رواية ياقدري واحلى قدر الفصل السادس 6 - بقلم Shody ✨✨

دگت الساعة فزيت ونزلت جوة لگيت مرة عمي تحط القوري عالنار وعمي يسوي الگهوة مالتة
- صباح الخير
- صباح النور شو گاعدة من وكت اني گلت قبل لا اطلع اكعدج
- لا والله نسيت اليوم مااداوم فمطفيت المنبه ودگت الساعة وكعدت
- يلله يوم دروحي كعدي سمر هاي التمبل شيگعدهة
دااطلع بالممر وطلع معتز من غرفتة
- صباح الخير لولو شنو هالنشاط من الصبح
- صباح النور
عفتة ورحت لغرفة سمر يعني هذا الانسان يگدر يگلب كياني بكلمة بنظرة بأي حركة
- سمر سوسو يلله كعدي
- صباحوو حب
- صباح النور يلله حبي كومي
- لج شعندج كاعدة من الصبح انتي كل عقلج بعد امي ل٨ يلله تروح
- بعد كعدت يلله تعالي نتريك
رجعت للمطبخ ولكيتهم كاعدين عالميز
- يلله الوفة صبي الچاي
صبيتلهم وكعدت اكل وياهم
حجة حسن
- اليوم ايلاف البيبي ستر ( مربية اطفال) وكلش عايشة اللقطة
كلهم ضحكو واني صعدت عندي الحرارة من الخجل
- يلله كمل اكلك وكوم لتلح وية البنية
- اموت واعرف شتنطيك وهيج ادافع عنهة ياحجي
- شتنطيني ولك ،، بس انت هواية تلح وياهة يلله يلله روح اطلع وخلصنة من لسانك
كمت اني ورحت دااغسل بالحمام اباع على روحي بالمراية صايرة حمرة
اجة وراية حسن
- ها ولچ طماطة خو مازعلتي
- لا حسوني شزعل مااعرف سوالفك
- لا عبالي زعلتي ،، حتى اذا زعلانة تعزميني اليوم تصالحيني
- هاي شنو انگلبت الاية هو منو المفروض يعزم
- انتي
- لا والله
- يمة فدوة شلون حلوة تصير من تعصب
- ولك جوز من سوالفك وجوز مني يلله وخر دااطلع
- هذا كلة المجال وتگوليلي اوخر شسمنچ بعد تصيرين
- عزااا اني سمينة
- ههههههههههههههههه
- وتالي وياك حسن چلبت وية البنية من الصبح كافي
- اجة المحامي الثاني تفضل استاذ معتز
عفتهم ورحت لمرة عمي
- تعالي هسة دااصيحج شوفي حبيبة هاي المميات وهذا فورتلچ مي للممة وهذا الحليب كل رقمين مي مكيالة حليب هي تشرب تقريبا ٤ ارقام يعني مكيالتين وهاي اللوازم ومالتهة
- ماشي لتشيلين هم
- وديري بالج يوم بعد مااوصيج
- بعيوني يوم
طلعو كلهم واني رحت لغرفة معتز حتى ابقى قريبة يم الطفلة كعدت على فراشة وظليت اتلمس بفراشة تمددت وحطيت راسي على مخدتة وظليت امسد عليهة
انيالج ياالمخدة شتحسين من يحط راسة بحضنج
شوية وفزيت على صوت ملوكة بدت تتحرك رحت بسرعة حضرت الممة وبردتهة وشربتهيا حبيبتي جانت جوعانة شربتهة ورجعت نامت رحت غسلت الممة ورجعت للغرفة باوعت عالميز رحت فتحت العطر مالتة وظليت اشم بي اووف كون اترس رياتي بهالريحة بلكت تتخدر حواسي ومتفز كل ما اشتم هالعطر بي رحت على كنتورة وفتحتة وظليت اتلمس بقمصانة
اني مو احبة لا اني وصلت مرحلة العشق ويا اني اعشقة واعشق كل تفاصيلة وكل شي يتعلق بي
رحت للمطبخ احضر بالغدة وخليت الباب مفتوح حتى اسمعهة اذا تبجي خليت الاكل عالنار وبديت اعزل المطبخ وغسلت المواعين داانشف بأيدي وسمعت صوتهة
رحتلهة اركض
- ها يروحي لتبچين حبيبتي يلله ... يلله فدوة لگلبج .. فدوة لهالوجه الحلو
طلعتلهة ملابس وحضرتهم وفوتتهة للحمام وغسلتلهة بالبداية حسيت بصعوبة اسيطر عليهة بعدين نيمتهة عالقاعدة مال الاستحمام جنت اشوف مرة عمي من تسبحهة وبديت افركلهة جسمهة على كيف وهي صافنة علية كملت ولفيتهة زين ووديتهة للغرفة بدلتلهة صارت تخبل ظلت كاعدة شوية وبعدين شربتهة الحليب ورجعت نامت غطيتهة ورحت عزلت البيت ونظفتة تعبت كلش رحت للمطبخ طفيت الجدورة كلت اكيد هسة متكعد خلي اروح عالسريع اخذ دوش واغير ملابسي كملت ركض ركض ونزلت لكيتهة نايمة جبت تلفوني وظليت اگلب بالفيس وتمددت على فراش معتز
شوية ومحسيت على روحي غفيت
حسيت اكو صوت بالبيت هستوني داافتح عيني وشفت معتز دخل للغرفة
- كال ها لولو خو ما تعبتج بنتي
كعدت بسرعة وجاوبتة
- لا فدوة لگلبهة شگد هادئة ،، شربت الممة ونامت
راح قريب من السرير مالتهة ونزل نفسة وظل يلعب بشعرهة
- لج لولو طلعتي صدك بيبي ستر على گولة حسن لج شلون عرفتي تسبحيهة
- عادي ،، ملعبت نفسي لتخاف
كام واجة تقرب مني شوية و كال
- لج انتي غير حقودة ...
- لا اتشاقة وياك صدگني
- شلونهة ؟؟
- شنية !!
- النومة بفراشي مريحة
- ها .... منمت جنت .. جنت دااكلب بالتلفون ووجعني ظهري تمددت
- اي شبيج صرتي طماطة قابل شكو واذا نمتي شراح يصير ،، جووعان امي مطبخت شي
- لا اني طبخت اليوم
- لا والله !! لج طلعت عدج خوش مواهب واحنة مندري ،، بلله خلي نشوف اشطبختي
راح للمطبخ ورحت ورا فتح الجدورة شاف مسوية برياني دجاج اخذ خاشوگة وضاك
- هاي شنووو !!! وكام يكح
- شنوو ؟؟
- هههههه اتشاقة وياج عاشت ايدج،، صبيلنة وخلي نتغدى اني وياج ، لان عندي شغل اريد اطلع ماالحك اجي عالغدة
- ماشي هسة اصبلك
راح غسل ايدة واجة كعد عالميز
اني طلعت السلطة ورتبت الاكل عالميز وكعدت مقابيلة
سمينة وبدينة ناكل كال
- والله الي يشوف شكلج ميتخيلج هيج ،، والله يالولو طلعتي ام بيت بأحتراف يعني فاجئتيني بأهتمامج ببنتي وهسة طبخج كلش طيب عاشت ايدج يعني بين قوسين الياخذج ميخسر
- ههههههه شكرا خجلتني
خلصنة اكل وراح يغسل ،، حضرت الچاي وسمعت صوت ملوكة تبجي ركض رحت فتحت الباب وتسمرت بمكاني
من ارتباكي ماعرفت شسوي اطلع لو اظل واگفة چان نازع قميصة وتقاطيع جسمة مبينة مال شخص محافظ على لياقتة والزنجيل الكارتير يلمع على رگبتة ماادري شگد مر من الوقت واني مبحلگة عيوني وواگفة
- ها لتخافين اني يمهة
- اسفة والله مجنت ادري بيك بالغرفة
- عادي لتعتذرين مصار شي ،، هاج اخذيهة هسة ابدل واجي وراكم
اخذتهة ورحت للحمام غيرتلهة وظليت العب وياهة بس بالي كلة يمة اووف ياربي هم يجي يوم ويصير نصيبي شگد احبة لو بس يحس ويدري اني اتنفسة
اجة يمي بالهول اخذهة وظل يبوس بيهة
- اروح فدوة لريحتج ،، شكد طيبة وهي تباع علي وتناغيلة كأنما تعرف هذا كل حياتهة هذا سندهة وهذا حزام ظهرهة
- ايلاف اني طالع محتاجة شي ،،
- لا سلامتك