السلام عليكم
رواية طوفان رجل
الفصل 32
نورا ناصر 🌸
ورديت مو من الصفر
حتى الصفر مايبدي
رديت منك منكسر
والبال ابد ما يهدي
جندي ورجع من معركة
رابح اني المعركة وخسران بالعندي
لشاعرها ....
رنا ...
وراها دخلت للغرفة شفت وليد يلعب وي علي يضحكه ويبوس بي ، شافني دخلت باوعلي و تحسر.
اخذت ملابسي ورحت للحمام سبحت وطلعت داارجع للغرفة لزمتلي عمتي الطريق تباوعلي وتخوزر كلش خفت منها احسها جاي تهددني رجعت للغرفة ركض
ياربي شگد جبانة أني ولا بيه دفعة بس والله اني مخايفة من صوابات اخويه عادل ، لااا ابد وانما خايفة من الفشلة والاهاين كدامهم
ظليت ادعي ياربي كون ما تكول اله دخيلك ربي كون ماتكوله ...
صار الليل أني ميتة من الخوف ، كلما تندك الباب لو أسمع صوت افز اكول راحتله عمتي وكالتله عليه واجه يعاقبني
ورى ما سويت العشة وغسلت المواعين وعزلت المطبخ كله ..ووياي امل مرة فلاح
واني كل شوية يريد يوكع صحن مني
سألتني شبيج رنا مو على بعضج يمعودة ثاني ماعون اجه يوكع من ايدج شيفكج من عمتج شيفكج من عمتي
شون عمات عدنه
كالت كلامها بهمس ...
ضحكت متوترة وقربت منها وسألتها هي عمتي شوكت تروح للسوگ ؟
كالت مادري والله يمكن باجر
كلت اجاك الموت يا تارك الصلاة شلون بيه اني بهالحالة
وهي تطل بوجهي شبيج رنا خيرج خو ما صاير شي يمعودة تحجين ويا روحج
سولفتلها دبريني أمل شسوي
كالت شمدريني
فكري فكري حبابة
كالت أمل اوو هسه شدعوة عليه عادل صدك جذب منه هو شعليه يتدخل ترى هاي سوالف نسوان أكثر شي خلي امج تعرسه بلكت يعقل
خيه اني شايلة هم لمرته خطية شون راح تعاشره ما ادري
جاوبت اووو لا تديرين بال هيج نماذج يدللون نسوانهم بس هم وبس وكدرتهم بس على خواتهم سليمة تصكهم
كتلها خيه امل وضحكت مستحية
ترى الي جاي تحجين عليه اخويه
ردت وايدهه على حلكها كالت اووو هههههه هم صدك بس غير على مودج
جاوبتها اي والله
ردت ليش ماتخطبيله شوكة
طبت شوكة هااا رنيووو عندج عريس الي وماتحجين ايا ملعونة طلع كل البلا بيج الخوينسة قسمة مرة زامل والشمر يدري وماتحجي
الشمر تقصد بي أمل...
فتحت حلكي ياااا وباوعت لأمل شفتحتي عليه من باب خيه شيفكني من شوكة
امل طكتها ضحكة واجت شوكة تنقنق بيه الا تكولين منو العريس انوب اذا أكلها عادل تفضحني والله برجليها تروح تخطبه حتى تصير الكتلة كتلتين من عادل
كتلها هذا واحد قرايب اخو رجل اخت اختي بالكوت يصير بس لكوله مرة هسه
امل طكتها ضحكة وشوكة غمتني وطلعت تدردم
كلنا نحصللنه رجل امداج يالفاهية تيهتي من ايدج
كتلها ايدي شكو اني معرسة يكرم الله
كالت الي الي ورجعت غمتني مرة ثانية ....
امل والله خوش مرة اخو انت وضحكت
مرة اخو وصلة مسح شوفيلي حل بدل لا كاضيتها ضحك عليه
جاوبت باعي ترى ما اظن عمي عدنان يخلي يمد ايده عليج وانت ابيته
رديت عليها عمي هم مودوم متواجد خاف يطلع
ترى حتى وليد هم مايقبل احد يضربج
جريتها حسرة شكبرها باوعتلها ونصيت
لزمتني من ايدي باعي من تشوفين عمتج تطلع للسوك اخذي وليد وروحي للكاظم زوري ولا تجون لحد الليل هناء نايمة واخوج نايم وراها ينسون
يمعودة تحجين صدك اكول لوليد لأ عيني مااكوله
ليش ولج مو رجلج
هزيت راسي وهي تفاجأت وكالت متعجبة ولج رنوو بس لا ماتتحاجون بعدكم علمود درة؟
سكتتت وهي حجت ياولج ماتسوى البنية تزوجت والله يسعدها ان شاء الله تستاهل انت ويا رجلج فتحي صفحة جديدة
كتلها امل عفية كوة لازمة لساني فدوة خليني ساكتة ماريد احجي عليه حقج ماتكرين اخر مرة شون جان يباوعلها
كالت اي اني هم مااسمحلج تحجين عليه لان وليد خوش ولد يمعودة لا تهجمين بيتج اشكال شفنه وتحملنا شوفي عمتج منو يحملها لو عمتي
هزيت راسي هو مو مال اهجم بيتي ولا هم اصير وصلة مسح بس لازم اكو حل وسط
هزت راسها وكالت سمعي سمعي الأغنية مال كل سنة
ضحكت اني اي والله اتاني تموز حتى اسمعها
كالت بضحكة حتى اني هم ..
وين تناومون الليلة ؟
كالت مالها أمان الكهرباء هسه شوية وتنطفي فرشت فوك من العصر
كتلها معدلة ...
ورحت للصالة اخذت علي جان يم عمتي وعمي يلعب
بس دخلت جان عمي حامد يكرص بهناء وهي تدفع بي تكله عيب البناات كاعدات
جانن منى ورسل كبال التلفزيون و ظهرهم على عمي وعمتي
طالعة اغاني وطنية كل سنة تطلع بتموز أغنية فرحانة ديرة هلي تموز من هليت مائدة نزهت
الشعب العراقي يتاني تموز يجي حتى يسمعها ههه
وتالي ينسمط سمط بالحر
عمتي الحجية مناك نايمة على روحها وتشوخر وهي كاعدة وعلي واكف بنص الصالة يصفك ويركص للاغنية
اخذته حتى انومه عمتي كالت صايرة فاهية من يمتى تغسلين المواعين توج خلصتي ؟ لو جانت امل يمج ودكن فج اسمع التبسبس
كتلها تصبحين على خير عمة
ورحت للغرفة وليد مشغل المسجلة ويسمع اغاني حزينة مال لطم
كعدت ع الجرباية انطيته ظهري وانوم بعلي هو حس على روحه وطفى المسجلة ، نام علي وخليته بكاروكه
مددت عالجرباية على حافتها كلش وتغطيت بجرجف خفيف الجو حار
حسيته تقرب يمي شويه ويلمسني قبل ميمد ايده واني منطيته ظهر كتله شتريد!
حسيت بانفاسه تدغدغ رقبتي رفعت كتفي اكبحها
كال مو أني اريد علاوي يريد اخو
كوة كتمت ضحكتي كتله شوفلك غيرهه هاي السالفة وغطيت راسي بالجرجف ..
حسيته كعد لان السرير يمي نزل .. وكال بنبرة عصبية
كوومي فرشيلي فووك السطح يله
شمرت الجرجف وكمت اخذت دوشك وصعدته فرشته اله فوك والله زين فوك السطح حتى احسن من هوى المبردة والسما مترووسة نجوم شكد احب اتفرج عليهن بقيت اباوع عليها شكد حلوة
لمن حسيت بي صعد يمي خليت ونزلت بسرعة واني داانزل كال إذا طفت الكهرباء جيبي علي وتعالوا هنا هزيت راسي ونزلت ..
وهو اصلا هسه كلهم راح يصعدون ينامون فوك واني استحي انام كدام احد خاصة عمو حامد وعمو فلاح
حجي عدنان عنده جرباية بره وينصبوها اله والحجية همين مابيها تصعد فوك ...
والله وصدك انطفت الكهرباء وصعدت علي يم ابوه جان سهران على الاطلال ههه ونزلت جبت الدوشك وخليته يمه السطح ظلمة وكلها نايمة تشخر
سمعت صوت شوكة صاحت رنيو ؟
كتلها بهمس هاا
كالت تردين تطلعلج شامة ؟
ضحكت اي
جاوبت حسبي سبع نجوم وحكي بخشمج تطلع هاكدهه بخشمج
متتت ضحك ووليد ضحك وكال نامي الخبلة وعوفيها ماتريد شامة منج
كالت من يمها فوكاها فوك ماريد اكشخ مرتك
رد عليهه أحد داز عليج نامي نامي ..
وصار هدوء والظاهر الكل نام واني صافنة عالسما كون قبل الفجر انزل لان استحي خاف اتكشف وقبل ماانام هواي فكرت خاف باجر جمعة وعمتي تروح للسوك وتمر على اهلي وتكول لاخويه
كعدت قبل الفجر ونزلت جوه وعلي خليته فوك حلو براد اله احسن من جوه الكهرباء رايحة جايه ...
نمت وكعد بالسبعة علي بفراشه ووليد هم يمكن طلعت عليهم الشمس ونزلوا
كمت نزلت الفراشات من فوك وبلشت اسوي شغل
وبعدها تريكنا كلنا
وراها اشوف عمتي تتحضر تروح للسوك وتباوعلي تتثاوب وتخوزر يمه اخاااف منها شوون بيه اذا سوتها صدك وراحت لعادل واشتكت عليه وهي بطبعها ماتنسى ابد ...
شفتها طلعت والدمعة تعلكت برمشي واني صافنة عليها
لابيه اتوسل بيها خاف نست واني افتح عينها مرة ثانية
ولا بيه أسكت
اخذت علاكتها مال السوك وراحت وامل حست بيه
شكد خايفة و تباوعلي
كالت ولج روحي لوليد كليله يتصرف
مشيت واني كلش مقهورة وبس أفكر طبيت للغرفة شفته لابس دشداشة بيضة وغترة وجاي يلبس بساعته
هو يوم الجمعة يروح ويه حجي عدنان للحلال وللكعدات
دخلت وكفت يمه محتارة شنو احجي بس وكفت كلش قريب عليه
لبس ساعته وباوعلي باهتمام
سألني ها رنا شنو ؟
درة ...
عفت البيت وعشت بحالي سويت عالم خاص بيه ازرع واردد ويا كل شتله اشتلها قال تعالى ((افريتم ماتحرثون انتم تزرعونه ام نحن الزارعون ))
ثلاث مرات واردد دعاء (( اللهم اجعله زرعا مباركا وارزقنا فيه السلامة ))
هذا الدعاء جدي معلمني عليه من اني صغيرة اوكف يمه من جان يزرع واتعلم منه واردد وياه
جان يكول اذا تقريها على الزرعات ابد ماتموت ولا تذبل ... اني التهيت ويا هاي المساحة وانتظر المدة تخلص بهذا البيت ووياه واشوف شلون تاليها ...
جنت اردد بالاية والدعاء واشتل بلحظتها سمعت صوت جرة الكرسي انداريت شفته كعد كال يابه الله يساعدكم خلي همه يسون خاف اظافرج تتكسر
يحجي ومبتسم ورجع كمل كال عفتج كم يوم كلت حقها بس كافي والقران طالعه روحي لان ماتحجين كولي شنو يرضيج
عمي والله اتوضا واحلف صار اكثر من اسبوعين مالازم مره صرت راهب من وراج اثاري مو بس صفية دواء لا حتى انت هم عالجتيني ...
يحجي واني ولا اجاوبه بس ساكتة واشتغل ...
رجع حجه زين كوليلي شنو جاي تقرين؟
تنهدت و رفعت صوتي كتله راح اعلمك بس علمود اكسب ثواب
كال اي والله مسكين انتي وتكسبين ثواب بيه
درت وجهي اباوع عليه خله جكارته بحلكه واخذ الشتله زرعها وكال امري لله اني ازرع وياج سويتيني فلاح عمي اصير كلشي بس ترضى دره خانم عليه
يحجي وكوه مفهوم كلامه لان الجكاره بحلكه
كام طب جوه باوعت عليه راح ، ضحكت يمكن مل وهو يحجي واني ساكتة
كعدت استنشق ريحة التربة المبللة بالمي
وحسيت بي رجع باوعتله مد ايده اليه بيده حفوف
كال هاي جفوف البسيهم اظافرج راح تتكسر واني اخاف على ممتلكاتي ...
اني بس اباوع عليه لااجاوبه ولاشي اخذتهم منه خليتهم على صفحة ، هز راسه وراح كعد على الكرسي يسولف وياي واني ساكتة ...
اخر شي عصب دفر الكرسي وكام طب للمكتب مالته ..
شويه واجت صفيه وتطك بشحاطتها وبيدها عصير دردوره حبيتي اشربي العصير ينشطج يله عماتي اخذي
مديت ايدي اخذت منها
اباوعله بتفحص و كتلها عاشت ايدج ..
ورحت خليته على الصبة الي بصف المساحة الي زرعتها
تقربت مني نصت صوتها كالت عفيه عليج ماتحبين تنسين اصلج تردين اساعدج؟
ضحكت اني كتلها لا انتي ماتعرفيني زين اني ابليس اربطه على الكرسي واتوبه وادرسه ، سحبت منج البيت مافاد لان ابو طبع مايغير طبعه
جان تشهك يمه شبيج ماتتحملين حجايه مني لوما اني عمتج
ضحكت بصوت عالي طلع فيصل من مكتبه صاح صفيه هي جفلت
صاح من مكانه بعصبية وتهديد اني شكلت هااا
كالت ماكو شي حتى باوع جبتلها عصير سويته بيدي
كالها ماشي اخذي راحتج يله
راحت هي وتتلفت باوع عليه واجه يمي
كال شنو سالفة العصير ؟؟
كتله علمي علمك ...
كال خوما تشربي؟؟
كتله لا طبعا شعندي غير روحي اخاف عليها ...
رد :- عفيه بالشاطرة
انحنى واخذ الكلاص وشمر العصير على الكاع
واخذ الكلاص
صار عندي فضول .. رحت يمه
كتله شنو تسوي بي الكلاص اخذته ؟
ضحك كال ادله اكسر ظهرها واذلها
كتله شنو السالفة يمعود ؟؟
ضحك وكال اطلع القضى والمضى
وعافني وصار يمشي باتجاه مكتبه
ذبيت الي بيدي وركضت امشي واريد الحكه
واحجي وياه كتله شنو هو حزورة ...؟
كال اشششش مايخصج ....
كتله شون مايخصني لازم تكلي وظليت اركض وراه طبيت للمكتب اندار وراح قفل الباب
كال صدتج ياحلوه ظليت احك براسي لان طول الفتره الراحت جنت اقفل الباب عليه بالغرفة ومااخلي يلزمني
كتله افتحه
كال تؤ تؤ العصفور طار و اجه برجله ... شنو تنطيني واسولفلج؟؟
كتله مااريد لاتسولف طلعني يله افتحه
وهو مبتسم بمكر : اصلا اليوم حتى عشانا هنا
ظليت متذمره كتله اريد اغسل ابدل اهدومي
كال هسه يجيبولج وسبحي بهذا الحمام
كتله مااريد احجي الي عندك يله خلصني حتى اطلع..
ظل يباوع على ايدي كال اليوم ضيفتي هنا خوما نستعجل و اني طبعي اكرم ضيفي
ضحكت كتله ماشي جوعانه
كال صار خابر رزان كلها العشا للمكتب دزوه و سده منها
كعد خله رجل على رجل كال اي شنو تردين تعرفين ؟
جاوبته كل شي ...
كال ببرود ... اهنا هواي اسرار راح تتعبج والي يسأل يدوخ خليج مثل الناس العايشه هنا لا اسمع لاارى لا اتكلم تكدرين ؟
كتله لا
كال اخاف يلوحج طشار وهاي اولها العصير اذا مو سحر او سم او تمرضج ماكو غيرهم
كتله عزاااا صدك تحجي
كال ابليس اسمها هيج اجاها هذا اللقب مو من فراغ
ظليت صافنه يارب استرني بسترك وارحمنا برحمتك جدي وين جابني
كتله ليش جبتها هنا تحب المشاكل
كال لا بس لازم اطلع منها كل القديم والجديد
كتله زين بله انت ابن ضرتها اني ليش تكرهني والله ولامره تصادمت وياها بحالي ومتجنبتها على الي اسمعه عنها
كال غير انتي بت ابن مرة ابوها ضحكت شنو انت منين تجيب هذا الحجي بله لو تالف انتو لاتخبلوني
اتفاجا من كلامي
كال انتي ماتعرفين
كتله شنو؟
مااعرف شنو
كال اهووو غلطت كام على حيله
رحت يمه لزمته كتله وداعة جدي مااعوفك الا اعرف
صفن بوجهي وتقرب مني صار مايفصلنا عن بعض هواي
اني جنت صافنة مصدوومة بس حسيت على نفسي راح اضعف .. ابتعدت عنه ...
هو تنهد ميل راسه من صفحة وحدة وراح كعد
وحجه شنو دره انت تعرفين الي كلته ؟؟؟
حجيت بصدمة والقران دماغي راح ينفجر يعني بابا من غير مره زين وبيبي استغفر الله ربي راح انجلط بهالليل
عفية خفف عليه يومية تفجرلي قنبله ورا قنبله هالله هالله بيه دماغي راح ينفجر ....
اخذني من ايدي كعدني على التخم
وراح جاب مي وانطاني اخذت منه شربت وانطيته الكلاص بيده
لزم اديه يهدي بيه ... باوعتله عيوني مدمعة
سألته كمل لا تخليني مذبوحة عالنص
رد وهو يلزم اديه ... اسم الله عليج لتكولين هيج ع نفسج
قاطعته ممهتمة لعد كمل احجيلي خليني افهم
كال مو هي ام أبوج ام سلام يعني فصلية جانت
رفعت راسي يمه شلون ؟؟ رحمه لاهلك لاتخبلني
كال لو محلفتني بغيرهم احسن حلفيني بيج واحجي
كتله بداعتي عندك احجيلي فدوة ....
دنك راسه محتار و حك ذقنه كال والله ماادري شون احجي وشيخلصني من حجي عدنان وكشفت سره
كتله يعني ام بابا فصلية؟ فيصل صدك لو تتشاقة شنو السالفة
كال اي والفصليه الي تخلف ولد يخلص حكمها ويعتقوها
خلفت ابوج وانعتقت
كتله الله اكبر عليهم على هالعادات والتقاليد خل اخابر جدي يجي اي لازم يجي
وكفت على حيلي متعصبة ...
كال اكعدي يابه بهالليل تجيبن الرجال الصبح خابري واني اسافر كم يوم لمن يبرد الموضوع
كتله لازم تخاف من جدي ؟
كال لا والله مستحي منه مااتوقعت ماتدرين ...
اليوم المصايب على راسي ركع زين صفيه اكبر من بابا ؟
كال مو اول شي تزوج ام حامد وصارت عدها صفيه بعدها ماصار عدها اكثر من عشر سنين
وبيوم جانوا معزومين بعرس خواله بالعماره وصارت عركه وكبل العرك بالتواثي والمكوار
واحد ضرب براسه اخو جدج ولد صغير اسمه محمد كبل مات وهو لابيها ولاعليها
وصارت كعدة وشيوخ تروح وشيوخ تجي رادوا فصلية وصارت لجدج لان ماعنده خلفه وهي هم تصير من گرابة خوال جدج...
بقيت مصدوومة رحت للباب اريد اطلع
توسلت بي عفيه طلعني كال شبيج اطلعج بس لاتخابرين جدج
هزيت راسي
كال وعد ؟؟
كتله وعد والله مااكووول ...
فتح الباب الي واني طلعت منه افر براسي فر وحايره بالمواضيع الي نزلت ترف على راسي يارب سترك ورحمتك ياربي ..
اذكرت مقوله للامام علي ( عليه السلام )
ساصبر حتى يعجز الصبر عن صبري
ساصبر حتى ينظر الرحمن في امري
ساصبر حتى يعلم الصبر اني صبرت على شي امر من الصبر
اي يدرة اصبري الله موجود شاصبر بشهر شعر راسي وكف من المفاجات لو شهرين شنو اسوي
اووگفي ياثوله اليوم شكد بالشهر عزا العزاني اتصخم وجهي واتطين يا يابه جدي الحكلي صعدت اركض اتذكرت قبل زواجي باسبوع غسلت منها
صعدت اركض دكيت على جدي كال الوو كتله شلونك جدي
كال هابويه شونج
كتله الحمد لله جدي اني يمكن حامل
كال ماشاء الله صلووات على النبي
كتله جدي اني بمصيبة فيصل مايريد طفل
كال معليج غصب عنه
كتله جدي خايفه والله
كال مو الج الخوف وجدج بظهرج بس لاتكليله هسه خلي بعد اتاكدتي يله
كتله لا وين اتاكد بس الشهريه مااجتني
كال الله كريم روحي نامي الله كريم ...
سديته منه وارجف اجذب اذا مااكول الخوف سيطر عليه سبحت ونمت واردد لاحول ولاقوه الابالله العلي العظيم يارب اجيب الطفل لهالضيم
سمعت طكطه فزيت حسيت الصبح وهو جاي يسبح
كمت احضر ملابسه واغراضه
تقرب مد ايده على كصتي باسها جنت محتاجه احضنه من الرهبه والخوفه الي بيه اتجرأت وحضنته وكمت ابجي
(اصعب شي عندي شخص هو الخوف وهو الامان )
ظل يتلمس بشعري كال شنو مصخنه ؟
واني اشد بالحضن رفع راسي كال دره لاتخوفيني شبيج؟
هزيت راسي مابيه ...
ظل يمسح عليه ويرددالله يهديج الي ...
سحبت نفسي وهو بس يباوع عليه
رجعت نمت مرت الايام بحالي متجنبه الكل ملتهيه بالحديقه واني ازرع طب فيصل اعصاب كال صار كم يوم من تزوجنا
كتله ٤٢
سأل لعد اشو مااجت الشهريه
رفعت راسي وصفنت كتله لا اجتني اصلا انت شعرفك احنه مو متزاعلين
كال اكيد؟؟ وبعيونه شك
كتله لعد اني اجذب واني اصلا مااريد طفل منك
كال الحمد لله مااعرف اجت على بالي الحمد لله راح اذبح عجل لوجه الله مااريد ابد سمعتي اطفال ابدد
كتله مرتبكة اني هم مااريد اني خطار باجر عكبه رايحه...
رفع نظره كال عشم ابليس بالجنه
كتله براحتك ... عفته وصعدت ...
مرت ايام هو ميعرف اني حامل ، بلشت اعراض الحمل تبين واني اداري بروحي حتى لا ابين حامل وهو شاك بيه ويومية عذر شكل ...
ضاقت بيه السبل احس راح انكشف وانه خافية جنيني بداخل رحمي ...
التجأت لجدي .. دكيت على جدي كتله جدي سألني فيصل على الشهريه وكتله اجتني جدي شنو اسوي اذا عرف بيه حامل ؟؟؟ احسه هالايام شاك وهواي يسأل بيه شنو اسووي جدي
حسيت على ايدي سحلتني من شعري وضربني ضرب قوي بلا رحمة واني بس اصيح جدي الحكني جدي الحكني
انكلب وحش يضرب بلا رحمة على ظهري وبطني وجسمي ويصيح تضحكون عليه انتي وجدج؟؟ تردون تورطوني بجاهل اني فيصل ينضحك عليه يرفس بيه ويضرب على وجهي والدم من كل مكان مااعرف منين يطلع
اخر شي فقدت الوعي ...
يتبع ...
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!