زمهرير الاوجاع الفصل الثاني عشر 12 - بقلم قدر ال هاشم

زمهرير الاوجاع .

حفصه ال هاشم ...

لا تنسون التصويت وتعليقاتكم الحلوه ...❤ بنوتات سوو تاكات لصديقاتكم ..خلي يتابعون القصه ❤

ـــــــــــــــــــــــ

قالَ وعيناهُ تأكُلها :: يا صغيرتي .
.الرجالُ كُلهم مفترسين..
والنبيل فيهم ذئبٌ صبور...
ــــــــــــــــــــــــــــــــــــــ

// اقصد انتي بوضع حرج ما يسمحلج تكعدين تحجين ويه الرايح والجاي وتتعرفين عليهم .. لان اي حركه منج اشوفها بعيني خطأ راح يأكدلي انتي جذابه ,,,,,

حاولت ابررله موقفي واني اصلا خجلانه منه وهوه فجأة عصب .. // ابو ر رامي والله اني محج...

// ما يهمني حجيتي ما حجيتي ميهمني ...بس انتبهي لتصرفاتج هاي الفتره وفراهد اخويه لا تضربين ميانه ويا هوايه شكد ما تحاولين ابتعدي عنه ..

هزيتله براسي وسكتت ...

شجاوبه يعني حتى وضعي ميسمحلي اكعد اتجادل ويا واني سمعتي سوده مصخمه ..
عيوني انملت دموع نزلت راسي وسكتت هوه هم كام وكف يم الباب وكال // اخذي راحتج هاي الغرفه كولها الج اني انام برا .. الطابق الثاني محد يصعد بي ..

كال هيج بحده وراح ...

صفنت على الغرفه جبيره ومأثثه بأحسن اثاث ..
بس كولها ما فايته بعيني اتمنى ارجع لغرفتي ام الجربايه النص نفر والهوسه البيها بس على الاقل جنت عايشه بيها بكرامتي ...

مرت الايام ويوم يجر يوم ورا .

.بعد اسبوعين
وحالتي نفسها بس الجديد بهالفتره اتعودت على امه

(نسيت شنو سميتها خلي نسميها ميساء ام فراهد هههه )

واخته علياء هم حبابه .. بس تضوجني من تكوم تعيب عليه لانو اني ما اللفظ حرف القاف والغين وكل ما اكول كلمه هيه تضل تضحك ...

اني مو كل كلامي هيج بس من احجي بسرعه يطلع عندي حرف القاف غين وحرف الغين قاف
لان بالمدرسه انجبرت احسن لفظي

ابو رامي ابد ما اشوفها وحتى اني اتهرب من اسمعه يجي ..
ومن يجي يسلم على امه واخته من المطبخ ويروح ..

.ومرات يدزلي فلوس بأيد علياء بس اني استحي اصرفهن اكول من يجي انطيهن اله وصار كل ما تنطيني علياء اخليهن بالمجر علمود ارجعهن اله ..

اسبوع كامل اني ما شايفته اريد بس اسأله عن اهلي عمم ابويه اريد اسأله عن السايق لكَو لا بس هوه ماكو ..

مرات اسمع صوته بالمطبخ على اقل حجايه يكوم يصيح ويعصب عاد اني اصعد ركض على الغرفه واسكت

.. ......

كملت غسل المواعين جانوا يتعشون وهمه قليلين مو مثلنه جيش كامل ونبتلي احنه بالمواعين .. هنانه همه نفرين ونص

.. علياء كالتلي راح اصعد فوك احجي ويه بنت عمها بالتيلفون وراحت ..

اني كملت الواعين وصعدت
وصلت تقريبا نص الدرج بس الصوت يوصل لان هيه ما واكفه بعيد

جانت تكوللها بصوت تحاول تنصي // زين هذا الشيخ ماعندج صوره صخام لطام سكتت شويه

ورجعت كالتتلها // طاحظج اذا ما تريدي اني موجوده بس ذبيله رقمي ...

صعدت اني اضحك عليها هيه هاي سوالفها علياء ههه مرات تضحكني ومرات انصحها اكوللها حرام تفكرين برجال مو زوجج وهيه تكولي عشتو على اساس اني مزوجه دخلي يجي سعيد الحظ عود اوعدج ما افكر بقيره

عود تعيب عليه ما تكول غيره جانت منطيتني ظهرها قبل ما تندار كالتلها // يمعوده هسه شمعرفني بأوس ذابحنه اريد ارجع لنور (خطيبته القديمه ) وفجأه نلكا متزوجلنه غديره ههههههه

بقيت واكفه بمكاني ماعرفت شسوي ..
من الصدمه قبل ما تندار عليه عفتها وتوجهت لغرفتي ..

حسيت عليها تصيحني بس ما اهتميتلها فتت للغرفه وسديت الباب ..

ضليت بالغرفه فكره تجيبني وفكره توديني
خطيه واني اكول ليش دائماً عصبي من جابني يمهم واني الثوله مافكرت يجوز يحبله وحده يجوز يريد يتزوج وحده ..

مثل العنزه الثوله من فرضني عمي عليهِ مشيت مثل العميه ...
مشيت ويا كزوجه بس كَليبي يم ابن عمي وهوه هم مشه ويايه كزوج بس كلبه يم غير بنيه ...

بقيت كاعده بالغرفه هسه همه جوه يجوز ديتعللون ويه فراهد ..
هذا هم دائما يجي بالليل وجايب ويا حلويات وبيبسي وماعرف شنو

و يكول لعلياء صيحي غديره خلي تجي تسهر ويانه بس اني من يجي هوه انعزل بقرفتي ..
افكر بجميل هسه شديسوي .... هذا من حغه (حقه ) يعصب عليه ويتهمني لان هوه ما متأكد اكيد من يتأكد اني بريئه راح يرجع الي ونتزوج اني ويا ..!

جميل حب طفولتي ..

من اني وصقيره اهلي دائماً يكولولي انتي لجميل وجميل الج ..
وعشت طفولتي على هذا المفهوم جنت اقار من بنات عماتي وبنات عمي يتشاغون ويا (يتشاقون ) وهوه معلكَني بالهوه لا اني للسما ولا اني للأرض

مرات احسه يكعد يتقزل بيه ومرات احسه ينفرني اتذكر مره اجه هوه لبيتنه اني جنت بالمطبخ جاي اصبلهم جاي ,,,

عاد هوه فات جان يسلم رديتله السلام واحس كلبي يريد يطلع من مكانه ويرحله ركض ..
سألني عن ابويه كتله برا بالديوان هوه ما طلع للديوان الخارجي مال الزلم سحب كرسي وكعد وكام يسألني عن الدراسه مالتي شلونها وشلوني بالدرجات واني اجاوبه هوه يسأل بكلمتين // دراستج شلونها

واني اجاوبه بجريده // الحمدالله زينه البارحه اخذنه هيج وهيج وهيجي سويت واحزر شنو صار هيج وهيج واكعد اخرطله الاول والتالي ..

حتى هوه يدوخ يلزم راسه يضل يفرك بكصته واني مستمره بالسرد مالتي

عاد اني كمت اصب بالجاي وهوه كاعد على الكرسي سحب استكان وكال اني لا تحطيلي شكر جاوبته // لعد تشربه هيجي ..

هوه باوع على عيوني وابتسم جان يكول لا حطيلي عسل ..

اني مثل العنزه الثوله ركضت على الدولاب علمود اطلع عسل داخليله بالجاي ..

اشو هذا كام يضحك بصوت عالي ..
انداريت عليهِ شبي هذا ..

هوه كال عسل واني رحت اجيبله عسل اكو شي يضحك ..

عيونه دمعت هاللكد ما ضحك ..
واني صافنه عليهن شلون يلمع خضارهن ويه الدمع ...

باوع عليه وسكت شويه من الضحك مال المخابيل مالته بس والله احلا مخبل بعيوني .,. جميل // لا حطيلي من عسل عيونج خن اضوكهن شويه ...

باوعت عليهِ من الصدمه ماعرفت شحجي ضحكت بفهاوه واني اباوعله ..
احس اذاناتي كامت تصوفر ويطلع منها دخان ..

فاتت بيبيتي وهيه تضربه على جتفه بالعصا مالتها .. // دهر صابك كون يبن جمال .. شتضوك ولك مضعوف البخت ..

هوه وكف على حيله ويضحك بخفه باس راسها وكعدها على الكرسي .. // حجيه انتي شجابج مو وكت نومتج هساع ..

هيه باوعتله وعقدت حواجبها وجاوبته بصوت عالي // ولك يبن مريم ماجاي اسمعك شتكولل شتكوول ولك ..

باوعت عليها هسه يبيبي انتي سمعتي كلامه القزلي (الغزلي) ومن يحجي وياج ما تسمعي ...

وراها بأيام هوه اختفه ...

ومن اجانه متقير حيل ..
حتى ما يباوع عليه يشاقه ويا بنات عمي وبنات عماتي بس انه حتى ما يباوعلي

صعدت لقرفتي وامة محمد كولها كاعده بيها .. فتت للقرفه واني ادردم ويه نفسي .
.يجمالي مو على اساس دانطيك عسل من عيوني اشو هسه كمت تاخذ من هذني المايعات

واخت جمال الصقيره تضحك عليه اسمها جوريه

... .........................

تنهدت بحزن على اايامي الراحت صح مجان اكو شي بيها مهم ولا جانت مثاليه بس على الاغل (الاقل) جنت بين اهلي وناسي جنت عايشه بين اهلي بطمئنينه ..

اخذت دولكَة مال المي ونزلت جوه جانت الساعه بالعشره ..
وصوتهم من الاستقبال يجي ..بعدهم كاعدين .. مشيت بالممر داروح للمطبخ وسمعت صوته بالمطبخ يحجي ويه علياء ويسألها شلونكم ما لونكم ..وهيه تكوله زينين ..عاد هيه سألته

// اوس هاي وين مختفي من اول ما تزوجت لهسه انته برا الب..

قاطعها هوه بحده// وانتي شلج دخل ولللج ... ؟

وكفت بالممر اشوفه اذا عصب علمود ارجع للغرفه ركض ..

رجعت جاوبته هيه /// لا بس نسأل عليك خطيه قدر اليوم سمعتني بالغلط من جنت احجي ويه سهند

جاوبها هوه بعدم مبالاة // خير انشالله شسمعت.؟

// والله جنت احجي ويه سهند وجبنه طاري نور بالصدفه .. عاد هيه سمع

رجع قاطعها هوه ومبين من نبرة صوته اللهفه على اسمها // وشبيها نور بشنو جبتوا طاريها ....؟

// هاا هيجي بكلام عادي . يعني ما حجينه عليها شي .. بس خطيه قدر سمعتن..

جاوبها بصياح // وما تسمعج يعني شسويلها ومتسمع لا تخليني هسه اجيبج واجيب قدر وياج ..

جاوبته هيه ومبين عليها تحاول تهدء بي .. // اوس على كيفك هسه احنه شحجينه بس هيج سالفه سالفه شو دكعد شكد صاير تصيح علينه انته تفوت وتطلع بس تصبح شبيك ..

عفتهم ورجعت للغرفه وهوه صوته بعده يصيح عليها ويغلط كواويد ما تخلون الواحد يرتاح كولوا صخام جاي من الشغل تعبان الا تسممون الواحد ..

صعدت للغرفه واني مقهوره على نفسي وعليهِ احس نفسي حمل ثقيل عليهِ وهوه هذا الواقع .. .
. حطيت الدولكه على الميز وكعدت على الجربايه اريد النوم يجي بس ماكو من كد التفكير حتى النوم انهزم مني

... ........

مرت ايام وهوه ماكو ..
يجي بس سلام من الباب ويروح ...
واني اكل بروحي اكل ,, اريد بس خبر على اهلي على امي

.. مشتاقه لاخواني لخواتي ...مشتاقه لجميل اكضي الليل ابجي والنهار كوله الدموع خانكتني خنك ..

هاي ماعده ام فراهد خالتي ميساء تروح للسوك وتجي محمله بأنواع القراض .. ملابس مكياج عطورات .. وتجيب وتوصي بعلياء // بنيتي زينيها هيه ما تحتاج بس حطيلها حمره كحلها ..

وتضرب على رجلها ليش عايفج اوس ليش ما يجيج وكومة اسئله واني احتار شجاوبها .
خاله عنده شقل خاله خلي براحته ..

وهيه تركض ورايه البسي فلان شي حطي فلان شي واني كله ضاربته بعرض الحايط اصعد للقرفه وانام

.. ......

طلعت من الحمام ونفس كل مره الحجاب حاطته على شعري بأهمال لان ما يصعد احد للطابق الثاني واخو من اخر رزاله اخذها بطل يصعد ...

الدنيه ليل وهمه نفس روتيهنم سهرانين جوه فراهد واخته علياء ..
فتت للغرفه واني افتح المنشفه داحطها على راسي .. سمعت صوته من ورايه

/// قدر ... ابويه تعاي عندي وياج كلمتين ..

انداريت عليهِ واخيرا اجه .. بلكي الله لكا الرجال .. جاوبته بفرحه // اي اي انشالله

فتت للغرفه لبست الشال عدل لان جنت ذابته على راسي بس ما مرتب نص الشعر طالع ..

طلعت عليهِ لكيته كاعد بالصاله ويهز برجله والتيلفون بأيده .. رفع راسه وكال // تعالي اكعدي هنا ..

اشرلي على مكان بصفه بعيد شويه عنه ..
كعدت يمه واني متوتره ساعه افرك بأصابيعي ساعه اطكطك بيهن .. اتحمحم هوه وكال // قدر احنه صارلنه فتره ندور على الرجال بس هوه الكواد فص ملح وذاب ..

رفع راسه وباوعلي .. الدموع انترست بعيوني عبالي لكوا الرجال واخلص من حالي هذا ..
رجع نزل راسه وفرك كصته بأيده ..

جاوبته من بين دموعي // يعني شلون راح ابغه (ابقه) هنا ..؟

هوه رفع راسه رأساً وضل يباوع عليه بتفحص ..

اتوترت من نظراته اول مره هيج يطول مسحت دموعي ونزلت راسي ..

// ليش احد مضوجج هنا لو سمعج حجايه .. .؟

رفعت راسي وجاوبته بسرعه // لا لا والله اهلك كولش حبابين بالعكس .. بس اني اشتاغيت الاهلي واريد اارجعهلم ..

// انشالله ترجعيلهم انشالله ... هسه هذا ابن عمج جميل خابرني ...

ـــــــــــــــــــــــــــــــــــــــــــــ

ويكأنَ ...

ويكأنَ فؤادُكَ استباح حرمةَ قلبي كي يأسرهُ ...

بقلمي ...

سهند ....

باوعتله بعدم اهتمام هوه حجه ويه ابويه معقوله ما كاله اني ابو سهند ..

بس عود ابويه على شنو يكوله اكيد مراح يكوله ..
.لكيتها حجه علمود اسأله شنو حجه هوه وبابا ..الفضول قتلني .. // اي ابويه .. ..

حسيت الوان وجها بهتت وصار اصفر ليمونه ..
عيونه ذبلت ويباوعلي بنظرات غريبه .. يااا مجنون هذا .؟ لو ديطلعلي فلم ثاني .. ؟ !

سألته بأستغراب ::/ ليش تعرف ابويه من قبل ؟

. باوعلي لثواني وثواني تصير دقائق .. وهوه بلا جواب بس عيونه مثبتهن عليه .
. نظراته خوفتني عبالك واحد مخبل قبل شويه جان يحجي ويايه وما بي شي ..

ترخصت منه وطلعت وهوه ضل على نفس وكَفته ما حرك ساكن ....
قبل لا اسد الباب فضولي عماني رجعت باوعت عليهِ لكيته سحب كرسي وكعد عليهِ بتعب وبعده يباوع لمكاني الجنت واكفه بي ..!!

لا ماشالله سهند انتي اي واحد مخبل تلكي بطريقج .. ..

رجعت للبيت .. وابو عباس خطيه ماخذ برج المراقبه لا يتعب ولا يمل ولا يكل ..
سلمت عليهِ وفتت للشقه ..

حضرت ملابسي مال الجامعه واغراضي وكعدت افكر بسويفان .. ليش هيجي جانت ردة فعله طاح حظج سهند اني ليش ما سألته شبيك .؟ قابل شراح يسويلي ياكلني مثلاً .. يجوز يعتدي عليه ..؟

اي يجوز لان مره علياء كالتلي وحده جانت وياهم بالدوام جانت تدرس بغير محافظه وجان اكو زميل الها ماخذها ومعتدي عليها

..كولشي كام يصير بهالدنيه على شنو أأمن بواحد غريب ..
بس هوه يعتدي عليه خوما بالجامع ههههه ...

مشه الوقت بشلعان القلب ..

لبست ملابسي وطلعت لدوامي وعيوني تفتر بشارعهم راح يطلع لو لا ..
راح يمشي ورايه مثل قبل لو بطل ...
اباوع على شارعهم وشكد ما احاول ابطئ بمشيتي صرت امشي عبالك على بيض مكسر سيارات هوايه كدام بيتهم ..وعالم طابه طالعه وهذا اليسلم وجنط مال سفر ديفوتوها بالبيت .!!

اخذتني الصفنه واني اباوع عليهم .. لا لا مو صفنه بس فضولي الراح يدمرني ..

ماحسيت الا على شخص يحرك ايده كدام وجهي ..
فزيت من حركته ورجعت ليورا كم خطوه ..

باوعت عليهِ بخزره طلع اخو سيف الاصغر منه اذكر الحجيه جانت تصيح عليهِ سرمد هذا المغرور ..
باوعلي وعيونه مخنزرهن عليه عشتو خيرك ..!

ما انطيته اهميه ردت امشي وسمعت صوته يكولي /// جنج تراقبين بيتنه .. .؟ لو تراقبين واحد من اهل البيت ؟.

باوعت عليهِ بعدم اهتمام .. ومشيت اصلا ماجاوبته ..

لا اراقبك انته يالمغرور .. سمعت صوته ورايه يكول // عود سيف مو هينه علمود تنطري ..؟

التفت عليهِ هذا اليوم شبي منوين طلعلي اصلاً !..جاوبته بتعجرف واضح على صوتي // لا انتظر سيف ولا هم يحزنون مجرد فضول وباوعت على الشارع .. مو جريمه ترا ؟.

درت ظهري ومشيت رجع هوه جاوبني بصوت اسمعه // لا مو جريمه . بس هوايه اشخاص يتأذوون من ورا فضولهم ..

عفته ولا اهتميتله .. عابتله هوه شدخله اباوع على الشارع انام بالشارع ..انته شكو ..

هوَ الولد مابي شي يعني اني ما شفت منه شي غلط بس واضح على وجهه التكبر والغرور واني كولش اكره هيج اشخاص ...

بحيث من بعيد اكرهم
مشيت من يمه واني اصلا تأخرت كوله من ورا ابو الافلام سيف افندي ....

بس هوه وين راح ...؟

جان عدنه اول محاضره الاستاذ ماكو ..
اجتيني جوري تركض من الممر وصلت يمي وضربتني بالاوراق الشايتلهن جوري// هاي وين تأخرتي صارلي ساعه افتر مثل الطفل المضيع امه ماعرفتي شصار ولج ..

ضحكت عليها // خير شصار من صباحيات الله جايبتلنه الاخبار انشالله بيها خير ..

// ولج تذكرين هذاك الاستاذ الي تعارك ويه المدير ..هذاك الاستاذ الحلو يمعوده .. ::

/ هاها اي شبي .؟

// ولج حرامات جابوا واحد غيرو والله حبيتو وضاع حبي بنص شهر ..

// هههههه ولج هوه هذا الهامج هوه هوه انتي شوكت عرفتي علمود تحبي ..؟ يلا يلا انشالله يجي واحد غيره وتحبي ..

مشينه اني وياها وهيه كضت النهار كوله ..
حبي ضاع وين ودوا ديحوني ههههه

خلص الدوام ورجعت للشقه مو مشي رجعت ركض اريد المحه .

. كل يوم رغبتي بشوفته تزيد اكثر من اليوم القبله ... !
ومرات انهر نفسي واضل اعاند كبريائي ومرات رغبتي تفوز عليه .. ..

وصلت يم شارعهم جان واكف ابنهم سرمد ويمه الحجيه ومرا ثانيه متوسطه بالعمر واخت سيف هاي السمره هم واكفه بصف الحجيه

... نزلت راسي ومشيت مع العلم جنت اريد اسلم على الحجيه بس هذوله المكروهين واكفين يم الباب الظاهر ديطلعون ..

سمعت صوت الحجيه تصيحني // سهند يولي يسهند ..

التفتت عليها بأبتسامه وعبرت الشارع ...
رحت عليها بوست ايدها وراسها سويت نفسي ما شفتها عود مصدومه .. // ها خاله .. شلونج حبيبتي ..

جاوبتني بأبتسامتها الحنونه .. وجها مليان نور .. ماعرف نور ايمانها لو قلبها الطيب .. // الحمدالله يمه الحمدالله .. والله ضايجه عليج فتره صارلي ما سيرت على الجامع .. عاد شفتج هسع كلت خلي الحك عليها قبل ما تتعده الشارع ..

// هه اي خاله واالله ما شفتج .. (بيني وبين نفسي اكول شالج الله يابه ) الحمدالله اني زينه خاله مشتاقتلج كومه بس اهم شي انتي بخير هاي تكفي ..

رفعت راسي صارت عيني بعين ابنها سرمد هوه مو طويل هاللكد .. تقريبا اطول مني بكم اصبع ..

رفعلي حاجبه بأستنكار عود اني داجذب ...
هوه صدوك اني داجذب بس هوه شله دخل عشتو ..

// والله يمه اني زوينه بس اخيتي سيرت علينه صارلها جم يوم والتهيت وياها وبالتحضيرات هاي لو اعوف الشغل على هالمسعده (وهيه تأشر على البنيه السمره ) جان انهدم البيت فوك روسنه ...

ضحكت عليها وهذيج البنيه جاوبتها بقلة ادب و ضوجه // ها هاا يمه ليش شطالبه مني وما سويته بعدين على شنو تحجين سوالف بيتنه للغريب ..

جاوبته الحجيه وهيه تضربها على كتفها // كون ينكص لسانج يالمصكوعه ما حجيتلي كلمتين الا ومدتلي لسانها شطوله ...

سرمد باوع على اخته وخزرها بعينه // هننندد فوتي جوووه ...

طلع اسمها هند وهيه من صدوك جنها هنود الحمر تخوف حواجبها رفيعات ومن شفتها وشافتني مخنزره عشتو ..
عود هايه اخوها سيف ما طلعت حلوه على اخوها .. !

هوه سيف حلو بس لو يبطل افلامه الهنديه ..

الحجيه // يمه سهند هاي اخيتي سيرت علينه من الانبار ,..

باوعت عليها جانت تباوع عليه ومبتسمه ..
تشبه الحجيه بس هاي اصغر .. ملامحه هادئه .. صفنت عليها وين شايفتها ما اذكر! ..

// السلام عليكم خاله اتشرفت بيج ..

// الي شرف بنيتي سهند

باوعت وراها جان الباب مفتوح نصه فتحه وطلع وهوه يكول بصوته العالي قاطعنه ..

/// الله حيييهم ..
باس راس امه وعيونه عليه ..

هذا وين جان خاتل من الصبح احوم يم الفرع مال بيتهم جني دجاجه مضيعه فريخاتها وهسه يلا طلع ..

حسيت اخو مراقب نظراتي نزلت راسي وهوه يتعذر من امه // اعذرينه حجيه تأخرت عليكم ..

الحجيه // لا يمه تأخيرتك بيها خير .. لمحتلي هالغزال الطاير ..
تحجي وتأشر عليه ابتسمت الها ونزلت راسي وهوه يباوع عليه وعاقد حواجبه .. // ها سهند الظاهر راجعه من الدوام ..

// اي ..

// اي الله يكويج .. ها راح تبقين واكفه هينه ...

قاطعته الحجيه // اي يمه صح فوتي اشربيلج كلاص مي جايات ..
ايدتها اختها وهيه تباوع وتبتسم حسيت اكو شي غلط بيه / اي اي خيه احنه هم ما مستعجلين ..

قاطعهم سيف وهوه يباوع عليه حسيته مرتبك ومتوتر يباوع عليه ويرجع يباوع على خالته // لا لا لا ما نريد نلهي بنت العالم خليها مادحكين يمه تعبانه من الدوام ..

الحجيه // اي خليها تشرب كلاص ميه وتروح

سيف بنفاذ صبر /// يممممه خليها تروح لبيتها البنيه هسع جايه من دوام اكيد تعابنه ..
هوه يحجي واني صافنه عليهِ شنو هاي يعتبروها طرده لو شنو!! ..

التفت عليه وأشرلي على الشارع // توكلي بويه توكلي عطلناج وبطينه احنه هم على شغلنه ..الله وياج ...

من الفشله مالتي ماعرفت شحجي .. احس نفسي دخنت من الفشله سلمت على الحجيه ومشيت ..

حته ما التفتت ليورا .. وهذا اخو المغرور يباوعلي بأستهزاء شبي هذا لو بس اعرف ..

وهوه سيف على شنو هيجي يحجي عبالك كاعده على كلبه ..
عابتله جان استحه اني هم ما رديتله اهله واكفين جان عرفت شحجي ويا مو اني ميته على شوفتك ..

ها لعد منو من صباحيات الله تجهز علمود يشوفه جدي لو ابو عباس ..
صرت امشي بطريقي واسئل نفسي واجاوبها شكد قهرني تصرفه ... استاهل علمود مره الثانيه ما اخلي بالي يمه

.. ......

وصلت للشقه سلمت على ابو عباس وفتت والله هاي ام عباس تسوي خوش دولمه لو بس تصير شويه سباعيه مثل زوجها وتسويلي جدر صغير وادزليا ..تنسيني قهر سويفان بي ..

رحت سبحت وطلعت ارتاحيت شويه بس شنو التفكير اكل عقلي وكل شويه ومطلعتلي شغله من جوا الكاع علمود ما افكر بي..

اخر شي خابرت علياء شويه خلي اتسلى وياها ..
علياء// هلا هلا بالكاطعه صارلج شكد ما مخابرتني ولج ..

// ولج علياء هنه يومين والله التهيت بالدراسه وما لحكت ..

جاوبتني بعدم اهتمام // ديلا يلا هسه انتي شلونج شخبارج ..؟ تكريت شلونها .؟

// الحمدالله كولهم زينين ويسلمون عليج واحد واحد ..

علياء // هاا دحجيلي ماتعرفتي على واحد ثنين ..

جاوبتها بملل // شذبحتيني ولج كل ما اخابرج تكوليلي ما تعرفتي .. بلي تعرفت

قاطعتني بسرعه // ايا نذله يا حقيره ليش ما تكوليلي لعد ..
/ ولج تعرفت على جوري مو حجيتلج عنها .ههههه.

// لا لا غير جوري ماكو ..؟حصليلج رجال وتزوجي قبلي .. علمود احسدج هههههههه

سهند// ههههه لا والله ماتعرفت ... بس كم مره شفت هذا شيخ الجامع .المكروه.

// من طاحضج لعد .. شيخ جامع شكبره بكد ابوج لو بكد ابويه ..؟

ضحكت عليها الثوله لو تشوفه تبيع ابوها وابويه /// ههههه لا ولج شاب بعده تقريبا يطلع نهايات العشرينات هيج شي ..

// هاا لعد شو احجيلي عنه شبي من طقطق للسلام عليكم ..

كعدت حجيتلها كل السالفه من اول شفته الى لقائي بي كم ساعه وهيه تسئلني واني اجاوبها ملكوفه هاي البنيه ههههه

علياء// ولج ثوله سهند اذا متريدي ذبيله رقمي بداعة الزاد والملح .عليج الله ....

// ديلا يلا اذبله رقمها عاد هوه عباله رقمي وياخذه مو .

// ولج عادي عادي بعدين عود اكوله اني علياء بنت عمها ههههه..زين ماعندج اله صوره صخام لطام .. جاوبتها بنفاذ صبر

// ولج علياء استكني شويه شصخم بصورة الرجال .. بعدين تعالي انتي مو على اساس ابن خالج رايدج ازاد ماعرف شسمه

// يووو سهند لا اجيبين سيرته اني بلا شي كارهه خالي من ورا ..جيبلي هذا الشيخ اليمج احسن من ازاد .. انوب امي قبل كم يوم تكولي تعالي نروح لكركوك واني من ورا بطلت ...

// هههههه ولج شبي الولد والله خوش ولد ومابي شي هم حلو انتي مو تريدين رجال اتزوجي..

جاوبتني بصياح // ولج هوووه انني ارييد رجاال علموود اخلص مننه .. انووب عليه اتزوج آزاد .. ...

بقيت احجي وياها عن اوس وزوجته .. وشويه وراحت ..

علياء امها من كركوك تركمانيه يعني .. ابن خالها من زمان يريدها وحاجي ويه امها بس هيه قافله ما اريده .. حسب ما حجتلي هوه جندي ويه البيش مركَه ومره من المرات شفته جان جاي يمهم وباقي ثلث ايام شفته واكف بالطرمه طويل حيل بس ضعيف ضعييييف حييل .. بطنه مصفوكه على ظهره من الضعف بس شكله حلو لا بأس بهِ وصاحب مسؤليه بس بنتنه مستهتره

.. ........

كملت صلاة العشاء وكعدت على التلفزيون ورا ما كملت دروسي ..

الضوجه دائما تجيني بهيج وقت اضل صافنه على الحياطين ..عاد لو تحجي ويايه ..؟

شغلت التلفزيون على اساس اكعد عليه .. قبل ما اكعد سمعت صوت الباب يندك ...؟

خير انشالله بلكي الله ام عباس جايبتلي خوش دولمه ...
رحت على الباب باوعت من العين السحريه ماكو احد .؟ هاي شنو .. بس لا حرامي ..؟

حرامي !!
ثول اليثولج سهند قابل الحرامي يدك الباب !!؟

:// منوو .؟

// انيي ..
واضح عليهِ صوت طفل ..

فتحت الباب وبالفعل جان طفل صغيروني تقريبا يطلع عمره 6 سنوات لو سبعه.. بس حلو النذل ..!

قدملي ماعون بي كيك // خاله هاي من جده الج ..كالت كوللها هاي من ام خالو سيف ..

اخذت الماعون من ايده وابتسمتله // شكرا حبيبي سلملي على جده حيل ..

طلع ورقه من جيبه وانطانياها // وهاي من خالو سيف ..

صفنت عليهِ ثواني عبالك واحد ضربني على راسي ..
اخذت الورقه من ايده بسرعه .. وراح الطفل يركض !...

سديت الباب وعفت الماعون على الميز ..
فتحت الورقه اريد اقراها سمعت صوت حجار على الشباك الاستقبال الي يطل على الشارع ..

رحت عليه داشوف منو واني متحلفتلهم لو هذوله الشياطين الصغار علمود ارزلهم رزاله غزل ولبس ..

لبست حجابي وفتحت البرده ..

فتحت عيوني بصدمه من ورا تصرفه ..
واكف براس الفرع ونفس وكفته الي دائما اشوفه بيها سبحته الي متنزل من ايده لازمها وعيونه على الشباك .

.طلعله الطفل يركض ماعرف شنو حجه ويا وراح الطفل وراها.
. اول ما التقت عيني بعينه اشرلي بأيده على شكل ورقه ..

الي افتهمت منه يأشرلي على الورقه قريتها لو لا ..

سديت البرده بقوه وابتعدت عن الشباك ..
فتحت الورقه وايدي ترجف عبالك داحجي ويا وجه لوجه ..

مكتوب بيها رقم وبنهاية الورقه مكتوب ( خابريني سيف) ...؟؟

ــــــــــــــــــــــــــــــــــ

لا تنسون تعليقاتكم الحلوه .. ورأيكم ..
وتصويتكم
احبنكم هووايه هووايه جثير الجثير عسلاياتي...

دمتم سالمين
حفصه الهاشم..