زمهرير الاوجاع الفصل الحادي عشر 11 - بقلم قدر ال هاشم

الاوجاع (الليالي من عذابك )

بقلمي حفصه ال هاشم ....

ـــــــــــــــــــــــ

سهند..

كل انسان من يخاف اله عاده يسويها
اكو عالم تاكل بأظافيرها اكو عالم تهز برجلها ..

اني من اخاف انعس بس حطوني على فراش وانام رأساً عبالك حاطيلي مخدر

من شفت بابا واكف مقابيل سيف والحديث طويل بيناتهم .. نعست من كد الخوف ...

بقيت اباوعلهم من وره البرده وابويه يحجي ويا بحفاوه ...وهوه عبالك حاطي بثلاجه نفس وكفته بس يهز براسه لبابا ويلعب بسبحته ... عاد لو يوصلني صوتهم ولو شويه ...

. ــــــــــــ

بقوا يحجون شويه وسلم على ابويه وراح ..

جان قبل كل ما يفوت للفرع يرفع راسه لو عيونه على الشباك هاللمره طلع بلا ميباوع ولا شي عبالك واحد مهزم ..

ــــــــ

انتظرت ابويه والاستاذ فراهد ابو القاصرات يجون ...
لهيت نفسي بتنظيف البيت الى ان سمعت االباب يندك ..

طلعت فتحته واحس بوجهي صار اصفر .. سلمت عليهم وفاتوا ...

رحت جبت لابويه مي وللافندي الي ويا شكد مكروه عيونه بس تلصلص ..
احسه مكار مثل الثعلب واكثر بعد ..ولا عبالك ابن عمي ولا الجبير فوكاها

قدمت لابويه .. وفراهد يباوعلي بمكر عباله راح اتجاهله علمود يفشلني كدام ابوويه بس بعده ميعرفني اني ذيبه بهاي السوالف خبره

اذكر قبل من نتعارك اني واختي ازل الله يرحمها هم جانت تسوي كدام ابويه نفسها فقيره ومن تشوفني تستفزني علمود اغلط عليها كدام ابويه واني الي اكل الرزاله ههههه

صبيتله مي ووانطيتهيا من ورا خشمي ..
رحت للمطبخ حطيت الجاي على النار ويه ما كملت صاحني ابويه ..

رحت على جان متكي على الفراش وفراهد كاعد مقابيله أشرلي اكعد بصفه بدون اي كلام كعدت بصفه

وسألته بفضول / تفضل يابه رايد شي .؟

حط تيلفوناته بصفه وعدل كعدته

جانت قبل تيلفونات قديمه االصرصر والطابوكه ونوكيا هيج اذكر اساميهن
واحنه بزمنه جنه نحسهن الايفون مال هالزمن ...

//شلونها المدينه عاجبتج المنطقه ناسها ابو عباس انشالله ما مقصر وياج

ابتسمت بيني وبين نفسي ابو عباس الله يخلي برج مراقبه شيقصر اكيد ما يقصر ...

جاوبته بأبتسامه / لا بابا المنطقه كولش زينه وابو عباس ماشالله هم مايقصير يوكفلي من صباحيات الله ومن ارجع هم الكا واكف الله ينطي العافيه خوش رجال

باوعلي صفح / اي مو اني موصي عليج ...

ضحكت بخفه وبسته من راسه // اي ادري ابو قلب الحنين شلون ما توصي عليه ..

هوه هم ضحك وكام يطبطب على رجلي وعيونه صافنه على الاشيء ..
ثواني اجر ثواني وراها الى ان سألني مره ثانيه ـ//سهند تعرفين ليش خليتج بهالمنطقه ما خليتج بسكن جامعي

//ليش.؟

طبطب على رجلي وعيونه صافنه على نقوش السجاده

// بزماناتي من جنه شباب ..

عدلت كعدتي واني استمع اله //اي ..

جنه نشتغل اعمال حره مره تجاره مره عقارات ههيج وهيج ... اني وعمج سعدون جنه نجي لتكريت بكثره بالاسبوع نجيها ثلاث مرات .. جانت قبل هاي المنطقه مو كولها مبنيه نصها تراب ومساحات واسعه منها اراضي ما مبنيه ..

//اي

// اي ...
صفن شويه وابتسامته احتلت وجها

/اي بابا كمل ..

سحب نفس طويل // ايييييه ايي اول مره اشوف امج بيها هنانه بهاي المنطقه بس ورا العماره بكم شارع .. جانت ساكنه هيه واهلها متهجرين ...

عدلت كعدتي وسألته بفضول //اي كمل بابا شلون شفتها .؟

// شفتها راجعه من السوك هيه وامها ..جانت بوكتها مو محجبه اهلها جانوا مخليها على رراحتها .. بس هسه سألت عليهم كالولي شايلين منا من زمان

جاوبه فراهد بأستهزاء// عمي هاي السالفه شلك بيها انته مو طلكتها ...؟

باوعله بابا بعصبيه ولونه صار احمر هالكد ما عصب // فرااااهدددد..

// اي انته مو طلكتها

صاح ابويه عليهِ بعصبيه اول مره يغلط على فراهد كدامنه /// تنجبب لوو الي تصرف ثااااني وياااك كوواد اني داحجي علىى شنوو تلبك من يممك .؟

باوعله فراهد بصدمه عود شلون هيج يحجي ويا

يستاهل اني هم رجعت ليورا لا تروح تجيني كفخه منا منا ..

جاوبه فراهد وهوه يهز براسه /حاضر عمي خير انشالله

عبالك ديكوله بسيطه اني الك مو حاضر شكد ميستحي

التفت ابويه عليه وعاط بيه //وانتتتي جايج وين صار

//هياته بالطريق.

كمت بسرعه هاهيه من ورا فراهد الحقير انسدت السالفه

احنه نعرف منفصلين عن بعض بس وينها هسه امي وعايشه لو لا محد يعرف حتى الظاهر ابويه ميعرف ...

ـــــــــــــــــــــــ

مرت 3 ايام وهمه يمي

كل يوم اروح للدوام وارجع بس سيف ما اشوفه ابد ...

وابو عباس اعتزل المراقبه لان ابويه موجود بعد ميحتاج يتعب نفسه

بابا كل يوم يروح ويايه للجامع الفجر وطول الطريق يجيب ويمدح بالمؤذن صوته حلو شنو هذا الرجال ماشالله عليهِ ساطرني سطر بي ...

بس هوه صدوك صوته حلو هادئ يخلي الجسم يقشعر و ويه هدوء الجو يصير كولش حلو .. عاد لو يصير سويفان ابو رجل الدين مثل هالمؤذن جان خير ..فالحلي بس يصحح سوء الضن ههههه

هالفتره ثلث ايام دائماً افكر بي ليش مداشوفه يم الجامع .

.اخاف صاير ويا شي وحتى امه الحجيه ما كمت اشوفها من اروح اصلي الكا الباب مفتوح ومردود بس هيه ماكو ولا سويفان ...

مرات أأنب نفسي ليش افكر احسن اشو من يجي اضوج ومن يغيب افكر بي

اصلا احسن مختفي هالفتره لا ابويه يشوفه ويسويلي طبل وزماره ,,,

ثالث يوم العصر راح ابويه وفراهد للسوك وما خله شي ما جابه
رحت عليهِ داساعده بتعزيل الاغراض ابويه صح عصبي بس من تكون متواجده زوجته ميقات يتغير ينكلب وحش وهيه هم ماشالله متقصر بس من تروح لاهلها لو يجي يمي بتكريت يتغير حيل ولا عبالك ذاك العصبي

// ها سهونه تريدين بعد شي اجيبلجيا من المحل

جاوبه النكراده فراهد كاعد على الميز وحاط رجل على رجل ـ// ههه والله عمي هوه انته جبت السوك كوله بعد شجيبلها ..؟

// اي غير اشووفها شمحتاجه ,..؟

جاوبته اني قبل فراهد افندي //لا بابا عاشت ايدك متقصر ..

كعد على الكرسي وهوه مبتسم // ديلا سويلنه جايات دنتوكل عاد تأخرنه ورانه طريق ..نشوف اوس افندي شمسوي وتعالي هنانه عندي كلمتين وياج..

سويتلهم جاي وصبيتلهم وفراهد طلع من الشقه عود عنده شغل بس هوه بابا كاله اطلع !

رحت كعدت يمه ..وهوه صافن عليه ويخوط بالجاي.. //خير بابا محتاج شي..؟

شرب من الجاي شويه وراها كال// بنتي انتي هم صرتي جبيره ..وتعرفين معزتج عندي .. واختج الله يرحمها توفت وفراهد ابن عمج خوش فراهد ترا ..

جاوبته بخوف بسرعه// اي الله يخلي لاهله ..

هزلي براسه ورجع كمل كلامه//اي بنتي وكل بنيه مصيرها الزواج ...وفراهد شاريج الرجال وطلبج مني اكثر من مره ..

قاطعته بسرعه ودموعي واكفه بعيني// بابا هاي شنوو ..انته مو تكول اريدج تكملين دراسه ..شلون اخذ زوج اختي..؟

جاوبني بهدوء// يا سهند قابل هسه اني جابرج ..جاي من بغداد لهنا داخذ رأيج وبس ..ما لزمتلج صونده اكعدي خلي نتفاهم..

رجعت كعدت مقابيله على الكرسي ..وهوه سحب نفس ورجع كمل // ليش ما رايدته..؟

// بابا اريد اكمل دراسه.

جاوبني بمراوغه حسيته يريد يقنعني بأي طريقه// مو عذر فراهد قابل بالدراسه..

//بابا ..يعني اني بعدني مو مسؤلية زواج ..ماريد..

//قصدج بس بهاي الفتره ماتريدين..

سهند// اي ما اريد اتزوج خاصة فراهد..

كام وكف على حيله اخذ تيلفوناته وطلع من المطبخ../ حضري الجنط دنتوكل,,

طلعت الجنط للمر علمود يرجعون لبغداد وفراهد افندي كل شويه وناط من يمه نجيج عود بعد فتره لا اضوجين

يا ااخي روح هوه اني كايلتلك ضايجه بس روح فك عني ياخه
حيل واثق بنفسه خطيه ..

سلمت على بابا وطلعوا .. فتت للاستقبال الملمها ...

وكلام بابا وردة فعله تدور براسي .. معقوله سد الموضوع بهالبساطه ..!!

ضوجه حيل وافكاري الشيطانيه تحاوطني من ناحية سيف..!..

اكول خلي اطلع على اساس اروح للمحل الي يم الجامع يجوز اشوفه ..
بعدين اكول لا على شنو اشوفه يموت يعيش اني شلي دخل ..

ــــــــــــ

ثاني يوم الصبح كعدت مستعده وبنشاط من الصبح حتى قبل ما يدك المنبه

بقيت اقره قرأن شويه وكل شويه اشوف الساعه ..اريده يأذن عاد ماكو ..
مصدكت أذن بس كال الله بعده مكايل اكبر لبست عبايتي وطلعت ..

امشي بسرعه عبالك داصابق الزمن معقوله لهالدرجه اريد اشوفه ..
بس اني اريد اسأله على الحجيه مو علمود شوفته هوه اي على مود الحجيه خطيه هم اختفت ..

وصلت للجامع وعيوني على المدخل مال الزلم لعنت الشيطان وفتت للجامع مال النسوان بلا هسه لو جاي واحد وشايفني اباوع على جامع الزلم شيكول ..,

بقيت استغفر شويه لبين ما يخلص أذان لان ماشالله عليه طلعت من صباحية الله ولازم اكثر استغفاراتي هاي الايام من وره هذا الي اسمه سويفان خلص أذان كمت وصليت ...
واليوم هم نفس الشي الحجيه ماكو ...

خلصت صلاة وكعدت استغفر ورا الصلاة شويه

/// سهند ..

فززني صوته .. صاررلي شكد ما سامعته هيه 3 ايام بس عبالك هوايه ..

كمت مفزوعه اباوعله واكف ورايه بدشداشته السوده ونفس السبحه بأيده ..سوده واحجارها بيهن لمعه ..
شكله نفس ماهوه بس السواد الجوه عيونه يشرح مدى تعبه ...

بقيت واكفه مصدومه من عنده هاي اول مره يفوت بيها للجامع جان قبل بس برا بالشارع يحجي ويايه

لزمت اصابيعي بتوتر واباوعله مره وارجع انزل عيني عنه // س.سيف ..؟

باوعلي بهدوء وايده شبكهن ورا ظهره هاي الحركه دائما اشوفه يسويها مرات استغرب على نفسي حفظته بهالفتره القصيره .. // شلون رويحتج بويه ..؟

جاوبته بتوتر واني اعدل بحجابي // ءء الحمدالله .. انته شلونك .. اشو ماكو ..؟

انتبهت على نفسي شنو جفصت اني يغبيه .. باوعتله بتوتر وفشله نفس الوقت وهوه يباوعلي بأبتسامه هادئه

// ههههه ء ءء اقصد خالتي الحجيه اشو ماكو يعني ههه هيجي ..؟

ضحك بخفه وهوه يهز راسه // هههه والله خالتج الحجيه مششغوله شويه وجم سالفه مضيكه روحها بيها هاليومين ..؟

سألته بخوف عليها // ياا خطيه شبيها ..؟ والله اشتاقيتلها جنت اصلي وياها دائماً الله يريح بالها ..

اني احجي ويا وهذا مبتسم عبالك داكوله نكته ..

بس والله خطيه هاللمره كولش حبابه .. جاوبني هوه بأبتسامه // اي والله هيه هم ضاجت عليج ..

باوعلي شويه ورجع كال اشتاقتلج يعني ..

هزيتله براسي بمعنى اي وابتسامه غبيه على وجهي غبيه كوولش كوولش ..
عبالك اول مره اشوفه ..

رجعت باوعتله واني مبتسمه مثل الغبيه وهوه احسه يباوع على كل حركه تبدر مني .. // ءء اني راح اروح .. سلملي على الحجيه عود ,,

باوعتله انتظر جوابه ..
ثواني وهوه بعده صافن عليه ..حتى وترني .

. مشيت من يمه وصلت يم الباب جان يسألني // عبد الجبار ابوج ..؟؟

ـــــــــــــــــــــــــــــــــــــــ

قدر ...

من شفت هذا الرجال عبالك الله دازه اليه اني توقعت راح يعوفني لو راح يسلمني لابويه الي يريد يسفك دمي ..
لان اغلب العالم بهالزمن بعيده عن المساعده خاصةً بهيج مواقف علمود لا تورط نفسها بهيج سوالف .. ...

بس احنه منطقتنه العايشيين بيها عشائريه و هواي بيها هيج سوالف ويهتمون بيها هم يعني من تكول لواحد اني دخيل يمك يشيلك على راسه لو حته انته الغلطان و بأعتبار انته صرت بحمايته قدر المستطاع يحاول ينصفك ويساعدك بالمشكله الي واكع بيها

..... مشيت بأرجاء الغرفه بملل ..

اسبوع اني بهاي الشقه

من بعد ما عقد عليه الرجال الشفته بالشارع والي عرفت بعدين اسمه اوس .

عمي جمال اخر مره اجاني بيها قبل اسبوع .. سأل عليه شنو ناقصني ما ناقصني .. وما طول نص ساعه اقل وراح ..

يكول ابوج من ورا المجلس السووا منعنه نحجي وياج ولا نتواصل وياج ..بأي شكل من الاشكال ..

بس هوه مره وحده اجاني بدون ميعرف ابويه هم خلف الله عليهِ وكف ويايه بدون ميسمع مني بس جان واثق من اخلاقي عكس ابويه الي رباني ...

سمعت صوت المفاتيح وراها صوت الباب ينفتح اكيد اجه ...
لبست حجابي وطلعتله ..

مثل كل مره كل يوم يجي ما يطول خمس دقايق يجيب ويا مسواك مال البيت ومرات يجيب اكل من برا يكول خلي اخاف ما بيج حيل اطبخين

طلعتله جان ديحط الغراض بالمطبخ .. // السلام عليكم ..

اوس // وعليكم السلام .. شلونج ابويه اليوم ..؟

/// الحمدالله .. ما يحتاج كل هذا المسواك بعدهي الثلاجه مليانه ..

جاوبني وهوه يكعد على الكرسي ..

// لا اخاف تحتاجين شي واني مو هنا .. انشالله بس يومين لو اقل نطلع لبغداد ..

باوعت عليهِ بحيره ./.نطلع لبغداد .. زين واهلي ابويه شلون .؟

سحب نفس طويل الظاهر صرت حمل عليهِ وحمل ثكيل هم .. جاوبني وهوه يعدل كعدته // قدر انتي جبيره و واعيه تعرفين سالفتج هاي مو هينه مو بسهوله ابوج يقتنع انتي ما مسويه شي احنه حجينه ويا اني وعمج وهوه راكب راسه ما يقتنع .. قنعته ندور الرجال الجان سايق مالتكم واجيبه لابوج وانشالله ابوج منا لذاك الوقت يهدئ ويتصرف بحكمه وياج ..

// زين ليش نروح لبغداد خلينه نبقه هنا ,..

ابتسم بهدوء وجاوبني // ابويه خوما ابقيج هنانه واني شغلي واهلي بغداد اوديج يم اهلي واني اطلع لشغلي ولا تخافين حسبتج حسبة اختي علياء وانشالله نحل مشكلتج بأسرع وقت ...

// شكراً ..

// لا يابوي على شنو تشكريني .. هذا واجبي .. يلا اني اتوكل .. راح اطلع واقفل الباب من برا والنسخه فوك الكاونتر .. في امان الله ..

// مع السلامه ...

طلع وقفل الباب ..
اني هم رحت رتبت المسواك الي جابه

كل هذا تفكيري بأبويه شلون أمن عليه يم الغريب ..
معقوله لهالدرجه نابذني ..

اذكر من اجتمعوا كولهم بالديوان علمود يهدون ابويه ويحلون السالفه

وصارتلي بوقتها فضيحه بالمنطقه الكل التمت عليها .. ما بقه صغير ولا جبير اذا ما عرف بالسالفه ...

مرات اعض على اصابعي من الندم لو ما سامعه كلام البنات لو ما منهزمه جان هسه اني ببيت اهلي لو حتى ذبحوني على الاقل ما تصير مثل هالفضيحه هاي ...

كعدوا بالديوان كولهم ابويه وعمي جمال وجميل و ولد عمي والشيوخ الكبار المعروفين بمنطقتنه واوس هم كعد وياهم همه يصيحوله ابو رامي ..

وعمي جمال خلاني بغرفه مثل المخزن ورا الديوان ..
كاعده واسمع صياحهم منهم الي يدافعلي واكثريتهم الي يأيدون ابويه ..

وهذا الصياح والفشار يسمعه الرايح والجاي .. الى ان عمي جمال فرضني فرض على الرجال ابو رامي ( اوس ) من كاله

// ابو رامي راح يعقد على قدر ويتكفلها ..

بوقتها صار الهدوء من الكل حتى هوه المسكين انصدم سمعت صوته يكوله بأستغراب // ابو جميل شتق..

قبل ما يكمل قاطعه عمي بسرعه عبالك ديقنع طفل صغير //ابو رامي اعقد عليها بس هالفتره بين ما ادور الرجال ونحل الموضوع وانطيكياها من هالشارب هيَ شريفه وحك الله اني عمها شعرها ما شايفه الا بالصدفه ..

ضل عمي يقنع بي وهوه ما سمعت صوته ابد وابويه ادخل جان يكوولهم هسه قرروا لو يعقد عليها لو اخذها ومحد اله شغل عندي

كل شي صار بسرعه عقدولنه وكل واحد شايل هم بكَلبه ...

من بعدها ما شفت لا ابويه ولا جميل .. ولا حتى اخوتي ..
وجابوني بهاي الشقه ابو رامي (اوس ) وعمي .. ........

ثااني يوم العصر اجه ابو رامي وكال اتحضري راح نطلع واني هم لميت غراضي الي هنه نص جنطه ...

ونزلنه من العماره هوه يمشي كدامي واني ورا وابد ما يرفع عينه عليه وهذا الشي يريحني ..
خليني اطمئن من اكون ويا بس يبقى الاحتياط واجب ..

جان واكف عمي جمال جوه العماره رحت سلمت عليهِ ودموعي بعيوني وهوه يصبرني ان شاء الله تنحل بس نلكه السايق وابوج يحبج بس هسه معصب والشيطان راكبه ان شاء الله يهده وترجعون مثل قبل

واني بس اهز براسي ان شاء الله عمو ان شاء الله ..

اخذ الجنط ابو رامي وراح يم السياره ديسفطهن عاد عمي سحبني عليهِ وكام يحجي ويايه بهمس .. ::

/ ابويه غدر (قدر) انتي جبيره وتفتهمين .. وتعرفيني شكد اعزج مثل جمانه بنتي واعز اني ما زوجتج لاوس الا من شفت الطيبه بعيونه .. وهاليومين سألت عليهِ الكل تحمد بي وبأخلاقه ..

قاطعته بتفهم // اي عمو والله خوش رجال ابد ما شال عينه عليه ولا حته بدر شي مو حلو منه ..

أيدني بكلامي ورجع يكمل // ادري بنتي علمود هاي اني انطيتج اله .. انتي هسه صرتي مرته لو حتى زواجكم صار بهاي الظروف بس انتي حاولي بينج وبينه اتممين زواجكم لا تضيعي من ايدج ..

جاوبته بصدمه // عمو انته شدتحجي .. انته مو كلت امانه يمه وبعدين ترجعوني .. شنو هالكلام لعد ..

قبل ما يجاوبني اجه ابو رامي وسلم عليهِ والتفت عليه وفتح السياره // يلا ابويه اصعدي ورانه طريق خلي نوصل قبل الليل ..

هزيت براسي وصعدت بالصدر واباوع على عمي نظراته عبالك يكولي لا تنسين الكتلج عليهِ ..

اني بيا حال وعمي يدور سوالف بطرانه .. استغفر الله حتينه ما اتخيل نفسي زوجه شرعيه اله اني احب جميل ..

مستحيل اصير لقيره (لغيره) صح احنه هسه متزوجين بس متزوجين لظروف وبس على ورق .. اصلا حتينه زواج بالمحكمه مراح نسوي بس عقد شيخ الى ان تخلص السالفه وكل واحد يروح بحال سبيله ..

ان شاء الله واكيد جميل من يعرف اني بريئه ويفتهم السالفه راح تتصلح علاقتنه ان شاء الله ...

طول الطريق لا اني حجيت شي ولا هوه حجه شي بقداد اول مره افوتلها .. احنه منطقتنه مو محافظه مثل منطقة الارياف .. يعني حتى التكسيات ماكو بيها لان هيه منطقه صقيره واقلب (اغلب ) شوارعها ترابيه .. واكثر الناس ما سامعين بيها ..

وما جنه نطلع حيل من المنطقه بس امي وزوجة ابوي مرات جانوا يروحون للفلوجه يتسوكون للعيد وبالمناسبات ومرات معدوده على الاصابع جنه نروح وياهم ..

بس بقداد ما نوصللها ... طول الطريق متلفلفه على نفسي واجيب العبايه واسحبها على نفسي اخاف ترفع لو يبدر شي مني حرام عليه هم ..

ونص الطريق كَضيتها غافيه ..قبل ما نوصل بقداد حجه ويايه وعينه على الطريق اوس// قدر اي احد يسألج ليش وشلون تزوجتوا بهالسرعه .. كوليلهم اوس عجل بالموضوع لان ابن عمي جان رايدني لان اني مكايل لاحد على موضوعج بس عمي الجبير وابوي ماشي

// ان شاء الله يعني اهلك ما يعرفون عقدت عليه ..

سحب نفس طويل وجاوبني // بلي بلي يعرفون بس موضوعج محد يعرف بي خلي بيناتنه بين ما ينحل وترجعين لاهلج

// ان شاء الله .....

وكفنه يم بيت جبير حيل ...حجه ويايه وهوه منزل راسه // انزلي ابويه وصلنه ..

نزلت وراح هوه نزل الجنط ودك الباب ثواني وفتحوله الباب واني مدنكه راسي حسيت ركبتي انكسرت

فتت اني ويا والولد الي فتحله الباب ساعه يسلم عليهِ وساعه يغلط عليهِ جان واكف بالطرمه رجال جبير لابس دشداشه بيضه وفوكاها عبايه مال الشيوخ سوده ..

سلم على ابو رامي (اوس مو تنسون ) والتفتت عليه ابو رامي وكال // عمي هاي البنيه الحجيتلك عليها ..قدر هذا عمي الجبير عبد الجبار رفعت

راسي وسلمت عليهِ واني المستحه ماكلتني احس الحراره كامت تطلع من اذاني // السلام عليكم عمو

// وعليكم السلام هلا بنتي هلا بيج تفضلي بويه ..

كام يصيح على وحده اسمها ام هبه .. ام هبببه وينج

اجتي هاي المره الي اسمها ام هبه تركض .. // ها شيخ تفضل ..شرايد .؟

تحجي ويا وعيونها عليه شكد استحيت هسه لو يعرفون بسالفتي شلون وين انطي وجهي .. اذا فضيحتي عرفت بيها المنطقه كولها بقت على بقداد ما تعرف بيها ... حاجاها الشيخ بأمر

// اخذي بنيتنه قدر زوجة اوس وصليها بغرفة البنات ..

باوعتلي من فوك ليجوه وهيه تجاوب الشيخ // حاضر ابوجاسم تأمر ..

سحبت ايدي بطرف اصابيعها // يلا عيني امشي منا فوتي ..

مشيت وياها بممر طويل بعدين يجي ورا مطبخ وصلنه للمطبخ ونفضت ايدها مني عبالك متقززه .. شبيها هاي لازمتلها فاره .. بس لا تعرف بسلافتي علمود هاي متقززه مني ..

بقيت اباوع عليها اريد من عدها اي استجابه بس ماكو ..
اجتي مره جبيره سلمت عليه وبوستني عبالك تعرفني من زمان عرفتها بعدين هايه زوجة عمهم الوسطاني ام يوسف ..

ودتني بغرفة البنات الي كال عليها الشيخ وضليت كاعده بيها ..

وهاي المره ام هبه زوجة الشيخ بعد ما شفتها ..

اجتي بنتها سلمت عليه وبقت تحجي ..عبالك فاتحتلها راديو اني عمري هيج عندي اختين عندي هالكد عمام هاللكد عمات ما خلت واحد ماحجتلي عليهِ واني راسي مسطور سطر من الطريق ومن الجاي ..

شويه واجتي ام هبه وكفت بالباب وصاحت على بنتها // ولج هببببه اني مو كتلج اكعودي بالغرفه ولا تطلعين منها شنزلج هااا ..

جاوبتها هبه بحماس // يمممه غير اجي اشوف عروستنه الججديده شوفي عيونها شلون حلوه ..

التفتت عليه وكملت كلامها خلي نتبادل انطيني عيونج العسليات واخذي عيوني السود

ابتسمت على كلامها شكد طفوليه قبل ما اجاوبها صاحت بيها امها مره ثانيه /// هبببه عاابت هاللحلك امشيي لدرووسج يلاا اتحرركيي ..

كامت هبه بوستني وسحبتها امها بعصبيه وطلعتلها برا الغرفه .. رجعت وكفت يم الباب وكالت // يلا عيني زوجج ينتظرج برا يكول دتروحون على اهله .

ما جاوبتها هزيت براسي وكمت وراها .
.كلمة زوجي حيل تقهرني اني مو زوجته ..
اكره نفسي من واحد يكولي زوجج لو زوجته ...

طلعت سلمت على الشيخ وهوه ضل يحجي ويايه // احنه ان شاء الله اهلج اي احد يضوجج بكلمه لو يزعجج بس كوليلي عليهِ وان شاء الله نحل موضوعج ابو رامي سبع هسه يطلع السايق من جوه الكَاع ..

// ان شاء الله تسلم ما تقصرون .. ,,,,,

صعدنه بالسياره جان يسألني // خوما احد سألج ..؟

// لا ....

سكتنه ثنيناتنه ...
هوه شكله مهموم ..

مرات انقهر على نفسي شلون اجيت عليهِ ليش حملته هذا الحمل الصعب بس مو بيدي من خوفي ماعرفت شسوي ..

وصلنه لبيته.. نزلنه وهوه كل شويه يكولي // مثل ما كتلج .... لا تنسين .. احد يسألج كوليله مثل ما كتلج ..

واني بس اهز براسي حاضر ونعم .. ...

سلمت على امه واخته علياء .. جانن كولش حبابات .. ما حسسوني منبوذه لو فد شي وصخ مثل ام هبه عاتبته امه // ليش ما كتلي انته وليدي اتمنيت ازفك وافرح بيك ..

وهوه يبوس بأيدها وراسها .. ويكوللها // يمه والله ظروف هسه مو زين اتزوجت جنتي تكوليلي عرس وهاي عرست

وهيه بقت خطيه تعاتبه عبالها زاجنه زواج حقيقي .. ان شاء تخلص هالسالفه وارجع لاهلي .. بأسرع وقت

.. اخذتني علياء وصعدتني فوك شوفتني البيت وراها فوتتني بغرفه وكالتلي // هاي بعد غرفتج اخذي راحتج .. اوس يجوز يتأخر ..

هزيت راسي وطلعت هيه اخذت ملابسي دشداشه سوده منقشه بذهبي عريضه حيل ..
واخذت شالي وطلعت من الغرفه داروح للحمام قريب على الغرفه همزين علمود ما اتيه من اول يوم ..

سبحت وغيرت ملابسي ولبست حجابي بالحمام وشعري يادوب نشفته اخاف افوت للغرفه ويشوفني لو موجود احد بالهول (الصاله) طلعت من الحمام صار كبالي رجال جبير ..

واكف مقابيل باب الحمام فد استحيت .. الباب مال الحمام مالتهم زجاجي وشبه شفاف فأني علكَت ملابسي عليهِ علمود لا يبين شي للواكف برا ..

فراهد // ياهلا يا هلا بمرت اخوي .. نعيماً

عرفته اخو ابو رامي سلمت عليهِ وعبرته اريد ارجع للغرفه بسرعه ..
عيونه اكلتني اكل ..

استغفر الله غدر (قدر ) ولج عيب لا تفكرين هيج يجوز هوه هيج متعود يباوع على الناس ...

عبرت من يمه جان يرجع يحجي بضحكه // شبيج قدوره اشو تمشين بسرعه عبالك راح اكلج ..

باوعت عليهِ من بعد ما جنت منزله راسي .. توترت كولش واحتاريت شنو اجاوبه ..

احنه عدنه لو حتى اخو زوجي بس ما نحجي ويا هيج وهذا ضاربلي ميانه من اول دقيقه ..

قبل ما اجاوبه سمعت صوت ابو رامي يجاوبه ///هااا فررااهد .. شصعدك هنا ...

باوعله هوه بتوتر وجاوبه / والله عبالي اسبح بحمامك بس طلع مشغول ..

نزلت راسي بتوتر وسحبت نفسي ورجعت للغرفه ..

جان ابو رامي يكوله ليش الحمام الجوه شبي دود وصاعدلي هنانه تسبح ..
وهذاك يضحك ويكوله لا بس علياء جانت دتسبح ..

بقيت كاعده بالغرفه شويه وسمعت صوت ابو رامي يدك الباب علمود يفوت عدلت كعدتي وكتله تفضل ..

فات هوه منزل راسه .. وراح كعد على القنفه الموجوده بالغرفه .. // قدر كلمتين خليهن ابالج ..

باوعت عليهِ بأستغراب // تفضل

// اني صحيح اتزوجتج وقبلت اكون كفيلج بس خليها بعلمج اني لحد الان ماعرف منو الكذاب ومنو اليحجي الحقيقه انتي تكولين اني بريئه بس ما عندج دليل يثبت برائتج .. فأي تصرف يبدر منج هاي الفتره بدون تفكير راح يخلي الشكوك تفتر حواليج ...

سألته بتردد واني اشوف بعيني الجنت خايفه منه ديصير // ي يعني شنو تق,,

// اقصد انتي بوضع حرج ما يسمحلج تكعدين تحجين ويه الرايح والجاي وتتعرفين عليهم .. لان اي حركه منج اشوفها بعيني خطأ راح يأكدلي انتي جذابه ,,,,,

ـــــــــــــــــــــــــــــــ

يلا شوفوني تعليقاتكم الحلوه وتشجيعكم علمود اكمل هههههه

ورأيكم ولا تنسون النجمه دوسوها ...

دمتم سالمين .

. حفصه الهاشم..

. ــــــــــــــ