السلام عليكم
رواية طوفان رجل
الفصل 34
نورا ناصر 🌸
عشنا مالا نريده،،
ونلنا مالانستحقه ونقضي عمرنا نسأل؟
أكنا نستحق كل هذا الالم لنتعلم،
ام إننا افرطنا في أحلامنا،
ونسينا إننا في واقع،
يغتال الأحلام،
عشنا الحياة بكل مافيها
بالصمت والصمت ثم الصمت والصبر،
وحين أخبرونا أن نغادر مايؤذينا،
وجدنا الأذى في ارواحنا،
لسنا ضعفاء ولن يصيبنا الاحباط بعد،،،
لكننا وصلنا لمرحلة نفذت طاقتنا،
وانتهى رصيد الاحساس والمشاعر في
قلوبنا ولانعلم ماينتظرنا بعد،،
غدا إن متنا يقولون لنا،،،،
ماذا رأيتم في هذه الحياة،!!؟؟
ليس بإمكاننا أن نجد أي جواب،يقال،،،
فمن شدة الآلام لم نستطع رؤية اي شيء
..............*...........
مرت أيام أني بحالة من الاستغراب الممزوج بـالصدمة ايام وانا أعيش الحزن بكامل قواه ..
دخلت على جدي محضر السلاح افتهمت منه فيصل مخابره وكايله جاي حتى ياخذني
لزمت ادين جدي بصدمة ورعب شنوو جدي تريد تكتله ؟
رفع السلاح وكال هو هذه الي ما يگرط نعمته هيج يصير بيه هسه غصبا ما عنه يتأدب
ظليت اتوسل بي لاجدي دخيلك عوفه لا تورط رووحك عفية لا تكتله
بعد ايدي عن السلاح وكال لا تخافين ما اكتله بس اريده يتأدب ويعرف شكد عزيزة عندي انت وربج الي ترسج بگلبي الا أندمه
حجيت برجاء جدي عوفه هو هم مو هين فيصل فدوة هذا مو حل والله اني بعد ما ارجع اله ابقى يمك
كال روحي لغرفتج وسدي عليج الباب وخلي الباقي عليه
سمعت صوت سيارة اقتربت من البيت ، لطمت على خدي عرفت اجه فيصل
وجدي قافل الزمه يوخرني انوب قوي ولا عبالك هسه طالع من أزمة صحية
يمكن غضبه ينطي قوة اكثر خفت على طفلي لزمت بطني وكمت كوة خليت ايدي بالكاع سندت روحي بالكاع وكمت
صار بوجهي وليد لزمته من ملابسه واتنفس سريع صار المي بأسفل بطني قووي ، عضيت على شفتي وتجاوزته كتله وليد
لزمني خيرج جدي بي شي شكووو
كتله والتقطت انفاسي گوة الحك على جدي يريد يكتل فيصل ، فيصل اجاه يريد يكتله واشر على الباب الوراي وادور اشر على باب البيت الرئيسي
وقريب علينا عموو حسن سمعني احجي ويه وليد عاف كلاص المي بيده بسرعة واجه باتجاهنا
فاتوا على جدي اثنينهم وأني وراهم راح وليد على جدي ياخذ السلاح منه
كاله جدي اني چتالة واطلع منها أنت
عمو حسن صار بيناتهم وعاط بوجه وليد اعقل وليد شنو هالحجي تردون تبلون روحكم تكتلونه شنوووو
لك فكر بأبنك بمرتك شنو من عقل شايل
خليت اديه على الحايط اسند روحي واتوجع واستمع لكلامهم انهارت كل قوة عندي .....
حنيت لأيام زمان شكد جنت قوويه ضعفتي فيصل امتص كل قوة عندي
سمعت جدي كال محد يتدخل اثنينكم ظلوا هنا انه طالعله
لزمه عمو حسن وحاجاه بنبرة رجاء يابه مو تصرف منطقي هذا انت معصب وهالعصبية ممخليه عندك تصرف منطقي اهدأ وخلي نحجي وياه بهدوء وهم مو بكيفه ياخذهه بعد احنه عدنه اتفاق وياه
طلع جدي ما جنه يسمع لعمو حسن ووليد رافع اكتافه ومتحضر جدي وعمو حسن طلعوا والباب اندكت بقووة
مشيت وراهم كووة صوتي يطلع كرهت نفسي وضعفي من بعد قووتي
التاف عليه جدي كال حدج هنانه لا تطلعين
صحت عليه جدي عووفه دخيلك عووفه والله خوفي عليك أني مايسووى تأذي نفسك
راح للباب فتحها وطلع واني وراه ، الباب بيها سركي من بره سمعت صوت السركي تنجر
رحت اريد افتحها تأكدت قفلها واحد منهم
ركضت للشباك الي يطل على الكراج والحديقة وواجهة البيت كلها ، شفت فيصل وعمار واحمد فاتوا ومن شافوا جدي ووليد وعمو حسن وكفوا بمواجهة وياهم
لزمت بحدايد الشباك وصحت بصووت كوة يطلع فيصل رووح رووح
احس روحي تطلع واني اصيح
المسافة بين مكان وگفتهم وبين المكان الي اني واكفة بي هواي جبيرة واني اصلا هلكانة الم بطني مثل سچاچين تنغرز برحمي وتموتني من الوجع
اجت رنا وعمة أمل لزموني يهدأون بيه
اسمع صوت وراي هناء لو بيبي ممركزة بس كل الي بالبيت اللتموا
أحمد ...
سمعت كل الكلام الي دار بين الممرضة وفيصل بس بقيت ساكت حافظت على هدوئي لأخر كلمة بينهم رغم الي يدور بداخلي
معقولة وصلت لهالبشاعة فيصل! تتخلص من ابنك تقتل روح !
فيصل بعده عايش بالماضي وعقده مسيطرة عليه
عباله درة نفس أمه هم تموت بالولادة ورافض فكرة الاطفال نهائيا
وبعد ماهو تأكد من
الدكتورة انو الاسقاط ميأثر على حياة درة استعان بالممرضة توگع الطفل المهدد بالاسقاط أصلا..
ودرة شنو ذنبها والطفل شنو ذنبه ، اخويه راح يرتكب اعظم ذنب وهو قتل الروح ...مو واعي على نفسه
بقيت بصراع ويه نفسي واشوف الممرضة تبتعد ودخلت مرة ثانية للردهة النسائية وفيصل رايح جاي ومتوتر ...
هشام من بعيد واكف ضايج من الأنتظار ..
ميلت راسي واشرتله سوى حركة بأيده فر كفه بمعنى شنو ؟
باوعت لفيصل الي جان ملتهي ويا افكاره وظهره علينا ...
هذا الطفل لازم يعيش ويجي عالدنيا اني لازم انقذ اخويه من هذا الذنب وعذاب الضمير الي راح يفاقم مشكلته النفسية إذا فعلا انقتل الطفل
وانقذ الطفل وهذا الطفل الوحيد الي راح يعالج أبوه ويخلصه من عقده كلها ..
اجه هشام يمي همستله اخذ فيصل واطلع بالحديقة خلي يدخن هنا ميكدر وراح ينفجر
باوعلي هشام بنظرة تساؤول وهمس من بين اسنانه شعندك ولك أحمد
هشام ذكي عرف أني اريد اصرف فيصل وعندي شغيلة
بنبرة مستعجلة جاوبته واني ابتعد عنه اخذه ديله يله
وفعلا راح هشام واني هم طلعت قبلهم ابعد الشبهات عني
شفتهم وكفوا بالحديقة كتله راح اجيب جكاير واجي
شفت فيصل لزم راسه ودنج ، انتهزت الفرصة ورجعت للمستشفى بخطوات سريعة
فتت جوه مقابيل الردهة النسائية ظليت اطلطل شفت ممرضة اجت وكفتها سألتها عن الممرضة نادية
طبعا عرفت اسمها من سمعتها تكول لفيصل على اسمها وحفظته
وهاي الممرضة اللخ كالت نادية بالصالة عدهه مريضة
ماقبلت تصيح الها بقيت ادك الها ناعم ضحكت يله راحت جابتها واجتي
اجتي نادية باوعتلي كالت نعم
ميلت راسي أأشرلها نروح لغير مكان ليجي فيصل وهي مقبلت كالت عندي مريضة دااسويلها تنظيف
كتلها واني اقرب منها المريضة درة مو ؟ مرة اخوية ؟
البنية ام العيون الكبار البيضة مو ؟
عكدت حواجبها متوترة ودنكت كالت اي واجت تفتر تريد ترجع
كتلها أمشي ويايه عندي حجي يفيدج
هي مبينة متوترة بس المبلغ الي وعدها بي فيصل جان مغري ..
ابتعدنا عن الردهة التفتت اللهه واكفة مقابيلي كالت نعم
كتلها اسمعي...
اخويه ومرته عدهم مشاكل وبساعة عصبية وكالج وكعي الطفل وهو هم عنده مشاكل نفسية واظن تعرفين شنو اقصد
ورفعت حواجبي
هي باوعتلي بصدمة ..
كملت كلامي ومثل مشفتي هي صغيره وهو اكبر منها بعمر والدها ، يوم يومين ثلاثه ويصحى على عمره ويتندم وبالتالي انت توكعين بيها
ظليت اعدد الها ويجي يحاسبج وتدخلين بسين وجيم وانا افوت شاهد واخويا اللي برا الثاني همين شاهد على انو انت قتلتي روح بدون ذنب وتشخيص الطبيبه يثبت انه الطفل مهدد بالاسقاط مو ميت حتى تنزلينه بالقوه من بطن امه
لذلك الاحسن الج تتراجعين عن هذه الشغله وتروحين تديرين بالج على المريضه وانت الممنونه حلو الكلام؟
بقت صافنة بعدين كالت بارتباك اي بس هو الطفل ميت فعلا
كتلها امشي نروح للدكتورة تشخصها مرة ثانية
ردت لا عليمن اصلا هي دزتها لصالة الولادة حتى تسوي كورداش
فركت وجهي بعصبية نرفزتني
كتلها انت مصرة تنسجنين مو؟
زين مو حرامات هذا الجمال كله يذبل بالسجن
وغمزت الها ..
كالت بس اخوك يكول
جاوبتها معليج كتلج اخويه ساعة غضب ويصحى ويجي عليج يطيح حظج
كالت نعم
جاوبتها اي ليش تخلينه نتجاوز يااعيني دروحي سوي الي كتلج عليه
باعي اني اكدر هسه افزع المستشفى كلها عليج بس ماريد هوسه لان اخويه تعبانة نفسيته وماريد اضرج اريد مصلحتج اني ميرحمج والله بس يستوعب شوفي شنو يسووي بيج ..
هي وجهه شحب صفنت ثواني هزت راسها بايجاب وراحت تمشي وتتلفت..
بعدها ...
ورى ما اصرت تروح تشوف جدي ، شفتها كاعدة بالكاع هيئتها تصعب على الكافر واسمعه يكللها كومي انت طرحتي وهي باوعتله بعيون كله دمع بس نظراتها قووية جانت ماطايقته تباوعله بحقد بس مكسورة ومقهورة منه حييل تجمع حزن العالم كله بعيونها ماتستاهل درة
رحت حتى اطمنها كعدت يمها ترجيتها تكوم
باوعتلي گلبي انعصر على منظرها ..
كتلها كومي وديري بالج على ابنج
ردت تباوع ومتعجبة
كالت بنبرة كلها يأس فيصل يكول طرحت
رديت لالا ماطرحتي الطفل عايش ديري بالج عليه فيصل عباله طرحتي بس هو لا ترى مو بس فيصل يريدج تسقطينه حتى امي وعمار
فتحت عيونها متعجبة لطمت خدها لزمت ايدها اهدي بيها واباوع لفيصل واكف بعيد
كتلها اششش اهدي
كالت وهي تبجي ليش ليش مكفاه الي سوااه بيه بالبيت مكفاه بسببه جدي بين الحياة والموت
كتلها بهمس دره فيصل مريض يتصرف موو بوعيه اشش اهدي .. وتكتمي عالموضوع هسه علما يطيب جدي ونشوف شون نتصرف
شهكت كالت اني ماعندي غير اسكت هسه جدي كل قوتي وهسه قوتي بين الحياة والموت
ورا ما طلع جدي من المستشفى وراحت درة وياه فتت للصالة مال البيت سمعت فيصل يحجي بالتليفون
جان مسيطر ويحاول يستفز جدي متعمد
سمعته يكول وتكوم تحرضها عليه حجي ؟ تفرعنها عليه نسيت أني من منو احميها !!
اي اي اضربها واطيح حظها وحتى احركها انت مالك علاقة هي طلعت من مسؤوليتك هسه هي ملكي تعرف شنو ملكي واذا زلت اني اعاقبها اي اعاقبها اربيها من جديد متسوي شي من وراااي
خليت ايدي على چتفه ودنجت عليه كتله فيصل جدي تعبان بلا هالحجي هذا هسه
باوعلي معصب ومااهتم لكلامي
وحجه اي جايك جاايك اني وماطلع من بيتك اذا مو هي وياي ...
سد السماعة مال التليفون وكام على حيله
كال حضر السيارة بسرعة
رحت وراها حاجيته برجاء كتله فيصل جدي
قاطعني من خله ايده بوجهي وكال بغضب مكتوم
مااسمع ولا كلمة منك
وصاح على عمار ....
رحنا احنا الثلاثة لبيت جدي عدنان ... طول الطريق افكر شراح يصير هناك
وصلنا دكينا الباب وطلعوا النا جدي وخالي حسن ووليد
الشر بعيون جدي ووليد وعمي حسن جان طباب خير بيناتنا ويحاول يهدي الامور
انتبهت على جدي شايل سلاح لزمت فيصل ابعده من كدام جدي بس هو مُصر يستفزه كان متهور لدرجه كبيره وناوي على شيء براسه ما اعرفه
ظلوا ناس تجر طول ناس تجر عرض ناس تهدي وناس تهوس
عمار ووليد اعداء الله يكببون بفيصل وجدي اني وخالي حسن من الخوش اوادم طبابيين خير ونهدي بيهم
جدي ايده ترجف وكال لفيصل ولك أنا گتلك يا ملعون اذا تجيس شعره منها انه چتالك
كال فيصل وتكوم تحرضها عليه تخليها تسوي شغلات من وراي ابو سلام هاي المرجيه منك تفرعنها عليه نسيت اني حاميها !
جدي بتهديد ؛- وتكوم تسكطها هيج ولك فيصل ولك انه انطيتك دررره ؟؟؟
كال فيصل باستفزاز متعمد اي اكتلها واسكطها تسكط محد يفك حلگه ويحجي
وبهاللحظة ثار جدي رفع السلاح بوجه فيصل وكبت العيطة لزموا جدي بس هو وينه راسه والف سيف الا يرمي فيصل
وفعلا انطلقت الرصاصة من السلاح وضربت فيصل بچتفه كل شي صار بلحظة وحدة
عااط بصووت عالي ولزم ايده مكان الرصاصة والدم ملئ ايده صارت ملابسه كلها حمرة
وكع بالكاع لازم ايده متألم وجدي تراجع بخطواته ولازمه وليد وحسن وجان كله يرجف وليد اخذ منه السلاح وعمار ظل يهد عليهم وعلى جدي ويصييح بعالي صووته تضرررب اخووويه تتتضرب فيصل
فيصل من بين المه وهو موجوع صااح عليه عمااار ....
أمرنا ناخذه للسيارة والتاف على جدي وكاله الي جيه ثانية تحضر الهه حجي....
ظليت اباوعله وماكدر بعد الومه اكثر بس بداخلي اتساءل ليش هيج سويت يافيصل ليش استفزيت جدي مو تدري بي هي نقطة ضعفه !!!
دخلوا جدي جوة واخذنه فيصل للسيارة وعمار بعده مستمر يعيط ويصيح على جدي الي دخل وهو منهك الانفاس ...
ظل عمار يصيح ويتهدد طلعله حسن يدفع بي
رووح عمار روووح ودي فيصل يسعفوونه إصابته بمكان خطر لا يخلص دمه
صاح عمار والله الا اسجنه
وفيصل صاح وهو بالسيارة انجب معليك كلمه مااسمع منكم تعااال ارررجع
كاله والله مو رجال اذا ماسجنته ...
طلعت شووكة من الباب تصييح كون زلمه سويها الا اكص مالاتك واخليهن بعلاكه الك حتى اسويك مره من صدك ولك ليش تتفشل عبنك ماتعرف تحجي جدي يسوواكم كلكم
عااط عمار امشي مابقت بس المسودنه عليه
هي هاي نسوانكم هااااي
وهجمت عليه بالنعال لزمها حسن من ايدها يريد يدخلها جوووه بس هي وين ركضت وراه للسيارة وهو يروح ويرجع يهد عليها وخالي حسن يطرد بي
اني لازم جرح فيصل واضغط عليه بقووة
واني مدري اضحك على شوكة مدري ابجي على فيصل مدري افكر بدرة وجدي ...
صعد عمار بالسيارة وانطلقت بينا ...
درة ...
بس سمعت صوت الرصاص انهاريت كل شي صار بدقايق وكعت عالكاع مااشوف كدامي ، بس يتخيلي فيصل مكتول ودمه يجري بقيت اهمس ياربي شنو صار كتله كتله كلوولي شنوو صاار
دخلو جدي بس مابيه اكوم يمي رنا وامل وبيبي مناك تدك وتلطم على راسها ... ورطتي جدج هسه يسجنونه الله ياخذج مانخلص منج
طبوا ورا دقايق عمو حسن وشوكة وياه يسحل بيها طبي طبي موو وكتج هسه
لزمت عمو حسن من رجله هو ترك شوكة وكنبص كبالي لزم وجهي درة بيج شي ؟ اوديج للمستشفى ؟
بلعت ريكي واصلا حلكي كله ناشف كوة حجيت كتله جدي مات فيصل ؟
جاوب لا يابه لا بس صوبه ارتاحي هسه ياخذوه للمستشفى ويسعفوه
جاوبته ببكاء وجدي هاا وجدي شلون خاف يشتكي عليه
طلع وليد لتخافين دره اني اعترف بداله المسدس عليه بصماتي هسه
شهكت رنا وركضت هناء تحاجي وليد واني رحت لغير عالم خليت ادية على راسي شنوو من عمر هذا خلصته ضيم بضيم ومو بس اني كل الي احبهم يتأذون من وراي والله تعبت
رحت يم جدي جان تعبان وجايبين اله المضمد مخليله كانيولا ونص نايم نص كاعد نفسه يصعد وينزل بشكل مو منتظم
بعدها مرت الساعات مثل موت بطيء كل دكة على الباب اكول اجت الشرطة وجابت خبره وكوومة افكار سودة سيطرت على عقلي
و بقيت اني بحيرة من امري ساعات واني كاعده وحسبه تجيبني وتوديني مات شنو الصار بي ياربي راح اضيع جدي من ايدي
انوب ابنه ببطني هم متعاون عليه ويايه كل شويه الم شكل بطني وظهري لو نزف لو تقيء ..
طلعت من الحمام لازمة بطني اجت منى كالت دك التليفون وخابر فيصل يريدج
ركضت اريد حل لجدي راح يضيع بسبي
اخذت السماعة رفعت السماعه بس كلت الو
اجاني صوته بس مبين متوجع
كال اني احبج وروح امي صارت وحده بوحده ونمسح كلشي شكلتي؟
كتله لا طبعا شتريد مني لخاطر الله ماكافي الصار والله متت حرام عليك كافي عاد حل عن حالي ماافيدك اني انت مامنك امان فيصل ما منك امان
نزلت دموعي بجيت بحركة
رد: جدج اخذ حقج يله حتى انتي ترجعين مثل الحبابه ويايه بدون صوت لأن تعادلنا لو تريدين جدج ينسجن ؟
كتله مااستغرب منك تسجنه وهو جان يضرب بته علمودك وحاسبك مثل ابنه بس انت ربات صفيه شنو اتوقع منك وشنو اكول بعد
كال بتهديد هاي مال ربات صفيه اني علمج عليها
طلعت خصلة من شعري وجريتها
كتله ازين روحي كرعه اذا ماخليتك ماتنام ليلك اذكرها زين
كال مااعوفج واذا ماتقبلين تردين اسجن حجي عدنان تعرفين اني مو هين هنا ومهنتي بالمنظمات الإنسانية تكلب الموضوع كله رأي عام وابوج معارض معدوم وجدج عنده سلاح ووو العائلة كلها تنكرف مو بس جدج
خفت گلبي صار طبل وسكتت بس اسمع اله
حجه سمعتي؟؟ جاي تسمعين انت ؟؟ درة تريدين تقضين على جدج وعائلتج كلها ؟ لو ترجعين ؟ ليش تبهذلي تالي عمره صعبه على شيباته ؟؟ مو حجي صحيح ؟
وبعدين انت ليش انانية وماتضحين على موده ! ترى هو هواي ضحى على مودج و هذا اقل شي تقدمي اله
ثانيا شكو هو رجال كتل مرته ماصايره كبل لو جديدة ومرته غلطانة وجذابة جذبت عليه واستغفلته واتفقت عليه هي وجدها
صفنت جدي اهم من روحي وهذا مريض خاف يعاند زايد ويأذيه
كال اطمأني ترجعين وكأن شي لم يكن تمام !
كتله ماشي يصير خير ...
من سديته منه محتارة ظليت شلون اقنع جدي ارجع اله ياربي جدي اكيد يرفض ومايقبل زين شون ارجع وطفلي ابطني خاف يرجع يكتله مرة ثانية ويفقدني امومتي هالمرة ، كل شي اتوقع منك يافيصل
رجعت دكيت الرقم وخابرته اكثر من مرة يدك محد يشيله
بقيت تعبانة حيل ورة ساعات يله رجعت خابرت
طلعلي هو كال الو
جاوبته انطيني فرصة كم يوم اقنع جدي حتى ارجع الك
رد ليش هيج قاسية انت ؟ يعني زوجج مضروب ومتصوب لا سمعت منج كلمة حمدلله ع السلامة ع الاقل
جاوبته انت صدك تحجي شووف نفسك شسوويت وتدور مني اهتمام
رد لا يابه مادور اهتمام بس انت حسي شوية اني احبج وروح امي
جاوبته اللّٰه يرحمها لا تتوقع مني شي فيصل بعد الي سويته بيه واني اذا ارجع الك ارجع علمود جدي خليها ابالك هاي
ضحك والله ياريت ترجعين بسرعة لا تطولين وانت تقنعين جدج رجعي قبل لا اطيب محتاجج
سكتت وكتله مع السلامة
انتظر اتصال منج حتى ادز الولد عليج يرجعوج خلال هالايام
رديت ان شاءالله....
سديت التليفون وامشي لغرفتي واسمع حجي الشماته من هناء من بيبي لو من عمو حامد سوى روحه حنين ويدور جدي
دخل للبيت بعد ما عبت راسه عمة هناء بالحجي
ظل يصيح ويينه ابووي و ينه والله اخليهم يتمرغلون بدم المچاتيل اذا أحد قرب عليك
شوكة فرت بيدها وكالت اي عود هو كفوو ابووصلعة
لزمتها هناء صلختها صواب على ظهرها وكالتلها ادبسز ابوج
وبيبي كالت بعد شنشووف ربي شنشوف من هالبلاوي من يوم دخلت لبيتنا هالبت واحنه مصيبة ورى الثانية اول مالفت مشت ابوها للكبر
باوعت عليها ع الاساس كلش ميتة على بابا انت الله يعلم شنو شاف منج نفس ما صفية سوت بفيصل ويمكن انت اتعس ... حجيت بقلبي مالي خلك احد بس مستعدة للهدوء ماقبل العاصفة ..
مرن يومين واني افكر بكلامه منين ماادير السالفه اشوفه فيصل يكدر يسجن جدي وتالي شيباته يتبهذل من ورا دره
كمت واتلمس بطني يارب احمي هالطفل من الوحوش كلها تريد تنهي حياته اذكرت احمد من حجالي بالمستشفى شون فيصل اتفق وي الممرضة تسقطلي الطفل
جان هسه طفلي راح خليت ايدي عليه اردد امانة الله ورسوله أمانة الله ورسوله وعندهم لاتضيع الامانات
مشيت بالبيت ادور على جدي ، فتحت الباب لكيته
كاعد بالحوش ويصفن اظن حاير بزمانه عليه
كعدت يمه وابتسمت بوجه كتله شونك عافيتي
ضحك وباس راسي انتي العافيه
كتله العافيه تفوت من عليك ودزلي ريح تبث العافيه واعيش ، اني وراك اموت
دمعت عيونه ودموعي وكعن كال هينه يابويه فيصل زين بس الله لايطي صفيه راضعه وياابليس ولاعبالك بتي
عدها خال يشبها يكولون يضحك على الوادم ويوميه مسجون اوووف الله كريم
كتله جدي اريد ارجع
باوعلي متعجب كال شلون جاانا صوبته حتى ماترجعين
كتله ادبته وهاهيه ابني لازم يم ابوه وهالطفل جلب ابطني رغم المصايب على الراسي ركع ركع
كال لابويه انسي رجعة ماكو اخاف عليج بنيتي
كتله على كيفك اخافن عليك هم هلجاي احسك تحس بالذنب لان ادري تحب فيصل وتموت عليه
كال مو اكثر منج ماكو شي بالدنيا بكدج يابعد هالعين ونظرها
كتله جدي ارجع دواه يمي واخاف عليك لايسووها سالفه علينا
كال لا تخافين شمالج مايكدر يسوي شي عبن هو يحبني وحاسبني ابوه واني طول عمري ارشده للصح ماقصرت وياه
كتله جدي لخاطري اني لازم ارجع لازم
هز راسه كال اظنج حبيتي؟
دنكت راسي
ضحك كال جاا اشبعي ضيم هذا عشك اسود ومصخم ...
يتبع ...
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!