زمهرير الاوجاع الفصل الحادي والعشرون 21 - بقلم قدر ال هاشم

زمهرير الاوجاع

بقلمي حفصه الهاشم...

صلوا على نبي الرحمه واركضولي على النجمه مثل اللبوات ههههه

ــــــــــــــــــــــــــ

قدر...

اتقدمت عليه وضربتني راجدي فرت بي راسي فر...!

لزمت عيني اليمنه حسيت بيها طلعت من مكانها لان الضربه اجتي عليها... اتقدم عليه فراهد واني مو من الصدمه من قوة الضربه بعد ما كمت اركز..

فراهد/// علياااء قندرره شلوون تمدين ايددج عليهااا.. اجه لزمني من ايدي ديساعدني علمود اوكف واني عيني اليمنه كامت تغوش ..! لزمته من ايده وكمت ابجي بخوف بس لا انعمي..

قدر// مداشووف مداشووف عممه ...مداشووف.. اجتي عمتي كعدتني على الكرسي واسمع صوتها تحجي على علياء بصوت ناصي..وفراهد خبص الدنيه عليها.. ام فراهد// يا يممه فراهد استهدي بالرحمن مو قصدها تضربها مو هيج يمه عليااء.. علياء// لا قصدي ونص تستااهل لسانها اطول منها احجي وياها كلمه تردلي بعشره عساها بالعمه..

تقدم عليها فراهد ودفعها بعصبيه ..انركع ظهرها بقوه على يدة الباب.. ام فراهد// ياا يمه فرااهد كسرت ظهرها مو هيج ابني .. فرااهد // يممه لا اداافعيللها وشوفي البنيه هايه انعمت طلعت عينها شصار بيها..؟

جابتلي عمتي ثلج وحطيته على عيني بس كل هذا واني احسها انزرفت من الألم ..لان محبسها اجه على عيني من ضربتني.. كعدت ام فراهد على الكرسي مقابيلي وفراهد واكف يم الباب ..علياء راحت ادردم بصوت عالي وتغلط وفراهد امه بالكوه لازمته.. ام فراهد// يممه تصير هيج مشاكل انتي ليش اترادديها يمه اكبر منج عيب ..

جاوبته واني ابجي// خااله والله ما حجيت شي وياها .. قاطعتني بسرعه// يلا يا يمه هسه سالفه وصارت لا توصلون خبر لأوس لا يروح يكرع روسنه..

فراهد// اي لعددد جرري إذاان بنتج لا اكصلهيااا اني بأيدددي خوش لكلكه عليها من شوكت عدنه الجنه تنضرب.. جاوبته امه عبالك دتعيره// ليش وازل منو جان يضربها اني لو جدي... باوعلها فراهد وما عاجبه الوضع كام يستغفر بضوجه وطلع من المطبخ.. ام فراهد// اصعدي يمه لغرفتج ارتاحي وخلي عليها ثلج علمود ينزل الورم منها.. لزمت الحايط وكمت // انشالله خاله...

......

. صعدت لغرفتي سديت الباب وباوعت على نفسي بالمرايه..! هاي شمسويه بيه..!!
طكيت من البجي عيوني مورمه كولش وصاير بيها حمار وازرك..عبالك وحده طالعه من حادث مو راشدي واحد..! كعدت على الجربايه ومن القهر من ورا كلامها دموعي ماكمت اسيطر عليهن .. وجماله كل ما ابجي تكوم تحركني بالزايد... من القهر ما اعرف من الدوخه نمت بلا ما احس على نفسي..

.................

كعدت ثاني يوم الصبح اوس ماكو لا بالغرفه ولا بالاستقبال..! ولو هوه من اخر موقف ويا كام ما يجي للغرفه بس علمود ملابسه ويطلع ركض عبالك الغرفه بيها جني..

.......

كمت غسلت وجهي عيني الورم مالتها خفان بس بعدها زركه لو باقيه حمره هوايه احسلي .. ماعرف شدعي عليج يا علياء شسويتلج علمود هيج تضربيني حسبي الله بس.. نشفت وجهي بكلينكس لان الخاولي يأذي عيني انوب اني جبانه اخاف أذيها وتروح تنعمي.. كعدت الجربايه افكر بالصار,.. اكيد مستحيل اكول لاوس على الصار..

اني صح بقيت هنانه فتره طويله بس احس نفسي لهسه حمل عليهم ومو منهم .. ماعرف اوس شنو سوه على موضوع السايق .. وكلام علياء بارحه وشكها ثار الخوف بداخلي.. عمتي ام اوس هم مو ناقصه إذا بنتها فكرت هيج هيه اكيد هم لعد اكو شكوك ابالها.. ما معقوله ساكتين عنه كل هالمده ..!!

الهم اكل كلبي ..اااخ معقوله اهلي ما سألوا عليه كل هالمده ابويه ما يكول هايه شتسوي يم الغربه.. كلبي خلص من التفكر .. الله يستر عليه ولا ما اكول غير شي..

..........

نزلت جوه خوما ابقه كاعده فوك عاد هيه عيني الورمت مو رجلي هههه.. لكيت عمو ابو فراهد وفراهد وامه كاعدين ديتريكون بالهول.. نزلت راسي وسلمت عليهم // صباح الخير.. الكل// صباح النور..

ابو فراهد// تعالي بنيتي تعاي كعدي بصفي..خلي اشوف شمسويه بيج هاي العرمه.. كعدت يمه واني منزله راسي// مصار شي عمو .. ابو فراهد// لا بنتي احنه بيت شيوخ وين لاكيها الحمايه تضرب الجنه

نزلت راسي ومجاوبته شجاوبه يعني هوه اني وبعدني مصدومه.. جاوبته عمتي// يلا ابو فراهد مصار شي انشالله هنه مثل الخوات يتعاركن يتصالحن على كيفهن.. هز راسه بعدم قبول وسكت...

كملوا الريوك وكمت ويه عمتي انظفلها المطبخ والبيت .. واوس ماكو وعلياء كاعده بغرفتها ما طلعت..! كملت تنظيف رحت على عمتي بالمطبخ اساعدها على الغده.. وعلى هالرنه يمشي الوقت نفسه ونفس الروتين ..

مرت يومين واوس ماكو ونفس الروتين ديتكرر.. وصلنه خير قبول عمهم الشيخ على خطبة سهند.. صراحة كولش فرحتلها.,.لان واضح عليها هيه تريده بس خايفه من ابوها.. كعدت اتخيل نفسي بمكانها وعايشه حياتي ويه اهلي وكأنوا مصار اي شي .. هيجي ويجي جميل يخطبني.. ااخخ احلام ضاييعه ..!

....... بس هوه جميل شغيره عليه ماعرف جان قبل ابد عبالك حاطني على الهامش معقوله كام يغار عليه..!
الله يقدملي البي خير والله تعبت من حالتي ابويه غضبان عليه وبعيده عن اهلي.. ولا اني المستقره بحياتي...

.....

صليت صلاة العشاء وكعدت على السجاده ادعي ربي يفرج عني هاي الكربه.. انفتح باب الغرفه بدون لا احم ولا دستور.. . وهوه اكو غيره..! اوس// ها دتصلين ..تقبل الله ..حضريلي ملابسي دافوت اسبح بسرعه..

هزيتله براسي وكمت بس ما باوعت عليهِ لا يروح يشوف زراك عيني وانوب يفتح ويايه تحقيق وسين وجيم .. وهيه علياء ابوها واخوها فراهد ما قصروا وياها رزايل على الطالعه والنازله..خطيه اخذت نصيبها..

كمت حضرتله الملابس وهوه فات للحمام.. شويه وصاح عليه من الحمام اوس// قدرر المنششفه.. باوعت على المنشفه بعدها على الكرويته ما اخذها الافندي هايه عادته الجديده يفوت يسبح وبعدين يصيح عليه جيبي المنشفه..!

ما تاخذها وياك قابل من ثكلها.. اخذت المنشفه وانطتهيا واني منزله راسي.. وهوه يطول يلا ياخذها .. رجعت للغرفه وسديت الباب بعدني لابسه أزار الصلاة.. جان يفوت هوه ورايه ينشف بشعره.. باوعت عليهِ وهوه ماكو متجاهلني ..راح وكعد على الجربايه وريحة العطر يجوز وصلت لسابع جار..بس عطره اشو ريحته طيبه..!

لو لان صارلي هوايه ما شامتها,..!؟ شمر المنشفه على طرف الجربايه وذب كلامه مثل الاوامر وهوه ينام على الجربايه. لا لا مو مثل هيه اوامر

اوس// طفي الضوه نعسان وراسي مسطور من الطريق..

نام وتغطى بالجرجف مالتي..! كل هذا واني صافنه عليهِ مثل الثوله بوسط الغرفه.. رحت شلت المنشفه من الجربايه لان مبلله.. قدر// ليش راح تنام هنا..
جاوبني بدون ميرفع راسه// لعد وين انام بحضن بيبيتي .. غير يم مرتي..!

سألته بدون وعي مني لان ما تعرفون مرات غبائي يصعد فوك الالف وخاصة كدامه عاد اطلع عبالك ثووله.. /// يعني راح انام سويه..؟! اني كتله هيج اشو هذا كام بسرعه على حيله وجاوبني // اي والله يا ريت عاد اني تعرفين ما احب ارفضل..

باوع عليه وسكت عيونه قلصهن على وجهي بصدمه..! قدر// شنو شترفض..؟
نزل راسه واشرلي بأصابيعه علمود اجي يمه// تعاي تعااي..

قدر// وين اجي ماكو ابو رامي أذا تنام هنا علمود انام برا.. اوس// قددددر تعااي داشوف عينج هاي شبيهااا..؟

انداريت على الباب بسرعه واني اصلاً نسيت سالفة عيني.. قدر// ها لا لا خلي أشر المنشفه احسن.. اوس// قدر لج إذا طلعتي من الباب اسويلج فلقه بالله العظيم..تعاي هنااا..

حطيت المنشفه على الميز واتقدمت عليهِ دافكر بفد جذبه قبل ما اوصله بس عقلي وكف.. سحبني من ايدي وكعدني بين رجلي على الكاع وهوه على الجربايه.. رفع راسي وضل يباوع على عيني ويدير براسي مره يمنه ومره يسره.. اوس//هاي شبيها عينج ليش هيج ..؟ قدر// مو والله ..اني من شسمه..

رفع راسي من حنجي وجاوبني// شبي الشسمه..؟
قدر// ها مو انركعت بالباب مال الحمام من جنت اسبح بدون ما ادري.. باوعلي لثواني واني هم بقيت اباوعله اشوف ردة فعله.. مسح على عيني بأبهامه وملامحه انزعجت.. اوس// غير تنتبهين ثووله يعني لو طفله ..منا وهيج خلي افوت اسبحج اني علمود لا تتعورين .. جاوبته بسرعه واني اكوم// لا لا اصلا هيه صارت زينه هسه والله..

جاوبني وهوه يطلع من الغرفه// يا زينه يمعوده غير مزوركتها شعلتي ابو ابوهاا.. شويه ورجع فات للغرفه وبأيده دهن.. كعد على الجربايه وسحبني من ايدي وكعدني على رجله.. من الخجل حسيت نفسي كاعده على بركان .. قدر// ابو رامي خلي اكعد هناك حباب. جاوبني وهوه يفتح العصاره // يا جذاب كالج اني حباب..؟ شوف شوف شمسويه بيها ..هاي لان تعرفيني احبهن لعيونج رحتي وعميتيهن ..

سكتت ما جاوبته وهوه كام يحط دهن عليها.. هيه خفت الورم مالتها بس الزراك مديروح.. سد العصاره وخلاها على الميز .. ردت اكوم رجع هوه كعدني على رجله ويباوع عليه بخباثه..// وين كايمه عندي حجي ويااج.. جاوبته واني منزله راسي// بس خلي اكعد هناك .. هز رجله الكاعده عليها مرتين وجاوبني// لا اكعدي هنانه احسن ..بيبيتج تسلم عليج هيه وامج..

رفعت راسي بسرعه عليهِ وسألته بلهفه// صدوك شلونها بيبي وامي انته وين شفتهن ..؟ // الحمدالله زينين يسلمون عليج واخوانج هم..

قدر// ليش انته وين شفتهم..؟ رفع حاجبه بأستنكار وجاوبني// ليش عبالج اعدي سالفه الهتلي جميل على خير..؟ // يعني .. يعني رحتي تعاركت ويا..؟ جاوبني بثقه وافتخار عبالك مسويله انجاز عظيم// لا ما تعاركت ويا بس اذا ما كسرت بي عضم ما ارتاح..يدلل جمييل الهتلي سحب الحجاب من شعري وكام يفتح بي بهدوء..عافه وسحب علاكه جان حاطها على الميز // هاج هذا مقويات لشعرج شفته ديوكع اهتمي بس زين ما اريده يخرب..

// انشالله بس خلي اكوم خطيه علمود تنام لان نعسان.. رجع جاوبني وهوه يهزبرجله الكاعده عليها// لا هيج مرتاح..

كمت بسرعه من يمه قبل ما يلزمني ورجعت لبست الحجاب// لا بس اني نعست ..
نام على الجربايه وجاوبني// البسي الحجاب زين لان ما شفت شي اني ..ديري بالج اكعد بالليل واشوفج نايمه بغير مكان.. هزيتله براسي وطلعت اشر المنشفه خطيه عفنت على الميز هههه ......

مرات اضوج من حركاته..ومرات اريد شخص يحتويني..اريد ارجع احس بالاهتمام وشعور الاهميه عند غيري.. بس كلبي يرجع ينهرني ويذكرني بجميل.. ايام وتمر وترجع نور وهوه يرجعلها واني بدال ما اعلك نفسي بي ومن ترجع يذبني ابتعد عنه والزم احترامي احسن..

رجعت لكيته نايم نمت بصفه بس بعيده عنه واتغطيت بغير جرجف احسلي .. مع العلم اني من اانام هادئه ما اتحرك بس اخاف هوه يتحرك بالليل.. اخذتني الصفنه عليهِ ماعرف ليش. مو حب ولا مشاعر من ناحية الاعجاب..بس اهتمام.. اي اهتمام اني لو احبه جان ما افكر بجميل بس ما احبه مجرد اهتمام..

ملامحه حاده وحلوه بس ما تحرك شي بيه.. شبسرعه هوه حب عيوني ..؟
ليش ونور حب السنين وين راح..؟
اتعوذت من الشيطان ولفيت راسي ونمت...

...........

ثاني يوم عزمونه على خطوبة سهند ..

جنه كاعدين بالاستقبال كلنه العصريه حتى اوس مجان طالع.. اندكت الباب راح فتحها اوس طلع يوسف.. فات هوه ويا والشقه مالتهم عالك.. جانوا يحجون بالمطبخ ويضحكون على سهند.. اوس// هاا ولك راح تزووجها اكيد هااي من ملاعيبك مو .. يوسف// هههههه لا ولك غير فضحتنه كدام ابوها تكوله لا ابويه ليش ترفض ههههه متت ضحك عليها..

اوس // ههههه مو اكوللها زماله مهجره تزعل ..هيه تريده..
يوسف// بيني وبينط الحجي تريده وتريد عشيرته هم ههههه

همه جانوا يحجون واحنه كلنه سمعناهم عود هاي بينه وبين اوس الحجي هههه فاتوا علينه وسلم يوسف على عمه وعلينه.. ام فراهد// هاا يمه منو تزوج..؟ يوسف// والله عمه سهند وافقوا على خطبتها ما كالج عمي ..؟

ام فراهد بصدمه// لا والله ابو فراهد اشو ما كتلي .. من منو.؟
ابو فراهد// ناس من الرمادي خوش ناس واهل دين واخلاق تستاهل الله يوفقها.. جاوبته خالتي والوضع ما عاجبها// هاا هم لفيتوا على اهل الرماادي يعني نفس حسب ونسب اهل امها..

جاوبها عمي بعصبيه وهوه يكوم// يااا مرره كمم مره كاايلج اني لا تحجين بهالموضوع ..هيه المره امها منو هججها غيرجن وسوالف النسوان الماتخلص..

طلع عمي من الهول وهوه معصب .. وعمتي بقت ادردم عليهم.. علياء كامت بعصبيه وهيه تبارك ليوسف ..// ايي خووش الف مبرووك.. جاوبه وهوه منزل راسه ويباوعلها بخزره// الله يباارك بييج ويهدددي سررج.

. راحت لغرفتها وما نسمع بس صوت الباب ينركع.. بقوا الولد كاعدين واني كمت سويتلهم جاي وحطيتلهم كيك.. وهمه ماخذتهم السوالف بس على سهند يعيبون عليها ويضحكون... انشالله تكنون ضحكة خير...

...............

وره يومين جانت خطبتها .. احنه ما رحنه للسوك لان عدنه علياء وخالتي هنه اصلاً ضايجات واني هم عندي فستان مرتب لونه اسود طويل ومستور كلت البسه بخطبتها... بيوم الخطبه اتجهزنه كولنه ولبسنه عباياتنه فوك الفساتين علياء جانت لابسه بيجي مو طويل حيل بس مرتب كاعد على جسمها حصر..

اخذنه اوس لبيت عمهم ومشغلنه اغاني عود هوه هم فرحانلها حيل والضحكه مرسومه على وجها اربعه وعشرين ساعه.. بنص الطريق وعمتي طفت الاغاني تكول راسها يوجعها..

.....

وصلنه لبيتهم وهمه ماشالله ما مقصرين الهوسه بالبيت كابه... فتنه سلمنه عليهم وهمه جانوا مكملين تنظيف البيت ..ماعدهم شي .. وهبه اتشغل الاغاني ويجيها يوسف يلطم..جنت واكفه اباوعلهم من المطبخ والدي جي محطوط بالممر..

يوسف// شسوي بيج ماتكوليلي ولج عنوديه طفي ابوج كرع روسنه..
جاوبته هيه بزعل// اي غير عرس اختي قابل ما اركص..
ارتجه هوه على الديجي وصفن عليها// لا عمي اركصي راح اشغله واركصي خلي اشوفج شلون تركصين..

هبه// يااا مو كدامكم ابويه ميقبل..
دنك هوه على الديجي وماعرف شنو سوه بي // اي هوه شنو المدمرنه غير ابوج وسوالفه ..هاج هذا نصيته علمود لا تضل الركصه بنفس هباوي

عافها ورجع طلع على الزلم.. سهند بغرفتها فوك ومرة ابوها يمها وام يوسف وعلياء هم صعدتلها .. كالولها تروح للصالون بس هيه ما قبلت كالت خليني بالعقد هيج مكياج خفيف علمود لا يخترع من المكياج.. شويه ونزلت صدقه شلون طالعه عبالك اميره هيه حلوه ماشالله عليها خدودها وحنجها عبالك مال اطفال..ملامحها نازكه.. نزلت والضحكه مرسومه على وجها عبالك عايشه بحلم ومدتصك..

رحت بوستها وباركتلها قدر// الف مبروك عمري الله يتمملج على خير. جاوبتني وهيه تضحك // عمري الله يبارك بيج هههه ولج قدوره والله مداصدك يجوز راح احسد نفسي بنفسي ههههه شو شوفي هايه البدله حلوه الله عليج اشو ما مقتنعه بيها.. باوعت عليها بدلتها بصليه كولش نازكه..// لا عمري طالعه كولش حلوه عليج.. بقت هيه تضحك ويه الهوى واحنه جنه مكعديها بالاستتقبال مال النسوان تقريباً بالخمسه كاموا يصيحون اجوي العالم واجوي العالم..

طلع ابوها الشيخ وعمامها والولد بالطرمه ديستقبلوهم طرمتهم جبيره كولش وحدها عبالك بيت ماشالله .. وشباك الاستقبال مال النسوان جبير صاير اول ما نفتح البرده يطلع باب الشارع كدامنه.. عاد سهند وشيكعدها كامت هيه وبدلتها والا اشوفه شلون يفوت ههههه فتحنه نص البرده وكامت تباوع عليهم.. جنه نسمع صوتهم الزلم فاتوا وهوه الولد هم فات وسهند احتارت مره تلزمني من فستاني وتحجي ويايه // شوفي شلون طالع حلو شوفي ومره تلزم علياء ونفس الكلام تعيده..

باوعت شويه من الشباك صدوك هوه الولد ماشالله عليهِ مو قاصر مرتب كولش شلون لابس الدشداشه والمحابس مرتبهن على اخر حبايه والشماغ.. اني شفته هذيج المره هم جان لابس دشداشه سوده. جانت الضحكه مرسومه على وجهه اول ما فات ولزم ابو سهند وكام يبوس بي من راسه مرتين ماعرف شكد الظاهر ما مصدك هوه هم..

ههههه شويه وصاح ابو الولد علمود يفوتن النسوان. اباوع على الولد وجها انكلب اصفر عبالك كالوله خلي نفوت المتفجرات موالنسوان..!!

وكف كدام ابو سهند وغطه جهة الباب بظهره ..وكام يفرك بكصته بتوتر.. باوعتلي سهند بأستغراب ورجعت باوعت عليهِ من الشباك.. شويه وفاتت امه واخته واربع نسوان وياهم.. ولدنه نزلوا راسهم وسوو مجال للنسوان.. والولد خطيب سهند راح اكله التوتر.. //يلا يلا بويه حدرن مناك الزلم..

قبل ما يفوتن ابو سهند رفع راسه وباوع عليهن بالصدفه..! قبل ما يفوتن صاح هوه بكل علاة صوته..
عبد الجبار// تماااااضررر..!!

هوه اول ما كال اسم تماضر اجتي مرة ابوها لسهند وفتحت البرده كولها بصدمه ..
اوس// عمي ياا تمااضر ؟ شيجيب تماض...

قطع كلامه من شاف وحده من النسوان خاتله ورا ام سيف..! صاح عبد الجبار بصوته الجهوري وهوه يباوع على الي اسمها تماضر

// تمااااضررر شجااابهااا ويااااكم...؟
اتقدم سيف من ابو سهند بترجي ولونه تحول للأصفر حجه ويا بترجي وهوه يلزمه من ايده // ابو اززل لا تتهور ..عمي تعال هنانه واني افهمك الموضوع..؟

نتر عبد الجبار ايده من ايد سيف وكام يصيح عليهِ// لااا تفهمنني ولاا افهمك تماااضر شتسووي بينككمم..؟

حك راسه بحيره وجاوبه// خالتي ..تصير خالتي..

اندارت سهند علينه وايدها على حلكها ودموعها تنزل عشره عشره.. سهند// امممي

ـــــــــــــــــــــــــــــــ

ولاتنسون رأيكم الحلو احبنكم جثير يدادا

حفصه الهاشم...