رواية ياقدري واحلى قدر الفصل التاسع 9 - بقلم Shody ✨✨

ظليت صافنة معقولة هذا معتز هو بعدة مشايفني لان النادي هوسة ،، كمت وكفت اشرتلة اجة
- ها شو گاعدة هنا منتظرة احد !!
- لا بس هسة طلعت من الامتحان وحسيت بدوخة شوية لان ملحگت اتريگ اجيت دااشرب گهوة
- يلله لعد امشي ارجعچ بطريقي
- معتز !! ليش اجيت
معقولة لهالدرجة ماعندك ثقة بية ،، يعني شنو چنت تتوقع تشوف ؟؟
- اني مجنت جاي علمودج ترى بس اني چان عندي شغلة بالجامعة ،، وشفت النادي بالصدفة واجيت اشرب چاي وانتي جيتي صحتيني
- اوك ،، يللة نرجع
رجعت امشي ويا وحسيت العيون كلهة علينة ،، واني مدري افرح مدري اضوج لان هذا الشي جنت اتمنى بداخلي
وصلنة للبوابة دنطلع وجان اشوف اثير بين مديجيب السيارة معتز اجة تقدم علية ،، اني گلبي حسيت وگع بالگاع وحسيت كل الواگفين يمي ديسمعون دگاتة اريد اشرلة اگلة روح بس اخاف يشفونة معتز ويفتهم الموضوع غلط
بهالاثناء اباوع على معتز شفتة رجع من شاف اثير واكف يمي همست بصوت ناصي
- الله يخليك روح لتسويلي مشاكل
- السلام عليكم
- وعليكم السلام ،، محتاج شي صديقي
- اقدملك نفسي مهندس اثير
- اهلا وسهلاً ،، تفضل شرايد
- متعرفت بالاسم ؟؟
- معتز
- اتشرفت بيك استاذ معتز ،، البارحة الظهر چانو الاهل يمكم واني بصراحة يسعدني ارجع اطلبهة من حضرتك لان حسب مااعرف انت ابن عمهة الكبير ويشرفني اطلبهة منك
- اخي انت دتشوف المكان مناسب ،، ثانيا انت البارحة دزيت اهلك بدون موعد ومشيناهة واستقبلناهم ،، بس مال توگفني بالشارع دتخطب حضرتك ترى هاي كلش واگفة وعلى العموم راح امشيلكياهة ....
صديقي احنة ماعدنة بنت للزواج ،، واحنة اسفين
- طيب ممكن اعرف السبب ؟؟ اني موافق على كل شروطكم وطلباتكم وبالنسبة لدراستهة اني ماعندي مانع تكمل وبالنسب......
- لانسبة ولاتناسب كتلك ماعدنة بنية للزواج وخلص
- بس فهمني شنو السبب ؟؟؟
- السبب ،،،،، البنية مخطوبة
- مخطوبة !!!!!! مخطوبة المن ؟؟ منو خطيبهة
- اني .
- اني اسف من حضرتك واعذرني مچان عندي علم اكرر اسفي ،، من رخصتك
اثير چان شكلة مثل الي انضرب على راسة شفتة يعبر الشارع بدون حتى ميباوع
اندار علية معتز عيونة نار يريد يحجي واني ماعت روحي وردت اوكع لو ما يلزمني
وللاسف فسر هذا الشي ضدي
- ايلاف بيج شي ،،ايلاف اوديج للمستشفى
- لا بس اريد اكعد
كعدت على مصطبة وراح جابلي مي وعصير شربت شوية من المي ورفعت شعري وبللت رگبتي گال
- ايلاف تحبي ؟؟
- معتز سبق وگتلك اني ماعندي شي ويا اقسملك باالله اني يجيني وارفضة
- لعد ليش تخربطتي وليش هالدموع المتجمعة بعينچ ،،
- والله تعبانة ،، البارحة منايمة ومرهقة من الامتحان وممتريگة الصبح والموقف الي صار
كلش انحرجت منك
- يلله اذا صرتي زينة ،، خلي نرجع
گمت ورحنة للسيارة ومشت بينة شغل الراديو والاغاني الدتطلع كلهة حزينة گوة لازمة دموعي مااريد ابچي ،، لان كل تصرف مني يفسرة بالعكس
- ايلاف شبيج ؟؟
متحملت ظليت ابچي ،،
- ليش تبچين ؟؟
- لأن لأن جوعانة
- والي يجوع يبچي ،،، والله ياالله ههههه يلله كافي هسة اوكلج
انطاني كلينكس مسحت عيوني ووداني لمطعم قريب طلبنة اكل وگعدنة ناكل بدون منحچي ثنيناتة دگ تلفوني ،،
- يا نسيت اخبر الخط ماارجع وياهم
الو هلو سحر ،، لا اني اسفة نسيت اگللكم ماارجع وياكم ،، رجعت اني تسلميلي ،، باي
- بعد كم امتحان عندج ؟
- بعد يومين امتحن اخر امتحان
- هسة شبعتي !!
رفعت راسي وحركته بمعنى اي
- ايلاف بعد مااريد اسمع هذا الموضوع يتكرر ماشي ،، واذا شفتي ديري وجهج
- ماشي لتشيل هم
مرت اليومين بسرعة واجة يوم امتحاني الاخير بالليل گلي معتز انو هو يوصلني كالعادة وگفت گبال الكنتور لحد مقررت البس فستان بينسل طويل نيلي وفوگا يلك بنفسجي وخليت مكياج بنفسجي وخليت شعري مفتوح رفعتة بس من گدام
اول منزلت صار حسن گبالي ،،
- ولج ايلاف شطالعة اليوم ،، يعني اليوم الجامعة كلهة توگف تك رجل
- ههههه متجوز من سوالفك
- صباح الخير
جاوبوني عمي وزوجتة وسمر
- فدوة لله شنو اليوم هذا اللون يجنن عليج يوم ديري بالج ليحسدوج
اجة معتز چان لابس قميص نيلي وبنطرون بيجي والعطر مالتة اويلي يسطر باوعلي ولمحت نظرة اعجاب بعينة مااعرف يمكن تخيلتهة المهم صبح علينة واني جاوبتة وطلعت للحديقة اجة وراية وحسيت لزمني من اطراف شعري انداريت بسرعة وبقت ايدة لازمة شعري بس برقة
- هذا الشعراليوم هيج يبقى مفتوح ؟؟
- والله بس اليوم لان اخر يوم ودناخذ صور
ظل صافن بعيني وحسيت اكو رجفة بأيدة وهو لازم شعري بس بسرعة وخر عينة وگال
- ماشي حنعديهة هالمرة ،،، بس ديري بالج هاي اخر مرة لان مو كل مرة الواحد يگدر يسيطر على نفسة
- شلون يعني مفتهمت ؟؟
- ماكو شي صعدي بلوة
صعدت وشغل فيروز
شايف البحر شو كبير كبر البحر بحبك
واني بگلبي اگلة والله اكبر من البحر انت شرياني النابض بس ريحتك تكفيني ،، يعافيتي الهوى بلياك يستاحش يطب ريتي
- مثل موصيتج ايلاف اذا حاولي متبقين وحدج واذا شفتي لتنطي مجال يحجي وياج
- ماشي
- تخلصين امتحان وگبل للخط
- مو گتلك اليوم اخر يوم نريد نطگ صور واحتمال نطلع نتغدى برى
- هاي شنو سالفة الغدى هالدور،، يابلوة كل ساعة الج شغلة ،، ترحون بس بنات لو ولد هم
- لا گروب ولد وبنات
- ايلاف اني اوديكم العصر انتي وسمر اعشيكم برى وبلاهة هالغدى
- معتز هو مو على مود الاكل بس لان گروب واخر يوم
- والله ثبرتيني بأخر يوم هي ٤ اشهر وترجعون اداومين شنو حتتخرجون
- يلله حباب والله اخذت اخذت اذن من ابوية ووافق
- ماشي بس لتتأخرين
- اوكي والله مااتأخر
نزلت من السيارة شربت گهوة ووياهة بسكت اني وبنية وياية بالقسم وچنت اراجع وعيني بالملازم رفعت عيني شفت مروة تباوعلي شافتني باوعتلهة اجتي
- گلبج ينطيج متحجين وياية والله حتى مقارية شي ولا فاتحة كتاب وادگ عليج متشيلي لج ليش ياظالمة والله اخذت درس وبعد مااعيدهة وياربي يدوسني لوري تايه بلا رقم و اتكطع وكل قطعة يلگوهة بمنطقة وو
- كافي كافي اسكتي يلله خلي نفوت للامتحان هاهية سامحتج
باستني وفتنة للامتحان ورحنة للسنتر اخذنة صور فردية وجماعية واتفقنة نروح لمطعم بالمنصور بهالاثناء دگ تلفوني
-الوهلو معتز
- ها وين اتفقتو ترحون
- للمنصور
طبعا سئلني على كل التفاصيل اسم المطعم وشلون حترحون وحتى سئل كم واحد انتو گوة سديت التلفون وتقسمنة بالتكاسي ووصلنة
اجتي قائمة الاكل وبدينة نختار وكلمن مطلع موبايلة ويطگطگ سيلفيات وهذا الي يسوي چيك ان بالفيس واني چنت صافنة بغير عالم لحد مسمعت صوت ماخذ گلبي وعقلي وكل حواسي
- السلام عليكم ....