رواية عروس الرمال الفصل الخامس 5 بقلم الضوء- ادم -بشير
فضلت أعاين للممر كم ثانية، لكن ما شفت أيّ حاجة بعد الظل المَرَق بسرعة واختفى،
حاولت أقنع نفسي إني يمكن اتوهمت بسبب التركيز الزايد مع يوسف، خصوصاً بعد الحصل في الغرفة، لكن الإحساس الجاني وقتها ما كان إحساس وهم.
كان إحساس زول متأكد إنو في عيون كانت بتراقبو من بعيد.
رجعت نظري ناحية السفرة، لقيت يوسف منزل رأسه وعاين للكباية قدامه، كأنه ما حصل أيّ شي.
لكن من طريقة تنفسه السريعة عرفت إنه شاف الحاجة ذاتها.
أبوي قطع الصمت وقال ليه: مالك سرحان يا ولد؟
يوسف رفع رأسه بسرعة وقال: عادي... بس ما نمت كويس.
أمي قالت بحنان: قلت ليكم الولد مضغوط ساي، خليتوهو عاملين ليه تحقيق.
أبوي ما رد عليها، بس فضل مركز مع يوسف بنظرات هادئة، النظرات البتكون أخطر من الكلام ذاته.
أنا حاولت أتصرف طبيعي، لكن عقلي كان مشغول بالحاجة الشفتها في الممر، وبالشعر الطويل الكان فوق سرير يوسف.
قعدنا نفطر في صمت أغلب الوقت، لحدي ما فجأة يوسف وقف بدون أيّ مقدمات.
قال لينا: أنا حـ أمشي المكتبة شوية.
أبوي قال ليه: مكتبة شنو الماشي ليها دي؟
قال: عندي امتحانات وقربت.
الكلام كان عادي، لكن طريقته ما كانت مريحة، كأنه حافظ الجمله دي من قبل.
شال تلفونو بسرعة ومشى ناحية الباب، لكن قبل ما يطلع، وقف فجأة وعمل حركة غريبة.
التفت وعاين للممر تاني مرة، نفس الممر الكنت شايف فيهو الظل،
وبصوت واطي شديد قال: لا... الليلة لا.
بعدها طلع بسرعة وقفّل الباب وراءه.!
أنا وأبوي اتلفتنا لبعض بنفس اللحظة، بينما أمي قالت باستغراب: الليلة لا شنو؟
لكن ما في زول رد عليها.
لأنه كلنا حسّينا إنو الجملة ما كانت موجهة لينا أصلاً.
بعد ما يوسف طلع، أبوي ختّى كباية الشاي في السفرة وقال لي بصوت جاد: أمشي وراه.
قلت ليه: أراقبو يعني؟
قال: ما مراقبة،، بس عايز أعرف الولد ده ماشي وين كل يوم.
أمي زعلت من كلامه وقالت: يا إبراهيم خليك واثق في ولدك شوية،، لكن أبوي قال بهدوء: لو كنتي شايفة العيون البعاين بيها الليلة دي، كان عرفتي إنو في حاجة غلط.!
ما ناقشت كتير، قمت لبست نعالي وطلعت ورا يوسف بسرعة قبل ما يبعد..الشارع كان هادي، والشمس لسه ما اشتدت، لكن الجو كان كئيب بصورة غريبة، حتى الناس القاعدين قدام البيوت كانوا قليلين.
لمحت يوسف بعيد قدامي، ماشي بسرعة ورافع ياقة قميصه كأنه ما داير زول يشوفو.
مشيت وراه بمسافة عشان ما ينتبه لي، وأنا في بالي ألف سؤال،، يوسف كان كل شوية يلتفت وراه بسرعة، كأنه حاسس إنو في زول بتبعو.؛
مرق من الشارع الرئيسي ودخل أزقة ضيقة نادراً بمشي فيها.
استغربت أكتر، لأنه المكتبة ما في اتجاه الأزقة دي أصلاً.
كل ما أمشي وراه، الإحساس الجواي كان بزيد سوء، خصوصاً لمن لاحظت إنه واقف كل فترة قدام أيّ انعكاس قزاز أو عربية، كأنه بتأكد من حاجة.
وفجأة وقف قدام دكان صغير مقفول، والتفت بسرعة لورا.
أنا اتخلعت ودخلت ورا عمود كهرباء قبل ما يشوفني.
بعد ثواني، واصل مشيه تاني.
بقيت أتبعه تقريباً ربع ساعة، لحدي ما وصل آخر الحلة القديمة، المكان البقرب من البيوت المهجورة.
المنطقة دي الناس بتتجنبها من زمان، خصوصاً بعد حريـ.ـق بيت الحاجة سعاد، أول ما الفكرة دي جات في بالي، حسّيت ببرودة غريبة مشت في أطرافي،، يوسف وقف قدام بيت قديم جداً، بابه متفحم واسود من الدخان.
قلبي دق بقوة، لأنو البيت ده...
كان بيت الحاجة سعاد ذاتها.
يوسف وقف قدام الباب فترة بدون ما يتحرك، كأنه متردد يدخل.
بعدها طلع من جيبه مفتاح صغير.
المشهد ده صدمني زيادة، لأنه كيف عندو مفتاح بيت مهجور؟
فتح الباب ببطء ودخل بسرعة، وقفّلو وراءه.
أنا قربت من البيت بحذر، وريحة الحر.يق القديمة كانت لسه موجودة رغم مرور الزمن،، الشبابيك كلها مقفولة، والحيطة الخارجية مليانة سواد ورماد. وقفت قدام الباب وأنا محتار، أدخل ولا أرجع؟! لكن فضولي غلبني في النهاية.
دفعت الباب بهدوء شديد، ولقيتو مفتوح، دخلت بخطوات بطيئة، والأرض كانت مليانة غبار ورماد قديم، البيت من جوة كان مظلم رغم إنو الصباح، وهادئ بصورة تخوف.
حتى صوت خطواتي كنت سامعو بوضوح، لدرجة حسّيت إني دخيل على المكان.
ناديت بصوت واطي: يوسف؟
لكن ما رد،، مشيت لقدام شوية، ولمحت نور خفيف جايي من الغرفة آخر الممر.
قربت بحذر، وكل ما أقرب، كنت سامع همهمة خفيفة، كأنو في زول بتكلم بصوت واطي.
وقفت جنب الباب وسمعت يوسف بوضوح المرة دي
كان بيقول: أنا جيت زي ما طلبتي،، خلاص سيبيهم في حالهم.! قلبي انقبض أول ما سمعت الجملة.
ما قدرت أمنع نفسي، فدفعت الباب ودخلت بسرعة.
يوسف اتخلع أول ما شافني، وقام واقف بعنف وقال: إنت؟!
لكن أنا ما كنت مركز معاه.
لأنو الغرفة ذاتها خلتني أتجمد مكاني.
الغرفة كانت شبه فاضية،
لكن في نصها بالضبط، كان في كرسي صغير جداً.
كرسي أطفال.
وفوق الكرسي،، كان في فستان أسود مرتب بعناية، كأنو زول لسه حاطو قبل دقائق.
يوسف قرب مني بسرعة وقال بغضب وخوف في نفس الوقت: قلت ليك ما تتبعني!
قلت ليه وأنا ما قادر أشيل عيوني من الفستان: الحاصل شنو يا يوسف؟ دي منو البتتكلم معاها؟
سكت شوية، وبعدها قال بصوت تعبان: هي ما بتخليني.
قلت ليه: منو "هي"؟
وقبل ما يرد
سمعنا صوت خفيف جداً من جهة الممر.
صوت خطوات طفلة.. الخطوات كانت بطيئة، وخفيفة لدرجة أيّ زول ممكن يقول مجرد صوت عادي،
لكن المشكلة إنها كانت بتقرب
شوية شوية.
يوسف رجع لورا ووشه اصفرّ بالكامل،
وهمس لي بصوت مرتجف:
ـ بالله عليك... ما تلتفت.
لكنّي بالفعل...
كنت بديت ألفّ رأسي ناحية الباب.
مُفاجأة 🤣💙
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!