السلام عليكم
رواية طوفان رجل
الفصل 33
نورا ناصر 🌸
صحوتُ بليلة شتاء باردة"
فوجدتُ خيمتي هزيلة يائسة;
مشيتُ بخطوات ثقيلة"""""
فحضنتني نخلة اصيلة ?????
سقتني من جوفها القوة !!!!!
واطعمتني التمرد والصلابة!!!!!!
اسمتني بالضبعة ولكن الضبعة....
روضني القدر لأصبح احد املاكه
وفولاذ محاوط بزجاجة !!!!!
اعطني الامان ياهذا ;؟؟؟؟
ولاتكسر مغلفي،حتى لاترى حطاما"
نعم انني حطام وقارورة مكسورة هشاشة
لكن خلفي صاعقة تملئني قوة وصلابة""
اذا هاجرت اوطانك فأقدامي لاتعاود الرحالة ¡
اخاطبك ايها المغرور والقلب اغلق ابوابه؟؟
خيوط هزيمتك تلتف حولك وحول افعالك ~
لايخدعك جمال عيناني وهدوء كلماتي
فبداخلي بركان يحرقك ويحرق اثارك !
haneenali422 ابداع حنونة
مرت ايام هو مايعرف اني حامل ولا حتى شك ، بس اني بدت الاعراض تبين عليه دوخة لعبان نفس اتشهى اكلات معينة انام هوايه ..
وويا هاي الاعراض قلق وخوف منه هو مايريد طفل شلون بيه!
اني اتاكدت بنفسي حامل من يوم جنه كاعدين الصبح وصادف جمعة جنت الصبح لعبانة روحي وكوة كمت من الفراش بس حتى لا يحس بيه جبرت نفسي اكوم واتصرف طبيعي كوة عليه
كاعدين واجت عمه صفية كدامهم كلهم
بحنية وممزوجة بتعب وكلها مصطنعة ومزيفة
كالت عيني درة انت مو ع الاساس ام البيت كومي طبخي تعبت أني كلها عليه وبراسي ...كومي اطبخي
هميت روحي اريد اكوم وجاوبتها :- حقج والله هسه كايمة اطبخ
فيصل لزمني كعدني ووجه كلامه الها يابه انتي طبخي هي وين تعرف
تطبخ
التفتت عليه مبتسمة :- لا اعرف والله يعني زين لابأس بيه
ظل يباوع بعيوني بنظرة شك
مامصدك كلامي يعني معناه معقولة تعرفين تطبخين
هزيت راسي مبتسمة ..
كتله والله اعرف شبيك ماتصدگ ...
رد يله نضوك طبخ اديج اليوم يعني ...؟
وباوع لعمتي مو هيج يمه ؟
هزت رأسها تحجي بحنان اي يمه اي نضوكه ليش لا .. طبخها يعجب امي معلمتها وشايف امي شلون نفسها طيب بالاكل...
كمت للمطبخ اني اعرف اطبخ بس اضبط شي اسوي
هو مركة اللحم وحشوة التمن
هلكد مانكتلت بيها من جنت اوكف وياه بيبي وتصخرني وشوكه تضم روحها لحد ماتلزمني اني ويصير الصوابات عليه بفلس ...
مرة من المرات جان عدنا عزيمة وكفنا اثنينا يم بيبي اني و شوكه ويايه
نحمس باللحم على البريمز وبعدها ودوا شوكه تحمي المي للحم حتى يستوي بسرعة ...
وشوكة تأخرت ما ادري وين راحت ..
اجت هناء كالت كافي حمس ديري عليه المي الحار
وراحت ...
نصيت عاللحم وظليت ادور على شوكه
لهناك لكيتها كاعدة بالصالة وممددة رجليها وشابختهن ومخليه جفوف اديه على الكاع وصافنة صفنة عميقة
و تباوع فلم عراقي لقاسم الملاك اسمه( فائق يتزوج )
ومندمجة وتتفاعل و تضحك وتكركر من الضحك ...
كتلها ياا هااي شنوو هسه وكتها كومي ندير المي الي حررتي على اللحم
باوعتلي ورجعت باوعت للفلم كالت يامي يا لحم ؟
تعجبت عليها يااا هاي تحجين صدك انت وج كومي يالله
راح يحترگ اللحم وشيفكنا ...امج توها اجت كالت ديرو المي
جان تفز كالت يااا نسيت ماخليت مي حار
كتلها يبوووو امشي نشوف حل انوب هو لحم عجل شون شيستوه
كالت وهي تتلفت اكلج هن وين؟؟
جاوبتها طبن يثرمن بالبيتيه للحشوة
كامت وجرت الصونده ولزمتها كالت يله هو كله مي
كتلها عزاا اليوم نتخزا ونتعزاا ولج شووكة هيج مايستوي والدنيا شتا المي ثلج شووكة دكوولي غيرها يمعودة
كالت تهدي بيه انت بس اسكتي وسدي حلگج خل تعدي على خير هن من يصبن الغدا نحبس روحنا بغرفتج ولا من شاف ولا من درة ...
هزيت راسي بعدم قبول وهي ترست الجدر مي
ولمينا الصونده وضميناهه ...
و ورا مدري شكد وقت بدا يفور وبلحظتها اجت بيبي فتحت الجدر وكلبته وسدته
باوعت علينا بنظرة صارمة و كالت ما تتحركن منا سمعتن؟؟
اثنينا خانسات ساكتات مثل واحد مسوي مصيبة ويداري مصيبته لا أحد يعرف ...وهزينه راسه بقبول
اندارت على شوكة كالت إلها و أنتِ شوكة ام اعطوب اذا شفتج كمتي منا ورحتي تتفرجين على التلفزيون اذبج بالجدر ويه اللحم
شوكه ساكتة الى ان خلصت بيبي رزالتها
و ردت حاضر ميساء الساحرة اتامرين امر اليوم تنفضحين بين العشائر الاخرىٰ وبالوجه الاسود
كالتها بيبي الدبسه اكعدي راحه لااذبج بالجدر واخليچ تنصلخين ...
شوكه گضتها تضحك خربانة ضحك ... واني بس اعض بشفتي راح ننفضح ...
وغمتها بيبي وطبت ... اذن الاذان وبدن يصبن .. واحنه واكفين يمهن ....
اشرتلي شوكه بمعنى خلي نفلت ، طكتها ركضة واني وراها وشردنا وهن مايكدرن يصيحن لان عدنا خطار جدي
وبقينا يومين محبوسين بالغرفة حتى جدي متحلف بينا لأن تفشل من الشيوخ الي عازمهم ...
و بس منى اخت شوكة تمدنا بالأكل ومن نصيح على أمل تفوت من يمنا ما تجاوبنا وشووكة متوليتها الشمر
انوب هي أمل تلبس كله احمر وماروني الوانها المفضلة
وشوكة تقلد عليها تكللها طالعة قوطية حليب ديالاك أحمر
و بعد توسلات بالرايح والجاي وعمو حسن كفلنا انفتح الحصار علينا وطلعنا بس شبعنا مسبات ورزايل من بيبي
تنهدت اوووف ياريت ترجع ذيج الايام رغم مشاكلنا بس بسيطة بالنسبة لهسه
هسه حياتي كلها الغاز وناس عبالك مااعرفهم اي والله اي شخص لو شكد ماتكون تعرفه الا بالعشرة يله يبين ...
فيصل شكد جنت اشوفه شخص مثالي وشخصية ونظيف بس طلع مليان عقد ...
رجعت لواقعي كله اني اطبخ اول شي حميت مي حار وبديت احمس باللحم ...
واني دا احمس صارت ريحة اللحم كلها بخشمي وبأنفاسي
وصلت لمعدتي وصارت تگلب ...
ركضت للحمام هنا قطعت الشك باليقين وتأكدت أني حامل .. ماكدرت اسيطر على نفسي ظليت اتقيأ
سمعت صووته يمي هادره خيرج بويه شنو موجوعه خاف مستبردة ... يحجي بقلق
الحمام مقابيل الصالة الظاهر سمع صوتي واجه
كنبصت وايدي علىٰ بطني احس مصاريني تتكطع وانفاسي سريعة گلبي يدگ ببلعومي
حاولت احجي مكدرت خليت جبيني على ركبي ولازمة طرف الدشداشة من يم بطني كولش قوي ...
بلحظتها هو سكت وخفت من سكوته ، احسه بدا يشك
جبرت نفسي ودست على ألمي وغثياني والدوخة وكل شي وكمت ، خليت ايدي على سيراميك الحايط
وحجيت واني اغمض وافتح لا مابيه شي بس الريوك جان دسم واني اكلت هواي
رحت وتوجهت للمطبخ داا اكمل الغده ، وكفت عالطباخ وهم كفخت الريحة بخشمي واشتميتها بس قاومت ومابقى شي بمعدتي أصلاً بس لعبان نفس قوية
حسيت بي جرني كال ياكلون سم تعاي هنه يكملن
وصاح يمه وووينج تعالي كملي بمكانها لوو أنت لو فاتن
خلاني جوه ايده وطلعني من المطبخ ، مشاني للصالة وحاضني كدامهم ....
ظلوا يصيحون سلامات يمعودة خو ماكو شي ...
مااكدر حتى اجاوبهم بس أأشر بأديه واحس الصالة تفتر بيه
هو ظل قلق يلزم بيه عباله مصخنه او مستبردة ويتحسس بشرتي ....
ساعدني امدد ، ومددت بالهول على القنفه وراسي على رجليه وهو يمسد بي ...
دنك وانحنى عليه كال اخذج للمستشفى ؟؟؟
جاوبته لا ميحتاج هسه اصيرر زينة !
نظرات القلق والشک بعيونه قلقنني ورعبتني ، جبرتني اغمض عيوني ماريد يقرا حچيهن ...
واني مغمضة احس معدتي ببلعومي ، لعبان نفس دمرني بقيت سادة عيوني وهيج ماحسيت بنفسي لمن نمت
بعدها مااعرف شكد مر وكت وحسيته كعدني ، فتحت عيوني ، قرب وجهه من وجهي وطبع بوسه على جبيني وكعدني. ...
فتحت عيوني ايدي تسللت لبطني ، خفت يحس جاي اتحسس جنيني سحبتها وايدي ترجف سويت نفسي اسحب ملابسي ...
ويه ما فتحت عيوني كتله هاااا بصدمة
احتضن وجهي بأديه يهدأني كال شبيج يابه
كل الي ابالي وداني مستشفى وعرف أني حامل هيج تصورت
بس هو كال كومي اكلي صار الظهر ميصير تنامين جوعانة ..
وصاح يمه جيبي الصينية .. واجت عمتي صفية بيدها الصينية وهو ظل يوكل بيه مثل الطفل ...
حبيت اهتمامه بيه وصرت اتدلل عليه ومايرضى الا هو يوكلني ماانكر عجبني الموضوع حبيت دلاله ...وخاصة احس نفسي هسه ضعيفة حييل ولايذة بقوته
عمتي كاعدة كاللها بلووم يمه صدك جذب وينها وين الطبخ ...
كالتله شبيهه يمه مو سباعية رباة التفگ ... لعد من تشيل البندقية وترمي ما تكول وينها وين
باوعلها خزرها ، سكتتت شويه وكالت اكلك يمه خاف حامل
جاي يوكلني رجع الخاشوكة للماعون وخزرها خزرة اقوى
عاط بعصبية ماتكرمينا بسكوتج
گحيت اني ولشتي صارت كلها ترجف
واني دااكوم كتلها لا عمة متأكدة مو حامل بس تعب ويمكن برودة ...
انطاهه الماعون اخذته منه
وتقرب مني يريد يشيلني ويصعدني للغرفة
بلحظة غمضت واجتني تخيلات وافكار اذا عرف حامل راح يفرح اكيد وهيج يداريني اني وجهالي!
بعدت الفكرة مني هو مايريد طفل نهائياً ...
كمت سويت نفسي مابيه شي رغم كل شي بيه
كتله لا زينه يجوز صدك استبراد اني راح اصعد مابيه شي هسه من تقيئت صرت احسن ...
وجبرت نفسي واغتصبت ابتسامة من شفتي بوجهه
بس درت ونطيته ظهري تلاشت هالابتسامة ...
صعدت للغرفة كعدت على السرير ، حاجيت ابني الي هسه متكون بظلمات الرحم وعيني على بطني
ليش اجيت يا يمه ابوك مايريدک .....
وكعت دمعة من عيني شهكت احس كسرة بروحي
واحس كلش كسولة وجسمي مكسر وين مااخلي راسي انام ...
يعني الي يركز يعرفني وهو متأكد اخذ الحبوب بس بالليلة عرسي ماانطاني ....
انوب تذكرت عمتي صفية من ذبت حجايه كدامه وكالت خاف حامل بحيث هو انصدم فتح عيونه وخزرها بس بلحظتها صدك حسيت وجهه شحب عبالك انسحب الدم منه ..
محد راح يفضحني غير صفية ، اكيد انفضح من ورى لسانها .. والله وجم دوب اني اضم عنه حملي ! أول وتالي بطني تكبر ...
العصر نزلت لأن كارهة الغرفة وريحتها ، صارت فاتن بدربي مبتسمة ابتسامة صفرة مال خبث
استوقفتني سألتني وهي مبتسمة ذيج الابتسامة
سمعت تتقيئيين خير ان شاءالله نكدر نكول مبروك ؟
جاوبتها بتذمر على شنو
اقتربت مني على الحمل
وغمزت
تلفتت لا ارادي مو نسوان حشى حياية حتى الحياية ارحم منهن
كالت شبيج خايفة ؟
حركت اكتافي قوست شفايفي اغطي على مخاوفي
كتلها ومنين اخاف واذا حامل قابل ليش اخاف وهو طفل وبالحلال
كالت مااعتقد فيصل يريدج تخلفين ...مايريد اطفال هو
وابنها على ايدها باسته حيييل عود تغورني
انت متخلفين فيصل مايريد أطفال تكرر بجملتها
تبسمت اسوي نفسي ممهتمة بس هيج داخلي قهرة من كلامها تسع الكون شنو ذنبه ابني
احاجي بداخلي سمعت حجيها ييمه لاتضوج أني احبك واريدك واذا ابوك صدك يحبني مثل مايدعي هم يحبك ويريدك ويخليك
صدى بداخل روحي يتردد بابا مريض نفسي ، فيصل مريض نفسي ......فيصل مايريد أطفال
اريد اطلع نفسي من هذا الصدى ماكدر ، هجيت من البيت
الحديقة مالتي بهذه الفترة مالي خلكها
بس كلت اكسر الموضوع واطلع بيها ، طلعت واتصفن
وحسرة تجيبني وحسرة توديني ، فكرة تستعمر دماغي من اسوء الافكار واردئها ...
سمعت صوت جرة الكرسي التفتت عليه
شفته كعد ...
مرت دقايق صمت ... بس داخلنا مو صامت ابد ضجيج ماله نهاية ....
اخترق هذا الصمت سؤاله :- ليش كله يم هاي الشجرة ومهتمة اكثر شي لهذا النبات
جاوبت بنبرة ماتخلو من الحزن : اسمه ياسمين البر هذا النبات مايعيش وحده ولا يزهر الاشجره جبيره يمه تسنده واحسه يشبهني كولش
كال افهم من كلامج تشبهج بعلاقتج وي جدج ؟
هزيت راسي بنعم ...
كال واني بعده مو ؟
ماجاوبت سكتت
كال اي اني بعده حتى لو انتي ماتريدين تعيشين يمي مااعوفج اعوف روحي ومااعوفج ...
عفته ورجعت اسكي
اجه يمي كال علمتيني عليها عايف الحديقة الجبيره ومكابل هاي الصغيره بله هذا حجي ...
وظل يضحك وبيده الجكاره ...
مرت الايام بسرعة مخيفة وحملي تأكدلي من التقي واشم ريحة التفاح الاخضر الصغار واخلي ماعون ملح واغمس بالملح واظل اكل الله عبالك تشفي قلبي
ساعه افرح شنو يعني طفل يصير عندي وساعه اكول ينظلم وشنو مصيره لازم اكسب فيصل واحب عيشتي لخاطر هالطفل
كلما اخابر جدي يكول هسه لاتكولين واحسه محتار بعد ماحجيت وياه الي شفته ببيتهم والي جاي اعيشه بس سوده عليه مابيده شي ورانا ناس وعالم الحمد لله على كل حال
فيصل اباوع بعيونه واشوف الشكوك وعبالك يكذب نفسه بحملي بس لان هو صار هواي مامتقربلي مايكدر يجزم الموضوع
واتاكدت اكثر من سؤال ه على الشهريه صعدت اخابر جدي وخايفه ياربي شنو يسوي بيه اذا عرف ياربي ارحم بحالي
واني احجي وياجدي انجريت من شعري والسماعه وكعت ويضرب بيه ويصيح ضحكتوا عليه انتي وجدج واني اصيح جدي الحكني جدي الحكني راح اموت هو يضرب بقسوة وبلا رحمه وبنفس الوكت يبجي بصوت ويصيح ليش يضرب بكل مكان اني ماافكرت بس شلون احمي بطني
من هسه نزرعت معزته وغريزة الامومة تفعلت ، سبحانك ربي يضرب واني كل جزء يجري دم وفقدت الوعي ثواني
كعدت حسيته يمي يعاتبني ولججج ليش وولججج ليش شنوو تردين بعد شنووو
حاولت الملم اشتاتي عيوني تدور جدي ويينه لييش مااجه ينقذني مااسمعني اعييط ووينك جدي
صرخخخ بصوووته العاالي احمددد عمااار هشااام ووينكم
نزل يصييح حضرروا السيارة للمستشفى ياالله
كعدت احس رطووبة بملابسي .. دخلت رزان ، فاتن ، عمتي وحدة ورى اللخ
رزان ظلت تبجي وتشهك وواجتي عليه
نظرات عمتي وفااتن يحجن مااعرف افسر حجيها صدمة حيرة تساؤؤؤل ..
طب مرة ثانية مثل اعصار مثل فيضان كسر كل شي بطريقه تحفيات التليفون الارضي الي جان بالكاع دفره لوين وصله
على عصبيته طلعن صفية وفاتن ، رزان اجت تطلع من خوفها عاااط بيها غيريلها ولبسيها دااخذها للمستشفى
ويأشر بيده
اخاف اباوعله اموت اخاااف حسيت روحي وروح جنيني بين اديه بهاللحظة
جدي ويينك تعاال دخييلك تعااال محتاجتك بس هسه تعال خلصني من هذا الطوفان الي اكتسحني مثل مدينة عامرة بأهلها وبنياتها وراح يدمر ماتبقى منها
لبستني رزان واني ارجف رجيف مصاير
وجسمي كله يون عليه ... نزلت وانطلقت بينا السيارة للمستشفى ، احمد يسوق وفيصل بصفه وريحة الجكاير خنكتني
غمضت عيوني فكرت بطفلي مات وكع لو بعده ياربي سلمتك امري انت دبرها الي خليت راسي عالكشن الي كدامي ... ورزان لازمة ايدي وتبجي ويايه .
وصلنا للمستشفى اسمع صوت رزان تبجي يمي واحمد
اخذوني للطوارئ النسائية وهناك دكتورة فحصتني وفيصل ويايه ويايه
فحصتني وبعدها كالت نقلوها للردهة وطلعت تحجي وي فيصل ماعرف حالتي شنو وشبيه
رزان يمي شكلولي مغذي وابره صحت ااخ جدي اجت يمي كتلها شبي شنو تكول الدكتورة عن طفلي
هزت راسها بمعنى ما اعرف ...
ورة وقت اجتي ممرضة نظراتها مريبة كالت لرزان خليها عالكرسي المتحرك
سألتها رزان وين موديتها ؟ جاوبت للصالة يله بسرعة خلتني عالكرسي المتحرك وصلت للصالة وكالت لرزان حدج هنا ابقي وكفت تباوعلي لبست الجفوف مااعرف نظراتها خفت منها
سألتها اببني عايش ؟
قربت مني اجت تخليلي ابرة بالوريد صاحوا عليها
تعالي نادية يردوج
راحت واني رجعت راسي عالسدية ماادري شكوو بالدنيا اباوع للسقف مال المستشفى وافكر بوضعي وجدي تأخر عليه ليش لهسه مالگاني
رجعت نفس الممرضة شكلها حلو ناعمة بشرتها لونها يجنن بس ماعرف ليش خايفة من نظراتها لزمت آلة ماعرف شنو صايرة أول مرة اشوفهه اشوف الممرضة مترددة بين اسوي او مااسوي خفت حييل
ماعرف شسوت وطلعتني بعدها الالم بكل جسمي وبكل روحي ...
ودوني للردهة تلكتني رزان تبجي وأني بين الوعي واللاوعي غمضت بس سمعت أحمد يكول جدي متخربط
كل القوة اجتني وكأن هذا الخبر انعش كل اعصابي وشراييني مثل الصدمة الكهربائية لانعاش القلب
كعدت على حيلي شبي جدي هااا ووينه جدي وودوني اله وودووني
ظلوا يهدأوون بيه واجه فيصل مااكوو الا هسه تودوني لجدي ... نسيت كل الي صار بيه نسيت طفلي شنو مصيره ميت عايش نسييت كل شي وفكري يم جدي
بعد جدال عقيم وحرب طلعوا منها خسرانين واني ربحانة ودوني لجدي ..
كمت اصيح جدي جدي سوده بوجهي جدي كمت اسحل بروحي ذبت رزان عليه العبايه وهي واحمد سانديني
وكعتي مو بالضرب وكعتي بجدي ربي ارحم من لايملك الا الدعاء
وصلت اله شافني وليد واني وياه نفسي البجيه على شنو وشنو نبجي ياربي بس عيونه تحجي اباوعله من بعيد ايده ملفوفه وقف اجا عليه من شافني
كال شون صرتي باوعت لايده ورحت كعدت شوكه اجت تركض شافتني شهكت كالت يمه شمسوي بيج ركضت عليه
كالتله فيصل انت تسوي هيج بدره عبنك ماتستاهلها بس يكعد جدي مايخليها اللك الشايب ابو النسوان
كال شكلتي ؟؟
صاحت مو عليك مو عليك
رجعت كعدت يمي كالت خفت منه بس خنزر خاف يسوي بيه مثلج صدك صايره جوبلس الشايب المسودن ليش ضربج لان جدي صاح فيصل كتل دره دره ماتت سودنا عبالنا صدك وركض وليد مثل المسودن اخذ السلاح وجدي اخذه منه كاله اني جتاله وتخربط
هي بس تسولف واني اهز براسي ادعي يارب جدي اريده منك نفس ذيج وكعته نفس اللمه بس الفرق ذيج سبب وليد وهاي فيصل ووكعت بيمن بجدي اووف ربي بعده وين اعيش فيصل وحش محد يكدر يوكف بوجهه
اي وحش منو بعد جدي يكدرله يارب ساعدني منو بس ربي ونعم بالله
شوكه كالت خايبه اني انقهرت على جدي خطية مايتحمل احد يأذيج
اني بس اهز براسي
كالت خايبه انا احجي ويالحايط عافتني وراحت عبايتها تسحل وراها لامه تراب المستشفى
تقرب من يمي لزمني بعكسي واني كاعده بالكاع كال كومي على الكرسي لا تكعدين بالكاع مو زين وانتي هسه طارحه
هديت ايدي منه بلكي اموت واخلص عوفني والله ادفعك الثمن غالي غالي مااطلع دره
احمد كاعد يمنا على الكرسي ويسمع كلامنا واني اردد كتلت ابنك هيج وصلت بسيطه حتى ماارحم بيك بيك بسيطة
كام كال خل اكوم قبل لااسوي شي اندم عليه بعدين
اني ضحكت لازم بعدك مامتندم هينه هينه نزلن دموعي ابجي على شنو وشنو جدي كوم لخاطري جدي منو يفزعلي جدي قلبي يجري دم وينك اضمده يابعد دره وقلبها
كل الي يشوفني حتى يخاف يسال شبيه بس وليد احسه يبجي على جدي وعليه بس صافن وادموعه ماوكفن شويه واحمد نزل يمي بالكاع.
همس كال كومي دره مو زين على الي ببطنج ...
..........
بعدها سمح الطبيب لجدي يطلع من المستشفى وعلى مسؤوليتنا ، جدي مايحب المستشفيات
اني اصريت اطلع وياه راسي والف سيف اروح وياهم للبيت ..
نظرات جدي لفيصل كلها انتقام والي اسف وحزن اروح الك فدوة جدي لاتتأسف ولاتضوج تروح لك فدوة درة كلي الك أني ..
واحنه دنطلع جدي تبعني فيصل لزمني من عكسي
ترجعين ويايه درة سحبت ايدي منه لهنا وبس كافي
همس واحنه نمشي شنوو نسيتي من منو احميج اني !!
جاوبته يمكن الي تحميني منه يطلع ارحم منك ولو اثنينكم مرضى
لزم ايدي عصرها إلا شويه العظم يتفتت بيده حتى ماكدرت اسحبها
جدي كدامنا بالكرسي المتحرك ويدفعه وليد حجه بلسان ثگيل فييصل درة تروح وياي
كاله بس حجي
قاطعه لاتغضبني عليك فيصل درة تروح وياي ...
قرب مني وهمس حسبي حسابج بس هالليلة وباجر اني يمج اني
رجعت للبيت ويا جدي وتركته ورايه .... رجعت واشوف عيون الشماته بيبي لا مو بيبي مرة جدي هسه هي بنظري مو إم بابا ونحل لغز المراة الي جنت الوذ بيها وتشحتني
ارتاحيت من عرفت هي مو ام بابا ما اعرف ليش راحة ارتاحيت بس ضايجة جدي ضم عليه ومن شفتها متشمتة برجعتي واني وجهي مزورك ومتملخة مهتميت مو نفس قبل
رجعت ونمت بغرفتي هواي نمت ومن كعدت كالوا جاي فيصل وانت نايمة ورى يومين من طلعة جدي من المستشفى دخلت عليه كاعد وبيده السلاح يحضر بي
كعدت يمه كتله جدي هذا المن وشسوي بالسلاح انت مريض تعبان نام تمدد
باوعلي حسيته يتأمل جروحي حسيت نظراته تخترقني وتتأمل حتى جروح الي بداخلي وكسرة گلبي ...
باوعلي كال فيصل على جية اريد اخذ حگج ...
يتبع ...
اسفة اعلن الكم هالشي 🥺النشر يوم السبت القادم
عندي مناسبة خميس وجمعة
تقبلوا تحياتي 💕🌸😘كلش احبكم وكلش احب حماسكم للقصة وخاصة بالكروب فدوة لكل البنات الي ينشرون عالقصة بالكروب والي يعلقون هنا بالوتباد
ملاحظة من انشر هنا بالوتباد تطير نص الكلمات ماعرف ليش
يعني اذا هو 3 الاف كلمة يصير فقط 2700 كلمة
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!