زمهرير الاوجاع الفصل العشرون 20 - بقلم قدر ال هاشم

زمهرير الاوجاع ..

بقلمي حفصه الهاشم ...
صلوا على نبي الرحمه ❤️.. ودوسوا النجمه يداداا

ــــــــــــــــــــــــــــ

سهند...

جاوبته بصدمه ولهسه اني ما مصدكه هذا هوه.. /// سيف .. هذا انته ..؟
سيف// لا اخو سيف .. عجل منو ياابه ..! ليش ما ترديني على اتصالاتي ..جم مره خابرتج..
// ليش تخابرني مو على اساس راح تزوج
سيف// اي انشالله اتزوج ليش لا .. ومعزومه انتي هم على العرس .. جاوبته بعصبيه // انتتته شكد حقير مخابرني علمود تعزمني للعرس .. قاطعني هوه بحده// اششش صاير لسانج طويل يولوو ليش هيج هذا فراكي غيرج مو زين عليج ابتعد عنج مو .. سكتت ما جاوبته اريد اسأله وما اريد اسأله اتزوج لا ..

اخاف اسأله وجوابه يدمرني بالزايد واني يادوب لازمه دموعي بعيوني .. رجع هوه حجه بجيده // بيت اهلج وين بيا منطقه ببغداد.. جاوبته بسرعه // ليش شتريد من بيت اهلي اقصد شتسوي بي ..؟! سيف // جايهم زياره لجن اعزمهم لعرسي .. جاوبته بعبره واضحه على صوتي // ها مشكور لعد وصلت عزيمتكم .. يلا لعد خطيه ما اريد اعطل عليك وانته عريس اكيد هسه مشغول .. جاوبني هوه بسرعه قبل ما اسد التيلفون |// يول يسهند لا تغابين اذا اني راح اتزوج عجل على شنو مخابرج لهالدرجه اني ناقص ..! بويه الخطبه وفصختها علمودج ..

من سمعت طاري الخطبه كعدت على حيلي من وره ردة فعلي ردت اوكع من الجربايه همزين هبه ما حست .. // يا خطبه قصد مالتك يعني .. لا تشاقه ويايه هيج شقه ترا مو حلو سيف .. الله عليك يعني بطلت بعد ماراح تتزوج .. جاوبني هوه بضحكه// ههههه ول ابويه هيدي هيدي لا يطك بيج عرك .. عجل خطبة منو ابوي .! والله لصتيها انتي عليه بيني وبين عمامي الله وكيلج انشالله اخابر على يوسف واحاجي بموضوع الخطبه وما اريد سيف انتظر سيف مو هسه ترا وصلت حدها ..
جاوبته بضحكه// لا لا ما اكول هاهيه والله بعد ما اكول ههههه ..
سيف// عساها دوم هالضحكه ما اريد بعد اشوف دموعج بعد سهند دموعج تأذيني ..
// اي انته لا تزوج بنت عمك واني ما ابجي ..
جاوبني بضحكه// ههههه بويه جاي اقنع جاهل ههههه .. يلا روحي نامي وانشالله هاليومين تشوفينه يمكم...في امان الله // باي .. .............

سديت منه التيلفون والضحكه شاكه حلكي من الطول للطول .. من الفرحه مالتي الغرفه بعد توسعني... بالكوه يلا قنعت نفسي انام وكل شويه واكول خلي اخابر علياء ابشرها .. بس كلت
هسه تكولي ملعب وما اعرف شنو واطير فرحتي...

.........

مرت ثلث ايام والوضع هدوء واني هم ما كلت لاحد لا ليوسف ولا لعلياء.. صبيت الجاي اليوم بابا كاعد بالبيت ما يريد يروح للمظيف ..صبيتله جاي اله ولعمو سعدون (ابو يوسف)..واخذتلهميا للاستقبال.. جان الباب نصه مفتوحه قبل ما افوت سمعت اسمي والفضول هناانه كتلني ... اعرف النتصت حرام بس شنو الفضول يمزق احشائي..

وكفت على بعد عن الباب واسمع ابويه يكول لعمو // لا اني حجيت وياها على فراهد ورفضت ..عايفها على راحتلها اكو كم شغله ابالي اتأكد منها يلا اتصرف... جاوبه عمو سعدون بسؤال// شغلتيش سهند ورفضت بعد شكو طلابه...؟ // لا هههه مو طلابه قابل غاصبها اني .. يوسف/// شدتسوووين..؟ انداريت على يوسف وقلبي نزل بين رجليه من الهبطه.. // اشش نصي صوتك يوسف بس خلي اسمع شديحجون..

جرني من أذاني من فوك الحجاب وهوه يأنب بيه// انتي ما تبطلين هاي السوالف فضولج هذا راح يعم عليج .. وديلهم الجاي مو برد وتعاي بالطرمه عندي سالفه وياج.. سهند/ اي انشالله .. فتت حطيتلهم الجاي وهمه يباوعون عليه عبالك بيه شي غلط... طلعت ليوسف جان كاعد بالحديقه مال بيتنه رحت سحبت كرسي وكعدت يمه.. سهند// ها شتريد.؟ جاوبني بخبث// لا سلامتج ..بس خابرني سيف البارحه..

عدلت كعدتي وجاوبته بأهتمام//اي شبي اقصد ليش خابرك ..؟يعني شيريد.؟
يوسف// لا سلامتج بس يريد يخطب وحده من بناتنه واني كتله تفضل يخوي كبع واخذ..

جاوبته بسرعه// ههههه اي اي خلي يكبع وياخذ والله خوش رجال ترا هوه بس شنو انته اقنع ابويه الله عليك يوسف هههه اني والله صارلي يومين اكول شعجب ما اجه معقوله بطل بس طلع عند كلمته الحقير ههههه جنت احجي ويا والضحكه واصله لسابع جار باوعت عليهِ هذا صافن عليه ومبتسم // اي اي بعد احجي طلعي الخياس شوكت حجيتي ويا ولج.؟

باوعت عليهِ بضحكه مال غباء المصيبه اني من اتحمس انسه نفسي وابدي اجفص عامي شامي // هههههه شوكت حجيت ويا استغفرالله شنو هالكلام يوسف.. يوسف// اي عمي صدكتج هههه الله يتمملج على خير بس والله متخوف من ابوج لا ينطينه بوري علمود فراهد وهيه سالفة فراهد ما صارلها كم شهر لا يروح يلعب الفار بعقله.. جاوبته بترجي// لالا لاتكول هيج انته قنع بابا عليك الله..

يوسف// اي اكيد انشالله اني كتله لسيف لو منتظر فتره بس هوه راكب راسه ..يلا الله يقدم البي خير .. كام وكف واخذ سويج السياره وتيلفونه ورجع حجه ويايه بحده// وانتي ديري بااالج تجيبين طااري لعليااء.. جاوبته بعدم اهتمام// اي انشالله انشالله.. يوسف// يلا مع السلامه اني راح يم اوس اخاف يسألون عليه وقبل العصر اجي اخاف يجون اهل سيف لازم نستقبلهم.. ركضت عليهِ لزمته قبل ما يطلع // عزاا ليش يجون اليوم ..؟ يوسف// والله يكول اليوم العصر اني كلت لامي تجهز البيت ولابوي وابوج بس ما كتلهم خطابه .. // عزززا يوسف غير تكولي لازم اروح اجهز نفسي واسوي هواي اشياء رووح رووح ما راح الحك.. عفته وصعدت ركض لغرفتي.. بلا هاي سوايه يسويها غير ينطوني خبر.. عود مفاجئه صارت فاجعه... لا لا سهند طاح حضج فاجعه شنو اسم الله انشالله تعدي على خير ..

...........

طلعت الماسكات ورفعت شعري وبديت احط ماسك ورا ماسك.. اليشوفني يكول هذا يوم عرسي هههه مو بس خطوبه.. .......

بقيت للعصر افتر منا ومنا وعمتي ام يوسف تضحك عليه بس هيه تعرف هذوله خطابه اما الباقي عبالهم خطار .. يوسف صارله ساعه من اجه كال خابرني سيف وكال وصلنه.. وصارله بالربع ساعه يدلي السايق على بيتنه والسايق مسطور.. ..... شويه وفات ساهر من الشارع يصيح علينه /// سدووا البرده سدوووا الصخاام اجووي الززلم...

ركضت هبه سدت البرده واني ختلت وراها وفتحت شويه منها داشوفه شلون طالع.. ابويه كولش رحب بيهم لان يوسف كايله شيوخ من الرمادي ومو ضيوف عاديين.. جاي بس هوه وابوو وامه الحجيه واخته .. يجوز بالبدايه ياخذون الموافقه وبعدين يجيب المشيه..! فات هوه وسلم على ابويه صدقه شلون طالع الحقير اشو طالع حيل حلو.. لابس دشداشه سوده والشماخ مزين راسه ونفس السبحه بأيده والمحابس.. هاي السبحه ألا اخاذها من عنده فد يوم..اصبرلي هههه..

ويه فوتتهم اجوي بيت عمي ابو فراهد فات اوس ومرته وعلياء.. وسيف واهله جانوا هستوهم فايتين للطرمه.. هوه اول ما شاف البنات نزل راسه و وكف على صفحه.. يبعد بيتي اني اليستحرم..

وهاي علياء الثوله صفنت عليهِ صفنه مال وحده تعرفه من زمان .. جرتها مرة اوس وفاتوا جوه..والنسوان طلعتلهن عمتي ام يوسف وميقات ديستقبلوهن من باب الاستقبال مال النسوان.. رحت للمطبخ داسلم على علياء وزوجة اوس والفرحه ما سايعتني... اول ما فتت المطبخ اجتني علياء ركض لزمتني من زندي وتحجي ويايه بصوت ناصي و وجها اصفر // سهنند هذوله منو ..؟ ليش جااين .؟ وخرت ايدها مني وجاوبته بضحكه وزوجة اوس تباوع علينه بصمت/// احزري منو ههههه.؟ ولج هذا سيف ابو الدشداشه السودده هههه ..والله جايين ديخطبوني..هههههه بس مو تكولين لاحد الله عليج خليهم يعرفون منهم احسن..

اتقدمت عليه زوجة اوس وبوستني وهيه تباركلي حسستني بفرحه مو طبيعيه عبالك صرت زوجته هسه.. قدر// الف مبروك حبيبتي الله يتمم عليج بالخير انشالله ضحكة خير كولي امين.. // هههه انشالله امين ..ياا ماتعرفت عليج هههه اعذرني والله من الفرحه كمت ما اعرف شسوي ههه قدر//لا خيه معذوره هههه اني اعرفج علياء حجتلي عنكم هوايه .. جاوبته بضحكه واني اباوع على علياء الصافنه عليه ..! // هههه عاد انشالله حجت بالخير علينه... قدر // لا لا كل خير حجت هههه ..

باوعت على علياء وحجيت وياها بالشقه/// ها علووش اشو صاافن هههه الله عليج لا تزعلين ما اعوفج لو حتى تزوجت هههه علياء// هههه يلا امشي خلي نسلم على اهله.. ضربت على راسي بخفه// ههه يوو نسيت امشوا خلي اعرفهم عليكم كولش حبابات.. اخذت اني العصاير من علياء وهيه ذبحتني اني اوديهن اني اوديهن إلا اجتي عمتي ام يوسف وفضت النزاع وعلياء ضاجت ماعرف ليش هنه عصاير والضيافه لازم البنيه الي راح يخطبوها تقدمهن علمود لا يخربطن بين البنات..

المهم هيه بقت مطنكره طول الكعده واني فتت عليهن والحجيه ماشالله فضحتنه اني سويت نفسي ماعرفهم علمود ميقاتووو لا تاكل راسي.. الحجيه// هلا يمه هلا بيج يول يسهند ضايجه عليج جثير والله الجامع اظلم من دونج.. بوستها من راسها احتراماً لكبر سنها..// ههه حبيبتي خاله والله اني مشتاقتلكم هوايه زين سويتوا بزيارتكم النه..نورت بغداد كولها.. الحجيه// النور نور اهلها يمه... سلمت على اخته هند وهيه كالعاده تسلم من وره خشمها..

بقينه كاعدين وسوالف الحجيه ما تنمل .. وعلياء خاتون صاحبتلها هند عبالك تعرفها من زمان..! توالموا كولش..هههه شويه وحجت الحجيه ويه ميقات عود على اساس هيه ولية امري عشتوا.. الحجيه/// والله خيه جاييكم بطارجة خير وعلى سنة الله ورسوله ناوين ناخذ هالحليوه هاي لبنه .. جاوبتها ميقات وهيه تباوعلي صفح ههه /// اي حجيه هلا بيكم من ممشاكم لملكاكم بس لازم ناخذ رأي الشيخ ابوها وتعرفين يجوز ابن عمها رايدها ما نكدر نوكف بوجهم بعد..

باوعت عليها بصدمه شكد حقيره هسه انتي على شنو تحجين هيج كدامها..؟ لو ما جاوبتها عمتي ام يوسف جان كمت اكلتها بسنوني لهاي ميقاتوو.. ام يوسف// لا خيه نتشرف بيكم انشالله ناخذ رأي الشيخ والبنيه ونردلكم خبر وما يصير الا اليعجبكم انشالله.. جاوبتها الحجيه // تسلمين يمه والله سألنه عليكم وناس معروفين ابغداد وسمعتكم صابقتكم بس ما دريت ابن عمها رايدها..
ام يوسف// اي حجيه بس كل شي مو بالزور القرار الاول والاخير بأيد الشيخ والبنيه وابنكم هم ماشالله مو كاصر..الله يقدم بي الخير.. الحجيه// انشالله ... .......

اباوع على الحجيه وجها امتعض عبالك ضاجت.. ومن تباوع عليه تبتسم بمجامله..! بس لا راح تبطل..!

صار عندي واهس كل ما اشوف شي اكول راح يبطلون.. .......

بقوا شويه كاعدين وعلياء اتجيب وتقدم للحجيه اشكال والوان مره عصائر مره حلويات واتجيب وتمسح بيها للسته المغرب صاحوا الزلم يريدون يروحون.. سلمنه عليهم وطلعوا... واني سويت نفسي عاقله كمت الملم بالمواعين والاستكانات وابويه واوس ويوسف وعمو بالاستقبال..اريد اروح اسمعهم شديحجون بس العيون كلها عليه.. علياء راحت كعدت على التيلفون..وبعدها ضايجه مني ..! وقدر كامت تلم ويه المطبخ لان انكلب ماشالله.. شويه وفات اوس وجها ثكيل.. سهند// السلام عليكم شلونكم اوس ما لحكت اسلم عليك من هوسة الخطار.. جاوبني بثكل نفسه ما تغير عبالي شويه من يتزوج راح يفك العقده ولو هوه زواجه بس شكلي انشالله نور تغيره ههههه اوس/// الحمدالله زين نسأل عليج

/تسأل عليك العافيه.. باوع على قدر بخزره وكاللها// يلاا تجهزوا دنرجع للبيت اريد انام من وكت ورايه كعده من صباحيات الله.. قدر// انشالله.. رحت صحت علياء كتلها اخوج يريد يروح ..لبسنه عباياتنه وطلعنه.. خطيه سهند طلعت دتسلم على علياء بس هيه ما سلمت عليها ركبت بالسياره وعافتها صافنه بالطرمه.. سلمت اني عليها وطلعت ...

..............

من اخر موقف ويه اوس هوه ميحجي ويايه صارله ثلث ايام..

من اخذ التيلفون وخابر على رقم عمتي واني متأكده هذا رقم عمتي شلون اجه يم جميل ماعرف.. جاوبه جميل عباله اني // قدر وينج وين رحتي.. هوه سمعه لو اتخبل لزمه فشار وغلط لازم التيلفون بأيد وايده الثانيه لازم ايدي بيها.. ويهز بيه يمنه يسره ويحجي ويا.. /من الخوفه الصارت عندي كلت هسه يموتني ويروح يموته لجميل هم..

اوس/// لاخرا بشااربك ياا ناااقص وصللت بيك المووااصيل تخاابر عليهاا بالختلااات الا اسحللك سحللل يا كووواد..
جميل/// هههه ديلا يلا هم مصدك بنفسك انته ..البنيه وما تريدك شعندك لازززك علينه .. اوس// اجيي لبيتتك واشووفك شلوون الززززكك بالحايط اصبررلي ..الا انعل شيب الخلففففك

سد التيلفون وهوه مفور من عنده .. باوع عليهِ وعيونه احس بيهن راح يطلعن من مكانهن اني من الخوفه نزلت راسي بسرعه.. هزني قوي من ايدي ويصيح عليه /// موو مرة عمممج مووو قندررره اتجذبيين عليه..توصل بيج المواصيل تحجين وياا بالختلااات.. لزمته من ايده الي لازمني بيها علمود اخاف يضربني الزم ايده بسرعه والضربه تطلع خفيفه..

// ابو رامي والله مجنت اعرف هذا هوه والله..
نتر ايده مني ودفعني على القنفه مسح ايده بوجها بعصبيه عبالك ديهدأ نفسه وباوعلي بنظرات لو تقتل جان هسه اني بالكبر اوس/// شجاااب الصخااام علييج..؟

قدر// واله..اقصد والله ما اعرف عمه كالتلي انطيني رقمج هيه وسماح وانطيتها التيلفون اني تحطه بي والله.. اوس/// ومنيه هااااي لطاااام ... قدر// بنت عمي ..

اتقدم عليه وكام يضرب باصابيعه على راسي ويحجي بعصبيه// هذااا هناانه شنوو شحااطه هنااانه ..؟ شلوون تنطيين تيلفووونج بأيد الراايح والجاااي غبببيه انتي.. اخذ التيلفون وطلع من البيت كله.. من ذاك اليوم مرت يومين بس هوه لا يحجي ويايه ولا يباوع عليه ..بس والله اني ماعرف شلون اجه الرقم يم جميل.. اني حتى التيلفون ماعرف استخدمه بس اخابر على اوس لان هوه علمني بس هيج .. وحتى اني ما احتاجه ...

.............

رجعنه للبيت .. نزلنه بس اني وعلياء وهوه طلع بالسياره..! بلكي الله ترجعله نور ويهدأ علينه.. رحت نزعت عبايتي ونزلت يم عمتي ام فراهد (هم نسيت شنو سميتها ههههههه) جانت دتسوي عشه تكشر بالبتيته وتحجي ويه اخوها ابو آزاد ..

كعدت يمها واخذت البتيته اكشرها عنها .. وهيه راحت تحجي ويا بالهول ..شويه واجتي علياء معصبه.. من اول ما رجعنه هيه معصبه وبس تنافخ.. ما معقوله علمود سالفة الضيافه لان ما قدمتهن هيه ..!!

سحبت كرسي وكعدت كدامي..وكامت تاكل بأظافيرها وتهز برجلها.. استمرت على هالحال لدقائق وترتني حتى اني .. كلت شويه خل اخفف عنها يجوز ضايجه من شي .. قدر// لوله شبيج اليوم اشو ضايجه..بس لا علمود الضياافه..!!؟ اخذت البتيته وكمت دا اغسلها .. كامت من الكرسي وجاوبتني هيه بهالاثناء بعصبيه وصوتها عالي كولش // انتتي يااريت تنجببين زييين ماا الج دخخل ليش اني زعطووطه علمود اضوج على هيج ساالفه..!

جنت بعدني شايله البتيته واحجي وياها.. باوعت عليها بصدمه هاي اول مره تغلط عليه هيج ..! قدر// ميحتاج هالغلط عمري بس شفتج ضايجه كلت خلي احجي وياها شويه علمود تفك.. كعدت على الكرسي وعوجت حلكها عليه // ديلا يلا سويلنه العشه ما بغه وغت علينه.. باوعت عليها بحيره ..! الله يهديها عود هاي اكبر مني وهيجي تسوي ..

يلا معذوره كل انسان تجي لحظات يعصب بيها ومايعرف شنو يحجي بيها... غسلت البتيته وهيه رجعت سألتني. // شفتي سهند شلون فرحانه عبالك ما شايفه رجال..كبر على هيج بنات.. جاوبتها بضحكه خفيفه// ههه لا خطيه يجوز تحبه الله يتمملها على خير.. كامت من الكرسي وجاوبتني بعصبيه ..!

//اي مو انتي هم مثلها من انتي بطول النعال لفيتي على اخويه ومانعرف شلون اخذيتي لا عرس ولا صخام بعينج ما صدكتي تعلكي بركبتج طااح حضضضج..

انداريت عليها وفاتحه عيوني عليها بصدمه على صوتها اجتي عمتي وفراهد جان نايم بالاستقبال جاوبتها بس بالكوه حابسه دموعي بعيوني // عليااء شنو هالكلام ترا اني مرة اخوج وما كتلج شي يضوج عيب عليج هذا الكلام .. اشو هايه اتقدمت عليه بسرعه وسحبت الطاسه مال البتيته من ايدي وشمرتها على الارض ..وكامت تصيح عليه علياء//// انجبببي موو انتي المانعررف منويين جااايه تعلميني الادب والعييب

باوعت عليها بعصبيه وعيوني حادتهن عليها ..عاطت بيه بصوتها العالي // نزللي عيننننج نذللله... اتقدمت عليه وضربتني راجدي فرت بي راسي فر...!

ــــــــــــــــــــــــ

سهند....ورا ما راحوا بقيت انتظر شوكت ابويه يصيحني علمود يحجي ويايه بالموضوع.. اشو طول حيل مرت يومين وهوه ما منطي جواب .. يعني ما رايدلها روحه للقاضي هيه بس كول اي وفضت راحت...ههههه ماعرف همه طولوا لو اني مستعجله هههه...

جنت كاعده بالغرفه بالليل بالتسعه ونص اجتي هبه تضحك عليه الحقيره /// يلا يلا يحلوه روحي على ابوج يريد بموضوع ومانعرف شنو احنه الموضوع ترا .. لبست حجابي وجاوبتها واني انزل على الدرج بسرعه // ههههه اي اي ما تعرفون مساكين .. صاحت عليه من ورايه بضحكه/// هههه ولج سوسه على كيفج هسه يكول هاي بنتنه فلتانه ..

وكفت شويه وسويت نفسي ثكيله وعود استحي .. نزلت على كيفي ورحتله ... فتت للاستقبال جان كاعد هوه وعمي ويوسف.. عبد الجبار// تعاي بابا اكعدي هنانه.. سوالي مكان يمه رحت كعدت يمه وعود اني ما اعرف شي ..

عبد الجبار// بنتي انتي كبرتي .. والبنيه بطبيعتها لازم تكون حريصه على بيتها واهل بيتها .. سواء يم ابوها لو يم عيالها .. وهايه سنة الحياة كل بنيه تعيش يم اهلها الى ان الله يفتحلها وتروح يم بيت زوجها ...والبنيه لازم ادير بالها على زوجها على نظافة بيتها واهلها .. واهمشي لازم ادير بالها على صلاتها هيه واهلها .. وتخلي بيتها عامر بذكر الرحمن علمود الله يرفع من شأنها بين الناس ويرفع شأن اهلها وزوجها هم ..

جاوبته واني اهز براسي // اي صحيح والله .. ليش شصاير ..؟
اردف بتفهم وهوه يطبطب على رجلي// هذوله العالم الاجوي اليوم .. الظاهر همه وياج بنفس المنطقه يكولون شايفين اخلاقها وسائلين علينه ومنطيهم العالم كل الخير عنه ..واني هم سألت عن الولد وعمامه ما منه قصور ..ونعم الرجال. شيخ جامع واستتاذ جامعي..والله اني ما اريدج تروحين للغريب وكلت لعمج سعدون ما اريد انطيها ونكوللهم ماكو قسمه..بس الظاهر هوه اله رأي ثاني

جاوبه عمي سعدون بسرعه واني احس كلبي نزل بين رجليه// لا ما يصير هيج حتى الله ما يرضها اسأل البنيه شنو رأيها مادام الرجال مسلم ويخاف الله حتى الله يغضب علينه اذا رفضنه بدون سبب..

باوعت على ابويه واني بودي أأيد كلام عمي بس لا يروح يجيني راجدي مرتب من الي بصفي,...

عبد الجبار// اي وعلمود هاي هسه داسألج تريدين الرجال خيرٌ على خير ما تردي هسه اخابرهم ونرفض السالفه كولها...

جاوبته بسرعه من فرط غبائي// لالا بابا ليش نرفض ..! اقصد ءء شسمه ..اقصد يعني اذا يخاف الله وشيخ جامع واني اريد واحد متدين يصوم ويصلي علمود يخاف الله بيه
طبطب على رجلي واحس نظراته ما مقتنعه بكلامي ..// هاهيه خير انشالله اني راح امشي على رأيج وخاطر عمج وإلا اني ما بنفسي تروحين للغريب..

عمي سعدون// لا انشالله اتم عليهم بالخير هاهيه خابر العالم وبشرهم ..
كام ابويه وعمي واني هم كمت وياهم .. باس راسي ابويه بس ما عاجبه كل الي ديصير ..!

// الله يقدملج البي خير ..

سهند// امين..

............ يومين وانتشر الخبر بين عماتي وعمامي سهند راح تنخطب..
فرحتي طيرتني ليفوووك فوووك الغيوم عيشتني بحلم .. ادعي من الله انو يتحقق..

ــــــــــــــــــــــــــــــــــــــــ

.سوولي تاكات لصديقاتكم بنواتات ..
وادعولي ما اتأخر عليكم هههههههههه