تحميل رواية «طَوفانْ رَجُلْ» PDF
بقلم نورا ناصر
جارٍ تجهيز التحميل... برجاء الانتظار
سيظهر زر التحميل خلال 10 ثانية
جارٍ توليد الملف...
التحويل يتم بالكامل داخل متصفحك — لا يُرفع أي شيء للسيرفر.
اختر مجموعة الفصول للتحميل (كل ملف حتى 10 فصول)
عن الرواية
رجل كالطوفان يقتحم عالم امراة يقودها الكبرياء ويحركها كيد النساء ... هو يطارد الحسناوات كالذئب الجائع ويغرس بهن أظافر الاشتهاء .. بهذا التمرد وهذا التحدي كيف سوف يُكوّنان سطور هذه الحكاية ؟ قريباً ينزل المشهد ... رواية "طوفان رجل" بقلمي "نورا ناصر" تصميم الغلاف من ابداع عبير الحسناوي AbeerAL_Hussnawy...
رواية طَوفانْ رَجُلْ الفصل الحادي عشر 11 - بقلم نورا ناصر
السلام عليكم
رواية طوفان رجل
مشاهد مستقبلية
نورا ناصر *
*اي شيء تطارده في الحياة يهرب منك .
**اكثر شيء يثير رغبة الرجل هو ان لا تكوني سهلة .
من كتاب☝️ *لماذا يحب الرجل العاهرات*
********
لازم اطلع واشرد واخلص من جوره وظلمه
الظاهر ما تحضرت زين حتى اواجه قوته وغطرسته ..
اني ويمه مثل الي يصلي ومايكدر يكطع صلاته وكدامه حية سامة وينتظرها تلدغه بأي لحظة
اني ما اريد اصير مثل الي جانن وجبة سريعة بحياته
ظليت افكر بيني وبين نفسي بس مااريد اطلب مساعدة وليد ولا استعين بي رغم ادري بي يفديني بروحه
بس ما اريده يتأذى مثل اخر مره أذوه بسبي وهو يذب نفسه للتهلكه على مودي لذلك اريده بعيد كل البعد عن مخططي
فكرت وفكرت ووسوست الي نفسي استعين بشخص
اي هو ماكو غيره يخلصني
وسمعت مركزه صار مرموق وترقى
كل الكلام هذا سمعته من شوكة من اجت اخر مرة
وصيت يوسف يجيبلي الرقم بس بدون علم وليد.
اي والله مصطفى هو الي راح يخلصني منه هسه صار عقيد بالجيش وعنده سلطة
نص ساعه وحصله يوسف للرقم وجابه الي
بسرعة دكيت عليه جاوبني بس كلت الوو
كال الله لايجذبني انتِ مو ؟
كتله منو اني بالله ؟
ضحك كال دره ترى مااتوه عن هذا الصوت واميزه
من بين مليون صوت ..
تنهدت كتله محتاجتك بشغلة ضروري تكدر ؟
كال ابشري رب الاگدر
كتله بخيبة ورجاء اريد اطلع منا تدري اني وين هسه مو ؟
كال اكيد كل اخبارج توصلني اول بأول
كتله اني عندي مكان بس انت تكدر طلعني هسه بعد مااكدر اتأخر
كال ابشري ساعة واني يمج
تفاجئت جاوبته بصدمة هيج بسرعة زين والكاميرات
كال صدك جذب سهلة اعطلها حضري نفسج مستعدة مو ؟
همست مستعدة اي ...
ختمت المكالمة وياه وركضت احضر كل شي
واني دااخلي اغراضي بالجنطة وكفت عن الحركة مااعرف ليش حسيت نفسي خنته لو اطعنه خاصة بعد اخر موقف ودموعه الي ماوكفت ...
*********
واكفة كدام الشباك واباوع على الغربان السود شكلها جان مرعب والسما لونها رمادي ترعد ومخيفة
بالضبط مثل حياتي الي ماشفت نور بيها
احجي ويانفسي شجابني هنا وبيه صرخة بكد الكون تطلع كل الكبت والقهر والظلم الي مار عليه
اتذكرت جدي وايامه غمضت عيوني نزلت دموعي ضغطت على اسناني واحجي وينك جدي وينك جدي هم حاس بيه ؟ هم توصلك اخباري؟
لوانت ارتاحيت وعفتني من امنتني بيد الظلام ...
جنت تكول صيري مثل النسر من مايجرأ الغراب ينگره
الطريقة الوحيدة الي يكدر بيها على النسر
هي من يصعد على ظهره ويعضه من ركبته
النسر لايندار ولايشوفه بس يصعد للسما عالي حيل والغراب يدوخ ويوكع لان مامتعلم يطير فوك
فهمتي يادره لاتلتفين وراه ابد اصعدي بويه اصعدي ولا تلتفتين
اااااااااااااه ياجدي ااه
دك التليفون عبالك صحاني على وضعي الي اني بي لزمت جهة من راسي وكلت ااااااخ ...
جاوبت جان يوسف فاتح كاميرا وضحكته ردت عافيتي
كال شونج دره شنو هالجمال انتي ماتكبرين
دمعت عيوني
وغطيت صفحة شعري الواكعة
هو كال سهلة سهلة ماردت اعوفج وحدج ماعندي اغلى منج وجان مدمع
كتله لااني اريدك يم الجهال ما امن احد يمهم غيرك
صاح ادم ايهم تعالوا
اجا قبلهم كرم يركض اخذ الموبايل وشرد وهمه يركضون وراه
كتلهم عوفوا خلي يحجي
خله حلكه على الكاميرا ، حلكه احمر ، افيش يايمه كال ماما ادهم ضربني ومايخلوني وياهم بالغرفة
كتله ادهم لحد يحاجي كرم مااقبل اني تره
ادهم وادم كالوا مايحترم ويتعارك ويانا على البلي
اباوع على كرم يعيب بلسانه ويمده عليهم وخاتل ورا يوسف وهم يسووله بسيطة بعدها رجعوا للبلي يلعبون
يوسف كال لاتفكرين بيهم اني شغلتي حاجوز
كتله هم رحتوا للبيت الجبير ؟
كال لا بقينا هنا مسيطر عليهم اني
فيصل وين ؟
.....؟
حبايب اعرف مقصرة وياكم هاليومين لان انشغلت بس ان شاءالله من باجر يبلش النشر طبيعي...
جمال التصميم 🥺من ايادي ام عبدو اكيد ❤️
رواية طَوفانْ رَجُلْ الفصل الثاني عشر 12 - بقلم نورا ناصر
السلام عليكم ورحمة الله وبركاته
رواية طوفان رجل
الفصل الثامن
نورا ناصر
*في الحب يتحدث الرجل عن انتصاراته
وتتحدث المرأة عن هزائمها
فالرجل أجبن من أن يقول ؛ دمّرتني إمرأة
والمرأة أدهى من أن تقول دمرتُ رجلاً !
*دره *
فزيت مرعوبة وشهگت بقوووة تحركت بعشوائية ونسيت شوكة يمي جان توگع من الجرباية لان هي ام النفر واحد ...
وكعت بالكاع تباوعلي وتحك براسها
كالت وجع حتى وجع عبالي حامد طب علينا
غمتني ورجعت تمددت ونامت بالكاع بدون مخدة .. نايمة على بطنها ورجليها مصعدتهم ليفوك ومخلية اديها جوه راسها
* اذكرت الحلم جنت لابسه فستان وردي وفاتحه شعري وفرحانة وجنت اضحك من كل قلبي وامشي بطريق مفتوح الي على وسعه
وبعدين اجت غيمة سوده وگفت بس فوك راسي بالضبط ظلمت عليه طريقي وسدته
اباوع واشوفها بس عليه السوادة مالة هاي الغيمه ظلت ترعد قوي باوعت لرجليه حافيه
ظليت ادور بالحلم ومخبوصة وين الحذاء وين حذائي شوكت نزعته بلحظة تخربطت كل احوالي
باوعت للناس الي يمي عادية امورها بس اني ظليت اركض اريد انهزم من هاي الغيمة وين ماروح تروح ورايه و تظلم عليه كل طريقي
فجأة واشوف عمو فيصل گبالي ظل يصيح عليه
تعاي تعاي ويفتح اديه اليه ، بس اني مااقبل اتحرك من مكاني واروحله و يصيح ويصيح واني رافضة جان شكله مرعب فزيت من نومي حنجرتي يابسة
شربت مي بللت ريگي واستغفر وبعده الحلم لازك بمخيلتي عبالك شي صار وياي وحقيقي مو مجرد حلم
رحت طلعت من جنطتي فلوس حتى اطلعهن صدقة ( علمني جدي من اتحلم شي مو زين اطلع صدقة يكول الصدقه تدفع البلاء وتخفف الذنوب )
طلعت وخليتهن على صفحة ورحت غسلت وجهي تنفست شويه ورجعت شربت مي احس بعدني عطشانة
طلعت من البيت رحت لجدي للديوان
هو شافني كالي بترحيب وعيونه تلمع مثل كل مرة يشوفني :- هلا هلا بدرتي اجيتج للغرفة شفتج نايمه وشوكة يمج ما هان عليه اگعدج اكيد تعبانة اليوم
كتله جدي خطيه شوكة خاتله من عمو حامد
كال افااا ليش
كتله بضحكة تكول عاضته يم العيب
كال هاا وظل يضحك
ضحكت اني همين وكملت كلامي اي والله جدو ضاملها الكتلة لان فتنت على امها هذاك اليوم
رد جدي وشعجب حظى بيها عاد هي هم ماتنكدر
كتله جايلها غدر من ظهرها وهي كاعدة على التلفزيون تباوع حتى ماتشوفه تعرف هي لو شايفته مايكدر يلزمها وهي قوية مخلي راسها بين زروره واكع الها كفخات وهي عاضته
اني اسولف وجدي يستمع الي بانصات و يضحك وياي
كتله جدي خطية خاف يرجع يكتلها
كال شحده يجيسها وانه موجود لا تخافين ام گلب الطيب وامشي خل نطلع للهول و سويلنا جاي من ايدج الحلوة
كتله ماشي رحت سويت وصبيته خليته بالمطبخ
صحت لشوكه تشرب جاي ويانه وتاكل كعك هي تحب العصرونية
رحت صختها انوب ظلت تدردم عليه
ولج درو اني شبيه انام يمج مغسولة و اعظامي توجعني من وراج
قربت منها بستها بخدها كتلها قابل متقصدة شو انتي بس تردين تزاعليني
كالت لا لا بس من الوجع احجي عليج
كتلها ديله يله امشي شون جان من ايدي يخبل ينتظرج بس روحي للهول هسه اجيبه
ظلت تفرك بأديها ولج حامد وين ؟
ضحكت كتلها جدي يكول شحده يجيسج امشي مدام جدي هنا محد يتدنالج
راحت للهول واني اخذت صينية الجاي وخليت كعك ورحت وكعدت اصبلهم كلهم صبيتلي وكعدت اشرب يم جدي
اجا عمو حامد يمشي فاك رجليه لان هو سمين ورجليه مطبوكات من اللحم
جدي كال بويه حامد هاي ليش هيج تمشي شبيك
كله بتوتر وعصبية هاا بويه امشگ امشگ امشگ حيل
جدي كله هاا امشگ جا خليله دهن وازنين (فازلين) ويصير زين ليش مخلي روحك هيج
نطت شوكه كالت يابه انزع سروالك وخلي دهن والله اني من امشگ هيج اسوي ، انام وافتح رجليه على المبردة بسرعه تصير زين...
(هي من كل عقلها مشگ مافكرة من العضه مالتها ناسيتها)
باوعلها خزرها كاللها انتي بعدين حسابج صبريلي بسيطة
ردت انقذ الموقف كتله عمو ليش انت تلبس بس دشداشة سوده؟
باوعلي ودار وجهه ورد عليه كال تطلعني ابيض ومايبين بيها الوسخ لو اظل اسبوع بيها ما تبدلها هاي هيه نفسها
كتله ببراءة بالعكس عمو البيضه تطلعك عريس مو هذا جدي وعمو فيصل ولو تلبس البيضه تكوم النسوان تركض وراك ، انت اصغر من عمو فيصل
كال بغرور وعظمة ورافع چتافه لعد انت عبالج ماتركض ورايه النسوان هن هم يركضن انت ماتشوفيهن واني ما اعبرهن
شوكه كمزتني بصياحه تصيح بانفعال :- استغفر الله لاتكفرين لاتكفرين تره الله يكلبها بينه ولج ابوي نفس فيصل؟؟؟ يماااااااه استغفر الله
اريدها تسكت انفتحت بعد ماتنطفي ، كوه سديت حلكها وهو منا متحلف الها ظل يباوعلها ويخوزر وهي ولا تخاف
كتلها على كيفج غير عمو فيصل مرتاح وعمو حامد تعبان خطية
هو عاش الدور كال اي والله اي والله تعبان اني تعبان
جدي ظل يباوعلي و يضحك يعرفني اجاري عمي ....
كتله عمو شنو رايك اني وشوكه اليوم نسويك عريس
باوع عليه كال شلون بالله فيدينا بت الروسية
كتله نسوي اديك ورجليك ووجهك اخليله قناع والشعر بلحيتك ارتبها واشيله بالملقط
شو هذا كيف وجدي بس مبتسم
كتله بس شرط ماتحاجي شوكه
كال هذا هو اخذيها مني
كمنا اني وشوكة
طبت هناء يببوووه تريدينا يتزوج عليه بت الروسه مو صار ساعه اسنط عليكم....
اني وشوكه خفنا صرنا ورا عمو
هو ظل يحامينه كال معليجن بيها انتن بحمايتي
هناء كالت لعمو شوف دره لافت عليك تريد تزوجك ادري بيها حاقدة تريد تنتقم مني نست ايام الربيتها بيها وداريتها
ضحكت باستهزاء
جدي اشرلي احجي كتلها وليش مايتزوج حلو وعنده فلوس وانتي هاملته بله هو بشنو احسن من عمو فيصل
بس كلت هيج شوكه دمغتني على راسي طشرت المخ وخلت عقلي يضرب روحه بالجمجمة
عمو حامد كاللها وهو يغمز الها :- هنوة هناوي اليوم البنات يردن يرجعني عريس عليج
هي عود خجلت ودنكت شوكه شاورتني كالت والعباس والحسين والكاظم عينن بسيط شايفته من يرش القمح وهو فرحان وشون خشمه مفروش
كتلها كافي ولج امج هاي و خلي اليوم يعدي على خير علمودج راح اتحمل وسخ عمو حامد حتى انت لتنكتلين
كالت بعد قلبي بعد روحي تغنيها وتهز ركبه لوحدها ....
كلتله يله عمو خل نبدي وانت شوكة تعاي جيبي طاسات مي كبار
توجهت للحمام تمشي وتغني وتهز رقبه بعد گلبي بعد روحي هاا بعد گلبي بعد روحي هاا
كمت اضحك شوكه تالف كلمات واغاني بكيفها ...
خلينا الطاسات و كل وحده مخليه ايدها بطاسة
كتلها اكولج شوكه يله خل نجلف ايد عمو
اني ظليت اجلف وهي كامت مدري وين راحت باوعتلها راحت صوب المطبخ ، عفتها وانشغلت اجلف رجل عمو شويه واجت جايبه سيم مواعين
وجايه تريد تجلف ايد عمو
انصدمت كتلها شنو هاي شسوين بي هذا ؟
كالت لعد الوسخ مايطلع منه لان وسخ سنين صارله
خزرتها وعضيت شفتي كتلها ولج صيري ادمية مدام النفس عليج طيبة ضبي لسانج
شمرت السيمة بالمي وراحت جابت جلافة وكعدت تجلف ...
جدي يباوع للتلفزيون وعمو حامد هم عينه ع التلفزيون وميحجي ولا منتبه علينها شنسوي بي
جان طالع صدام حسين اللقاء مالته ويظل ساعتين وهنه تلث قنوات وكلهن نفس الوكت يطلع بيهن اللقاء يعني الواحد وين ينطي وجهه
ينجبر يشوفه لخد ماينسطر وينام
خلصنا الايدين والحمد لله من خلصناهن جبت مرطب ودهنتهم وكرضت اظافره
واني اكرضهن اذكرت اظافر عمو قيصر يااااااا
اني هم اظافري مطولتهم وابردهم بس اني ركزت لان اول مره اشوف ايد رجال حلوه ولونها وردي عبالك ايد طفل اي والله حلووه
انوب جبنا طشت جبير وخلينا رجل عمي ساعة السوده من حجيت بس خله رجله صار المي اسود
كلتلها لشوكة روحي بدلي المي
كالت ما انت روحي بدلي
تعاركنا ووحده ذبتها على الخ
ظل يصيح عمو علينا
كالت خل نسوي قاله باله برتقاله والتطلع بيها تبدل المي
كتلها لاتقشمرين روحج لان من نحسب واحد للعشرة نعرف منو الي يطلع
كالت حنطه بنطه شيل الجنطه جنطه خفيفه مثل الريشه بط ....
طلعت اني هزيت راسي وضغطت على اسناني متعصبة ...
رحت بدلته غصبا عليه ورجعت وهم ظلينا نفرك اشرتلي شوكه كافي واجت همست يم اذني ولج كافي طيح الله حظج ورطتينا هو فطر رجل ابوي ينام بي العگرب شكبره ...
كوة كتمت ضحكتي ورحنا جبنا خوليات ونشفنا رجلين عمو
ظهرنا انكسر وغلسنا على اللحيه ماعدلناها لان تعبنا ع الادبن والرجلين
شو هذا الله هداه كال تعبتن عاشت ايدكم وكل وحده اطاها فلوس وراح يم هنوته
ظلينا مصدومين اني وياها وحدة صافنة بوجه الثانية ، شعجب طلعت منه منه من الشيطان والله عجيبة
جدي كال لاتنصدمن من رحتن تجيبن الخاوليات
كتله تعبن خطيه اطيهم فلوس
كايله ماعندي وجدي منطي منه خطية
شوكه كالت اي ابو ي كو.....د وكلب ابن كلب ماتطلع
منه وعافتنا وراحت
جدي اشرلي اكعد يمه رحت يمه
كالي بويه شنو تغسلين رجل حامد هو لو يغزر بي مااضوج بس بعد كم يوم وتشوفين سوادينه كابات عليج لاتدنكين راسج لأحد سمعتي لو لا ؟؟
وكمل كلامه باجر عكبه من تزوجين اذا مو خوش ادمي عوفي لادنكين راس اله ومحد يستاهل والبشر ينسى ومايغزر بي
شوكه ذوله ابوها وامها ومن تصير صدك يصفون وياها وعدها اخو وخوات بويه انتي وحيده واني خاف اموت مااريد اشيل همج يابعد بيتي انتي
لزمت وجهه باثنين اديه وبست راسه
وكتله اسم الله عليك كون يومي كبل يومك لا تجيب طاري الموت جدي الله يخليك
ابتسم بوجهي وكلي خلي الحجي هذا ترجية باذنج
هزيت راسي و طلعت للمطبخ فعلا لكيت عمو حامد يبوس بشوكه ويشاقيها
ااااه
ماكو اصعب من تكون وحيد تحس ظهرك متعري ومحد يغطي والناس تستغلك وتستضعفك وحتى لو كنت قوي وكولشي عندك راح تظل مهزوز من الداخل ماكو الي يشاركك بهمومك واوجاعك
لحد يكول محد يفيد لا يفيد حتى لو القلوب متخالفة بس كدام الناس عنده اهل
والناس الها الظاهر وتظل تشك بالناس حتى اذا حبوك تحسهم عندهم غاية او مصلحة ………
جدي عزم بيت عمو فيصل كلهم على الغدا
ممتن منه على معروفه ويانه بالقبول
ذبحوا الذبايح قبل بيوم من العزيمة
كعدت صليت الفجر اجاني جدي
كالي بويه دره اذا خلصتي صلاة لا ترجعين تنامين روحي اوكفي ويه بيبيتج على الطبخ هي العزيمة كلها علمودج
واريدج منا وهيج كل الطبخ تعرفي وتتعلميله
ما اريدج باجر عكبه تحتاجين احد
ابتسمت وكتله ان شاءالله تدلل جدو هسه رايحة
ووكفت ويا بيبي بالمطبخ بس طيحت حظ حظي بالصخرة جيبي ذاك ودي هذا وين الملح وين البهار وين الجدر الجبير وين الجدر الوسطي ، حطي هذا الجدر شيلي ذااك
انوب اباوع عليها لافه االفوطه ليفوك لان حاره نطبخ على عين جبيره بريمز
وفاتحه خشمها والله صدك حيزبون تكوم وتكعد تحجي عليه وتنتقد بيه واني بالعه الساني وساكتة
الله بهاللحظة منطيني الصبر
واصلا هن يخبصنا من يطبخن هو اللحم وبصل وبهارات ونومي بصره ونخلي علي مي والتمن مايرادله شي ...
كل عزيمة يخبصن الدنيا ظهري انكسر رجليه وكعت متت بعد ماااكدر وهي الصخره تتعب اكثر من الطبخ
انوب اجا بسيط اللوكيه صارت كولش بعد جيبي وحطي وودي
وتجي شوكه بس تصيح عليهم يسكتون مدري شعجب
انوب دزوني للحوش على شغلة طلعت باوعتت للسما واكول الفرج ياصاحب الفرج جان يطب عمو فيصل يكول ياالله
جدي يكله تفضل تفضل
يممه اجوا اجوا واني كاتلني الوسخ وحتى وجهي مصخم من الفجر اشتغل وياالسعالوه وطيحن حظي عبالك واكعه بتنكة الدهن (قبل جان الطبخ كل بالدهن ماكو هلكد زيت )
شفت عمو فيصل سلم على جدي و مد ايده الي يريد يصافحني
اني تذكرت ايده النظيفة التلمع اخاف اوسخها حرامات
كتله بخجل عمو ايدي وسخة جنت بالمطبخ
ضحك ودنك باسني من راسي ....
سلمت عليهم كلهم ومرته جان وجهها مايكصه السيف كووة ردت عليه لو بيدها تذبحني بس هي نظراتها جانت كفيلة بذبحي
سلمت على رزان كالت فيصل مابايس بس راسج عمره مامسويها
ايناس راح تنجلط تخزر وتنفخ وتحتار شتسوي بس هي هم حقها رجلها والغيرة قاتلة بس تحبه وتغار عليه ليش تتزوجه هيج زواجه مؤقتة ...
سلموا الولد وفاتوا واخرهم احمد كال عوع هاي شنو انتي هيج من وسخه حلووة
كتله شكد حقير وجلب
كال والله لوما راضعة ويايه جان قاتلت حتى اخذج وظل يعيب عليه من كلت لعمو وسخة
ويقلد صوتي ويبدل صوته الرجولي بصوت انثوي
عمو وسخه عمو وسخه ثول حتى ثول اكو واحد يكول على روحه هو وسخ
كتله ولك وكعوا صبغي من الفجر شبيك انت شبيك كال ديله سوي طريق وفات جوه يمهم
طبيت صحت شوكه شوكه روحي قدمي المي
الهم
اجت شوكه شمسويه بروحها يبووه مخليه احمر هواي لخدودها وحمره على حلكها ومصخمه عيونها اي والله مو مكحلتها مصخمتها تصخم
شافها وليد وظل يصيح عليها خزرها وكاللها
روحي اغسلي وجههج شنو هاللعبان النفس هذا
كالتله شني اهووووو شعليك
خزرها مرة ثانية وباوعلي هو ومخنزر
درره اخذيها خلي تغسل مااريد نقطة مكياج بوجهه
اخذتها كتلها ليش هيج مخليه هواي مكياج على وجهج
كالت خليت نفس مرة فيصل
ظليت اضحك اخذتها تغسل وماتقبل كوة واهددها بوليد
كتلها ولج مايخليج حتى تدخلين تسلمين عليهم
كوة اقتنعت ...
رحت اني دخلت للحمام و سبحت جلفت نفسي جلف وطلعت
رحت يمهم وكملنا العزيمة والحمد لله تغدينا وكولشي تمام
بعدها كعدنا نشرب جاي عمار كال دره شنو راح تجيبين هدية لفيصل مو جابلج القبول يستاهل هدية ترة
كتله شنو اصلا هو المفروض يجيبلي لنجاحي هدية
ثانيا بله هو اوكع اله لان جاب القبول انت لاتغلس ورق ورق همزين ذكرتني
كال يبووه شحجاني اني هو انت ينكدرلج
عمو فيصل كال هديتها مني سيارة
كلها سكتت وشوكه عاطت يماااااااااه
عمو حامد صاح فيصل لاتطلع عينها انوب سيارة اكسر ظهرها وابطلها من الكلية واكعدها بالبيت ...
جدي صاح تكسر ظهر منو ولك
عمو فيصل كال حامد خلي دره تكول اي واريد اشوف شون تلزمها
عمو حامد ضحك بخوف ووجهه كلب الوان
اني كتله عمو فيصل تسلم ماقصرت قبولي احلى هدية مااريد سياره وثانيا اخلي خط احسن الي
فتح عيونه بتعجب
كتله والله عمو احسن
قلصت عيوني بتوسل اشارة لعمو فيصل حتى يفهمني بما معناه انو اني ماريد تصير مشكلة
سكتت باوعت لجدي حسيت الرضا بوجهه
بس وليد وجهه نار وصافن عليه ورجله تهتز
واني احس روحي عركانه من هذا الموقف احس روحي صايرة ابينهم
اجت شوكه من ورا ودمغتني على راسي كدامهم كلهم
كالت سيارة سيارة ياثوله
همه ظلوا يضحكون
احمد كال بس شوكه مفتهمه الدنيا صح سيارة ياثوله
وضحك
عمو فيصل باوعلي كال فكري دره
كتله تسلم تسلم اصلا كافي فضلك عليه
باووع بنظرة ماعرفت افسرها نظرة مليانه حجي بس مافهمت مضمونها وبقى يباوعلي
واشوف وليد يوزع نظراته علينا بانتباه وعصبية ....
حسيت جدي راد يشغله او راد يكطع صفته لا احد ينتبه سأله ماعندك سفر هالايام ؟
اكتفى بهز راسه بلا
وخاط الاستكانة .....
خلصت العزيمة وسلموا علينا وطلعوا وصلناهم للباب صعدوا بالسيارة وراحوا
اول مطبينا حجت بيبي الفكر جان كلتي اي ونحصل سيارة لو بس تعرفين تضحكين على جدج ومخلصه فلوسه
قوست شفايفي ورفعت اكتافي ومجاوبتها
انوب ظلوا كلهم يحجون عليه لان رفضت السيارة
حجايه من هناء وحجايه من حامد وشوكه
بس اني ولا عبالك سمعت منهم بس انتبهت على جدي صافن عليه
كتله ها جدو شبيك
ضحك كال رحمة صاروا اثنين نشوف وين راح تصفى ...
ماافتهمت كلامه غامض شنو اثنين وشنو يقصد ...
العصر غفيت شويه نعسانة كاعدة من الفجر ولمن كعدت لليل طلعت رحت لجدي لكيت ووليد يمه وجان عصبي كولش مبين جان بينهم نقاش حاد
بقيت واكفة اباوع ومتسائلة بنظراتي ، اني اخاف من يصير عصبي
هو بس شافني طلع من يم جدي وطبك الباب حيل
فزيت من الصوت
رحت لجدي سالته جدي شبي وليد معصب
كال علمود السيارة
كتله مو رفضتها سالفة السيارة الي ماتخلص
كال هي السيارة فرتننا فر
كتله ياا
كال السيارة ابد مو خاليه غيرت افكاري
كتله هاا
كال وليد راحت عليه السيارة
كتله بتفكير اكلك جدي وليد مو عنده سيارة شنو راحت عليه
كال لا وين عنده سيارة مبينه راحت عليه بس تردين الصدك سيارة فيصل احسن من سيارة وليد
كتله جدي دوختني بالسيارات
كال تصفا تصفا بس ياسيارة توديج اول يوم فيصل
لو وليد؟
كتله جدي لاهذا ولاهذا اروح وياعمو سلمان
كال وين جانت عني هاي السيارة بس شون اجيبها واضبطها يرادلها هواي تعديل وتعب الله كريم الله كريم
كال هيج وهو يضحك وصافن ويفر بالسبحه يباوع مرة ع التلفزيون ومرة يباوعلي ويحجي
وموضوع السيارة حديث البيت لمدة اسبوع حتى عمو حامد تندم كال لو ما اخذتها واخذها منج
وعمو فلاح يكولي تفيد للبيت سيارة واجت بلاش
اما شوكه تغم بيه ليل ونهار
بس الي دوخني وليد ليش مهتم لموضوع السيارة هو عنده سيارة ومكتفي بيها وهو مو من النوع الي عينه فارغة ابد بقى هالموضوع شاغل بالي
داومت بالكلية اول يوم وصلني عمو سلمان نزلت للكليه افر باذانتي مامفتهمه شي وين اروح وين اجي
كلت بسم الله ورحت سألت وين مرحلة اولى وكفت حالي حالهم ودخلنا قاعة وتعرفت على بنات ويايه صارت علاقة عادية واكثر شي تركيزي وياالاستاذ
ومن ارجع من الدوام بوجهي انام واكعد اقرا وماادري شنو بالبيت شيصير ميصير
بس يم جدي اكعد تالي الليل قبل لاينام واسولفله كولشي صار وياي وحتى مرات احسه مامركز وياي بس عنده المهم نهاية يومي وياه
وليد يشجعني وعمو حسن بين فترة وفترة يجون لغرفتي ونسولف ويسالوني عن دوامي وكلها تنطيني مصرف
جدي الصبح من اطلع يظل واكف بالباب لحد مااصعد بالخط ويمشي الخط يله يطب ويدعيلي ويوصي عليه
الكلية ضافت هوايه الي وزادتني اصرار وعزيمة والدنيا بعيني حلوه من عرفت امتيازاتها مباشرة يحقلي اقدم ماجستير و دكتوراه والاساتذه بدوا يعرفوني
اما الاناقة واللبس موضوع ثاني ، وليد ياخذني وين ما اريد ، وبرزت والثقة زادت ودرجاتي عالية والحمد لله
ومرت الايام واني ماكو اسعد مني ومااريد من ربي بس تستمر ايامي هيج
ذاك الوكت جانت كل كلية بيها مكتب او مقر حزب البعث والكل ينتمي اله خاصة جانت الكلية تابعه لديوان الرئاسة مو لوزارة التعليم العالي
حتى اساتذة من الخارج يجون ينطونا محاضرات
ممثل الحزبي لمرحلتنا لزك راد مجال وكم مره يكلي دقائق احجي وياج واني اظل اتعذر واكوله العفو مااكدر واعوفه
وغيرها وغيرها من الشباب اصلا ماارفع عيني واشوف شنو شكلهم مخليه جدي بين عيوني بحالي كولش
وحتى البنات من يصير حديثهم على الشباب وفلانه تحب فلان اني بس اهز راسي
كل هذا مو ابالي بس هدف واحد ابالي النجاح واعوض جدي واخلي يفتخر بيه اريد يكول تعبي ماضاع وياج
مرة من المرات كاعدة ويا البنات بالشمس بالشتا والمح عادل بكليتنا
كلت بقلبي هذا شجابه هنا خل افلت قبل لايشوفني
حاولت اكوم واضيع نفسي بين الطلبة
اشو هذا يسال واشروله عليه
واجه باتجاهي مالحكت حتى اشرد
سلم وسال عن احوالي
كتله شعجب اليوم بكليتنا
كال وبؤبؤ عيونه مووثابتة : ها عندي شغله خلصتها واجيت اشوفج
كتله تسلم
كال محتاجه شي كولي اني موجود
كتله لاشكرا من احتاج ان شاء الله اجيكم
ردته بس يروح اخلص منه ، راح واني داارجع لمكاني شفت ممثل الحزب الي صارحني يباوع بنظرات توعد خفت منه
كولش ضجت كوه طلع ورجعت للبنات وظلن يحققن وياي ... ويسألن هذا منو وشنو
كتلهم ابن عمي ومخلص قانون وعنده شغلة هنا
استمرن باستهزائهن وتلميحاتهن وشقاهن الماصخ الي كوه بلعته
شدعي عليك عادل اني عايزه مغثه عوفوني بحالي مراح اخلص ..
رجعت للبيت سولفت لجدي من شافني ضايجه
كال بويه عادي وشنو يعني ماتصير واذا مر عليج
كتله مو تعرف ذوله التافهين مااطيهم مجال يستغلون الفرصه وتعرف الي ميلوح العنب
طب وليد كال خوش ست دره الشباب وعادل شنو هالحجي
كتله عادل روح حاجي ليش اجا اني دازه عليه لو ابلعه اصلا والشباب عادي مامطيه مجال لاي احد وانت تعرف الكليه شنو
كال وين جانت النا الكلية اوووووف طلع وطبك الباب حييل
واني هم حيل ضجت وتنرفزت كولش ورجعت حضرت ملابسي ونمت ...
بعدها جيته عادل اثرت عليه وطلع حجي على انو اني عندي واحد ومااباوع على احد غيره ....
وداومت بعدها فد يوم مثل اي يوم مر عادي لحد ثالث محاضرة اجوو ثلاثة من الامن صاحوا اسمي كالوا تفضلي ويانه
اني متت من الخوف كمت الم بالكتب وارجف
وهذول حاوطوني من كل الجهات
رفعت راسي اباوعله بتوسل عفية شنو
كال بنتر امشي ويانا هسه تعرفين
طلعوني كوة واني خطوات ثگيلة وارجف اتمنى مااوصل للمكان الي راح يودوني اله
جسمي كله يهتز من ساسي لراسي
كل الي في بالي على موضوع بابا ظليت ارجف واردد ( امن يجيب المضطر اذا دعاه ويكشف السوء )كلساع اعيدها
قلبي يريد يطلع من ضلوعي من الخوف ، واحد منهم تقرب لزم ايدي وخرت ايده بسرعة
خله ايده على ظهري ودخلوني لمقر الحزب الخاص بالكلية
همه تلاثه الي اخذوتي ولكيت بالمكتب اثنين واني ارجف مثل السعفة
هسه يللله عرفت شنو معنى الخوف ، صدك جنت مااعرفه على الرغم من عمو حامد شكد اذاني
بس ماخفت لان اعرف شنو واعرف ارده بس هذول معروفين شيسوون
ظليت اباوع بوجوهم الشيطانية الحقيرة ونظرتهم وسخة بمعنى الكلمة
سألوني عن اسمي
جاوبت واني ارجف دره سلام عدنان ال…..
كال هااا باوعت عليه جان واحد جبير بالعمر يعني عمره بالخمسينات
وضخم وطويل
كال جدج شيخ عشيرة معروف
هزيت راسي بأي
كال اي دره شنو نشاطج هنا
رفعت راسي استاذ اني طالبة جاي ادرس
صاح بغضب شيطاني جاي اكووول شنو نشاطج
ا نرعبت حسيت نفسي بقمة ضياعي ، انحدرت دموعي على خدي
حجيت واني اشهگ والله مااعرف على شنو تحجي استاذ والله مااعرف
الخوف تملكني واحس شفتي رجفت ويابسة وكل شويه ابللها بلساني وترجع تنشف احس هاي لحظات وينكطع نفسي من الخوف
واحد من الواكفين اجا يمي كاله سيدي لونوديها للامن العامة وهناك يعرفون شغلهم وياها وهم احنه ناخذ راحتنا بالتحقيق
اني صعد الدم لراسي وماظل بجسمي قطرة دم ....
يتبع ...
ممكن اذا عجبتكم الحلقة تصويت 😊
رواية طَوفانْ رَجُلْ الفصل الثالث عشر 13 - بقلم نورا ناصر
السلام عليكم ورحمة الله وبركاته
رواية طوفان رجل
الفصل التاسع
نورا ناصر
*****
أريد الجلوس مع شخص مختل عقليًا، أتحدث بكل ما بداخلي فيستمر بالضحك حتى يشعرني بسخف الأشياء التي أرهقتني طيلة هذه الأيام •
*****
بس سمعته هيج حچه ظليت اباوعلهم واحد واحد بخوف وترقب ، وصار كل الكون اضيق من قبري عليه ...
غصة توسدت ببلعومي وسنوني تطكطك ، ذبلت رجليه وصارت كوة تحملني ، بهتت روحي من الخوف يمكن الي يذبحني ما يلگى بيه قطرة دم .
صاح الرجل الخمسيني بكل تعجرف واجرام احچيييي شنووو نشاطچ هنااااا
بس اريد افتح حلگي احچي مايسمحلي استمر يحقق ويايه بدون ماينطيني فرصة
جان واحد منهم قريب مني مد ايده على شعري مديت ايدي وخرته مني بنتر
خزرني بقووة وضربني راجدي حيييل وبقسووة طير صفحة من وجهي
الراشدي جان قريب على حلكي بحيث شفتي طخت باسناني ونزفت
صار طعم حلگي كله دم
شهگت وظليت اتوسل وبقلبي اناجي
ربي يارب ساعدني اني يتيمة امانتك اني ياربي خلصني من الي اني بي
الدنيا بعيني صارت شكدوتها حسيت نهايتي قربت ومو بعيدة حتى عفتي تنتهك على ايد وحوش ظلام ومتغطرسين
صاح عليه بت النعال صايرة شريفة براسي مو هسه اش..ج بالنص ....
خليت ايدي على حلگي اشهك ...
اخذني ودفعني على الكرسي ... وقيدني باديه مخليهم على اطراف الكرسي ويسأل بيه
احجي منو هم جماعتج ومنو مشترك وياج
نشغت بقووة عيوني غوشت حسيت دم ينزل من خشمي واتمتم والله لو عندي شي اعترف بس والله ماعندي شي والله
كال بتوعد ووحشية والتقرير الي اجا بيج ؟
هزيت راسي بلعت ريگي صار طعم الدم ببلعومي
اتنفس كوة عبالك اشهگ من الجحيم ...
دمغني على راسي الي واكف يمي وصاح بجبروت وتهديد
احچييييي لچ ...
صاح الرجل الخمسيني خيررري
جاوبه خيري الي واگف على راسي نعم سيدي
رد عليه بنبرة كلها غطرسة وتوعد :-حضر السيارت دناخذها للمقر مبينه راح تتعبنا هنا
اني گلبي وصل لنجرتي وانربط لساني ، برودة دبت بأطرافي
صرت مثل ميت بيد مغسل لا حول ولا قوة شبيدي على روحي ، ربي وكلت الك امري انقذني من هذول الوحوش الي محاوطيني !
اجى خيري وذاك جان يحجي بالتليفون الارضي الي يمه ع المكتب واني حتى صوتهم مايوصلني احس حتى اذني انت انعزلت عن الكون كله صفيت بس ويه خوفي وقلقي
قبل ماكو تلفزيون او راديو او اي شي نكدر نشوف من خلاله الجرائم والتعذيب الي تصير بغياهب السجون
بس جنا نسمع سمع عنها سجن ابو غريب نكرة السلمان والامن العامة ....
وجنا نسمع انو فلان عائلة اخذوهه هي ونسوانها واطفالها وفلانه انعدمت وفلان تغييب بالسجن وانقطعت اخباره وممنوع يسألون عنه
وسمعنه عن التعذيب والاغتصاب والتغييب بس ماجنا نشوف وهاي الاقاويل جانت تتداول بسرية بين الناس
جدي دائما يگول الحيطان الها اذان ديروا بالكم تحجون باي شي ضد السلطة والنظام
وجان يقصد بالاذان المخبريين السريين المدسوسين بين الشعب
وهم جانوا من الاقارب مو بعيدين واستغلوا هالشي لصالحهم بحيث اي شخص عند عداوة حتى لو ويه اخوه يكتب بي تقرير ويودي ورا الشمس ناس بلا ضمير
لشويه صارت هوسه وانفتحت الباب دخلوا اثنين ملثمين ولابسين اسود بأسود وبس عيونهم طالعة وعدهم اسلحة ...
ضخام طوال طولهم فارع ومرعب وهيئتهم مخيفة
عرفتهم هم شنو ! شايفتهم بالتلفزيون يسموهم فدائيو صدام معروفين بالقسوة والبطش
حسب ما چنا نمسع عنهم وهم اطفال ياخذوهم من الملجأ ويربوهم على القسوة وكانوا مايهابون الموت وشغلهم بس يطيعون الاوامر بلا تفكير ناس منزوع منهم الاحساس والضمير مثل الروبوتات
اني هنا خلص استسلمت وايقنت انو ساعة الموت قريبة اذا ماا اموت على اديهم راح اموت من الخوف
جنت بذاك الكرسي المشؤوم مثل محكوم ينتظر يعدموه ومخلين راسه تحت مقصلة الاعدام ..
المقصلة الي جانوا يستخدموها بالقرون الوسطى والي تفصل الراس عن الجسد .....
من شفت الفدائيين كلت هاي هيه بعد استنفذت اخر ذرة رعب بيه جانت ناقصة واكتملت بدخولهم
ووره ماشفت هذول الاثنين دخلوا للغرفة
انفرجوا كل واحد بصفحة واديهم على اسلحتهم دومهم بوضع الاستعداد
وجان يدخل هو
دخل مثل الطوفان العظيم الي يكتسح وياه كل شي بطريقه ...
دخل من بينهم وجان مايقل عنهم ضخامة وهيبة وهيئة مرعبة ويه الاثنين الي فاتوا جان بعد اكو اربعة وياه من الفدائيين
دخل ورج الغرفة رج بصوووته " هااااي لييش جايبينهااا هنااا شمسوووين بيها شعدكم وووياها ""
اني شفته ورجعتلي قوتي فجأة مثل الارض اليابسة الميتة ويحيها الماي واني هذا الطوفان حياني
يارحمتك ياربي كمت ركضت عليه وحضنته من الخوف صحت عمو الحگني
التصقت بي من الفرحة والخوف لحد ما حسبت دكم سترته اخترقن جسمي
هو وخرني من حضنه واديه على وجهي ويباوعلي بتفحص وعيونه تنتقل بوجهي بتركيز وتلمع بغضب وصدمة
وهو يباوع ع الدم الي مالي حلكي وخشمي ونازل حتى على رگبتي وقميصي الابيض
كال بغضب منو سوى بيج هيج
التافيت ادور بعيوني على خيري واشوفهم كلهم واكفين باحترام وعبالك بوضع الاستعداد
اشرت على خيري بصمت لحظات وبعدها لساني ماسكت كتله عمو هذا لزم شعري وضربني راشدي وغلط عليه
عافني و سندني ع الحايط وراح على خيري ضربه بوكس ووكعه بالكاع
كال هذا اريده يكول ان الله حق اريد اتادبوا عدل مفهووووم
خيري بتوسل كاله سيدي والله مااعرفها اني انفذ الاوام
بعده ممكمل
دفره برجله وسحبه من الگاع
واجه عليه يسحل بيه وصله يمي و لازمه من ملابسه وخلاه مقابيلي
كلي اضربي ...
اني باوعتله بخوف وتردد واهز راسي وابجي مرعوبة
صاح بعصبية اضربي گتلج
كمت شبعت ضربات باديه وادفر برجله
وبصقت عليه واغلط عليه نذل حيوان ماعندك رجووله لك ممسويه شي ممسووويه
بعدها لزمني يووگفني لان فقدت اعصابي وانهاريت
ودفر خيري وكله اطلع بررره حيوووان اطلع
وهو هم لازم بطنه وطلع من المكتب بسرعة والجمع الغفير الي واگفين على الباب سووله مجال يطلع ورجعوا التموا
عمو فيصل راح للرجال الخمسيني الي جان واكف بوضع الاستعداد ورا مكتبه والملثمين الاثنين منهم يتبعوا وين ميحرك رجله وياه وكأنه يحمونه ....
كاله شكو وبصوت عالي رجهم رج ...
الرجال هذا جان لابس زيتوني بس بدون رتبة
كاله اجا تقرير من طالب وياها يثبت انو عندها ميول ايراني ومن بحثنا عنها تاكدنا من اسمها طلع ابوها معدوم وكلنا اكيد وراها شي مو خالية
كال بنبرة أمر صارمة ... جيبوا الطالب أريده ..
جابوا الطالب وطلع نفسه الي مانطيته مجال نفسه هو ممثل الحزب كاتب تقرير بيه الله لاينطي الصحة والعافية
لمن طببوه كمت اصيح بووجهه وارجف من فوك لحدجوه مثل سعفة طاكهه الهوا وافرك باديه
وولك ليش تأذيني لييش لان شريفة ومانطيتك مجال هيج تسوي حقير نذل
عمو فيصل ضربه ضربه وسحلوا وهذا مدير المكتب اعتذر لعمو فيصل
وطلعنا وراه الفدائيين يمشون ومجتفين الطالب والضابط الي ضربني جنهم فيران لازميهم
والطلاب تباوع عليه وهو مخلي ايده على جتفي ونمشي ...
شاف العميد تشكر منه الظاهر هو الي مبلغه
تنفست بقوووة وشهكت عبالي مراح اطلع عمري كله ماامصدگة ابد هاي طلعتي وداامشي ويمي عمو فيصل
طلعنا صعدت ويا بالسيارة ظل ينطيني كلينكس وبطل مي غسلت وجهي وشربت
واني ابجي هو يسكت بيه خله ايده على راسي يمسح بي بحنان ويطل بوجهي :- كال اخذ حقج مربع اني غلطان ماخليت واحد يتابع اخبارج هنا احسبيها عليه
فوكاها يعتذر مني ويحرك حرك بالجكاير
انوب ذوله الي وياه يخوفون بس عيونهم طالعة وحتى مايحجون شي ساكتين
رجعني لبيتنا نزلت من السيارة
كال اسلمج بيد جدج
دگ الباب طلع جدي باوع لعمو فيصل وانه وراه جنت طلعت باوعتله وصحت جدي
ظل محتار شيسووي كوة وگف على حيله
بصوت مخنوگ گال بوويه دره شبيههه وظل يباوع على عمو ويسأل بي فييصل شبيهااا
لزمه عموو فيصل واني رحت حضنته حرف مگادرة انطق من شفته هيج منهار مايهون عليه اخلي ينقهر
بسببي
كعدنا بالديوان وسولف لجدي كلشي وظل يطمأنه
لتخاف عليها سالفة بسيطة وعدت والي تجرء وسوا بيها هيج راح ياخذ اكثر من عقابه ويظل يتوسل حتى نرحمه
وانس هم سولفت اله وهو تخربط وضغطه ارتفع
طمنه عمو فيصل وكاله بعد الي سويته محد يتجرا يتقرب منها كلها عرفت هي تخصني ياويله الي يفكر بعد يوصل يمها دره بحمايتي ...
جاوبه جدي :- فيصل تحجي صدك انت موو وصيت عليها العميد ليش هيج بوويه صار وياها انت مو تدري معزتها عندي هيج يسوون بيها هيج
كتله جدي اهدا عموو فيصل وصل بالوقت المناسب فدوة لخاطري اهدأ والله تعبانة
اخذ راسي ويبوس بي ، عمو فيصل كاله اوديك للمستشفى ، بس هو رفض
بعد الي صار وكعت مريضة ، يومين اني الصخونة ملازمتني ومافكتني والرجفه الي بجسمي ماعافتني
كوابيس واحلام مسيطرة على نومتي حتى صرت اخاف انام
اخذني جدي للطبيب وكتبلي ابر وعلاج شويه تحسنت بس حقارة الموقف والرهبة والخوف اذتني بشكل لحد الضياع والانهيار ...
شنو يعني شخص حقير ووضيع يحطم انسان بس لان ماشي عادل ومحافظ على روحه
شنو انسان بسبب حقده ومرضه النفسي وعقده يضيع بشر وشكد ناس راحت بظلم هيج نماذج وتاذت بلاذنب مو بس هم همه وعوائلهم سوى والله يعلم اشافوا بعد اني بس هذا الي شفته جنت محاطة بوحوش بشرية غيري الله يعلم وين وصل بيهم الحال
اني عمو فيصل نقذني غيري شلون يارب شنو هالظلم ، جان طول هاي المده التفكير مسيطر عليه
اسمع صوتهم يمي جدي يسولف لعمو حسن واثنينهم يسهرون عليه كمادات دافية يخلولي ويغسلولي
وحتى جدي يسبحني و اسمعه يم اني يكول دره بنيتي يا بعد جدج عينيني حتى ابدلج يابعد حيلي روحي بادت مابيه والله اثاري عافيتي بيج
ويشهك بالبجي
كل هاي الصخونه الي بيه واني لازمه ايده من يعوف ايدي اظل اصرخ اخاف ابقى وحدي الموقف مسيطر عليه
بعدها فرشلنا بالكاع حتى اظل لازمه ايده ووليد وياهم يكعدوني شويه ويعلكون المغذي
صحيت شويه وسمعت جدي يسولف لعمو حسن يكوله فيصل يخابر يسال عليها يوميه ويعتذر مني فوك الضيم هو منو صاحب فضل على الثاني تلاحك البنيه جان ضاعت مني ....
وعمو حسن يطمنه يكله احمد ربك وشكره وصل بالوقت المناسب جان راحت بيد الي مايرحمون الله يحبك يابه رجعها لحضنك يدري بيك شكد تحبها
جدي جاوبه والله لو صاير بيها شي انه امووت بس يابويه ياحسن اذا متت انه شگول لسلام ماحافظت على امانتك
عمو حسن كاله الحمدلله ماصار بيها شي انت هم ارحم بروحك مايصير تظل تلكل بنفسك
بويه حسن انه غلطت من دللتها كلي لو مامداومة بهاي اللطمة
يابه شي مكتوب وصار والله قدر ولطف لاتظل تلوم بروحك دره محتاجتك وكوم نام شويه اني راح ابقى كاعد علمود اراقبها وخاف تحتاج شي
رد جدي بحزن :- والله ماتغمضلي عين انت روح وراك دوام خلني انه يمها
ظلوا يتناوبون عليه اثنينهم خطية مقصروا راح عمو حسن وكلما اكعد وافز اسمع جدي الليل كله يقرا ايات قرآنية يم راسي
شويه صرت احسن بعد اسبوع كامل مر عليه واني بهاي الحالة و حتى بهاي ماكو مره يمي تساعدني ابد
لمن اجا جدي وكعد يمي يسال عن احوالي
كتله جدي اني بطلت من الدوام بعد مااريده
بس جدي ماقبل وظل يحجي عليه
انه ربيتج قويه هيج تنهزمين بسرعه والحمد لله عدت سلامات والله حفظج يتيمة والله باوع لحالچ
كتله جدي منو يدري بلي صارلي ؟
كال بس عمج حسن حتى وليد مايعرف يدري بيج بس مريضة
هزيت راسي كال كومي اسبحي كلت لشوكه تسويلج شوربة
جان هو محضرلي ملابسي اخذتهن و كمت اريد اروح للحمام اسبح ..
كال خاف ماتكدرين اجي وياج اعينج ؟؟
كمت اضحك خجلانه
كال هااا ولج تستحين تره مرتين سبحتج وحسن ويايه ...
كتله عزا جدي لاااتكولهاااا
ضحك كال هااا اظنج نسيتي منو جان يجلفج وانت صغيرة
ابتسمت وكتله انسى كولشي وماانساك انته
ضحك وكال عمج فيصل يسال عليج تره دكي عليه وتشكري منه يستاهل ...
هزيت راسي ان شاءالله بس اطلع من الحمام
سبحت وكملت جان الوكت بالتسعه بالليل طلعت بالهول شافتني بيبي كالت صلوووات صرتي زينة المسعدة مخليه جدج عايف العالم والفصول ومحتار بيج
تحجي وتصفك باديها ...
اني منهارة محد يرحم بحالي وهي ماتمل ماترتاح اذا ماتقهرني ... تريد اي حجة تأذيني وتجرحني بكلامها وافعالها حتى واني مريضة ماترحمني عبالها اجذب او اتصنع ابد ماتعطف عليه ولا عبالك بنت ابنها الشهيد ومن دمها ولحمها
كتلها بعصبية اني لخاطر جدي ساكتة عنج الله لايشوفچ شري تعبت منكم تعبت محد يحس بيه
اني كتلها هيج وهي كامت تصيح تعالوا تعااالووو شوفوا لسانها شطوله هاي المريضة هاي الفقيرة تكول عليها ومكابلها وكاعد ولك هاي شيطان شيييطااان
هزيت ايدي عفتها تحجي وتدردم لوحدها
ولا همه صدگوها عبالهم تدور مشكلة ويايه بعد هالايام الجنت مريضة بيها الظاهر حنت للمشاكل متعرف تسكت
رحت للهول كعدت ولافه الخاولي على راسي
اجت شوكه بيدها الصينية خلتها مقابيلي بيها الشوربه اكلتها كلها احس ميتة جوع وهم وقهر ....
ايام وليالي بس گضيتها على المغذي
شوكة كالت يبوووه واخيرا كمتي من المرض يارحمة الله الواسعة ولج موتوني جيب وودي
وودي جيب
ولج لاخلوني اشوف فلم لا خلوني اشوف مسلسل كوومي كوومي خلي اني اخذ استراحة
تدرين دره اني اتمنى اتمرض حتى انام ومحد يضخرني اصلا ادعي على روحي بالمرض
ضحكت كتلها اكو مخبل يدعي على رووحه بالمرض كعدي وسكتي لج الصحة نعمة محد يحس بيها بس الي فاقدها
كالت اي صحتي ماريدها متنازلة عنها لحيزبون ولبسيط
ضحكت كتلها جيبي جاي حبابة والله مشتهية جاي والله من ايدج الطيبة ...
كالت يله بالله هسه اسولفلها عالصخرة انوب تكول جيبي جاي أأشر على الگمر والمطي يباوع لاصبعي ...
كرصتها من خدها واني اضحك كتلها متقصرين حبابة گوومي
كالت بتذمر اووو اني اشتغل عند ابوج
وكامت جابت جاي واجت
خلته يمي و كالت يكولون على تلفزيون الشباب اليوم فلم يخبل هاي المذيعة شروق اويلي شكد حلوه تكول فلم اخذ هواي جوائز
كتلها جيبي بطانيه ومخده خل نتغطى ونباوع عليه احس اليوم رجعتلي عافيتي جنت مغيبة عن العالم كله اريد ارجع لحياتي وانسى الي فات والي صار وتنذكر وماتنعاد عليه ان شاءالله يارب
هي خطية راحت جابت بطانية ....
وبدا الفلم جان اسمه( تايتنك ) ظلمت الهول علينا صار ظلمة نزلت البردات حتى نشوف بس ضوه التلفزيون
هو الفلم جانت المجلات كلها تكتب عليه بذاك الوقت وهو فعلا عظيم ورهيب ...
كالت الله شحلاته هذا الولد اخضر وعيونه شگر
اني غصيت من الضحك
وهي كملت كلامها لو ازوج مثله اوويلي اله مااخلي يعتب باب الغرفة اضمه بس الي حتى من اهله هم اضمه
كتلها باله هو هذا الي بجماله هم يباوعلج
كالت العوبه انتي لاترحمين ولاتخلين رحمه الله تنزل اني اجذب على روحي انتي سديها بوجهي فد نوب انتي حتى الحلم تكطعي عليه ليش وياي هيج
كتلها حقج والله اصلا اهم شي الاخلاق اصلا ياريت عندي راحة بالج
كالت بعد ماتفتحين حلكج سدي سدي خلي اتمعن بجاك ابو عين الشگرة
هزيت راسي وكتمت ضحكة ، اباوع عليها فاقدة مرات احسدها ماتفكر ولاتحسب لأي شي عايشة
حياتها كل يوم بيومه
ولاشي يقهرها ولاتزعل ، الفكر والتحليل ماعدها هيج انسان مايتاذى صحيح احنا ننقهر عليها ونحبها ونعطف عليها ونشفق بس احنه نفسيا تعبانين من التفكير والعقول المشغولة حتى واحنا ساكتين
اصلا النعمة الحقيقية هي راحة البال ... واني ماعرف شراح يصيرلي بباقي ايامي ..
واحنا كاعدين اجا عمو حسن سلم ولزمني صاح شلونج درتنا جنج بخير
وكرصني من رصعة حنجي
كالت شوكة وهي مندمجة دخيلك اخذها واطلعوا خلوني اباوع لا تدوخوني
تحجي وعينها على التلفزيون
كام يضحك عمو حسن صف يمي وتغطا اخذ راسي خلاه على جتفه ويبوس بي ويلعب بشعري
اندارت شوكة عليه كالتله صدك جذب بوسني اني هم جا اني حتى من بوس اهلي محرومة لابوس رجال ولا بوس اهل
جفصت كمت سديت حلكها ضحكنا لا بعد تجفص اكثر ...
عمو حسن كلها تعاي ابوسج ولا يهمج
كالتله ابد ولا اريد خو الا اكلك كون انت من ذاتك
هجمنا اني وعمو حسن لزمنا راسها وباسه بالكوه واني هم ابوس بيها وندغدغها ونضحكها
صاحت بينا وظلت تدافر واحنا عفناها وسكتنا صدك مو مال هوسة ، ظهر و الناس نايمة
عمو حسن صغير بالعمر اكبر من وليد بست سنين وعلاقتهم حلوه هو ووليد بس عمو حسن حياته كلها يقرا وعبارة عن كتب لذلك دائما منعزل لوحده
ودائما من صف المدافعين عني دفاع مستميت حتى يعارك عمو حامد على مودي
جدي كولش يفتخر بي ، بس هو هادئ ومنعزل بحاله مااحسه عايش ويانه نادرا مااشوفه يكعد ويانا بكعداتنا
رجعنا نباوع للفلم طب وليد سلم عجبته الكعدة سالني شلونج شون صرتي بالي كله يمج جنت بس تهذين
كتله الحمد لله لاا لتهتم ولا تدير بال شويه تعب
صاحت شوكه كمزتنا ياطلابة الماتخلص خل نباوع سكتوا
هم جذبهم الفلم واندمجوا وهو صدك حلووو واكثر من رائع وكدر يطلعني من الجو الجنت بي
راحوا همه كالت شوكه شون نام بعد هذا الحب ياربي اي واحد اشمره من يمك اي واحد وبسرعة اني عود ارتبه
ضحكت ورحت لغرفتي تمددت ونمت كعدت ثاني عادي صادف جمعة دورت على جدي لكيته بالبستان
من شافني صاحني راحت يمه كال شونج بويه اليوم ماصرتي احسن ؟
هزيت راسي الحمد لله احسن انت شلونك عفية لاتشغل بالك اني زينة
كال اذا ماانشغل بيمن انشغل يابويه وطفرت دمعة من عينه كال يصعب عليه اشوفج بهالحال شوون بيه وين اضمج
حضنت راسه وبسته وهو اخذ اديه يشم بيهم ويبوسهم
كال دره بويه عيب خابري على فيصل الصبح خابر يسال عليج كتله نايمة ترة باله يمج خابري
كتله ماشي راح اخابره جدي
كال انه رايح للديوان وجيبي التليفون اهناك
كتله ان شاءالله تدلل
رحت جبته هو ووايراته يضوج ودوخة التليفون الارضي
كال يله جدي خابري عليه
باوعتله ثواني اشوف جدي هواي مهتم بالموضوع
هزيت راسي اطرد افكاري و طلعت الرقم من دفتر
دليل الهاتف ودكيت على رقم بيتهم
ظل يرن شالته رزان سلمت عليها
كتلها شونج وانتوا بالبيت كلكم شلونكم
كالت زينين بس خلي احجيلج شغلة شصار ذاك اليوم من طلعنا منكم
كتلها بفضول خير ان شاءالله خو ماكو شي ظل بالي
كالت لج اسمعي دره السيارة سوت مشاكل كومه
كتلها يا سيارة هاي ؟
وعيوني راحت لجدي اباوعله
جدي سمع سيارة اجه يمي يتسمع وخلى اذنه يمي
الموضوع يهمه كولش
رزان انطلقت بالكلام وظلت تحجي الموضوع بحذافيره
من رجعنا بالطريق ايناس كامت تحجي على فيصل بعصبية انت شون تريد تنطي لهاي الزعطوطه سياره صدك جذب منك
هو اندار عليها وبعيونه شرار وغضب
كالها وانتي شعليج مال ابوج هذا
كالتله خوب انطيها الي اني
خزرها صوتج مااسمعه ومعليج افتهمتي اخر مرة تفتحين هذا الموضوع
هي ما سكتت وكامت تدردم شبيك فيصل ترى اني ملاحظة عليك انت من شفتها ونكلبت احوالك وهسه تخبلت عليه شجاك
اندار عليها وضربها على وجهه وكوه فكينا منها ربج السيارة ما انكلبت همزين احمد يسوق وامي يمي
ظلت تبجي ايناس وبس وصلنا للبيت اول ماطبينا
باول لحظة طلقها كاللها انت طالق
هي كامت تدك وتلطم وتتوسل بي فدوة فيصل بعد ٣ اشهر لا تطلگني هسه فدوة بقيني اسفة تدخلت ماتتكرر
كاللها ولج انت عايشة الدور ومصدگة نفسج شنوو نسيتي انت شنووو
ظلت الليل كله تتوسل وتعتذر بس مافاد وياه قافل على طلاقها وجبرها تجمع ا غراضها ومن الصبح طلعت
كتلها بله هاي شنو انوب كوليلي وين مااندار مشكلة بسبي والله مليت وتعبت اني
كالت انتي شعليج قابل اخذتيها اشو رفضتيها
اي بس ضجت رزان
كالت لو ادري ماكتلج اذا تضوجين
كتلها لا ولا يهمج بس عمو فيصل وين اريد احجي وياه
كالت بالمكتب لحظة خل احولج عليه
حولتني وحجيت وياه سلمت عليه وكتله عمو ممنونه منك ومااعرف شون اشكرك فضلك ماانساه طول عمري
كال ابد لاتفكرين دره واجبي هذا
كتله عمو فضول انت شون عرفت اني دياخذوني
كال الحمد لله العميد خابرني على تليفون اللاسلكي وبلغني واني اصلا جنت بديوان الرئاسة على شغلة جبت الحرس واجيت
كتله تسلم عمو مقصرت ويايه اني لو ما انت
قاطعني كال درت ليش ممداومة انت اطمني تماما وروحي بحيل صدر الكل عرف انتي بحمايتي وتخصيني بعد محد يكدر يمسج بكلمة
كتله تسلم عمو ان شاءالله ارجع بس والله خايفة كولش الرهبة بعدها بيه
كال انت بطلة وهالشي ميأثر عليج ارجعي داومي مستقبلج لتتخلين عن طموحاتج
كتله ان شاء الله عمو من باجر اداوم
كال عفية الضبعة
ضحكت وسلمت عليه ونهيت الاتصال باوعت
واشوف جدي يحك بحليته
كتله هاا جدي بشنو تفكر ؟
رد كال هاي السياره حقت بعد بس تتعب الله كريم
كتله هي مرته اطلقت من ورا السيارة
كال عادي هو دائما يبدل النسوان المهم يبقى على سيارتنا ومايبدلها
ضحكت كلته هالايام تفكر بالسيارات وانت ماتعرف تسوق الله ينطي عمو سلمان
كال هالمره عجبتني السيارة وراح اسوقها على مرامي .....
يتبع
🥺اسفة تأخرت عليكم البارحة شكد حاولت انزل تنويه وماكدرت المسودة يصير بيها مشكلة وتروح من وحدها وماينشر
ادعووووولي بقضاء حاجتي الله يقضي حوائجكم
هو الله لقضاء حاجة ...
رواية طَوفانْ رَجُلْ الفصل الرابع عشر 14 - بقلم نورا ناصر
السلام عليكم
رواية طوفان رجل
الفصل العاشر
نورا ناصر
لو أرادَكَ صَلِبًا لَخلقَكَ من صَخرةٍ
ولكِنّ لينُّ الطينّ كَانَّ فيكَ مَقصودّا
*-
*-
*-
تركت جدي وطلعت .. لميت اشلاء روحي المبعثرة بزحمة الموقف اخذت منه قوة مو ضعف ، رب العالمين نجاني ورحم بيه ..
اذا كان جدي ظهر بالدنيا عمو فيصل ظهر الحامي بالدولة ويجوز الله عوضني بي بدل عمامي الي مايكدرون يسوولي شي وكلمن لاهي بهمه
عمو فيصل طلعلي بوكت كولش محتاجته الحمد لله ربي حنن قلبه عليه على الرغم هو عمي من بعيد رب العالمين من يحب عبده يصخرله ناس توكف وياه وتحمي حتى لو كان هذا الشخص الي صخره الي ربي غريب
حاجيت نفسي كومي دره انفضي غبغر الهم و الحزن والذكريات المؤذيه خليها ورا ظهرج ابدي من جديد الصدمه الي تاذيج تقويج
خابرت بنيه زميلة وياي بالجامعة وسألت عن المحاضرات واخذتهم منها
اثناء الكلام وياها هي رادت تحجي بالمشكلة الي صارت بيه بس اني مانطيتها مجال تشكرت منها وختمت المكالمة
طلعت كتبي والمحاضرات واتكلت على ربي هو المستعان قررت ابدي من جديد واخلي كل شي ورايه ...
دوامت بعدها بيوم شفت الطلاب تباوعلي و تحجي
وحتى الي ميحجون بعيونهم حجي واسئلة ..
مااهتميت الهم ابد هم بوادي واني بوادي ثاني
مااهتم لو يحجون للصبح ...
وحتى الجلاب الي جانت تنبح عليه سكتت وخافت والاساتذه بدوا يهتمون بيه اكثر واكثر وهالشي زادني مكانة بيناتهم وحتى زادت ثقتي بنفسي ..
اما الفرقه الحزبية كمت اذا امر من يمهم يدنكون وعيونهم انكسرت بعد ماجانت عيونهم قذرة على البنات
ومثل ميكول المثل رب ضارة نافعة كل شي بي حكمة
رغم الموقف جان صعب بس تحسن وجودي بالكلية
وكولش مرتاحه واموري تمام ودرجاتي محافظة عليهم وبين فترة وفترة يدز عليه العميد يسأل عن احوالي والحمد لله والشكر الذي لايحمد على مكروه سواه ...
.
.
.
وبيوم 31 بشهر كانون الاول عام 1999
العصر ، جنت كاعدة اقرا واحضر الدروس ..
مرت من يمي شوكة وهي جانت من قبل بكم يوم تلح تريد تحتفل بدوران السنة مال عام 2000
سنة دخول العالم للقرن الواحد والعشىرين وجان هالشي مميز عند العالم كله
لان نهاية حقبة التسعينات والدخول بالالفية الثانية
جانت شوكة مصره تسوي احتفال براس السنة
كتلها هاا شكوو بعدج تلمين ؟
كلت هيج وباوعت لايدها بيدها سفطة فلوس خمسة وعشرينات وخمسينات ومية دينار وتحسب بيهن
هي جمعت من الكل بس عمو حامد ماقبل ينطيها وهي تركض وراه وتتوسل يابه عفية بس 100 دينار بس 150 دسوويهن 200 دينار
جانت هاي الفلوس الها قيمة بذاك الزمن وهسه انقرضن
هو عمو بخيل كولش جلده گرميده وميطلع منه فلس احمر من عهد العصملي
كالت بعد حامد هم ميقبل ينطي ...
هي كله حامد وهناء لا ماما ولا بابا
شافته فات للبيت وركض وراه تتوسل واني طبكت الكتب ودخلت وراهم ...
سمعت هناء تصيح لاتطيها الخبلة هو الاحتفال للكفار مو النا شهالعيارة بعد
جاوبتها شوكه وانتي شنو مسلمة ؟
جاوبتها جاا ليش صايمه مصليه الحمد لله اشايفتني
شوكه كالتلها لاشافج الله وين مصليه تضحكين على الملائكه مايلحكون يسمعون الايه من تقريها بالصلاه خوب الركعة بكيفج ولايوم بوكتها
الظهر تصلينه بالليل والفجر تصلينه الظهر والمغرب لو يوصله السرة وتصلينه لو لا
كالتلها شوف شوف ادبسز الااجويج على هذا لسانج لو اكصه من العرج هيه وحدة الاثنين
كالتلها غير طالعة على امي ومدت لسانها عليهم
راد يركض وراها عمو حامد بس هيه طارت طلعت برة
رحت وراها سمعتها تدردم وتضرب رجلها بالكاع ولكم اريد احتفل مثل العالم واكلب البيت عليكم والله نحتفل يعني نحتفل وراحت تمشي وتدردم عليهم
رحت للغرفة شمرت الكتب والملازم وطلعت فلوس ووديتهم الها كتلها هاج فلوس ولاتنقهرين
خمطتهن مني رغم ثاني مرة انطيها كالت والعباس ابو فاضل الااخذ منه غصبا عليه
كتلها يمعوده يكتلج عوفي هسه شنوو حبكت
كالت مايدري هو شمدري عندي خطه جهنمية
طبت تركض للبيت ويس الغبار وراها
رجعت لابسة عباتها وكفت بطريقها كتلها ولج ووين
كالت انتظريني يجيج الصافي
وراحت اخذت الطريق ركض هي وعبايتها طايرة وراها ...
هزيت راسي وصفكت ايدي وضحكت
شويه واجت تضحك كالت تعاي احرسي
كتلها شكووو
سحلتني وراها وصعدنا الدرج
طببتني لغرفة امها وابوها وكنبصت كبال البوفيه
وطلعت مفتاح من جوه عبايتها انصدمت
قربته يم خشمها وسوت عيونها حوول وتباوع للمفتاح تالي ظلت ترمش سريع سريع وبعدها ظلت تنزل بحواجبها وتصعد
ضربتها على كتفها متفضيهااا هو و شكووو جاي تسووين سحر
كالت سحر محر خله الدجاجة تنتحر افتح قاصة حامد
سمعنه صوت حركة ... دفعتني كالت ولي روحي حرسي
رحت طليت ماكو احد بس سمعت خطوات عالدرج
وهي خلت المفتاح وانفتح الدولاب الي بالبوفية
طلعت سفطة فلوس و اخذت منهم ورجعت الباقي ورجعت قفلت الدولاب
كتلها ملعونة ولج منيلج المفتاح
ضحكت كالت جبته من ام تحسين نفس بوفية امي ويرهم المفتاح عليها خلي حامد الجلف يضم بالفلوس على كلبه مامحتاجه منه وتضحك لووحدها
خلتني وراحت تركض وراها اجت من السوك وهي جايبه العلاگة الجنفاص هاي العلاكة الي تصير من گونية الطحين
خلتها وطلعت منها اشكال والوان دكول مو علاكة مصباح علاء الدين طلعت منها النفاخ والنشرات ولماع وشموع وطكطاك وكرزات
وخلتنه ننفخ بيهن ظلينه ننفخ ونعلك بالنشرات تالي لزمت وليد انطته فلوس يجيب كيكة حابه تحتفل براس السنه
انوب لزمت امل خلتها تسوي كاستر وزنود الست وبقلاوة لوحدها
وهي ظاله تهلهل وتصفك وتركص وكل شويه وكتلت الجهال شلون ياخذون جكليت ويمدون اديهم على الميز مالت الاحتفال
جدو صاح عليه .. ولج شوكة انه ما بيه اسهر ل١٢ خلينه نروح ننام انه وجدتج
ردت عليه... حلفت بالطلاگ اتطلگ بالثلاث اذا ما حظرتوا الاحتفال وجودكم اهم من وجودي
خطيه سكتو وكعدوا وهي مستمره تدبج وتردح وتهز بشعرها عبالك عرسها مو عيد راس السنه
شغلت كاسيت اغنية قاسم السلطان اسمها الماعنده منين يجيب من خلگ الله
وهي تركص وتصفك وتلحن وتغني لما عنده منين يجيب يبوگ من اهلة
وتموت من الضحك وترجع تردد هذا المقطع ولازم كلنا نصفگ ونتفاعل وياها ولما يتفاعل يترزل ويتهدد ما تنطي كيكة
وتباوع لابوها وتضحك كلها هو بقلاوه انطيني
هي كمزت من مكانها متحمسه .. تريد بقلاوه خاب عساك على بقلاوه يا بقلاوة لبقلاوات انت
وتجيب وتحط بحلكة حتى هو مستغرب وكل شويه وكلتله.. انت الخير والبركة انت خيمتنا من يطكنا المطر وتوكل بي كيك وشربت وجكليت طلحت الرجال طحل
وهو مكيف عباله تمدح بي مدام العالم ومفتخر ببنته شلون مدللته وتحبه
دكت الساعه ب١٢ باليل ودارت سنة جديده علينه سنة ما نعرف شنو الي صاير بينه وشنو ضامة النه من مفاجئات واحداث
شوكة كالت ..تمنوا تمنوا الله هيج وكت يحقق الاماني
رفعت ايدها وهي تصيح .. يارب انت تعرف امنيتي ما حاجة كل يوم ذاكرتها اصلا منيتي تعتبر وجبه رئيسيه كل شويه وطالبتها منك
فدوه ربي زوجني عليك العباس ربي هاي السنه لازم تزوجني حتى ما اطلع عن الطريق والله لان بصراحة بدت تنهار حصوني
امها ركعتها على راسها كلتلها .. وسم احجي عدل
ردت وهي تحك براسها.. لعفو ربي والعباس مو قصدي بس اني اتلخبط بموضوع الزواج اظل اجفص المهم ياربي هاي السنه لازم اتزوج
ورجعت تدك وتركص واني دعيت ربي يطول بعمر جدو ويخلي خيمة على راسي وينطي الصحة والعافية
ويوفقني بدراستي ويختارلي الي يرضي ويقنعني
رحت يم جدو كتله.. كل سنه وانت سالم جدو ان شاء الله العمر المديد والصحة والعافيه
باس راسي ودعالي بالخير كتله الطف الجو .. اي شنو امنيتك تتزوج على بيبي هههه
رد عليه .. لا يبعد جدج امنيتي اشتريلج سياره واطمن عليج
ابتسم.. يعني تخليني اسوق
رد عليه بحب.. اي خليج شنو وحد عن البنات
كعدنا الصبح على صوت عياط وصراخ وگابه الامة طلع عمو حامد كاتب عمة هناء لان لگة نقص بالفلوس
جدي لزمة كله.. على كيفك ويه المره موتتها ما دگلي شبيك
رد عليه بعصبية.. بايگة فلوسي باگت فلوسي بيهن نقص
كالت شوكة.. اي والله ماكو غير امي باگتهن لان المفتاح بس عندك وعندها بعد احنه شلون نبوگ؟
وكملت بخبال.. هي ترا امي من صندوك الصدقات تبوك تريدها ما تبوگ من جيبك صدك جذب غير تاخذ حذر
يعني هي من الله تبوگ تريد انت عبدالله ما تبوگ هه صدك انت تضحك
امها عاطت بيها.. ولج والله من اجيج اله اشكج شك
ورجع عمو خبز هنا خبز ويهدد بيها اله تطلع الفلوس وهي تحلف ما ماخذتهم
راح عمو وهناء كعدت تنوح وتلطم على حظها وعلى الكتلة الي اخذتها من دون سبب
كالت الها شوكة.. شوفي هاي السنه فالها مو زين عليج مدري يا نبي كال لا تعادوا السنين حتى ما تعاديكم
وانتي بعدها ما اجت السنه اعترضتي ما يصير نحتفل وعيد الكفار دكليها لو صايره كافره ولا هالكتله
هناء تعصبت فوك ما هي عصبيه نزعت النعال وشمرته عليها وهي تصيح .. بت النعال والله اذا الزمج الا اصحيج على زمانج الثولة
شردت شوكة بروحها العزيزه وهي تدردم والله تبوگ وتعاي يشوگة تحملي اووي شدخلني اني
رجعت لغرفتي اقرا وخلصت وواجباتي رحت اغسل ملابسي وشريتهم فوك نزلت على الدرج و اسمع صوت شوكه تتعارك وياامها وابوها
نزلت يمها سمعت هناء تكول لا تنكرين جلبة هسه شفت ام تحسين كالت فادكم المفتاح فتحتوا البوفيه
كتلها يامفتاح
كالت اجت شوكه اخذته
صرخت شوكة لا مو اني اخذته هاي مخرفة الا اتعارك وياها
اجت سهى اخت شوكه الصغيره كالت شفت دره واكفه اباب غرفتكم الفوك الي بيها البوفية وشوكه جوه بالغرفه تحوس
عمو حامد بس سمعها كمز يصيح اليوم اخلصكم خلاص واني وشوكه افلت ركضنا مثل بب بيب الكارتون
كالت ولج دره وين نوولي
كتلها للطابق الثاني حتى علما يصعد النا يتعب هو سمين واحنه نختل
ظلينه نركض ركض شبخنا الدرج
وهو ورانا احنا تعبنا وهو يسب ويغلط وماتعب من الغلط
صعدنا للسطح نلهث وندور مكان نختل بي
وجان اسمع صوت ورايه دره شلونج ؟؟
انداريت اشوف مصطفى بسطحهم
شوكه شافته كامت تعدل بملابسها وشعرها واحنه عبالك اصحاب الكهف من الركض نلهث
كتله واني الهث واضحك هلو مصطفى
كال شكو اسمع صياح ببيتكم صاير شي تحتاجون فزعة ؟
كتله بضحكة وتوتر هههه لالا لا ماكو شي صعدنا نظف السطح اني وشوكه
وشوكة حتى ماترمش وبس ابتسامة على وجهها شاركته من الاذن للثانية
دنحجي صعد عمو حامد ...
احنه شفناه وتخبلنا نركض هيج وهيج الى ان سد الدرب على شوكة وهو فاتح اديه ولزمها
واني لزكت روحي بالحايط من الخوف رجليه ماعادت تكدر تحملني انوب الفشلة من مصطفى من جذبت عليه وكتله جايين ننظف السطح صدك حبل الكذب قصير وطلعت الجذبة
اشوفه يباوعلي درت وجهي بخجل ....
ظل عمو لازم شوكه وهي تحوص وهو يريد يثبتها
مصطفى كاله على كيفك يامعود البنيه خطيه مريضة
وشوكه يدك عليها عمو على ظهرها وجتافها وهي تبتسم ابتسامة عريضة شاكة حلكها وتباوع لمصطفى
كال عمو حامد لمصطفى يمعود حصان اصحى مني ومنك
كله مصطفى مو مخبلة وحرك ايده بشكل دائري على راسه بمعنى مخبلة ....
صاح عمو حامد على مصطفى كلب ابن ١٦ كلب بتي اعقل منك ومن عشيرتك
عاط مصطفى بغضب احترم نفسك حامد انت وبنتك مخابيل طالعه عليك مو صوجكم صوجي اني انقهرت عليها
عمو حامد عاف شوكة و ركض يريد يعبر على مصطفى لان السياج بينا ناصي
ومصطفى افلت طب وسد باب السطح ونزل
عمو حامد انشلخت رجلي من السياج وكله تراب
شاف مصطفى طب اخذ عوده ثخينة مشمورة بالكاع
لزمها وظل يركض ورانا
كتلها شوكه يلله بسرعة تعالي
نزلنا ركض لغرفتي قفلنا الباب علينا
ونفسنا انكطع من الركض ظلينا نلهث ونتنفس وكلبي يدك حيل
غرفتي بيها شباك يطل على الهول ابو الطلاكتين لان هي اصلا جانت ترك اضاءة للهول بس جدي سواها الي غرفه وظل هذا الشباك على وضعه
وصار يعتبر النافذة المطلة على اخبار البيت كله
كعدنا بالكاع نلهث ونضحك شويه ثواني ونسمع عمو حامد يصيح ويتوعد النا طلعن لو ماطلعن قابل تحمضن بالغرفة مصيرجن بيدي الا اشلع اذاناتجن لا عبالجن كبرت
نسمع لتهديده وخايفة اني انوب خاف يكسر الباب ويفوت والحظ الاكشر جدي المنقذ مالتي ماموجود بساعتها
باوعت للثلاجة الي بالغرفة تذكرت همزين بيها حلويات ومي حمدت الله وشكرته من الركض واللهطة جعنا وعطشنا
كتلها شوفي ادري لازم نطلع منا لج سمعي وهاي امج استلمتنا ادعية
ظلت هناء تدعي علينا ...
كالت بتفكير اكولج حامد يشبه جامبو الجبار ويا ساسوكي
كتله يااا احنا وين وانت وين هو هذا الي كدرتيله
كالت والله شبيج هسه من ركض ورانا باوعتله نفسه اصلع من النص ومنا ومنا شعر ويركض وطارن شعراته ودشداشته الهدله ووبطنه والكرش شكبره وانوب لزم عوده حتى لافهم ولاعلم رحمة الله على جامبو
متت من الضحك عليها ولا عبالك توها ايده تصعد وتنزل عليها
كالت ولج مصطفى صاير يكطع سمنان ولعباس ماكدرت اشيل عيني اريد اشبع شوف منه
اكلج صدك جنت طالعة حلوة وابوي يكتل بيه مووو ؟؟
تحجي وتعدل بشعفتها المتطايرة
كملت كلامها بحالمية انووب يدافعلي اروحله فدوة
وترمش بعيونهه ...
ضربتها على فخذها وطلعت بطاله مي كتلها شربي
كالت مخبلة اكو واحد بالشته يشرب مي بارد
كتلها مو كلبي محترك اريد ابرده
كالت شعندج قابل انت اني شوو اني عاشكة واحب مصطفى وكلبي معطب
كتلها دشربي شربي العاشكة ظل واحد ما عشكتي ....
خمطت البطل مني وفتحته تشرب منه وراحت فتحت الشباك وتطل على بيبي وهناء محتركات حرك باعصابهن
تباوعلهن وتمجع بالبطل وتمطك
وبيبي كالت مال واحد يجيويجن على هاي العمله ترافكتن هسه تسودن وجوهنا
الغلط والسب اشكال ويشربن جاي كدامنا ويغلطن علينه
كالتلها شوكه ياالحيزبون اكعدي راحه مو رجلج بالكبر كولي يالله
كتلها بيبي كون الموت الي ياخذج ياالمسودنه يالمخبله
كالت شوكه انتي هم الج كبر بين الكبور؟؟ ماكو من ندفنج اروح وياهم حتى بس يخلوج اكعد ابو....ل عليه حتى منكر ونكير تشرد ماتلحك تسالج وتتشعوطين بالكبر
بيبي سمعتها وصاحت يمااا بيش تطلبيني اليوم الا اخلي حامد يعلكج بالبنكه شوفي شويكه اليوم اليوم
وتطل بوجه هناء ولج هنوى هيه هاي تربيتج ؟
صاحت هنا اني شعليه هي ترافكت ويه ذيج بت الكافرة الروسية وصارت اخلاقها خراب فد نوب
بيبي عضت اصبعها السبابة وكالت اخخخخ كل البلا من هاي بت الروسية ربي يمتى تريحني منها
ظليت اهز براسي هسه شوكه غير تسد الشباك وتسكت ابد الا تخليني اسمع كلام يسم
اجا عمو حسن سولفوله كال يستاهلن وغلطانات شون يبوكن فلوس بدون مايستأذنن دره شوون شاركتيها ولج موو عيب
شوكه كالته هو انت شوكت عندك موقف وياهم وياهم عليهم عليهم انت اخر من يحجي
كام يضحك وعافنا وكالعادة دخل للمقر مالته بغرفته الي يقضي بيها اغلب اوقاته منعزل ويه كتبه
بقينا محبوسين و خلصنا المي واحنه بحصار وهي ولاتستلم كل شوي تتلاشط ويه وحدة بالحجي
الى ان كامن كل وحدة بمكان مرت امل من يم الشباك
صاحتها شوكه كالتها جيبنا مي حبابة
كلتلها امل عفيه معليه مالي خلك مشاكل خلوني بعيدة عنكم من غير شي امج مسودنتني
امل تمشي وشوكه بعد شويه تطلع وجهه من حدايد الشباك تكلها الشمر الله يحركج ويا الكطعوا المي عن الحسين امل هزت ايدها وراحت
لزمتها من ايدها كتلها على كيفج قلبها مايطيها هسه تجيب صدكي
كالت علواه يبس افادي الله ييبس افاد حيزبون كون
كتلها ولج كافي دعاوي من روا دعاويج راح نموت من العطش
سمعتني وراحت خلت وجهها بين الحدايد الشباك ...
مرت سهى الفتانة شوكه ظلت تهدد بيها ولج الا انفرد بيج واشوفج النبي العربي يا سهيوة الفتانة
سهى ظل وجهه ينطي الوان تدري بشوكة من تحصرها شسوي بيها ...
خافت وراحت جابت دبتين مي واطتها من الشباك عود شوكة دتاخذ المي وغدرتها ، لزمتها من ايدها وبالايد الثانية كرصتها كرصة حييل بخدها وجرتها من اذنها وجرت خصلة من شعرها بردت كلبها بيها يله تركتها وراحت تبجي سهى لامها
لنص الليل اجا جدي ووياه وليد بعدهم ممبدلين بس كعدوا سولفولهم المقتل كله
وليد كله يابه شكد الفلوس بس كلي اني انطيك
عمو كال تلث الاف و ٧٥٠
جدي كله والله ماتسوى على هالمبلغ تسويلك عركة شكبرها
كاله يا ماتسوى هذا راتب موظف مال شهر كامل وشيل منها السبعمية والخمسين دينار
كام وليد طلع فلوس من محفظته وانطه لعمو
كاله هاك بويه اخذهن منه وحسبهن
كال بعد الف و٧٥٠
جدي كمل عليهم الفلوس واصلا اخذ ضعفهم تلث مرات يله انفك الحصار علينا
وكعدت شوكه وسكتت ؟؟ لااا ابد ختمتها بس انتو زلم البيت (جدي ووليد )الباقي كلهم نسوان
جدي كال شوكه عيب بويه احترمي شويه مايصير وهاي عملتج ما تنعاد ترى مرة ثانية ماادفع عنج
كالت جاا ما تونستوا بالحفلة ماااكلتوا بس اني وهاي ودمغتني على راسي
جنه بعدنا واكفين على شباك الهول
جدي غلس عليها وباوع لعمو حامد كاله
شون تسب مصطفى وابوه ميت عود جاي يدافع لبتك
كالت شوكه جدي اي والله سبه لمصطفى وحق الله الا تنطوه اني فصلية
جدي كال لاحول ولا قوة الا بالله ياربي انتي مالج صرفه هسه شنو جنه نحجي قبل شويه ...
بعدها داومت عندي امتحان كولشي ماقاريه بعد مقتل الي صار بالبيت ، مادخلت محاضرات وعزلت نفسي اقرا واني بيه طبع من اقرا لازم امشي اروح واجي واقرا بصوت هم
تعبت من الفرة كعدت اقرا والشمس حلوه رفعت راسي دااختبر نفسي وجان ا لمح واحد
ظليت بين هو بين لا كلت ياربي اني عايزه كمت من مكاني رحت كعدت اقرا على المصطبه الثانية
ودنكت اقرا وعزلت نفسي عن العالم بس ضايجة وفكري مو وياي
سمعت خطوات يمي وظل خيم عليه
كال بهدوء شونج دره
رفعت راسي كتله بعدم تركيز الحمد لله
كعد يمي وتنهد كال المركز مالتي قريب عليكم ومريت عليج
كتله بانزعاج اهلا وسهلا
كال وصراحة من شفتج ع سطح تمنيت انفرد بيج اكثر
درت وجهي عليه خليت عيني بعينه ومخنزرة
هو ابتسم كال كبرانه وصايره بعد احلى وحبج يكبر بقلبي اكثر واكثر شونها الكلية الاخذتج مني ؟ .
اني كولش ضجت منه اصلا هو كلما يشوفني يكولي كبرانه حليانه ، سبحان الله الي طرد حبه من كلبي بعد ماوكف بوجه طموحي ومستقبلي ...
كتله خير مصطفى احجي لعندك عندي امتحان وقتي ثمين مااكدر اطول وياك
كال ماغيرتي رايج بعد قافلة
كتله بشنو اغير رأي ؟
كال بموضوعنا اني وياج شنو انت نسيتي
كتله انتهى وخلصنا كل يوم انفتحه اني افكر بمستقبلي
وانت تهدد مستقبلي وطموحي
كال انتظرج مامستعجل انتظرج العمر كله
كتله لاتنتظر اتعبك اني ولا اوعدك باي شي شوف حياتك
كال انتظر تخلصين كلية وهم ارجع اخطبج مااستسلم اني
كتله ورايه تعيين ودراسات وامك ماافيدها اني رحمة لاهلك موضوع انتهى خلص
كام على حيله وكال بعصبية انتي شايفه نفسج هواي ومغرورة لج هسه بس اطب للكليه اصاحب مية وحدة منو انتي واذا اشمر حذائي يوكع على الف شنو هالعنطزه مالتج
كتله روح منو لازمك لخاطر الله فكوا ياخه عني اختنكت
كال وهو مخنزر منو بعد خانكج
كتله بملل ماكو احد
كال بسيطه هذا خشمج اذا مااكسره مااطلع اني مصطفى
كتله بتحدي اعلى مابخيلك اركبه
طلع اعصاب وبيده جكاره شطوله والبدله العسكريه الزيتوني الها هيبتها اباوع البنات تباوع عليه
هزيت راسي ورجعت اقرا بعدها خلصت الامتحان ورجعت كعدت ارتاح واشم هوا
شويه فات عمو فيصل يمشي سريع انهجم بيته على النظافه لابس جاكيت سمائي دخاني والقميص ابيض والبنطرون نيلي يلج لج
طب بوجه قلق حتى ماانطاني فرصة اسلم
كال خابروني يمج واحد لابس عسكري ظل بالي
كتله لا عمو ارتاح هذا مصطفى
كال منو ؟؟
كتله مصطفى بن عمه سعدية
كال هااا بارتياح وكعد على المصطبه يمي وطلع جكارة وورثها
كال اي وشعنده هنا مصطفى
كتله مر يسال عليه
كال وهو شنو يسأل على كل بنات العمام لو بس انتي
كتله ماادري
سكت شويه
كال بعصبية مصطفى شعنده وياج دره
كتله ماعنده شي خطبني اكثر من مره واني ارفضه وهسه رجع وتعاركت وياه وراح هذا بالمختصر الي يفيدك
كال همه بعرس عمار تعاركوا علمودج
يحجي ورافع تك حاجبه
هزيت راسي صفح وسكتت
كال والله خوش موكعه ولد العشيره كلها
كتله عمو مااسمحلك تتهمني هيج اتهام انت ماتعرف اخلاقي شنو روح اسال اخوانك والعشيره كلها اني ربات حجي عدنان وربيت ويا الزلم وهمه مو بعيني اني ارجل منهم واتحدى واحد يكول اني مطيه مجال اله ولا لمس شعرايه مني لاتخليني اغير نظرتي عنك بعد ماصرت سبايدر مان او حلال المشاكل بحياتي انت عم سند وظهر تالي وكت
كال شنو هاللشلعان الكلب تالي شيبي من وراج بلغي جدج كم يوم امر عليكم مشى وبيده جكاره
ركضت وراه عمو شتكول لجدي لاتكله على مصطفى يروح يتعارك وياه وامه تسوي فلم يم كرايبنا عليه وعمامي مايصدكون يبطلوني
كال ليش ماتغطين الغضب واشر على شعري
كتله بعدني مامقتنعه
كال بله وين جانت الي هاي المصيبه
كتله عمو يامصيبه اصلا مصطفى جبان بس يهدد كولشي مايسوي وشوره بيد امه
كال يانعل هذا
راح يمشي بعصبية ورجع كال لالا لتكولين لجدج خلي اندل دربي ياله
كتله عمو لاتزعل
كال اشتعل عمج بنار ونفط جر الكتاب وكتب رقمه
كال هذا رقمي المباشر شوكت ماتحتاجين دكي مع السلامه
استغربت تصرفه ماعونت ارجع لجدي واسولفله
رجعت حتى مابدلت بملابسي وكعدت احجي لجدي
الصار كله
كال مصطفى شنو هو مو مركز مالته بالعامريه لازم سيارته عطلت يمج اقصد يم الكلية
و كال فيصل سيارته زينة وتفيدج وبدت تصلح شويه شويه
كتله يعني اخذها منه السيارة شنو تقبل انت يعني
كال لايابه ناخذها مو هسه من اصلحها
كتله لعد من يجي كله ليش هو كلي يريد يجيك
لان كال امر لجدج وبعد حجا على شعري بعدين حجا على روحه نار ونفط وبعدين كال لاتحجين لجدج خل ارتب الوضع ...
جدي ضحك وكال اني نظرتي ماتنزل للكاع
يتبع
اعتذر ع تأخير 😭انحذف نص البارت واضطريت ارجع اعيد صياغته
التصميم الي خطف قلبي بايد ام عبد الرحمن 😍
اذا اكو غلط غلسوووو 💋😭
رواية طَوفانْ رَجُلْ الفصل الخامس عشر 15 - بقلم نورا ناصر
السلام عليكم
رواية طوفان رجل
الفصل 11
نورا ناصر
أشبهُ أنا أشياءَك الصغيرة..
قهوتك، نظارتك، كتابك..
وتُشبهُ أنت أشيائي العظيمة..
ملجأي، وطني، ملاذي🤍
مرت ايام وبيوم منهن سمعت عمو فيصل جاي خطار علينا ... اخذت صينية بيها جاي ومي ورحت للديوان
فتت سلمت عليه وقدمت اله جاي ...
حسيت لازم اخليهم لوحدهم شفت الجو متوتر وهمينه حسيت هم محتاجين يبقون لوحدهم ترخصت منهم خليت وطلعت
رجعت ورا ساعة كل الي في بالي عمو رايح وجدي لوحده
بس شفت سيارته موجودة بعدها
هو مايطول شعجب دومه يكول مشغول .. رحت دكيت باب الديوان عليهم فكرت خاف محتاجين شي اخذ الصينية واجيبلهم جاي او مي
من دخلت عليهم جان عمو اعصاب ونار ووجهه احمر وجدي وجهه مرتاح
من شافني وكف وديطلع باوعت بوجهه من ارتباكي بشوفته رفعت حواجبي متعجبة هو خله ايده على كتفي عصره وترخص وطلع بسرعة
رجعت لجدي كتله شبي عمو عصبي صاير شي جدي ؟
جدي ضحك بارتياح وكالي وهو يحوط اكتافي لاتخلين بالج على شي بس عليج بالدراسة
ابتسمت و كتله ان شاء الله جدي ، بس بقى فكري يم عمو وشبي هيج معصب
مشت الايام والحمد لله خلصت السنة الدراسية وجان اخر يوم الي بالامتحان خلال المدة السابقة جنت اداوم وارجع اتغدا الظهر ماكو احد
بس عمو حسن ووليد اصب الهم غدا احط كدامهم واكعد واتغدا وياهم
اشيل الصينية اغسل مواعين واروح انام واكعد بالستة اصلي وارجع اقرا مااطلع الى ان يصيحولي من يسوون العشا
اساعدهم شويه بهوسة العشا وشكد يذبون حجي خاتون وماتشتغل ومسعدة واحنه خدم عدها بيبي وعمه هناء ومن هالحجي مااهتم بكلامهم قايمة بواجب جدي ملابسه اكله ومكانه
عايشة سلام داخلي رهيب بس مخلية اهداف بحياتي واريد احققها وخلاص مااركز بالكلام ولاادوخ نفسي بي ابد
طلعت بنتيجة وحدة هي راحة الانسان هو العمل الدائم وانشغاله راح يبعده عن كل السلبيات بحياته
وحتى تبعده عن التفكير بالماضي و بالاشياء المؤذية والناس السلبيين .
كاعدة بغرفتي بالليل و اجتني شوكه تريد تفتح مشروع كالت دره اريد استرزق ليش ماابيع حلويات على الجهال ليش يرحون للدكان منا لهناك خوب اني استفاد احسن
احنه عدنا بالبيت جهال عمو حامد سهى ومنى وجهال عمو فلاح اربع بنات كولش هادئات ودائما فوك مينزلن الا نادرا مثل امهن امل ..
كتلها خوش فكره وراس المال منين ؟
كالت اني عندي فلوس بس محتاجة مساعدة فدوة تساعديني دره ؟ وضربتني على كتفي كالت تساعديني مووو
كتلها بلا تهديد بالله وكوولي بشنوو اساعدج يله ومااقصر اني
باوعت للغرفة ورفعت حواجبها ونزلتهم وهزت برقبتها حركاتها الشهيرة جدا
وكالت افتح شباك غرفتج وابسط بي البسطية مالتي
انصدمت ياا هاي صدك تحجي ، صفنت واني عود جنت مقررة ارجع للاهتمام بنفسي واعيد نشاط الرقص اريد ارجع لياقتي ....
المشكلة مااكدر اكوللها لا تروح ترجع الحروب بيني وبينها واني ماعونت يصير صلح
هي من نوع الي ماتنسى ولحد هسه تسمي عمه امل الشمر ذي الجوشن لان ماانطتنا مي كل هذا والموقف صار عليه ست اشهر ....
خبزتني خبز على ظهري ولج درو وين صفنتي جنج ماموافقة عوزج بعد ماتوافقين وماتساندين رفيقة دربج نسيتي من ركصت بنجاحج ولج حتى ركبتي لهسه توجعني ولزمت ركبتها وكالت اخخخ
كتلها لا هم عوزي مااوافق بعد شسوي امري لله وافقت
كمزت عليه كطعتني من البوس خنگتني دفعتها ومسحت بوجهي كتلها اووي ترى وافقت غصبا عليه تحت التهديد
جان تكول بوستج بوساتج حتى رجلج من تتزوجين هم مايبوسج مثلي
طكيتها ضحكة صفنت شويه طليت بوجهها خيررر الصفنة موو الج وظليت الوح كدام وجهه
كالت انت راح تتزوجين منو امووت واعرف منو ياخذج تدرين اني من انام ع المخدة شفكر ؟
كتلها شنو ؟
كالت اكول ياربي وينه زوجي هسه وشجاي يسوي
كتلها اكيد نايم غير انت تفكرين بالليل
ضربتني على رجلي كالت اي ولج وهم افكر بيج اكول درو رجالها وين هسه وشجاي يسوي اظن رجلج روسي
ضحكت والله عليج سوالف
كامت طلعت بره بسرعة ووراها راحت جابت اشكال حلوايات وحتى جكاير حب شمس اسود وعلج
و باعت على ولدنا وتتعارك وعمو حامد ياخذ ويكولها بعدين ومايطيها و هي بدروها تروح تبوك من محفظته
ويعرف وتگب العيطة
لزمتها بعد ما بزعت كتلها شوكه هاي مو حاله مسلوبه راحتي شوون بيه اني
كالت اووف ياخنفسانه ماتسوين شي بي خير لله
صعدت للفوك واجت تهف بيدها جابت بوري حديد وخلته بين الشباك والكنتور وخلت جرجف عليه
وطلعت عليه من وره الجرجف كالت هااا اخذي راحتج نامي نامت عليج طابوكة
ضحكت عليها على افكار جهنمية
وتمددت براحة شويه خصوصية ..
توسع بيعها تروح لبيت جدو قاسم وتسحل الجهال يشترون ولي ما يشتري تخلصه خلاص من الكتل وينجبر يجي يشتري منها
ويا جاهل تشوفه رايح لغير دكان تسحله وتجيبه تخلص فلوسه يله تدزه لاهله
يوم من الايام راحت لبيت جدو قاسم بعد ما سمعت بجهالهم طالعين اوائل ومنطيهم فلوس
مانشوف الا دخلت علينا هي و الجهال وكعدتهم بغرفتي وظلت تبيع عليهم وجان وقت الظهر
دخل وليد توه جاي من الدوام وظل يسولف بالمطبخ
كال جهال بيت جدي قاسم ضايعين امهم شصاير بحالها وابوهم حافي يركض لاكاني يسأل عنهم كتله ماشفتهم
بسرعة كتله يااا وليد تره الجهال عدنا شوكه حابستهم بالغرفه الا. تخلص فلوسهم ياله تطلعهم
تخبل وليد وعصب وظل يصيح صدك جذب دره غير تنتبهين عليها شوون تحبس الجهال من ذاك الصبح لهسه
وراح يركض للغرفة وكام يرزل بيها واخذ الجهال ورجعهم
وراها اجوا هادين علينا
طلعتلهم شوكه تصيح وتشمر باديها تكلهم هم منو يبوكهم جنهم جريذيه كرطوا الحلويات كلها
كوة دخلناها شووكة تريد هي تعاركهن وطلع جدي اعتذر منهم وهم حقهم جهالهم وهم يخافون عليهم
ومنها بطلوا دكان شوكه وكالولها شكد تردين فلوس كولي بس بطلي مشاريع
وراها كم يوم خابر عمو فيصل مبلغه العميد بدرجاتي كلها امتياز بس درس جيد جدا
والحمد لله فرحت هواي و رحت استلمتها اني ووليد بالسيارة جان مشغل أغنية اضعف كدامك بس انته ومعليها كولش ويدندن ويا هيثم
باوعتله و كتله بضحكة هواي تسمع هاي الاغنية وحتى بغرفتك تشغلها شعندك
ضحك والتفتلي كال هواي تمثلني الاغنية هاي
سويت هممم وابتسمت .. كل الي في بالي انو يحب وحدة وياه بالدوام او من زميلاته بالكلية ...
كال اليوم عازمج على مطعم بمناسبة نجاحج
كتله ياعييني يله كون احسن مطعم ترى جوعانة
وصلنا للمطعم وكعدنا طلبنا الاكل هو طول الوقت مبتسم كتله صار شكد ماكاعدين ومسولفين
كال الكليه بعدتج هواي عنا واخذتج شحلاتج جنتي
كتله الدراسه اخذت وقتي كله والحمد لله وانت هم انشغلت بالتعيين والحسابات يعني مو بس اني انشغلت
بس يباوع عليه مبتسم ويهز راسه كال
شنو ابالج بعد الكليه
كتله اريد اكمل دراسة ماجستير ووراها دكتوراه اكرس حياتي للدراسه واوصل مستوى عالي اخلي جدي يفتخر بيه ويشوف بعينه ماضاع تعبه
فجاة تغيرت ملامح وجهه كال ومنو يخليج تكملين هسه جدج موجود بعد عمر طويل شون
ظليت صافنه بوجهه كتله وهمه بشنو ياثر دراستي عليهم راح يصرفون عليه احد منطيني اشو اصرف من خير ابوي
كال لا بس احنه تعرفين عاداتنا ماكو دراسه لبناتنا انتي كولش زين هسه وانوب تفكرين دراسات وتعيين وضحك ضحكة استهزاء
كال كملي كليه وحققي احلامج مو تردين اطفال هواي كون سته وتربيهم وتسوين عائله خاصه الج
كتله وليد غيرت افكاري دوام الحال من المحال محد يبقى على افكاره
كال اي الكليه كلبتج وغيرتج جان تفكريج بسيط ومحدود هسه توسع وكمتي تفكرين اكبر من راسج
كتله راسي جبير بجال جدي مو بفضل احد
كام يصيح كومي كومي خربتي علينا اليوم
رجعنا وجان طول الطريق كالب وجهه
طول الطريق افكر شبي بالله بشنو غلطت هيج يسوي وهيج يعاملني مرة استهزاء ومرة اعصاب ..
رجعت للبيت جدي هواي فرح بنجاحي وباركلي هو وعمو حسن وشوكة جانت مطنكرة لان بطلوا مشروعها وحتى اني ماتحاجيني ...
مرت الايام بين مد وجزر بالبيت ومثل كل يوم قبل لاانام امر على جدي رحت يمه واول ماطبيت
استقبلني بابتسامته الحلوة الي تلمع بيها عيونه من يشوفني
كال هلا هسه اريد اجي يمج عندي سالفه وياج
كتله متفاجاة ومتسائلة كول جدي
كال اسمعيني اكمل كلامي للاخير يالله تحجين ولو اني متاكد من جوابج بس عسى ولعل تقتنعين لان اني حتى من تمشين اعرف بشنو تفكرين
كتله كول شعدنا نسمع يابعد گلبي گلبك وروحي رووحك
كال بويه اني كبرت ورجلي والكبر واريد اطمن عليج ويرتاح بالي منج واريدج تتزوجين وليد
اني انصدمت من كلام جدي كمت اضحك تفاجئت بالموضوع
كتله تحجي صدك جدي .. اتزوج منو ؟؟ وليد ؟
كال اي وين تلكين احسن منه ابن عمج وتعرفي ورزن وثكيل صايم مصلي ومثقف شتردين بعد وابن عمج شيال همج مثل مايكولون ...
كتله وليد ماكو احسن منه وذهب مصفى واحبه واموت عليه بس مثل اخويه ربينا سوه هو يمينك واني يسارك وهو عزوة وظهر وسند الي بعدك بس مو اتزوجه شون فكرت بيها هاي يجدي
كال ماكو مثله ولااحسن منه
كتله اي ونعم منه بس مااتقبله غير اخوي جدي انسى الموضوع ولاتفتحه مااكدر مستحيل
كال فكري انه هسه مااعتبرج رديتي فكري بويه
كتله الموضوع منتهي جدي
مر اسبوع خلاله ماصار اي لقاء ويا وليد وردت اشوفه احجي وياه بالموضوع الي كاله الي جدي ومتاكدة اكيد رايه من راي اني ، هذا جدي منين اجا بهاي الفكره
طبعا عمو حامد وهناء كلبوا ويايه ١٨٠ درجه فجاة صرت بتهم وعزيزتهم ويحبوني ويسمعوني احلى الكلام وين اكو مثلي وبجمالي وبيبي كامت تكتب اشعار بيه
حتى ماحبيت وجههم الجديد لان ملايك الهم وممتعودة عليه
مصدومه بالبشر ليش لازم من مصلحتهم يتم الزواج حتى الورث يصفا الهم ويبقى بينهم يتقاسمونه ومايدخل غريب بينهم
رحت لجدي كعدت يمه سألني فكرتي بويه ؟
كتله جدي اي فكرت واني رافضه الموضوع نهائي جدي مااشوفه غير اخوي
كال بس هو ابن عمج واولى بيج من الغريب ويكدر ينهي عليج ياخذج غصب عنج وانتي تعرفين زين وهو رادج وهاويج من زمان
كتله خليك من نفسيتي وهو كونا اخوي وربيت وياه تعال نحسبها حساب عرب اني مكسورة جناح ووحيدة تشوف حالي بعد عمر طويل الك وليد تشوفه مثل نسر يحابي عليه ويفترس الي يكرب مني ؟
لو تشوفه طير بربري يوطي للريح جدي اني مااريد اجرح بكلامي بوليد لان احبه واموت عليه بس هو
سكتت ماكملت كلامي ...
كال كملي ليش سكتتي ؟
كتله عوف الحجي
كال لا كولي اريد اسمعج
كتله وليد فقير ومايحب المشاكل ودائما يسايس الامور مايوم دافعلي جنت اني بسده دائما كل عركه تلكاني وراه جدي ربيتني قويه اني اريد واحد اقوى مني انام بسده واني مطمئنه وماخايفه من باجر ، جدي اني عندي امل باجر اطلع من هذا البيت اذا اخذت وليد معناه حكمت عليه طول عمري مدفونه بالحياة ووليد لحد هسه مالمحلي رايدني ، جدي وليستحي من بت عمه مايخلف مو هذا المثل كالوه لو لا ؟
جدي اكتفا بهز راسه
بعدها كال كبرتي دره وصار الشور من راسج
كتله مااكبر عليك جدي ومنك تعلمت واحسبها وقيسها من كل جهه ويا جدي والنفس شون تجبرها هذا عمر لايوم ولايومين عمري لراح تعب بتعب والجاي هم شلون اريد اعيش وشوف كلامي صح لو لا
طلعت من جدي ورحت لغرفتي شوي وندك الباب
رحت فتحته صار وليد بوجهي
جان ضايج واعصاب كتله تفضل وليد
طب وعاف الباب مفتوح
التاف عليه يفرك بوجهه متوتر ويتنفس بتوتر
كال ليش رفضتيني دره
كتله اخوي انت مااكدر وليد
كال لا مو اخوج امي هناء وابوي حامد وامج تالنا وابوج سلام منين اخوان هاي منين جبتيها مو حجة هاي دره جاوبي ليش
كتله ربينا سوه اكلنا وشربنا وضحكنا حتى اسرارنا سوه
كال بعده ابالج مصطفى؟
كتله ابد وداعة جدي لامصطفى ولاغيره
كال انتظرج مو الا هسه
كتله ابد والله الموضوع منتهي
كال بحزن وحسرة ماكو امل يعني
كتله ابد ولا واحد بالمية
كال بقهر لاتصعبها عليه دره
جاوبته بحزن مو بيدي
كال بعصبية لعد اذا مو الي ماتصيرين لغيري تبقين هذا حالج واكف لا الي ولا لغيري
هزيت راسي و كتله بنبرة بكاء هذا هو وليد
كال اني باجر راح اخطب
كتله افرحلك اخوي ويعرس اكلب الدنيا
كال وانتي اخليج لاطايله ارض ولاسما واشوف منو يكرب صوبج سمعتي ؟
هزيت راسي باي ضرب الباب قوي وطلع ردت اسد الباب شفت جدي وراه وسمع الكلام كله
باوعتله لجدي بحيرة
كال بحسرة جدي مذبوح الله يعينه
بعد ما الكل سمع بموضوع رفضي صار الجو بالبيت متكهرب وكلها كالبه وجهها عليه
بس ميخالف فتره وتعدي بس الي اكثر شي ماذيني جفا جدي ويايه حيل صار جاف وياي
مع العلم حسيته مقتنع برايي بس ماراد يطلع منه الرفض وذبها براسي وعزيز عنده وليد
بس اكيد مو اكثر مني كله يهون مثل مايكولون وجع ساعه ولا كل ساعه
واشتغل موشح بيبي وهناء وطلعني مااسوى قندره عتيكه
وحتى شوكه ماخلصت منها انواع الغلط مالذة وطاب وصرت حتى يهوديه بعينهم
واني اصبر روحي واكول فتره وتعدي ويتقبلون الموضوع
فد يوم كاعده باليل اندك الباب فتحته لكيت وليد ضحكت بوجهه
جان تعبان شكله مو بخير ابد وبيده جكاره
باوعلي مفهور كال بغصة ليش
كتله تدنى نفسك على شوكه اني نفس الشي والله وداعة جدي مااجذب عليك انت غالي عندي واعزك بس ماترهم ياخويه
كال الله كريم وراح
كعدت وراها بايام على صوت الهلاهل
كمت من الفراش و طلعت من الغرفة
لكيت شوكه تهلهل وكفت يمها متسائلة
باوعتلي وكالت وليد يريد يخطب رنا بت عمو حاتم ابو عادل
اني فرحتله البنيه حبابه وفقيره وحلوه ونازكه نعرفها والصراحه تلوك الوليد ومن نفس النمط مالته
شفته كاعد ع الكروبته وكفت يمه
باركتله وكتله زين مااختاريت ادب واخلاق وجمال
رفع راسه وباوعلي هز راسه صافن بوجههي عبالك يدور على شي بي
هناء كالت بحقد ونبرة تقطر سم
- اي والله احسن من الكفار واحلى منج بمية قاط
درت وجهي عليها كتلها يستاهل وليد ربي يسعده ويحفظه
جدي جان يباوع عليه مافهمت نظرته كالهم جدي روحن اتفقن على المهر والنيشان وكعدة الزلم
شوكه ظلت تهوس وتدبج بت عمنا واختنا تصير جتنا مانريد الغريبه تدوس عتبتنا وتاشر عليه يعني هسه اني غريبه صرت ظليت اضحك
ويهوسن ويدبجن. واني هم هلهلت لان وليد غالي مااريد اخسره هو شافني هيج عصب طلع بسرعة والشر من بين عيونه يتطاير
ركضت وراه كتله عاشت ايدك رنا خوش بنيه منو كلك عليها ؟
التفتت عليه نفخ وتحسر ولزم جبينه
كال جدي عاجبته واني كلت خل اخذ على ذوقه مادام گلبي ماعرف يختار
كتله مقدره وضعك وحقك وشتحجي ماازعل اذا الاخت ماتتحمل اخوها منو يتحمله وضربته خفيف على جتفه ...
هو مابدى رد فعل
كتله جدي زعلان ويايه ماتجي صالحنا ؟
كال لا بعد ماكو نفس قبل اني واحد جديد وليد القديم طار باخ تغيرت
جان يحجي بحركة
كتله صدك تحجي وليد ؟
كال بعصبية والله لعد شنو
كتله لعد اذا تحسب عشرتنا وخوتنا قبل عندك بيها غايه وهسه ماحققتها لعد جنت تمثل وحالك من حالهم اني مااضيع العشره والكلام الي سمعته راح انساه
كال لاتنسي وبعدني عد كلمتي ماصرتي الي ماتصيرين لغيري ماشي
باي ...
عفت وليد يمشي ويلتفت عليه بيده جكارته
دخلت افكر شلون لازم اصالح وياجدي جان قبل اذا يزعل جدي وليد اليصلح بينا وهالمره الزعلة بسب وليد
بعدين فكرت كلت عمو فيصل يحلها ماكو غيره
دكيت عليه جاوب كتله شونك عمو انت ابو الكلفات وعايفتك للصعبات
كال هاا يا ويل يابه منو وياج
كتله اول مره تصير ازعل وياجدي ونريدك تصالحنا
كال شعجب كتله وليد خطبني ومااقبل وجدي موافق
سكت عموو
صحت الو الو عمو تسمعني
كال اسمعج
كتله اني ماقبلت هو مثل اخويه وماترهم السالفه واصلا راح يخطب بت ابو عادل
جان يضحك كال يابه سهله اني اجي واصالحكم
كتله بس عمو لاتكول مزاعلين علساس ماتدري
ضحك بصوت كال تمام
كتله تسلم ياحلال مشاكل دره
ضحك وكال مع السلامه نهيت المكالمة
رجعت النسري جدي
لكيته ديدخن بالديوان دخلت ببتسامة هو باوعلي ورجع يدخن كال … شنو تندمتي على وليد؟
هزيت راسي بنفي.. لا ابد وخصمت هذا الموضوع بس يا جدي كلها يهون زعلها يرضون ما يرضون محد يهمني بس انت زعلك مر مثل العلقم عليه مستحيل انام وانت زعلان
كملت ببتسامة حزينه.. بروح ابوية ترضا عليه تعرف غلاتك ومعزتك عندي تدري انت من تزعل مني احس فعلا اني يتيمة ومحد الي تعرف ليش ؟ لان انت ابويه واخويه وامي انت اعز من روحي ما حسيت واني وياك باليتم ابد بس من اشوفك هيج مجافيني حسيت بالزعل والغيظ وحسيت فعلا اليوم مات ابويه وتركتني امي
جر نفس ورد عليه.. لو ما سويت هيج جا خسرت وليد وانتم اعزاز عندي يجدي ما اكدر ازعلكم صرت مثل بلاع الموس لاني بالعه ومرتاح ولاني مطلعه ومرتاح
حسيت بموقفة وحسيت بكل معاناتة ومشاعره التلفانة وصلتني تقربت منه بست راسه واديه واعتذرت منه بست خدوده وخشمه وعيونه
وهو يضحك .. هههه كافي يجدي كافي راح اموت ناقص من وراج
ضحكت واندك الباب اجه خطار الجدي طلعت اركض وهو يصيح عليه.. عود ما اوصيج خابري عمج فيصل وكليله تصالحنا اني وجدي هههه
ضحكت وطلعت وهو التهى بخطاره
بعد ما اتفقوا على الخطوبة جدي عزم العالم وحضر الذبايح وما خلة شي يعتب عليه
عوائلنه نقسمت قسمين قسم يمنة وقسم يم اهل العروس لان تصير العروس من اقاربنه
بيت عمو فيصل انظموا للقسم الي احنه بي يعني الاهل العريس مو للعروس
جان البيت ضجة بسبب الناس الي بيه والناس الرايحة والجايه والجهال
من غير هوسة شوكة كل شويه ولابسه ثوب شكل وتهز وتركص وهلهولتها تفزز النايم بگبره وتصيح… اخت العريس كليجايه تتدحرج جويه الجربايه
يوم الي واذبح طلي لا بالعباس اذبح عجل مو بس طلي انتم بس ادعولي اتزوجج وادللوا بالعباس اليسطر بالحضرة اخليكم توردون وتنشنشون على العشاء الاسوي بعرسي
ومندمجة ومستمتعه اخر استمتاع وكل شويه واني اهديها اكلها عيب دكول لا مالج شغل هاي خطه شلون اصيد عريس لان بس اني اركص وفرفوشه هسه كلها تخطبني النسوان ما ادور معدلات تدور راگوصات
عافتني وراحت تبدل وهي منطلقه
بعدها جدو وعمو فيصل دزوا عليه بالطارمة خليت وطلعت سلمت عليهم
كتله بزعل واني اتحارش بجدو.. عمو فيصل ترضا جدو زعلان عليه ومجافيني
كال … لا شلون يصير ما ارضى اكيد
كتله وهي مسوية بريئة.. بعد صارت وزعل
ما سولفت المشكلة الصارت لان خفت جدو ميقبل نطلع اسرار بيتنه
بعدها كمل عمو كلامه بحب.. لا هو يتعزز عليج انتي خوش دره دره مال الله وين يلكه مثلج
ضحكت بفخر.. الله الله هاي العمام الزينة الينشد بيها الظهر وانعترف بشهادتهم ونعلگها بحايط الاستقبال
لعد قابل عمو حامد جان يلبس دشداشة سوده واني عيوني مدمعة من العاطفة عبالي حزين على بابا طلع يلبس اسود حتى يعكس على بشرته وتطلعه ابيض
هم ضحكوا وجدو باس راسي وحضني كال.. وانه اكدر ازعل على درتي
عمار ضحك كال.. اكلج هو الاسود من يلبس اسود يطلع جنه غراب بعد شلون عمج يصير ابيض هههه
رفعت حاجب .. شدعواك عيني عاد جاملني سايسني لو كلامك كلمة حق يراد بيها باطل
ظلوا يضحكون عليه وعرفوني اني جذابه ودا اصبغ بيهم لذلك جاملوني
كال .. هااا
كتله… والله بس هاي عدتك مرتك فاتن
كال.. شبيها مرتي
ضحك عمو فيصل واسنانة عقد لؤلؤ ناصعات البياض ابيض من مستقبلي وحياتي وانظف من اخلاقي واخلاق شوكة
ابتسمت.. اصيحلك شوكة هي تحجي
ضحك كال.. يله بله
خليت ورحت الها كتلها تعالي عمو فيصل وعمار يردون يسلمون عليج
هي حضنتني حيييل كسرتني من حماسها.. عليج العباس مو كتلج يحبووني يحبني هو يحبني
مشت متحمسه ورجعت كالت اوكفي اطلع كذلتي وزلوفي خاب امووت عليج نعال موواح
هزيت ايدي وطلعنه سلمت عليهم وهي تضحك
كلها عمار شبيها مورتي
جاوبته بقرف.. اييع صفره وحية شلون تبوس دكول ملاطه مال حليب
استغرب كلها.. ملاطه شنو
كالت بخبال.. خاب شبيك هاي النسوان يحطنها يطلعن حليب من ..
سديت حلكها وماخليتها تحجي خرب شكد عيب شلون تجفص واني الثولة جبتها واجيت اركض
كتلها .. ولج عيب شلون هيج تحجين
ردت علية .. يطبهم مرض حتى يتادبون ويعرفون شلون يختارون عايفين الجمال كله $ تأشر على نفسها$ ويركضون وره الخايسات الصفر جاب ام اذانات واجه اذاناتها جنهن اريل بيت ام سوادي
كملت بحماس وعضت شفتها… اووووويلي خايبه اوويلي تلوميني اذا احجي؟ شفتي فصولتي شطالع بالدشداشة البيضه ليشوفة يكول صار شهر منكع بالقاصر ولج احبه من دهر صابه وصاب امة
اخذتها ورحت بعدها رحنه لبيت العروس حتى نسوي عقد القران اخذنه الزفه موسيقى وركص حيل تونسنه
وصلنه لبيت العروس شفنه العروس ما شاءالله تجنن بيضه بملامح طفولية ناعمة عبالك حمامة لابسه فستان وردي زايدها تألق وجمال وهي هماتين دمها عسل حيل محبوبه
بعد ما قروا الفاتحه وعقدوا دخل وليد هم ما شاء الله عليه طالع حيل حلو ونازك لبسها النيشان وهي جانت تبتسم بخجل وهو همات جان خجلان
من صدك تمنيت الهم الذرية الصالحة والسعادة الأبديه ويتمم الهم على خير لان وليد حيل يستاهل وهي كذلك
جنه نهوس ونركص وحيل فرحانين بس هو جانت عيونه عليه
ارتبكت بس بعدها شجعت نفسي وهوست اله كتله اخونا خوش اخو يستاهل الهوسه
خلصت الخطوبه ورجعنا للبيت بس هم رموا بباب بيت العروس وبعدها رجعنه عزلنا البيت وكل من راحت نامت ذبينه روحنه موتة من التعب
كعدت من النوم بعد ساعات طويله كعدت عرگانة ومخنوكة وضايجة كلت عادي هاي دائما من اخذ ساعات إضافية من النوم هيج يصير ويايه
طلعت فتحت عيوني مصدومة متفاجئة
يتبع
ابداع ام عبد الرحمن تسلم ايدج 😍
رواية طَوفانْ رَجُلْ الفصل السادس عشر 16 - بقلم نورا ناصر
السلام عليكم ورحمة الله وبركاته
رواية طوفان رجل
الفصل الثاني عشر
أنا وأنت
والكَثيرُ مِن التَناقُضات،
خَوفي و إيمَانُك
رَحيلُك وبَقائي
مُحاولة التَمسُك والنُفورُ
في ذات الوَقتِ،
كِلانا مُعقَد
كُل الأمور التي تَجري
بينَنا مُعقده أيضًا .
...
.
.
...
طلعت مفرفحه اريد هواء بارد گلبي حار احسه ، بدربي توجهت للثلاجة فتحتها طلعت بارد وجرعته مرة وحدة
تحسرت ولزمت رقبتي
واني على هالحال واسمع صوت وشهكة وونين
باوعت للحديقة من الشباك الي جان مفتوح
شفت عمو حسن ووليد كاعدين
ووليد يبجي اي والله يبجي مخليه اديه بين رجليه ومدنك ووجهه احمر صاير ويشهگ
شصار بيه متت من قهر لزمت حدايد الشباك وعصرتهن حيل ، گلبي اتفطر عليه بس شبيدي والله مابيدي عليه شي ..
جان عمو حسن واكف يمه واسمعه يكوله مو قسمتك ونصيبك وليد اقنع بهذا الشئ ولا تأذي نفسك
هز راسه وگاله حسن اني ربيتها بمي العيون تعرف شنو مي العيون بيهن سكيتها
عمو حسن خله ايده على ركبته وكاله حاول تنسى خطبت هسه فكر بخطيبتك لا تضعف انت قوي وليد ماتضعفك مره
شهگ ومسح وجهه شلون بيه حسن اني اعرف حتى طول شعرها شكد حتى رموشها اعرف عددهم شنو احجي حتى الكمة اغص عليها
انت شايفني على الغده ابدل ماعوني بماعونها بدون ماتدري لان اعرف امي ماتداريها بالاكل
وظل يفرك باديه وكال اووف شكول وشحجي عيوني ماتملها ضحكتها تروي روحي اليابسة شنو وشنو ااااااااخ يابه
اني صرت نسخة جدي حتى اعجبها هلكد مااشوفها مبهورة بجدي بعد شسوي كلي حسن شسوي
جاوبه عمو حسن بعد شسوي يعني اقتنع بقسمتك ماكو غيرها باجر تنسى تنشغل بمرتك يصير عندك اطفال
رد عليه بمرارة شلون وهي گبالي
هزيت راسي ورجعت لغرفتي مااريد اسمع اديه على اذني اسد بيهم واشهك ...
كعدت على الجرباية كمت ابجي تصورت حالته ماتغيب عن عيني ، ماتصورت هيج يحبني او باله يمي ولا يوم لمح ولا يوم حسيته فرقني عن شوكه حتى من يحجي على جمالي كل الي في بالي ينطي ثقة الي لان يتيمة
هو انسان طيب مايأذي و بار بأهله شكد ابوه يدوس وياه مرات بس يتحمله ويطول خلكه وياه حتى لو يتجاوز عليه هو هذا طبعه ويا لكل مو بس ويايه
لذلك اني ما افيده ولا هو يفيدني منتراهم ولا نتوالم هو يتعب ويايه واني اتعب وياه اكثر اثلا انتهي
واذا تزوجته مو بس الدراسة راح افلس منها هواي شغلات خاصة هناء وحامد هسه مو تحت جنحهم وشمسوين بيه لعد لو اصير لأبنهم شون راح يعاملوني
كل شوي اريد اكوم اواسي هذا وليد مو اي شخص
ظليت اكوم واترردد واكعد ، لا لاابد مااستسلم اله ، ماريده يتأمل بيه خلي يكطع الامل ويتعود على عدم وجودي لان كل هذا التعلق خلي ينقهر ويبجي يوم يومين وينسى وجع ساعة ولا وجع دوم
والبنية الي خطبها خطية شنو ذنبها البنية وردة وحبابة وحلوة من كل الجوانب حلوة وتكدر تنسي اي تكدر هي كدها ..
ظليت اقنع بروحي بهذا الكلام اي خليني اعيش بأمل اخلص من هسه احسن ماافقد كولشي واظل بنفس الحلقة المغلقة الي حولي اظل افتر طول عمري الله يداوي جرحه الله موجود ظليت ادعيله بالسعادة والصبر وكون يتأقلم وياه خطيبته وينساني بلكي تعوضه هي وهو يميل بكفة قلبه الها والله هي تنحب وهو حباب ..
مرت الايام الي بعدها واني وحيدة ومختليه بنفسي اقضي وقتي بالقراءة وبالمكتبة مالة بابا واشغل نفسي عن القيل والقال والكلام المسموم الي ينكال الي بدون وجه حق
وهم بسرعة راحوا حددوا موعد العرس لأن اقارب وماكو داعي تتعطل وتطول تصير محلووة وتكثر المشاكل حسب رأيهم همه
وراحوا كلهم للسوك واشتروا ملابس ومحد يجي الي ويكول امشي ويانا جنت منسية فد نوب واسمع بس
صوت الهلاهل ماسألت ولادتخلت بأي شي ولا عبالك عرس اخويه الي جنت اشاركه ويشاركني بكل شي يخصنا
قبل عرس وليد جنت محبوسة بغرفتي كالعادة
واني كاعدة اندكت الباب كمت فتحتها
شفت وليد باوعتله ثواني ونزلت عيني لان صار الحجي بالعيون بس مو مثل قبل جنت اخلي عيني بعيونه شكد مايصير ومااحسب حساب هسه لا صرت احسب حساب حتى للنظرة وهالشي مزعج من اشوف نفسي متقيدة وي السخص الي جان بالنسبة هواي صديق اخ ..
كال بعد ما جر حسرة حسيتها طلعت من گلبه
شلونج دره شو ماكو محد يشوفج ؟
كتله بابتسامة وفرحت لسؤاله اني موجوده وين اروح هنا بالغرفة اغلب وقتي انت شخبارك تعال اكعد
كال سوينا جاي وتعاي بالحديقة احسن
كتله تمام بفرحة تمنيت بداخلي يكون تقبل الواقع وبدا يتعافى مني بس اكيد مانرجع مثل الاول وهالشي مخلف غصة بقلبي شكد تمنيت مانخرب ولا يخربنا هالحب الي من طرف واحد..
سويت جاي وحضرت الصينية وخليت بيها قطع بسكويت ويه اكواب الجاي ولحكته للحديقة واني اتمشى باتجاهه وبيدي الصينية وهو محاوطني بنظراته ويباوعلي من راسي لخطواتي
ارتبكت زين ماوكعت الصينية صرت متقيدة
كتله زين مااختاريت رنا ذهب
ضحك كال هذا رايج بيها
هزيت راسي باصرار
سكت فرك اديه دنك ع الكاع بعدها رفع راسه باوعلي
بس نظراتنا مانثبتها ثواني بعيون بعض وهالشي يوترني
كال مااشتريتي ملابس لعرسي ؟
كتله عندي هوايه
كال شفتي اذا مااذكرج محد يذكرج مو
ضحكت كتله لا والله اصلا جدي كلي قبلك وعمو حسن هم وادري بيك ماتقصر والنعم منك خويه ماتنساني واني ماردت عندي هواي مالة الدوام
كال اني بعدني مامشترتي قاط لعرسي شنو رايج باجر نشتري سوه...
فرحت كولش حسيت رجعت الماي لمجاريها
كتله صدك تحجي
كال اي بخجل وتوتر وابتسامة
كلت الله يفرحك ويسعدك ويرزقك الذرية الصالحة الي مو مثل لا هناء ولا حامد
كام يضحك وتقرب باسني من راسي كال بالعشرة الصبح
نطلع اني وياج حضري نفسج
كتله تمام بخفوت من باسني من راسي ضجت لان جنت قبل اشوفها اخويه هسه عبالك صارت بيها شك تعوذت من الشيطان
المهم رجع طبعه ويايه حتى لو القلب مخالف هسه تجي رنا وينساني وينسى عشيرتي
ركضت لجدي قبل لاينام وحجيتله كال بويه ابعدي شكد ماتكدرين ومرته راح تجي اطيها مجال تكسبه ابعدي عن
عينه
يابويه عشك الصغر يوجع بالعظم لحد الموت خاصة للرجال ماينساه لو شما صار يبقى بالگلب اكو اليكدر يضمه ويمشي حياته واكو اليتعب من وراه ومايعرف يخلص منه
زين بويه
هزيت راسي باي انطاني فلوس وبسته وغطيته وطلعت
كلام جدي ماخلاني انام وحسيته ضايج على وليد شكد اني كضيت حياتي كلها وياجدي بس هو ظل متواصل وياه اكثر وياه بالفصول والشغل والطلعات كلها وياجدي صار جدي اذا ماكو وليد عبالك تايه بلياه وحتى وليد صار يشبه جدي كولش نسخة منه
يمكن وليد لو من غير عائلة يعتبر نصيب زين ولد حلو ومثقف ورزن وثكيل متعين وماديا زين والناس كلها تحبه
بحيث يكولون معقولة هذا ابن حامد سبحان الله حتى باليوم الي راح خطب رنا لليل ردوا الجواب ابد ماتأخروا
لان هو ماعليه قصور ابد الكل يعرفه اي بنيه تتمنى هيج نصيب بس مو اني هاي البنية وللاسف ..
للصبح تريكنا وطلعنا الحمد لله طول ما احنه نفتر بالسوك
حسيته سعيد واخذ قاط نيلي ورهمنا قميص سمائي ورباط ابيض ومقفل بسمائي ونيلي وحذاء يخبل طلع
اني من داخلي واعماقي ادعيله ربي يسعده ويوفقه وينزع حبي من قلبه مااريده يتأذى وليد انسان مستقيم ويخاف الله بابسط الاشياء يستاهل التوفيق والسعادة
اني اخذت مثل زي الفروسيه جان موديله بوكتها يصير قميص ابيض بي كشكش بالردن واليلك اسود وبي جلد من الجوانب قيطان تصير على شكل xالقميص يصير طويل والليك اقصر والبنطرون جلد اسود ...
وليد كال هذا مايوالم العرس تعرفين لبس البنات شنو ؟
( احنه عدنا البنات ماتلبس بنطرون ابدا اما فستان او تنوره وقميص ممنوع منعا باتا لهذا نسوان عدهم اني مسترجله لان جنت اطلع وياجدي والبس البنطرون ومو محجبه بس والله ابد مالبس ضيق كله عريض وحتى جدي عمره مااعترض على لبسي )
جاوبته وليد هو عريض وطويل موضيق واشرت على راسي هذا قفل على هذا اللبس
كال هو شنو طيح حظنا غير هذا واشر على الراسي
ضحكنا اثنينا .. رحنا تغدينا ورجعنا للبيت لليل دز عليه جدي لكيته اعصاب نار تفاجئت كتله خير جدي شصاير؟
جر ايدي وسحلني ويحجي بصوت ناصي شنو حاجيه ويا وليد
كتله ماحجينا شي كله على الملابس ليش
كال اجا يريد يبطل الخطبه والعرس بعد يومين
كتله مصدووومة جدي تحجيي صددك
كال والله ولج تخبل حرام عليه البنية يخرب سمعتها بس انه ماسكتتت تعرفين شنو كتله
هزيت راسي متسائلة شنو
كال كتله كفو دره ماقبلت بيك لان تعرفك مو صاحب موقف وكلمة لان هيج تلعب باعراض ناس ساعة غضب تخطب وساعة تبدل وتعوفها بويه والبنية شنو ذنبها الناس ماتاكل وجههم ليش عافها قبل يومين من الزفة كمت وصحت بي هي لعبة وللك تلصم وتسكت مااسمع صوتك
... سكتت مصدومه فعلا شنو ذنبها البنية!
خلص جدي كلامه وهو يتوعد كال والله اكسر ظهره اذا كسر بخت البنية
كتله لا جدي والله وليد مايسويه بس يمكن لحظة ضعف
كال وانتي جلبه بت الجلاب مو كتلج عوفي عوفي شكوو مجلبة بي ولج
ظليت ساكته كال انعل ابوكم لابو حتى الخلفكم حرت بيكم واباهتكم مرتاحة
اعصابه نار جدي و يحرك بالجكاير حررك
واني خايفة ولا كلمة
انوب كام طردني اطلعي اطلعي برا برا واحد انكس من الثاني لابارك الله بيكم ...
طلعت خايفة وضايجة من كلام جدي رحت للهول كعدت اكل بأظافري
واني على هالحال ورا شويه وطب وليد شفته كلبت وجهي ورحت واجهته كتله وتلومني ليش ماقبلت بيك اذا البنيه انكتبت باسمك وانت رجعت بكلامك وليد الرجال افعال مو اقوال سمعت زين ؟؟
تنفس بعمق باوع لعيوني بخزرة ، هز راسه وماحجا شي ولانطق اي حرف
راح طب على جدي تبعته شفته باس راسه ومدنك وبعيونه دموع ..
طلعت من عدهم واسمع صوتهم واصل لبرة
وليد يكوله جدي مو حبيت انت من قبل وعرفت لوعة الحب مو كتلي لحد هسه بگلبك بعدها
كاله جدي اي بس جانت رايدتني و ابن عمها اخذها انت ياالكديش ماتريدك البنية لو تظل عمر شايفتك اخوها اوعى على روحك خايب جانا مااكيف تاخذك بس بعد حكم الگلب
بويه تعوذ من الشيطان واستهدى برحمانك الله يهديك يابويه لاتوجع گلبي بعد گلبي گلبك
كاله بحزن اسم الله على گلبك جدي
خليتهم ورحت والغصة برووحي ...
صار العرس ومثل مايكولون المعرسين اثنين والمجانين الفين ، جدي سوا عرس جبير لوليد لان هو الحفيد الوحيد عدنا
(جدي عدنا حفيد بس وليد بس جدو قاسم اخوه عنده ١٢ ولد متزوج نسوان اثنين وذوله ل١٢ اقل واحد عنده اربعة
يعني من يلتمون عزوه جبيره وعمرهم مااحسسوا وليد بوحدته
جانوا وياه دائما بس هو علاقته بعادل ومصطفى اكثر قويه )
جدي عزم الدنيا كلها عرس كولش جبير والهوسات والمهاويل يامحلاها
وجدي يتجاوب وياهم تجنن وناس من المحافظات لان جدي هاي العالم كلها تعرفه
وهو صاحب واجب واحنا نباوع من فوك رجلينا وجعتنا من الوكفه وماملينا
وشوكه تكول كون اروح بنصهم ادبج لازم واحد اثول ينعجب بيه
البنات يضحكن ورزان اخت عمو فيصل ويانا
شوكه تكول اني عندي امل بفيصل لابد وان يوصلني السرا ومايلكا مره وياخذني
ووجهت كلامها لرزان كليله عليه رزين حبابة
كالتلها ميخالف انتي ورده شوكه وكلها تحبج
جاوبتها مااريد يحبوني بيش الكيلو الحب اريد اعرس اعرس راح اموت ياناس الحكوني
احنه ميتين ضحك على سوالفها
بعدين صاحوا علينا نروح نحني ادين العروس
طلعنا من بيتنا و صعدنا بالسيارات
وصلنا لبيتهم جانت العروس حلوه بمعنى الكلمه وتلوك الوليد
وهناك شفت بيبي زهره اموت عليها جانت حنينه عليه وطيبه بشكل ومن اهل الله
هي الي ربت عمو فيصل من ماتت امه رحت سلمت عليها وكتلها زعلانه منج لان مادزين عليه وتخلين حنه لشعري
كالت يابعد گلبي بطلت من مات محمد ( ابو فيصل )
كتلها الله يرحمه بيبي تدرين بعدج ماحنيت شعري
كالت سوده عليه لخاطرج اسوي وادز عليج
ضحكت وبستها امووت عليها بيبي شافتني احجي وياها لان هي تصير مرة حماها
اشرتليى من بعيد رحت عليها
دنت حلكها يم اذني كالت تكلي شعندج وياها كاعدة وتبسبسين ؟
كتلها ماعندي شي اني احبها واجيت اسلم عليها
كرصتني كرصه خلتني اكمز بمكاني من الوجع
عفتها وابتعدت عنها ...
احنه علينا العشا والحفلة ويعزمون بالحنه
الزفه بس للكرايب واحنه عشيره بحالها
اجه ثاني يوم متنا من الصخره جيب وودي ومتنا يله خلص الغدا وكمنا احنا البنات للمواعين ظلينا نغسل
اجه عمو حامد كال بعد ساعه للزفه هو بس كال هيج
كلها فلتت ووكعن براسي ظليت اغسل وحدي
وبيبي فوك راسي عايفه النسوان والخطار تركض وراي شوون بالحظ الاعوج
ظلن كلهن يركض ينتظرن السيارات كل شوي كالوا راح تجي واني اجلف
طب جدي شافني مامبدله كال عوفي البيدج اريدج كون العالم تصف لحلاج اليوم سمعتي؟
هزيت راسي رحت بعدلت ووحده من جناين عمو قاسم كالت تعاي اعدل شعرج ليش هيج كتلها جدي مايقبل
(اذكرت جنت من الح على جدي اكص منه مايقبل هو ثخين كولش وسرح واسود كولش بس متعب وهو جدي سوده عليه يجبلي زيوت من سوريا لشعري ويخليلي بيده ولايمل كل اسبوع مره من المرات من الثخن ماكدر يكصه صاح للوليد وخلاه يكصه اذكرت وليد شون يقلب بي بيده ويكول ماشاء الله هسه بديت اربط شغلات بحبه )
كالت بس ارتبه شويه صدك كصته مسطره
كالتلي خلي كحلة على عيونج
كتلها مامجربه ابد ولا مرة
كالت عرس وهوسه البنات اشكال مسويه تعاي اخليج
كعدتني و خلت بعيني كحلة و مسكاره
من خلصت اتفاجئت بعيوني وجمالها.
اني صفنت بيهم هي ظلت تكول ماشاء الله وكل شوي تباوع وترجع تعدل بعيوني كالت عيينا عيون ليلى العطار
ابتسمت وتشكرت منها
سمعتهم يكولون الزفه طلعت رحت اركض كلها رايحه باقي سيارة العريس وجدي كاعد بالصدر وعمو قيصر يسوق واصلا هي سيارته السودة نفسها
ركضت صحت جدي عافوني وراحوا جدي ظل يكول ماشاء الله بويه شنو هالعيون!
باوعت لعمو فيصل يمه بصدر يباوع عليه
سلمت عليه كتله شلونك عمو فيصل
كال اصعدي ويانا
جان عمو فيصل صافن وبيده جكاره هيبه يلمع دشداشه بيضة بعباته جوزي واطرافها ذهبي
والساعه والمحابس والعكال يلوك بس اله
ديرتنا كلها ماكو هيج نزاكه ونظافه وترتيب لان اصلا يطلعون للكاع وولدنا حتى داخلين كليات بس مو هيج تنسيق او يجذبني ترتيبنا لان عمامنا كلهم الي بعمره مبهذلين ملتهين بالكاع والحلال وعمو حامد بعمره بس عبالك ابوه
قرروا بسيارة عمو فيصل يزفون وليد ، بس احنا من عاداتنا النسوان تروح للعروس وهي قريبه علينا ويسون حلفه يالله يجي العريس
وبوقتها النسوان كلها راحت وحتى لو منو يفقدني اني بس بالكراب يذكرني
وبس ولد عمنا واكفين بالباب ولا مرة اكو بس اني
اجا عادل كال النسوان راحت تعاي اوصلج اني
جدي كله اي والله علواه وله انت شتكول فيصل ؟ تروح بسيارة عادل ؟
جدو جان يحجي بنبرة مبطنة بسخرية
عمو فيصل كال لالا تصعد ويانه
عادل يكول اني اوصلها وكل واحد يكول اني اوصلها واني واكفه يتعزمون والحفله راح تخلص واني طول عمري مااحضر حفلات بنات كله ويا الزلم يم جدي
اخر شي قررت وحسمت الموضوع وصعدت وياجدي
كلت لعادل مشكور اصعد وياهم
ظل عمو فيصل يباوع بالجامه
كال لو رايحه ويا عادل جان زعلت وياج وغمز لي
ضحكت تفاجت بعمو يغمز هو طول عمره ثكيل مااعرف استحيت منهم كولش ودنكت
بعدها اجا وليد وصعد باوع عليه وجان يشوفني كاعده يمه بمكان العروس ضحك
كال هاي شنو شمكعدج هنا
كتله بنبرة بكاء مصطنعة عافوني وراحو ا ولحكت بس عليكم
صفن بوجههي كال هاي شمسويه بعيونج
ضحكت كمت ارمش بيهم وسألته حلوات لو لا
ضحك كال ماكو احلى منهم بالكون كله
بعدين وعيت على نفسي شنو حجيت ردت اغير الموضوع كلت جدي جدي
كال شكو كتله حتى مانكتل مادام عمو فيصل موجود يفزعلي ووليد
كال هااا واني وين
كتله هسه بس تعرف تصف وياجدي
كال جدي كولي لاتغثينا راح نوصل للعروس
كتله كصيت من شعري ومديت راسي يم جدي
اني اصلا فاتحته لان جان موديل البيرمن (الكيرلي )
جدي جرني من شعري ويكولي اذا ماكسرت ايدج بسيطه
صحت اااخ جدي وكعت شعري وينك عمو فيصل فزعتك
كال عمو فيصل تستاهلين اكثر حيل بيج ليش تگصي
كله جدي مداري شعرها بيدي كل اسبوع ادهنه بزيت ويجر بشعري والباقي كله على جتف عمو فيصل لان صايره بين الكرسين
وجدي يسحل بشعري فك شعري
كتله والله صوجي لو ماحاجيه محد يدري
وليد كال اصلا من صعدت انتبهت وردت اكلج بس انتي حجيتي
كمت اضحك كتلهم خلوني اهوس لوليد ( اسمر ويخبل كل القوط تلوك عليه ) واعيدها مديت راسي بست جدي خاف زعلان كام يضحك
كتلهم (جدي حلو جدي زين جدي يحفظه الحسين ) اهوس واهلهل ...
جدي يضحك وفرحان كالي وفيصل وحد هوسيله
كتلهم ( فيصل هيبه وصدر ديوان للكلفات يردونه )
كام يضحك وصلنا نزل جدي وردت انزل كال وليد بصوت ناصي ريته مكانج ياوجع گلبي ...
يتبع ...
سلاما ياعراق 💔🥺
الرحمة لشهداء العراق جميعا...
رواية طَوفانْ رَجُلْ الفصل السابع عشر 17 - بقلم نورا ناصر
السلام عليكم
رواية طوفان رجل
الفصل 13
نورا ناصر
تعامل معي دائماً بمبدأ الإستثناء ، أنا لا أُشبه أحد✨️
.
.
انصدمت من وليد وحچاياته ماتوقعت تطلع منه وبهيج يوم وهيج وقت ، من الخجل احس گلبي وصل لحد اصبع رجلي الچبير
وبسرعة راحت عيوني على عمو فيصل باوعت عليه بالمراية الامامية لمحته فتح عيونه وعگد حواجبه ...
دنگت وعضيت شفتي ومديت ايدي لشعري اخلي ورا اذني ، جريت نفس وزفرته ليش هيج هسه شيكول عليه ياربي ...
والله مااحب انحط بهيج مواقف تصغرني
وتحسسني اني رخيصة ، اني احب روحي كولش ومدرايه نفسي واحساسي
ومااحب اخلي نفسي بمواقف مو حلوة مثل هالموقف
احسها تقلل من شأني ...
استغفرت ربي الدمعة صارت تلالي بعيني اختنگت كولش تمنيت توگف بيه الحياة والوقت والدنيا وكولشي ..
ماعونت اندل قفل باب السيارة افتحها بيد ترجف ودمي محروگ وانزل
......
نزلت وطبيت لبيت العروس ... وتصير بي حوش جبير وبي حديقة ، دخلت جان اكو هوسه وموسيقى ، النسوان جوه والزلم بقوا بره
من دخلت شفت شوكة تركص ذبت لحم وتسوي حركتها الشهيرة تهز ركبة وظلن تهوس بكيفها شامي عامي
تصفك وتصيح واحد واحد واحد وليد احلى واحد وحده وحده وحدة شوكه احلى وحده وخلت النسوان كلها تضحك
ماخلت هوسه ماكالتها اخر شي كالت ( طاحت النجمة على الجرف ياعباس (هاي هوسه بمحرم من جنا صغار نكولها من نحج )
ظلت تشبش هوسات محرم على هوسات الاعراس و تخيط وتخربط من فرحتها ماتعرف شتكول وشتسوي
والكل متونسيين عليها وخربانين ضحك
بعدها خلت ايدها على خصرها و كالت تعبتت وماكو كلب ابن كلب يخطبني درررووحن ......
ظل الكل يضحك وهاي تكوللها اني اخطبج وهاي الي تكووللها عرسج وزفتج على ايدي وهي تكوللها كلجن بس مزامط
اني رحت طبيت وياها بعد ما شويه تناسيت صدمتي بوليد
طبيت للوسطة وصحت (كلنا خواته لاتكولون وحيد)
وظليت ارددها ...
اجت شوكة لزمت ايدي وتدبج وياي هيي ولاتتعب رغم حر وعركانة بس ابد صامدة ومستمرة
باوعت شافت عمه صفيه مسويه روحها راقيه كاعده رجل على رجل وتباوع من ورى خشمها ومعاجبها تصرفات شوقة
راحت يمها شوكة ولا تكعد كالت الها : عمه كومي هوسي ويانا ليش بس كاعدة
ضحكت عمة صفية ضحكة ثقيلة يااا والله نسيت الهوسات كولها مااتذكر بعد شلولنا من هنا
كالت شوكة وهي تصفك باديها باستهزاء : شولنا مو؟؟ شولنا ؟؟؟ انهجم بيتج يا الغراب العطشان انهجم بيت البانية شكد تنفخ
عمه صفيه خزرتها واكتفت بالسكوت ماتكدر تعاركها لان شوكه ماكو حدود عدها لاي شي ... وداير مدايرها ناس يأثر على البرستيج مالتها ..
جريتها لاتكفشها لان تعبت وماتسيطر على نفسها
لزمتني من عكسي كالت العباس عليج ترگصين
كبل لا اكوللها اي او لا جابت وصله وشدتها على خصري
وظلوا يشجعوني الي داير مدايري
وهي طلعت أغنية لجورج وسوف (حد ينسى قلبه حدينسى عمره )
بيها راقصة اسمها اماني واني اعشق الرقص الشرقي اموت على الرقص عندي جينات روسية
امي جانت راقصة باليه الظاهر ورثت الرقص منها
شوكه كعدت البنات كلهم تلزم وحدتهن من ملابسها وتشمرها لهناااك وغصب تكعد بيهن
وتخزرهن وتهدد وعلي الي تكوم ترگص اكسر رجلها بس توصل للوسطة خلن بس دره ترگص
وهن خافن من شوكة وماادراك مااشوكة ...
اني بعد لحظة خجل غمضت عيوني وحسيت بالاغنية تتخلل لأسماعي انعزلت عن العالم ونسيت الدنيا بلشت اركص واتمايل باحترافية ...
فتحت عيوني اشوفهن صافنات عليه لحد ماكملت صار التصفيق حار
اجت شوكه يمي كالتلي وعلي مال اخذج للملهى احصل بيج كوومة فلوس ....
ضحكت وخليت ايدي على زندها كتلها رحم الله والديج ...
كالت ووالديج شووكة بالخدمة
دنكت داافك الوصلة الي على وركي اجتني بيبي تكرص بيه وصاكة اسنانها وتحجي
انت ولج صدك مال ملهى عرمه لاتستحين ولا تخافين
تحجي ابشع كلام ممكن ينكال بحقي وتكرص بيه حتى الوادم انتبهت ، وخرت عنها خطوات اصلا هرمون السعادة الي يحفزه الرقص جان مسيطر عليه وعفتها ووخرت من المكان الي هي بي
ظلت تعض شفتها وتتوعدلي بعيونها وبيدها وتسويلي حركة مال صبريلي لا هامها الناس ولا هامها احد
اجتها مرة كبيرة كالتلها عوفيها ام سلام شمسويه هسه هيه محد غريب بس نسوان وتونسنه على ركصها
هي ظلت تشمر باديها تشيلهم وتنزلهن وتحجي وين مااولي مفشلتني وغمتني كدامهم ...
خليتها تحرك بروحها وتخزرني ، ابتعدت عنها وصرت كبال المبردة جبيرة وشعري يطير كدام الهوا مالتها واباوع للكل واضحك
واجن البنات يمي متعجبات على رقصي ويسألن شون تعلمت يردن اعلمهن صرت خبرة ..
كتلهن شريط كاسيت مال ركص ووصلة ع الخصر وقفلي باب الغرفة وانطلقي وطز بالدنيا
ظلن يضحكن كالت وحدة منهن لا ندخل دورة عندج وكملت بهمس بس بيبيتج شلون بيها تشمرنه من فوك السطح
كتلها بضحكة افااا انت بحمايتي معليج
دنحجي كالوا راح يجي يطب العريس
.
.
.
لشويه طب وليد و جدي وياه سلمها اله وكعد يم عروسته شويه وظلن النسوان يهلهلن وهناء تطش جوكليت ركعتنا تركع بي
ووليد مبتسم بخجل وعيونه تدور الى ان صارت عيونه عليه
واني اصفك ومبتسمة ، بهتت ثواني بس بقت ابتسامتي على شفتي ماتلاشت ...
بعدها كوموهم ونزلوا البركع على وجهها لزم ايدها
وطلع بيها من الاستقبال ووكفوهم بالحوش
وبدا تصوير فديوو كاميرات فوتو غراف
بالحوش صرنا نسوان وزلم كلنا سوى واحنا كلنا ولد عم ماكو احد غريب كلنا من عشيرة وحدة على كولتهم عمك خالك
وصارت الهوسات تخبل كلمن يشمرله هوسة شكل
جدي سحبني يمه و شاورني لا تصفنين هوسي يادرة جدج هوسي بويه وبيني فرحانة بعرسه لايكولون ضايجة لان اخذ غيرج ولايكولون مااخذ بت عمه
اني كبل طخت عندي وعبالك واحد كرصني وصحاني
رفعت ايدي و هوست ( اليوم معرس ضلع من ضلوعي )
اليوووم معرررس
وظلوا هم يردون وراي الهوسة
وليد باوع عليه وابتسم بحزن ....
ابتسم جدي وايده على جتفي واني صايرة بينه وبين عمو فيصل
لازم بيده جكاره وبالايد الثانية لازم البشت مالته
واني احاول ابعد عيوني عنه مستحية
لهسه كلما اتذكر موقف وليد جسمي كله تدب بي حرارة بعروگي واخجل ....
بعدين هوست ( اعضاي العرس جده الوادم تحلف بي اعضاي العرس جده الوادم تحلف بي )
وجدي ظل يضحك ووليد تحولت ابتسامته لضحكة فرح حلوة ، والكل ظل يردد وراي حتى هوساتي مال زلم
عاد وولدنا الي جانوا يهوسون بالنص ومن ضمنهم مصطفى وعادل ردوا على هوستي ( ابن العم تفكه واعارك بي ) ... .....
طب واحد من اولاد عم جدي وبيده بندقية و راد يرمي جدي صاح عليه جعفر انطيني هاي الرشاشة و جيبوا بعد وحدة غيرها ...
هم بسرعة جابوله وحدة ثانية صاح دره وينج تعاي
رحت يمه انطاني وحدة وكال هاج بويه يله اثنينه بيد وحده نخرط شاجور
كتله بابتسامة وميلت راسي صفح متحمسة يله جدي
والعالم الموجودين بالعرس كلها ظلت تباوع حتى الهوسات وكفت وصار هدوء بس حجي متناثر وهمهمات هنا وهناك العيون عليه ومصدومين
جدي اشر وكال للمصورين صورنا من نرمي
رد عليه المصور صار حجي ودار الكاميرا علينا
اني و شعري المفتوح والهوا يلعب بي ولبسي الشبيه بلبس الفروسية وهمينه لابسه كعب عالي وجنت شويه فرق عن جدي ...
والدنيا عصر كولش بدت الشمس تغيب بس صفارها يضرب على وجههي
باوعتله وكتله يله وانطيته اشارة
رمينا اني وجدي سوه بتك ايد هو باليمنه واني باليسره والايد الثانية متلازمين بيها
جنت حاضنه اصابعه حيل واخترق صوت الرصاص القوي كل الارجاء والنسوان خافن شي يخلن اديهن على اذاناتهن
ورنا خلت راسها على زند وليد من الخوف
بس اني صوت الرصاص مايخوفني واستمتع بي احسه قوة الي
بلحظة تمنيت يوكف الوكت والساعة بهاليوم
مااعرف شنو من لحظة جانت بيها حلاتها وهيبتها وقوتها
احساس واحد
عبالك جدي يكولي شدي عضدج بروحج بعدي ما احد يسندج انت سند نفسج وبس
اباوع عليه بقلبي احجي الله يطول بعمرك اااااااخ جدي وين الكى مثلك اخ لو افتر الكون كله انت بس واحد
بعدها طلعوا العرسان والكل وراهم طلع صاروا يصعدون بالسيارات وهوسة كومة ناس نسوان واطفال اكثر شي كلها هابة عرس جبير كولش
واني طلعت ظليت ادور على سيارة حتى اصعد بيها
واني مخبوصة وادور على جماعتي وين حتى اصعد وياهم
لكيت مصطفى يتقرب مني بخطواته الواسعة
مبتسم ولابس زي عربي الشواربة الطويلة الي نازلة على حنچه ومبتسم
اني تلاشت حتى ابتسامتي سويت نفسي مااشوفه وملتهية ومخبوصة ادور ع الكوستر الي بيها شوكة لو رزان حتى اكعد يمهن
بس هو باغتني وتقرب مني وهمس وبعده مبتسم
يوم النا ان شاء الله وظل ياشر بيده على الاصبع الي يلبسون بي الحلقة
هزيت راسي بسرعة وركضت صعدت بالكوستر الي كبالي والي لمحت بي هناء قبل شويه وترددت اصعد
وياريت لو راجعو مشي احسن بهواي بس صعدت استلمتني هناء كدام البنات
ظلت تصيح هاا ولج ادبسز انت شون صاعدة بسيارة العريس عايش الدور ياعرمة
ولج هو اني امه محد صاحني ولا حتى بيبيته صعدت وانتي شكو معنتره ويالزلم
اني بلحظتها معنوياتي فول منتعشة ومفرفشة وماردتها تعكر عليه مزاجي
التفتت عليها وحرصت احرك خصلات من شعري وياي كتلها واني ااحرك اكتافي بكيفي همه صاحوني عزيزة عدهم ومميزة شلون مايصيحوني
هي فتحت عيونها بغضب وبعصبية كالت
شوف شنو من لسان وتجاوبني بت اليهوديه شيطلع منج ومفرعه علينا ماتستحين انوب ترمين حالج حال الزلم ماكو حيا ولا خجل طاح حظج مو صوجج صوج الي مكبر راسج وانت ماتسوين فلس
اني بس مبتسمة ولاجاوبتها ولا حركت ساكن
كاعدة واحرك بشعري كل شوي واضحك
وهي تفور تفوور احتارت شتحجي مخلت كلمة تعتب تريد بس تبرد كلبها
التافيت عليها كتلها اشتريلج ايس كريم يبرد گلبج شويه شنو رأيج خطية دا انقهر عليج
نطت شوكه الظاهر توهه وصلت الهه الكهرباء وسمعت اني كاعدة بسيارة العروس
كالت كال اني اعلمهم ليش مايكعدوني بسياره العريس شمالني اعض بسيطة سهلة
هسه لو مصعديني بلكي اتزوج يلوحني السرة
هناء جاوبتها لا السرة لل*** وتأشر عليه
ياسر الي يسوق بالكوستر من اولاد عمومة جدو
ويمه رعد هم ولد عمنا كالها شبيج هناء تغارين من البت جا رميتي مثلها لو لان فرس وماتلحكنها ماتصيرن مثلها
ثوورن ع الوضعية شبيجن
كتله تسلم عمو شهادة اعتز بيها
دار رعد كال يابه لاتضوجين حقهن يغارن انتي بالشرق واهنا بالغرب دره سبعه ربات حجي عدنان
كتله بفرح وفخر والنعم منك عمو شكرا
هناء تخبلت كامت على حيلها ولازمة بالكشن وتصيح
كبرتوا راسها هي امها يهوديه وكفار سويتها فدمره يالماتسحتون لو لان حلوه عجبتكم
اندار ياسر اعصاب صار عيونه براسه
كاللها لج هناء تسكتين لو انزلج واخلي العالم تتفرج عليج
لزمه رعد كله يمعود مرة وبنص عقل هسه انت ماتعرف هناء اسكت اسكت لا تنكلب بينا الكوستر
رجع اندار وخزرها و كال وهو يباوعلها راح اسكت لخاطر وليد وماريد اخرب عرسه
هي هناء بلعت لسانها تدري بروحها جفصت
وهو ماسكت ظل يحجي الله يساعدكم شون عايشين وياها يا طركاعه السوده يعينك الله ياحامد
هي خنست وسكت اني اباوع عليها وابتسم واحرك بحواجبي استفززها
وهي تاكل بشفتها وتخوزر بيه
ردت اغير جو ظليت اهوس ( يوم الج ياشوكه يوم الج ياشوكه )
اني كلت هيج وهي شوكة كامت على حيلها تخبلت احتارت شسوي تهلهل وتهز ركبة
كالت خل يجي رجلي الا اضربه بميت نعال بسيطة كل هالوكت اتاني وهو مسربت دايح مدري وين ماوين
الكوستر كلها طكت من الضحك وهي تفر باديها
ياسر كاللها ولايهمج شوكة اذا محد اتزوجج اني اتبرع
ظلت هناء تفر بيدها وتكول وين ما حافي على گلبي لافي
مرته لياسر گاعدة يمها تباوع وتخوزر هاي هم صدگت
هناء كالت لمرة ياسر ما تربطين الطلي مالتج وتكثريله علف
كالتلها مرة ياسر بصدمة يااا انووب ؟
ردت شوكة وهي تعدل ببرجمها الي طالع من الحجاب اي ماتشوفينه عينه عليه
ياسر كال هم صوجي ازامط ....
هناء جرت شووكة من المقعد الي كدامها وكعدتها وتخزر بيها ، وشوكة بعدها مامكعدتها هناء كامت تصفك وتدبج
"ياسايقنه سوق سوق حتى ننطيك اخت العريس
الظاهر شوكة عجبها الموضوع... "
لحد ماوصلنا لبيتنا جانت سيارة العروس واصلة قبلنا شفتها من نزلت ولازمها وليد ودخلوها بالبيت و كعدوها بالصالة
ونزلوا الناس وصاحوا مي مي للمعازيم ، اني هبيت بسرعة و رحت اريد اوزع مي
جانوا المي مخلينه بسطوله كبار وبي قوالب ثلج
ناخذ بدولكات وكلاص نوزع على المعازيم
اني وشوكه نوزع ومملحكين كوومة اوادم لحد متنا من التعب حتى مالحكنا نبدل ملابسنا
واني دااوزع اجا عمو جعفر صاح عليه تعالي بويه دره
رحته اركض
مد ايده انطاني سلاح مالة جدي
اخذته منه كلي ضمي زين لاالجهال تلعب بي وتسوي قدر مالنا خلك خلينا فرحانين
كتله صار عموو
اخذته منه
كال روحي بويه وجيبلي مي يبس افادي
اني علكت الرشاشة بجتفي ورحت اجيب مي لعمو جعفر
جنت هستوة مدنكة بالسطل داا اجيب مي
وانجريت من شعري بقووة
وصارت الراشديات ركع عليه اجيت اوكع بسطل المي ونطخ راسي بالثلج حتى مااكدر اندار وبس اسمع صوت عمو حامد يصيح
ك....ح ....ه ب.....ر....ك هذا لبس الابسته ومكحلة تردين الزلم تعاين عليج ادبسززز اذا هسه اغرگج بهذا السطل احد يكلي ليش يهوودية بت الكافرة
استمر يشتم ويفشر ويغلط ويكفخ بيه بكل قووة
اني بطوله لان هو كصير بس هو رجال وايده ثقيلة بحيث اريد اخلص روحي منه مااكدر وكعدت ع الكاع والبندقية نبتت ابطني توجعت فوك ما ااني متوجعة
وجايه وياه هناء واكفة على راسه وتكوله ترمي مثل الزلم حالها من حالكم انوب تضحك ياسر ورعد عليه ترضاها انت ؟؟؟
هي تحجي وهو زاد ويكولي تاج رااسج هناء تااج رااسج ادبسز
ورجعت تحجي لا ابشرك ان شاء الله رقاصة غير شدت الوصلة وتركص ركص مال بنات ملاهي وكاوليات
ظل حجيها مثل البانزين الي ينكب على النار ويزيدها ظل يضرب ضرب مابي رحمة
اريد احد يخلصني منه ماااكوووو متوحد بيه والغرفة الي بيها المي فارغة بس سطولة مي بيهاااا
خشمي وحلكي يجرن دم وهاي تلغي فوك راسه وبيبي اجت ظلت تشجعه يضرب تكله بعد ايدي ايدك هاي مسترجله ترگص مثل الك.....اب شوكت تعلمت
كملت بيبي كلامها وكالت عفية يمه ياحامد هاي تخزيكم وتكسر عيونكم بين الوادم ادبها من هسه لا تطلع عن الطريق
هناك ودخلت شوكه بنصنا تفك بينا وتصيح عوفها حامد المسودن راح تخبلوها مثلي الله ياخذكم شصار بيها ولك دممتها
امها سحبتها منه وتفشر عليها المسوودنة وخرري خلي يبرد گلبي بيها ضحكتهم عليه وووخري
راحت شوكة جابت قبق برميل المي وظلن تكفخ بحامد حتى يعوفني وتبجي عليه
اني حالي يبجي الصخر تعب هو من الضرب اخر شي عافني ويريد يطلع واجت هناء تريد تكمل ضربتني و دفعتها حيييل
وهي كلبت الدنيا بالصياح تعال حامد تعاال شووف شوون ضربتني وهجمت عليه
هو رجع عليه اني بعد ماتحملت هم لو بزونه تخرمش خلصت طاقتي
ضربتها بعكس الرشاشة خليت خشمها يجري دم وظلت تصررخ
اجه حامد راد يوصلي وهو وراه الشباك عدل (اني اعرفه جبان ويستكوي بس عليه وهذا اليقهر شخص ضعيف يتقوون عليه الجبناء وهو لا حول ولا قوة )
عدلت الرشاشة سحبت اقسام ورميت على الشباك
وصرخت بووجهه كتله اذا وصلت يمي اكتلك بمكانك والله
وظليت اصرخ وايدي ترجف لازمة الرشاشة
مابيكم رحمة وللكم ليش شسووويت اني شسووويت
اصرخ وموجهه الرشاشة عليه
على صوت الرمي وكلها طبت تركض لان صوت الطلق جان عالي
من جان يضرب محد موجود هسه كلها بالمطبخ صارت
حامد صار مثل الجريذي مدنك ومكنبص على رجليه يصيح بويه جاامتت لحكوني لحكووني
ورفع راسه يباوعلي يتصنع ويتوسل يكولي ترميني مو اني عمج دره ولج جااجت الطلقة بيه
صحت بصووت مبحووح انت موو عمي موو عمي انت عار على العمام انت عار سمعت عار
بكل علو صوتي صيحت وبلعومي مشخوط من الصياح والبجي والرشاشه مخليتها على راسه
طب جدي وعمو فيصل ووليد والولد كلها يصيحون شنو هذا الرمي جدي من شافني وشاف وجههي يجري دم وكف مصدوم ماحجا شي عبالك تحنط بمكانه وعيونه بيها دموع
حتى ماكال عوفي السلاح ولا حجه عليه لان يدري بيه انظلمت
كتلهم بصووت كله بچي واتصنع القوة
وحق الله الي يجي يمي اضربه و اضرب روحي واخلص ....
اجت عيني بعين عمو فيصل جان واكف مصدوم شمر البشت مالته و جيت على عمو حامد وصار يضرب بي شبعه رفسات
وهو اصلا ماحرك ساكن ايده مارفعها ابد يخاف جبان كدرته بس عليه
عمو فيصل شبعه رفسات ويصيح عليه حقير الااكسر ايدك لوه ايده يريد يطكها ورا ظهره
صررخت اني كتله عوفه اني اخذ حقي منه وانهي كولشي
باوعلي وهو لاوي ايد حامد ورى ظهره ورافع راسه عليه وعيونه بهامته من العصبية
كال دره عوفي السلاح بويه لا يصير قدر يله سباعية عووفي
كتله اني اريد القدر يصير لحد يتقرب اريد اخلي حد لهذا العذاب
كلت جملتي بصريخ
وهناء عود نجره اجت من ورا رجعت ضربتها بالسلاح فوخت قلبي
وهذا يرجف مثل السعفة شكبرها عليه كدامهم كلهم تقربت منه اريد اضربه منهارة ماعرف شسووي ...
وليد وكف بيني وبين ابوه اخذالسلاح مني
وليد ساكت لان ابوه وصعبة عليه
ظل يتوسل بعيونه وكال لخاطري لاتهينين عمره وشيباته
ماكدرت ارفضه انطيته السلاح وركضت حضنت جدي وابجي بصوت واكوله والله جاي يذبحوني بلا ذنب والله بلاذنب
وببجي و بصريخ عبره بصدري تكتل تموت تذبح ذبح مقهوررة
طلعوا الولد بره واني بحضن جدي ولاكلمة حجا ابد وعمو فيصل ترك حامد واخذوه طلعوا بره
وظل عمو فيصا بس يشرب بالجكاير
جدي وهو حاضني كال خل يزفون وليد حتى الناس تفض ونشوف دربنا
صاح عليهم فيصل وهم راحوا يزفونه
واني اخذوني اغسل وجهي من الدم واحسه من الضرب تخدر واحس متبنجة ...
زفوا والولد والهوسات ووليد كولش ضايج وجدي واكف ومخلي ايده على جتفي يرجف حسيت برجفته
واباوع عليه العبره خانكته ومبتسم جذب لوليد
والغريب عمو حامد يهوس ويدبج ولا عبالك صار شي قبل شويه
هذا الرقص على الجراح لمن يذبحوني ويهيونوني ويدمرون نفسيتي
ولاعبالك بشر انقتل قبل شويه اي انقتل البشر مو بس ينقتل باداة لا ممكن ينقتل بكلمة تاذيني وتذبحني
وتبقى سنين بداخلي وانزف منها
وحتى تشكل حاجز نفسي عندي وهمه عايشين عادي اصلا مايذكرون الموقف كله
اذن القتل باداة ارحم من جرح كلمة ، القتل بالاداه راح يموت بوقتها الشخص لكن الكلمة تظل سنين وياه وكلما يتذكرها يموت من جديد
بعد مازفوه تقرب عمو فيصل لجدي وكال حجي عدنان انت ليش تعاند مو كتلك الحل يمي وبعده عرضي قائم فكر ترة مالها غير حل
جدي صفن شوويه وبعدها اللتاف عليه
و كله فيصل عنوان امها اريده ...
يتبع ...
واكيد الابداع بالتصميم بأيادي ام عبد الرحمن 😍
رواية طَوفانْ رَجُلْ الفصل الثامن عشر 18 - بقلم نورا ناصر
السلام عليكم ورحمة الله وبركاته
رواية طوفان رجل
الفصل 14
نورا ناصر
في أشد أيامنا قسوة ..لا نحتاج سوى الرحمة والأمان ، أن نجد بالقرب منّا أحداً يسمعنا ، يطبطب على أرواحنا المتعبة ، يخبرنا أنّ الظلام سيتبدد وأنّ النور سيتسلل إلى حياتنا مجدداً ، نحتاج وبشدّة لمن يرغب دوماً بالإستماع إلينا حينَ يتغلّب علينا شعور الحزن ويتملكّنا الخوف ، حينَ نضيع بينَ آلام نعجز عن شرحها وبكائها أيضاً ، وجود أحدهم بقُربِنا يُخفّف من وطأةِ الأيام علينا ، يجعلنا نشعُر أنّ الدنيا لازالت آمِنة وأننا سننجو يوماً ما منها..
بعد كلمة جدي ويا عمو فيصل انقهرت وتساءلت بداخلي وبعيوني وكل كياني
شنو يريد معقولة يريد يرجعني لأمي ويتخلى عني بكل سهولة معقولة تعب مني !! مل من مشكلي !! وبعد هالسنوات!
وشنو اعرف عنها اني مااعرف عنها شي واصلا اني بدون جدي ضايعة لا اقرا ولا اكتب غير جدي ...
جان الالم من كل صوب بيه ، شفتي وارمة وطعم الدم بحلكي وبين اسناني يلم يصل عليه ... حتى ما اكدر اتفوه بكلمة وحدة ..
لحظات سكوت مرت حقيرة وموحشة من اشوف عيون جدي وحيرته بحمايتي منهم احس الالم يوصل لعظمي
ويسكن گلبي ويخلي يون عليه
انوب فكرت بكلام عمو فيصل لجدي قبل شويه
ويكوله على حل !!! هم شنو قصده بالحل
شنو قصده شنوو قصده ياربي دخلت افترت الدنيا بيه باوعت لجدي خليت عيني بعينه واحاجي بالنظرات
والله ياجدي صاير تضم شغلات عليه الله يعلم شنو عندك وعلى شنو ناوي !! زين ليش مايگلي !
خلصت الزفة ودخل وليد على عروسته واني رحت بدلت ملابسي الي صارت كلها دم ورفعت شعري الي تگطع بين ادين حامد
بعده الالم بكل مكان بيه وبجسمي وبنص روحي وگلبي غمضت عيوني لو اني بمكان ثاني غير هالمكان هذا ياترى شون راح تصير عيشتي !
هزيت راسي كل شي يهون بوجود جدي بحياتي كله فدوة اله هو الي مصبرني على هاي الحياة وضيمها ، حبه مقويني ومنطيني شجاعة
بعدها بساعة خفت الناس من عدنا بقوا بس الاقربين كلش ومنو جان يشوفني يصبر عليه صبري وميخالف اهلج ويمونون عليج ومن هالحجي وناس تكلي هم مو بعقلهم مايدري شيسوي والعتب على هناء توزه هو عمج وتحملي
اني بس اهز براسي
وناس تلومني وتسم بدني اكثر مما هو مسموم
ومنهم عمتي صفية لزمتني وكالت ولج شنو هالرعونة عمج ومخليه بندقية براسه
صدك جذب عيب عليج عقلي مو جاهلة انت واذا كتلتي يعني شتحصلين اكيد اعدام وبدربج للنار
اني خلصانه طاقتي و هذا الصنف بالذات مارد عليه لان ميعرف شنو احساسي شنو معاناتي شنو عذابي
جنت اشرب مي بالممر ورووحي فايرة فوران دمي محترك حرك الي صار الليلة كسر روحي وشعل دمي
واني على هالحال سمعت صوت هلاهل ترست البيت
باوعت اشوف وليد طالع من غرفته والكل يهلهل ويبارك اله
وهالشي معناه انو تمت ليلتهم ببساطة يعني كمل عرسه
هناء واكفة تهلهل ولاعبالك خشمها مكسوور كلما تخلص هلهولة تطگ الثانية
وهو يبوسهم ويستلم تهانيهم بس عيونه تدور وتتنقل الى ان حطت عليه ظل يباوعلي بتفاخر
وبعدها باس راس امه واديها وگال لأمه بصوت مسموع وهو يخلي ايده على چتفها
يمه روحي لرنا تريدج
هي راحت للغرفة مالتهم تمشي وتهلهل وهو تبعها
رزان اجت يمي كالت راح نرجع
جانت تحجي وياي بنبرة حزن
هزيت راسي الها وهي بوستني .. وجانت تباوعلي بقهر وعطف دنكت اني ماحب احد يشفق عليه لو مهما يكون هذا الشخص
واحنه واكفين اجت شوكة كالت ولج عرسوا عرسوا كملوا شغلتهم يوم الالنا
ماكدرت حتى ابتسامة اخطفها من شفتي
رزان كالت ولي شوكة هي دره بيا حال بسبب امج وابوج
تخصرتلها شوكة وكلتلها ان شاءالله تعنسين ومااتعرسين وغمتها وراحت
رزان ضحكت وكالتلي تصبحين على خير
هزيت راسي حتى مااكدر احجي حلكي مورم ويوجعني وهي خطيه راحت باتجاه الباب وكل شوي وتلتاف عليه
وعمتي صفية سحبتها بسرعة وراحت وياها ...
بعد الي صار بذيج الليل. الكل رجع عادي ويضحك واحنه المذبحين اني وجدي البينا مو نار لالا اكثر من النار
مثل شي و يوجع بالجسم وجع قوي ومااعرف اوصفه
ولا اندل مكان ووجعه ولااكدر اوصف شكله للناس والدكتور
وبداخلي اخاف ماكو علاج اله هذا الوصف بالضبط نفس مايكولون الوجع ماياذي بس صاحبه اني جدي ويايه ...
والنسوان وراها طبوا للعروس يباركون ويهلهلون
وخلص يومنا بس شون نهاية لهذا يوم ، حفرت نقوش حديد بالدماغ لاتنسي ولاتنمسح
لان وجعها مر وحنظل ماينجرع ظلت راحتي مروهنه بوجود جدي
وبعده شنو الي يصير ومن هسه اقرا بعيونه هذا المصير ااااااه يابويه اعتب عليك ومااعتب على امي والله لوعايف امي مسقطتني ولاهاي الحياة ..
الظاهر جان وياها كل الحق مارادت تسقطني والظاهر تنبئتلي بهذا المصير المشؤوم ومارادتلي اعيش هاي الحياة
صرت اعذرها واعتب على ابويه لهالدرجة وصلت ...
صرت اتكلب ع الفراش عظامي تون عليه ودموعي غركت الفراش بيدي الكلينكس امسح دموعي وامسح الدم الي يطلع من من جروحي وكبل كل شي روحي تنزف ....
صار الصبح بالشافعات شكد كرهت الليل من ذيج الليلة
احت علينا الناس تبارك وتهني للعروسين اباوع على جدي ومتأكدة مانام ليله واحسه محنظل كلساع يبلع ريكه ويباوع عليه
و اني وجههي كله الوان ازرك واحمر من الضرب
طلعت رنا من الغرفة لازمها من ايدها وليد وهي جنها طفلة بنزاكتها وبراءتها ...
لما تصد عيني بعينه يداريها اكثر ويحوطها ويحتويها
وكأنه يوصل رسالة الي ... عباله اتندم او حتى اغير رأيي
بس بعد الي صار البارحة ايقنت اني جنت متخذة قرار صحيح برفضه ...
رحت باركت الها وهنيتها وهنيت وليد .. الي يرفع بجتافه بتفاخر ويسوي نفسه فرحان ...
هنيتهم بفرحتهم واني كل حزن وجروح ...
بعدها كدرت اختلي ويا جدي .. وسألته
كتله جدي انت على شنو ناوي ؟؟ صدك تريد ترجعني لأمي ؟
تنهد وباوع عليه كال لا يابه شون ارجعج وهي مارادتج من اول اخليخ ترجعين من تالي بس الي غايه بيها
وحتى لوردت ارجعج الهه عمج فيصل ماينطي عنوانها وحتى نكر يعرفه وتوقعت هذا الشي منه
كتله ليش هيج كلت لعد مدام ماناوي ترجعني ؟
كال الي غايه بيها اغليج وراح الح على عنوانها وانتي مالج شغل ...
هزيت راسي بأي بس ممرتاحة وفضول بداخلي اعرف
وادري بجدي مستحيل يفصح عنه غايته ويوضحلي شنو يريد من عنوانهه
باوعتله وكلي فضول اسمع منه بعد
وهو كمل كلامه
كال بحسرة ويأس :- ايدج ومدتها شيسوون بيج من سوايه ذوله الي مايخافون من الله
دنگت ودموعي وكعت بحضني واعصر باديه ... مسحتهم ورجعت باوعت عليه
هو مستمر يحجي ويأشر على روحه اني كبرت وخانتني الصحة واذا انتي هيج هيج محترمتهم مافايد بعد لاتحترمين وحسابهم يمي ماتعديلهم على خير هاي الليلة
فرحت من جدي انطاني الاذن جنت احسب حساب لكلشي وماريد اافشله او يحجون على تربيته الي
ماردت بيوم احد يعيره بيه ... بس بعد مدام هو حجاهه واني شيكول اكوله تم هذا هو ببطن عيني يدللون
اشرتله من عيوني وعلى وجههي ابتسامة ..
طلعت من يم جدي والبيت يروش خطار ، مسوين ضيفة واهل رنا جايبين الريوگ وجايين
وهنه يركضن هيج وهيج ويصيحن عليه ومااطلع ولالزمت شي وابد حالي حال الخطار اكل واكوم كمت اني اتحارش بيهم ادور انتقام وياهم
صار وكت الغدا دخلت للمطبخ كتلها هناء وين الغدا جدي جوعان
اندارت بيدها الچفچير وتخوزر بيه كالت هااا ولج گ** تكولين هناء ادبسس موو اجي اشگ حلگج بهذا الچفچير والله
خليت ايدي على خصري كتلها لازم كسرة خشمچ نسيتيها مرة الخ اكسر رجلج واخليج مقعدة و الحاجتين جواج
هي فتحت عيونها بصدمة كالت ولج مو والله اكتب بيج تقرير يم ام سراب هاي الحزبية الي هنا واوديج ورى الشمس واخليج تخيسين بالحبوس
بوزت شفتيى وفريته جاوبتها واشمر باديه باستفزاز
حتى لو انسجن عود اشوف منو يجنيج بعد
فتحت عيونها وشمرت الجفجير ووكع وسوى صوت عالي وهي هم ظلت تصيح من گماعة راسهاا
يبوو تخبلت علينا بت الكافرة بالزايد تعاي عمه شوفي عرك الروس
اجتي بيبي كالت هاولج طلعلج حس بعد مافرجنا العالم عليج بعدج عرمة ماانكسرت عينج لوو عين ال؟؟؟ ماتنكسر !
اني ضحكت والتافيت عليها كتلها بتحدي ورافعة حاحبي
منو سواني فرجة العالم؟؟ لعد منو ضحك العالم على ابنج و راد ههههه
والله حتى الجهال مايسوون سوايته ويخافون مثله
وكملت ضحك اضحك واحجي وسفة عفته لخاطر وليد
و انتي دواج دور العجزة
خليت ايد على ايد وعضت شفتها بعصبية طايحة الحظ ساقطة ولج اذا ما اخليلج سم واخلص منج مااطلع بدرة
كتلها يله سويها لله اني اروح شهيدة وانت بدربج للنار يمكن حتى النار ماتلفيج تظل روحج هايمه وهذا عذاب اكثر الج
هنا كللتلها عمه هاي نسويها مثل ذيج السوايه مال كبل سنتين بس بغير مكان حتى محد ياخذهه بعد وتظل تخدمنا طول عمرها
هزيت ايدي وضحكت ...
وطلعت من يمهم والله افور خوب بيبي لو اعضها بسنوني واكل لحمها نيء هم ماارتاح....
جانت هناء تلمح تسوي بيه سوايتها مرة ثانية
من جنت بالخامس اعدادي
(وتذكرت موقف حرك دشداشتها ضمتها الي
واني وراها بوقت اعترفت بفعلتي حتى احرك قلبلها وراها جدي عنده فصل بالكوت واخذ وياه وليد
وعمو حسن بايت يم صديقه يقرا
دخلن عليه هناء وشوكه ويجرن بيه كالن اليوم محد اكو الا نتوبج بعد ماتحجين لجدج شي وبعدج ماتجاسرين على غراضي وتلعبين بكيفج
ظلن يسحلن بيه اقاومهن وماكدرن اثنينهن عليه
واخذني للطباخ
جان مشتعل وعليه سييخ مال شوي
ظليت احوس اريد اتخلص منهن ما اكدر هنه اثنينهن ضخمات صرخت ردت ماكو وبيبي شكد استنجدت بيها
الظاهر مسويه نفسها ماتسمع
ظلن ينزعن بيه يردن يجوني هناء تكول ولج شووكة
طلعي مكان كون ماينشاف
ها حتى بعد توب الدوده مالتها
متت من الخوف رووحي شااغت
اصيح كتلهم والله ماافوتها عووفوني عووفووني
ماكدرن عليه ظليت ساده رجلين
شكن التيشيرت من فوك و جوني بزندي من يم جتفي
حتى اللحم لزك بالصيخ
بس اني مابجيت رغم الوجع ماينحمل
بس صريخ اصرخ
واني مخدرة من الوجع قربت مني الصيخ الثاني وتحركه يم وجهي واني منتهية فد نوب
كالت تكولين لجدج مرة ثانية ؟
هزيت راسي بمعنى مااكول وعيوني افتحها واغمضها ايدي ماكدر الزمها جهنم مشتعلة بيها
الوجع مو من الجوي لا من الوليه عليه لوحدي وجع النفس اكثر من وجع الجسم وهدوني ورجعت لغرفتي بجيت بجي ماصاير
استجمعت قوتي و هميت على نفسي وكلت مو دره يكسرنها نسوان واخذ حقي حتى مااكول لجدي لازم يخافن مني مو من جدي
بس هذا الموقف ما قهرني بكد قهر من موقف بيبي
اكثر شي حز نحري وذحبني
رحت طبيت لغرفتها لكيتها تصلي وكفت كبالها
كالتها لاتصلين ولاتصومين الله مايقبل منج لا احللج ولا اوهبج اذا الله يسامحج اني لا وبيش تلاكين بابا باي وجه فهميني تسمعيني اصرخ وماتجين لييش
هي كالت شنو ماادري شصار ؟؟
كتلها بصياح تغشمين نفسج بسيطة وين ترحين من الله ودعوة يتيمة ماتتعداج انتي وربج حسبي الله ونعم الوكيل عليج
ظليت اكررها الى ان طلعت من الغرفة
وراها بيومين اجا جدي وسلمت عليه شافني تعبانة
وسالني شبيج
كتله فلاونزا مريضة بس بشوفتك صرت زينة
ابتسم وبوسني
صبوا غدا وهناء وشوكه فرحانات عبالهم كدرن عليه اكلت شويه وكمت
كال جدي وين ماكملتي غداج
كتله بابتسامة رايحة اصلي
توضيت وفرشت السجادة بالصالة وباب الصالة مفتوح على الطرمة
طلعت منه واني بالجادر مال الصلاة ....
شفت هناء تسوي جاي باوعت للقوري يفور ميه اجيتها من ورا ودفعت قوري الجاي على رجليها صرررخت بصووت عالي واني ورجعت كبل للصالة ووكفت اكمل الصلاة ...
ظلت هي تصرررخ ولكم لحكولي دره حركتني
واسمع جدي كاللها البنية تصلي حتى وانت الله غاضب عليج تتبلين عليها ؟
سلمت باخر ركعة ورحت للمطبخ شفتهم مكعديها على الكرسي ويدهن حامد برجلها
ببرود كتلهم شكو واني بالجادر
باوعتلي ملامح وجهه معقوجة و تاشر عليه
كالت والله حركتني والله كلبت الجاي على رجليه
كتلها بصياح انت شنو كلشي تذبي براسي
ولزمتني ضحكة عفتهم بالمطبخ ورحت
وبيومها جدي ماخلاهم يصدكونها
رجعت ابجي على السجادة ليش يخلوني اتحول لأنسانه مو زينة وشريرة مااريد هيج اصير ماريد
اجا جدي كال شبيج
كتله مابيه شي
لليل صطكت رجلها واخذوها للمستشفى كوه تمشي وتصيح من الوجع
وشوكه تباوعلي وترجف خايفه مني وتفكر شنو راح اسويلها
بالليل تمددت واجه جدي يمي
باوعلي بذكاء وسألني
كال انتي حركتيها هناء مو؟
تنفست واني مخنوكة والله مراضية على نفسي
كتله اي
كال ليش بويه ؟
مديت ايدي رفعت ردان ملابسي و طلعت جتفي المحروگ شوفته
هو تخبل راد يكوم يطلعلهم لزمته
كتله جدي اخذت حقي مربع ونزلن دموعي
كال ليش تبجين بويه ؟
كتله مااريد اصير مو زينه همه جبروني هيج اسوي جدي والله جبرووني
كال انتي طيبة والي سويتيه غلط بس انتي اخذتي حقج وهذا هم صحيح ونفس الطريقة
بس يابويه مو دائما تنوخذ الحقوق هيج مرات الخصم اقوى من عدنا لازم نسايس حتى تمشي الامور مو دائما نوگف للموجه
وارجع واكلج سباعيه بنيتي ماتعوف حقها
حجى هيج ويربت على ظهري ويمسح على شعري
بس بنبرة صوته انكسار وعينه مايكدر يخليها على جتفي المحروك
اني كضيتها بجي
وهو راح واني ظليت اسبح واستغفر الليل كله)
خلصت هوسة العرس والسبعه ماحضرتها لان اكيد اصير محور حديثهم ووليد اشوفه مبتهج ويضحك واموره تمام والعروس فرحانه عليمن مادري
جايها الضيم جايها خطية اذا مااغنت شجابني للضيم جنت مدلله مااسمي روحي دره على المخابيل الي عدنا ...
ومرن شهرين وراح يبدي العام الدراسي بعد مامرت ايامي تمام التمام والتحجي كلمة اردها بعشرة ..
كلاص المي مااشيله والظاهر الناس ماتجي الا بالعين الحمرة
وحامد المكان الي يشوفني بي يطلع ومايكدر يخلي عينه بعيني
صحيح ليش اتعجب هم من نوع تخاف ماتستحي ولارحمة بقلبهم
و بعد مااسكت عن حقي ابد ... وشيريد يصير خلي يصير عسى ما تنفتح جبهة بالبيت مايهمني ..
وليد ورنا مندمجين ورنا مسايستهم عمها وعمتها ... وشوكة صافة وياهه
يكعدون على الاكل يداريها ميقبل الا تاكل وياه بنفس الماعون
ويشاورها وتشاوره واذا رادت مي تستحي تحجي تحاجي بهمس يصبلها ويخلي الكلاص بيدها ..
يوكفون على المغسلة يغسلون سوى يظل يشاقيهه يشمر مي على وجهه وهي تضحك واني ابتسم على سوالفهم ويباوعلي وليد وتتلاشى ابتسامته ...
فد ليلة وورا العشا اجا مصطفى وامه النا هو عادي كل إجازة ينزل يجي يسلم عليهم ويكعدون بالصالة
اني سلمت وطلعت منهم وطبيت بغرفتي ورا ساعتين
والظاهر راحوا مصطفى وامه
اندكت باب غرفتي عليه حيل اريد اكوم افتحها
قبل لاامد ايدي لليده طب وليد معصب عيونه براسه
وبيده حبل التاف قفل الباب ووجهه عصبي يخوف عبالك مو هو
كتله شكو وليش قفلت الباب
كال بعصبية دره تستغفليني وتضحكين عليه؟؟
كتله شنو منيلك هالحجي ؟؟
كال لج مصطفى جاي يخطبج متقفه وياه بس اتزوج يخلالكم الجو ويجي مسويتني مضحكه تضحكون على شوراربي
كتله بتوسل على كيفك شجاك وداعة جدي ماكو هيج حجي ومااعرف على شنو تحجي انت
كال ليش ولج بشنو احسن مني بشنو قصرت وياج لج ربيتج بمي العيون ولج مزروعة بيه فهميني
يحجي ويبجي بصوت وحركه
كتله والله العظيم والحسين وداعة جدي ماكو هيج شي ولا شايفته ولاحاجيه وياه ليش ماتصدك ووليد
كال اني مغشوش بيج انتي تلعبين عليهم كلهم مصطفى وعادل وهسه فيصل طلعلج صفح اني الا اربيج و اعلمج ...
انصدمت من كلامه خليت اديه على حلگي من الصدمة
...
اجه عليه لزمني من زندي وسحبتي حييل ايدي انخلعت بيده
كام و جتفني واني ارفس بي وهو يشد بالحبل اصيح واعيط ماكو لان كاعدين بالديوان البراني وهو كاتم نفسي بيده وساد حلكي
اريد اصيح وينك جدي وينك جدي تعال
اريد.اصيح مااكوو ظليت ارفس
كلما يوخر ايده حتى يشدني اصررخ على شوكه
بعدها سمعتني الظاهر وظلن تدك بالباب ...
كتلها الحكيني ولج طلع رس هناء وحامد
هو ربطني بالكرسي و تقرب باسني بحلكي قوي كولش لعبت نفسي واتفل اريد اذبها ودموعي عشره عشرة
نزع الحزام مالته ويضرب بيه بلا رحمة حتى على وجههي واشكال الغلط يسمعني
وشعري كطعه ترس الغرفة بي احتار شنو يسووي
راح يدور بالجرار ويحجي وينه المكص اليوم اله انتف شعررج
ير يكص شعررري لايربي الحمدلله مالكه مكص
ظل يصيح بعلو صوته
اني غشيم بيج كلهم يعرفوج وحجي امي وابوي صحيح اني هيج تسوين بيه تتفقين ياسافله وياهذا الك....واد
خله جسمي يجري دم من الصوابات والخراميش ..
بعدها اجوو يدكون على الباب ويصيحون من الشباك وكعوا الباب من الدك
واني بهالحال جدي اسمع صوته يكله وليد افتح والله اندمكم واخليكم تبجون دم
وماكو هو فاقد رووحه حتى تعب من الضرب وكولشي بيه ينزف جسمي وقلبي
كعد بالكاع ينحب ويبجي بصوت يصيح اااخ يابه
كتله بقهر وبجي والم انت نفسهم وراح تنتدم وساعتها ماتلكه سماح يمي
جنت كوه احجي من وجع الجسم ووجع الروح والكلب
فتح الباب والكل طبوا اانصدموا من شافوني
رنا تباوعلي وتباوعله مصدوومة صدمة حياتها
جدي ماتحمل وكع بالكاع على طوله قبل انصدم بوليد وسوايته
ومااتحمل
يبس جسمه واديه عچبن وحلكه دار
ومن وكعة جدي انكلب البيت بالصياح وشوكه تفتح بيه واني وكعت جنازة يم جدي وخلصت اخر ذره بيه
گعدت واني بالمستشفى من صحيت باوعت شفت يمي امل مرة عمي يمي
سألتها بتعب وقلق جدي وين ؟؟
ظلت تبجي
واني هم بجيت ومتت خووف امل لاتخوفيني وينه جدي ؟
كالت لتخافين هو زين بس تعبان يعني حالته مستقرة
واني اكوم من سرير المستشفى كتلها وينه ؟؟
يمي صايه لبستها
واني جواها جنت لابسه تراكسود ولميت شعري وشديته بس راسي يوجعني وكلشي بجسمي يوجعني
بس خوفي على جدي خلى حيل عندي حتى اشوفه
كالت على كيفج دره فدوة
كتلها وديني لجدي
اخذتني من ايدي ودتني للانعاش يم جدي لكيتهم كلهم هناك بيت عمو قاسم وعمامي العارات ووليد ااااخ ياوليد صدك كسرت ضلع مني بهاي عملتك
لان جانت مكانتك تفوق الكلام واعجز عن وصفها ...
اتفاجوا من شافوا وجههي وشكلي عموجعفر
اجه صوبي مصدوم كال شبيج دره هم حامد؟؟؟
كتله لا وابجي الغصة تارسة روحي ترس
حامد كمز من يمه والعباس مو اني مااجيت يمها اسالوها اسالوها
يصيح ويأشر عليه
قاطعته كتلهم واني ابجي ومخنوكة
شونه جدي ؟
كال عمو جعفر جلطه بس يعدي اليوم سلامات ان شاءالله
اااخ يجدي الوجع البيه من خوفي عليك اريد ادور عليك جدي واشتكي وابلغك جدي مريض (اي المن اشتكي شعندي غيرك بهالدنيا)
كالوا ارجعي ماكو نسوان هنا عيب كلساع تجي عالم غريبة عيب منهم وانت بهالحال هسه شيكولون
كتلهم ليش اني مره ؟؟ و ضحكت بقهر مااتحرك منا لو تطلعوني جنازة
ورحت كعدت بالكاع بس ابجي ووليد بنهاية الممر يبجي ويمسح بدموعه ظاله ادعي ويباوعلي ميت قهر
اتمتم بيني وبين نفسي جدي اني وحيده ومكسوره جدي لخاطري اصحى ...
عمو حسن جان مسافر وياجماعته يتونس هنياله مايدري بالدنيا شكو
الساعات بطيئة تمر انتظرها تعدي علمود يعدي مرحلة الخطر
وانوب كلساع واحد يجي يوكف على راسي ويكول ارجعي للبيت ماتظل نسوان اهنا
واني مااقبل بعدين ياسر جابلي غتره كلي غطي راسج بيها لحد مايصحى لان شيوخ تجي
هزيت راسي كاعده بالكاع وطابكه رجليه وحافيه والكاع احسها ثلج ابرد من جثتي الميته انعدم الاحساس واسبح بتسبيح الزهراء
اذكرت مره نايمه يم جدي بمكاني المفضل بالديوان من الي هوه ينام بالكاع ويخليني بجهة الحايط ويبوس براسي سالني دره شون بيج من اموت؟؟؟
كتله اندفن وياك بالكبر اكلهم دفنونني وياه
ضحك كال مايصير بويه
كتله لعد اذا اعيش هم مدفونه بالحياة لعد يدفنوني وياك احسن وين الكى مثلها هالدفنة هاي
كال ااااه يابويه
لمحت وليد عيونه ولا وكفن بس يبجي والممر متروس ناس وكلها تسال شون تخربط
لمحت من بعيد اجا عمو فيصل واخوانه يمشي سريع ويسال عليه متخبل كال شون صار وليش هيج صار بي بسررعة ؟؟
ويباوع لعمو حامد
عمو حامد صاح من يمه والعباس معليه اني مو تباوعلي هيج
رجع سأل باعصاب نار لعد شون وكع وانجلط ماتحجون؟؟؟
عبرني وراح لوليد شبكه ويسكت بي ويكوله ليش هيج صار غير واحد يفهمني هيج كاعد ومابي شي ووكع
اجا ااحمد يسلم على وليد وشافني تفاجأ
اجاني ركض وكنبص كدامي كال دره ماعرفتج شبيج ؟؟؟
واني زدت ابجي وساكتة بس صووت البجي
كاال هاي شبيج
سكتت بس هو مصدوم من شكلي ظل صافن يصبر بيه بس احس الحيره على وجهه
اشوفه رفع عينه لفيصل ويأشر عليه
يمكن فيصل ماعرفني
اجا عاقد حواجبه حرك حلكه بمعنى شكوو
احمد كله هاي دره
دنك ونزل كال بتعجب ؛دره ؟؟؟
رفعت عيني ونزلن دموعي صدك جنت محتاجه عمو فيصل
ووجهه مااعرف شنو افسره غضب على صدمة على مفاجاة على حيره وماعرفت شنو يفكر
سالني بنار عصبية تطلع من عيوونه
منو سوه بيج هيج ورجفه بصوته وبحه حنينه
احسها خوف وبلع ريكه هااا منو سوه بيج هيج جدج؟؟؟
هزيت راسي حييل بجيت كتله طبعا لا لاا
كال لعد
دنكت راسي وبلعت غصتي
بدا صوته يعلى كال لعد حامد ماكو غيره احجي ؟؟
كتله لا والله الله يخليك عوف الموضوع المهم جدي عمو جدي اموت وراه والله
رجفه وخوف بصوتي واني ارفع اصبعي اموت لو تدفنني وياه وغطيت وجههي باديه ابجي ولچمت كل جروحي
ظل يمسح بوجهه من العرك واعصابه تفوور يكوم ويكعد ويتمسى بالممر وهو بركاان
صار الليل وكلها راحت بقينا احمد وعمو فيصل وعمو حامد ووليد الي واكف بنهاية الممر بس يبجي
يمكن وعه على نفسه بعد ماموت جدي وموتني
عمو فيصل شويه واباوع عليه ينزع جواريبه
وبحلكه الجكاره وشمرهم عليه
كال البسيهم بارده رجليج صارن زرك ليش حافية
ظليت اعدل بالغتره انصدموا هو و احمد من شافوني ولج ليش ماتحجين منو مسوي هيج شنو مسويه مكسوره فهميني جدج لاكفج ويا واحد وهيج ضاربج غير تجاوبين
ابجي واهز براسي بلا
كتله حتى انت عمو هيج تكول وتشك بيه
كال ولج فهميني بيه نار تحرك المستشفى حرك ولج روحي موجره تعرفين شنو صار ساعه ساكت الناس موجوده
ولج هسه ماتحجين ياهو واني اثرمه ثرم
منوو لمس شعره منج تعرفين شنو غلاتها عندي ودموعج اطلعهم دم
سكت قطع كلامه ماعرفت شنو قصده
رجع صيح بصوت عالي احجي
اجه وليد متردد
يتبع ..
بايادي المبدعة ام عبد الرحمن
النشر بين يوم ويوم
لخاطركم طولت البارت
امحح
احبكم
😘😘😍😍💜
رواية طَوفانْ رَجُلْ الفصل التاسع عشر 19 - بقلم نورا ناصر
السلام عليكم ورحمة الله وبركاته
رواية طوفان رجل
الفصل 15
نورا ناصر
لم نعُد نريد شيئاً من هذه الحياة ، نريد فقط أن نهدَأ ، أن نحظى بلحظة طمأنينة لا أكثر ، أن نمضي في طريقنا بقوة ويعود الشغف يملأَنا ، نريد أن نؤدّي مهامَنا في الحياة دون شيء يُتعبنا ، دونَ شك ، دون قلق وخوف ، فكل ما بداخلنا باتَ مضطرب ، لقد رأينا في حياتنا ما لا يُنسى ، وشهِدنا ما لم نتوقّعهُ يوماً ، كبِرنا قبل أوانِنا وحملنا على عاتقنا هموماً أثقلتنا ، لم نعُد نريد شيئاً..نريد من الحياة أن تدعُنا وشأننا..
اجه وليد متردد ، عمو واكف على حيله وأحمد رجع كنبص گبالي واني گاعدة على الگاع ...
رفع اديه ليفوك اثنيناتهن وطبب اصابعه بشعره
ونفخخ نفس بصوت مسموع وكال بحس مبحوح وشهكة بجي مسيطرة على حنجرته
كال بعد حيرة وتردد
- اني ربطتها بالكرسي وضربتها بالحزام .
-
بلحظتها من اعترف وليد صرت بين اعدام وبين افراج ...
عمو حامد رفع اديه باستسلام و من يمه صاح الحمد لله طلعت برائتي ...
عمو فيصل سيطرت عليه الصدمة ثواني واحمد كام من كدامي وصار بمواجهة وي وليد
عمو فيصل سأله بنبرة مبطنة بتهديد : ليش !
باوع وليد عليه اول شي وبعدها باوع على عمو فيصل
وكله هاي اسرار بيت ماتنحچي لا هنا ولا بأي مكان ولا بأي وقت ...
طفر فيصل كور قبضة ايده وضرب وليد بوكس
كسر سنه لان لابس محبس ثگيل
وكع وليد على الأرض وحلگه صار كله دم ينزل على الارضية وهو يبصق وساند جسمه باديه ع الكاع ..
وعمو ظل يصيح كاله ك""اا"د ليش شنو مسويه وتجرم بيها هييج
شديت على نفسي وحجيت يستاهل وليد
كتله عمو مصطفى خطبني واني ماادري هو عباله متقفه وياه واريده وضربني عباله استغفله
حجيت هيج ونزلت دموعي على جروح الي ماليه وجهي ...
وكانه بوكس الي اكله وليد من فيصل ماشفى غليل احمد
بنفس اللحظة جيت عليه و يضرب بي
و يصيح عارات زبالة تستكون على درة!!!!!
يسب ويضرب بي ووليد يدفع بي ويصيح بوجهه شعليكم حاشرين نفسكم بحياتنا اني ابن عمها واعرف شي وانت تعرف شي لا تتدخل
كاله احمد الله اكبر يالماعدكم رحمة ولكم ولية غمان ولك ابوها لو عايش تكدر تسوي هيج ؟؟ انتوا مخانيث مع الاسف عليك وليد عبالي رجال طلعت ناقص تستقوي على مرة
على صوتهم طلع الدكتور ظل يصيح
مرضى هنا فضوها بره المستشفى حسو على نفسكم شويه لا اطلبلكم الامن
سكت احمد ووليد ابتعد عنه لزك نفسه بالحايط
يعدل بقميصه الي تشلعت دگمه ويمسح الدم من حلگه
عمو فيصل كال بتهديد شوفوا والله لاادفعكم الثمن غالي واذوككم نفس الوجع واكثر وفوك ماتتصورون
انتوا بيمن اندكيتوا ؟؟ اندكيتوا بمصب العين
سهلة دباركم يمي ....
بقيت اني محتارة اباوع هيج وهيج مناك جدي جرحي وهمي ومصيبتي بالانعاش وماادري بي يكوم منها سالم لو لا
ومناك وليد وجهه منكع بدمه ، يمسح وجهه بقميصه الي تكطعت دكمه
ومنا عمو صار نار واعصاب ويهدد ويتوعد
قويت نفسي وكمت ماريد تصير مشاكل بسببي
كتله عمو عوفهم الله يخليك المهم جدي يطلع بالسلامة كلشي فدوة اله
صاح وليد من مكانه بعصبية انت شعليك تهدد بتنا نضربها نموتها ندفنها انت شعليك حاشر نفسك شي ميخصك خليك بعييد
على حجيه هذا مثل تيزاب وانصب على نار
جيت عليه عمو يضرب بي هو و احمد
اجاهم عمو حامد كام يصيح ويريد يطلع ابنه من جواهم
وهم وسحلوه وياهم واني مخليه اديه على خدودي واشهگ وابچي
وصارت ناس تضرب بناس وطلعوا امن المستشفى وصارت هوسه واني كاعدة اضررب على وجهي
امن المستشفى اخذووهم من ردهة الانعاش وطلعوهم ماادري وين ودوهم
واني بقيت وحدي يم الباب وادعي لجدي كل حيل وعافية مابيه ، عليمن ادعي وعليمن اسكت ...
ادعي على الدنيا الي تكفخ بيه؟؟ انوب وليد جان عندي امل بي بعد جدي طلع نفس اهله
لا اكثر لان همه ماجان عندي رجا بيهم وهنا المشكلة هنا الي يذبح الگلب لمن يطلع الغلط من شخص تعزه تأذي وتجرح اكثر
احس زادت معاناتي لمن انصدمت بأنسان جان كل عشمي بي ، انسان مثل وليد راهنت عليه راح يكون سندي ، ماتوقعت منه كل هذا
ماتوقعت رفضي اله راح يحوله وحش بدون رحمة
معقولة يسوي كل هذا بدافع الحب ! لو يريد ينتقم لكرامته المهدورة بسبب رفضي اله !
رفعت راسي للسما غمضت عيوني وكعت دموعي ، ظليت ادعي واناجي ربي رب شيصير لجدي ياربي رحمتك ارحم بحالي ماعندي غيره
مو انت تكول فأما اليتيم فلا تقهر
اليوم اريد جدي منك لاتقهرني بي
ظليت اتوسل برب العالمين
كاعدة ابجي بالكاع ، سمعت صوت خطوات اقتربت مني ، رفعت راسي شفته عمو فيصل
دنك يمي كال كومي وياي
باوعت بوجهه جان بعده معصب سألته وين ؟
كال خلي يشوفج الدكتور لاتروحين توكعين وانتي اصلا منتهية
دنكت كتله عمو مابيه شي اني من يصير جدي زين اصير وياه زينة
اجاني صوته معصب كال باعي رفعي عينج وباعي هذا شاربي ازينه اذا مااخذت حقج زين دره
كتله عمو مااريد شي والله بس جدي و بجيت ماكملت كلامي
مد اديه حضن راسي وباسه ، جر نفس قوي
حرارته لفحت راسي
كال مااعوفج ولا بيوم تظنين اخليج وحدج لاتفكرين ولاتخافين اني وياج
هزيت راسي كال بحنية وهدوء
يله كومي ...
سألته و بعيوني كومه دموع وجدي
كال يصيرر زين وعيونج يصيرر زين
لزمني من ايدي وكومني ...
اخذني ورحت للغرفة ساعدني اتمدد كل قوة مابيه
تمددت على سرير المستشفى اباوع للسكف وايدي على بطني
شويه وطب احمد جايب بيده علاكه كال هاي ملابس واكل حتى تبدلين وتاكلين
كتله مالي خلك كولشي والله شون تعبر اللكمة وجدي من البارحة مماكل
كال لازم تصيرين قوية علمود جدج لعد هو شوصله لهالوضع غير من قهره عليج
كتله احمد يكولون انت اخويه بالرضاعة صفيت بعد جدي اني والكاع اريدك انت سندي حتى اعيش وانتظر جدي والله ميته وظهري عاري خيمتي وكعت وتكشفت
نزلن دموعي كابلني وظل يبجي وياي
كال والله مااعوفج بعد سمعتي جنت اكول وليد ساندها بعد هذا الموقف تغير كولشي
باوعت على عمو لكيته يدخن جكاير عيونه حمر ويباوع على الشباك
كمت طبيت لحمام فتحت المي على جسمي شاغت روحي انسمط اباوع من الضرب بالحزام جلدي مخطط وبيها مورم احمر و جلدي الضرب كله مبين بي شاغت روحي وظليت جوه المي وطلعت حسيت احسن
بدلت وطلعت سمعت احمد يكول لعمو هذا احسن قرار تاخذه بحياتك ومتندم صدگني
دخلت هم سكتوا اجا الطبيب وضربوني ابر اللتهابات ومسكن الام وانطاني مرهم بس اني بياحال حتى مااخذته
كتلهم جدي ماصار زين؟
كال احمد بعده
كلت لعد فدوة اريد اروح يمه
عمو فيصل كال ابقي هنا احسن تمددي ونامي
من يسمح النه الدكتور نطب عليه انت أول وحدة اجيج اخذج تطبين يمه
كتله بتوسل لا عمو والله مااكدر
نزلت من السرير امشي وهمه بصفي ، كلما تخوني قوتي واميل هم واحد منهم يسندني
وصلنا لردهة الانعاش اباوع لجدي من الجام
الاوكسجين مخلينه بحلكه سوده عليه
ظليت اتمتم بألم بيه ولا بيك جدي من صحتي على صحتك ان شاء الله
بقوا احمد وعمو فيصل ماعافوني ابد
بس وليد وحامد ماكو طلع الصبح وهم ماكو
الانتظار قاتل والوقت يمشي بطئ
واني دموعي مااوكفت
عمو فيصل ماوكعت الجكارة من ايده
وأحمد راح نام بالغرفة بمكاني
بعدها طبوا عمامنا عمو قاسم وولده واجو وليد وحامد كلهم طبوا يسألون عن جدي ووضعه
واني ماسكتت من ترديد ( امن يجيب المضطر اذا دعاه ويكشف السوء )
يمكن مليون مره عدته شويه
واني كاعدة على هالحال البائس ، شفت مصطفى دخل ببدلته العسكرية واجا يمشي سريع ووصل يمهم
وظل يسأل على جدي بخوف وقلق
وظل يحجيلهم اني جاي من الدوام خابرت اهلي وكالولي على خالي متخربط واجيت
سألهم وين وليد اشروا عليه
توجه مصطفى باتجاه وليد ومبين عصبي وعبالك راح يتناطحون باي لحظة
وفعلا بس وصل يمه مصطفى لزم وليد من ياخة القميص
وسحبه اله وصيح بوجهه الا اكسر ايدك الي مديتها
ولك نذل تسترجل على مره بيك خير عاركني اني
لو جبان كدرتك عليها
وليد يدفع بي ويغلط عليه ويكوله انت هم يجيك الدور خلي يصير جدي زين اصبرلي
مصطفى يكوله تخسي جبان بيك خير من جنت كاعد جان لزمتني مو من طلعت يله رحت الها واستقويت عليها خنيث
كمت من مكاني و رحت يمهم وحاجيت مصطفى كتله شتريد مني مو كتلك مااريدك ليش تسسببلي مشاكل كل مرة
باوع عليه مصدوم مااهتم للكلام الي كلته اله بقدر اهتمامه بوجهي الي مخربه الضرب
كال بعصبية وعيونه مفتوحة على اوسعها
هذا الكلب هيج مسوي بيج
وكمز عليه وظلوا يفاككون بيهم وسحبوا مصطفى وهو يتهدد ويتوعد ووليد يغلط عليه يكله تحلم تجيس اظفرها كلكم تسمعون اني ناهي عليها
احمد لزم وليد كله من البارحه ساكتين عنك والا حسابك بعده ماوصل
وليد ضربه والهوسه واني اباوع عليهم ومااريد بس جدي لازواج ولا كلية
لو اعيش وياجدي لو اموت وياه مستحيل نفترق
ربي هيج اكتبها عليه
فضت الهوسه وناس تروح وناس تجي ومرن يومين واني بس المي ببطني ولاعفت مكاني وبس مكابله غرفة جدي
يادكتور يطلع اسئلة على وضعه يكول حالته مستقرة وان شاء الله نطلعه من الانعاش ..
رغم الاطباء طمنونا عليه بس اني گلبي نار ماتطفى عليه
بعدها اجو شوكة وهناء وبيبي
وشوكه تبجي وتصيح كون لهناء والله ماابجي كون لحامد ولعباس ماابجي كون لبيبي والحسين اركص
خلت العالم كلها تضحك وبيبي كرصتها وشوكه عاطت كالتلها جا اجذب على ربي المهم جدي كلهم خايسين ترحوله فدوه ونذر
تحجي وتبجي وتمسح دموعها ، لفت واجت عليه تبجي دره والله الله يساعدج باستني كالت شجاه وليد تسودن من عرف بمصطفى بس والله هو مو هيج هاي الحيزبون كالتله شفتها تحجي ويامصطفى من ورا السياج
هزيت راسي كتلها اني مو كدامج بالغرفة شوكت طلعت شوكت حاجيته الله اكبر
كالت هالحيزبون مو كتلج نسمههم وفيصل يطلعنا من السجن وتغمز بحواجبها
بعدها كعدت و تربعت بالكاع يمي ولابسه عباه وجواها ربطه ونعالها لونه احمر
كالت بالله عليج مارادوا يجيبوني كالوا تفشلين ام السوادين
بس اني جلبت ببنيد السيارة نمت عليه دفروني ضربوني ماوخرت والحيزبون ذبت مي عليه وماعفت السيارة
بقيت نايمه عليها لزكت جني ضمغ دغدغوني وماهديتها ابد تالي ياسر انقهر عليه وصعدني بالكوستر بس تفلت على هناء والحيزبون ولاح عمي حاتم منه ياله عفت سيارة عمي حاتم
وجدي عزيز عليه والله اني جايه على موده
وهم بلكي دكتور ينعجب بيه ويتزوجني
اني مالي خلك اضحك غصبا عليه ابتسم
بعدها اجا دكتور كال الحمد لله عدت الجلطة وبدا يفوق...
كمت ابجي من الفرح وسجدت بالكاع واحمد الله واشكره ابجي واضحك اكمز وشوكه ويايه تكمز يارب رحمت بحالي ورجعتلي روحي الجانت معلكة بين السما والارض ...
سألت الدكتور واني افرك باديه اكدر اشوفه؟
كال هو يسأل دره وين انتٖ دره ؟؟
كتله بلهفة وحماس وفرح وايدي على نفسي ااشر على رووحي واحجي بفرحة عارمة اي اي اني اني فدوه اشوفه
كبل لا يكول فوتي فتت جوه
فتت عليه شفته مفتح عيونه ااااااخ ياجدي انت العشك وانت الروح انت الهوا وانت المي انت الصبح ونسمه هوا العذبة انت الطيب والحنين انت حياة دره وانت الممات لدره بعدك جدي
ظل يباوع لعيوني وابتسم وهوه كوه يتنفس كتله الحمد لله مااريد شي بالدنيا غيرك ...
( اذكر واني صغيره عمري تقريبا عشره سنين رحت وياجدي لعرس وجنت كولش متونسه بوكتها جدي جان يغني اليه دره ياحلاها كصايبها وراها اجا الخطاب يخطبها وجدها مانطاها ...
بيبي كالت اله بله المن تنطي دره وتزوجها
كال ااا هذا ياهو الياخذها مني لازم ازوجها بيت قريب يمي كون ماافاركها ولازم واحد اذا مد ايده على دره اكسرها
حجاهه و كام يضحك ....
كتله جدي لاتكول هيج اني ازوجك انت مااتزوج غيرك
هو ظل يضحك ويكول يابختي بدره اي والله
بس مايصير يابويه
كتله معليه من اكبر ازوجك علمود مااعوفك هو يضحك يابويه يابويه هذا ياكلب ابن الكلب ياخذج ويوجع گلبي )
بست راسه وفرحانه بي وهو مفتح عيونه يباوع بس عيونه تحجي زعل وقهر لان شاف وجهي كله اثار
كتله مو مهم الضرب فدوه الك كوم حتى تاخذ حقي ظليت ابوس بايده مااشبع يارحمة الله يارحمة الله من صار زين ...
بعدها نام وطلعت اني ، سالوني حجى كتلهم لا بس يباوع بعيونه المهم فاق والحمد لله
.....
اهم شي حسه بالدنيا ماريد شي غير حسه وشوفته
ياربي عشت لحظات عصيبة خوفي على جدي جانت اصعب مرحلة مريت بيها بحياتي لحد الان مااتخيل يومي بدون جدي
هيه اللحظة وشنو هيه اللحظة مااطيقها بدونه
حتى من اداوم كلية هناك افكر بي شنو اكل شنو شرب من ارجع شنو راح نسولف وشراح احجيله ...
بعد ماعشت هاي اللحظات المعدودة بفرحة عارمة لان جدي كعد وفتح عيونه
افتقدت شوكة ظليت اتلفت واكللهم شوكه ماكو
مشيت الممر اطل وادور عليها
شويه واجا عمو جعفر لازمها من عكسها كال بله خزتننا لازكه بالمصعد صار اكثر من ساعه ماتطلع منه تروح ناس تجي ناس شكد عيب اشتكى العامل عليها انوب طاردته من المصعد تكله اني اليوم بمكانك
باوعت عليه كالتله شلكم شغل مال الحكومه وا لعب بي ظل يهز بايده
كاللها ترجعين وياهم ماتظلين هنا لا تفشلينه
كالت والحمزه ما اروح لحد ماجدي يطلع
كال لا ربحنا
شافته راح يم الزلم انوب اكو سديات يمنا تصعد وتدفع برجلها بيهم وتمشي السديه بيدها والممر كلبته هوسه
جرها عمو جعفر ودفعها يمي كالت لازم استغل مرض جدي واحصل عريس جنت بالمصعد شفت يخبلوون يابويه عبالك لوز وعلي
وهالمره انتي وجهج جنه قندره جوبلس من الضرب محد يباوعلج اني احلى منج
حتى الدكتور شفتي يباوع عليه
كتلها بكيفج ان شاء الله تحصلين اني شريد من الدنيا بس سلامة جدي وعريس الج
طلعت بيبي من يم جدي تبجي وتكول مو الك هاي النومه ابو سلام كوم
راحت الها شوكه كالت الها اي مو لجدي هاي النومة الج
يوم الج واذبح طلي بفاتحتج
هي فتحت عيونها وتصيح اسم الله اسم الله المسوودنة مفاولة عليه غراب البين ولي من وجهي
شوكه ظلت تضحك كالت اشهدوا عليه ياعمامي من بيبي تموت اروح وياالدفانه انزلها بيدي بالكبر
بيبي عضت اصبعها وتكوللها نقمة كوون يوومج كبل يومي
وعمامي يضحكون سوتلهم جو شوكة
عمو حاتم كاللها ليش عود شوكة تروحين وياهم
كالت شوكه حتى ابو....
وانيى ركض .سديت حلكها لاتكمل
واني سادة حلكها اباوعلهم واحجي وهي تحووس تريد تطلعها من حلكها الحجاية يله ترتاح
اني كتلهم حتى تبجي عليها
بعدين عمو حاتم سأل على حامد ووليد وين
كتلهم ماادري كال البارحة اهنا
كتلهم لليل راحوا وبعد ماشفتهم
سكتنا شويه وطب عمو فيصل وعمار سالوا على جدي
من عرفوا بي فتح عيونه كالوا الحمد لله
اجه يمي عمو سألني على صحتي
كتله والله صرت زينة من صار جدي زين وفتح عيونه عمو بس كوه يحجي مايكدر
كال الحمدلله هسه مدام ارتاح گلبج روحي للبيت ارتاحي مو صار زين وانت محتاجة راحة
كتله يابيت عمو يابيت ، بيت ومابي جدي مايعتبر بيت
اني ما اطلع هسه الا يطلع جدي يله اطلع وياه
كال شون ويه عنادج مو انت تعبانة عيونج راح تطلع من مكانها وخدودج ذبلن
ضحكت كتله والله مابيه شي ارتاح عمو اني هياني شوفني اضحك
وضحكت
هو صفن ثواني بعيوني وبعد ابتسم ابتسامة بسرعة تلاشت وتحسر وراح يم العمام ...
يوم ورا يوم تحسنت صحة جدي وفاق وناس تروح وتجي عليه واني ماعفته وعمو فلاح اجه وصاحني بره
رحت ورا كال بقلق :- حامد ووليد ماكو ندور عليهم اختفوا ماشفتيهم هنا
كتله لا عمو ماشفتهم
كال يمتى اخر مرة شفتيهم ؟؟؟
كتله بتفكير يمكن قبل تلث ايام بعد مااجو ا عبالي جدي مايريد يشوفهم ولا سأل عليهم
ظل يصفك باديه و كال ماكو مكان مادورنا بي عليهم مالهم اثر
كتله الله اعلم والله عمو ماادري ....
كال يله فوتي جوه ...
فتت يم جدي وبقيت افكر ، ياربي وين راحوا !!
باوعت لجدي حتى ماسأل عليهم ابد
واني عندي فرحتي لسلامة جدي تفوق كولشي والحمد لله ...
شوكه كامت هي تجي لوحدها بدون بيبي وهناء بعد ابد مااجوي يمكن ملتهين باختفاء وليد وحامد
شوكة تجي ويه عمامي للمستشفى تجيب وياها ملابس الي ولعبت لعب ماخلت مريض ماعرفت قصته ...
وتكوم بالمريضات تاخذ اكلنا وتروح توزعه عليهم واحنا نضل بلا اكل
من يجون بالليل عمو فلاح لوو عمامي الي هم اخوان جدي ياخذوها يرجعوها للبيت
ومقسمين العمام بيناتهم يوم يبات عمو فلاح ويانا ويوم عمو جعفر
وكلما يجي عمو فلاح اسأله عن وليد وعمو حامد
وصرت قلقة عليهم مهما يكون عشرة والعشرة متهون
اما جدي سمحله الدكتور يطلع من للمستشفى للبيت
والحمد لله الذي لايحمد على مكروه سواه وطلع للبيت واني وياه بالسيارة لازمة ايده وابوس بيها وهو شويه تعبان قوة ماعنده
وصلنا للبيت و الغريب ماكو لاوليد ولاحامد وعمامنا يدورن عليهم شكو بمصطفى خاف مسوي شي ..
وراحوا دزو عليه اجه وحلفلهم ماله علاقة
لحد ما بيوم اجا عمو فيصل واخوانه لجدي يشوفوه
ويتحمدوله بالسلامة
اني كاعده يم جدي ماافاركه لازكه بي بس اذا اجو الخطار الغربة اعوفه
بس غيرهم لا ابقى مكابلته وقايمه بكل واجباته اغسله واوكله وابدله كولشي وانام يمه
كلما افز باليل اشوفه ابوسه وانام واتقرب اشمه عبالك طفل مجلب بامه
هو يكلي ريحتي خايسه مال مستشفى اكوله مسك وعنبر ريحة الجنة ريحتك
عاملته مثل مجان يعاملني قبل من جنت طفلة بمرضي وايام جنت مااكدر اقوم بواجباتي
واحنه كاعدين دخلت بيبي وهناء يتوسلون بعمو فيصل
بيبي كلتله اروح الك فدوة ابني ووليد وينهم خاف مشتبهين بيهم وماخذتهم الحكوومة وراحوا جوه الرجلين
عمو فيصل جاوبها حجية توقعي كل شي هاي دنيا كل شي بيها
هناء لطمت وجهه وظلت تبجي وتنحب لا عفية الله يخليك انت عندك عرف بالدولة شووفهم وين وليد وحيدي وابوه بعدهن بناتي محتاجاته عفية بروح امك بروح ابوك
جاوبها ببرود ونبرة مبطنة بتهدبد
والله يا ام وليد لو مو عرف بالدولة هاي الدولة ماتعترف بالعرف خليها ابالج الي يخطأ يتعاقب
يباوعلي ... ظلن هن يتوسلن بي ويبجن وهو برودة جليد القارة القطبية المتجمدة كلها بي
وظل يباوعلي ... وكال لهناء وديري بالج انت ترى هم يشملج العقاب ديري على روحج
جان يحجي بنبرة مبطنة بتهديد وعيونه تروح وترجع وتحط عليه ... مثل طير يطير ويرجع لعشه
بعدها شافن ماكو نتيجة بيبي اخذت هناء وطلعن يبجن اثنينهن...
واني اجاني احساس هو ورا اختفاءهم وتذكرت من حلف بشاربه ...
الى ان صار الي قطع الشك باليقين ...
جدي تقرب لفيصل وحجه وياه بصوت ضعيف واهن بسبب المرض
- گله فيصل طلعهم ....
يتبع ...
الغلاف الجميل جدااااا بأيد المبدعة ام عبد الرحمن 😍

# النشر بين يوم ويوم هواي شفت يسألون وانا نوهت بالبارت السابق 💜
رواية طَوفانْ رَجُلْ الفصل العشرون 20 - بقلم نورا ناصر
السلام عليكم
رواية طوفان رجل
الفصل 16
نورا ناصر
كل ما حدثَ معنا نعتقد أنه انتهى بانتهائه ، لكنه يبقى عالق برؤوسنا دون أن ندري ، ثابت في مكان ما بداخلنا ، نعجز عن حمل كل ما مرَّ بنا دفعة واحدة وإلقائه وراء ظهورِنا ، هناك كلمات ، نظرات ، نبرة أصوات ، بداخلنا حية ، في عزلتنا الوقتِيّة تُصيبنا وعكة التعمّق في التعمّق وتكون بمثابة صمت خارجي يُغلّف صراعات داخلية لامتناهِية ، حتى نصِل بعدها إلى الصمت الداخلي الذي يُعيدُنا إلى الحياة مرة أخرى.
صارت ملامح عمو فيصل كلها متفاجاة
هو كاعد بصف جدي وجدي بيده السبحة ويفر بيها
ويباوعله وعلى وجهه ابتسامة لعوب
عمو جاوبه بعد لحظات من الصدمة وبابتسامة
كله شعرفك يمي ؟
جدي ميل راسه وعينه بعيون فيصل
كله افاا فيصل انه خامك واعرف شنو تفكر
وكمل كلامه بعد تنهيدة مريرة :- طلعهم هم ولدي وغلطوا وانه اعرف شون اعاقبهم ..
جاوبه عمو فيصل بقبول اذا اريد اطلعهم بس لخاطرك المهم حق دره ماضاع ....
جدي استمر يفر سبحته وهز راسه وباوع عليه ابتسمت بوجهه بحب بس بالي مليان افكار
.. بعدها راح عمو فيصل ... وصله عمو فلاح للباب ورجع يم جدي وظلوا يتناقشون بالموضوع
كمت اني شلت الصينية الي بيها الضيافة ورحت للمطبخ وبس افكر كوومة انهالت عليه افكار
امشي وبيدي الصينية ، صارت مقابيلي رنا ، جانت عيونها كلها دموع
انقهرت عليها ..وكفتني من لزمتني من ايدي تحجي وتبجي كالت صدك فيصل رفض يدور على وليد وعمي حامد؟؟
لو صدك هو حابسهم لان وليد ضربج ؟
باوعت بعيونها مباشرة وبتركيز ومقهورة ايدي رجفت مادري شنو اجاوبها ضاع كل الكلام مني
تحسرت اريد احجي كالت والله اني مارضيت على وليد يسوي بيج هيج ولا حتى صدكتهم من حجوا عليج وتهموج لان اني اعرفج متسويهه
جانت تكول كلامها بهمس وتتلفت
مشيت للمطبخ وهي مشت ورايه ، خليت الصينية وظليت اباوعلها هي سكتت شويه
وكملت كلامها حجيت على وليد من جان يجي من المستشفى وكتله ترة دره ماتسويها ووالله يادره هو جان ندمان ومقهور وكاره حتى روحه
اني اعرف فيصل يعزج وهو عنده نفوذ ويمكن صدك مثل ميكولون عمه وبيبي هو الي اله ايد باختفائهم
وكالت دره اني عروس
ومكملت كلام ظلت تشهگ وتبچي
لزمتها من ايدها وبيدي الثانية مسحت دموعها
كتلها مسحي دموعج وان شاء الله يرجع ...
حتى كوة كلت اسمه و ليد وعمو همين وتقر عينج بشوفته
ظلت تهز راسها وتمسح دموعها
كتلها اي شي يكولوا انت لاتصدكين اذا متشوفين بعينج تمام
كالت اذا قصدج على الي تهموج بي
سكتت كتلها اي شي يصيرر ويله روحي نامي وارتاحي مبين عليج تعبانة لانوم لا اكل رحمي بحالج شويه
كالت مو اهلي يكولون خاف كرفتهم الحكومة خاف احد كاتب تقرير عليهم عادل مبقى مكان ماسأل عنهم
كتلها لا تخلين ابالج هذا الشي انت خليج واثقة يرجع ان شاءالله وهاي الافكار شيليها
حاولت اضمد جروحها واطيب خاطرها واني عليلة وخاطري مكسور
بس مهما يكون الكلمة الطيبة صدقة ، راحت هي نامت
واني رحت يم جدي ومتجنبة الكل عندي بس جدي بالوجود ... فرحانة برجعته للبيت ..
رجعت يمه حضرت فراشه مددته وغطيته ، وتمددت يمه واباوعله طايرة بي ييمه اجه يروح من ايدي ، اني ماتخيل حياته لحظة بدون كل شوي اسجد سجدت الشكر لله على رجعته الي بالسلامة
غفيت وصار الفجر كعدنا اني وجدي حتى نصلي رحت امشي حتى يتوضى ولازمة بيده
وكفت يمه ع المغسلة وخليته يتوضى ورجعته للديوان ورحت توضيت رجعت شفته كاعد على سجادته
كتله هاا خما صليت وخليتني ؟
ضحك لا بويه شلون يصير انه اتانيج
لبست الجادر مال الصلاة وهو جدي گبالي واني وراه وصلينه سبحنه التسبيح وبعدها طويت السجادات ومددت جدي وكعدت يم راسه اقرا عليه ايات قرآنية
ولهناك تذكرت وليد واصلا اني بكل موقف اتذكره وهسه بالصلاة ومن كلت لجدي خما صليت قبلي تذكرت موقف
مرة جدي جان معزوم واذن المغرب واني طفلة افتر منا ومنا فتت للصالة شفت وليد يريد يصلي ...
هو شافتي كال يله درة صلاة يله صلي
كتله ماا الا جدي يجي يله اصلي
كال مايصير يروح وكت الصلاة
كتله معليك اني اكول لرب العالمين جدي طالع وخطيه يصلي وحده وانتظرته
ظل يضحك كال مايصير وهسه جدي صلى وعافج هو مايفوت فرض
كتله لاجدي مايعوفني الا نصلي سوى
كال بكيفج وتوجه للقبلة وظل يصلي
بعدها اجا جدي رحتله ركض حضنته وبوسته وهو جان جايبلي وياه جوكليت وملبس كلش احبه
لهناك وتذكرت الصلاة ، كمت لزمته من ايده يله جدي كوم نصلي وليد يكول صليت
كال اي بويه انه صليت
هو كال هيج واني كلبت البيت بالبجي ليش تصلي واني انتظرك
اجا عمو حسن صاحني وفهمني على الموضوع بس كتله ميخالف مااسامح جدي مدام صلى وعافني
همه يضحكون عمو حسن يبوس بيه ويكول فدووه هالجمال
رحت زعلانة وجبت حجاب و خليت جدي يلبسنيا
وكفت اصلي واقرا الايات بصوت عالي وانسى وهو يصحح اليه من اغلط
كملت صلاة ورحت مديت اصبعي الصغير لجدي عود صحيبة
كال جدي شنو اني هم تزاعليني؟
خجلت و هزيت راسي بمعنى لا
كتله باوع
وعمو حسن وجدي واكفين واني بنص الهول واغمض عيوني وافتر واصيح ياناس احبن جدي ياناس احبن جدي
وجدي يضحك دووم اسويها اله من اريد اعبر عن حبي اله اظل افتر واكول احب جدي ...
رجعت من ذاكرتي بست جدي على جبينه ، هو فتح عينه يباوعلي
كتله ها نايم كعدتك من النوم
كال احلى كعدة .. ابتسمت وبوسته هواي على راسه وجبينه وهو يضحك يكول هنيالي ...
واحنه على هالحال ونسمع دك بالباب بس قووي ومفزع
جدي يريد يكوم على حيله ، كتله على كيفك جدي لتخاف
كال لا انه ادري منو ، رفعت حواجبي وفتحت عيوني وهو هز رأسه ومبتسم
طلعت للصالة شفت عمو فلاح ينزل والباب ينرفس بعده
عمو فلاح جان قلق ركض للباب يفتحها ووراها الكل طلعوا من غرفهم
وجدي واكف بباب الديوان ... ويترقب
بس انفتح الباب دخلوا عمو حامد ووليد ووجهم يخوف ووجههم مدمى ومجرح ومزورگ
هدومهم مشككة وحالتهم حالة يرثى الها
خليت اديه على وجهي بفزززع
جدي شافهم ودخل ببرود للديوان ..
عمو فلاح واكف يم الباب لازمه مصدوم من منظرهم ، ورنا تشهگ وتبچي
وهناء وبيبي يلطمن
ويمكن شوكة بسابع نومة
ركضوا الهم بيبي وهناء بس رنا انزرعت بمكانها واكفة متصنمة ولازمة بمحجر الدرج
هم عافوا بيبي وهناء وطبوا يم جدي
رحت وكفت بباب الديوان
شفت وليد يبجي ونزل على رجل جدي ويبوس بيها
ويطلب منه يسامحه يكوله والله مااعرف شخبلني بذيج الساعة اتمنى الكسر ولااذي دره شخبلني سامحنى ابنك وغلط والسماح من شيمك
جدي دار وجهه وكال انتوا بس فيصل دواكم
عمو حامد واكف وكله اني شعليه يابه من عرس وليد بطلت حتى مااحجي وياها هسه اخذوني بذنب وليد ليش بالله ليش
يحجي ويون من الوجع يابويه يابويه
طبت هناء كبل كالت يبووه من ورا الكافره مدري شمسويه للزلم مسودنتهم
كبل صاح حامد عوفيها ولج ياخذوج وينعلون والد والديج ....
كالت بيبي وهي تفر بيدها شنو خايفين منهم مو زلم انتوا
جاوبها عمو حامد يمه صونده وحده تموتين ...
كالت بيبي ياايمه سودة عليه ورفعت اديها للسمه تدعي بصورة غير مباشرة عليه
هم اثنينهم يونون ويصيحون من الوجع ووليد بس يحرك بالجكاير واحسه منتهي
اباوعله واكول ليش هيج سويت بنفسك !! وهو يباوعلي بندم ومرارة
عمو فيصل اذاهم كولش وليش علمودي انقهر عليه بس اني ماارضى باذيتهم خطيه مو هيج
اني مارضيت الاذية لنفسي ونفس الشي ماارضاها لغيري
وهذا وليد مو حي الله واحد اوووف ياربي وين جاي نوصل ...
طردهم جدي كال ماريد اشوف احد منكم بس دره تبقى يمي وصاح على عمو فلاح وكاله طلعهم من كدامي
وهم كلهم طلعوا
تقربت من جدي مقهورة على الي شفته ماريد احد يتأذى بسببي
كتله لجدي سامحه خطيه كافي الي شافه وهو متندم ساعة شيطان
ابتسملي جدي وكلمة ماحجى وياهم نام وغطيته ....
وجريت التليفون ورحت لغرفتي ..
دكيت على عمو فيصل جاوبني
كال الو
سلمت عليه بنبرة كلها حزن
شونكم عمو شخباركم
كال الحمد لله ...
الي اثار انتباهي أغنية عبد الحليم الي مشتغلة يمه وصوتها تسرب لأسماعي بشكل واضح
چانت كلماتها بصوت عبد الحليم العذب
تگول
اشتقت اليك فعلمني ان الا اشتاق
علمني كيف اقص جذور هواك من الاعماق
علمني كيف تموت الدمعة بالاحداق
علمني كيف يموت الحب وتنتحر الاشواق .
يامن صورت لي الدنيا كقصيدة شعر
وزرعت جراحك في صدري واخذت الصبر
ان كنت اعز عليك فاخذ بيدي فانا مفتون
من راسي حتى قدمي
فانا مفتون من راسي حتى قدمي
جر نفس كال الگلوب سواجي يابه
كتله عمو مااعرف شنو اكول بس خطيه هيج مأذيهم
اني مسامحتهم حتى لو ... بس ماكو واحد مايغلط ومادام الله جبرني بسلامة جدي كولش كافي عليه
و تسلم عمو ماقصرت ربي يديمك سند وقوة النا
ضحك كال ادللي يابه وصلتج العصارات لا ؟
كتله اي وصلت جاي تخجلني اشكرك على شنو وشنو والله محتارة
كال دره لاتشكرين المهم عندي احسج مرتاحه والضحكة ماتغيب عن وجهج
كتله بوجودك ، تسلم مع السلامة
نهيت المكالمة وياه
ورحت يم جدي لكيته كاعد
رحت يمه كتله هاا محتاج شي
سألني وين جنتي كعدت مالكيتج
حجيتله على المكالمة ويه عمو فيصل
وهو طلب كل شي بالتفصيل
واني ماقصرت حتى على الأغنية هم حجيتله
وشرحتها اله
ظل يضحك جدي وكال نامي نامي بويه وخلي عبد الحليم بگبره ..
واستمرت الايام وجدي رجعت صحته بالتدريج ورجع لنشاطه ورجعت الحياة طبيعية والحمد لله
وعمو حسن رجع من اجازته مايدري بالدنيا شكو وكعدوا يسولفون الصار اله بس اكتفى بكلمة وحدة زين اني هسه شسوي يعني صاير البيت ماينطاق
كال اخر كلمة واخذ الجنطة وصعد لغرفته
تقربت الجدي وهمست بأذنه
جدو عمامي مابيهم خير واحد عربانة وواحد خنجه وواحد محتار بس بروحه
جدي ابتسم كال اي والله العوض عند ربي
والحمد لله ناس ماتخاف الله تخاف من البشر ظل محد يندك بيه مرتاحه كولش
ووليد هواي لح باعتذاره ظل ايام يعتذر وينزل على رجله لجدي ويبوس بيها
اخر شي جدي قبل اعتذره ماكدر على زعلهم لان هو ايد جدي اليمنى ...
كاعدة بغرفتي واندكت الباب وجان وليد وهاي للمرة الالف يدك الباب يريد يعتذر وماافتح اله
ظل يحجي من ورا الباب دره ماتسامحين نسيتي زيناتي كلها وذكرتي شينه وحدة بس ؟
اني ملتزمة السكوت ومشاعري حجارة وگلبي انحت عليه جرحه وهو حديد ...
اجاني صوته لا تحرميني منج عفية راح تبقين هيج طول العمر
تنهدت ، رحت فتحت الباب وصار كبالي
صكيت اسناني كتله وليد روح منا مرتك شتكول
هسه ، احترمها ع الاقل يااخي
ظل واكف كال انت تعرفين اني جاي اكره روحي والله
كتله من ايدك يله روح وهذا عقابك
سديت الباب بوجهه ماكدر انسى الي سواه بيه ..
بعدها اني بغرفتي و سمعت صوت هلاهل ، طلعت من الغرفة شفتهم هستوهم جايين من الطبيب ووليد بيده ورقة التحليل
عرفت رنا حامل ، كولش فرحت ووليد يستاهل ورغم الموقف الصعب الي صار بينا بس اني مااحقد. ...
لكل واحد من عدنا لحظة يخطأ بحياته ويدفع ثمنها غالي
صحيح ماارجع نفس قبل وابقى انقهر على الايام والعشرة الحلوة الي جانت بينا ، لكن ترجع الحياة طبيعية
وتمشي ويبقى جرحها بمكان عميق بالگلب ..
جان وليد فرحان ووجهه كله يضحك واني هم ابتسمت ورحت باركتهم باوستها ووليد باركتله من بعيد مد ايده حتى يصافحني ماانطيت ايدي سويت نفسي ماانتبهت
ودرت وجهي
خليت حدود لعلاقتي بي صعب ارجع نفس قبل صار حاجز فولاذي صعب اختراقه
بس اضطريت اسامحه اذا الله يسامح اني مااسامح!!!
وارجع العلاقة لخاطر جدي ولخاطره هو اني اعزه هسه وبعد مو ذنبه حبني هذا امر القلب
مو ذنبه يكون بهيج عائلة احنا اثنينا ضحايا حامد وهناء و حكمة ربة بعدين نعرفها الله أعلم...
رجعت للدوام وبداية العام الدراسي واني فرحت راح ارجع اداوم والتهي
اجاني وليد جان يحجي وياي وبعدها علامات الندم مسيطرة على لغة جسده وعيونه
و عرض عليه نطلع نشتري ملابس
بس اني ماقبلت ورفضت
كال لعد معناها بعده قلبج شايل عليه
كتله ابد تعرف جدي علمنا ننسى اللحظات المؤذية بحياتنا لان تعلمنا على الحقد والحقد اكثر شي يأذي صاحبه
و راح يضل مرتبط بالماضي وماعايش الحاضر الله موجود وانت تندمت وهذا اهم شي الله يسامح منو احنا ومانسامح يابه وحتى تتاكد اروح بس جيب رنا ويانا
ضحك كال تمام وكام ظليت اباوع على وليد هاي الي يكولون عليها غلطة الشاطر بألف بس وليد من الاشخاص الي يستحق اكثر من فرصة
طلعنا واشترينا رنا حبابه وهادئة استمتعت بالطلعة وياهم واباوع شقاهم وكلامهم الهمس ادعي بكلبي الله يسعدهم ويهنيهم
التهيت بالدوام وهاي الفترة اني مرتاحة من البيت والدوام نكدر نكول عمو فيصل ضبط الدنيا الي بعد رب العالمين ...
البيت ابدد محد يحجي اويذب كلمة وحتى الشغل بكيفي بعد ماجانوا يسحلوني سحل اني وشوكه حتى هي تكدر تفلت منهم بس اني وين اكدر
عمو حامد نهائيا مااندك بيه ولو هناء حتى لو لمحت تلميح الي هو يتخبل من يمه ويكلها يعلكوج فلقة تره اني ابلغ عليج والله
وبيبي تخاف من يمها وتسكت مني ....فيصل عيشهم برعب فترة ....
صح مرتاحة بس اني مو استغلالية واستغل هيج اشياء
اشارك وياهم بحملات التنظيف والحوش عليه حتى لو داوم بالليل اكمله
ومواعين العشا واصلا شوكه وين تعوفني والصراحة احب احرك نفسي ومااحب الناس تخدمني بس كل هذا بمزاجي و محد ضاغط عليه من جنت اسوي والحجي كله فوك راسي
عايشه والحمد لله بهدوء والحياة مستقرة بس وين دره تعرف راحة ابد ...
فد يوم كال جدي عمار صار عنده ولد ونريد نروح نبارك الهم حضري نفسج حتى اخذج وياي
كتله تمام ورحت بلغتهم وحضرت نفسي
رحنا اني وشوكه وبيبي وجدي نباركلهم
اول مادخلنا كالت شوكه كبر يافيصل شو انت تزوجت شعيط ومعيط وبليط بقت بس عليه
ووكالت لجدي جدي جدي گله خل يكسب ثواب بيه
كالها جدي حقج والله اليوم اگله ادللي شوكه
نزلنا من السيارة وطبينا لبيتهم سلمنا على الكل وكعدنا ،ضيفونا واجت فاتن جابت ابنهم يخبل انطوه لجدي واني اتوسل اشيله
اطانياه جدي كلت فدووه الله يحفظه
احمد كال شوف دره يالله زعطوطه وشايله طفل
كتله انت شون عم هذا لو عدنا اكابله واكعد
كال شنو تحبين الجهال
جدي ضحك كال ولك تريد يصيرون عدها ست جهال ركضت اريد اسد بحلك جدي شنو يكول احلامي
عمو فيصل كال ستة شدعوه هسه لو خمسة نكول تسوينهم فريق خماسي كرة قدم ستة شسوين بيهم
كال جدي لا وتريدهم اربع ولد واثنين بنات
شكد استحيت منهم وهمه يضحكون باوعت لجدي زعلانه شون يكول هيج ويفضح اسراري وشوكه فاتحه عيونها تأشر لجدي عود احجي مو اتفقنا
جدي غمزلي كاله فيصل انت ابن عمي واخوي والمثل يكول اخطب لبنتك ولاتخطب لابنك واليوم اني هاديلك حفيدتي مره ما الكه احسن منك
همه بهتوا وعمو مصدوم من كلام جدي ومتعجب ويمسح بالعرك مالته
كال فاجئتني حجي عدنان
اني وجدي وشوكه نضحك ونباوع
كمل كلامه جدي يأشر بيده ترى بطلب منها
هو يضحك بس متوتر ويتلفت
عمه صفيه كالت يابه هو غير تزوج هسه من اجا من السفر وشون وحده تخبل مال وجمال هو مايباوع هنا
وتأشر علينا
جدي خزرها كلها وشنو حفيداتي شويه مال وجمال واصل وربات ايدي شو انتي ماتعرفين تحجين
ظلت تمتمت وتفرك بايدها عمو فيصل كال والنعم منك حجي عدنان
ورد باوع لعمة صفية بنظرة تحذير
عمة صفية تريد تداري فشلتها صاحت نورس تعالي
عمو زاد توتره وظل يمسح بكصته من العرگ
وشوكه تغم بي من جوه لجوه وتدردم يم اذني
تكول مفلفل مايظل بلا مره انتظر شويه شصار عليك
نزلت نورس واجت يمنا باوعتلها ايه من الجمال
اني وشوكه فاتحين حلكنا على جمالها ماادري وين يلكاهم عمو تخبل عيونها كبار سود والشعر اسود سرح ونازل على اكتافها چنه ليل
ظلينا صافينن عليها سلمت وكعدت ...
تقربت شوكه مني
كالتلي وجهه الجوبلس اني مو احلى منها ؟؟؟
هزيت براسي بمعنى اي
كعدت نورس يم عمه صفيه وعمه تمسح على شعرها وتكول لبيبي يمه شوفيها شون جمال فيصل يستاهل
ونورس مبتسمة وتباوع لفيصل بحب واعجاب
ومبين الغرور على هيئتها
بيبي كالت اي والله يمه فلعة گمر
تقربت شوكه تكول باع صفصف اللوكيه تصبغ وترجع ليوره اصلا اني احلى منها مو مو
اني صافنة على نورس حكرت شوكة
كامت كالت موو؟؟؟
وكرصتني حيل
عطت والكل باوعلي خجلت وافرك مكان الكرصة واباوع لشوكة و كتلها اي
وخرت عن شوكة شبعتني كرص و رحت لابن عمار وشلته
عمار كال ابقي اهنا نذبه عليج مايخلينا ننام
ضحكت يخبل والله اجت فاتن شايله المميه
كتلها انطيها الي هي مدتها واخذتها وكعدت اشربها اله
عمو فيصل يباوع عليه بتركيز انتبهت عليه
يباوع كتله عمو لو عندك جهال جان هسه بكدي وازوجه لان اكيد يلمع لمع مثلك
ضحك كال احمد دره نورس مو تشبهج ؟؟
ضحكت كتله لا احلى مني ...
كال اول ماطبت كلنا عبالنه انتي
عمار كال لا دره جمالها روسي بنكهة عراقيهة مختلف
نورس كالت منو هاي لا طبعا متشبهني وتعوج حلكها
جدي كال وهو يباوع لعمو فيصل دره مالها شبيه دره واسمها عليها مو فيصل ؟
جدي كله بالعافية عليك عبالي اطيك حفيدتي مو كتلك ماتكدر والعندي مايفيدك
حجاهه وضحك جدي
انطيت فاتن ابنها نام على ايدي
و درت من ورا القنفة و شاورت عمو هو عبالك كمز من حركتي وجدي يباوع مبتسم علينا
كتله عمو جدي يقصد على شوكه سايره بالشقا وغمزتله
هو ولا تحرك بس يباوع عليه لان قريبة
وكملت والله تخبل مرتك اصلا احلى مني بمية مرة
ضحك وكلي بهمس ماكو احلى من دره
و ركز باللفظ على حرف الهاء الي بأسمي ...
جدي كال يله يابه خلي نروح وبالخير عليكم ويتربى بعزكم ودلالكم
فيصل كال لا ماتطلعون ابقوا على العشه
جدي ماقبل وكام على حيله ... عمو فيصل همس لجدي
جدي باوعلنا اني وشوكة وبيبي كال طلعوا انتظروني برا جاي وراكم عندي حجايه وي فيصل
طلعنا برا رزان كالت دره ظلي باتي يمنه
كتلها لا عندي دوام ماكدر والله
شوكة كامت كرصتها ولج بس دره تظل واني ماتكولين
الي ظلي
خطية رزان خافت وكلتلها بخوف انت همين
ظلينه نسولف اني ورزان وشويه دفعتني بيبي كالت ولج وينها ذيج المسودنه روحي شوفيها
عمة صفية كالت لبيبي يمه وين تروح بت حامد هسه تلكينها تكمز وهسه ترجع
رجعت بيبي طختني روحي شوفيها
كمت عفتهم بالحديقة و رجعت للبيت
داافوت من يم الاستقبال و اسمع عمو يكول لجدي والله اطلقها هسه بس كول اي وبلل ريگي مو حنظلته والله مو حالة هاي
جدي كال انت امان الها من الناس بس مو امان من نفسك يفيصل
هزيت راسي بتساؤل وفضول
شفت شوكة يم حوض السمك رحت سحبتها وطلعت
بعدها جدي طلع وكال اودعناكم يابه
وصعدنا بالسيارة واجت عيني بعين عمو فيصل جان معصب
عفت نظراته عليه ودنكت و مشت بينا السيارة
و ظليت افكر طول الطريق شنو الموضوع معقولة يقصدوني اني ومعقولة هي تشبهني
اي صح هي تشبهي بس عمو لا مستحيل لا مستحيل ظليت ابعد فكري عن الموضوع
وبعدها فكرت بالمستشفى من كال اندكيتوا بمصب العين
هاي الحجايه ماراحت عن بالي ابد ... بس هو عمي وصديق ابويه وجدي معقولة يخلي عينه عليه !!
قاطعت افكاري شوكه كالت جوبلس شفتي مرته شونها كل من ورا جدي ظل يأجل بالموضوع الى ان تزوج غيري
كتلها شنو انتي راح تسميني جوبلس ؟
كالت اي عندج اعتراض جا مو انتي سميتني شوكه لان قبل لازمة ابو الصبير وابزز بيكم
كتلها والله مااتذكر
جدي ضحك كال اي مو ايدج انترسن بزيز وكمت اطلعهن بالملقط وانتي تبجين وكلتي الا اسميها شوكه هي تشكك بالناس
كالت هي ياع وانتي ماترضين بالجوبلس
كالت بيبي جاا هي اخذت جدج مني ترديها مااطلعلج اسم وتفر بايدها
باوعت لبيبي بله شنو اجاوبها ماادري
كالت شوكه بس مرته صدك تشبههج
كتلها لاشوكه هي تخبل شنو اني
كالت خايبه جا انتي بعرس وليد من خليتي كحله تكتلين كتل والعباس سمعت عمو جعفر يكول لعمو حاتم من رميتي اذا ماسودنوا اليوم وعافوا كل النسوان من وراها حجي عدنان حرك ولدنا اليوم .....
يتبع ...
الحيزبون وچنتها 😅
تصميم ام عبد الرحمن الوردة 😍💕
تصويت للبارت اذا عجبكم 🌺