زمهرير الاوجاع الفصل الثامن عشر 18 - بقلم قدر ال هاشم

زمهرير الاوجاع..
حفصه الهاشم... صلوا على نبي الرحمه ❤️ ودوسوا النجمه..

ــــــــــــــــــــــــــــ

اراكَ قريباً للعين بعيداً للمنالِ.. فيا ويلُ حالَ حالي في عشقكَ..
اَبصَرتُ نظرات الناسِ فيكَ فَمتُ حيا.. ودُفِنتُ في تراب الغيرةِ ما دمتُ حيا...
بقلمي حفصه الهاشم...

ــــــــــــــــــــــــــ

سهند.. قاطعني هوه بسرعه// سهننند لا تحجيلي عن جووري احجيليي عن سييف

انصدمت من كالي اسمه...منوين يعرف سيف.. عزا شجاوبه ..شكوله.؟ احس وجهي صار اصفر من الخوف عيوني رأساً نعسن جاوبته بغباء عود ما اعرفه// هاا يا سيف .؟ منو سيف..؟
جاوبني هوه بصوت هادئ// سهند احجيلي منو سيف ترا المصادر الاجتني موثوقه.. من شوكت صايره تضمين عني ولج هاا منو هذا سيف ..بس لا هذا الشفنا يم الكشك من اجيت اخذج ..
هوه يحجي ويحلل واني صافنه منوين عرف صفنت وهوه يحجي ويايه ..ماكو غير علياء اني ما كلت لاي احد بس علياء!! جاوبته رأساً بدون ما انتبه على نفسي// منوين عرفت يوسف ها بس لا هاي عليااء الحقيره والله الا ازاعلها ..

جاوبني هوه بمكر// هاا موتكولين ما اعرفه ..ليش ضامه عني سهند هاا.. لازملج توثيه اني لو شنو..
// هاا ..لا والله بس شنو يوسف .. هذا يعني صح انطاني رقمه .. بس شنو والله رجال محترم ها وابد ما سوالي شي ومن حجيت ويا ما اتجاوز بالكلام بس كالي اريد اجي اخطبج وبس ..بس شنو اني الي اجلت الموضوع.. يوسف// وليش أجلتي..؟ تحبي لو لا..

بقيت ساكته .. اي احبه بس خايفه من سالفة الارتباط..وزواج ازل عندي اكبر دليل على فشل الحياة الزوجيه..
يوسف// خير انشالله ممنوع تحجين ويا بالتيلفون سهند .. واني هاليومين وجايج واشوف الولد ويصير خير..يلا في امان الله

// يوسف يوسف انتظر حباب راح تكول لبابا عليه..؟
جاوبني بسرعه بس صوته مبين عليهِ ضايج// دننجبي شكول لابوج يعني ثوله انتي ... روحي هسه عندي شغلل ومثل ما كتلج ممنوع تخابري سهنند.. / انشالله ما اخابره .. // في امان الله .. ......

سديت التيلفون والخوف اكلني .. صدوك هاي الي يسوي مكسوره يبقى خايف طول الوقت .. بس لو اعرف هايه الحقيره علياء شلون تكول ليوسف عليه.. خابرتها رأساً شالته من اول رنه..علياء// ها حووبي سهند شلونج شخبارج

جاوبته بعصبيه// الحمدالله زينه // شبيج منو وياج بس لا سيف.. احجيلي شسوالج..؟
جاوبتها بصياح// لا مو سيف ويايه انتي الي ويايه ..علياء شلوون تكولين ليوسف عليه هاا شلون تفتنين عليه شبيج عليااء..
جاوبتني بصوت هادئ// ياا يا هاي شبيج سهند انتي مو تكولين يوسف مثل اخويه وما تضمين شي عنه اني كتله علمود ينصحج ويحجي وياج لان ادري بيج ما تسمعين كلمتي وراح تضلين تحجين ويه هذا سيف..

// وعليااء بلا هذاا حل هذا ادري يوسف مراح يسويلي شي لان يعرف اخلاقي شنو .. بس هسه اكيد زعل مني وضاج وكوله من وراج ..المن كلتي بعد ها.
ردت بأستغراب// يااا هاي شبيج سهند المن اكول قابل اني كلت ليوسف لان اعرف بي ما يحجي لاحد.. والله ما كلت لاحد. //خوش خوش باي .. جاوبتني بسرعه قبل ما اسد التيلفون///سهند سهند .خوما زعلتي مني ترا زعلج ما يهون عليه // لا ولج ما ازعل منج بس شويه ضايجه علياء// ها دخوش روحي ارتاحي بالليل اخابرج عود.

..... سديت التيلفون منها .. كولش ضجت منها .. على شنو تكول ليوسف لو اريد جان كتله اني .. من الخوفه الصارت بيه نعست

.. حطيت راسي على المخده ونمت.. ما كعدت الا والساعه خمسه .. صايره تنبل مال نوم اني.. كمت نضفت الشقه التراب عاميها عمي ..كملت تنضيف شي بالساعه هههه كعدت شويه على دروسي ..احضر بيهن وخلف الله على ملخصات جوري جان دحت بلياهن.. اندك الباب ..كمت دافتحه اكيد هذا ابو عباس..

// منو.؟
// اني اني بنيتي افتحي الباب هاي مسواك من ابوج

فتحت الباب وخطيه ابو عباس محمل بالمسواك اخذتهن من ايده وفوتتهن للمطبخ ..و وديتله كلاص مي // تفضل عمو, تسلم عمو ليش تعبت نفسك.. ابو عباس// لا يابوي ماكو تعب هاي كولهن من ابوج هوه وصاني عليهن ,,يلا ابوي اني اتوكل ديري بالج على نفسج.. // الله وياك عمو.. ....

سديت الباب منه ورحت على المستواك جوعانه خلي ادلل نفسي اليوم.. بلكي انسه سواية علياء .. طلعت علبة مرتديلا وخليت اللحم شويه على النار و وراها طكيت فواكاها بيض .. صح بالليل مو مال بيض ..بس هوه اصلا اني الصبح ما اكله فعادي اكله بالليل ..هههه .......

واني دا اكول جان يدك التيلفون.. باوعت عليهِ سيف.. انطيته رفض .. اني كلت ليوسف ما راح اخابره ..قويت نفسي وانطيته رفض.. رجع خابر مرة الثانيه هم انطيته رفض.. والثالثه والرابعه ..
هسه هوه ليش يلح عليه..مو دانطي رفض ..استغفرالله.. شويه ودز رساله.. فتحتها بسرعه عبالك ما مصدكه.. جان كاتب بيها.. (يول يسهند هم رجعنه لنفس الحنه.. ابويه افتحي التيلفون احاجيج بموضوع..)

شويه ورجع خابرني انطيته رفض ودزيتله رساله (سيف بعد لا تخابر فدوه ترا ابن عمي عرف وعصب عليه كولش لا تلح عليه عفيه.) سويتلها ارسال وكعدت انتظر جوابه.. خرب حضج علياء على هالدكه .. هسه انتي على شنو دتكولين ليوسف.. ما دزلي رساله خابرني ورا ثواني واني هم رجعت انطيته رفض.. دزلي رساله كاتب بيها (افتحي خل افهم السالفه)..

رجع خابر واني صافنه على التيلفون .. من بعد تفكير عميق والتيلفون يدك ..فتحت الخط وحطيته على اذني .. اول ما فتحته هوه يحجي بسرعه ومبين عليهِ منفعل حيل .. سيف// الو سهنند ابويه انه شكتلج مو كتلج اجي اخطبج .,عجل ليش هسع ما جاوبيني ليش خايفه من ابن عمج انطيني عنوان اهلج ابغداد واروحلهم باجر من الغبشه ..الو وينج سهنند.
/وياك سيف بس صعبه احسها . جاوبني هوه بسرعه// ليش صعببه ابوويه انتي ..هيه رايدلها روحه للقاضي ..سهنند ابنن عممج خووما حاط عينه عليييج..؟

جاوبته بسرعه// لا لا والله هذا يوسف مثل اخويه بالعكس.. قاطعني هوه بشك// يااهو يوسف هذا الي اجه مره اخذج..؟
سهند// اي هوه . جاوبني هوه بس صوته مبين عليهِ ما مرتاح للسالفه// هاا خير انشالله .. وانتي هم ابويه لا تضربين ميانه ويه ولد عمج .ابوج شعجب يخلي يجي عليج وانتوا وحدكم هاي وين صايره..

جاوبته بعدم اهتمام //اي عادي مو احنه عايشين سويه من احنه وصغار فمتعودين
سيف// هاا خير انشالله..ولد عمامج شكثرهم..؟ جاوبته واني افكر // هاا خلي اعدهم ..ساهر وقادر ويوسف واوس و ..يعني تقريبا سبعه لو ثمانيه . // ها هوايه ماشالله.. وامج موجوده.؟ جاوبته بتوتر // ههه اي لعد شلون ..الحجيه شلونها.,.

سيف// الحجيه زينه زينه تسلم عليج..

..........

بقينه نحجي اني ويا اخذني الوقت ويا هاي عود اني ما ردت احجي ويا واكسر وعدي ليوسف.. بقه يسألني عن اهلي واني اسأله عن اهله .. بس اسألته هوه اكثر هههه خوالج شلونهم ..عبالك راح يناسب خوالي.. كل دقيقيه والثانيه خوالج وخوالج..واني ارجع اغير الموضوع.. بس هوه وين من يلح على شغله الا يعرفها يلا يرتاح.. سديت التيلفون منه بالعشره ونص .. وهوه معصب وين رايحه بعد وكت دجاجه تنامين هسع.. .......

انتظرت يوسف يجي عليه هوه كال هاليومين واجي بس ما اجه.. وحتى اخابر عليهِ ما يجاوبني.. تصرفه يقهرني اعرف بي مستحيل يحجي لابويه شي بس اني ما متعوده عليهِ هيج كل ما اخابره ما يجاوب لو ينطي رفض .. مرت يومين ويوسف ماكو .. خابرت على ساهر سألته عليهِ كال ابن خالتهم مسوي حادث ورايحين عليهِ ومتوفي الولد ساعة الساعه.. ويوسف واكف وياهم بالفاتحه.. همه خوالهم مو ببغداد بالمناطق الصايره على اطراف بغداد ..

علياء بقت كل يوم بالليل لازم تخابرني تعودت عليها كل يوم لازم احجي وياها..واحجيلها عن سيف وشلون اطورت علاقتي بي وهيه هم تبقى تسألني عن سيف شنو سوه شنو حجه ويايه.. بالبدايه جنت اكوللها ما كمت احجي ويا وبطلت .. بس بعدين كمت ما الزم نفسي بس تسألني اخرطلها الاول والتالي هههه.

اما سيف وما ادراك ما سيف.. سيف كل يوم تقريباً احجي ويا مرت ايام واني ويا متواصلين.. وطبعا المكالمه ما تخله من مناكرتنه .هههه وهوه يجيب ويسألني على اهلي ومن اكوله شعندك بأهلي يكولي اي غير راح اجي اخطبج لازم اعرف تفاصيلهم كولهم.. وسالفة الخطوبه كولش يلح عليه .. مرات يكولي انطيني رقم ابوج واني افهمه السالفه.. ومرات يتعارك ويزعل من اكوله اصبر هالفتره مو هسه تخطب .. بس هوه ما يعرف ابويه اني حافظته حفظ.. اذا اجه هسه خطبني واني وافقت راح يكولي عندج شي ويا ليش لعد من اجه فراهد خطبج كلتي دراستي.. ابويه وحافظته حفظ...

وبالجامعه ولا عبالك يعرفني .. هذا الشي احسن الي ..لان جان قبل لو يصفن عليه لو يذبلي كلام .. وانوب اني استحي من جوري لان اغلب الوقت ويايه ... ........

سديت الكتاب وشلت التيلفون .. الامتحانات على الابواب واني صايره حيل مهمله بدراستي.. سيف دائما هيج وقت بالتسعه يخابرني.. وصدوك صارت بالتسعه جان يخابر.. // الو..
جاوبني بصوت متعوب// هلا سهند شلونج ابويه..؟

سهند// الحمدالله زينه اني ..انته شلونك عبالك ضايج! ..
تنهد وجاوبني// اي والله ياابه تعبان وانتي ما تحنين.
//ليش شصاير شمسويه اني..؟
سيف// شنو شمسويه كم مره كتلج راح اجي اخطبج وانتي راسج اليابس مادري ليش ما ينكسر ؟ شبيج ابويه انتي ليش رافضتني.؟. جاوبته بسرعه// لا والله سيف ما رافضه بس ابويه ميقبل هسه ..والله اني اعر..
قاطعني هوه بصوت عالي// موو كتلج اننه احجي ويااا و افهمممه ليييش ما يقببل ..من احجي وياا يقبل.بس الظاهر انتي ماخذتني لعب //سييف ليش تحجي هيج والله مو هيج قصدي بس افهمم..

اشو هذا صاح بيه فجأةً// لا افهمم ولاا هم يحزنوون الج مناا لتلث اياام اذا ما نطيتينيي عنوان اهلج ..اتصرف تصرف قسم باللهما يعجبج زيين رجال شكبرني المنطقه كلها تعرفني شيخ جامع وسمعتنه سابقتنه..بلا لو يعرفون احجي وياج بالمخاتل شيكولون ..سهنند مجاال بعد مابيهاا زين وريتينيي ورر الج هالمده وبس في اماان الله..

صفنت على التيلفون ..! كل عقله هذا ..ادري اذا راح يجي يخطبني هسه وابويه رفض احنه شنستفاد.. كل مره يلح عليه علمود الخطبه بس هاللمره زودها حيل.. .. ثاني يوم بقيت انتظره بالجامع بلكي اشوفه علمود اتفاهم ويا .. بس ما اجه ولا شفته بالجامع..!! كلت تمام عود اشوفه بالكليه.. وهوه هم للكليه ما اجه.!! ..ادري شنو معنى تصرفه هذا.. هاي اذا من هسه صياح وعصبيه لعد اذا تزوجنه شلون .! رجعت للبيت خابرت علياء رأساً.. حجيتلها كل الصار .. /// علياء كولي شسوي ..اكوله يجي يخطبني.والله احبه اخاف يضوج مني ويعوفني..

علياء// لا عيني ديريي بالج تكوليله تعال اخطبني ..خلي هذا اختبار اله شوفي يحبج لا يالثوله جاوبتها واني ابجي// ولج انتي شبيج.؟ الرجال يكولي اريد اجي اخطبج وانتي تكوليلي اختبري.! علياء// اي ااي هاي النماذج اعرفها كولش زين لا تنخدعين اصبري عليهِ هاي التلث ايام خنشوف شيسوي ..واي شي يصير وياج خابريني.. //انشالله باي.. .....

علياء ردتها عون صارتلي فرعون.. كلامها ما ريحني يجوز يعوفني ..اذا ما كتله تعالي اخطبني..!؟ .........

بقيت هاي التلث ايام عايشتهن بحيره.. وهوه يجي للكليه بس ابد ما يباوع عليه وجهه ما يكصه السيف.. وابد ما خابرني ..ولا اني خابرته.. خلصت المده مالته ومرت وراها اربع ايام وهوه ماكو لا يحجي ويايه ولا شي .. كعدت الخميس الصبح والجامع ديأذن.. لبست عبايتي وطلعت للجامع.. امشي بالطريق واسأل نفسي راح اشوفه لو لا..!! مشتاقه لسوالفه حيل .. فتت للجامع الحجيه ما جانت موجوده موجوده بنتها هند.! وكفت صليت .. ودائما ورا الصاله ادعي ..بس من عرفت سيف الى الان دعائي كوله عن سيف.. باوعت عليها جانت كاعده هم دتسبح..! سبحان الله انهدت البنيه.. باوعت عليه وابتسمت اني هم ابتسمتلها بأستغراب.. هند// شلونج سيان..شسمج؟

جاوبتها بأبتسامه// سهند ..الحمدالله انتي شلونج.. تنهدت بتهب وتربعت // اييه خيه والله ملتهين هالايام نجهز لخطوبة اخويه وتعبانين جثير تعرفين شيوخ والعالم تتعنه علينه من كل صوب..

جاوبتها بفرحه// ها الف مبروك يستاهل سرمد خوش سرمد. بكلبي اكوللها خوش مغرور الله يعين التاخذه..

اباوع عليها اشو هاي كامت تضحك بعلو صوتها ..واني صافنه عليها مثل الثوله.. // ههه شبيج اشو تضحكين..؟!!
جاوبتني من بين ضحكتها // هههه لا عينيي ماخطبنه لسرمد..خطبنه لسيف اخوي العود.

صفنت عليها وماكو اي ردة فعل على وجهي .. صدوك تحجي هاي .؟ جاوبتها واني بعدني داباوع عليها// يا سيف.؟
// يااا شبيج عينني اشو صفريتي سيف اخوي سويفاان خطبناله بنت عمنه. باوعت عليها بصمت ماعرف دتجذب لو لا ..

لميت عبايتي وطلعت من الجامع وهاي تصيح ورايه هند// خيه تعالي شبيج عبالك بزون بايكين عشا ..
ماجاوبتها عفتها وطلعت .. عيوني احسها امتلت بالدموع بس ما اريد اصدكها .. سيف مو من هذا النوع اعرفه مو من هذا النوع.. طلعت من الجامع شفته كاعد على الكرسي وبصفه واكفه نفس البنيه ودتحجي ويا وهوه مبتسملها.؟ بقيت واكفه اباوعله بعصبيه ودموعي كامت تنزل وحده ورا الثانيه .. حسيت عليهِ راح يندار عليه ..رأساً نزلت راسي ومشيت بطريقي .. وصلت يم الفرع مال شقتي وماكمت اسيطر على دموعي همزين ابو عباس ماكو جان لزمني تحقيق.. فتت للشقه نزعت الحجاب واني ابجي .. اني غبيه لو كايلتله تعال اخطبني لو ما ساامعه كلاام علياء.. سحبت كرسي وكعدت عليهِ ..

سحبت نفس اريد اهدئ نفسي ..يجوز اخته دتجذب عليه .؟بس شنو مصلحتها تجذب عليه .. قطع سلسلة افكاري صوت التيلفون اخذته طلعت علياء مخابرتني اكثر من مره بس ما انتبهت عليهِ من ورا مصيبتي.. فتحت الخط وخليته على أذني // ها سهند حبي شلونج .؟ جاوبتها ببجي بعد ما استحمل اريد شخص يكولي جذب // عليااء ... اريد اكمل الها الموضوع ما كدرت بقيت ابجي بصوت عالي وهيه بس تسألني شبيج وشبيج.. سهند// علياء سيف راح يتزوج ...الي..اليوم شفت اخته.. و وكالتلي..

علياء// هااا اهاا طااح حضج مو كتللج هذاا مو ماال ثقه تستااهلين ..خيولي لا تبجين عليهِ يروح واحد يجي ميه.. جاوبتها بعصبيه // بسس اننني ماا ارريد ..ماا ارييد الميه اريده هووه شلوون يتزووج لعد و انيي ..؟ علياء// ولج سهند طاح حضج عووفي خيولي الزمي كرامتج ديري بالج تخابري وتنزلين من قيمتج.. سهند// علياء روحي بعدين احجي وياج .. سديت التيلفون قبل ما تجاوبني اني اريدها عون تصيرلي فرعون بس لو اعرف ليش تكرها اني ارتاح..طلعت رقمه واني متحلفه بي العصبيه احسها طغت على اخر ذرة صبر بيه خابرته مره مرتين ميجاوب !! رجعت خابرته ثالث مره يلا جاوب .. سيف// // ها ابويه محتاجه شي.؟ صفنت على نبرة كلامه.!! هذا مو سيف الي اعرفه!! اخاف ديسوي هيج علمود يضوجني بس ..! جاوبته بعصبيه // لا اخوويه ما محتااجه شيي ..سلاامتك..

جاوبني ببرود// اي الله يسلمج عجل شعندج مخابره علي..؟ بعد ما اتحمل برووده هذا لو كداامي جان اكلته بسنوني.. /// سييف لاا تسووي هيييج ..لا تحجي وياااييه هييج .. سيف// هههه شبيج ابويه شلون حاجي وياج اني .. عجل شلون ترديني احجي وياج..؟ سهند// سيف صدوك السمعته لو جذب ..هاا الله عليك لا تشاقه ويايه.. سيف// هسسع ليش البجي.. شسامعه انتي بويه شو كليلي..؟ جاوبته ببجي// هااي اختك تكول خطبناله بنت عمك صدوك..؟سيف انته ما تسوي هيج مو.؟ مجاوبني ضل ساكت.. //سيف الله عليك كول شي.؟ سيف// امسحي دموعج سهند.. بعدين انتي مو ما تريديني شعندج مقهوره..؟

جاوبته بسرعه// لاا والله اريدكك ...والله سيف لا تزووج..
سيف// يوللي داكللج امسحي دممووعج ما خاطبها اني بس
//بس شنو يعني اختك دتجذب مو ..ههه والله عرفت دتجذب..

قاطعني بسرعه// لا ما دتجذب مشيتي عليها الاسبوع الجاي..

ــــــــــــــــــــــــــــــــــــــــــــــــــــ

قدر..

أكُنُ لكِ عِشقاً مخبئاً كَعدد رمال البحر النائمه...

بقلمي حفصه الهاشم...

ـــــــــــــــــــــــ

دفعته بس ما وخر رجعت دفعته ويه دفعتي سحبه اوس ودفعه على الحايط.. راح عمي ركض عليهم واوس مجلب بخوانيك جمال ويفشر عليهِ واني انهزمت بالمطبخ يم البنات لا يروح يبتلي بيه كدامهم.واباوع عليهم وبنات عمي كولهن ملتمات على الشباك اوس// قندره زوجها وواكف وتحضن بيهها انعل شيبك اليوم كوواد.. جاوبه جمال وهوه يحاول يدفعه// هااي السالفه شيلها من لساانك لا تعيش الدوور زاايد زي ضربه اوس براسه واجاهم عمي يفاكك بيهم جميل// ولكم فضحتونه عمكم راح يسمع صوتكم ويجي يبتلي بينه..

سحب عمي ابو رامي وكام يحجي ويا بترجي// بويه فوت الله يرضه عليك عوفه بعده ما يعرف يتحجه عوفه يا ابني جمال بصوت عالي// لا ياابه هوه الكلام الصحيح يضوج العالم اوس// قدررر .. باوعت عليهِ من الشباك يا ستار .. بس لا راح يضربني كدامهم..! جوريه // ولج يمثبوره روحيله بس لا يذبحج .؟ باوعت عليها بخوف ورجعت باوعت على اوس من ورا الشباك //قدرررر.. فتحت الباب وطلعتله وعمي واكف يهدئ بي وهوه صاير نار كبره أشرلي على الباب قبل ما اوصللهم// بسررعه اركبي بالسيااره.. من الخوف مالتي اشرتله براسي وركضت على الباب دافتحه واطلع.. سحبني جمال من ايدي وهوه يصيح على ابو رامي /// هييي وين ماخذها ما تطلع البيت هسه اصيح عمي ونفض سالفتكم ..

سحبت ايدي منه بخوف ورجعت ليورا وهذاكه اوس تخبل عليهِ عمي لازمه وهوه يريد ياكله اكل.. عمو جميل// ولكم فضحتوونه راح يجي ابوو قدر ويسويلنه مصيببه ..ابو رامي وين رايح هستوكم اجيتوا.. جاوبه اوس وهوه يلزمني من ايدي../ راايح لصديقي .تسلم ابو جمال ما تقصر بس مستحيل ابقه هنانه واعرف كلش زين عيون هذا الوسخ عليها .. بقه عمي يتوسل بي وجمال ما يسكت بس يصيح ويريد يطلع يصيح ابوي علمود نحل موضعنه هسه.. واني خفت لا ابوي يسمع ويجي بنص هالمشكله .. عاد تصير المشكله مشكلتين.. فتح ابو رامي السياره وصعدنه بيها عمي من شاف عناده كام يتعذر منه وياخذ بخاطره.. اجه صعد يمي وركع الباب يجوز انكسر اصلاً!

بقيت ساكته واعصر بملابسي من التوتر وهوه طول الطريق بس يفشر ويغلط على جمال.. // كوواد هذا هم ينحسب ابن عم هذا ! لنعل شاربك نغلل.. التفت عليه ويحجي ويرجع يلتفت على الطريق مره ثانيه // هذاا هم تحسبي ابنن عمممج هااا ولج هذا لوو ابن عمج لوو حووك جان صار حريص على عررضه ..جاان صار حرريص علييج وعلى سمعتتج ..لانعل ابو الجره.. ضل هوه يفشر ويغلط ومن يندار عليه اني بس اهزله براسي داخلص منه.. بس الكاتلني جمال شعجب صاير هيج.. معقوله يغار من ابو رامي!! بقينه نمشي شي دقايق وهوه هم هدئ شويه.. تجرأت شويه وسألته// ء ابو رامي راح نرجع لبغداد..؟ جاوبني بدون ما يباوع عليه// صديقي هنا نكعد يمه يومين على ما نرجع //اخاف عيب نكعد يمهم.. التفت عليه ورفع حاجبه بأستنكار // هاا عيييب نكععد يمهم بس مو عييب نكعد يم جممال موو .؟ باوعت عليهِ بتوتر // لا مو هيج قصدي.. //ها لعد شنو قصدج.؟ قدر // هيج ما اقصد شي .. // اي عباللي.. .......

وصلنه لبيت صديقه والظاهر هوه منطي خبر .. لان استقبلنه من الباب اول ما وصلنه .. فتت جوه مرت صديقه سلمت عليه وفوتتني بالهول ماعدهم احد بس هوه ومرته وامه جبيره بالعمر .وبيتهم ماشالله جبير.. سلمت على الحجيه امه وكعدت يمها .. خطيه مرته شالتنه بالصلاوات .. وامه مره جبيره ما تحجي هاللكد.. ضلينه كاعدين اني ومرته وهيه تعرف بسالفتي .. .هوه مابقه احد مايعرف بسالفتي بالمنطقه وضلت خطيه تدعي على السايق وتدعيلي.. البيت فارغ ماعدهم جهال .. تقريبا لصلاة العشاء يلا اجوي زوجها وابو رامي ماعرف وين جانوا طالعين ..

تعشينه اني ومرته والحجيه زوجته توكلها لان ما تكدر تاكل هيه.. ساعدتها بلم المواعين مع العلم هيه ما بقت حلفان ما حلفته عليه.. خلصنه جان تفوتني بغرفه متوسطة الحجم .. // فوتي خيه هاي الج ولرجلج ابو رامي دائما يجي علينه يبات ونخليله هاي الغرفه .. جاوبتها بتفهم// اي صح تسلمين خيه تعبتج ويايه // لا يابه ماكو تعب يلا اخذي راحتج.. طلعت وسدت الباب وراها.. نزعت حجابي الدنبوس اكل ركبتي اكل.. كعدت على الجربايه ام النفر ونص .. حسبي الله عليك اوس يعني الا تتعارك ويه جمال .. جان هسه اني نايمه بين بنات عمي.. كمت صليت العشه واستغفرت شويه .. صارت الساعه بالعشره .. يلا خلي انام من وقت بلكي يمشي الوكت بسرعه.. كمت اتمددت على الجربايه وغفيت.. .....

بنص الليل تقريبا حسيت على ثكل نزل الجربايه من صفحتي.. فتحت عيوني مفزوعه مو حلم هذا واحد نايم ورايه من صدوك.. وخرت الجرجف عني وكميت من الجربايه اصيح // ابوو رااام.. سحبني من ايدي بسرعه وسد حلكي بأيده الثانيه.. اوس،،// اشش ولج فضحتينه شبيج عبالك شاييفه جني.. التفتت عليهِ وهوه بعده سد حلكي //شبيج حلمانه لو شنو..؟ وخرت ايده عن حلكي وكمت بعصبيه // لاا ما حلممانه انته شلون تجي هنانه بدون ما ادك البااب هاا موو عيب..؟ خزرني بعيوني وأشرلي على الجربايه// اشش نصي حسج وارجعي نامي .. //ها وانته وين تناام..؟ جاوبني بنفاذ صبر وشكله مبين منعس// وين انطمرر يعني غيرر هناا يلاا تحرركي .. فتح الجرجف وخطه نفسه ونام على الجربايه؟.

رحت فتحت الضوه وباوعت عليهِ هوه وخر الجرجف من راسه بضوجه // وتاليها يعني ما ننطم.. باوعت عليهِ اشو هذا صفن عليه..! // هسه بس دافرشلي بالكاع.. كعد على الجربايه وعدل كعدته..وبعده صافن عليه ..؟ خبل هذا مو صاحي.. رحت داشيل المخده مالتي والفراش صايرات يمه على الجربايه من دنكت عليهِ اشو هذا سحب خصله من شعري .. باوعت على ايده الي سحبت الخصله هاي شلون طلعت من جوه الحجاب..؟ //شعرج طويل..!

باوع عليهِ بأستغراب// وهاي شلون طلعت من الحج.. لزمت راسي فتحت عيوني عليهِ //غمض عيونك ابو راامي لاا تباووع .. ركضت على الحجاب دالبس بي احس نفسي مصللخه مو عبالك شعري طالع اشو هذا كام وسحب الحجاب ..// على شنو بعد شفته وخلصت شوو دنزعي خلي اشووف.. سحبت الحجاب من ايده اني لازمه طرف من عنده وهوه لازم الطرف الثاني ..

// ابوو رااميي عووف الحجااب شنززع مننه .. رجع هوه سحبه بس اني بعدني لازمته من يسحبه حته اني انسحب ويا مو بس الحجاب..من الثول مالتي.. // داكوولج عووفي شو وخرري لا تعااندين .. اني اجر بي وهوه يجر بي..باوعت عليهِ بخزره وهوه كاعد بأريحيه ويضحك عليه.. اوس// ها ما تعبتي ..؟ ذبيت الحجاب بنتره احسه ديستهزء بيه // ترا عييب علليك شلون تشووف شعريي هيج..

اوس// اي عادي انتي مرتي..بعدين تعاي اكولج اشو مكايلتلي شعرج طويل..؟ باوعت عليهِ بعصبيه وسكتت ما جاوبته..وهوه المكروه كام يضحك.. اتمدد على الجربايه وخله ايد وحده جوه راسه والثانيه على بطنه// هههه يابوويه شنو هالخزرره هااي.

كمت شلت مخدتي وداخذ الجرجف جان يسحبه هوه.. // ويين مولليه..؟ جاوبته بعصبيه،،/ دانام وين يعنني.. سحب الجرجف قوي // اي انطمري هنا ماكو نومه بالكاع.. // لا اني عاجبني انام بالكاع اريحلي.. جاوبني بحده // دناامي هناا لا اكووم انعنع ضلوعج تحرركي.. جاوبته بعناد هيه هاي الناقصه انام بصفه.. // لا ما انام هنانه راح يصير المكان ضيق واني اتحرك هوايه من انام .. اوس// موو اذا اكووم اشوفج ال لا شلون صايره ..تعااي انطمرري عااد ..

سحبت مخاديد جانت فوك الكنتور وخليتها بيني وبينه ..وهوه صافن عليه.. حطيت المخده مالتي وغطيت راسي .. اوس// كومي جيبيلي غطه صخام اهمشي غطت نفسها ونامت..تحركي.. كمت طلعتله جرجف من الكنتور وانطيتهيا ورجعت نمت بمكاني.. شويه جان يرجع يحجي // قدر .. ما جاوبته سويت نفسي نايمه عود.. كام يحرك بجتفي علمود اكعد // قدر موو داالغي ويياج شبسررعه انطمررتي.. وخرت الجرجف عن راسي وجاوبته// كااعده كااعده محتتاج شيي ابووو رااامي..؟

باوعت عليهِ جان ديدخن بنص الضلمه..// لا ام ررامي تسلمين ما محتاج شي..اكعدي دالغي وياج.. كعدت على حيلي وجاوبته// مو اني ام رامي اشو كمت تغربطت..؟ باوع عليه صفح// هاا لعد منو ام رامي..؟
// منو يعني غير نور راح تصير ام رامي انشالله.. باوع ععليه وضحك بأستهزاء// حيل واثقه ..ام رامي صارلها بالشهرين مختفيه.. جاوبته بأستغراب// يعني شلون مختفيه.؟

سحب نفس من الجكاره وكال// يعني مختفيه اخابرها تيلفونها مغلق اروح لمنطقتهم يكولولي سافروا هيه واهلها وين ماعرف..

//ياا الله يجمعكبيها انشالله..
باوع عليه وهم صفن بعيوني// لا ..هاهيه قابل اضل راكض وراها اني هم عندي مره ابقه عليها واسكت قابل اول واحد ما اخذ الي يريدها.. قدر// يعني متزوج وحده ثانيه..؟

اشو هذا كام يضحك بحيث صار احمر على ازرك هاللكد ما ضحك ..واني بعدني صافنه عليهِ دافتهم الموضوع.. اوس// هههه اي عندي مره ثووله لابعد الحدود ..هههه ولج غبيه انتي مو مرتي ..
جاوبته بسرعه/ لا مو مرتك ..ءء اقصد يعني احنه زواجنه مؤقت مو دائم ..

ضحك بأستهزاء وسحبني من ايدي ..قرب وجهه من وجهي وكال بخبث.. /// ههه هاي تحلمين بيها الطلااك شيلي مننانه.. دك على راسي بأصابيعه ورجع كمل// بالعراق جذاب اليكولج اتزوجج اتفاق وارجع اطلكج..

سحبت ايدي منه وعيوني مفتوحات عليهِ بصدمه// لا انته كلتلي فتره وانطلك بين ما تلكه السايق.. رجع ضغط على ايدي بقوه علمود ما اسحبه // هههه وتريديني اطلك وينعم بيج جمال مو .؟من تشوفين جثتي موجوده بالتابوت عود ذاك الوكت تخلصين مني ..طلاك ما اطلكج..

ـــــــــــــــــــــــــــــــــــــــــــــ

.. دمتم سالمين
حفصه الهاشم.. احبنكم جثير االجثير