زمهرير الاوجاع الفصل التاسع عشر 19 - بقلم قدر ال هاشم

زمهرير الاوجاع .. حفصه الهاشم صلوا على نبي الرحمه ❤️
ودوسوا النجمه .

. ـــــــــــــــــــــــــ

جَلستُ أُعاتبُ صخراً لا يمدُ للعتابِ بِواصلةٍ..
أُطالبهُ بالوصالِ فيسقي حنينَ قلبي بسنينَ فُراقهِ.
. ويحكَ يا بخيل الطباعِ... أضرمت نارً في قلوبِ الشبابِ..
ويحكَ ان لم تستجب لهذا العاشقِ.. فقد اكتوى من الهوى...
ما قد جعلَ فؤادهُ يصبح للنارِ رمادً هامدِ..

بقلمي ..حفصه الهاشم...

سهند... قاطعني بسرعه// لا ما دتجذب مشيتي عليها الاسبوع الجاي.. صوت بكائي صار يعلوا شويه شويه جاوبته بعصبيه // لاا ما تزووجهاا سييف انتته مو تريد تزووجني اننيي.. جاوبني ببرود// يعني هسه انتي تريديني ..؟ صدوك النعمه من تضيع من ايد الانسان يلا يحس بيها .. // سيف شنو قصدك ..؟ ترا اني ما كتلك ما اريدك لو ما اريدك ليش جنت احجي وياك بالتيلفون وكسرت كلمة ابوي وثقته بيه هم ..وتاليها تروح تزوج غيري!! سيف// هذا الكلام ما ينحجي على التيلفون شوفيلج حجه اطلعي بيها من ابو عباس وتعاي هينه .. قاطعته بسرعه// شلون اطلع ابو عباس واكفلي برج مراقبه.. جاوبني بحده // عجل ابقي بمكانج واسكتي في امان الله.. سد التيلفون بوجهي !! كل عقله هذا اني محترك كلبي وهوه يحجي ويايه بهالبرود هذا ..! مستحيل اخلي يتزوج اني احبه والله اريده..اذبحهم ثنينهم بالعرس .. ما كدرت اروح ابو عباس اليوم عرس ويايه ..حطله كرسي وكعد يم باب الشارع.. بقيت الوب بالبيت ..اخابره ينطيني رفض .. بس لا يسويها من صدوك ويتزوج ..لا لا سهند لا تفكرين هيج.ما يعوفني اكيد ما يعوفني.,. ــــــــــــــــــ

مرت ثلث ايام واني كاعده بالبيت وساكته العطله مالتنه بدت والجامع ما كمت اروحله .. اكعد متأخره حتى صلاة الفجر ما الحكلها .. وهذا كوله من ورا السهر ..الليل كوله اسهره بالتفكير والبجي.. علياء كل يوم تخابرني وعلى اساس تحفزني بس هيه تنطيني يأس بدون ما تحس.. كل كلامها عوفي واتركي وخيولي.. هيه لو تعرف بحالتي جان ما حجت هيج.. باوعت على الساعه بالسته المغرب.. اخذت التيلفون وطلعت رقمه.. اخابره لو لا..! اي سهند خابري نزلي من كرامتج شويه.. خابرت عليهِ يرن يرن وما يشيله .. رجعت خابرت عليهِ مرة الثانيه والثالثه وهم ماكو..

حطيت راسي بين رجليه وكمت ابجي بصوت عالي.. سيف مو هيج والله اني اعرفه ما يسوي هيج بيه.. ااخ يا يسهند لو ما سامعه كلام علياء لو مشيت ورا ورا كلبي وعفت كلامها .. غبيه غبيه.. واني على هذا الحال جان يدك التيلفون.. كمزت كمزه يجوز بعد ما اجيب جهال من وراها.. اخذت التيلفون بسرعه واني اضحك ويه نفسي .. انشالله هوه انشالله هوه.. باوعت على التيلفون والابتسامه مالتي اختفت تدريجياً.. جاوبت يوسف ..وسويت صوتي ما بي شي لا يروح يشك بيه..

// هه هلو يوسف شلونك.. يوسف// هلا بيج زين الحمدالله ..خابرتج داكولج حضري نفسج باجر لو عكب باجر اجي اخذج مادام عطلتي,, جاوبته بتوتر// هاا باجر خليها بعد ..بعد كم يوم مو // مو شنو شعندج بتكريت بعد جيبي كتبج وتعالي هنانه بالعطله هذا قرار ابوج هم .. سهند// انشالله.. سألني بشك/// بعدج تحجين ويه هذا الاسمه سيف.؟ سكتت ما جاوبته ما اكدر اجذب عليهِ هوه افتهمه جاوبني بهدوء // خير انشالله اجي ويصير خير يلا مع السلامه.. //باي.. سديت التيلفون وكعدت احس نفسي ضايعه.. يوسف راح يجي ياخذني وسيف راح يتزوج معقوله هيج ننتهي..! لاا مستحييلل اني الشي الاريده اخذه وسييف هذا الحقيرر موو بكييفه يتزووج والله اذببحه خلي يصطبرلي .. ما صدكت صارت الساعه بالعشره حطيت راسي ونمت .. اريد الوقت يمشي بسرعه التفكير اكلني اكل ... ــــــــــــــ

ثاني يوم كعدت قبل ما يأذن الفجر بربع ساعه .. لبست عبايتي واتجهزت عبالك راح اروح للحرب,, وجهي اصفر ما عدا رجفة ايدي .. سمعت صوت المؤذن بسرعه لبست حذائي وطلعت .. وصلت للجامع جانوا الزلم ديفوتون اني هم نزلت راسي وفتت للجامع مال النسوان .. الحجيه ماكو !! وبنتها هم ماكو.. بس لا صدوك تعبانين من التجهيزات وما اجوي للصلاة..! استعوذت ربي من الشيطان و صليت .. بقيت كاعده على السجاده ادعي ربي ما يفشلني ويا .. اني مقرره اليوم احجي ويا .. ومو حجي عادي ما اخلي يتزوج يعني ما اخلي .. بقيت كاعده على السجاده شلون راح احجي ويا .. تيلفوني مو ويايه جان خابرته .. شكد ثوله اني شكد ثوله.. // ها بويه ما ناويه تكملين استغفارج.. التفتت بفزع وحطيت ايدي على كلبي من الخرعه.. هذا شجابه ..!شوكت اجه اصلاً..؟! كمت وكفت على حيلي وباوعتله بحده وعصببيه لو بيدي جان ذبحته هسه هوه و واكف.. وهوه بكل برود كاعد على الكرسي وديلعب بالسبحه مالته ..! منين اجا هالبرود هذا ..

جاوبته بعصبيه// بللي كمملت ممن زماان بس جنت دانتظررك.. كام وكف على حيله ويعدل بدشداشته السوده..// يااا بوويه سهنند دنتظرني؟ تفضلي بويه شتردين مني أمري.. جاوبته بنفاذ صبر // سييف عووف هذاا الكلاام شلوون تزووج بنتت عمممك.. هاا سييف لعد واني شنوو ليش جنت تحجي ويايييه لععد..

باوع بعيوني بعمق وبهدوء واني محترك دمي وعلى ثانيه دموعي ينزلن عشره عشره // انا انطيتج مهله وانتي ضيعتيها بغرورج وتكبرج قاطعته بسررعه واني ابجي // ماا ضيييعتتها مااا ضيعتتها موو بكيففك سييف ما تزووج انني موو لعببه عنندك تحجي وياييه اشهرر بعديين تكوول ارروح ارروح اتتزووج ..

تقدمت عليهِ وضربته على صدره مرتين من وره حركة قلبي وهوه واكف ببرود ما انطه اي ردة فعل.. // هذااا هذاا التتصرررف موو مالل زلللم سييف موو مااال زززلم لزم ايدي بقوه ودفعني ليورا /// الزززمي حدددج سهنند لا تخليني ابتللي بييج جمم مره كتللج اسيرر على اهللج وانتي ترفضيين وتصديني جمم مرره ..

حطيت ايدي على وجهي وكمت ابجي بيأس // سيف.. سيف انته ما تعرف ابويه ..اني والله ما اريد اجرح كرامتك علمود هاي كتلك مو هسه تخطبني .. باوعت عليهِ مسح وجهه بأيده بعصبيه عبالك ديهدأ نفسه .. جاوبني بهدوء// وانا شكتلج مو كتلج انا احجي ويه ابوج .. // يعني هسه راح تزوج..؟

سيف// انطينه خبر لعمامي ولكرابتنه مابيها رجعه بعد.. باوعت عليهِ بندم .. وهوه يبادلني بنظراته الحيرانه.. جاوبته بصوت بالكوه كدرت اطلعه من ورا البجي // يعني راح تزووج..؟
جاوبني بهدوء// هذا الظاهر.. باوعت عليهِ بحقد // انتته .. انننته وااحد ححقييير سييف واااحد حقيييير ..حقييير..

دار ظهره وديريد يطلع بدون ما يكلف نفسه يجاوبني.. ركضت عليهِ ولزمته من دشداشته قبل ما يطلع.. //سييييف ..

التفت عليه بعصبيه ودفعني وسد الباب ورا عاط بيه بصوته الجهوري وبغضب وحيره // ما تكوليلي شتريديننن شتريدينن رحمه لابووج مو خبلتينييي اخطبج لا ما نصلح سوه ما اريد اجرح كرامتك اعوفج ما اكدر.... اكولج راح اخطب تكومين تبجينن شتريدينن بالضبط فهمينييي

اردفت بصوت باكي واني امسح دموعي /// لا تزوجج اني اعرف طريقنه مسدودد بس ما اكدر اشوفك تتزوجج ماا اكدر اموت والله ابويه مستحيل يقبل ما اريد اجرح كرامتك انته واهلك بس ما اريدك تبتعد

تحول لبركان هائج وكام يكسر شكو تحفيه موجوده بالمسجد وهوه يصيح كلت على ساعه راح يلتمون علينه المنطقه ///خبلتينيي شنو من بشرر انتيي ما تحسيننن جليددد انتيي جليددد كام يضرب على صدره بقسوه وعيونه الي أسرتني وأسرت كل جوارحي تحول لونهن للأحمر القاني ///هذا ..هذا الغبي حبببج انتيي شكد انانييه شكد حقيررره اكولج اخطبببج ترفضين اروح اتزوج غيرررج تبجينن شنوو انتيييي
تقدم عليه بعصبيه وعيونه تبث الشرار واضلمت بسواد الحب لزمني من ايدي قوي وقربني علي لدرجه ما يفصل بينه انش واحد باوعت بعيونه بندم وهوه يبادلني بعصبيه.. هزني من ايدي قوي وهوه يحجي ..وتنفسه الحار يضرب بوجهي // تمسحيين دمووعج وتوليين لبييتج سهنند لاا ابتللي بييج قسسماً بالله .. والله العظييم اذا سمععت صووتج الا اججي اسوويلللج فللقه بنص اهلللج زييين .. ذب كلامه بعصبيه وطلع ..!

باوعت على الجامع بحيره ودموعي تنزل .. هاهيه بعد مابيها امل.. ااخ يسسهند تستاهلين علمود مرة الثانيه ما تمشين ورا كلام الراييح والجااي.. ضيعته من ايدي ضيعتته.. بقيت كاعده بالجامع بين ما اهدئ .. بس جذب اذا هدأت كل دقيقه ودموعي تزيد اكثر واكثر.. احبه اني اريده والله احبه.. شلون بهالسرعه يتخلى عني ..ويروح يتزووج..! كل ما اتخيل عرسهم وشلون راح يكون هوه وياها اموت الف موته ..

لميت شتات روحي الضايعه وطلعت من الجامع مكسوره ..ومخذوله بنفس الوقت.. جنت اتخيل من راح احجي ويا وجه لوجه يلين ويغير قراره بس صدمني بالعكس.. طلعت من الجامع امسح بدموعي ومنزله راسي.. قبل ما اعبر شارعهم استوقفني صوت الكريهه سرمد // ها ياا سهنند صارلنه زماان ما شاايفيج..؟ التفتت عليهِ واني روحي طالعه من أذاني مو من خشمي.. باوع عليهِ بأبتسامه خفيفه // يلا بويه ماكو قسمه شتسوين هههه..
اجانه صوته يصيح على سرمد سيف// سرررمدد تحرررك لشغلللك يللاا..

باوعت عليهِ وهوه ما رفع عينه عليه .. كل ما اشوف طوله الحلو وشخصيته تصرفاته .. اضل اغلط على نفسي .. اني الضيعته من ايدي بكلام علياء ااخ لوو ما ساامعه كلاامها ..بس شيفيد الندم هسه..

...............

.ورا يوم اجه يوسف عليه لتكريت وهذا الثاني هم زعلان مني وما حجه ويايه ولا كلمه .. بس السلام و يلا جيبي الجنط

.. ركبت ويا بالسياره وكلبي محرروك حتى مابيه حيل اكعد ابرر ليوسف لو احجي ويا .. احس الدمع كولها واكفه على رموشي بس واحد يحجي ويايه حرف اكعد ابجي.. حركنه السياره وفتنه من يم فرعهم ..باب البيت مالتهم صاير من يم الجامه مال يوسف.. اول ما وصلنه لباب بيتهم لمحت واحد واكف يم الباب انداريت بسرعه لجهة يوسف اريد اشوفه هوه واكف لو اخو.. وكف السياره يوسف على صفحه قريب من بيتهم وهوه يباوعلي صفح نزل وراح على الكشك الموجود يمهم...

انداريت على باب بيتهم هوه واكف نفس وكفته والسبحه بأيده ويباوع على السياره.. لا والله هذا هوه مدا احلم.. ضليت صافنه عليهِ اريد احفظ شكله ادق تفاصيله اباوع عليهِ والندم ياكل بيه.. شويه وراح يمه يوسف..! كمزت من مكاني ولزكت بالجامه هذا شودا يمه..!؟ باوعت عليهم واحد يسلم على الثاني بحراره .. والظاهر ديتعارفون..

هذا يوسف عليهِ سوالف .. هسه وكته يتعرف عليهِ.. وشنو الفائده من تعارفهم اذا اصلا ماكو شي يربطنه ولا راح يربطنه.. ظلوا يحجون شويه وبعدين اجه يوسف للسياره.. صعد بالسياره و وجهه مزعوج.. حرك السياره ومشه شويه وسألني// هذا سيف مو..؟ جاوبته بهدوء// اي.. باوع عليه بصدمه ورجع باوع على الطريق// وانتتتي شلووون تحجين ويا وهوه رااح يتزووج..؟؟شبييج سهننند اشوو متخبلله فردد نووب...

هوه كاال هيج واني انفجررت بالببجي .. هوه يصيح شبييج وما بقه رزاله ما رزالها .. واني مستمره بالبجي... جاوبته بصوت شبه عالي واني ابجي // بالجديددد خططب يوووسف بالجديدد...من جنت احجي ويا مجان خاطب ..بالجديد كالي راح اخطب..
بديت بنوبة البجي مالتي وهوه ساكت.. شويه هدأ واني هم هدأت بس بداخلي مقهوره حيييل..

يوسف// وليش راح يتزوج غيرج اذا هوه جان يحجي وياج..من حجيت ويا مبين عليهِ خوش رجال.. جاوبته بحركة قلب/ ايي لان اننني غببيه سمعت كلاام عليااء ومشيت وراها مثل الخبلله..تكولي كوليله لا تجي تخطبني ومو هسه وماعرف شنو واني كتله هيج الى ان طك الرجال وراح شافله مره يوسف// من ايدج تستاهلين كم مره كايلج علياء لا اطوخين علاقتج بيها وانتي تركضين وراها ركض.. جاوبته بنفاذ صبر// هيه البنيه شلها دخل غير عود تنصحني.. يوسف// اي مو انتي غبيه وتاخذين النصيحه من الاغبى مننج..المهم اني اخذت رقمه الظاهر الرجال متمسك بيج يجيب ويوصيني دير بالك عليها هاي صارت بنتنه ومن هالحجي.. //اممم خوش..

ـــــــــــــــــــــــــــــ

وصلنه للبيت.. نزلت ويوسف نزل الجنط وكل شويه ينبهني لا تحجين لعلياء وماعرف شنو ..واني بس اجاوبه بأي خوش.. فتنه للبيت بالخمسه العصر .. سلمت على عمتي ام يوسف والولد شكد مشتاقتلهم .. رحت سلمت على عمي سعدون وهوه كل ما اروح وارجع عليهم يشيلني بالصلاوات هلا بنيتي شمعة البيت وماعرف شنو شكد حنين ..ويوسف طالع عليهِ...

بعد السلام والكلام صعدت لغرفتي سبحت شلون ما جان.. وطلعت حطيت راسي على المخده ونمت.. شويه وحسيت واحد نام بصفي .. عرفتها هبه.. فتحت ايدي ونومتها عليها وغطيتها.. هبه// اشو ضايجه سوسه..؟ طبطبت على ايدها وجاوبتها بتعب// من ورا الدراسه ضايجه شويه صعبه الدروس.. رفعت راسها باستني من خدي // اقري زين علمود تصيرين دكتورنه ونجي يمج ببلاش هههه // انشالله حبيبتي ..

شويه وغفت بحضني واني هم نمت وياها .. هاللكد ما افكر بسيف صارت احلامي كولها بهِ واحلام مخربطه هم ادوخ الراس .. ـــــــــــــــــــــــــــــــــــ

فتحت عيني الساعه بالخمسه هبه ماكو الظاهر كاعده قبلي كمت غسلت بخمول النعسه بعدها بيه .. طلعت من الغرفه وصوت هبه تصيح على علياء يم الدرج.. هبه///داكووولج ناايمه لا تكعديهاا تعااالي هاااي شبيييج.. علياء// يووو شوو دوخري عني ما ناقصني غير الزعاطيط وخرري..

باوعت عليهن عبالك ديك ودجاجه واكفات على الدرج وهبه تسحب بعلياء وعلياء تدفع بيها.. نزلت عليهن لا تروح وحده تملخ الثانيه // عليااء ولج لا تدفعيها لا توكع من الدرج.. اندارت عليه وعقجت حواجبها// لا يابه ما توكع لا ادافعين لاختج هاي فوك ما جايه اسلم عليج.. جاوبتها بضحكه واني احضنها// يمعوده قابل هسه اني طاردتج هههه.. هبه// اني كتلها نايمه من تكعد عود اصعديلها ما طردتج ترا.. علياء// دسكتي اسكتتي ام حلك يلا انزلي عدنه سوالف كباار.. سهند// ياا عليااء لا تحجين هيج ويه هبااوي.. جاوبتني هبه وهيه تنزل// لا اصلاً اني ما اريد ابقه هنا مادام هيه هنا..

عافتنه ونزلت .. اول ما نزلت سحبتني علياء من ايدي وصعدت فوك.. فتنه لغرفتي وهيه عبالك مطيوره .. كعدتني على الجربايه وكعدت كدامي.. سهند////هاي شبييج ولج مركبتلج محركاات شكوو.؟ جاوبتني بسرعه// عووفج من محركاتي..احجيلي عن سويفان ..تنهدت بضيق وجاوبتها// علياء سدي الموضوع الرجال راح يتزوج يباوع بعيني بكل ثقه ويكولي مشيتي عليها الاسبوع الجاي..اكوله لا تزوج يكولي تأخرتي واني ما اكدر بنت عمي وماعرف شنو .. جاوبتني بسرعه// اي خيه خيولي اني اصلاً ما حبيته من البدايه امبين ملعب .. ضربتها بخفه على ايدها // عليااء لاا تحجين عليهِ هييج .. // عشتوو انوب ما ترضه عليهِ

...............

بقت علياء يمنه للعشه .. وكل شويه تكولي خيولي وماعرف شنو .. واني ساكته ما اجاوبها .. بقيت يم اهلي يومين .. قرايه مدا اقره شلتها من بالي من ورا التفكير بسيف هملت نفسي كولش هوايه.. معقوله هسه عقد عليها وتزوجها.. ما اكدر اخابره هبه اربعه وعشرين ساعه يمي واذا مو هبه امها ميقات ..مشتغلتلي برج مراقبه اربعه وعشرين ساعه كل ما افتح باب غرفتي الكاها واكفتلي ناطور يم الباب...

ورا ثلث ايام الساعه بالدعش ونص بالليل .. جنت كاعده كالعاده بالغرفه وصافنه على سقف الغرفه وهبه نايمه بصفي.. وتفكيري كوله بسيف .. سمعت صوت التيلفون يدك تجاهلته اعرفها هاي جوري.. فصل ورجع يدك من جديد .. اخذته من الميز واني ضايجه مابيه حيل احجي وياها.. فتحت الخط وخليته على اذني.. فززني صوته العصبي وهوه يصيح عليه بضوجه/// سهننند ويننج يولووو جم دووب ادك علييج يلا تشيليين التيلفون..

ــــــــــــــــــــــــــــــــــــــــــــــــــــــــــ

قدر...

رجع ضغط على ايدي بقوه علمود ما اسحبه // هههه وتريديني اطلك وينعم بيج جمال مو .؟من تشوفين جثتي موجوده بالتابوت عود ذاك الوكت تخلصين مني ..طلاك ما اطلكج.. احنه زلم الشيخ ... ما عدنه نسوان تطلك ولا احنه نطلك النسووان خليها ترجيه بأذانج... سحبت ايدي منه بسرعه وجاوبته بنتر// ماكو هيج شي لعد عمك الشيخ ليش طلك مرته ..احنه متفقين نطلك ابو رامي وانته وعدتني ..لعد نور وين راحت مو على اساس تحبها..

جاوبني وهوه يتمدد على الجربايه ويخلي ايده جوه راسه// ايي نور ماضي وانتي الحاضر..
باوعت عليهِ اريد اشوف ملامح وجها ديشاقه ويايه لو شنو ..!! اذا هوه ينسه نور اني ما اكدر انسه جميل ..

اوس// شبيج بنتي هاللكد معجبه بيه حفظتي شكلي حفظ .. جاوبته بعصبيه// انيي بااجر من نتصاالح اني وابوي اكوله يطلكني مننك احنه هيج متفقين.. جاوبنه وهوه يغطي راسه// اي الله كريم يلا بابا ناميلج شويه ورانه كعده من الصبح..

غطه راسه ونام كل عقله .. عافني بصدمتي وهوه مرتاح.. ههه مو هوه بكيفك استاذ اوس والله ما ابقه على ذمتك اطلك منك وانته حير بنفسك.. اني اعوف جميلي علمود اوس افندي خلي يحلمها بأحلامه.. اخذت جرجف ومخده ونمت على الكاع.. انوب يريدني انام يمه المكروه ..

.................

ثاني يوم كعدت الصبح .. تثاوبت بنعاس البارحه من التفكير مانمت الا واني والوحده.. فتحت عيني وصفنت شويه على الحايط .. اني شجابني هنا ..! اتذكر نمت على الكاع معقوله اني امشي بنومي..!! وخرت الجرجف وكمت بسرعه ردت اوكع على وجهي هاللكد ما الجرجف ملفوف عليه لف..

اوس// هههه على كيفج يابه شنو حلمانه بجني وهيج فزيتي.. باوعت عليهِ واني اعدل بكفشتي ولو هوه سرح بس الواحد من يكعد من النوم لازم يطلع شكله مال وحوش.. // لا بس اني مجنت نايمه على الجربايه شجابني هنانه.. رش من العطر وهوه يباوع على نفسه بالمرايه بغرور , حط العطر على الميز واتقدم عليه // عمي زوجج لاعب اثقال يشيلج ويشيل ابو ابوج بنتي.. كال كلامه وغزملي بنهاية كلامه .. باوعت عليهِ بعصبيه حركاته صايره تحرجني حيل .. رجعت ليورا كم خطوه وجاوبته بضوجه واني منزله راسي //ابو رامي ترا مو حلوات هاي الحركات ..

اتقدم عليه وسحب شعري بأيده وكام يرفع بي على شكل كعكه.وعيونه بعيوني.// ليش يا حركات تعجبج اكثر بس لا مال المخنث جميل..
باوعت عليهِ بضوجه سحبت شعري منه بلا ما احجي ويا .. لبست حجابي وطلعت للحمام.. شكد صايره اكره وجوده من يسوي هاي الحركات ويايه.. بس لو اعرف هايه نور الغبيه وين احت ما ترجعله وتخلصني منه..

..................

تريكنه يم بيت صديقه .. وطلع ابو رامي وحده لبيت ابوي. ما قبل ياخذني ويا يكول اخاف يذبلج كلمه لو يعصب خليني احجي ويا وبعدين اجيبج اله.. بقيت كاعده يم الحجيه ومرته وادعي ربي يحنن قلب ابوي عليه.. وخطيه زوجة صديقه عافت شغلها واجتي تدعيلي هم هههه...

............

بقينه كاعدين للعصر وابو رامي ماكو منه خبر .. واني بديت أيأس .. بالخمسه سمعنه صوت الباب ينفتح وصوت ابو رامي وصديقه فاتوا للاستقبال.. شويه وخابرني على تيلفوني.. فتحت الخط بسرعه وجاوبته// السلام عليكم ابو رامي هاا بشرني شنو كال بابا قبل ارجع..؟! جاوبني وصوته واضح عليهِ الضوجه // جهزي نفسج دنرجع لبغداد .. يلا خمس دقايق انتظرج بالطرمه..

كال هيج وسد التيلفون ... من صوته عرفت الجواب .. كمت بيأس حضرت الجنط وطلعتها هيه صغيره اصلا مو جبيره .. ومرته بقت تتوسل ابقوا يمنه على العشه وابو رامي قافل و وجهه ما يكصه السيف.. فتحنه الباب دنطلع ويه طلعتنه فاتت مرة عمي جمال وبنتها سماح ..

سماح اكبر مني بثلث سنوات.. سلموا على ابو رامي وتعذروا منه على تصرف جميل.. سلمت عليهم وعمتي كل شويه توصيني ديري بالج على زوجج الزمي بيتج ولا تهدمي.. عبالك دتكولي شيلي جميل من راسج ولا تفكرين بي..! سلمت على سماح وهيه لزكتلي الا تنطيني رقمج.. واني هم حسيت مابيها شي اذا انطيتهيا هيه بنيه خوما ولد وراح تحجي ويايه من تيلفون امها.. انطتهيا وسلمنه عليهم وطلعنه...

ـــــــــــــــــــــ

طول الطريق اني ساكته وهوه ساكت .. بس النار بكلبي ماكلتني شكد تمنيت اشوف بيبي لو اشوف امي وخواتي.. الحمدالله على كل حال.. عسى ان تحبوا شيئً وهو شرٌ لكم...

.............

وصلنه لبغداد.. تقريبا الساعه بالثمانيه .. خطيه عمتي مجهزه العشه سلمنه عليها وهيه تجيب وتبوس بأوس.. حيل تحب اوس تكول هذا اخر العنكود من ولدي .. صعدت اخذتلي ملابس وفتت للحمام اسبح .. طلعت من الحمام نشفت شعري ولبست الحجاب علمود انزل على العشه .. نزلت عليهم اوس هم مغير ملابسه يجوز سبح بالحمام الجوه.. جانوا كاعدين بالاستقبال وصابين العشه .. صاحني اوس وهوه يطبطب على مكان بصفه// يلا قدر تعاالي اتعشي ما كلتي شي من الصبح.. // اي..

ابو اوس// تعاي تعاي بنيتي شعندج مستحيه قابل غربه عنج اكعدي بنتي تعشي ولا تستحين اهلج انشالله..
جاوبته واني اكعد بصف اوس// انشالله عمو..تسلم..
ام اوس// اي قدوره شلونهم اهلج والله اني كتله لاوس اريد اروح اشوف اهلج اتعرف عليهم بس اشو ما قبل كال على غير مره انشالله.. جاوبتها بتردد// هه اي انشالله عمه.. كولهم زينين الحمدالله..

همه ما يعرفون بسالفتي فعبالهم رايحه زياره عليهم .. علياء ما موجوده رايحه لبيت عمها جايه بنت عمها سهند ورايحتلها .. خلصت العشه بشلعان الكلب.. اوس يجيب ويحط سمج كدامي ويلا كملي هذا وهذا زين للشعر اكلي ..شبيج صافنه مدي ايدج لو تريديني اوكلج .. وهذا الفطير فراهد يجيب ويضحك..عبالك ديحجي نكته..

لميت المطبخ وغسلت المواعين.. بين ما كملت صارت الساعه بالعشره.. صعدت لغرفتي ولملمت الجنط صاير انفجار بالجنطه .. اوس طلع ويه يوسف واصدقائه.. كعدت اسوي تسريحات بشعري مادام طالع.. سويته ضفيرتين هيه بس هاي الكادره عليها اني ههههه شعري طويل يغطي ضهري واسوود وسحر بس عيبه التسااقط كولش يوكع ..بس مع ذلك مو خفيف زين شايل نفسه.. شويه وسمعت صوت التيلفون يدك.. رحت شلته جانت عمتي ام سماح.. لان اني من انطيتها رقمي سجلته هيه يمي ..ولا اني لا اعرف لا ااسجل ولاهم يحزنون هههههه جاوبته

بسرعه// الو السلام عليكم عمه..
جميل// اني جميل قدووره شلونج ابيي انتي ..؟

شهكت بخوف وضربت ايدي على صدري// عززا جمميل ياا جميل شلون اجه رقمي يمممك عززا
جاوبنه بعصبيه// شبيج قدر بس لا خايفه من هذااك المغروررر اني جمييل ابن عممج ونصيببج هم لوو نسيتي..

ما تحملت كلامه .. اني صح احبه بس هاي تعتبر خيانه لان اني متزوجه اخاف الله يروح يغضب عليه وتنكلب حياتي سديت التيلفون بوجها وطفيت التيلفون من الاساس.. ماعرف شلون انطي بلوك على كولة علياء ولا اعرف امسح الرساله.. اوس ماعلمني شي بي بس شلون اخابر عليهِ ويه ما سديت التيلفون انفتح الباب وفات ابو رامي..! باوعت على ايدي ترجف وجسممي كله يرجف بس لا سمعني ويروح يفكر بغير شي..

باوع عليه ورافع حاجبه سد الباب ونظراته بعدها عليه.. اوس،// شبيج ..اشو صفريتي عبالك واحد جان ديسوي جريمه..! ضميت ايدي ثنيناتهن ورا ضهري والتيلفون بأيدي.. // ههه لا والله ههه يا جريمه هاي .. اتقدم عليه بهدوء نزل لمستوايه وسحب ايدي من ورا ضهري // هااا لعد ليش ضامه التيلفون وراج..؟!!

باوعت عليهِ بخوف ونفسي تخربط من ورا التوتر دارجع ليورا بس هوه سحب ايدي على السرع وعيونه بعدها تباوعلي بشك.. فتح اصابيعي واحد واحد واخذ التيلفون منه بكل هدوء وراح كاعد على القنفه ويباوعلي بهدوء // تعالي اكعدي شبيج واكفه ..؟ بقيت واكفه واطكطك بأصابيعي وهوه فتح التيلفون وكام يكلب بي شويه ورفع راسه عليه // هذا رقم منو..
//ها مال ..رقم هاي مرة عمو والله..
أشرلي اسكت بأيده وفتح سبيكر.. /// الووو قدر وين رحتي...

ـــــــــــــــــــــــــــــــــــــــــــــــــــــــــــــــ

رمضاان كريم .. وتقبل الله منكم الصيام والقيام وصالح الاعمال.. اكثروا من قراءة القرءان بهذا الشهر الفضيل حتى لو صفحه وحده.. تقربوا الى رب العالمين بهذا الشهر ماتعرفون يجوز بهذا التقرب مالتكم لو حتة الاستغفار الله يحققلكم اماني تحسبوها بعيده عنكم...

احبنكم جثير الجثير يدادااا.. دمتم سالمين وغانمين عسلاياتي انتوا..