السلام عليكم
رواية طوفان رجل
الفصل 30
نورا ناصر 🌸
- أنا أهجر الأراضي التي لا ترحب بي، وإن كلفتني عزة النفس أن أعيش بلا أرض، وأهجر الأشخاص الذين لا يعاشرون وإن كلفني ذلك أن أعيش بلا بشر.
رنا ...
بليلة حنة درة وبعد ما تعشينا وخفت العالم وراحت لبيوتها صارت الساعة 11 دخلت لغرفتي انوم علي لان نعس وهو اصلا ينام على وقت حده لل9 بس اليوم لأن هوسه ..
خليت علاوي على رجلي اهزه حتى ينام وهو من يريد ينام يسووي اووو اوووو مثل واحد يهذي ويظل يغمض ويفتح يله يغفى
واني اباوعله مبتسمة احبه من ينام ويسوي هاي الحركة من يرفع شفايفه يوصلهم لخشمه الشنوفة مالته ابوسه عليهه
ورى ما غفى خليته بنص السرير تذكرت اختي تكلي حرمي منج وخلي علي بيناتكم من تنامون
فكرت ثواني وصفنت ! بس اني ليش اسوي هيج واحسسه مهتمة!
هو اني فعلا مهتمة بس احب اتصرف على طبيعتي
والحجاية اوزنها يله احجيها ...
صح مادارسة وماعندي شهادة بس اعرف يمتى احجي ويمتى اسكت ودائما احب اسكت ثواني قبل ماا انطق وهالسكوت ينطيني فرصة افكر شنو احجي
اخويه عادل مايحب بنية تدرس رغم هو دارس ومحامي بس ضد الدراسة للبنية
أني الوحيدة من بين اخواتي الاربعة وصلت للصف الثاني متوسط نجحت منه وبطلني ...
بس خبرتي اكتسبتها من خواتي الاربعة الأكبر مني
ومشاكلهن ويه رجالهن ...
اني تزوجت وليد زواج تقليدي ، مثل اي بنية بمنطقتنه ، منطقة كلها بساتين ونادرا مايصير بيها قصة حب ، واذا صار وصارت يبووو السلف كله يدري صغير وجبير يصيح هاي فلانه مصاحبة فلان ...
احنا ربينا سوى وي درة وبنات عمي الباقيات كلهن وجنت اشوفهم هي ووليد ميتفاركون بس كل الي في بالي جان بحسبة اخوها ماتوقعته يحبها ورايدها زواج
ومن خطبني وافقت واهلي فرحوا ووافقوا وليد ماكو منه وحجي عدنان هم ماكو منه والكل يعرفه ووليد هادئ واخلاقه عالية وشاغول ومتميز ...
من تزوجنا حسيت نفسي اسعد انسانة وياه ، و محترم كلش ويقدر وايده مو اله نفسه حلوة..
بالخطوبة وبعدها ماشفته هواي وبسرعة صارت وتزوجنا ..
من شفته يعاملني بلطف وهدوء ، احترام يسولف وياي يشاركني بهواي شغلات تخصني كلت هذا هو يحبني ولا يمكن يشوف وحدة غيري ... فرحت هواي فرحت
بعدها وبعد المشاكل الي صارت والاسرار الي طلعت علني ومن اكتشفت هو يحب دره حسيت هاي الفرحة بداخلي طفت
واستنتجت انو كل هذا الي يسوي الي هو من باب الواجب لا أكثر واني عبالي حب
واني قبلها ظليت انقش قصة بدماغي يمكن هو شايفني بفد مناسبة او طلعة او مرة جاي لبيتنا وانعجب بيه وصار يحبني ...
بس بعد ماطلعت الاسرار كرهت معاملته اللطيفة الي عرفت هذا كله مزيف
وبعد الي سواه بدرة رحت لاهلي وحجيت الهم على كل شي وعادل جان رأيه هذا بيت ابوج وكعدي بي يمتى مايعجبج بس مرجعج لرجلج لاتحلمين وتفكرين بالطلاگ ابد ....
هو زلمه يحب يصادق ماعليج بي شايل عيبته اهم شئ مامقصر وياج ومرجعه الج ...
واني اكيد ملازم اناقش اخويه عادل ابد ومن راح اختليت وي امي والدموع بعيني ابني بحضني اعرف أني مرجعي لوليد بس شون اتصرف
عيوني تسأل أمي بدون مااحجي ..
كالت سمعي يمه وليد يضربج ؟
هزيت راسي لا
يضرب ابنج ؟
هزيت راسي بقوة لا يمه يحبه يموت عليه
زين مقصر وياج ؟ بالاكل بالشرب بالهدوم بالفراش ؟
هم هزيت راسي
كالت لعد انت ليش ضايجة هذا هو بعد شنو ليش تبجين وجايه زعلانة
يمه هو ليش تزوجني مدام يحبها
كالت تدرين بيها بت الروسية حلووة وشكد خطاب خطبوها وهو من باب بت عمه واله ماتصير لغيره جاي يسوي هيج وله هو يحبج انت شفتي جم مرة اجه ودك بابنه من جيتي لهسه ويكلج يله ارجعج حتى لو يحبها جان زوجها اله حجي عدنا بس انت قسمته
ظلي هنا هذا بيت ابوج وانت بتي ماطردج واكلج امشي ولو ادري بي ياذيج لو يضربج ماخليج ترجعيله حتى لو يبوس رجلج اله احرمه من ابنه ومنج بس وليد خوش وليد وانت محظوظة بي ماتشوفين خواتج وقسمتهن شايفات الضيم وكله وكله متحملات
اني لا اريد اصير مثل خواتي ولا حابة وضعي هذا بس ماكو اي خيار ثاني ... جنت عايشة بوهم اسمه الحب وطلع مزيف
يمه مدام من نفس راضيه بعد موواله حب من نعلة على الحب
وظلت تضحك ضحكة امي الاحبها ويه الدكات الي على حنجها
وعلاوي هم على ضحكة امي ضحك ويخلي اصبعه على الوشم الاخضر الي على حنجها متعجب وهي تشبكه وتبوس بي ...
التفكير تعبني اني اعرف مرجعي اله وحياتي مراح اعيشها مثل ما اريد واتمنى و احاول امشي الأمور بس بنفس الوقت لازم يعرف انو اني مو لهالدرجة مضحية
هو خدعني ولازم يعرف خطأه ... ويعرف أني مو سهلة وأمشي الخطأ بحقي اني قوتي بشكل مختلف ممكن بصبري بتحملي وحتى بسكوتي
بليلة الحنة ..... دخل وليد للغرفة خليت اديه جوه علي حتى اخلي بسريره .. هو جان تعبان حييل ...وحسراته مابطلها لدرجة خفت منه خفت يطلع الحركة بيه ، لو بالطفل
تقرب من السرير متردد حسيته شوويه ، اني نزلت رجليه من السرير هو اجه كال بصوت كوة ينسمع وكله عبرة
اخذه اخلي اني بسريره ؟
بالبداية ترددت انطي اله عود ابيع ثگل ومزعوجة من تصرفه ، بس بعدين مديته اله واخذه مني
خليته ياخذه ويخلي بسريره وگمت اريد اطلع من الغرفة سمعته يحاجيني وكفت استمع إله منطته ظهر وساكتة
كال رنا ما تجين تنامين ؟
جاوبته بنبرة سريعة حرصت مابين انزعاجي على تصرفاته - رايحة يم البنات...
كلت هيج وفتحت الباب دااطلع
سمعته كال بنبرة كلها ندم ..
- أني أسف رنا
مجاوبته وطلعت .. لغرفة شوكة وجانت يمها رسل ومنى وهي لازمتهم وحدة وحدة وبالاوتي تكوي شعرهم عود تحضرهم لباجر للعرس
دفرت منى وكومتها
كالتلي تعاي ام عليوي مددي خلي اكوي شعرج
كتلها شوكة عفية الدنيا تفور حر تكوينه هسه منا لباجر شيصير بي
كالت شبيج انت احطله تفال من حلكي يثبت بعد ولا يتحرك منا لباجر صاير مسطيحة
ضحكت لا حبابة عوفيني بحالي
فرت ايدها وغمتني كالت أنت هم مدري شلونج الله منطيج نعمة عايفتها وجايه مكابلة چهرنا وكاعدة
كتله نعمة شنو و
كالت رجال رجال تارس حضنج وانت متعافية عايفته وجايه يمنه امداج
تحسرت .. طبت عمتي هناء تتثاوب
كالت وسم شوكة خلي البنات يخمدن وخمدي خلينه نخمد
عافت الاوتي على شعر منى وذيج متمددة ماتدري بالدنيا وظلت تحجي ويه امها
صحت عليها ولج شووكة الاوتيى راح يحرك شعر منوة خطية
وهي انتبهت ووخرته
هناء انتبهت اني يمهن كالت شعندج هنا وعايفة رجلج احنه المن رجعناج بالله دروحي يمه روحي خلي ينساها
وفرت بيدهه ، كمت اني كتلهم تصبحون على خير.. اريد اطلع بره صاحت وراي وين غرفتج مو منا
جاوبتها ان شاءالله عمة بس اني رايحة اجيب ملابس علاوي من الحبل .... تثاوبت وكالت وهي تتثاوب روحي
طلعت اريد ابقى اطول فترة ممكنة بعيدة عنه ماريد اشوفه وهم اريد انعس حتى من ارجع بسرعة انام وهو خلي عايش على اطلاله ...
.... افتريت شويه يم الحبل واخذت الملابس طبكتهم وخليتهم بالصالة على الكرويته وبعدها رجعت للغرفة بس دخلت كفخت ريحة الجكاير بخشمي
تأفاأف الطفل نايم بالغرفة وهو يدخن ، لا حول ولا قوة الا بالله.. ماكو إحساس
دخلت وفتحت شباك الغرفة هو كال ليش مو حر وهسه يطلع هوا المبردة بره
كتله بنبرة شبه عصبية مو الطفل نايم خلي يطلع دخان الجكاير لا يتمرض شنو ذنبه
كام هو وطفاها بالنفاضة الي على الميز بصف الجرباية
واني رحت تمددت على طرف الفراش وانطيته ظهري ...
سمعته همس رنا .... مجاوبته وغمضت عيوني وغفيت ...
ومرت الأيام من بعد زواج درة هو حالته حالة ، واني مستمرة بجفائي ، جان يحاول يتقرب مني بس اني ابتعد اكثر ماريد اصير اني دوى لجروحه مالي ذنب اني خلي يتشافى لوحده
جنت الهي روحي وي ابني وشغل البيت الي مايخلص وشوكة ومقالبها وسوالفها ...
بس يبقى كلامه الحلو الي جان يسمعه اليه ومن يتغزل بيه يجرحني ويألمنيى جنت فرحانة بي وهسه ضايجة
احسه مجرد واجب
مرات مو بس الكلام السيء يجرح حتى الكلام الحلو اذا نكتشفه مجرد مجاملة او فرض من شخص خطأ ..
ورة عرس درة اجاني وليد للمطبخ كال شنو نشتري هدية لدرة !
التافيت عليه خليت عيني بعينه اجذب اذا اكول ماغرت او ضجت
اني احب درة بس هم انثىٰ اني وعندي مشاعر
بعد ثواني قررت اجاوب .. ماعرف وليد اني انت اختار لان تعرف شنو تحب وتعرف شنو يعجبها ...
دخلت عمتي كالت والله بطرانيين انتوا تشترولها هدية هي عايزة ؟ شو خير من الله عدهه مال وحلال وبعدين يا هدية تملي عينها وهو فيصل مغركها بالفلوس خلي هاي الجم فلس يفيدنك الك ولابنك وللبيت
كتلها عمه هي الهدية مو بسعرها بس بقيمتها ومن باب ذكرني ما حكرني رفعة راس الهه كدام زوجها
ظلت تفر بيدها عود تعرف تحجي هي الفاهية ديله كملي غسل مواعين صارلج سنة بيهن من يمتى دخلتي المطبخ
كالت هيج وطلعت واني انطيت لوليد ظهر وظليت اغسل بالمواعين وهو جان كولش قريب عليه
حسيته قرب مني واشتمني من يم ركبتي كمت حركت اكتافي احاول ابين اله رفضي لقربه مني
وهو فعلا حس وطلع ...
بيوم عزيمة درة وعيالهه كعدنا من الصبح نطبخ ونحضر
وليد كل شوي فات درة هيج تحب ودرة هيج سوولها
مااعرف شوكت يطيب من حبه الها لو راح يبقى ملازمه طول عمره هالشي فعلا متعب واكثر من طاقة تحملي اله
قبل الظهر بشويه اجوي وسلمت عليهم
بعدها جنه لاهين فاتت لمياء اخت مصطفى
سلمت وسألتني على درة
جاوبتها والله ماادري يمكن بغرفتها
رحنه للديوان ماكو يمكن طلعوا للبستان هي والحجي ورجلها بس جنطتها موجودة جانت اني طلعت لان صاحت عليه بيبي وبقت لمياء ورايه ...
درة ..
من شفت جدي ضرب فيصل انصدمت ، فيصل عاط ولزم ايد جدي
اني خفت على جدي ، فيصل جان معصب حييل
طبيت بسرعة عليهم خايفة أول مرة اشوف جدي هيج يمد ايده على فيصل وماعرفت شكو
دخلت بيناتهم مرعووبة مصدوومة
كتلهم شكو جدي ليش شصاير فهمني
فيصل بس مصدوم من ردة فعل جدي
جدي تنهد بقووة وعيونه على فيصل عاكد حواجبه وضايج
جدي رد علين مالج شغل أنت ِ
كتله شون مالي شغل جدي كولي احجي شعجب هيج ضربته غير اكو شي لاتضم عليه
فيصل هز راسه وكال يمون ابو سلام
ظليت اباوع هيج وهيج
كتلهم شكو احد يكلي جدي لا تخليني محتارة احجي عفية
جدي كال يريد يطلع اخوانه من البيت وتبقون بس انت وياه بي وجاي احاول اقنعه مايرضى ويسب صفيه وانه ماارضى على بزري
كتله بس هيج ؟ و تضربه جدي ؟ اشو ممقتنعة جدي
كال اي اضربه وحتى بكسرية هم اذا تطلب الحال
حتى اوعي لدنياه هذا نسى الامانه ونسى نفسه
فيصل بس يكوله تمون حجي بس لاتكول لاخواني ماارضى على زعلهم اني والي تريده يصير مايصير خاطرك الاطيب
بقيت صافنة وكلشي ماافتمهت من كلامهم احسه بس بسامير واثنيهم مصدومين من بعض
جدي جاوب فيصل كله مااوعدك اكدر اسكت مااوعدك فيصل لاتخيب املي بيك لا عبالك تبقى يمك
كاله فيصل لخاطري اذا جان غالي والله وروح امي لمصلحتهم وانت تعرف البيه كلها جربت وشفتهم مو كدها
جاوبه جدي بعصبيته وعصاته رافعها بوجها بتهديد
اطيتك مهره جامحه لو انت تشوف نفسك مو خيالها؟
ورفع تك حاجبه جدي
كتلهم فهموني اني اطرش بالزفه بينكم جدي احلفك
بعدني ممكملة قاطعني جدي كال هي كلساع مو كتلج على شنو تعيدين وتزيدين
و يله يابه خل نروح يم الوادم ...
كتله اوكف جدي ترى اني مو غبية وانت تعرفني مو هذا الموضوع الي جاي تتعاركون عليه كولوا شكو؟؟
ترة مبينه حجيكم اقوى ومااظن فيصل يسكت وانت ضربته
كال فيصل لان غلطان وحجي عدنان يمون يمون
اباوعله عيونه بالكاع ويصيح يمون ويهز راسه
شبي هذا بقيت متساءلة شميوي من مصيبة
صرت حيل محتارة وفضولي يقرأ الف ..
بعدها رفع راسه وعينه مايخليهه بعيني يلعدها رأسا كال يله دره نروح هم يله ؟
تفاجئت !! شبسرعة بعده ماصار العصر
جدي كال لا بعد وكت ابقوا ...
طلعت وعفتهم وطالعه روحي ومااتقنعت بالموضوع ابد ... ليش مايحجون شبيهم ...
رحت اغسل بوجهي واعيد بالغسل بنفسي اعرف شكووو
سمعت صوت ورايه التفتت لكيت لمياء اخترعت كتلها خرعتيني كالت اسفه والله وحضنتني وبوستني شلونج مبروك حبي ان شاء الله تتهنين
كتلها شكراا ...يوم الالج
رجعت حضنتني ... وتهمس باءذني اكولج درة حبي اسفة على الرساله خليتها بجنطتج مصطفى جبرني والله خطيه لو تشوفين حالته
وخرتها مني كتلها عزا العزاني شافها فيصل وماعرفت شنو اكوله يارب سترك اكولج انتوا ما تتوبون شوون بيكم تدمرون حياتي يله ترتاحون عوفوني لخاطر الله عوفوني ....
ورجعت همست باذنها فهمي اخوج اني مووو قسمته
كااافي عااد الي ... ومكملت كلامي...
اجه وليد كال شكو ؟
لمياء كبل كالت اني معليه والله معليه
دغيتها وكتلها سكتيييي كتله ماكو شي وليد
بيني وبينها
هي بسرعة كالت باي درة مع السلامة وراحت تركض
قرب وليد مني مبتسم
شعدها المرسال القديم يمج ومرتبكة !!!
كتله دعوووفووني بحالي هووو شكوو منخلص عاااد !!!
اني جنت معصبة حييل وطلعت الحركة بي هو
لزمني من أيدي كال اعصابج هوووشكو وهيج عصبتي
سحبت أيدي منه و ظليت استغفر ربي اكثر من مره رحت لغرفتي بنفسي ابجي اني من نوع من احس الخيوط مو واضحه كدامي وماابيدي حيله كولش انقهر
والتفكير بجدي يمووتني اكيد الموضوع جبير ولا فيصل يسكت من ضربه جدي اكيد مايسكت بس جدي لازم عليه لزمة
اوووف ياربي ساعدني اريد اطلع طب وليد
مرة ثانية دره شبيج مبينه ممرتاحة ...
كتله وليد والله مرتاحه الحمد لله بخير وانت هم مبين مرتاح رنا ذهب وتستاهلها انت وابنك يخبل ربي يحفظكم دير بالك عليها
جنت احجي بسرعة بسرررعة اريد اخلص منه ماجاي يفكني
قرب مني كال لتزعلين مني اني قبل شويه دااشاقة وياج مو اعرف لمياء ماقصدي بحقج شي
وكمل كلامه دره اني بقى سندج وعزوتج مايردج بس لسانج يمتى ماتحتاجيني موجود
احاول اهدي نفسي كتله والنعم منك ماتقصر وليد
دير بالك على رنا خطية
كال بلكي تحجين وياها هي كلش مجافيتني وبعدها زعلانة ، اني تركتها على راحتها بس ممقصر وياها والله يشهد
كتله ادري بيك بس هي حقها تبتعد عنك هم تريد تستوعب الي هي بي خليها على راحتها
كال بس هيج تصير فجوة بيناتنا وماريد اضغط عليها هواي انقهر عليها اعرف خدعتها بس والله ما اكدر بدونها
كتله ان شاء الله ع الجايات احجي وياها اني تدلل وتستاهلون انت وياها ...
تشكر مني وطلع واني طلعت وراه
لاكيت شوكه سدت عليه الدرب
تغني اليه ناس عايشه بالعسل وناس كاتلها البصل اااه ياويلي ااااه
ضحكت كتلها والله احسن الج هيج والله تعبانه ودايخه بزماني دوخة الله يعلم بيها
ظلت تغمز تكولي مو كتلج فيصل يتعب اخذيني ضرتج واعاونج على هالضيم ماكو احلى منه نتشارك اني وياج وتصير حياتنه حلوة
شويه ونسحلت من فستاني اباوع جدي
يحاجيني تعاي يالمغسوله تعاي
طبيت وياه متعجبة وكلي فضول اريد اعرف الموضوع الي عموده ضرب فيصل لان ممقتنعة بلي كالوه
وكفت يمه اباوعله واسمع اله بكل جوارحي
كال اسمعي زين شعره مايجيس منج وتعرفين المكان الي هو بي طلعي منه اعتبري ماموجود سمعتي؟؟؟
كتله ليش جدي هو شكو ؟؟
كال مايستاهل
كتله بس ليش غير اعرف جدي لاتحيرني عفية مو راح اموت
كال شني حبيتي؟؟؟
كتله لالا بس غير اعرف ليش هو هيج وكبل غير اكو سبب
كال وعدته مااكلج اريدن تفهميها لوحدج
هزيت راسي بس ماقابلة
كال تكدرين وانتي كدها وكدود ندفعه الثمن غالي ماشي بويه
كتله بحزن اي
مثل ماتوقعت فيصل عنده زوجه غيري اكيد هذا الي يقصده جدي ماشي سهله سهله ......
رجعنا وفكري يجيب ويودي والدائره الي خلوني بيها فيصل ليش هيج معقوله مزوج غيري لا والله مااصدك لا لا مستحيل وكلامه وحبه الي يحجي عليه جذب جذب
مستحيل نار بقلبي يااامهة الاسلام شنو لي يبردها ياربي دخيلك
باوعت من البلكونه كلت اي هذا علاجها نزلت للحديقه رحت ورا يم القطعه الزغيره الي فكرت ازرعها قبل بيوم
دورت على كرك كمت احرث بيها واكلب بيها اني كولشي معلمني جدي حتى الزراعه
و اكلب بيها بغيض وقهر شويه واجت رزان كالت وج ندور عليج شتسوين تعاي تعشي
كتلها مااريد راحت اجا احمد كال شنو طالعه سوادينج متعاركين هو اعصاب مايحجي نار وانتي اهنا تحرثين بله صدك عليمن متعبه نفسج كتلنا الجوع
كتله روح احمد عوفني رحمه لاهلك
كال شنو السالفه احجي
كتله ماكو سالفه عوفني محتاجه لوحدي ابقى
هو خله وراح ظليت احرث هلكت هلاك ماصاير بحيث ماكو قوه للوكفه
رفعت راسي فيصل واكف كال شنو تسوين
كتله اريد ازرع
كال عوفيها اني اجيب فلاح وكوليله شنو تردين تزرعين
هو يحجي وبحلكه جكاره واني رجعت اكلب بالكاع كال عوفيها تعاي تعاي شافني هلكانه نزلت دمعه مني كتله طلقني
انصدم كال بس ليش !
500 الف مشاهدة شكرا لكل متابعي القصة 🌸💜
يتبع ...
متابعة للكاتبة لطفا ty__ty18
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!