رواية يقيني الفصل السابع 7 - بقلم نوري

من ساعة ما سمعت الخبر وانا قاعدة في البيت مبخرجش منه، بحاول استوعب ازاي كتب كتابه فجأة كدة، انا ولا مرة شوفت في ايده دبلة حتى، وفي نفس الوقت وبلوم نفسي في اليوم ألف مرة اني مشيت ورا مشاعري، كانت بتجيلي رسايل واتصالات كتير اوي من سيف وحنين، لكن مكنتش قادرة ارد، بابا كان قلقان عليا ومش فاهم اية اللي حصل، حاول يتكلم معايا كتير لكن مكنتش برد عليه، هقوله اية، أقوله إني غلطت وعلقت نفسي بحاجة مكنتش ليا من الأول، هقوله اني حبيت واحد مكنش شايفني اصلا بس كنت بقاوح، هقوله اية بجد

° ليلى

بصيت للباب وشوفت رقية، قفلت الباب ودخلت بهدوء، مكنتش عارفة ابص في عينيها ومكسوفة منها رغم أنها متعرفش حاجة، قعدت جمبي ومسكت أيدي

° مالك

مكنتش عارفة ارد عليها، وهي كمان فضلت ساكتة، لحد ما قالت اللي خايفة احكيهولها

° حبيتيه

رفعت عيني ابصلها بخضة، اية اللي خلاها تقول كدة، عرفت منين

° بابا قالي لما كنتو مسافرين

_ بابا؟ هو عرف

° متقلقيش مجرد شك بس

_ قالك اية

° مش مهم قالي اية، المهم تجاوبي على سؤالي .. حبيتيه

_ هو .. هو مين دة

° معاذ

_ لا دة .. دة مجرد دكتور في الجامعة

° هتخبي عليا انا، دة انا اختك، لو خبيتي على الدنيا كلها متخبيش عليا

وكأني كنت مستنية إشارة، إشارة إني اتكلم واقول كل اللي جوايا

_ انا فعلاً حبيته

ضمت أيدي اكتر بين كفوفها وطبطبت عليا

° سمعاكي

_ معرفش اية اللي شدني ليه، اول مقابلة بيني وبينه مكنتش الطف حاجة، ولا حتى تاني مرة، بس يمكن عشان صدق حلمي، يمكن عشان .. مش عارفة، مش عارفة دة حصل ازاي

° ليه مقولتليش

_ مكنتش متأكدة من مشاعري، ولما اتأكدت مكنتش بلاقي منه اي فعل، ولا حتى رد فعل، لو كنت قولتلك ردك عليا كان هيبقى إني متعشمش، محبتش اسمع دة منك وكملت في اللي بعمله، لكن يا ريتني قولتلك من الأول

مردتش عليا وسابتني اكمل

_ انا كنت بدعي بيه كتير اوي، في كل صلاة وفي القيام، عملت كل حاجة، كل حاجة عشان يبقى من نصيبي، لكن برضو منولتش اللي بتمناه، هو ليه كل ما ادعي بحاجة منولهاش يا رقية، هو انا وحشة، مستحقش انول اللي بتمناه ولو لمرة واحدة

° انتي اجمل واحسن بنت في الدنيا، مشكلتك إنك مش فاهمة يعني اية دعاء يا ليلى

_ عشان خاطري مش عايزة اسمع كلام كل مرة

° لازم تسمعيه عشان تفوقي، انتي اية اللي عرفك أنه الشخص الصح، الشخص المناسب اللي هيصونك ويعيشك العمر كله متشالة فوق الراس، مين قالك إن عيشتك معاه كانت هتبقى جنة، اية اللي يضمنلك إنه مكنش يمد ايده عليكي ولا يخونك مثلاً، اية اللي يضمنلك إنه يكون كويس معاكي، بتدعي بيه على أساس اية

_ على أساس إن اي حاجة بنتمناها بندعي بيها ربنا واحنا عندنا امل تتحقق

° غلط، احنا بندعي ربنا مش عشان أمنياتنا بس، احنا بندعي ربنا عشان دي عبادة، ملناش غيره نلجأله وقت ضعفنا وحزننا قبل سعادتنا وراحتنا، بندعي عشان يكتبلنا الصالح أياً كان هو اية وفي الوقت اللي ربنا عالم أنه مناسب لينا، مش عشان مجرد إننا عندنا حاجة عايزنها وخلاص، ادعي، واتمني، اتمني المستحيل وانتي واثقة إن ربنا قادر يحققلك كل شيئ، لكن كمان يكون عندك يقين بأن الخير هو اللي هيحصل وبس حتى لو كان الخير دة إن دعوتك متتحققش، وبعدين انتي بتقولي كل ما تدعي بحاجة متتحقش، اومال فوزك في المسابقة وحضورك المؤتمر دة اية، طلوعك كل شوية في برنامج شكل وآخرها برنامج ليكي لوحدك دة اية، مش دة اللي كنتي عايزاه وبتتمنيه، ربنا مكتبلكيش اعلام لكن في نفس الوقت حققلك دعوتك بطريقة تانية هو وحده اللي عالم بأنها خير ليكي وتناسبك، متخليش الشيطان يلعب في دماغك ويعميكي عن كل دة، عشان لو النعم دي راحت منك هتندمي في وقت ميفيدش فيه الندم

خرجت من الأوضة وسابتني، اول مرة تكون حادة معايا اوي كدة في الكلام، طول عمرها بتطبطب وتكلمني بهدوء إلا المرة دي، فضلت افكر في كلامها لوقت طويل، كل مرة بيطلع عندها حق، اية يضمنلي أنه يكون كويس معايا وحنين عليا، خصوصاً بمعاملته وأسلوبه الحاد دايماً، حطيت ايدي على دماغي لما حسيت بوجع، كتر التفكير والعياط تعبني، واللي تاعبني اكتر اني بلوم نفسي على كل تصرفاتي الفترة اللي فاتت، فضلت كدة كتير لحد ما فكرت اطلع برا، كانت قاعدة لوحدها قدام التليفزيون، استغليت إن بابا مش معاها وقعدت جمبها

_ انا اسفة

° على اية

_ على كل حاجة

لفت بأتجاهي وخدتني في حضنها

° انا اللي اسفة اني اتكلمت معاكي بالطريقة دي، بس كان لازم افوقك

_ انا عارفة كل اللي قولتيه يا رقية، انا بس كان عندي أمل، ولما لقيت إن حنين اتقدملها اللي بتحبه واللي كانت بتدعي بيه بقالها سنين فرحت، قولت يبقى انا كمان ربنا هيستجيب ليا

° حنين مش مثال الكل يمشي عليه، دة نصيبها، وكان وارد ميبقاش، لكن انتي مش معنى إن ربنا منعك يبقى حرمك، بالعكس دة اكيد رحمك من حاجة لا يعلمها إلا هو سبحانه، وحتى لو معاذ دة احسن واحد في الدنيا، برضو ممكن ميكونوش مناسب ليكي بأي شكل من الأشكال وربنا حب يعوضك بالأحسن

_ عندك حق، درس واتعلمت منه

° شطورة، المهم انك متهمليش دراستك أبداً ولا شغلك مع سيف، مش بقولك متزعليش لكن متهديش كل اللي بتبنيه عشان خاطر وهم، واراهنك إن قدام هتكتشفي بأنك مكنتيش بتحبيه من أصله، خليكي قوية، واحنا كلنا في ضهرك

_ حاضر

° اوعديني متنهزميش

_ اوعدك

فضلت وخداني في حضنها لحد ما نمت، صحيت تاني يوم لقيتني نايمة على الكنبة وهي مش جمبي، قومت وانا بعدل نفسي بشويش من نومة الكنبة اللي وجعت جسمي، سمعت صوت في المطبخ ولقيت رقية طالعة منه

° صحيتي أخيراً

_ هي الساعة كام

° بقينا بعد الضهر

_ ياه كل دة

° بقيتي كسولة

_ لابسة ليه انتي مروحة

° ايوا، عايزة اروح اظبط البيت واعمل غدا قبل عبد الرحمن ما يرجع

_ والله جوزك دة كتر خيره أنه مستحملنا، زمانه مضايق من إنك كل شوية عندنا

° ابداً، هو عارف قد اية انا متعلقة بيكم ومش بيرضى يزعلني، وانا برضو مبيهونش عليا زعله ومش مخلياه ناقصه حاجة

_ ربنا يهنيكوا يا حبيبتي، وعقبال ما ابقى خالتو يارب

° وقت ما ربنا يريد، يلا انا همشي بقا

_ خلي بالك من نفسك

° حاضر

بعد ما مشيت دخلت اتوضيت وصليت الضهر، دورت على تليفوني وأول حاجة عملتها اني كلمت سيف

* والله شكراً انك تكرمتي وكلمتيني

كان بيتكلم بعتاب لكن في نفس الوقت نبرته كانت هادية

_ انا اسفة، مش عارفة اعتذرلك قد اية بجد

* كنتي فين، وليه اختفيتي كدة

_ حصل عندي ظرف ومكنتش قادرة ارد ولا اتكلم مع حد

* طب انتي كويسة

_ الحمد لله احسن، بعتذرلك بجد مرة تانية

* متعتذريش، المهم انك بخير

_ الحمد لله، انا هلبس واجي المحطة على طول

* لو مش قادرة النهاردة خليكي الدنيا مش هتطير

_ لا هاجي دة اصلا زمان صاحب المحطة هيتخانق معايا

* محدش يقدر يقربلك وانا موجود لا بكلمة ولا بفعل، وبعدين انا فهمته انك عندك ظروف من قبل ما اعرف اصلا فا متقلقيش

_ يا سيف، مش عارفة اقولك اية بجد

* متقوليش اي حاجة، يلا لو جاية انا مستنيكي

_ فوريرة

كلمت بابا استأذنه ولبست ونزلت، وصلت هناك بعد ساعة ودخلت الاستوديو على طول

* عاش من شافك

_ يا كسفتي، طب انا اسفة تاني والله

ضحك* يا ستي بهزر، اتفضلي اقعدي، قوليلي تشربي اية

_ ولا اي حاجة، قولي هنعمل اية النهاردة

* ايوا كدة افتقدت حماسك، بصي يا ستي، الأيام اللي فاتت انتي اتدربتي على إن ازاي تقابلي الضيف وتحاوريه بكل ثقة، النهاردة هنراجع من تاني كل حاجة وبكرا إن شاء الله نبتدي اول حلقات البرنامج

_ بالسرعة دي

* اية، خايفة

_ طبيعي اخاف، بس إن شاء الله خير

* متقلقيش، هبقى معاكي خطوة بخطوة، بس في حاجة عايز اكلمك فيها

_ اتفضل

* انتي دلوقتي بقيتي ملتزمة بعقد وشغل مهم جداً، مينفعش لو حصلك اي ظرف تاني تختفي فجأة، كدة كل حاجة هتقف وتتعطل وهتضيعي فرصة كبيرة اوي من ايديكي، مش بقولك تبدي الشغل عن حياتك واي ظرف طارق يحصل، لكن على الأقل اديني خبر

_ حاضر، اوعدك مش هتتكرر تاني

* وانا واثق فيكي، يلا بينا

_ يلا

حسيت إن اللحظة دي كانت نقطة بداية جديدة، مش بس في شغل، لكن في حلم بيتخلق من اول وجديد على أرض صلبة

دخلت معاه غرفة الاجتماعات وانتبهت لكل كلمة بيقولها

* بصي، أول حاجة هنعملها هنراجع السكريبت اللي هتشتغلي عليه أول حلقة

_ ماشي، بس عندي سؤال، أول ضيف هيكون مين

* مفاجأة، بس أقدر أقولك إنه حد تقيل وهيخلي الحلقة تكسر الدنيا

_ يا نهار أبيض، طب ده ضغط مش طبيعي

* هو صح ضغط، بس كمان فرصة، وانا رشحتك لأني شايف إنك قدها

_ طيب ماشي، وريني السكريبت بقى

فتح اللاب توب اللي كان قدامه وبعدين لفه ناحيتي

* اهو، ده الخط العام، والأسئلة هنا، طبعًا ليكي حرية تعدلي حسب سير الحوار

_ تمام

ابتديت اقرأه وانا مركزة في كل حرف، مكنش كبير للدرجة، لكن اخدنا وقت نتناقش فيه لحد ما استقرينا على الأسئلة الموجودة

_ والله حلو، والأسلوب لايق عليا كمان

* أنا عارف، وده المطلوب، بكرا هنبدأ تسجيل من بدري، فعايزك تنامي بدري وتيجي فايقة

_ هحاول، مع إن الحماس هيخليني مش عارفة أنام

* عادي، أول مرة بس، بعد كده هتتعودي

_ خلاص، أنا جاهزة لأي حاجة

* برافو، وشدي حيلك، إحنا داخلين على حاجة كبيرة

خرجنا من الأوضة واحنا بنتكلم بحماس، خطواتنا كانت سريعة بس وراها شغف كبير، البداية قربت، وكل لحظة بتعدي كانت بتقرب الحلم من الحقيقة

روحت البيت وأول ما دخلت دورت على بابا، لقيته قاعد في اوضته بيقرأ في المصحف فا سيبته يخلص براحته ودخلت اوضتي، قعدت على السرير ودماغي رجعت تفكر فيه من تاني، غمضت عيني بتعب، مش عايزة افكر تاني، دماغي وجعتني، قومت غيرت هدومي وقولت اكلم حنين

: والله؟ لا بجد والله

_ انا اسفة

: يا سلام يختي اصرفها منين، كام مرة كلمتك اليومين اللي فاتو، هتتكبري عليا من دلوقتي

_ اتكبر اية بس يعني فكرك انا من النوع دة

: يعني أفسر تصرفك دة بأية

_ بأني مكنتش في احسن حالاتي، بجد

نبرتها اتغيرت من الهجوم للاهتمام والحنية

: مالك، اية اللي حصل

_ محصلش لكن فجأة حسيتني مش كويسة

مقدرتش اقولها على السبب اللي اختفيت عشانه، مش عايزة اكون وحشة في عين حد أو احس بالشفقة

: اوعي تكوني اتحدستي

_ لا لا مش للدرجة

: هرمونات؟

_ يمكن، قوليلي انتي عاملة اية

: غرقانة في نعم ربنا والله، كنت عمالة اتصل بيكي عشان ابلغك بميعاد خطوبتي من يونس

_ بجد، حددتوها امتى

: بعد بكرا إن شاء الله

_ بتهزري يا حنين، جاية تقوليلي دلوقتي

: انتي عبيطة؟ هل انتي عبيطة؟؟؟؟ مين اللي كان عمال يتصل بيكي ومترديش

_ احم انا

: هستناكي على فكرة تبقي معايا من الصبح

_ دة كدة كدة، متقلقيش، هتعمليها فين

: في قاعة بس البنات لوحدهم والرجالة لوحدهم

_ حلو دة

: احكيلي انتي بقا عاملة اية

_ انا يا ستي هبتدي من بكرا إن شاء الله اسجل حلقات البرنامج بتاعي

: يوغتي يوغتي عليكي وانتي بتقولي البرنامج بتاعي، ربنا يوفقك يا حبيبتي يارب ويكون فتحة خير عليكي

_ يارب والله ادعيلي يا حنين

: بدعيلك على طول، المهم انتي ركزي كدة ومتقلقيش من حاجة

_ سيف هيبقى معايا فا مش قلقانة

: اية اية؟؟ سيف اية يختي

_ هيكون موجود معايا يعني وكدة

: اية الحوار بالظبط يا ست ليلى، الظاهر إن في حاجة انا مش عارفاها

_ ولا اي حاجة والله، بس بصراحة أنا ببقى مطمنة وهو موجود لاني معرفش غيره في المكان

: مممم يعني عشان كدة بس

_ اومال انتي فاكرة اية

: ولا حاجة يا روحي، اهم حاجة ركزي بس

_ خير إن شاء الله

: بقولك اية، باي من غير سلام عشان قرة عيني بيتصل

قفلت في وشي من غير ما تسمع ردي، ماشي يا ست حنين، مهو من لقى أحبابه نسى أصحابه، خرجت برا احضر عشاء خفيف ليا ولبابا عشان انام بدري، بعد ما خلصت دخلت الأوضة ولقيته هو كمان خلص، قعدنا سوا ناكل وسط تساؤلاته عن يومي كالعادة عشان يتطمن، وبعدها شيلت الاطباق ودخلت انام على طول

تاني يوم صحيت على صوت المنبه، قومت اخدت شاور وطلعت من دولابي طقم جديد عبارة عن بلوزة ستان طويلة لونها سماوي على بنطلون ابيض وطرحة من نفس اللون رجعتها على الناحيتين، لبست اكسسوارت بسيطة مع ملمع شفايف وردي وكنت بيرفكت وزي القمر كالعادة، اخدت شنطتي ولبست هيلز مفتوح بكعب صغير ونزلت

بعد ساعة بالظبط كنت وصلت المحطة، سألت على سيف وروحتله مكتبه، خبطت ولما سمحلي ادخل اتفاجأت، " أكرم عز الدين " بنفسه هنا، يعني دة اللي هسجل معاه حلقة النهاردة؟

* ايوا هو أستاذ أكرم مش بيتهيألك

_ انا مش مصدقة عيني، اذي حضرتك

: ليلى ادريس اشطر وأصغر مذيعة في مصر، اذيك انتي

_ الحمد لله، حضرتك اللي هتسجل معايا أول حلقة

: ايوا يا ستي

* استاذ أكرم لما عرف إنك انتي اللي هتحاوريه وافق إنه ييجي

: شوفتك في المؤتمر وفي البرامج اللي استضافتك والحقيقة اني كنت منبهر بيكي جداً فا عشان كدة مترددتش و وافقت اجي

_ حقيقي مش عارفة اقولك اية بجد شكراً اوي

: متشكرنيش، كل الشباب الشاطرة والطموحة زيك تستحق مننا اكتر من كدة

* طيب يلا بينا نبتدي

_ يلا جداً

أكرم أشهر من النار على العلم بجد، هو قدوة لناس كتير، وكل اللي اشتغلوا معاه بيقولوا إنه عبقري في شغله ومفيش زيه، مش بس علشان نجاحه، لكن علشان شخصيته اللي بتفضل حاضرة في أي مكان يدخل فيه

أكرم اشتهر ببرنامجه الوثائقي اللي قلب السوشيال ميديا والتلفزيون وقت ما بدأه، برنامج بيحكي قصص الناس العاديين، بس بطريقة غير عادية، كان بينزل الشارع، يقعد مع الناس، يسمع منهم، ويخلّي كل حكاية فيلم قصير يبكي، يضحك، ويفكر في نفس الوقت، الناس حبته علشان صادق، وبيعرف يوصل لقلب أي حد بكلمة واحدة، بس النجاح الحقيقي بدأ قبل كده

لما كان صحفي صغير في مجلة متتهزش، وكتب تحقيق عمل ضجة عن الفساد في مؤسسة كبيرة، وقتها ناس كتير خافت، وهو لا، كمل، وواجه، وفضل صوته عالي، لحد ما الناس ابتدت تشاور عليه وتقول "هو ده اللي بيكتب الحق"

وبعدها، اتجه للإنتاج، وعمل شركته الخاصة اللي دعمت شباب كتير، وخرجت منها مشاريع غيرت مفهوم الإعلام تمامًا، ماكنش بيشتغل علشان شهرة، كان بيشتغل علشان يؤثر، علشان يسيب علامة، وده فعلًا اللي حصل

كنت بسأله شوية من السكريبت وشوية من عندي انا، كنت عايزة اعرف اية سر نجاحه دة وازاي فضل ثابت رغم كل اللي مر بيه

_ طيب نختم بأخر سؤال، لو رجع بيك الزمن، كنت هتختار نفس الطريق؟

سكت لحظة و كأنه بيسترجع سنين حياته

: بصراحة .. أيوه، رغم التعب، ورغم اللحظات اللي كنت بحس فيها إني مش قادر أكمل، بس كل لحظة عدت علمتني حاجة، وأنا مؤمن إن ربنا بيحط كل واحد في سكته اللي تناسبه

_ جميل جداً، ودي أكتر إجابة صادقة سمعتها

كنت حاسة إن الحلقة دي هتكون بداية لحاجة كبيرة، مش بس ليا، لكن لكل اللي هيسمعوها، خلصت الحلقة وقومت أشكره للمرة التانية على إنه قبل يسجل معايا ومملش من اسألتي، وقبل ما يمشي قالي حاجة رنت في وداني

: انتي شاطرة جداً، فوق ما تتخيلي، إن شاء الله هيكونلك مستقبل باهر وهتقعدي قعدتي دي، والأهم من كدة اني متأكد إنك هتسيبي اثر في قلوب الناس، جواكي حاجة كبيرة اوعي تسيبيها تموت

فرحتي مكنتش سيعاني حقيقي، رقية عندها حق، انا دعوتي استجابت، انا ربنا عوضني، اللهم لك الحمد حتى ترضى يارب، اللهم لك الحمد حتى ترضى، دخل سيف وشوفت في عينه نظرة فخر

_ شوفت، سمعت قالي اية

* شوفت وسمعت كل حاجة، حقيقي انا فخور بيكي

_ كل دة بفضل ربنا ثم انت، لولا مساعدتك ليا مكنتش هوصل

* ابداً، ربنا كتبلك الطريق ومشيتي فيه، انا بس مجرد سبب عشان تكوني هنا، و بشطارتك وعزيمتك بقيتي هنا، على أرض صلبة بقت ملكك خلاص، وبعدين انتي تستاهلي كل جميل .. كل جميل يشبهلك يا ليلى

ابتسمت بخجل على اخر جملة اللي دايماً بيقولهالي، حقيقي هو أحسن واجمل حد في الدنيا، يا سعدها وهناها اللي هتكون معاه