحجي

- بلي حجي

مداتسكت هالبنيه الي جبناها من كم يوم والخانم مريم متقبل نسكتها

- هاي احجي وياها

نطاني الموبايل حجيت بتلكأ

- بلي حجي

- مريم ليش متقبلين يسكتوها انه جم مره محذرج غير شغلج لتدخلين

- حجي صغيره و

(قاطعني)  - ماعليها شييييييي لتدخلين انتي

- بس

- ( قاطعني)  انتي شكد صار عمرج

- ليش حجي

- صايره واعيه جر نفس

يله هانت

- شنو مفتهمت

- انطي الموبايل لسعدي

نطيته الموبايل

جان فاتح حاكيه سمعته كال

اطلع بره خل احاجيك

طلع واني وكفت اتسنط شحيحجي

- حجي بدريه تعبت وهسه مريم الكل بالكل

- منكدر الولد هسه محد يقبل انت جيب وحده بمكانها

- ماشي

ماشي حجي تأمر

شويه ورجع علينه سويت روحي عادي باوعلي بطرف عينه كالي

- الحجي يكول حضري نفسج هاليومين يطلعج بمهمه

- ارتبكت وخفت بس حاولت اتضاهر عكس هالشي

مهمة شنو

- من تطلعين تعرفين

وهسه وخري عن طريقي خل اسكت هاااااي

- عوفها كتلك

- تره اذا حتضل تبجي يكتلوها بزعو الولد

-باوعتلها

شفتي

سكتي ولج

سكتيييييي ليموتوج

- ماماااا اريد مامااا

- سكتي ولج هم بس ياخذون فلوس من ماما يرجعوج لتبجين العبي هسه وي صديقاتج مو صارو عندج صديقات

- بقت تبجي وكوه سكتتها

بقيت افكر شنو المهمه شيريد مني

حانت ساعتي شنو ضاملي القدر ياترى

مرت هاليومين على اعصابي حتى الي يحاجيني اعيط بي متوتره كلش متوتره

هناااااك اجه الحجي المغرب ولمن نزل الولد وكفتله ويستقبلو

صاح

سعدييييي

- تاامر حجي

- بلغتها

- حجي عرفت حتطلع بمهمه بس ماتعرف تفاصيل

- وينها

- جوه حجي جوه

- شفته اتجه للبيت يجي

فات وصاح عليه

مريم

- اجيت اركض خايفه وعيني بالكاع تفضل حجي

تعالي وراي

- اجيت

اشرلي اكعد كعدت كباله بغرفه وحدنه وبلش يحجي

- اسمعيني

انتي مايعجبج تطلعين منا وتعيشين عيشه حلوه ترتاحين بيها

- بلي اكيد

- حلو

زين واذا تشغلين دماغج راح توصلين

- شلون يعني

- اكو واحد ثكيل بالدوله اريدج توكعي وتصوري فيديو

- ليش

- بلا ليش سوي الي اكلج عليه

- حجي اني مااكدر

- ( كام وكف على حيله وخوزر)  شلون يعني متكدرين ( صاح)  هاااااااااااا

اااااااننننننه مخليججججج هنااااااااا على سواااااااد عيووووووونج

مخليج داحافظ عليجججججج

سمعيييييي

تسوين غصبا ماعليج بعد باجر الفيديو يمي اريده

يعني شلون شسوي بالفيديو

- هه

سوي مثل مال النسوان تسوي للزلمها

(فر بأيده واستهزأ وطلع)

_كعدت ولطمت على خدي ودموعي سالت

عزه لعزاج مريم

صخام بوجهي

عزه

شلون

حيخليني بلعبتهم

هذا الي جنت خايفه منه

شلون

شسوي

وين اروح

لمنو اشكي

بدريه اي بدريه اكلها بلكت تكله للحجي

- رحت اركض وكعدت بدريه من النوم جانت نايمه

بدريه

يمه بدريه كعدي

- فتحت عينها متفززه

شكو يمه شصاير

دنكت على ايدها ابوسها واتوسل وابجي

بدريه الله يخليج

كليله للحجي

كليله مريم متكدر

مااكدر اسوي الي دايكلي عليه اروحلج فدوه

- شنو شصاير على شنو

-- الحجي يريدني امشي بدروب العوجه   واجيبله فيديوهات

- ( بخيبه)  جنت متوقعه

- وشلون شسوي

- مريم سوي الي يكلولج عليه

- لا يمه اروحلج فدوه اني مااكدر مستحيل

- لج يمه اذا متسوين الي كلج عليه يذبحج مايرحمج

- اموت

اي خل يموتني بس مااكدر

اني جنت اشوفهم شيسوون بالبنات الي يجيبوهم ماكدر اصير مثلهن

- راح يسوي بيج الاكثر اذا ماتقبلين

- يعني ماتكليله

- مااكدر راح يعتبرني انه حرضتج وراح يكتلني ويكتلج ولج ستري علينه وسوي الي يكلج عليه

- ماكدر

ماكدر

- انتي عليمن محافضه على نفسج وخايفه على روحج هيج تاليتج حالج حال الباقيات

- بس مو هيج

مو يشغلني

لايدخلني بشغلهم

كليله

كليله تروح تشتغل وي البنات بس ليدخلني بهل الشغله

- شوفي مريم منج اله انه مالي علاقه الحجي كلشي ولا شغله

- لطمت على وجهي وبجيت وين اروح شلون

كلت انهزم اتناهم ينامون وانهزم مالي غير حل

بقيت اتاني للفجر يله نامو مباشرة طلعت امشي على كيفي واتلفت وكلبي احسه طبل طبل يدك

مشيت لحد ماطلعت من المنطقه محد انتبه

صرت ازيد بخطواتي وارجع التفت مااشوف الا اصطدمت بواحد من الولد طلع حمزه

تلكأت ومعرفت شجاوب

حمزه واحد من المنطقه واخبث واحد بيهم حضي الاغبر بيومها عثرني بي لزمني من ياختي وحجه بنتره ومن بين اسنانه

شعدج طالعه بنصاص الليالي

دتنهزميييييييين موووووووووو

امشيييييييي

- دفعني ومشيت وهو ورايه وصلت للمنطقه فتح باب من البيوت الي متروكه وفوتني بيها وقفل الباب جانت ضلمه كلشي ماينشاف معرفت تفاصيل البيت بقيت كاعده ومكوره نفسي خايفه اني اساسا خايفه من البيوت من الاول هنوبه فوتني بيها

صبح الصبح كسر الضوه شويه على البيت

جان بيت صغير مو اكثر من 60 متر

بي غرفه صغيره ومطبخ وصحيات وطلعه بين الغرفه والمطبخ تودي للباب الخارجي البيت كله مبني حياطينه عاليه متصله بالسكف حتى الباب فوكاها حايط من ذاك البناء القديم لكن بنص الطلعه اكو فتحه من السطح تجيب ضوه وهوه لكن باوعتها بيها كتيبة شباك بحيث محد يكدر يخترق هاي الفتحه

فتت للغرفه وياريتني مافتت

جانت اكو ملابس عليها دم

دشداشه نساىيه بيها دم وقميص رجالي هم عليه دم وزناجيل مربوطه بالحايط واثار اصابع بالدم على الحايط

خبز معفن وماعون عليه اكل يابس ومعفن

خفت كلش خفت عرفت هذا البيت مخصص للمخطوفين يكتلوهم هنا ويعذبوهم هنا

مشيت للمطبخ وسخ كلش وسخ فارغ مابي شي بس قواطي شرب وبطاله شرب مشمره وصونده جايه من حنفيه وميز ومخلين عليه كلاصات ومواعين

اباوع للبيت وسخ على تراب ودهن وشي مقزز يمكن بحياتهم مامنظفي

داامشي دست على شي طلع صوت خفيف باوعت فاره كمزت وصرخت ورحت للباب اركض وادك واصرخ فتح الباب حمزه وراه الحجي

جانت ملامحه تجدج نار وغضب

صاح

تعالييييي

تردين تنهزمييييييين موووووو

والله لااسويج عبره اليوم

جرني من شعري وحاولت اتوسل بي

حجي بس افهمك

مجنت

مجنت دانهزم

- ااااااااش سكتييييييي كذابه

- لا حجي حمزه

حمزه هو دايتبله عليه

- فوكاهاااااا

- يجر بيه من شعري ويمشي واني احجي

حمزه يحبني وكالي دام حتبيعين نفسج لهذا وهذاك انه اعلمج الا لكل للحجي تريد تنهزم واطلع حركة كلبي بيج

حمزه تبله عليه حجي

- وكف والتفت لحمزه الي عيونه نطت بره من الجذبه فاك حلكه ميعرف شيحجي

همس

حجي كذابه لاتصدكها

- واني نطيت حجيت

لا حجي هو هو كالي اريدج وراد يعتدي عليه بحجة يحبني وميتحمل اروح وي غيره ومن ماقبلت كالي الا لكله للحجي تريد تنهزم

- هدني الحجي وراح على حمزه ضربه بوكس وصاح بي

ولك تكذب عليه

وانه اكول شلون صادها وشطلعه بهذا الليل

مخشت بعقلي جذبتك بس صدكتها

نذلللل

تريد تخربط الاول والتالي

صار ينطي بوكس وره بوكس

واني احس مي ثلج نزل عليه

يستاهل

صاير شهم وخايف على مصالحه

دكلها

حتى ماتبيع مراجل عليه مره ثانيه

التفت عليه الحجي وصاح

امشي وياي يلاااااا

راح كدامي وباوعت لحمزه يريد ياكلني

همست اله

حاولت تصير رجال على مره

شوفتك كيد النسوان شنو

ديربالك تتدكر بيه بعد

تفو

وعفته ومشيت

وهو يحز بسنونه يريد ياكلني

رحت يم الحجي

حجي وين اروح

- اسمعي

راح اخذج لمكان هناك جهزي نفسج وتحضري وبالليل تسوين المهمه

- حاولت اتضاهر عادي بس بكلبي اتكطع

صعد بالسياره وصعدت يمه جان هو يسوقها وملابسه عاديه بنطرون وقميص وحتى السياره عاديه

مشينه ولمن وصلنه لشارع عام وبي ناس لبس كاسكيته ونظاره

وبقه يمشي وداني على بيت حلو مرتب نزل ونزلت وياه اول مانزلنه ماشفنه الا ابو غضب واحد ويا

من شافه الحجي تخبل

- انت شجاي تسوي هنا

-ولو انه عتبان عليك حجي مفروض تسال عليه طول هالمده

- ليش وين جنت

- بالسجن

صارلي سنتين مسجون

- يطبك مرض

وهذا منو الوياك

- صاحبي خويي هذا

- شعندك شتريد

- رجعني اشتغل وياك حجي وجبتلك واحد وياي هم ذيب صحاري

- باوعله ورد باوع لابو غضب

منو يكول

- كتلك صاحبي

خريج سجون مثلك

- اااافه

السجن للزلم حجي

- باوعله وسأله

انت ويامن جان شغلك

- انه جنت اشتغل وي الحوت

- رفع حاجبه متعجب

الحوت؟!!

وشلون طالع انت هسه

- انه ماجانت عليه قضايا هواي بين قوسين مامخلي عليه لزمه نسجنت 3 سنين واخر ست اشهر حولوني للسجن الي بي ابو غضب

- وشنو جانت مهمتك

- الايد اليمنه للحوت

- جان ابو الفهد ايده اليمنه

- وره منقتل صرت انه بمكانو

- وقبلها شنو تشتغل

- اوقت التفجير مسؤول المتفجرات وهم اعرف منين نستوردها

- حلوووو

كلش حلو

ياهلا بالسبع اسمك

اسمي الضرغام

- ياهلا بالضرغام

- ابو غضب :  ها حجي حتشغلنه

- اي بس مو هسه

- لعد شوكت

- هسه العين عليكم مفتوحه

والحكومه تراقب تشوفكم وين ترحون وين تجون ماخليكم هسه

روحو شهر شهرين وردولي

- وانت يالضرغام من اليوم واحد منا وبينا

مشكور حجي وباوعلي بعد كل هالكلام

جان رجل يطلع منتصف الثلاثينيات طويل حنطاوي  البشره عريض الاكتاف مرتب بعيون بنيات واسعه وشعر مزين خفيف  وشوارب كثيفه

رمقني بنظره من فوك لجوه بصوره سريعه

وانتبه بعدها للحجي

جان شكله مألوف شايفته بس مااتذكر وين

ابد مو غريب شكله

كلت يخلق من الشبه اربعين يمكن احد يشبها

كملو كلامهم وراحو وفتت للبيت وي الحجي

جان البيت بمنطقه شبه مقطوعه والبيت جان مرتب ونضيف جبير

كال

جهزي نفسج منا لليل امرلج

انه طالع

راح طلع

باوعت استغربت واستوحشت من المكان

تمشيت بالبيت مرتب ونضيف اثاثه عريق قديم وحلو بي غرفتين وحده بيها سرير حديد من نفرين مال قبل وكنتور صاج قديم بس مرتب شكله وميز تواليت كذلك وعليه كحل مكي من هذا الي يتخله بالموكحله ومرطب وعطر من هذا الي يكون رفيع يبيعون منه بالزيارات هالامور ماعرفتها الا متأخر بوكتها كانت اول مره اشوفها وماعرفت اسمها او شنو بس عجبتني

رحت للغرفه الثانيه جانت اكو منضده وعليها فراش مرتب وبي سرير حديد نفر واحد وميز وتلفزيون

واكو ميز وعليه جريده بالبدايه عبالي ورقه مكتوب عليها لكن بعدين عرفت

ماجنت اعرف اقره مافهمت هاي شنو وياجريده بس جانت بيها صور

مشيت بالصاله جانت اكو صوبه علاء الدين

مخليه بجيس لان جان صيف مو وكت استعمالها وتلفزيون وكرويتات ثنين وعليها جرجف ومخاديد

المبرده جانت من جهة الشباك فتحتها لان البيت حار

تمشيت رحت للمطبخ جان بي كاونتر حديد مرتب شكله ونصيف وبي مواعين وكلاصات ولستكاين ومواعينها

السنك نضيف الطباخ كذلك

استغربت

شلون بيت محد ساكن بي هيج مرتب ونضيف

بس اكيد الحجي ساكن بي اكيد والا شمعرفه ابو غضب وليش جان ينتظره هنا لو مايدري حيجي

ساعه مااشوف الا مره فاتت للبيت وياها سعدي

عيوني جانت تسأل منو هاي

ماحجيت

هو تكلم

هاي منيره اجت تساعدج علمود اليوم

بعد عافنه وراح

منيره:- دزني الحجي كالي اساعدج احفلج اخليلج مكياج

- لا مشكوره

-  لاعيني على شنو مشكوره رتبي وضعج لليل يريدج جاهزه

- هزيت براسي بمعنى اي وكعدت جابت الخيط وصارت تحفلي جان وجهي يأذيني اول مره احف وجهي كله كل مره فقط مناطق الشعر الكثيف

بقت تجهزني عبالك عروس

واني كلبي ممرود من القهر

وافكر شراح اسوي شلون

لحضتها تمنيت تنفتح الارض وادخل بيها واخلص

صارت تخليلي مكياج ولبست فستان ضيك جان كلش بي فتحات

وكفت اباوع لنفسي بالمرايه اول مره اشوف روحي مره من صدك

لبس ومكياج كبرني هواي وحسيت اني فعلا كبرت

اجت بالي اختي هم صارت هسه بعمري؟؟؟؟؟

سديم.................

اتصلت عليه ست سميره.....

- صباح الخير سديم احنه بالباب

- تمام ست جايه

- طلعت بسرعه فتحت الباب وانصدم ست سميره بالسياره ويمها ادم هو راح يودينه بسيارته

-( كلتها بشمئزاز) ست شنو ادم يوصلنه واشرت عليه بالسبابه بعدم قناعه جان كلشي بيه يتفسر هيج

ادم - حلاوة حلكج ادم احجي عدل ( التفت على ست سميره)  باعي خل تعدل لسانها من تحجي

- باوعتلي وفتحت عينها تخوزرني

سديم صعدي اي ادم يوصلنه لعد وي منو نأمن نروح احنه نسوان وحدنه

- باوعت وسكتت وهو يباوعلي بطارف عينه ضايج

صعدت 

كعدت لوره وهم ليكدام تأفف وفر راسه يستغفر الله

باوع لست سميره

هاي لخاطرج حروح والله

- باوعت ودرت وجهي هه هو منو ذاب نفسه عليك بدون صوت حجيتها

حرك السياره ومشه وكل شويه يباوعلي بجامة السياره اني اعوج حلكي وادير وجهي على جامة السياره

قريب مراح نوصل هم انتبهت دايباوعلي خوزرني وعض شفته بتحلف وفر براسه مثل الي يتحلف بيه استفزيته هواي اعرف بروحي 

نزلنه اول ماشفت الجامعه فرحت كلش فرحت لزمت ايد ست سميره مثل الي مامصدكه

وامشي واباوع جانت كلش حلوه

توجهنه للعماده حتى نقدم  وهو ويانه للامانه ماقصر بوكتها هو قام بكل الاجراءات صح اني ويا بس هو ماقصر وكأنه اخصه

بعد ماكملنه وطلعنه

- ست سميره:- مبروك سديم صرتي جامعيه عقبال ما تتخرجين ان شاء الله

- هو مخلي ايده بجيوبه واكف بعيد شويه مايباوعلنه صافن عيونه على البنات

مشينه حتى دنروح باوعتله همست شكرا

هز راسه بمعنى شنو عيدي

- شكرا تعبتك

- طلع عندج لسان مال بنات عبالي مال خاوه مو بنات لسانج

-  شنو يعني خاوه

-   متعرفين شنو

- احسن لتعرفين

امشينه يله

مشى واحنه وراه وصعدنه بالسياره جنت حيل فرحانه مامصدكه وبنفس الوقت شايله هم شلون ادرس واوفر مصاريف

اسمعهم يسولفون بس مامركزه بشنو تحديدا

لحد ما انتبهت لحد ماسمعت

انطيني رقمها

بروح ابوج سمسم

- باوعت على منو بقيت مركزه وهو باوعلي بالمرايه مباشرة نزلت عيني وسويت نفسي مامنتبهه

- سميره:- ادم اسكت لتفشلنييييي

-وعيونج ماكلها اني كرايبج بس دنطيني رقمها

- اددددددددمممممم كافيييييي

-شوفي سمسم قسما بالله اذا متنطيني رقمها اجيبه ومن دكلي منين جبت رقمي اكلها سميره دزته

- عزززه يا    ياااااا

ولك شتريد تبلينيييييييي

- لعد صيري حبابه ونطينيا

- انطي الك اوي هي مشكلتها تبقه بس مثل ماتفقنه لاااعرفك ولاتعرفني

- دجيبيييييي

سجل

............ 0770

- يسلملي الحلووو ياحلو انت والله على هذا الرقم الا لااغديج غده يلوك لهل الحلك

-( ضربته خفيفه بجمع الايد على كتفه) كبر الك ولألفاظك

- اوي عيني ام الالفاظ خليت الثقافه الج وللكاعدين اهل الهندسه هع

- باوعت وسكتت محجيت شي وصلنه لمطعم وفتنه جان مطعم راقي وطلبنه غده

جان مندي على لحم وريحة الدخان تفوح منه

وياه لبن وسلطه ومقبلات وشوربه وتمن ومرك

واني جنت ميته جوع

ومستحيه كلش ذابتها على الصامت ومااكل

جان بودي اني اعزمهم هالعزيمه هاي بس منين

اني ماكلني المستحه واباوعلهم ادم. نازل شقه وضحك ويستفز بسميره وسميره ساعه تضحك ساعه  تضوج وهو منطلق

كاف ردان القميص وياكل ونوبه يريد يوكل سميره لحم ويكلها

دشوفي ولج هاي لوووز اكلي من ايدي

- ولك اددددمممم عيب منا الناس

- يمعوده شدانسوي قابل

دكلي بداعتي

وكلها لكمه وهي تضطر تاكلها حتى تخلص من فضايح ادم

بعدها بشويه انتبه ادم مدااكل

- اكلي سديم

- مااشتهي مو عاجبني

- ( ابتسم بشقاوه)  تردين اوكلج مثل سمسومه

- لا شكرا مااشتهي اكلك

- اهووووو عمي منخسرج فلوس والله اكلي

- ( اختنكت حيل من كال هيج وابتسمت بكذب)  ماريد

- والحمزه  اذا متاكلين لااغسل وجهج بهذا اللبن

- لاتجبرني ادم

- لا وعيونج برضاج كلشي برضاج بس اكلي

- باوعتلي ست سميره

اكلي سديم صدك جذب مجعتي

- سكتت وهو قدملي اللبن حتى اشرب من دون مايحجي شي بس عيونه جانت دكول اشربي

اخذته وشربت وبديت اكل وياهم

جان شعور الخجل والخنكه متنوصف

على كد فرحتي بالجامعه على كد فشلتي لان مو اني الي عزمتهم قررت انطي الي شايلته واني ادفع وشيصير خل يصير

تغدينه وكملنه واجه النادل يشيل الاكل اني مباشرة سألته

- شكد الحساب

- باوعلي ادم وخزرني

اني مهتميت

النادل:  هسه اشوف الحساب ثواني

راح وقرب وجهه ادم بغضب

- شنو الكاعد يمج متارس عينج مو عيب تصرفين هيج واني موجود

- ابتسمت:   فرحتي اليوم بالجامعه متتقدر بثمن لهسبب حبيت اعزمكم

- اصور اني العازم

- اي بس عليه

- رفع ايده بتهديد ويأشر بالسبابه)  سديم ايااااااج تعيدين هالتصرفات مره ثانيه

- ليش اكو مره ثانيه

- لو صارت يعني وهسه يجي النادل حلكج متفكي تحترمين نفسج اني ادفع

طالعه وي رجال انتي مو زعطوط

- باوعت لست سميره واشرتلي بعينها بمعنى سوي مثل مكلج

دنكت وسكتت

اجه النادل ونطاه الحساب وباوعلي بغضب وجر نفس قوي وكال

امشو يله

- مشينه وصعدنه بالسياره اول مصعد دك تليفونه طلعه شافه وسده ورد دك مره ثانيه وهم كتمه

وصار يسوق بالسياره ورجع دك مره ثالثه ورابعه اخر شي طفرت روحه رد

- الو( وباوعلي بالمرايه من يحجي كل شويه يباوع بالمرايه ويرجع يدير عينه هو ويخابر) 

- اي

تمام

من تشوفني ماردلك افتهم اني مو وحدي

رد ارتبك

اقصد يعني بشغل

بشغللللل

( يحجي بصيغة ولد رغم الصوت طالع بنيه سمعته لان وراه) 

-اي

لا اليوم ماكدر امرلك

لا لتجي

اهووووووو

لاتجي اليوم

مو اليوم خليها على باجر

ماشي

يله باي

ههههههه كافي عاد ولك داكلك يمي جماعه داشتغل

وسده

باوعتله ست سميره

من منو مستحي عيني حاجيها بصيغة بنيه

- يمعوده تسويلياها قضيه احسن اكلها داشتغل

- هه تريد تجيك للبيت؟

- اي بس زحلكتها

- ليش قررت توب مثلا

-باوع بالمرايه عليه ورد باوع لست سميره

لااااا بس اريد انسق

- شتنسق عمى عماك ان شاء لله

- شبيييييج لكفيها

دماغج ثكيل (وباوعلي بالمرايا ورفع حواجبه ثنينهن يأشر) 

كلش ثكيل مينهضم

- عبالك بديت اربط ادم

- عفيه عليج هو اريدج تربطين ههههه

- ماشي ادم ماشي كون الحجيته وياك بقى منمسح

- باوعلها معاجبه

ليروح بالج بعيد اقصد هاي الي اخذت رقمها

-هزت براسها وتفر

اخ منك ادم اااااخ

- سلامتج من الااااااه

سلامتج.( وكام يدك على الستيرن ويغني سلامتك من الاه) 

ساد صمت بعدها وكملنه الطريق بسكوت وهو يحوص مره يشغل راديو مره يضوج ست سميره مره يعلك اغاني ويصفك وياها مره يسوق سريع ويخلي ست سميره تصرخ وتضربه

حركاته تصرفاته جنونيه

تخليك تيتسم وتضحك شكد متكون ضايج

وصلنه للبيت وقبل لايروح كال

عيني مهندستنه

يوم تخرجج وزواجج ان شاء الله ونخلص منج  وبدلتج على حسابي بس تنحل عقدتج وتتزوجين

همس يوصيني

وكعيلج دكتور يحضي عوفي طلاب ولد ماما ميفيدون

ضربته ست سميره على جتفه بقوه وهو صاح اااخ وصار يمسح مكان الضربه

ضحكت على كلامه وهو دك هورن بالسياره وكال ثيمالا

ولك هي ولد ددكلها ثيمالاااااااا

ضحكت

خلي ست خلي براحته

وبعدها راحو

واني فتت جوه للبيت وجنت كلش فرحانه وكلتلها لعمتي وفرحتها وياي

اخر اليوم بالليل جنت كاعده على سريري بعد ماجاني نوم وفكرت بكلامه

ماعرف ليش نزعجت من كال يوم الي تتزوجين ان شاء الله ونخلص منج

يتشاقه لو صدك بالشقه

واني عبالي معجب هه

شينعجب بالله لامنه ولامن عالمه ولامن ثوبه كلشي بيني وبينه يختلف حتى ابسط الامور

اني وييييييين وهو ويييييين

هو سفر وفلوس وبنات يأشرلهن بأصبعه الصغير يجنه اذا مو عليه على فلوسه زين اني شنو بالنسبه الهن اكيد حلوات ويخبلن هم الي يعرفهن ولبس ومهتمات بنفسهن اني شنو

اكعد بالصالون انضف لهاي رجلها واسوي لهذيج اضافيرها واسشور واغسل شعرهن  هه قابل مايدري هذا شغلي

ف شلون يباوعلي

حتى لو بين انه معجب بيه اكيد راح ياخذ غرضه مني ويتركني ومن احجي حيكلي شكد تردين فلوس وتسكتين وتفكين عني

باوعت لروحي بالمرايه

لا سديم لا

لاتروحين بالج بعيد

لاانتي من دنيته ولاهو من دنيتج اكيد يوم حيتزوج حياخذ الي تليق بأسمه ومكانته مو اني عايشه نزل بيت خالي واشتغل حتى اعيش الضاهر رحت بخيالي هواي

ربما تستقل بنفسك فقط لانك بسيط ولانك لاتتمادى يوما في مبالغة نفسك أنت جميل ومميز بااختلافك وحتى بساطتك فكن جميلا......

بقلم:  رغد  الموالي

في امان الله ♥

ربما أتيت لتكون الوطن الامن

ــــــــــــــــــــــــــــــــــــــــــــــــــــــــــــــــــــــــــــــــــــــ

مريم:-

اجه الحجي وشافني تعجب بيه وابتسم

لج شطالعه

فتنه الجمال يابه فتنننننننه

امشي

مشيت وصعدت بالسياره

اشوف القدر شضاملي بعد هالطريق الي راح امشي وهالليله الي راح اعيشها

شضاملي القدر ياترى

اباوع الحجي متحمس ويحجي وفرحان

- اسمعي عيوني انتي

اريد تبهري تخبلي بحيث يريدج دائما وكلما تجيبيلي فيديو عنه راح جائزتج تكبر

-شصوره يعني شلون

-كاميرا حنطيج وتصوين

- واني هم اطلع؟

- محد يشوف لتخافين

- لا حجي لا ماكدر

- لا تكدرين والااااااا

- شنو

- اعذبج واخليج عبره لمن اعتبر واقتلج على البطيء

- سكتت محجيت شي خفت وكلت هسه يسويها اخذني وصلني لمنطقه راقيه كلش وبيها بيوت تخبل وكفها للسياره وطلع تليفونه وخابر

- هلا بالغالي

احنه بالباب

اي طبعا

تمام

وسده

طلع ساعه ولبسها باايدي هاي صوره وصوت كاميرا سوي بلي علمتج عليه

- ماشي

شويه واجه هذا الرجال جان رجل خمسيني كبير سلم على الحجي وصار يباوعلي بنظرات وسخه بعدها لف من يم جهتي وفتح باب السياره وكال انزلي ياحلوه

- نزلت وباوعت للحجي جان فرحان

واخذني هذا الرجال ورحت للبيت جان بيته يجنن من بناء من اثاث بكلبي كلت كل هالعز وتدور وحده بكد بناتك

خله ايده  عليه

كشت روحي وغمضتها قوي عصرت عيوني

- شبيج خايفه

-  لا

-لعد

- بعدني مااخذت على المكان

- هسه تاخذين على المكان تعالي اكعدي

كعدت بالصاله وراح جاب مشروب وكاستين وكعد صبلي وصب اله وقدمه الي

تفضلي شربي من ايدي

- لا مااشرب

- هو حعلمج تشربين شربي

- مااشرب كتلك

- انتي مبينه تعاندين وحتشلعين كلبي بس تهون

بكلبي كلت

كبر رجلك باب كبرك

اجه يمي خله ايده على جتفي وخرتها وكمت

شبيج ليش كمتي

- اني مااكدر

-  هه جايه هنا توبين

- كتلك مااكدر لاتلح ولاتجبرني

- اسمعي لج جري عدل واسمعي كلام احسن مااخذج بالقوه

- دجرب اذا مااشوفك النسوان شتجيب

- هه شجابت عاهر جابت عاهر

- اني عاهر يابن الكلب

- لا ولسانج طويل هم

وجرني من شعري وضربني حاول يعتدي عليه  دفرته برجلي وكمت جان بطل المشروب يمي كسرته وجهته عليه هو بلع ريكه ويبس بمكانه

صار يهدأني

على كيفج

على كيفج

افتح الباب

صرخت مره ثانيه افتتتتتتتتح البااااااااااب

فتحها واني نهزمت مباشرة طلعت اركض اصطدمت بسيارة الحجي وكبل داس بريك وكفها للسياره ونزل وعيونه نااااار تجدح

عرف مقبلت وافتهم كلشي من ردة فعلي

بغضب جرني صعدني بالسياره وصعد

وحركها بسرعه ومشه رجعنه للبيت الي جنت بي

نزل وجرني وفتته جوه

صار يصيح

ولج شكتلللللللللجججججججج

شكتلللللللج اااااانه شعلمتتتتتتتج

وصار يضرب بيه واني ابجي ماارد

شكتلج انه شكلتتتتتتتتتتت

صرت اتوسل بي احاول ابوس ايده

حجي ابوس ايدك اعفيني مكدرت  كشت روحي مكدرتتتتت

مكدرتي  ليش يمه

مخليج على سواد عيونج انه كل هالسنييييييين

شوفيييي

الج فرصه وحده اذا ماتسوين الي اكلج عليه تعرفين مصيرج

حجي ماكدر طلعني وي البنات اشتغل بالنوادي اقبل بس لاتخليني هيج اسوي واصور

- ليش يمه الي بالنوادي ميسون هيج كلشي يسون ويسمعن كلام

- اي مايصورون حجي ماكدر

- دفرني وراح افتر شويه فرك وجهه ويباوع بغضب دك تليفونه وعرفت ابو غضب..

- انت واتاااااااااالييييييي وياااااااك

كتلك اختفي اختفييييييي

اي الحكومه يابا هسه خلتكم جوه المطرقه بعدين هذا الي وياك شلون تجيبه للبيت غبي انت غبيييييي

- ملفه وين بيا سجن جنتو

- ماشي

- اي لازم اتأكد جان يشتغل وي الحوت لو لاااااا

- وين انتو هسه..

- اي ابقو هناك لحد ماجيك الوضع وانطيكم الاشاره الخضره متتحركون

اني ادزلكم فلوس مو مشكله

باوعلي

وضحك بااستهزاء

هه عندي خوش حمامه تردوها

ههههه لا خليها هسه بس اذا متسوي الي اكلها عليها انطيها الكم

واني ابجي اتوسل واضرب على وجهي

سد تليفونه وكف تخوصر

ها شكلتي

- حجي ماكدر اصير خدامه هنا اشتغل شغلة بدريه اسوي اي شي بس هاي الشغله لا

- اشو تسويها وغصبا ماعليج

كومي هسه كومييييي

وين وين

للمنطقه يلاااااااا

اخذني وصعدت بالسياره ويا جان شعري مهووس من كثر الضرب ابجي وامسح دموعي كل مايصرخ احاول اكتم البجي بس مداكدر تفضحني عيوني

وصلنه للمنطقه ونزلت مباشرة اركض للبيت وهو نزل يحجي وي الشباب

تلكتني بدريه

- ها ولج شنو هذا حالج شصخمتي ولج

صرخت واني ابجي

عوفينيييي

عوفيني

- كعدت ابجي وحايره شسوي شلون

وين اروح

مشكله كلما اتذكر انقرف رجال بكد جدي وفوكاها يريدني اصور شلون

كورت نفسي وكلت لازم اطلع بحل اني مستحيل اقبل يصوروني ابد لا

زين شلون

اجت يمي بدريه

شبيج يمه

- يريدني اصور

تقبليهاااااااا

- لترفضين تره يأذيج زين مطول خلك وياج

- جمدت وباوعتلها

يعني تعرفين

يعني تعرفين تاليتي هايييييي وسكتي

-مريم المره الي تطب هنا مستحيل تحافظ على نفسها هيج وله هيج راح تخسرين نفسج وشرفج وكرامتج

-  انتو شنووووو من بشرررررر

ليش مكتيليييييي

كمت اصيح وكمت من يمها رحت لغرفه ثانيه لكيت بنيه اكبر مني بشويه تطلع  تفاجأت منو هذه

جانت لابسه تراك وتمشط هم تفاجأت من شافتني

- انتي منو

- اسمي لمى اجيت اليوم الصبح

- وشتسوين هنا

- جابني الحجي

- ليش

- هههههههه الظاهر جديده على الوضع انتي وتسألين

كليلي

مختطفه لو جايه تساعديني

- بشنو اساعدج

- ضاهر خاطفيج

كعدي خل افهمج

- كعدت اسمع شحتحجي

اليوم عدهم حفل الولد واجيت

افييييييش  اشتاكيت لهوى المنطقه من زمان ماجايه

- ليش انتي جنتي هنا

- اي سنين ربيت هنا صار عمري 12 سنه سرحوني وي البنات

يابنات ليش شكبرج

- هه عمري 30 سنه

- توقعتج اصغر

اني هيج حبيبتي محافضه على نفسي وشكلي وشعري شتريديني لعد

شتشتغلين انتي

ابيع خاثر هههههههههه شوف هاي الفطيره

دكومي كومي بدلي وسبحي عبالك جنتي تشتغلين

- شنوووووو

-  دروحي روحي سبحي

- رحت سبحت وثولتها لنفسي بالزايد سويت روحي مختطفه كلت استجوب منها كلام

سبحت واجيت كعدت يمها

اي صدقه هسه تخبلين جنج كيمر

مكتيلي منين خطفوج

- بعدين اسولفلج كليلي انتي شتعرفين عن الحجي المنطقه

-  صار هواي من طلعت منها بس الضاهر على شغلهم بعده مخدرات وخطف وسلاح

- سلاح؟

- اي سلاح متفجرات احزمه ناسفه كل ذني يتاجرون بيها

-  الحجي سمعت انه يخلي بنات يحافظ عليهن لحد. مايكبرن ويطلعن لناس تخصه اكو هيج شي

جمدت وتلكأت وحجت بتأتأ ليش تسألين انتي شمدريج

- عرفت

- م م ماعرف ماعرف شي اني

- نزلت دمعتي متحملت امثل اكثر خليت ايدي على ايدها بتوسل

ابوس ايدج فهميني الحجي ليش يريد تصوير

- فتحت عينها وكالت

يااااا بس لا انتي مريم

- اي اني مريم وجان مطلعني ولان مقبلت بهذلني وهسه دايهدد ليش قافل وليش يريدني اروح والا اني

- انتي مقبلتي

- اي مااخلي يصورني

-شوفي هي كصيره لاتطوليها بعدين تتعودين

- شتعود ها شتعود واحد بكد جدي لعبت نفسي منه

-  ولج هذا ثكيل متلتل فلوس يهنيج ويعيشج عيشه تخبل

- ماريد الله يخليج

- واني شعليه عينيييييييي

روحي للحجي كليله

- مايقبل

- شوفي حنصحج نصيحه لوجه الله

- شنو

- الحجي يريد تصوير حتى يلزمها لزمه على الناس الي يريد يزحلكها او يسحب منها فلوس لهسبب يصورهم

امن اختارج لان حليوه وصغيره

- اي

- لهسبب باعج لواحد ثكيل

انتي اذا متقبلين انهزمي

- شنهزم لكفني

- لا باعي

صوري فيديو وراها نهزمي اخذي وانهزمي

- نقل مباشر اله مو تسجيل

- عززززززززه

مراح تكدرين لعد

- وشلون

- اشتغلي واسكتي هياتني كبالج شصار عليه

- ليش انتي هم هيج صار

- بأثرها فات الحجي علينه جمدنه ثنينه كال وهو يأشر

عقليها لهاي احجي وياها وعقليهااااا

خل تحط عقلها براسها وتفكر صح

- ماشي حجي خليها عليه

- باوعلي وطلع

والتفتت عليه لمى تحجي

ولج داحجي وياج ولج سمعي كلام

شسمععععع تصويييييرررر

واني

اني اخاف

- ليش تخافين

- جنت صغيره وشفتهم ومره تحارش بيه عنتر ومن يومها واني اخاف الله يخليج احجي ويا

- عيني مريم ميفيد وعيونج يكتلج ويخليج عبره للكل وميعوفج كتلج سوي الي دايريده وراها بوكي للرجال وانهزمي حتى لو يبقه عنده فيديو لتهتمين اخذي فلوس وانهزمي وعيشي بالفلوس لتصيرين مثلي جنت صغيره وماعرف اتصرف والي اخذني وهمني بكلامه الحلو والناعم مجنت ادري دااتصور لو راح يلزموها لزمه عليه لحد ماصرت لهذا ولهذاك

- ليش مانهزمتي

- مكدرت صوروني وكالولي نفضحج نكللهم من ياعشيره انتي وعشيرتج تقتلج خفت وكعدت

كلها بجفه وسهى بجفه

منو سهى

- جانت بنيه ويانه جنت انه بعمر ال 13 وهي تطلع بعمر 23 اكثر

المهم هي جانت حلوه والحجي خله عينه عليها

بقه وراها وراها جذبها  بكلامه الحلو ومواعيده  هي مجانت تعرف طبيعة شغله مو بعيد عن تل الذهب منطقه قريبه عليها

جان الحجي منتصف الثلاثينات

خلاها تعشقه بجنون وبعدها واعدها وجابها لبيته بعيد عن الحي مو هنا

المهم

جابها وبقو كم يوم باللبيت

طلع دايصور بيها وهددها يشوفها لعشيرتها للفيديوهات نفس الي سواه بيه

بعدها خافت وضطرت تبقه وياه بالبيت

اهلها عبالهم ماتت لان جان اكو نهر يمهم وعلساس داتجيب مي وغركت

بقت بيته يجي سنه وراها حبلت الحجي تخبل وراد تنزل الطفل مقبلت جابها هنا للحي حبسها بيت حتى يجبرها تنزل الطفل صار مايوكلها ولايشربها ويضربها لحد ماطرحت خطيه بقت تنزف وعالجوها بس صار يغمى عليها والعجيب بالموضوع الحجي جان يجيبلها طبيب ورجع يعاملها حلو وره مطرحت بس هي احسها كرهته

ماعرف جان يحبها لو لا

- اكيد لا لو يحبها يجيب منها طفل

- ميكدر جان متزوج بنت الواوي وعنده منها اطفال وهدده الواوي اذا تخلف اقتلك لهسبب خلاها تحت رحمة بدريه والشباب وكت ميطلع يعتدون عليها ويهددوها  بأهلها يكتلوهم متحجي ويجي الحجي ميعرف شصاير وهي تسكت لان تخاف خافت حتى منه وصارت تسكت بيوم كشف الموضوع وتخبل موتها ضرب وكللها

- لج انتي وحده عااااااار  وكل ظني تحبيني

- هددوني يكتلون اهلي

- منو هذا الي هددج احجييييييي

جنت اباوعلهم من بعيد خاف يشوفوني واشوفه يكتل بيها دماها خطيه وهي ترجف وتحلف وتتكله هددوني الحجي تخبل صار يصيح ويضرب ويكلها منو هددج

- سعدون

- صاح عليه وراح يركض واول ماشافه ضربه نيمه بالكاع وصارو يتعاركون وناس صارت تضرب ناس اخر شي قضى عليه الحجي ضل يضرب براسه بالكاع لحد مامات وراد يضرب البقيه وكف بوجه الواوي وكله

- ولك مره توكع بين زلمي

تريد تقتلهم ولك من وره هاااااي

- غدرونيييييي

بظهري طعنوني جلاااااااااااااب

- ماطعنوك هي رخيصه وماكلتلك

- جبروها هددوها

-كيد النسوان  لتصدك

- صار يضرب بجمع ايده بالكاع ويصرخ وسكت صراخه وضربه وي صوت الطلقه الي طلعت من مسدس الواوي رفع راسه باوع سهى مضروبه وبالكاع

ركض عليها ورفع راسها بس هي جانت باانفاسها الاخيره ماعرف شكالتله وهو يكلها سامحيني

سامحيني ادري جبروج وادري جبرتج وصار يبجي

تخيلي الحجي يبجي عليها وهي ماتت

ولمن نهار ويبجي اجه يمه الحجي

- خله ايده على جتفه بضربه قويه وكله كوووم

عيب على الزلم تبجي

هو مارد ولا حجه واستفزه بكلامه الواوي

- كووووم طلعت عاطفي وتعشك زين كتلتها وموتت گلبك داتشوفها هاي مو مره نكتلت هذا گلبك كلبك حتى اسويك رجال

هه ثاري يحبلي صايره قيس ابن الملوح هههههه

- كام الحجي عليه وعيونه حمر وصيح

كتلت ابني الي بطنها بسببك حتى ماكسر گلب بنتك وهسه تقتلها تقتلهااااااااااا

- حتى تلتفت لشغلك وين رايح ابو العشك

داتحب ولك يااغبر احنه الي مثلنه يعشكووووووون

- اييييييييي  احبها

احبها ولو اموت مانساها

- ضربه الواوي ورد عليه الحجي بنفس الضربه وتلازمو بس جان الواوي كوي والحجي حيله راح وره منقتلت دايتعاركون ورجع بجه والواوي ماعرف يمكن نقهر عليه لان شافه صدك متأذي وحضنه وكله فتره وتتعوود

صاح بالولد

شيلوها

- انه ادفنها واوي

- شالوها وبالعاده يدفنون كبل بس هو غسلها وكفنها يله دفنها بقه فتره متأذي كلش والواوي صار يطلعه ويا وين ميروح ومرات يجيبله بنات يخبلن ايه من الجمال علمود ينسوها اله بس ماكو فايده

بقه وره وييييييييين يله تعايش وي الوضع تحديدا كدر يصير هيج ويقسى وره منكتل الواوي

- معقوله هو وره كتلته

- كلشي وارد لان مابيها سنه ونقتل الواوي وعلساس القبرص وجماعته قتلوه استلم الزعامه الحجي وهذا مثل متشوفي  

- حياتهم كلها دم

- اشكال شفت اشكال

- حتى اني  كلها بجفه والخطف ويقتلون بدم بارد بجفه

- يخطفون بنات كبار

- لا صغار اخر وحده جابوها صغيره ساومو اهلها بشدتين يله رجعوها  سطرت اذانهم بالبجي

- ياعيني

هسه ماعلينه انتي شقررتي

- مادري خايفه

- كتلج اني شتسوين هو هسه يرتاحلج وينام مطمئن منجحتي اول مره ثاني مره وثالث لحد ماتوكعين على وكعه جبيره وتاخذيها وتنهزمين افلتي دام بيج روح

- ماشي

ماعندي غير حل

- وعلى كولة اهلنه الي يريد شي يعوف شي

- هسه انتي شراح تسوين

- حتحضر الحجي حيوديني على ثنين من جماعته بيني وبينج الحجي يريدني استجوب واحد منهم 

- هه عرفتهم هذا ابو غضب واحد ويا جديد

- اي هو شاك بي دايدور وراه

- انتي تعرفين هو يبقه يدور وره اي واحد يجي جديد

- واني ابقه للنزلاء

هه والله يالله

دكومي كومي تحضري يمكن يوصلنه سويه

كمت خليت الفستان بعلاكه وخلتلي لمى مكياج وتحضرت اجه الحجي شافنه ابتسم

عفيه بيج لمى عرفت راح تقنعيها

- تدلل انت حجي

- بعد هذاك اريدج تقرري افتهمتي

ابو غضب يكول مالي ايدي منه دورت وراه طلع فعلا عنده سوابق ومطلوب ومو اول مره ينسجن بس لازم اتأكد بعد شوفي ليا جماعه تابع منو وراه القبرص لو الحوت هيج شي

- تأمر حجي

- طلعنه وصار بوجهي حمزه باوعلي بنظرة غضب يريد ياكلني واني ضحكت بحقاره ومشيت وره الحجي وصعدنه بالسياره وصل لمى لبيت ابو غضب

نزلو ثنينهم واني بقيت بالسياره وي السايق

حجه وياهم من الباب

-بقو يحجون ولمى دخلت جوه شويه وطلع هذا الي اسمه الضرغام بقه واكف بالباب والحجي صاحه

وضرب على كتفه بفخر

وبقه يحجي وياهم

التفت الضرغام للسياره باوعلي وباوع للسايق ورجع باوع للحجي شويه ودخلو جوه والحجي اجه للسياره وطلع بينه وصلنه للبيت

نفس البيت الي خلاني بي اول مره وهالمره بديت اخطط لازم انهزم لازم اكسبه لهذا الرجال وابوكه وانهزم منا واخلص لازززممم

اروح منا وادور على اختي بلكت الكاها.....

سديم.....

اثنين ملثمين يركضون وراي واني اركض بطريق مضلم شعري مفلول وثوبي قصير مخصر من فوك عريض من جوه لونه بني وعليه ورد ابيض ناعم اركض وكل شويه التفت عليهم

اعثر وارجع اوكف وبعدهم مالحكو بيه لحد مانهزمت منهم بزاويه ختلت ووكفت انهت من الركض احاول استرجع انفاسي باوعت لرجلي من الركض بيها دم كلها ارعبني المنظر رفعت راسي والكاهم ثنينهم يمي واحد صار يخنكني والثاني يريد يبتر رجلي احاول اصرخ بس مااكدر احاول واحاول بس ماكو صوتي راح

حسيت على نفسي واني احاول افكهم مني لكن لكيت روحي على السرير والي جان مجرد حلم

عركانه ونفسي مخنوك فعلا رحت غسلت وباوعت لروحي بالمرايه يوم جديد ابتسمت

يوم جديد يصحبه امل بريق امل يلمع من بعيد ويدلني على الطريق حتى اوصله صحيح بي عثرات وبي صعوبات وبي متاهات بس البريق يخليك تتحمل كل هالصعوبات

لازم اكون قويه حتى اتخطى....

لفيت شعري بشكل كبه وخليت ميك اب خفيف ولبست ملابس الشغل وطلعت للصالون

اليوم احسه مميز صار عندي هدف اشتغل علموده صار لازم اهتم بشغلي حتى اكدر ادرس اشتغلت واني مبتسمه وبلهفه انتبهت عليه ست سميره

- فرحانه اليوم سديم

- اي ست ليش ماافرح صارعندي امل جديد

-   حبيبتي الله يهنيج ويوفقج

- تسلمين ست والله ماعرف بيش اجازيج انتي وادم

- احنه اهل مو غربه منو يوكفلج لعد اذا مو احنه نوكفلج والله حتى ادم كلش فرحلج كال سديم بنيه حبابه وتستاهل كل خير وهو من سمع تره كال اني اوديها للجامعه

- ميقصر اشكركم

- لا ولو

كليلي شوكت ترحين تشترين ملابس

- من يبدي الدوام

- تمام نروح عود اني وياج

- صدك ست

اشكرج

هواي اشكرج اني

- تدللين

  بعد انتهاء اليوم رجعت للبيت واحس كلشي اشتغله واسوي بحماس

مجربين شعور لما ينولد امل جديد ينسيك كل الامك

اتنفس بعمق بأمل باارتياح

واعد يوم يوم على دوام الجامعه

عدت الايام والاسابيع

واخذت ست سميره ورحنه للسوك نشتري

شتريت ملابس وجان اكثره على ذوق ست سميره اني موكلش اعرف اختارتلي مكياج لان هي تعرف وشغلات هواي

وبعدها اخذتني لبيتها داقيسهن واشوفهن حلوات لو لا

ابدل لبس والبس الثاني وهذا حلو وهذاك تمام وهذا هيج يرادله شال وهذاك كذا وهذا الحذاء الونه هيج لبسي ومن هالامور سوالف بنات

تأخر الوكت

كالت لاتهتمين هسه ادم يوصلج على جيه

- ليش حيجي

- وصيته على عشه

- لا ست ماريد اسوي زحمه والله هسه اخذ تكسي

- كعدي اكلج بهل الاثناء دك الجرس

ها

هياته اجه

روحي فتحي الباب

رحت حتى افتح الباب

اول ماشافني

ياهله وجثير الهله

- ابتسمت بردة فعله وطريقة سلامه

- يله اخذي العلاكه ساعديني ولج

- اوك

اخذتها منه ورحت للمطبخ وهو وراي

- جبت شاورما وفنكر وببسيات رتبيها وجيبيها على السريع تره ميت جوع

- اوك

راح هو يم ست سميره واني رتبتها بالصينيه وجبتها الهم كعدنه تعشينه

ادم- ها كملتن فرتجن بالسوك لو اكو جوله ثانيه

- سميره- اسكت ادم هلكت متت تعب

ادم- عدجن مثل العسل هاي الطلعه

باوعلي

جهزتي كلشي عوزج شي

- لا ست سميره مقصرت

ادم- اكلج متشيلين هاي ست تره لعبت نفسي منها صحيلها سمسم

ست سميره- شمدريني اكلها دكلي لا استاذتي انتي

- ادم- هههههه استاذه باللبخ حقها تصيحلج ست

سميره- اسكت ابو لسان

- اني ادري شلون يجيج رزق ويوميه واحد داعي عليج عمي تطبلج الوحده جبار تطلعيها نانسي

- والله الحلوه حلوه ميحتاجلها لبخ هواي

- اويلي اموتن بالحلوات لتجيبيلي طاريهن فدوه خل اكمل اكل لان بالنسبه الي حلويات عندي ذني

- ههههههه ليش شبينه عيني كدامك جبار ومندري

- انتي اي جبار اصلا جبار شايل انوثه اكثر منج

-طاح حظك وحظ ذوقك

- ذوقي وشبي ذوقي يمه دهاج باوعي

وشوفلها صوره بالموبايل بدون مااشوفها اني

ضربته وكالتله طيح الله حظك متجوز من سوالفك

- ههههههههه بس كون الله يهديها

- ادمممممم

- شدانكول

- شفت كلامهم صار الغاز كمت من الاكل

الحمد لله

- وين شكلتي

- شبعت

- ادم- عوافي على قلبج عيوني انتي

- كتمت ابتسامتي

كمل كلامه

اريد جاي من هالايد الحلوه

- هزيت براسي بمعنى اي ورحت اسوي جاي بين مايخدر الجاي صرت احضر الاستكاين والشكردان وخليته بصينيه صغيره سمعتهم يحجون

- ادم:- لج شلعته لكلبي يله حجت

- ادم عوفها للبنيه انت هاوي لعب مو زواج لتخليني اروح احجيلها

-والله اكلها تحبني وتريد تخرب بيناتنه

- لعد عوفها

- صدكيني مدالعب اذا خوش بنيه اتزوجها قابل ابقه بلا زواج

- شكو بيها اذا هيج تفكر بيها الخير

احس دمي نشف من سمعت هيج عصرني كلبي انتبهت للجاي صار اخذته ورحت قدمته الهم وكعدت بدون مااباوع وهم رجع كلامهم الغاز

- اي فديربالج تحجين

- حشوف تاليتك ادم

- اندعي تسهل

- الله يسهلها عليك وتزوج وافك ياخه منك

- طلع مني كلامي بدون تفكير

- ست مكتلج

- شنو حبيبتي

- رادني ضابط وصار مرتين يدز اهله عليه وحايره

- ارفضي دراستج اهم

ادم- لحضه ليش ترفض اذا نصيب زين

- نفس حجاية مرت خالي

- لا دراستج اهم سديم

- باوع وسكت ماحجه وهي كالت فكري زين افترضي تزوجتي وماكنتي سعيده وياه شتسوين ها

فترضي تطلكتي وين ترحين بلا شهاده فكري صح

- لا اني مااتزوج ولامفكره اصلا

بيني وبينج ست هم الزلم مامن وراهم الا وجع الراس اني كرهت الزلم بسبب ولد خالي

ادم- ليش انتي ويامن عايشه

- وي بيت خالي

- ولدهم شكبرهم يعني

- واحد بعمري اكبر شويه واحد اكبر مني

- هااا زلم يعني

- اي

-  وليش تكرهيهم

- لان فلسهم الهم ومرت خالي تحير بالعيشه عديمين المسؤوليه

- لهسبب اشتغلتي

- اي

-  شعجب مرت خالج مااخذتج لواحد من ولدها

- اكله كرهت الزلم من وراهم

- يعني حتى اني

- ليش شنو تفرق عن الزلم انت او غيرك بالنسبه الي اشخاص اعتيادين لااحبهم ولا اكرههم

- يعني متحبين انتي

- لا

- هههههه هسه ترحين كليه وتعيشين الحب

-  هاي بنظرك كل الي يرحون جامعه يحبون لتشوف الناس بعين طبعك رايحه ادرس اني مو اتمعشق خليت الحب للناس الفايخه للي ماعدها مسؤوليه واحلامها ورديه تعيش بضل ام واب يصرفون عليهم ويكعدون اقسام بدال بهذلة المواصلات

وبعدها شلت الصينيه وديتها للمطبخ ورحت وجانت ملامحي توحي بالخنكه المكتومه حابسه دموعي واكابر

- ست عفيه اريد اروح اترخص اني

- هسه ادم يوصلج

- هسه اخذ تكسي

ادم- هسه اوصلج سديم اساسا طالع اني

- طلع واخذ العلاليك همست لست سميره

حتخليني اروح ويا

- امان

ادم حجيت ويا تره وكتله شيلها من راسك البنيه يتيمه وتريد تعيش

- اشكرج

  صعدت بالسياره وراه باوعلي بالمرايه

سديم تعالي يمي موحلوه كعدتج وره هاي مو تكسي ولااني سايق

شنو المشكله

- لتلفتين انتباه اصعدي يمي داكلج

- اوك

صعدت يمه ومشه طول الطريق مركز بالشارع ومدار اي كلام تلكوه اصدقاءه بالطريق وصارو يدكوله هورن ويذبون حجي كل الي سمعته

كمرررر بالعافيه ابو الصيدات يوووول اناني صايرررر

باوع عليه ورجع باوعلهم بغضب

كال

حيوان هاي مرتي حتصير خاطبها

- دكوله هورن وكالوله متكول صاير كله شغلك من جوه لجوه

شايف الخير ضلعي  وراحو

صار يدردم

يحجون الاخرس

طيح الله حظكم

قربنه نوصل وقبل لاانزل كال

- اسف

- على شنو

- يأشر بخجل مثل واحد يريد يوضح موضوع  هو غلطان بي

على

على الي صار

تره لو ماكلهم هيج يجيبوج بالطاري

واني مااقبلها

انتي عرضي

شنووووو......

ربما تفضحنا مشاعرنا مهما تضاهرنا بلكبرياء

كنت معكم انا رغد الموالي في امان الله ♥

سلام عليكم

الى أين تسير بي ياقطار العمر؟. .........

ـــــــــــــــــــــــــــــــــــــــــــــــــــــــــــــــ

مريم.....

حسيت بتعب كورت نفسي على كرويته ارتاح شويه واخذتني غفوه

حسيت على طبكة باب المطبخ فزيت اشوف منو

شفت رجال اول مره اشوفه كان نهاية العشرينات

لون بشرته بيضه عيونه سود وسط شعر كثيف وطويل شويه شاده بقراصه شافني بقه مصدوم ويباوعلي

خفت ورجفت

م

م

منو انت

- انتي منو وشتسوين هنا

- الحجي جابني هنا

- لويش

- سكتت مرديت

تقرب وسأل

ليش جابج

- بشغل

.. حلوووووو

وشغل اله لو لمعارفه

- سكتت

- عت زندي بقوه احجيييييي

- لواحد يريدني

- حلووو كلش حلو يعني مخاصه اله

- لا

- انت منو

- اني اجيت اخذ نصيبي كالولي كمر جايبين هنا بالبيت

- شنو

شتقصد

- بدون كلام مباشرة

وتهجم عليه حاولت ادفعه واقاومه لكن كان اقوى مني مكدرتله خله ايده على حلكي حتى ماابقه اصرخ

واعتدى عليه

هنا حسيت الدنيا تلاشت

ومتسوه شي بعد

خلص

اغلى ماعندي خسرته

وي منو

وي شخص لااعرفه ولايعرفني

حسيت رصاصه طاحت برائتي بعفويتي بطيبتي بخجلي بكل شي ممكن تحمله بنيه بريئه عذراء

اني اصلا استسلمت بعد ماخسرت

اعتدى وتركني قطعه متهشمه على الكاع تنتظر من يساعدها

بسبب غريزه عارمه للحضات بنت تدفع سنين عمرها وتبقه شايله ألم مستحيل يطيب

تبقه صورة هالانسان الي جردها اعز ماتملك محفوره بذاكرتها

وكأنما يبقى بالذاكره ليوم تجتمع فيه الخصوم وترد الحقوق

ليوم القاضي العادل الي يحكم بين الناس

وينتقم من كل انسان اذه انسان

الا اذية البشر رب العالمين مايقبل بيها ولايسامح

استعاديت قوتي شويه وهو مدد بالكاع ماخذ راحته اخذته غفوه

زحفت على الحايط وارتجيت بي

ولا اكدر ابجي احس دموعي ماكو

نشفت

شويه نوب وحسيت باب الخارجي نفتح شويه ودخل الحجي باوع استغرب من المنظر

باوع عليه

وباوعلي

همس

شبيج

باوعت ماحجيت

انتبه لحالي افتهم الي صار

جيت عليه ولزمه بيده الاثنين وهو يصيح

اكعد لك حيوااااان

كلللللب

كووووم

هو فز

ها يابه شكو

فتحت عيني بوسعها

يابه

يعني ابنه هذا

- لك شلوووون تعتدي عليهاااا

وباوعلي تفل بوجهي

كالي

جرجرتييييييي ولج وين لكيتييييييي

- حجي اعتدى عليه مكدرتله

شوف حتى ملابسي شوف شسوه

-وانه شدراني عبالي من التعبانات التجيبهم

- ولك خربتلي الاول والتالييييييي صبر السنين

ضيعته بالشط

وضربه لابنه بوكس وابنه كور ايده راد يرد الضربه وصاح بوجه ابوه

لتخلينيييي امد ايدي علييييك داكلك مادري مادري

- وين اصرف المادري هاااااااا وييييييين

- المطلوووووب

- لك اقتلك اقتلللللك

- كافييي عافه وطلع وهو صار يروح ويجي نار شرار صاير اجه وكف كبالي باوعلي وبكل قوته ضربني راشدي

لو من البارحه فاضتنه جان مصار الي صااااارررررر..

- امشي لبسي اي خركه وتعالي وراي

- لبست ومشيت وراه

اخذني بالسياره لبيت ابو غضب

نزل ونزلني وياه

دك الباب

فتح الضرغام

حجه بهدوء

هاي البنيه جبتها يمكم كم يوم خل تبقه

باوعت للحجي بخوف

حجي يعني حتعوفني يم زلم ثنين

- لا انيمج يم ماما

لعد اوديج للمنطقه هسه ابقي هنا بين مااشوف شسوي تاليتي شغلي من وراج يخرب

- راح ورد التفت سأل الضرغام

ابو غضب وين

- اشر وجان يحجي كوه يدبر الكلمه

حجي ابو غضب جوه

يم

هاي

يم

هاي البنيه

الي

جبتها اقصد الي دزيتها

- ها ها افتهمتك

كله ديربالك على الضميمه يله ثيمالا

- الله وياك

فتت جوه جنت لابسه تيشيرت بهاري ولادي ابو الكلو جبير شويه عليه وعريض

مدنكه بالكاع استحي احجي شي

همس

جوعانه

- باوعت ومارديت

- ليش ترجفين

- لا رد

- زين بردانه

- ماارد الخوفه بعدها بيه

- ليش متردين شبيج

بجيت نزلت دموعي وغصه بداخلي وبجيت بصوت يحرك الكلب اجه اقترب كعد يمي دايلزم وجهي دفعته وصرخت وكمت

وخررررررررر

وخرررررر عنييييييييي

وخررررررررررررر ابتعددددددددددددددد

حاول يهدأني

على كيفج

على كيفج

مداسويلج شي

واني نهاريت اصرخ

وخررررررررررررر

طلع ابو غضب ها شكو

- مادري نهارت

باوع وحاول يهدأني ونوب من شفته بس بالشورت ومساتر جسمه تهسترت اكثر وحسيت ثنينهم حيعتدون عليه وصرت اصرخ اكثر

وارجف اعصابي كلها ترجف

لزم ايدي الضرغام بقوه ورفع ردن التيشيرت ومسكني بقوه وابو غضب ضربني ابره ماعرف شنو هي بس على اثرها هدأت ونحل جسمي اخر شي اتذكره وكعت وتلكاني ضرغام قبل لااطيح بالكاع  وماحسيت على شي بعد

حسيت الدنيا ليل وضلمه على فراش نايمه ومتغطيه كلشي مداشوف ضلمه

همست

اني وين

منو هنا

ماكو رد

كمت امشي بااتجاه الحايط على كيفي بعدني مسطوره فتحت باب الغرفه لكيت ضوه خفيف بالصاله

مشيت لكيت الضرغام نايم على التخم ومخلي عكس ايده على عيونه

باوعت هدوء وكلها نايمه كلت فرصتي هاي خل انهزم

مشيت بااتجاه باب المطبخ حاولت افتحها مقفوله

باوعت باارجاء المطبخ ماكو مفتاح

فكرت شسوي

شلون

لازم انهزم

بقيت احاول افتح الباب بهدوء بالسجين مينفتح

كلت اطلع حجه بالحمام واكعده وراح يفتحها اضربه وانهزم

خليت سجين جوه ردن التيشيرت ورحت كعدته

اااااحم

فز

فتح عينه ضيقها اول ماشافني

عدل كعدته وكال

شمكعدج

- اريد اروح للحمام

- اشرلي بحاجبه اروح كدامه وكام هو سبقني بمشيته وطلع المفتاح من جيبه وفتح الباب

ويباوعلي مركز بكل حركاتي

رحت للحمام وطلعت السجينه

باوعت لكيته ناطيني ظهره واكف

مباشرة تمشيت بخطوات خفيفه ونبزت السجين بظهره

وحجيت

افتح باب الكراج

بقه واكف ماصدرت منه اي ردت فعل

رجعت حجيت

افتح الباب

افتر عليه وباوعلي مستهزأ احسه ماحجه شي

بلعت ريكي دخل بگلبي خوف بس تضاهرت عكس هالشي

عدت مره ثالثه

افتحها اكلك ورفعت السجين لرگبته الثلم مال السجين على لوزته صايره

افتحهااااا

- عافني وراح متوجه للمطبخ لحكته وداضربه بالسجينه وضربته بضهره شاغت روحه وباوعلي بغضب اجيت داجرها دفعني بأيده

الدم صار يجري مثل المي

خفت وتوترت

شسوي هذا دم دم ديطلع

- باوعلي

لعد شربت حيطلع شايله سجين وتهددين

- شسوي شلون

- جفيني شرج روحي منا

كعدي لاابو غضب

- وين هو وين

- بالغرفه

- رحت دكيت الباب

وطلع ابو غضب

- الحك الضرغام نقتل

- شنوووووووو منو قتله شتحجين وين هو

- بره

بره بالكراج

- راح يركض واني وراه جان الضرغام بالكاع نايم على بطنه والدم تارس المكان

شاله

ويحاجي

منو ضربك

ولك منوووو

- كام يثكل لسانه

ويحجي

ابو غضب مو وكتها السجين دايكص بيه كص اسحبها

- شسحب هسه اخابر المضمد يجيك

- ولك بس اسحبها

سحبها وهو تشوغ روحه وي السحب ويگلب بعيونه واني متوتره وصرت الوب والوم بروحي هاي شسويت

صرخ بيه ابو غضب جيبي وصله جرحه دينزف

فتت اركض للغرفه فتحت الضوه واشوف لمى نايمه وهي فزت على الضوه

لمى - ها هاي شتسوين هنا

- اجيت اخذ وصله

- لج شكو شصاير ليش شجابج

- بعدين بعدين

طلعت قميص رجالي واخذته ورحت اركض عليه نطيته القماش وجان الضرغام مغمض عيونه

- شبي ليش مغمض عيونه

- نزف هواي

- يطبطب على وجهه بخفة ايده

ضرغام

ضرغام اكعد

ضرغام باوعلي

سنده بالكوه ودخله جوه بالصاله

وكل شويه يخابر على المضمد

هاااااااا وينكككككك

فضها حيمووووووت

- اني اكول لو نودي مستشفى

- ببها سين وجيم غير اعرف منو قتله

- دنكت وسكتت

باوعلي بشك

فد لا انتي

-رفعت راسي وهو فز وكف على حيله ولزمني من زندي بقوه

احجييييي

انتي مووووووو

سكتت وصاح بيه اجت لمى

عوفها ابو غضب مو وكت هالحجي

- والله اذا طلعتي انتي وراها لااقتلج

شويه واجه المضمد وصار يضمدله جرحه

-جرحه عميق بس الحمد لله مامتكطع لاشريان ولاوريد الله نجاه

- يعني يطيب

- لازم نحوله مستشفى للتأكد مامعقوله شريان سالم بس بالفحص مبين ماكو بعدين هو نازف دم هواي

ضروري مستشفى

- ابو غضب:- وشلون لو حققو ويانه

- هههههه منو يحقق عمي ليش الحكومه مثل قبل نكلهم عركه بنادي وشاربين ميدرون بروحهم وضربو هاي امهاوهاي ابوها

يله لعد خل ناخذه

- اخذو وراحو للمستشفى

وبقيت الوب لابيه انهزم ماعرف حالته شنو ولابيه ابقه ماعرف مصيري شنو

- اجت لمى

انتي ضربتي

- باوعتلها عيوني جانت تكول اي

- يعني انتي

ليش ولج

- ماقبل انهزم

- ليش جيتي لعد

- الحجي جابني

- يعني هم المقصودين

- لا يوديني يم غير واحد

- مو المفروض يمه وعلى اتفاقنه شصار

- ابنه وصرت ابجي وارتعش

ابنه

- شبي ابنه

-ابنه اعتدى عليه

- هنيالج

طاقة الفرج وانفتحتلج

- ولج شتحجين

- لج التفي على ابن الحجي بحجة هو اخذ شرفج وكعي

- وشراح استفاد

- هه عيني ولده مدللين خط احمر خصوصا الحجي مو سهل

- شلون يعني

- يعني شغله ثكيل شبيج

- شنو وزير رىيس شنووو ادري بي تاجر هه

- ماعرف بس تره مو سهل

- خوفتيني هيج اكثر

- لج فرصتج هاي ياتطلعي وي النجوم باتصيرين لهذا ولهذاك تشيطني وصيري ذكيه

- لمىــــــــــــى

- نصحتج وبقت يمج

- سكتت وفكرت بكلامها وشسوي.......

تجري الرياح بما لاتشتهي السفن

ربما تأخذنا الدنيا بأقدارها الى متاهات تدخلنا فيها فننسى من أين طريق العوده....

ــــــــــــــــــــــــ

اركض بالطريق والدنيا ضلمه وخايفه

نفس الفستان البني بي ورد ابيض حافيه وشعري مفلول واركض هالمره كلاب ثنين تلحكني

طريق اضلم كله عثرات صخور وطسات وخاف اعثر

عطشانه كلش عطشانه ومااكدر اوكف واشرب مي لان بس اوكف حتعضني الكلاب لازم اكمل طريقي

لازم.....

كعدت واني انهت وميته عطش

اعوذ بالله شنو هالحلم

كمت رحت للمطبخ اشرب مي

احس ريكي ناشف وشكد شربت احس مرتويت بسبب خوفي بهذا الحلم

رجعت مددت بفراشي شعور غريب سيطر عليه

شعور الخوف تمنيت احد. يمي

امي مثلا واختل بحضنها من خوفي

كورت نفسي وصارت افكار مخيفه بالنسبه الي تجيني

صرت اتخيل حموت

عزراىيل ممكن يجيني هسه ياخذ روحي واموت

وتنتهي كل احلامي

زبن شنو معناها كلاب ثنين يركضون وراي

معقوله احد يريد يأذيني

زين منو ذولي

معقوله ولد خالي

اي

ماكو غيرهم

هذا تحذير بالحلم منهم

بس لايتحارشون بيه

بس لاناويلي نيه

هه

اسويهم مصارو غير

واذا مو بنيه اعرفهم النسوان شنو

ايييييي طبعاااااا

بقيت احجي وي روحي لحد ماغفيت مره ثانيه

وكعدت الصبح

لكيتهم يتريكون

اول ماشفت ولد خالي تذكرت الحلم باوعتلهم بقرف وفتت من يمهم هم ثنينهم صفنو عليه

احسهم يسألون هاي شبيها

غسلت وكعدت اتريك وياهم

- عمه اريد القوري

صبيت جاي وسويت لفة جبن وكعدت اكلها

واخزرهم

باوعلي ابن خالي

- ها شعدج هيج تباوعيلنه من صباحيات

- هيج

- هجاجه بهل الخلقه

- هجاجه شنو

- بعدج صغيره بنتي كملي لفة الجبن مالتج

يمه اني اكول لو مسويتلها حليب ومخليتلهيا بكلاص باغه احسن

- شوفي ابنج عمه عود من انفك لتلوموني

- اسكت انت عود هو يعرف يحجي

- سكتنه بس شبيها تريد تاكلنه من الصبح

سديم - اني شبعت اكوم احسن الي

العمه: وين بنتي مكلتي شي

- لا هاهيه شبعت الحمد لله

- شوكت جامعتج

- هلايام مابقه شي

- الله يسهلج بنتي يوم الي اشوفج دكتوره

- ههههههههه لا طلعنه هندسه

- وهاي عاد بيها مستقبل

-اي اكيد

- ان شاء الله موفقه بنتي

يوم يروح ويوم يجي وروتين كالمعتاد صرت حريصه على الفلس اكثر واكثر لازم اخلي كلشي بمكانه حتى اكدر ادرس

عدت الايام الى اليوم الاول الي نداوم بي

طلعت على الساعه ٦ الصبح للكراج اروح عبريه

هوسة الكراج السيارات السواق تحسها مو ب 6 الصبح ب 10 صعدت بسياره توديني للمكان الي اريده نص ساعه اكثر يله قبطت السياره وطلعنه

طول الطريق الناس متبطل حجي واني اكره مااكره كثرة الكلام من الصبح

وصلتت للجامعه اخيرا

نزلت واباوعلها جميله بكل ماتعنيه الكلمه

حركة الطلاب والاجواء حلوه تحسها تحيي روح قربت تموت بداخلك دهشه مثل فرحة الطفل باللعبه

جانت ملامح وجهي تتكلم عن فرحتي مبتسمه وفرحانه

توجهت لقسم الهندسه الي من اختصاصي ودخلت القاعه جانو بيها طلاب وطالبات

وك مرحله اولى بعدنه متأثرين بالمدارس وبهوستها لانظام الجامعه ولاهم يحزنون

كلها تحجي وناس تتعرف على ناس

هذا الي يكول

يبوووووووو مصدكت اخلص من السادس وضيم السادس ممصدك رحت جامعه..

- وهاي الي تكول: امي عبالها حطلع علم الذره من السادس هسه مو زين نجحنه ياحجيه سادس خل تقره وتشوف الظيم

- هه امج تحجي ورجليها بالشمس

طبعا هم الاهل ميدرون بالمطي الي دايدرس ذصاير بي

- الله وكيلك حتى المطي صار احسن لانوم لااكل لا راحة فكر مثل البشر بس كابوس الكتب والدفااتر

هاي

هاي ايدي تكطعت من الكتابه بس اكتب يوووو شحجي

- شويه ودخلت الاستاذه

صباح الخير

صباح النور

وبلشت تتعارف ونطت اول محاضره وطلعت

وراها الطلاب

كل واحد صار يتذكر مدرسه الي جان ضايج منه وميفوت حصه ابد

هاي مثل ست انعام تموت ولاتعوف درس

- اي جان عدنه مدرس الرياضيات هيج هسه دتمرض فد يوم ولا تجي ماكو

واني اسمع وابتسم اجواء تنسيك ضيمك رغم بسيطه

حسيت بفرحه تغمرني طول اليوم

وبعد انتهاء الدوام رجعت لنفس مشكلة المواصلات الي ضجت منها من اول يوم

وصلت للبيت بحدود 2 ونصف نصف ساعه استراحه غده وسبحت وتوجهت للصالون

ست سميره:- ياهلا بسديم شلونه يومج بالكليه ان شاء الله حلو

- الحمد لله خير من الله

- لو مرتاحه اليوم اكيد تعبانه

- هههههه هذا التعب راح كل يوم نعيشه لازم نتأقلم

- وانتي الكايله الله يكون بعونج

اشتغلت من تعب رجليه صرت ماحس بيها من الوكفه

بااخر النهار رجعت للبيت متكسره شمرت روحي على الفراش مباشرة وغفيت حتى ملابسي ماغيرتها

حسيت الفجر وي الصلاة شبعانه نوم وطاقتي رجعتلي كمت غسلت وغيرت ملابسي وصليت وتحضرت حتىى اروح للجامعه

ونعاد اليوم كما البارحه

رغم انه تعب لكن ثمر هذا التعب ينسيني الي جاي اعاني اخر الشهر من استلم الشهريه واروح اشتري الي يعجبني بالنسبه الي انجاز

مرت الايام تعرفت على زميلات وزملاء وياي بالجامعه وصرت اطلع وياهم كافتريا او نتواصل على امتحان او امر ما

صار. يومي عباره عن دوام وشغل واخر الليل دراسه

وكرست كل جهدي على هالجانبين

الاساتذه والدكاتره صايرو يحبوني لان تقريبا احسن وحده بالشعبه من ناحية المستوى العلمي

جنت دائما غامضه وي الكل تواصلي وياهم على كد الدراسه اي جوانب ثانيه مااتطرقلها

حياتي الخاصه او وي منو عايشه او او هذه محد يعرفها ولااحب اذكرها

مرات اتصفن واكول لو اختي موجوده جان هسه اني وياها نروح ونرجع سويه وين ياترى عايشه ميته ويـــــــــــــــــــــــــن..........

مريم.........

بقينه ننتظر ماكو اتصلت لمى وفتحت سبيكر على ابو غضب

- بشر وينكم

- بالمستشفى وين يعني

- شخبار ضرغام

- بالعمليات

- شنوووووو

- هذا المضمد مطي كلشي ميفتهم

يكول مابي شي السجينه مأذيه حتى كليته

مريم - خليت ايدي على حلكي بخوف وفتحت عيوني شهكت

وخفت

عزه ابو غضب يعني حيموت

- انتي سدي حلكج خل اجي ويصير خير والا لاابلغ الحجي بلي سويتي

- الله يخليك لا

-اشششششش

وسده

لمى- عزه العزاج ولج شسويتي

- والله مادري والله مجنت اعرف هيج حيتأذه

- كون مايصير بي شي لان اذا مات مراح يرحمج الحجي

- زين شلون شسوي

- انهزمي

- انهزم

- عندج غير حل موردتي تنهزمين نهزمي هسه

- بلعت ريكي ماعرفت شسوي بقيت حايره

- راح انطيج فلوس اخذيهن ودبري روحج بيهن انهزمي مريم ولاتردين اذا مات مراح يرحموج واذا عاش راح يخلوج لهذا ولهذاك انتي مو تردين تخلصين

- اي

- خلص انهزمي

نطتني فلوس وطلعت فتحت الباب واتلفت يمنه ويسره مادري القدر شنو ضاملي وره فتحت هالباب وهالخطوه الي راح اخطيها

صرت اركض واركض بدون مااباوع وراي من يادربونه فتت وين طلعت محفظتها حتى ماارد مره ثانيه

اركض واركض لحد ماتعبت وصرت انهت من التعب

وكفت ارتاح شويه

باوعت الدنيه ظهر بس ظهر الشتاء مو مثل ظهر الصيف لازم ادبرلي مكان انام بالليل بي

امشي واباوع للناس كل واحد ملتهي بحياته

هذا الي يبيع وينتظر اخر النهار يرجع بمصروف ومسواك للبيت واهله يتلكوه وزوجته مدفيه البيت ومحضره الطبخ

والناس كل واحد بشي كل شخص عنده هدف راح يروحله بااخر النهار او الايام

زين اني شنو عني

وين حروح

لمنو اتوجه

حتى الرب الي الناس تحلف بي اني ماعرف شي عنه

ماعرف حتى شحجي حتى يخلصني

باوعت للسماء واول مره ادعي واول مره اباوع للسماء قاصده الرب

كلت

يارب هاي السماء الي داىما اباوعلها وارتاح اريد ارتاح خلصني يارب دليني وين اروح

تسائلت هو يسمعنه؟

افكار صارت تجي بالي رغم محنتي

ترى هو شخص مثلنه؟

يعني يدري اني شدااكول بقلبي؟

شلون خلقنه ومنين خلقنه وليش خلقنه؟

مااعرف شي ماعرفه

زين هاي السماء جبيره شلون ثابته؟

مابيها شيمان مثبتها ولاحايط مستنده عليه

زين شلون؟

يووووو اني وين وافكاري وين

عمري مفكرت بس يمكن لان احتاجيت احد وياي فكرت

ماعرف حسيت اكو احد وياي وباوعت بساعتها للسماء وحجيت

بقيت امشي جعت حيل جعت طلعت من الفلوس الي نطتها الي لمى

رحت حتى اشتري لفه

- لفتين كص

ابو المطعم: بشحم لو بدون شحم تريد

- بدون

شويه وصاح

- تفضل اغاتي

- باوعت شو هذا يكلمني بطريقة ولد

عيني اني بنيه مو ولد

- العفو لبسج مال ولد ومنا مخليه كلو البلوزه مامبين مو اكول صوتج صوت بنيه بس الهيئه ولد

- اخذتها ومشيت وعجبني دور الولد

اي اسوي نفسي ولد زين اجت الملابس من يمي

كعدت على رصيف الشارع اكل الشاورما وياها بيبسي وافكر وين شحسوي.

خلصت اللفات ومشيت

وحاولت اتقمس دور الولد هيج احسن الي

جنت بمدينه بعيده عن تل الذهب اساسا البيت الي ساكني مو بتل الذهب ولما نهزمت بقيت اتمشى وقبل الغروب اخذت تكسي

- وين تاامر

- مادري

- شلون يعني

-وديني بمنطقه بيها جوامع حسينيات هيج شي

- انت منين جاي

- ليش

- شكلك مو منا

- اي

شنو سالفتك اكدر اساعدك؟

- سالفتي طويله

- انت بنيه لو ولد

- ليش

- شكلك وصوتك بنات لبسك ولد

- اني من المتحولين

- اعوذ بالله

- عمي وصلني رحمه لوالديك

- مشى بيه وذبني بمنطقه بيها مثل مطلبت

الليل داهم المدينه

تمشيت وكعدت يم باب جامع جان فايت على وقت الصلاة

جبت كارتون وخليته باب الجامع ونمت عليه

حسيت وي الفجر احد يكعدني

- ابني

ابني

باوعت رجال لابس عرقجين ودشداشه ولحيته كثيفه اخذ الشيب منها كل السواد شايل سبحه وجهه بي الطمأنينه

ليش نايم هنا

- ماعندي مكان

- وين اهلك

- ميتين

- لعد وين جنت عايش

- باوعت محجيت

- لتخجل وليدي كول بالميتم شنو يعني

لاحول ولاقوة الا بالله من تطردوهم من الميتم متفكرون وين يرحون

رحمتك ياربي

كوم ابني كوم جوه بالجامع على الاقل المكان دافي

- اني بنيه عمو

- ها

لعد ميصير تفوتين

- حروح لتهتم

- لا بويه امشي لبيتي

- لا لا عمو ماكدر

- ليش

- لا

- شتحتاجين لعد شلون اساعدج

- ماريد شي

- عفته ومشيت خفت اروح لبيته ماعرفه ماعرف منو عنده هناك خاف يبيعني مثل مجان الحجي يشتري ناس بفلوس

تذكرت مره من اجت بنيه بعمر ال 16 سنه بايعها ابوها خلاها يمي الحجي يومين واخذوها وماعرف شي عنها بعد وبوقتها سولفتلي قصتها

- انتي اذا اهلج موجودين شوصلج لهنا

-ابوي باعنه احنه تلاثه

اخوي الصغير جان عمره شهور باعه ابوي لناس منعرفهه جنه نايمين كأي عائله حسيت على صراخ امي وتلطم على وجهها

ابنييييييييي اريد ابنيييييي

ابويه جان كوه يحجي شارب ومثكل

يكلها

جبناه لهذا نجيب غيره اني منين اجيبلكم واصرف عليكم وهذا دمرني حليب وحفاضات منين اجيييييب

- وهي تكله الله ياخذك الله ينتقم منك

حاولنه نعرف لمنو باعهم معرفنه

امي من القهر متحملت تمرضت وعلى اثرها ماتت

ماتت قهر وحسره وألم

بعدها ابويه صار يشغلنه بمعمل الطابوك اخويه عمره عشر سنوات واني، 14 سنه غصبا ماعلينه نشتغل

العمال هناك عيونهم مترحم وجنت اتجنبهم

تحارشو بيه مره واخويه دافعلي ولزمو لااخويه وضربو ورادو هم يأذو بطريقه بشعه

- لهسبب اني دافعت عن اخوي واني واخويه ثنينه صرنه نعيط ونصرخ والله جابلنه مدير المعمل بساعتها وخلصنه

توسلنه بعدها باابويه كناله يابه منكدر نشتغل كذا وكذا يصير بينه

ضربنه وكال عسى ماتشتغلين هالشغله جيبي فلوس

الجشع جان عامي

وصرنه نروح ونجي بهذلة الحر والبرد والاهاين والمواصلات والضرب

كلها تحملناها

اخوي هو ودايشتغل بالغلط وكع عليه عربانه محمله طابوك من فوك هشمته تهشم

هنا فقدت وصرخت فجعني

بكل ماتعنيه الكلمه على امي مابجيت بكد مابجيت عليه

اابوي تأثر كم يوم وراها رجع لعادته وصار الشرب والاقمار بالبيت وغصبا ماعليه اقدملهم واجيبلهم الثلج واجمرلهم الفحم يخليني اروح واجي كدام الزلم

اي غيره ماعنده وبيوم اجه رجال كاله تبيعني بنتك

جان مخنوك لان خسران بالاقمار والفلوس الي اجيبها من المعمل متسوي شي

باعني 5 مليون واخذني الرجال

اعتدى عليه وصار كل يوم يعتدي عليه لحد مامل مني ونطاني لرجال جبير والرجال دزني هنا

-مرات نحس انه الامنه وجعنه ومصيبتنه ماكو مثلها والي شفناه ماكو احد شافه بس لان احنه مجاي نتحمل الي نمر بي

كلنه نتعب وكلنه ننوجع لكن كل شخص بطريقه شكل

الالام والاوجاع مثل الموت تماما كلنه نموت بس كل واحد بطريقه شكل اكو الي طبيعي واكو الي بحادث واكو الي غرك واكو الي انتحر ووووو. الخ

بالنهايه المصيبه وحده............

معكم رغد الموالي

في امان الله ♥

نحن لسنا متفردون في الالم نحن ضحايا كالباقين لكن دون سند........!!!!

      ـــــــــــــــــــــــــــــــــــــــــــــــــــــــــــــــ

مريم.....

تذكرتها وجريتها حسره

من سمعت قصتها توقعت اني الوحيده الي عانت بس مرات لمن جنت اشوف المخطوفين وشلون يعذبوهم اكول اني ارحم منهم

الله اعلم هي هسه البنيه وين بيا نادي نباعت لمنو

شنو حالها ماعرف

زين ابوها ضميره هم يحاسبه

من يخلي راسه على المخده تالي الليل ميتذكر ميكول عائلتي دمرتها

سخفت من كلامي

وكلت لو يكول جان كال الحجي

بديت يوم جديد وهم من شارع لشارع امشي فتريت كل الازقه تعبت ومالي مكان استقر بي لحد بقيت تلاث ايام بالشارع انام على كارتون بالشارع اتختل

وره تل رمل او بيت قيد البناء هيج شي

تبهذلت ملابسي توسخت ماعرف وين اروح

داامشي شفت مره كاعده باب بيتهم

مره عجوز جبيره بالعمر

باوعتلها واني امشي هي هم باوعتلي

كالت

وليدي النظافه حلوه ليش هذا حالك ورجلك وسخه عليها كومه تربان وين اهلك عنك

- اني ماعندي اهل خاله اني بنيه

- دكت على صدرها يبوووو طلعتي فطر الحايط شنو

- تربيت بميتم

- لقيطه يعني

اعوذ بالله

- سكتت شحجيلها مالي خلك اسولفلها سالفتي

- يمه تعالي فوتي سبحي بدلي ماعندي احد بالبيت ابني وطالع بالعماله

- ماشي خاله

فتت وياها بالبيت

بس ماعندي هدوم

هسه اجيبلج دشداشه وجاكيت من عندي

-ماشي

- فتت سبحت جان المي دافي  وصابون غسلت لحد ماحسيت روحي صدك نظفت

لبست من ملابس الحجيه دشداشه وهم كصيره عليه شويه لان اني طويله وجاكيت وطلعت

- اللهم صل على محمد وال محمد

ورد بسم الله ماشاء الله كيكه جنج

-خاله عندج مشط

- اي

جابتلي وسرحت شعري

-تعالي يمه اكذله لشعرج

- اكذله شنو

- يعني اظفره

- ها اي

كعدت وهي صارت تظفرلي وكامت تبجي هي وتظفرلي

- شبيج خاله

- لا هيج يمه تذكرت بنتي

؛ شبيها

- الي سنين ماشايفتها

- ليش هي وين

- مسافره

اخذها رجلها وسافرو

- خطيه وليش مرجعو

- استقرو هناك يمه

- خطيه

سكتنه لدقاىق وي محتكمل الضفيره كالت

خايفه عليها من زوجها

- ليش

- كملت الظفيره وكعدت كبالها

زوجها يضربها ويأذيها

- ليش لعد قبلت تسافر وعايشه ويا

- عدها بزر منه يمه

- اي تجيبهم وياها

- ابني هاي شوفة عينج طبته وي المغرب وسود عليه كبل ينام من التعب يادوب مكفي مصرف البيت ماكدر عليها هي وجهالها

-خطيه ولهسبب اختارت تعيش ويا

- اي

ابني مازن ماشاف شي حلو من هالدنيه توه صاير ابوه مات وماعدنه مصدر عيشه عينه على الله وعليه

صار يشتغل هو وصغير يطلع عماله لو يبيع ﺟاي المهم اخر النهار يجي وبجيبه جم فلس

وتعود على هالشي

لاكدر يكمل دراسه

ولا يتونس مثل هالشباب

لايطلع لايروح سفرات لاعنده اصدقاء

خايفه عليه يكضي حياته هيج

- زين ليش ميشتغل غير شغله

- المهن الحرفيه يرادلها خبره وهو مايعرف غير الطاسه والخبط شيسوي

- هم صحيح

-شخص ثاني همه وجعه شكل.......

بقيت بيت المره لايام صرت اساعدها بالبيت انظف وارتب وهي تطبخ جان طبخها كلش طيب اول مره اكل طبخ بهل الدفو هذا حسيته بي كل الحب والاهتمام والنفس الطيبه جنت اكعد وامشي بدون حجاب كالتلي

يمه مايصير تمشين كدام الولد بلا حجاب خلي غطه على راسج

- ليش

- شنو ليش غير الله فرضه علينه للحجاب

- يعني شلون شمدريج

- باين بالميتم ماحجولكم شي

- لا

- بنتي الله امرنه بالقران انه لازم نتحجب

- القران! 

- ليش مستغربه وكأنه اول مره تسمعين بهذا الاسم

- اني كلشي مااعرف خاله

- شوفي بنتي الي خلق الناس والارض والسماوات رب العالمين الله

خلق انبياء ورسل

منو الانبياء والرسل

ها

الانبياء هم بشر مثلنه خلقهم رب العالمين بس ميزهم انه هم صالحين وعلمو الناس على الاسلام وانه الرب الوحيد هو الله قبل كانو يعبدون اصنام يسووها من الحجر ويعبدوها ويعتقدون انه هذه هي الرب

،- شلون هو حجاره

- اي عقلية الناس بعد المهم ف الله سبحانه وتعالى بعث انبياء تبلغ الناس

- والرسل؟

- هم انبياء يعني هم بشر بس صالحين لكن سموهم الرسل لان يتنزل عليهم الوحي بأحكام سماويه وشراىع دينيه فيبلغون الناس اما النبي فيتمم الي جاء به الرسول

كان خاتم الانبياء والمرسلين هو الرسول محمد( ص)

ورب العالمين نزل عليه القران

القران شنو

- كتاب سماوي من الرب فيها احكام الله سبحانه وتعالى انزلها على الرسول محمد ص

الكتب السماويه ٥

- 5؟!

- اي:  هي صحف ابراهيم لسيدنا ابراهيم اول الانبياء بعد ابونا ادم

والتوراة على سيدنا موسى

والانجيل على سيدنا المسيح عيسى

والزبور على سيدنا داوود

والقران على نبينا محمد ( ص) 

- كل هذه الكتب تحمل احكام قدسيه

- اي

لهسبب يابنتي احنه نتحجب ونصلي

الله حرم اضهار مفاتن الجسد

حرم التبرج

- زين احنه نموت يعني شراح نستفاد من الحرام والحلال

-  لايمه شنو هالحجي ورانه حساب الروح تصعد لربها ويحاسبنه  ونروح للجنه لو للنار

- وين هاي صايره

- هههههههههه شنو وين صايره هاي شلج بيها ييمه

- ههههه لا لاتضحكين اسأل من صدك

- جنه فوك سبع طبقات والنار يكولون جوه الارض سبع طبقات وكل واحد حسب عمله

الي يظلم

والي يأذذي الناس

والي يكفر

والي يقتل الناس بلا ذنب

والي يعتدي على اعراض الناس

- يعني الي يختصب الله يعاقبه

- اي طبعا ياويله من الله

غوركت عيوني ونزلت دمعتي

- شبيج بجيتي يمه

دنكت راسها ليمي وهمست

احد دنالج واعتدى عليج

- مسحت دمعتي وهزيت براسي

لا

- بس عيونج متكول هيج

- اي خاله تعده عليه واحد

- دكت على صدرها يمه اسم الله

- صرت ابجي

اني

اني

والله مردت بس تعدى عليه ضربني بقوه

- سوده عليه بنتي

حضنتني تهدأني ودخل ابنها مازن

اااحم

حجيه

فوت وليدي

همست

خلي هاي الفوطه ( شيله) على راسج

خليتها وهم معرفت الفها

كعد كال

حجيه انه طالع للسماوه باجر

- ليش وليدي

- شغل اجانه رزق خير من الله

باوعتلي وابتسمت

وجهها خير هالكيمر هاي علينه

روح وليدي محروس بالله

ثاني يوم طلع مازن وبقينه اني والحجيه بالبيت

علمتني هواي شغلات شلون اطبخ تعلمت الباميه والتمن وسوت دولمه بس ماحفظتها صعبه جانت بيها هواي شغلات

تعلمت اسوي كباب عروك

هسه شفتي نخلي شوية طحين على البصل واللحم والكرفس  وكركم وملح ونعجنها يصير يخبل

اكو بيهم يخلوله طماطه بيتنجان منزوع كشره بس انه مو زين عليه

علمتني الوضوء والصلاة

ماجنت حافظه سورة الفاتحه ولا التوحيد جانت تعلي صوتها واردد وراها

بكل الي دكوله لان حتى الاذان ماعرفله ولاالقنوت

ولا اي شي

كعدتني يمها تحفظني الفاتحه

كولي وراي

بسم الله الرحمن الرحيم

(( الحمد لله رب العالمين......................  ولا الضآلين)) 

لازم تمدين الكلمه الاخيره بالصلاة

عليها حركة المد

عدتها كم مره لحد ماحفضتها

ماجنت اعرف اقره واكتب حتى اكتبها واحفظها

وهسه نقره سورة الاخلاص

وهاي اجرها عظيم

الي يقراها 3 مرات كأنما ختم القران

اكو روايه دكول الخليفه عثمان ابن عفان رضي الله عنه ختم القران بسجده وحده

شي ميستوعبه العقل صح؟

بس يكولون قرأسورة الاخلاص 3 مرات بالسجده وهيج اعتبر ختم القران

زين منو هو عثمان

خليفه من الخلفاء الراشدين الاربعه

يعني رجل صالح بعد الرسول تعينو خلفاء يخطبون بالناس ويمشون على نهج رسول الله

محمد النبي الي كلمتج عليه

اي

هذولي صارو خلفاء على المسلمين

اولهم ابو بكر الصديق

وعمر ابن الخطاب

وعثمان ابن عفان

وعلي ابن ابي طالب

-وبعدهم  هم جون ناس

- اي جانو ابناء علي ابن ابي طالب وكومه ناس هم

على اثرها صار الفاسد يريد يحكم ابناء علي ابن ابي طالب ماقبلو ومابايعو فقتلوهم

- هم لو مبايعيهم مو احسن من مايقتلوهم

- لا يمه هذا  جده رسول الله شلون يقبل بواحد فاسد يحكم بالناس

جان محد بقه على دين محمد

- يعني هو نصر دين محمد

- اي

- بس هو نقتل

- بس فضل يموت ولا يقبل بالباطل

والناس تمسكت بدين محمد اكثر لان شافو سبطه مات وماقبل بالباطل

- شكد شجاع هذا لمن فضل يموت ولا ينتخب الظالم

- هه مثل شعبنه يجيب وينتخب بالفاسدين ويصعدهم ومن تسأله يكلك حياته الخاصه هاي

مالنه علاقه الدول الاوربيه ميعرفون الدين بس شغلهم بضمير

شغلهم مو بضمير شغلهم تحت العقوبات اكو هنالك من يعاقب ويفرض العقوبات لهذا السبب الكل يشتغل بخوف لا بضمير

الي مايخاف الله مستحيل حيخاف الله بشعبه

كل يوم انفجار وطاىفيه وقتل وذبح

شنو ذنب ام محمد متسمع صارت

- ليش

- تصوبت بالصاروخ وكع يم بيتهم وانفجر اثر على سمعها صارت متسمع

زين هاي منو يعوضها

لمنو تلزم

زين ليش

كفار احنه؟

قتله؟ 

ليش مثلا شنو الي سويناه ذنبنه شنو

-  ذنبكم سكتو ورضيتو بالباطل

- فرقتنه الطاىفيه

جانت الخطه للسيطره على العراق هي التفرقه ونجحو بهذا الشي

زمان باايام عبد الكريم قاسم كلها صفقت لعبد الكريم قاسم لان رئيس نقذ معاناتهم ونطاهم حقوقهم لكن حقيقة الامر تولى الرئاسه على حساب دم شاب كل ذنبه تولى عرش ابوه

هاي العداله وهذه المحبه؟

لما غمضنه عيونه من الحقيقه وفتحنها على حقيقه احنه اصطنعناها بس لانها تتصالح مع ضروفنه هنا بس بين انه البعض مايستاهل تضحيات ولا بلد امن

اكو بيهم هم باعو بلدهم وهم صعدو ناس فاسده وهم اذو ناسهم

بالاخير يهتف ويكول الحكومه

لا مو الحكومه الحكومه مجان صارت لو مانت وهو تخلوهم بالحكم لو ماهذا وعدك بوضيفه وهذاك وعدك بكذا مليون وهذا كرايبك وهذاك ابن عمك

والاقبح صارت حتى الشيوخ تعقد جلسات بمضايفها حتى ينتخبون فلان لان من عشيرتهم

فلان لازم يصعد لان حترتقي العشيره اكثر وتتوضف ابناءها ويكون الها كرسي بالبرلمان

وتصير عشيره قويه

زين انت يالشيخ مافكرت هذا  يستحق هلمنصب لو لا

حيكون

جدير بهذه المهمه

حيوكف بوجه الباطل لو يبوس الايد حاله حال غيره

انه ننظرلها للحقيقه من جانب بينما هي من جانب  ثاني بعيييييييييد كل البعد عنهم

- يعني لو جانت حكومه زينه احنه جان حالنه غير

- اي

مازن بدال مايشتغل عماله ويروح محافضات علمود الرزقه الزينه جان هسه هو يشتغل بمعمل او حتى لو عامل بس عنده راتب اذا مو حك شي فعلى الاقل حك النفط

- مادري شكلج خاله بس اول مره اعرف هالاشياء

- قيدو عقولكم حتى مااتتوعون

- زين انتي شعرفج بهاي الامور

- جنت مدرسة تاريخ

بزماني اشتغلت مدرسه وجنت سعيده جدا بوضيفتي

صار الاحتلال وسقط النظام اخويه جان حزبي بعثي جبير قتلو ولان اخويه بعثي فصلوني من الخدمه

- خطيه

- اي جانت عندي بنتي زينه ومازن صغار كعدت وسكتت بالبيت وربيتهم تالي البنيه تزوجت وراحت والولد هاي شوفة عينج

ندكت الباب

اكوم اشوف خاله

- اي شوفيلنه منو

- رحت فتحتها وجانت بنيه صغيره

بيبي هنا

- اي منو انتي

- اني سميه جيرانهم امي دزتني تكول خل تجي بالقرايه باجر ب 3

- قرايه؟  منو انتو

- هي هنا لو  لا

- اي

دوخري خل اكلها

فاتت واني باوعتلها اتبسمت جانت بنيه صغيره بعمر ال 8 سنوات لسانها بطول كصيبتها الي نازله وي طول ظهرها راحت على ام مازن وكلتلها

وراها راحت

اجيت يم الحجيه

خاله هاي شنو تقصد شنو قرايه

- ههههه يمه يعني مجلس عزه يسوون

- قصدج نسوان تبجي وتلتم مووو

- اي

- شفت مره هيج نسوان بس مفتهمت ليش كالي ليو مجلس عزه هذا

- وين شفتي ومنو ليو هذا

- هااااا

ا

ا

( توترت)  بالميتم اي جان طفل صغير وشفناه لان احنه الميتم صاير قريب على البيوت وشفناهم

- ها اي يمه هذا مجلس يسوون النسوان بمحرم على مصاب سبط الرسول الي ذبحوه الي كلمتج عنه

- ها

اي  لهسبب راح اخذج واشوفج وهم تتعلمين

- ماشي

ثاني يوم اخذتني وياها لبست عبايه زينبيه جانت مال الحجيه ولبست شيله هم مالتها وهي لفتها الي مجنت اعرف الفهه واخذتني وياها

همست بأذني

شسوي سوي مثلي راح اكلهم هاي بنت اخوي لتحجين شي

- اي

رحت وياها وجنت اباوع بوجوه الناس احسهم حيعرفوني وحيكولولها للحجيه وحتطردني

دنكت ومشيت وياها دخلنه وجان المجلس يضج بالنسوان واكو مره يسموها الملايه واكفه وتقره وكل شويه تسد الكتاب الي تقره بي وتدك عليه يصدر صوت اقوه بالدك الي جانو النسوان يدكون على صدرهم صارت تنعي والنسوان تبجي شي الي تذكرت ابنها وعلى صوتها وصارت تصرخ وتسمي بااسمه يمه وليدي كتلوك وانت بعز شبابك

يمه والله مامسوي شي

رايح للكليه يدرس وتصرخ

للحضات اجه بالي

معقوله هاي ام واحدمن الولد الي كتلهم ابو غضب

اولي شكد تعذبو

شكد تبهذلو

جنت اتمنه اساعدهم افتحلهم الباب واكلهم انهزمو بس جنت اخاف من ابو غضب وسعدي

باوعت للثانيه تذكرت ابوها

صارت تبجي وهم تصرخ يابه عفتنه

يابه تعبنه بعدك

الله ينتقم من المجرمين  شسوينه

ابويه بگال( بقال) 

ذنبه واكف بالسوك يبيع تجي مفخخه تطشره

شلناه لحم  دفناه مو جسم كامل

كلمات جانت تذوب الگلب وانت كاعد بينهم لو حتى مالك ذنب بس فكرة جنت عايش بوسط هيج نماذج هاي مصيبه واحساس بأنك مجرم

فكرت ابلغ الشرطه

اي

هم جانو دائما يخافون من اسم

جهاز مكافحة الارهاب

اشوف وين واروح ابلغ

انتهى المجلس ومن دااطلع وي احساس بالذنب الي جنت احسه بنيه قدمتلي جيس بي قطعة كيك وعصير كالت

هذا ثواب ابا عبد الله تفضلي

باوعتلها

واخذته من سكوت

اني لااعرف ابا عبد الله ولا رب ابا ابا عبد الله

اني مجرد كائن خلق بنص وحوش ماتعرف الرب

مثلت كلشي اعرف ومشيت وي الحجيه

اكثر شي حبيته بالحجيه فطرتها

جانت معلكه سوره بالبيت

كالت هذا الامام

- وانتو شايفي؟

لا

بس يكولون اقرب شبه هاي الصوره

- معناها نور الله بيهم

- اي

هواي احبها لهاي الصوره اخويه من جان بالحزب يكلي انتو بطرانين شلكم بهاي السوالف جان على امي مايقبل لان امي شيعيه وابوي سني قبل ماجنه نعرف شنو شيعي شنو سني لان بالنهايه متفقين الله ربنا ومحمد نبينه وخلفاىنه الراشدين اربعه

لكن

الله يلعنهم للي بثو سم التفرقه والطائفيه

- تفرج خاله تفرج

- الا يصفيها ابو صالح ويظهر

رغم مافهمت منو ابو صالح ولا سألت ودققت جنت تعبانه واريد ارتاح والالم الي عشته من رحت للمجلس كرهني بنفسي ردت انهزم من روحي وانهزم من واقعي وانهزم من كل هاي الحياة

يارب الموت والحياة

ان كنت مااستحق الحياة ليش اعيشها

لشوكت ابقه هنا ناس لشوكت حتبقه تتحملني

هم يجي يوم ويضوجون

وفعلا اجه هاليوم

كان راجع مازن من السماوه وبين عليه علامات انزعاج من عقدة حاجبه

لحد ماسمعته يكلم امه

- يمه احنه بلدنا عشاير وخاف هالبنيه وراها طلابه تاليتنه احنه نوكع بيها

- يمه لو وراها عشاير ليش محد سأل

- يمه تلكيها مهزومه وعشيرتها تدور عليها تاليتنا نوكع بطلابه شكبرها مو بعيد يكتلوني واني مالي ذنب

-  هااااا والله مادري شكلك يمه بس خطيه البنيه

-  بقت يمج يمه

جنت اسمعهم واني بالغرفه

صح نقهرت بس نطيتهم حق الحجي وجماعته لو سمعو  خبر هسه يكتلوهم ويكتلوني

اطلع  باجر واروح ولااجيبلهم مشكله

الله اعلم ماضرغام مات

لله اعلم شنو هسه صاير

كعدت ثاني يوم الصبح رجعت لملابسي الي اجيت بيها ورحت للحجيه لكيتها بالمطبخ تتريك

جانت مخليه بالصينيه جاي وكعك وجبن وعالكه قرايه يوليدي يعبد الله لحمزه الصغير

وتبجي وتدك بايدها على رجلها وي الدكه الي بالقرايه

صباح الخير خاله

- هله يمه هله بيج تعالي تريكي الجاي حار

- مااشتهي ماريد

- ليش يمه بيج شي؟ 

- لا بس اني حروح

-سمعتي لمازن صح؟

- خاله حقه انتو مالكم ذنب لو صار شي

- انتي مو من ميتم

- دنكت وسكتت

- مو من الميتم صح؟ 

- لا خاله اني سالفتي سالفه وماريد ادوخج راح اروح قبل لايصير شي

- منو انتي ومنين جيتي احجيلي يمه بلجن اكدر اساعدج

- باوعتلها لدقائق بعدين بديت اسولفلها.........

- دكت على صدرها

يايمه هاي انتي هيج والله ماعوفج يمه ذوله ناس متخاف الله

- لهسبب حروح

- وين ترحين

- ارض الله واسعه خاله مو انتي هيج علمتيني الله ميعوف احد

- والله مو هين عليه ترحين

- خاله ادعيلي فدوه رايده بس دعوتج كون الكه اختي وبيت خوالي اني مااتذكرهم وين

- يمه ان شاء تلكيهم

- كمت حتى اروح كالت ليش رجعتي لهذا لبسج

- مشكوره خاله ماقصرتي

- لا تنزعين حجابج يمه

- كامت جابت شيلتها والعبايه ودشداشه كالت لبسيها

لفيت الشيله لخاطرها وخليت العبايه وخلت ملابس الي بعلاكه

هاي فلوس خاف تعوزين

- عندي خاله

- ميخالف خليهن يمه عندج متزيد

- عاشت ايدج خاله

- بجت لان راح اروح

بستها من راسها كتلها خاله اشكرج تعلمت منج هواي

- يمه امانه لو استقريتي وكدرتي تجيني مريلي طمنيني عليج

- اطمنج عليه اطمنج

- حنطيج رقم مازن خلي يمج خل اكعده اصبري

- راحت شويه وجابته بورقه

خابري خل يبرد نار كلبي

ماشي خاله

بستها من راسها 

وطلعت جنت مخنوكه خنكه مايعلمها الا الرب

كابرت ولما طلعت ومن يم بيتهم نزلت دمعتي لااراديا

مسحتها

كسره بصدري وخنكه

مشيت ومشيت وابتعدت اخر شي تعبت من المشي وكفت واحس الدنيا تفتر بيه وين اروح لمنو اتوجه

منو حيكلي اني عندج ولتخافين

كلها تخاف من القانون من العشاير

زين اني مجرمين وراي

واذا اروح حكون اني السبب بأذيتهم

زين شلون

رفعت راسي للسماء والدمعه بطرف عيني

ورديت دنكت اباوع محتاره

كلت والرب

والي خلق هالسسماء مثل مابهذلوني لاابهذلهم

والا اروح ابلغ عليهم

مشيت

واخذت تكسي

- وين

- اريد اروح لمكافحة الارهاب وديني

- ياستار الله يسترنه

- وديني الله يخليك

- ماشي يابه

وداني لمركز شرطه ورحت

فتت للمركز حتى ابلغ وبعد تحريات على تثبيت اقوالي ودوني لجهاز مكافحة الارهاب الاقسام الخاصه فتت بمكان غرفه مضلمه ضوه خفيف

وكعدت على ميز بي مرايات جان المكان مثير للقلق كلش

وتندمت بلحضتها لان خبرت.......

ربما نخرج من حفره لنقع بالاسوء منها

اليوم ماكو ادم وسديم خلونه بضيم مريم.....

تقبلو تحياتي انا رغد الموالي

اخبار الروايات الخاصه ب رغد الموالي  في سيدات العراق