زمهرير الاوجاع الفصل السابع وثلاثون 37 - بقلم قدر ال هاشم

زمهرير الاوجاع

حفصه الهاشم
صلوا على النبي بنوتات ..

ــــــــــــــــــــ

لا شيئ يستحق العناء..فقط امضي.

ــــــــــــــــــــــــــــ

ضحك بأستهزاء وهوه يباوعلي من فوك ليجوه
// ههه سمعت عمي مات اجيت تأدي الواجب

اباوع عليهِ وعيوني مغوشه من الدمع..
هذاا سيف نفسه الحبيته ..!؟

مستحيل سيف الي حبيته جان يكولي دموعج تأذيني
جان ينقهر على قهرتي مو يضحك على حزني.

انتفض اوس بعصبيه ودفعه من كتفه
انته شجاابك هناا هم الك عين تجي توكف كداامنه

سحبه عمو سعدون وهوه يباوع على سيف
وسيف نظراته متركزه عليه واني هم بعدني داباوعله
دا ادور على سيف الحبيته بين عيون هذا الشخ الواكف كدامي.,.

سعدون// اووس اهدأ مو وكت خبالاك فاتحه والعالم رايحه جايه عليه

التفت على سيف وكاله
وانته ابويه امشي ويه يوسف عندي موضوع وياك

باوعت على عمو بسرعه وجاوبته قبل ما يجاوبه سيف
عممو ممنوع تحجيله اي شي السالفه انسدت وراحت ما اريد ارجع افتحها.

سيف// ها الظاهر ضامه بعد سوالف من وراي يولوو .!؟

سحبه يوسف
امشيي ولاتظل تخوط بصف الاستكان اممشي

طلع سيف وياهم للمشتمل مال يوسف
وعمو لزمني يقنع بيه علمود يحجي لسيف السالفه كلها

واني ما اريد ارجع افتح الموضوع ويا من جديد
ما اريده يرجعلي لان عرف السالفه اذا هوه صدوك يحبني جان اجه استفسر مني

هوه لا بسرعه طلكني وراح تزوج

عمو سعدون/ بنتي خلي احجيله علمود يعرف الموضوع وماتبقين انتي بعين ا اهله الموزينه
علمود يعرف اقاربه شنو ويلزم اخته هم ويجر اذنها

بعد كلام طويل عرض استسلمت لكلام عمو
ورجعت للبيت

وهمه بالمشتمل

كعدت بغرفتي بحيره..
بعد كل هاللمده رجع.. رجع علمود يستهزأ بيه مو رجع من الشوك

من اول ماعرفته وحياتي كل مازادها تصير اسوء
مرت ربع ساعه والفضول كتلني

اريد اعرف ردة فعله من يعرف الحقيقه
هاي اذا صدك بيهم بس هوه لوحته ميصدك التسجيل بتيلفون يوسف موجود

لبست حجابي وطلعت للطرمه مال البيت
بين المشتمل وبين بيتنه باب واحد

صوتهم عالي يوصلي واني بالطرمه

محد ديصيح بس سيف صوته يلعلع

//يوووسف وانته ليش ماكتلي اننه هييج ينضححك عليه قسسم بالله لاكسر رااسهاا اانه الهاا البربووك

سمعت صوته يريد يطلع وعمو سعدون لزمه
سعدون// ياابه ماتروح الا اطلك بنتنه احنه كلام عبد الجبار الله يرحمه ما أمنه بي مانعرف خلعها منك صدك لو جذب طلك بنتنه وروح اتفاصل ويه اهلك

صاح بي سيف // حججي خللي ساالفة الطللاك على صفححه خلي تخلص الفااتحه على خير والي ويه سهند كلام ثااني

اسمع اوس ماعجبه الكلام
وتلازم هوه وسيف اوس يكله اشمر عليها يمين الطلاك وسيف معند ميقبل يطلك

صوتهم لم علينه زلم المنطقه
فاتوا جيرانه نازلين جدد قبل الفاتحه بيومين كعدوا يمنه حايطهم على حايطنه

ابو عمار// ياابويه صلوا على النبي ما تنحل الامور بالعصبيه

اوس// سييف اننعل الجاابك عللينه دمررتها للبنيه طللك وروح بحال سبيلك قسما بالله الباب ماتطلعه الا وانته مطلكها

جاوبه سيف بصوت عالي// يوول كطنه وشيللها من أذنك ماا اطلكها لو يكعد ابوها من الكبر

سعدون// ياابه انته مو تزووجت شعندك بعد وياها بنتنه وماتريددك

قاطعه سيف بحده// منهوو كاال ماتريدني لاتريدني واريدها هم لو اخذها الرابعه اخذها اخذها

رجع اوس هجم عليهِ وهوه يسب ويغلط
تاخذا الرابعه مو هيه هيته ومالها ظهر علمود تاخذها الرابعه

على هوستهم طلعت ميقات وعمتي جليله يمي

ميقات// ولج هذا نفسه المسودن رجعلج.؟

هزيتلها براسي وسكتت
جليله// عااب هالوجه شعنده جاي يولي مو تزوج

رفعتلها بكتفي بمعنى ما اعرف

ظلوا يتمالخون بيناتهم واوس داك رجله الا يطلك يلا يطلع من البيت
ادخلوا جيرانه وعمو ابو فراهد وبالكوه خلوا يطلع

ركب سيارته وماخله بس الغبره ورا

كعدوا الزلم بالمشتمل مال يوسف
وجيرانه هم كعدوا وعمو ظل يتعذر منهم على الاصوات الطلعت والظاهر همه خوش ناس

ما اهتموا لهاي السوالف

عفتهم وصعدت لغرفتي مهمومه
سيف بين الحب وبين عقلي منو اختار.!؟

بعد هالفتره كولها رجعلي
لا ومتزوج هم شلون اقبل على نفسي ادخل بحضن رجال متزوج.؟

بس اني اعتبر زوجته الاولى وهيه الثانيه
اني عقد عليه قبلها

افكاري متشتته بسبب تسرعه وصلنه لهاي المرحله
بسببه وبسبب اخته وبنت عمي ابويه توفى وهوه مو راضي عني
شلون ارجعله بعد كل الي صار.؟

احبه اي صحيح بس كرامتي وين..

بقيت طول ايام الفاتحه الصبح نايمه وبالليل النوم يعوفني
اظل ابجي على ابويه الضيعت عمري ويا بالمعارك والمزاعل تاليها توفى وهوه حتى نظره ماجان يباوعلي

ابجي على حضي وين وصلني
من صفحه ابويه ومن جهه ثانيه سيف..

يومين وهوه ساكن يم بيتنه
هوايه اجه على عمو سعدون يطلب من عنده يرجعني بس اني قافله
لا اي ولا لا

عمو هواي حجه ويايه بس ما جبرني
هواي ينصحني ترا متزوج وتعرفين عيشة الضراير شلون والرجال بنفسه يكول ما اكدر اطلك بنت عمي لان ابو رايدها
وبنفس الوقت ما يريد يخسرج فكري زين ورديلي خبر

ما اعرف ليش انقهر واضوج احس بخنكه من الموضوع ينفتح مره الثانيه
فضلت السكوت على الجواب

واوس كل يوم عازمني علمود يحشي براسي
اذا رجعتيله غبيه ولاتنسين السوا بيج شلون ترجعين تثقين بي ومن هالسوالف

..................

بعد مرور عدة اشهر

سهند..

مرت اشهر على وفاة ابويه ..
بس ابد ما نزل من بالي ومن دعائي

دائما ادعي ربي يغفرلي لانو مات وهوه ما راضي عني..
وهذا الشي يجوز اكبر عقاب لي لان عارضته وقبلت اتزوج سيف

سيف بعده يروح ويرجع على عمو وشكد حاول يتصل عليه بس اني ابد ما اجاوبه
كلبي شايل عليهِ هوايه
وامه الحجيه كم مره خابرتني وظلت تتعذر

مره طيبه من اهل الخير
ابد ما انطت عذر لابنها لا بالعكس تكول اول ما كالي طلكتها زعلت عليهِ

وعرسه ماحضرته من تزوج بنت عمه

واني هم احجي وياها على كد السلام واسد الخط

هاي اخر سنه الي بالمعهد يوسف يجيبني و يوديني
واذا مو يوسف اوس لو ساهر

هبه حبيبتي جابت ولد سمو على اسم ابويه عبد الجبار

وقدر واوس عصافير المناكر هههه
مناكرهم مستمر كبروا وبنوتتهم كبرت وهمه بعدهم يتناكرون

وهذا اوس لسانه زفر
اتذكر مره كاعدين بالليل يم يوسف بالمشتمل مالته

وماعرف على شنو اوس عصب على قدر
هايه كاعده بصفه جانت
وثنينهم بس يتبسبسون وقدر تضحك عناد بي وهوه يخنزر عليها

عاد هيه كامت من يمه وكعدت بصفي وكالتله
دروح شوف بعد منو يكعد بصفك

جان ديكشر بالبرتقاله وهيه لازمه بنتها خنزر عليها هوه ومنزل راسه وجاوبها
درجعي كعدي بمكانج لا اكسر رجليج هذني

هزيتله بجتافها بأعتراض
ما اكعد اكعد وحدك اني اكعد يم بنتي

عاط هوه عليها
ولج بربوك اذا اكوملج هسه اسوي بيج جريمه كدامهم ارجعي لمكانج انعل ابوج لابو بنتج

كامت هيه مبرطمه وكعدت بصفه عاد هوه اخذ بنته وشمرها على هبه
وحط راسه بحضن قدر وياكل بالبرتقال

اي هيجي اسمعي الكلام لو الا أجرجر أذاناتج

بوقتها ظلت هيه معصبه عليهِ وهوه عمداً يحرك راسه بحضنها
لو يتحارش بيها

جانوا الولد بوقتها ما موجودين لو موجودين جان ماعت من المستحه

.....

انسمطت من الحر صارلي ساعه واكفه اباب المعهد ويوسف ماكو
ورصيد خلصان عندي

فكر من يوم يومي

المعهد يبعد نص ساعه عن بيتنه

حطيت الدفتر على راسي امنع حرارة الشمس توصل لراسي
خلي امشي الى ان يجي يشوفني على الطريق ويشيلني احسن ما صافنه هيج

مشيت ربع ساعه تقريباً ويوسف ماكو
هناك واسمع صوت واحد ورايه ..

ياا بنييه هيوو ابويه انطري شويه

التفتت بأستغراب ومنانه الشمس ضاربه على عيني وروحي طافره من خشمي
اتقدم عليه طويل القامه ماركزت بيه حيل سألته بأستغراب

خير اخويه محتاج شي

قدم جزدان بأيده وهوه يضحك بخفه
ابويه وكعتي جزدانج وانتي تمشين تفضلي

اخذته منه واني اشكره ومشيت

مشيت شكد ويوسف هم ماكو
خطيه هم ابنه مصخن ومحتار بي

سلكتني الشمس سلك ..وصلت لباب بيتنه
وداحس بطول الطريق اكو شخص ديمشي ورايه

التفتت عليهِ
هذا شرايد مو انطاني الجزدان بعد شكو.!؟

باوعت عليهِ باوع عليه وابتسم

وكفت وانداريت عليهِ بعصبيه
هيي انتته موو عيب عليك مااشي وررايه كل هالمساافه مااتستحي

رفع حاجبه بمكر وفتح باب جيرانه الي بصف بابنه
من الفشله معت بملابسي

// وين العيب واحد راجع من شغله لبيته مشي بيها عيب.!؟

خنزرت عليهِ وفتت
ويه فوتي اجه يوسف وكف السياره ونزل يسلم على الولد سلام حار
هلا هلا بيك عمار شلونك خويه

وهذاك يجاوبه هم بنفس السلام

فات يوسف وبأيده ابنه اخذته منه وكام يتعذر لان ما اجاني
مو مشكله يوسف اهمشي عبودي زين هسه

يوسف// اي والله سوسنه الحمدلله حرارته انخفضت

الحمدلله

...................

عدت الايام وهذا الاسمه عمار بين فتره وفتره اشوفه

مايسوي شي ولا اني مهتمتله لان كلبي مات من هاي المشاعر
بس هوه الرجال عينه زايغه كل ما نتقابل يبقه يباوع لو يكصني كص من راسي لساسي

سيف ما شايلته من بالي ابد
اني زوجته الاولى اني الي حق بي مو بنت عمه الدخلت بالنص
اكدر ارجعله وهمه هم مابيناتهم طفل من حقي هذا زوجي وحبيبي الي

ومرات ارجع اكول شلون راح اثق بي ويثق بيه
الثقه من تموت بالعلاقه الحب يموت

طلعنه اني ويوسف وهيه
اليوم عاجبه يعشينه برا

شلت عبودي ابن يوسف وطلعت للسياره
يلاا عااد يووسف هيه طلعه لا تظل ادقق على البنيه بلبسهااا

طلعت وفتحت السياره هذا يوسف
صاير حيل يتشدد على هباوي هيه سمنانه شويه وهوه كاضيها هذا ضيق وهذا هذا
كل ما نطلع يسوي هيج

خليت عبودي بالسياره هوه والجنطه مالته واني العب ويا
سمعت صوت واحد ورايه يسألني

// الظاهر تحبين الجهال هوايه.؟

التفتت عليهِ
ماكو غيره عمار افندي

متجي على الباب وجكارته بأيده يدخن بيها ويباوعلي من فوك ليجوه
شكد مستهتر هذا.!؟

حتى لبسي تنوره عريضه وقميص
بس احس بعيونه ليزر

جاوبته بعدم اهتمام واني اندار على عبودي
لاا اصلا اكرهم بي على الطخات

سمعته يهمهم شويه ورجع كال
ترا تنورتج ضيقه من ورا مبينه مفاتن جسمج حيل.

انداريت عليهِ مصدومه من جرأته المستهتر
خزرته بعيوني واني داحضر الرزاله اله

بعدني مفاتحه حلكي جان يطلع يوسف وهبه

خزرته بعيني وسكتت
سلم على يوسف واني وهبه صعدنه بالسياره

هبه ماتقبل الا اصعد ليكدام بس اني صعدت ليورا
على شنو اكعد ليكدام مرته غير تكعد بصفه

شغل السياره وهذا ابو عيون الزايغه بعده واكف التفتت عليه
ميل راسه وغمزلي

انداريت بسرعه واتجاهلته
شكد مستهتر هذا

وعود هوه رجال جبير يعني يطلع عمره بالثلاثين
بس مستهتر ثول اي والله

.........

جاب عشه يوسف و ورحنه لحديقه كعدنه نتعشه هناك
الجو ماخله من شقه يوسف ورا شويه هم ساهر اجه هوه وجاسم

بقينه كاعدين شويه وراها يوسف كال تأخر الوقت
وعمو سعدون يظل باله يمنه

كمت دالم بالغراض وهبه وساهر ويايه

اسمع يوسف يسلم على واحد سلام حار
التفتت عليهِ
شايل طفل صغير بالعمر وعيونه معلكه عليه

قلصت عيوني عليهِ
هذا ابن منو..!؟ ممعقوله ابنه هوه كال لعمو متزوجها بس علمود ابو .!؟

اتقدمت عليهم وهوه يباوعلي بأرتباك..
سيف// سهند شلونج ابويه مشتاكلج جثير يولوو

مجاوبته اباوعله واباوع على الطفل الويا
جاوبه يوسف عني

/ لاتشتاك جثير بعدني واكف مارحت علمود تاخذ راحتك

سيف// هههه يول لا تصير حقنه مثل ابن عمك

وكفت بصف يوسف وهوه كدامنه
قاطعته بسؤالي الي خلا يتوتر

// ابن منو هذا سيف.!؟

باوعلي بصمت وبنظرات عمق
ماجاوب ظل صافن لاعليه والطفل يجرجر بلحيته

ثواني واجت وحده من ورا لازمه طفل ثاني و تصيح عليهِ
يلا ابو فلاح رجولي تعبن جثير.

اتقدمت وكفت بصفه
من شافتني حسيتها صفرت وانصدمت هم

اول ما شافتني لزمت ايد سيف بسرعه
عبالك دتكولي ترا هذا الي ملكي صار

يوسف سأله عني واني بالكوه حابسه دموعي
على الخير ابو فلاح ماكلتتلنه صار عندك اطفال

مسح على وجهه بتوتر وجاوبه
صارت بسرعه خويه ماجنه متوقعيها.

كال هيج ورجع يباوع عليه ينتظر ردة فعلي

عفتهم على وكفتهم ورحت يم هبه
اخذتها ورحنه للسياره

بالكوه حابسه الغصه بداخلي
صعدنه بالسياره والتزمت الصمت

شويه واجوي الولد
وصلنه للبيت نزلت على السريع ودموعي بعيني مغوشات الرؤيا عليه

ما اريد ابجي عليهِ ما يستاهل
ما يستاهل حبي اله اببد

عايش حياته و ولده بحضنه واني عمري بنهاية العشرين ودا انتظره مثل الثوله
جان امل صغير ارجعله بس من شفت جهاله يمه مستحيل افكر ارجعله ابد

ثاني يوم انطيت خبر لعمو علمود ينهي موضوع سيف نهائياً
عادي مو اول ناس يحبون بعض و ينجمعون

دست على كلبي حيل ويا
بس ما اكدر ادوس على كرامتي اكثر

عمو رجعله خبر علمود يجي وينهون الموضوع
وهوه تخبل يكول لعمو بس خليني احاجيها

بس اني قافله من ناحيته حتى ما اريد اشوفه
اخاف اشوفه واضعف كدامه لو كلبي يخذلني ويكسرني كدامه

رفضت رفض قاطع انو اقابله
وهوه هم اللوتي انهزم علمود اوس لا يلزمه ويجربه يطلك

ابويه صح كال خلعتها بس ماكو شهود
علمود هاي عم يريد يطلكني كدامه علمود لا ندخل بنطاق ثاني

مرت يومين ثلاث ايام وهوه ماكو بس يخابرني واني انطي بلوك وارجع ليورا
الحجيه هم خابرتني تقنعني علمود ارجع بس اني اتعذرت منها وكتلها موضوع صار خارج عن طاقتي
هوه متزوج ومكون اسره ما اكدر افوت بينهم وهيه هم تفهمت حالتي وما جبرت عليه

بس امنتني انو ما اقطع تواصلي وياها
واني هم ما ناويه اقطع تواصلي وياها
مره من اهل الخير حرامات اخسر صداقتها الي

رجعت من الدوام يوسف ذبني براس الفرع وطلع لشغله
وصلت لبابنه وهذا عمار المستهتر واكف

ادري هذا ما تسلكه الشمس
عود هوه هم بي نوع من السمار الذهبي شلون صاير هذا ما اعرف

باوعتله بطرف عيني وتجاهلته
كاعد على طابوك مسفط بين باب بيتهم وبابنه

سمعت صوته يحجي بخشونه
عيونج رايدلهن فرمته شوو باعيلي

التفتت عليهِ اني من الله اريده يحجي دا ارزله
هيي انته تراا حيل زودتها هاي عود انته جيرانه على الطبه والطلعه واكفلي مرصاد شككو خيير

وكف ونفض التراب عنه وهوه يباوعلي
عيونه عسليه برموش سود ثخان وكبار هم

جاوبني وهوه يميل راسه// بنت عبد الجبار انتي مو

// واننته شدخللك بأبووها!.؟

التفتت عليهِ هذاا شجابه هسسه..

جاوبه عمار بثكل
عادي جيران الباب على الباب وهم الكلب على الكلب انته شرايد

سيف// لاتظل تزامط بالحجي وتوكف للرايح والجاي زين مره متزوجه ترا حرام عليك

باوعت على سيف ورفعتله حاجبي بأستهزاء

فتحت الباب وفتت ماسديته خليته مفتوح
فات هوه ورايه وعمو جان ديتوضه بالطرمه

سلم على عمو وفات للاستقبال

طلب يشوفني وعمو هم مل من الموضوع
فتت للأستقبال علمود نفض هذا النزاع البينه

كعدت مقابيله ورأساً طلبت منه الطلاق
سيف// ابويه سهند صدكي بالله التوم غلطه وصارت

قاطعته واني اضحك بأستهزاء
ههه لا وفوكاها توم..!؟ سيف لاتعبني ولا اتعبك طلك وكل واحد يروح بحال سبيله مامكتوبه النه قسمه

مسح وجهه بندم وباوعلي
ابويه والله احبنج جثير ليش تكسرين بينه

تنهدت بألم ولزمت ملابسي بقوه ما اريد اضعف ماا اريد
// سيف هذا الكلام مينفعنه هسه انته متزوج واب لطفلين شبابي ضاع وياك وحياتي ادمرت من فتتلها

باوع عليه حسيت بعيونه دمع وحابسه
بلعت ريكي بألم ودرت وجهي عنه رجعت كملت كلامي بغصه واني ابعد نظراتي عنه

سيف .. طلكني وبس

كام وكف واني هم وكفت ويا
بدون مقدمات تقدم عليه وحضني حيل حسيت عظامي تكسرن بنص حضنته

للحظه ضعفت كدام عطره وحضنه القديم
لفيت ايدي على حصره وبادلته الحضن

عبالك جانت اشاره خضره مني قوه حضنته الي
وكل ثانيه يرجع يرخي ايده ويقويها

حسيت على حجم الغباء الي اني ابي اطلب منه الطلاك واحضنه بنفس الوقت
ابتعدت عنه بسرعه ومسحت دموعي

باوعلي بنظرات تهز مشاعر حزني اله
فات عمو علينه وكال ها يابه اتفقتوا

باوعتله وهوه بادلني بترجي

سيف// والله يبو يوسف ما اريد اطلكها

تنهد عمو بتعب وجاوبه
ابويه طريقكم مو راهم طلكها وخلها تشوف حياتها

وجهه انكلب احمر وعظام فكه تصعد وتنزل
نزلت راسي ودموعي تنزل بس ما اريد اضعف كدامه

باوعلي بألم ورمى الطلاك عليه

طلكني بس عكس هذيج المرا الطلعت اني اركض ورا حافيه
بس علمود ما يطلكني

هالمره اني الطلبت منه الطلاك واني الراضيه

طلكني والدمع الي بعيونه يشرح الم كلبه
اما اني ما تحملت اشوفه ضعيف احبه والله احبه بس ما اكدر ارجعله

سيف
ابويه سهند ديري بالج على روحج

هوه كال هيجي لو ذبلي ملح على الجرح
ماسيطرت على صوت بجيي

حطيت ايدي على حلكي وكمت ابجي بصوت عالي

هوه رأساً طلع من البيت كله

اجه عمو حضني ويهدي بيه
مو انتي الطلبتي الطلاك على شنو هالبجي بنتي

سحت دموعي وصعدت لغرفتي بدون ما اجاوبه
طلبت الطلاك بس احبه

اول حب بحياتي هوه اول رجال اسمحله يفوت الكلبي
مايهون عليه طلاكي منه بهيج طريقه

تمنيت لو مصايرين البعض لو ما محاولين ننجمع
يجوز بوقتها فراقنه يكون المه اهون

ماعرف منو الغلطان ومنو المايعرف يحب
اني لو هوه

مانسيته ابد مرت شهور
وصورته لساها ابالي سيف..وما ادراك ماسيف

تخرجت من المعهد ومرت الايام
قدوره حامل مره الثانيه واوس متخبل عليها

سمعت علياء مديصير عدها اطفال
بس زوجها متمسك بيها

امي صرت على توواصل وياها
بس تواصلي وياها خفيف على كد السلام مع العلم هيه تحاول تتقرب مني
بس اني شي يمنعني من انو ادك وياها ميانه

ميقات ...

تغيرت ميه وثمانين درجه يجوز موتة ابويه أثرت بيها

او يجوز شفقه على حالي
هواي تسمعني ابجي بنص الليل على سيف
وتجي هيه تكعد بصفي وتحجي ويايه عود تخفف عني

طبعها شويه يختلف هيه من النوع الماتكدر اطلع حنيتها
اطلع حنيتها على شكل عصبيه

هوايه تجي تضربني كفخه وتحجي بعصبيه ويايه
انتيي ثووله سهنند ليش تبجيين خيوليي وامداج اذا بجيتي

هيه هيج طبعها اطلع حنيتها على شكل عصبيه

صحيح الدنيا تمشي وماتوكف على احد
بس كسرة ابويه جانت جبيره بالنسبه الي
ابويه وسيف

هواي من المرات اكعد ابجي عليهم
مرات اسمع صوت همساته لسيف من احجي ويه الحجيه وهوه يكوللها
يمه افتحي سبيكر خلي اسمع صوتها

واني كل ما اسمع صوته الغصه ترجعلي

.......

عمار هذا بحث اخر
هواي صار يجي يتعلل ويه الولد ويسهر وياهم
واغلب المرات يوكفلي ناطور على الباب

الى ان اجه خطبني
خطبني وره ما اطلكت من يوسف بست اشهر ضبط

جنت رافضه حيل انو اوافق وما اريد ادخل بتجربه فاشله
وتنتكس حالتي اكثر

بس عمو واقاربي جان الهم رأيي ثاني بهذا الموضوع
صحيح كلت لعمو انو يرجعلهم خبر انو ما موافقين بس عمو ما رجعلهم

كالي هالمره مو بكفيج الرجال ما ينعاب
محامي وحالته زينه والرجال شاريج خوما تظلين عايشه على ذكرى رجال متزوج وعايش حياته

كلام عمو يضوجني
ديحسني ترا اني قابل وازوجج اله

وكم مره طلعت قالبته لهذا اسمه عامر بالشارع
ويكولي عنيك عينك ترا نهايتج بحضني

حيل ينرفزني كلامه جريء حيل
اقارن بينه وبين سيف بعد الشمس عن الارض

مرت فتره وهوه يروح ويرجع على عمو ها شنو رأيكم
ويبقى ينرفز بيه
اتذكر مره اخذت عبودي وطلعت اشتريله واشتري الي

وهوه شال عبودي مني ويمشي كدامي
عبالك غوريلا مو رجال

اسمعه يحجي ويه عبودي بس الكلام موجه الي
عمار/ حبيبي عبود تراا رجليك الحلوات هذني اكسرهن الك اذا تطلع الظهريه وحدك مرة الثاانيه
تريد شي بس دك على بابي واني اطلعلك

اني اتجاهلته ومن وصلنه للسوبر ماركت
اشترين غراض قليله
واخذت منه عبود طبعاً بس هوه لوتي ظل واكف يم الحساب ينتظرني

اجيت دا ادفع وهوه سحبني بخفه من ردان عبايتي مو من ايدي
باوعلي بخزره وكال

شنو مو رجال كدامج علمود تدفعين .!؟

عفته يدفع على راحته
كمل الحساب وانطاني العلاكه وشال عبودي

باوعتله رفعت حاجبي اله بغرورو وكتله
بس اني بعدني ما مكمله غراضي

قلص عيونه العسليه عليه وجاوب
محتاجه شي بعد اخذي

والله ما اكوللكم رحت اخذت نص السوبر ماركت هههه|
وهوه صافن عليه ورافع حاجبه يجوز عرف بيه داشوفه يدفع لو لا

حطيتهن يم ابو الحساب وهوه يباوعلي بطرف عينه
نزل راسه يم أذني
طلع عقلج صغير يولي

باوعت عليهِ رأساً
كلمة يولي هاي مو اله خزرته بحده واخذت عبودي منه

// ميحتااج تدفع

طلعت جزداني وحطيت الفلوس على الميز الدفعهن
عفته وطلعت وهوه مصدوم من ردة فعلي الهجوميه اله

..............

مرى ايام وعمو رجعلهم خبر انو وافقنه على عمار

هاهيه لازم اشوف حياتي
خوما ابقه متقيده بسيف

بس كلبي شيقنعه
افكاري حيل متشتته ما اريد ابقه متقوقعه بالماضي

اقنع نفسي اكثر من مره ماكو قسمه بيني وبينه
وهذا الشي الله كاتبليا ان شاء الله الكه الراحه ويه عمار
وكلبي ينسه سيف واشيله من حياتي

.............

اول مره بعد مددده شكد طويله اشوف ابويه بالحلم

كعدت من الحلم فرحانه ابجي واضحك بنفس الوقت
شفته لابس دشداشه بيضه و وجهه ابيض عبالك حاطين بي ضوه

جنت اني خاتله ورا المكروتيه ما عرف ليش
بس بالحلم جنت خايفه من شخص انو يشوفني

عاد اجه ابويه كعد يمي ورا الكروتيه ومسح على راسي وهوه مبتسم
ما حجه اي كلمه بس يمسح على راسي ومبتسم

فجأةً طلعت بالغرفه ودالبس بفستان ضيق عليه
فستان عادي مو مال حفلات او شي مابي اي تفاصيل

عاد هوه هم فات عليه بس مثل العصبي
سحب الفستان من ايدي وشمره على صفحه وانطاني فستان من عنده
بس الفستان مالته جان واضح عليهِ قديم اخذته ولبسته

حلمين بحلم واحد هههه
حجيت لعمتي جليله خوش تفسر احلام على الطخات مره تفسره صح ومره اطلع تفاسير من جيبها

جليله// يولي هاي ابوج دينبهج انه هوه ما راد سيف والفستان زواج
فيجوز ما راد سيف الفستان اليمج وسحبه وانطاج فستان يعني انطاج عريس بس ليش قديم ما ادري اسألي عمج سعدون

اني هم غلست على الموضوع وما سألت عمو
يجوز كلام جليله صح هذا الحلم يظهر الواقع مالتي

حددوا العقد والخطبه بنهاية الاسبوع
هواي امنع نفسي من البجي

اني راح اصير على ذمة رجال ثاني ميصير افكر بسيف ابد
ولا ابجي على ايامي الراحت ويا

ما اكدر اكول هوه نساني لان بعده يحوم حوالينه
يدور بعيونه عليه ياخذله نظره لو نظرتين

مرات اشوفه كدام الفرع مالتنه ومن يسأله يوسف
يكول مريت من هينه بالصدفه

قبل الخطوبه بثلث ايام
خابرني رقم غريب

شلت التيلفون وسكتت
اذا طلع ولد اسده واذا شخص اعرفه اجاوبه

اجاني صوته متعوب التعب واضح عليهِ
حجه ويايه بغصه واضحه على صوته عبالك واحد حابس البجيه ابلعومه

سيف/// ول ابويه هان عليج تروحين لحضن غيري.!؟

ــــــــــــــــــــــــــــــــــــــــ

اسفه على التأخير عسلاياتي انتوا
رأيكم الحلو من فديتكم والله

احبكم جثيرر عود
دمتم سالمين

حفصه الهاشم