السلام عليكم
رواية طوفان رجل
الفصل 29
أما عن جدي فهو الضلع الثابت في اعوجاج الحياة.
من وگعت نظراتي على مواليده تخبلت
شنو مواليد 58 معناهه اكبر مني ب22سنة
يعني عمر كامل بين وبينه ياربي ، لعد ليش جذبوا عليه وجدي مرة يكلي اكبر من ابوج ب7 سنوات ومرة يكول اكبر منج
ب 15 سنة مو هواي ...
صفنت وظليت اربط احداث قبل بسنوات طفولتي
و اني عمري سبع سنين اتذكر جان عدنه واني رحت كعدت يمه اسولف وياه
سألته عمو شنو تشتغل ؟
جاوبني اني مهندس .... هاي وغيرها وغيرها
وهواي سمعتهم يكولون من جابتني امي هو شالني
يعني بوقتها جان شاب لعد ليش يجذبون عليه ؟؟؟
وجدي هم ضم عليه وهذا موسبب اصلا ماعندي خيارات اختاره او ارفضه جنت مجبره على هاي الحياة ، بس اكره الكذب اريد كلشي يصير كدامي حتى لو موجع مو مشكله المهم مو بظهري ...
باوعت لصورته بالجنسية وصرت احاچي صورته
ها فيصل بديتها بهاي الجذبة ؟؟؟ واستمريت عليها !!!
عفت المستمسكات ، رجعتهم بمكانهم و ظليت اروح واجي بالغرفة
شايطة اعصابي نااار ، وكفت بنص الغرفة وجريت نفس حسيت اختنكت حييل
مابيدي شي غير اهدي روحي ، صرت اوجه لنفسي كلام
اهدي دره اهدي دره شجاااج
تعوذت من الشيطان واستغفرت ربي ....
هالفيصل وراه بس وجع الگلب والضيم ، حياته كلها الغاز ومشاكل وفوك كل هذا انسان غامض بمعنى الكلمة وهالشي يخليني احس نفسي عايشة بدوامة ومحيط كله ظلام بظلام
هسه العمر منين مااجيبه ماالكه عذر لجدي يصغر بي گدامي ....
ظلت الافكار تاخذني وتوديني مثل الروج تعب عقلي انضغطت كلش احس شويه وينفجر راسي ..
تذكرت جدي كال اليوم يجي النه ، محتاجته ضروري لازم اروح اخابره حتى أأكد عليه يمر عليه
رحت للتليفون الي بالغرفة ودكيت رقمهم
لشويه اجاني صوت شوكة ...
سلمت عليها كتلها شونج خيه شخباركم كالت بالضيم وانتي كلساع تدكين اليوم خاف مضوجاتج وعلي اجي بالكرك اعجنهم عجن وارجع محد يدري هسه الصبح وكلها چانه والعباس احجي صدك ...
ضحكت كتلها كفوو والله والنعم منج ماتقصرين
كالت والله صوتج موزين اظن فيصل مااخذج اكس مربع ومتعبج ماتردين عونه؟؟؟
رديت عليها واني اضحك
كتلها ولج عيب هالحجي لايسمعونج فشلة
كال مرض حتى مرض شون تنامين وشبعانه بوس وكله
من الحلك واني ولا بوسه ضايكه الله يرضى رسووله يالماتخافون من الله
كتلها ولج كافي بطني انشكت من الضحك منين تنطفين انت
كالت جااالله عايفني بس للضيم انوب بسيط وحيزبون
مستلمات رنا المكروده مطلعات روح روحها خطيه ومطيحات حظها بالتنظيف واخوي ملتهي بالضريح يشم بالعلك اقصد بالخاولي مالتي عباله مالتج يشم ويبجي ...
كتلها بصددمة يااا كدام يبجي لهالمرحلة وصل ؟
كالت خايبة لا شفته من الشباك لازمه ويشم بي
وصراحة انقهرت عليه وضعه صعب ماردت اصدمه ماكلته الخاولي الي
واني يوميه ارشه من العطر الي عفتي ياكريمده ظال بي للجعب اريد عطر من عمج النظيف العباس عليج تنطيني
كتلها ادللي جنج على عطر انطيج عطورات
والله ياشوكه بس انتي تضحكيني الله يطيج العافية
كالت هسه اتفقنا مو ؟؟ تنطيني من عطر فيصل ؟
جاوبت انطيج والله انطيج امداني اذا ابخل عليج
ها دره ها خو ما تغارين
لا لا مااغار منج انت اختي اكو وحدة تغار من اختها
بس فدوه من يجي جدي خلي يخابرني
كالت ماشي بس موتنسين العطر كون اختاري يرد الرووح اخيتج محتاجته
كتلها اليوم يجيج تدللين ....
يخليلج فيصل وان شاء الله اصيرلج ضرة سيف ودركة احارب الاعداج وياج
ضحكت شكرا شكرا ماريد
كالت ياا انت الخسرانة وين تلكين ضرة مثلي
جاوبتها ولج رووحي خليني اشوف دربي واكدي على جدي يجي
كالت خوش وسديته ...
كون تتذكر وتكول لجدي كلش محتاجته اليوم ...
مر الوقت بسرعة مااعرف شلون بين تفكير وصفنات
باوعت للساعة صايرة بتلاثة
رحت احضر الحمام اله
باوعت على الغسولات أشكال والوان
اني الانكليزي مالتي زين ظليت اقرا بيهن
شامبوات اكثر من خمس انواع ومكيفات نوعين ومطهرات اسنان ...
و تلث غسول جسم اكو للبشرة الجافة وللبشرة المختلطة وللبشرة الدهنية
ونوعين غسول اقدام و احجار عنده وحده مربعة لونها ابيض والثانية لونها وردي ولخ خشبيه وبيها حجر اسود ناعم
واني ياحظي جايبه محجاره وحدة صارلها عشر سنين وين مااروح اخذها وياي وتسوي رجليه زبد
يله بالله هذني شنو يسوي بيهم كلهم !!
اشوف الفرش من كل الاحجام احنه الي عدنا بس الفرش الي نغسل بيهم الزوالي ....
بعدني بالحمام محتارة شحضرله وشخليله
وجان اسمع صوته صاح درة وينج
جاوبته من يمي هااا
على صوتي فات للحمام كال كولي نعم شنو هاا ؟؟؟
فتحت حلكي وكتله بالله لاتقلد
كرص خدي
خليت ايدي مكان الكرصة وكتله وأني أأشر
على الغسولات واسأله
شنو هاي الغسول كلها شنو شغلهم شوكت تلحك تستعملها ؟؟
تقرب مني و باس راسي
تذكرت اني ماسلمت عليه من فات
بخجل كتله الله يساعدك
ابتسم كال يحفظج ربي
وكمل برجاء تعاي اسبحج واشوفج شنو شغلهم
ضحكت رديت لالا شكرااا شكراااا
كال شبيج والله مثل الطفل اسبحج مااخليج تسوين شي حتى ملابسج البسهم الج انتي طفلتي المدلله الوحيده واخاف عليها اكثر من روحي اني ما اريد اطفال اريدج بس انت طفلتي
گلبي انعصر من كال هيج ماعرف شصار بيه
وهو كمل كلامه :- تعرفين لو مصايره الي جان انجنيت اي والله تخبلت كلشي نطبع منج بقلبي طبع وختم
اجت ايام من اسمع احد رادج او اتقرب منج اتخبل
ولزم وجهي بكفوف اديه ويباوعلي بحب
كال الف الحمد لله والشكر صرتي يمي
حركت راسي وهو وخر كتله الحمدلله على كل حال
كال تدرين دره يمكن اني الوحيد الي مااكره عدي صدام لأنه صاحب فضل عليه لوما هو جان بقيتي مصب العين طول عمري
ابتسمت والله محتاره بكلامه من ناحية يحوطني بحب وحنان ومن ناحية يخوفني منه
كال هاا يعمي ماتقبلين اسبحج ؟
هزيت راسي اضحك وابتعد عنه
كال انتي الخسرانه بس باعي اول فقرة الصبح
اغسل شعري بشامبو للشعر الجاف ومن ارجع من الدوام
اغسله بشامبو للشعر الدهني لأن يصير بي نسبة دهون وحتى يصير مرتب أكثر
بعدين اخلي مكيف وظل يأشر بيده على المكيف مال السعر كال شويه وبعدين غسول للبشره الدهنيه لان طلعت للمصانع وافتريت عركت احس جسمي كله دهن
صار
هو يحجي واني حسيت جلدي كلها دهن .. كال لازم تفركين بصورة دائرية وهاي املاح القدم تخليها بالليفة
الخشنه ويعلمني الطريقة
واني اباوع عليه و رغم رجليه نظيفه بس حسيتهم وسخات
كال اهم شئ التنشيف ضروري لا تهملي ، نشفي كل قطرة مي حتى لا يصير حبوب واللتهابات بالجسم والبشرة
واني واوكفه اتفرج عليه شون يعلمني ورا ما خلص
كال ها ؟
بمعني يسالني مرة ثانية ..
كتله يله يله إغسل اني طالعة ، وطلعت من الحمام
انتظره بعدها هو كمل سبح وطلع لاف الخاولي ورش بخاخ لزم مرطب لجسمه كله وبعدها اخذ نوع الخ لوجهه ومشط ونشف شعره صارت بالاربعه والجماعه جوه طكهم الجوع
لبس واخذ دشداشه بيضه لبسها عريس طول عمره الشايب مايكبر
كال ننزل هزيت راسي باوعت لروحي هو يبرج واني لابسه دشداشه ورديه فاتح بيها وردات بيضه ومسويه كصيبه ولا قطره مكياج مخليه
لأن هو ميقبل كلما يعجبني اخلي شويه يعجبني حيييل يجي يمسح وجهي بيده ...
نزلنا لكيتهم صابين الاكل على الميز وينتظرونه بس طبينه صاح احمد ادري عرسان وتاكلون بالعسل احنا شنو ذنبنا متنا جوع؟؟؟؟
كله فيصل ببرود وهو يكعد على الكرسي تلحك على العسل
اني كتله احمد على الاساس ماتاكل بالكليه مو اني شاهده من جنت تجيني كله بالكافتيريا تاكل اشوفك
كال اي والله ايام يدزني الباشا اشوف الاجواء اشونها وانوب كليتكم احلى بنات بغداد بيها
ضحكت كتله فيصل يدزك ؟؟ انت ماتضم شي ابد
هو يضحك ويهز براسه وفيصل يباوعله بطرف عينه
هو سوى عود نفسه خايف وكال احم يله بسم الله
بدينا باسم الله تغدينا و مر اليوم للعصر كاعدين نشرب جاي اندكت الباب حسيت بي جدي
كمت على حيلي اباوع من الشبابيك ، وهو باوعلي بنظرة مستفسرة وفعلا طب جدي بعد مافتحوله الباب واحمد يفوته تفضلي جدي تفضل ..
صااح يالله وينها بنيتي ، عمتي ردت من يمها ببرود هلا يابه تفضل
واني يمه شصار بيه رحت اركض عليه وظليت ابوس بي والله مشتاقتله ياربي الله لايحرمني من هالطول
سلم عليهم كلهم وكعد شويه بس عينه عليه
من بين كلامهم اشرلي بعيونه تعاي بالحديقه اشوفج
كال لفيصل راح اخذ بتي منك شويه
فيصل هز راسه واشر بيده كدامك حجي ...
ترخصنا منهم وكمنا باوعت لفيصل عيونه علينه واحنه سوى وحسيته ضاج وبعيونه يسال ليش لوحدكم
مااهتميت اني عندي المهم جدي فرحتي بي ماتنوصف رحنا وابوس بي وهو هم سوده عليه يبوس براسي
وكل شوي يكرر شوونج زينة كلما اجاوبه زينة يرجع يسأل
بعدها اتذكرت كتله جدي ليش تجذب عليه؟؟
كال متعجب اني؟؟؟ ليش بويه بشنو جذبت ؟؟
كتله بزعل اي والله صدمتني جدي
كال شلون فهميني بالله ؟
جاوبته يعني ليش تكلي فيصل مواليد٦٥ وهو ٥٨ ليش جدي ليش هاا فهمني
تنهد كال بويه جنت اريد ارغبج بي اعرفنج تدورين شاب بعمرج وكلت فوك جبرتها على الزواجه تشوف عمره تتسودن
كتله جدي هو اني جان عندي خيار غيره واكول لا؟؟؟
كال مو ادري بيج تشوفي مثل عمج ردت اهونها عليج يابويه بس من كتلج بينكم ١٥ فرحتي صح لو لا ؟؟
دنكت هزيت راسي ماريد اتعبه وانبه والوم بي اكثر فرحتي بي طغت على كل شي ...
كال عوفينا من هذا الحجي صارت بعد بس كليلي انت شونج وياه
كتله الحمد لله بخير
رد بتساؤل يريد تأكيد مرتاحة؟
كتله الحمدلله
كال شونه بالفراش متعبج مو ؟؟
اني دنكت استحيت حيييل بس جاوبته
كتله لا زين
كال يعني شنو؟
كتله بتردد وخجل وافرك بأصابعي مانام هواي
كال بصدمة شلون بعد جدج؟؟
كتله واني مستحية عيب جدي عفية
كال بعصبية بت الكلب احجي
خفت ونطيت كتله بس تلث مرات
كال شلون بس تلاثة ؟؟
وجدي انكلب وجهه وضاج ووجهه احمر
كال تلبسين احمر واصفر
كتله لا مايقبل يريدني هيج حتى بلا مكياج
كال شون يعني اكو رجال مايريد هاي السوالف
كتله يكلي اشوفج مثل بتي وانتي بتي الي ماخلفتها
جدي تخبل وعصب نبرة صوته تغيرت للغضب
كال باعي اليوم تلبسين عروس ومن ينام خابريني
كتله مو هو يكولي لاتسهرين وتنتظريني
كال بت الكلب بت النعال كوليهن كلهم تكطرين عليه خايبه صايره فاهيه من شوكت وماتعرفين الزلمه شنو
كتله ذاك اليوم اجا اجا لكاني كاعده ونام ويايه بطريقه مو حلوه وتعاركت وياه
كال اي كملي
كتله وكمت انام من وكت
كال يعني يجيج مخلص جيلاته بره؟؟
كتله جدي شنو جيلاته يعني
شفنا فيصل جاي من بعيد انقطع كلامنا
وصل يمنا فيصل كله حجي شتريد من مرتي؟
ضحكنا كله جدي اي والله صدكت مرتك بس هي بتي مو بتك
هم يضحكون وعيون فيصل عليه وبيها تسال عن شنو يدور بيه
جدي كله احس دره مطفية فيصل
كال شنو السالفه حجي شوفها جنها العافيه و شوفها شون مورده
كال لا ماشوفها بيها بهجة العروس
اني ضحكت و فيصل كال شنو السالفه حجي ؟ شسامع انته
وباوع عليه ... واني دنكت ...
اجا هشام يسلم على جدي وقطع حوارهم
بعدها دخلنا جوى وجدي يحاول نبقى وحدنا بس ماكو
بعدها كال تعاي للسيارة اطيج الزيت واعلمج عليه
رحت وراه واحنه نمشي باتجاه السيارة
كال باعي اليوم لاتلبسين الاحمر والاخضر خاف فيصل حس انه عرفته بس ظلي سهرانه
كتله جدي بس خل اكلك شغله بعد
كال هاا احجي ..
واحنا واكفين يم السيارة كتله بهمس واتلفت
انطاني حبوب مانع
كال بصدمة شنهي ؟؟
كتله حبوب مانع
ظل يتلفت كال ووواخذتي
كتله مرتين اخذت
كال بعد لا ااتاخذين ومن يسألج كليله شربت سمعتي
وظل يكرصني ويصيح ااااه يانار كلبي فيصل دواك يمي ماتلعب ويانا انا حجي عدنان ودره الضبعه بسيطه هينه .....
رجعنا للبيت سلم عليهم وكال عازمكم الجمعه غده ان شاء الله ...
راح جدي بس خفت عليه هالكد ماضايج اخاف على صحته الله يحفظه الي يباوع عليه وعيونه حمر يمكن الضغط صعد عنده الله ليستر ربي لاتفجعني بي بيوم
هسه اني شجاني وحجيتله
بقينا اني وفيصل بالحديقة
كال شنو جنتوا تحجين وليش جدج اخذج على صفحة؟؟
كتله واحاولي اخفف توتري
يسال عن احوالي
كال وشنو كلتي وهيج عصب ؟ مو جنه جان عصبي ؟
كتله لا يتصورلك اني كتله كولش مرتاحه بحيث مااكو فرق عن حياتي واني بنيه
باوع بعيونه وينتقل بيهم هو ماعرف شنو قصدي وليش هيج اكول
نهاها بالحمد لله اني هذا الي اريده ماكو فرق بحياتج
ضحكت كتله انت تريد تمشي حياتي بالي تريده ويامن ويادره لالا يسبعي احسك ماتعرفني زين اذا جنت سايرتك بامور ، هاي لأن اني امانه يمك وارجع مااريد اخرب امورك الي عايش عليها سنين مااجي اخرب انظمة وقوانين امشيهم عليها اني رايحه رايحه
احجي وامشي و اسويله باي باي
جرني من ايدي تعاي تعاي تنسين الاتفاق سمعتي ؟؟
ضحكت اني عايشه بهالامل
ظل صافن بوجههي
بعدها كال شنو الي يخليج مو سعيده اهنا فلوس ذهب خدم شنو الي تريدي هاي مطالب النسوان
ضحكت كتله كلهم مايخلون الواحد سعيد
تنبع السعاده من الداخل عمر الماديات ماتفرح ثانيا دائما تحسسني اني فقيره تره اني عندي خير من الله وجدي طول عمره مدللني دلال الفهد تعرف شنو دلال الفهد؟؟
لزمني حييل وقربني اله وهمس بأذني بنبرة فحيح الافاعي كال راح تبقين هنا يعني تبقين ماريدج تتمردين مفهووم ؟
سحبت ايدي منه سمعت الاذان مشيت وصعدت حتى اصلي ظليت اتوضا واعيد بالوضوء بالي يم جدي واحجي وياروحي جدي شنو اباله !!!
بعدها تعشينا وورى ما خلص العشا والجاي
طلع فيصل وماادري وين راح
وفعلا اني مانمت حسب وصية جدي
عبرت ل١٢ ماكو ما اجه طليت من البلكون
اباوع مكتبه مظلم يعني طالع مموجود بي
بقيت متسائلة يا ترى شنو وراك فيصل؟؟ جدي ليش ضاج ؟؟ شنو يقصد جدي جيلاته برة يخلصهن !!! ظليت احلل واربط ماوصلت لتفسير ...
تفاصيل حياتي مرعبة واني صدك مامرتاحه حياتي جامده
حاولت التهي نوم ما اجاني ظليت اعدل ملابسه واضيع بالوكت صارت الوحده سمعت صوت سيارته ظليت محتاره بين اسوي روحي نايمه او كاعده
استقريت اظل كاعده ليش شنو يصير اكثر من الي صار بحياتي !!!
عدلت شعري وفتحته واني مدده بالفراش
ومن طب ابتسمت بوجهه هو عقج حاجبه
وسألني عود ليش كاعده؟؟
كتله الله يساعدك ياب
ابتسم كال مو كتلج نامي لاتنتظريني
كتله لا مامنتظرتك بس مانعسانه
سكت هو واني نزلت من السرير و كمت افتر وراه اخذ من ايده ملابسه
كتله تاكل شي ؟؟
رد لا والتاف عليه كال بتحذير دره لتحجين لجدج عن حياتنا ؟
كتله طبعا لا وهو رجال قابل شنو اكوله عيب عيب
كال عفيه انتي بعيني غير كل النساء اريد اسوي اشياء تخليج سعيده دليني عليها يجوز مقصر وياج حجايه جدج اثرت بيه من كال دره مطفيه مابيها بهجة عرس انتي ضايجه شي مني او ابالج شي احجي لاتتردين او تستحين حتى مااريد اتقرب منج الا بمزاجج ...
بعد كلامه ظليت محتارة وساكتة ، ارتب ملابسه وماعرف شنو اسوي
بقينا واحد يباوع بوجه الثاني محتارين بامرنا وبحياتنا والعقد الي بينا ياربي ساعدنا والطف بينا اصعب شي الانسان مايعرف شنو يريد
رحت يمه كتله مااريد منك اكثر من الامان اني طول عمري عايشة بخوف مااعرف الامان اريد اجربه اريد اعيشه واحسه وبعد مااطالبك بأكثر
ابتسم و حضني ومتمسك بيه ويهمس اني حضنج ممكن يخليني اعيش بعد اربعين سنين ليكدام يطيني طاقه عجيبه
خليت راسي على صدره وظلينا حاضنين بعض ومانعرف شنو مصيرنا اصلا ....
بعدها صار يتقرب الي ويتلمسني بجرأة .. .
ومن انتهى كل شي مااخذت الحبوب
رجعت يمه ظل حاضني ويكول بصوت ناصي ماتعوفيني مو؟؟ شما صار مو ؟؟ سلوتي وبهجتي مو؟؟
احجي جاوبي
كتله يعتمد على هاي السنة الي متفقين عليها
خلي اشوف شون اعيشها وياك بعدها اقرر مااكدر اوعدك
شدد بالحضن ونمت حسيت على الاذان كعدت وسبحت وصليت وقريت الاذكار واردد ربي اختر ماتراه خيرا الي واعيدها بالسبحه كم مره
اباوع عليه واني اسبح بالسبحة واردد داخلي ربي ساعدني والله احس ضايعة ...
كمت فتحت شعري وفرشت اسناني قررت ابدي مرحله جديده واشتغل على نفسي حتى اكسبه
رحت للسرير وظليت امدده اوف يادره وانتي بنيه ماشبعتي نوم ومن تزوجتي هم جافاج النوم
اباوع عليه كعدته فيصل فيصل فتح عيونه
كتله اكعد يله جرني يشبكني ويبوس
كال شهالصباح الحلو ربي ادمها نعمه واحفظها من الزوال
ضحكت ورحت احضر ملابسه وعيونه تشع حياة
معقوله اني هيج أاثر بي
زين لعد ليش احس اكو بعد بينا مايقرب دائما عايش بين مد وجزر اتقربت ظل يلعب بشعري بيده
كال انتي حققتي امنياتي بس اني ماحققت الج شي ساعديني بيهم ولو شي بسيط
ضحكت كتله الحمد لله على كل حال راح يسبح ساعه والله ياله طلع متت من الانتظار
ورى مطلع كتله اريد اروح صالون
كال يجيح اليوم انتي اميرتي ماتروحين الناس تجيج
كتله لاتضحك عليه بهالكلام المعسول اريد اروح لا
كال لا يابه دره اليوم يخابروج وكولي شنو تردين وهمه يجون يسونه
تافأفت كتله تمام و عوجت حلكي ماراضية
قبل لايطلع اجه باسني ولزم ايدي بايده وكال انتي دخلتي مملكة فيصل مابيها خروج
ضحكت كال ماتنزلين ؟؟
كتله مانايمه من الفجر كاعدة ، راح ارجع انام...
باسني على راسي وطلع واني رجعت نمت ...
بعدها كعدت ومر يومي عادي لحد الليل
و ظل هالمره ماطلع بره البيت
وصعد قبلي للغرفه
صعدت وراه لكيته يبدل
كتله احضرلك ملابس؟؟
كال لا انتي لبسي هذا
كتله شنو؟؟؟
باوعت مختار من ملابسي فستان اسود قصير للركبه ومن جوه كلوشه وبي بس دكم من فوك
كتله ليش شكو ؟
كال خلي نعيش مغامره حلوه الليله ؟
ضحكت و هزيت راسي
ورحت لبست الفستان وفتحت شعري وتكحلت ورشيت العطر
رجعت لكيته لابس قميص ابيض وبنطرون اسود ويعلك شموع ومشغل قرص سيدي اغنيه لجورج وسوف حلف القمر يمين ويردد وياها
اندار شافني اجيت قرب مني وسحب ايدي صار
يركصني سلو ويكول احسبي واحد اثنين تلاثه لحد ماضبطها ويردد اغنينه حلف القمر
انتهت بليله جميله بااورع مااتكون ...
يوم ثاني صباح الجمعه ظلينا نايمين ل١٠
من كعدت ظليت اباوع الغرفه مكلوبه واليوم عزيمة جدي
كعد فيصل صبح عليه وقبل لايطب للحمام
كتله اوكف اوكف انت ساعه يله تطلع خليني قبلك
كال يله روحي رحت للحمام وكملت صلاة نزلت قبله صبحت عليهم كالت عمه صفيه بعد وكت ياعروس
مو اليوم عازمنا الحجي؟؟؟ شعجب فاتتج !!
سكتت اني واحمد رد عليها
اي هسه نطلع لتستعجلين
جاوبته هسه منو حاجي وياك صايرلهه محامي
باوعتلها بتحذير واذكرها بالاتفاق الي بيننا
وبهاللحظة نزل فيصل كال يله حضروا روحكم حتى نطلع
اني سمعته و ركضت ابدل لبست قاط رسمي زيتوني
دخل عليه جنت اربط الحجاب ... هو اجه ربطه الي ورتبه واني اباوعله عيوني لزكت بي
فززني من صفنتي عليه من كال العبا مو تنسيها
كتله بس احنه من بالسيارة للبيت
كال ابد عباه يعني عباه وماتنزعيها هناك
كتله شنو حتى يشبعون ضحك عليه والله اتبهذل بيها حباب حباب
ظل يضحك يله يابه نزلي ...
نزلت واتفاجأ بعمتي لابسه قاط تنوره وقميص طالعه جنها مديره مدرسه واحمد وعمار يتوسلون بيها تنزعها
وهي ترزل بيهم وخروا عني محد اله علاقة بيه
عمار كاللها عيب يووم يكولون عليج اخرفت تالي عمرها
جاوبته تكلهم بالعكس يكولون ترقت وشافت العز والااروح لبيت جدكم قاسم وانت عمار الزم مرتك ماعليك بيه
رزان جابت الها عبايتها كالتلها هاج ماما ، اخذتها وشمرتها عالقنفة ... كالت ما البسها
رزان عاطت بصدمة ياااا
هي كلتلها ومرض شجااااج
نزل فيصل سكتتت واخذت العبايه ولبستها عبالك رعبها
والكل ظلوا يضحكون ....
طلعنا واحمد كلساع يكول لامه تفضلي ست وين تصعدين ست
كالت يم فيصل بالصدر
فيصل ضحك كالهم وين حجيه هذا مكان دره وانتو ا طلعوا بسيارتكم
عمتي كالت مسجل باسمها؟؟.
كالها وحتى قلبي باسمها
همه ضحكوا وصعدنا بالسيارات بعده يددن بحلف القمر واني استحيت من اذكرت البارحه
كال مو كتلح الزمي البيت
كتله مو هسه مو جدي كلي اهم شي فيصل لزمت ايده واشر بااصابعه فيصل ثم فيصل ثم فيصل ثم فيصل ثم فيصل ثم صفصف
هو سكر من الضحك ويردد بالاغنيه حسيته طاير ومايدري بالشارع شكو فرحان كلش كلش
وصلنا لبيت جدي وكفت كباله تحسررت ااااخ شكد مشتاقتله هالبيت وذكرياتي بي انهالت عليه مرة وحدة
طلع جدي يرحب وصادفنا مصطفى بالباب يريد يطلع
سلم علينا واني باوعت ونزلت عيوني جان وووجه احمر مطعون
سلم واترخص بسرعة .. سألوه الولد
كال افلاونزا من رخصتكم ...
طب لبيتهم ويتلفت علينا ...
طبينا لبيت جدي وجدي يصيح هلا هلا الحوش والبيت إنمله بدرة هلا هلا ...
يلحنها واني اضحك واحاجي العشك انت اي والله احضنه وابوس بي واكله من عمري على عمرك من صحتي على صحتك هو يضحك
فيصل كال شلون احنه مانسلم الملكه بس لدرة ؟
كاللهم جدي تفضلوا تفضلوا ، شويه واجن البنات يركضن
شوكة ومنى ورسل حضنتهم ابوسهم والصغار افر بيهم ...
وراهم طب وليد شايل ابنه ويسلم
وكف كبالي حسيت بالغصة من كالها شونج درة
جاوبته الحمد لله اخذت ابنه بوسته مشتاقتله همين من هو صغير واني احبه
عفت جنطتي وطلعت يم النسوان سلمت على رنا وباركتلي كالت هواي كلت لوليد يجيبني الج اباركلج
وماكملت حجايتها
عرفت ممخلينها .. دخلت بيبي وهناء سلمت عليهم
تمنيت بيبي تاخذني بحضنها بس سلام من ورى خشمها واني هم الكرامة شادة حيلها ...
اجت عمه صفيه وراي مديوره التنوره والفتحه صايره صفح ولابسه كعب تطككك بي وتمشي بنزاكه وممسيطرة وكلساع تعثر
اجت شوكة شهكت صفصف شلابس
غمتها عمتي وكالت انجبي
وراها عمتي كالت لهناء شنو رايج بلبسي تعلمي مني شون البس نظل دافنين روحنا بالحياة
كالت شوكه عمه عوفي امي بحالها كافي علينا انتي المهم أنيقة حضرت الست
كالت عمه صفيه تقلدين عليه
شوكه اخذها الواهس كالتها ست صفيه ياعيوني لابسه قاط زيتوني لابسه ساعه لماعه تسوه كل الجماعه
تغني شوكة وهم يسكتون بيهااا
رجعت للهول اريد اخذ جنطتي
شافني فيصل كال هاج المحابس والساعه خليهم بيها
اخذتهم بعدها تغدينا بين ضحك وشقى وعيون تراقب وعيون مقهوره وعيون فرحانه وعيون حزنانه وعيون حاسده وعيون مهمومه
غسل فيصل وصاح وين الساعه كتله بجنطتي شويه وصاح بصوت تعاي جرني لديوان كتله شكو كال شنو هاي الرسالة
كتله يارساله هاي؟؟
كال بقمة غضبه لكيتها بجنطتج كولي منين ويهز بايدي
قريتها مكتوب بيها (لا السيف يفعل بي ماانت فاعله
ولالقاء عدوي مثل لقياك
لوبات سهم من الاعداء في كبدي
مانال مني مانالته عيناك) انتظرج يا ربح العمر
كتله والله مااعرف منين هاي وداعه جدي وهو نار يفور فور بركان
شويه وطب جدي كال روحي عاوني البنات وجيبنا جاي
طلعت واني اتلفت وارجف منين هاي المصيبه
كلت شنو جدي يدري بالرساله راح يحاجي عليها تقربت من الشباك اسمع كله حجي ماتكدر لطاقتي اني لراحتها هيج مسوي ما تتحملني ورحمة امي من حبي الها هيج مسوي
جدي رفع ايده وضربه راشدي
يتبع ..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!