زمهرير الاوجاع الفصل الرابع عشر 14 - بقلم قدر ال هاشم

زمهرير الاوجاع ..

حفصه ال هاشم صلوا على رسول الرحمه .♥.

ـــــــــــــــــــــ

مقبرةُ الرجل ... إمرأةٌ لا ترحم ..
ومقبرة المرأه ... رجل لا يفهم ...

ــــــــــــــــــــــــــــــ

قدر ....

طلعت عليهِ ركض كاعد على القنفه ويهز برجله

اول ما اجيت رفع راسه ناحيتي ..جاوبته واني منزله راسي //تفضل ابو رامي شمحتاج ..؟

جاوبني بأبتسامه هادئه // وينج ابويه اليوم عايفتني وحدي بالسهره هههه بس لا نعسانه

باوعت عليهِ بغباء يا سهره يا صخام جاوبته بفهاوه // هاا .؟

اوس /// هههه اذا نعسانه روحي نامي عبالي اكملج سالفة نور ..

صفنت ثواني يلا افتهمت قصده .. جاوبته بتفهم // هاا ..لا مانعسانه بعد وكت اذا تريد تحجيلي عادي .,..يعني بكيفك ..

اشرلي على مكان بصفه رحت كعدت على القنفه بصفه
وهوه لازم يصفن شويه قبل ما يبدي يحجي عبالك ديرجع عقله للماضي

اوس // اي وين وصلنه .؟ سكت شويه ورجع كمل اي كتلج بقيت وراها وراها .. وهيه مرا حمامه ومرا غراب .. مره تنطي وجهه ومره لا .. الى ان بنص السنه رحت وتقدمتلها .. ورا كم يوم يلا رجعولنه خبر موافقتهم .. بوقتها من الفرحه مالتي ردت اروح اتزوجها واعرس عليها بساعة الساعه .. بس ابوها جان اله قرار يختلف ..

سكت شويه وباوعلي بهدوء واني صافنه عليهِ اريده يكمل ../ اي .

. اوس // اي ابوها وامها جانوا يكولون احنه بناتنه غاليات وانته واحد غريب قبل ماتعقد عليها اتعرفوا على بعض خلي هيه تتعرف عليك على طبعك .. وبعدين اعقدوا ..علمود اخاف يصير ما يصير ما تنحسب مطلقه بنظرهم .. عمي مشينه وياهم و وافقنه .. سوينه حفله بيناتنه لبسنه الحلقات واستمرت خطوبتنه شهر اقل من شهر .

. // اي

اوس// اي هيه البنيه مو محجبه ولبسها على راحتهم لا ابوها يكوللها لا ولا امها ..واني جنت دائما أنبها على لبسها وعلى سترها لمصلحتها اول شي وثاني شي لان هيه راح تصير بأسمي .. بس الظاهر هذا الحرص جانت تفسره هيه بغير شي ... ماطولنه كم اسبوع وابوها خابرني يتعذر مني وماكو قسمه والله ينطيك على كد نيتك .. وسد التيلفون ..!

قدر // هييج !!؟

صفن بعيوني ثواني رجعت وضحتله السؤال ،،/ اقصد هيج بهالبساطه .. يعني .؟ بس علمود هذا الشي ..

هز براسه وطلع جكاره ورثها // اي بهالبساطه ..

سألته بتردد // انته .. بعدك تحبها ..؟

رجع باوع بعيوني وهوه صافن بيها // اي .. وجنت احاول ارجعها الي ....

سكت شويه واني هم سكتت خطيه انقهرت عليهِ اذا تركته على هذا السبب التافه شكد زعطوطه لعد ..

من بعد صمت رجع كمل كلامه // ورجعتها هم ..

قدر // هاا ..؟

اوس // رجعتها .. بس حاليا ملتهي بسالفتج وعلى ما تفض انشالله ارجع اخطبها من ابوها ..

اباوع عليه جان يحجي بحماس واللهفه واضحه على عيونه قدر ،/ الله يجمعكم انشالله

اوس // انشالله ...وانتي .؟

// هاا..

اوس // وانتي احجيلي عن هذا جمييل ..

حسيته من كال اسم جميل طول بي حيل مثل الواحد ديستهزئ ..

سكتت ما جاوبته لان اني ويه نفسي استحي احجي بهالموضوع عاد مو احجي ويا هوه

مرات اخته لجميل شكد جانت تريد احجيلها وهيه تعرف اني احبه بس اني استحي احجي لاي احد ..
اوس // يلا عمي براحتج .. حجيتلج علمود تحجيلي .. بس يلا هم جممميل مو شكول واحد يحجي بي حقج ..

باوعت عليهِ بسرعه وعيوني مفتوحات // ليش شبي جميل ..؟

جاوبني عبالك ديقنع بطفله مو بنيه جبيره كدامه// لا عمي مابي شي ورده مال الله ما شاء الله عليهِ...

ما اقتنعت بجوابه امبين ديستهزئ بي .. عشتوو شفايتلك تصير مثل جميلي ..الحقنه لو يطخها لو يشلع مخها لو اربعه وعشرين ساعه مدلغم لو تصير الميانه مالته بلا ملح ..

واني اصلا ما اريد اضرب ويا ميانه وسوالف .. بقيت اباوعله بس الضوجه الي بداخلي لا ارادياً خلت عيوني تباوعله بنظرات شبه عصبيه ..بدون ما احس على نفسي عاد هوه طكها بضحكه قويه صار احمر على ازرك من وراها حسيت على نفسي نزلت راسي بفشله وهوه بعده يضحك

اوس من بين ضحكته // ههههه عمي ما حجينه شي عليهِ لتروحين تصلينه بعيونج هذني ..

كمت على حيلي بسرعه جاوبته بتوتر // لا ..لا مو قصدي .. اني اروح انام تصبح على خير ..

عفته ورحت لقرفتي ركض .. يستاهل هاي الخزره علمود مره الثانيه ما يحجي على جميلي

... .......

مرت الايام نفس الروتين ..
اوس دائماً بالليل اسمعه يحجي ويه نور .. لو مرات يكولي تعالي ابويه اذا مو نعسانه خلي نسولف واني هم ماعندي شي .. اروح اكعد يمه ويبقى يسولفلي عن مشاكساته بالمدرسه لو عن عركاتهم هوه ويوسف و ولد المنطقه ..

مره المرات يكولي طلعنه اني ويوسف بالليل دنلعب بالشارع وجانن المسدسات هستوهن نازلات بمنطقتنه والجهال متخبلين عليها عاد احنه هم اشترينه منهم ..
وبالليل طلعنه اني ويوسف نريد نلعب بس الجهال كولهم بالبيوت ماكو واحد طالع والدنيه ضلمه ..
عاد شفت سياره من بعيد جايه من راس الفرع صحت على يوسف تعال خلي نلعب ويه هذا ابو السياره ..
عاد اخذت يوسف وكتله من تجي السياره سوي هيج وهيج ..

اجتي السياره وخليت يوسف يوكفله من اليمنه واني وكفتله من اليسره اول ما وصل أشرتله بالمسدس اوكف على صفحه .. والله هذا الرجال وكف .. فتح الجامه بدون ما يباوعلي ماعرف شيدور بالجكمجه .عاد احنه استغلينه الفرصه وصيحنه عليهِ طلع اوراااقك بسرعه ...هوه خطيه كام يصيح ..
والله سيارتي والله سيارتي ابو سالم هاديها الي هههههه ..

شكد يسولف ..

يكول والمصيبه هذا الرجال طالع يعرفنه عاد ثاني يوم رايح على عمي الشيخ ورايد فصل يابه شكو صاعد السكر عندي من ورا ولدك ..عاد عمي اتعذر منه وعزمه على غده وسكت الرجال ..

قدر // وانتو ما سوالكم شي عمكم..؟

// هههه بلي يابه ..بوقتها اخذنه فلقه كل واحد اخذ عشرين ضربه اذا مو اكثر على رجله ..بس هم ما توبنه ...والمصيبه السياره طلعت مسروقه مو مال الرجال

.... ....

وهووااي سوااالف وشكد يسألني على جميل يريدني احجيله عن حياتي ويا ..لو شلون حبيتي .؟ ليش حبيتي.؟ شحبيتي منه.؟

واني افضل السكوت على الجواب ..

احسه يضوج لان ما احجيله .. بس احسن ما اريد اضرب ويا ميانه عن حياتي ...
وهوه اصلاً واضح عليهِ ميحب جميل من طريقة كلامه

... ..... بالبدايه جنت استغرب كلامه وتغيره ويايه ... بس لاحظت كم مره من يتعارك ويه نور يصيحني ويكعد يحجي ويايه

.. الظاهر يخفف عن الضغوطات الي تصيرله ...

/// قدررر ..قدررر وينج ..؟

غسلت ايدي من الزاهي مال مواعين وصعدت عليهِ .. كالعاده جاوبته وراسي بالكاع // تفضل ابو رامي شمحتاج ..

جاوبني بسرعه // يلاا ابووويه جهزيلي الجنطه مالتي داطلع لاهللج .. بسرعه بسرعه بين ما اسبح ..

فات للحمام وعافني بنص الهول مسطوره.. يروح اهلي .. شصاير .

.بلكي الله لكو الرجال..بقيت واكفه والضحكه على وجهي انداريت على جنطته ..شجهزله هوه اني اعرف ملابسه شيلبس ما يلبس ..؟ جان حاط جنطه صغيره مال سفر على القنفه..ويمها ملابس بيتيه تراكسود ودشداشه سوده شلتهن وحطيتهن والمشط وكم عطر محطوط على الميز هم حطيتهن وسديت الجنطه ...هوه بس حاط هذني شحطله بعد ..؟!

طلع من الحمام لابس بنطرون اسود وقميص اسود وينشف بشعره ويحجي ويايه ــ// هاا ابويه جهزتيلي الجنطه ..

// اي كملتها ..

اخذ مشط ثاني وكام يمشط بشعره كدام المرايه ويحجي // اي عفيه السباعيه .. عمج جمال خابرني يكول السايق مالتج راجع لبيته وهادين عليهِ اهلج ..

من سمعت اسم السايق الخوفه اتملكتني .. اخاف يجذب عليهم وابويه يروح يصدكه هذا ماعنده ضمير كولشي يسوي ..

انتبه عليه شمر المشط على الميز وباوع عليه بنظرات حاده ورافع حاجبه وايده حاطها على خصره // شبيج اشو صفريتي ..؟

باوعت عليهِ نظرات الاتهام مرسومه بعيونه .. ! عرفته ما مصدك بيه .. // مابيه شي ..

اوس بأصرار// لا شوف شكلك شلون صرفيتي ..؟ شبيج.؟ لازم تفرحين راح تبين برائتج ..بس الظاهر راح تصيرلج جلطه من الخوف..

رفعت راسي عليهِ بعصبيه // مااااا عنندي شيي اااني .. بسس جن..

قاطعني بحده وهوه خازرني // صوووووتج نصي ولللج..

نزلت راسي وسكتت وهوه بعده يباوعلي بعصبيه دفعني من جتفي وراح على جنطه // وللي مممن كدااامي ..

اخذت المنشفه ورحت لغرفتي بسرعه .. دموعي جانت على طرف رموشي اول ما فتت لغرفتي نزلن ركض طاحضج قدر طااحضج .. شلون رفعت صوتي عليهِ هيج مادري ...

كعدت ابجي بحركه من الفشله ماعرف يجوز لكيتها حجه علمود ابجي.. خايفه بس لا هذا النذل يجذب عليهم كولشي يكدر يسوي .. اذا جذب عليهم واتهمني اني ..اهلي يتبرون مني واكيد اوس يعوفني .. وين اروح اني بعد .؟؟

سمعت صوت سيارته طلعت من الكراج عرفته راح ..
شريت منشفته ومسحت دموعي ونزلت ويه امه خطيه تبقى تشتغل وحدها وعلياء ملتهيه بالتيلفون..!
بلكي الشغل يلهيني عن التفكير..

ام فراهد تلكتني من الدرج المكشاره بأيدها والبيتنجان بأيدها الثانيه // هاا يممه قدووره بشرري شرااد منج اوس هاا .. يمه شسويتوا

.. استغفر الله خاله هسه شجاوبج بلا ..؟ صوتها شعلاته .. طلع فراهد من الاستقبال يضحك .. // يممه يعني شسوو بلا .. سوالف متزوجين شلج بيها هاي .. التفت عليه وغمزلي بعينه .. مو قدوره ..

نزلت راسي وفتت للمطبخ .. شكد ميستحي ..
وهاي خالتي لاحكتني وين ما اروح شسويتي انتي واوس وشنو حجيتوا ابتليت بيها فوك الهم الماكل كَلبي ..

كالعاده علياء على التيلفون بس لو ادري ما تمل اربعه وعشرين ساعه على التيلفون ..!

اجتي خالتي من الممر وهيه ترزل بفراهد ../ فريهد طاحضك سوالف نسوان شدخلك انته .. وهذاك سفيهه بس يضحك ..

ام فراهد // يمه قدوره لا تزعلين مني يمه بس غير اريد اشوف ضنه وليدي افرح بيهم .. هذيج العاقر وانطمرت جوه التراب شستفادينه منها .. الكبور ولفتها ..

قدر عرفتها تقصد زوجة فراهد الماتت // خاله خطيه لا تحجين عليها بعد ماتت حرام ..

ام فراهد // ختولي ... همزين ماتت مابيها خير .. عاد انتي شوفينه سباعيتج وجيبيلنه وليد نفرح بي هزيتلها براسي وسكتت ...

هواي تضوجني من تحجي على ازل الله يرحمها بابا جان دائماً يعلمنه الحجي على الميت بالموزين مثل اكل لحم الميت ..
وهيه مرات اسمعها تحجي عليها وترجع ليورا حتى من يجون صديقاتها جوارينها العاقر والعاقر ..

بقيت كاعده جوه لو اساعدها بالشغل لو تصخرني على ايدها ..كملنه الغده وتغدينه العصر كاعدين نشرب جاي ..
سمعنه صوت الباب يندك بقوه عبالك صار هجوم علينه .. كلبي نزل بين رجليه الافكار اجتي ابالي بأبشع التصورات ..

بس لا اهلي اجوي علمود يذبحوني وتصير فضيحتي ببغداد هم مو بس بمنطقتنه ..
بعدني كاعده على صفنتي واجه فراهد من الطرمه يصيح .../ يممه تعاالي على ابن اخووج .. هذا آززاد خطيه صارله ساعه مسلوك بالشمس عطب تعطب ..

كام خالتي وهيه تهلهل وتمرحب بيهِ // يا هلا ومية هلا فوت يمه فوت ماكو احد غريب ..

كامت علياء بسرعه عبالك شايفه جني وادردم ويه تفسها // هسه الا تفوته هنا ما تفوته للاتسقبال .. اندارت عليها امها خزرته ورجعت فتحت الباب للولد وفات هوه وفراهد .. سلم على خالتي ام فراهد وباس راسها وايدها طوويل شطووله نزل من سبع طوابق يلا باس راسها ..

آزاد // شلونج باجي شخبارج ..؟

// هلا بيك يممه بخير تفضل تفضل ..
كعد على القنفه من بعد ما خالتي عرفته عليه وخبصتنه هاي زوجة اوس هاي جنتنه وهاي وهاي وهوه منزل راسه ابد ما رفعه .. آزاد// شلونج علياء .؟

جاوبته من ورا خشمها وهيه تطلع من الهول /// زينه ..

حسيت الجو توتر هوه يباوع على خالتي ام فراهد وهيه تباوعله بفشله .. فراهد /// هاا آزاد خوما راح تاخذ على خاطرك تعرف انته علياء خبله شوكت ما ينطبكن الوايرات اطنكر ..

جاوبه بضحكه خفيفه وصوته بيه بحه خفيفيه عبالك جان نايم هههه // ههه لا عمي اني اخذ على خاطري من علياء.. دكول غيرها ..

غمزله فراهد النذل وجاوبه بمكر // اي عمي ما تاخذ على خاطرك اذا اخذت على خاطرك شلون راح تحصل نصيبك منها مو ..؟ عفتهم ويه خالتي وطلعت اسويلهم جاي ..سوالف فراهد كوولها جايفه ..

اجتي علياء تركض من الممر واني داصب بالجاي // جيبيي جيببي .. وينه كلاص هذا الغبي ابن خالي
أشرتلها على واحد منهم// هذا ليش شتريدين.؟
// جيبي خلي احطله سم فيران واخلص منه بلكي يموت وافتك منه..

شهكت بخوف وسحبت الكلاص منها بسرعه // عزا العززاج علييااء موو هيج

حجت بصوت حاد بس ناصي تخاف لا يسمعون.. // انتي ماتعرفين هذا ليييش جااي ...عيننننيييي هذاا دااهيييه جاي يزحف على امي واخوتي علمود يجبروني اتزوووجه وللج ثعللب مكاار مكاار ..

// يمعوده كولي يا الله محد يجبرج منو جابرج ..صيحي فراهد خلي ياخذ الجاي لا يبرد..
اجه فراهد اخذ االجاي ويغمزلها وهاي صارت حمره من العصبيه وبس ادردم .. علياء // كون يروح لشغله وبعد ما يرجع كولي امين ..

جاوبتها واني اشرب من الجاي وهيه واكفه كدامي// ليش هوه شيشتغل.؟
حطت ايد على ايد كدام بطنها وتحجي بقرف// عشتووو يشتغل جندي ..بالبيشمركَه..

// اي شكو بيها حلو ..
سحبت تيلفونها من فوك الميز وطلعت من المطبخ وهيه تجاوبني // يووو رحمه لاهلج فكيني انوب عليه حلو..منيله المعصعص.

اني هم كملت جايي وصعدت لغرفتي
هوه الولد مابي شي ماشالله خالتي تمدح بي وشكله هم زين هيه واهلها تنجاز ..

لليل يلا نزلت كولهم كاعدين بالصاله وخالتي ام فراهد تقنع بعلياء يمه الولد رايدج والولد شاريج وهيه قافله لا يعني لا ام فراهد// قدررر قدوره يمه تعالي هذا اوس يريد يحاجيج..

رحتلها ركض على المطبخ انطتني التيلفون وحطت أذنها يم أذني.. أوس // الووو قدر ..
// ءء اي ابو رامي ..

اجانه صوته العالي // يمممه رحممه لاهلج وخري أذااانج خلي احجي ويااها كلمتيين ..

يا ستار ..
خالتي وخرت من يمي وباوعتلي بصدمه// ياا بممه جنني خوما جنني بس لا حاطلنه كامرات بالبيت ولك..

الظاهر هوه سمعها جان يجاوبها بضحكه// اي يممه مو هاي سوالفج عرفتهن ..قدر شويه اطلعي من يمهن داحجي وياج..

طلعت من المطبخ ارجف صعدت لغرفتي وهوه ساكت صوته خوفني ..والفضول كتلني // هاا طلعتي ...,.

قدر// اي ..
اوس/// رحمه لابوج بلا هاي سوايه تسويها قدر ..

من الخوف البرد خله عضامي اطكطك .. // هاا ءء شسمويه والله ما مسويه شي اوس .. ابو رامي الله يخليك كوللهم ماسوت شي هيه والله جذاب شنو كاللكم هااا الله عليك لا تصدكه ..والله مامس

اني ابجي واحاول ابررله حسيت الدنيه اضلمت بعيوني .. كلت هذا اكيد جذب عليهم ..وهمه صدكوا

اشو هذا كام يضحك بصوت عالي من كل عقله .. اوس // ههههههه ولج قدر هاي صدوك تحجين هههه ابويه انتي فهمتي على شنو اقصد وين طار عقلج بنتي ..

مسحت دموعي بأستغراب احاول اوكف شهكاتي // يع.. يعني شنو ..مفهمت..؟
اوس / داكولج على ملابسي شحاطتلي انتي بلا.. والله جنت ناويلج على نيه بس دموعج شفعتلج ..

صفنت شويه ورجعت جاوبته داستوعب كلامه// شحاطتلك والله حطيتلك الملابس الحاطهن على الغنفه ..

اوس // ها بس التراكسود والدشداشه مو ؟..
// اي والله حطيتهن

اوس // زين والملابس الداخليه وينهن ...؟

وخرت التيلفون من أذني وسديت السماعه مالته عضيت شفتي بفشله ..طاحضج قدددر طاحضج ..يلا ملابس يا داخليه .. شجاوبه.؟

اوس // وينج ياببه هسه شكايلج اني الوو قددر ..
رجعت التيلفون على أذني وجاوبته بسرعه عود علمود اسد الموضوع.. // ءء نسيت نسيت .. شسمه ..انته شلونك ..ءء رحت على اهلي..؟

اوس// اي عمي رحت رحت واشتريتلي ملابس داخليه من المحل اليم بيتكم .. بلا بشرفج قدر هسه اني لبست الدشداشه شلبس جواها ..؟ اطلع برشوت هههه..؟ ههههههه وينج ولج ..؟

عزا العزاك هسه هوه شكد لح بالموضوع .. اجيبه يمنه يجيبني يسره .. قدر // ءءء ابو رامي شووف

جاوبني بسرعه وصوته بي ضحكه خفيفه // هاا شفت ..؟

// ءء هايه شفتوا الرجال ..؟

تنهد بضوجه وجاوبني // لا ما لكيانه ماخذ فلوس من مرته وضاربها واهل المره راحوا على اهله وصايره لويصيه بس الله اليعلم بيها انشالله نلكا دندور عليهِ اني و ولد عمج ..

// انشالله. سكت واني هم سكتت .. سمعت صوته من بعيد يحجي ويا ..

جميل// هاا حضررة الضااابط ..ويامن تحجي ويه قدووره ..

عدلت كعدتي بسرعه بلكي الله يحس اوس وينطينيا احجي ويا ..
جاووبه اوس بحده// ويه مرررتي داحجي ليش شرايد جمممييل

صار صوتهم بعيد ..بس يوصلني خفيف ومن الفضول فوتت التيلفون بأذني علمود اسمع زين.
.يا مرتي يا صخاام

جميل // ههه والله مصدك بنفسك ياا مره هاي ..لا تنسه انتو متزوجين بس على ورق..

اوس // دقيقه قدر اصبري ....
رجع صار صوته بعيد بس بعده يحجي ويه جميل..حسيت صوته بي نبرة مكر هووايه

اوس// ههههه اي ابني كدامكم شي و وراكم شي ثاني .سوالف متزوجين بعدين احجيلك عنهن من تكبر ..

عزا العزاني هذا شديحجيله .. كمت الطم على خدودي بس لا جميل يصدكه..
شكد جذاب هذا اوس .. مسوي نفسه جبير ورزن وهسه كاعد يصفطله جذب ..هاي لو اني كلت هيجي لنور جان شنو سوه ..!

ماسمععت شي وراها بس صوت فشار وهذا يغلط على اوس واوس يغلط على جميل ... ونسد التيلفون ...

رجعت خابرت عليه اكثر من مره ماكو ميجاوب خابرته مره رابعه بأخر رنه يلا انفتح الخط.. //// حركتي شيييب الخلفوووني شكووو ..؟

// ءء ابو رامي شصار تعاركتوا مو؟

جاوبني بصوت حاد بس ديحاول ينصي سؤاله جمدني من الخوف // انتي شمصخممه ويه هذا الكوواد جممييلل ..؟

ــــــــــــــــــــــــــــــ

سهند...

يغارُ عليها وهيَ ليست لهُ... كَـ فقيرٍ يحرسُ مالَ غني....

ـــــــــــــ

الطلاب كولهم كاموا يباوعون عليه ويرجون يباوعون عليهِ
وجوري خبصت نفسها خبص منوين تعرفي ..

باوعت عليهِ بخزره وهوه الخبيث مبتسم .. جاوبني وهوه يأشر بأيده اكعد بلا مبالاة // اعرفج ميحتاج اكعدي .. الي بسدها ...

وكفت جوري وهيه تبتسمله واني رجعت كعدت ..
شكد مكروه غير وكفت عود احترام الك وداعرف عن نفسي هوه صوجي مو صوجه ..

هوه شجابه هناا خلي يصبرلي اذا ما اكول لأمه عليهِ اخليها اجرجر اذاناته على كولتها .
. هاي اول مره يفوت علينه خلصها كولها ضحك وشقه ويه الطلاب واني كاعده بشلعان الكلب اريد بس يخلص الوقت ..

والله ابو الافلام طلع عنده حس فكاهي ..
خلصت المحاضره هاي اذا جانت محاضره كلبها منصه مال ضحك هوه والطلاب وفوكاها هذا وليد طالب ويانه اخذها ميانه ويا .. ابد ما يحب يضحك بس اكوله دي يكعد يكركر من الضحك ..

جوري// تعالي ولج سهنند منوين تعرفينوو الله عليج كوليلي بس لا يطلع اقاربج هاا ..
جاوبتها بضوجه // يمعوووده جيرانه جيرررانه لا اخويه ولا ابويه جيرررانه ..

ضربتني على جتفي بخفه وتحجي بزعل // ايي هسه على شنو معصبه انتي.. قابل شسألتج اني ..هاهيه بعد لا اسألج عن شي ولا احجي علمود لا ضوجين ..

سحبتها من ايدها قبل ما تروح واني احجي وياها بضحكه // تعالي ولج هاي وين رايححه ههههه اشو صايره تزعلين بسرعه .. جاوبتني بزعل/ اي مو انتي صايره كل ما احجي وياج تجاوبيني بعصبيه
جاوبتها بضحكه// لااا يمعوده بس اني ضايجه من شي وطلعت بيج اسفه عذريني ..

باوعت عليه بسرعه وملامحه تغيرت والبسمه انرسمت على وجها /// هاا ديلا عبالي ضايجه مني ههههه اني اذا ما اصطرج انتي من الصباحيات المن اسطر ..بس والله سهينه هذا الاستاذ إلا اشررد ....

ورجعت ديمه لعادتها القديمه هسه اني لو ما مراضيتها هههه...
خلص الدوام وهذا ابو الافلام ما شفته .. رجعت للبيت بعدني ارجع مشي .. اريد احصلي سايق انشالله بهاليومين ..ويجوز اسجل ويه جوري لان أأمنلي ...

فتت من يم فرعهم وهذا اخو سرمد افندي واكف ناطور يم بابهم .. اول ما فتت تجاهلته وهوه الافندي مو عيون كامرة مراقبه.. تجاهلت نظراته وسرعت بخطواتي .. كالعاده سلمت على ابو عباس خطيه الشمس حاره وهوه جان يفر براسه يمنه يسره يجوز ديدور عليه هههه.. .........

طلعت من الحمام انشف بشعري والتيلفون يدك سطرني سطر .. // الوو ..ها علياء ..

علياء// ولج سهنند اشوو ضاايجه بس لا لان خابرتج هااا كولي كوولي ..

سهند// لا يمعوده ضاييجه من غير شي انتي شلج دخل..
علياء بحماس // هاا الله عليج منو مضوجج هذا الانباري هاا كولي كولي حبابه ..

ذبيت المنشفه على الكرسي وجاوبتها بضوجه// اي والله هذا المكروه شمعرفج انتي ..؟
// ههه لا مو هيج توقعت ..شبي احجيلي..

سهند// مابي شي بس اليوم طلع الاستاذ الجديد مالتنه .تخيلي ..
علياء،// لا بربج سهنند لجج هذا راكض وراج يالثوله .. دخذي رقمه بحجه استاذ وكذا وانطينيا هههه

سهند// هم رجعنه لسالفة الرقم على كولته ابويه انتي انسي هالموضوع هههههه
علياء بصوت عالي/// اويليي اذوووب اني بالابويه هههههه

سهند// ههه عابتلج صايره فرد مره تزوجي آزاد وذوبي يمه..
علياء // لا عمي عوفي آازاد على صفحه وسولفيلي بسيوفي..

جاوبتها بنفاذ صبر//يااا علياء لا سيف ولا آزاد هستوني طلعت من الحمام خلي اكمل شغلي وبعدين اخابرج..
سديت التيلفون منها واني ضايجه ..
ماعرف منو الصاير مكروه همه لو اني... كل ما احجي ويه وحده كال سيف وحجه سيف..انوب لحكني للجامعه .. وهسه اني على شنو ضايجه شلي دخل ببي خلي يولي عادي ...

انوب هايه علياء صايره تخابرني كل يوم علمود تسأل على سيف امرها عجيب .. بدال ما تسأل عني تسأل عن سيف...!

ــــــــــــــــــ

اليوم التالي.

كعدت الفجر بنشاط اريد اكول لامه عليهِ اليوم بلكي الله الكاها بالجامع..
لبست عبايتي وطلعت للجامع... الجو بي نسمة برد والدنيه شبه ضلمه وصوت الاذان هاادئ نيال المؤذن على هذا الصوت..

فتت للجامع والحجيه دتصلي ,,وكفت اني هم يمها وصليت .. كملت صلاة وهيه تباوع عليه وتسبح .. هالحجيه هايه شككد محبووبه ..بست من راسها وكعدت بصفها // شلونج خاله..

// زينه يبعد خالتج انتي شلون رويحتج..دروسج شلونها..؟

سهند// الحمدالله خاله زينات كولهن..
//اي الحمدالله ..كالي سويفان صار استاذ عليكم والله فرحت جثير عبن انتي حديثه وحيده وصيته عليج وحطيت حجايتين بأذانه ..

سهند::/ هههه اي خاله شفته ..ءء هوه شمعرفه بالجامعه مالتي..
//لا يمه مايعَرف بس هوه سائل الوادم ورفيجه طرشله خبر عنج عاد كتله قدم عليها وخلي بنت العالم جدام عويناتك و وصيته عليج جثير ....

سهند// اي خاله تسلمين ..
خلي البنيه بين عوينك قابل اني ماعرف اتصرف لو صغيره ..
شجاوبها ماعرف انوب سائل عليه اخته بنته علمود يسأل عليه اصبرلي سيف ..

سكتت شويه ورجعت كملت كلامها// اييه يمه اييه ...هذا الوليد الوحيد عندي انه ..
عقدت حواجبي بأستغراب// شلون خاله الوحيد ليش سرمد وهاي البنيه مو اخوانه..

طبطبت على رجلي بأيدها الدافيه وجاوبتني// اي يمه اخوانه...هند اخته وسرمد يصير اخو بس من الاب ..الحجي جان متزوجني انه ومره ثانيه ويايه وتوفت مرته بالولاده وجابت سرمد ..الله يرحمها

// الله يرحمها .. يعني سرمد وسيف اخوان بس من الاب ..
// اي سيف اكبر منه بجم سنه ..وبعدين يلا جبت اخته هند الغبره..

سهند/ ههه خاله ليش تكرهيها ..؟
جاوبتني بتعب // يمه ماكرها بس سالفه طويله وانتي بطيتي عن دوامج توكلي والايام جدامنه جثيره..انشالله..

//انشالله..
سلمت عليها وطلعت .. صدوك البيوت اسرار ...واقفال هاي الاسرار اهل البيت.
. كدام الجامع مال الزلم كرسين وطبله صغيره هوه جان كاعد على الكرسي الي كدام الجامع وبأيده سبحته نفسها حفظتها حفظ ما يغيرها.!

رفع راسه عليه ورأسةً ابتسم.. بادلته بنظرات حاقده ومشيت عنه.. //يولي سهنند..يولوو..

التفتت عليهِ بعصبيه جاوببته بنتر// خيرر خيرر شراايد ..أمر خدممه.؟
جاوبني وهوه يهز براسه/ تؤ تؤؤ يول يسهند هيج تحجين ويه استاذج يولو العكَل يراد..

// والله انته هنانه مو استاذي ترا ..بعدين انته ليش تسأل عني بالجامعه هاا ترا عيب العالم شيكولون عني..اكيد راح يحجون عني مو عنك

جاوبني بحده ينزل راسه وبس عيونه رافعهن عليه // حسسسج لا تعلييينه جم مره انبهج يولوو ..بعدين منو يحجي عليج الا ارجعه لظهر ابو اشو تحجين حجي ماصخ انتي ..

باوعت عليهِ بتوتر مو اكوللكم خبل قبل شويه جان يضحك وهسه عصب بسرعه ..
سهند// خوش..

عفته ومشيت سيف// يووول يسهننند اذا ماا تاخذين الرقم مني اطلع مو من ظهر ابوي اذا ما حاجيت رفيجتج واخذت رقمج منها...

ـــــــــــــــــــــــــــــــــــــــــ

النهايه قربت ☹️

جذب هههههههههههه اشاقه وياكم عسلاياتي..

ياقربت ورانه حصبه وجدري ماعرف حسبه وجدري هوه المثل نفسه هههههه

رأيكم ولا تنسون التصوين رحمه لأبيكم ههه... حفصه الهاشم...