زمهرير الاوجاع
حفصه الهاشم
ـــــــــــــ
كانت فوضى عارمه... لم نستطيع كبحها.
سهند
واكف اليشوفه يكول بركان على اي لحظه ينفجر
رجعت ليورا واني خايفه منه ومصدومه بنفس الوقت
شبي شصار ويا وليش ديحجي هيج.!؟
هذ كل الديدور ابالي
جاوبه اوس وهوه يصيح عليهِ
/// شبييك ووولك كواوويد شنوو اشو ما تحترم اننته.؟
اتجاهل كلام اوس وحجه ويه ابويه وهوه مركز نظراته عليه
// عمي امشي احجي ويااك بموضووع وحدنه
راح هوه وابويه واوس وعمو سعدون للأستقبال الخاجري المضيف
التفتت على عمتي جليله الترزل بيه
// يولي يفاينه شمسويه وجايه الرجال هينه يزكح بينه بس لا يضيع من ايدج
جاوبتها بخوف وجسمي احسه برد من الخوف والقلق
// لاعممه فدوه لاتحجين هيج
رجعت تكرز حب وتشرب جاي
عما العماج ضيعتي الرجال من ايدج
بقيت كاعده يم قدر وهذوله خبصني شمسويه وشمسويه
وقدر تهدأ بيه ان شاء ماكو شي وماعرف شنو
شويه وصاحني ابويه للمضيف
حسيته طلبني للأعدام
اني ما مسويه شي بس من الحبطه حيلي باد
فتت للمضيف وعيون الكل عليه
عيونهم تباوعلي عبالك ديباوعون لواحد مجرم
عبد الجبار// تعاي هناا
أشرلي على مكان بصفه وهمه كلهم جانوا واكفين
وكفت بصفه واني ضامه ايدي بخوف
جاوبته بصوت يرجف
ياب..يابه شصاير.!؟
اخذ التيلفون من سيف وحطه كدام وجهي بدون مايحجي
باوعت على التيلفون بلا انتباه ورجعت باوعت على ابويه
//شكو ما فهمت شكو.؟
جاوبني بحده وهوه حازرني
عبد الجبار// اقري المكتووب
اخذت التيلفون من ايده وباوعت عليهِ
فتحت عيوني بصدمه
حسيت عيوني غوشن هم
صعدت المحادثه اقرا بيها واني ما مفتهمه شنو السالفه
كلام بالمحادثه على الفيس
وكلام ما ينلبس عليهِ عكال..
ماعدا صوري الموجوده بالمحادثه
شمرت التيلفون على الطبله واني ارجف
عززا بابا شنو هااي والله مو اني هااي
باوعت على ابويه صافن عليه وعيونه مقلصهن
مثل الي ديقرا افكاري
جاوبني سيف بحده
يووولي سهنند لاا تجذبيين انتي تعررفين الولد هذا منهووو تعرفي..؟
هزيت راسي بقوه وجاوبته
لا لااا والله سيف ما اعررفه هذاا والله
عاط بيه وهوه يدفعني من جتفي
هذااا سررمد سررممد اخوووي يمثبووره
حطيت ايدي على حلكي ورجعت ليورا
عززا وشجاب صوري يممه سييف والله هذا مو حسابي اسألوا يوسف هوه رمز حسابي يم يوسف والله
عمو سعدون// ياابه سهند تربايتنه ماتطلع منها العيبه لا وتحجي ويه اخو زووجهها ماتسويها بنتي واعرفها
عمي يحجي واني اهز راسي بقوه وأأيد كلامه
اي اي والله
مسح على لحيته بعصبيه وجاوب عمو
ابوو يووسف عجل هذني شنني اخوي حجاالي سوالف عنها انه ماا اعرفها من مواليدها لجسم..اتسغفر الله
حطيت ايدي على حلكي وكمت ابجي
وصوتي ما كمت اسيطر عليهِ من الخوف
شجاب صوري يم سرمد ..!؟
وهذا الحساب اصلاً مو مالتي بس المصيبه مسجل بأسمي
اوس// وانته يعني مصدك سهنند تسوي هييج اختي واعرفها مايطلع منهاا هييج هيه كتلت نفسها علمودك هاي وين لاكيها انووب.؟
سيف// عججل هذااا شنووو يول لا تخبلني هذا شني بوويه شني
جاوبته واني ابجي// سيف والله جذب هاي مو
قاطعني ابويه وهوه يشمر التيلفون على سيف
انني بنتي وحافظها حفظ ما تطلع منها العيبه ولا تعرف سوالف الفيس والحجي بالمخاتل
احنه ناس كواويد طلعنه طلك وروح بحال سبيلك واني اعرف شلون احل هذا الموضووع
خزر ابويه وجاوبه
اننته مااتعرف غير طلك وطلك شني هيه واطلكها والناس تااكل وجهنه
عبد الجبار// هذا شي ما يخصك
باوعلي بتحدي واني اقابله بنظرات ترجي
سيف والله مو
سيف// طاالك ..انتي طالك
طنين بأذني عيوني غوشن من الدمع
فتحت حلكي مصدومه منه وماداشوف شي من ورا الدموع
نزع الحلقه وشمرها على الميز وطلع من الباب
باوعت على ابويه واني بعدني فاتحه حلكي بصدمه
رجعت نظراتي على اوس وعمي
مستحيل..
طلكني ..؟
مسحت دموعي وطلعت ورا
سييف سييف اووكف سيف لاتسوي هيج خللي نتفااهم سيف الله عليك
هوه يمشي ولا يباوع عليه
عبالك ماكو احد ديصيحه ويتوسل بي
صيحت عليهِ واني ابجي بحركه واحاول الزمه
بس ماكو صعد سيارته وحتى ما باوع عليه نظره وحده
//سييف لااا لاا حبااب سيف والله موو اني موو اني
ضربت رجلي الحافيه على الشارع واني اصيح عليهِ
ببكاء ممزوج بعصبيه
سييف تعااال مااترووح الا تفهمم الساالفه سييف الله علليك
تحركت السياره وراح...
راح وحتى ما باوع عليه نظره وحده
كعدت على الرصيف بتعب واني ابجي بصوت عالي
طلع اوس وعمو عليه وفوتني جوه
وهذا اوس يسب ويغلط عليهِ من حركة كلبه
لزمت عمو واني ابجي بصوت عالي
عموو عمو طلكنني طلكنني..
اوس// وانتي شببيج تبجيين اننعل ابو الجابه علينه
خيولي بنتي هذا حتى شلون تثقين بي وهوه من هسه ذرة ثقه ماعنده بيج
سعدون// اوس مو وكت هالكلام خلي نشوف صرفه هسه للصار
العالم شراح تكول من تطلع السالفه والصور منوين جابهن اخو
رفعت راسي من حضنه
عمو والله ما اعرف اني اصلاً اكره اخو والله
ظل عمو يهدأ بيه بس وجهه متهجم
واحمر من العصبيه
ما يلام هاي فضيحه بحقنه
كل الصار وشلون صار ماعرف
.....................
يوسف..
تزوجت هبه وعرسنه على عناد ميقات
هبه هاددئه حيل حتى بيوم عرسنه
اكوللها روحي هناك تروح سوي هيج تسوي
ابد ما تعبتني ولا اني لحيت عليها
ما اعرف ليش اخاف عليها حتى من نفسي
اباوع عليها هيه ونايمه بحضني وحلكها نصه مفتوح
هاي شلون صبرت عليها كل هالسنين ما ادري
كعدنه الصبح
اني كاعد على القنفه وهيه تفتر كدامي منا ومنا تلملم بالغراض
عبالك فراشه وطايره
............
رجعنه للبيت وهيه لهسه مستحيه مني
شكد حاولت اشاقه وياها بس عبس خجوله حيل موتتني
وصلنه للبيت وهوسة البيت
اكو مشتمل بصف بيتنه الجنه كاعدين بي
اخذته الي والها مع العلم عمي وامها عارضوا بس اني هم عندت وياهم
استقبلونه بالهلاهل والصلوات
اباوع بوجوهم ادور سهند الحقيره ما اجتي باركتلنه..!؟
........................
قدر
شكد جنت اكول علياء حقيره
بس ابد متوقعتها هيج
اني ما عندي شي يثبت هيه دازه الصور لاخو سيف
وما اكدر اتهمها هيج فقط بسبب الشك
لان هاي مكاره تطلع منها مثل الشعره من العجين
ورا ايام انتشر خبر الفضيحه
سهند متحارشه بأخو خطيبها والعالم خطيه اكلت وجها
اوس كل يوم يودينه يمها ويوصينه عليها
جنت منتزره ردة فعل علياء علمود أأكد شكوكي
وصدوك بقيت اراقبها من سمعت بالخبر شلون وجها انكلب اصفر
وكامت تبلع بريكها بخوف
تأكددت مليون بالميه هيه ورا هالسالفه
عفتها على راحتها تسرح وتمرح بالبيت
وبنت خالها شجن دائما تجي عليهم للبيت
بيوم جنت فوك دا اعزل بالغراض
وهمه مجتمعين جوه
وهذا فراهد داك صدره يريد يتزوج سهند ويستر عليها
وابوها مرحب بالفكره
فتح الباب وفات معصب
القيت نظره عليه ورجعت اكمل شغلي
هوه هيج مدلغم علينه من يوم سالفة سهند
كعد على القنفه ويباوعلي ومقلص عينه
شبيك اوس محتاج شي.؟
أشرلي بدون ما يحجي اكعد يمه
رحت هم بصمت وكعدت يمه
شكو شصاير!.؟
طلع تيلفونه وفتح تسجيل صوت
سمعت تسجيل الصوت وكمت ابلعم
هاي شلون وصل يمه..!؟
جان صوتي اني احجي ويه سهند وانبها من علياء
الكلام كله مسجل من بدايته لنهايته
باوعت عليهِ وما حجيت شي
اوس// فسريلي كلامج هذا شنو معنى.؟
بلعت ريكي وجاوبته
اي عادي مجرد تنبيه
رفعلي حاجبه بعدم تصديق
تنبيهج هذا عباالك عليااء عدوتها مو بنت عمها ليش هيج حجيتي وياها بلا لف ودوران
اوس ترا والله عادي مجرد تنبيه عادي هيه سهند تحجي للرايح والجاي خصوصياتها هيه وسيف
واني حاولت انصحها واكوللها هيج اشياء تبقى بينكم ميصير اطلعيها مابيها شي
باوعت عليهِ وهوه هم ظل صافن عليه
ثواني وكام طلع من الغرفه
باوعت على الباب لثواني ورجعت لشغلي
شكد حقيره هاي علياء متخاف يعني اذا احجيله عن مصايبها
مر اسبوع والافندي زعلان مني
علمود سالفة علياء
والتحاليل جابهن والحمدلله ما طلع بيه شي
وهذا الشي زاد من حيرتنه
اذا مابيه زهايمر لعد هاي النسيان ليش ديصير
مع العلم اني متأكده من السغله الاسويها
بس هوه اوس ميصيدك بيه.
............................
بعد شهرين بالضبط
اني دخلت بشهر السادس
بطني كبرانه
وهباوي هم صارت حامل صارلها شهر ونص
ويوسف متخبل عليها
يحير شيسويلها
دائما من نروحلهم اشوف تعامله وياها
عبالك هستوهم متزوجين الله يحفظهم
اما سهند حالتها حاله
صحيح ابوها ماسوالها شي
بس ميحجي وياها اببد
هاي راح تير على سالفتها 3 اشهر
وطول هاي الفتره هوه ميحجي وياها
ولا رافع عينه عليها
وسيف هم مختفي نهائياً
لاحس ولاخبر
حتى علياء النذله متعرف وين
واخته هند بطلت تحجي ويه علياء هم اختفت فجأةً
وعلياء كاضيتها وينها الحقيره
و وينها
..............
عركاتنه اني واوس مستمره
وكولها بسبب نسياني
صار يفوت ويطلع يصيح عليه
متكوليلي شبيج يحضييي مو خبلتني فحوصات وسوينالج صخام بعينج وجبنالج لييش تنسسين
هوه يرزل واني مستمره بالبجي
حتى اني بديت امل من نفسي ليش هيج يصير ويايه
بديت اشك بيتهم بي جن.
يوسف من عرف بسالفة سهند
تعارك ويه عمه وانته شلون تصدك وسهند مستحيل تسوي هيج
وحتى فتحلهم الفيس مال سهند
لان الباسورد يمه بس مالكو شي المحادثات مابيها بس علياء ويوسف وسيف
وهيه اصلاً ابوها ماخذ منها التيلفون من يوم الحادثه
ويوسف هم ما اعرف ليش اعتزل سهند
صحيح يوصينه عليها بس ميحجي وياها
اوس يحجي ويا يكوله ولك كواد انته بس لا مصدك بالسالفه
يكوله لا اكيد ما مصدك بس مقهور عليها شلون هيج انكلبت حياتها.
.......................
عمتي وعلياء وشجن جوا بالمطبخ
والبيت مابي بس احنه الزلم كولهم طالعين
نزلت جوه اساعدهم اخاف هم يجيني الحجي طشار
بعدني ما فايته للمطبخ وصوتهم وضحكهم يوصلني
شجن// ولج عليااء والله خطيه هههه سويتنها مجنونه
جاوبتها عمتي ام فراهد بضوجه// ختوولي ان شاء الله تنجن من صدوك اني ما رايدتها من البدايه
وجهت كلامها لعلياء وكملت.. انتي عوبه ظلي شيلي بغراضها وغراض اوس بلكي يطلكها ونفتك منها.
علياء // يمه ازود من هيج تحط شي منا اني اشيله منا ههههه تستاهل بلكي تتخبل
حطيت ايدي على حلكي وفتحت عيوني عليهن بصدمه
عززا العززاني مو العززاهن
لهالدرجه الحقد يوصل..!؟
وصلت لباب المطبخ وهنه انصدمن من شافني
باوعت على علياء وعمتي بحقد
بعدني ما حاجيه كلمه وحده جان يفوت اوس علينه مثل العاصفه
علياااااءءء
انداروا عليهِ مصدومين من جيته
واني هم مصدومه منه
اتقدمت عمتي عليهِ دفعها بعصبيه
وضرب علياء راشدي يجوز انطرشت أذانها
اوس// بننت الززماايل شحااطين بالببيت احننه برببوك
يضرب بيها بحركة كلب ويسب عليها
اندار على امه بعصبيه و وجها احمر
يمممه هييج تسووين بمرررتي يممه انني حااطها يممج اماانه واجيب اوصي بيج عليهااا خططيه مرريضه دااريها
تاليهااا طلعتي تسويين مكائدد من ورااانه
ام فراهد// يممه بس اف
عافها وسحل علياء للغرفه فوتها للغرفه وقفل الباب عليهاا واخذ المفتاح
شجن اول ما شافت اوس انهزمت لبيتهم
لزم ايدي وصعدني ويا فوك
وصياح علياء وامها شال البيت شيل
اوس// لاننعل ابوو اليعييش ويااكم كوواويد حاطيييلنه جلاابه بالبيت احنه نااس تااكل بنااس
نزل الجنط من فوك الكنتور
تعاالي لممي الخررا بسررعه كعدده وحدده بهذاا البيت ماااكو بععد تحرركي
لميت ملابسنه وهوه هم كام يلم ويايه
وصياحه عالك
نزل الجنط وامه استلمته بجي وتوسل
يممه الله عليك لاتطلع تطلع علمود هاي يمه ختولي وازوجك الاحسسن
ماجاوبها طلع الجنط بالسياره
بعدنه ما صاعدين جان يفوت عمي ابو فراهد
يالله شكو ابني وين رايحين
جاوبه اوس بصيااح
راايح اشووفلي بييت واكببر نفسي بيي من ورا مرتك وبنتك
انطا المفتاح وحجاله السالفه كولها
وعمي خطيه ظل يتوسل ابويه ابقه انته وين طالع احنه نطلع وانته مرتك تبقون بالبيت
بس اوس معند لا يعني لا
ابو فراهد فوت مرته وهوه يدفعها الظاهر اليوم راح يكون صعب عليهن
علياء اتوقعها منها بس عمتي ابد مجنت اتوقعها منها
عود هاي المره الجبيره التخاف الله هيج تسوي..!؟
............
خابر يوسف و وصا على شقه بيت صغير على كدنه
اوس جان ناوي نبقه بالفندق علمود السالفه لاتطلع وتصير قال وقيل
بس يوسف مقبل كاله تجون تكعدون ويانه بالمشتمل
بين ماتلكون شقه
وصدوك رحنه يم يوسف وهبه
اوس ضايج والدنيه طافره من عينه
ويوسف بس يضحك وفرحان لان راح يبقى يمه
شويه شويه كدر يشيله من حالة العصبيه مالته
بسوالفه الحلوه
واني هبه بالغرفه دنرتبها الي ولاوس
بقينه يمهم شي اسبوعين
كل مانريد نطلع يوسف يدك رجل لاا ابقوا يمي شعدكم طالعين ظلوا هنا تونسونه ونونسكم
بس بعدين اوس هم دك رججله هههه
لكينه بيت طابق واحد صغير ومرتب على كدنه
انتقلنه بي اني واوس
وهوه هم الحمدلله عكدة حواجبه انفكت يسولف ويضحك
ولاعبالك هذا العصبي الجان ابيت اهله
الحمدلله تغير حاله شويه
استقرينه اني واوس بالبيت
وكولش مرتاحين
وهوه يفوت ويطلع يصيحني البطه والبطه
مايلام بطني واصله لخشمي ههه
صدوك الحمل متعب يعني اني شايله نفسي وشايله انسان ثاني بداخل بطني
وهذا الانسان هم راح تصيرله حياته الخاصه وتنبني اله حياة كامله سبحان الله
اوس طول هاللفتره ما حاجي ويه امه
بس ويه فراهد وابو
وابو كاله اجه خاله لاوس وطلبها لآزاد وعمي موافق
ومحددين يوم علمود يعقدون شيخ
اوس كاله على خير والله يقدملها البي خير وما ادخ حيل بيهم
ولاسأله موافقه هيه او لا
من سمعت خبر خطبتها من ابن خالها ما اهتميتلها حيل
بس نقهرت على سهند الثوله
علياء خربت حياتها وهسه راح تبني حياة مستقره ويه ابن خالها.
.................
سهند..
دائما جنت اكول للبنات واكول لنفسي هم
اني احس بنفسي احبه اكثر ما هوه يحبني
وهاي الحقيقه
كولشي صار حسيته صار بسرعه
ماعرف هيه هاي طبيعة البشر الشي الي يضوجنه والفاجعه التصير ويانه نحسها تصير بلحظات
كل يوم واني اكول باجر يجي لا سهند لاتظلمي باجر راح يجي
ميكدر هوه على بعدج
باجر باجر والباجر تصيرلها 4 اشهر
لاهوه جاي ولا مخابر
كولش تعبت بهاي الاربع اشهر
مو تعب جسدي لا تعب نفسي
اني هاي الصور ماخذتهن بتيلفون علياء وحتى هيه ورا الحنه مادزتهن الي
شوصلهن لسرمد.!؟
ابويه ميحجي ويايه
ولايوسف
شنو الغلط مالتي ما اعرف.!؟
صار عمري 25
هاي كم سنه صارلنه انازع اني وسيف علمود ننجمع ومدتصير النه قسمه
اقنعت نفسي هاي قسمتي
وسيف مو من نصيبي
مع العلم هوه ما طلك شرعي
وابويه يكولي اني سويتلج فصخ يعني طلاك غيابي
وسمعت من الولد هوه مخابر سيف وكايله طلكتها منك طلاك غيابي
شلون صاير هذا الطلاك ما اعرف
اقتنعت بكلام ابويه استسلمت للأمر الواقع
شبيدي يعني عمتي جليله تكول هاي علامات الله يدزلكم اياها
يعني سيف مو زين الج مادام هيج تصير مشاكل وياكم
عدة فتره واني حياتي فوك العاديه وفوك الممله
مره وحده حجيت ويه يوسف وكتله اريد اعرف الحساب هذا المن وشلون نكدر نعرف صاحب الحساب
لان هوه مسجل بأسمي والمحادثه كولها سوالف عني
يجوز حتى اني ماعرف هيه موجوده بيه.!؟
سمعت بالي سوته علياء ويه قدر
صدوك ضجت منها شنو هالخباثه التخليج هيج تتهمين البنيه بالمرض.!؟
صارت خطبتها ماردت اروح
لان هيه هم صارلها فتره مقاطعتني متحجي ويايه ولاتسأل
هبه لحت عليه اروح وياها
ورحت
طول الحفله واني مالي خلك احجي ويه واحد
عاد المعازيم كلهم هاي ام المصايب وهاي العافها الرجال
بس والله هالجليله هاي خوش تردهن
بس وحده تفتح حلكها تنزللها اكس مربع
وانتن شعدجن بالكال وكيل ماتسنحن جايات لحفلة خطوبه لو حفله الحش والنش
والله خوش بردت كلبي بيهن
............................
قدر
بعد اسبوع ابو فراهد اجه علينه
وظل يحجي ويه اوس علمود يحضر الخطبه ويقنع بي
الى ان اقتنع اوس
وصدك ورا يومين رحنه لخطبتها
هيه كالعاده مدلغمه والدمعه بطرف عينها
الواضح عليها جابريها على الزواج
سهند هم جانت جايه
لابسه فستان وردي فاتح طالعه كولش حلوه
بس التعب واضح عليها
ضعفانه حيل وجوه عيونها اسود مع العلم دتحاول تخفي بالمكياج
بس هم مبين
سلمت عليها وبقيت كاعده يمها
وهيه تجاوب على كد السؤال وابتسامتها المصطنعه على وجها
ماجانت حفله عبالك عزا
العروس مدلغمه والجو كله مشحون
عقدولهم وبدت الهلاهل
عافتهم علياء وفاتت للغرفه بلا حتى ماتحجي اي احد
اجه يوسف اخذ هبه وسهند
ورجعوا للبيت
والعالم هم كامت تروح كل واحد لبيته
غرفة علياء نفسها يم الدرج والمغاسل صايره يمها
رحت داغسل ايدي من الكيك
هذا ابن خالتهم يجيب بالكيك ويكومه عليه
دانشف يم الدرج
وصوت علياء من الغرفه طالع
// يعنيي شنوو هنند تزووج شلوون يتزووج انتي وعدتني تحجيله عني وتخلي يخطبني هسه شنو هالكلام
صفنت على بابها شويه
الله يهديها بيوم خطبتها ورايحه تخابر هند تسأل عن سيف.؟
بس هوه تزوج منو.؟
سيف لو اخو.؟
رجع صوتها يلعلع
الله يااخذج حقيرره املتيني بي وبالاخير طلعتتتي بووخه الله ياخذج
شويه وطلعت من الغرفه باوعتلي بعصبيه
فاتت من يمي وهيه تدفعني
رووحي رووحي بشريهاا المحرووس سييف تزووج خلي تطمن ما صاار لا الي ولاا الهاا
ـــــــــــــــــــــــــــــ
اقتربنا من النهايه 🖤
انطوني توقعاتكم للنهايه
🖤 هنانه او بكروب ورود وفراشات
دمتم سالمين احبتي🖤
احبكم جثييررر
حفصه الهاشم
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!