رواية عروس الرمال الفصل الرابع 4 - بقلم الضوء- ادم- بشير

رواية عروس الرمال الفصل الرابع 4 بقلم الضوء- ادم -بشير‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏

‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏

وقفت أعاين للستارة المتحركة وأنا ما قادر أفهم الحاصل شنو بالضبط،

يمكن أيّ زول غيري كان حـ يضحك ويقول مجرد هوا، لكن المشكلة إنو الجو جوة الغرفة كان خانق بصورة غريبة، والهواء ذاته واقف، لا شباك مفتوح ولا مروحة شغالة.

يوسف كان واقف جنبي ساكت، ودي الحاجة الوحيدة الخلتني أتوتر زيادة، لأنه من أول ما اتكسرت الكباية وهو ما اتحرك تقريباً، بس مركز نظره في الركن المضلم آخر الغرفة.

أنا حاولت أكسر الصمت وقلت ليه: ياخي مالك عامل كده؟ خوّفتني ساي.

لكن ما رد عليّ مباشرة، فضل ساكت شوية وبعدها قال بصوت واطي: مهند إنت ما حـ تفهم.

الكلمة دي ضايقتني شديد، لأنه من متين يوسف بقى يدس عليّ حاجات؟ نحن من صغارنا ما كان بيناتنا أسرار، حتى المشاكل الصغيرة كنا بنعرفها من نظرات بعض. لكن الليلة كان مختلف بصورة غريبة، كأنه زول شايل حمل أكبر من عمره.

حاولت أعاين ليه بصورة عادية وقلت: أفهم شنو؟ إنت براك من يومين متغير، لا بتقعد معانا، لا بتضحك، وحتى عيونك بقت غريبة.

رفع رأسه شوية وعاين لي، لكن بسرعة أبعد نظره وقال: قلت ليك الموضوع ما مستاهل. قعدت فوق الكرسي القريب من الباب بدون ما أستأذن، وقلت ليه: خلاص كويس، بما إنو ما مستاهل وريني الكبايه التانيه دي حقت منو؟

يوسف اتوتر للحظة، لاحظتها في حركة يدو لمن مسك طرف السرير بقوة، لكن حاول يغطي ارتباكه وقال: شلت التانية ساي.

ضحكت وقلت ليه: ساي؟ ياخي إنت من متين بتشرب شاي في كبايتين؟

ما رد.

والصمت الحصل بعد السؤال كان أطول من اللازم، لدرجة حسّيت إنو الغرفة كلها سكتت معانا. حتى أصوات الشارع البتدخل من الشبابيك عادة ما كانت موجودة، لا صوت مواتر لا أولاد بلعبوا برا. الغريب إنو البيت ذاتو كان هادي بطريقة تخوف، مع إنو الزمن كان لسه صباح.

أنا بطبعي ما بحب الصمت الطويل، عشان كده قمت وتحركت جوة الغرفة شوية، وأنا أعاين للحاجات حواليني. لاحظت إنو في رف صغير فوق المكتب، كان فوقو بخور شغال. الدخان كان طالع ببطء شديد ومالي نص الغرفة بريحة ما قدرت أحددها، لا هي ريحة بخور عادي، لا عطر.

قلت ليه: من متين بقيت تبخر غرفتك؟

قال لي بدون ما يرفع رأسه: بحب الريحة دي. استغربت أكتر، لأنه يوسف أصلاً كان بكره البخور وبيقول بيكتم النفس. لكن ما علّقت، واكتفيت إني أعاين للحاجات حواليني. فجأة انتبهت لحاجة غريبة شوية، في طرف السرير، قريب من المخدة، كان في سبيبات شعر طويل واقع فوق الملاية.

وقفت مكاني أعاين ليه، لأنه أكيد ما شعر يوسف، شعر ناعم وطويل بصورة واضحة.

مدّيت يدي أمسكه، لكن يوسف اتحرك بسرعة وقال بعصبية:

خليهن!

اتخلعت من ردة فعله وقلت:

ياخي مالك؟ شعر ساي.

سكت لحظة، وبعدها قال بنبرة أخف: وقعو من أمي يمكن.

الكلام ما دخل راسي، لأنو أمي عمرها ما دخلت غرفته من يومين تقريباً بسبب تصرفاته.

لكن قررت ما أضغط عليه زيادة، لأنه واضح كان متوتر بصورة ما طبيعية. قمت من مكاني ومشيت ناحية الشباك، فتحته شوية عشان يدخل هوا، لكن أول ما دخل النور جوة الغرفة، حسّيت يوسف انزعج.

قام بسرعة وقال: أقفلو.

قلت ليه باستغراب: ليه؟ الغرفة مكتمة شديد.

قال لي: عندي صداع... الضوء بوجعني.

قفلت الشباك وأنا أعاين ليه بصمت.

الزول الواقف قدامي ده، مهما حاولت أقنع نفسي إنه عادي، كان مختلف.

حتى طريقته في الكلام بقت أبطأ، ونظراته دائماً سرحانة في حاجة ما موجودة قدامي.

قعدت تاني فوق الكرسي وقلت ليه:

يوسف، بيني وبينك... إنت واقع في مشكلة؟

رفع عيونو عليّ أخيراً، وكانت باينة فيها حيرة وتعب شديد.

قال لي: لو قلت ليك أيوة... حـ تعمل شنو؟. سؤاله خلاني أسكت لحظة، وبعدها قلت ليه: حـ أقيف معاك، إنت أخوي.

ابتسم ابتسامة خفيفة جداً، أول ابتسامة أشوفها منه من يومين، لكنها اختفت بسرعة.

بعدها قال: مرات يا مهند، الزول بدخل في حاجات أكبر منو بدون ما يقصد.

قلت ليه: فعلاً، بس زي شنو يعني؟

لكن قبل ما يرد، سمعنا صوت أمي من الصالة بتنادينا للفطور.

يوسف اتنفس كأنه ارتاح من السؤال، وقام بسرعة وقال:

يلا أمشي إنت، أنا جاي.؛

طلعت من الغرفة وأنا عقلي مليان أسئلة، لكن الحاجة الوحيدة الأنا كنت متأكد منها، إنو يوسف فعلاً داسي حاجة كبيرة،، وحاجة أكبر من مجرد تعب أو ضغط دراسة.

نزلت الصالة ولقيت أبوي قاعد يقلب في التلفون، وأمي بتحضّر الفطور.

أول ما شافتني قالت: أخوك مالو؟ لسه زعلان؟

قلت ليها: ما عارف والله، لكن واضح تعبان.

أبوي رفع نظره علي وقال: قال ليك أيّ حاجة؟

هزّيت رأسي وقلت: لا، لكن في حاجة مضايقاه أكيد.

قبل ما أبوي يرد، يوسف دخل الصالة.

كان هادي بصورة غريبة، وجاء قعد بدون ما يتكلم.

أمي، لاحظت لي يده ارتعشت خفيف.

يمكن غيري ما كان ينتبه، لكن أنا كنت مركز معاه بصورة كبيرة،، الغريبة إنو يوسف كان ساكت بس، وفجأة..

رفع رأسه بسرعة ناحية الممر المؤدي للغرف،، كلنا عاينّا ليه باستغراب، لكن هو كان مركز في الممر بس، وملامحه اتغيرت للحظة.

أمي قالت ليه: مالك؟

هز رأسه بسرعة وقال: لا،، ولا حاجة.

لكن أنا، حلفت إني لمحّت ظل اتحرك بسرعة آخر الممر واختفى.