رواية جارنا الثامن الفصل العاشر 10 - بقلم دانيا

رواية جارنا الثامن

الفصل التاسع9

بقلم دانيا

صحيت مخلوعه لقيت الزول واقف فوق راسي قال لي قايله نفسك مفتحه ، انا م كنت عاوز اسألك لكن بعدا شوفي الحايحصل فيكي شنو واول شيء ح تخسريهو عايني حولك واختفى فجأة بقيت ماسكه رقبتي وبحاول ارلقط انفاشي وبعاين حوالي.....م لقيت اي حاجه عاينت لقيت خوله مافي في سريرها ،، اتصدمت قلت معقوله قصدو خوله ؟ بقيت انادي عليها وطلعت برا وشفت الحمام م لقيتها لمن ناس امي صحوا قالوا لي في شنو يابت قلت ليهم وانا برجف من الخوف " خوله مافيشا م لقيتها" .

ابوي قال لي ياداب دا آذان الصبح ح تمشي وين يعني؟ بقينا نفتش م لقينا ليها اثر ،، قلت لو كلمت ناس ابوي يمكن يمشوا يداهموا الزول دا ولاا نلم في خوله ولا فيهم سكتت بس وبقينا نفتش للصباح ناس الحله اقلبيتهم قامو يفتشو وقالوا في بنات كتير اختفوا ليلة امبارح ، ابوي قال لينا مافي زول فيكم يطلع لمن نلقى البنات كيف يعني بناتنا يختفن من بيوتنا ونحن م دريانين ،، امي بس بقت تبكي وتقول عاوزة بتي جيبو لي بتي ، اول ما ناس ابوي طلعوا انا طلعت بعديهم بمسافه اول ما جيت طالعه لقيت مرتضى في وشي ،، قلت ليهو اها الحصل معاك شنو؟ قال لي م لقينا اي حاجه في بيت الراجل دا يا خديجه انتي متأكده إنو عثمان دا ليهو علاقه بالإختفاء دا قلت ليهو ليه م اتأكدا متأكده حتى امبارح جاء وقال لي ح تدفعي التمن والكلام دا بالليل قبل تختفي خوله.

عاين لي بإستغراب وقال لي كيف يجيكم بالليل ؟ انتوا بتخلو بابكم فاتح للغاشي والماشي ؟ قلت ليهو لا لكن عثمان دا م بني ادم زينا انت ليه م ناوي تثق في كلامي ؟ قال لي انتي قربتي تجني شكلك الله يهون ومشى مني.... اتغظت من كلامه قلت ليهو اي حاجه بتحصل للبنات ديل زنبها في رقبتك انت وإذا حصل شيء لأختي خوله م بسامحك ، عاين لي بعين حاره ومشى مني بقيت ابكي قلت اعمل شنو انا وامشي وين ،، قلت بس لقيتها عرفت امشي وين اتجهت طوالي على بيت عمي محمود قبل اصل لمحت الزول الجديد دا "عثمان" كان ماشي مستعجل بإتجأه الغابه قلت إلا امشي وراهو .

مشيت وراهو بس خليت مسافه بينا لمن وصل الغابه ، بعد وصل الغابه وقف عاين يمين شمال وبعدها كمل طريقو وصل لحته شجر زاتو م فيها قلت معقول انا وين حالياً ؟ دا شنو المكان دا اول مره اشوفو.....مشى قدام لسه كان في منطقه زي الجبال مشى لمن اختفى بهناك للجبال ،، مشيت بسرعه حصلتو بعد مشيت ورا الحجار الكبيره ديك لقيت مكان اخضر شديد كله شجر والزول اختفى هناك بقيت واقفه وبتلفت م شايفه اي اثر ليهو مشيت قدام حبه لقيت مكان عباره عن مويه زي البحر وفي نص البحر دا في بقعه خضراء .

قلت يا خديجه انتي متأكده من إنك عايشه في المنطقه دي ؟ فجأة لمحت الزول في نص المويه عايم لمن قطع بهناك وقف على البقعه الخضراء ديك مسافه وبعدها اختفى جواها ،، استغربت كيف الزول دا قطع المويه دي عوم ؟ وانتي يا خديجه بتعرفي تعومي ؟ اصلاً انا طول فترة حياتي هنا دي م حصل جيت المكان دا ولاا بعرف اعوم ، اتزكرت قلت ايواه معناها نقلوا البنات هنا....اتزكرت اختي خوله وحتى هي كانت بتقول لي انا الزول دا م ارتحت ليهو .

قلت انا ح اقطع المويه دي بأي طريقه ، عاوزة انزل في المويه كدا حسيت بيد مسكتني من يدي لمن اتخلعت ،، حسيت قلبي ح يقيف من الخوف عاينت وراي بخلعه لقيتو دا مرتضى ، فكيت منو يدي وقلت ليهو دا انت قلبي كان ح يقيف بسببك جابك هنا شنو؟ قال لي كنت ماشي وراكي بعد مشيت منك فجأة لمحتك ماشه على بيت حاج محمود وبعدين غيرتي طريقك قلت البت دي مجنونه ولشنو؟ ولحقتك ،، قال لي في حاجه ياداب ظهرت لي نحن قبل نطلع من بيت عمي محمود ختينا فيهو كاميرا وياداب اتضح لينا إنو الزول دا فيهو حاجه غلط.

شكراً لأنك مشيتي وراهو م كنا قادرين نعرف هو بختفي وين وبعمل في شنو لو م مشيتك وراهو دي ،، قلت ليهو انا م عملت شيء عشان زول انا عاوزة اطلع اختي عاوزة انط في المويه مسكني قال لي انتي ارجعي انا بتصل للعناصر وح نتصرف بعدا الموضوع عندنا م تخافي ، عاينت ليهو بنظرة غضب قلت ليهو انت من هسي م عارف تتصرف انت قوتك في عناصرك وانا قوتي بالله من متين الشيطان بحاربو بالسلاح ؟ ما في النهايه ح يختفي من قدامكم ويمكن يأزي البنات بسببكم .

هسي زح مني وم تضيع لي زمني خساره اني وريتك ارتني وريت اخوي خالد كان ساعدني اكتر على. الاقل هو حافظ كتاب الله ،، الشيطان ح يخاف منو .

زعل من كلامي وسكت مسافه قال لي خلاص امشي كان تقدري قلت ليهو اصلاً بمش ونزلت في المويه حسيت نفسي نزلت في القاع