السلام عليكم
رواية طوفان رجل
الفصل 31
نورا ناصر 🌸
إذا ركبت القطار الخطأ
حاول ان تنزل في أول محطة
لأنه كلما زادت المسافة.... زادت تكلفة العودة !
رنا ...
طلعت دره من غرفتها ووراها طلع وليد شفتها يتبعها بنظراته ... گلبي حسيته چواني ...
هو شافني وليد بسرعة انطيته ظهري ماردته يلاحظ على ملامحي ألمي وانزعاجي ماردته يلاحظ غيرتي
حسيته اجه وراي للمطبخ سمعته
كال بخجل.. ر رنا ...
ماعبرته وطلعت من باب المطبخ الي يودي للبستان
رجع صاح عليه رنا بس اسمعيني ..
جاوبته بعدم اهتمام… عادي عادي لا تهتم يمعود صدك جذب باوع واهتم وتخبل اني شدخلني
واني مستمرة أمشي حييل حتى راح أوصل لنص البستان
لزمني من عكسي ووگفني
كال أوكفي شنوو قصدج ؟
ترى ماكو شي يعني لا تفكرين بغير شي
ضحكت ضحكة طويلة كلش اشكرك ضحكتني ان شاء الله تتجازه بالجنه ما افكر بغير شي مو ؟ لعد منو يصيح ليل ونهار اني منهي ونهيت وظال بس تلطم على النهوه
جاوبني بعصبية… وانت شنو هسه صحيتي؟؟
جاوبته بمثل عصبيته :- صحييييت !! شكد منافق
تدري شنو جنت منتظرتك شوكت تصحى بس للاسف تماديت وطغيت ودست على مشاعري وعلى مرتك وابنها اني صاحيه بس انت الي مو صاحي وتركض وره سراب
وكملت واني ارجف روح تزوجها روح صيح اني ناهي على بنت عمي الي فضلت غيري عليه واني فضلتها على مرتي
ترة عادي أنت مو مهم وجودك مثل عدمه
يا مرة دافعت عني بهذا البيت حتى اشوف خسارتك جبيره انت خساره مو ربح
رجع لزمني حيل وشد على اسنانه وكال طلعلج لسان
ضحكت .. حتى البزون والبزون من تشوف واحد يدوس بمصارينها هم تنتفض الى متى اظل مدمغة لأهلك...
وصلت لقمىة عصبيتي وحجيت :- حتى عيب عليييك من يشوفوني متغيرة ومسلوحه تدري شيكولون ؟ راح يكولون بسبب زوجها مبي خيير
فتح عيونه على اوسعها وضربني على وجهي ..
ابتعدت عنه خطوات ليوره وخليت ايدي على خدي وعيوني مفتوحة اباوعله بحقد بعدها ابتسمت بألم … والله عجيب هيج الحقيقة قاسية اذا قاسية ليش ما تعدل من نفسك وتنتبه لحالك ولعائلتك بدل ما تركض وره مره متزوجة
رجع قرب مني وصاك على اسنانه وكال بتهديد
..... رنااااا
كملت وهااا اريد اصير لسان تحجي كلمة ارد بعشرة مثل دره
وانطيته ظهري ومشيت عنه .... خليت ايدي على خدي وكملت بجي ...
وصلت للبيت مسحت دموعي وطبيت غسلت وجهي ومسحت اخر دمعة نزلت من عيني
وطبيت للبيت ، شفت شوكة لازمة علي وتشفط بخده بالبوس هو شافني فرفح عليه اخذته وحضنته
كالت وين جنتي فرر من البجي عليج
اريد اخذه منها واني ساكتة هي تطل بوجهي وشابكة الطفل وتكول يا جاي احجي وي خرسة
وكملت تكول ولج احجي احجي لا تصيرين مثل قسمة مرة زامل لا زامل يطكج بمرة
سمعت صوت عمتي صاحت هاي ليش الجدورة الكبار بعدهن ما مغسولات
كلت لشوكة خلي عندج ورحت للمطبخ
طب وليد كاللها وهو يباوعلي بس معصب
جيبيهن نغسلهن بره شيغسلهن هنا
وهي عمتي كالت ايبااه انووب تغسل عنها الجدورة والله زمن ياما وياما غسلنه جدور العزايم والضيم محد كلف روحه واجه ساعدنه
كال ميخالف يمه ميخالف أني منا وجاي اساعدج ولا يهمج
اخذ الجدر ديطلع من باب المطبخ عاطت عليه
ولك وليد مو انت تعبان من الصبح واكف على رجليك طب ارتاح شوية رنا تغسلهن شناقصها ايد رجل
تحجي وتباوعلي
كتلها عمة غسليهن انت اني اديه تاخن من الغسل من الصبح لهسه
اباوع وليد يخزرني وكال كاافي اني راح اغسلهن
هو طلع من المطبخ وهي كلتلي خاف انعديتي من بت الروسية وعاجبج تاخذين مكانها لا عبالج وليد مايكدر الج ترى اشتكيج عد اخوج عادل اخلي يطيح حظج
ظليت اباوع لوليد سحب مي بالصوندة وظل يجلف بالجدورة على الصبة ، طلعت من المطبخ اخذت علي من شوكة كتلها راح انوم علي وانام
صوتي جان شويه عالي اسمع بي هناء
تعبت مليت من الفجر كاعدة اكرب ومحد يحس ابد ومنا اسهر الليل وي ابني كل شوي اكعد ارضعه كل شوي اغيرله
هذا كله يهون بس ما وصلت لحد مااحب احد يتأمر عليه هاي ساعة بالنهار مااكدر انام شوية اذا ماصار هجوم عالغرفة
بعد انوب منا وجاي اقفلها أحسن حتى عن وليد اذا ضووجني انوب تهددني بأخوية والله الواحد مايدري وين يروح وصدك خوفتني من هددتني بي لان هو مايقبل يريد المرة تطيع عيالها بكلشي كللشي
جانن خواتي من تجي شكوى عليهن يروح لبيت عيالهن يكتلهن كدامهم وهالشي اني ماريد اوصله ....
درة
هلكت من الحراثة تعبت مااعرف اعاقب نفسي لو شنو ليش اعاقب نفسي شنو مسويه مامجرمه بحق احد اشو هي الدنيا تكفخ بيه تكفخ
مااعرف حظ او مالي مكان بالدنيا مرات احس حاشكه نفسي بيها كوه وبس شلعان كلب لجدي هالمسكين
لاحول ولاقوه الابالله العلي العظيم جدي بس حسسني عنده مره وماكلي ولا وضحلي كل السالفة خلاني بين اي وبين لا عبالك معلكة بين سماء وارض
لان يدري اذا اتاكد متزوج مااضل يمه وخاف ارجع واني مصار اكثر من ٣ اسابيع يمهم
و شنو راح تكول عليه الناس وشيخلصني من الي حواليه ... اي ماكو غيرها هيج مفكر جدي
رفعت عيني لكيت فيصل بيده جكاره والظاهر صارله هواي وماحسيت عليه
كال شبيج تخبلتي شنو جاي تسوين وبهالليل ؟
كتله ببرود جاي احرث
كال ادري ليش تحرثين ؟ يعني اذا عاجبج ازرعها الج ازرعها يجي الفلاح وكليله شنو تردين من زرع وتنزرع
كتله لالا انت ماتعرف لذة الزراعة شنو اني اريد ازرعها بيدي ...
كال هيج بخبال ؟؟ اكو واحد هيج يحرث ..
كتله ليش ماتكول اطلع غيض كلبي بيها
كال و ليش هذا الغيض ؟
ذبيت الكرك واني اصب عرك وحالي يبجي الكافر رفعت عيني بعينه كتله انخذلت من شخص حسبته بعد جدي سند ثاري اتجيت على حايط من كزاز بس التفت يتكسر
و بنيته من وهم من وهم
احجي واهز اهز براسي طلكني فيصل
انصدم كال بس ليش ؟
كتله طلكني خلي الم بقايا دره واداوي جرحي من جديدً
جرني كال تعاي نحجي فوك شنو الصار وهيج حالج خذلتج بشنو خل نحجي
هديت ايدي منه كتله عوفني اني اعرف شون اداوي روحي ما اريد منك شي اطمئن طول عمري وحيده بس كون تسوي فضل ونقنع جدي بالطلاق
مد ايده ظل ياشر على راسي كال باعي هذا الطلاك تشيلي من بالج ولاتفكرين بي بعد ابد
اني وياج بس الموت يفاركنا
لزمني من زنودي يله تعاي ارتاحي هسه ويصير النه حجي غير مرة انت تعبانة
دره انتي عايشه بروحي ابد لايصير عندج شك بحبي الج سمعتي؟
حركت روحي وخرت اديه مني و عفته ورجعت احرث والله من اخلي رجلي على الكرك واغرسها بالكاع عبالك بقلبي تنغرس واحفر بي واطلع الامال والتفاؤل وكل الاحلام
ترك المكان الي اني بي و راح للمكتب الي هو كبالي تقريبا وحتى يكدر يشوفني ... وظل يراقبني من بعيد
واني على هالحال اجت عمه صفية تضحك وتهز بايدها باوعتلها بنظرة بمعنى خير ؟
ضحكت كالت شبيج مسودنه لو حنيتي لأصلج
تجاهلتها بلحظتها ماجاي اطيقها ...
هي كملت كلامها بس عفيه بيج عبن ظلي لاتبعدين عن أصلج هواي لأن فيصل مثل الريح والهوا ماله امان يابت اخوي ...
ضحكت وهزيت راسي هذا الخايف منه جدي الشمات والحولي كلها تضحك على جروحي وترقص عليها
ردت اخلص منها واضوجها كتله باعي يجي يوم هذا البيت يبقى بس الي واذكرج وحفظيها زين
وبعدين تعاي جاي ترى فيصل رباتج يعمه لهذا شايفته ريح لأن انتي حاسه نفسج اهنا هوا فارغ تنفخين نفسج علينا وعلى اهلج
كامت تصيح السانج ياادبسز واني شتوقع منج طول عمرج دايحه وياابوي بكل فاتحه وبكل عرس
ضحكت وهي راحت تدردم ....
وكفت اباوع عليها تبتعد واواعد نفسي
والنبي الا اخبل البيت كله اولهم فيصل وماشي
سهلة
ذبيت الكرك ورفعت عيني اباوع عليه وهو بالمكتب شفته يباوع عليه من الشباك كاعد على الميز مالته
وبيده الجكاره
اكول بگلبي شتسفط جذب عليه ...
صعدت اخذت هدوم اسبح واني جوه الدوش اكول اواجه شلون واني مااعرف خلاني جدي بالنص لا فهمني ولا خلاني على عماي
بس اعرف جدي قصده مايريد ينضحك علينا
خلصت السبح و انشف بروحي اتذكرت حرصه عليه علمود لا اتمرض اوووف ياربي شجاج دره كافي تفكرين بكلشي
طلعت لكيته كاعد وطبعا هاي اول مره موجود هيج وكت بالبيت دائما يطلع بالعشره ويرجع وراال ١٢
باوعت عليه كتله شعجب موجود الليلة ؟
كال علمود احجي وياج
كتله مابينا كلام لا تتعب نفسك
دااروح من يمه لزمني كعدني يمه عالسرير
كال تكدرين باليوم ٥ او ٦ مرات؟؟
فتحت عيوني متفاجاه من كلامه
تنهد واتجا على الجرباية وكمل لا وبطريقه حيوانيه هم ماارحم اني
بقيت مصدومه بكلامه وماكدر انطق
كمل ردت اخليج تحبيني واكسبج حتى تتحملين الي اني بي ، طاقتي تهلكج وتكرهج بيه واعرف اذا اجمع وحده وياج ماراح تظلين
وردت هاي السنه اعيشج ملكه واكسبج ، و ادور الفرح بعيونج ، عشت ويانساء من كل جنس ونوع واذيتهم هواي ودتمروا مني
بس انتي مااكدر ااذيج ومااكدر اعوفج ادري ماراح يفيدج تبريري لموقفي بس هو هذا الواقع
وهاا ليكون بعلمج اني عالجت هوايه ورحت دكاتره كالوا حاله نفسيه
اباوع عليه انطعن وجهه راد يكوم لزمته كمل ماتعوفني بنص الكلام
كال من اني وصغير طول النهار اني بالزرع اشتغل الكرك اكبر مني واني اشتغل بي اني الزم شغل ابوي وهو ملتهي بالشرب والسكر
ولايوم شافني ولا يعرفني اذا شافني بس توالي الليل يرجع للبيت
و من ارجع من المدرسه الكه جدتي زهرة عازله غدا الي وتنغص الي
وراها اطلع من الوحده الظهر لحد العشره باليل لحد مااطفي ماطورات المي على الزرع ارجع مهدود حيلي
ادور لكمة داكني الجوع اباوع جدتي زهره نايمه
وصفيه كمل بضحكة صفية لو تشوفني اموت ماتطيي مي
ادور الكه بس خبز واركض لغرفتنا تعرفين جدي قاسم وعودته من يفتر ويلكه واحد كاعد يلزمه فلقة
اخذ الخبزه واروح لغرفتنا اطلع واجبي اكتب وصفيه ممدده تنوم بعمار
اكتب بايد واكل بيد بس تسمع ابوي اجا سكران تكوم تدثرني وتصيح لااا تحووس واذا حست تعرف شسوي بيك
جنت طفل صغير واخاف وعلى تهديدها اغطي راسي واكل بالخبزة لان ذابحني الجوع
تخيلي وهي شسوي !! تبدي تنزع كدامي ربها ماخلقها وتغوي ابوي
اسمعه يصيح بأسم امي وصفيه تتجاوب وياه وتدري بيه كاعد واسمع كلشي يصير. و اشوف واسمع من عمري ست سنين لحد عشرة من اخذوني بيت جدي ليلية على هذا الحال ...
واذا اطلع نفس تحبسني بمخزن جوه الدرج المظلم الي كله جريذية
سكت شويه مسح وجهه وبعدها رفع راسه
انتي ماتدرين شنو شفت و شنو عشت
ظليت صافنه بكلامه واحجي بقلبي صفيه الله لاينطيج ولاتشوفين العافيه ابد شمسويه بي وهو بهذا العمر ومامخلص من العقد الي سببتيها اله بسبب عمايلج يالماتخافين الله
اباوع عليه واصفن بي وألاحظ الجكاره مانزلت من ايده
كال جنت احتمل ظلم صفيه لخاطر جدج يجي للبستان ويجيب اكل اليه ومايرضى على جدي قاسم واذيته
وحتى ملابس يشتريلي مثل ابوج واكثر هم لان كم مره يطي لصفيه وهي تاخذ الفلوس وماتجيبلي
ومره جدج شاف ملابسي تعبانه كال لعد صفيه ماجابت الك ؟
كتله لا ...
راح لبيتنا ومتعارك وياها وحتى ضرب ضاربها
واني بس رجعت للبيت .. شوفي شسووت بيه
رفع التي شيرت كال باعي
وشوفني اثر مال حرق بصفحته
نزل التيشيرت وكال كاعد اقرا ومااحسها الا وكفت فوك راسي واني اكتب ...
انتبهت بيدها سجينة من كد الحرارة صايرة حمرة شالتها وطبعتها بصفحتي
ظليت ارافس من الالم وهي تصيح هاي بعد حتى لا تشكيني يم ابوي
الالم بلحظتها اخترق روحي مو بس جسمي حرفيا حسيت الحرارة تخترق الشرايين والاوردة وتچويها
ومن حلاة بروحي تبعتها صرت كدامها و اخذت السجينه وضربتها بيها ببطنها
صررخت ووكعت علل على ركبها تتألم والدم ترس ملابسها كلبت البيت بالصراخ والتموا عمامي عليه وحبسوني جوه الدرج واخذوها للمستشفى
وهناك مشتكيه عليه واجو اخذوني الشرطه وحققوا وياي واني صغير بعمر عشرة
شبعت كتل وبس جدج يركض يريد يطلعني عمامي وابوي وجدي قاسم يكولون طبه مرض
وظليت بالشهرين بالسجن ، لحد ما جدج تعب وماكو حل
غير يروح لجدي اللواء ...
واجا عليه هو وجدتي ام امي راحوا لصفيه حتى تتنازل عن القضية لان ماكو وقت راح انحكم
قبلت مقابل ذهب امي كله الها
كالولها ميخالف وصار التنازل وطلعت واخذوني اجدادي انسان متدمر كل عقد الدنيا بي من غير الي شفته بالسجن واني عمري عشرة سنوات ..
صفيه شاذكر منها وشنو انسى
ظليت صافنه هاي الرواية اول مرة اسمعها ، كل الي سمعته انو جده شايفه تعبان واخذه يمه
اوووف شيحمل قلبك الله يساعدك واني ماراضيه على حامد وهناء طلعوا ملائكه بالنسبه لصفيه ابليس
سألته ليش جبتها يمك اذا هيج مسويه بيك وماعدها رحم هيج انسان يظل متدمر نفسيا اذا كبالك هي طول الوقت
مراح تنسى الي سوته بيك
سألني شفتيها بقوتها كدامي لوتخاف مني؟
كتله الصراحه بخزره منك ترجف
ضحك كال وذهب امي رجعته وهي الممنونه
كتله شلون؟؟
كال مو هذا موضوعنا
كتله صح بس مع هذا مو مبرر للي تسوي ويايه ليش تاخذني بذنب غيري ليش !
انت تعرف الي بيه مكفيني وزايد انت قتلت امال هواي وحتى من زرعت املي بيك وبده يكبر دست عليه انت مااطيتني فرصه اساعدك ، واحد يضمد جراح الثاني
اني اشكال شفت بعمري ماتركت هذا الشي ياثر عليه او اعكسه على غيري مماذيه بشر واخذ ذنب غيري بس لان اكو انسان بحياتي ظالم واذاني
اني اعذرني مااكدر بعد اسلمك نفسي مااكدر اتقبلك انت ماتركت فرصه الي حتى اسندك ماخليتنا فرصه نثبت الهم ماتدوم لاحد والي يظلم اكو الاقوى منه وربك عادل
حتى جدي صدمته بيك تفوق الوصف تعرف شنو يحجي بيك شنو يكول عنك شون يرغبني بيك كمت ابجي بصوت
عالي واشهك
اجه وقرب مني كال الي تردي شنو اتركها؟؟
تخبلت وتعصببت صيحت يعني تحجي عينك عينك وخر مني ووخررر مااريدك لو تصير ذهب سمعت مااريدك
ركضت لغرفة الملابس قفلتها عليه انهاريت ظليت ابجي ماادري شون اتصرف
تمددت بالكاع يارب ساعدني ووجهني للطريق الصح يارب ماعندي غيرك ...
ظليت اردد لاحول ولاقوة الابالله العلي العظيم ، اردد لحد ماغفيت على الارض و ماادري بالوكت المر شكد
وبقيت نايمه
بعدها كعدت و فتحت الباب الشمس قويه اباوع للساعه ب١٢ ونص
رحت توضيت وصليت رجعت لدعائي رب اني اتوجه اليك بنبيك ……
شويه ودكت كلت منو ؟ سمعت صوت رزان تكول اني
رحت للباب فتحته
شافتني ظلت تتأمل ملامحي الحزينة انقهرت ورمقتني بنظرة حزن كالت مرتبكة فيصل خابر يسال عليج يكول خما مصخنه؟
كتلها لا مابيه شي
كالت يكول جاي يدك بالتليفون ليش متجاوبين
كتلها نايمه جنت وما سمعته
ردت حبيبتي درة محتاجة شي ؟
هزيت راسي لا ممحتاجه شي بس تعالي فوتي شويه
فتت كعدت يمي كتلها رزان فيصل هم جان هيج ويانسوانه .. يعني اني اول مره اسالج هيج سؤال ممكن تجاوبين؟
كالت لا والله و وكفت على حيلها لزمتني من ايدي
كالت تعاي ويايه ...
رحت وياها اخذتني وياها للغرفة الي رادت تدخلني بيها صباح
فتحتها كالت كل نسوانه بهاي الغرفه ومايطب كد ساعه او اكثر ويطلع وحتى ماينام بيه انتي الوحيده الي خلاج بغرفته
وحتى انصدمنا من امي سالته نحضرلها غرفة العرايس؟
جاوبها نصا والله تخسى مره تساوي دره ، دره مكانها يمي بغرفتي معززه مكرمه اميره وانتو خدم الها
حتى ماما والولد انقهروا من كلامه
كملت دره حبابه والله يحبج وكلنا فرحنا من كال اتزوجها كلش هواي فرحنا اني والولد
انتو من البارحه وضعكم يختلف وعاشت ايدج صباح بعد ماوصلت وخابرت ماما تتوسل بيها حتى تحاجي فيصل يقبل يرجعها
وهي وصت منو وفيصل عاد كولش ياخذ حجاية ماما
كتلها ليش هن صباح وامج صديقات؟
كالت لا بس هنا يتفقن على كل عروس تطب للبيت...
كتلها لعد فيصل مايتدخل؟؟
كالت ابد يتكافشن يتذابحن ماله علاقه واذا اشتكت وحده يكلب البيت على روسنا بحيث اني شغلي فازوع
وياويلها اذا صفت وياهم فاتن على وحده عيشتها سوده ومصخمه
بس انتي الصراحه قبل لاتجين هددنا كلنا وامي تعرفيها ماتسكت بحيث كال لأخواني لاتزعلون دره لان هي بكفه وانتو بكفه اعزها مثلكم واكثر
الصراحه جان قاسي باسلوبه
هزيت راسي اريد اطلع هذا الكلام كله يهزني ويضعفني تجاهه مره انطي الحق ومره مااغفر
طلعت منها مااريد كلام يشتت فكري نزلت جوه صاحت صفيه كعدت العروس التليفون احترك علمودها
عفتها وطبيت للمطبخ وهي ورايه كتلهم شنو الغدا
كالت ام سعد الست صفيه عريد نطبخ تمن احمر ودجاج
كتلهم بعصبية لا غيروه
وصفيه كامت طكطك وترجف كالت ها دره حبيبتي شنو تردين؟
درت وجهي الها اباوعلها ببرود مرعب وتهديد ..
كالت سوولها ريوك دنت الكرسي يمي
كالت شتفقنا ؟
كتلها اسالي نفسج عمه انتي الي تنسين مو اني عيني ام سعد سويلنا مركه فاصوليا
نطت عمة صفيه تكوللهم تشاقى وياكم تعاي تعاي عمه نباوع تلفزيون
كتلهم اريد قوائم الصرف البنيه انطتها الي
وعمه صفيه كالت كافي دره حبيبتي عوفيها هاي السوالف لوما احنه دم ولحم واحد
كتلها صفي الحساب هالاسبوع واني الزمه من اسبوع الخ عايفه حال ومال رجلي بيد العالم هم حرام عليه الله يحاسبني
عفتها ورحت للحديقة بديت اخطط شنو اريد ازرع وبديت اكتب الي اريده من بذور الزرع واكدت على شقائق النعمان وياسمين البر اهم الشتلات الي اريدها وكتبت سماد واريد سياج ناصي اعزلها عن البيت
اريد مملكه خاصه الي مالهم علاقه بيها
وظلت صفيه تروح وتجي عليه كالت الي كلتي صحيح لا مستحيل حبيبتي انتي
كتلها لاصح اريد الزم امور بيتي ولان انتي ماتكدرين تغيرين طبعج ويايه واذا ماعاجبج كلامي اشتكيني لفيصل العباس عليج اشتكي لفيصل
هزت ايدها وراحت وراها رجعت وبيدها عصير شكيت خاف بي شي من شوكت نزلت المحنه
كالت دره اشربي عصير مو تعبانه ومااكلتي شي؟؟
كتلها مشكوره مااريد يحرمني من الغدا واشبع
كالت بداعة جدج اشربي
طب فيصل يمكن سمع كلامها اخذه منها كال اي والله اجا بوكته هي كامت ترجف كالته يمعوده عوفه اني اسويلك هذا لدره خطيه تعبانه بالحديقه
كالها جيبي اني اشربه واروحي سويلي واحد راحت تمشي بسرعه اخذ الكلاص وذبه بالكاع كله عرف اني شاكه بي
كال ههه صدك محد يكدر يضحك عليج
كتله لا انت كدرت
رد ويأشر على نفسه اني ضحكت عليج انتي الوحيده الي مااذيتها بحياتي ولا راح ااذيها
اجت صفيه وبيدها عصير تكول سوده عليه فيصل تعبان هذا سويته بايدي
كلها رحمه الله والديج اي والله حجي عدنان يستاهل الرحمة
رفع عينه عليها ظلت واكفه يمنا كلها خير حجيه مره ورجال واكفين سالمين
ضحكت كالت هااا اباوع لدره نادره شوف شنو جاي تسوي
كال شوي ويجي الزرع الي ردتيه تامرين بشي هزيت راسي بلا
كال ماشي راح يسبح وصاحونا على الغدا
مر الروتين اليوم عادي والليل طلعت للحديقه سمعت جايبين الزرع خطيه ابو اسعد كال بويه كليلي واني ازرعهم كتله لا والله اني اتونس بيهم ماعندي شي بس وصلهم يمي وهاهيه
والله بديت انزل بالشتلات وازرع بيهم بالكاع ...
هاي الفترة ابتعدت عنه واللتهيت بزرعاتي
مرة ملتهية بالحديقة اباوع لبناتي الزرعات سميتهم بناتي هلكد مااهتم بيه واكفة واجا فيصل كال اكولج شكد صارلنا من تزوجنا؟
كتله ٤٢ يوم
كال ومبين ضايج وعصبب :- لعد شو مااجتج الشهرية !؟
يتبع ...
عويناتي انتوا ... اذا فد يوم البارت كلش قصير معناهه ظرف منعنا نكمله فياريت تعذرون فدوة اروح الكم انه 🌸💜
وهذا بارت تعويض عن البارحة وبيوم ماننشر او قصير عذروا شويه تحياتي وشكرا للمتابعة
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!