رواية جارنا الثامن الفصل الحادي عشر 11 - بقلم دانيا

رواية جارنا الثامن

الفصل العاشر10

بقلم دانيا

نزلت في المويه على امل اني اقطع بهناك بس اول ما نزلت لقيت نفسي بقطس جوا المويه قربت للقاع ،، بقيت م قادرة آخذ نفس بعد صراع طويل مع المويه وانا بحاول انقذ نفسي ، بعداك مرتضى نزل في المويه وساعدني طلعني برا قرب يغمى علي.....قال لي بنبره حاده انتي مجنونه يابت إذا م بتعرفي تعومي منزلك في المويه شنو ؟ هسي كان ممكن تموتي اتخيل لو انا م كنت هنا م كان متي؟ زح مني مشى خطوتين وقبل مني وشبك يدينو في راسو قال لا حوله ولا قوة إلا باالله رفع تلفونو من الأرض ، هو قبل ينزل في المويه طلع تلفونو من جيبو ختاهو في الأرض ونزل في المويه.

قال لي انا ح اتصل لناس عمي محجوب يجو يسوقوكي من هنا انا م ناقصني تموتي لي انتي قدام عيوني ،، قمت على حيلي شلت منو وقلت ليهو لا م تتصل ابوي عندو ضغط ياداب متحمل قصة إختفاء خوله بالعافيه.....وقعدت ابكي قلت ليهو مافي وقت انا لازم اطلع اختي خوله من هناك لو حصل ليها شيء م بسامح نفسي والله ، عليك الله ساعدني اقطع البحر بهناك وبقيت اعاين ليهو نظره ترجي ، دنقر مني وقال لي لا م صاح توصلي لهناك المكان داك خطر عليكي انتظري هسي العناصر بجو وإن شاء الله م بحصل إلا كل خير ، اثناء ما هو بتكلم معاي اتصل ليهو زميلو حسن عاين للتلفون قبل يرد قال لي م قلت ليكي هانت اكيد العناصر بكونو قربو يوصلو هنا قلت ليهو طيب رد.

رد على التلفون بلهفه بس فجأة ملامحو اتغيرت وبقى يكورك ويجوط في التلفون وآخر شيء قال ، كلم المسؤؤل قول ليهو مرتضى قال لو براهو بمشي الجزيره دي وبالنسبه لموضوع الفصل انا بستقيل هو مافي داعي يتعب نفسه ويفصلني ، حسن قال ليهو تمام يا زول انا قريب عليك انا زاتي اعترضت على كلام المسؤل دا وطلعت منو هسي جاي عليك ، مرتضى قال ليهو تمام وقفل الخط ،، انا هنا مستغربه ومنتظراه يقول لي الحاصل شنو ، عاين لي وقال لي للأسف المسؤؤل رفض للعناصر إنو يجو وقال دي كلها إشاعات واخبار غير مؤكده وضياع وقت هم م فاضيين للإشاعات عاوزين دليل ثابت عشان يتحركو ، وقال لو انا م رجعت خلال ربع ساعه اعتبر نفسي مفصول واي زول بجي وراي يعتبر نفسه مفصول.

واقفين بنتكلم كدا فجأة سمعنا صوت عالي جاي من إتجاه الجزيره ، عاينت ليهو بخلعه وعاينت للجزيره قال لي انتي خليكي انتظري هنا انا بمشي اشوف الحاصل شنو ؟ انتي خليكي هنا حسن هسي بجي ،، وقبل ارد ليهو نزل في المويه م شفتو غير وصل لنص المويه خلاني واقفه م فاهمه شيء....بقيت افكر انزل وراهو ول اعمل شنو؟ وهو خلاص بعد شديد وصل قريب للجزيره ولسه كانت الأصوات طالعه قلت لا يا خديجه لازم تنزلي وراهو تقعدي براكي هنا لشنو واصلاً الدنيا قربت تعتم والظلام يسد المكان.

جيت عاوزة تنزل في المويه في حاجه ثبتتني لمن اتخلعته وقلبي تقول يطلع من مكانه شدة ما خايفه عاينت وراي براحه وقلت حسبي الله ونعم الوكيل اول مادرت وشي لورا ،، لقيت بنت يعني بتكون اكبر مني بسنه او سنتين لكن جميله شديد تحسها ملاك م بشر.... زحيت منها سريع من شدة الخلعه قلت ليها انتي منو ودايره مني شنو؟ قالت لي عاوزة اساعدك استغربت قلت ليها انتي تساعديني ؟ بنبره فيها نوع من الدهشه والإستغراب قلت ليها انتي بتعرفيني من وين اصلا ول عارفه مشكلتي شنو عشان تساعديني فيها؟.

مدت لي يدها بكل ترحيب وملامح وجهها البشوشه ابتسمت وقالت لي انا اسمي كنوز جيت الغابه عشان اجمع حطب ،، سمعت صوت صريخ ولمحتك واقفه هنا....من كلامها حسيت بإنو في حاجه غلط

الفصل الحادي عشر من هنا