رواية تراتيل الاسد العاشق اماسي الليل الفصل الثاني 2 - بقلم مريم اماسي الليل

#تراتيل_الاسد_العاشق
اماسي الليل
حواء: من يوم العزيمه الحجيه  بدت تتصل عليه  امرلهم كل كم يوم
حتى من ماعدهم عزيمه ...
ومرات ادز عليه الف كبه  وياها  وتبقى تسولف  وتسألني عن امور تخص حياتنا ...
واحيانا هي  وبناتها يمرولنا للبيت براء ونور اختي صاروا صديقات ...
والحجيه تبقى ويا أمي واني احب نورس صح بيناتنا ٤ سنوات بس احسها بعمري  ... مرت تقريبا شهرين من اخر مره لمحته بيها
وكل مره اروح لبيتهم اتمنى أصادفه لكن متصدف
بهالفتره اشتريت تلفون اتصل بي على اهلي  لان مرات احتاجه من اطلع للسوك
ومرات تتصل عليه نورس من الحجيه تحتاجني
وبيوم اتصلت عليه نورس ...
نورس: هلو اكلج حواء اذا ماعندج شي تكدرين تجين يمنا اني وبراء بقينا وحدنا وجيبي نور وياج
حواء: لا ماعندي شي ... شعجب وحدكم
نورس: مو امي وفاتن راحوا ويا فرقد وأمنه للمستشفى عدها ولاده ...وخالتي تدرين بيها يم بيت خالي صارلها يومين باجر ترجع
حواء: لعد هسه اجي اني نور ...
استأذنت من ابويه و
رحنا يم البنات كعدنا بغرفتهم نسولف ... ونور وبراء كالعاده ... يگلبون الكعده صالون مكياج لو وحده تحف للثانيه
بس نسمع الضحك ...
نورس صارت قريبه مني ... واغلب المرات تسألني على حياتي قبل ما نسكن هنا ... من جنت بالجامعه وعن اهلنا ...وعلاقتي
بأهل (ابويه وامي) بالبنات والولد تقصد الابناء من جهت العمام والخوال ...
نورس : امشي خلي نسوي جاي وكعك .
حواء: طلعنا للمطبخ وندري محد بالبيت  سمعت صوت بالكراج قريب على المطبخالتفتت عليها
اكلج نورس اخاف احد يدخل واني بالبنطرون والتيشيرت
شفتها مدت راسها من الشباك گلتلي
نورس: لا هذا ضرغام ... بالكراج كاعد بالسياره ... ميجي ...
وحتى ترتاحين راح اقفل الباب ... واروح اقفل باب الهول ... حتى اذا احد يجي يدك الباب ...
حواء: من قفلت البيبان أمنت ... دخلنا للهول ويانا صينية الجاي ...
نورس شغلت التلفزيون ... وگلتلي راح اروح اتصل على امي اشوف اخبار امنه ... واصيح البنات ... بدربي
لزمت الريموت اگلب ... على فد قناة بيها مسلسل لو برنامج
نتفرجه ...
بدخلته للهول صاح نورس تعالي اقفلي الباب ورايه راح نطلع اني وضرغام
صار گبالي ... اني انثولت وين اضم نفسي وهو ارتبك ميعرف يرجع برا الهول ... لو يطلع للكراج
انطاني ظهره ...
إسد: بنتر ممكن اتصيحيلي نورس وبداخلي شو هاي ماخذه راحتها بالهول متخاف واحد من عدنا يفوت ويشوفها بس الظاهر هي متقصده ... هالشي
حواء: كل الثول نزل عليه بهاللحظه المفروض من شفته اندار اركض اطلع
بس بلحظتها الي بداخلي ربك التفكير الصحيح ...ما فكرت بس أبرر موقفي كدامه
عفيه ترى اني ما متقصده وما ادري اكو احد بالبيت لان نورس
قفلت الباب يله اخذت راحتي ونزعت حجابي ...
والمره القبلها ... جنت اشتغل ويا البنات وگلولي محد يوصل
واذا احد راد شي يدز الجهال ...
وهاي اخر مره .... اسببلك واسبب لنفسي هالاحراج ....
أسد: ابتسمت ... لان قرت الي براسي من نبره صوتي وياها ... تخيلت شكلها من دتحجي والارتباك والخجل ...
بصوتها
جاوبتها ... ترى عندي موعد وانت مقيده حركتي ما اكدر التفت ... ياريت اصيحيلي نورس ..
حواء: هي دقايق بس حسيتها وكت طويل ... وبالاخص من فشلني ... يا الله اتمنيت الگاع تنشگ وتبلعني ....
بهاللحظات ايقنت اني حبيته وحبه ما خلى بعقلي رزانه ... تصرفاتي كدامه مثل المراهقه ...وكل ما احاول احذر اوكع
نفسي بموقف اتعس من القبله ... لاول مره احس ألم بقلبي ...
على البرود العنده واسلوبه المستفز ....
جان اكو كلام على لساني اريد احجي يريح قلبي ... لكن تحذرت ممكن يثير غضبه ... وما اعرف شنو طبعه ممكن يمد ايده عليه لو راح يسمعني حجايه ثگيله
طلعت ... دخلت للغرفه نورس الشيخ رايدج
شفتها فتحت عينها فهمت شافني ..جاوبتها جان موجود بداخل البيت من قبل متقفلين الباب ... وبنفس الوقت گتلها لنور يله امي اتصلت محتاجتنا ...
نورس: وين رايحه اكيد راح يطلع هسه .....دبقي الله عليج
حواء: لبست عباتي والشال ...
لا خطيه اخاف ابويه رايد شغله لازم اروح
طلعت اني ونور ونورس وبراء ... ما لگيته بالهول ... طلعنا للكراج نزلت راسي حتى ما التقي بي ...
نور سلمت گالت مرحبا ...
سمعت رد عليها صوتين ....
رجعنا لبيتنا ... جنت كاتمه بقلبي شي نزل بهيئة دموع اول مره احس نزلت نفسي ... لاحد ...
وقررت بعد ما اروح لبيتهم الا اذا الحجيه احتاجتني اساعدهم
من عدهم عزيمه ...
أسد: مجان دماغي فاضي اذكرها ... لو افكر بالموقف الي صار بيناتنا الا ورا ايام
سألتني امي ...
أم اسد: يمه انت مسمع البنيه حواء حجايه .... اختك گلتلي بيوم
ولاده امنه جانت حواء واختها يمنا وعرفت انت فايت للهول وشايف البنيه بلا حجاب
وراها لابسه عباتها ورايحه لاهلها من يومها ... البنيه ما وصلتنا
اجتي اختها مرتين على براء ... وهي ما اجتي وياها گالت مريضه ...
أسد: ما اتذكر صار شي ... ثانيا اني راسي ناقصه يفكر بحواء يا يمه .... اجتي ولا ما اجتي شسويلها ...
الام: لا والله اني البنيه تهمني ... لان بالي اخذها الك انت متريد تزوج اني اريدك تزوج واشوفلك جهال... خو ما اتگضي عمرك
بلا مره ....
أسد: اني گايلج ... مره ما اريد ... ولو افكر اتزوج ... فمخلي
بالي وحده ... اذا انضربت بعقلي ما اخذ غيرها ... بس هي تفيدني
الام : دكلي منو وخلي اروح اخطبلكياها ....
أسد: بعد عندي عقل گتلج من انضرب على راسي .... ها اتذكرت
ترى عمي ( ابو فاتن) رايد براء لنصير ... واني وكفت بعيني نورس اخاف تنقهر .. براء تنخطب قبلها
الام : لا يمه خواتك ما بينهم هيج سوالف .... بس شو فاتن ما لمحت لهيج شي
أسد: متدري السالفه بعدها بيني وبين عمي ... يمه انتي انطي خبر لبراء وشوفيلي ردها على الموضوع
ومن خلصت ويا امي كعدت بالهول ... گبال التلفزيون ... صارت حواء گبالي بهيئتها من دخلت عليها .... البنيه حلوه بس ما اعرف عنها شي يخليني انجذب لفكره ... افكر بيها كزوجه مثل ما مفكره امي ...
حواء: اندكت باب البيت .... صارت كدامي براء رحبنا بيها .... ودخلت وجهها فرحان
استقبلتها نور ... اول ما دخلنا للغرفه كعدت گالت لنور خطبني
شكيت اكو شي ...
نور : اي على الخير الله يسعدج
حواء: ابتسمت صايره اسرار من ورايه
براء: هذا ابن عمي جنت احس بي مخلي عينه عليه ... وسولفتلها لنور عليه
حواء: عاد حلو مثلج
براء: اي حلو ... عندي صوره بالتلفون عائليه اخذناها مره ببيتنا هو موجود بصف فاتن
حواء: انطتني التلفون ...وكعت عيني على الساحر مبتسم بضحكه ...انصدمت يعني يضحك مثلنا واكو امور أضحكه ...
بلحظه خطر على بالي شي ...
سألت نور راح اسوي جاي ... عادي اخذ التلفون اشوف العريس
بس اشريلي منو بيهم فاتن بصفها واحد ثاني من الجهه اللخ
اشرتلي .. عليه
وصلت للمطبخ ...كل الي بالي اخذ رقم الساحر اكيد موجود بتلفون اخته ... كتبت شيخ ما طلع كتبت اسد طلعلي
ابوفهد بين قوسين اسد ...
بقيت محتاره هو لو لا ... بس هذا لا متزوج ولا عنده طفل ولا الكنيه مالته ابو فهد ...
اخذت الرقم لان ماكو اسم اسد غيره .... كلت يجوز يلقبوا هيج
رجعت التلفون على الصوره ... ورجعت ... يم البنات ... بس دماغي مو وياهم بيدي كوب الشاي وافكر شسوي بالرقم ليش اخذته اصلا ....
لليل بقيت افكر بالرقم ... اله لو لا .... وفكرت شنو اريد اسوي ...
بس اريد اتأكد الرقم اله
بلحظه شيطان وتهور دكيت على الرقم ... إجى بأذني احد نادى عليه اسد
هو جاوب الشخص ....لحظه ضرغام ) مبين موجودين بالسياره
اجاني صوت الو ... يشبه صوته واكو احد گله اسد
تأكدت هو يا الله شكد حاقده عليه شكد مشتاقه المحه ... سديت الخط بوجهه
ورا اكثر من ساعتين ....كتبت مسج
( شكد مغرور وبارد ومستفز ...) ودزيتها بس احس قلبي من الخوف راح يطلع من مكانه حسيت سويت مصيبه ... وبعد ميفيد الندم ... بلحظه اتمنيت لو الواحد يكدر يرجع المسج ويحذفه قبل ما يوصل
لكن وصل ... واستلمت جواب .... هههههه منو انت بس لا الي بالي
بلحظتها انصدمت منو هاي الي باله ...
اسد: اول ما وصلني المسج بالاول دخت منو الي يدزلي هيج مسج
بعدين طخت عندي احتمال واحد من الولد ... قصده يشاقى لان دائما يفتحون ويايه موضوع ما ناوي تزوج لو مناوي تحب ووحده تاخذ قلبك ... گلت
هاي سوالف علاء مسويها سابقا بغيري
دكيت على علاء.... الو يويل بطل هالسوالف اضحك على غيري
علاء: هلو ابو فهد .... شكو يا سوالف
أسد: يويل المسج لتغشم نفسك ... ترى هيج شقى اني اتقبله بس منك بس اذا دريت اكو احد وياك .. ساعتها نتخارب
علاء: وداعت محمد ابني ما دازلك مسج ولا متفق ويا احد نشاقى وياك
أسد: بداخلي ضجت منو صاحب المسج ... علاء جديات مو انت الي دزيته ولا اي احد من الولد جاوبني يحلف بأبنه وسأل الولد يمه .. جاوبني محد داز مسج .... سديت الخط ويا علاء
دكيت على الرقم
انرفضت بعدها صار مغلق .... ثار فضولي هالمسج من منو سجلت الرقم بأسم مستفز
حواء: من دك الرقم ... من الخوف والورطه الي خليت نفسي بيها
طفيت الجهاز ...وجسمي كله يرجف الله يصخم وجهج حواء
شسويتي بنفسج ... يعني كل مره تريدين تكحليها ويا تعميها بالزايد ... بقيت افكر حتى النوم طار من عيني ... لگيتلي منفذ بلكت يفيد ... فتحت الجهاز تقريبا...ساعة وحده
دزيت مسج ( متأسفه هسه انتبهت دازه المسج للرقم الغلط غلطت بالرقم الاخير ) جاوب صار خير
أسد: متمدد ووصلني مسج فتحته ... من (مستفز مثل ما سجلته) افتهمت وحده غلطانه ...
رجعت دا ادك على علاء اگله طلع بالغلط واصلني ... طلعت المكالمات حتى اتصل عليه ... صار اسم المستفز گبالي ... هذا اتصالي على الرقم وبعدها أنغلق
بس هذا اتصال ثاني منها (المستفز) قبل كم ساعة داكه عليه
شوكت ..أتذكرت هذا الاتصال الي اجاني بالسياره ومحد رد ... من سجلته بأسم ميزته ... يعني هي نفسها صاحبه المسج ... معناها مغلطانه
معناها هاي وحده عرف بس ليش كاتبتلي شكد مغرور ومستفز ... معناها كارهتني ..ابتسمت منو هاي الي اني مستفزها وحاقده عليه ... خمنت وحده مراهقه ...من العرف
حواء: من دزلي صار خير ارتاحيت ... الحمد لله ... ياربي
صحي هالعقل ... شكلي اخرفيت .. ولا هالسوايه بمراهقتي ما سويت مثلها هسه من كبرت فقدت عقلي ورزانتي ...
كافي حواء طلعت عنده وحده بباله مبين من جوابه ... بعد شيلي من تفكيرج ... وارجعي لعقلج محلوه هالتصرفات بحق نفسج ..
قررت ارجع اروح للحجيه والبنات ... ومن اليوم أتصرف على طبيعتي شلون فسر اخلاقي وتصرفاتي بعد ميهمني ...
اني قبل مجنت اهتم لاحد من الناس لان اعرف نفسي ما اغلط ويوم الي اهتميت لشخص و لفكرته عني ... غلطت ...
ثاني يوم ... مريت لبيتهم
الحجيه عتبت عليه ... وگلتلي زعلانه مني اتحججت جنت مريضه ...
وخاله سهام ... گلتلها معذوره ماطول مريضه ...احنه نعتب عليها لان انحبها ومعتبريهم من اهلنا ...
بقيت يمهم شويه وعرفت خطوبه براء ويا عقد هالايام ووعدتها نجي اني ونور ... نساعدهم ...
بعد ايام  حضرنا لبيت الحجيه
بيوم الخطوبه اني ونور الظهر مثل ما اتفقنا ويا البنات ... من دخلنا لكيته واگف يحجي ويالحجيه بالكراج
بدون ما ارفع وجهي سلمت على الحجيه
_شلونج خاله ... المره ردت السلام گلتلي
_فوتوا البنات ينتظروكم ...من وصلنا لباب المطبخ
نور : غير اتسلمين على الرجال مو واگف ويا امه ...على الاقل گولي السلام عليكم مثلي
حواء: بقلبي ليش اني ما اعرف المفروض هيج اسلم ... بس
البيه ميخليني كارهته لان حملته مسؤوليه تصرفاتي الي متندمه عليها .. ..
دخلنا يم البنات بالغرفه كعدت وياهم شويه حتى وراها اروح اساعد البقيه بالمطبخ ..
و نور تبقى يم براء ونورس لان تعرف تخلي مكياج طلبوا منها تخليلهم من بدت نور بوجه العروس
ترخصت منهم
_ اني اروح اشوف بشنو اساعد البنات ومن تخلصون تعالوا حتى اشوفكم ...
طلعت من الغرفه غرف النوم مفصوله عن البيت (الهول والصاله والمطبخ ) ... بفسحه داخليه بيها الغرف والدرج وبعدها مثل الممر عريض يودي للمطبخ وبقيه البيت .
من جنت اتمنى المحه ( الساحر) مجان يتوفر
وهسه من قررت بعد ما افكر بي شفته مره ثانيه بنفس اليوم
قريب ما اوصل للممر دخل هو منه  اظاهر يريد يروح لغرفته ارتبكت نزلت راسي احتاريت ارجع للغرفه لو اكمل طريقي بدون تفكير كملت طريقي  مريت بصفه  سمعته همسلي
السلام لالله
ما جاوبته ولا شفت وجهه خطفت بسرعة
ورحت للمطبخ يم خاله سهام  والبنات قلبي يدك سريع   بهالايام حسيت
أمنه بيها شي ويايه مو مثل قبل متولد وما اتذكر صار بيناتنا فد موقف او حجايه حتى أگول زعلانه مني ...
من بديت اساعدهم بالمطبخ خاله سهام بدت تسولف عن نفسها
سهام : ايام شبابي خطيه ابن عمتي حبني واني فطيره وغشيمه ما ادري بي ... لحد ما خطبني من الخجل بدل ما اگله لابويه
اي گتلهم لا ... تورطت .. ردت بس ابويه يرجع يگلي ليش ابن عمتج خوش ولد لو يجبرني اتزوجه ...القسمه لصمت حلك ابويه
گلي بكيفج وهو يمكن كيف بوكتها لان جانت امي معلعله واني شايله البيت ومداريه اخوتي  وتالي سمعت بي ورا فتره خطب
بنيه كرايب ابو انقهرت وبجيت ... ومن الفطاريه بس عزمونا ..
ورحت للعرس نسيت الدموع وكعدت اركص وفرحانه نسيت عمتي وابن عمتي
حواء: هههههههه زين خاله يعني انت هم حبيتي
سهام : لا والله ما حبيته بس هيج عجبني أقلد الافلام ...واكعد ابجي من سمعت بي خطب
أمنه : والله خاله هاي انتو قبل على نياتكم هسه البنات بس تريد تزوج ... حتى لو متزوج هم تقبل بي
حواء: ههههههههه الله يخليج خاله ...كلبج شكد طيب وعلى نياتج
سهام : لا خاله ليغرج لساني بس اباوع للبشر احزره ...
اذا زين واذا شين
فاتن : صدك والله خاله اني مجربتج من تكولين على واحد زين يطلع زين ومن ما ترتاحيله وتحبي .... صدك يطلع بي سالفه عوجه
حواء: انتهت الخطوبه  وهنينا العروس ورجعنا للبيت ... مثل كل مره من بيت الساحر ويجي
الليل من الكل ينامون ابقى افكر بالساحر لحد ما يطير النوم من عيني ....
من اتذكر حجايته السلام لالله احس قلبي يرفرف لان انتبه ما سلمت عليه ...
انتظر بعد يومين بلكت اشوفه بالنيشان  ولو يمكن ميكون موجود لان هو اخو العروس ...
أسد: على رغم جمالها بلا حجاب لكن من دخلت لابسه عبايه سوده وياها شال اسود ويا أشعة الشمس شفتها احلى انتبهت على ملامحها هالمره بتمعن من كثر ما توصفها خالتي الي وتبقى تحجي بيها
خلتني لا اراديا  انتبه عليها من سلمت على امي ..هي واختها منزلين عينهن انتبهت عليها هاي ثاني مره متسلم عليه
الاولى بيوم الي جانت ويا البنات وطلعت هي واختها يروحون لبيتهم اختها سلمت وهي لا وهسه هم سلمت على امي وعليه
لا معناها الموقف اخر مره هو السبب
وتأكدت من رحت لغرفتي ابدل ملابسي قبل ما يجون ضيوفنا صادفتها قريب غرفة خواتي شافتني ونزلت عينها
بأرتباك اتوقعت هالمره راح أتسلم وهم ما سلمت
ما ادري شنو الي خلاني انطق السلام لالله حسيتها السالفه مثل المراهق الي يذبله حجايه لوحده تعجبه
بيومها التهيت بالخطبه وضيوفي الى تالي الليل دخلت لغرفتي ... اجيت انام ... اتذكرت حواء...وموقفها من عندي ...بلحظه خطر على بالي المسج ممكن تكون هي الي دزته بس هي منين اتجيب رقمي استبعدتها ...من تفكيري ...
وأتذكرت سالفه المسج والمكالمة .... باجر اتذكر ادك على الرقم
واذا ما جاوبت صاحبته اروح للشركه اطلع بأسم منو الخط