رواية جارنا الثامن الفصل الثاني 2 - بقلم دانيا

رواية جارنا الثامن

الفصل الثاني2

بقلم دانيا

الصباح جهزنا للمدرسه وقعدنا مع ناس امي نشرب الشاي ،، خنساء قالت لي انتي انا سامعاكي امبارح بتتكلمي مع خوله عن بيت عمي محمود قلتي في زول جاء سكن فيهو.....عمي محمود م عندو اولاد واهل القريه م برضو زول غريب يحي يسكن بينهم وخاصة إذا كان من ناس المدينه مستحيل يقبلوا عشان كدا رأيك شنو ياامي تتصلي ل خلود وتسأليها ؟ قبل امي ترد انا قاطعت حديثهم وقلت ليهم لا انا بعد اجي من المدرسه عاوزة امشي ليهم منها بسلم عليهم ومنها بتسلى شوية مع اولادها وبسألها عن الحاصل.

خنساء قالت لي خلاص تمام انتظريني بعد اجي من الجامعه نمشي مع بعض ،، عاينت ليها نظرة زول مغيوظ قلت ليها انا بعد اجي من المدرسه طوالي بمشي ح ابيت هناك....امي قالت لي اجي يا بتي تبيتي لشنو انتي بتجي الظهر لحد الساعه خمسه دا كله زمن م بكفيك إلا تبيتي؟ قلت ليها ياامي كدا كدا بكره يوم الجمعه عشان كدا قلت ابيت معاهم ، قالت لي انتي سمعتي كلامك ابوكي وعمك موسى قبل كم يوم؟ قلت ليها لا قالوا شنو؟ قالت لي عمك موسى قال داير عروس لولدو صهيب لكن م حدد داير منو فيكن لكن انتي طالما اتجاههم داك عاجبك للدرجه دي احسن يدوكي ليهو منها بتكوني مع اختك خلود في نفس البيت .

من قالت كلامها دا حسيت الشاي زاتو خنقني وقف في حلقي ،، قلت ليها انا ياامي؟ والله اموت وم اتزوج صهيب دا انتي م شايفاهو عامل كيف مكشر وشو الزمن كله صاح إبراهيم راجل اختي خلود اخوهو لكن م بشبهو نهائي واحد بشوش والتاني عصبي....وبعدين ياامي انتي عندك خنساء اكبر مني اديها ليهو ، عاينت ل خنساء لقيتها مدنقره راسها وميته من الخجل ،، تاني قلت ليها او ادوهو خوله صاح هي اصغر مني لكن بالنسبه ليكم اعقل مني مش دائماً بتقولوا خديجه دي م بجي من وراها غير وجع الراس ، يلا ياخوله قومي اتأخرنا ، طلعنا امي بقت تقول لي هيي يابت مالك هايجه بنهظر معاكي اصلاً هم اتكلمو في خنساء.

بعد الظهر جينا من المدرسه لقيت امي قاعده تعمل في الجبنه ،، قلت ليها الليله مالكم اتأخرتو في شراب الجبنه م من عاداتكم....قالت لي اسكتي جونا ضيوف ، الزول القولتيهو جاء مع عمك موسى وقاعدين في الصالون مع ابوكي وخالد من قالت لي كدا حسيت قلبي عمل شح قلت دا جابو هنا شنو؟ واقفين بنتكلم مع امي في المطبخ قالت ل خوله امشي نادي خالد يجي يشيل الجبنه ،، نطيت قلت ليها انا بناديهو...امي عاينت لي بعين حاره وقالت ل خوله امشي ناديهو ، خوله مشت انا طوالي طلعت من المطبخ ماشه على الغرفه .

جيت ماشه شفت باب الحوش فاتح قلت يعني نحن م قفلنا الباب خليني امشي اقفلوا ،، مشيت وقفت جنب الباب عاوزة اقفلو فجأة لقيت الزول في وشي....لمن اتخلعت كان بتكلم بتلفون برا قفل الخط وجاء خاشي لقاني في وشو عاوزة اقفل الباب ،، من شفتو اتربكت وم عرفت اعمل شنو سمعت صوت امي قاعده تناديني طوالي مشيت بسرعه جوا ؛؛ جيت قلت ليها نعم عاينت لي وقالت لي نعم شنو؟ قلت ليها مش هسي كنتي بتناديني ؟! قالت لي لا اناديكي لشنو انتي لسه حايمه بهدوم المدرسه ، قلت ليها طيب ومشيت منها .

قلت والله انا سمعتها لكن هي قالت م نادتني سبحان الله ،، دخلت الغرفه وطلعت لي غيار مشيت استحميت وجيت صليت الظهر وقلت اجهز واطلع امشي بيت خلود....واقفه في المرايا كدا حسيت بخيال في الشباك عاكس على المرايا ، اتلفتت بسرعه م لقيت اي شيء قلت يمكن طير جاء طاير بجنب الشباك او كدا ، جهزت وطلعت لقيت الضيوف فاتو قلت لأمي جوا لشنو هم وقال هو منو وجاي من وين ؟ قالت لي دا ود اخو حاج محمود جاء من المدينه قعد في بيت عمو وراجع بعد فتره.

قلت ليها جاء براهو ؟ قالت لي شكلوا كدا ، قلت ليها يلا انا ماشه ، قالت لي سلمي ليهم طلعت مشيت كانت الدنيا عصر م لقيت خلود لقيت بناتها وولدها بس صغار هم اكبر واحد فيهم بت عمرها 8 سنه قلت ليهم خلود وعمتي سحر وين ؟ قالوا لي مشو بيت ناس حاجه كلتوم ، قعدت مع الأولاد حبه الساعه جات 4 قمت طلعت السطوح وقفت بالضبط على اتجاه بيت الجار الجديد ،، عاينت جوا م شايفه اي شيء قلت الزول دا مشى وين انا نهائي م ارتحت ليهو قمت ماشه عاوزة انزل تحت سمعت لي اصوات جايه من جوا بيت عمي محمود ، وقفت مستغربه قلت مش قالوا ساكن براهو؟ دي شنو الأصوات دي.

نزلت تحت لأني من فوق م سامعه كويس ، لميت اولاد اختي سقتهم وطلعت بيهم برا قدام بيت عمي محمود في شجره كبيره قلت ليهم ورح نلعب هناك....عندهم كورة بقوا يلعبو بيها وانا بقيت واقفه جنب الحيطه عشان اقدر اسمع بعدا م سمعت شيء ،، جاني ود اختي قال لي خالتي خديجه الكورة وقعت جوا بيت عمي محمود ،، عاينت ليهو قلت ليهو ياالله منكم هسي دي يجيبوها كيف؟ اتزكرت الأصوات الجايه من جوا قلت دي فرصه ندق ليهو الباب عشان يدينا الكورة ومنها يمكن اعرف في منو غيرو جوا.

قلت ليهم تعالوا اقيفوا جنب الباب خلينا ندق الباب للزول دا عشان يطلع لينا الكورة ،، مسكت الباب بيدي براهو فتح قبل اضربو....استغربت قلت كيف مخلي الباب فاتح ، ود اختي الصغير شاف الكورة طوالي جرى جوا قال لينا لقيت الكورة ، دخلت وراهو قلت ليهو يا ولد عيب بتدخل من غير إذن شال الكورة وعاوزين نطلع الغرفه المقابله الباب كانت فاتحه والأصوات جايه من جوا البيت ،، ود اختي شال الكورة وجرى برا انا مشيت على الغرفه ديك .

وقفت في الباب م شايفه اي زول كان في تربيزه في نهاية الغرفه ،، فيها جهاز لابتوب وكان فاتح كأنو هسي كان في زول شغال فيهو جيت قريب منو في حاجه لفتت إنتباهي لمن جسمي رجف من الخوف كان في اللابتوب في صوره مقسمه لعدة اجزاء وكل جزء كان عبارة عن صورة لجزء من المنطقه....وقفت مخلوعه قلت الزول دا مصور القريه ليه؟ فجأه سمعت صوت اقدام جايه على الغرفه م عرفت اعمل شنو طلعت جريت بورا للغرفه وقفت في ممر عباره عن زقاق بودي لباب السلم ،، قلت لو وقفت في مكاني دا لو جاء على الشباك ح يشوفني ، طلعت نعليني شلتهم في يدي وجريت على باب السلم .

فتحت الباب براحه ودخلت جوا ،، وقفت تحت السلم اثناء ما انا واقفه سمعت لي صوت همهمات م عرفتها جايه من وين بقيت