تحميل رواية «طَوفانْ رَجُلْ» PDF

السلام عليكم ورحمة الله وبركاته

رواية طوفان رجل

الفصل 37

نورا ناصر 🌺

ريحة ليل تندهني وأسولف بيك..

وأتوسد حلم ملگاك وأغفه بحسبة متانيك..

وأفز محتام لشلونك..

تهت والعافية عيونك..

أفز محتام والگه الشوگ ريحة ليل تتوضه بنبع طاريك..

أفز محتام وألگه رويحتي تناغيك..

لشاعرها ...

صدمة وخجل وغربة ، الم ببطني صار ايام ملازمني ، يروح ويجي وبهاللحظة اجاني ، كدرت اتحمله مثل ما كدرت اتحمل كل الم بحياتي وحافظت على ابتسامتي ...

كال بابتسامة  ‏ انه عمج علي الجبير والتفت واشر على واحد منهم وكال هذا محمد

‏

‏باوعتله وابتسمت وهو هم ابتسم وكال شلونج بويه

‏صفنت بشكله ادور بابا بي

‏

‏ شكله مربعانين وملامحه ناعمة

‏

‏واستمر يعرفني على اخوته

‏ واشر كال وهذا عمج جعفر

‏

‏ عمو جعفر  اسمراني وعلامات الشمس على وجهه مبينه تاركة اثر

‏

‏ والوراه عمو حبيب بس هذا يختلف عن لبسهم لابس  بنطرون وقميص عكسهم كل دشاديش وغتر

‏

‏و مبين شاب مو كلش جبير   واشر على واحد كال هذا

‏ عقيل

‏سلمت عليه مبين بكدي شاب طويل ابيض مرتب والاخير اسمه مالك

‏

‏ راحت عيني عند وليد مبتسم وفرحان كاللهم مو هي ماتعرف غيرنا عمام ان شاء الله تتعرف عليكم

‏

‏اباوع عليهم كلها تباوع عليه حتى احمد متفاجأ مثلي بس جدي مايخلي عينه بعيني عرفته لان ماكلي ويحس بتأنيب الضمير

‏

‏ صاح جدي تفضلوا تفضلوا عمو علي كال تعاي يمي خل اشوفج زين تقربت يمه وكعدت بصفه محتارة بكعدتي بطني جبيرة والالم راح

‏

‏باوع عليه ابتسمت بوجهه ودنكت اضحك

‏كال يابه تشبهين بيبيتج بهالفشكه الي بحنجج لا والله  تشبهينها بكلشي حتى  نظرتج هم

‏

‏لزمت طرف العباه واعگد بيها ومدنكة مااحجي استحي

‏هو   ويضحك ويمسح بلحيته كال حقج مشدوهه بينا جي ماتعرفينا بس ابوج ماعافنا وجان يجينا هو ورجلج فيصل خوش زلمه ونعم من حجي عدنان اختار عبنه اخو اخيته وزلمة من صدك ماكطع ويانا وماخاف من صدام ومواقفه  هواي ...

‏

‏اني هم بقيت ساكتة واكول بداخلي والله يااعمو المظاهر خداعة ...

‏

‏ فتح عيونه وضحك كال اظنج خرسه ماسمعت صوتج ابد ...

‏

‏ ابتسمت و احس العرك ينزل من كل جسمي من الخجل والصدمة  وشنو من عمام وياخوفي يطلعون مثل حامد

‏

‏ رفعت راسي باوعت عليهم لا بس مستغربة منكم انتوا وين جنتوا هاي الفتره كلها وليش هسه طلعتوا

‏

‏راد يجاوب واحد منهم هو قاطعه كال حقج لان احنه كاعدين بالاهوار من سنين ظامين روحنه وممستقرين ..

‏

‏ صارت كبل مشكله وياواحد مسؤول بالحزب

‏ وجعفر ضربه بكرك ومات واحنا  اخذنا امنا وطلعنا للاهوار

‏

‏عفنا كل شي  ورانا حالنا ومالنا اخذته الحكومة وماكو ظلم يدوم ابد ربج يفرجها على ساعة

‏

‏وبس صار السقوط اجينا ليج والحجيه تبجي دموع عليج تذكرج يوميه ووجيينا نزور الائمة وهم مرينا عليكم

‏

‏وهاا حتى ناخذج تشوفيها

‏

‏باوعت لجدي كال هاي نبعة گلبي واخاف عليها هسه الوضع مو مستقر وهذول طبولنه الامريكان خلي يستقر الوضع وتولد بالسلامة وان شاء الله تروح وياكم

‏

‏ كال ان شاءالله تولدين بالسلامة واخذج تشوفج جدتج

‏ يله بويه كومو ا احنه نرفع الزحمة

‏

‏كلهم كاموا واني وياهم كمت  ...

‏

‏ جدي جلب بيهم يباتون ماقبلوا كالوا نزور موسى الكاظم

‏ونطلع لاهلنا ....

‏

‏باوعلي  عمو علي   وتقرب كال الله يجعل حياتج مثل وجههج وان شاء الله احنا بعد مانفارگج

‏

‏ هزيت راسي مبتسمه وفرحانه وحبيت لمتهم وفرحت بيهم و ادور السند والامان بالوجوه

ودعناهم وطلعوا  وجرني جدي روحي قفلي غرفتج وغراضج وتعاي باتي هنا عندي حجي وياج سمعتي؟؟؟

هزيت راسي بأي اخذت احمد وطول الطريق ساكتة وافكر ، الطريق طويل من بستاتنا لبستان فيصل واني هسه شهري ومااعرف شلون راح اولد بهالاوضاع والظروف هايه ...

‏

‏ كتله احمد شنو رايك؟؟

‏

‏ كال متعجب مثلج بس حلو واحد تالي عمره يطلع اله عمام هيبه ومبين الطيب بوجههم ...

‏

‏ كتله مااعرف عنهم شي

‏

‏  كال اكيد جدي  راد يوضح الج كلشي وانت الج الصافي ...

‏

‏هزيت راسي وساكتة ...

‏

‏ وصلنا رحت قفلت حتى غرفتي نزلت على الدرج شافتني صفيه كالت خير عمام تالي وكت طلعلولج ذوله ولد الفصليه صاروا زلم ويحجون بزودهم هسه

‏

‏ كتلها بختج انتي بت جدي ولا جان جان كتلهم هذا كلامج وخليتهم يعرفون شنو يسوون بيج تعرفين عمو علي شيخ عشيره وامهم شيخه وبت شيوخ ماكو داعي اكولج بعد هالمره بختج بجدي يله باي ديري بالج على البيت

‏

‏اجت وكفت كبالي كالت شنوو صايرة تهددين بت الرووسية وتحجين بزودج وتهدديني بمنو بولد الفصلية ؟  مو انت تعرفيني منوو ؟

‏

تنفست بصعوبة لأن تعبانة حيل ، صعدت الدرج ومشيت طريق طويل واني عندي الم وحتى مالي خلگ اتجادل وياها

اجه احمٰد گال عووفيها ياا يمه عووفيها متشوفيهه شلون تعبانة صدك جذب منج واذا اجو عمامها

تخصرت وحجيت بعد ما اللتقطت انفاسي

اي صدك واذا اجو عمامي

ظلت تصيح وتفشر عليه وتهد على أحمٰد ولك لاتوكف بوجعي حميد لا تدافع لهاي الحية

لزمها من معصمها يمه طبي جوه فضحتينه بين البساتين طبي دخيلج

وصلت سيارة بس صوتها واضويتها اشوفها من بعيد وكف گلبي اني كلما توصل سيارة يم البستان اكول هو اجه ...

رجليه ما تحملني صارت رحت كعدت على المرجوحة

الى ان وصلت السيارة يم البيت ونزل منها هشام

تنفست وراها اجه گلبي يوگف عبالي فيصل ...

هو هشام بعده ممخلص كلية الطب بس بفترة الحرب اتطوع بالمستشفى لان الجرحى مايتلحگ عليهم ...

هشام شافهم يتناكرون هو يكوللها فوتي كافي صياح وهي تدفع بي صاير محامي للروس ...

سألهم بهدوء وبرود شكووو شبيكم تتناگرون بالمغربية

جاوبته هذا حميد مايطيعني وصوته يعلى على صوتي وصاير يدافع للحياية  ...

جاوب أحمد بصدمة خزيفة  أني ؟بريء والله بريء  ...

ضحك هشام وطبب امه جوه وهو يهديها .. سأله أحمد

شلونه الوضع

مسح على جبينه بتعب رد شلونه بعد والله ماعرف شلون راح تصفى ...

جاوبه احمد والله هذول الامريكان ماظن جايين وجايبين الخير وياهم الله يستر من الأيام الجاية

رد هشام بحسرة تدري اليوم سمعت الارمريكان هم الي ساعدوا باقتحام المتحف الوطني حتى ينهبون محتوياته واااثار عمرها آلاف السنين يعني ذول جايين ينهبون وقتلون عكس مايدعون

احمد كال اووف اوووف والله هالبلد شكله رايح باتجاه الهاوية صدك هشام ماكو اخبار عن فيصل ؟

هو باوعلي وكال لا والله ماكو تعرف خطوط مقطوعة بعدها وماكو مخابرات هم زين رجعت الكهرباء وبلكي وراها تتعدل الاوضااع شوية شوية

باوعلي ووجه كلامه الي كال درة لتخافين فيصل اكيد طلع وي وحدة من المنظمات الانسانية وان شاء الله تستقر الاوضااع ويرجع

ابتسمت اله جان بودي اكوله اني مبقى شي وتخلص مدة السنة وارجع لجدي مستحيل ابقى وياه بعد بس سكتت

كتله ان شاء الله

رد وهو يتقرب مني بخطواته كال انت هسه لا تفكرين هواي ديري بالج على نفسج وصحتج وراج ولادة ...

هزيت راسي ان شاءالله مشكور هشام على اهتمامك ..

كال وهو يتنهد يله من رخصتكم اني تعبان ..

كتله مرخوص واحمد طبطب على چتفه وكله ارتاح اكيد وراك كعدة من الصبح هم ترجع للمستشفى

هو هو فرك عيونه بأصبع السبابة والابهام وشكله نعسان

كال اي والله  وفات  جوة ...

اخذني احمد ومشينه بس احس بطني نزلت والم بظهري وببطني يروح ويجي ..

مرينه على بيت بيبي زهرة وكفت احمد كتله خلينا نمر على بيبي اشوفها

اني جنت هم اريد اسألها على حالتي لأن كلشي ماعرف بالولادة ولا عندي احد يعلمني ..

دخلت عليهم سلمت وسألت على بيبي كالوا بغرفتهه تعبانة شويه

وفوتتني جنتها عليها اني واحمد ورحنه بوسناها

وكعدنا يمها جانت كاعدة ومددة رجليها ومغطية بالبطانية حد نصها وبيدهه سبحتها

كاللها أحمد بيبي تعبانة اجيبلج هشام يجيك وضعج ؟

كالت لا ولك مابيه شي اني بسبع ارواح بس شوية فكري يم فيصل ماكو خبر منه ؟

جاوبهه لا ماكو تدرين خطوط مقطوعة وانت  لتخافين يرجع يرجع متعودين عليه احنه يختفي فجأة ويظهر فجأة

كالتله ولك قابل دور أول مثل هسه شوو حرب وكايمة كاتل ومكتول كلساع يجينه خبر واحد وغير هذول الچلاب حشى السامع قصفوا البساتين باطراف بغداد وراح ابن خالتي خطية مات هو وعويله

رد احمد اي بيبي سمعت الله يرحمهم بعد شنو نسوي هذا البلد وهاي اوضاعه كل جم سنة تطلعلنا سالفة لو حرب لو حصار لو مدري شنو تعودنا وحتى گلوبنا ماتت

وهي تسبح بسبحتهه كالت اي والله ييمه

باوعتلي كالت يمه  درة گربي يمي اشوف بطنج

رحت يمها خلت ايدها فوك بطني كالت بطنج نازلة 4 صابيع ولادتج گربت ديري بالج على روحج وتمشي كنسي الحوش حتى لا تعسرين

كتلها عندي اوجاع صار جم يوم تروح وتجي

كالت تشاليع هاي تريد تطلع الفرخة

وضحكت هيج تطلع مثلج حليوة شراح تسمينها ؟

ابتسمت كتلها والله حتى على إسم مااتفقنا اني وفيصل هو كضاها مشغول بفترة قبل الحرب بس هسه فكرت  اريد اسميها على اسمج

كالت وويع زهرة اسم قديم

جاوب أحمد لعد سميها زهراء حلوو

كتلهم هذا هو نسميها زهراء

سألتني لو اجتج الطلوگة منو راح يروح وياچ ؟

دنگت كتلها ماادري أكيد جدي ميعوفني لوحدي

رد أحمد كال حتى اني هم اروح وياج

جاوبته بعصبية مرحة انت تروح شسووي ولك شسوي  قصدي مرة مرة حرمة تروح وياها مو أنت...

اني انقهرت وبقيت مدنكة صدك فكرت منو يروح وياي يدخل جوه لصالة الولادة خما يدخل جدي خفت حيل وظليت اعصر باديه حييل ..

خلت ايدهه على رجلي وكالت لاتخافين يمه اروح وياج اني

كتلها بيبي وين بيج ترحين وياي انت

كالت ما عليج ادري بصفيو مابيهه خير

رد احمد بضحكة هاا بيبي ترة اني كاعد

كالتله شعليه منك انت هي امك مابيها خير قابل مجذبة

جاوبهه رحم الله والديج بيبي .. يله درة امشي نروح

بوستها وكتلها تصبحين على خير وطلعنا

نمشي ودنيا ليل جو حلو وهدوء بس صوت الحشرات

واحنه دنطلع صاحت عليه حميد لاتزعل

باوعلها لا بيبي ما ازعل منج اني

جاوبته لا انت مو ماتزعل مني بس تعرف بامك مابيها خير

ظل يضحك رفع ايده وهو مبتسم

وكاللها تصبحين على خير بيبي ..

طلعنا نمشي لبيت جدي واني صافنة وبس افكر شلون راح اولد ، شوكت يجي فيصل منو يروح وياي !! خاف يصير شي لبنتي ياربي شلون راح اولد بهذا الوضع الصعب وبنتي بنتي خاف اموت بالولادة وتبقى هيه وحيدة منوو الهه ربي ارحمني من هاي الحيرة

وصلنا لبيت جدي دخلنا بالكراج جانت رسل بنت عمو فلاح تلعب بالمي وملتهية

راح احمد على كيف يمشي ولزمها من ملابسها ورفعها عن الأرض خرعها وهي متدري بي باوعتله ببراءة وبعد شويه وتبجيى

كاللها شسووين هنااا ولج ؟

هي خطية تباوعلي وتباوعله اخذتها منه كتله احمد خرعتها شبيك ترة رسل عاقلة

مد ايده كرصها وضحك كال ادري بيها بنات خالي  فلاح كلهم عاقلات عكس بنات حامد

وخرت ايده منها شسوويت بخدها عوفها هم خرعتها وهم تكرصها

كال هي خدودها يغرن مال عض وگرص ...

حجه هيج وكاللها يلا فوتي من دربج غسلي اديج ودرسي دروسج

كتله ولك احمد يا دروس هسه والمدارس مقفولة من قبل الحرب لهسه

كال اي مو عدهه كتب خلي تقرا لحد ما يفتحوهه

هي بس تريد تشرد لزمها ودنك صار بمستواهه

كاللها هسه شسوين من تفوتين ؟

هي تباوعله مبرطمة تريد تبجي وفعلا دموعها صار على خدها

ظل يضحك وباسها حيل على خدها وهي ركضت جوه تمسح بالبوسة مالته بقوووة على خدهه عبالك نفس قوة بوسته الهه

وهو يضحك عليها كال شكد احب اضوج الجهال الحلوين مثلها هايه شسمها هيه هاي ؟

كتله رسل بنت خالك متعرف شسمهه

كال هو اني وين شايفها بس كم مرة

جاوبته اي هي متطلع هواي كله بغرفتهم فوك

نادرا ما يطلعون هي وخواتها وهسه ااكدلك مراح تطلع بعد بسببك خوفتهه والله البنية ممتعودة هيج

ضحك بصوت عالي

تلكتنا شوكة كالت اله الله شحلاتك هسه لو انت نسيبنا وجاي دتععشى عدنا انت ليش ترفس نعمتك برجلك

كاللها بعد ما كتف اديه اكولج تعالي خطبيني فد مرة ليش مترددة وخجلانة

جاوبته ومنين تريدني اخطبك خما اخطبك من امك

جاوبها لاا طبعا هاي إهانة بحق رجولتج شون تخطبيني من مرة

كالت يعني اني زلمة

ضحكت وعفتهم يتناكرون فتت جوه صار بوجهي عمو حسن ابتسمت اله وهو هم كالت شبيج تعبانة مبينة هزيت راسي اي والله عمو

سمعت احمد يصيح على عمو حسن

هلااا خاااال ماتجي تاخذ بنت اخوك عني رحمة على والديك

راح عمو حسن باتجاههم واني فتت ادور على جدي

شفت رنا ووليد سلمت عليهم .. رنا هم حامل بس اني غالبتها بكم شهر ..

وليد كال ليش رحتي مشي جان اني وصلتج بالسيارة تتعبين هيج

دنكت كتله لا امشي احسلي .. سالتهم وين جدي

رنا كالت بالديوان خليتلج عشه يمه وهو دينتظرج ..

كتلها مشكورة ... ومشيت باتجاه الديوان ، دخلت شفت مخلين عشا  الي واله ...

كابلته وكعدت اتاكل بس ساكتين كال لاتباعين هيج انا ضميت لان همه سنين معدده محبوسين بالاهوار وكل يوميا ينتقلون لمكان  ... حتى يأمنون على روحهم

‏

‏وانا مااريدج تخافين منا ابوج ومنا عمامج اخافن عليج يابويه

‏

‏ كتله جدي اني ممعاتبتك انت  ادره بمصلحتي ولا بيوم شكيت بهذا الشي هسه لو تلزم سچينه وتغرسها بگلبي ما اكلك ليش هااا وافتح بعيوني واضحك

‏

‏كال گلبي گبل گلبج ياماي العين ...

‏

‏ كتله هاااا العشك طلع اكول عايف المره ومو بحالها اثاري الكلب محجوز من سنين ومحد كدر يسد هالمكان ...

‏

‏ ضحك اشربي الجاي ونسولف على كيفنا

‏

‏ كتله كولشي وكلاشي تحجيلي

‏

‏ كال صار

بعد العشا بلش يسولفلي

كال جنت وانا صغير احب اروح لخوالي اجي من الكوت للعماره اتونس يمهم گلوبهم طيبه واكضيها صيد وزراعه بس بونسه مو تعب

كلها تشتغل ومثل يمنا قاسم مطيح حظي من الشغل وهو يلعب انا مزوج وعندي صفيه ومنين مااندار اشوف ضيم

‏

‏ منا قاسم ومناك صبريه تتعارك وياامي وخواتي وخلفه ماصار وراه صفيه

‏

‏و البيت مشتعل مشاكل اربع وعشرين ساعه مره من المرات شردت منهم لبيت خوالي

‏

‏ نزلت من السياره يم السده واشوف بنيه طالعه من بيت خالي جنها تمره اي جنها تمرة  الرطب

‏

‏يطلع عمرها ١٣ سنة مرت  من يمي ولا شافتني بس انا اخذت روحي اباوع مخليه العباه على راسها بس مالافتها بحيث طالعات  كصايبها طوال ولون شعرها  مثل لون الرطب من يستوي

‏

‏ وخدودها بيض وحمر وكل عين قصه مرت من يمي وريحة الحنه ضربتني ردت روحي مثل العطشان واجته رشفة ماي بارده

‏

‏ ظليت عيني عليها طبت بيت قريب ماراحت من بالي كل مده اجي وادور عليها لمن مره واكفين وابن خالي صاح بسمها بدريه تعاي

‏

‏ اجت تركض هاا شتريد مني كلها مو كتلج لبسي فوطه بعد صرتي جبيره ماايصير راح اكل لعمي عليج

‏

‏ نترت بوجهه روح كول مااخاف اني بدر اصيد الطير من يمر

‏

‏ ااااااه ياحلاة صوتها وعجنت عجن بگلبي وتربعت وانا شون متزوج وعدي بت وزحمه من خوالي هي تصير من بت ولد عم خوالي

‏

‏ وذوله من اهل العماره مايرحمون بالشرف بس هي جنها انتي رابيه بين الولد من كلامها عرفت ومن نلتم تجيب الحطب وتسوي گهوه تخبل مثل عيونها تعدل الراس

‏ بس مره

عزمونه خوالي على عرس ابنهم

ورحنا كلنا وهناك الهوسات والمهاويل تخبل والكعده الحلوه الزينه ورعشة گلبي ورفيفه من احسها جريبه هالبت شجابها بدربي ياربي

شهالضيم وزحمه من الودام ...

‏

‏نص العرس وصارت عركه شكبرها كلها بالتواثي والمكوار وطاحت الضربه باخوي محمد اصغر مني لابيها ولاعليها وكبل مات

صارت هوسه شكبرها وشيوخ تروح وشيوخ تجي وغسل للدم بينا انطونا فصليه

مارضيت وتعاركت شذنب هالبت خطيه همه كالوا هديه تهدي النفوس بينكم وانتو خوال مو غربه قبلنا وجابوها مغشايه وجهها

وعقدلنا الشيخ  قبلت لان رادها قاسم وهو مزوج وعنده

اربعة

واعرفنه مايرحم بيها كتله اخذها حتى لو فتره واسرحها لاهلها بس خل مده وتهدا النفوس

‏

‏ كتلهم لا اخذها ولان هم ماعندي خلفه امي فرحت عبن هي من كرابتها وتدري عندي مالة الله واخافه

‏

‏ انا وعالسمع بس صوت بجيها واباوعها طويله دخلوها للكبه مالتنا وطبيت عليها لمن رفعت غشاوتها

‏شفتها انصدمت  كتلها تمره انتي ؟؟

‏

‏كالت لا بدريه بس عيونها حمر وحالتها حاله من البجي

صاحت لاتكرب وعلي اكتل روحي لو اجيت

كتلها هدي بويه هدي مااجي صوبج نامي بجهه وانه بجهه

‏

‏ بس انا مااجذب عليج يا درة فرحت كلش كلش هيج الله يحبني وكتب الي هالقسمه يارحمة ياربي الي شملتني

اباوعلها لفت روحها بالعباه ونامت بالجهه الثانية  وتبجي اسمع شهيكها الليل كله ماسكتت ولا تعبت ولا نامت

كعدت الفجر لكيتها گبلي  تتوضا وتصلي وتسبح ودموعها ماوكفن دموعها ذبحني ذبح

‏

‏ ثاني يوم طلعت لشغلي وبيبتج صبريه شدت وياها بس امي جانت تحبها وواكفه وياها وزهره مرة قاسم بت حموله وطيبه الا صبريه وظلت يمي شهرين ماجايسها وعيونها كل ليله على خدها

‏

‏ ردتها ترتاح النا بس ماكدرت  وانا عندي بس شوفها كافيه نفسها حلوو ريحة الحنه بالغرفه عبالك بالجنة

‏

‏ سنونها ليلوو ولكاها كل ليله تمشط شعرها بمشط خشب واباوع تخلي بي زيبك

‏

‏ شنو اكول يابويه شوصف ماادري عبن گلبي حبها واشوفها كلها حلوة

‏

‏بس هي لاتضحك ولا تسولف بس صافنه كل وكتها والدمعه مانشفت من عيون تمره

‏

‏ اهيسهه  تغسل هدومي  ولبسي هي تعدله وتكعد من الفجر وراضيه الكل جفيه ونادره ومالها صوت

‏

‏العجل نذبحه هي تطبخه واحلى اكل واهلي حبوها عبن صبريه ملتهيه بالمشاكل والطركاعه ٢٤ ساعه ماتلفي للبيت

‏

‏ اكتلها احجي عليها ليل ونهار مايفيد عفتها والتهيت بتمرتي وصدك تمره حلوه حيل

‏

‏ بليله من الليالي اجت كالت ابو صفيه انه اخاف الله وهذا حقك انا ماانكره وانه جاهزه وتمددت بصفي ، ايديها على وجهه

‏

‏ انا فرحت اريد كربها بلكن گلبها يرف وتعشگني وترضى بعيشتها ..

‏

‏صرنا مرة ورجلها من صدگ ورا شهر طلعت حامل وهي ماعافت فرض ولاذبت سبحه وعايشه بحالها مالها علاقه بكل واحد

‏

‏انااكعد اسولف وياها هي حتى عينها ماترفعها بوجهي اهلي فرحوا بحملي وصبريه سوت طلابه والايام تركض ركض

‏

‏ لحد ماجابت سلام ابوج ...

‏

‏درة : من گال هيج گلبي عصرني عصر ودموعي نزلت من عيوني ، رغم ماتذكر على بابا بس ماعرف شصار بيه بلحظتها

‏

كمل جدي كلامه عن بيبي وكال

‏ورا السابع مالها اجت الي كالت ابو صفيه انت مامنك قصور ابد عشت وياك بطيب بس الگلب امره مو بيدنا انا خلفت الولد والفصليه من تخلف يتسقط حكمها  وانا اريدك تحلني من هالحكم ..

‏

‏ غرغرت عيوني كدامها صوت بيه يصيح لو طلع من حنجرتي يجيب التايه

‏

كتلها انا عاشگك واريندج كالت وانا گلبي مو الي

كتلها وانه خانگتني العبرة

‏- هايه الي تامرين بي يجرالج

سقط حكمي عنها وراحت عرفت بس خلصت نفاسها اخذت ابن عمها وانه كل ليله اذكرها مانسيتها بيوم بس حفظت كرامتي واسمع اخبارها  على طول وابنها ماخليته يكطع منها ابد يروحلها ويشوف اخوانه ومرات اشهر يظل يمهم

ماكتلج عليهم عبن صارت مشكله وكضوا عمرهم بالاهوار بس الله فرجها عليهم وعندهم كيعان وحلال خير من الله

ناووين  يرجعون  حكهم ويوكفون على حيلهم

وعلي رجع مشيخته والظلم مايظل على حال ربج لابد يفرجها بيوم حتى لو مرة مية سنة

‏

‏هزيت راسي اباوع لجدي تعبان وصحته بالنازل وايده اليسرى  بيها رعشة

‏

‏ كتله جدي شبيها ايدك

‏

‏ كال ماادري والله بس وليد كال بس يستقر الوضع يحجزلي عند الدكتور و اروح

‏

‏ كتله اروح وياكم

‏

‏رد لايابه شيخلصنا من فيصل

‏

‏ كتله هو وينه لخاطر الله هااا يكولون يم مرته السورية؟؟

‏

‏ ضحك جدي رد اعرفنها هاي المريضه حرام يعوفها عبن ايامها الاخيرة  اسم الله وكتله دره مو خطيه

‏

‏يضحك كال ول ول دره عشكت فيصل وراح تشبع ضيم بس اكلج شغلة فيصل صاحب عمامج

‏

‏رفعت راسي كلشي فيصل كلشي فيصل خل اروح اشوف حالي اريد اروح وياهم  شوكت اروح وياهم بس والله استحي منهم مااعرفهم

‏

‏طبت شوكه انا اروح وياج فزعه بس يصير اخذ واحد منهم عبنهم يابويه على حلاتهم

‏

‏ جدي يضحك ولج ولاتستحين

‏

‏ كالت اهووو هسه لانضوك العسل ولانحجي بيه

‏

‏كتلها ياعسل خايبه بصل

‏

‏كالت معليه مو جربتن العرس وكمتن تتعززن

‏

‏ صاح جدي ياجلبه بت الجلب حتى ماتستحين مني

‏

‏ طلعت تكول لا مااستحي عاي الشغلة مابيهه مستحى بعد حگي واريدنه

باوعت لجدي وضحكنا ...

رحت نمت بغرفتي بس احس الوجع زاد وهمينه صار يروح ويجي

طلعت ظليت افتر بالصالة شافني بيبي وهناء

كالت بيبي  شبيج تلوبين جنج ولادة الليلة

عضيت طرف شالي حييل

ظلن يضحكن وينج وين جروخج تجيبين بهالزلك الشوارع مكطعة والجسور مقصوفة والامريكان تارسين الشارع

هناء ضحكت اي سوي مثل هذا الحيوان نسيت اسمه يضم فرخه بجوراب ببطنه انت هم ضمي بتج ببطنج لا تطلعيهه هسه خل ينسحبون الامريكان وطلعيها

امل طلعت شافتهن يخوفن بيه

كالتلهن بنبرة تبين خايفة منهن

خطية عمه جاي تتوجع لا تخوفينها

اني انهضمت وانقهرت على روحي صارت دموعي تصب

صحت بصووت عالي ولأول مرة يييييمه ااااخخخخخ

واني ششفت من امي يااربي من حلاة الي بروحي صحت يممه

دخل جدي ووليد يمشي اجاني بلهفة وخوف

درة شبيج بويه

مشيت اله ابجي خليت راسي على صدره

اريد احتمي من هالالم بي

اريده يحميني من الوجع مثل ما حماني واني صغيرة ..

من كل شي ..

بس الالم كل ما اله يزيد وصار يفتك بيه ياربي

حضني جدي واني اشهك من الوجع ومخنووكة بيه صررخة بس الم بطني كاتم على نفسي ماكدر حتى اصررخ

كعدت بالكاع وهم يحجون بيناتهم احس فقدت الوعي مادري غفيت على روحي ثواني واني كاعدة انفصلت عن العالم كله بلحظات بس جانت لحظات بيها لذة لان جانت تفصلني عن الالم ...

حسيت بيهم يلبسوني عبايتي ويسألوني عن ملابس الطفلة كتلهم اني محضرة جنطة بالبيت

رنا كالت اروح وياج

صرخت عليها هنا وين ترحين لج كعدي وسكتي الخرسة انت حبلة لا انوب تخافين و يوكع ابنا كعدي وسكتي

وليد رد يمه شسالفة مو مخلفة من كبل شون نخليهه وحدهه تروح

جدي كال امشي بويه اروح وياج انه وماخليج

بيبي صبرية كلتله انت شنو ما تشوف روحك شصاير بيك وايدك ترعش وبهالليل اكعد قابل هي اول وحدة تجيب

مجاوبها ولزمني بوقت هو محتاج واحد يلزمه بس جان يتحدى المرض ويتحدى كولشي حتى يوكف وياي بهذا يومي

وينك فيصل موو تريد تصيرلي مثل جدي هذا جدي يمي ولازمني ووينك انت وووينك !!!!

اخذوني بالسيارة وفعلا جانت الطرق مسددة وحظر تجوال... رجعوني لديرتنا واخذوني هناك لقابلة جدي يعرفها

دخلتني لبيتها وبي غرفة تولدني بيها . انسلخت رووح من رووحي واني اوولد شفت الموت بعيني واصيح جدي جدي

جدي ينتظرني بره اسمعه يصيحلي يتالم وياي بس صوته يوصلني مغوش

الى ان سمعت صوت البجي الي يعلن وصول انسان جديد لهاي الدنيا ، استغربت الصوت ورفعت راسي

سألتها شنوو ولدت شنووو

جاوبتني ولد جبتي ولد

رجعت راسي على السرير و مبتسمة واردد الحمدلله على كل حال الحمدلله ...

بعدها نظفتني ولبستني وجابته يمي مبدلتله ومنظفته ظليت اباوع عليه يدور يريد يرضع جوعان

دخل جدي باسني على راسي ضحكت كتله ولد مو بنية

كال مدام هيج خليني انه انطي اسم 

كتله احنه كلنه الك شنو راح تسمي ؟

كال : اسمه  ......

وللحكاية بقية ...

السلام عليكم

رواية  طوفان رجل

الفصل 38

نورا ناصر

.....

لم يكسرني  غيابك كما توقعت    ...

فالمكسور يتناثر وها أنا ذا قطعه واحدة..!

.....

كال بابتسامة : أَسمي يوسف على عناد فيصل  شحده من يرجع يغير إسمه

تنهدت  وحجيت بگلبي هو شيهمه لو يهمه ابنه ماراح وخلانا وحدنا ويدري بينا بخطر ...

جدي انتبه عليه وعلى تنهيدتي الي طلعت وفسرت كل معاناتي ..

باوعلي بقلق بويه لا تشيلين هم

ابتسمت شون اشيل هم وانت موجود

رجع باسني على راسي ، رنا بصفي خطية ما تركتني

تذكرت السونار الي اخذته وكالوا بنية ابتسمت تفاجئت من اجه ولد كل ظني جان بنية ، الحمدلله على كل حال ، اهم شي تمام الخلقة

ورى ماارتاحيت طلعت للبيت ، دنيا الفجر والاغلبية نايمين سوتلي رنا اكل وجدي يمي خطية وتعبان

كتله روح نام والله أني زينة

كال شظنين مني اتركج بهيج يوم ؟

رديت لا والله هيهات ادري بيك هو انت واني طفلة ماتركتني بدراستي وبليلة عرسي تتركني هسه بس اني زينة والله وهسه اكلت وراح انام

كال خاف يكعد يوسف وانت نعسانة ما شبعانة نوم اشيله عنج

دمعت عيوني من كال هيج هو ايده ترعش مابي خطية وهم يريده يشيله عني

كتله وين بيك وايدك ترعش واني كلش خايفة عليك

كال لا اخلي على رجلي واهزه شعليج من ايدي

كلتله رنا جدو كوم نام ويوسف مايكعد هسه لان توه جاي للدنيا وجايى يستكشف الوضع الجديد

السهرة مالته تبدي باجر

‏وضحكت ..

جاوب رنا بوويه لا تخلينها وحدهه خطية

كتلها لا رنا روحي ابنج عايفته وجايه ويايه من البارحة خطية وهمين انت تعبانة وحامل جزاج الله الف خير ماقصرتي اوكفلج اني بالافراح ان شاءالله

كالت لا عاد لتكولين هيج احنه خوات واحنه لبعض ..

ومدت ايدها لجدي كومته يله جدو امشي نام وارتاح ولتفكر بدرة هي بأمانتي

كام وياها ويتشكر منها بس خطية تعبان حييل ظهره محني ويمشي ، لزمت گلبي بيدي ، ربي مد بعمره ولا تحرمني منه ....

مددت واباوع على يوسف واحجي وياه مبتسمة

حبيبي نورت الدنيا يوسفي جدو حبيبي انطاك هذا الإسم اكيد لأن انت حلو

تحسرت واكيد هسه تسأل على بابا وليش مو ويانا ؟

هو بابا يحبك وهسه من يشوفك يفرح بيك وان شاء الله يرجع وتلتقي بي

هو حبيبي يباوع ويسد عيونه ويرجع يفتحهن واني من التعب غفيت .. كعدت على صوته يبجي ، شفت رنا نايمة يمنه خطية فارشة بالكاع انقهرت عليها حامل ونايمة جوه وابنها يمها والله ملاك هالبنية يستاهلها وليد والله .. 

اخذته و كوة احاول ارضعه

مااعرف شون يرضع وهو يبجي ، كعدت  على صوته رنا واجت تعلمني شون ارضعه

كتلها ليش هيج نايمة جوه بالكاع وانت حامل خطية تتأذين

ردت لا ميصير اعوفج وحدج شوون ارضاها اني وبعدين جدي وصاني عليج شون اعوفج

ظليت ادعيلها الله يسهل ولادتها ويحفظلها وليد وابنها

كالت امين الله يسمع منج اني راح احضر الحمام واجيب امي تسبح الطفل لان هي تعرف

كتلها متقصرين وعفية بلغي بيبي زهرة خطية جنت البارحة يمها وبالهه ويايه وكالت تروح وياي بس اني حتى نسيتها من اجاني الطلوك

كالت ان شاءالله تدللين اكللها بدربي من اروح..

طبت شوكة تفرك بعيونها كالت هاي شنو جبتي

وتوهه تريد تهلهل وصمت حلكها رنا كلتلها ولج علي نايم لا تكعدي وبس بالاعراس يهلهلون

هي دفعتها خطية رنا افترت فررة على روحها دوختها

هلكد ما شوكة ضخمة ورنا ناعمة

واجت يمي كالت وينها بتج اكيد حلوة تشبهني مو ؟ غمزت لرنا

كتلها اي تعالي شوفي زهورة شلون حلوة

خذتها مني كالت مو تب....ل عليه اموتها

ضحكت كتلها جيبيها  لابسة حفاظة ..

بعدها طلعن هي ورنا و اجاني جدي كال والله كل شويه اطل عليج شفتج منومته يمج خفت عليه لا تنامين عليه وتمردينه لازم اجيبله سرير

كتله هو عنده جابله أحمد بس بقى هناك بذاك البيت

كال ادز عليه وليد يجيبه هو واحمد

كتله ان شاء الله...

طلع جدي واني كمت اغير ملابسي واغسل وخليت يوسف عالجرباية ، دااطلع سمعت هناء وبيبي لازمات رنا ويرزلن بيها ولج ليش تاخذين علي وتودينه يمها هسه يتمرض توهه جايبة امج ماعلمتج

وهي تكللهن الله الحافظ وهن مبين من نبرة صوتهن بعد شوية وياكلنها بسنونهن ...

فتحت الباب وطلعت اباوع بوجوهن

كالن ها جبتي حمدلله عالسلامة

كتلهم الله يسلمكم ورحت للحمام شسوي لعقولهم هم هيج وعقلهم ميتغير لو بعد عشرتالاف سنة ، بس حيل انقهرت حسيت گلبي يتفتت من القهر ، ذكرت فيصل من كعدت من الصبح يتخايلي هو يمنا واحنه هناك بغرفتنا ، تنفست حد مااوجعتني روحي واوجاع الولادة

رجعت للغرفة شفت رنا تحضر ملابس يوسف ومخليتلي صينية الأكل

وعمه امل مخليه يوسف بحضنها

فرحت باهتمامها حمدت الله احد وكفلي ، جنت شايلة هم شون اتعامل ويه الطفل ....

عمه امل تحمدت اليه بالسلامة وبوستني

كالت تريكي اني ادير بالي عليه ..

كعدت اتريك وراها خلصت ، طبت عليه بيبي زهرة تمشي على عصه وخطية تعبانة ووياهم ام عادل

باركلي وبوستههم

عاتبتني بيبي  لان ماجيت عليها تروح وياي

كتلها والله حتى ماتذكر شلون اخذووني منا من كد الالم

كالت حقج يمه حقج ولج وينها زهورة

ضحكت كتلها هذا يوسف

ام عادل كالت ياا هم تطردين عيون درة

كتلها والله هيج بالسونار كلولي بنية واصلا انصدمت من القابلة كالت ولد...

وتحضرن حتى يسبحنه  ... خلن طشت بالغرفة

كالن بالحمام يدخله هوا ويتمرض  ... وكعدن ينزعنه

‏ورنا وعمة امل حضرن المي دافي مناسب لجلده

بيبي زهرة كالت خلي امه تشوف الماي لان هي تحس بابنها اكثر

رحت خليت ايدي بالمي اتحسس درجة حرارته

كتلهم شوي بي حرارة زيدو مي دافي .. رنا صبت عليه مي دافي وتحسسته كلت زين

ام عادل كالت هسه كون صبرية كبلنه مسبحته ورايحة

بيبي زهرة خزرتها كالتلها الله لا يعوزه لا لصبرية ولا لغيرها ....

جانوا  منزعي ومخلب  بنص الطشت ، وجواه وصلة

و فتحت الباب و طبت شوكة باوعتله لطمت خدوودها

كالت ياااا هاي بتج شنووو عدها ؟؟؟

صاحت عليها ام عادل ولج سديييييي الباب لا يدخل هوااااا

طبكت الباب حييل كالت ولج درة لحكي بتج

عدها دن**دو**لة

واحنه طكينا ضحك وساعة نقنع بيها هذا ولد

وهي تكول لا هاي بنية عدها **** السونار مو كال بنية مايجذب ....

واني اباوعلهم شلون يفركوله ويسبحونه وكل شوي اصيح على كيفكم وياه لا يتأذى ايده لا تنفصخ وگلبي بيده لازمته خايفة عليه

هو صغير وبيدهن مثل اللعبابة يجيبنه منا يودنه منا ونظفن اذانه وخلوله كحل وكمطوه وانطوه الي اخذته منهم بلهفة ريحته حلووة صارت وشعره نظيف ...

للظهر اجه احمد وهشام تحمدولي بالسلامة وشافوا أبن اخوهم ، احمد كال مو اتفقنا اروح وياج ليش ماجيتي عليه

ضحكت كلها تعتب عليه تريد تروح وياي واني بلحظتها ماادري برووحي اريد بس اجيب واخلص من الوجع ...

بقيت ببيت جدي وورى شكد يله اجتي صفية تتباركلي وياريتها ما اجت ، سممتني بحجيهه وراحت ...

مرت أيام اني فرحانة بيوسف صح متعبني الليل ماينام واسهر وياه وبالنهار نايم واني من نوع ما احب احد يخدمني

من ثالث يوم كمت اغسل ملابس ابني وملابس وكولشي اسوي ..

رغم رنا متخليني وتاخذ الملابس من ايدي وتغسلهن وتدخل عليه بصينية الاكل ووليد يدور يدور ويوصيها عليه

بس اني هم انقهر عليها خطية حامل وعدها طفل ...

وابني مااخلي وحده خاف يبجي ومو يمه احد اخلي رسل بنت عمو فلاح لو منى اخت شوكة واروح اغسل ملابس او مواعيني الي اكلت بيهم او اسبح ...

وورى ماارضع يوسف وانومه ، ابقى وحدي بالغرفة اصفن و اتذكر فيصل

تذكرت  مره  جان اكو قنفه بغرفتنا مقابل البلكونه الي على الحديقه  يحب يشرب گهوه بهذا المكان

بأول ايام زواجنا مرة  العصر قبل لايطلع صاحني تعالي اجيت يمه فتح ايده وحضني حضنه امان وراحه جان صدره دافي كولش واني مهشمه سالني مرتاحه

كتله امان فيصل  امان

ورجعت لزمت وجهه باثنين اديه وصحت امان فيصل امان انته

ضحك كال هاي ثاني مره هيج تلزمين وجهي

اتفاجت كتله لاهاي اول مرة

‏

‏ جان يكول لا هسه اذكرج يكول مره اجيتكم للبيت وابو سلام جان طالع واجيتي انتي تركضين عمرج يمكن ست سنوات وحامد يركض وراج

‏

‏جيتي وختلتي ورايه  وكلتي  من عمو حامد يريد يكتلني شلتج ودخلنه للديوان

‏

‏ اجا حامد عيونه شرار يريد يلزمج وماقبلت سالته شمسويه كال كسرت جام سيارتي اليوم اموتها

‏

‏التفتت عليج ودنكت  كتلج ليش دره؟

‏

‏ لزمتي وجهي بثنين اديدج نفس حركتج الي سويتيهه قبل شوسة

‏

‏وكلتي  حرك لعابتي جابها الي جدي لان شوكه ام الكمل تريدها ومااطيتها وظلت تبجي عليها وهو اخذها وحركها بالجداحه واني احبها

‏

‏جنت تحجين وتبجين بوكتها شفت بيج نفسي من جنت صغير تخبلت وتعاركت وياحامد وطلع وعافني وظليتي نايمه على رجلي لحد مااجا جدج

‏

كالي تصدكين كل مشاكلج ومصايبج اعرفها كلما اشوف جدج واسال عليج وابو سلام يسولفلي كلشي عنج وشكد شايل همج

بيومها اجا جدج وسال شمسويه من مصيبه ركضتي اله وتصيحين وينك جدي  كسرت سياره عمو حامد لان حرك لعابتي لان شوكه ام الكمل تريدها

كلج ليش جدي جان انتظرتي واني احجي وياهم

كتيله مو انت كلت اخذي حقج بايدج وصيري قويه

‏

‏ جدج كال ميخالف بويه مو يأذوج

‏

‏وطب عمج حامد اجا يركض عليج يريد يبسطج ويهددج وانتي خاتله ورانا

‏

‏وراح جاب دب احمر   وحركه بالطرمه

‏

‏وانت  ولاتخافين طلعتي وكتيله والله الا احرك سيارتك وخليتينه  الليل كله لازمين حراسه على السياره لاتحركيها

‏

‏  رجعت من صفنتي واباوع لابني تمددت يمه ، خليت ايدي على راسه وامسح على شعره واحاجي بهدوء وهمس وانت هم تصير وكح مثلي !!!

وليد اخذ جدي وراحوا للدكتور  ومن رجعوا ووجهوهم مگلوبه

‏

‏خفت تقربت منهم  كتلهم شكو؟؟

‏

‏ كال وليد وهو ضايج  ايده بيها شللل رعاشي

‏

‏لطمت على وجههي عزا العزاج دره

‏

‏ جدي رد اسم الله بويه ماكو شي انطاني دوه وكال استمر عليه

‏

‏ باوعت لوليد كتله شنو كال الدكتور ؟

‏

‏كال وهو يمسح جبينه  هي هاي انطانه علاج  وماكو غيرها وجلسات تدليك علاج طبيعي

‏

‏عيوني كامن يجرن الا جدي يارب

‏

‏كال بويه شبيج كلشي مابيه وشنهي عمر تفكه اخذ عمري وعمر غيري

‏

‏رديت اسم الله عليك كون بيه ولا بيك

‏

‏ كال اسم الله عليج انا امنت ومااخاف من الموت كل الهلا بي

‏

‏خلاني الطم لطم وشابكني ويضحك بويه مابيه شي ابد والله كومي حضري نفسج عمامج يردون يجون انه دزيتلهم خبر درة خلصت نفاسها

‏

‏ ظليت مفرفحه وادعي ربي لاتكسرني بي ربي باوع عليه

‏

‏ كال مابيه شي روحي بويه انا اريدنج ترحين

‏

‏كتله واني اولول وين اروح جدي وين واخليك مريض

‏

‏تقرب وشاورني حتى ترجعين تسولفيلي عنها ويضحك اااااه ياتمره سنين طويله ماراحت من فكري ولا ليله نمت دون طيفها يمر عليه

‏

‏يحجي و بوجهه ابتسامة رغم تعبه

‏

‏رجعت للغرفة ومباقي شي واخلص المدة وواعدت نفسي اذا رجع فيصل ورى انقضاء المدة بعد مستحييل ارجع الا احرم روحي منه ...

‏

‏وراها  طبوا عمامي طبتهم هيبه وتفرح الروح وتسعد الخاطر ابتسمت وسلمت عليهم ...

‏

‏ كالوا حتى تروحين ويانا

‏

‏باوعت لجدي وفيصل ؟

‏

‏عمو علي كال فيصل خلي عليه

‏يحجي ومخلي ايده على صدره ...

‏

‏هزيت راسي بس خجلانة كولش شون حرووح اني استحي ومااعرفهم ...

رحت للهول شفت رنا ووليد واكفة يمه تحجي وياه وهو يسمع الها ..

‏

‏ ترددت  احجي باوعلي وليد عرف عندي شي

‏ كال وليد كولي دره محتاجة شي ؟

‏

‏كتله انت معليك بكيف رنا

‏

‏ هم ضحكوا كتلها يصير وليد يروح ويايه للعماره والله اخاف واستحي وحدي هاا بكيفج تقبلين ترفضين يمج

‏

‏ كال وليد شوف شوف اتفقتن عليه عمي راضي بحكم رنا

‏

‏ كتلها وهاا علاوي اخذه ويايه خاف يتعبج

‏

‏كالت  عادي خل يروح انا ماادخل بينكم اخافن

‏

‏ضحكنا كملت علاوي وياكم كتلها حضري جنطه كمنا نضحك رنا ورده هنيال وليد بيها

‏

‏

بدخلة  ‏ احمد شافنا نتحضر سأل شكو

حجيناله كل شي راح للباب ورجع  كال دره شون اعوفج اروح وياكم

همه ضحكوا وفرحت صدك منا وليد ومنا احمد

‏

‏رحت للغرفة حضرت كل شي طبت بيبي وسدت الباب

‏كالت هاا رايحة للفصلية ؟

‏

‏باوعتلها وابتسمت كتلها الفصلية انعتقت وراحت وصارت شيخة وابنها شيخ وانت بعدج تصيحين الها الفصلية ؟

‏

‏كالت مو تجين منها وترسين اذن جدج حجي عنها هاي انه كتلج هالمرة ماتسلمين مني لا انت ولا هذا وتأشر على يوسف

‏

‏تقربت منها كتلها سمعي بيبي ابني هذا خط احمر اني شبعت اذيه منج انت وربج بينا الله بس ابني لا ماارحم احد كائن من يكون فلا تهددين بي زين

‏

‏غمتني وطلعت ...

‏

‏حضرت نفسي و طلعنا عدهم بيكاب اثنين وين تكفي كالوا اصعدي بالصدر واحنه بالبنيد

‏

‏ كتلهم لا ابد وليد كال اني ودره هواي مسويها وياجدي نكعد وراه خل اجيب فراش

‏

‏ كالووا لا شلون وهي وابنها والطريق تراب يتأذى

‏مايصير ...

‏

‏ صعدوا  احمد وعقيل وحبيب وره طلعنا سيارتين عمو علي وجعفر بسياره وعمو محمد ومالك بسياره

‏

‏عقيل كال نصعد ويامحمد لان  علي كلساع يعيط علينا حتى نتونس الطريج طويل

‏

‏ ابتسمت احمد اندمج وياهم وليد هم اخذهم الواهس وهمه بشرين وناس عشريه بسرعه اخذنا عليهم

‏

‏ فرشها وليد بطانيتن ومخاد وصاح عقيل سوا ترمز جاي نشرب بالطريق

‏

‏  طلعت شوكه هاج اخذوها وياج وتحجي برقه فتحت حلكي صعدنا وعلاوي يمي فدوه لگلبه عمره سنتين مكيف ويانه

‏

‏ الولد عبالك رايحين سفره وكلساع عمو علي صاح بينا صعدنا  اني كدام  ووليد واحمد وعقيل وحبيب ورة

‏

‏ واني عباتي ويمي علاوي وبحضني يوسف

‏

‏ سلمت على جدي هو فرحان كال تونسي بويه هناك العيشه تجنن بويه باسني

‏

‏و صاح عمو يله بويه طلعنا وعقيل كال شوفوا ولكم شيخه دره سحلونا علمودج ...

‏

‏ضحطت و  الطريق كله هم ورى يغنون ويصفروون ..

تعدينا على هواي سيطرات مال امريكان ، من اشوفهم محتلين ارضنا ويتحكمون بينا عصرني گلبي ،، كلش متت من القهر ...

‏

‏طل  حبيب كاله  اطينه اغنيه

‏

‏ كال مااذكر هسه

‏

‏صاااح يبوه  يله هيج انتي حلوه بويه ماكو بحلاتج

‏

‏ واحنا نصيح بويه

‏

‏ كمل يم الظفاير خليتي حاير والعشك بلوه

‏

‏واحنا نصيح بويه ( اغنيه لعلي العيساوي )

‏

وراها  حول لأغنية لقاسم السلطان اشلون لك عين وتصد بعيني وانت مااخذ مني احلى اسنيني واحنه نردد وراه شلون الك عين

وساعه يطك اصبعتين وساعه يهز ركبه وشربنا الجاي وطلع الكعك ناكل

ماحسينا بالطريق من الضحك والسوالف وليد واحمد كلش متونسين لحد ماغفيت وانا كاعده

وصلنا الهم بالليل ...  احمد فتح الباب واخذ يوسف

و  اطاني ايده  ينزلني

و وليد شال ابنه و يصيحون تفضلوا تفضلوا ياهلا ومرحبا ياهلا

فتحت النا بنيه شابه اصغر مني ، عمو علي كال

هاي  تصير عمتج  عدج ثلات عمات سهى وشيماء وشفاء وكلها كصتج  ثمانيات مواليدهم

طبينا جوا شفت حديقه جبيره

‏صاح عمو علي افرشوا للولد بالديوان وحاجهة

‏سهى كاللها  اخذي دره بويه تعبت تحلل وتسبح ولاتكعدين  الحجيه  الصبح تشوفوها

‏

‏هي كالت ابو حسن هي كلساع تفز تسال عليكم

‏

‏كلها من تكعد كليلها جبنا الامانه وناموا تمام بويه

‏

‏ ردت اي خويه

‏

‏اباوعله يالله هذا عمو علي ينكط طيبه وحنيه تقرب مني وباس راسي

‏

‏كال بويه البيت بيتج واحنه خطارج ومن هالساعه انا ابوج وعمامج سندج وبظهرج بعد عمج سمعتي لاتهمين بشي ذبي عليه وانا احله ياوجه الخير انتي

‏

‏ ابتسمت الله يديمك يارب

فرشولي اني ويوسف  وعلاوي ظل يم وليد مددت ظهري مكسر سهى  جابت مي يمي

كالت خاف جوعانه

‏

‏ كتلها لاعمه مشكوره

‏

‏ ضحكت كالت انا اصغر منج بس عظمي خشن

‏

‏ كتلها ماشاء الله

‏

‏كالت الحجيه كلبها نار تريد تشوفج والله دموعها مانشفت عليج من جنه بالاهوار لحد هسه

‏

‏ وكالت لجدج من مات ابوج بس جدج كاللها اريد تكمل دراسه والاهوار مالهم مستقبل

‏

‏ الولد بس حبيب كمل بجنسيه مزوره وعايش يم عم امي ابو غايب ماعنده خلفه والناس عبالها ابنه خطيه لان حيل شاطر

‏

‏ وهسه جاي يعلمنا كلنا احنا الصغار نعرف بس شويه باجر العصر اكعدي وشوفي  شلون يعلمنا

‏

‏كتلها شمخلص ؟

‏

‏ كالت دكتور اسنان

‏

‏كتلها ماشاء الله الله يحفظه ...

‏

‏ردت وهي  تغطيني تسلمين

‏نامي ارتاحي ...

‏

‏نمت يمكن ساعتين سمعت الاذان وصوت يوسف

‏ كمت رضعته واباوع ماكو سهى

‏

‏ هميت وكمت كوه تعبانه لبست ربطه وطلعت ماشاء الله الكاهم كلها كاعده بالصحن ( هول داخلي جبير ) واكفين يصلون الفجر وشباب هواي خير من الله

‏

‏ رجعت للغرفه استحيت مع العلم لابسه دشداشه عريضه وردن شويه طويلة

‏

‏وطبت بنيه كالت انا شيماء ليش استحيتي ذوله كلهم ولدنا ولد علي ومحمد وجعفر فروخه اصغار وسهى  مخطوبه لابن عمي  بعد مده ياخذها تعاي تعاي

‏

‏مشيت وراها  اخذتني سلمت عليهم وطبيت اتوضا وخلصت الصلاة

‏

‏ كتلها بيبي وين

‏

‏ضحكت كالت هسه كتلها كالت خل تصلي وتجي وهاا

‏ صيحها حجيه مو بيبي عبن شيخلصج من الولد لو سمعوج يبوووه ليل ونهار يلزموها الج

‏

‏ضحكت كالت يله تعاي لحجرتها

فتحت الباب وطبيت كفختني ريحه الحنه اي الي كال عليها جدي بس مو بس ريحة حنه ماادري شنو وياها بحيث ريحتها تنظف النفس مثل الاوكسجين وتريح المخ والاعصاب

طبيت كلت السلام عليكم التفت كالت هلا وكل هلا يابعد عمري الفات وماشايفتج

ابتسمت الها شفت  مره مفوطه لابسه كله اسود بيضه كولش والخدود حمر والحلك جوزي مثل لون التمر وفشكة الحنج العندي مثلها

والسماحه والطيب بوجها شهالجمال وهي بهالعمر شكد مااوصفها اظلمها يكفي المحنه والدمعه بعينها

‏

‏ تقربت عليها حضنتني وتبجي واني هم دموعي ماوكفن وين جانت ردت مره وحده حنينه عليه ماكو طول عمري بين الزلم

‏

‏ ظلت تنوح عبالك خلت ملح على جروحي كلام نوحها خلاني هم الدنيا كله اطلعه بالبجي

‏

‏ يمكن ساعه ماسكتنا لمن طب عمو علي وصاح بينا شنو جبناها تبجينها لو نوسها

‏

‏كالتله بيبي شوف علي هاي البت من بجيها مهضومه ومظلومه عبن هي بالدنيا وحدها بس جدها وياها وهم كبر

‏

‏ ذمه بركابكم ليوم الدين كون تعوضوها لراح منها وتسندوها وحك هو علي اظل ماراضيه دنيا واخره اذا هيستها مضلومه واغضب عليك وعلى خوتك سمعت

‏

‏كال حجيه صلي على البني بويه ماخذه زينة الزلم فيصل وتعرفي

‏

‏ كالت ياهو ابو نسوان هذا ماله امان كون من تكول اخ انت واخوانك وولدك فوك راسها سمعتوا

‏

‏كال هاهيه يمه من غير توصاه هي بت اخونا وحالها من حال ولدنه وانتي تعرفين انا الحك اكوله لو على كص ركبتي

‏

‏كالت اي يمه كوموا خل نتريك ....

طلعت لمتهم تخبل ماشاء الله نسوان عمامي سلمن وبناتهم همين ... اخذتني سهى  عرفتني عليهم ماشاء الله خير من الله ...

رحت اخذت يوسف وخليته بحضن بيبي بوسته من راسه وظلت تقرا عليه وهو ظل صافن عليها وهادئ بحضنها

صبووا الريوك اني وبيبي بصينيه وهمه كل وحده وجهالها وحد والبنات ويانه وبيبي تجيب وتخلي كدامي اكلي يمه انتي مرضع يرادلج اكل

‏

‏ اني استحي منها بعدني ومتقبل تنطيني يوسف تكول ميخليج تاكلين انت اكلي وخلي عندي

‏

‏شكد حبيت حنيتها ، احس بيها تتغلغل بيه وتنعشني

‏ كملنا اكل

‏

‏اريد اشيل ويالبنات ماقبلن ابد ظليت يم بيبي جايهم يخبل صبيت بعد واحد وظليت اشرب

‏

‏  بيبي كالت الولد لخاطرج سووه على الفحم بالعافيه الف عافيه ابتسمت كتلها كلش طيب ...

‏

‏ كملنا وبيبي رادت تسلم على وليد واحمد مشت كدامي طويله بطولي بس ظهرها محني وبيدها عوجيه

‏

‏ طبينا بسلام عليكم وهمه وكفولها تقرب احمد كال تشبهج تره ضحكت كتله اي هواي

‏

‏كال عمو علي يابويه ضحكتج شحلاتها رحمة انتي مااخذه جان ولدنا تعاركوا عليج ...

‏

‏ وواحد من ولده كال غير ننهي عليها ويضحك رفعت عيني لوليد ونزلتها ...

‏

‏ رد وليد شحدك ولك ووليد بظهرها ...

‏

‏ ابتسمت عرفوني على ولدهم عمو علي عنده ٦ ولد واثنين بنات وعمو محمد ٤ ولد و٤ بنات وجعفر عنده ٣ جهاله بعدهم ازغار

‏

‏ الحلو عمو علي وزع شغلهم وطلعوا كلهم محد اعترض حتى للولد كل واحد بجهه واحمد ووليد وياهم

‏

‏ بيبي كالت افرشولنا بالحوش انا ودره كعدنا بالحديقه البره الجو طيب اجتي وحده من احفادها كعدت كدامها كالتلها جده مشطيلي

‏

‏ خلت يمها الزيت ومشط خشب كعدت تمشط

‏كالت اي دره احجي باليوجعج اول

‏

‏ رفعت عيني كتلها عمري كله يوجع بس جدي دوه انجرح ويداوي ماكو مره بعمري حتى بعرسي اني وحيدة

‏

‏ جان عندي امل الدنيا تفرحني واخذ واحد ارتاح وياه انوب الدنيا لوتني لوي كلما اشيل راسي تكفخني  شحجي وشنو اكول وشنو الي سولفله وشنو الي اعوفه

‏واني منين مالزمها موجوعه روحي

‏

‏ صفنت بوجهي كالت عندج فطنه من تحجين معدله عبن رابيه ويا جدج

‏

‏ تعاي تعاي امشطج كالت للي جانت تمشطلها كوومي يمه خلصتج

‏

‏ فتحت شعري وكعدت كعدامها كالت ليش مامخليه حنه كتلها جانت بيبي زهره تخلي اليه وبعدين تمرضت وبطلت وزيت جدي يخلي الي

‏

‏كامت تضحك وتسولف كبل جدج يطب عليه وشافني اخلي زيت لشعري سألني وكتله هذا زيت الزيتون وزيبك ادوبن بي

‏

‏ كالي ريحته طيبه

‏

‏ضحكت كتلها من زغيره يخلي لشعري حتى يظل يلمع

‏

‏ظل تمشط بشعري

‏

‏سألتها  بيبي ليش ماظليتي يم جدي جان حياتي تغيرت

‏

‏ ضحكت كالت وگلبي شون بي عشگت ابو علي من فتحت عيني على الدنيا هو ابن عمي عشكنا جان ينضرب المثل بي

‏

‏عشك الشروكي ماسامعه بي؟؟  يسودن الواحد وانا وياه روح وحده هاي اللكمه نگسمها هاي المي نگسمه عايش بروحي

‏

‏من اخذوني فصليه يكولون هاج بالبر فكد عگله وتسودن ردت عافيته من اجيت شايفه هذا بزري كله هو اغلى منه

‏

‏ بس امر الله فركنا وكلشي مقسوم يايمه لاتكولين لو ولو زرعوها وماخضرت ...

هزيت راسي 

كالت انت  ماعشكتي ماضگتي العشگ ؟

كتلها لا ...

‏

‏كالت وفيصل مرتاحه وياه ؟

‏

‏هزيت راسي بلا ...

‏

‏ ردت بلكت وليدج  يعدله جاانتي ماقاصره ليش بس هو بي سوله مال نسوان

‏

‏ باعي يايمه لون ضاك خلگج منه وماكدرتي على عيشته لاتكسرين بروحج عوفي وتعاي اهنا وفنه اليوصل يمج يايمه لاتفكرين كولي التردي وانا ولدي بظهرج

‏

‏دمعت وبرطمت ، وشهگت ، طلت بوجهي

‏

‏كالتوهااا جاوبي لاتضل هاي الدمعه هالتفرفر بعيونج وانتي حاصرتها ماتطلع ذبيها وذبي حملج على الله

‏

‏ فيصل معدل وخوش ادامي جانوا هو و ابوج يجونا للاهوار يفره  ويوصلون وماقصروا بلكشي وماكطع بولدي

‏

‏ وساعد حبيب صاحب افضال علينا وحتى من راد ياخذج دزنا خبر وانا فرحت وسمعت عنج فطنه ومعدله وكلت تلمه وتملي عينه

‏

‏ وهو كايل لعلي احبنها فرحت عبن اليحب ماياذي

‏

‏ هزيت راسي

‏

‏كالت  احجي يمه

‏

‏كتلها شاكول بيبي اني عروس وهو مااخذ وحده عليه وهسه شوفي وينه اكيد هم متزوج مالي قيمه اخذني مكسوره بس كدام الناس ويدري محد يحاسبه ومحد يكدرله

‏

‏كلها تمدح بي واني عليه لازم اسكت واليحجي ويكول هذا حكه بيبي فدوه رحتلج اذا احجي هسه منا لباجر كلكم وياه خلينا من هذا الموضوع والله كريم

‏

‏ضحكت كالت عاشكته عاشكته

‏

‏ضحكت كتلها العشك لوحده مايفيد يمه نزلت دمعه مني كتلتني كتل ...

‏

‏مدت ايدها مسحت على خدودي ... حنيتها تردلي روحي وتذكرني بجدي

‏

‏اااه شكد جانوا لايكين لبعضهم ، ياريت لوومكملين سوى جان هسه اني عايشة احسن عيشة بس هذا المقدر وهذا المكتوب. ...

‏

‏الحوش جانت ارضيته صبابة وجبير كولش وبي حوض مال مي صبابة و بي سدرة مال نبك بس مو وكت حملها

‏

‏يوسف كله نايم بالغرفة واني  كضيت النهار اتعرف على البنات وشغلهم اساعد بي ، الكط الخضره واكطع الخبز حياتهم رغم بساطتها بس حلوه القلوب صافيه بيبي حاكمه البيت وتوجه هيج وهيج ...وكل توجيهاتها بمكانها ومنفذة ...

‏

‏ لحد الظهر رجعوا الولد

صبوا الغدا وكملنا وشربوا جاي صاح حبيب  يله بعد ربع ساعه تعالوا اقريكم

هبوا النسوان يخلصن بالشغل والولد تلم وياهم انتبهت

‏على  مبدأ التعاون بيناتهم زلم ونسوان

‏

‏وكلها بسرعه لموها والبنات بالمطبخ تغسل المواعين ووحده من الجناين فرشت بالحوش وكلها حضرت قلم ودفتر

‏

‏وتسطروا نفس الصف بس بالكاع النسوان ثلاثه والولد عقيل ومالك ولد عمو علي وبناته ومرته وعمو محمد ولده وبناته ومرته وعمو جعفر جهاله ومرته وبيبي كاعده على كرسي توجهه كعدتهم

‏

‏جابوا سبوره وعلكوها على كراسي بدا حبيب يكتب بالحروف ويكوم وبيهم ويلفظها كدامهم وهمه مندمجين وياه

‏

‏والي يحجي بيبي تصيح بي ...

‏

‏ تونست وياهم وبساطتهم والضحك الصار وعقيل يغش من الجهال ومو بس قراءه لا رياضيات هم تقريبا اكثر من ساعه وحبيب مطول خلك وياهم

‏

‏ بس الكبار يعيط بيهم عائله شكبرها ضاعت سنينها بالاهوار الله اكبر

‏

‏عمو علي ومحمد وجعفر يعرفون يقروان ويكتبون جانوا بالمدارس بس الاجيال الي وراهم لا خطيه انحرموا من التعليم

‏

‏ كمل الدرس وانطاهم واجب وخطيه هو لبس وراح عنده خفر عقيل كال دره امشي اونسج اليوم انتي والولد

‏

‏ ابتسمت بوجهه كتله ياريت بس يوسف اخاف عليه والله

‏

‏كال خلي يم سهى مبينه تعلقت بي ممفارگته ...

‏

‏كتله  يله اروح اوصيها عليه

‏

‏رجعت للغرفة شفته عدها جاي تنطي ممه خفت اروح او ماروح اني كلش اخاف عليه كل شويه اطل عليه

‏

‏كالت سهى روحي تونسي ولتخافين عليه اني يمه

‏

‏ظليت اباوعله ترددت بعدها لبست عباتي وانتظرت بيبي كالت شويه والحكم مااعوفنها وحدها لاتوكعوها مخابيل انتوا ...

‏

‏ كملت لبسي ورحت وكفت يم السيارة انتظر بيبي

‏

‏جانوا واكفين يمي  عقيل ومالك ولد عمو  علي ووليد واحمد

‏

‏ كال عقيل اليوم اخذج للاهوار  يكول وليد تعرفين تصيدين

‏

‏ ضحكت كتله جنت هسه مااصور اكدر بعد انصاديت ومالي خلك وتركيز كبل

‏

‏ كال حسن ابن عمو علي لادره لا تكسرين نفسج والخلك لاتضيعي منج لان ماشتروا انتي لاتبيعي فهمتي

‏

‏ كتله اي افهم

‏

‏ كمل اشتري روحج و خل تجي جده ونصعد للاهوار ناخذج وتونسي وناسة مصايرة ، ضحكت ...

واحنه ننتظر بيبي ، شفت سيارة وصلت يمنا ونزل منها

حسيت گلبي طفر من مكانه ....

للحكاية بقية ...

من اصعد لغرفتي انزع قناع الفكاهة  الي مغطيه بي وجهي بيه كدامهم لان اني داخلي مدينة حزن كاملة وقافلة عليها

لااكدر احجي ولمن احجي  هو بس جدي الي وجبير ومريض نصيحة جدي باظهار القوه اذتني

‏

‏ لان دست هوايه على نفسي ...

‏

‏   الارتباط بانسان قوي هم اله سيئات لأن مااكدر اوكف

‏ بوجه ..

‏

‏و هو اعتبرني ملك خاص  اله  وخلص محد يكدر ياخذني منه

‏

‏وفعلا هذا الي صار مو سعيدة وخايفة من مستقبلي فيصل ماله امان

‏

‏ جدي موجود جاب مره عليه اذا مات جدي شون بيه وين اروح

‏

‏واني ماارضى بالضعف ولا اقبل اشوف بعين احد شفقة

‏عليه ..

‏

‏ شون بيه ماادري دخل فيصل كالي الظاهر

‏راح تهججين سلوى لأن صعدت تكولي اريد اطلق اذا ماتسكت دره مني

‏

‏ضحكت خفيف كتله وانت شنو كتلها

‏

‏كال شنو مافرحانة اطلقها ؟؟

‏

‏ كتله على شنو افرح احنه موضوعنا منتهي اني وياك ماابقى اعيدها الك اني ماارضى بانصاف الامور مارضى بنصف رجل والنصف الثاني الها

‏لو كلك لو مااريد

‏

‏كال شنو ماتريديني؟؟؟

‏

‏ كتله شون احبك واموت عليك انت عندي مثل جدي ويا النفس وشايله هم شون بفراكك و  حضنك بس الكرامه اغلى من الحب

‏

‏ اني مالي احد غيركم انت وجدي وابني انت ماشفت القهر الي شفته  الله يخليك تعبت بشكل واريد اعيش مثل الناس ...

...... مشهد

شلونكم 🥺اعتذر صار عندي خلل وانحذف الي كاتبته وهسه مالحك اكتبه من جديد ان شاءالله باجر انزل بارت طويل تحملوني شوي وهذا المشهد مكتوب من مستقبل الرواية حتى نرضيكم لا تزعلون ☹️

السلام عليكم

رواية طوفان رجل

الفصل 39

نورا ناصر

لقد كنت معك مثلما يهب الجنود أرواحهم للوطن، أهبك كل ما بيّ من طمأنينةٍ ومواساة،لكنني كنت حين أصل في آخر المرحلة أجدك تحضنهم بحرارةٍ جميعهم، إلا أنا تُصافحني.

صعدنا بالسياره وبيبي كاعده يمي كل شويه تبوس بيه وصلنا لكاع خضره وبيوت كلها كصب وشويه عنها الشط صاحوا هذا الهور وصلنا ...

نزلنا وظليت اباوع هوا نظيف وحلو ابتسمت بس بالي يم يوسف لو شوي جبير جان جبته وياي

‏

‏  شفت وليد واحمد متونسين حتى اوجوهم متفحه والابتسامه شاكه حلكهم

‏

‏سلموا على ولد كاللهم كلشي حاضر طبينا بيت كصب يخبل مفروش ومخاد وريحة شوي مال سمج يخبل

‏

‏صاح مالك هادره حلو اندريت كتله يخبل كال من الصبح نحضر بيهم

‏

‏ الحجيه كالت اريدج تتونسين ولاتفكرين بيوسف هسه يدارونه وينطونه حليب انت عيشي يومج اليوم

‏

باوعت بوجهه وعيني بعينها شكد حلوة ووجهه سمح كتلعا ان شاءالله بيبي

‏

وباوعت للولد كتلهم مشكورين ليش تعبون نفسكم

‏

‏ صاح عقيل كال اكلج انت كله تحجين اعوج؟

‏

‏ كتله بتعجب  اني؟

‏

‏ كال اي تعبتوني وتعبتوني دولي خل نتونس من وراج اليوم حصلنا اجازه من ابو حسن حتى نونسج دهر فرج

‏

‏ ضحكت بصوت  على سوالف عقيل

‏

‏كالوا امشوا نتمشى ، طلعت وراهم

‏و نزلت امشي على كيف لااوكع

‏

‏باوعت للمي واشوف المشحوف يفتر بالهور والجاموس يسبح  ... صفنت بالطبيعة الحلووة وافكر  بالغايب ماادري عنه والقلب اشتاقله ومصير ابني شنو!!

‏ اوووف يافيصل خليت عله بقلبي ماتطيب ولا تبرا

‏

‏ صاحت  بيبي لاتصفنين يمه ربج موجود لادوخين عيشي اليوم والله كريم باجر

‏

‏ هزيت راسي اي ورحت يمها بيبي يمتى نرجع اشتاقيت ليوسف وبالي يمه

‏

‏كالت نتغدا ونرجع مانطول وهسه البنيات يبارنه شمالج انت لاتخافين عليه يبارنه اكثر منج

ابتسمت ، وجعني صدري يمكن جوعان حبيبي ...

‏

بقيت افكر بي والهدوء يجبرني افكر بأبوه

‏

مر الوقت مريح كلش  الهوا النقي والوجوه الطيبه شعور حلوو نفسي هذا اليوم مايخلص لو ما اشتياقي ليوسف وخوفي عليه تمتيت اتووه هنانه وابقى العمر كله واجيب ويايه جدي ...

طلعوا لبيبي سمج منظف ومفتوح كالت اليوم اضوكج الطابك معروفين بطبخه احنا اهل العماره ذبي عباتج وتعاي ساعديني وتعلميها مني

كل الي يذوقها ماينسى طعمها

‏

‏ ضحكت كالت ضحكي يابعد جبدي مااريدج مكدره لو انا ولدي جوه رجلج بلي تامرين والي يريح افادج

‏

‏رديت العفو بيبي تاج انتو على راسي ونعم منكم بس انا كلبي تعلك بي وابني مااريدنه يتيم

‏

‏ كالت جا لا تفكرين تونسي ولذاك الوكت يحلها ربج

‏

‏كتلها الله كريم

‏

‏ طلعت السمج وغسلته وملحته وعلكت تنور الطين وخلتها بي وسوت سياح على الطابك مسويته من الطين

‏ وخليت عليه طحين التمن سوت السياح

‏

‏كالت تعرفين تسيحين ؟؟

‏

‏كتلها اي بيبي اعرف علمتني بيبي الطبخ وشبعتني دك وكتل وتعلمت جدي جان يكلي تعلمي كلشي حتى ماتعتازين احد والعازه بالكبر توجع

‏

‏كالت بكثر فرحتي بشوفتج بكثر ما وجعتيني وقهرتيني اظنج متمرره بعيشتج ...

‏

‏ضحكت بحسرة ووجع ماريد اشكي واكدر عليها اليوم خليني ناسية كل شي

‏

‏ اطتني وكمت اسوي وياها وجابت فحم من التنور وخلته على السياح لحد ماوجهه كسب

‏

‏فرشته بطابك خوص وخليت عليه السمج واني طبخت تمن احمر على البريمز وظليت  اكلب بي حتى يتهدر

‏

‏ اباوع عليها تباوع عليه بوجهها ابتسامه وعيونها تحجي

‏

‏ابتسمت بوجهه تعلقت بيها هواي

‏ كالت دره معدله شغلها مرتب تشبهيني

‏

‏ ضحكت كتلها شفايتلي اشبهج اذا انتي بهذا العمر وجدي عاشگج

‏

‏ ضحكت كالت هاااا تضحكين على هاي الشيبات جااانا مااعرف بعيون وليد لو لاله

‏

‏ ضحكت كتلها اخو والنعم منه

‏

‏ كالت ماكو اخو غير الطالع من بطن امج كلها جذب خاصةً الزلم

‏

‏كتلها اي والله فيصل عبالي عمي وتالي اخذني ههه خل اصيح الولد نصب الاكل ...

صبينا الأكل وكعدنا نتغدا ، وضحك وسوالف تونست كلش جانت الكعدة ناقصتها شوكة وجدي تمنيتهم ويايه ..

ورى الاكل شربنا جاي على الحطب ، طعمه طيب كلش

واني خبلتهم عفية اريد اروح للبيت بالي يم يوسف لو جايبته ويايه بس اخاف عليه طفل مايتحمل ..

رجعنا للبيت دننزل من السيارات نزلت أني وداانتظر بيبي تنزل من السيارة وجانوا الولد محاوطيني كلهم بصفي

شفت سيارة اقتربت من يمنا سمعت عقيل كال هذا ياهو الجاي لينا

ولهناك نزلت بيبي واني اباوع عبالك گلبي علم

شفته نزل حيييل شگد مشتاقتله تمنيت اختصر المسافة الي بيننا ويختفون الي حواليه واركض احتضنه واطب اخذ يوسف واشوفه اله

بس جانت عيونه كفيلة بذبحي عرفته معصب ومغتاض

اجه سلم على الكل وصل الي جر راسي باسه كدام الكل وفارقني بسرعة راح وي الولد

انتقلت نظراتي لاحمد لا ارادي ، شفته قلق ومستغرب مثلي ...

دخلنا جوى وركضت ليوسف شلته اريد اودي اله

سمعت صوت مالك يم الباب يحجي وي شيماء

فيصل يكول خلي درة ترتب حالها يريد ياخذهه هساه

بيبي كالت طالعة احجي وياه

كتلها بيبي اكيد معصب مني لان طلعت وهو غايب

كالت حگه ومو حگه يا حبوبة

طلعت  هي وخلتني يم يوسف ، بس ارجف ومقهوورة كلش ... ليش هيج عاملني بجفاء

حضرت اغراضي ولبست ليوسف واجن البنات يمي

كالت شيماء تعودنا عليج

دمعت عيوني خنگتني العبرة والله اني هم تعودت عليكم ...

گالن لا تگطعين منه هم تعاي غير نوبة

كتلهم اجي اكيد وانتوا همين تعالوا

دخلت بيبي كالت يله حبوبة رجلج يريدج ومحتم حتم اله ترحين هساه وياه

هزيت راسي حضنتها حييل وبوست راسها واديها وهي بچت بصووت ومسحت دموعها بفوطتها

واني گلبي عبالك انعصرت اضلاعي عليه هلگد ما منعصر من القهر وحتى الدمعة عصت بعيني

طلعت وبيدي يوسف وامشي واتلفت حبيتهم فعلا ردت اگضي العمر وياهم ، قصرت يا جدي ما جبتني يمهم يحموني ، بس هم فعلا جانوا بوضع محد يحسدهم عليه ومامستقريين بمكان ..

رحت امشي وراه واباوع منو راح يجي ويانه

اباوع وليد احمد اتوسللهم بعيوني اريدهم يجون ويانا بس الظاهر هو محذرهم

جان منطيني ظهره ويمشي واني وراه ماعرف اشيل طفل واني لابسة عباية كوة ومنا متوترة

وهو من طلعت باوع لايدي الي شايلة يوسف ودار وجهه هنا جانت اكثر لحظة مؤلمة بالنسبة الي ليش وشنو ذنبه طفلي هو همين طفله ليش يتعامل ويانا هيج

تبعته للسيارة بس ماتمنى اتبعه تمنيت الارض تلزمني من رجليه وتجمدني مثل التمثال ، ماعرف شينتظرني لمن راح اروح وياه ...

تبعوني احمد ووليد للسيارة وهو نظراته باتجاههم كلها تحذير ، حتى لأخوه ، ديروا بالكم تجون ورجعوا لحالكم

وليد كوة عليه متحمل بحيث اجه وراي اخذ يوسف مني وفتح الباب الى ان صعدت كدام وهو ناوشني يوسف

كال محتاجة شي ؟

سمعت صوت فيصل يكعد يمي وكال وليد سد الباب يله

هز راسه واني اباوعله تجاهل فيصل وكال محتاجة شي درة احنه وراكم نجي

هزيت راسي بلا وماكدر احجي

حرك فيصل السيارة ومد ايده يسلم عليهم ووليد سد الباب ووكف بعيد عن السيارة ومكتف اديه وبصفه احمد ويحجون ويتناقشون

جانوا مالك وعقيل يحاجون فيصل يردوه يبقى حتى يشوف عمو علي

بس هو رفض ووعدهم يجي مرة ثانية ..

حرك السيارة وابتعدنا عنهم ، وهو ابد ولا كلمة ، بس مبين من سياقته جان يسوق بشويه رعونة

بادرت وسألته ببرود  // شلونك ؟

ضرب ايده على الستيرن بقوووة لازم مكيفة حضرتج واكفة بين الزلم

كتله بنبرة شبه عصبية بعد ما فاض بيه

ياا زلم هم اخوك وولد عمي

عاااط بصوووت عالي ووولج ياا ولد عمج يااا ولد عمج هستووج عرفتيهم يمتى لحكتي تذبين ميانة وياهم

على صوت عياطه فزز يوسف وصار يبچي جي ظليت اسكت بي وابووسه

حبيبي ماما اسكت عمري انت ، خليت الممه بحلكه

اشوف فيصل ادي ترتعش

من هدأ يوسف وسكت هو رجع حجه

كالي هاي طلعتج من بيتي واني غايب راح تدفعين ثمنها غالي

جاوبته بغرور اني طلعت بأمر جدي وعمي

عاط بعصبية محد ولي امرج غيري انيييي ولي امرج

كتله انت ليش دتحاسبني هااا ليش ؟ مترووح تحاسب نفسك عفتني اني بنص الخطر والصواريخ فووكانا وهسه راجع دتحاسبني

كال شووفي وحسبي اغلاطج اول شي رحتي وكونتي اسرة بدون مترجعيلي واتفقتي وي جدج وخلفتي هذا الطفل وهسه طالعة من بيتي ورايحة لغير محافظة واني غايب وغير تمردج وورفضج وتقصيرج بس اني اعلمج

سكتتت عنه .... رجعت للبيت دخلت تلگتني رزان سلمت عليها اخذت مني يوسف وتبوس بي وهو ابد ولا حتى طل بوجه ابنه ولا شافه

صعدت للغرفة خليت يوسف على السرير ، طب هو بحوش وماعرف شنو اخذ وطلع من الغرفة وبعد ما شفته

دخلت رزان عاتبتها ... كتلها ولج طلعت الاربعين مالتي وانت حتى ماجيتي تشوفين ابن اخوج

كالت غير ضجت طلع ولد وما جيتج

ضربتها على كتفها كولي الحمدلله

ردت جذب والله غير ماما رجعتنا لهذا البيت والنبي جنت متونسة هناك

جاوبتها رزان متونسة عليمن انت هناك !!

ردت والله ماما عرفت بيناتنا نظرات ورجعتنا هنا هي تريدني لابن خالة فيصل تكول احسن لان من مستوانا واني صراحة اريده كرار

جاوبتها كرار ابن عمو راضي ؟؟ (( راضي ابن عم بابا))

هزت راسها اي والله گلبي ارتاح اله امي شافته يحاچيني وگبت عصبية كالت تريدني لزيد ابن خالة فيصل تكول عالم طاگة ومن مستوانا

رديت عليها وشبي كرار ترة خوش ولد وحباب بس امج تباوع ليفوك ومنو يكول راح تعيشين سعيدة ويه زيد

والله ماادري ياادرة ماادري اني همزين بس نظرات وي كرار همزين بعدتني امي عنه ماريد اتعلق وادري امي تخربها

ضحكت بسخرية ... سألتني شگال فيصل  على يوسف ؟

من سؤالها گلبي عورني كتلها ميحتاج بعد انت تعرفين شنو موقفه هو رافض من الأول

ردت يتقبله صدكيني هسه يكبر وسوالفه تحلى ويتعلق بي .. 

كتلها بحسرة مااعرف ، كالت اعوفج ترتاحين مدام ابنج نايم

وخلت وطلعت واني من التعب والقهر حتى نوم ما اكدر انام

تمددت يم ابني وعيوني ترفض تستسلم للنعاس ، كل شويه اكول هسه يطب عليه يراضيني وياخذ ابنه بين ايديه ويلعبه ويبوسه ممعقولة ممتلهف عليه يربي ليش هيج يعاملني ليش هيج يسووي

وطالي انتظاري و ماكو ومااجه ... بالليل دخلت عليه رزان كالت اجوي خطار علينا نسرين وزيد وامهم .. وجاي يريدون يشوفون ابنكم ويتحمدولكم بالسلامة

كمت لبست وعدلت ولبست يوسف ونزلت الهم ، سلمت عليهم ، عائلة مرتبة وراقية ، نسرين كولش حلوة ومبينة فرحانة ولابسة حلقة بأيدها مخطوبة جديد

وظلت امها تحجي عن اصرارها على خطيبها وشلون شلعت قلبهم والا تريده ورفضت هواي غيرة ومصرة عليه وهي تضحك على حجي امها

بعدها سألتني خالة فيصل شلونه فيصل ويا يوسف فرح بي ؟

ردت عليها صفية وين انت مو تدرين هو مايريد جهال اصلا اجه منا جابهم منا وطلع ...

كالت خاف عنده شغل !

ردت عليها صفية لا مو تدرين ما يريد اطفال هو

جاوبت خالته لا هسه يكبر الطفل ويتقبله

اني حيل انقهرت على طفلي متتت قهر عليه ... وهي خالته انطته فضل وطلعت من يمهم رحت للغرفة

واختفى فيصل اسبوع تقريبا ... وبعدها رجع...

جنه كاعدين بالصالة دخل و دخلت وراه بنيه شابه

كالت السلام عليكم

‏

‏ هو عيونه عليه وكلهم ردوا السلام

‏

‏عمتي سالت منو هاي ؟

‏

‏ فيصل كاللها  زوجتي سلوى

‏

‏ همه رحبوا بيها عدهم عادي مايجي سفره اذا مو بيده مره

‏

‏بس اني صدمتي مو بي جانت بنفسي

‏ واهنا عرفت نفسي شكد قوية

‏

‏  بداخلي صرخة كبيرة وكاتمتها ، جان هذا الشعور قاتل

‏كوة كبحته وتحملته ...

‏

‏ هو صافن بوجهي ويدور على ردهدة  فعل مني واني مثلت دور عادي وسلمت عليها ورحت لغرفتي .. 

ودموعي شلال مايوكفن مااعرف منو اجا ركضت للحمام وفتحت الدوش وظليت ابجي وقلبي ماشفى

سمعت صوت رزان تدك بالباب وتصيح

‏ وينج صبينا غدا

‏

‏كتلها جيبيلي ملابس ...

‏

‏راحت ورجعت مدت ايدها  جابت ملابس سبحت وطلعت رضعت يوسف ونومته وخليته بفراشه ماريده يشوفه ابد

‏

نزلت جوه  ‏وكعدت على ميز الطعام سلوى  زوجته كعدت يمه يعني بمكاني ...

و هاي اصعب مرحلة مريت بيها بحياتي كلها

‏ بداخلي نار وبارود ومااظهره وهو عيونه ماشالها مني وجنت اشوف فيها اعتذار وندم بس فات الوكت خلصنه الاكل وصعدت ...

وراي بدقايق هو اجا صعد للغرفتنا وباس راسي

كال شونج

همست الحمد لله

كتله  تريد هاي الغرفه لسلوى  عادي حتى احول غراضي لان انت شون تبدل

ظل  صافن بوجهي اشر براسه لا ، طلع جكارة

يريد يشربها باوع لسرير يوسف الي مغطيته اني

بتول شفاف وميبين منه

كال بحسرة ندمان

‏

‏ كتله لا ليش احنه على اتفاقنا هو شبقى بالمدة وارجع لاهلي  وانت ارجع لحياتك اذا تريد هسه لان عدي وبعد راح وهم نبرر طلاقنا بزواجك شتكول؟

‏

‏قرب مني حييل ، خفت منه عبالي ديضربني

‏

‏بس هو  حضني قوي ويشم بيه عبالك اوكسجينه

‏ ومااحجى اي كلمة

‏

‏ورا  نص ساعه كال لاماتروحين شهر واطلقها

‏

‏ ضحكت ودموعي تنزل  كتله لا ماتعرف درة

‏ لعد اني ماانكسر الدنيا هواي كسرتني واوكف من جديد لاتخاف عليه وديني  لاهلي ...

وكف على حيله ... كال برفض اصلا تنسين الاتفاق والطلاق وتعشين وتموتين يمي سمعتي

  كتله لا ماسمعت وماابقى على ذمتك والطفل انت ماتريده وخلص احنه عيشتنا سوه خلصت باح انت شهريار ماتكدر بدون نسوان وتجديد

عافني وطلع صعدت رزان كالت ووصى الكل عينهم عليج

ابتسمت اي  خاف اطلع لو اسوي شي بروحي هو حافظ تاريخي ويعرف تفكيري ...

سلوى  حلوه بس من النوع هاي شعرها مخصلته اصفر كولش ومكياج اشكال فوك العين وحمره ماتنزل من حلكها اوفر بلبسها وشكلها

‏

‏ماغرت منها ولاخليت نفسي بمقارنه اني عندي ثقه بنفسي اني مقهوره لفيصل تمنيته   مالتي وملكي

‏

‏ مثل جدي من جان يلعب واحد من جهال عمامي انقهر واغار عليه واذا يلحون اتمرض واصخن

‏

‏فيصل صار هيج شي يخصني بكولشي بضحكته الخفيفة بوسامته بعيونه من يعصرهن حتى يلمح كذبي عليه

‏ واخفي مشاعري

‏

‏ من يقرا وكاحتي ومقالبي من يقبلني بكل اغلاطي والاحضنه ااااه من اهتمامه حتى باظافري ينتبه من كثر مايدقق وياه

‏

‏اذكرت مره جنت بالحديقه اشتغل احول من السندان للكاع اجا شافني عركانه وازرع  جان ياخذها مني هو يزرعها

‏

‏وكال ليش درتي  تتعبين نفسج باعي هاي حبايه طالعه فوك حاجبج مو اتفقت اذا يصير بيج شي اخذها منج

‏

‏ ظليت صافنه بوجهه والجكاره بحلكه وهو يزرع  يحجي والحجي يطلع مو واضح

‏

‏بويه انتي بنتي واماريدج تعبين اجيب فلاح وكوليله شنو تريدين يوميه ويهتم بيها نفس الحديقة الجبيرة

كتله بابا ماتعبانه منها عندي هوايه واسال جدي هم جان عندي زرع كومه واشكال كلها اعرفها واهتم بيها وثانيا اشغل وقتي من الفراغ الموجود

كال اريدج اميره وكولشي يجي يمج

ضحكت كتله لالا زوجتك مو كسوله واذا تريد اطبخ واضوكك طبخي

‏

‏ كام يضحك عباله اجذب جان يعصر عيونه ويباع بعيوني كال لاتجذبين كتله لامااجذب بس جدي جان مصر اتعلم الطبخ وجنت اوكف ويا بيبي لحد ماتعلمت والله مااكذب  لعد باجر الغدا اني اسوي

حجاية  جدي دائمًا يكولي تعلمي كلش مادامج عايشه حتى ماتحتاجين احد ...

طلعت بالحديقة مالتي حنيت الها ظليت اشوفها واجيك زرعها. .

وهو اجه يمي ظل ساكت وبس يباوع

كتله مااسالك ليش تزوجت لان انت عندك هذا الشي عادي بس اليش مبقيني على ذمتك الي اعرفه انت ماتجمع اثنين ليش بس ويايه شنو تريد تذلني لو لان صرت حامل تعاقبني

هو يشرب جكاره ذبها وداس عليها كال  بكيفي عافني وطلع من الحديقه

‏

‏ ظليت ارش بيها وصدك التهيت بيها وتغيرت من نفسيتي شويه ظليت

‏

‏ للعشا دزوا عليه والكل مجموع على الميز اني كعدت بعيد عنه هو صاحني وكوم سلوى  كال هذا مكانج لاتبدلي اشرت براسي

‏

‏ بعدين حجى وياه هشام كاله اخذ درة  للمستشفى سويالها تحاليل وجهها اصفر

‏

‏  اني بس  ساكته كاله تمام

‏

‏عمتي كالت يمه من سافرت بطلت تاكل

‏

‏ احمد كال على فراكك وبس تبجي واني اخزر  لاحمد وهو يسولف واحنه نواسي بيها موهيج رزان

‏

‏ردت  اي والله واني  اخزر بيهم وهمه ماكو واباوع عليه صافن عليه

‏

‏اخزرهم واضحك ورجع ياكل ، سلوى  من يمها صاحت ليش حبي لازم جنتي  تعرفي هو يحبني وتزوجني حقج تغارين

‏

‏ هي تحجي بخشمها وتتموع بالكلام واني ضحكت ضحك لدرجه عيوني دمعت من الضحك وكمت من الميز

‏

‏كتلها بالعافيه عليج و صعدت لحكني فيصل

‏وطلب جاي ودخل وراي

‏

‏ كال شنو غرتي اشرت لا

‏

‏  كال لعد ليش تضحكين ؟

‏

‏جاوبت اضحك على حظي. وقدري تعرف فيصل  اني هاي الدوامه كلها مااريدها جانت احلامي كولش بسيطه بيت صغير ورجال يحبني واسوي اطفال سته اربع ولد واثنين بنات

‏

‏ وحديقة بيتي صغيره وحتى ووظيفه مااريد واريد هدوء. وعائله بسيطه ماعندي اكثر من هذا الطموح

كال تكوين الاسرة يجي بالاتفاق وانت اخليتي بالاتفاق هذا ... ولازم تدفعين ثمنه وتتحملينه وحدج ...

.

.

.

بهاي الفترة رجعت الخطوط خابرت جدي على الارضي وطلبت يجي وفعلا اجه  وكعدنا سوه وسولفته على. زواج فيصل جدي ماقبل اطلع وكال تريدين العالم تاكل وجهنا ابقي اهنا وهو كال شهر وتروح وشنو. الجديد كلنه نعرف فيصل  يزوج يوميه تحملي على الاقل سنه بعدين كلي ليش ماكسبتي

كتله جدي هي كوه واني ماقصرت وياه اساله جدي

‏

‏كال اني متعجب هو جان يحبج ورادج

‏

‏كتله  جان جدي جان هسه مل مني

‏

‏طب فيصل وجدي كام

‏رحت يمه كتله  لجدي اروح وياك مو كلت من تجيبن اخذج جدي اني رجعت علمود الطفل وهو مايريده وهسه اخذني وياك

‏

‏ كال شنو تخبلتي مو صار عندج طفل لخاطره تبقين

‏

‏كتله جدي كافي مااكدر ابقى يوميه يظل يزوج عليه وهو مايريد الطفل

‏

فيصل كال لجدي ابو سلام اخذ درة  وياك اني ماقصرت وياها

‏

‏جدي كاله ويوسف اخذه وياها ؟؟

‏

‏ اجذب اذا اكول ماانقهرت متت قهر وانصدمت لان حتى لو اطلبها جنت اتوقع يرفض هذا الشي

هز راسه فيصل ... بأي ..

‏

‏ جدي كاله مايصير صار بينكم  طفل

‏

‏ كبل كتله جدي  هاهيه فيصل فضله ماننسى واحنه متفقين كلمن يروح بطريق

‏

‏طلع واني دموعي ماتوكف والم بالغراضي وطلعنا وعمتي عبالها اشوف اهلي وارجع سلمنه عليهم هو يشرب جكاير وجهه مدخن واعصاب بحيت وكع كلاص المي منه وتفلش

‏

‏ صعدت السياره واني اباوع عليه ....

للحكاية بقية ..

.

.

.

السلام عليكم

رواية طوفان رجل

الفصل 40

........

ستقتلني يومًا هذه المزاجية، سأقع يومًا وأنا أتأرجح بين السعادة و التعاسة، بين الاكتراث و اللامبالاة، الشعور و اللاشعور، سأتلاشى في المنتصف الباهت."

- لأحمد خالد توفيق

........

طلعنا من بيتهم وابني بيدي ، مهضومة ومقهورة حييل دموعي توكع على ابني الي بحضني اني مراح اخلص من هاي السلسلة الي لازمتني ...

بابا امه تخلت عنه خلفته حتى ينفك قيدها والحكم الي كبلها ، واني امي هم تخلت عني وبدلتني بالفلوس

وهسه ابني هذا يرفضه ابوه وينكره ... شنو هالقدر هذا !!

شبعت بجي والطريق كله ماسكتت وجدي خطيه ماحجى خلاني ابجي وبس يستغفر ...وادري گلبه يتگطع عليه سوده عليه

‏

‏بعدها صاح بيه كافي كافي يابه انتي نفسه مو زين عليج للتكولين بالبيت جايه زعلانة كلها شمات ..

‏

‏غمضت عيوني وكوومة دمووع وكعت مني عبالك غرگ خديى اي والله ياجدي كلها شمات

‏

‏

باوعلي وعيونه كلها قهر

‏كال هو اخ يا درة يظل مشلوع گلبج وگلبي ومانرتاح ليش هيج بوويه انه بس لا ظلمتج

‏

‏ كتله واني اناشغ ؛- جدي هو مزوج عليه مل مني وانوب ولدت خلص مني انت شنو ذنبك

كال درة ماتنهز وياهو يضوجج رجال ولامره اخذ حقج وارتاح بس ابقي بنصيحتي لاتجين وياه بفراش ولاتاخذين منه فلوس فيصل دواه يمي زين بويه

سكتت كمل كلامه :- وحق دموعج ذني الااخلي يحفا عليج ومايلكاج ويتمنى شوفة وجهج اني اعلمه

‏

‏

‏

‏ جر حسرة وسكت و ظلينا ساكتين بس صوت نشغاتي

‏وصلنا لبيت جدي ... هو دخلني للكراج غسل وجهي بالمي

‏يله دخلت ...

‏

‏همزين ينامون على وقت ، بس ضوه طالع من غرفة وليد الظاهر كاعدين

‏

‏كال جدي روحي لغرفتج نامي وارتاحي ، هزيت راسي

‏صاحني بغصة بوية انت متعشايه ؟ اجيبلج لگمة تاكلين ؟

‏

‏جاوبته لا جدي اكلت والله مجوعانة ، عفية ليظل بالك عليه ولا تنقهر اني زينة والله

هز راسه قرب مني وباس راسي .... شفت راح يمشي باتجاه الديوان بس ظهره محني هو هم ابتلى على عمره بيه اووف شووكت تخلص ...

طبيت لغرفتي شوكة نايمة بيها ، وهي نومها ثگيل كولش كمت خليت ابني ورضعته ونومته بصفي وصفنت عليه ودموعي مثل المطر تمنيتهن يخلصن بذيج الليلة احس كلشي يبچي وياهن حتى گلبي حتى رووحي وجع وجعي ماينطاق وماله علاج المصيبة علواه على الم الجسد..

ظليت افكر هسه هو يمها ينام وياها يهتم بيها يسوولف وياها ...واني الي القهر ليش فيصل ليش مو خلفتلك طفل مثل الورد والناس تتحسر عليه وعلى ريحته ترفضه وتنكره ليش ليش مو ابنك مو من صلبك

شايل گزازة وتخدش برووحي ليش !!!

نمت الليلة بكسرة وقهرة بنص روحي ، حسرات تطلع غصب عني ...

يوم ثاني الكل استغرب وجودي بالبيت شعجب وشعجب خاصة هم عرفوا فيصل مصارله هواي من اجه واني والدة جديد مفروض ابقى يمه ، يشبع مني ومن ابنه بس ليش !

وبيبي وهنااء وبساميرهم وبسبستهم متخلص ..

اما فيصل عافني هالفترة لا اجه ولا سأل ولا ابد بس يدز مصرف بيد احمد ورزان الي ما كطعوا مني كل اسبوع يمي ...

واني بلشت اندمج وياهم ورغم اسألتهم وخاصة وليد هوايه يدقق ولا ملتهي عني ابد رغم رنا ولدت ولد سمته ايهم وجانت يم امها تداريها هناك

وليد كلش تعلق بيوسف خاصة هو هسه كبر وصارت سوالفه حلوة يناغي ويضحك للهوا ، أول ميجي من شغله يدك عليه الباب ، جايب اله لعبه

خو علاقة جدي ويوسف قضية ثانية حييل يحبه

دخل جدي للبيت وين يوسف

كتله ترى بلشت اغار شنو وين يوسف كول وين درة

ضحك هاي انت كبالي يوسف وين

سويت نفسي مبرطمة احس نفسي ولا اكبر ويا جدي

كال غير انت الأصل... دنكت على ايده بستها

اجت شوكة كالت جدي جدي اذبح بعير اريد الچعب مالته

كاللها شسووين بي يالمدهوورة !!!

ردت عليه شسووي بي بعد ارريد اعررس ووصفوه الي والله اريد اعرس مو حتى بيضاتي يبسن

لزمت حلكها سديته وجدي رفع عصاته وكاللها جلبة بت الجلب ماتستحين

دفعتني بضخامتها التفيت على روحي

كالتله حركوا جيبوكم شويه وذبحوا بعير هم تاكلون وهم تفتحون قسمتي وظلت طول اليوم تلح تريد الا يذبحون بعير

فد يوم مريت اريد افوت للمطبخ سمعت هناء

تحجي نقفل عليها الباب لاتطلع ويشوفنها وتخرب قسمتج

مديت راسي طليت شفتها يم شوكة ، الظاهر جايينهه خطابة

وشوكة كاللتها اي يمه عفية كلشي ولا تطلع

اني ركضت كبل للمفتاح هنه نسختين اخذت نسخة

واحدة ورجعت ...لمكاني بالغرفة

للعصر هم يحضرون بس ميحجون ، وشوكة تغمز ومتحجي ، اسمع امها تكوللها مو تحجين لدرة جاييج خطابة ترى تنفسين ولج ماتشوفين رجلهاا شمرها هنا علينا وسمعت متزوج عليهاااا

هي تكوللها اي يمه سمعت سمممعت

بعدها العصر كاعدة بغرفتي ، ابدل ليوسف وابوسه والعب وياه وهو. يضحك وينااغي ...

سمعت صوت الباب انقفلت عليه وصوت ضحك حتى ميزت ضحكة بيبي ، بلا صبرية وبيبي بدرية شتان بيناتهم

سمعت صوت النسوان اجو ويحجون ، طلعت النسخة

من المفتاح الضامته وفتحتها وطلعت

سلمت على النسوان ورحبت بيهم ، هناء شافتني وبيبي وشوكة ظلن مصدومات عبالهن جني ويتلفتن

كعدت يمهن وهن اندارن عليه ام العريس واخته

سالوني شنو اسمج شكد عمرج مخلصة دراسة

‏

‏باوعت لهناء وشوكة كاعدة عاقلة وتباوع وتتوسل بنظراتها

‏

‏ساحبة كذلتهة وكاشخة ولابسة اكسسوارات

‏

‏كتلهم هلكد عمري وهلكد مواليدي وهماتين كتلهم مزوجه اني

‏

‏طبعا مااردت اخرب عليها خطيه اريدها تتزوج بس ضجت من اسلوبهم

‏

‏ اصلا لوحدي مقرره مااطلع ...

‏ كتلهم متزوجه وعندي طفل واشواق ورده وام بيت هنياله الي ياخذها

‏

‏طلعوا الناس واجوا يركضن عليه شون طلعتي انت من الغرفة ؟؟

‏

‏ كتلهم قابل اخترقت الحايط ولو طلعت من الشباك ؟؟

‏هو الباب وطلعت منه ليش اكو شي ؟؟

‏

‏ سكتن ووحدة تباوع للثانية

‏

‏ كتلهم بتهديد هالمره عديتها مره ثانيه اكعد بحضن العريس واخربها

ظلن يتوسلن ،،، اجت وراي شوكة تتوسل بيه

هي شوكة ماينزعل منها فطيرة وعلى نياتها وشنو تكولها أمها تسوي

بس العتب على الي عندهم عقل

ويستخدموه حتى يأذون غيرهم بي

‏

‏اجه ... جدي وحجوله على العريس واسمه وشغله وبيتهم ...

‏

‏جدي مارضى على الولد يكول مشكلجي والمنطقة تشكي منه ...

‏

‏و تعارك وعمو ياحامد كال خلي نعرسها نخلص منها

‏

‏وهناء وتريد تزوجها باي طريقه .... وشوكة تبجي وتريد تعرس وتصيح بالبيت خايبين اعرس اعرس حتى لو يخطبني عتوي چلب واوي هم اعرس ماصدگت أحد خطبني ...

‏

بعد مناقشات جدي تعب وعافهم وراح لمكانه الي يستقر بي دائما بالديوان ...

اخذت يوسف من عمو حسن واللتهيت وياه بين ارضعه واغسله والعبه ...

دخلت عليه شوكة درت وجهي زعلانة منها ، اجت كعدت يمي كرصتني ولج اسمه حسين ولج فرحانة راح ادلعه حساني واغنيله حساني شوى أذاني و ماانطاني

وظلت تصفگ وتغني حساني شوى اذاني ومانطاني

لا اراديا ضحكت ورضيت عنها انداريت عليها كتلها الله يكتبه من نصيبج ان شاءالله ويسعدج وياه

خلت اديهه جوة حنجها برجاء وغمضت بحالمية وتالي شبكت روحها وتسوي حركات ، واني متونسة عليها اخر شي تمددت بالكاع وعيونها على السگف وصافنة ومبتسمة بعدها نامت على بطنها ورفعت رجليها ونفس الصفنة ..

ابتسمت ودعيت الها يكتبلها ايام حلوة ...

بعدها فقدت جدي ، كل ليلة اروح يمه ليلتي ما تكمل إذا مااسولف وياه واسهر واتسامر وياه ...

نومت يوسف ورحت للديوان شفته متمدد بنص الديوان نايم صفح على ايده ومدد ايده الي نايم عليها والثانية ترعش

ركضت عليه لزمته حلگه صاير صفح ، صرررخت بصووت عالي ، خليت راسه بحضني واتمتم

جدي اكعد جدييي حبيبي تروحلك فدووة درة وعمرها الراح والجاي يروحلك فدوة حامد وهناء وصبرية يروحولك فدوة كلهم اكعد جدي اروح لك فدوة اكعد لاتخليني واني بأمس الحاجة الك

طب عمو حسن مفزوع ووراه وليد وعمو حامد وبيبي الكل طبوا واني حاضنته وابجي كلت هاي هيه راح مني

اخذوه وليد وعمو حسن وراحوا بي يردون يروحون للمستشفى ركضت لعمة امل

وحاجيتهه بسرعة عمة عينج على يوسف

وركضت اخذت عبايتي وتبعتهم جانوا هسه مشغلين السيارة فتحت الباب وفتت التاف وليد جان كاعد ديسوق

كال وين درة

كتله جدي ماعوفه وحده

كال مو وحده احنه وياه ابنج وحده رجعي

عاندت الا اروح وياهم كاعدة يم جدي ورا وابوس بي والزمه من وجهه وابوس بأديه ..

‏ وصلنا للمستشفى واخذوا جدي للانعاش ، خطية ضاربته جلطة

‏

‏بقيت وياجدي بالمستشفى والناس تجي تشوفه اني ووليد نبات يمه ومرات اني وعمو حسن ..

‏

‏ شكد حاولوا علمود ارجع ماقبلت الا ابقى يمه

‏كالوا ردهة كلها زلم

‏

‏كتلهم حتى لو ابقى بالحديقة حتى يوسف مافكرت بي ، روحي شنو هيه روحي بالنسبة لجدي لاشيء ...

‏

ولهناك واشوف سجاني بهالدنيا ، شفته جاي هو وجبروته سابقه اخخ يا ظلامي وكسرة خاطري

شافني تفاجئ تخبل ، لزمني من عكسي ورفعني من الكاع

شسووين هنا ؟

لزمه عمو حسن قيصر احنا بالمستشفى

كال شعدها هنا ماتكابل ابنها وتكعد

سحبت ايدي منه انت اخر واحد يحجي بأبني معليك مني

ظل يصيح اليوم احرك الخلفوج على هذا العناد ترجعين للبيت يعني ترجعين

‏

‏كتله لهنا وكافي جدي مااعوفه افتهمت

‏

‏صارت عيوني بهامته و يسب ويغلط واني انطيته

‏اذن الطرشة ..

‏

‏اخر شي كال خل اطلع احسن ما اصير بصفه بالغرفة الثانية

‏

قصده يعني ينجلط من ورايه ....

وراها بكم يوم اني اروح وارجع للبيت اشوف يوسف وارجع لجدي مافارگته

هو طلع من الجلطة بس بقى تحت المراقبة ...

رجعت للبيت شفت رسل شايلة يوسف هو بس شافني فرفح عليه شون يعرفني ، اخذته بوسته بس مستعجلة اريد اخذ لجدي هدوم بس لاحظت الديوان يمه كومة شحاطات رجالية

اجت عمة امل كالت بهمس اريد اكولج على موضوع

كتلها خير خير شكو شصاير اول مادخلت شفت كومة شحاطات يم الديوان شصاير ؟

‏

‏ كولي كالت هاا

‏

‏كتلها فضيها يمعوده تكسي ينتظرني بالباب

‏

قربت يمي وشاورتني

‏كالت حامد لام عمامه كلهم ويريد ياخذ المشيخه اله

‏

‏ كتلها بصدمة شنو ؟؟

‏

‏ كالت والله وبس انتي تكدرين تحليها ترة عمي اذا سمع يصير بي شي

‏

‏رحت كبل للديوان حافية واني من جيت من المستشفى جنت لابسه صايه وشال

‏

‏وكفت افكر باوعت لروحي

‏فكرت شون اوقف حامد وهو جدي طلع من الجلطه واذا يدري شيصير بيه يروح بيها ، حامد سبب جلطة جدي ومايستاهل يصير شيخ

‏

‏ فكرت بحجابي واني عادي همه كولهم عمامي وشايفين شعري بس جدي يكول المره الي تشمر حجابها بطلب زحمه من احد يردها

‏

‏دخلت والكه الديوان بيهم ولد عم جدي وولدهم ملضوم ناس واطب و كتلهم من قلة الخيل شدوا ع الجلاب سروج وذبيت شالي بنص الديوان

‏

‏ جان الكل صاح ابشري ويذبون عليه بعبي مال زلم

‏ووياهم فيصل ياااايابابه ....

بس اني ما انتبهت عليه كولش وبعدني جاي اكول شلون تسووها وجدي بعده عايش

اجه فيصل و خله عباه على راسي وايده على حلكي وطلعني من الديوان

وجان يحجي بتهديد كالي حسابج بعدين

بقيت معاندة وكاعدة يم الباب وعلى راسي عباه مال زلم

دخل فيصل وفض اللمه ، وكلها انسحبت وعمو حامد طلع يتوعد وتعارك وي فيصل

واني كاعدة بباب الديوان خايفة مدري شبيه وراها سمعتهم يكولون فيصل اتخربط شفته لازم قلبه وشكله تعبان خفت من حامد طبيت وياهم بالسيارة ورحت للمستشفى

رحت وياهم واني على راسي عباه زلمه شثگلها ولابسه شحاطه رجاليه تك وتك وصعدت وياهم

چيكوه بالمستشفى الضغط الصاعد نازل والنازل صاعد

ظليت ابجي عليه مدري على روحي مدري على حظي ..

ولد عمه ويانا واني خايفه منه وعود لامه نفسي بالعبايه ومغطية نفسي زين حتى مايحجي هو

جنت مختنكه واصب عرك بس اخاف منه واكفة على راسه يم سرير المستشفى

هو فتح عيونه كتله الحمدلله والشكر وامسح بعيوني جان يكول بت الكلب تردين تموتني شون هيج تسوين؟؟؟

كبل نفضت نفسي شفته مابي شي كتله لعد شلون حامد تخلوا شيخ وجدي عايش

‏

‏ كال منو يخلي وثانيا عبالنا عازمنا لسلامة ابو سلام

‏

‏كتله انت موجود وياهم يعني قابل مووو ؟؟

‏

‏ كال شون اقبل هاي عملتج ماانساها بسيطه اني علمج

‏

‏ كتله شتسوي مثلا كتل كتلتني وزواج زوجت عليه بعد شنو هاا وشمرتني اني وابني يعني بعد شنو تسووي شنوو

‏

‏صاح بصووت عالي طلعوها راح تجلطني ...

يخاف على روحه عشتو و وو

‏

‏طب احمد شافني تفاجئ كال هاي شنو شلابسه

‏

‏ كتله بدويه

صااح فيصل ولك احمد طلعها منانه طلعهااااا

‏

... انداريت على فيصل

‏ كتله تامر ياطويل العمر رايحه لجدي

‏درت ظهري امشي وعباية الزلمة على راسي

‏ كام يضحك التفتت عليه شفته يهز بايده ...

رجعت لجدي لكيته كاعد كال وين جنتي؟؟

كتله بتوتر هاا والله جدي استغفر الله استغفر الله جنت بالحمام

‏

‏عكد حواجبه ويحجي بتعب

‏ وليش لابسه عباه مال زلم؟؟؟

‏

‏ كتله هاا برد برد بردانه

‏

‏فتح عيونه على اوسعها كال الدينا تموت حر وينه البرد درة شكوو بووية

‏

‏ كال وليد من الخوف بردانه مسويه مصيبه اكبر من راسها

كتله اني. سويت نفسي فقيرة

‏

‏ كال وليد خطيه المشكلة تجيج كوه

‏

‏ظليت اغمز اله عاد سكت

‏

‏ جدي خطية يباوع عليه ويباوع عليه

‏

‏كال شكو؟؟

‏

‏ كتله ماكو شي

‏

‏ سألني ونعالج ؟؟

‏

‏كتله نباك بالمستشفى

‏

‏ كال وذني منين اللابستهن

‏

‏وليد كله الزلم انقهروا عليها وانطوها كل واحد تك

‏

‏كال اثنينكم جذابين

‏

‏كتله جدي ظل هنا هسه اجي

‏

‏كال قابل وين اروح وين اولي

‏

‏ضحكت بوجهه اخفي توتري

‏

‏طلعت و كوه امشي بالشحاطه واني قياس رجلي 38

‏ ورجلي طالعه ليكدام والشحاطه ثگيلة

‏ فارغه من ورا ...

رحت للغرفة الي بيها فيصل مديت راسي من البردة الفاصلة بينه وبين بقية المرضى

كتله فيصل كال شكو رجعتي ولج شكو تفترين هيج بالمستشفى ؟

‏

‏ كتله سوبرمان حلال المشاكل وكلت بگلبي عشتووو

‏

‏ كال شكو ؟؟

‏

‏جاوبته اريد شال وشحاطة

‏

‏ باوع على رجليه كام يضحك كال ماتستاهلين ام الطراكيع

‏

‏ كتله بليز هليب مي ( ارجوك ساعدني )

‏

‏هز راسه ماشي بس شكولج تسوين ؟؟؟

‏

‏جاوبته اي خوش

‏

‏ صاح احمد حضر السيارة دنروح للبيت

‏

‏جاوبته يااابيت اني ماروح للبيت مالتكم

‏

‏رد على الاقل علما يطلع جدج من المستشفى شنو انت مارايدة روحج وترجعين لبيت جدج ماتخافين من حامد لو البزون يحب خناگه

‏

‏حركت اكتافي بعدم معرفة ... هو كام وعدل نفسه

‏ماعرف ليش خفت منه من كام ، بداخلي عدم رغبة لحتى اروح وياه ....

‏

رحت وياهم بس افكر فيصل ليش دياخذني وياه

هو حامد يخاف منه ولا يفكر يأذيني أبد وفيصل موجود !!!

تذكرت بالفترة الاخيرة صارت تساؤولات هوايه

ليش اني متروكة ببيت جدي وفيصل ميجي علينا !!

حتى سمعت هواي كلام ، مرة من المرات تهموني انو الطفل هذا مو ابن فيصل وهذا ابن زنا لذلك فيصل نكره

وشصار بيه بوقتها لعد جدي موزين منه صامد لهسه على الي ديصير بيه شنو يريد يتحمل !!

رحت وياهم للبيت جان دنيا الصبح والكل نايمين

وكفت واحمد فات جوه وكفت يم البيت واباوع لكل اركانه

اتخيل ابني يمشي ويلعب هنا وهناك حديقتي الاحبها

وبذيج الزاوية اكعد واشرب استكان الجاي المهيل الاحبه

بس اني منفية ....

التفت عليه فيصل وشكله تعبان يمشي ببطئ

كال تعاي

‏

‏جاوبته ابدل ملابسي وارجع يم جدي للمستشفى

‏

‏رد ارتاحي شنوو انت المصيبة الي سويتيها اليوم كلها وبعدج واكفة على طولج ولج انت شنووو

‏

‏كتله فيصل افتحلي غرفتي ، , ءءءء اقصد غرفتك اخذ ملابس وارجع لجدي

‏

‏كال ووراها وين ترحين ؟

‏

‏لبيت جدي

‏

‏متخافين من حامد انت ؟

‏

‏جاوبته لاااا

‏

‏رفع تك حاجبه لو منج اخاف على الي سويتي اليوم

‏

‏وراح كعد عالمصطبة بالحديقة ... تعب من الوكفة واصلا هو مريض

‏

‏اني صفنت يعني انت شنوو ماتحميني منه بعد ؟

رد لا تستاهلين كل الي يصير بيج ولج عمج تشبهينه بالجلب وحامد خبل وينخاف منه لو منج حتى ابنج لازم تخافين عليه مو مأمنته يمه

خفت كلش من كلامه خليت ايدي على شفتي ابدل واروح

يمه يله فيصل افتخلي الغرفة ..

كام بهدوء واشرلي على الباب فتت جوه هدوء ماكو صوت

يمكن نايمين ... صفية نايمة للظهاري ولا فكرت تجي تزور ابوهه مريض بالمستشفى ..

‏

صعدت للغرفة هو قافلها فتحها بالقفل ودخلت ‏اني

وكف بالباب كال اعوفج براحتج ترتاحين وتبدلين ملابسج

هزيت راسي

غمرني الحنين هنا والذكريات وريحة الغرفة تغلغلت باعماقي وحركت بيه مشاعر جياشة ، اشتاقيت وحنيت لايامي ... اووف فيصل اووف

لو اعرف ليش هيج تسوي بيه

دخلت للحمام سبحت وطلعت رفعت شعري بسرعة

ولبست صاية وشال

لشويه طب هو مبتسم ..

وكفت كبالي كال بتوسل تعاي يمي

ادنيت يمه كتله شتريد؟؟

كال اريدج ظليت احك براسي ...

‏ كتله ماافيدك اني امراه مرضعةة

‏

‏ضحك كال واذا مرضعة

‏

‏ كتله انت تريد وحده خاليه مختليه بس اللك

‏

‏ كال وانتي؟

‏

‏ اني اهز براسي بمعنى لا

‏

‏ كال ذبي العباية

جاوبته شعري مبلل مامشطته وابني وجدي ينتظروني ماريد اتأخر عليهم ...

كال و اني مالي دقايق من وقتج ؟

جاوبت وهو يقترب مني ، لا ولا دقيقة ولا حتى ثانية

مد ايده على شعري وفتحه

كتله عووفه هوسه ومبلل وممشط

كال اموت عليه هوسه

كتله مو هسه جنت موزين ولتزم گلبك ودتموت

كال لا طبت

ابتعدت عنه كتله الحمدلله همزين

تقرب مني لازمني وحكم قبضته عليه حاولت اتملص منه

‏شدد قبضته ، بقووة ولاعبالك هسه متخربط واجه ينجلط

‏

‏ غمض عيونه وتقرب يشتم انفاسي دفعته حيييل

‏توترت كلش

‏

ظل صافن عليه ويباوع لكل تفاصيلي بهيام كتله احم احم شوكت طلقني

‏

‏ كال طلعي بره بسرعة لاتجلطيني .....

يتبع

ان شاءالله باجر اعوضكم وعد مني صار عندي ظرف 🥺وانتوا اكيد تعذروني لان محد مايصير عنده ظرف ويقصر بحق شغله او واجباته صح ؟

هسه تكولون مو مكتوبة القصة ؟ خلال شهر يله كدرت اكتب اول تلث بارتات وواحد انحذف ++ انو البطلة الله يسامحها كاتبتلي الاحداث مخربطة من كل حقبة من حياتها مشهد وترجع تكتب لغير حقبة وتكمل الي قبلها يعني هوسة هوسة وحاليا هي ممتواجدة وياي مختفية والمحادثة قديمة كلش من 2019 يعني كوة جاي اسحب الاحداث وبيها كومة رسايل بحيث صايرة ثگيلة كلش كوة جاي اصيغ وارتب حيل تعبتني هالقصة لان ممرتبة أحداثها بحيث اصفن شوون ارتبها ++ شخصية فيصل المزعجة

ان شاءالله مااطولها عليكم واختمها بس انتوا انطوني مجال واصبروا عليه ☹️

من اتاخر وماانزل مو معناهه كاضيتها سختة ومتعمدة ومهملة لاابد والله البارحة نمت على التليفون وانا جاي اكتب البارت حييل مشغولة

واليوم طلعت من الصبح عندي شغلة صارتلي ورجعت طلعت العصر ورجعت بالليل حيل حيل مشغولة بس والله بالي يم القصة واريد اكملها باسرع وقت مااريد اطولها عليكم ...

شكرا لكل المتفهمين ....

السلام عليكم

طوفان رجل

فصل 41

غلسوا ع الاخطاء بارت قابل للتعديل كتبته بتك عين

في يوم ما ستجيء بخريطة عالمك ستنظر إليها بتمعن باحثا عني في ارجاءها ، لكنك لن تلمح طيفي لن تسمع صوتي الذي ملئته اهات وحسرات ، ستشتاق لنظراتي بعيونٍ قريرات

لن تراني لن تجدني سأكون قد ابتعدت عنك

‏وبيني وبينك الف الف شارع

‏و الف الف مدينة

‏

لن أكون ملكك

لن أكون عبدتك

لن تكن قد استعبدتني ...

سأبعد عنك ، سأهرب منك ..

سأتخذ القرار بالهروب ...

سأفك قيودي واكسر اغلالي

وأنجو من سطوتك

حينها اؤكد لك

بأنك ستندب حظك صباحاً ومساءاً ....

ستعيش في جحيم خسارتي ...

قل وداعا لمن كانت تعيش لك وتموت من اجلك

خسرتها والىٰ الأبد ..

بقلمي، ،،،

ضحكت ورحت كعدت على السرير ، خليت رجل على رجل والله صدگ افضل انتقام منه هو اجلطه بسوالفي يتدلل ابو النسوان ....

مسح علئ شواربه ولحيته وطلع من الغرفة ً ، رحت للتليفون خابرت علئ بيت جدي بالي يم يوسف والله عمو حامد مخبل كل شي يسوي بس هم يخاف من من فيصل وما يسويها ويأذي ابني

اني جدي خط احمر بكل شي لدرجة نسيت نفسي وحتى ابني

ظليت افكر بس فيصل حتئ شامرني وشامر ابنه وتملص من المسؤولية كلها وجدي مريض منو يحميني ويحمي ابني اني!!

كلش انقهرت وانشغل بالي عليه اكثر دكيت الرقم طلعتلي رسل سألتها على يوسف

كالت اجو اخذوه

لطمت خدي ولج منوو اخذه

ردت هذا الي يكرص بخدودي واخته

ضحكت تقصد احمد ورزان حمدت الله وشكرته هذا اكيد فيصل كايللهم يجيبوه

ياربي شنوو هالدوامة الي اني بيها ادور ادور وتلف بيه الدنيا والكئ نفسي دخيلة وطالبة الامان ببيت فيصل هسه شسووي اني! !

نزلت ادور علئ فيصل ، صارت عمتي بوجهي توهه كاعدة من النوم تبتسمت من شافتني

كالت شجابج

كتلها اجيت

ردت ها شعجب عبالي ماترجعين بعد وفيصل مرتاح وي سلوى البنية حلوة ومامنها قصور ومدللته

ضحكت بس گلبي احسه تجرررح وصار يوجعني

كتلها بالعافية عليه يستاهل يتدلل

مشيت وعفتها عضيت شفتي حيل وغمضت عيوني مقهورة حييل

شفته بالمكتب دخلت عليه

كتله انت دزيت على يوسف؟

كال لاء خابر عمج حسن واحمد رد عليه

كال الولد حرارته مرتفعة وحامد جان جنونه صاير مسعور وحسن يريد يروح للمستشفى لابو سلام وحامد كل شي يطلع منه

رفعت حاجبي شعجب حامد بالعادة يخاف منك

رفع اكتافه ويباوع للورق الي كدامه

ما اعرف ليش هيج يسوي مااعرف ويبين عدم اهتمامه بيوسف، ليش هيج يعاقبني شوكت يخلص من عقده شوكت يخلص من مرضه شووكت يتشافى شنو هالوگعة الي وكعتها اني

كعدت بالحديقة بالي يم يوسف ياربي هملته هواي واللتهيت بالمستشفى وي جدي اثنينهم اغلى من روحي ربي لا تحرمني منهم ولا تأذيني بيهم

شفت سيارة وصلت وطبت للگراج كمت امشي باتجاهها، نزلت منها رزان واحمد جان يسوق

رزان بيدها يوسف اخذته منها وتحسست حرارته، بوستها وكتلها ليش مكلتي راح تجيبون يوسف

كالت غير سحلوني من الفراش وجيتج للغرفة سمعت صوت الدوش بالحمام صحت درة درة ماسمعتيني

هزيت راسي واسمعها تتثاوب ظليت ابوس بي وحرارته زينة مابي شي اجه يوكف كلبي عليه وحسيت بتأنيب الضمير ! ! اني اهم مهملة ومااستاهل يوسف بس جدي عندي غالي عليه

اخذته وتوجهت للغرفة صارت مقابيلي سلوى هي شافتني وظلت تعدل بشعفتها

كالت اشو رجعتي

صارت بوجهه رزان وانت شعليج بيتها هذا هي الاصل

‏

‏جان تعيط بوجهه انت حسابج عند فيصل لساانج شطوله

‏

‏قربت من سلوئ كتلها شوفي حبيبتي مثل مكالت رزان بيتي هذا وشوكت مااريد ارجعله ارجع وشوكت مااطلع هم اطلع انت مايخصج ولتسألين

‏

‏راحت كعدت عالقنفة وظهرها منتصب كالت خليها ابالج فيصل يحبني ويريدني

‏

‏ضحكت بسخرية

‏

‏رزان جاوبتها حبيبتي لا تعيشين الدور انت حالج حال الي قبلج واظن تعرفين شنو اقصد

هي خلت رجل على رجل وكالت لا عيني باجيتي صفية وفتونة كالن ولا وحدة طولت بكدي ويا فوفايتي ووهو مايجمع بين اثنين ابد هاي اول مرة يعني اني استثناء

تحجي وتشر على روحها

شكد رخيصة خليت وصعدت للغرفة فوك اني اعلمج يا سلوئ البلوئ الا اجزعج اخليج تكرهين روحج

بقيت يمهم بس بالي يم جدي وفيصل ماله علاقة لابيه ولا بأبني، واني بس يطلع جدي ارجع

بقيت علئ تواصل ويه عمة امل تبلغني عن حالة جدي ،،،، او تصدف عمو حسن يجي واخابر ويرد عليه وكالوا زين بس تحت المراقبة

مابقيت حابسة روحي، جنت انزل واخذ ابني وياي وابن عمار يشوفه طفل مثله يجي يحاجي وهو يوسف هستوة يضحك ويناغي

‏

كاعدين ‏ هشام كال درة تعرفين ليلى العطار تشبهج

اني ابتسمت

فيصل باوعلي ثواني ودرت وجهي منه

هو كال صحيح بس انت عيونج مجروره

‏

‏فاتن كالت شدعوة مو لهدرجه على كيفكم

‏

‏ عمار الظاهر جان يريد يغثها

‏ كالها والله يحجي ضميره درة احلى بعد منها

‏ هي شاطت وكرصت ابنها خلت يبجي

‏

‏ احمد كال الصمت في حرم الجمال جمال درة بعد جمالها روسي

‏

‏سلوى حجت كالت اي بس الجمال بشنو فادها خطيه (قصدها عود تزوج عليج )

‏

‏باوعت اريد اردها شفتها تاشر على ركبها بيها ازرق ( اني شنو صار بيه اذكرت من جان ركبتي يترسها زراك واحجي عليه اكوله عيب استحي من الولد يكولي راحتي اهنا بعدين شنو هالركبه الي وهالنوعمه غير اختمها خوما اعوفها اني اضحك )

‏

‏ اني كبل من شفت ركبتها باوعت عليه فهم الموضوع وجنت اكوله بعيوني يعني شجنت تسوي وياي تسوي وياها

‏

‏شكد صعبة من العين تنترس دمع وحاصرتها حتى ماتوكع وعمتي تباوع تضحك بشماتة

‏

القهرة الي بيه والغصه والحركه يابه تموت حتى هو حسيته تفاجا من شافني هيج بس عيوني ماشلتهم منه اريد اكرها اي اريد اكرها بوكتها حتى اقسي قلبي مايحن اله لو اسامحه وارجع واكول حياتي وياه مؤقتة مو اليوم باجر اروح واخلص منه، ،،

بعدها اجت بيبية فيصل الي هي بيبي زهرة

اجت زيارة عدنا فيصل كولش يحبها واني هم احبها

من شفتها كمت اصيح هلا بيبي هلا دنكت عليها بوستها

‏والولد اللتموا عليها بيبيتهم يحبوها

‏

‏ خلولها جربايه بالهول الداخلي لان هي وعمتي وحده ماتحب الثانية

‏

فيصل شكد توسل علمود تعيش يمنا ماتقبل فتجي زيارات بين فتره وفترة

كعدت يمها جان تكول صلووات يوسف كبران وحليان

كتلها اي بيبي بس فيصل اتزوج عليه

‏

‏كال يااا صدك

‏

‏هو كاعد هز راسه كالتله ليش جا درة احلى من هاي شنهو اسمها كالتلها بتنعوص اسمي سلوى بيبي

‏

باوعت عليه كالت تعاي احبنج عبن صبرتي على فيصل وماعفتي وجبتي ولد منه

‏

‏ كتلها مو بكيفي غصب عني والله يا بيبي تدرين حامد متحلفلي ومحد يوكف بوجهه واني كووة عليه باقية هنا

‏

‏ جان تضربني على راسي كالت دهر صابج ليش فيصل مو حلو وكوة عليج

‏

‏ كتلها لع موو حلوو ابو نسوان واني اريد زلمه بس الي وحدي

‏

‏كالت حكج جاا انت فيصل ليش عرست عليها هاي ام العطوب نعاله حتى اسمها الله كالبه

‏

‏شهكت هديل والولد طگوا ضحك، خو رزان سكررت من الضحك

‏

‏فيصل باوع عليه ظل يهز براسه كالها اسمها سلوى مو نعال بيبي

‏

‏ كالت وشنهو الفرغ نعال يعني نعال شوف درة جنها حلغوم

‏

‏باوعت عليها كتلها بس حلغوم

‏

‏كالت وكيمر وركبتها من تشرب الماي يبين هاي مهرتك موش نعاله

‏

‏كاللها اكول درة على منو طالع لسانها

‏

‏ هزيت بحواجبي اصعدهم وانزلهم كتلها بيبي مادامج هيج راح ازوجج لجدي شتكولين

‏

‏جان تكول ياع موش انا اكبر منه

‏

‏ كتلها مايهم اهم شي الحب

‏

‏ كالت الحب مو مذله الحب هو ورده

‏

كتلها بيبي يعني اني حلووه

ردت يااع انتي بعد درة كل السلف يحجي بحلاتج وانتي بت الانكليزيه

كتلها اي اي كتلها خلينني اسبحج

كالت لا وديني للحمام كمت اغنيلها اسبحنج اسبحنج يايابه اجا احمد كام يغني ويايه احبهنه احبهنه يايابه وحك عيناك يايابه واني اكوله تذبحوني يابه تموتوني يابه اصيح بصوت احبهنه

‏

‏هشام ورزان ماتوا من الضحك حتى هي حبوبه وفيصل يهز براسه ويضحك وعمتي كابه سوادينها تضوج من بيبي زهرة

‏

بعدها سبحتها ومشطت الها وخطيه هي تدعيلي الله يسعدني

رجعتها جوة بالصالة كعدنا كلنا

كالت انتي احسن من نعاله لا تضوجين

‏

‏ كاللها فيصل دشوفي شلابسه

‏

‏ اني لابسه ثوب بنفسجي كشمير بي طوبات بيضه وقصير جوه الركبه ونص ردن ولابسه جواريب ازرق واصفر احب اغثه باللبس ناويه اجلطه لان ادري بي يحب الترتيب وينغث من يشوف هوسه وشي ممتناسق

كتله وانت ليش تركز وياي شلابسة ملابسة انت وي سلوتك خوش تكشخ

سلوئ حضنت اديه وخلت راسها على جتفه اي حبيبي وعيونها عليه، سحب ايده وكتف اديه اثنينهم

جبت خس من المطبخ و كعدت اكل خس وكاعده يم بيبي اجت فاتن كاعده من النوم سلمت على بيبي كالت الها ياهو هايه

كالت اني فاتن زوجة عمار

‏

بيبي طلت بوجهي و ‏كالت منهو هاي

كتلها فتنه تخرب بين الناس

فاتن كالت بزعل شوف فيصل

درت وجهي كالت بيبي شنهو

كتلها بيبي يعني تفتن بين الوادم

احجي واكل بالخس

كالت فاتن بعصبية انت شنوو ناوية عالشر اليوم

فيصل كال اسمها بتحذير فااتن

‏وخزرها سكتت وطلعت

‏

‏واني شبعت وغسلت نعست كتلها بيبي راح انام فوك راح اصعد اخذج ويايه

‏

‏ كالت ياه وحيدج فيصل ماينام يمج

‏

‏ كالت سلوى لابيبي اليوم عدنه سهرة اني ويااه

‏

‏ خزرها اندارات بيبي كالت خل تولي لاتنغهرين

‏

‏ كتلها عليمن بيبي تعاي نامي يمي فوك صعدناها اني واحمد فوك و طفينا الاضويه ونمت يمها

‏

‏

نزلت نمت بالكاع بيبي نامت على السرير وظليت اتلقب وافكر هسه نايم يمها حاضنته حاضنها كل شويه فكرة شكل

للساعو تقريبا ب2 حسيته يمي هو رفع الغطا ومدد بصفي سويت نفسي نايمه ( اني مشتاقه اله كولش وردت اشوف شنو يسوي )

باس راسي كال ادري بيج كاعده الاعتذار مايفيد بعد بس زواجي من سلوى غلطة الشاطر بالف دمرت نفسي بنزوه وردت مااتعلق بيج زايد عبالي اكدر اسيطر طلعت غلطان كولش

اني نايمه على ايده كتله لعد والطفل؟

‏

‏ كال اني مااريده بلكي يموت يختنك مااريد طفل اني ماااريد

‏

‏ كمت كبل كتله اطلع بره مااريد اشوف وجهك تسمع اكرهك دمرت حياتي كوم

‏

‏ كال بعصبية وصوت عالي شبيج

‏

‏ كتله مخبله كوم اطلع كوووم

‏

‏ بيبي كعدت من النوم كالت شكو شبيكم

‏

‏كام طلع وركع الباب وكعد يوسف يبجي، رحت اخذته واني ابحي

‏

‏ بيبي كالت يالعوبه جاي يصالح

‏

‏ كتلها بيبي خليها سكته خليني بضيمي وابجي مانمت للصبح ومقهورة حيل، ،،،

علتي بكبر بغداد ان حجيتها شاعت بالبلاد وان سكتت حرمتني الزاد

وصلت مرحله تعديت اكدر اضحك والهم تارس قلبي عباله مااهتم لا والله من افكر بكلامه انطحن طحن

يدعي على طفلنا ليش حتى يظل بنزاوته او خاف يظل مربوط بيه علمود الطفل يريد يظل يبدل النسوان مثل نعاله

سخرية القدر ختلتني كدامه والي ماعنده حظ من جابته امه ينعدل حظه من تالي

بس لا والله ابني اعيشه احسن عيشه حتى لو هو مايريده انعل ابو الرجال لابو حتى الدنيا

يوم ثاني بقيت بس ساكتة وقررت اخلي يوسف يم بيبي زهرة واروح لجدي طاك كلبي عليه

كعدنا على الغدة وهو مقابيلي جانت عيونه بيها كلام هوايه حتى اني نسيت العالم والدنيا اباوعله بحقد والومة واعاتبه كلها بنفس اللحظة

انتبهت عليه ولا اكل ابد ويصفن بوجهي بعدين كام

‏يغسل

‏

‏واحنا رجعنا بالهول الداخلي نشرب جاي بيبي عود كدامهم تنصحني معليج بيهم انتي العاقله

‏

‏كتلها بيبي لعد منو الذب ضرته بالبلوعه وهي تمسح ( هي ذبت ضرتها بالبلوعه من غيرتها شافت زوجها صافن عليها من تمسح وخطيه كوه طلعوها منها )

‏

‏ كالتلي دهر فرجج ياهو كلج

‏

‏كتلها بيبي التاريخ كله يمي و همه بس يضحكون

‏

‏

‏ كالت تعاي اكلج

‏

‏كتلها هاا بيبي

‏

‏اخذتني شاورتني كالت الليلة نامي وحيدج

‏ حتى يجي يصالح يمغسوله

‏

‏ كتلها ماا معليج واذا مابيج تصعدين يمي انام بالكاع هنا ظلت تفر بحلكها مااعاجبها حجي دمغتني كالت ميلي عندي دوختيني

ضحكت وكمت من يمها، لزمتني صفية

كالت شعدجن تبسسبن ولج جاي تتأمرين عليه موو ??

كتلها عمة هوو منوو يمج

كالت ولج ما كفاج الي سويتي بعمج حامد شكد صلفة انت

كتلها وانت من صنف عمو حامد تردون تورثون جدي وهو عايش لا والله تحلموون

اجا فيصل من الدوام اعصاب اليوم اني قللت استفزاز وكعدت وسكتت، كابلت ابني وبيبي

‏

‏بالليل اجااه اتصال سداه بسررعة ويصيح

‏عمااار احمد امشي المخازن محتركه

‏

‏ كلها ركضت الولد والحرس اخذوا اسلحه وراحوا واحنه بس بجي وصراخ

‏ورا شويه صار رمي قوي يم باب بيتنا الداخلي

‏

يتبع، ،،

اذا اكو اخطاء او عدم ترابط نبهوني اعدله لان القصة مخربطة عندي

والمشهد الاول جان بي اخطاء سويتله تعديل لان ماجنت اعرف الشخصيات بالبداية ولا الحقبة الزمنية هي جانت تنطيني من كل حقبة مشهد ووقع اختياري علئ مشهد الرمي وصغته بطريقتي لذلك طلع بي اخطاء بالشخصيات والوقت مالته اما كمشهد فهو حقيقي الخلل فقط بالشخصيات وعدلتها

🥺🥹

السلام عليكم

رواية طوفان رجل

الفصل 42

نورا ناصر

كل يوم أعيد تكوين نفسي من جديد وهذه إحدى أنواع قوتي.

،flash back,

تفاجئت بجية جدي لبيت فيصل وبنفس الوقت فرحت حيل مو يومين مفارگته عبالك دهر

ركضت ابوس بي واحضنه وهو سودة عليه تعبان ووياه عمو حسن ووليد

تقدمت عمه صفية تسلم عليه ببرود يابه حمدلله علئ السلامة اعذرني ماجيتك ملتهية

هو جدي مجان يشوف احد غيري رد عليها ببرود ورحنه كعدنا بالصالة

جدي جان كاعد يمي ظل لليل فيصل جان كاعد كبالنه اني جنت اسولف ويه جدي واستمع اله واتمعن بملامحة واتنفس حبي اله

هو باوع الفيصل وكال .. باعي شلون عيونه مزرزه علينه يريد ياكلنه بدل دنان بعنبوري ههه ( دنان يقصد السواد الموجود بالتمن العنبر والعنبوري هو التمن الاصلي ) يقصد دنان سلوى واني العنبر

ضحكت على كلامه بصوت ولزمت ايده وبستها هزيت راسي على كلامة كتله .. انت الوحيد الي تغير مزاجي

كال جدي … گومي گومي ما اريده يباوع علينه خلينه نروح بالحديقه خليني احجي وياج وافهمج

وكفته على حيله وانطيته عوجيته وخلينه ورحنه تحت نظرات فيصل المتعصبه بس طبه مرض عسا يموت بحركتة

كعدنه بالحديقه وجدي يكولي .. شوفي يدرتي انه صح غلطت وكلبي يوجعني عليج انه ما اعرف شلون صار هيج وما جنت اعتقد بيوم من الايام فيصل يتزوج عليج جنت اكول يجوز معجبنه نسوانه بس دره تعجب وصغيره والف واحد يتمناها

هسه احنه صح غلطنه يجدي بس احنه لازم نلعبها صح وبهذا الوكت القوي ياكل الرجيج وفيصل قوي واحنه ما النه الا الله

انه يجدي راح اعتمد عليج يكولون كيد النسوان عظيم اريدج هالمره تستخدمين كيدج وياه وعوفي النوح واللطم على صفحة ترا اذا يشوفج ضعيفه يتلذذ بضعفج اكثر وينجلب زياده

تنهدت مقهوره على حالي .. زين شسوي احجيلي حتى كيدي العظيم ما اعرف شلون استخدمو ويه هذا المخبل

جاوبني .. شوفي يجدي احنه ما نريد نطلع من المونه من دون حمص لازم نحصل على حمصاتنه ودام هيج السالفه وابو طبع لازك بطبعه لازم احنه ناخذ حقوقنه وتالي نرفس فيصل الف رفسه شكلتي

كعدت بحماس وصفكت .. اييي بس شلون

رد عليه .. يوسف ابنج هو الوحيد الي ربحتي من معركتج ويه فيصل بس شني طلعتي بيه بكماطه واحنه ما نريد هيج

عقدت حواجبي .. لعد شنريد

تنهد وهو يضرب عوجيته ويحفرها بالارض كال .. لازم يوسف يتسجل باسمة وياخذ كل حقوقه باجر ابنج يظل تايه المالك تعرفين شني تايه المالك يعني لا من ابو ولا من عشيرته و الولد لازم يتسجل باسم ابو صح هو مو عزوه بس ميخالف عنده املاك وحلال وهو هذا ما يخلف انتي غلطة وخلف منج افتهمتي

رديت عليه .. زين شلون اخلي يسجله باسمة وهو نكره وهاي مرة ابو تصيح ابن زنا وتلعب بعقله وتكله مو ابنك

جدي .. شوفي هذا فيصل استخدمي وياه اسلوب الترهيب والترغيب خلي ما يعرف شني سرج خلي دايخ بزمانه يوم متقبلته ويوم لا خلي يدوخ بيج

البسي واكشخي واصبغي واستفزي وكل شي سوي ثيري غيرته واكسبي واطلبي منه يسجل ابنه باسمة ومن تظمنين حق ابنج ذيج الساعه اتلفي على ساعة السودة العرفتج بيه

ضحكت بصوت عالي…. هههههههههههه عزا جدي موتتني ضحك

تنهد وهو يكول .. جا جدي شنسوي ما النه غير هالوسيلة واذا كلش كلش ما جبتي نتيجة كليله راح نسجل الولد بس وليد وهو يتخبل من وليد بذيج الساعه يسجله باسمة وغصبا على شاربه وشارب الخلفه

وهااا باعي طلعي لسانج وطلعي وكاحتج تعاركي ويه مرته ام عطوب شعفتها جنها شعفة فزاعة وروحي تمسكني واشكي الفيصل حسسي هو سندج وهو رجالج وانتي بحاجته احنه المهم نكمل خطتنا خلي يفرفح عليج خوش يجدي

هزيت راسي

....

ظليت افكر بكلام جدي كلت ليش مستسلمة زايد شنو انتظر منه يوم الها ويوم الي لو شنو لو انتظر يعدل بينا

ضحكت من كل قلبي شوف سفاهة القدر من ننحط بهيج مكان ومتقيدين من كل الحوالينا

‏

‏  لا ويردوج تعيشين عادي وسعيده وتتقبلين الواقع بحلوه وبمره صح اني احبه بس عندي قابلية ادوس قلبي واعيش

‏

‏ بس الي مقيدني جدي لو ما هو واكف ويايه اني جان اموري هوايه تغيرت جدي مايقبل اطلع من اطار العادات والتقاليد والناس وجان  يشوفه مناسب الي من كل الجهات

فعلا اجا ثاني يوم وكلت الا اگص  شعري عناد بي والله الا افرفح گلبه مثل ماكال جدي

ورحنا للصالون اني وفاتن وسلوى ، مو حبا بيهن رحت بس لان فيصل ميقبل اروح وحدي،  كلت يله شعليه منهن

اهم شي اسوي نيولوك

كصيت شبرين منه صار شويه للظهر بعد ماجان مغطي الورك

(جدي جان يجيب الزيوت اشكال وسوده عليه يكولي خاف تكولين ماعندي ام تهتم بشعري هذا زيت جابوا من سوريا تخلي لشعرج

‏

‏ومن تزوجت فيصل هم بقى يدزلي وماكطع مني

‏

بعد مكصيت شعري رحت حفيت وسويت تنظيف بشره ورسمت عيوني

طبعا خليتهم يخلصن واني اخر شي يعني المغرب يالله  خلصت وقبلي سلوى  صبغت اصفر  وشعرها عبالك محترگ من الاوكسجين

‏

‏من رجعنا صعدت اشوف يوسف بقى يم بيبي ورزان

‏شافتني بيبي ورزان بيبي كالت اليوم فيصل عيده اليوم بس حريمة يايمة شعرج لوين جان

‏

‏كتلها بيبي مو هيج احلى،  بشرفج رزان مو اريح هم ارتاح من تمشيطه متعب حييل يوسف ماخذ كل وقتي

كالت بيبي زهرة جدج وانت زغيرة يحطه ويمشطه الج مابيج تمشطين خلي رزين تمشطه الج ابو النسوان فيصل شكو بيها

ضحكت بصوت عالي وكلت خلي رزان تمشط شعفتهه اول شي

وغمزت لرزان

هي عكدت حواجبها

وبيبي جرتها من شعرها علئ كيف

كالتلها ولج ليش ما تمشطين ليش تتعاجزين من هسه متعاجزة لو تزوجتي شلون وصارت عندج بنية منو يمشطها هاي كله صوج امج ماعلمتج

كالت وهي تسحب شعرها من بيبي اووي بيبي عود منا لذاك اليوم الله كريم

عفت يوسف يمهم ونزلت

‏

‏ لكيت سلوى واكفه يم فيصل  هسه جاي تكوله شنو رايك  بشعري

‏

‏هو يكلها بملل حلو حلوو

‏

‏ واني طلعت شعري مشسور وراسمه عيوني بالكحل ولابسه دشاشه مارونيه قصيرة

‏

‏هو شافني   وجان يركبه جن تخبل

‏اجه يمي وكام ولزمني من شعري

‏

‏ كال بت الكلب كاصه شعرج مو؟

‏

‏ كتلج ماتگصي ماتگصي

‏يحجي ويعت بي

‏

‏ كتله على كيفك جاي يوجعني

‏

‏ كال لج كم مره كتلج لاتجيسين شعره منه كم مرررة

‏

‏يحجي ولازمني من شعري  واني لازمه ايده اوخره من شعري واصيح اااخ يمعود

‏

‏تقربت منه كتله عوفه خل احجي وياك وعصرت عيوني

‏بتوسل  هو رخا ايده كلت بكلبي الله يستر

وخر مني واني عيني على سلوى جانت مبتسمة وشمتانة

كال فيصل شكووو ??

ركضت للدرج مااكو شي وصعدت للغرفة ....

بيبي ورزان ماكو ويوسف بسريره نايم

بالغرفه مالتي ظليت اروح واجي وافرك باديه شلون شسوي اني لازم اخبل سليوه عليه هو اصلا ما يحبها وماخذها تسليه وصار لازم يخلص وقت التسليه وكذلك لازم اخليها تنگ عليه وهو  يكره الملحة والتقييد والغيره الزايده

ركضت بسرعه للميز ابو التواليت طوخت المكياج وعدلت شعري وبدلت كلبيتي وطلعت برا شفت فيصل كاعد بالصاله يشرب جاي وسلوى تفتر عليه بكلبيتها البارزه مفاتنها

كعدت قريب منه وهمست اله .. فيصل ممكن تجي عندي بالغرفه عندي موضوع وياك على انفراد

قلص عيونه يبارعلي

ابتسمت بتوتر ورديت عليه..ترئ صدك عندي موضوع وياك موجذب

كال ياموضوع

يعني موضوع انت من تجي تعرفه لا تخاف مراح اكلك ولا اسوي شي

ضحك باستهزاء وهو يكول … وشنو يعني شتسوين مثلا متسوين شي؟

وكف وعدل قميصه وهو يمشي كدامي باوعت السلوى ورفعت حاجب وهي جانت شايله صينية ضيافه بيها كعك وعصير

من شافتني انهارت وظلت تعضعض بشفايفها متعوده بيه

دخلت للغرفه وهو ويايه باوعتله بمكر وهو باوعلي غيرت نظرتي وابتسمت بوجهه بحب كتله .. تفضل اكعد

كعد وركز بنظراته عليه وينتظر شنو موضوعي

بللت شفايفي وحجيت بثقه .. فيصل كل شي اني متغاضيه عنه ونفتح للود ابواب عادي متقبله زواجاتك هاي انت هيج حياتك وهيج متعود يجوز مرض نفسي وتتخلص منه راح اصبر عليك

رد عليه بملامح باردة.. اني ما احب المره الي تنك ولا احب الي تكبر وتيبس راسها والانسان مو معصوم اذا غلط بس انتي ما وكفتي وياي ولا ساندتيني خليتني التجى الغيرج

حطيت ايدي على جتفه ببتسامة متوتره ..يجوز كلامك صح ويجوز اني غلطانه بس الي بعدني ضايجة منه هو الطفل يوسف طفل بريىء ما اله ذنب بلي صار كله

يعني انت عاجبك الوضع الطفل بدون جنسيه من دون اي حق ترا من ابسط حقوقه يتسجل باسمك وتعترف بيه ابنك كدام الكل وعناد بصبصب الي كل ما حجت وكالت ابن زنا

اني لو زانيا بيه انت رجولتك ترضاها عليه وتخليني عندك اشو لا المنطق ولا العقل يرضاها

فاني ما اريد بس اظمن ابسط حق من حقوق ابني واريده قريب مني بحضني انت عشت طفولة ماساوية لا تعيد الماساة ببنك وانت فاقد لهذا الشي انطي لابنك

نزل راسه وهو يكول … هو صح طفل ما اله ذنب لهذا السبب اني ما ردته بنولد بهيج ظروف ولا يجي لهيج دنيا كلها وحوش لان ما اله ذنب

كعدت يمه وحجيت بحماس واني اكول .. اييي يعني شنوو يعني احنه لازم نوكف للطفل ونوصله لبر الامان وندعمة بكل خطوه من خطوات حياته

وكفت ومشيت خطوات وجبت الشيشه مالت الشراب مالت يوسف واني ناويه اضرب عصفورين بحجر

اشرت اله من بعيد واني اكول .. تشوف هاي شنو هاي خافض حراره من يتمرض اشربها اله بعدها مليانه وجبت وحده جديده لان گلبي عنده وروحي وياه اجيبله احتياط ما اريد ابني يحس بنقص

مشيت خطوات متقصده بيها وعثرت نفسي بالزوليه الكدامي وكعت بيها وطرت لفيصل بخطه مدروسه مني

هو عاط بيه خايف عليه والشيشه جنت فاتحته ترسته دوه من صدره لركبته

وكف وهو ينكث بملابسه وهو شكد نظيف ويتخبل من هيج شغلات كال بغضب .. هاااي شسويتي انتي شبيج تخبلتي اوووف لا اله الا الله

رديت عليه واني امسح بيدي دشداشته وصدره .. يا عزا مو قصدي خرب رجلي التوت رجلي ما اعرف شصار بيه جدا اعتذر

نزع القميص بسرعه وشمره عليه كال .. اغسلي صرت كلي دبك

ضحكت .. هسه يلتم عليك الدود هههه

باوعلي بطرف عينه واني سحبته للحمام كتله .. ادخل ادخل اسبح لك عيني هاي شنو  الدوه تارسك ترس

دخل للحمام واني بسرعه حضرت ملابسه جانن عندي وكذلك انطيته منشفه  ضحكت بمكر واني مفتخره بنفسي

هو طلع من الحمام وبعدها طلع من الغرفه كلها واني بسرعه دخلت سبحت وطلعت لفيت الخاولي على راسي وطلعت من الغرفه

واشوف سلوى كاعده عبالك على جمر تطلع دخان عبالك تنين مدري شوكت تنقرض ونخلص منها

هجمت عليه بعنف كالت … انتي شكد متستحين شكد حقيره ورخيصه ماكو هيج وحده مثلج رحتي ركضتي اخذتي الرجال لغرفتج تتوسلين بيه حتى ينام وياج

ضحكت رديت عليها.. مو ارخص منج وانتي تدرين روحج مجرد تسليه يا تسليه

كملت كلامي … وبعدين واجب العدل مو هيج قابل هو بس الج وهاا ترى  كال غلطة الشاطر بالف وانتي غلطة يومين وتلكين نفسج باقرب حاويه

فتحت عيونها مصدومة.. شوكت كال

مشيت عنها وامشي بدلع .. من جنت بحضنه

ظلت تسب وتغلط وتفشر ما درت الها بال وهاي اول بدايات الخطط وان شاء الله ما يظلج وجود وانت يفيصل حسابك ليكدام اذا ما فلستك ما اطلع دره

ورا العشا نزلت ادور فيصل شفته كاعد ويمه سلوى  دفعتها اريد   اكومها من يمه متقبل

‏

‏ هو بس يباوع عليه كتلها ادني

‏

‏ كالت ما

‏

‏ كتلها اهووو بس احجي وياه هو دفعها بيده ( هو يحب هاي الفقره من اكعد يمه واشاوره لو احجي وياه )

‏

‏ كلها وخري خلدنشوف شتريد

‏

‏كتله شنو شو ماعاجبك

‏

‏ كال العفو يابه تفضلي بس فضينا

‏

‏كتله هااا والله الااخابر جدي واكوله اريد تين وفيصل  مايجيبلي حتى يكول عليك بخيل الا اخزيكم

‏

‏ كال اووكفي انتي شوكت كلتي على تين

‏

‏ كتله يبووه صار اكثر من كم يوم  واكتبه من يسوكون ومحد يجيبلي

‏

‏ كال لعمتي ليش محد يجيب تين

‏

‏كالتله هاا  والله ماادري

‏

‏ كتله هاي فاتن وسلوى

‏يمسحنا من القائمة

‏

‏ هن كبل كالن لاوالله

‏

‏كتلهم كالوا للحرامي احلف كال اجاني الفرج

‏كتله هسه معلينا اريد تين

‏

‏ كال سهله باجر يمج

‏

‏ كتله شنو واني اريده هسه لو اخابر جدي يجيبلي مايقصر يدز وليد لو مصطفى لو واحد من الولد وهسه كلهم يهبون

‏

‏ هو يفر بالسبحه ويباوع عليه وخزرني،  ركع السبحة بالطبلة بعصبية

‏

‏ تقربت شاورته كتله شوف بمنيه تجيب الحاجه الي وهو اكل  الله يحاسبك ويشويك بنار جهنم واني مرضعة واتشهى

‏

‏احجي وافتح بعيوني

‏

‏بيبي كالت بس لا حبلتي ورئ الاربعين وتتشهين

‏

‏جاوبها يمه هي هيج هاي يمتى ماتجيها تتشهى

‏

‏ظليت اغمض وافتح بعيوني عود احس

‏

‏ كتله ها تطلع هسه تجيب تين لو اخابر جدي

‏

‏ كالي شكد تردين

‏

‏كتله صندوك

‏

‏باوع عليه يهز براسه كال صندوق تمام

‏

‏ باوع عليه محتار بشنو يطلع الحركة

‏كال بعصبية لمي شعرج ليش فاتحته

‏

‏كتله اضايق من المه

‏

‏ كال ميخالف لمي

‏

‏ مديت ايدي اخذت قراصه سلوئ وهي مدت ايدهه بعصبية تريد ترجعها

‏

‏بعدت ايدي و اباوع بيها

‏

‏كتلها خاف بيج قمل

‏

‏ كالت جيبي قراصتي

‏

‏ كتلها الم شعري انتي شعرج سيم اماعين ومحترك

‏

‏فيصل يباوع بعيونه  مايحجي

‏

‏ كالتله شوف سوالفها

‏

‏  هو يهز براسه يعني ميخالف

‏

‏ انوب شعرها صار كفشه قبل الاوكسجين يطيح حظ الشعر وهو قصير صار عبالك راس فجل

‏

‏  كتلها تعرفين هسه اني محتاره انتي البكبك الاصفر لو راس فجل

‏

‏ همه ظلوا  يضحكون خوب فيصل مخلي ايده على خده والسبحه بيها ويضحك

‏

‏   تقرب باس راسي كال بعد تردين شي

‏

‏ كتله هو وينه التين لو تريد تكومني من يمك

‏

‏ كال لا والله بس اكعدي عاقله وجفينا شرج

‏

‏هزيت راسي تمام بس مااكوم منا

‏

‏كالت سلوى اهووو هذا مكاني كوومي قبلج كعدت

‏

‏كتلها بله لاتدوخينا ليش محسستني  نفسج عبالك عبد حمود (حرس صدام)

‏

‏ كال واني صدام رحمه الله والديج

‏

‏ كتله ادلل ابو تحسين ظل يضحك

‏

ابو تحسين منو

‏

‏كتله لقبك الجديد

‏

‏ كالتله سلوى والله انت مكيف شنو اني عبد حمود

‏

‏ كتلها والله حقج لان انتي البكبك الاصفر بلامنافس

‏

‏ همه يضحكون انوب خله ايده على جتافي يعني حضني كال كافي عوفيها خطيه شيسويتي. بيها

‏

‏ كتله لعد تقبل يحاربوني بلاكل اني سمعتها تكللهم امسحي التين

‏

كالي غير تجين تكوليلي

كتله انت مقامك اكبر من هيج وحجيت بدلع

‏

‏شويه و يجي احمد جايب فلم كال شنو رايكم نباوع فلم هسه نازل اسمه ، كلهم قبلوا وكالوا  خل نروح بالهول الداخلي

‏

  وتحولوا كتلهم محد يشغله خل يجي التين ياله كلهم فيصل وصيت ابو سعيد يجيب

  ‏

  ‏انتظروا شويه وجابوا صندوق التين كلت يالله كمت شفته اخذت وحده بلاغسل ضربني على ايدي

  ‏كال اغسليها واكلي

  ‏

  ‏ كتله جيبها مااكدر بعد اكلت وحده واخذت الصندوق للمطبخ

  ‏

  ‏كال خل يغسلوا

  ‏

  ‏ كتله اني اغسله كمت انظفه وخليته بمصفى وانوب خليت جوه المصفى صينيه حتى مايخر مي عليه اخذتها وشلتها على راسي واني لابسه دشداشة زرقه وبيها خرطه من يم الصدر وشريط احمر ودشداشة كلها قصار  ولابسه جاكيت بيبي زهرة  زرق ورق

  ‏

   طبيت والصينه على راسي كال احمد هلا والله

   ‏

   ‏ كتله من هسه ماانطي

   ‏

   ‏جان يكول ليش مو اني صاحبج وحزام ظهرج بالمصايب

   ‏

   ‏ كتله كسرت خاطري  بس امدحني شويه

   ‏

   ‏كال وهو يصفك  عالحايط  درة  تين ومنوره البستاتين

   ‏

   ‏ ظليت اهلهل وايد الثانيه لازمه الصينيه فوك راسي

   ‏

   ‏كال  كل جناينا يرحلج فدوه ونذر

   ‏

   ‏كتله خجلتني تعال انطيك

   ‏

   ‏ظل يفرك باديه بحماس

   ‏

   ‏انطيته ماعون بس كتله هاا ماتنطي لاحد

   ‏

   ‏ كال هاي يشبيح لو ابوي يطلع من كبره ماانطي

   ‏

   ‏ كتله حقك حرمونا من التين فتره المايخوفون الله بس همه مو صوجهم صوج الراعي وهو مسؤول عن رعيته

   ‏

   ‏ طبعا اني كاعده بالكاع واحمد يمي مخلي الماعون بحضنه

   ‏

   ‏ عمار كال اني اريد

   ‏

   ‏ كتله امدح جان يكول وين اكو باخلاقج وجمالج ضحكت وكتله  بس انت مااامن انطيك خاف تطي لمرتك

   ‏

   ‏ هو ضحك كال خل تروح بالبطون كلمن يحير بنفسه

   ‏

   ‏ كلت لفيصل الباشا مايريد??

   ‏

   ‏ كال بكيفج

   ‏

   ‏ كتله كل راع مسوؤل عن رعيته

   ‏

   ‏ شاورني احمد تنطي

   ‏

   ‏ كتله لعد شلون قلبي ماينطيني خطيه ثانيا هو الجابه هم عيب

   ‏احجي وعيني عليه واحاول اسمعه

   ‏

   ‏ كال صحيح انطيته ماعون عمار كال هاي شنو

   ‏كتله مو اذا ماانطي خاف يشيل الصندوق وينطي للبكبك الاصفر  وكل راع مسؤول عن رعيته

   ‏

   ‏ كال حقج يابه انطيت لعمتي كالت وخري مااحبه

   ‏

   ‏ ورزان هم ماتحب التين  بقوا بس فاتن وسلوى يباعن  عليه

   ‏

   ‏كتلهم اني قلبي طيب بس كولن توبه بعدمانسويها وكل راع مسؤول عن رعيته

و انطيتهم وظليت اكل شغلوا الفلم

من اصعد لغرفتي انزع قناع الفكاهة  الي مغطيه بي وجهي بيه كدامهم لان اني داخلي مدينة حزن كاملة وقافلة عليها

لااكدر احجي ولمن احجي  هو بس جدي الي وجبير ومريض نصيحة جدي باظهار القوه اذتني

‏

‏ لان دست هوايه على نفسي ...

‏

‏   الارتباط بانسان قوي هم اله سيئات لأن مااكدر اوكف

‏ بوجه ..

‏

‏و هو اعتبرني ملك خاص  اله  وخلص محد يكدر ياخذني منه

‏

‏وفعلا هذا الي صار مو سعيدة وخايفة من مستقبلي فيصل ماله امان

‏

‏ جدي موجود جاب مره عليه اذا مات جدي شون بيه وين اروح

‏

‏واني ماارضى بالضعف ولا اقبل اشوف بعين احد شفقة

‏عليه ..

‏

‏ شون بيه ماادري دخل فيصل كالي الظاهر

‏راح تهججين سلوى لأن صعدت تكولي اريد اطلق اذا ماتسكت دره مني

‏

‏ضحكت خفيف كتله وانت شنو كتلها

‏

‏كال شنو مافرحانة اطلقها ؟؟

‏

‏ كتله على شنو افرح احنه موضوعنا منتهي اني وياك ماابقى اعيدها الك اني ماارضى بانصاف الامور مارضى بنصف رجل والنصف الثاني الها

‏لو كلك لو مااريد

‏

‏كال شنو ماتريديني؟؟؟

‏

‏ كتله شون احبك واموت عليك انت عندي مثل جدي ويا النفس وشايله هم شون بفراكك و  حضنك بس الكرامه اغلى من الحب

‏

‏ اني مالي احد غيركم انت وجدي وابني انت ماشفت القهر الي شفته  الله يخليك تعبت بشكل واريد اعيش مثل الناس ...

تقرب يمي لزمني كال انام يمج،  كمت منه كتله اني ماافيدك ابو قحطان روح مني

عكد حواجبه وكال ظلي هيج وراح تندمين

كتله اني تعشمت زايد وندمانة كد شعر راسي ومشاعري تبلدت وهاي هيه

هو خله وطلع

وراها بأيام  المغرب  اجه معصب وعيونه براسه وظل يسولف لبيبي زهرة عن واحد بايگه بالشغل مبلغ جبير

وهو فيصل طارده من الشغل مانشوف الا صاحوا االمخازن احتركن طلعوا هم واسلحتهم وصفية تركض وراهم وتصيح فيصل ووين مودي ولدي

طلعتلها بيبي زهرة تجر بيها خايبة فووتي هم بس ولدج غير اخوووته

ظلت تلطم صفية وورة ماطلعوا سمعنا صوت

ورا شويه صار رمي قوي يم باب بيتنا الداخلي واحنه بس نسوان

‏

‏عمتي صفية وكفت يم الباب واسمع

‏ ذوله يصيحون وينك حجي فيصل  اطلع خاتل بالبيت مثل النسوان

‏

‏اني عرفت ذول ناوين على شر

‏ومحد بالبيت كلهم يم المخازن وذوله يصيحون

‏

‏طليت  بيهم سبعه تقريبا رادوا يدخلون للبيت ودفعوا عمتي وكوعها بالكاع

‏

‏ركضت لغرفة عمتي لبست عباه وبوشيه واخذت رشاشه وطلعت رميت فوك

‏

‏شو شردوا منهم اربعه  كومت عمتي ووجهت الرشاش عليهم ذوله يهمون روحهم ويردون يدفعوني ويدخلون

‏

‏ وجهت الرشاشة وظليت  ارمي عليهم وفعلا كدرت اصوب واحد منهم برجله وثاني بجتفه

‏

‏ بهاي الاثناء اجو الولد وسحلوهم

‏

بعدها عرفت طلع الحرس البره ضاربي والولد  سامعين الرمي وجايين سحلوهم وطلعوهم اجوا يركضون خايفين

‏

گعدت  وأباوع لٖأديه لهسه ترجف ، بس رغم هذا مفتخرة بنفسي وبلي سويته اليوم ، ومنتظرة اعرف ردة فعله من يسمع انجازي واني حميت بيته وماخليته ينداس

فدوة الكلبه جدي ماقصر من علمني على السلاح اليوم اجه وكته ...

سمعت صوته يحجي ويه عمتي وبيبي زهرة  كمت على حيلي بسرعة صح ارجف بس مبتسمة احس بنشوة الانتصار ... ومنتظرة يثني عليه ويفتخر بيه

ظل يستفسر منهم و ويسألهم

_ خو مااذووكم ؟؟ خو ما واحد بيكم تأذى ؟

جاوبته : لا يمه محد تأذى هيه مرتك صوبتهم وشردوا

ظل يصيح بعلو صوته بغضب كاسح

_ يااا مرة منهم هاي ياهيه الطلعتلهم هاااا

عمتي جاوبته بخوف وتردد : دره!

اجه يركض ويصيح : شنووو شطلعها بت الكلب لج وووينج شووون تطلعين للزلم ؟؟

اني الابتسامة الي جانت مزروعة بوجهي قبل شووية تلاشت ومن الخوف ركضت صرت ورى القنفة

وهو دخل للصالة مثل اعصار تسونامي ...

اني شفته عيونه بكصته وحمر من العصبية

دنكت صرت جوة القنفة وهو ظل يصيييح ويسب ويغلط واسمع صوت بيبي زهرة تهدي بي ...

طلعت راسي من القنفة وجاوبته بس على كيفك غير دفعوا عمتي واعتدو علينه لعد اخليهم يدوسون حرمة بيتنا شون يصير ماعاش ولاصار الي يدوسنه واني موجودة واكدر احمي

صاااح بصووت خلاني الزم بالقنفة قووي باثنين اديه وانزل جواها واطلع بس راسي واطل عليه ..

وهو كمل كلامه بصياح : انتي شلج شغل عسا ما يكتل الوادم كلها اكو زلم لو ماكو زلم بنت النعال هسه اني احتار بمصيبتج بذيج المصيبه يعني الولد خطر اي نعال لو يموت ولو اكو حكومة يكعدونج بفندق خمس نجوم لو بالسجن يخلون ابو ابوج يعفن

كتله فوكاها من ردت احافظ على بيتك فوكاها صاير عصبي عليه وعبالهم عود ماكو زلم لا اني مره بالف رجال

خزرني وهم عليه يريد يجيني ، ركضت بسرعة للهول الداخلي وقفلته اني هم ضجت ماتوقعت ردة فعله هيج ... وهو يصيح وراي والكل وراه اجوي

يصيح يعني تظلين هنا ماتطلعين لج شكول وشحجي مرتي طالعه للسلابه لو جارينج ومااخذينج ...

اني فتحت الباب وطلعت راسي كتله اصلا مخانيث بس رميت شردوا اربعتهم حتى ظليت صافنه كلت لعد عليمن جايين شردوا بهالسرعه اشجعت وصوبتهم واحك براسي

ظل يمسح بوجهه بتوتر ويستغفر ربه ... وعيونه عليه ويهز راسه برفض

تقربت منه سلوى البلوى ، خلت ايدها على كتفه وتمسح بعرك وجهه ووتتموع

كالتله : كنالها كنالها اكعدي واسكتي وانلصمي طلعت ترمي مسويه روحها من الماجدات العراقيات

هسه حتى لو دفع عمتي شنو قابل انتم تسكتون لو هي اله تحب تستعرض قابل عمتي ما عندها ولد اشو يطلعون الحكوك من اللحلوك

يعني هسه وكعت بمشكله اكبر من القبلها وهسه يكولون بين العشاير الزلم ضامه روحها وطلعولنه النسوان

رد عليها وهو يبعد ايدها منه : ...وشحده الي يجيب طاري النسوان ما رايد روحه اليذكر اسم مرتي بديوان والله اسويها دم للركاب

اباوعلها بتحذير واحاجي نفسي : ماتسكت الحية الي تفح سمها هينه بسيطة يا بلوى

وين تروحين مني خلي تفض هاي المصيبة

دواج عندي انت هم ماتتوبين مني

ورجع باوعلي بتهديد : وانتي،ولج احسابج بعدين اذا ما ربيتج وخليت الاسلاح يتراولج فلا اطلع ابن امي وابوي اطلع كو***د ابن كوا**

بيبي زهرة وجهت كلامها اله : لا يمه على كيفك لا تغلط على نفسك وعلى ابوك

رد : انتوا  شلون تخلينها تطلع يعني هسه لو واحد منهم فطس ومات واحد منهم صوب عليها شگول اني

بيبي زهرة  ردت عليه بعصبية بعد مافاض بيها : كول دافعت عن شرفها عن كرامتها وعزة نفسها افتخر بيها يمه هل بنيه ضبعة تحطها ببيتك وانت مأمن محد يدوسلك على طرف

راح كعد على كرسي واني تركت الباب الي جان بيدي لازمته وانفتح من وحده وبقيت واكفة بمكاني ...

كعد يم بيبي زهرة  وهي مدت ايدها بحنان وتمسح على جتفه :- ادري خايف عليها

رد عليها ونظراته عليه يباوع بعدم رضى وغضب وكال: اي طبعا تضل عرضي مهما تكون الظروف

شحيت نظراتي منه بكبرياء ...

بيبي سألته : اي يمه وشراح تسوي

بتنهيده ويفرك بكصته : اذا مات اكلهم اني كتلته واسد حلكهم بجم فلس وما اخليهم يجيبون اسمها ادعي الله ما يموت

ورجع رفع اصبعه بتهديد وعيونه تنطق غضب وعينه عليه : - انتي احمدي ربج ما يموت ولو هو يموت ما يموت اني مسكطج مسكطج

فتحت عيوني بعصبية وجاوبته : هااااي انوب فوكاها فوك ما مضحيه بنفسي لخاطركم

كام على حيله وشمر الكرسي لبعيد طخ بالحايط وصار صوت كولش قوي على اثره رجفت ورمشت بعيوني

وهو بعصبية وغضب

هجم عليه ويصيح :- انوب ترادد ترادد ولج انتي شنووو ؟

لزمته بيبي زهرة تهدي بي : يمه عوفها يمه عوفها وانتي روحي شكو واكفه كدام وجهه ما تشوفي صاير نار

مشيت بهدوء وحذر من باب الهول للدرج واباوعله

خاف بأي لحظة يهجم واكف جسمه متصلب ويباوعلي مخنزر

ظليت ادردم بكلبي كله ما راضي هم لو اطك روحي طلقه واكتلها هم ما يرضه هو اني صوجي ذيل الجلب عمره ما ينعدل..حشاني اني

واني ع الدرج سمعت بيبي زهرة  تكله : - يمه على كيفك هي حتى الرشاشه ما بيها حظ ما ترميي

جاوبها اي مو هي التفگه العوجه هم تصح بيها رميه اخلص من الگوم تتلگاني السريه..اخلص من ذولاك الهتليه تتلگاني الضبعه ومصايبها ...

فريت ايدي وصعدت لغرفتي هسه اني شمسوية كلب الدنيا والله يا الله ....

طبيت للغرفة شمرت البوشي والعباه ورحت يم يوسف رزان لازمته جانت لازمة ضحكتها كوة

كالت هاا ترزلتي

تخصرت كتلها متشمته حضرتج

كالت ولج لا بس والله سباعية انت لج نسيتي اني من فريق الاصدقاء مو من فريق الاعداء

رحت كعدت عالجرباية واخذت يوسف وحسرة بگلبي شكبرها يمتَى اخلص انوب رزلني كدام الحياية سلوى وفاتن وصفصف يايابه ياابوويه

...........

يتبع

...........

السلام عليكم،،،،

ان شاءالله البارت الجاي اكمل كتابته وانشره

بدون موعد

احسكم ما متحمسين للقصة وانا جاي استعجل بحيث اكتبه وانا منعسة بالليل وانشره على استعجال

و القصة جاي تفقد ترابطها وواقعيتها

+++انو القصة كلش متعبة ومهوسة مثلما ما كتلكم وبطلتها مختفية

وهواي متابعات نصحوني اوقفها الئ ان ترجع درة

بس انا راح اكتب بلي عندي واختمها قريبا

وان شاءالله ما اتأخر

طوفان رجل

بارت 43

نورا ناصر

"ولكني تعافيتُ منه، لم أعُد اُصر على تواجده في كل شي، توقفت عن مناداته واللجوء إليه ..قل مقداره في قلبي بقدر ماهنت عليه.

اجا جدي واني خاتله بالغرفه من فيصل

‏ سمعتهم يصيحون تفضل ابو سلام

‏فتحت الباب داانزل سمعته كال هاا جا  وين درة  بس

‏لا مصوبه

‏

‏كاله فيصل  هي مصوبه الزلم وطلعت رمت عليهم

‏وظل يحجيله

‏

‏دخلت شفت جدي ابتسم

‏  رحت  اركض وكتله هلا بجدي  هلا

‏

‏كال يابه بتي ذيبه وعلي  طالعه لجدها

‏

‏ظليت اني اضحك

وجدي يبوس بيه فدووه رحتلك ربي بتي مهره حره من الحراير يابه

ويبوس بيه واني اضحك

كتله بس خفت والله شوف ارجف

‏

‏بيبي زهرة كالت  وين خفتي خرطتي شاجور فوق وايدج ولانهزت

‏

‏ وفيصل  كال حرام اذا تخافين صوبتي اثنين وانتي خايفه لو ماخايفه جان شكد

‏

‏  طبعا هو اعصاب يفور وبيده الجكاره

‏

‏بعدها  لموا العشيره ويوميه كعده وفيصل  يفور ولا اجي كباله  لان شنو يلكه كباله يكسر واحمد يكول جدي

‏ كلساع يكلهم هاي حفيدتي لصوبتهم سواها اغنيه

‏وفيصل  يكب للستار

وراها  جنت بالصالة يم رزان اضحك واسولف عود اضغط سلوئ وفاتن صايرين عصابات داخل البيت كلمن وعصابتها

اجا فيصل  نار هو شافني وظل يغلط  بت الكلب صرت سيره على كل لسان لا وانوب  جدج يكولهم هاي حفيدتي واني علمتها على الرمي ولج كدامهم  يكولي جيب درة خلي تسلم على عمامها

كتله هاا اي صدك جان اخذتني اسلم علئ عمامي شكو بيها

كسر التحفية وصار مراكض ماله والي رزان من صفحة وفاتن من صفحة واني وسلوئ شون صلافة ولا شردنا

وهو ظل يدردم ولج جدج فضحنا واني اغمز اريد ماكو

و يكولهم يغار عليها  جنها الكمر كل عين هالكبرها بكد الصينية ولج جدج خرف علئ تالي وكته

ضحكت وكلت بكلبي تروحله فدوة

هو اني فيصا حابسني من غيرته وجدي كاعد و يوصف

‏

‏ظل يصيح  اني علمج اني يحجون بمرتي بالمضايف بسيطه لج الدكة بصفحه وطلعتج بصفحه ثانيه

بقيت واكفة كال امشي ولي من كدامي يله ولي

طكيتها ركضة للغرفة وخربانة ضحك

صعدت وبقيت  كاعده منتظره شنو الي صار اكل باضافر اديه وخايفه ارجف بعد عملتي االي سويتها هي مو عملة سوده بس صح جنت شويه متهورة

اجه احمد يمي كال .. ولج شسويتي يا دره

وكفت محتاره .. يعني شسويت والله هم غير هجموا علينه وخبلونه اني بعد شسوي زين هسه شسويتوا شصار

تنهد وهو يكول .. يعني شصار يا عيني اذا هو متخبل فيصل متسودن يكول ضاع حقي

عطت بيه .. صدك تحجي انت هو شنو  ضاع حقه شلون ضاع حقه بالعكس اصلا اني شنو  من رميت رفعت راسه حتى ما يكولون دكوهم ومحد طلع الهم ما عندهم زلم لا اني اعادل الف رجال ورميت يعني هو فيصل لو هنا ما جان رمه عليهم

جاوبني بقلة حيله … اي بس مو انتي تتجرئين وترحين هيج تسوين السويتي غلط انتي لو قاتله قتل لا سامح الله مو جان انسجنتي هسه خليج من السجن مو جان ضميرج يظل يانبج سنين عمرج كلها ؟

نزلت راسي بفشله .. اني متعوده على السلاح والرمي يعني جنت اكول الشغله بسيطه وهم هماتين خرعونه وحتى خرعوا الجيران ولو ما رميت عليهم ما انهزموا

هز راسه بعدم قبول وحس الكلام وياي ضايع وعقيم لان الي براسي براسي

بله هذا يتفاهم الا فيصل شيفهمه شيقنعه انوب هسه يظل يلوم عليه ليل ونهار شلون ورطه ما ادري

كتله .. زين هسه شصار

جاوب… انحلت بالتراضي بين الطرفين وخلوا كمبياله محد يعتدي من الطرفين خلوا فصل محد يستلمه واذا واحد اعتده وبده يفصل مربع لان الطرفين غلطانين

يعني انتي لو ما راميه جان حگيناهم وخليناهم يفصلون مربع وغصبا على كل شارب بس انتي وين رحتي انوب صوبتي منهم وانحلت بالتراضي

صفنت بعدها ظليت اركع وابرر النفسي وما انطي مجال .. اي وشكو بيها شمحلاة التراضي لو شلون انتم تردون الا فصول يمعود صدك جذب اكو احلى من الحل النزاعات بين الطرفين ؟

اصلا لازم تبوسون اديكم وجهه وكفه على السويته وياكم

باوعلي بنص عين كال.. زين والمخازن الي احتركت منو راح يعوضها ؟ يعني انتي لو ما راميه جان كل شي تعوض

جاوبته واني ما انطي بنفسي .. الله يعوضها

مشه وهو يكول بعدم مبالاة.. هذا الحجي كولي الفيصل

راح عني واني ظليت عزا هذا احمد ما راضي عن الي صار لعد فيصل شلون هاي شلون طركاعه صدك لو كالو سوي زين وذب بالشط

عساك غركان بالشط يفيصل ومحد يطلعك ياكلك القرش ان شاء الله

وراها كوة مرت الايام وهدأ شويه ونسئ السالفة

وصار عرس  نسرين بنت خالة فيصل وكوة قبل اروح

و هاي نسرين  مدللة الجد وكولش يحبها  لبست بالعرس فستان ماروني وخليت مكياج ولبست يوسف قميص سمائي وبنطرون قماش وهو صغير وناعم نزلت من غرفتي شافني فيصل

بالمكياج

كال شنو هاي مدام

حركت اكتافي وبرطمت شفايفي

ليش شبي معاجبك

كال بنبرة امر تلبسين بوشيه يله تطلعين حمدي الله وشكري راح اخليج تطلعين بعد عمتلج السودة من يوم صخمتي وجهي

نزلت سلوئ واني حاولت اغير االموضوع اني كلش محتاجة اطلع واغير جو

اشرت علئ سلوئ كتله خلي سلوئ تلبس مو بس اني

هي حركت شعرها كالت لا اني نازكة انت يلبسج حتئ لحد يشوفج شلون مهووسة

اجيت اكفشها بس فيصل تدخل بيننا واصر الا البس بوشيه ولبست فعلا وكال منا وجاي متنزع بعد

جاي يصير مكروووه كولش ومينطاق فعلا داكرها

رحت لعرس نسرين جانت طالعة حلوة كولش ونازكة كعدت يمها وسولفنا كالت بعد متتزوج حتسافر للاردن هي وزوجها جانت فرحانة كولش

رزان انطتها هدية مغلفة كالت الها هاي هديتج من فيصل

استغربت اني وباوعت لرزان ابتسمت الي هي اخذتها وانطتها لامها تخليها بجنطتها

واجت عليها الزفة ودخل زوجها عليها

الزفة بسيطة وناس قليلين بحكم الاوضاع وحتئ اجوي علئ وقت حظر التجوال الي يبدي بعد المغرب

كعد وسام زوجها بصفها وجانوا منسجمين كولش وهو وسيم وشخصية قوية وهي نازكة حييل ورقيقة

زفوهم ودعت امها واهلها  واحنا رجعنا للبيت ...

رنا

متمدده وابني بحضني وفرحانه بيه وهذا ثاني ولد الحمدلله والشكر لله راضيه ومقتنعه صح علاقتي ويه وليد حلوه بس تفقد للثقه تفقد لكل شي ومرات احس بخنكة

ليش احس هيج لان بصراحة احسه مو ملكي مو الي ولا قلبه الي احسه بعيد عني وقلبه ملك غيري

وعلاقتنا مجرد تادية واجب لا اكثر ولا اقل هو مأدي واجبه تجاهي واني كذلك مأديه واجبي تجاهه

احقر من هيج عيشه ماكو بس نكول دائما الحمدلله والصبر مفتاح الفرج ويجي يوم ويشيل دره من باله

احس نفسي الة تفريغ بس شكول شحجي اني مثل هذا الي يكول هذا ما وجدنا عليه اباؤنا وأجدادنا

يعني من احجي لامي ومن واحد من اهلي وكالن والله كلنه هيج امي جانت هيج وجدتج هيج وفلانه هيج وعلانه هيج

بس اني لو عندي احد يسندني اني جانت تطلكت بس احس نفسي مثل الكاع الحره المديوسه

هم مثل البنات اتمنى زوجي يحبني يحسسني بإن اني انثى الي قيمة عنده يعشكني بداخله لهفه الي اني مدا احس بهذا الشي ويه وليد ولا احس بلهفته ولا بخوفه عليه

بحيث اني صرت اتمنى اتطلك واتزوج واحد يحبني يعشكني يتلهف عليه يتغزل بيه بنفسي هيج شي بس مجاي احصله

مسحت دموعي واباوع الطفلي يرضع ويباوعلي مسحت شعراته الناعمات وابتسمت اله .. يعمري انتم عوض واجمل عوض طز بابوكم مو صح ههه

حسيت بخيال شخص من كدام الباب رفعت راسي وعلى اثر ابتسامتي شفته دخل بطوله الفارع وهو شايل علاليك

خلاهن على صفحه واجه باس راسي وكعد وهو يلعب بالطفل كال .. حبيبي شلونه بس لا متعبج

ابتسمت والعب بشعراته .. لا حباب وهادئ حييل حتى ما يبجي

كال .. طالع على امه هدوء الكون كله بيها

باوعتله تنهدت والابتسامة على وجهي جاوبته .. الحمدلله من طالع عليه بس مرات اضوج ما اريدهم يطلعون عليه

عقد حواجبه وهو يكول … ليش ؟

نزلت راسي وجريت حسره .. يضيع حقهم بهاي الدنيا الفقير والعادئ ما ينراد والقوي ياكل الضعيف اني اريدهم اقوياء وما يسكتون عن حقهم مثلي

ابتسم وهو يغير الموضوع كال .. عوفينا هسه جبتلج كل شي تحتاجينه واذا محتاجة بعد شي اني موجود كليلي اجيبلج

جاوبته بقهر .. ممحتاجة شي الحمدلله كل شي عندي

تنهد وسكت محجه شي بعدها كال .. اكلج صدك عكب باجر خطوبتة اختي شوكة

ضحكت بفرح .. يااا صدك اي همزين جا خليني اروح وياك اني كلش احب شوكة

صدمني من حجه خله ابتسامتي اختفت تدريجيا كال .. لا والله امي وحبوبتي ما قبلن اجيبج يكولن ما يصلح خاف شوكة تنجبس وما يصير عندها جهال

داريت فشلتي رديت عليه .. اهااا يله عادي براحتكم اي صدك اني هم نسيت

رد عليه بعدم اهتمام .. يله ان شاء الله بالعرس تجين وحتى اخليج ترحين وياها بالزفه

جاوبته .. شكرا ما قصرت

كملت كلامي واني متردده  ومترقبه اجابته… دره تجي مو

صمت لحظات وجاوبني .. اي اكيد تجي غير هي تعدل شوكة هي تعرف بهاي الامور وتعرف شلون ترتبها

رديت عليه بسخريه .. اهااا اي صح ان شاء الله الف مبروك يارب تستاهل شوكة ما عندها حقد وطيبه واصيله

وكف وعدل ملابسه وجع باس الطفل كال .. يله عندي شغل محتاجة شي اخاف بنفسج شي كولي اجيبه

باوعتله صفنت بوجهه ومن داخلي افور احس راح انفجر احس خلصت طاقتي

كعد مقابيلي ركبه ونص وهو يسال .. شبيييج

صرخت بوجهه بالم مكبوت وبجييت بصوت مسموع

هو للامانة انصرع من شاف حالتي هيج بسرعه حضني ويمسح بدموعي استعطف حالتي ويسالني .. شبييج رنا. شكو شصاير ليش تبجين اكو احد مضوجج اخوج عادل مضوجج مسويلج

هزيت راسي بنفي وابجي بصوت عالي مسح ودموعي واحتضن وجهي ضمني الصدره كال .. اني ماذيج احجيلي شكو سويت شي يمعوده عادي اذا تردين تروحين وياي روحي نعال على شوكة خليها تنجبس

رجعت شعري وره اذني وجاوبته باحراج .. لا خطيه ما اريد اروح انوب شيخلصني خليني ما اروح احسن

رجع كعد وهو يتنهد كال .. رنا شبيج بيج شي اذا ضايجة مني كولي اني ما اريد اشوفج تبجين

هزيت راسي بنفي .. والله ما بيه شي بس هيج هرمونات تتغير وره الولاده عادي مزاج يتغير

لزم ايدي وباسها حييل جاوبني .. الله كريم ان شاء الله بس تخلص الخطوبه اجي اخذج واذا تردين هسه عادي اخذج اصلا اني ما اؤمن بهاي الشغلات مال جبسه ومدري هاي السوالف

ضحكت .. ههه يمعود لا ما اجي شيخلصني عادي العرس موجود والحنه يله الله كريم

ظل هو متردد وكعد يسولف ويحجي يريد وسيلة يعرف بيها سبب حزني واذيتي بس ما عرف ولا بينت اله

درة

بنفس اسبوع عرس نسرين خابرتني شوكة خربانة من الفرحة وتبلغني موعد خطوبتها

  اني حيل احبها عشت وياها طفوله كامله صح بيها خيط بس تظل احن واطيب قلب عليه حيل محبوبه وتضحك وتونس

فيصل ما قبل اروح بس اني اصريت اروح هو محاربني شلون تجرأت ورميت ولهذا السبب هو عاند ما خلاني اروح وهم مصار هواي رايحة لعرس نسرين

بس اني شنو اظل كاعده وساكته لا عيني رحت خابرت جدي واتفقت وياه يكله ضروري تجي

وصدك جدي خابره وجبره يخليني اجي كله .. شوكة مسكينه تريد بنت عمها وياها وهي شعندها غير دره هم خطيه وحيده فريده

هو تنهد وكال .. يله امشي خلي اخذج إمري لله اذا جدج دك اليتيمة شويه ويبجي

رحت بسرعه بدلت واني فرحانه حيل واخذت يوسف وياي حييل جنت فرحانه

وصلت ولكيت شوكة تدك وتركص وتهلهل والدنيا ما ساعيتها فرحانه خطيبها اسمه حسن وهي تكول .. حساني شوه اذاني وما اطاني حساني يا بعد بيتي تسوه اهلي وعمامي

ركضت عليه حضنتني وتبوس بيه كالت … خايبه افرحي راح اتزوج واااااي وااااي ما مصدكة اكرصيني خاف اتحلم مو بيوضي يبسن واني ممتزوجه

ضحكت … خايبه خيه هو هذا الزواج من امداه والله صرت احسد الما متزوجات

ردت بسخريه .. اي كلجن هيج عيارات وتبيعن ثكل يتزوجن وانوب يكعدن يلطمن فوك راسي جا ذيج الزواج مو حلو شكو خلفتي هوهو هو يعايرات

ضحكت … هههه تقشمرت بعد ما اعيدها اخر مره

اجت بيبي كعدت هي وعمتي ام وليد كالت بيبي وهي ضايجة .. خايبه شوكة دخلي دره تحمرج وتكحلج ولبسي دشداشة امج ذاك اليوم خيطتها عند ام امجيد جا غير تخبل كلها لمع وخرز ونمنم

عاطت شوكة و وكفت … يااااااا خاف مترضين ليش ما البس قاط ابوي بعرسه مو احسن

اني ضحكت وبيبي ردت كالت .. جا وشبيها والله انه من اتزوجت لبست دشداشه ولبست بجامه حمره غير طلعت اجنن وذاك الدكاك وريحة الحنه تفوح وزفوني بمشحوف

شوكة … ههههههههه لو زافينج على مطي احسن انوب بجامتها حمره مكيفه عبالي لابسه فستان فاتن حمامة  طلعت بجامتها حمره و متباهيه بيها

جرتني وهي تكول … كومي كومي دره لا يرحن يلبسني خاجية جدي وعكاله ذن تخبلن خرفن مو صاحيات

هن ظلن يغلطن عليها وهي تلغط واني ميته من الضحك عليها

رحنه اني وياها للصالون اخذنه وليد جبنالها بدله بنفسجيه جنها تنور طبعا ما قبلت تاجرها بس هي اصرت تموت وتجنن ومنفوشه واحب النفشه

خليتها براحتها هي هاي قناعتها وعاجبتها خليها خطيه ما تظل بنفسها سوت الها ام الصالون مكياج حلو بس هي ما تقبل تريد طوخ وتريد لمع وتريد اخضر وازرك خبلت ام الصالون

انوب تكلها اريد تخليلي وشم ترسمي رسم عين كلها لمع وتبجي واسم حسن جوه باخر حرف هذا الجنه طاسه يجمع دموع خوش

ام الصالون شويه وتكتلها على ملحتها وسوالفها كعدت ترسم الها عين وتجمع دموع بحرف النون

بعدين رادت تكلها اريد تكتبين اسم حسن واسمي وبالنص زائد انوب هيج يساوي الجهال

تريد عمليه حسابيه يعني هيج حسن + شوكة = الجهال

انوب لزكت تريد حمره مارونيه وهي لابسه بنفسجي واحجي وياها ما تقبل ابد تريد كل شي على مزاجها كوه سحلتها سحل من الصالون

اجه عمو اخذنه وهي اول ما دخلنه للبيت شمرت البرنص وظلت تطگ اصبع وتركص وتنفح ببدلتها

وامها تصلي على النبي خاف يحسدوها

انتظرنه شويه واجو الخطابه كعدن النسوان جانوا ناس على كد حالهم امه مره جبيره ما ادري حسيت اكو خلل بخشمها مكروط ما اعرف شبيه وحتى صوتها غريب الحمدلله على كل حال مبينه المره حيل فقيره من اهل قبل

تمت الخطوبه وبدت الهلاهل وشوكة عقدت هي وحسن واجوا بعد العقد كعدوا على القنفه شوكة هاطره حلكها وتضحك فرحانه

وحسن جان كصير وشويه متروس بس ملامحه حلوه وشعره. خفيف لايك عليها

ظلن يهوسن .. يلوك الها الذهب مرتك صغيرونه يلوك الها الذهب وفصوص روبه يا كفاها منين دورها ولكاها

واحنه كوه لازمين شوكة ما تهجم على حسن وهو الولد مبين ثكيل ويخجل مو مثل شوكة ههههه

وانوب كل شويه وشاورتني وكالت … لج يخبل يمه يموووت ماكو هيج جمال شنو الطول عوده يجنن جسمه عذاب عبالك ممثل شلون هيج ما ادري جنه غزال

ضحكت عليها وباركت الها خطيه الله يرزقها كل الخير لان تستاهل

راحوا العالم واحنه ظلينه نركص واني شايله يوسف واركص بيه فديته اخذته وياي للصالون

لان هنا ماقبلت يبقئ عند عمه امل ورنا مموجودة عاد اخذته

جنت بالغرفة جاي العب ليوسف واريده ينام وهو بس يبجي هاي من تجي النعوسة هيج يسوي يظل يلج يلج الئ ان ينام ، عاد اني اظل العبه وهو ساعة يضحك وساعة يبجي الئ ان يتعب وينام

لازمته من جوئ اباطه والگف بي وبيبي تگولي ولج يمه لا يوگف گلبه

خليته علئ صدري وحضنته وابوس بي واكول اسم الله اسم الله

كالت هو شبي يبجي

كتلها يريد ينام ويتدلع

كلت هيج وبسته علئ خده ...

كتالت رضعي خلي علئ صدرج

جاوبتها والله حتئ صدري مايريده يريد ينعس كلش يله ياخذه هالفقرة كلش متعبة

انفتحت الباب وطبت سلوئ لابسه روب احمر ابو الريش وفاتحة شعرها الاصفر الفاتح والمكياج علئ حباية ونص والعطر مالتها قوي كلش لدرجة صرت مقتنعة هذا عطر رجالي لان يصير اقوئ من العطور النسائية

ظلت تباوع يمنه ويسرئ كتلها خيرج شكووو

كالت بيبي الها خايبة طلعي احنه بكوة نريد ننوم الفرخ لا يخترع وشينوومه

ضحكت علئ بيبي وكفت تطك بعلجها كالت اريد جداحة دااشعل شموع عدنا سهرة اني فيصولتي حبيبي

باوعت لبيبي كتلها ديلله بالله بيبي متشووفي شلوون ذووق عليه

هي حركت شعرها كالت بيج خير اوصلي لجمالي وامتلكي قلبه وخلي بس يباوعلج مو هو اصلا حتئ ممعبرج وانت ميتة قهر مني

ضحكت بصوت عالي وكمت فتحت المجر وطلعت جداحة وانطيتها الها وكتلها ديالله هاج اغار منج دروحي ولعي ليلتج الحمرة حتئ الصبح ينتهي مفعولج

هزت روحها وهي تاخذ الجداحة كالت مينتهي مفعولي خمت عبالج انت جبتيله الولد وبعده ممعبرج ولا معبر ابنج

تباوع علئ يوسف وتحجي

اني الا ابني ماريدها تهينه رحت لزمتها من شعفتها وسحبتها حييل

كتلها هييي رخيصة ابني وكل شي يخصه لا تجيبينه علئ لسانج وييله ولييي كملي سهرتج

فتحت الباب وطلعت تسويلي حركة تهديد واني ركعت الباب وراها،  حسيت بيوسف اخترع وزاد  بالبجي

رحت اخذته بس گلبي نار

بيبي وهي تسبح بالسبحة كالت يمه لا تضوجين ماتوصل لظفرج

كتلها شفتي شجايب عليه هم ياريت تسوئ

كالت يمه هذول الزلم كون بطنه شبعانة وفراشه ممدود

كتلها واني وكياني ووجودي  وكرامتي واحساسي شنوو بيبي شنووو

كالت يمه انت درة وهو مرجعه الج

رديت برفض واستنكار لا بيبي لااا اني وفيصل انتهينا وگلبي الي حبه طاب منه سوالفه وعمايله من اول ماعرف بيه حامل لحد عملته الاخيرة من تزوج عليه خلتني اشوفه شخص ثاني شخص غريب

كالت يمه انت مالج غير فيصل جدج تعبانة صحته خطية وانت يتيمة مالج احد وصدك وعندج ورث ابوج بس تبقين وحيدة لا من اخو ولا من اخت والفلوس ابوحدهه ماتسندج

شلت يوسف وبسته من خده كتلها عندي زلمة صغيرون كلي امل بي

كالت يممه الله يحفظه الج وهاي الحية لاتنطينها مجال وقلعيها انت بيديج انت سباعية لاظلين بس تتفرجين

جاوبتها بيأس،والله صراحة بيبي فيصل مايهمني كتلج طبت منه فد نوب ونفسي ماتتقبله بعد

كالت بعصبية جاا ظلي هيج انت الخسرانة وين لاكيتها يصحلج رجل يدفيج بالشتا

خليت يوسف بالسرير مالته ورحت يمها علئ،السرير

وحضنتها بيبي انت يمي وادفئ بيج

هي ضحكت وباست راسي كالت يله نامي ولاتفكرين ربج يحلها

خلت سبحتها جوه المخدة وكالت وعيني لصلاة الفجر

جاوبتها ان شاءالله

نامت واني بصفها علكت بس ضوة الثريا لان يوسف بعده صغير مانومه بالظلمة

نزلت جوة اغسل ممة يوسف شفتها سلوئ طلعت من البيت باوعتلها من الشباك شفتها راحت للمكتب

بقيت كاعدة وشكد افكر بحياتي ومستقبلي ويا فيصل ومستقبل ابني الي ماراضي يعترف بي وحتئ صفية طشت خبر انو مو ابنه وميريده هي وصبرية وهناء مرة حامد وهن ذن يتونسن علئ هالخبر

حييل انقهر من يكولون هيج فكرت لازم اقنع فيصل يعترف بي واذا ماقبل الجئ للمحكمة ولو هسه فوضئ وكايمة لا حكومة لا محاكم انتظر الله يفرجها

ولهناك واترك كل شي وافكر بجدي من اتذكر شكله وايده ترعش وصحته التعبانة اموت قهر گلبي يوجعني عليه واظل ادعي اله الله يطول بعمره ويشفي مااكدر اتخيل حياتي بدونه

بعد ماانترس راسي من التفكير استسلمت للنوم

حسيت بيبي تضغط علئ جتفي كعدت واسمع صوت يم الباب طبت رزان كالت بسرعة درة درة  اخذي يوسف واني راح اخذ بيبي واانزل

كتلها وولج شكووو

كالت ولج نار نار بغرفة فيصل وسلوئ

لطمت خدي واسمع صوت الولد  واشم ريحة الدخان

هي لحظات وطلعنا حتئ مالحكت اسألها بس بهالحظات هاي فكرت بي شصار بي هسه احترگ لو شصار

طلعنه من يم الباب احمد اخذ يوسف بسرعة بسرعة واني عاونت رزان ببيبي لزمناها

مرينا من يم غرفتهم شفت هشام وعمار وسمعت صوتهم

سحبني احمد جنت داريد اطل حتئ اشوف فيصل

بس مالحكت نزلت واني خايفة طلعونا بالحديقة

شفت صفية وهناك يمها سلوئ تعصر باديها بس اطلالتها مزعبلة

احمد انطاني يوسف وطب يركض بقيت حاضنة ابني وصفية تصيح بوجهي

سويتيهه المجرمة ولج تردين تحركين البيت واحنه بي لان تزوج عليج

باوعت لسلوئ مخرووعة وهي تعدل بشعرها ظل يبجي يوسف لان كعد من النوم كوة اخذته رزان

واني داحجي وي صفية انت شتحجين احرك الغرفة شنوو شعليه

كالت فاتن ربج سلوئ وفيصل بالمكتب جان احتركوا وماتوا

جاوبتها ومدام بالمكتب ليش احرك غرفتهم خو احركهم وهم بالغرفة

مااحس الا طلع فيصر سحبني من شعري وظل يضرب بيه

ويصيح بوجهي بأعلئ صوته

و يكولي ليش حركتي الغرفة ولج ليييش شهالسوالف هاي

اني اريد افتهم ماكو استمر يضرب كتله موو اني موو اني

ركعني بالجداحة كال هاي مو جانت بغرفتج ليش واكعة بالغرفة

ظليت ادفع بي اريده يتركني ويوسف يبجي ترس اذني وبيبي تصيح عليه

تكله والله نايمه يمي ماتحركت من مكانها عوفها فيصل عووفها

‏

‏هو ماكو يضرب ويسب غضبه عماااه مايشوف غيري فريسة اله كطع شعري وكعت خصل خصل منه بالكاع

بيبي انهارت تصرخ ومابيها تكوم رزان خايفة وبيدها يوسف تروح وترجع تريد تفكني وتخاف علئ يوسف

‏

‏بهاللحظة طلع من البيت  احمد ودفعه يكله يمعووود هاي الشموع باقية مشعولة وحركت البردة ويباوع لسلوئ

اخذ الجداحة من الكاع وكاله وهاي جداحتها

بيبي كالت جت هاي الفزاعة اخذتها

هو باوع لبيبي

‏

واني  ‏ من الفزعه ومااعرف منين اجتني قوه جريت نفسي منه كتله تضربني عربانه دفعتك عليه تضربني علمود سهره حمره مو ???

‏

‏باوعلي مصدوم يباوع بالوجوه ويباوعلي

‏ واني احجي بحركة كملت  هااا تضربني علمود نومه راحت عليك???

‏

بسيطة اني اعلمك لااالهنا وبس كافي بعد كاافي

‏احجي بصرييخ

‏

‏ركضت جوه ورزان ركضت ورايه وبيدها يوسف طك من البجي  رفعت التليفون و تقريبا الساعه بالثنتين بالليل

‏ وخابرت جدي

‏

‏اول ما جاوب  كتله تجي هسه وتشوف الي تكلي عليه سند هسه تجي لو احرك روحي والله احرك روحي

‏

‏حسيت عليه  اخذ  التليفون  مني وحجا وياجدي كاله ماكو شي لا تجي

‏

‏ جريته منه كتله وروح ابويه احرك روحي ومايصبح الصبح

سديت التليفون صيحت بوجهه بعلو صوتي اطلع بررة ماريد اشووفك اطلع بره

لزمني من معصم ايدي وكال بنبرة تهديد اهددددددي

ووياهه خزرة عباله يخوفني بس اني جنت بحالة ثوورة عاارمة محد يكدر يوكف بوجهي

سحبت ايدي منه ورحت لابني حضنته حييل وهو يبجي واني ابجي

سمعته استغفر وطلع باوعت لاخر خطواته  بحقد وكره وانتقام. وغمضت عيوني بلا حول ولاقوة

قربت رزان مني كالت وهي تبجي كومي غسلي

ماقبلت كتلها ماريد رزان عوفيني هيج

ظلت  تتوسل بس عيب نبدلج هسه يجي جدي خطية يشوفج هيج

كتلها ابد لعد مااستحى من ضربني

كمت خليت يوسف عالسرير وطلعت عباية وشال ولفيت يوسف خليت العباية والشال بيدي ونزلت جوه جان  هو بس يشرب جكاير ومحد يمه واكو كراسي مركوعة وتحفيات متفلشة

كعدت يم الباب انتظر جدي هو اجه باتجاهي وكف فوك راسي

كال حظر تجوال جدج مايجي كومي صعدي لغرفتج والصباح رباح

رفعت راسي ليفوك اباوعله كتله يجي جدي مايعوفني ومنا علما يجي دقيقة ماابقالك هنااا

كال تحلمين تطلعين من ذمتي

دكيت ايدي علئ الكاع كتله لااااشوو اطلع لا عبالك تستقوي عليه لا عبالك بس انت بالدنيا

احجي بصياح،  اجه احمد يركض وكعد يمي يباوع عليه ويباوعله كال خيرج درة شكووو

اني بس اباوع لفيصل بحقد وكرره وهو كمل كلامه

يمعودة درة كسري الشر ودخلي بغرفتج

الدنيا ليل وحظر

بجى يوسف وظليت اسكت بي و اهزه ....

وراها بساعات وصل جدي واني جنت علئ نفس الكعدة

اجا جدي فوق القهر جايب حامد وياه وعمو حسن

‏

‏ باوعتله

‏ خطيه يرجف تقرب مني ودنك كعد بصفي

‏ و شافني وجهي ازرگ وشعري منفوش وحلكي منه طالع  دم

‏

‏ تخبل كال شكو يباوعلي ويباوع لفيصل

‏ كتله هذا السند الي  تريده الي  بعد ماتموت وتغمض مرتاح  هاا هذا

‏

‏كاله فيصل  شكو شبيهه درة وشتحجي احجي فيصل شسويت لبتي

‏

‏ هو دنك مستحي من جدي

‏

‏ كاله احتركت الغرفه وعبالي هي

‏

‏ كاله جدي وحتى لو هي هيج تسوي بيها ولك فيصل شمسووي بيها

‏

‏سودة عليه يحجي وكوة يجر النفس

‏

‏لزمني  بويه امشي خل ناخذج للمستشفى

‏

‏كتله واني ابجي عساني متت ورتاحيت

‏

‏ جدي وكف علئ حيله وكال لفيصل

‏الدم الي بينا وبينك صار مي يافيصل  وانت مو كد الامانه بتي عندي وكلمن بدرب ...

‏

‏يتبع

السلام عليكم

شكرا لان قدرتوا ظرفي الي مريت بي شكرا لان عكستوا اخلاقكم وتربيتكم وثقافتكم هاي لو منزلة بارت طويل جان ما طلعتن لساناتجن هيج وان شاءالله تكون هاي اخر قصة اكتبها

شكرا للبنوتة السعودية الي دافعت عني بغيابي وردت علئ بنات بلدي الي نازلات عليه

وشكرا لكل الي دافع عني

مو ذنبي صاحبة القصة غدرتني وخلتني عالنص حتئ لو القصة كاتبتها كاملة هم ارجع واحتاج تفاصيل خاصة هي كاتبتها الي بالمخربط ومو بالسرئ واثناء ماوقفتها حتئ اكملها اختفت وخلتني ارجع للمحادثة القديمة واعاني كلش علما انسخ واربط حدث بحدث

الله يسامحج يادرة اذا جنتي متعمدة هيج تختفين واذا ممتعمدة ان شاءالله تكونين بخير

السلام عليگمـಿـ

طوفان رجل

44

ان قامت امراة اخرى بسرقة رجلك

فليس هناك انتقام افضل من تركه لها

لان الرجل الحقيقي لا يُسرَق ...

خذلان وقهر وعذاب ،  ايدي علئ ابني واني كل جروحي توجعني تذكرت نفس الطريق الي رجعت بي من ضربني واني حامل وبكل مرة ارجع بيها مكسورة ونفس الوجع ونفس الالم ونفس الاحساس

عيني علئ جدي الي عيونه مدمعة وكل شوي يلتفت عليه مااكدر انهار اكثر اخاف علئ جدي وعلئ ابني الي شبع صدمات وخرعات وشنو يريد يشوف بعد

قبل لا نطلع جدي كال لفيصل انت بدرب واحنه بدرب

تقرب منه فيصل ندمان كاله لا حجي

وكف بينهم عمو حسن وبعد فيصل من صدره وكاله فيصل لهنا وبس كافي بعد هاي ثاني مرة يافيصل احنه امناها عندك وهسه وكتها ترجع الامانة

فيصل عاط بوجه عمو

حسن لا تتدخل

عمو حسن اول مرة اشوفه يفقد اعصابه

جاوبه بعصبية ونبرة مبطنة بتهديد  ذااااك الزمن ولئ ياافيصل جاي تفهمني شنوو احجي  ولئ وراااح لهنا حدك درة ناخذهه يعني ناخذهه مو عبالك يتيمة ومحد يطلع وراها انت شنوو وحش هاي شمسوي بيها لو ميت واحد منكم هم مايحقلك تسوي بيها هيج

جان عمو حسن يحجي بحركة وقهر وصوته مبحوح

فيصل موقفه ضعيف واصلا مايعرف شيحجي وياهم

بس جان رافض اطلع من البيت ، الئ ان اجت بيبي زهرة لزمته

يمه فيصل خليها تروح وياهم وترتاح الها جم يوم وتالي يصير خير

هزيت راسي اريد احجي بس عمو حسن سكتني

جروني ورحت وياهم واني بطريقي للسيارة اباوع لجدي شلون ظهره محني وتعبان ويتلفت عليه كل شوي

وصلت لبيت جدي،  نزلت وابني بيد عمو حسن نايم

عمو حامد جان ساكت ماله اي دور وماجاي اكدر احزر شنو الي يدور براسه

مشيت وكعت عباتي من راسي علئ جتافي وتوجهت لعمي فرشت اديه اريد اخذه منه

كال خلي نايم اني اودي لغرفتج ارتاحي انت

اسمع صوت جدي وراي سامحيني بويه ويهز براسه ويبجي رحتله واني كلي جروح حضنته وبوسته

لاتبجي يانظر عيني قابل شبيدك هو طلع ناقص ودكاته مو حلوة وانت تدري بدرة هذا حظها ويامن يكعد حتئ يكعد ويه فيصل بس وياك كاعد حظي بس بيك محظوظة اني

ابتسم وعيونه مدمعة وايده ترعش لزمته من ايده وفتت جوة

الكل نايمين واني دخلت لغرفتي شوكة نايمة وتشخر خليت يوسف وتوجهت للمراية اباوع لوجهي انقهرت علئ روحي واستهضمت حييل

ليش هيج يصير بيه ترضاها يربي مو كلت بكتابك واما اليتيم فلا تقهر ليش محد يطبق هاي الاية ليش كلها تقهر بيه

هاي فوك ما هو ناكر ابني ومتزوج عليه يتهمني ويضربني شفقت علئ نفسي واحتقرت روحي فوك هذا الاحتقار

فتحت باب الغرفة ورحت لجدي للديوان

اسمع صوت عمو حسن يمه وعمو حامد

عمو حامد يكوله يابه صدك تحجي انت رجعتها ويانه يعني انت تدري بدرة ومصايبها ترة هي هم مو بعيدة تسويها وتحرك الغرفة والبيت كله نسيت عمايلها ويانه

فتحت الباب ودخلت شفت جدي متمدد واديه علئ وجهه تعبان تعبان والله تعبان تعبته اني اكثر من بزريته

هزيت راسي ومهتميت لكلام حامد الي جان يكوله قبل شويه كعدت يم راسه وبوسته

كتله جدي اني ماريد ابقئ هنا

باوعلي وعيونه حمرة وين ترحين بويه ??

كتله اروح لعمامي ولبيبي بدرية اخذ يوسف وابقئ يمهم

جان نايم صفح كلب روحه نام عدل ووجهه داره عليه

باوعلي صافن عمو حامد كال تردين تنقلين مصايبج وبلاويج يم الناس الغربة كعدي وسكتي كلها جم يوم ويرجعج رجلج انت منو يتحملج

عمو حسن اخذه من ايده وكاله كوم حامد كووم دخيلك لو تحجي لو تسكت يمعود احنه بيا حال هسه

طلعوا اثنينهم وجدي فتح عيونه عليه كال وين تردين ترحين بويه

درت وجهي كتله لعمامي ويم بيبي اريد اهج من بغداد كلها

كال بوويه انه احس روحي بأخر ايامي خليني اشبع شوف منج واترس عيوني بيج

حضنته وظليت اناشغ وابجي وتنازلت عن الفكرة بسرعة بوست راسه واديه وتمددت يمه بمكاني الاحبه خليته رجع غفئ وطلعت من الديوان توه فاتحة الباب ويصير بوجهي وليد درت وجهي منه بسرعة

هو تقرب مني وظل يطل بوجهي شبيج درة هاي شصاير بيج

هزيت راسي ماكو شي شلونك انت شخبارك

لزمني من اديه ووكفني ويطل بوجهي خيرج درة هذا منو مسوي بيج هيج

بجيت بحرركة وهو لازمني من اديه

فتح عيونه بصدمة وكال هذا هذااا فيصل هيج مسوي بيج هاااا

طلعت رنا من غرفتها هو جان مركز بيه ويسأل ليش وشكو من شفتها سحبت اديه لا اراديا منه

هو كال اليوم مووته علئ ايدي ديطلع من الباب ركضت وراه اني ورنا هماتين ونسحب بي وطلعت امه وبيبي

وهو يهدد ويصيح ويتوعد وهناء افتهمت من كلامه وظلت تدعي عليه هم لفيتي علينه ام البلاوي ولج والله اذا صار علئ وحيدي شي الا اكص ركبتج

بيبي تجرجر بي وتحجي ولك يمه شتريد تسوي انت هي تنجرع تنعسن بت عمك مسويتلها مصيبة عوفها يطبها طول  ورد لمريتك

طلع عمو حسن وعمو حامد وجدو وافتهموا االسالفة وعرفوا  وليد يريد يروح يهد اخذوه وهدوه ودخلوه جوه

اني بهالفترة سمعت هواي حجي يسم البدن ويتعب حييل بس شسوي مجبورة احوط نفسي بدرع من حديد واي حجايه اعبرها

اجت شوكة كالت اووي اني،عروس لاتتعبوني

ضحكت كتلها شكو

كالت  رزان تريدج عالتليفون روحي شوفيها شتريد اووي

جاوبتها متخصرة وانت شبيج مزعوجة عشتو

كالت انت هم مدري شلونج عايفة فيصل وكارصة هنا حتئ لو مزورك عينج دروحي،يمه اني احس ماكدر اتنفس بدون حساني

‏

‏ضحكت دنشوف تاليها شلون تصفئ وياج ويا حساني ....

‏

‏رحت للتليفون رفعته خليته علئ اذني كلت الوو

‏اجاني،صوت رزان شلونج درة شخبارج

جاوبتها زينة الحمدلله انتوا شلونكم

ردت شلونه يوسف والله مشتاقتله

كتلها تعاي،شوفي لازمتج مو بيت جدج هذا

هي كحت كالت اي بس،امي حارمتني اجي واالله موتدرين بيها

‏ سكتت وهي كملت كالت خطيه فيصل  مقهور كولش من رحتي وكلساع ينسى يكول باسمج

‏

‏ضحكت باستهزاء

‏

‏كالت والله شبيج  سمعت هشام يحجي وياه يكول مو كتلك ماتفيدك درة  قويه وربات جدي  عدنان تعرف شنو

‏

‏ كاله قصدك مااكدرلها

‏

‏كله لا بس اعرف اتعبك وانت تريد غير حياه

‏

‏ جاوبه شوف هشام هاي المغسله تشهد من شفتها ردت اشلعها من بالي والله الله من سافرت دورت مثل مواصفاتهاوتزوجتها كلت يجوز لان حلوه طلع الموضوع مو بالجمال لالا ابد

‏

‏وها ترة  بس ييشرب جكاير

‏

‏ كاله هشام هي طفله جانت تفك السلاح وترمي تذكر شلون

‏

‏ ظل فيصل  يضحك كاله هي مختلفه وحبيت بيها قوتها  وماتتنازل شكد حاولت اغريها بفلوس وذهب حتى تصير علئ مرامي واوتتنازل عن امور ابد تقفل

‏

عبالك هسه من عايفها يم اهلها تتغير ابد ومشاكلها تزيد ماتنقص

و طبعا اني احك براسي واسمع لرزان واكول جذاب ابو النسوان يضحي بابني علمود نسوانه مااصدك بي

اني جنت حابسة نفسي  حكيت راسي كلت هسه عليمن مضوجه روحي خل اطلع من هاي العزله ابني يريد ام قويه مو مكسوره

‏

‏كمت اشارك بشغل البيت خفيف اني اضوج احس عاله على غيري او احد يخدمني رغم شكد  يرفضون البنات اشتغل

‏

‏ بس اني مااقبل ابد اول شي كمت اطلع وذبيت البوشية

‏بس  من سويت هيج خفت منه بس قنعت روحي هو هسه  متزوج  ومتونس واني اقهر بروحي

رنا

التعَمق بالمشاعر ما يجي ورا غَير الصدمات والخَيبه والكَسره بلنهايه ..

خَلو مشاعركم وثَقتكم محدودة ..

خَلو مشاعركم نَضيفه …

بعد ما رجعت من بيت اهلي واستقرت الاوضاع قررت ما استنزف طاقتي واعيش الاطفالي بعيدا عن مشاعري تجاه وليد وبعيدا عن برودة تجاهي

لبست الوضع وحاولت ارتب نفسي وما ادفن روحي بالحياة حفيت وجبت كريمات وملابس جديده من فلوس الي وصلوني بيها من جبت

اخذتهن وجبت كل احتياجاتي بيها لان عرفت هم راح تعرس شوكة  فحبيت اعدل نفسي والتفت الروحي

جنت انظف بالييت شفت وليد جان يروح منا ويجي منا واني اباوعله ركض عليه علاوي وهو حضنه وشاله وباسه

حنية الدنيا كلها بيه ويحب اطفاله بس هو لحد الان ما يكدر يشيلها من باله بس ليش يعني ليش ما يحاول لخاطر جهاله وهو ممجبور هو تزوجني مقتنع بعدها انصدمت بحبه الدره وميكدر يشالها من باله

من شفتها حاولت اتجاهله ودخلت الغرفتي مطلعت صرت اتجنب اكون وياه بنفس المكان ولا اركض وراه مثل قبل خلي يحس بعدم وجودي

شويه وتوسط الغرفه كال .. هااا رنا

باوعتله واني ارتب بالغرفه كتله … هاا الله يساعدك احظرلك حمام لو اصب غدا

هز راسه بنفي كال .. لا متغدي برا وهم اريدج تحضرين نفسج نروح نشتري ملابس الج والجهال لان عرس شوكة اختي ما ظل عليه شي

انصدمت من كال هيج هو ابد ما يهتم لهيج شغلات ولا يلتفت الها ودائما لو امي تشتري النه لو امة وعلى ذوقهم بحياتي ما اشتريت شي على ذوقي بس اتذكر مرة طلعنا ويادرة تشتري ملابس للكلية وجنت توة متزوجة ورحت وياه 

رديت عليه بتنهيده .. اخاف امك ما تقبل

جاوبني … لا حجيت وياها وكلتلها محجت شي وبعدين انتي غير مرتي شدخلنا

ابتسمت بوجهه ورحت بدلت وبدلت لجهال ورحنه سوه اول ما طلعت شفت هنا  عمتي كاعده ومجتفه اديها ومطنكره وتخوزر بينه رغم هي موافقه نطلع سوه شنو الي غيرها وخرب واهسها

وكفت وحجيت وياها بإحترام … عمه راح نشتري ملابس محتاجة شي

جاوبت بسرعه وزعل  … لااااااا شمحتاجة قابل روحي روحي

ظليت واكفه بمكاني متشتته وبعدها صاح عليه وليد كال …يله يابه وين صرتي لا نتأخر

طلعت بسرعه شايله ابني الصغير وعلاوي عند ابو اول مره احس بينه عائلة محترمة وعائلة متكامله

ركبنه بالسياره ورحنه على السوك اشترينه ملابس للجهال والي جان حباب يسالني شنو اريد وشمحتاجة فرحت حييل فرحت حسيت بروحي صدك متزوجة وعندي رجال

اكو شغلات تفرح اكو شغلات حتى لو بسيطة بس ترفع للسما وتحسس الواحد يقيمتة

اخذنه كال .. راح اشربكم عصير دائما اشرب منه

صدك اخذنه نزل كيك وعصير شربنه واكلنه تاخرنا شويه اذن المؤذن واحنه بعدنه بشارع

خلينه ورجعنه للبيت وهو يسولف وياي واني جنت مستمتعه عبالك اول مره اتزوج

وصلنه للبيت ودخلت عمتي وجهه ما يكصه السيف مطنكره وكالبه وجهه سلمت ودخلت

جاي اسفط بالملابس وما اشوف الا العيطه كبت طلعت بسرعه اركض شفت وليد هو وامة صايره الهم مگاصب

باوعتلهم شفته يصيح … الله اكبر والله مليت والله طلعت روحي اريد احس روحي متزوج مثل العالم ماكو كله بامرج

هي تخبلت واشرت على روحها … انييي اني ولك وليد هااا صاير اخو مرتك ولك شمحصله منك يا ما ربيت يا ما كبرت تاليها تحط مرتك بالصدر وتفتر بيها واني مخليني بالبيت شنيي رنيوه احسن مني

وليد بعصبيه … هااا انتي تخبلتي وتغلطين وتصيحين لان شتريت الها ملابس واشتريت للجهال والله الا احركهن واشمرهن بالزباله اطلع كلب ابن كلب اذا خليتها هنا هسه اشمرها على اهلها

امه … ايييي انوب فوك حكه دكة فوك ما ماخذها تفتر بيها المسعده لو منطيني الفلوس مكمله بيهن شغلات اختك مو احسن شنيي توازت رنيوه الا تلبس على الموده بسيطه

هو ركض على الملابس يريد يحركهن وبيبيته تفارغ بينهم  ظلت تحجي على ام وليد ولزمته وظلت تحلف بيه ما تخلي يحركهن

ورحعت  امه لزمته كالت ..شنيي حسره واحد يحجي حجايه تتخبلون عليه راح اعوف البيت واهج خلي رنيوه تتهنه بيه

هو دفعني صاح بيه … دخلي الغرفتج امشي روحي روحييي من وجهي

دخلت بسرعه للغرفه وهو ظل ويه امه هي تصيح وهو يصيح واني افرك باديه واقره ايات بلكي يهدي الوضع

عم الهدوء وتقريبا الساعه بالعشره باليل هو دخل اكيد جان طالع خارج البيت يفتر بالبساتين

اني جنت نايمه ومطفيه الضوه شفته من دخل كعد على القنفه ويفرك براسه بوجع وانزعاج

وخرت البطانيه من روحي ومشيت بخطوات تقربت منه حطيت ايدي على جتفه رفع راسه الي بقهر وذبول

ابتسمت بوجهه كتله .. ميخالف خليها تحجي امك تهون

جر نفس وسكت مجاوب بس مبين حيل مقهور وكف اخذ الخاولي وراح للحمام دخل

شكد انقهرت عليه يعني ابد متخلي واحد يرتاح ولا تخلي واحد يفرح وبعد شنسوي الحمدلله على كل حال

شوكة بعد كم يوم حنتها وتريد تروح تاجر بدلات راحت هي وامها ياجرن بدلات

هي تكفيت الشر وغسلت الفراشات وما خليت شي ما نظفته بلكي عمتي تغير معاملتها وياي

اجت شوكة هي وامها مطنكرات مبينات متعاركات بالسوك

كعدت شوكة وتربعت كالت … اني فد وحده مطيه اني صخله لا بالقران زماله اصلا كل الحيوانات الالفيه والمفترسه اني من يرحلي فدوه كل الحيوانات

ضحكت كلت الها .. لا خيه شوكة حشاج ليش هيج تغلطين على روحج

صرخت بيه بملامح مفترسه .. لا مو حشاني نعال على اني ولج وحده مثلي عروس اطك بالكاع بكل هذا الجمال والاناقه اروح اخذ مرة حامد تاجر وياي بدلات بله وين جان عقلي ويين ؟

ضربتها امها على ضهرها وعاطت بيها … ولج يالعوبه يالغبره يا ام ذوق الخايس من لزكتي بالبدلة الصفره شكالتلج روحج واني جنج فزاعة وزريكة يا سويده

ولج اختاريت الج الوان تخبل ازرك وبرتقالي و ازبري شلون اللوان تفتح على البشره

شوكة وهي تسوي روحها تتقيئ … اييييع باع اللوان الطيف من تمطر الدنيا يطلعن بصراحة العتب مو عليج عليه اني حبتج واجيت والا انتي شني منيلج الذوق

هو انتي لو عندج ذوق ما تزوجتي حامد علباته وصلعته سوه ليكول شارع مبلط

امها .. عشتووو من عساس خطيبج الحلو

هي وكفت وهجمت على امها تخصرت كالت … ياااا  خاب ترحيله فدوه انتي وابو صلعه مالتج

وكفت عمتي ولزمت شوكة وكتلتها بالنعال وشوكة تصيح … ولج يمه لااااا مو حلوه اروح للرجال مزوركة خلي هو يزوركني فدوه اروحلج

امها مستمره بالنعال وين اليوجعها وترد عليها.. انعل ابوج لابو خطيبج اليوم انعنع ضلوعج ولج تحملت الج هواي يالخبله

وكفت افارغ بيهن واهدي بعمتي وعمتي ما صدكت جابتني بنعالين غير متحلفه بيه لكتها فرصه ههه

عود تسوي روحها تضرب بشوكة وهي بيست بيه

عفتهن يتعاركن ويتداهرن وركضت لابني سمعت صوته يبجي

بسته ورضعته وشويه ودخلت عليه شوكة كالت … رنيوه باعي ملابس الجهال ضمينهن الي خاف اخلف منين اجيب الهم ملابس بعد بيتي عمت عيوني عليهم

سدت الباب حييل الطفل كمز من مكانه وظل يصرخ تنهدت … ياربي شلون اني بهاي العائلة كلها مو صاحيه

درة

اجه عمو حسن يلعب بيوسف التفت عليه

‏كال انتي سباعيه  شنو رايج تكملين دراسة

‏

‏ اني كتله  ياريت احسن فكرة هاي ‏والله جدي جان يصلي يمنا ظل يصيح الله اكبر و عادها ثلث مرات

‏

‏ كلته والله لو هسه تختم القران اكمل دراسه يعني اكمل

يتبع

‏