السلام عليكم
رواية طوفان رجل
الفصل 21
نورا ناصر
داخلي يغلي وخارجي يغري..
كل شيء حولي هادئ إلا قلبي..بداخلي تسكُن طفلة تئنّ من الوجع ، والسكوت يظهر على ملامحي ، متعبة من التظاهر بالقوة ، متعبة من ادّعاء اللامبالاة ، متعبة من الجميع ، وغارقة أبحث عن نفسي في قاع قلبي ، أبحث عن مخرج ، أريد الرحيل ، أحتاج لعزلة أكون بها وحدي ، أعيد تشكيل روحي..أريد معالجتي..
رجع فيصل ضحك خفيف وبغرور وسيطرة
وجه كلامه لجدي كله حجي تحجي صدك عود انت ؟ لو شنو الوضع فهمني ؟
جدي هز راسه كله اي صح الصح وحالها حال زواجتك الي تزوجتهن كلهن
اني سمعت كلامه و بثت الروح بيه وعروگي خضرت وارتوت وصار عندي امل جديد بحياتي ...
التقت نظراتنا انا و وجدي وهو شاف بيه هذا الشي
شاف ملامح الاستبشار على وجهي ابتسم وحياني بنظراته الاحبها
ورجع باوع عليه فيصل كال لجدي بس ياحجي اني رايدها عمر مو يوم ويومين
كله جدي برفض قاطع واصرار
لا فيصل لا مدة وترجعلي بتي
فيصل كاله مااكدر مدة مؤقتة وانت تعرف الي ازوجههم بمدة لو ارملة لو مطلقة مااخذ بنت بيت وتعرف هاي حكمها بالدين غير شي ...
اني ضحكت وحجيت بقلبي يزينون الدين حسب اهوائهم
وبكيفهم والي يريحهم
من ضحكت هم باعوا عليه اثنينهم
اني خليت ايدي على حلگي اكتم ضحكتي
جدي كله اني اعرف بالدين اكثر منك هي امانة سنة وترد لصاحبها وهذا اخر حجي عندي
كال كلامه وانتجى على الحايط الي وراه
كاله فيصل بعدم رضى وبدا يصير عصبي
هذا مو حجي ومو خوش اتفاق
جدي عله نبرة صوته وحجه باصرار ويأشر بأصبعه السبابة
كاله لاتظن بحمايتك لدره تلوي ذراعنا اكدر من هسه اخذها واروح لأهوار العمارة يم خوالي وفنه ليوصل حتى صدام مايكدر يطبها واظنك تعرف كلش زين كلامي صحيح ولو ادفع وازور جنسية بغير اسم واسفرها لأمها
ظنك مااكدر يفيصل باوع عليه زين وعايني انه اعرف شكو وراي وشكو كدامي ماينضحك على شيباتي بعد هالعمر بس انه راغبها لهالزواجة
سكتوا اثنينهم وصار هدوء وبس صوت الانفاس المتنرفزة
قطع هذا الصمت صوت فيصل من كال لجدي وهو يهز راسه مامقتنع :- الي تامر بي حاضر
وبس نهى حملته كام على حيله
وكال يله تصبحون على خير
بعد ماطلع اني ركضت لجدي بسته من خده
كتله عاشت ايدك جنت ميتة خوف شنو اكضي العمر وياه واني اريد رجال بس الي محد يشاركني بي
كال جدي تعاي هنا هسه صار الحجي الصدك الي لازم ينحجي
هزيت راسي اسمع اله بكل جوارحي وارمش بعيوني
كال باعي بويه درة انه كدامه كتله مده وتخلص
بس احنه نريده يدوم شنو اكوله تخلي بعقلج ويأشر
على دماغي
كتله بس جدي والله مااكدر اعيش وياه وهو بهالحالة
رفع حواجبه كال شنو انت تشكين اضرج بشي ؟
هزيت راسي وبغصة كتله لا والله جدي ولا واحد بالمية
كال هايه هيه وانه اليوم ردج عجبني من ماطلبتي شي وحلو ردج من كلتي مهري الامان ، بويه اريدج هيج
وانه اعرفج ماتغرج فلوسه ابد حتى لو تتعجبين لاتبينين
اريده يحير شون يرضيج عبن هو متعود النسوان تتلوكله وترضي انتي صيري بالعكس من كل نسوانه
وهسه وبديناها بشرط المدة مثل كل زواجاته هو يخلي شرط المده ، هالمره احنا خليناها
وهااا بويه انه متأكد اليوم ماتغمض عين اله بس ارجع واكول هو خيالج يابويه بس هو يلوكلج من العشيره كلها والله يهديكم اريد اموت وانه مرتاح
كمت لزمت راسه وبسته كتله إسم الله عليك عمرك طويل
كال يا بويه شگلج انه سمعي مني اريد مصلحتج
گتله ادري بيك جدي بس
اشر بيده وكال لا تكملين الأيام راح تثبتلج وكولي جدي ماكال
تنفست وسكتت اباوع للكاع وارسم بأصبعي عليها بعبث ...
سمعته يتثاوب كال كومي نامي بويه وانه هم انام نعست كلش وباجر وراي الف شغلة ..
بلعت الغصة گتله تصبح على خير جدي
وبسته براسه وطلعت توجهت لغرفتي ...
تمددت على السرير وانه بالي مشغول والله يعلم شنو ضام الي باجر
الف شلون وشلون كلتها بالثانية واتنهد وافكار تغيبني
عن العالم كله ...
أني شلون راح اتقبل شخص گضيت عمري كله اگوله عمو واعتبره واحد من عمامي ...
شخص اشمئز من اسمع انو يتزوج ويطلق بهاي الطريقة
بس لا لازم شرط جدي يكون حقيقة ومدة وتخلص هالشي كلش مناسب الي وارجع لحياتي ماكدر اتقيد وياه واشاركه حياته الي كلها نسوان غيري
طلعت صورة أبوي الي مخليتها جوه المخدة
أبوي لا مافطنت عليه ولا شبع مني
ظليت احاجي الصورة وطيفه الي تكوّن بخيالي
يابابا المن اشتريتني من أمي حتى أعيش من دونك شنو الحكمة ياربي
ياترى إذا بابا عايش شنو راح تكون ردة فعله من كل الي يصير وياي !
هم راح يقبل يزوجني لصديقه الي اكبر مني
ب15 سنة
صديقه المزواج الي بس يتزوج وحدة يطلقها بعد مدة ويتزوج غيرها باتفاق ومدة معينة
واني هم القدر خلاني بطريقة حتى اكون حالي حال زواجاته السابقة
أتمنى اوگف عقلي عن التفكير ، أتمنى بي دگمة وأطفيها مثل اي آلة ثانية
قربت الصورة لشفايفي وبستهه ، قريتله الفاتحة ودعيتله وخليت الصورة جوه مخدتي ونمت
احس وانا نايمة عقلي يدور ويفكر حتى باحلامي أفكر بلي مضموم الباجر
كعدت الصبح احس ثقل الكرة الأرضية كله براسي
ذكرت الله وتعوذت من الشيطان
لميت شعري ورحت غسلت وجهي وانفاسي تطلع بشكل حسرات الهه اول مالهه اخر
كعدت يم جدي و تريكنا أني وياه بس ساكتين وبداخلنه كومة حجي .. خلصنا وجاي الم السفرة طبت شوكة توهه كاعدة من النوم و شاده راسها وبس توون
صبحت علينا عود تأشر بيدها ...
صاح عمو حامد شبيج اليوم ؟؟
لزمت راسها
كال هاا راسج ،، اي همزين راسج يوجعج حتى نخلص من السانج
باوعت عليه كالت وهي تأشر على ابوها
- مايدري بالرئيس القائد؟؟
انيى بسرعة هزيت راسي برفض وكتلها
لا واعض بشفتي الها بتحذير
كالت والله الا اكله جا بس اني انجلط !!
تحجي و تهز براسها هيج وهيج
و تكول لو يدري حميد شك ثوبه لو يدري العبد شكه ثوبه (هوسه على الي ضامين عليه موضوع ومن يعرف يتخبل )
وظلت تكول اووف اوووف
هو يشرب جاي كاللها شكو ؟؟ هم اكوو مصيبة؟؟
كالتله ابن الرئيس خطب دره
هو شهك يارئيس بت النعال لاتجينا مصيبة شتحجين انت
كالته الرئيس القائد بعد منو
كاللها بصدمة ولج يارئيس ماتحجين
كالتله شبيك هذا الي يغنوله وظلت تغني
الله يخلي الريس الله يطول عمره ندعيله بكل بساعة غالي وحلوة طباعه الله يخلي الرئيس الله وتهز بركتبها من جهه لجهه وتكمل بالاغنية
باوعلنا عمو كال هاي الخبلة شتكول؟؟
جدي كال اندري تهوس بكيفها
شوكة كلتله والله اذا اتزوجته الرئيس يسويك تكه ويعلكك بالتيل وعلي ويخلي الناس ياهو يمر ينتل واني اتزوج من الحماية يابويه
هو وجهه صار اصفر وبقى صافن
كالتله خطيه ضامين عليك حتى لاتنجلط عبن اني نجلطت البارحة الدنيا تمطر زلم على دره واني مكابله صلعتك
واشرت بيدهه برفض هاااا وهي رفضت ابن رئيسنا الغالي حبيبنا صدام والسيف والريه والقائد المقدام (انشوده بالقراءة موجودة وجان لازم نحفظها غصبن على الي خلفنا )
وكملت شوكة كلامها كالت رفضت ابن الريس وقبلت بفيصل يعني انت صلعتك مشكوكه اكيد
احنه نضحك اني وجدي
وبعدها جدي خزرها ووجه كلامه لعمو حامد
كاله تتشاقى وياك شبيك صدكت ووجهك صار فالت
شوكة بسرعة كالتله والعباس والحسين والكاظم عدي صدام حسين حفظه الله ورعاه رايدها وجدي مايقبل واطاها لفيصل
وفجأة تعبت من الحچي وصاحت اهوو دوخوتني بكيفك تصدك لا بكيفك ... وطلعت
هو ظل يستفسر ويتسأل وجدي يحاول يغير الموضوع ويرجع لنفس سؤاله دره وين شافهه عدي وخطبها بويه ؟
اجت بيبي والظاهر سمعت الحديث
كالتله يمه شييك انته تصير كالوها بخت العواهر
ظليت مصدومه هسه والله لو مسويه الها شي لو ماذيتها
جان ميخالف اعذرها بس ممسويه شي
ياربي بيبي ظل لغز بحياتي ماافسر كرهها الي
صفنت عليها وجدي يرزل بيها
بعدها جدي كله لعمو حامد فيصل خطبها والخميس الكعدة
كال بصدمة ووكف على حيله تحجون صدك غير تاخذون راينا لو احنا خراعة خضره اهنا ؟؟
اشرله جدي يكعد وكله جدي لادوخنا بالله حامد هو خطبها وقبلنا
صاح ادري كلووله ناخذ رايها شبسرعة هيج خطبها طب الخطبة الخميس طب الله يعلم العرس يمتى
طبت شوكه اخذتلي تحيه كالتله ذيج المره علكك فلقه هالمره شيسوي لو يدري معترض على زواجه من چنة الرئيس القائد حفظه الله ورعاه
ضحكوا كلهم ظاله من الصدمة تخبط بكيفها شيجي على بالها تحجي
وظلت تروح وتجي تضرب تحية الي
ولكساع اغنيه شكل ...
و تصيح احنه گلوب بالصندوق خلينا ( أغنية بايعناك ياصدام لحاتم العراقي )
اني عفتهم ورحت الغرفتي داخل دماغي ضوضاء وضجيج مو طبيعي ماجاي ارضى واقتنع بزواجي منه يارب ساعدني والله خاطري مكسور
صافنه بالدنيا الي فرتني فره وكعتني على وجههي
جان حلمي اصير استاذة بالجامعة ، جنت اغمض واتخيل نفسي امشي بالجامعة ولابسة رسمي واطكطك بكعبي العالي والطلاب يحترموني ويسلمون عليه
ااااه الدنيا دائما معكوسة ويايه كل مره اوكف بوجهها وتصير مصيبة ، هالمره راح اسلم امري لربي وامشي ورا كلام جدي احسن ...
حاضنة رجليه لصدري وفاصلة عن العالم كله ، شون مااشوفها مانرهم اني وياه والله مانرهم
خليت راسي بين ركباتي اريد بس يهدأ هذا الضجيج الي براسي ما اكدر احس ماجاي اكدر اعيش حياة طبيعية ابد ...
واني على هالحال واسمع صياح عمو حامد
والكم هذا عدي تحجون صدك هسه يطب علينا وياخذها
خليت اديه اذاناتي ياربي شوون بيه وين اشرد برووحي شووكت يخلص كل هذا
نصه الصوت كمت تقربت للشباك
اسمع شوكه تكله يابه خلها تتزوج فيصل ويجي عدي مايلاكاها وياخذني
اشو هذا عمو حامد هم كال خوش فكره انتي خوش تفكرين بويه
شر البلية مايضحك والله هاي العائله لاكفة من صغيرها لجبيرها
اتاكدت شوكه على ابوها
حمدت ربي من بين كل هالمعاناة اكدر اضحك ولو شوية ...
للعصر سمعت صوت بالصالة ، بس مااكدر افسر الكلام الي ينحجي
بس ميزت الصوت هذا صوت عمة صفية
اكيد راح اسمع حجي يسم البدن هسه
خليت ايدي على بطني وجريت نفس قووي
اتمنى اتحول لمخلوق جليدي مايحس ولايشعر باي شئ
رزان بقيت مترددة اطلع الى ان اندكت الباب وقبل مااكول تفضل فاتت رزان
باوعت عليها جانت مبتسمة واجتني بوستني وتضحك
ولج شنو هالمفاجاة راح تصيرين مرة اخوية وكرصتني بخاصرتي
اني كوة غصبت روحي ابتسم مجاملة ...
وسحبتني من ايدي تعالي ماما هنا وفاتن فيصل كال روحوا شوفوها شمحتاجة لج والله فرحانة الج كوومة ..
طلعت وياهه للصالة سلمت كوة عليه وادري بيهم كارهيني بهالحظة اكثر من قبل...
كعدت واباوع لصفية وجهها ما يكصه السيف ...
وفاتن كالعادة شايلة خشمها وبس هي وبس ماتشوف احد الكل جوة رجليها وهن اثنينهن صنف واحد
كامت عمتي صفية تتصنع دور الامراة الارستقراطية
بس ملايكلها
وتاشرلي بأمر ونبرة اآمرة وباقتضاب
كوومي درة عندي حجي وياج
عرفت عااحجي راح يسمني سم
ياربي صرت حچوة بحلوگ الحياية ، رحمتك بيه ياربي
بهاليوم وبهالساعة هايه
حجيت بقلبي وعيني عالسكف
اخذتني على صفحة بالممر وكفت يمها لازمة عكس ايدي بايدي الثانية
كالت اكلج وكعتي انوب فيصل ؟ ولج شسويتيله وهيج مسودن عليج هااا ؟؟ لج خاف كاسرج احجي
باوعت الها احتار شلون اجاوبها بالله هسه هاي تحجي صدگ ، اني بهاللحظة صدك تحولت من جليد
بعد ما جريت نفس كتلها بجمود اطمئني ماكو شي من الي ابالج
احجي وعيني ومااخليها بعينها
لزمتني من عكسي بطرف اصابعها وتجرجر بطرف ملابسي
كالت باعي من تجين للبيت حسج مااسمعه واني ابقى الكل بالكل وتعرفين اذا ماتمشين برايي تخسرين اطلعج بليله ظلمه بطرك الهدوم الي عليج سمعتي؟؟؟ لا عبالج هنا لاعبة لعب هناك وحد وهنا وحد هنا جدج مكبر راسج هناك اني ادوس على راسج
ضحكت بصوت عالي بدون ما حتى اباوع عليها
وعفتها ومشيت وهي تخبلت بالزايد احتارت شتحجي ورايه
ممترباية شايفة نفسج ادووس على راسج واكسر خشمج
رجعت يمهم كعدت ...
باوعتلي فاتن من فوك ليجوه
واني باوعتلها بنظرة بمعنى خير ؟!
هي اجاهه ايعاز وحجت اي عيني بالعافيه ياعمري انت والله بخت طلعتي من دلال حجي عدنان طبيتي بدلال فيصل والله عمي زين حظج كاعد
استفززوني بشكل مو طبيعي بعد مااكدر اسكت الهم
ذاب كل الجليد الي حصنت بي نفسي
كتلهم بنبرة شبه عصبية عدكم كلمة طيبة تكولوها كان بها ماكو خل نحجي بالمفيد
كالت صفيه من ورى خشمها تجر الحجايه جر يله تطلعها
تحجي تباوعلي وتدير وجهه
دازنا نشوف شنو تردين
كتلهم ماكو داعي يدزكم اني احجي وياه وهاا هالمره ماراح احجي الكلام الي كلتوا لفيصل (( وشددت على احرف اسمه ))
وكملت مره ثانيه تصير موحلوه اني مالي حجي ويالنسوان
كالت صفية طبعا انتي طول عمرج ويالزلم
كتلها عفيه تعرفين هذا الشي والزلم كول وفعل مو بس تتهدد ...
غمضت عيوني وشددت على اجفاني وفتحتها واستغفر بيني وبين نفسي يعني اني وين اروح وارتاح ماعرف منين بعد ذني الي طلعلي صفح مغثة ع الاساس اني ناقصة
طلعت من بيبي وهناء طبيت لصفيه وفاتن وعمي ستر الله على بيبي وهناء
صفية هجمت بيت جدو قاسم وخلت الاخوان تذابح ودمرت الكل
وفيصل يكولون جان قلبها عليه جلد وقاسي حتى موتته جوع وجانت تطرده بس هو ما تخلى عن اخوانه بعد وفاة والده
اووووف ربي صافنة عليهم ضاجن من كلامي يردن يكفخن بيه من البداية ...
من غير فيصل الي شخصيته غريبة عجيبة
واكيد متعبة وكل هذا وفارق العمر الي بيني وبينه معضلة ..
و اكيد لغة التفاهم
بيننا بعيدة كل البعد عن بعض ، عجيب يكدر يحميني من كل الحولي ؟؟ الله اعلم
صرنا نتذابح بالنظرات ... ثواني
و صاحت صفية عيني خانم هسه شنو نكله
كتلها كوليله مااريد شي اني عندي اشكال تسلم
كالت باعي تره فيصل غير عن ولدنا مركزه كولش جبير وراح يعزم الناس كلها تردين تفشلينا وتلبسين هلاهيل من عندج حقج ماشايفه عيشتنا هناك والناس التجي وين طالعة حدج للمطال
كالت هيج و ضحكت هي وفاتن وبيبي وهناء
هميت اريد ارد عليهم وجان تطب شوكه كالتها والمطال انتي جنتي تعجني وتسوي احنه مانعرفه ودره كلية حقوق وطول عمرها عايشة بالغالي وابوها منو وجدها منو كافي صفصف تره اربطج يم المطال حتى تتذكرين زين
وكاموا بيبي وهناء عليها يردون يسكتوها
بس فدوه لقلبها ماسكتت وتشرد منهم وترجع تمد راسها
تحجيلها حجاية وتشرد خبلتهم
اني بس ابتسم على المسرحية الي كدامي والله عبالك بلاروح ولاعقل الدنيا تسيرني بكيفها
ورزان فقيرة عدها دور المتفرج بس من هيئتها ماقابلة على كل الي يكولوا وتباوعلي خجلانه وتنصي
طلعوا وكفوا بالباب يردون يرحون وصفية
وكفت كالت شحاطتي وين
كالت الها امها وين نزعتيها
ردت بعصبية وهي تدور يم الباب هنا بعد وين انزعها
دورت ماكو ظلت تدردم وعمار منتظرهم حتى ياخذهم
وهناء ماخلت مكان ما دورته ومالگتها
اخر شي صاحت صفية بنبرة امر بدون نفس
يمه جيبيلي شحاطة منج
راحت بيبي جابتلها شحاطتها لبستها وراحت معصبة
ورا ما طلعوا واني بالصالة اتصفن وافكر بمستقبلي المجهول
طبت منى تضحك وتباوعلي ... باوعتلها ابتسمت
وهي واكفة دنكت لرجلها شفتها لابسه شحاطة صفية
وجبيرة على رجليها واصابعها الصغار طالعة من كدام
رفعت حواجبي بتساؤول ومبتسمة
كتلها هاي شنو شحاطة عمة ليش لابستها
هي ببراءة الطفولة
كالت هادره ضوجتها لان ضوجتج
ركضت شوكه اخدتها من رجلها تكوللها نزعي
ولج شعرة من لحم الخنزير ...
ورا ساعة طبيت بالغرفة انعزل لوحدي ويه افكاري
سمعت صوت منى من الشباك مالةغرفتي الي على الصالة
وكالت درة عمو فيصل على التليفون يريدج
جريت نفس وزفرته وجاوبتها من مكاني
هسه كايمة مناوي ..
رحت جاوبت بعد السلام بس صوته عصبي حييل
كال بعصبية حضرتج طاردة النسوان وتريديني اني اجي هاا والزم ورقة وقلم اسجل الي تردي مو احجي وياج؟؟ جاوبي؟؟
كتله مااعرف بالضبط شنو الي وصلك ولا راح احجي الي صار بس كتلهم ماعندي طلبات وكولشي عندي متوفر الحمدلله
سمعت صوت الجداحة يمه معناهه جاي يشرب جكاير
كملت كلامي كتله ثانيا اني ماراح اتزوج صفيه راح اتزوج فيصل احب اتفاهم وياه هو مو هيه
ضحك كال هي هاي الاصول غير ندز نسوان
كتله صح لو عندي وحدة على كلبي ميخالف واني ربات زلم وكلامي مباشر مااعرف الف وادور
كال تمام
كتله ثالثا
قاطعني كال هاااا طلعتي تطلبيني مااطلبج
كتله ياريت بعد لاتاخذ موقف مني قبل لاتسمع مني لانبديها بمغثة رحمة لامك الي بيه هوايه مالي خلك روحي خلينه نبدي على حب الله
نزلت دمعتي خانتني غصب عليه شهكت وسكتت
كال يابه الموضوع مايسوه تبجين
كتله لا ماكو شي ما داابجي يله مع سلامة
سديته منه اتنفس تلث مرات شهيق وزفير حتى احصل على تركيزي كوه كدرت اكوم حيلي باد وروحي طالعة
بعدين تذكرت جدي اي المهم جدي زين وعايش هذا اهم شي لاتضوجين (اواسي نفسي بنفسي احجي وياروحي حتى جدي بعد مو حمل شكوه خطيه صحته بالنازل من غير القهر مالتي )
لكيته راجع من الكاع باوسته وسويتله جاي وسولفتله كولشي كال السانج عسل وعبالك تكولين الي بالي بس ها لاتضوجين روحج بالنسوان اتعبي ويافيصل يابعد هلي وناسي
بسته من ايده وكتله الي تريده يصير
كال لا انا لمصلحتج وماتلكين مثل فيصل سيف ودرع الهم كلهم
ظليت بصراع ويه نفسي مثل كلّ يوم، ألف هَم، وألف حزن، والف فكرة تجرفني وبالنهاية ، اطلع بكلّ هذا الثبات.
أريد واتمنى أفرغ رأسي من كل هاي أفكاره ، وأستريح بمكان مايوصلني بي احد من الي يأذيني تمنيت اختفي وانزوي .
صار يوم الاربعاء ومعناهه باجر الخطبه بعد الريوك والهوسه طبيت لغرفتي اشوف شنو البس باجر بالخطبة
اكلب بالكنتور طبت شوكه خايبه تعاي شوفي الفلك البره مودينا الج
التافيت كتلها يافلك
كالت الامير داز مره عليج تريدج
استغربت و كتلها تمام عدلت شعري رتبت نفسي و طلعت اباوع بيبي وهناء وامل والبنات وشوكه مكابلين البنية وكاعدين
تنورتها فوك الركبه والشعر بيرمن ولابسه ستره قصيره ضيقه سادتها بدكمه تريد طك اني شايفه هيج بالكليه بس البيت وين يشوفون هيج
طبيت سلمت عليها كالت اهلا وسهلا حضرتج دره
كتلها نعم
كالت دزني استاذ فيصل حتى اخذ القياسات وذوقج ببدلات الخطوبه والعرس
هزيت راسي وهي كامت تتحرك باتجاه غرفتي والكل وراها يمشي متعجبين
اخذت القياس وانوب شوفتني كتلوك
اختاريت فستان وبدلة الحنة والعرس ....
خلصت مني بعد مااخذت قياساتي
صاحت شوكه واني ؟
كلت تستاهل شوكه كتلها صممي لأختي هم واشرت عليها
هي ظلت تبوس بيه خطيه
واختاريت الها على ذوقي
بقوا البقيه خجلت اكلها الهم هم بس مااريد يحس اني مستغلته
هي بس شوكه واني مستحية لان طلبت الها
وهنا يركضن وراها انطيت فلوس ملابس شوكة
و كتلهم ملابس العرس عليه
ورا ماطلعت البنية شوكه هلهلت وهوست( هذوله اعزاز وافرح من يفرحون ) والبنات تكمز وياها وهي تأشر عليه ...
ضحكت اريد افرح خايفة كولش حيل حد هسه
ضلوعي بيها رعشة خايفة انظلم بعد وبعد
المشكله القوي كسرته صعبة بحق ذاته اني احب نفسي واهتم بيها واعالجها
جدي كبر واخاف عليه واخاف احجيله ويقلق ظاله حابسة خوفي بين ضلوعي بس ربي يدري بي وربي مايتخلى عن عبده حشا لله
اجا جدي وشوكه ورا تسولف اله الفلك حتى ماعرفنا اسمها شنو هالكد مايمشون وراها متعجبات
كلي هابويه شونج
كتله الحمد لله
كال ليش خايفة
كتله لا ابد ماخايفة
كعد على الجرباية كال ماكو احد بكدي يعرف هالعيون بس اكلج امني كلش وبردي گلبج لاتخافين نفس ماعرف عيونج اعرف عيونه
لو تشوفين الفرح البيهم تطمنين على نفسج
بويه ماكو مثله بيهم كلهم ولدنا ياهو مصطفى اذا يدري بعدي يضم راسه يخاف على مستقبله
لو عادل ياهو لو وليد ظل بس يهوبز لاحول ولاقوة فيصل ذب روحه بالنار فكرج حتى لو محصون عدي اذا راد يأذي يكدر ويسوي مشاكل
كتله جدي هو فيصل شنو شغله الي اعرفه عندهم شركات استيراد وتصدير واسهم بشركات حكومية من صار الحصار اشتروها منها شركة الاتصالات
كال بويه الماتعرفينه فيصل تابع لمنظمات انسانية دولية تدعمه ومنها محصل حصانة دولية وعدم تعرض ويحمل اكثر من ١٠جنسيات لان هاي المنظمات تسافر وتساعد الناس
جاهو حتى شغلهم ويا هواي دول اجنبية هي ملك جده بويه جااا اجداده جانوا ويالعثمانيين بويه هم مراكز وغنى مو اليوم وباجر
كتله عجيب والله والقسمه بتهم يم عمو قاسم ...
اقصد ام فيصل الله يرحمها ..
كال جاا ها هذا النصيب اعرف ناس تصيح عمو وعمو وتالي صارت بحضنو
وغمزلي
ضحكت بصوت عالي وهو هم ضحك
كتله تضحك عليه منو الخلاني بحظنو غيرك
كال بويه غير ملتنا ابد مايشبههم وانتي هم مو من كاعنا طاگ عندج عرك الروس
ضحكنا اثنينا كال بويه ضحكة خير ان شاء الله اريد انصحج نصيحتين تخليهم باذنج وتمشين عليهم بفتره وماتاخذين حجي اي احد حتى منه اخذي كلامي وامشي بي عبن محد يحبج ويريد مصلحتج بكدي زين بويه
كتله اي جدي هالحجي مانختلف عليه وادري بيك اني تعرف مصلحتي وواثقة منك بس شنو النصيحة
كال (لاتجين وياه بفراش ولاتطلبين منه فلوس ابد ابد )
ادري حرام الي أگوله بس يابويه حتى فيصل يظل عليج
مايدور غيرج
كتله مافهمت شنو يعني لاتجين بفراشه
كال لاتجين على هواه بفراشه ولاتطلبين فلوس انتي عندج خير من الله عبن هو شايخ على النسوان بذني السوالف سمعتي؟؟
و فكري وباجر وراج يوم طويل ان شاء الله خير كله يمج ومايفارگ جدمج ويفرحج ويحفظج عبن فرحي بفرحج وحزني بحزنج يانور عيوني
نزلن دموعي على كلامه وهو نزلت دمعة وحده تذبح وعيونه الحمر معبرة اقرا خوفه عليه
بس يحسسني بالامان وهذا الشعور المتناقض مرعب لان نظرة جدي تصيب ماتخيب
حضنته بقوة كتله يكفي هو تكول يشبهك هذا كولش كافي ولو انت ماكو الي يشبهك ابد
ضحك كال شلون من تروحين وين اطي وجههي ياربي
كتله يوميه تجيني لو اجيك ماعوفك اظل نايمه على افادك حتى تضوج مني وتطردني
كال اضوج من روحي ومااضوج منج ابد ...
صباح الخميس كعدت على صوت الهلاهل فوك راسي شوكه كالبه الدنيا وتغني الي مبروك عليك بت الحلال مبروك عليك ملكة جمال
وتدبج وتهوس تكول كعدي خايبه عمي ياخايبه اني الخايبه فيصل دز كراسي وميوزه للحديقه البره يكول الديوان مايكفي
اليوم يجيب خواله تعرفين شنو خواله كله بشاوات خيه مثل ليالي الحلمية
بيبي تكول كلهم اغنياء كلش كلش ولابس جدي قاسم بقندرة عتيكة
خليت ايدي على حلكي
وهي كملت كلامها عبالك مذيعة بالراديو تحجي نشرة الاخبار
جدي قاسم من الصبح يشكي لجدي عليه جدي كله تعال انت محسوب عليه ياله ضحك
وصفصف مسودنه شون فيصل ياخذج وتخابر بيبي تكلها فيصل متعارك وياهم هي وفاتن لان حاجيات جذب عليج وحاصر رزان وخايفة وكالته الحجي الصدك كله
خيه ديري بالج منهم واذا ضوجوج دزي عليه ولو انتي تطيها بالعظم احنه حفيدات عدنان معذربات ماننكدر
ضحكت وكتلها طبعا ادز عليج وكمت وبستها
كتلها لعد ياكلونه هيج وماسالمين منهم
سألتها عن جدي اذا كعد
كالت اي كاعد ...
رحت صبحت عليهم جدي يكول هلا بهالصباح
اباوع شفت وليد يمه و تعبان كلش سلمت عليه
كتلع شونك ...هو باوعلي ودنك مقهور حييل
اني ردت اكسر الزعل الي صار ، مااريد اروح وبقلبه غيض عليه اظل اعزه لوليد
واني من نوع ماتهون عليه العشره حتى لويغلط بحقي ميخالف بس الضغط الي جاي يصير اكبر من تحملي وطاقتي
دعيتله بقلبي يارب برد قلبه ولاتخلي ناره تاكل عافيته
ورنا خطية بعدهه ببيت اهلها لحد الان راح عليها ومقابلة تجي ومتحاجين هو وعادل وراجع زعلان
موجز الانباء هذا جان من شوكة
كملنا الريوك اباوع لروحي لو عندي ام جان هسه محتاره شنو تسوي الي حفافة ترتيب اي شي
احنه البنيه من تنخطب يالله تحف جريت نفس الله موجود هسه حتى لو المن اكول
فكرت اكول لاسراء مرت عمو جعفر رحت اريد ادك عليها جان يدك التليفون جاوبت طلع مصطفى جان يصيح ولج غدرتي بيه واني منتظرج ومنو فيصل ياا حقيرة ويصيح ويغلط
سديته وركضت لغرفتي ارجف وخايفة يارب المشاكل تركض ورايه ارجف واعصر باديه
طبت شوكه قلبي وكع كتلها شكو
كالت فيصل يريدج على التليفون والزعاطيط لزمنه وحده ورا الثانيه يسلمن عليه عريس ما عريس ويهوسون ودوخوه تالي سده بوجههم ثولنا الزلمه ثول وهسه روحي حاجي
رحت دكيت الرقم جاوبه سلمت عليه بس خايفه عبالي مصطفى مخابره او شي حظي مصخم واعرفه من الارتبارك كتله شونك عمو
ضحك كال مو كافي عمو
كتله العفو نسيت
كال تردين شي محتاجه شي؟
كتله تسلم بس طلعت مني الكلمة بعبره
مااعرف شنو بيه
كال بحنية كولي ليش خايفه خجلانه انت
كتله اني وحدي و كولشي مامسويه
سكت شويه كال لعد نسوان بالبيت وينهم
كتله ماكو محد اله شغل بيه
حجيت و بجيت ماكدرت الزم نفسي ماابجي
كال يابويه الله لايعوزج لبشر هسه يجيج كادر كامل يقوم بالواجب ولاتفكرين امسحي دموعج
مسحت دموعي واني ساكتة
كال ردت اكولج شغله وانتي بكيفج بس اني حاب هالشي وانت الوحيدة الي احسه يلوكلج
كتله والغصة خانگتني شنو
كال طقم امي اريدج تلبسي اليوم عادي مو ؟
كتله اكيد طبعا
كال ماتضوجين لان موديله قديم
كتله ماعندي مشكلة المهم يكفي تنطيني هيج شي عزيز عليك بس احلفك بيها محد لابسه قبلي غيرها
كال ولاشايفي اصلا كلش نادر وارثته من بيبتها ومالكيت مره تستاهل تلبسه غيرج
كتله برجفة تدلل فيصل
ضحك بصوت وكال حلوة من حلگج
تنفست جاوبته تدلل
رد يالله روحي حضري نفسج
كتله شكرا شكرا شكرا
ضحك كال مابينا شكر منا وهيج وتره هذا واجبي
ضحكت وسمعني هو وكال
عسى ربي مايحرمني من هالضحكة ...
يتبع ..
الاغلفة الي خطفت قلبي من ايد إم عبد الرحمن
فنها الي تكول قصير اليوم 🙂
اهد عليها شوكة
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!