رواية جارنا الثامن الفصل الثامن 8 - بقلم دانيا

رواية جارنا الثامن

الفصل الثامن8

بقلم دانيا

اثناء ما بتكلم معاها عمي احمد جاء داخل " ابوها " شافانا واقفين ومتوترين سألنا قال لينا مالكم هي عاوزة تحكي ليهو مسكت يدها عاينت لي هزيت ليها راسي بمعنى لا ،، فهمت وقالت ليهو مافي حاجه بس خديجه كانت طالعه وانا عاوزة اقدمها....قلت ليهو ااي صاح يلا ياعمي فتك بعافيه ، قال لي سلمي لناس البيت ،، اول ما طلعنا جنب الباب لقينا مرتضى جاي خاشي وقف سلم لينا وعاوز يدخل مآب قالت ليهو عاوزنك في موضوع.

طوالي رجع خطوتين ووقف قدامنا قال لينا إن شاء الله خير اتفضلوا ، طبعاً اخوها طيوب ومسكين م زي اخوي خالد كان عادي ممكن يهرشنا يقول لينا دايرين شنو.....زحينا من الباب شوية وقفلتو عشان عمي احمد م يسمع الراجل دا عندو ضغط ،، وقفنا جنب شجرتهم وحكيت ليهو كل شيء ، هو زاتو اتصدم بس قال لينا خلاص انا بسوق الزملاء وبمشي انتوا م تدخلو انتوا بنات.

قلت ليهو تمام هي عاينت لي قالت لي ادعي الله بكون الحق معاكي عشان م تخسري صديقة عمرك ، قالت الكلام دا بنبره حاده وهي بتعاين لي....طوالي مرتضى قال ليها دا كلام شنو يا مآب معقولة يجي منك انتي....انتي بتعرفي الزول دا عرفة متين يابت مافي حاجه بتخليكي تخسري صديقتك فاهمه وهسي خشي جوا ، عاينت لي بزعل وخشت جوا وقفلت الباب حتى م قالت لي مع السلامه.

مرتضى عاين لي كدا وقال لي م تشيلي هم الموضوع عندي ومحلول بإذن الله ،، قلت ليهو ليلة إكتمال القمر دي متين ؟ قال لي بعد تلاته يوم لشنو؟ قلت ليهو سمعت إنهم ح يطلعوا البنات بالحدود الليبيه في ليلة إكتمال القمر ،، عاين لي بخلعه قال لي والله دا كله لو حصل يبقى معناها نحن في ورطه كبيره لأزم نتحرك بسرعه ، اثناء ما بتكلم معاي تلفونو اتصل قال ليهم اها وصلتو خلاص تمام جاي عليكم ، قال لي عن إذنك الجماعه جو لازم امشي عليهم عشان نمشي بيت عمي محمود.

مشى دقو الباب قريب نص ساعه ما فتح ليهم ، قالوا يمكن طلع قربو يتحركو يمشو الباب فتح ... من لقاهم في وشو عمل نفسه متفأجئ قال ليهم خير إن شاء الله ، لمن شاف مرتضى سلم عليهو سلام عرفه لأنو قريباً ح يصبح جزء من عائلتهم مرتضى قال ليهو جيناك زياره وحبينا نعمل ليك مفآجأة ، قال ليهم بصوت متردد حلوه المفآجأة بس ممكن نمشي القهوة القريبه هنا دي لأنو البيت م مرتب عارفين انتوا حال العذابه.

مرتضى طوالي دخل قال ليهو ولا يهمك عادي ياخ ،، والباقيين دخلو وراهو بقى واقف في الباب قال ليهم اتفضلوا على اول غرفه على يمينكم ، دخلو قعدوا جاء جاب ليهم مويه وعمل ليهم جبنه وعمل غداء....مرتضى قال ليهو ماشاء الله عليك انت متين لحقت تجهز دا كله بالسرعه دي؟! ابتسم ابتسامه خفيفه ودار وشو قال ليهو كان عندي الأكل جاهز في التلاجه ، اكلو وبعدها مرتضى قال ليهم ماشي الحمام ، اول ما اختفى من انظارهم بقى يفتش في الغرفه جاء للغرفه دي لقى بابها زي ماهو فتحها لقى فيها دولاب ملابس وسرير بس وكل شيء طبيعي ومافي اصوات طالعه ، مشى بإتجاه السلم م لقى الباب القلتو ليهو ، قال ااخ منك يا خديجه مافي اي حاجه من القلتيهو طلعت صاح طيب ليه عملتي كدا؟ قام ماشي لقى الزول في وشو قال ليهو عاوز حاجه ،، مرتضى لمن اتخلع عاين ليهو بنظره غريبه وقال ليهو لالا مافي شيء.

بالليل وانا نايمه صحيت فجأة لمحت لي خيال واقف فوق راسي ،، عاينت بخلعه لقيتو دا نفس الزول مسكني من رقبتي بكل قوة وقال لي بصوت كله غضب " مفكره نفسك مفتحه "