رواية ياقدري واحلى قدر الفصل السابع 7 - بقلم Shody ✨✨

مرت ايام وقربت تخلص امتحاناتي
معتز قليل اشوفة لان دائما بغرفتي اقرى ومن يصيرلي مجال انزل اخذ ملوكة العب وياهة شوية واكل واصعد مرة ثانية ،، اثير صار فترة مختفي خلصت من الزن مالتة مچنت ادري ضاملي مفاجئة
رجعت للبيت بالخط مثل كل يوم صعدت لغرفتي غيرت ملابسي ونزلت اكل جنت لابسة تراك برتقالي ورصاصي شوية التيشيرت مالتة چان قصير
دااشرب مي من البراد فلت من ايدي الگلاص چان بلاستك دنگت اريد اجيبة طلع ظهري جان وراية معتز وكفت اجة تقرب مني وحچة بصوت ناصي
- يعني شباب تلاثة بالبيت المفروض التيشيرت يكون اطول واذا مصرة تلبسي انتبهي وانتي ادنگين
طبعا مكدرت اجاوب حسيت راح يغمى علية سكتت وظليت اباع بعينة شوية وحسيت على نفسي وتحركت دااصعد صاحت مرة عمي
- ايلاف يلله يوم تعاي اكلي
- لا يوم مااشتهي اكلت بالكلية نزلت اشرب مي اريد انام
بدون مااسمع الاجابة صعدت ركض للغرفة ذبيت نفسي عالسرير ظليت صافنة عالسگف وكلماتة ترن بأذني ،،اني استاهل المفروض انتبه ومااحط نفسب بهيج موقف
اندگت الباب باوعت اثاري اني چنت غافية باوعت عالموبايل لكيت ١٠ مكالمات فائتة رقم غريب ،، كمت بسرعة فتحت الباب لكيت حسن واكف بالباب
- ايلاف امي تگول بدلي ونزلي عدنة خطار
- منو ؟؟
احنة قليل يجونة خطار غير مرتضى ومرتة وجهالة
- والله ايلاف مااعرف بس نسوان تلاثة جايين اول مرة اشوفهم
بدلت ونزلت لبست بنطرون اسود وتيشرت احمر قصير من گدام ومن ورة طويل
نزلت لگيت سمر بالمطبخ دتحضر التقديمات للخطار
- لج هاي وينج الدنيا محترگة وانتي رايحة بسابع نومة
- شكو منو ؟؟
- ولج خطابة
- لابربچ ،، ااااي الف مبروك
- والله ياحبيبتي مبروك عليچ
- اني ؟؟؟؟؟؟؟؟ منو هذا الي جاي يخطب بدون سابق انذار ،، والله ياالله احنة وين گاعدين وبيا عصر
دنحجي وسمعنة صوت ركض اجوي جهال مرتضى چان عندة بنية وولد سما و زيد
- خرب حضج ايلاف ،، اجتچ نور كملت السبحة
- اويلي عالحظ
- هلو سمسمة حياتي شلونج ،، تعال زيودي انطيني بوسة
- السلام عليكم ،، شلونكم ،، شنو عدكم خطار
- اي والله جماعة جايين على ايلاف
- اي بالخير والبركة الوفة تستاهلين
- يمعودة ياخير وبركة اني حتى مااعرفهم منو ولاناوية اطلعلهم اصلا خلي امي تگوللهم ماعدنة بنات وتفض السالفة
بلله هذا منين طلعلي ،، هسة اني ناقصة هم
- ايلاف امي گالت خلي تجي هي تقدم
- صدك تحجين !!
- اي والله تگول عيب خلي تجي
اخذت الصينية مال عصير ورحت وجتي وراية نور شايلة الكيك طلعتلهة حجة حتى تفوت متگدر اذا متنبص
- السلام عليكم
- وعليكم السلام ،، اللهم صلي على محمد وال محمد ،، شنو هالزحمة تعالي بنتي هنا يمي حقة اثير من خبصنة خبص
- اثير ؟؟؟؟
چانت مرة كبيرة بالسن بس مرتبة لابسة جبة وربطة ووياهة بنات اثنين وحدة مبينة نهاية التلاثينات والثانية تطلع بعمري
حجت المرة
- شوفي ياام معتز احنة نعتذر على دخلتنة المفاجئة عليكم بهالوقت بدون مناخذ موعد بس ابني الله يسلمة منطانة مجال
- لا بالعكس البيت بيتكم اهلا وسهلا بيكم اي وقت تشرفون
- احنة ياام معتزطالبين القرب منكم وابنة خوش ولد مهندس ومعتمد على نفسة وعندة شركة ومكون نفسة الحمد لله اشترى بيت وجهزة من كل شي ،، يعني الحمد لله مناقصة غير بس المرة الزينة الي تنور بيتة وهو اختار كريمتكم ايلاف وان شاء الله تكون قسمتة
حجت مرة عمي
- والله ياام اثير نتشرف بيكم ،، الزواج قسمة ونصيب واحنة لازم ناخذ رأي البنية ونشور ابوهة واخوتهة والله كريم
- اني الي اعرفة ياام معتز هي ماعدهة اخوان وابوهة متوفي
- اي نعم ،، بس عمهة هو ابوهة الي رباهة وولد عمهة همة اخوتهة ان شاء الله
ام اثير ايلاف بتنة يشهد الله صح ماجابتهة بطني بس ايلاف معزتهة من معزة سمر واكثر ،، الام هي الي تربي مو الي تجيب
- لاعاب لسانج حبيبتي ،، ونعمة التربية
يلله ياعيني احنة نرفع الزحمة وننتظر جوابكم واحنة الممنونين
_ نورتونة وشرفتونة والبي خير يقدمة رب العالمين
اني هنا مااعرف اوصف كم المشاعر الي جنت حاسة بيهة ردت اصرخ بنصهم واكللهم لاتجون بعد اني مكتوبة بأسمة اني كلي ملكة مااگدر ارتبط بغيرة
راحو ورجعت مرة عمي گالت
- ها الوفة يوم حبيبتي انتي تعرفي للولد شايفتة
يعني اني اشوف بعد وكت على موضوع خطوبة وزواج ،، بس اذا انتي رايدتة الولد وهاويتة محد يگدر يمنعج
نطت نور من يمهة
- لاعمة شنو بعد وكت اني بگدهة تزوجت والولد كامل مكمل حتى بيت عندة ورجال صاحب مال ليش متريدة ،، معليج منهة كولي لعمو وشوفي شيگول
اريد احجي وفات مرتضى
- السلام عليكم ،، شلونج حجية ،، شلونكم بنات
- هلة بيك يوم شلونك انت شخبارك
- اكلج يوم منو النسوان الي طلعو من بيتنة
- ناس جايين على اختك
- سمر !!
- لا ايلاف
- هاي شنو عيني !! كبرنة وگمنة ننخطب ههههه
طبعاً احس نار اشتعلت بخدودي كلش خجلت تحججت بشغلة وطلعت من المطبخ صعدت لغرفتي
ظليت كاعدة ورحت على تلفوني لكيت بعد مكالمات فائتة من نفس الرقم واثناء مدااشوفهم دگ التلفون
- الو
- الو منو !! اثير !!!!!
بهالاثناء اندگت الباب وانفتحت رفعت راسي واشوف معتز فاتح الباب وعينة علية.......