السلام عليكم ورحمة الله وبركاته
رواية طوفان رجل
الفصل 20
نورا ناصر
ولأننا لم نبكِ حين كانَ يجب علينا البكاء ، تحجّرَت الدموع في قلوبنا على هيئة مشاعر باردة ، تبلّدنا بالكامل ، ما عُدنا نشعر بشيء ، ما عادَ شيء يؤثّر فينا ، يُحزِنُنا أو يُبكينا ، حتى ردود أفعالنا أصبحت باردة ، فالأوجاع التي كتمناها كانت قاسية ، صُرنا نبالغ في عدم اكتِراثنا لأننا لم نعترف بضعفنا سابقاً ، ما نخشاه فقط أن نسقط من الحزن دفعة واحدة..حينها فقط لن ننهض ثانياً..
.
.
.
بعد ما خلى الجو النه وارتاحينا من هوسة حامد وشوكة ووليد ووكلمن بصفحة يجر طول ويجر عرض
صفنت ويه نفسي وبالموقف الي صار بيني وبين فيصل ، لزمت خدي اتحسسه ، جان مؤلم بالروح والجسد يضربني
صح كلامي جان قاسي بس من صدمتي وانهياري ماكدرت اتحكم بنفسي بلحظتها
باوعت لجدي سألته جدي صدك تخلي فيصل يتزوجني؟
كال الله كريم
كتله الله يعيني
باوعلي وجاوب شمالج بويه هيج تحجين جا هو وكفاته شويه ؟؟ ترى ماكو مثلها
كتله صح اني وياك هو وكفاته مو شويه جدي وياما وكفلي ودافع عني بس مو يتزوجني شون اتقبله واني طول عمري معتبرته عمي
كال وشبي ترى هو رجال ومايتعيب
كتله باصرار اي بس مو الي جدي
كال نامي يوم الله لايعيده ولايشوفه لعبد مسلم ان شاءالله
كتله لاجدي مااكدر انام خل نحجي اني مصدومة برأيك
انت شون تقبل تزوجنيى لواحد مثل فيصل
هو تنهد و كعد ومدد رجله والثانية مثنيهه
كال شوفي بويه انه من ربيتج ولحد قبل سنتين ردتج لوليد ابن عمج
تفاجئت عدلت كعدتي سندت روحي بكف ايدي
ردت احجي بس هو سكتني بايده كال سمعيني للاخير خل اكمل
دنك يعبث بالطفاية الكدامه بعبث ومتردد
ورد باوعلي وفاتح عيونه ويباوع بعيوني مباشرة وبتركيز
كال شفت وليد سبع بس انتي اقوى منه بكلشي حتى بعقلج وتفكيرج
اباوعله وكل جوارحي مستمعة اله ، من كال هيج هزيت راسي ...
كمل كال شوفي خل احجيلج سالفة انه ابوي الله يرحمه جان ضعيف بس وراه امي جان يكعد بالديوان والناس كلها تهابه كلها من جبيرها لصغيرها
بس من عنده طلابه صعبه امي تحلها وتكله شون يتصرف وشنو يسوي جان كبل يجي يستشيرها اذا صعبت عنده مهمة
وبفضلها هو هيج صار صيته معروف لان امي كويه وربات شيوخ وحلها للمشكلة بالمكان ماتخطي
وانتوا همين شفتكم نفس الشي انتي وياه هو كله وياي واخرته يصير شيخ وكلت مالكه مثله عليها وشفته هواج وعيونه حارستج وتظلين جوه عيوني وتحت جنحي اذا صرتي من نصيب وليد
دنكت وهزيت راسي برفض رافضة وممتفقة وياه
بس مستمعة بصمت ..
هو كمل كلامه كال بس يابويه من رادت تصير صدك تراجعت وحسبتها صح كلت لا حرام عليه اظلمها هي ماعدها احد غيري وتاخذ وليد راح يكسروها وتتعب لان لازم تفكر بي اكثر من روحها هو بار بأهله ومايقبل عليهم
من شفت فيصل رجع هنا واستقر وقلل سفراته كلت هذا نسرها الي ادور عليه
ادري بيج راح تكولين ابو نسوان ومزواج
راح اجاوبج و اكلج ما شاف مرة تسد عيونه عن النسوان
وعنده شغلة بعدين تعرفيها ووهو يتزوج بحلال الله مو حرام ولا عيب حك هذا
و تعاي جاي من يكدر يحميج من عدي غيره اشريلي هاا ياهو ؟؟؟
خايبه خرس البيت كله من وليد ضربج منو يتجرأ هسه يحاجيج من ذاك اليوم الهاليوم حاجيني
جريت نفس معترضة كعدت عدل وحضنت رجليه لصدري وماحجيت شي
هو كال اكعدي يامتعلمة واحسبيها ورقه وقلم وردي عليه هسه تعبانين خلينا ننام واريدنج تفكرين بكلامي مرة واثنين وعشرة والنا كعدة بعد والحجي بعد اله تكملة
نرتاح وباجر الله كريم ...
مديت ايدي اله سويت علامة الصبر بأصابعي وكتله بس ياجدي اني
كال وهو يأشر بيده بوويه دره كتلج فكري ماتخسرين شي فكري
تقربت منه نمت بحضن جدي حسيت بالأمان
البارحة وين جنت واليوم وين صرت
كلها كم ساعة وتغيرت حياتي وانقلبت فوك جووه سبحان مغير الاحوال
البارحة جنت احضر للسفرة وفرحانة هسه لازم افكر بالعرس والموافقة ياربي دخيلك
سحبت نفسي من جدي لان ايده تظل توجعه سوده عليه فتح عيونه كال الله لطف بيج تعرفين ليش ؟
كتله بختك هذا والله يحبك واكف لصغيرها وجبيرها شون الله مايوكفلك ويلطف بيك
كال لا بت ام سعد نجحت عمليتها والله دفع بيها امر عظيم والا عدي يعوف وحده تعجبه ابد والله
كتله واني فرحانة الحمد لله الف الحمدلله
( اذكرت ذاك الاسبوع ام سعد وبتها الي جانوا يظفرون شعري بالابتدائية اني ماعفتهم بيوم او تخليت عن مساعدتهم
وحتى وكت المحصول ادزلهم مابيوم اتخلى عن شخص ساعدني
وام سعد اكو ايام ارجع من المدرسة من جنت طفلة وجدي ماكو وبالبيت شادين ويايه اظل يمها الى ان يجي جدي
ذاك الاسبوع جنت راجعة من الكلية شفت دكانها معزل واني يومية اسلم عليها
تعجبت مو من عوايدها ، رحت دكيت الباب مال بيتهم بصف المحل
فتحتلي الباب وعيونها تعبانة وبس شافتني بجت وخلت فوطتها على وجهه تمسح دموعها ..
قربت منها لزمتها كتله شبيج خاله فدوه احجي ليش تبجين صاير شي فاطمة شبيها
كالت فاطمه بتي طلع ورم بالرحم ولازم عملية وتعرفين حالي
انقهرت على بتها ودمعت عيني خطية ماتستاهل
كتلها سهله صدك جذب
بقيت يمها استفسر عن مرضها
كتلها لاتخافين ودخلت شفتها تعبانة حييل ويرادلها طبيب زين وتكاليف العلاج والعملية وروحه ورجعة من البيت للمستشفى ومن المستشفى للعيادة والعكس
رجعت للبيت ركض وگلبي مليان حزن وقهر عليها احبها وهي متستاهل
دخلت للبيت اصيح وين جدي وادور عليه
طبيت للديوان لكيته رحت يمه بسته براسه
كال على كيفج بويه شبيج جايه تنهدين خو ماصاير وياج شي خوفتيني
سولفتله الموضوع كال سهله كتله لا جدي اريد مني فلوس
باوع كال هاي اول مره تكوليها
كتله فضلهم ماانساه ابد انطيهم من فلوس المحصول كل العلاج اتكفل بي دز عمي جعفر وتكفل بكل الموضوع والحمد لله صدك كل شي تسوي بهالدنيا يرجع عليك
جدي دائما يكولها)
ظليت ابوس بجف ايده نمت واملي بربي جبير مايخلي عبده حاير ...
الصباح دائما يحسسني اكو امل جديد بالحياة وكولشي اسود ومعتم لابد ينتهي والي يرمي حمله على ربه ماينساه
كعدت الصبح باوعت لجدي نايم يمي ، عضيت شفتي وبداخلي الالم ماينحمل
ااخ ياجدي شلعت قلبك تعبتك هديت حيلك خوفتك عليه شنو ذنبك بيه !
تقربت ابوس بخده واشمه عافيتي بي ، واني على هالحال اجاني صوته يكول بويه اني مو حلو وهيج تباعين بيه
ضحكت ورجعت ابوس بي
كتله والله بعيني ماكو احلى منك واحن عليه جا اني ليش ماتملي عيني الزلم لان مالكيت مثلك زلمة
كال فيصل مثلي واحسن مني بعد
كتله لا لا ابد انت وين اكو مثلك
كال اريد اكلج شغلة
جاوبته كلي اذان صاغية الك
كال تعرفين؟ تمنيتج ولد اخ يابويه ااخ
ضحكت بصوت عالي كتله تريدني ولد حتى تسويني شيخ ؟؟
كال جا شلون انتي احسن من هواي زلم
تقربت وبسته وكمت وروحي مفرفحة ...
طبيت للبيت غسلت وجهي ، سمعت صوت ورايه التافيت شفت رنا وبيدها ابنها تريد تغسل اله
بعيونها هواي حجي والظاهر سمعت كل الكلام الي البارحة دار بيني وبين وليد او بالاحرى العركة الي صارت لأن جان صوتنا طالع ...
احتتاريت شنو اكول الها وكفت بوست علي وهي همست باذني
درة بعدين عندي حجي وياج قبل لا اروح لأهلي
تفاجئت وانقهرت حيل وليد شجااي تسووي انت راح تضيع نفسك والله رنا حبابة ومتستاهل ابد خطية اكيد انجرحت من كلامه البارحة
خليت ايدي على كف ايدها ، كتلها لايظل ببالج رنا عفية ولاتهدمين بيتج بعدج ببداية الطريق والشغلة كلها شغلة عناد لا اكثر ولا اقل ووليد يحبج ويحب ابنج ومدللكم
قاطعتني كالت بعدين نحجي ... وراحت للمغسلة تغسل لأبنها و تتلتفت تباوعلي ...
رحت للمطبخ ساعدتهم بالريوك وبعدها كعدنا تريكنا
اجا عمو حامد يحجي بنعومة كال حبيبتي دريه شون صرتي؟؟ لعبت بوليد طوبه انتي وامج اخليكم بعيوني
اني مصدومه صدك يحجون لو عقلي لاكف
تقرب يشاورني كالي قصدي شريف للزواج واني عمج شيال همج اسعيلي بيها
هزيت راسي وبعدها الصدمة مسيطرة عليه
كال شوكت نروح لامج ؟؟
كتله ان شاء الله
واني مااعرف شكوله ياربي شسووي والله تورطنا
هو دار وجهه شاف هناء وطلع
كمت شلت مواعين من السفرة
اجت هناء اتقربت مني وكرصتني حيل بزندي
كوة سيطرت على المواعين الي بيدي لايوكعن ويتكسىرن
كالت والعباس اذا خليتي يروح يشوف امج اموتج سمعتي ؟؟
اني هزيت راسي وملامحي كلها متألمة ...
هيى كملت كلامها وتهز بيدها بعد ما حررت ايدي من كرصتها
انوب نجيب الكفار علينا لا ربحنا
طبت شوكه كالت عوفيها انا وابوي قابلين بالكفار جا انتي مسلمة اتبرى النبي منج كون
كالتلها اني مسلمة شمالي مو ملسمة هم اصلي واصوم الحمدلله
كالت شوكه عود من تطبين للجنة سدي الباب خاف نطب وراج لأن احنا نريد نطب للنار قابلين قابلين
هزيت راسي كبع بيناتهن واني مالي خلك الي بي كافي وزايد
عفتهم وحده تتعارك ويه الثانية و طلعت لكيت وليد كبالي الظاهر اليوم مامداوم شوون حظ هذا
تأفأفت ...
اجه همس يم اذني فكري بكلامي مو الي ماتصيرين لغيري ...
وخرت عنه هزيت ايدي وطلعت ...
كعدت بغرفتي .. اندكت الباب طبت رنا وراها بسرعة اجت كعدت يمي وابنها بيدها
كالت راح اروح لأهلي
جريت نفس كتلها رنا لا ترحين ترى وليد يحبج بس كتلج هي شغلة عناد لان رفضته
كالت لاتلومين نفسج مو منج الصوج ادري بيج بس هو هواي جرحني اني سمعت كل الكلام الي دار بينكم البارحة
اريد احجي بجى ابنها وظلت تسكت بي وترضعه وهو سكت وهو يرضع التفات عليه كالت ماتوقعته هيج وليد هو ممقصر وياي ولا ويه ابنه بس اني انجرحت ومااقبل يطلع منه هيج كلام
شويه وهي دتحجي سمعت صوت وليد يصيح رنا رنا
شالت ابنها وعدلت ملابسها وطلعت عافت الباب مفتوح
وهي ووليد مقابيل الباب
كاللها وبنبرة كلها توسل ها مو ردتي ترحين لاهلج ؟ يله اوديج حتى العصر ارجعج
هي هزت راسها برفض قوي واختفت من كدامه بسرعة
باوع على غرفتي من بين فتحة البار تخصر وتأفأف ، رحت سديت الباب بهدوء سمعته دفره فزييت وقفلته بسرعة ..
سمعت خطواته تبتعد طلعت ركض ورحت كعدت يم جدي مالي خلك اي احد ... ومناقصة هم احد ... كافي جبال الهموم الي على اكتافي ..
للظهر جدي خابر فيصل يتأكد من الوضع
كاله كولشي تمام والحمد لله لاتفكرون بالموضوع
اني اخذت التليفون من جدي كتله عمو اذا كله تمام وضبطت اموري مثل متگول خل ارجع للكلية اداوم
كال بعصبية انعل ابوج لابو حتى الخلفوج كلبة بت ال١٦ كلب احنه نسدها ونستر على عرضنا وانتي بعديج تفكرين بالكلية؟؟
كتله معليه مو كلت امان وارتاحوا لو بس حجي تضحك علينا انت ؟؟
ظل يصيح من گماعة راسه داومي وين العباس ويلكفوج خوش داومي خابري اخذي دروسج وداومي انعل الساعة السوده الي شفتج بيها
اني من صوته وعياطه سديت التليفون بوجهه
جدي كاعد سألنيى شگال ؟
كتله هيج وهيج گال
كال اني احصل بس النعايل من وراج
دك التليفون رفعته بسرعة
كال الو بت النعل تسدي بوجهي هااا ولج ؟؟
اني خفت كلته لاعمو انقطع الخط مو مني
كال بتهديد : باعي لچ هالقشمريات ماتمشي وياي سمعتي لو لا ؟؟
كتله اسفة اسفة والله ماعيدها بعد
بعدني ممكملة جملتي سد التليفون بوجهي
باوعت لجدي مبرطمة ظل جدي يضحك جان يكول شعلتي شيب الخلفه
كتله راح اداوم خلي بس تصير بالخمسة واخابر رونق
جدي من سمع كلامي فتح عيونه بصدمة
خليت ايدي على حلكي اكتم ضحكي
هو كال بعصبية طبج حريشي وجع حتى وجع عفية مرة مانكدر كلنا عليج؟؟ ولج انت شنو ماتكليلي
غمزتله بعيوني واضحك وادز بوسات بالهوا عليه
هو يباوعلي و يهز بيده يكول لو ما هاي العيون دولبني
واني افتحهن شويه واسدهن وارمش بيهن
وهو يضحك
طلعت من يمه ورحت للغرفة اليوم اروح لرونق
واشوف محاضراتنا شنو
طبت شوكه حتى مادكت الباب
باوعتلها بانزعاج مصطنع كتلها غير تدكين الباب قبل لا تدخلين ؟
كالت مو مهم بعدين الي عندج عندي عليمن ادكه قابل اني زلمة ؟
سكتت مالي خلك ملاهدتهم
جان بيدها كوستم وثوب
واحد لازمته باليمنى والثاني باليسرة
ووجهتهن عليه كالت شلبس الثوب الاصفر لو الكوستم المشجر من نروح ؟
عكدت حواجبي بتساؤول كتلها وين ترحين ؟
كالت لامج بعد وين ، ماتدرين جا حامد راح جاب بنطرون وقميص ومحتار بالكم شعرايه الي براسه يمد بيهم على الصلعه و يرجعن مثل السبرنگ
رمشت بعيوني بملل شوون ويه هالسيرة هاي
هي شمرت الملابس واحد وكع فوك راسي واللخ بالكاع
واجت كعدت يمي ... على السرير بحيث طمست واني كاعدة
كملت كلامها تحجي كالت بعدين شفت ابوي بهالحال انقهرت عليه و كلت خطيه هم ابوي وبلكي الله يسهل امرنا
رحت جبت الاوتي وخليت خاولي وكويت ا له الشعر ليش ما اني داكوي اجت رسل العوبه متعاركه ويا منى واجت تركض دعمت بيه ووكع الاوتي على صلعة ابوي جنت موخرة الخاولي واحترك راسه
وانوب تلاثتنا ركض ورانه وصلعته طككت
كالت اذا رحنا لا تكليله شنو لان ماعافنا بس من حلفنا بامج تالنا مدري بانيا ياله عافنا
ضحكت ضحك يابه ضحكة خير بس عبالك قلبي علمني من ورا هالضحكة مو زين
كالت هسه شوكت نروح ؟؟
كتلها وين ولج امي سافرت وراحت
شو هاي صاحت يبووووه حبيبي سافر وعافني كله من حامد البومه عرسه وياعرسي
طلعت واني قفلت الباب بس فاتحة الشباك واسمع حجيها
ابوي الاصلع اطلع ...
انوب سوت اغنيه ابوي الاصلع حطوله ريحه عينه وكيحه وذني الزعاطيط رسل بنت عمي فلاح و منى اختها يكمزن
طلع عمو حامد كلها وج اسكتي امج نامت خل نخلص منها كالت مايفيد سافروا وعافونا ....
هو سمع شوكة اجاني من الشباك كال شنو ولج دريه شون تخليها تسافر ؟؟
اجا جدي كبل لزم عمو حامد كاله بويه بتها مريضة وراحت ماتكدر تبقى هنا
عمو حامد كال يعني ترجع مرة ثانية لو لا ؟
كاله اي ان شاء الله ترجع مدام اجت مرة تجي بعد
عمو حامد اجا دمغ شوكه كالها من الهبطه كطعتي خلفتي هو اريد اجيب الكم خوان روسيين ..
شوكه عوجت حلكها كالت ابو بيت العكرب باميا تقبل بيك ؟؟ غمت روحها وراحت
واني انفتح الحصار عليه باوعت الساعة صارت بالستة
تأخرت هواي ركضت اخابر رونق
دكيت جاوبت سألت عليهم وكالت ومبين صوتها قلق
دره مااعرف شكولج
كتلها كولي شكوو
كالت شفتي العسكري الي صاحج بالحبانية؟
اني وكع قلبي بين رجليه من الخووف
وانكطع نفسي
كتلها اي
كالت اجا اليوم وسأل عليج وكالوا ماجايه
بس جاسم الحزبي اخذه مااعرف شكله ابد بعد لاتوصلين للكلية سمعتي فدووه ابد لاتجين يدورون عليج والله الظاهر مافكو منج
اني نزلن دموعي وكملت هي كلامها
كالت لاتتصلين بعد اخاف على روحي واهلي عفية دره
سديته منها وكعدت الطم الطم على اخدودي وجدي خطيه يسكت بيه ويسال شكو
كتله يدورن عليه ...
بهالاثناء طب وليد وشافني الطم
اجه بسرعة كال عليمن هاللطم والبجي لان عافتج امج شنو انتي تصدكين اعوفج واخليج ترحين وياها اكسرج واخليج مشلولة ولاترحين
باوعت عليه كمت ابجي بس دموع بلا صوت
هو مثل الي خاف من شاف حالتي هيج
اجه كرفص كدامي كلي ليش هيج تبجين عليها هاا انب مااكدر على فراكج درة وداعة جدي انتي عندي بغلاة جدي
شون اعيش بدونكم اني ؟ جدي كبر وانتي كلج منه حاجيني؟؟
ادري استعجلت واتزوجت بس مره ماتاكل مره واعدل بينكم ماعندج حل غيري نهوتي تكسر ظهرج ليش ماتلحكين على ايامج وشبابج
كمت بصقت عليه تفاجا راد يضربني لزمت ايده
كتله هذا ردي مع الاسف عليك مو رجال انته
و باوعتله من فوك لجوه
ظل يهد عليه يريد يضربني وجدي صار بيناتنا و يدفع بي ويسحبه يريد يطلعه
اني كمت رجعت على التليفون دكيت على عمو فيصل واشرت لوليد اسمع
جاوب عمو الو
كتله بانفاس لاهثة عمو شونك
كال اهلا يابه خير خوما كو شي جدج بي شي مبين صوتج باجيه
كتله بعده عرضك موجود تريد تزوجني؟؟
جدي وو وليد واكفين بالباب
ووليد يفشر عليه بابشع شي ك....به بر.....وك عجبج وتعرضين نفسج ؟؟؟
عمو فيصل كال يوم عيد و انشف مصب العين!
وليد مصدووم وبعده يصيح ويغلط ويجي يهد عليه يوصل يمي وجدي يسحله
وصل صوته لفيصل
كال بصدمة ومستعجل هذا منو الي يغلط هيج ؟؟
كتله وليد سمعني وهو نهى عليه
ظل ضحك بصوت عالي
كال موافقة أكيد مو ؟
كتله تفضل يمنه مااكدر بعد وبجيت
كال بسرعة جاي وسده بدون مايسلم
وليد ظل يضرب على راسه واخذه جدي وطلعوا من الصالة ... هناء وبيبي واكفات متفاجئات ومصدومات ...
هناء كالت الله يبليج ولج راح تموتين ابني وحيدي هججتي مرته وهسه راح تخبلينه
بيبي كالت ترحين فدوة لوليد ولج ولمرته ولأبنه الله لايوفقج مرمرتي گلبه انوب تعرضين روحج على فيصل لا يا طايحة الحظ انه كلت يجي يوم وتسودين وجوهنا صخم الله وجهج
اني ظليت ابجي وراسي بين رجليه ... وافكر ياربي شلون بيه خاف فيصل هم مايكدر يحميني جاي يدورون عليه خاف يجووني الليلة قبل مايتم كل شي ...
طلعت اركض ورحت لديوان جدي طبيت كعدت ابجي ماشفته
واني جاي ابجي سمعت شوكه تلطم لطم على كصتها كعدت يمي كالت راح تتزوجين الامير فيصل واني لاحصلت خفير حقير مدير خبير حمير خوش لطميه احوووو احووووو
طاحت النجمه على الجرف ياعباس احو احو ومسويه دائره بنص وتلطم على كصتها واخواتها وياها على الواهس
انوب كامت طلت بوجهي ولج صدك فيصل ياخذج؟؟
اني ابجي واهز اهز براسي
طب وليد مرة ثانية كال وعلي كتالكم اني اثنينكم بس تصير والعشيرة ويايه مو جدي كول ؟؟؟
جدي كله ماتدري انت اسكت
اجاني كام يجر بشعري وسحبني وكفني على حيلي
يصيح ويباوع بوجهي عيونه مرعبة
كال لايكون مصخم وجهج وياه ؟؟
سحبت شعري كتله تخسا تحجي عليه هيج بس اني شايفه رجال واركز على كلمته بس هو يكدر يحميني
كال كولي عاجبتج فلوسه ؟؟
كتله اني مو فقيرة وعندي خير يغركك وانت تعرف العندي وعمري ماغرتني الفلوس
كال لعد ليش ولج اني مااحميج شبيه مو ستر وغطا الج
كتله تكدر تستر عليه من عدي؟؟
كال بصدمة ولج ياعدي
كتله عدي صدام حسين بعد منوو
شوكه ظلت تعيط يابويه يايابه انتي الله يشمر عليج زلم واني حظي مصخم واريد رجال بخت بخت
احوووو ورجعت تلطم طاحت النجمة على الجرف ياعباس وتطلم
والكل سكت وليد مصدوم كال صدك؟؟؟
كتله جدي أسأل جدي
كال انتوا تضحكون عليه؟؟
كتله هاي بيها ضحك بالله
كال وهو مصدوم بعده وين لكاج
جدي بسرعة جاوب كاله شافها بالكلية ...
كال وهو منهار وخله ايده على الحايط ويتنفس سريع
اي وشنو صاحها وعرف اسمها وهسه يدور عليها؟؟
كتله باستهزاء يللله كول لعدي اني ناهي عليها تكدر ؟؟
شوكه كالت ياحظي جان كتيله اخذ بت عمي يابويه يابويه وصلتي لعدي وصلتي للرئيس سيدي شكد انت رائع سيدي
بيدك الطيبة الكريمة والله داوت المواجع
وتغني بالاغنية انوب مسويه فرقه وياها خواتها الاصغار يكمزن واحنه مصدومين وهي حقها ماتعرف عدي شنو عبالها ابن الرئيس يريد يزوجني
ااااااخ ياوجع قلبي بس شوكه بالها مرتاح وظلت تصيح ناسبنا الحكومه وبقينا حبايب (مقطع مسرحية ريا وسكينة )
ضحكنا وقلوبنا تنزف اني وجدي
و وليد عيونه بس الدموع بيها ماتعرف تطلع هللكد ماتعبن من النزول
طب عمو فيصل سلم صاح جدي شوكه سوي جاي
كال الله بالخير
جدي صاح الله بالخير والعافية
فيصل كعد باوعلي درت وجهي
هوظل يحجي كال اي بابا وليد شنو موضوع النهوه انت جذبت جذبه وصدگتها وين اكو نهوه بعد وانت تزوجت وخلفت حير ببزرك بابا
كاله وليد اني حياتي كلها حاير بدرة
كاله فيصل محد جبرك انت تركض وراها وهي جانت نسره تخرمش الي يوصل حدها مو انت حاير بيها ..
شوكه كاعدة يمي تكول انتي شايفج نسره
اني شنو شايفني بومه ؟ عفيه هسه اشرطي خل ياخذنا اثنينا ..
مو مصطفى هيج عرض شكو بيها ؟؟
اني بس دموع وبيا حجي ماينحجي وشكد ماحجيت مايفرغ البيه لو اكتب ايام مايخلص بس عيني بعين جدي ودموعي تنزل
والمح بجدي دمعة تفتر بعينه حابسها لاتطلع
جان يكولي بعيونه مابيدي غير حل ويهز براسه ...
فيصل كال لوليد الغلط الي سمعته بعد ماينعاد لان طلعت منكم وصارت تخصني
وليد بعجز وحسرة وعينه عليه كله بعدها يمنا
كاله بصوت عالي بس كالت موافقة انكتبت باسمي
كائن من يكون ماله حجي وياها الهوا مايمرها سمعت وليد ؟؟؟
وليد نفضت روحه كاله فيصل لاتخليني اخرب عليك
كام فيصل على حيله و سحل وليد من دشداشته كله زلمه انت خرب ادفنك اهنا بس راي دره وحجي عدنان يمشي غيره ادوسه برجلي
وياشر برجله وكمل هسه سمحتلك تحجي بعد كلمة غير السلام مالك وياها وياريت لو تطلع منا اريد احجي ويامرتي
صاح فيصل عليها انتي سمعتي
كالت اي سمعت اني كاعده يم دره خاف محتاجه شي
هز راسه بلا اطلعي هي دمغتني كدامه وطلعت تركض هي وفرقتها
جر دشداشته عدلها وعلك جكارة باوع عليه وعلى جدي مرت دقايق صمت متعبه ومهلكه عبالك تلم الي بقى حتى نواجه حياة جديدة
باوع كال شكو لاتكولين موافقتج هيج صارت او بعناد وليد
هزيت راسي بلا وكلت عدي داز احد للكلية يسال عنب يدورن على عنواني
سوا احم و كال لاتفكرين بهذا الموضوع او تقلقين سمعتي انتي بحمايتي محد يوصل يمج ابد لاتفكرين
وابتسم بغرور هسه فكري بالخطبة والعرس وشنو تامرين بي حاضر
فكري وحلمي مثل اي بنية بعرسها ماتفكر تريدين ملابس وبدلات من اي بلد والذهب اوزنج والله رفعت عيني بعينه ودمعة وحيدة جنت حابستها لاتنزل قبل ساعة
كتله مااريد غير الامان الامان مهري فيصل .. وخليت عيني بعينه ....
كال اذا مر الهوا وجرح خدج واني ماادري كولي فيصل مو كد كلمته يا مصب عيني
باوعت لجدي بعيونه نظرة رضا وقبول لكلامه
وكفت على حيلي شهكت
فيصل كام من مكانه تقرب عليه خله اصابعه على خدي
و مسح دموعي
اقشعر كل بدني
وكال ذني بعد مااريدهن ينزلن سمعتي؟
باوعت لعينه بتحدي
هو ابتعد مني وكمل كلامه بغرور وجبروت
ومسيطر الخميس الخطبة ان شاء الله
اني رجف گلبي ومطرت عيوني امسح دموعي
وينزلن عشرة عشرة
بلعومي مجرح مغصوبة ياناس ماريده اريد اشرد واركض واصيح اريد اتخبل واتمنى انصاب بزهايمر وانسى الناس والعالم والدنيا انطفيت قبل ماانور ، الوجع مالي صدري والخنكة تكتل كتل
جدي كله فيصل زواجك منها بمدة وتنتهي ...
يتبع ...
ان شاءالله نشر البارت الجاي بعد اربعينية الامام الحسين عليه السلام ...
واكيد مانختلف على ابداع ام عبد الرحمن 😍 عاشت اناملج
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!