زمهرير الاوجاع الفصل السادس وثلاثون 36 - بقلم قدر ال هاشم

زمهرير الاوجاع

حفصه الهاشم

تفضلوا اكعدوا لاتبقون واكفين ودوسوا النجمه بدربكم ههههه

ــــــــــــــــــــ

...بدايه بائسه ونهايه مفتوحه

ما كنتُ أحسِبُ أنّ مَن أحببتُهم يوماً
سينسَونَ الوِدادَ ونفترقْ
كُلُّ الذين عرفتُهم ما بين أضلُعِهم
قلوبٌ لا تحِنُّ ولا ترِق
لم يَبقَ فيهم مَن يُطيّبُ خاطري
ما عُدتُ أعرِفُ في الحياةِ بِمَن أثِقْ

كم فاضَ قلبي طيبةً ومحبّةً
لكنّني لم أُعطِها مَن يَستحِقْ

ـــــــــــــــــــ

قدر

باوعت عليها بتفحص اخاف دتجذب علمود سهند تعوفه

عافتني ورجعت للغرفه حايره تفتر منا ومنا و وجهه معصب
فتت وراها للغرفه

علياء صدك تحجين تزوج من صدوك لو دتشاقين

باوعتلي بعصبيه وجاوبتني
دتشوفيني دا اتشاقه اكوولج تززوج تززوج بنت عمه صارله اسبوع حقيرره حقيرره

كامت تفتر بالغرفه وتغلط على هند
حقيرره هيه وعدتني تخلي يجي يخطبنني هيه كاالت احجي ويا يجي يخطبج شككد حقيره تاليها زوجته بنت عمهاا

كعدتها على الجربايه وجبتلها كلينكس تمسح صخام وجها
امسحي امسحي دموعج اليوم عقدج وكاده تبجين على رجال متزوج

اخذت الكلينس من ايدي هيه وتبجي
اي احبه احبه شلوون يعني هيه وعدتني تخلي يتزوجني

لاحول ولا قوة الا بالله علياء ليش هوه ابنها علمود تزوجه بكيفه
بعدين هوه مو يريدد سهند شلون تزوج بنت عمه

مسحت دموعها و وكفت ولاعبالك صار شي
اي ابو كاله بنت عمك وانسه الماضي وزوجها وهيه هم يتيمه تزوجها وفض السالفه

باوعتلي بتحدي ورفعت خشمها
واصلا اني ما هامني سيف هاي شوفيني راح تزوج الي يحبني ويصوني خلي يولي

خزرتها بحده وجاوبتها
لعد ليش دمرتي حياة سهند اذا ما هاامج شنو هاي الانانيه.؟

دفعتني من ظهري وهيه طلعني برا الغرفه
يووو بلا لغوه زايده ولي من وجهي هسه

رجعت فاتت للغرفه وسدت الباب
شنو هالحقاره هاي

بعد كل الي سوته تكول ميهمني .!؟

وسيف هذا شلون يتزوج هيج بهالسرعه
غير لو تسمع سهند خطيه تدمر وهيه لهسه تكول يجوز يرجع ويجوز يجي يفهم السالفه مني.

الله يعينها.

................

مرت على خطوبة علياء اسبوع

كل مانروح لبيت يوسف وهبه تجي سهند هم بالليل ونتعلل سوه

خطيه وتبقى تحجيلنه عن سيف وبطولاته وياها
وشلون جان يلحكها ويمشي وراها

مرات اصفن هيه ودتحجي واكول معقوله يعني هذا الحب كله يختفي من موقف واحد بس
لو يجوز هي ما اختارت الي يحبها صح,.؟

ومن يجي اوس يكعد ماتحجي عنه
لان اوس يكرهه ويظل يرزل بيها من تجيب طاري

.............

كالعاده خابر يوسف على اوس
ويريد نروحلهم بالليل لو يسولفون عن سياسه لو يصيح الولد ويبقون يلعبون دومنه وهاي السوالف ببيت يوسف

رحنه بالليل سهند مجانت موجوده
والولد بعدهم هم مجايين

بعد السلام والكلام كعدنه بهدوء
فجأةً اوس سأل يوسف عن سيف

// اكولك سربوت هذا الكواد ما منه ذكر.؟

باوعله بأستغراب
ياكواد كواويدك انته هوايه ,.؟

اوس// هههه ولك نذل اقصد على النذل سيف ماتعرف اخباره.؟

يوسف// لا والله كطع فرد مره واني هم كطعت ويا بعد السوا ويه سهند خيولي

اوس// هممم

جاوبتهم واني اصبلهم الجاي
يكولون تزوج بنت عمه.

برفعوا راسهم ثنينهم بصدمه
ياا تزوج ولج انتي شمعرفج.؟

والله ما اعرف بس علياء تحجي ويه اخته وكالتلها متزوج بنت عمه صارله تقريبا شهر

صاحت من ورانه بفزع
سهند// منوو تززوج.؟

التفتنه عليها بـأستغراب شجابها هسه.؟

كاملها يوسف وهوه يبتسم
يمعوده صديقي صدي..

دفعته بغضب وابتعدت عنه
لااتجذب لا تجذب عللييه

باوعتله وعيونها مدمعه
ضربت رجلها على الارض بعصبيه وصاحت عليه
لاتجذذب علييه يووسف ...تزووج .؟ متجاووب تزووج يعنني

كعدت باكاع وكامت تضرب على رجلها بعصبيه وتبجي
وانني الثووله الانتظرره انني الغببيه غببيه غبيه

حطت راسها بين رجلها وكامت تبجي
وصوت بجيها عم البيت كله

لزمها يوسف وحظنها
ولج سهند ابويه انتي لاتسوين هيج بنفسج

باوعتله بعصبيه وضربته قوي على ايده
لاتكوول ابوويه لاتكوول هااي الكللمه اكرهااا اكررهاا

رجعت حضنته وتبجي
الله ياخذك سييف شسوويت بييه شسوويت

كام عليها اوس وسحبها من ايدها بعصبيه ويهز بيها
ثووله سهنند خلي يوولي انتتي تبجين عليه هناا وهوه كاضيهاا زواجاات كاافي بجيي عااد

دفعت ايده وجاوبته وهيه تطلع جتفها

اووس هااي الندبه ماال شنوو اووس مال ضرربته ماال ضرربته

ضربت على جتفها بعصبيه
من ورااا طلقته تالي ماتالي يروح يتزووج

رجعت حضنته وتبجي

هوه هم ما حجه وياها شي
ظل حاضنها الى ان هدئت

اخذناها اني وهبه للغرفه مو مال تروح لبيتهم يوسف عود يخابر ابوها يكوله تبات هنانه

نامت بحضن هبه عبالك طفل صغير
بقت تبجي الى ان داخت من وجع راسها ونامت

طفينه عليها الضوه وطلعنه
اوس واكف ويتهدد بسيف

هوه بعد تزوج يتهدد بي على شنو
الله يكتبلها الاحسن منه والي يسعدها من صدوك ما تستاهل

................

سهند..

كل يوم جنت اكول هسه الشوك يجيبه ويرجعه ليمي

واكيد راح يرجع علمود يفهم السالفه مني..
هواي تخيلات رسمتها ابالي من يجي شراح اكوله

وشلون اتصرف اسامحه لو التزم بكرامتي

مرات جنت اضعف كدام كلبي واكول لا عادي اسامحه
الي يحب يسامح اسامحه واكمل ويا بس خلي يجي

جنت مستعده انسه كل شي الصارلي بسببه
من زعل ابويه وغضبه عليه الى كلام العالم واقاربي الي اكل وجهي اكل

هواي امور ما حبيت ارجع اذكرها
واهمها الكلام الي جان مثل البسامير تجيني

العالم ما ترحم ما تصدك يلكون شغله علمود يحجون عليها

من عرفت تزوج من صدوك كرهته
حقدت عليهِ حيل

الحب والحركات الغراميه كولها وين راحت لعد

سنين وهوه يمشي ورايه وحفظ حفظ على اساس
لعد وين راحن هذني كولهن

تمنيت اشوفه واضربه اضربه الى ان اطلع حركة كلبي كلها بي

مرت اياام
اياام واني ليلي كله اكضي بالبجي

احبه احبه الحقير
ابجي عليهِ ابجي على كلبي على حياتي الدمرت من ورا

لا دراسه كملت ولا اهل راضيين عني
حياتي ادمرت من دخلها

ما الوم ابويه من رفضه
صدوك هذوله العائله الطلاق يسري بدمهم

ابويه يكول خلعتج منه
ومن هوه حاجي ويه سيف كايله لا اني ما اقتنع بالخلع وهيه بعدها على ذمتي ما مطلكه

اني بالحالتين طلاكي منه مؤكد سواء ابويه خلعني منه او لا

ــــــــــ

بعد كم شهر قدوره جابت بنوته تخبل
ناعمه حيل وبيضه على حمره

اوس متخبل عليها كلب المستفى بصوت ضحكته

بقت البنيه اسبوع بلا اسم
اوس يريد يسميها نور على اسم بيبيته ام امه وقدر قافله على نور حبيبته القديمه

وفوكاها تكولي نور لهسه ادزله صورها شلح بلح
ودائما تراسله وادزله رسائل وهوه يحضر بيها ويرجع ليورا

فصايره لخه بينها وبين اوس علمود الاسم

وعاد اوس من يقفل على شغله الا يسويها يلا يرتاح
بس هم ميكدر على زعل قدوره سموها قمر وتوكلوا على الله

علياء تزوجت وراحت لكركوك ويه زوجها آزاد
وهيه اصلاً ورا السالفه الصارتلي قطعت تواصلها ويايه

ولاعبالك جنت بنت عمها وكل يوم تخابر وتسأل
صارت نادراً ما تخابرني.

يوسف فدوه لطوله
قنع ابويه ارجع اداوم بس مو طب

لا فتت معهد تمريض اربع سنوات واتخرج
هم الحمدلله احسن من الكعده

بديت اداوم ابغداد
صحيح رجعت لحياتي الطبيعيه بس مو نفسها سهند القديمه

لا شي بداخلي انكسر
شكد ماجنت قبل اجتماعيه هسه اختلفت حيل
يادوب الي يسلم عليه اجاوبه

ابويه طول هالفتره ميحجي ويايه نهائياً
يادوب السلام عليكم وعليكم السلام

حتى ميباوع بوجهي
كولش انقهر على نفسي وعلى وضعيتي

وهوه هسه اكيد عايش حياته وما مهتم
اجذب على نفسي اذا اكول نسيته

اني مو مثله جليدة المشاعر
اني حبيته بقلب بريء مايعرف شنو الخيانه لوو الشك

ما اكدر انسا بلحظات لو بأيام مثل ما سوه هوه بيه

تمر عليه ايام انهار بيها من الشوك
تفضحني عيوني كدام اقاربي

عمتي جليله هاي الفتره يمنه من تباوع عليه
رأساً تكولي امشي صعدي فوك راح تفضحينه يمصكوعه

واني اسمع كلامها وابجي بالزايد
كلامها يتشابه ويه كلامه

كل شي اشوفه يرجعني لزاويه من ذكرياتي ويا
شنو الطريقه للنسيان ما اعرف

.........

اجتي علياء علينه زياره زوجها ذبها وراح تكول عنده شغل

من عيونها امبينه عاجبها آزاد ومتعلقه بي
اباوع عليهِ شلون يعاملها بحنيه وحب وهيه تتنعوص عليهِ

رأساً اتذكر سيف
مو حسد لا والله علياء ما احسدها بس انقهر على سيف شلون سوه هيج بينه

الحمدلله على كل حال

علياء ما تتواجد ويايه بنفس المكان ما اعرف ليش
حتى تتحاشى تباوع بعيوني

اني هم عفتها على راحتها
مابيه حيل اكعد اراضي بالعالم واني محد يراضيني

الكل موجود ببيتنه بس ابويه طالع
ماكلتلكم ميقات هم جابت بنيه

خطيه وكضتها بجي تريد ولد هههه

اليوم اهلها عازمين ابويه وعازميها وطالعين هيه ويا

اباوع على علياء كاعده كدامي
اجاها اتصال رأساً باوعت عليه وكامت من الاستقبال

عفتها على راحته ما اهتميت الها
بس دائما اريد اسألها على تواصلها ويه هند

بعدها تحجي وياها لو لا

............

قدر..

حياتي الحمدلله مستقره ويه اوس

بس الحقيره نور لو بس اشوفها الا انتفها بسنوني
شلون غيره عدها

رجال متزوج وصار عنده بنيه ولهسه ادزله صورها وتحجي ويا
بس هوه دائما ينطيها بلوكات لو يتجاهلها

هسه هيه صارت جبيره يعني عقلها جبير وفاهمه
شلون تسمح لنفسها تحجي ويه واحد متزوج

ومن راد يسميها نور تخبلت عليهِ
طلعت عبسي الجوايه عليهِ

ودكيت رجل الا يغير الاسم
عاد سماها قمر

وهيه بعد روحي صدوك اسم على مسمى
قمر بحد ذاته

عاد عمه جليله خابصتنه هسه من تكبر تصير خزيه
يابه ليش لان اجتي حلوه من تكبر تخرب ههه

...........

اليوم علياء راجعه زياره وبيت عمهم سعدون عازمهم

كاعدين كلنه وعلياء بالغرفه مال ام يوسف
تحجي اتصال يجوز ويه زوجها

خاصة هيه هالفتره حيل متعلقه بزوجها
الله يهديها.

شويه وصبينه غده
كمت داروح اصيحها على الغده تأخرت حيل

علياء// هند يمعوده لاتذكريني هههه سرمد ما اعرفه اني

جذبني موضوعها
وخاصة اني جنت شاكه بيها على موضوع سهند

سويتها وحده بوحده
مثل ماهيه سجلت الي صوت اني هم طلعت تيلفوني وفتحت التسجيل

بهالاثناء اجه يوسف وكف يم الدرج قريب من يمي
وباوعلي بأستغراب عاد اني ضميت تيلفوني بس بعده السجيل مفتوح

وعلياء تسولف

// ولج والله ما اعرفه سرمد اني جنت داخله كروب على الفيس وهوه بي ..عاد بعدين هوه فاتلي خاص وكام يحجي ويايه
اني اصلا هذا الحساب من زمان مسويته بأسم سهند علمود اخاف يطلع لاقاربنه ميعرفوني

سكتت شويه ورجعت تضحك
هههه لا هيه صارت صدفه هوه اخوج حامي اول ما دخلي خاص احبج وما احبج وراد صور دزيتله صور سهند على اساس اني بس والله مجنت اعرف هذا اخو سيف هههههه شلون صدفه.!؟

اباوع على يوسف انكلب وجهه احمر
ما انتظرها تكمل دفر الباب عليها وفات

علياااء

اول ما شافته شمرت التيلفون بسرعه علمود ينكسر
اتقدم عليها وضربها راشدي والراشدي يسحب راشدي ورا

خشمها كام ينزف وشفتها انشكت بس عرمه

هوه محترك كلبه وهيه تردله الضربه بضربتين ولسانها زفر

فات عمو سعدون واوس سحبوها من جوه ايده لان هيه متكومه بالكاع وهوه داك بيها ضرب
من حركة كلبه

اوس// كوواد شدتسووي انعلل شيببك..؟

ابو فراهد // يوووسف ترااك حييل زودتهااا شبييك لاززمها وداك بيها كتتل ما تستتحي اشو ما خليتلنه حررمه كوواد.

وجها احمر ويتنفس بصوت عالي عبالك تنين
ما جاوبهم سحب ايدي بسرعه وجر التيلفون

// افتحيي الخرراا

فتحتله التيلفون وايدي ترجف من الخوف

شويه وطلعلهم التسجيل وشغله

من الصدمه ابوها اتخربط واحتارينه بي
وهيه لابده بحضن امها وتبجي وتصيح جذاب جذاب

فراهد وسعدون ويوسف شالوا ابوها و ودوا للمستشفى
بس لا ينجلط الرجال من سوالف بنته

اوس ما اهتم لابو اول ماسمع التسجيل سحبها من حضن امه
وسحلها سحل للسياره

مو مبالغه ابد
هيه كاعده بالكاع وهوه لازمها من ايدها ويسحل بيها الى ان وصلها للسياره
وهيه لازمه رجله وتتوسل بي

صعدها بالسياره وامه وعماته يحجن ويا
ولك يمه اهدئ خلي نفهم السالفه

وعمتي تلطم راح يذبحها وراح تروح بنتي

وهوه سكوت شغل السياره وراح
وين مانعرف

بقت عمتي ادك وتلطم وعماتي يهدن بيها

بس جليله مابقت سب ماسبته عليها وعلى امها
عاد جليله معروفه عرمه لسانها طويل

تشمر الكلام وما تخاف من احد

سهند المسكينه سامعتهم وداكتها بجي بالغرفه

صعدت عليها
بس تبجي وتغلط على علياء

هيه بلا شي تريدلها حجه علمود اطلع البجي من عينها انوب تعرف علياء الحقيره شمسويه
انهارت فرد مره

مرت يومين اوس ماخذ علياء وماندري وينها
ابوهم خطيه صابته جلطه ولسانه ثكيل

يتأتأ بالكلام

عمهم عبد الجبار لهسه ما كالوله على السالفه
ما اعرف ليش..

يجوز ينتظرون ابو فراهد تتحسن حالته فرد مره صار

آزاد يجي ويروح يريد علياء
بس همه كتموا على السالفه وكالوله محتاجيها هالفتره هاي يمنه

لان فضيحه اذا عرفوا اهل زوجها يطلكها

ولو هيه تستاهل الطلاك على هالفعله هاي..

...............

سهند

بحياتي كلها ماجنت متوقعه علياء يطلع منها هيج شي

دائما جنت اشوفها اخت بالنسبه الي

الكلام والصدمه المريت بيها ما خلتني احجي اي شي
حتى البجي بعد مايفيد ويايه

اريد الزمها واطلع نار ككلبي بيها الحقيره
شكد جنت اخابرها واشتكي الم شوكي اله

وهيه النذله تستغفلني من ورا ظهري

بحياتي كلها ماحقدت على شخص ابد
بس علياء الى الان من يسألوني هم حاقده على شخص

اكوللهم اي بنت عمي حاقده عليها حد الموت

عمي انجلط وكعد بالبيت لسانه ثكيل
ويادوب يحجي حلكه انعوج فرد مره

من ورا النذله بنته

قويت نفسي اريد الزمها واطلع نار كلبي بيها
بس اوس ماخذها وحتى عمامي محد حجه ويا

لان التهوا بعمو ابو فراهد

وره يومين عمو سعدون طلب من اوس يجيبها لعلياء
واوس قافل اني اعيد تربيتها من جده وجديد

بالكوه يللا اقتنع يجيبها

ماجابوها لبيتنه ودوها لبيت يوسف

من سمعت بيها بالبيت
نزت ركض عليها

المشتمل مال يوسف بي افتح باب الحديقه اصير بطرمتهم

فتت للأستقبال وهيه كاعده بالنص تبجي بصمت

اوس لاعب بيها طوبه من الكتل
وجها معالمه ضاعت أثار حزام على ايدها ورجلها

وكل هذا بس ميشفي غليلي

اول ما شافتني نزلت راسها وكامت تبجي بصمت

عمو سعدون واكف يرزل بيها
اضلمت الدنيه بعيني من حقدي الها

هجمت عليها بالضرب
احتاريت وين اضربها بس المهم ابرد كلبي بيها

ما اعرف منين اجتني القوه
يجوز من حقدي عليها لو من صدمتي

شالني اوس عنها وهيه على نفس كعدتها ما تحركت او دافعت عن نفسها

سهند
ولج حقييره علياااء العتااب ويااج ميفييد ميفييد لانج شيطاان الله ينتقم مننج الله ينتقم مننج
ولج نذلله اخاابرج اشتكي وابجي يممج واننتي تلعبين من وراايه شييطااانه

انهاريت حيل
كل ما اتذكر شلون جنت اوثق بيها انهار واكره نفسي حييل

.........

علياء حطيت عليها اكس
نهائيا ما اجيب طاريها على لساني

ابويه الى الان مايعرف

صاحني عمو سعدون وكام يطيب خاطري بكلماته الحنونه
طلب مني اروح اكعد ابويه واستسمح منه علمود عمو يكوله على سوالف علياء

مسحت دموعي وصعدت عليهِ

دكيت الباب فتحتلي ميقات
هاا شعجب اشو يمنه

//داحجي ويه ابويه

وخرت على صفحه سوتلي مجال افوت وطلعت هيه
اي كعدي واحجي ويا الرجال الهم اكل كلبه يريد يعرف الصور منين طلعت ليل نهار يتكرضم

سدت الباب وطلعت

رحت كعدت على صفحة الجربايه وصفنت عليهِ
حبيبي ابويه.

مديت ايدي على شعره الخفيف الي نصهن الشيب غازيهن
ابتسمت بحب ودموعي على عيوني

اقتربت بسته على كصته وخده
صارلي شكد ما مقتربه من ابويه لهاي الدرجه

نسيت كلمة باب شلون يكولوها
الله لاينيطيج يا علياء

مسحت دموعي وهزيته خفيف علمود لايجفل
ياابه...

يابه اكعد راح يأذن المغرب مو زين تنام وعمو يريدك بموضوع...

ابتسمت بخفه عليهِ نومه صاير ثكيل حيل حبيبي اكيد من الشغل

رجعت هزيته شويه قوي
باباا يلا اكعد ديصيحوك جوه

باوعت عليهِ ثواني وايدي ترجف
لزمت ايده بارررده...!؟

ياابه اكعد مو ديصيحووك عمو سعدوون يزعل عليك ترا

اتقربت عليهِ حطيت اذني يم خشمه
ماكو صوت تنفس..!؟

بااباااا ياابه دككعد كاافي نووم

هزيته قوي ماكو مديكعد

طلعت من الغرفه ركض وكفت على على الدرج وصحت على عمو
عموو سعدوون يووسف عفييه عموو ابوويه مديكععد

رجعت للغرفه ركض احتاريت شسوي
رجعت كعدت يمه

باابا ديللا اكعد حبااب باباا الله علييك اككعد

صعد عمو سعدون حيله مهدود من الهبطه لزم الحايط وصافن على اخو

ويوسف اجه شاله واني وساهر ويا يادوب ..وابويه ماكو ولا حرركه

شالوا للمستشفى ماطولو خمس دقايق وطلع الدكتور علينه
متوفي بسكته قلبيه موتة الله

ماتحملت الخبر ابويه يموت ومو راضيه عليه ولايحجي ويايه

صدمه بحياتي
انهارت قوايه وعيوني انطفت

يومين كعدتهم بالمستفى انام وارجع اكعد ويرجعون يضربوني بهالمهدئات
بين ايديه بين ايديه ومات ابويه شلون ماحسينه عليهِ ليش خلينا يناام...

.............

ورا يومين طلعنه من المستفى ونصبنه الفاتحه مال ابويه الله يرحمه

اول يوم الفاتحه لهسه اتذكره

العالم والنسوان والزلم كلهم يبجون العالم اجتنه من كل حدب وصوب

ميقات منهاره فرد مره تحتار المن تلزم ساعه تحضن هبه وتكعد تبجي
ساعه تحضني وترجع تبجي

شالوا التابوت يم الزلم واني ما مودعته
طلعت ركض على الشارع قبل ميحطو بالسياره

اريد اشووفه ولو اخر مرره اريد ابوسه
ماشبعت منه كضيناها سنين بالزعل وهسه عافني

نزلوا التابوت وفتحوليا..
يحبيبيي يا ابوييه هييج بسررعه ترووح منو يبقى فوك رااسنه بعد

نمت على التابوت بالكوه يلا وخروني منه

حطوا التابوت بالسياره وراحوا ديدفنوا..

مافتت يم النسوان هوستهن وصياحهن يأذيني

كعدت بالخيمه مال الزلم فارغه
بجيت والبجي ميفيد ولايرجع الراح

شويه ورجعوا الزلم فات عمو سعدون مبين على وجهه التعب
ظهره منحني من الحزن

فاتوا ويا الولد يوسف واوس و ولدنه كولهم

رحت بحضن عمو وكعدت ابجي..
وهوه يبجي بصمت ويايه

من بين كل هاالهوسه اجاني صوته
مثل الحلم..

///البقاء لله

كمت من حضن عمو وانداريت عليهِ بسرعه..
مسحت دموعي وباوعتله بأستغراب..

سيف..!؟

يباوعلي بشماته..
اي اي هاي نظرات تشمت..ديتشمت بحزني.؟

ضحك بأستهزاء وهوه يباوعلي من فوك ليجوه
// ههه سمعت عمي مات اجيت تأدي الواجب

ــــــــــــــــــــــ

اقتربنا للنهايه
هواي حزن اختصرته وماكتبته احتراماً لمشاعركم

احبكم جثيير عسلايات

دمتم سالمين
🖤🖤حفصه الهاشم