السلام عليكم
رواية طوفان رجل
الفصل 27
بداخلُنا حزن عميق لم يستوفِ حقهُ بالبكاء..
بداخلُنا خدشُ طفولة ، كبُرَ وصارَ صدعاً مع الأيام..
بداخلنا حب موؤود وحنين مبتور وأسرار لم نبُح بها يوماً..
بداخلنا مشاعر مدفونة تُربِكُنا تسرق من أعيننا النوم..
بداخلنا صرخات وآهات وغصات يوماً ما ستقتُلنا..
بداخلنا مدينة لا أضواء فيها ، هاجر ساكنيها ، منهم من أخذه الموت بعيداً وآخر رحلَ بطعنةِ نصيب وآخر لم تُعرَف أسباب رحيله..
(( فيصل))
......
صفنت تذكرت من لمن كتله انت قطار يلم شكو بدربه واني گاع ... يعني باقي اباله هذا الكلام وما ناسيه ...
تقربت منه كتله ان شاءالله بس هالمرة ياريت ما تنذكر وماتنعاد ...
مسح وجهه وتنهد قرب مني اكثر
كال بتوسل وهو يباوع عليه اشبكيني ...
رمشت بعيوني سديتهم حييل ..
لفيت اديه ورا راسه وحظنته و ظليت امسح على راسه امسح الى أنْ غفى كلش ...
بقيت اباوعله و افكر بقلق واتنهد ،
اووف ربي والله ماعايزه تعب يكفي الي شفته بحياتي من اول ما انولدت لهسه ياربي شوكت مكتوبلي ارتاح ....
غمضت عيوني ، الارق دمرني رجعت فتحت عيوني ظليت هم اباوع عليه واتساءل ياجبل شنو جواك وشنو الي مأذيك ؟؟؟
تافأفت الظاهر اني ماشايفة قهر مثلك لدرجة تسوي بيه عقد الحمدلله سليمة نفسيا لحد الان
اني سمعت هواي حجي عن صفصف وتعذبيها اله
وأذيتها بس شنو ياتره غير الي سمعته بعد !!
جنت اسمع هي جانت اموتته جوع وهذا الشي
اكثر مادرج على مسامعي ...
سحبت اديه من جواه ببطئ وهدوء ، هو فتح عيونه
بس بغير عالم عبالك ميشوف شي وبعدها بثانية وحدة
رجع غمضهم ...
تسللت من السرير بدون صوت ، اضوية الغرفة مطفية
بس ضوه الحديقة عاكس كالعادة
غطيته بلطف وهدوء بشرشف خفيف ورحت للتليفون
اخذته واتصلت على بيت جدي اريد احاجي العشگ
دكيت رقمهم بس مااجاني صوته رد وليد
كال الو
سلمت عليه شونك وليد
جاوب بلهفة مبينة بنبرة صوته
درة !
رديت اي اني جدي وينه ؟؟
تحسر و كال جدي سهران حاله من حالي البيت فرغ من بعدج درة وين جانت ايامنه سهراتنا كعداتنا على الاكل طلعاتنا اووف
سكتتت مااعندي اجابة ، انعصر گلبي عصر
كتله تسلم بس فدوه لاتنسى علاج جدي بوكته كون ياخذه و اني راح اتصل و بكل وكت اذكركم ...
سكتت شوية ورد ان شاءالله لتديرين بال اني وياه وياه. ..
جاوبته وينه جدي عفية صيحه اريد أسلم عليه
كال ان شاءالله تدللين بس انتظري لحظة ...
بينما ميودي لجدي سألني أنتِ شلونج شخبارج مرتاحة ان شاءالله
همست الحمدلله وحرصت توصله نبرتي واني مرتاحة
بس شلوني أني اوف والله تعبانة حيل ...
بعدها صاحه سلم عليه وماكدرنا نحجي كولشي الظاهر وليد فوك راسه لان حسيت كلامه رسمي سلمت عليه وكتله دير بالك على نفسك و سديته
اشتميت ريحة جگاير و انداريت وجان افز لكيته كاعد كبالي على التخم الي ببداية الغرفة وبيده جكاره
خليت ايدي على قلبي و كتله ادري غير تكول غير تحجي خلي اسمعلك نفس ع الاقل ليش تفززني هيج
ضحك و ابتسامته كمزتني
كال تصرفي مثل ماتحبيين لاتتقيدين بشي احب كولشي بيج ولاتفكرين بتصرفاتج شون ماتكون احبها انتي طفلتي المدللة عندي احب اشوف عفويتج ...
حكيت شعري باربع اصابعي مثل الي افلي
كال لاتفكرين
كتله شمدريك افكر
كال ادري هاي حركتج تسوينها من عندج شي براسج
ابتسمت كتله ماافهمك اني
كال المهم انتي يمي ...
يكولها بهيام ..
اني مكتفية بس اهز براسي ، هو فتح ايده اليمنه واشرلي بمعنى تعالي والجكاره بلحكه ...
رحت امشي بتملل وصرت بحضنه ..
طلع الجكاره من حلكه .. وظل يباوع بعيوني وعيونه تلمع وبيها نظرة حلوه ماعرف افسرها
ووهاي النظرة ماشايفتها بعيون احد من قبل
خله ايده على زندي ويتلمسه
كال انت شون تشعبتي وتفرعتي بداخلي وكمتي تجرين بدمي ... ليش وشلون !
وظل يأشر بايده على رموشي ويلزمهم ويحجي
ذني ليش هيج يسلبن روحي من اباوع بوجههجً ليش انسى الناس الي يمي والعالم والكحل بعيونج يفقد حتى ادراك عقلي خليني محتفظ بهيبتي جوه ولاتخلين كحل اترجاج
سألته ليش ؟
كال اظل صافن والكل ينتبه عليه
اني بس اهز براسي و داخلي اكول معقولة كلامه صحيح وهيج يحبني هو طول عمره جنت اصيحه عمو وماحسسني بشي لا اكيد يشفق عليه او يحبني لان اشبهه بهواي امور ...
ظروفنا كلها تتشابه اني وياه معقولة اذكره بنفسه!!
والله دخت وين انطي وجههي ياربي ...
صفنت .. خله ايده على خدي يتلمس بي
كال شبيج !
هزيت اكتافي وكمت كتله يله تكوم ننام ؟؟؟
كام بحيله و كال يله ...
مشيت وياه بغرفة النوم
ونفس الشي الاضوية من الحديقة عاكسة على الغرفة
لونها اصفر مزعج ومومريح للعين
انداريت وسألته هذه ماطفوها او قللوها على الأقل
كال لاء اني اكره الظلمة كتلج البارحة
كتله اني هم اخاف منها بس اذا وحدي
كلت ودنكت اعصر بأصابعي
باوع عليه كال يعني انتي هسه ماخايفة؟
باوعت ورجعت نزلت راسي و هزيته وكتله انت أمان أمان فيصل أمان ....
ضحك بصوت عالي ، رفعت راسي وهم ضحكت اني
....
كال سويتي عبارة خاصة بيه ....
ابتسمت كتله بس حافظ عليها اذا ضاعت ماترجع
كال لا هاي الثقة اكبرها ماتصغر ...
ابتسمت وهمست نشوف
رد عندج شك ؟
كعدت على السرير كتله مااعرف بس هسه نعسانة ...
تمددت واجه مدد يمي وحضني .. ..
لحظات من الصمت و اني مفتحة عيوني اباوع للسگف
الضوة عاكس على الكرستال الي بالثريا وادعي ربي ييسرلي أمري ويسعدني بحياتي ...
سألنيى؛ شنو تقرين ؟
كتله ايات قبل النوم جدي معلمني اقراها من اني طفلة
وماكطعت العادة
مدد صفح يطل بوجهي واني نايمة على ظهري
همس اقريها بصوت الي والج
وبديت اقرا اول شي قريت الفاتحة وبعدها المعوذات والكرسي وبعدين اصلي على النبي وال بيته تلث مرات
و بعدها اخلي ايدي على صدري واكول لاحول ولاقوة الابالله العلي العظيم تلث مرات
وعلى بطني هم اقراها تلث مرات
قريتها وانداريت عليه ومسحت صدره وبطنه
كال هاي ليش هيج سويتي هاي الحركة ...
كتله جدي يكول تبعد الجن والشياطين عنا طول ماانت نايم لحد ماتكعد والصبح نكول الحمد لله الذي احيانا بعد ما اماتنا واليه النشور الحمد لله الذي رد الينا ارواحنا وعافانا بااجسادنا واذن لنا بذكره ....
كال اووو هاي كلها مااذكرها
كتله من اكعد اقراها بصوت وانت تحفظها
ضحك بصوت وكال ان شاء الله يفيد ويااابليس دتعاي تعاي لاتبعدين عني اكولج جيبي ايدج والعبي بحنجي مثل من سويتي لجدج اليوم الصبح
كتله بس هاي لجدي خاصة انت زوجي تفرق الامور انت شكل وهو شكل
كال انسي اني زوجج واتصرفي مثل ماتحبين ..
كتله ان شاء الله بس بقيت ساكنة ولا مديت ايدي
هو جر ايدي وخلاهه على حنچه وظليت العب بحنجه الى ان غفى
اخذت ايدي و ظليت استغفر مااريد افكر ولا اخطط لأي شيء وكلت امري لربي استمريت بالاستغفار لحد مانمت حسيت للفجر وكمت اصلي فز كام ويايه
راد ينام كتله كوم كوم وكومته من افراشه جريته للحمام ادفع بي هو يضحك وفاتح تك عين ويتوضا
بعدها صلينا ورجعنا تمددنا على السرير
هو بس يبوس براسي و اسمعه يرردد الله لايحرمني منج الله لايحرمني منج ...
ابتسمت ونمت ...
مرت الايام لحد السبعة وبيها حضرت سبع فساتين اشكال والوان البسهم بحفلة السبعة ...
وعزموا الناس واجا جدي جابلي ملاوي وعمامي كلهم جابوا هدايا و حتى عمو حسن حضر وجابلي هدية
سوو حفلة وركص وخلصت بسلام والحمد لله وماتخلو من مشاحنات شوكة وصفصف لان جانت خطيه تكتلها من جانت طفلة كلما تشوفها ببيت جدو قاسم .. .من كبرت شوكة صارت تاخذ بثارها وبطبعه الطفل ماينسى الي يأذي ...
جانوا كلهم واكفين وفيصل هم وياهم و رادوا يطلعون اهلي اجه وشبكني جدي وهمس يم إذني
_ بويه مو تنسين نصيحتي ؟؟
هزيت راسي وكتله واني اشاوره محتاجه احجي وياك بهواي امور صارت ....
جدي راد يغطي على الموضوع وميحسس احد
كال تدللين باجر اجيبلج من عيوني كم دره عندي ضحكت على دهائه
طلعوا من البيت ودعتهم وصعدوا بالسيارة وراحوا ...
الكل طبوا واني داافوت وراهم صاح درة و جرني من عكسي
رجعني بسرعة يمه ظليت اباوعله بتساؤول
قرب مني اكثر وكال شنو ردتي من جدج ؟
كتله هاا بعدين مااعرف شون دبرتها كتله زيت شعر هو يوصي من سوريا وجابه الي بس نساه بالبيت
واني كل اسبوع اخلي جدي يخلي الي
رفع حواجبه كال بعد لاطلبين من احد كولي شنو تريدين اني اجيبه
سكتت ماجاوبته وداافوت صاح بعصبية سمعتي ؟؟
كتله استغفر الله مو كتلك جدي خط احمر هذا الشي يخصنا
كال اني شنو هسه سبيته ؟؟؟ كتلج بعد اني مسؤول عنج مااقبل تطلبين من اي واحد سمعتي؟؟
كتله ماشي
كال شو من ورا خشمج تكوليها ؟
كتله واني لازمه فستاني جان كلوشه فتحته بايديه افتريت وكتله حاضر مولاي سمعا وطاعة مولاي اتسمح الي بالدخول فقد حان وقت صلاتي
هو ضحك ضحك وفر ايده على جتفي ودخلنا وهو بعده بس يضحك
دخلنا اني وياه عمه صفيه بالصالة سمعت ضحكنا
كالت شنو هالضحك ضحكونا وياكم وتعوج بحلكها
كتلها لاعمه مره ورجلها يضحكون شون تسالين هيج سوال فاتتج هالمره وغمزت الها
اشو هي كبت لحالها صارت نار صعدت وكامت على البنات الي يخدمون عدهم ، البيت نظامه عدهم ام حسين هي لازمه الطبخ والخبز
وياها بنات اثنين ينظفون البيت وحده من الصبح لحد الواحده والثانيه من الوحده لحد العشره تطلع بس ام حسين هي ورجلها عايشين بمشتل بظهر البيت
هذا نظام من جانوا بيت جده اللواء بي هسه همه مسافرين بالاردن وجان فيصل بعد سفرهم عاش وحده وجده كتبه باسمه
و بعد وفاة ابوه طلب من اخوانه يجون يمه
بس هم ماقبلوا يجون الاصفصف وياهم يعني امهم
اضطر يقبل وهي طبعا من اخذوه اجداده تغيرت وياه هوايه وصارت تدك ناعم من تشوفه وتتلوگ اله
بس ياتره بصغره شنو تسوي جانت بي ماااعرف
صبوا العشا وبالعادة ومن قوانين هذا البيت
لازم الكل حضور وانتبهت ماكو احد يحجي بحضور فيصل
ويظلون واحد يخزر بالاخ هاي الملاحظه انتبهت الها هسه لان ركزت عليها لان خلال الاسبوع الراح هو ياكل ويالخطار
انوب اذا هدوء على الاكل صوت المضغ يموتني اتوتر من اسمعه عندي حاله نفسيه منه توترت كوه اكلت
و هو يخلي كدامي حتى اكل
بعدين عمه صفيه كالت اذا مايعجبج الاكل كولي حتى اوصيهم يسولج غير شي اعرفج متعلمه على الدسم والثريد هيج اكل مايفيدج ....
اني تعوذت من الشيطان من البدايه صفصوف اووووف سكتت منها رجعت كالت والله احنا خير من الله عادي تردين باجه وتضحك هي وفاتن
احمد كال شنو السالفه باجا ههههه المعده الروسيه مبينه من رشاقتها
ابتسمت اله باوعت على فيصل يأذنلي احجي و هز راسه بمعنى احجي
كتلها الصراحه همه اهلج وانتي اعرف بيهم والحمد لله اربات خير بس اني مالحكت على الباجه يجوز انتي جنتي تاكلين هيج ماتشوفين عمه من يومج عندج وزن زايد وليش اكولج اني ام البيت واسوي الي يعجبني
و ضحكت باوعت على فيصل شفته يضحك وغمز
صار سكوت وظليت احجي بداخلي صفصف اكعدي راحه انتي مو كدي اني حجي عدنان مرضعني دهائه وذكائه وحكمته من بعد سنين يعني اشتغلج على البارد
رجعت اباوعلها ابتسامه بوجهي وهي شاطت عبالها نفس زوجاته الباقيات واصلا نست هي مرضعتني لا وفوكاها عمتي من عينها اعرف شتفكر
كملنا العشا وصعدت طبعا هو ماتقرب مني غير المرتين الي ذكرتهم طب للحمام بس الباب مفتوح اشوفه يفرش اسنانه
كتله هاي شكد فرش اهنا شدعوه
كال اي تعاي سوي مثلي
كتله لا وكعدت على الميز يمه
كال مااحب هيج اشياء
كتله واني مااعرف اتقيد بحركتي وافتح شعري ذبيت القراصه
كال راح تتعبيني يراد اعلمج نظامي
ضحكت اباوع ربع ساعه يفرش بفرشاه خشنه بعدها غسلها وذبها بالزبل
بعدين وحده ناعمه وهم ربع ساعه واني متذمره من كل عقله ومن كمل ذبها
هم انوب جاب خيط الاسنان وجابه هيج وداه هيج يدخله بين اسنانه ومن خلص ذبه
واخر شي طلع سواك ويفرك اسنانه طلع واني امشي وراه بكفشتي
كتله هاي يوميه هيج ؟
كال واكثر من خمس مرات
كتله وبالدوام هم ؟
كال حتى بالدوام
واني احك براسي هو يباوع عليه اني لابسه بجامه مورده ابيض واصفر وتي شيرت اصفر.
هو بايد وحده نزع الدشداشه وعلكها واكيد من يعلكها حسب تدرج الوانها وبقى بالشورت والفانيله وطب للحمام شغل الجاكوزي وعلك شموع وشغل موسيقى وباوع الي واكفة افرش اسناني
كال شنو رايج نسبح سوى ؟
كتله لا لامااريد
كال جربي بس
كتله بملابسي بس
ضحك كال مو مشكله المهم اريدج مرتاحه
جان المي دافي وبي غسول ريحته تخبل والشموع والموسيقى كلها تساعد على الاسترخاء
طبيت وتونست هو يباوع عليه مبتسم
كال ماتنزعين ؟؟
كتله لا لا استحي
هو نزع الفانيله صحت لهنا حدك
ظل يضحك كال ليش مو اني زوجج
كتله ماصارلك كم يوم
هو يضحك واني اغمض وافتح تك عين
كال صارلج كم يوم يمي ماضحكت هيج جنتي مصب العين صرتي بهجة الروح
ضحكت ليش كلامك مااكدر استوعبه شنو معنى مصب العين
كال ماتعرفين معقولة؟
كتله اعرف معناه بس اسمعه منك
كال شايفه الدمعه الي تظل بعينج لاهي نازله ولاهي رايحه غصتها تخنك ونزلتها تذل وتصير عزيزه انتي هيج
ظليت اباوع لعيونه وصافنه بيهم كلامه وصل روحي لامس احساسي الطريقه الي وصفها غريبه ونفس الشي الدمعه الي كالها بعينه واني بحيره من امري بقائي مستحيل ورجوعي انهزم وانكسار اله والي مااادري يارب ساعدني ولاتوصلني لحيرة
كتله خل اطلع وفعلا طلعنا اثنينا نشفنا نفسنا وطلعنا سمعته يطلب فواكه بللتليفون اندك الجرس الغرفه فتحته اخذت الفواكه من البنيه تشكرت منها ودخلت
كال الزمي امور البيت كلها
كتله مو هسه خلي صفصف شويه لحد مااني ارتب وضعي ياله
كال لا اريدج من البدايه تلزمي
شاقيته كتله عمو على كيفك وياصفصف تروح تنجلط ونحير بيها وعيب من ولدها
كلت هيج وهو مات من الضحك كال عيثي بالارض فسادا
وغمز
كتله مو هسه بعد بعد الله كريم صفنا بوجوه بعض تقرب باسني من شفتي صح اني ماتجاوبت وياه بس عفته على راحته
بعدها ترك شفايفي وواخذني للفراش صار
عليه كمت ودفعته حتى افصل دماغي عنه و انفذ كلام جدي
كتله خلي اخذ حبايه
كال خليتها بكلاص العصير ...
انصدمت وضجت بشكل مو طبيعي يستغفلني ليش هيج سوه اني ردت اخذها وتنرفزت لدرجه طلعت النومه زقوم عليه مرمرته كمل دفعني حييل وصاح بعصبية نعلة عليج
سكتت دخت اواجه لو اعوف الموضوع حسيت روحي يضحك عليه فرت
وكمت من يمه ورحت ظليت بغرفة الملابس اروح واجي كلت اذا اعوفها تمر سلامات اموت
طلعتله بيده جكاره كتله فيصل خلينا على حب الله لاتستغفلني خلي الاوراق مكشوفه
كال مااريد طفل يذوقج الي شفته وانتي ردتج حتى ماتشوفين الي شفته بعد وفاة جدج
كتله إسم الله عسى عمره طويل واني وياه متفقين نموت بنفس اليوم اموت روحي وراه اني هيج هيج ميتة وراه
وانت لاتحير بيه الله موجود وثقتي بيه تفوق الوصف رحمني بجدي بعد وفاة بابا كادر يدزلي شخص بعد جدي ...
انت مامتكفل بيه مارايده منك اكثر من الوضوح خلي بينا حب الله لااكثر ولااقل لاتخليني احتار بيك لو بالجوه ماعايزه تعب
كضيت عمري احمي نفسي من الحوالي واذا انت عندك صفصف وحده اني جان عندي تلاثه البيه كافي رجاءً
ظل صافن بوجهي وبعدها نطق
كال صدكي اني واقف سيف ودرع الهم ماغمضت عين من شفتج بالمستشفى شون وليد مأذيج ودفعته الثمن غالي غالي وحامد جويته بايده وكتله باليوم الي تفكر تمدها عليها تذكرني ...
تعجبت من كلامه
هو اشرلي تعاي يااغلى من النفس والروح اني نفسي اضمج اهنا بضلوعي لو بهاي الغرفه مااطلعين حتى ماياذيج شي
كتله لاتخاف عليه اعرف اعيش يامه دكت على الراس طبول
كال اذا اعترف بشي تصدگيني
كتله حسب ...
كال انتي اول وحده ابوسها بشفتها ....
ضحكت سكرت من الضحك
كال شنو سمعتي نكته
كتله حدث العاقل بما لا يعقل انت متزوج اكثر من ١٥ وحده من كل شكل وكل نوع وكل بلد وتريد تقنعي مابايس وحده منهم لاعفية هاي قويه اي واحد تكله مايصدك مو بس اني
كال بكيفج اني تلعب نفسي من كل بشر انتي اشوفج طفلة حتى نفسج اشتهي اشمه
كتله شوكت واني طول عمري اصيحك عمو عمري ماشفت نظرتك مو حلوة الي ولامرة حسيت بيها
كال ولا اني انتي بنتي الي ماخلفتها ولا راح اخلف غيرها
خلاني بصفنتي هالفيصل نام هو واني الضوء زاعجني كمت على كيف وطفيت اضويه البلكونات صار الجو شويه ظلمه مو قويه نمت ماحسيت الا
على صريخ ...
يتبع ....
ثورة تشرين العظيمة ستبقى نبراسا لكل الثورات المطالبة بالحرية مهما حاول الطغاة تشويهها
1 أكتوبر 🌺الفاتحة والرحمة لشهداء ثورة تشرين ...
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!