زمهرير الاوجاع الفصل الثالث والعشرون 23 - بقلم قدر ال هاشم

زمهرير الاوجاع..
حفصه الهاشم.. صلوا على نبينا ♥️

ـــــــــــــــــــــــــــــــــ

سهند..

اود أن اصف شعوري الان بالتفصيل الملم .
رجفان القلب..
ضيق التنفس..
الارتباك والتوتر خدر الأرجل وعدم التحرك.. الهمة في البكاء ولكن التوتر يتغلب على الدموع الالم يستوطن قلبي اما إذا سألتني تحديدا عن قلبي ...متقطع متهشم.. متناثر متقسم واعتقد ايضا انها نهاياته والتوجه نحو التحول الى صخور.

بقلم.

ــــــــــــــــــــــــــــــ

قدر..

رجعنه من بيت عمهم واوس كال شويه وارجعلكم.. عاف السياره وطلع.. فتنه اني وعمتي وعلياء.. بعدني واكفه يم باب المطبخ الخارجي جان تصيح علياء على امها علياء// يمممه شووفي قدرر شسووت هاي المسكيينه.؟
باوعت عليها بأستغراب // شسويت .؟ علياء// لاتسوين نفسج ماتعرفين ماشفتي اوس شلون يباوع عليه شكلتيله هااا كلتيله علياء ضربتني ذاك اليوم مو.؟ ام فراهد// لا اني كلتلها ماتكوله.. خوما كلتيله ولج قدر.؟

قدر// لا والله خاله ماكتله . علياء// ها يعني داجذب ..لعد شبي اخويه طول الكعده وطول الطريق يخزر بيه بعيونه ها شمحشيه براسه احجي. ام فراهد// اي يمه اني هم شفته معصب عليها..خوما كلتيله ولج غدر.
+ قدر// لا والله خاله مافتحت حلكي بكلمه اصلاً اني ناسيه السالفه من زمان خوما هسه اكعد اكوله علياء// جذاابه ..كلتيله.. اتقدمت عليه ودفعتني من جتفي وهيه تصيح عليه // شووفي لج لا عبالج اخاف منج اذا تكوليله قسم بالله هاي عينج الثانيه افكسلجياها براشدي يفر راسج فر زين ماناقصني غير الزعاطيط..

دفعت ايدها عني وماجاوبتها بس خزرتها بعيوني.. وخرت عنها اريد اطلع من المطبخ..جان ترجع تدفعني قوي على الباب مال المطبخ الخارجي.. انتظرت نفسي علمود اركع بالباب اشو ما انركعت..؟!

اوس/// عليااااء اسبقيني لغرفتج بسررعه..
التفتت عليهِ بسرعه عبالك اجه ابويه مو زوجي . علياء// اوس والله هيه اتجاو..

جاوبها بهدوء بس عيونه تبين عكس هذا الهدوء // لغررفتج داكول بسرعه. باوعتلي هيه بحقد وراحت لغرفتها. بس لو اعرف شغيرها عليه اني ارتاح.! ام فراهد// يمه اوس سوالف بنات بينهن يحلنها لا تسويلها شي. اوس// يمه عتبي عليج شلون تخلين بنتتتج تمد ايدها على مرتي عود هاي امانتي يممج هيج تسوين بيهااا

ام فراهد// يمه بس على كيفك هنه بين. طلع اوس من المطبخ وهوه يجاوبها// خير انشالله خير.
عافنه وراح لغرفة علياء. ام فراهد// طاح حضج قدر شوف شراح يسويلها هسه ارتاحيتي هيج.. طمت عليه بنهاية كلامها اوراحت..!! ادري اني شلي دخل..؟! اذا هيه بنتها مفضحه

.......

عفتهم وصعدت فوك.. صح انقهرت عليها على حسب ما سمعت منهم اوس ايده والضرب اذا احد يخالف كلامه.. بس هم خلي يجر أذانها شويه خبلتني كدام بنت عمها وكدام الرايح والجاي لو تذبلي كلام لو تكعد تقلد عليه ام القاف وماعرف شنو.. نزعت العبايه وفتت غسلت وطلعت.. دامشط بشعري.. وصوت اوس يوصلني من جوه..

يا ستار ..بلكت ينام برا اليوم ما ناقصني يجي عليه ويكعد يرزل بيه. ضفرت شعري هستوني كملت جان يفوت هوه لا احم ولا دستور.. عيونه حمر من كد الزوم. راح كعد على طرف الجربايه وحط ايده على رجله وكام يهز برجله..

باوعت عليهِ واني لازكه بالميز.. أشرلي بأيده وهوه منزل راسه بمعنى تعالي.. بقيت واكفه بمكاني ما تحركت. رفع راسه وخزرني // شدااالغي انكبرري هنااا

ذبيت المشط ورحت وكفت يمه. اول ما رحتلها جرني من ايدي بسرعه وكعني بالكاع مقابيله.. اوس// على منوو اجذبببين قدررر..؟

قدر// ها.؟
اوس// علللى منووو اجذبين .؟ اكوولج شبيها عييينج تكوليلي حمااام زعطوووط كداامج اني تقشمرييين عليه بنت الزماايل. جرني من أذني وهوه يرفعني عليهِ حسيت بيها راح تنقطع. اوس// قسماً بالله اذا شميت ريحة جذب مننج الا لسااانج هذااا اكصه واعلكه بركبببتج قنندرره مفهوووم لووو لا.؟

لزمت ايده الي لازم بيها أذاني وعيوني دمعت من الالم هزيتله براسي بمعنى .. انوب هذا كام يهز راسي من أذاني ويصيح // ارريد اسسمع صوووتج.
قدر// مفهوم مفهوم.

دفعني من أذني وطلع من الغرفه. اوس// حضريلي ملابببسي دافوت اسببح بسررعه. ...
مخبل والله مخبل..لزمت أذاني صايره حمره . مجنون هذا هوه اني المضروبه بدال ما يعصب على اخته اجه طلعها بيه. حضرتله ملابسه وحطيتهن على القنفه الصايره بالصاله. شويه وصاح على المنشف.. فوكاها يتأمر. انطيته المنشفه ورجعت للغرفه. جان المفتاج موجود بالباب. قفلت الباب ورجت نمت..

احسن علمود ما ينام بصفي,. حقير شلعها لأذني شلع.. لهسه حرارتها عبالك جانت بالفرن.. هاي عود بدال مايدافعلي..! كالعاده اخذتها حجه وكمت ابجي.. من جهه علياء ومن جهه اوس..ومن جهه ابويه. نمت بدون ما احس على نفسي من وجع راسي من البجي.. ...........

لنص الليل تقريباً حسيت عليهِ نام بصفي ..! شويه شويه وسحبني عليهِ حط ايده جوه راسي والثانيه لفها على خصري..! فتحت عيني واني مطفيه .. دفعته وعين فاتحتها وعين مغمضتها من النعس.
اوس// أُشش نامي نامي.
واني هم ما جذبت خبر غمضت عيوني ونمت بحضنه..

..................

ثاني يوم الصبح هوه كاعد وطالع من الصبح.. اني هم غسلت ولبست حجابي ونزلت جوه.. احسن خلي يطلع .. كل ما أذكر البارحه شلون نمت بحضنه استحي خدودي تصير نار من الفشله.. وهوه ميستحي جان كل شويه ويحرك ايده على خصري.

...........

نزلت جوه عمتي جانت مخبوصه وعلياء مطنكره قدر// صباح الخير. كامت علياء اول ما فتت للهول وطلعت برا ام فراهد// لا هلا ولا مرحبه..روحي روحي شوفي زوجج شمسوي بأخيته من وراج.
قدر// خاله والله اني ما كتله..ام فراهد// وخل خاله.. لاتحجين ويايه شمري رداناتج ونظفي الصاله راح يجون بيت اخوي من كركوك.

عافتني وراحت للمطبخ. من صدوك تحجي..! اني شدخلني بالموضوع اذا هيه علياء فضحت نفسها بأيدها.

................

بقيت انظف بالبيت ومر النهار كوله وهنه مطنكرات عليه. كل ما احجي ويه وحدده تعيط بوجهي. اني هم عفتهن والتهيت بشغل البيت.. للعصر اجه ابوهم وفراهد. وراهم فات اوس.سلم على امه وهيه مطنكره عليهِ اجه سلم عليه وباسني من راسي.! اوس// شلونها مريتي اليوم.؟ جاوبته واني اوخر من يمه // الحمدالله زينه.

اوس // يااابوويه ..اموت بالمعصب اننني. باوعت عليهِ بخزره هستوني داحجي جان تجي امه من ورا نزلت راسي وطلعت من الاستقبال ام فراهد// يلا يمه اجوي بيت خالك بسرعه فوتهم.. فاتوا بيت خالهم .ابو آزاد الي يريد علياء. الله يعينه عليها. بقوا كاعدين الزلم والنسوان وحد. فتت سلمت عليهم وخالتي حتى ماعرفتني عليهم.. فتت بملابسي من الفشله. سلمت عليهم شلون ما جان وطلعت.همه اتغدوا . وراحوا على بيت اقاربهم.

...............

كاعدين وره العشى .. صبيتلهم جاي و وزعتلهم . واوس كل شويه يباوع عليه ويغمزلي..! مو اكوللكم مجنون..بس متصدكون.

ابو فراهد// اليوم بيت اخوج طلبوا علياء مني رسمي.
ام فراهد بفرحه// والله يوم المنا اناسب بيت اخوي
ابو فراهد// اي اني هم عاجبني الرجال والنعم منه

فراهد// اني عن نفسي قابل خلي يكبعها وياخذها.
اوس// هوه خوش رجال خوش رجال اسألوها هيه شنو رأيها يلا تقررون
ابو فراهد // عمي رأيها مو مهم خلي نزوجهم ونفضها هوه الرجال من زمان رايدها على شنو نطول بالسالفه.. ــــــــــــــــــــــــــــــــــــــــــــــــــــ

سهند.

مر اسبوع على الي صار..

ابويه ما يحجي ويايه ماعرف منو الي لازم يزعل اني لو هوه ..! ما الي عين اخابر سيف ..مع العلم مشتاقتله كولش ..صح وافقت ابويه بكلامه من كالي تنسين الصار وياهو اليسألج اكوله اي اني ما اريده.. بس مستحيل اعوف سيف..

بس لو اعرف ليش جابها اذا هوه جان يعرف ردة فعل ابويه من توتره .. ادري شلون حظ عندي اني.. جنت خايفه ابويه ما يرجعني لتكريت بقيت يومين اكل بروحي.. إذا ابويه ما رجعني يعني بعد ما اشوفه ..ويجوز هوه يروح يتزوج.. جنت كولش خايفه من هاي النقطه.. بس الحمدالله ما حجه بالموضوع ابداً ..

بهذا الاسبوع اغلب وقتي بغرفتي ولو هبه ويايه لو اوس يجيب البنات يمنه.. وحتى كلامي وياهم قل..مابيه حيل اكوللهم هلو عاد مو ادك سوالف وياهم.. يوم الجمعه تحديداً قبل ما تنتهي عطلتي بثلث ايام.. كالعاده جنت كاعده بغرفتي ويمي قدر وعلياء.. قدر هادئه عكس علياء حركه كولش ههه واربعه وعشرين ساعه تتحارش بقدر مرات اكوللها كافي يمعوده بزعتيها للبنيه ..وحتى هيه قدر مترد عليها..

بس علياء لو حطت شي براسها منو يطلعه بعد.. سمعت صوت يوسف ديصيحني طلعت من يمهم شويه ونزلتله جان واكف على الدرج.. سهند// ها يوسف.
يوسف// خيتي جهزي نفسج انشالله عكب باجر نطلع لتكريت حجيت ويه ابوج اني وابويه وقبل ترجعين..

جاوبته بفرحه صوتي يجوز وصل للأستقبال // الله عليك يعني راح ارجع لتكريت ..هههه الله يبشرك بالخير.. باوعلي وعبالك ما راضي على تصرفي.. ادري بي حافظني حفظ.. يوسف// سهندد ترجعين للدرااسه مو لغير شي درراسه.. حكيت راسي واني احاول اتيه الموضوع عليه // اي اي يوسف ههه لعد المن ارجع غير للدراسه .ولا يهمك انشالله عكب باجر اكون جاهزه.. جاوبني ونظراته مو مقتنعه// اي خوش .. يلا اني نازل على اوس خبصني خبص.. سهند جاوبته واني اصعد// اي تمام باي.

........

صعدت للغرفه واحس روحي نصها رجعتلي نصها مو كلها.. فتت على البنات واني اضحك سهند// هااكم البشااا. قدر// اش اشش هذا ماعرف منو خابر وعلياء جاوبته.. باوعت على علياء راحت وكفت يم البرده بعيده عنه ..كعدت بصف قدر واني بعدني اباوع على علياء بأستغراب.. سهند// شنو يعني رقم غريب..؟ قدر// لا تيلفونج دك وعلياء جاوبت عليهِ كالت بين ما تجي.. // ها منو دك خلي اكوملها.. رحت على علياء وقدر جاوبتني بضحكه// // هههه والله ماعرف واحد مكتوب عليهِ ابو الافلام.

انداريت على قدر وعيوني مفتوحه على وسعهن.. سيف..!

رحت على علياء بسرعه وهيه اول ما اجيتها انطتنيا علياء// خوويه ياريت بعد ما تتصل ابوها يسويلها مصيبه وانته النار ما توصلك بس تحركها هيه.. ياريت متخابر بعد مع السلامه.. سدت التيلفون وانطتنيا..

علياء// شلون كرامه سزز شبي هذا الغبي اكوله اني بنت عمها علياء يكولي انطيني سهند احاجيها..عابتله..
اخذت التيلفون منها بنتره واني خازرتها // وانتي لييش هيجي حجيتتتي ويااا.؟
علياء// يا يا سوي خير وذب بالشط ولج سهند مو زين رزلته جان هسه خابصج بالاتصالات ويروح عمي عبد الجبار يسويلج سالفه احسن هيجي اني لمصل.. قاطعتها واني امشي من يمها // خللف الله عليج لاتجاوبين بعد على رقم يخاابرني ..

وكفت على صفحه داريد ادك عليهِ هوه خابرني قبلي.. بسرعه فتحت التيلفون وحطيته على اذني اول ما فتحته اجاني صوته المعصب .. اسمه ..اسمه متنرفز ومعصب.. سيف// بنت الاوااادم جاي اكلج انطيني سهند شهالكواة العين..

ضحكت عليهِ بيني وبين نفسي ويه الضحكه طلعت الالف الحسرات من روحي.. سهند// اني سه
جاوبني هوه بسرعه وصوته امبين عليهِ اللهفه // سهندد..بوويه شلووونج سهنند..جم مره خابرتج ضل بالي يمج..يولووو سهنند هذا ابو رااس اليابس خوما سوالج شي تارجعله اهدم بغداد فوك روسهم..

وخرت التيلفون من أذني وهوه بعده يحجي بس علياء خبصتني أذانها حشكتها بنص وجهي.. عفتها وركضت على الحمام وقفلت الباب عليه واسمعها هيه ادردم عليه.. رجعت حطيت التيلفون على أذني وهوه بعده يصيح الو سهند وينج يولو جاوبيني لا اشلعين كلبي.. قويت نفسي عود داجاوبه بدون ما ابجي..بس عبس.. سهند// سيف..

جاوبني هوه بسرعه// يبعد اهلوو وعشيرتوا كولي شبي سيف الارعن كولي
. سهند// ههه حشاك.. شلونك.؟
تنهد وجاوبني// شلوني ؟ ابوج باك النوم من عيني شلوني يانور عيني شلوني..؟ اشهد بالله كلتلها لامج لاتجين خاله على عيني وراسي بس جيتج ماتفيدنه بشي بس شيقنعها.
سهند// انته ليش ما كتلي هايه امي..؟

سيف// ماكدرت ابويه كلت اخاف ترفض وما تقبل .. كلت اخطبج اجيبج يمي وبعدين اكولج.. بس الله كاتبلنه غير شي..
سهند// بابا من ورا الصار كولش عصبي ومحد يكدر يحجي ويا كلمه .
جاوبني بحده// هذا ابو راس الياابس لو مو ابووج..استغفرالله ربي..لا توازيني على الحجي يولوو..

سكتت وهوه هم سكت بقيت اسمع صوت تنهداته واتحسر من يمي عليهِ.. شويه ورجع حجه // سهند انشالله ارجع لابوج من جديد واخطبج خوما نبقه هيج واجيب ويايه شيوخ كبار عسى ولعل يلين راسه اليابس..

جاوبته بسرعه //صدوك سيف يعني مراح تعوفني ؟!..
تنهد وجاوبني// شعوف منج يبليه شعوف. خلي اشوف دربي من وراج لا ليلي ليل ولا نهاري نهار.. جاوبته واني اضحك وابجي بنفس الوقت// ههه والله ,, والله اني عبالي ههه ..عبالي راح تعوفني سييف..

سيف// يبعد اهلوو لا تبجين جم مره لازم اكلج دموعج غاليه سندي لا تبجين..
مسحت دموعي واني اجاوبه// هههه سندك.؟؟!
سيف// ههه اي بويه سندي . لا يخوفج هذا ابو راس اليابس من يسألج كولي اريده لا تتخلين عني سندي..
جاوبته بسرعه// لا ,لا والله ما اتخله عنك اني احبك اصلاً والله شلون اع..

سمعت صوت الباب يندك بقوه من الخرعه مالتي سديت التيلفون بوجه وطفيته .. لزمت التيلفون واني افتر بالحمام.. وين اضمه ..وين اضمه.؟ باوعت على الغساله فتحت الباب مالتها وحطيته بنصها.. فتحت الباب واني اسوي نفسي طبيعيه بس صوت تنفسي من التوتر يجوز وصل لتكريت.. علياء// هااي ويننج انتتي شبييج سهند ما اتوبين الا ابوج يلززمج..؟

باوعت عليها والعصبيه احسها شويه شويه كامت ترتفع وتطلع على شكل حراره من أذاني.. جاوبتها واني اكز على سنوني// عللللياااااء.. علياااء شدععي عللليج ..انتي شتريدين مو هبطتيني شبييج سويتي هجوم على الباااب..
عفتها ورحت طلعت التيلفون من الغساله .. شدعي عليها .. طلعت من الحمام وهيه ورايه..

علياء// اي انتي غبيه ترا صعدت مرة ابوج وسألت عنج بس اني ضميت وراج هاي بدال ما تشكريني كاعده تحجين عليه انداريت عليها وحضنتها // يمعوده شكرا هااا اها هايه بوسه لست علوشه.. علياء// ديلا يلا خوش..قنعيني بهاي سوالفج..تعالي احجيلي شنو حجيتوا انتي وسيف..؟

تعالي.. سحبتها من ايدها وفتنه للغرفه جانت كاعده قدر تلملم بيها ههههه حقها اذا اني مسويه الغرفه خرابه.. كعدنه ثلاثتنه وعلياء خبصتني يله ويله.. سهند// اصبري ولج خلي اخذ نفس.. احم كال راح يرجع يخطبني من جديد بس على ما يهدء بابا..
قدر// والله كفو منه عبالي من ورا الصار راح ينهي كولشي هوه هم.. سهند//ههه اي والله اني هم بس حتى هوه يكولي لاتعوفيني يعني ماناوي يعوفني.. علياء// والله طلع خوش رجال..!

ضربتها بخفه على ايدها وجاوبتها// هههه اي يابه شسامعه عنه هههه
علياء// هههه لاعمري بس توقعنه يعوفج..الله يهنيكم..

..............

بقوا البنات كاعدات يمي تعشوا يمنه وراحوا.. اني هم صعدت جهزت اغراضي بسرعه بسرعه عبالك باجر راح اروح ..

بعد يومين...
صعد جاسم نزلي جنطتي ونزل واني ورا.. جاسم// ديري بالج على نفسج اخيتي ادرسي زين ارفعي راسنه..
جاوبته واني ابوسه// انشالله حبيبي انته هم دير بالك على دروسك وعلى نفسك..
عبد الجبار// هاا راح تتوكلون.؟

سهند//اي.. سحبني وهوه يبوسني من راسي ويحطلي فلوس بأيدي
// هاج بنيتي ديري بالج على نفسج ..ما اريد سوالف غير الدراسه سهند.وروحه منا ومنا هم ما اريد ابو عباس راح اوصي عليج انشالله..
سهند//انشالله يابه. عبد الجبار// يلاا وللك يووسف وين نممت ..؟ طلع يوسف من الغرفه وهوه يلبس ساعته// جايك جايك عمي. بقه بابا يوصي يوسف على الطريق ولاتمشي سريع وماعرف شنو.. هوه يوصي بي واحنه اول ما نلزم الطريق السريع يفولها للميه هههه.

...............

طلعنه اني ويوسف وطول الطريق اني ساعه اضحك ساعه اصفن.. حسيته يباوعلي بطرف عينه سويت نفسي مو يمه.. يوسف// سارحات عنزوج اليوم خاتون..!

سهند//ههههه اي والله مشتاقه لجوري..
يوسف//امم لجوري..كلتيلي..

سكت شويه واني هم سكت ..ادري بي هذا يوسف اللوتي ماتمشي عليهِ هاي السوالف هههه وصلنه لفرعهم عبالك قلبي سوه حفله بداخله التفتت على جهة يوسف لان بيتهم من جهته.. باوعلي هوه صفح وكام يمشي بطيئ..اول مافتنه بفرعهم جان هوه واكف يم الجامع هوه وابو.. انتبهوا علينه واني بسرعه نزلت راسي.. شكد فشله من ابو رجال جبير وينطرد..

يوسف وكف السياره على صفحه ونزل يسلم عليهم.. اباوع عليهم شكله ديتعذر منهم . سيف يباوع على السياره ومن يباوعله يوسف يسوي نفسه ديباوع على غير شي.. هم لابس دشداشه سوده..!

بس لو ادري مايغيرها لو ماعنده غيرها.. انشالله من نتزوج اني اشتريله اصبروا عليه شويه..هههه
شويه واجه يوسف حرك السياره وفتنه لفرعنه.. باوعت عليهِ عبالك ديلعب بأعصابي..! نزلنه من السياره ويوسف نزل الجنطه طلع ابو عباس وكمنه نسلم عليهِ سحبت الجنطه وفتت قبله اكيد ابو عباس اذا ما ياخذه بالنص ساعه سوالف ميرتاح..

فتحت البيت عبالك صارلي سنه عايفته مو كم اسبوع.. فتت لغرفتي حطيت الجنطه ويوسف بعده مافات..اخذت ملابس وفتت للحمام غيرت ملابسي..وهم طلعت ويوسف ماكو..! كل عقلهم حتى النسوان ما سوتها..

رحت للاسقبال وفتحت البرده شويه صارت عيني عليهِ اول مافتحت البرده اني اكول ما معقوله كل هالوقت ويه ابو عباس.. واكف يوسف وسيف وداكيها سوالف.. شديحجون كل هالمده.!!

بقيت واكفه واباوع عليهِ شلون يحجي ويه يوسف ومنفعل.. ساعه يمسح وجها بأيده وساعه يحط ايده على خصره والظاهر ماعاجبه الكلام.. شويه وراح ويوسف صعد للشقه. رحت وكفت يم الباب اول ما اجه فتحتله الباب قبل ما يدكها.. باوع عليه بأستغراب // يااستار واكفتلي ناطور شبيج؟

سهند//شجنت تحجي ويه سيف.؟
راح على المغسله واني ورا جاوبني وهوه يغسل//سوالف زلم مو مال بنات ليش شتريدين.؟
سهند//يووسف هاي شبيك .؟شجنتو تحجون ها شكالك.؟ سحب الخاولي وكام ينشف وهوه يباوعلي بصمت.. سهند بأسغراب//شبيك.؟!

شمر الخاولي بوجهي وراح للمطبخ//دتعاي بدال هاي سوالف تعالي سويلي لكمة اكل داولي لاهلي مرتي تخاف عليه ماتقبل ارجع بالليل.. فتحت الثلاجه واني اجاوبه//هسه اسويلك اكل وتكعد تحجيلي شنو حجيتوا. طلعت بتيته وسويتلها مخلمه بسرعه بسرعه.. حتى البيض يجوز ما استوه كله ههههه حطيتليها وصبيتله جاي وكعدت كدامه.. سهند// يلا احجيلي..

يوسف//دخلي اتزقنب شبيج..؟ سهند//اي اي اكل حشاك من التزقنب. باوعلي بطرف عينه ورجع يكمل اكله.. بالشافعات يلا كمل كام غسل ايده واني لميت الميز رجع كعد على الكرسي صبيتله جاي وكعدت مقابيله يوسف// الرجال شاريج بس ابوج قافل قفلة قريش. سهند//ادري بس انتوا شحجيتوا.؟ يوسف// اني رحت طيبت من خاطره وخاطر ابو..عاد هوه كال اني انشالله فتره وارجع اخطبها كتلها اني هم راح احجي ويه ابوها واخلي عمامها هم يحجون ويا بهدوء وانشالله البي خير الله يقدمه.

سهند//وصدوك راح تحجي ويه ابويه.؟ يوسف/لعد داجذب على الرجال..؟!
سهند//انشالله. يوسف//وانتي هم ياريت هاي الفتره لا تحجين لعلياء كل شي خلي اسرارج بينج وبين نفسج لا تكعدين على اقل شي تخابريها وتسردين الاول والتالي..
سهند//انشالله انشالله.
يوسف//يلا اني اتوكل..ديري بالج على نفسج وعلى دراستج. سهند//انشالله.

................

طلع يوسف واني رجعت سويتلي حمله على البيت تنظيف وكنس . ورا ماكملت اخذت ملابسي وفتت سبحت.. شكد حلو البيت من يطلع مرتب ههه جان كاتله الوسخ.. مشطت شعري وضفرته.. طلعت ملازمي داشوف دراستي وين صارت نسيتها هاي الفتره كولش. وعلى هالحاله مشى اليوم كله...

...........

ثاني يوم كعدت قبل صلاة الفجر.. وكولش متردده اروح او ما اروح.. شمرت العبايه على القنفه وكعددت.. اروح على جامعهم واني ابويه طاردهم من البيت فشله وعيب. سمعت صوت التيلفون .. رحت اخذته طلعت رساله من سيف..! فتحتها بسرعه وضحكتي شكت حلكي.. (تانتظرج بالجامع الحجيه هم تريد تشوفج)

باوعت على الرساله عبالك انطاني الضوء الاخضر.. اجيت اجاوبه بس رصيد ماعندي.. مو حظي واعرفه.. رحت لبست عبايتي واني من الفرحه عبالك اتزوجته.. رجع رمش التيلفون اخذته ههم سيف. جان دازلي رصيد.!! بعدني صافنه على الرساله جان يخابر سيف//الو سهند.؟ ابويه كاعده نايمه..؟!

سهند//لا كاعده ..ليش دزيت رصيد سيف ميح..
قاطعني بسرعه// بويه لا تسوين هالسوالف بيناتنه انتظرج بالجامع مو تبطين.
سهند//انشالله.

.................

سديت التيلفون منه شويه وأذن الفجر انتظرته يكمل وطلعت للجامع.. غريب ابو عباس ماكو..!!
..... وصلت للجامع كالعاده جان الباب مفتوح .. فتت صليت والحجيه جانت واكفه دتصلي هم .. كملت صلاة وبقيت ادعي لو استغفر ..هسه شلون احجي وياها متوتره حيل ..عبالك اول مره اشوفها. انداريت عليها شويه شويه عبالك مسويتلي جريمه.. اول ما التفتت عليها شفتها صافنه عليه ومبتسمه.. ضحكت بفشله وكمت سلمت عليها.. بست راسها // شلونج حجيه والله فشلانه منج حيل .. قاطعتني وهيه تبوسني// يا يمه سهند تخجل مني ..يحويل..

كعدتني بصفها وبعدها لازمه ايدي // بنيتي سهند والله انه حاسبتج مثل بنيتي اول ما شفتج حبيتج ماكولها كدامج الله شاهد..
سهند// ادري والله خاله ميحتاج تحلفين ...اني هم حبيتج هوايه بس والله مستحيه منج كولش. الحجيه// يا يمه لاتستحين غير ابوج انه ماعرفه من قبل عبن ظروفه التزوج بيها اخيتي ماهي زينه ..والله ابني شاريج مو عبن هوه وليدي لا يمه بس والله اشوف القهر بعينه من ينام من يكعد مهموم ما ياكله غير لكمه لكمتين نزلت راسي وسكتت..

شجاوبها لو بيدي اكبع نفسي واروح ويا. اردفت وهيه اطبطب على رجلي // انتي تردينه سهند لو ما تردي علمود انه اتصرف اذا ماتردي ازيحه عن طريجج.

جاوبتها بسرعه وكلبي نزل بين رجليه كولشي ولا الحجيه ترفضني //لا لا والله خاله اريده ليش ما اريده بالعكس والله حتى اني كلت لابن عمي يحجي ويه ابويه علمود يوافق والله.. باوعت عليها شفتها صافنه عليه وتضحك.. عزا ثول يسهند ثول ما تبطلين جفصاتج انتي ابد.

سيف// هاهيه حجيه مو تاتكلج اريده خلي اجيب ابويه ويعقدلنه هين.
انداريت عليهِ والفشله اكلتني اكل ..لو باقيه على الحجيه هواي احسن. حكيت راسي بفشله ووجاوبته على اساس داكحلها // ههه لا اقصد ..اقصد انته يعني خوش رجال يعني حباب هم وحلو يعني خوش رجال هههه

اتقدم على امه باس راسها وهوه يباوعلي .. كعد بصفها وجاوبني بمكر سيف// اي بويه حباب وحلو وشنو بعد يمه..؟ الحجيه// خوش رجال

سيف// اي نسيت خوش رجال ..ليش لا هسع اجيب ابوي يعقدلنه دامج هيج رايدتني.
خزرته بضوجه ونزلت راسي والحجيه تباوع علينه ومبتسمه.. ضربته على رجله بخفه وهيه تحجي ويا // يول يافاين خجلتها للحديثه ماتبطل سوالفك انته.؟ سيف// يمه غير هيه رايدتني ..انه شعندي بنت خالتي طلبت شي غير انفذلهيا. الحجيه// اي انشالله تنفذلهيا انشالله..

باوع عليه وسحب نفس بضيق وجاوبها وهوه صافن عليه // ايييه انشالله حجيه انشالله.
بقه صافن عليه وعيونه بيها حزن . صفنت اني هم عليهِ لا ارادياً اجتني العبره .. بالكوه سيطرت على نفسي. كام هوه ومد ايده لامه وكومها اني هم كمت وياهم سيف// يلا بويه توكلي بس حبيت اشوفج انه والحجيه لا يجيج ابو عباس متصركع..

هزيتله براسي وسلمت على الحجيه وطلعت وهوه ورايه. اول ما طلعنه اجتي بنيه نفسها الي اشوفها مرات توكف يمه وهوه كالي عليها بنت عمه باوعت عليه وعلى سيف بأستغراب .. راحت على سيف وحجت ويا. // سيف نخيتك ابن عمي بويه طالع لغير محافظه وخوتي بشغلهم ماتوصلني لدوامي.

جاوبها وهوه يباوعلي// انشالله تقوى هسع فوتي للبيت طالعه من الفجريه شعندج فوتي بويه فوتي الصبح انه اجيج عود.
تقوى// تسلم والله ماكو مثلك ابن عمي ابو النخوات الحلوه.. سلمت عليهِ ورجعت لبيتها. كل هذا واني بعدني واكفه يم باب الجامع وصافنه عليهم. التفت عليه وحجه ويايه بأستغراب // ها بويه ناويه تبيتين هينه ..؟

مشيت من يمه واني اجاوبه// لا راح اروح اكيددد. مشيت من يمه وهوه ماجاوبني.. هاي البنيه ابد ما مرتاحتلها ابدد. وصلت يم فرعنه التفتت ورايه شفته ديمشي ورايه على مسافه بعيده. باوعت عليهِ ابتسملي واني ما رديتله البسمه ماعرف ليش..! فتت للشقه وابو عباس اليوم ماكو اشو.؟ شنو هاي معقوله اتقاعد من مهنة المراقبه مالتي..؟!!

.......................

مر اسبوع واني كل يوم اروح للجامع. والحلو ابو عباس ماكو لا بالروحه ولا بالرجعه..! اخاف الرجال صار بي شي مو من عوايده..! سيف وامه كل يوم اشوفهم بالجامع. وهوه ورا الصلاة يجي يكعد يمنه بالصاله مال النسوان يبقه يذبلي سوالف واني استحي اجاوبه كدام الحجيه. وله هوه يعرفني الحقير . من اخابره يكولي اني اتعمد اتغزل بيج كدام الحجيه لان لسانج يقصر كدامها.

تعرفوني بعد اني ماقصر من احجي ويا وحدنه استلمه اكس مربع. وهوه يجيب ويصيح لساانج سهنند لسااانج لا اطولي هههه

......

فتحت التيلفون المغربيه جان ابويه مخابرني..؟! صلاوات شعجب.؟
خابرت عليهِ من اول مره جاوبني سهند// السلام عليكم بابا شلونك .؟

عبد الجبار// هلا بيج وعليكم السلام..الحمدالله انتي شلونج .؟
سهند// الحمدالله بابا ملتهيه بالدراسه.؟

عبد الجبار// بالدراسه لو بالجامع..؟

ـــــــــــــــــــــــــــــــــــــــــــ

رأيكم بالسرد والاحداث يهمني احبنكم جثير يداداا..

دمتم سالمين وغانمين حفصه الهاشم..