زمهرير الاوجاع الفصل الثاني والعشرون 22 - بقلم قدر ال هاشم

زمهرير الاوجاع ..
حفصه الهاشم...

تابعوا حسابي علمود من انشر على المنصه بخصوص القصه يوصللكم
صلوا على نبي الرحمه

ـــــــــــــــــــــــــــــــــــ

ذكَرْتُك فانهَلَّت عَلَيَّ مَدامِعي وعادَت إلى قلبي الكَليمِ مَواجِعي ‏بكَيتُ....
وليتَ الدَّمعَ يُرجِعُ ما مضىٰ‏
ولٰكِنَّ يَومًا قد مَضى غيرُ راجِعِ....

ـــــــــــــــــــــــــــــــــــــــــــ

سهند...

من احلى اللحظات جانت بعمري من ابويه وافق على سيف.. جنت حاسه بنفسي اكو شي غلط ابويه واعرفه ما يوافق بهالسرعه.. ولو اكدر اكول حظي واعرفه.. وكف ابويه بالطرمه كدام الكل وميقبل لا النسوان يفوتون ولا الزلم... وهوه يصيح عليهم بصوته الجهوري وكل هذا بكون وصدمتي بكون ثاني.. امي..!

بعد كل هالسنوات تجي على بيتنه وبالختله هم .. والمصيبه الاكبر بيوم خطبتي و ويه سيف..! شكد جنت اتمنى اشوفها بيوم من الايام .. بس مو بهالطريقه..وفوك كل هذا تطلع خالته للرجال التمنيت يكون من نصيبي..!

عبد الجبار/// محددد يفووت لاا نسووان ولااا زلللم هسسه تفهمووني تمااضر شلون صارت خاالتك اني سألت عنكم ما جابولي طاريها وطاري اهلها..شلون غشيتووني هييج..؟ جاوبه سيف وهوه يحاول يهدئ بي// عمي كول ياا الله لا غشيناك ولا هم يحزنون..انته من سألت سألت عن خوالي شي..؟ اليسأل يسأل عن عمام الرجال مو صح ..

جاوبه ابويه بكل صرامه وحده وهوه ينطيهم ظهره// هااهيه لعد مره ما الكم عندي انتهى الموضوع.

من الهبطه لزمت علياء وكمت ابجي وما سيطرت على صوتي..سهند// عليااء عززا عمه اطلعي احجي حبابه..
دفعتني علياء من ايدي بنرفزه و وكفت يم الشباك// شوو دوخري خلي اشوف شديصير.

لزمتني قدر وعمتي ام يوسف واني احس قوايه كلها تبخرت .. عمامي هاجوا عليهِ وصارت هوسه وصياح ابويه رافض وهذوله يقنعون بي ويتهددوله.. عمو سعدون// ابوو جااسم الاموور ما تنحل هييج خوويه احنه ناطيهم كلمه للعالم شلون ترفض هسه كول يا الله وفوتوا جوه خلي نتفاهم.. جاوبه ابويه وهوه يسد باب الاستقبال// محدد يفووت لبيتي.. زوواج ماااكو مرره ماعدكم عنددي..

اتقدمت تماضر عليهم وحجت ويا وهيه تبجي// ابوو ازل بعدك نفسك ما تغيرت متغطرس وجبار.. ليش تظلم الجهال من ورا خصوماتنه الولد شاريها ورايدها على سنة الله ورسوله ..ما يكفيك حرمتني منهم كل هالسنوات وهسع تريد تكسر كلبهم..

جاوبها ابويه بعصبيه وهوه يباوعلها بحده// ماا حررمتج منهن اني .. جمم مرره اجيت لبييتكم اسأل عنج ولا وااحد بين اخواانج انطوني جوواب جم مره اجيت وجبيتهن بأيدي هنه وصغار وارجع خااالي الوفااض وين جنتتي هاا صرت هسه اني حاارمج منهن..

جاوبته وهيه تبجي بعصبيه// اي لان رجعت لرماادي شيبقيني ابغداد ..لا تكوول اني عفتهن انه جمم مره اجيتك وناخيتك اشوف جهالي وانته شجنت اتسوي مو جنت تطردني.. جم دوب ابقه اتوسل بيك مو ثلث سنوات اني رايحه جايه لبيتك وانته ولا كأنوا .. جاوبها ابويه وهوه يدير راسه بعدم اهتمام.// اي لو تحبيهن صدك جانت انتظرتي اكثر من هالثلث سنوات التحجين عنها..

اتدخل ابو سيف وكام يحجي ويه ابويه بهدوء واحنه كولنه خايفين من قراره النهائي // ابوو جااسم هسسع خصوماتكم صفوها بيناتكم لا ادخل الويلاد بالموضوع انه اجيتك من الباب وطلبت بنتكم المحروسه على سنة الله ورسوله وانته انطيتني كلمه..مايصير هسع ترفضني وانه هالكبرني واكف بشيباتي تكلي ارجع لبيتك ماكو مره..الشيخ من ينطي كلمه تصير كلمته مسموعه وتتنفذ وانته انط..

قاطعه ابويه بسرعه وهوه عبالك يريد يتخلص منه// هاااهيه حجي انته كلت كلمة الشيخ مسموعه وانني مرره ماا انطي لا هسسه ولا بعدين.. عافهم ابويه وفتح الباب يريد يفووت للاستقبال.. لزمه سيف من ايده وسحبه عليهِ سيف// ابووو اززل انننه ماا انررفض لا بالديين ولا بالاصوول شيكول النبي محمد صلى الله عليهِ وسلم.

الكل // عليهِ افضل الصلاة والسلام..

التفت ابويه عليهِ وكام يباوعله بأنصات..
سيف// مو يكول ( من جائكم ترضون دينهُ فزويجهُ).. صح لو غلط عمي..؟
جاوبه ابويه بتأييد// صح بس..

سيف// بس شنو بعد خاالي ديني ما عاجبك مو انه وياك نفس الرب ونفس الرسول بعد ليش ترفض عمي اننه بنتك شاريها وكدام الكل اننه رايدهاا الها ما اقبل ترفضني هيج وانه شيخ والي سمعتي بالديره كلها شراح يكولون الناس عنه من نرجع واحنه ما ويانه مره..الحجي مراح يضرني بنتك التنضر عمي ..وانه ما اقبل بالهشي..

دفعه ابويه من جتفه وهوه معصب عليهِ//انته موو احررص على بنتي منني فاااهم الززم حددك وارجع منوين ماا اجيت مرره ماا انطيك لوو تطلع برااسك نخله .

اتقدم عمي ابو فراهد على ابويه وكام يحجي ويا بصوت ناصي عود ديهدء بي // عبد الجبار يخوي كلام الرجال ما عليهِ حاجب ما راح يتضرر غير بنتك من هالسالفه لا تتصرف بعصبيه استعوذ من الشيطان وخلي نحلها بهدوء..

حطيت حجاب على راسي طلعت اني وعمه ام يوسف هم طلعت ويايه وكفت يم الباب مال الاستقبال.. صار سيف كدامي باوعت عليهِ وعيوني مغوشه من الدموع..وهوه نظراته كسرتني اكثر.. يائس..نظراته نظرات يأس حزن..

عبالك ديكولي سامحيني بنظرات عيونه ..!
باوعت على تماضر ,..الي على اساس هيه امي.. اتقدمت عليه وهيه تبجي ..تريد تحضني جرني ابويه من ايدي قبل ما تلزمني بسرعه وفوتني للهول هاللكد ما سحبني قوي..وكعت يم عتبة الباب وهوه مستمر يسحب بيه.. وصلني صوته وهوه يصيح على ابويه بعصبيه. سيف// ابوو اززل يمعووود كسررتها للبنيه لا تسحبها هييج ابووو ازززززل..

دفعني ابويه بالكليدور مال الهول وكام يدفعه من صدره ويصيح عليهِ // انتته لا تددخل وللك اني وبنتتي اخذ اهللك وارجع منوين مااا اجييت كلتلكم مررره ما انطيكممم كلااامي نهائي..

سد باب بوجها وكومني وهوه يفشر عليهم صعدني للغرفه وسد الباب عليه وطلع.. افتريت بالغرفه بحيره ودموعي ما بطلت ..يعني هاهيه ..ماكو نصيب.. امي ..!

امي شلون صارت خالته..؟ شنو هالدنيه هاي الصغيره..افترت افترت ورجعها اليه..

تشبها .. تشبه ازل حيل ..عيونها نظراتها..اخخخ اززل .
.وينج تعاي شوفي امج..تعالي شوفي حالي اززل..

انهارت قوايه يم الباب حضنت نفسي بيأس وحررت دموعي من سجن جفوني.. ماعرف على شنو ابجي.. على سيف على امي ..اريد اززل ..محد غيرها يكدر يواسينيي شيواسي هالكلب هذا شيواسي..!
الباب مقفول عليه وصوت صياحهم يوصلني ليفوك.. ابويه ساد الباب عليهِ وتاركهم بره بحيرتهم..

........................

قدر...

كل شي صار بسرعه..خطيه على كد ما جانت فرحانه وتضحك بكدها اضعاف بجت.. ابوها حبسها بالغرفه بدون ما يحجي اي كلمه سوى مره ماعدكم يمنه.. بقوا العالم واكفين بالطرمه وهذا سيف خبص الدنيا عليهِ احتار على منو يصيح .. اتقدم عليهِ اوس يحاول يهدي خبص البيت بصياحه والجيران كولها التمت علينه.. اوس// كول يا الله ابو فلاح (سيف) ماكو شي ينحل بالصياح عمي واعرفه هسه معصب عوفه شويه يهدئ ونرجع عليهِ..تفضل ويايه للبيت وانشالله نشوف حل..

جاوبه وهوه يصيح بعصبيه اباوع على عيونه حابس الحزن بيها وديضهرها على شكل عصبيه.. سيف/// يااا ينحححل انته شفتتك عممك ماا يستجن شوويه تانعرف نتصررف انه ماخذ جلممه منه ما يصدنني هييج ماا يصدني..
لزمه عمهم سعدون ابو يوسف// كول يا الله ابني انشالله ما يصير الا كل خير استهدي بالرحمن وامشي ويه ابو فراهد لبيتهم وانشالله ما يصير الا كل خير..

ابو سيف// تسلم خويه ما تقصر بس احنه رادين لتكريت مالها لزوم نضل بعد الصار..
ابو فراهد// والله يبو سيف على راسنه انته وابنك بس بعد انته شفته بعينك اخويه شلون قافل..

جاوبه ابو سيف وهوه يطلع نسوانهم// الله كريم .يلا بويه في امان الله..

طلعوا النسوان وابو هم طلع يسحلون بي وهوه يرجع يفوت للطرمه.. لزم يوسف قبل ما يطلع واخذه على صفحه وكام يحجي ويا.. يحجي ويا و وجهه معصب مكلوب احمر على كد ما صيح.. شكد اعصاب لعد..!

.............................

فتنه للبيت وكل وحده بينه صافنه على الثانيه بصدمه.. لهسه ما متقبلين الصار.. نزلت مرة ابوها ميقات من فوك و وكفت يم لدرج ضرب ايد فوك ايد وهيه تكول // ابوها قافل الباب عليها احجي ويااها ماتقبل تشوف احد تكول..اصعدي عليها انتي ام يوسف بلكي تسمع منج وتبطل هالافلام جاوبتها ام يوسف وهيه تمسح دموعها بفوطتها // الله يهديج ام هبه ماتشوفين الصار وياها يا افلام هاي التحجين عنها.. عوجت حلكها ورجعت صعدت لغرفتها..

....

البيت كله صار متوتر وكلهم اعصاب الا علياء اخذت تيلفونها وراحت تحجي ويه صديقتها هند بالمطبخ ..! هالبنيه معقوله ما تحس ابنت عمها..! .... صاحني اوس بالممر مال الطرمه رحت عليهِ داشوفه شيريد.. جان واكف ويدخن ويهز برجله بسرعه.|
قدر// تفضل ابو رامي صحتني..؟جاوبني بسرعه وهوه يسحبني من ردان العبايه// امشي اصعدي لسهنند هااي ثوله لا تروح تسوي شي بنفسهاا ..وينها علياء اخابر عليها يطلعلي مشغول //مو دتحجي ويه صديقتها.. جاوبني بنرفزه// هسه وكت صديقات مو دتشوف الامه العربيه اشتعلت خررب حضها.. مسح على وجها بعصبيه ورجع حجه ويايه// امشي انتي اصعديلها احجي وياها لاتبقوها وحده خطيه .الى ان نشوف صرفه ويه ابوها..
قدر//انشالله.

............

صعدت عليها اجتي ميقات نطتني المفتاح بتقزز وراحت.. بس لو اعرف هاي شبيها ويايه.. فتحت الباب عليها ..بالكوه فتحته.. خطيه جانت نايمه ورا الباب اول ما دفعته فزت وكعدت مرعوبه.. لزمتني من ايدي وهيه تبجي// هااا بشري ابويه غير رأيه ..بعدهم جوه..؟ باوعت عليها حبست دموعي بالكوه علمود ما ابجي وياها انوب اني جايه داريد اهديها اكوم ابجي وياها..

سديت الباب وكعدت يمها وخرت شعرها من وجهاا ..وجها صاير خارطه الكحله والمكياج رايح لاعب بيها طوبه.. قدر// حبيبيتي كولي يا الله ..انشالله كولشي ينحل بس انطي صبر.. ضربت ايدها على رجلها وهيه تبجي بيأس// يا صبر ولج هذا ابويه متعرفي..متعرفي..هاهيه انتهى كل شي قبل ما يبده اصلاً

حضنتها وهيه كامت تبجي مثل الطفل..وتردد بأسم ازل اريد ازل.. بقت شويه تبجي الى ان حسيتها هدأت..كومتها بالكوه للحمام غسلتلها وجها وهيه ايدها مابيها حيل ترفعها.. طلعتلها ملابس وعفتها بالحمام تغير ملابسها.. كعدت بالغرفه انتظرها.. اتذكرت بيبيتي من تكولي يمضعوفه ديري بالج من العين الحسوده تراها تجسح بني ادم تجسح.. صفنت شويه واتذكرت كلام ععلياء وامها..! معقوله هاي عين حسدتها..!

استغغفرالله قدر مامعقوله بنت عم تحسد بنت عمها .. فززني من صفنتي صوت تيلفون ديدك..! باوعت بأرجاء الغرفه ماكو.. اتبعت الصوت جان جوه الملابس محطوط.. شلت التيلفون واني ماعرف هذا مال منو اصلاً..! جان مكتوب على الرقم ابو الافلام..!

ما لعبت بي بقه هوه يفصل ويرجع يدك اكثر من مرتين.. ابو الافلام منو..؟! شويه وبطل يدك..الحمدالله لا يروح يصعد واحد من الولد ويسمعه انوب تعال اشرحلهم ابو الافلام منو.. وهوه بلا شي اني صار عندي ردة فعل من التيلفونات من ورا جميل..

...........

طلعت سهند من الحمام رأساً راحت نامت.. اني هم بقيت كاعده يمها شويه الى ان ثكلت نومتها ونزلت.. اول ما نزلت تلكتني علياء لابسه عبايتها هيه وخالتي علياء// ها خاتون ماشبعتي سوالف زوجج دينتظرنه برا.. ماجاوبتها نزلت ولبست عبايتي دنروح.. علياء من اخر موقف ويايه كولش متغيره تصرفاتها وكلامها عبالك مو هيه..

اني صح ما كلت لاوس عليها ضربتني بس ما حجيت وياها اي شي يادوب بس السلام لان حرام السلام لالله مو لعباد الله.. طلعوا همه قبلي واني هم لبست عبايتي وطلعت وراهم..جان اوس ديحجي ويه يوسف بالطرمه.. خطيه يوسف الا شويه ويكعد يبجي.. اوس// يمعود دكول يا الله انشالله تنحل عود هاي انته بأعتبار اخوها كوم كوم غسل وجهك واحجيلك وياها كم كلمه جاوبه وهوه يلزم راسه بأيديناتنه ثنينهن // شحجي وياها انته ماشفتها شلون جانت تتوسل بيه علمود اقنع ابوها هسه بلا شحجي وياها..؟
طبطب اوس على جتفه //انشالله تنحل انشالله. اندار عليه وأشرلي اركب بالسياره ..اني هم رحت صعدت بالسياره وهوه شويه واجانه..

.......................

وصلنه للبيت وكل واحد راح لغرفته بس عمتي وعلياء كعدوا بالاستقبال.. عفتهم وصعدت فوك اني من يمي تعبت من ورا الصار الله يعينهم همه.. فتت سبحت وطلعت.. دانشف بشعري واسمع صوت يصيح ..! فتحت باب الغرفه وطلعت راسي داشوف شكو.. اوس// فراااهد تككعد راااحه وعووف العاالم هممه بلا شي البيهم مكفيهمم تنهي عليهااا شنو كل عقلللك انته..؟

فراهد// اي بنت عمي ورايدها ما بيها شي.. اوس// يااابه احجيلك شي لييش ساااكت..؟ ابو فراهد// ابني اذا هوه ابن عمها وماناقصه شي مابيها شي وتعرف الحجي الرااح يطلع ليش فصخوا الخطوبه بيوم الخطوبه ياخذها ويسد حلكهم.. اوس// يااابه البنيه ما ترييده موو وكتهاا هسه موو خطبها ورفضته بعد شكو..؟ فراهد بعصبيه// اوووس ترااا تجاووزت حدودك حيللل اخووك الجبير من تحجي ويايه الززم حدودددك زيين لا قسم بالله تصير الساالفه ويااك مووخووش.. اوس// من تعررف تصررف عود ذااك الوكت احسببك اخووي الجبير..

ابو فرااهد// اوووس لاتشوفني سااكت عنك تكووم تخوط وتخربط بكيفففك انته مالك شغل اطلع منها وهيه تنحل.. جاوبهم اوس بعصبيه// والله لو بس تطلعون انتوا منها هيه تنحل.. طلع وركع الباب ورا..!!

............

ياساتر البييت انكلب بين ليله وضحاها.. الله يهدي سرهم...

بقيت كاعده فوك وصوتهم جوه وفراهد بقه يغلط على اوس ويفشر عليهِ بقيت كاعده وساده الباب عليه.. ماعجبني كلام فراهد وشلون كام يغلط على اوس ..نرفزني كولش... لليل يلا صاحتني عمتي ..لبست حجابي ونزلت.. ام فراهد// تعاي يمه تعاي اشو اليوم مختفيه بس لا مقهوره على المحروسه..؟ قدر// لا خاله بس ماعدنه شي كعدت اقره قرأن شويه.. ام فراهد// اي خوش لعد تعاي سويلنه لكمة عشه.. عمج وفراهد ما ماكلين شي خطيه.. //صار .,.عمه بس اخذ تيلفونج شويه اخابر على اوس اشو تأخر ..

جاوبتني وهيه تطلع من المطبخ// على الميز اخذي ......

اخذته وطلعت رقمه وخابرته.. هوه الصراحه ما متأخر مرات يبقه لنص الليل بس اني ماعرف ليش حبيت اخابره.. او بالاحرى اوكف ويا بهيج ضروف.. اوس// الو هاا يممه شكو خوما صار شي..؟ قدر// لا مصار ..ء اني قدر..
اوس // ها قدوره ..خوما محتاجه شي شعجب مخابره عليه..؟
قدر// لا مامحتاجه بس ضل بالي يمك وطلعت انته معصب ..

اوس// يااايابه جان عصبت من زمان وانهزمت من البيت علمود يبقه بالج يمي..
جاوبه بسرعه واحس حرارة المطبخ ازدادت// لا والله ابو رامي ..بس شنو ..اني شسمه يعني جنت داسوي عشه وكلت خلي اشوفه يجي على العشه.. جاوبني بضحكه خفيفه// هههه هوه ما مدمرني غير الشسمه..لاتسوين عشه باباتي هسه اجيب ويايه من برا..يلا شويه وجاي مع السلامه..
// باي.

ذبيت التيلفون على الميز ..اخذتتني عيوني على المرايه شعندي داضحك..؟ هوه صدوك سوالفه مرات تضحك..حباب اي بس مو مال ابقه زوجته.. لو يصير جان اطلكت منه وبقينه اصدقاء ههههه بس هاي وين تصير بالعراق هههه..!!

.....

فاتت عمتي للمطبخ ولطمت على خدها // ولج قددر وين العشه اشوو ماااكو ..؟
قدر// لا خاله هسه راح يجي اوس كال اني اجيب من برا..
// ها خوش انتي كلتيله يجيب

قدر// لا والله هوه كال.. جاوبتني وهيه تطلع من المطبخ// يلا خوش..

..............

ثاني يوم هم اخذنه اوس اني وامه وعلياء لبيت عمهم.. مبين عليهِ كولش مقهور على سهند يجيب ويوصينه علييها.. سلمنه عليهم وبيبيتهم زعلانه على ابو سهند بس هوه ما مهتم .. الظاهر هذا الموضوع عنده خط احمر..

صعدنه اني وعلياء على سهند وام يوسف تكول حابسه نفسها من البارحه وبالكوه تاكل لكمه وتدفع الاكل عنها.. فتنه عليها بالغرفه ظلمه وساده البردات.. فتحت علياء الاضويه وهيه تحجي بأنزعاج. علياء// هاي شنوو .؟ ولج سهند شمسويه بنفسج ..؟ وخرت الجرجف من راسها وهيه تحجي بأنزعاج // علياء طفي الضوه يمعووده موتشوفيني منطمره..

جرت الجرجف من فوكاها واني رحت فتحت البردات.. علياء// دكومي كومي جايين عليج وانتي نايمه.. رحت كعدتها وسحبناها للحمام بالكوه ..خليناها تغسل وتغير ملابسها .. كعدت تمشط شعرها وصافنه على الفراخ.. اجتي علياء سحبت المشط من ايدها وكامت تمشطلها.. علياء// ادري قابل نمونه تسوين بنفسج هيج يروح سيف يجي عشره ورا شبيج انتي موتي نفسج..

جاوبته هيه وتسحب المشط من علياء بعصبيه// انني ماا اريد العششررره ماا اريدهم..
علياء// ياا ستار صايره متوحشه ولج .ديلا كملي دتنزلين ويانه شويه .. سهند// مابيه حيل..

قدر// سهند اوس من البارحه يسأل عليج انزلي خطيه كولهم بالهم يمج..
هزت براسها وكملت شعرها.. لبست حجابها ونزلت ويانه اباوع عليها بالكوه حابسه دموعها وملامحها تتعارك ويه الهوى .. اول ما نزلت اجه اخوها جاسم باسها من راسها وكعد يتشاقه وياها وعيونه هوه هم مدمعه.. وهيه بس ساكته وتجامله بأبتسامه جذابيه.. نادره(بيبيتهم) // تعالي تعالي مضعوفة البخت تعالي اشوفج..

راحت سهند وكعدت بصفها وحطت راسها بحضن بيبيتها .. نادره// هذا ابوج راسه يابس يا يمه ما يسمع الجلمه..اني زعلانه عليهِ من البارحه على سوايته هايه.. بقت تحجي وياها وسهند نايمه بحضنها... شويه وفات اوس

اوس// حجيه دكعديها شنو جاهل ومنومتها بحضنج..
نادره// انته انجعم لا انعنع العصى على ظهرك.. راح باس راسها وهوه يضحك وياها// حجيه مو مرتي واكفه هسه شتكول عليه.. عوجت حلكها وهيه تدفعه// عاد شلون مره وخر عني وخر..

باوعت علياء عليه وهيه تضحك وتهزني بأيدي// هاي عليج ترا هههههه
باوعت عليها بطرف عيني و وخرت من يمها.. اني ناقصني ..

كامت سهند من حضن بيبيتها وسلمت على اوس ..وهوه ضل يحجي ويااها لو يغلط عليها عود علمود يخليها تتعاك ويا بالشقه.. هذا الرجال لسانه زفر حييل حتى بالشقه الكواويد مايعوفها.. اوس// يلا دكومي كومي شكبرج ونايمه بنص الهول جاموس خوما جاموس.. باوعت هيه عليهِ بطرف عينها وسكتت.. اوس// ولج نذله اشو تباعيلي بطرف عينج..راح اكوم افكسهن الج..

جان كاعد على هوه القنفه واني وعلياء كدامه على القنفه هم هوه من كال هيج نغزتني علياء بأيدي // مثل ما فكستلج عينج قبل فتره ههههه شلون راجدي فر راسج فر..

باوعت عليها بضوجه ..شبيها اليوم مخبله.. عود فرحانه فرت راسي فر..!

رفعت راسي اوس جان يباوعلها بخزره و وجها انكلب احمر.. علياء// يا ستار ..شبيك اوس.؟
هزلها براسه وهوه خازرها وسكت .. بهالاثناء فات ابو سهند.عبد الجبار// السلام عليكم..

الكل// وعليكم السلام..
عبد الجبار .،// كومي سهند اصعدي فوك عندي موضوع وياج..
نادره// شعندك وياها ما تشوفها تعبانه خليها يمي.. عبد الجبار// يمه مابيها شي كلمتين احجي وياها دانفض الموضوع صرنه علج بحلوك العالم..

كامت سهند وصعدت فوك وهوه صعد وراها نادره// هسه كام يهمه كلام العالم مافكرت بسمعتها من طردت العالم ولا يتوب هذا الولد..ولايتوب.. فات فراهد و فات ورا يوسف.. فراهد بضحكه// هههه يلا هسه انفصخت خطوبه انشالله تقام خطوبتي.. نادره// انته يمهتلف ابقه اتزوج ابنات العالم وموتهن لو طلك بيهن خفت لهالوجه..

بقت الحجيه ياهو التشوفه كدامها تحجي عليهِ تلزمه اكس مربع.. واكيد اني اخذت نصيبي منا هم ههه...

ــــــــــــــــــــــــــــــ

سهند...

من يوم الخطوبه اصلاً لازم ما تسمه خطوبه..من يوم الملحمه..

واني بغرفتي ..كولش مقهوره على نفسي وعلى حظي وعلى امي ابويه سيف..! الحل الوحيد جان كدامي هوه النوم علمود انسى بي كل الصار.. صعدت ويه ابويه واني ساكته ماحجيت شي.. فتت لغرفته وميقات جانت موجوده سد الباب وكعد على الجربايه وصاحني يمه.. عبد الجبار// بنتي هوه كلشي قسمه ونصيب..وهذا الرجال ماناقصه ولاعايبه شي بس عيبه امج خالته..اني من طلكتها صح ماجنت اريد اطلكها بس جدج الي هوه ابوها عزم الطلاك ماطولت يمي سنتين اخذتها اهلها رافضين واهلي هم رافضيين لان طوائف مختلفه اخذتها لا عرس ولا طربكه وهيه قبلت ..بس هايه العائله الطلاك يمشي بدمها ابوها ظل ورانه ورانه الى ان طلكها مني ..وعقوبتها جانت بيكم..

باوعتله بهدوء وهوه يحجي ومبين عليهِ مقهور بس شيفيد .. اردف وهوه يمسح وجها // اخذتكم من عدها وهيه اخذها ابوها .. صح حاولت تجي تشوفكم بس اني رفضت ..جنت اعاقبها بيكم علمود ترجعلي بس مافاد بشي بس زاد كرها الي..هذا الرجال ابن اختها بنتي اليوم ياخذج باجر يرجعج مطلكه الي ..

سكتت ما جاوبته ..باوع عليه بضوجه وسألني // اشو ساكته متجاوبيني..
سهند// شجاوب يعني..؟ عبد الجبار// شوفي سهند سالفتج صارت علج بحلوك المنطقه ..وفراهد جزا الله خير خوش رجال ابن عمج بعد طلبج مني مرة الثانيه واني من يمي موافق عليهِ انتي شتكولين..

انتفضت من يمه بعصبيه // بابااا اني مااريد فرااهد ..فررراهد زووج اززل شلوون اتززوجه..
جاوبني ببرود // مابيها شي ابن عمج مو حرام..

سهند // ماا ما اريده..
وكف على حيله واتقدم عليه وهوه حابس غضبه,,. ذب كلامه بتهديد بوجهي وهوه رافع اصبعه السبابه // اذااا ما تزووجين فرااهد هذاا الاسمه سيف تشيلللي من بااالج ماا اريد اسممع اسممه على لساانج لو اسمم خااالته زيين ولا قسمً بالله اذااا بقيتي على حااالتج هاي والافلام التسويها حتى الكليه احرمج منها فااهمه..

باوعت عليهَِ ودموعي حجبت الرؤيه عني.. صاح بيه بصوت عاالي /// مفهوووم..
سهند// مفهوم

ـــــــــــــــــــــــــــــــــــــــــــــــــــــــ

شلون صدمه هذا البارت احجولي عن شعوركم

تمامم البارتات الورا صدمه اكثر هههه..
رأيكم الحلو احبنكم جثير الجثير يدادا..

الحلو اني من بغداد بس ليش احجي هيج ماعرف. هههههههه

دمتم سالمين وغانمين احبتي حفصه الهاشم..