تحميل رواية «توبه» PDF

بعد الرجوع إلى المنزل

محمد بيه: خلي بالك انت من النهارده هتكون السواق بتاعي لحد ما أسافر وكل ما أنزل القاهره هتكون معايا

توبه : ليه كده بس مش يمكن لما ترجع السنه الجايه اكون معايا عربيه وعندي فيلا

محمد بيه: تصدق ممكن

توبه : بس برضوه هشتغل معاك متقلقش

محمد بيه: جدع (وبيضحك) سلام

توبه : سلام

توبه : شفيقه عملتي الأكل

شفيقه: اه استنا ثواني يكون جاهز

توبه : ماشي عبال ما اخد دوش سريع

شفيقه: ماشي تكون اميره اختك جت

توبه : لي هيا فين

شفيقه: مع مها جوه

توبه : جوه فين يا شفيقه

شفيقه: يا واد في البيت مالك

توبه : الراجل جه بنتك تقعد جوه وفي واحد غريب في البيت ينفع يعني يا شفيقه

شفيقه: ما مكنش موجود

توبه : ألو

اميره : اي يا توبه

توبه : عشر دقائق تكوني قصادي انتي فاهمه

اميره : حاضر يا توبه مالك في اي

توبه : سلام

اميره : سلام

شفيقه: اي يا توبه مالك دا راجل محترم واد أبوها

توبه : بس راجل غريب ومش ابوها ياما

شفيقه: حظها اسود اللي تاخد صعيدي

توبه : أول ما البت تيجي تعرفني انها جت أنا داخل اخد دوش

في جانب آخر

مها : اي عملت اي النهارده أتأخرت بره أوي

محمد بيه: الله مش اميره كانت معاكي

مها : توبه اتصل عليها راحت تشوف عايز اي

محمد بيه: توبه دا ملهوش حل موتني ضحك النهارده

مها : ليه عمل اي

محمد بيه: مش موضوع عمل اي هو دمه خفيف اي كلام بيقولوا بيضحكني وخصوصاً أنه طريقته في الكلام طريقه واحد اي متربي في الشارع (وبيضحك)

مها : بس هو جدع ومحترم اوي

محمد بيه: فعلاً هو ابن حلال وكويس

مها : طب اي مش عايز تاكل

محمد بيه: ياريت

مها : طب ياله

محمد بيه: ياله

في جانب آخر

اميره : على فكره مفيش حاجه لكل ده يا ماما هو توبه عمل كده ليه

شفيقه: لو سمعك هيطلع يكمل عليكي هو عنده حق انتي في البيت سمعتي صوت الراجل كنتي خرجتي من نفسك

توبه : خير في حاجه

اميره : لا مفيش حاجه انتي في حاجه يا شفيقه

شفيقه: لا طبعا مفيش حاجه يا قلب شفيقه

توبه : اه وكمان حابب اعمل تنويه صغير كده للساده الاخوه الكرام اللي احنا في ده ممكن يخلص في كلمه ونرجع البيت من تاني ونرجع نعيش حياتنا اللي كنا فيها ذاي ما دخلنا البيت ده علي السليم عايز نطلع منه على السليم علشان منطلعش من هنا نندم يعني اللي تربينا عليه يا ست الشحروره يكمل ها منجيش هنا العبط يشتغل سامعه ولا لا

اميره : حاضر يا توبه فهمت والله

توبه : وانتي يا شفيقه عملالي فراخ و لحمه مع بعض فوقي ل نفسك يا شفيقه ارجعي تاني يوم فراخ يوم فول يوم مكرونه يوم لحمه بلاش تدوسي على الآخر علشان لما نرجع بيتنا مترجعيش عندك نقرس ولا حاجه ها

شفيقه : شوفي ابن الفقريه

توبه : اي الصوت ده

اميره : مش عارفه الوقت متاخر على الصويت ده كله

شفيقه : دا حد بيستنجد

توبه : (فتح باب الشقه وخرج اكتشف أن الفيلا اللي جمبهم هيا اللي فيها الصوت )

صاحبه البيت: ( أول ما شافت توبه ) متقتلنيش خد كل حاجه وابعد عني

توبه : في اي ياست سعاد حسني هو أنا كلمتك

صاحبه البيت: انت مين

توبه: أنا سواق من البيت اللي جمبك في اي

صاحبه البيت: في حرامي فوق

توبه : شفيقه خليكي معاها وانتي يابت روحي البيت

اميره : والنبي اتفرج

شفيقه : امشي يابت

في جانب آخر

كان توبه طلع البيت وكان محمد بيه خرج يشوف في اي

محمد بيه: في اي

شفيقه : في حرامي فوق

محمد بيه: حرامي أنا هتصل على البوليس

شفيقه: اه اتصل بسرعه

محمد بيه: توبه فين

شفيقه : طلع يجيبه

في جانب آخر

توبه : ( ماشي في الدور الثاني من المنزل ) يا ابني اطلع الناس هتجيب الشرطه يخربيت امك أنا عايز اسطر عليك

يابني اطلع يخربيت امك كل ما اجي أكل حد يخطفني من على اللقمه مش عارف الناس دي فلوسها حرام ولا اي

الحرامي: ( من ورا توبه ) ارفع ايدك على راسك ومتعملش راجل

توبه :(لف وشه ) ياعم أطلع انت بره البيت ومتعملش راجل الحكومه

جايه

الحرامي: مين توبه يخربيتك بتعمل اي هنا

توبه : ياعم شيل الشراب اللي على وشك عايز اعرف مين ورا الشراب ده

بوجي : أنا بوجي

توبه : يخربيت امك بتعمل اي هنا صحيح بتعمل اي اي السؤال العجيب ده هو أنا قفشك في معرض الكتاب

بوجي : ياعم كنت جمب البيت قولت ادخل اشوف الدنيا

توبه : وهتعمل اي الحكومه جايه

بوجي : منا مش عارف اعمل اي في المصيبه دي وانت مش غريب اخوك لسه خارج من السجن معفر آخر حاجه

توبه : يخربيت امك من ساعه ما كنا محبوسين مع بعض

بوجي: لي ياعم مليش أهل تسأل عليا أنا خرجت وعملت حوار كده ورجعت تاني

توبه : جدع اديك راجع تاني اهو

بوجي : لالالا مش هينفع يا توبه وحيات امك شوف حل

توبه : اعملك اي بس يا بوجي ما انت عملت خط الصعيد الله يحرقك

بوجي : يعني كده

توبه : عندي فكره بس تسمع كلامي

بوجي : ياعم امين

توبه : هو المطبخ فين

بوجي: هو ده وقت أكل يا توبه

توبه : ياعم اسكت بقا وقولي فين المطبخ

بوجي : هنا اهو

توبه : شوف ابن القرده دخل البيت عشر دقائق عرف مكان كل حاجه قدامي يابن الجزمه

بوجي : اهو هتعمل اي

توبه : دور معايا على اي حاجه حمره بس تعالي تعالي ولا تدور ولا تعمل غرق وشك شربات من ده

بوجي : اهو

توبه : اعمل بتموت

بوجي : ( بصوت عالي)اه حرمت والله ياعم حرمت مش هعمل كده تاني

توبه : امشي يابن المجرم وحيات امك ل اخدك القسم بأيدي ( ونزل بي تحت )

محمد بيه : اي ده عملت في اي ل يموت يا توبه

صاحبه البيت: دا حرامي يموت في داهيه اي يعني

بوجي : ياله يا وليه يا رمه

توبه : ( بالقلم ع وش بوجي ) اسكت يا بلغه

بوجي : ياعم حرمت وربنا

محمد بيه: البوليس جاي حالا

توبه : وربنا ما حد واخد الكلب ده على القسم غيري

شفيقه: ل يهرب منك يا حبيبي

توبه : ما يهرب

مها : نعم هو اي اللي ما يهرب

توبه : قصدي أنا عايزه يهرب مني كده

بوجي : هو العيله كلها كرهاني ليه كده هو أنا يهودي ما حد يقول كلمه حلوه

توبه : هو انت كنت بتسرق في الكريزمذ يابن الجزمه امشي قدامي

وخد توبه بوجي في العربيه بره الكمبوند

بوجي: والله ما عارف اقولك اي يا توبه كان زماني راكب مع عيله النسر

توبه : ياعم خف على نفسك انت كل ما اشوف وشك تقولي وربنا اخر مره وترجع تاني والمشكلة انك حرامي عبيط ومسجل جرائم هلس يا بوجي

بوجي : لا المرادي توبه يا توبه والله

توبه : مش فاهم يعني اي المرادي توبه يا توبه قصدك أنا الحرامي يعني

بوجي: ياعم قصدي توبت والله يا توبه

توبه : انزل اغسل وشك في التلاجه دي ياعم هترجع البيت كده ازاي

بوجي : ياعم الجو ساقع

توبه : خد الجاكيت بتاعي أنجز علشان القسم قريب من هنا يعني المفروض زماني راجع

بوجي : طب استنا ( ونزل غسل وشه ولبس جاكيت توبه )

توبه : هتركب اي من هنا

بوجي : هركب اي حاجه ابو أتاته

توبه : ينهار اسود اسم المنطقه لوحده يحبس استنا اشوفلك اوبر يخدك البيت الله يحرقك

بوجي : رجوله اقسم بالله من يومك

توبه : خليك واقف هنا العربية شكلها اهو لونها سوداء امسك

بوجي : اي ده

توبه : ألف جنيه ادفع تمن الرحله وخلي الباقي معاك لو شوفتك في حوار سرقه تاني مش هعرفك يا بوجي أنا بكره السرقه والحراميه بس أنا علشان بحبك وقفت معاك

بوجي: ياعم خلاص والله أنا كده كده هفتح كشك تحت البيت

توبه : وهتجيب فلوس منين تملأ الكشك بضاعه

بوجي: ما في بتاع جمله عندنا في المنطقة هعمل عنده ماتش اعتزال و أسرق من عنده كام كرتونه شيبسي على كيكه والشغل يشتغل

توبه : وسع بدال ما ادوس عليك وسع ياض

بوجي : ماله ده زعل ليه الوقتي

في جانب آخر بعد رجوع توبه إلي المنزل

محمد بيه: عملت اي يا توبه

توبه : حبست أمه

محمد بيه: مدام جميله عايزه تشكرك على اللي عملته ( وأشار ل شفيقه وكانت وقفه وراها جميله)

توبه : مدام جميله مين انتي مش اسمك شفيقه ياما

جميله: أنا أنا مدام جميله

توبه : معلش يا مدام جميله بس شفيقه ماشاء الله عليها عامله زاي فريد شوقي وخده الصورة كلها

جميله: متشكره اوي اوي يا انت اسمك اي

مها : اسمه توبه ومفيش شكر على واجب هو عمل اي يعني اي حد مكانه هيعمل كده

توبه : سيبي الست تتكلم بحب الناس تشكر فيا

جميله: خد يا توبه

توبه : اي ده

جميله: ده مبلغ بسيط والله على اللي عملته

توبه : لا والله ابدا ملوش لازمه زاي ما مدام مها قالت لحضرتك اي حد مكاني هيعمل كده

محمد بيه: خلي فلوسك معاكي يا مدام جميله توبه مش شغال معايا توبه زاي ابني

توبه : الله يخليك يا محمد بيه بس هو ممكن اروح أكل لقمه لحسن كل ما اجي أكل تحصل مصيبه

شفيقه: مش انت يابن الفقريه اللي زعلت اوي لما لقتني عامله فراخ ولحمه

توبه : يا وليه هيجيلك نقرس اسمعي الكلام خفي بروتينات بقيتي شبه البيج رامي

عم رمضان: توبه توبه استني اقولك حاجه

توبه : يا فتاح يا عليم يا رزاق يا كريم نعم يا عم رمضان

عم رمضان: خدني معاك لحد أول الشارع اكسب فيا ثواب

توبه : اركب ياعم رمضان هيا ورديه شكلها جمايل النهارده

عم رمضان: الله يكرمك يا ابني كلك واجب طالع ل ابوك

توبه : حبيبي يا عم رمضان

رمضان: لسه شغال بتاع اوبر

توبه : اه بتاع اوبر ياعم رمضان

رمضان: ربنا يكرمك أما أنا شوفت لك حتت حلم يا واد يا توبه إنما اي ربنا يجعله من حظك ومن نصيبك ياض

توبه : اللهم امين يا عم رمضان قولي شوفت اي

رمضان: إلا ياض يا توبه كنت جاي من اخر الشارع وعلي راسك ورده بيضاء ليها العجب كبيره اوي وشكلها تحفه

توبه : ورده بيضاء الله اكبر اي الجمال ده

رمضان: مش بقولك ربنا يجعله من حظك

توبه : طب اي ياعم رمضان أول الشارع فات واول مصر كلها فات انت كان قصدك اول شارع برلين ولا اي

رمضان: ياض لا أنا رايح في سكتك

توبه: ( وقف علي جمب) اه سكتي لا اسمع يابو صيام خد مني خمسين جنيه اهي وشوف حالك الله يكرمك علشان افتح يومي أنا بقا

رمضان: والله كنت عايز اقولك هات خمسين جنيه بس مكسوف منك

توبه: لا ياعم لما تحتاج حاجه عيوني ليك بس بلاها من مشوار اخر الشارع ده الله يكرمك

رمضان: ياله مع السلامه أنا بقا

توبه : مع السلامه يا ابو صيام ( وفتح اللاوكيشن ) يارب ابعت ناس نضيفه بدال الناس اللي بتكح نشاره دي بدأت تندع ألو

العميل : ألو حضرتك فين كده ياسطا

توبه : أنا بيني وبينك دقيقه

العميل : ياعم بجد فينك كده

توبه : ياعم شوفتك والله حتى لابس اسود في اسود

العميل : اه فعلاً

توبه : اركب

العميل : بص سيبك من اللاوكيشن وأنا هروق عليك

توبه : ياعم اعتبر الموضوع في الثكرت بس لو شمال قولي علشان دي عربيه اكل عيش

العميل : ياعم لا بالعكس اطلع بس وانا اقولك

توبه : طلعنا

العميل : أنا رايح اكتوبر علشان

توبه : بس عندك هنا أنا مش عايز اعرف غير اكتوبر اللي رايح من اجله ده بتاعك مليش في

العميل : لا مش قصدي بس أصل انت خوفت لما قولتلك سيبك من اللاوكيشن

توبه : ياعم مش قصه خوف بس أنا محبش المشاوير الشمال فهمت

العميل : ياعم ده شكل واحد يمشي شمال

توبه : هو أنا بخاف إلا من المحترمين يا اخويا

العميل : ( مبتسم) تعرف قريه الفيروز

توبه : اه

العميل : أنا داخل جوه

توبه : ياعم ماشي بس خلي بالك أنا قفلت اللاوكيشن وانت اللي قولت اقفل

العميل : ياعم المشوار عامل كام قبل ما تقفل اللاوكيشن

توبه : ١٦٢ جنيه و الاتنين جنيه علشان المصداقية وكده

العميل : ( بيضحك) لا ياعم هديك ٢٠٠ جنيه مبسوط

توبه : حد يشوف حضرتك ويبقى مش مبسوط

العميل : ايوه هيا القرية دي

توبه : نفتح البرنامج بقا يمكن ربنا يكرم ب حد من الناس الحلوه دي يكون طالب سواق كحيان زاي حلاتي

العميل: ربنا يرزقك

بعد عشر دقائق كان البرنامج جاب عميل جديد ل توبه

توبه : يا سلام على احلامك يا ابو صيام شكلها النهارده عمرانه

العميل : شوفت ياعم علشان تعرف أن وشي حلو

توبه: عارف بقى لو نزلت على باب الكمبوند هتبقى وشك زاي العسل اروح اخد أنا العميل التاني قبل ما يهرب

العميل: ياعم سهله نزلني هنا

توبه : روح ياشيخ ربنا يروق بالك ويجعل نهارك كله رزق

العميل: اللهم امين

توبه : ( راح يقابل العميل التاني كان اللاوكيشن جوه كمبوند كبير )

توبه : ألو

العميل : ألو انت فين

توبه : حضرتك أنا على البوابه هتخرجي ولا ادخل

العميل : لا طبعاً مضطره ادخل هنا الأمن مش بيسمح بدخول عربيات من غير لوجو الكمبوند

توبه : لالا لا خليكي أنا هتصرف

العميله: طب لو مقدرتش اتصل عليا تاني

توبه : تمام ماشي ( وقفل المكالمه)

الأمن : اقف داخل ل مين

توبه : اللواء سامح الشبراويشي

الأمن : مين سامح الشبراويشي ده

توبه : ياعم الفيلاه رقم ١٢

الأمن : يا محمد احنا عندنا لواء جوه اسمه سامح الشبراويشي

محمد : لا اوعا كده انت داخل ل مين ياسطا

توبه : اللواء محمد السعيد

محمد: ياعم انت عايز مين بالظبط سامح الشبراويشي ولا محمد السعيد

توبه : أنا عايز اللي موجود منهم هنا سبني ادخل متبقاش كئيب كده

الأمن: لا مفيش هنا ولا شبرويشي ولا منويشي

توبه : ينهار ابوك اسود منويشي وكتاب الله هقوله دنتا يومك طين

الأمن : بس يا محمد بس يا محمد شكله في حد جوه اسمه كده بجد واحنا منعرفش

محمد : خلاص يا سطا سيب التليفون منا بكلمك اهو

توبه : ابدا لازم اقوله

محمد: ياعم خلاص احب على راسك ادخل وبلاش تقوله حاجه

توبه : اسمه اي

محمد: سامح الشبراويشي

توبه : قولت اي

محمد: سامح بيه الشبراويشي

توبه : ايوه كده ( ودخل بالعربيه)

العميل : انت فين ولا معرفتش تدخل

توبه : قصاد باب حضرتك

العميل : تمام تمام أنا خارجه

توبه : ( فتح باب العربية وبدأ ياخد جوله حوالين العربية كانت خرجت العميله )

العميله: حضرتك اوبر

توبه : لا أنا توبه

العميله : توبه مين

توبه : لا ده حوار كبير اركبي وبعدين نشوف القصه دي

العميله : نعم

توبه : اركبي يا مدام هو في حد غيري قصاد حضرتك

العميله: تمام ماشي

على باب الكمبوند

توبه : اسمه اي

الأمن : اللواء سامح الشبراويشي

توبه : قولتله وخارج يقتلك اهرب بسرعه ( وبيضحك)

العميله: خير هو في حاجه

توبه : لا دا انا لقيت يفطه بره على الشارع مكتوب عليها أن الشبراويشي هو اللي عمل الميدان اللي بره على حسابه الواد بتاع الأمن بقى كان رافض ادخل بس على مين قولتله اني تبع اللواء سامح الشبراويشي الواد اترعب مع أنه قالي مفيش حد جوه اسمه سامح الشبراويشي

كنت عايز أقوله هو في حد يبقا اسمه الشبرويشي أصلا ( وبيضحك)

العميله: هو فعلاً مفيش جوه الكمبوند حد اسمه سامح أصلا

توبه: يعني هو في شبرويشي

العميله: لا والله مش عاجبك

توبه : أنا راضي زمتك يعني لو كان والد حضرتك اسمه شبرويشي كنتي هتفرحي ( وبيضحك وكانت العميله مش مبتسمه قال في نفسه شكلها كئيبة)

العميله : هندخل الكمبوند ده فيلا رقم ١٢ خمس دقائق و ترجعني تاني مكان ما جبتني

توبه : تحت امرك يا فندم

العميله: استني ثواني وخارجه

توبه: ( فتح باب العربية ونزل ياخد جوله حوالين العربية شكلها بت كئيبة و ناشفه مش هتدفع كاش محترم وشكلي هرجع اقفش في خناق ابو صيام)

وبعد مرور عشر دقائق سمع توبه صوت استغاثة من جوه الفيلاه وكان صوت البنت اللي كانت راكبه معاه خبط على باب البيت فتح لي واحد بودي جارد

الحارس : عايز اي

توبه : المدام دي كانت معايا وقالت لي عشر دقائق وخارجه هو في حاجه

الحارس: مفيش اجري امشي شوف رايح فين

العميله: لا متمشيش اوعا تمشي

زوج العميله: ( ضربها بالقلم) اسكتي اجري امشي ياض

توبه : لا استني بقا ياعم انت مشخصن الموضوع مع الست ليه

الحارس: ( حط ايده علي كتف توبه قام توبه ضارب الحارس ودخل على صاحب المنزل شد من أيده العميله وخارج بيها كان الحارس ضربه على رأسه ضربه قويه فتحت رأسه بس برضوه خد العميله وخرج بيها بسرعه بره الكمبوند)

العميله: يالهوي دماغك اتعورت تعالى معايا البيت يا نروح المستشفى

توبه : مش شايف حاجه بتعرفي تسوقي

العميله: اه

توبه : تعالي مكاني مش عارف اسوق

العميله: هات ايدك طب انزل اركب الناحية التانية

توبه : ماشي

العميله: ( بعد ما دخلت توبه العربية ركبت وبدأت تمشي بالعربيه دخلت في الرصيف دخله جامده )

توبه : يا نصبتي السوده يا اني ياما

العميله: خفيفه خفيفه متقلقش احنا بخير

توبه : انزلي الله يحرقك هو انتي بيحصلك حاجه منتي زاي الفل أنا اللي عمال اتقطع من ساعه ما ركبتي معايا

العميله : معلش والله هعوضك بس وصلني البيت

توبه : لا لا انزلي أنا هكمل بيكي يااااااا

العميله: اي علقت ولا اي مالك

توبه : ينهار اسود فقط الذاكرة أنا مش فاكر اسمك

العميله: ياعم هو أنا قولتلك اسمي أصلا

توبه : يعني أنا أصلا مش عارف

العميله: لأ

توبه : طب الحمد لله اني مش عارف قلقت على نفسي

العميله: وصلني البيت وهقولك كل حاجه

توبه : وأنا مش عايز اعرف حاجه أنا عايز العربية ترجع زاي ما كانت

العميله: ياعم تعالي نشوف دماغك دي الأول

توبه : لا دي أنا عارف هعمل فيها اي الله يخربيت امك يا ابو صيام هيا دي الورده البيضاء اللي على راسي

بعد وصول توبه إلي منزل العميله

العميله: اتفضل ادخل

توبه : ( شاف المرايا ) ينهار اسود كل ده دم الله يحرق ده حلم ياعم رمضان

العميله: ياعم قول الحمد لله انك مش فاقد الذاكرة بعد الضربة دي

توبه : قولي انتي الحمد لله اني كنت معاكي كان زمانك مقتوله ولا العيال دي اتحرشت بيكي

العميله: ياعم مش للدرجادي

توبه : مين ده

العميله : أنا هقولك كل حاجه بس اقعد اجيب حاجه ل دماغك دي

توبه : ماشي

دخلت فعلا جابت شاش و قطن وخرجت

العميله: هعملك غيار عبال ما تروح مستشفى علشان الدم يقف

توبه: ماشي بس أنجزي القميص اتبهدل

العميله: على فكره انا مها الشبرويشي

توبه : (بص ل مها ) الشبرويشي

العميله: هتضحك تاني على الإسم

توبه : لا ياستي مكنتش اعرف أنا آسف

مها : الشبرويشي ده يبقا جدي بس احنا لقب العائلة عندنا الشبرويشي إنما بابا اسمه جمال

توبه : يعني الشبرويشي ده جدك ولا أبوكي

مها : لا جدي

توبه : ومين بقا الراجل اللي كنا عنده ده

مها : ده طليقي وكنت رايحه اخد لبسي من الشقه بس هو مجنون كل ما اخد سواق من بتوعنا يضربه ف ملقتش بصراحه سواق يجي معايا ف خدتك انت بقى حظك كده

توبه : أنا مال اهلي ما كنتي قولتي علشان اكون عارف حسابي

مها : يعني كنت هتعمل اي يعني بلا وكسه

توبه : لا خلي بالك أنا مش بتاع بابا وماما بس انتي خدتيني خوانه إنما أنا لو رايح وعارف كنت عملت حسابي

مها : باين عليك صايع فعلاً

توبه : احترمي نفسك اي صايع دي

مها : متزعلش خلاص باين عليك شبح

توبه : شبح لا بقولك اي أنا مش عايز القطن و الشاش ده كله أنا عايز ام العربية اللي بره دي ترجع زاي ما كانت

مها : خلاص يا عم روح التوكيل شوف هتتكلف كام وأنا هدفع

توبه : اقولك اي بس اوعي اوعي

مها : رايح فين

توبه : رايح في داهيه

مها : والعربية

توبه: هاخد منك العوض يعني ياله ياستي سلام

مها : سلام

توبه : ( خد العربية وخرج من الكمبوند على المنطقة)

رمضان: ياخبر اي ده يا توبه

توبه : الله يخربيت احلامك يا ابو صيام الورده اللي ليها العجب على راسي اهي

رمضان: عملت حادثة ولا اي

توبه : لا ياعم دا حوار كبير سبني اطلع علشان دماغي مصدعه اوي

رمضان: أطلع الف سلامه يا ابو الرجولة

توبه : ابو الرجولة لا بقولك اي يا ابو صيام وربنا ما معايا ولا جنيه الورديه ضاعت في البنزين لو راسم على اي حاجه متجيش علشان مفيش سلام

رمضان: سلام عيل ناشف

في جانب آخر

الأم: يالهوي اي ده يا واد يا توبه يخربيتك

توبه : دماغي فرقعت يا شفيقه

الأم: مين اللي عمل فيك كده يابن العبيطه طلع عليك حراميه ولا اي

توبه : لا ياستي ده حوار كده بس الحمد لله جت سليمه

الأم: اقعد اقعد

توبه : اي الريحه دي يا شفيقه

الأم: اختك قافله على نفسها الاوضه جوه وعماله تولع في سلك وقال اي بتعمل اختراع ينفع البشرية

توبه : كانت نفعت نفسها

الأم: رايح فين

توبه : اشوف بنت المجنونه دي ل تولع في البيت ممعيش جنيه احطه في حاجه

الأم: روح عبال ما احضر الأكل

توبه : اميره انتي يابت افتحي

أميره: عايز اي يا توبه

توبه : عايز اجيبك من شعرك اقسم بالله على اللي بتعمليه فينا كل يوم ده

أميره : بكره لما أبقا اصغر عالمه واطلع مع مني الشاذلي متبقاش تقولي ابوس ايدك اجي معاكي

توبه : ابوس ايدك افتحي الباب علشان أنا على أخري

أميره : استنا لحظه واحده علشان هجرب حاجه بس

توبه : لالالا هاتي الاختراع ده كله وتعالي اطلعك السطح عيشي فوق بدال ما نولع كلنا

الأم: توبه الأكل

توبه : استني يا شفيقه اشوف بنتك الأول

أميره : (فتحت الباب) عايز اي يا توبه

توبه : اي يابت السلك ده كله هو انتي خدتي الفلوس مني علشان تفتحي محل خردة

أميره: سيب شعري وانا اقولك

توبه : اهو

أميره: اي ده الف سلامه عليك مالك

توبه : لا سيبك مني انتي بتعملي اي جوه

أميره : دا اختبار عملي يا توبه مالك خايف من اي

توبه: طب كفايه عملي في البيت أنا مش ناقص

الأم: يا ابني الأكل برد ياله بقى

توبه : جاي اهو يا شفيقه تعالي انتي كمان علشان ناكل

أميره: أكل اي ياعم مش لما اخلص من الاختبار

توبه : ( شدها من شعرها ) لا وربنا ما في اختبار في البيت امشي ياله

الأم: ما تتصل على خالتك وهات اكلمها

توبه : خير في اي

الأم: ممعيش رصيد الله

توبه : مش ده القصد أنا قصدي ليه المكالمة المستعجلة دي

الأم: يا واد بنتها جالها عريس وكانت بتكلمني

توبه : ألف مبروك خودي ( وبيطلع التليفون من جيبه ) اي ده شكله في العربيه

الأم: شوفي الواد

توبه : والله ما معايا شكله في العربيه بجد

الأم: طب كل وانزل هاته

توبه: يالهوي ده عند بنت المجنونه

الأم: بنت المجنونه مين

توبه : مش وقته ياما ( وخد المفاتيح ونزل )

الأم: الله ماله ده يا اختي

أميره : شكله كده بيعك يا شفيقه

الأم: يعك اي ياعين أمه هو عنده وقت يعك

أميره: دلعي انتي في كده لحد ما ينحرف

الأم: كملي أكلك وانتي ساكته ملكيش دعوه ب اخوكي

في جانب آخر بعد وصول توبه

الأمن : ياعم مينفعش تدخل الوقتي في مشكله جوه

توبه : ياعم مشكله اي بقولك نسيت تليفوني جوه انت بتفهم منين

الأمن : انت النهارده عملتنا مشكله في عميل شافك جوه عمل مشكله بسببك معانا

توبه: لي ياعم شاف عزرائيل

الأمن : ياعم علشان خاطر ربنا بلاش تدخل الوقتي خليها الصبح

توبه : لا أنا أخري معاك اركن العربيه بره هنا وحد منكم يدخل معايا لحد الدكتورة اخد التليفون و اخرج

محمد: خلاص يا عم أنا داخل معاه سيبه

الأمن : هتشيل انت ذنبه لو حصل مشكله تاني

توبه : ياعم انت رابط دماغك معايا ليه

محمد: خلاص بقى سيبك منه أنا داخل معاك ياله

توبه : والله انت ابن حلال

محمد : ربنا يخليك بس انت خد تليفونك ونمشي على طول بلاش تعملي مشكله

توبه: من عيني ياعم عيب عليك

محمد: خليك هنا أقول للدكتوره ولو قالتلي خليه يدخل هخرج اقولك كلمها ماشي

توبه : اهم حاجه تجيب التليفون أنا لا عايز ادخل ولا اتنيل

محمد: ماشي بس خليك هنا

توبه: ماشي

دخل محمد خبط على باب مها

طاهر بيه : نعم

محمد : كان في سواق بره اسمه توبه ناسي تليفونه عند الدكتورة مها هنا وجاي ياخده

طاهر: ده اللي كان معاكي الصبح صح

مها : لا مش هوا

طاهر: خليه يدخل

محمد: تحت امرك ( وخرج ل توبه )

توبه : اي فين التليفون ياعم

محمد: طاهر بيه عايزك وخلي بالك لحسن شكلك مزعله

توبه : طاهر بيه مين هو أنا أعرف حد هنا

محمد: طاهر بيه ده طليق الدكتورة مها بس ما بنهم مشاكل

توبه : الله هيا ليله غامقه

محمد: ادخل علشان وقف عينه علينا

توبه: هو الراجل ده شغال اي

محمد: راجل أعمال

توبه: ماشي ( ودخل الفيلا)

توبه : باشا مصر بعد اذنك بس التليفون بتاعي

طاهر: خد ياض تعالى ( وخرج حد من رجاله قفل باب الفيلا)

توبه : في اي بس يا بيه لو التليفون عاجب حضرتك خلاص مش عايزه بعد اذنك ( وخارج من البيت)

طاهر: خد هنا بقولك هاته يا سيف

سيف.: تحت امرك يا طاهر بيه

توبه : ياعم ايدك انت ماسك حرامي منا داخل معاك

طاهر: انت بقى عامل راجل يا روح امك و جايب الهانم تاخد حاجات من بيتي غصب عني

توبه : ياعم افهم بس أنا بتاع اوبر مليش طرف في مشاكلكم دي عايز تليفوني وماشي خدت بالك ياعم سيف ولا أنا جاي متأخر شكلي متأخر تصبحوا على خير

طاهر: انت مسجل ياض

توبه : يابيه أنا داخل في تليفون انت عايز القصه تكبر ليه سبني امشي

طاهر: سيف روق الواد ده

سيف : تحت امرك يا طاهر بيه

توبه : انت هتعمل اي يا متهور مش كفايه دماغي

سيف : ( خد توبه بره وقفل باب البيت )

مها : انت فاكر أن بابا هيسيبك والله لما يرجع من السفر ل اخليه يعرفك مقامك

طاهر: لو رجع لقاكي أصلا

مها : انت عايز مني اي مش طيقاك يا اخي

طاهر : علشان كده عايزك وحيات امك ل أربيكي

باب البيت بيخبط

طاهر: ( بيفتح الباب شاف توبه في وشه ) فين سيف

توبه : ياعم منا قولتلك هات التليفون و سبني امشي كبرت الموضوع ( وضربه ودخل ) قومي

مها : عربيتك فين

توبه : دي كانت مواصله طين امشي قبل ما الحيوان اللي بره ده يقوم تاني

مها : انا مش عارفه اقولك اي لولا وجودك في الوقت ده كان زمان الحيوان ده عمل فيا حاجه

توبه : والله أنا اللي مش عارف اليوم ده أنا كنت مصطبح ب وش مين

مها: صدقني والله هعوضك عن كل حاجه ولو مش مصدق أقف عند اي مكنه اسحب فلوس علشان تصدق اني بنت ناس مش ذاي ما انت فاكر

توبه : ياستي وأنا مش عايز منك اي حاجه الحوار بتاعك ده اخر مشوار في النهارده شوفي عايزه اوديكي فين وبعدين مع نفسك

مها: هات مكالمه طيب بعد اذنك

توبه : اتفضلي

مها : هكلم بابا علشان يرجع يشوف حل مع الحيوان ده

توبه : ياستي وتقلقي الراجل ليه انا اخدك الوقتي حالا عنده

مها : عنده اي انت عبيط ده في ألمانيا

توبه : اي يعني المنيا خمس ساعات اكسب فيكي ثواب و تخرجي من راسي

مها : منيا اي بقولك ألمانيا

توبه : المانيا اي اللي هيا طياره وفيها

الباير ميونخ

مها : اه سبني اكلم بابا بقى

توبه : ياستي بتعملي اي أنا شاحن كارت فكه هاتي ام التليفون انتي تيجي معايا البيت وربنا يحلها هناك

مها : اجي معاك فين يا حيوان يا سافل يا عديم التربية

توبه : انتي فهمتي اي الله يحرقك هو أنا طايق خلقتك لما اخدك معايا البيت عشان اعمل معاكي حاجه ثما أنا عايش مع امي و اختي

مها : لالالا انت سبني في اي فندق أنا هتعامل

توبه : جدعه كده كده في فندق قصاد عينك اهو ربنا معاكي

مها : طب تعالي دخلني وامشي يا توبه

توبه : علشان ابقى عملت اللي عليا للآخر انزلي اتفضلي ادخلي وجوه اخر مره اشوف وشك المقطقط ده اتفقنا

مها : احسن برضوه

عامل الفندق: اتفضلي يا فندم

مها. : لو سمحت كنت عايزه احجز غرفه

عامل الفندق: اتفضلي حضرتك أملي البيانات دي

مها : تمام ماشي

توبه : امشي أنا بقى الحمد لله

مها : اه ياريت بدال ما انت عمال تشتم فيا كده وخلاص

توبه : سلام

مها : بس بعد اذنك أنا ممعيش اي إثبات شخصي

عامل الفندق: اذاي يا فندم طبعاً مينفعش لازم يكون مع حضرتك بطاقه أو اي حاجه تثبت حضرتك مين

مها : يا سيدي خد الفلوس اللي عايزها بس سبني اقعد في الفندق أنا في مشكله كبيره من فضلك

عامل الفندق: للأسف يافندم والله ما ينفع

مها : ( ينهار اسود بصيت حواليها فين توبه وخرجت من الفندق جري )

في جانب آخر

توبه : ياعم وسع سكه ابوس ايدك سبني اخلع من هنا

الأمن: عدي ياسطا

توبه : الهي الفندق يولع بيكي يا بعيده

مها : ( بصوت عالي) توبه يا توبه

توبه: ( سمع صوت حد بينده عليه رفع وشه في المرايا شاف مها وقف ب العربية)

مها : الحمد لله انك لسه وقف

توبه : وربنا أنا ما كنت وقف أنا كنت ماشي انتي اللي وقفتيني

مها : أحم أحم

توبه : نعم

مها : هو بيتكم فين

توبه : ليه الفلوس اتحشرت في المكنه

مها : لا ممعيش بطاقه ولا اي حاجه تثبت شخصيتي

توبه: وأنا اخدك البيت عندنا من غير بطاقه اذاي أفردي طلعتي إرهابية ولا حاجه

مها : توبه بالله عليك الجو برد

توبه : اركبي ده كان يوم ما يعلم بي إلا ربنا

مها : شكراً

بعد وصول توبه إلي منطقته مع مها

مها : اي ده المنطقة دي شكلها حلو اوي

توبه : ( شاف صاحب العربية تحت البيت عنده ) يا صلاه النبي كده كملت الليله

عم سراج : اي ده يا توبه انت عملت اي في العربيه

توبه : وحد الله يا عم سراج العربية بكره تدخل الضمان ترجع لك عروسه

مها : مين ابو صوت وحش ده

توبه : ( حط ايده علي بوق مها ) ابلعي ريقك انتي والنبي

عم سراج: لا انت كداب فين فلوس الضمان دي يا توبه

توبه: هو أنا همشي بمبلغ ذاي ده كده عادي يا عم سراج انت عايز بتوع الاعضاء يخدوني ولا اي

مها : انت بتكلمه كده ليه انا اللي خبط العربية يا حيوان انت

توبه : ( بص ل مها ) وحيات امك

مها : نعم

عم سراج: آخره المشي ورا النسوان اهو مين دي يا توبه انزل من العربية

توبه : نسوان مين ياعم سراج دي بنت خالتي عيب عليك انت تعرف عني كده

عم سراج: انت حد يعرف عنك حاجة حتى اميره اختك لسه كانت بتشتكي منك

توبه : ياعم سراج سبني النهارده أنا هراضي الجميع بس سبني الوقتي

عم رمضان: اهو توبه اهو يا رجاله خير من يشهد على كتب الكتاب

توبه : كتب كتاب مين يا ابو صيام

عم سراج: الواد احمد صحيح كان مستنيك انزل انت وبنت خالتك تعالى

توبه : مش وقته يا رجاله أنا مش خلاص الإمام الشافعي خلي اي حد يمضي شاهد يا ابو حميد ربنا يفكها عليك وعلي الناس كلها

مها : الله تعالى بس ( وفتحت الباب ونزلت وكانت لبسه بيجامه المنزل)

توبه : بت يخربيتك اركبي نازله كده ازي هنا مينفعش اهدا يا ابو صيام عينك خرمت لبس البت

عم رمضان: عيب عليك يا واد يا توبه مش عايز تشهد على عقد زواج الواد والله ده ما تقدير

توبه : طب اهدا بس سيب ايدي وانتي بتجري رايحه فين انتي هبله

مها : عايزه اشوف عامل اذاي

احمد : أنا اهو يا استاذه

مها : مين ده

توبه : مش عايزه تشوفي عامل اذاي

مها : قصدي كتب الكتاب عندكم

توبه : أسند ضهرك يا احمد بقى عيب عليك يا اخي بقولك بنت خالتي وانتي اطلعي ( وبصوت عالي) يا شفيقه يا شفيقه

الأم: عايز اي يابن العبيطه

توبه : انزلي خدي بنت اختك بسرعه

الأم: بنت اختي مين

توبه. : اهي ياما انزلي وبعدين تفهمي ياعم رمضان عينك من على البت مش كده دي من دور عيال عيالك

رمضان: كان زمانك عملت الواجب والله

توبه : اعمل انت الواجب و سبني اطلع

الأم: تعالي يا حبيبتي معايا تعالي

مها : توبه

توبه : اطلعي مع خالتك يا مها اطلعي

مها : ماشي

توبه: ( حط ايده علي كتف احمد ) تعالى بقى انت عامل حوار ولا ذاي ما يكون أول مره تتنيل تتجوز

احمد : بتبارك بيك يا اخي

توبه : إلا ما في عقد كتبت أسمي عليه إلا وطلق بعد شهرين

احمد : ما علشان كده بنستناك ( وبيضحك)

توبه : الله ده عم مجدي هو المأذون كمان اي ياعم مجدي هو مفيش غيرك في المنطقة

الشيخ مجدي: اقعد يا توبه اقعد

بعد انقضاء كتب الكتاب خرج توبه من بيت عم رمضان الي منزله

عم سراج: واد يا توبه

توبه : نعم يا عم سراج ده بؤس وكتاب الله

عم سراج: الله في اي ياض

توبه : ياعم مفيش نفسي كلمه النهاية بتاعت اليوم ده تخلص بقى

عم سراج: على العموم يابني أنا كنت عايز اقولك حقك عليا احنا اللي ما بنا مش عربيه وفلوس أنا اللي مربيك على أيدي ياض

توبه : حبيبي يا أبو سراج الله يكرمك يا معلم

سراج: بس خلي بالك بكره لو العربية بتاعتي مجتش زاي ما خدتها هطلع عليك القسم

توبه : الله يحرقك راجل نتن

عم سراج: بتقول اي ياض

توبه : بقول الله يحفظك راجل جدع

عم سراج: تصبح على خير

توبه: وانت من أهل الخير يا حج

بعد طلوع توبه فتح الباب لقي التلاته قصاده واقفين

توبه : لا لا لا حلو اوي اوي على كده النهارده بكره بقا يحلها ربنا نتكلم إنما الوقتي حلو اوي على كده

الأم: الله مين دي يا واد

توبه : دي شفيقه امي ودي اميره اختي ودي مها ولا اعرف عنها حاجه ننام بقى وبكره يحلها ربنا تمام

الأم: انت هتنام فين يا توبه

توبه : شفيقه انتي في الاوضه بتاعتك و مها مع اميره وأنا ذاي منا اللي مش عاجبه النومه الشارع بابه مفتوح لكل سائل تصبحوا على خير

في الصباح

الأم: توبه يا توبه

توبه : صباح الخير يا شفيقه نعم

الأم: مين يابني البت اللي جبتها معاك بليل دي شكلها بنت ناس اوي

توبه : ركبت معايا ياما وبعدين كان في واحد عايز يخطفها جبتها هنا

الأم: يا حنين

توبه : نعم

الأم: أنا مالي انت شكلك عايز تتحبس تاني

توبه : اعمل اي طيب يا شفيقه يعني لو بنتك اميره مكانها ترضي ليها كده

الأم: يا حبيبي المره اللي فاتت اتحبست بسبب واحده والآخر خدت فلوس وقالت انك خطفها ولبست انت والراجل طلع برئ

توبه : ياما أنا عملت حاجه لله مليش طرف مع البشر ولو الزمن رجع هعمل اللي عملته قبل كده تاني

باب الغرفه بيخبط

توبه : مين

مها : أنا يا استاذ توبه

توبه : استاذ توبه ادخلي ادخلي كده عايزه مصلحة

مها : أحم أحم ممكن تيجي معايا مشوار

توبه : لأ اعملي الفطار يا شفيقه خلينا نروح اشغالنا

الأم: حاضر يا حبيبي ( وخرجت من الغرفة)

مها : توبه توبه

توبه : ( شد البطانيه على وشه)

مها : (شدت البطانيه) توبه بكلمك

توبه : عايزه اي يا مها

مها : أنا سمعت كلامك مع ماما شفيقه هو انت بجد اتحبست

توبه : اه خايفه مني اجري امشي

مها : ياعم أنا سمعت السبب علشان كده مش خايفه بعدين منا هنا من امبارح لو كنت عايز تعمل حاجه كنت عملتها

توبه : طب بره بقى علشان النص ساعه اللي بنام فيها قبل الفطار دي اهم عندي من النوم طول الليل

مها : طب علشان خاطري تعالي نروح مشوار سريع سريع

توبه : خاطر مين هو أنا اعرفك أصلا اجري بره

مها : شكرا يا توبه علشان قاعده في بيتك تعمل فيا كده حقك يا توبه حقك ( وخارجه من الغرفه )

توبه : ( قام اتعدل على السرير) عايزه اي يا مها

مها : مشوار صغنن أد كده ممكن

توبه : بعد الفطار طيب

مها : حاضر اروح احضر الفطار

بعد الفطار

أميره : توبه ايدك على ٢٠٠ جنيه

توبه : ليه ناويه تشتري سلك تاني ولا اي

مها : دي اميره دي دماغها جباره والله خلي بالك تنفع مخترعه بجد

توبه : اه دا حضرتك دماغك سايحه ذاي دماغ البت المجنونه دي

أميره : شوفتي أنه اكتر واحد مسبب لي إحباط نفسي

توبه : الحمد لله أنا نازل

مها : استنا رايح فين أنا جايه معاك

أميره : استنوا انتو الاتنين فين ٢٠٠ جنيه

توبه : هما ١٥٠ جنيه جايه معاكي ولا اي

أميره : هات

توبه : خدي خلي ٢٠٠ جنيه دي معاكي

مها : مين انا

توبه : هو في حد غيرك أمسكي

مها : لا ربنا يخليك

توبه : بلا وكسه (وحط الفلوس في جيب مها ) ياله

مها : أنا نازله معاه يا ماما شفيقه

الأم: عسل من بوقك ياخربيت طعامتك

في جانب آخر بعد ركوب مها العربيه مع توبه

توبه : ها رايحه فين كده

مها : أولا خد الفلوس بتاعتك والله ما عايزه حاجه كفايه اللي انت عامله معايا

توبه: خليها معاكي بس الوقتي رايحه فين بقى

مها : اقرب مكان اقدر اسحب منه فلوس

توبه : ماشي

مها : هو انت ليه بتتعامل معايا كده امسك فلوسك يا عم ٢٠٠ جنيه اي دي

توبه : اهو كل برغوت و على أد دمه

مها : برغوت

توبه : اه برغوت

مها : انت حر في نفسك برغوت برغوت

توبه : جلابيه البت أميره هتاكل منك حته

مها : اه شوفت عجباني اوي تعرف ان دي اول مره ألبس اللبس ده

توبه : اي خدمه

مها : لا و ماما شفيقه بتعمل طعميه تحفه بجد حاجه روعه

توبه : ماما شفيقه

مها : اه

توبه : المكنه اهي انزلي

مها : ممكن تيجي تقف جمبي

توبه : ليه أن شاء الله

مها : اصلي خايفه

توبه : انزلي بس اركن العربيه على جمب بدال ما هيا وقفه في نص الشارع كده

مها : ياعم انزل هو في حد في الشارع كله غيرنا

توبه : انزلي خلينا نخلص

مها : فك وشك كده خلي ربنا يرضى عليك

توبه : اهو اكتبي الرقم بقى خلينا نخلص

مها : ( بدأت تسحب الفلوس)

توبه : ما كفايه يا بنتي انتي رايحه فين على كل ده

مها : هقولك بس اصبر اخر مره

توبه : ماشي

مها : حلو كده ياله بينا

توبه : أنا عندي شغل خلي بالك

مها : ياعم اعتبر نفسك النهارده شغال معايا

توبه : لا شكراً انتي ترجعي عند ماما شفيقه وأنا اشوف شغلي

مها : استنا بس عايزه اشتري تليفون الأول

توبه : اركبي

مها : والله انت جدع بس مخبي جدعنتك ورا وشك المكشر ده

توبه : وماله

مها : توبه انت اتحبست اذاي بجد

توبه : انتي مش كنتي ورا الباب و سمعتي

مها : لا يعني جت اذاي المشكله أصلا منا مفهمتش حاجه

توبه : لازم تعرفي يعني

مها : اه معلش ممكن تقولي

توبه : كنت على الدائري راجع من الشغل والساعه كانت اتنين بليل لقيت عربيه وقفه علي جمب قولت يمكن يكون زميل عطلان ولا حاجه ركنت العربيه ورجعت اشوف في اي لقيت بنت وولدين وكانت بتستنجد منهم وقفت معاها وضربت العيال وخدتها روحنا القسم وعملنا محضر اتاري الواد أبوه طلع لواء سابق وليه معارف وبتاع لقيت نفسي خاطف البت و لابس قضيه شروع في قتل جم خدوني من البيت حتى الظابط اللي كان كاتب المحضر راح حلايب وشلاتين ( وبيضحك)

مها : ينهار اسود والبنت ليه عملت كده

توبه : بيني وبينك جتلي بعد ما اتحكم عليا وقالت لي أنها طلعت حامل و الواد كتب عليها وطلقها بعد ما ولدت وخدت مبلغ كويس أنا كده كده كنت لبست ٧ سنين ف خلاص مش فارقه معايا حاجه

مها : ينهار ابيض سبع سنين

توبه : أكلتي دماغي محل التليفونات اهو انزلي

مها : انزل معايا

توبه : ياله

بعد ما اشتريت مها التليفون وراجعه مع توبه العربيه جت عربيه خبطت عربيه توبه من الخلف

مها : ( بصت ل توبه وحتط أيديها على بوقها )

توبه : ( من الصدمه مش عارف يتكلم )

صاحب العربية التانيه : فين الحمار صاحب العربية دي

توبه : حقك والله حمار فعلا

صاحب العربية: دي ركنها يركنها

توبه : لا ودخل السنتر ولا كانه معطل الدنيا

صاحب العربية: أنا بقى هحرق قلبه عليها ( وطلع شومه من عربيته وعايز يكسر زجاج العربية)

توبه : بس الله يهديك ملوش لازمه أنا قاعد مستني أمه هنا

صاحب العربية: أنا هقتل أمه

مها : انت بتكلمنا كده ليه ما تولع عربيتك دي عربيه تعبانه حتى

صاحب العربية: ( بص ل توبه بغضب ) انت صاحب العربية

توبه : تخيل

واحد من الناس في الطريق

خلاص ياعم ما الراجل مضرور اكتر منك عدي الطريق بقى

توبه : خلاص يا استاذ حقك عليا وانا متكلف ب حق تصليح عربيتك

صاحب العربية: مش عايز منك زفت اوعا من وشي ياعم

مها : انت اذاي تسيبه يكلمك كده ما تضربه

توبه : يعني أنا غلطان وكمان اضرب الراجل بعدين الحمد لله أنه مرضيش يسبني اعمل العربية ممعيش جنيه أصلا

مها : أنا معايا فلوس انت مالك

توبه : أنا من يوم ما شوفتك وأنا في بلاء عظيم اقسم بالله اركبي ده لو كان في حاجة لسه باقيه نركبها الله يحرقك

مها : هو الراجل يضربك تطلع غلبك فيا

توبه : يضربني

مها : اه يضربك

توبه : مش جبتي التليفون

مها : اه

توبه : كلمي أبوكي ابوس ايد أبوكي

مها : طب امشي وقف ليه

توبه : العربيه عطلانه هنزل اشوف فيها اي رني على أبوكي انتي

مها : برن اهو ياعم الله

توبه : هو كان يوم اغبر والله

مها : ألو بابا انا مها ( وبدأت تبكي )

توبه : يابت بس يخربيتك الناس تقول خاطفك

الأب: مها مالك في اي

مها : شوفت الحيوان طليقي

الأب : ماله

مها : كسر البيت عليا وكان عايز يقتلني يا ارجع معاه

توبه : احكيله أنا عملت اي ها

الأب : ابن الكلب وحياتك عندي منا سايبه المؤتمر ينتهي بس و ارجع مصر

مها : أنا مش عارفه اعمل اي

توبه : قوليلوا طيب اني عامل معاكي الصح

الأب : انتي فين طيب الوقتي

مها : قاعده عند ناس غريبه

توبه : نعم يا روح امك ناس غريبه ليه أن شاء الله بنمشي على أيدينا

مها : بس ياض

الأب : مين ده في اي عندك

مها : ده الراجل اللي قعده عنده متقلقش عليا أنا في مكان أمن لحد ما ترجع

توبه : نعم يا روح امك لحد ما يرجع انتي هتتسلبطي علينا

الأب : طب انتي محتاجه فلوس عبال ما أنزل ولا محتاجه حاجه

مها ؛ لا يا حبيبي معايا فلوس الحمد لله انت بس خلي بالك من نفسك علشان خاطري أنا طلعت من غيرك مليش لازمه لو سبتني الكلاب تاكلني

توبه : ( حركه غير أخلاقية)

مها : يا قليل الأدب

توبه : أنا كلاب ياللي معندكيش دم يا عديمه الأصل

الأب: في اي عندك يا مها

مها : مفيش يا حبيبي سلام

الأب: سلام

توبه : ( شد مها من كتفها ) انزلي من العربية

مها : انزل هو انت اشترتني كل شويه قله قيمه أنا بنت ناس

توبه : جدعه ياله بقى خدي جمب علشان امشي اوعي كده كتك البلا

مها : راجل انت كده

توبه : نعم

مها : لما تنزل واحده ست في نص الشارع من غير راجل وانت عارف أن في ناس عايزه تقتلني ( وبدأت تبكي )

توبه : حكمتك يارب

مها : امشي يا توبه امشي

توبه : اركبي

مها : لا مش

توبه : (قطع كلام مها وبصوت عالي) اركبي

مها : حاضر ياعم انت خلقي ليه كده الله

توبه : صوت نفسك لو سمعته انتي عارفه هعمل اي

مها : عارفه عارفه

توبه : ( خد مها على البيت وتحت البيت قابل عم سراج)

عم سراج: اي ده يا توبه الله يخربيتك العربيه بقيت كفته ينفع كده وبرضه معاك نسوان

توبه: ياعم دي هيا هيا بنت خالتي بس وشها وحش بعيد عنك

عم سراج: عملت اي تاني في العربيه

توبه : عم سراج أنا رايح التوكيل سبني بقى امشي بدال ما أتأخر عليهم

سراج: امشي يا توبه معاك مهله لحد بليل انت حر يا توبه

توبه : اطلعي البيت ياستي ياله

مها : انت معاك فلوس تروح التوكيل

توبه : اقوله اي يعني لازم اقوله كده

مها : طب خلاص رغم الكلام اللي قولته واني وشي وحش إلا أني مش هتكلم و هنزل من العربية

توبه : الله يكرمك سلام ياست

بعد ما خرج توبه من المنطقة

مها : أونكل سراج

عم سراج: اي أونكل دي يابنتي عيب الكلمه دي ل راجل مهم في البلد زاي حلاتي كده

مها : ( سكتت شويه علشان تختار اسم تنده بي سراج )

مها : طب حج سراج حلوه

عم سراج: أنا عملت عمره قوليلي يا عمري

مها : اي ده بجد هو اللي يعمل عمره الناس تقوله يا عمري

عم سراج: أومال اي

مها: طب بص خد الفلوس دي

عم سراج: من يد ما نعدمها فلوس اي دي

مها : تصليح عربيتك

عم سراج: ما توبه راح يصلح العربية انتي مبرشمه ولا اي

مها : يعني اي مبرشمه

عم سراج: اقطع دراعي أن كنتي من منطقة شعبيه شكلك بنت أكابر

مها : خود الفلوس بقى و سيب توبه في حاله

عم سراج: هاتي يا قمر

مها : شكرا يا عمو سراج

من بلكونه البيت

شفيقه: بت يا مها حد مضايقك

مها : لا يا ماما شفيقه

شفيقه: الواد توبه فين

مها : راح الشغل

شفيقه : طب اطلعي

مها : أجيب أسنكس وطالعه

شفيقه: تاكسي اي يا بت اللي عايزه تجيبه اطلعي وتوبه جاي يوديكي اطلعي بلا هم

مها : سنكي يا ماما سنكي

شفيقه : والله ما في الكلام ده إلا تاكسي قال ( ودخلت من البلكونه )

عم رمضان: مالك يا بنتي في اي

مها: أنا أعرف حضرتك صح

عم رمضان: أنا صاحب توبه الروح بالروح

مها : ممكن تقولي مين بيبيع سنكي هنا

رمضان: يخربيت امك انتي طلعتي بتشربي الله يعينك يا توبه ( ولف وشه ومشي )

مها : لو سمحت

ام سمير: نعم يا حبيبتي

مها : عندك سنكي

ام سمير: واد يا سمير تعالى شوف البت القمر دي عايزه اي

سمير : هيا الحاره دي فيها حد يعرف حاجه عن القمر دول شويه مقشفين ياما

مها : ياساتر يارب مين ده

سمير: يالهوي انتي بجد

مها : بس بس اي ده عايزه سنكس

سمير: هاتي ( وخد الفلوس من مها ) خدي

مها : اي ده

سمير : بوزو و قلبظ كمان

مها : ايدي يخربيتك ( وخدت الاكياس وطلعت البيت )

في جانب آخر

توبه : يابيه بلاها مخالفه كل سنه وانت طيب ( وحط ١٠٠ جنيه في جيب الأمين )

الأمين : اي ده ١٠٠ جنيه بس لا متنفعش

توبه : ياعم أنا لسه طالع هو أنا عملت عشرين جنيه أصلا دي من جيبي

الأمين : شوف واحده تانيه

توبه : وعهد الله لو علقتني من رجلي ونفضت فيا ليل نهار ما هطلع مني إلا خمسه جنيه نهارك أبيض بقى

الأمين : عيل بكس امشي

توبه : تسلم يا عم نسور مصر

توبه : ( ارجع البيت انا ازاي الوقتي زمان عم سراج قاعد تحت البيت اعمل اي أنا بقى الله يحرقك يامها يابنت الشبرويشي قادر يا كريم)

وبعد اللف في الشارع قرر توبه الرجوع الى المنزل وكان عم سراج تحت البيت

توبه : ( يخربيتك مش بتنام ولا بتعمل حمام حتى قاعد لي في الشارع كده على طول وجعلنا من بين أيديهم سدا ومن خلفهم سدا يارب تعما ما تشوفني يا بعيد )

عم سراج: توبه واد يا توبه

توبه : دا انت محتاج عمل سفلي مش اقرأ عليك قرآن يا بعيد

عم سراج : بتقول اي يا توبه

توبه : التوكيل قفل يا عم سراج شوف الحظ

عم سراج: ياولا أنا بنده عليك علشان اقولك اعمل العربية على أقل أقل اقل من مهلك يا حبيبي هو الدنيا طارت

توبه : ( وقف مستغرب وساكت)

عم سراج: الله ماله ده واد يا توبه

توبه : انت قولت اي يا عمهم معلش علشان سمعت كلام يحبس معلش

عم سراج: لا يا حبيبي اللي سمعته صح أنا فعلاً بقولك خد راحتك

توبه : معقول الكلام ده

عم سراج: الله مالك يا ولا

توبه : وجعلنا من بين أيديهم سدا ومن خلفهم سدا

عم سراج: هو أنا شيطان ياض

توبه : شكلك كده ياعم سراج

عم سراج: على العموم أنا عملت اللي عليا سلام أنا بقى

توبه : اي ده كمان هتمشي من تحت بيتي دا انا كنت فاكرك لقيط وربنا

عم سراج: لا أصل فاضل اربع دقائق وامك ترمي جردل مياه من فوق ( و ساب توبه ومشي)

توبه: اربع دقائق اي هو الراجل ده ماله هو أنا بحلم

وفجأة نزل جردل مياه على دماغ توبه

شفيقه: يالهوي توبه هيا جت فيك

توبه : يابن الجزمه حتى ميعاد الجردل عارفه

توبه : اي ده بس يا شفيقه

الأم: معلش يا توبه حظك كده بقى

توبه : هو في حد يرمي المياه من البلكونه كده أصلا

مها : توبه

توبه : نعم انتي كمان

مها : ادخل خد شاور علشان المياه دي ريحتها وحشه اوي

الأم: بس يابت بقى بلاش تضحكي على الواد

توبه : خلاص أنا مش شامم ريحه لبسي مثلاً

أميره : ياساتر اي الريحه دي

توبه : أسألي امك أنا داخل استحما حضري الاكل يا شفيقه

الأم: ماشي يا حبيبي

في جانب آخر

طاهر : ادخل

سعد : طاهر بيه جبتلك عنوان الواد من أرقام العربية بتاعته

طاهر: حلو اوي ساكن فين الواد ده

سعد : ساكن في -----------

طاهر : دي منطقه شعبيه

سعد : للأسف هيا دي المشكلة

طاهر : مش هينفع حد يدخل ياخد الواد من هناك الف مين يقف معاه

سعد : حضرتك شايف اي

طاهر : اسمع يا سعد اللي هقولك عليه يتعمل بالحرف انت فاهم

سعد : تحت امرك يا فندم

في جانب آخر

أميره : ما تنامي يا بنتي

مها : مش جيلي نوم

أميره : خير مالك

مها : مفيش بس تعرفي توبه ده تركيبه غريبه اوي

أميره : لي يعني

مها : يعني جدع كده ومش بتاع مصالح وشايل أهله ظروفه صعبه جدا بس ميحبش ياخد حاجه من حد يعني رغم كل اللي هو في ده مصمم يقف معايا ومش عايز ياخد منه جنيه رغم اني سبب كل حاجه وحشه حصلت معاه

أميره : لا اصل توبه ده هو الفقر ب عينه يوم ما خد الشهاده أبوه مات ساب حلمه واشتغل اوبر حب واحده ابن خالتها جه من الكويت اتجوزها خد جمعيه كبيره راح ساب عربون عربيه ملكه طلع صاحب العربية نصاب وضحك عليه أشتغل في شركه وكانت حلوه الشركه أفلست وقفلت رجع اشتغل اوبر أتحبس سبع سنين خرج من السجن دور على شغل قامت الثورة في مصر ومحدش بقى لاقي ياكل ويوم ما خد عربيه عم سراج يشتغل عليها اتكسرت منه ومش عارف يصلح العربية اذاي

مها : ياخبر ليه هو عنده كام سنه على كل ده

أميره : هما ٣٠ سنه

مها : يالهوي اي كم الفقر ده

أميره : بس عارفه والله رغم كل ده بعد حبس توبه أتعرض عليه مليون مره سكك مش حلوه وفيها فلوس كتير بس هو راجل و ميحبش الحرام خالص ولا ليه في السكك دي

مها : اقولك حاجه

أميره : قولي

مها : يا بختك بيه والله

في اليوم التالي

توبه : اي ده يا شفيقه

شفيقه: فطار يا توبه مالك في اي

توبه : الله هو أنا قولت حاجه أنا بسال بس

شفيقه: رايح فين يا واد

توبه : الحمد لله تمام كده

شفيقه: يا واد أفطر

توبه : حد يفطر عجه على الصبح يا شفيقه الله يهديكي علينا ياستي سلام

شفيقه: سلام يا اخويا ربنا معاك يا ابن الهبله

توبه : فتاح يا عليم يا رزاق يا كريم عايز اي يا ابو صيام

عم رمضان: شوفتلك حتت حلم

توبه : خليه ل نفسك الله يكرمك نهارك أبيض

عم رمضان: ياض اسمع بس

توبه : ياعم احلم ل نفسك الله يكرمك ملكش دعوه ب أهلي وسع كده بدال ما ادوس على دماغك اللي مفيش وراها غير تحلملي دي

اثناء الخروج من المنطقة واحد أشار إلى توبه

توبه : تحت امرك يا مدير

العميل : فاضي ياسطا

توبه : اي هقعد معاك شويه ولا اي

العميل : اكتوبر ياعم

توبه : يخربيت دي محافظة اركب

العميل : ياعم مالك أنا هعمل معاك الصح

توبه : والله ما بحب الكلمه دي بس خلينا نشوف الاصطباحه رايحه فين

العميل : منين يا سطا

توبه : مكان ما خدتك وانت منين

العميل: اخوك سيد من اكتوبر

توبه : اجدع ناس يا عرب

سيد : في مصنع عايز ناس معاهم عربيات تشتغل معاهم تيجي

توبه : النظام اي يعني

سيد : ياعم دي ناس كويسه اوي اللي عايزه تاخده بس اهم حاجه عايزين الالتزام في الشغل

توبه : ياعم أنا صايع كده كده بس هما يقدروا

سيد : خلاص خش اليمين الجاي ده

توبه : على فين يا عرب

سيد : نروح المصنع يمكن يكون ليك لقمه عيش في

توبه : ياعم مفيش مانع ربنا يعوض علينا حق المشوار

سيد : ياعم هتاخد حقك والله ملوش دعوه

توبه : حقه ياعرب لو طلع كلامك صح يبقا والله تدبير ربك

سيد: بس هو المصنع ده

توبه : اه شكله ذات قيمه كمان

سيد : انزل انزل

توبه : وماله ( ونزل من العربية وقفل العربية)

سيد. : تعالي يا توبه

توبه : عرفت أسمي منين يا عرب

سيد : ياعم عيب عليك

توبه : شكلها حفله على دماغي دي يا عرب بس خلي بالك انت صورتك اتحفرت في عقل اخوك

سيد : ( بيضحك ) ياعم ادخل تعالي

توبه : ( أول ما شاف طاهر بيه) عم الناس اي الغيبه دي كلها

طاهر بيه: وحيات امك

توبه : الله مالك بس يا بيه

طاهر: مها فين ياض

توبه : مها مين

سيد : ( ضرب توبه على رأسه ) اتكلم يالا

توبه : يخربيت امك ايدك تقيله يا عرب مش كده

طاهر: انت فاكر نفسك طالع من هنا غير لما اسمع منك اللي أنا عايزه

توبه : يا غالي اهدا أنا مش فاهم حاجه انت عايز مني اي وأنا عيني ليك

طاهر: عايز مها ومش عايز منك حاجه تانيه

توبه : مدام مها مش عندي مع أبوها في شقه كده في وسط البلد عايز تروح اتفضل معايا اوديك و ننجز القصه دي بس وربنا ما هتحرك قبل ما سيد يدفع تمن المشوار اللي خدته لحد ما وصلت هنا وحضرتك تدفع تمن المشوار بتاع وسط البلد جاي من حضرتك ولا هتقعد تشرب في سجاير وتضيع وقتك و وقتي

طاهر: يعني انت عارف مكان بيتهم الجديد

توبه : وغلوتك عندي اعرفه

طاهر: هو أبوه كان فين

توبه : كان مسافر بره مصر و روحنا المطار خدناه ورجعنا على البيت اللي بقولك عليه عيب عليك يا باشا أنا مش هكدب عليك

طاهر : سيد خد الواد ده وروح معاه هات مها وتعالي

سيد : تحت امرك يا طاهر بيه

توبه : لا لأ وحد الله كده أنا عايز منك ٢٠٠ جنيه ومن الباشا ٦٠٠ جنيه قبل ما أتحرك

سيد : ياض امشي بقولك

توبه : لا وربنا ما خارج من هنا

طاهر: سيد خلاص خد يا توبه ألف جنيه اهو مش ٨٠٠ بس عارف لو طلعت بتلعب علينا

توبه : باشا هو انت نجيله ألعب عليكم ياله يا عرب خلينا ننهي القصه دي

سيد : امشي

توبه : ياله ياعم الوحش انت

اثناء الطريق

توبه : كده ياعرب عيب علي جسمك حتى

سيد : انت مش خدت اللي عايزه متبقاش لمض وامشي بقى

توبه : ياعم سهله

سيد : انت رايح فين كده

توبه : ياعم أسند ضهرك انت بقى و ملكش دعوه اروح فين انت مش ليك اخر الطريق توصل ل الهدف

سيد : اه

توبه : الشارع اللي وراه

سيد : ولا خلي بالك أنا على أخري

توبه : اهو ادي العربية بتقطع شكلك مش سالك يخربيتك

سيد : في اي

توبه : نازل اشوف في اي متلعبش في حاجه

سيد : استنا نازل معاك

توبه : طب ما تنزل اي اجي أسندك

سيد : مش بقولك لمض

توبه : ( فتح كبوت العربية وبدأ يربط شويه خراطيم ) دور العربية كده يا حبيب اخوك

سيد : استنا

توبه : ( طلع شومه صغيره ورا ضهره )

سيد : تمام أنجز بقى

توبه : سيد تعرف أبو الهول

سيد : ماله

توبه : بيقولك خد دول ( وضرب سيد علي دماغه ) أنا عارف ابن الجزمه بيجيب الأحجام دي منين انزل ياعم ( وشد سيد من العربية وخد العربيه وطلع على اقرب مستشفى علشان الجرح اللي كان في أيده )

في المستشفى

الدكتور: عايز خياطه

توبه : ماشي كام غرزه دي

الدكتور: أربعه بس خليك بره شويه وهنده عليك

توبه : خلاص ماشي

اثناء جلوس توبه قصاد باب الدكتور جت ست كبيره على كرسي متحرك معاها اتنين أولادها

الإبن: ماما خليكي هنا يا حبيبتي لحد ما اشوف دكتور وجاي خليك انت معاها

الاخ : ماشي

توبه : ( مع الإبن اللي وقف مع أمه ) خلي بالك شكلها بتحتضر

الإبن: ياعم بعد الشر اسكت

توبه : طب روح شوف دكتور بسرعه أنا وقف جمبها

الإبن : حاضر ( وجري يبحث عن الدكتور)

توبه : ياما انتي كويسه ردي عليا طب قولي ورايا اشهد ان لا اله الا الله قولي حركي شفيفك

الأم: ( بدأت تحرك فمها )

توبه : وأن محمد رسول الله

الدكتور: في اي وسع كده

توبه : حاضر

الدكتور: (بعد الكشف ) البقاء لله

الابناء في حاله حزن

توبه : ( مع الابن الأكبر ) ياعم محدش ليه في نفسه حاجه وحد الله دي ست طيبه والله أنا لقنتها الشهاده الحمد لله قبل ما تموت

الإبن : شهادة اي

توبه : الشهاده ياعم انت عبيط ولا اي

الإبن : الله يخربيتك احنا مسيحين

توبه : نعم

الإبن : مش هسيبك

توبه : ياعم اوعا ايدك بس كده

الدكتور: حد يسند الست بدال ما تقع من على الكرسي

توبه : سلام أنا ( وخرج من المستشفى جري على البيت بيخبط فتح الباب واحد غريب)

توبه : مش دي شقتنا تقريباً

الشخص الغريب: اكيد انت توبه

توبه : انت مين

الشخص: أنا محمد الشبرويشي والد مها

توبه : حمدالله على السلامه يا دكتور حضرتك جيت في وقتك والله

الوالد : ربنا يخليك يارب

توبه : حضرتك بقى تاخد الكتكوته بتاعتنا رغم أن القلب يحزن على فرق مها بس هعمل اي ربنا يوفقك انت وهيا مع السلامه مع السلامه

الأب: يا ابني افهم في اي

توبه : قول يا عمهم

الأب: أنا متشكر جدا جدا على اللي عملته مع بنتي وعارف أن مش اي حد يعمل كده علشان كده أنا عايزك تيجي معانا انت و أهلك كمان

توبه : اجي فين

الأب : القصر بتاعي وفي مكان خارج القصر تعيش في انت و أهلك وكمان شغلك معايا من النهارده المرتب اللي يطلع من بوقك مفيش مانع أنا موفق عليه

توبه : لا لا مفيش حاجه لكل ده يا دكتور دا واجب عليا واي حد مكاني هيعمل كده

الدكتور: والله ابدا أنا أصلا مش هكون مطمئن على بنتي غير في وجودك لاني بسافر كتير تكون انت جمب مها اضمن لينا كلنا

توبه : صدقني والله ما ينفع معلش يا دكتور

شفيقه واميره خارجين كل واحده معاها شنطة لبسه

توبه : اي ده يا شفيقه

شفيقه : خليك انت قاعد هنا بقى

مها : الشقه كلها عندك اهي عيش فيها أنا هاخد أميره و شفيقه معايا

الدكتور: ياله بقى يا توبه

توبه : اعمل اي بس بعد ما الشقه بقيت على البلاط

مها : شنطتك في العربيه تحت ياله خد شنطه شفيقه وانزل

توبه : والعربية بتاعتي

محمد بيه : انزل بس سيبك منها

بعد الوصول إلى القصر

شفيقه: اي ده يا واد يا توبه هو في كده

توبه : في ياما اسكتي لحد ما نعرف مكنا فين

شفيقه: يارب يكون الشقه اللي هناك دي

محمد بيه: توبه دخل أهلك وتعالي

توبه : مكشوف عنك الحجاب يا شفيقه ادخلي

مها : الله الجنينه حلوه اوي يا توبه

توبه : دي شقه ولا فيلا اي كل الفرش ده

شفيقه: شكلها لعبت معاك يابن الفقريه

توبه : مع مين بس ياما دا انا توبه

في الصباح على باب غرفه توبه مها تدق الباب

توبه : بس يا شفيقه الساعه سته الصبح عايز اتخمد

مها : ( فتحت الباب) انت ياعم أصحا

توبه : لا نهارك ازرق أنا مش علشان قاعد في بيتكم خلاص كل خمس دقائق تنطي فوق دماغي

مها : في حد يقول لي حد على الصبح نهارك أزرق

توبه : اقفلي النور

مها : قوم عايزه اروح مشوار

توبه : هو أنا مالي ما تروحي

مها : هو أنا مقولتش ل حضرتك

توبه : قولتي اي

مها : مش انت بقيت السواق بتاعي

توبه : لا مش عايز يفتح الله روحي شوفي رايحه فين

مها : ياعم هو أنا بسألك أنا خلاص استقريت على انك تكون السواق بتاعي

توبه : وأنا استقريت اني مش عايز الوظيفه دي

شفيقه : توبه الفطار جاهز

توبه : فطار اي يا شفيقه

شفيقه : قوم يابن الهبله علشان تشوف شغلك

توبه : ياما بلاش تعومي على عوم البت دي

اميره : مها انتي رايحه لحد فين كده

مها : انتي رايحه فين

اميره : وسط البلد

مها : خلاص نروح نوديكي وبعدين نروح المشوار بتاعنا ثما أنا عايزه توبه يعلمك السواقه تخدي العربية تروحي و تيجي بيها من الجامعة

اميره : احلفي

مها: احلف ليه لو مش مصدقه اخرجي خدي اي عربيه من بره

توبه : جدعه وخدي معاكي مها المشوار اللي عايزه تروح في

مها : محدش فينا بيعرف يسوق

توبه: مش لازم تتعلمي السواقه الاشكال اللي زيكم مهما يعملوا مش بيموتوا الدنيا بتاخد الناس المهمة بس

مها : ( شدت البطانيه من على توبه ) طب اهو خليك في التلج ده

توبه : مها عايزه اي بجد عايز أنام

مها : عايزه اروح وسط البلد علشان اميره وبعدين نطلع التجمع ضروري جدا جدا جدا

توبه : علشان اخلاص من الذن وسعي كده علشان ألبس

شفيقه: ياله نفطر يا ولاد

توبه : مش متنيل

مها : تسلم ايدك يا ماما شفيقه أنا مستعجله اوي

شفيقه: أنا غلطانه وربنا اني تعبت نفسي

توبه : امشي انتي وهيا خلينا نخلص

بعد الخروج الي جراج سيارات الخاص بي العائلة

مها : اختار عربيه نروح بيها

توبه : اي ده يخربيتك انتوا اكيد حراميه أعضاء

مها : لا

توبه : اي العربيات دي كلها

مها : أما انت فاكر اي مش بقولك بنت ناس يا ابني

توبه : ماشي يا ستي احنا ناخد المرسيدس شكلها اخر شياكه

مها : ماشي ياله يا اميره ( وفتحت الباب وركبت في الكرسي الخلفي مع اميره )

توبه : اي ده أن شاء الله هو أنا شغال عندكم ولا اي

اميره : والنبي يا توبه خليني اجرب

توبه : ماشي يا ستي ( وركب العربية) علي فين

اميره: الجامعة وبعدين مكان ما تروحوا

مها : معلش يا توبه اخر اليوم نروح نجيب اميره المشوار بعيد عليها اوي

توبه : ماشي ( وبدأ يتحرك ب العربية)

في جانب آخر

سعد : طاهر بيه والد مدام مها بره

طاهر : هو جه من السفر

سعد : اه وقاعد بره ( وفجأة باب المكتب اتفتح)

محمد بيه : طاهر المرادي أنا جيت لحد مكتبك علشان اقولك اللي حصل مع بنتي في غيابي مش كويس ولا ليك ولا لأي شخص يفكر يعمل ده مع حد يخص محمد الشبرويشي

طاهر : يا محمد بيه أنا عملت ب نصيحه حضرتك و عرضت نفسي من تاني على مها لجل أنها تكمل معايا

محمد بيه: وأنا مش جاي علشان اقولك اه أو لا بس اقسم بالله يا طاهر لو سمعت أن مها شافت وشك صدفه في مكان هيا في اقسم بالله الدبان الأزرق ما هيعرف طريقك انت فاهم ولا لأ

طاهر: فاهم يا محمد بيه فاهم بس حضرتك لازم تسمعني

محمد بيه: لالالا زمان الكلام ده انتها لولا الولد اللي وقف جمب بنتي طول فترة غيابي يا عالم كنت هتعمل اي مع بنتي بس من النهارده يا طاهر عيوني عليك وانت عارف يعني اي عيوني عليك

طاهر: عارف يا محمد بيه عارف

محمد بيه: أنا حظرت وانت حر اختيارك (وخرج من المكتب)

في جانب آخر

بعد نزول اميره من العربية قصاد الجامعه نزلت مها ركبت جمب توبه

توبه : يا ساتر عايزه اي

مها : يعني ارجع مكاني تاني

توبه : لا خليكي

مها : التجمع بقا

توبه : رايحه تعملي اي

مها : اخاف اقولك تقولي لأ وترجع بينا على البيت

توبه : لا والله قولي

مها : انت حلفت صح

توبه: اه

مها : نشرب قهوه في مكان بحبه اوي

توبه : يعني دون كل كافيهات مصر وكل الكوكب عايزه تروحي من الشرق للغرب علشان نشرب قهوه

مها : انت حلفت

توبه : لو كنت اعرف اقسم بالله ما كنت حلفت

مها : ياله بقى على هناك

توبه : اربطي حزامك طب

مها : اهو أطلع بقا

بعد الوصول إلى الكافية

توبه : كنا أترمينا في اي مكان قريب من جامعه البت بدال المرمطه دي ياست زفت

مها : يابني انت لسانك ده اي ميقدرش يتكلم كويس شويه

توبه : ما صحيح مش ناقصه فرسه

مها : طب خلاص بقى سبني أشرب قهوتي كده و استعيد ذكرياتي

توبه : أشربي يا ستي

مها : تعرف يا توبه أنا اخر مره حسيت فيها ب أمان كان امتا

توبه: امتا

مها : من قبل ما اتجوز والله ما فاكره كان امتا بس أنا تعبت اوي في المرحلة دي بجد خدت مني مجهود لا يحتمل أنا لحد الوقتي تعبانه نفسياً اوي كل ما افتكر اللي عديت بي اتعب اكتر (وبدأت تبكي)

توبه : لالا اهدي كده بلاش الكلام ده أنا عايزك تنسي وتعيشي حياتك مش كل الناس زاي بعض بكره ربنا يكرمك ب الراجل اللي تعيشي معاه كل حاجه كان نفسك فيها اعتبري نفسك كنتي في درس من دروس الحياه

مها : بس كان درس متعب بكل ما في انت مش عارف طاهر ده أذاني أد اي رغم أن فتره الزواج كانت سنتين بس إلا أني شوفت العجب والله يا توبه

توبه : بكره ربنا يرزقك ب اللي احسن و احسن بس انتي خلي عندك صبر وخليكي أد المسؤلية

مها : توبه

توبه : مش هنتنيل نشرب القهوه النهارده انا عارف عايزه اي تاني

مها : أنا متشكره اوي على كل حاجه عملتها معايا انت وقفت جمبي وقفه اقسم بالله ما كنت متخيله أن في حد ممكن يقف جمب حد كده بدون مقابل

توبه : يارب يتمر بس

مها : بس بقى بتكلم بجد

توبه : مها أنا عايز اقولك حاجه مهما جدا وبجد

مها : قول

توبه : اللي زاي حلاتي متعود يرمي جدعانه وميخدش حقها اللي زاي حلاتي محطه تقفي فيها وتكملي طريقك عادي مش محطه تركني فيها كلامي ممكن يكون مش مفهوم ليكي ولو فهمتي كلامي ممكن تقولي أنا ليه قولت كده بس مع الوقت حاسس أننا هنروح الحته دي والحته دي انتي مش قدها وأنا مقبلش اكون في المنظر ده قصاد نفسي و أهلي

مها : انت ليه بتقول كده يا توبه

توبه : علشان اللي شوفته في عينك الوقتي يامها

مها : انت بتقول اي يا توبه أنا مش فاهمه حاجه منك أنا واخده منك انك مش بتاع ألغاز وبتقول اللي في قلبك أول ب أول

توبه : وأنا قولت بس انتي بتنكري يبقا اعتبري اني مقولتش حاجه اشربي القهوه

مها : ماشي

توبه : اقوم أحاسب عبال ما تشربي ولا حابه تكملي هنا شويه

مها : تقوم اي ياعم هو الراجل جاي لحد هنا انت غاوي تتعب نفسك

توبه : كنت فاكرها شبه القهوه بتاعت عم سراج الله يحرقه لازم تدخلي لحد الواد جوه لحسن لو جالي يبقا نهاري ازرق

مها : ليه يعني

توبه : حرامي قديم

مها : ( بتضحك)

عامل الكافية: اي خدمات تاني يا فندم

توبه : حبيبي تسلم حسابك كام

عامل الكافية: ثانيه ويكون الشيك عند حضرتك

توبه : نعم شيك

مها : تمام تمام اتفضل انت

توبه : اتفضل اي بيقولك شيك

مها : هو هنا التعامل كده ياعم اهدا انت

توبه : لا أنا مش بحب السلبطه

مها : يعني اي سلبطه دي

توبه : مش علشان أنا اللي هدفع تسحبيني في شيك وبتاع

مها : ياعم أنا اللي هدفع اسكت انت

توبه : لا معلش عيب في حقي بعد كده تيجي لوحدك

مها : يا توبه اهدا في اي

توبه : بلا توبه بلا بتاع هات ياعم الشيك ده كده وريني بيقول اي

عامل الكافية: اتفضل يا فندم

توبه : ٨٠٠ جنيه في اتنين قهوه و قرصه

عامل الكافية: حضرتك دي مش قرصه دي كرواسون ب عجينه سينابون

توبه : زينبون مين

مها : توبه اسمع بس

توبه : ريحي انتي بس أنا بكلم الراجل

عامل الكافية: حضرتك تقدر تدخل ل مدير الفرع

توبه : ياعم ادخل هو يعني كان مدير أمن القاهرة

عامل الكافية: يا فندم حضرتك زعلان ليه بس

توبه : ياعم ازاي مزعلش أنا الاتنين قهوه و القرصه دي أخرهم معايا ٤٠ جنيه جايه معاك

مها : بس هات الشيك

توبه : هات ياعم هيا شغلانه طين أمسك

عامل الكافية: نورت يا فندم

توبه : طبعاً نورت مش دافع ٨٠٠ جنيه في شويه هري

مها : ياله نمشي كفايه فضايح

توبه : هو أنا هعدي القصه دي معاكي على خير امشي قصادي

مها : ( بتضحك و كتمه الضحكه)

توبه : يعني أنا عمال اقولك حرامي حرامي تروحي انتي جيباني عند زعيم العصابة وربنا ما تنعاد تاني

مها: ياعم اهدا منا عماله اقولك عندي أنا المرادي عندي أنا وأنت اللي مصمم

توبه : يعني أنا قاعد وانتي تطلعي فلوس تحاسبي انتي فاكره نفسك قاعدة مع سوسن

مها : ياعم لا بس الوقتي خلينا نتكلم بالعقل

توبه : عقل اي بعد ما بقيت على الحديد يابنت

مها : بس اهدا كده عيب خلينا نتكلم بالعقل

توبه : اتفضلي

مها : الوقتي انت شغال مع بابا حلو كده بلاش شغال معايا

توبه : وماله

مها : والمفروض انك بدأت شغل من النهارده صح

توبه : حصل للأسف

مها : حضرتك ولا راضي تقول الراتب بتاعك ولا عايز تاخد فلوس ووخدني على نفقة الدولة هو ده ينفع

توبه : منا مش هعرف أخد منك فلوس أصرف بيها عليكي عيب يعني

مها : ياعم دي فلوس شغلك مش فلوس مني ثما بص قصادك كده العربية عايزه بنزين هتدفع حقه كمان

توبه : منين تجيها ما خدتيني الكافية طلعتيني منه أبيض

مها : طب اتفضل الفيزا بتاعتي حط بنزين ثم عايزه اعرف انت عايز راتب شهري كام

توبه : لا منا مش عارف يمكن اطلب رقم يطلع أضحك عليا

مها : اقدم سواق كان معانا كان بياخد عشر آلاف جنيه

توبه : حلو ده وانا راضي

مها : لا انت متعرفش دا بابا عامل ليك مرتب شهري اي

توبه : هو شكله ناشف

مها : اي ناشف دي

توبه : مش سخي يعني

مها : لا بالعكس خالص ده بابا كريم اوي والله

توبه : هو أبوكي اسمه محمد ولا كريم مش ناقص دوخه

مها : ياعم كفايه هزار بقا

توبه : شوفي البت وقفه في الشارع اذاي بسبب حضرتك

مها : أنزل اركب جمبها ورا بقا أنا

توبه : انزلي

بعد الوصول إلى المنزل

شفيقه: اي كل ده

توبه : اهو عبال ما بنتك خلصت

اميره : حرام عليك أنا في الشارع بقالي ساعه ونص مستنيه حضرتك

توبه : اي الشنط دي كلها

شفيقه : دا واحد كان معاه عربيه شكله بتاع التوصيل ده

اميره: دليفري

شفيقه : اه هو ده

توبه : مين قاله يجيب الحاجات دي يا شفيقه

شفيقه : قالي محمد بيه باعت الحاجات دي لحضرتك ودخل الشنط وخرج

توبه : لا كده كتير هو الناس دي بتعلفنا و ناويه تدبحنا ولا اي

شفيقه: اي تعلفنا دي يا حيوان

باب الشقه بيخبط

توبه : استني ياما انتي الوقتي ( وبيفتح الباب )

محمد بيه: توبه بعد اذنك فاضي

توبه : تحت امرك يا محمد بيه

محمد بيه: عايزك تيجي معايا مشوار ممكن ولا عندك حاجه

توبه : لا طبعاً تحت امرك ثانيه اجيب المفاتيح

محمد بيه: لالا دي عربيه مها أنا عندي عربيتي المفتاح اهو

توبه : تحت امرك ثانيه واكون عند حضرتك

محمد بيه: مستنيك في العربيه

توبه : ماشي

شفيقه: انت رايح فين تاني

توبه : الناس دي شكلها مش بتحب تقعد في البيت وانا مش ناقص قرف تعالي نرجع يا شفيقه بيتنا

شفيقه: نرجع فين احنا مسمار جحا و أدق هنا

توبه : سلام يا جحا

وخرج من البيت على العربية

محمد بيه : خلصت

توبه : تحت امرك يا فندم

محمد بيه: وديني الأول الشركه وبعد كده نروح المهندسين

توبه : تحت امرك ( وخرج بره الفيلا)

محمد بيه: انت رايح كده فين

توبه : الشركه

محمد بيه: الشركة مش من هنا انت كده ماشي غلط ارجع خش يمين

توبه : انت تعرف طريق مختصر يعني

محمد بيه: مختصر اي يابني (وبيضحك ) انت تعرف الشركه فين أصلا

توبه : اه طبعاً

محمد بيه: فين يا توبه

توبه : شارع الشركة في المطبعه يا مدير

محمد بيه : ( بيضحك ) شارع الشركة اي يخربيت عقلك

توبه : اي بس في اي

محمد بيه: يا توبه أنا قاصدي الشركه بتاعتي اللي في أكتوبر

توبه : شركه بتاعتك يعني مش بتاعه المطبعه