تحميل رواية «حكاية سمر 😍» PDF

# حكاية_سمر..

،،،،،،،،،،بقلم الكاتبه زينب ماجد،،،،،،،،،،،

البارت_11

سمر.. دا ابجي بحظن ماما ما احس الا رجل دفرتني للكاع.. التفتت شفته بابا..

كمت ازحف ليوره من الخوف.. واكف بملابسه العسكريه والغظب يتطاير من عيونه جر مسدسه وسدده بوجهي..

لبدت وره ماما وهوه يصيح وخري منها اغسل عاري بدمها.. وامي صارت كباله وتجر بيه

وتكله.. ابو احمد استهدي بالرحمن.. البنيه ما غلطت وهوه يصيح وخرررري ..كالتله امي دخيلك فدوه والله جايه خطار ما مطلكه..

كاللها طلعيها من بيتي كالتله اي هسه هسه بس اهدء.. كاللها شهدء ولج هاي نزلت راسي..

ولج هاي طينت شيباتي.. تالي عمري خليل يسمعني حجي سم من وراها.. ولج تاليتهم همه مسوين عليه الفضل لان ساترين بنتي..

ولج خليني اذبحها واخلص من عارها وخررري.. امي لزمته بثنين اديها.. واني ابجي.. واخواني الاصغار ملتمين عليه..

كتله بابا والله مغلطت ويه احد والله.. صرخ ما اريد اسمع صوتج طلعي برا.. كتله بابا ما اريدهم حرام عليكم .. موتوني وخلصوني..

كلت هيج.. وما احس الا اخويه احمد.. فوك راسي وجرني من شعري.. كال ساقطه حسابج وياي..

لزمني دفرات على ايدي وعلى جسمي متت من الوجع واصرخ.. وامي تجر بيه.. ويلزمني ابويه بوكسات..

وتاخذني من ابويه.. التمو عليه ثنينهم.. امي فقدت ضلت تصرخ بكل قوتها وتجر بيه.. لحد ما دخلتني بالغرفه وقفلت عليه..

وبقت تبجي وتحجي حرام عليكم بنتي ما غلطت الله لا ينطيكم انشالله بجاه النبي يطلع حوبتها بيكم.. يا ضلااااااااااام..

كاللها احمد طلعيها طلعيها خل اخلص منها طلعيها.. كالته امشي وخر مني انعل ابوك لابو اهلك..

بنتي والله ما انطيها. كاللها ابوي ما اريدها هنا.. اذا طلكوها اذبحها.. كالتله ولكم والله اجت خطار ما اطلكت الله ااااااااااااااكبر على راسكم..

بقو يتصايحون امي وابويه واحمد.. واني واكعه بالكاع والغرفه ضلمه و بس ابجي.. والم خدر جسمي من كل مكان

بقيت ابجي ساعات وكل ساع احمد يضرب الباب ويكلها طلعيها ما اريدها بالبيت..

لحد بليل كولش.. هدء البيت.. وبقيت بين الغافيه وبين اون من الالم.. دخلت امي.. كالت اكعدي..

كتلها ماما ايدي موتتني من الوجع.. كالت عوفيني من الوجع هسه.. كوليلي جيتج شنو.. كتلها يمه عادل ميريدني..

كالت ارجعي الهم.. احمد مخبل ما يرضا تطلكين يذبحوج والله.. كتلها وين اروح.. كالت اتحملي عدهم شتسوين..

الله موجود يشوف ويسمع مايعوفج وحدج.. وانه ناخيه ابو الفضل العباس اليوكفلج ويكفلج وما يخلي احد يجيسج..

كالت منو جابج.. كتلها بكر.. كالت خابري خل يجيج كتلها ماما ما ارريد ارجعلهم خليني هنا الله يخليج.. كالت وج يمه والله يذبحوج ارجعي .

وكفتهم هسه.. منو كال باجر اكدرلهم.. وثنينهم صافين عليج ابوج واخوج.. متكدريلهم..

راح جابت جنطتي وخلتها يمي.. وكالت خابري.. وعافتني وطلعت.. صدوك بجيت بحرڪه احس روحي يتيمه وما الي احد..

رغم وجود اهلي احس بوحده.. مديت ايدي بصعوبه طلعت موبايلي من جنطتي.. لكيت بكر مخابر 13 مره.. زاد البجي عندي..

كمت ابجي بصوت.. اتصل واني ابجي.. كتمت البجي ورديت.. الووو.. كال الو ها سمر كون احد اذاج..

كال هيج انفجرت ابجي بهيستريا.. ضل يصيح شبيج سمر بس فهميني ضربوج بس احجي يمعوده خرب لا تكفريني بس لتبجين وكوليلي..

ما حجيت بس بقيت ابجي. كال دقايق واني يمج ..سد الخط.. دنكت بس ابجي وين صرت ليش هيج والله ما سويت شي..

عقابي اكبر من ذنبي والله.. حرام عليكم تعبت والله تعبت.. مستمره بالبجي واعاتب ويه نفسي.. وسمعت الباب اندكت.. سمعت صوت بكر ويه احمد.. دخل..

كاله وينها.. احمد.. كاله بكر اذا عادل ميريدها احنه نتصرف.. كاله تخسي انته وعادل اكسر روسكم والله.. وينهاااا..

كالها ذيج الكلبه بالغرفه اخذها واطلع وما نريد نشوف وجها.. ولو شفتها مره لخ والله اذبحها.. كاله اي مو زلمه حظرتك..

مد ايدك عليها كبالي وشوف شسوي بيك.. وكف احمد كاله شتسوي.. جره ابويه.. وكاله احمد اتركه خل ياخذها ونخلص

ودفع الباب بكر.. ودخل.. شغل الضوه.. اني متمدده والدموع ماليه وجهي. والالم ذابحني..

ركضلي.. اخذني بين اديه.. وكال كتلج يا سمر لا ترحين اوووف منج .. شالني خله ايدي على كتفه.. وبقى يمشي بيه..

وكف ابوي.. وكاله شوف بكر.. لو خذتها مالها رجعه هنا.. واذا عادل مايريدها.. تنطونياها اني اتصرف وياها..

كاله طيرو انتو وعادل .. ومشى.. صعدني بالسياره وصلني للبيت.. دخلنا البيت هادي كلها نايمه..

دخلني لغرفته.. كصتي جامد الدم بيها.. كام جاب قطن وديتول ويعقملي جروحي.. بقيت اباوع بوجها وهوه يعقمني..

نزلت دموعي واني اباوعله.. كال كافي لا تبجين والله تأذيني دموعج.. كتله ليش بس انته مهتملي..

كال لج والله انتي روحي شتحجين.. واخذ راسي لحضنه.. كتله بكر ما الي غيرك يحميني..

بقى يمسح على راسي.. انتي بس ارتاحي وهذا هو ما اريد اكثر.. بس لتبجين كافي.. والله ميلوكلج الدمع..

شال راسي من حظنه ولزمني بثنين اديه.. ويكولي والله اعيشج اسعد وحده بس اتقوي وسانديني.. ولا تسمحين واحد يضعفج..

هزيت راسي ودموعي تجري.. حظني بثنين اديه بقوه..

حظن حرام صح.. بس هنا فقط احس الراحه الوحيده من هلعالم.. فقط هنا احس بأمان.. ومو ممكن اتأذه..

فقط هنا اكدر انام واني متأكده.. محد يلزمني ولا يدفرني ولا احد يضربني.. اعرف هلمكان هوه ملاذي الأمن..

بقيت سمع دكات كلبه وهوه نفسه يصعد وينزل.. واني خدرانه بأوجاعي.. لحد ما غفيت.. حسيته نزلني ونومني علسرير.. وطلع هوه..

بقيت نايمه مابيه اتحرك بندت.. للصبح.. كعدت.. باوعت الساعه 6 كوه كمت من الفراش.. طلعت لكيت بكر نايم علتخم بالصاله..

ما اعرف بمجرد ما صفنت بوجهه اجتني ابتسامه عفويه.. مشيت بالبيت.. فتحت غرفة عادل.. لكيت الموبايل على اذنه ونايم..

اخذت الموبايل.. باوعت الرقم قلبي.. ولسه الخط مفتوح.. كحيت احمم.. جان تكول ها حبي اسم الله..

كتلها منو انتي.. كالت وانتي منو.. كتلها اني مرت عادل.. جان تضحك وتكول يااااا قصدج خدامته.. كتلها خدمة الزوج شرف..

لكن اللي تخابر رجال متزوج للصبح .. شتسميها.. كالت اشرف منج.. ههه لاعبه شاطي باطي وتجي تبيع شرف براسي..

كتلها تدرين انتي تلوكين العادل يا سبحان الله الطيور على اشكالها تقع.. نفس الزمره.. وقفلت الخط..

باوعته نايم ولا حاس بالدنيا.. وريحة الشرب مخيسه الغرفه.. عفت الجهاز.. وطلعت.. جان تطلع عمتي بوجهي..

كالت شجابج.. كتلها بكر.. كالت وشعدج اجيتي.. ما رديت.. غمتني ومشت.. استغفر الله واتوب اليه..

مشت جان تكول.. والله حلو.. نايمه بغرفة بكر.. وشامره الولد هنا متكسر علتخم.. بكر صحى على كلامها..

كاللها يمه وانتي شكو.. يحجي وكوه مفتح عينه.. كالتله يطبك مرض.. ومشت.. هو يباوعلي بتك عين كوه صاحي..

ابتسمت.. ابتسم.. ومد جسمه وكال عفيه هيج اريدج.. ابتسامتج متفارك غمازاتج ضحكت ههههه

اجه يمي.. كال ضوجتج امي.. هزيت راسي وكتله ابدا.. ضربني على خدي خفيف ومشا يبتسم..

صاحت امه.. تعاي سويلنه ريوووك يلمسعده.. رحت وكفت اسوي ريوك بصعوبه.. بتك ايد اشتغل كوه.. اجه عمو خليل كال هاي شجابها..

كالتله عمتي بكر اكو غيره.. دكعد اكعد خل احجي وياك.. كاللها شكو..

كالتله اليوم عيال رنا راح يجون يتفقون ويانه علعرس.. كالها يا الله بيها الخير..

كالتله يا خير وابنك قافل مايطلع الربع وينطينياه.. كاللها اني اخذ منه.. اجه بكر طب كال صباح الخير كاله ابوه الله جابك..

كاله خير.. كاله رايد فلوس.. هز راسه بكر وكاله انشالله.. كاله مو انشالله ..عرس اختك راح يتفقون عليه اليوم ونريد نجهزها..

كالها عاد تستاهل رنا.. كالتله امك.. انته شبيك متخبل هليام اختك شلون متستاهل.. كاللها واني شكلت كلت تستاهل.. اني من يمي ابتسمت..

هوه باوعلي وابتسم.. خليت الريوك كدامهم.. والبيض وطماطه كبال بكر.. اكلته المفضله هذي ..

كال كعدي.. كتله اي هسه.. رحت جبت الجاي واجيت كعدت.. اجت رنا كعدت.. كامو يتريكون..

كال عمو خليل رجلج ما يكعد.. اني مدنكه اكل.. كال هيووو ..رفعت راسي اني.. كال لا امي.. رجلج ليش ممكعدته..

كتله ما اعرف.. خاف ميكعد.. كال بكر.. هسه شلك بعادل يابه.. شنو يوميه يكعد من الصبح.. ردت اكوم كال بكر اكعد هوه التنبل هذا ماكو منه فايده

غير شرب ونوم واستهتار.. كاله عمو من ايدها.. هيه المره التخلي الرجال يستعدل ويصحه علزمانه بس هاي مابيها خير..

كاله الخير عايفته لابنك يابه.. كمل ريوك مابينه حيل مشاكل من وره هلسكط.. كالتله امه انته شبيك ويه اخوتك تكول عدوانك..

كاللها اهوووو راح يدكون اليتيمه براسي.. اكوم اشرفلي.. كالتله تعال تعال لا تشرد.. نطيني فلوس..

كاللها ما عندي.. عمو خليل.. كاله شنو ما عندك تعال هنا.. عرس اختك قرب ونريد فلوس منين اجيب اجدي خوما اجدي..

كاله ما اعرف ما عندي.. كل البجيبي شمرته علمشروع الجديد.. امه باوعتلي بحقد.. ودارتله.. كالتله بكر تنطي لو ما يصير خير..

كاللها ما انطي.. واريد اشوف شيصير.. كالتله زين.. طلع بكر.. اجت عليه.. كالت وين ذهبج.. كتلها ما اعرف بالغرفه..

راحت للغرفه.. كعد عادل كاللها شكو يمه.. كالتله وين ذهب سمر.. كاللها شتردين بيه.. كالتله اريده..

كاللها بعته.. كالتله شلوووون.. كاللها اي ما عندي مصرف.. وبعته صار اسبوع.. . اني اباوع يربي اضحك لو اكول هلو ..استغفر الله هزيت راسي ومشيت..

عفتها تصيح وتغلط عليه وعلى بكر.. ورحت كملت شغلي وهمه مخبوصين ساعه تفكر بالمسواك.. ساعه بالفلوس اللي تريدها لعرس رنا..

لشوي دخل بكر وجايب مسواك اشكال الوان.. دخل من باب المطبخ وهمه جوه ميدرون بعدهم يدردمون.. هز ايده وغمز واشر عليهم..

كتله بعدهم ديطابخون علنار.. ضحك وغمز وكال اي ادفي عليهم لعد.. ضحكت وكتله هوه هم هيج.. صاح يمممممه..

كالتله وغمه.. كاللها شكرا.. هاي المسواك جبته.. والغدا مال الناس لا اطبخوه.. اني وصيت على اكل من برا..

كالتله فلوس الاكل من برا انطينياهن.. ما اريد احنه نطبخ.. جان يأشر عليه.. ويكلها قصدج هاي التطبخ وانتي وبنتج كعدن وسولفن..

كاللها تشوفيها بنص ايد ودتشتغل.. كومن وياها.. كالتله الله ااااااااااااااكبر انته ما هامك غير سمر..

رجلها ما مهتملها بكدك.. حرك حاجبه بتكبر وطلع.. ضلت تصيح ولك بكر يااا شلون بيه هذا بكرررر تعال هنا..

ولا اهتم طلع ولا دار وجهه والله دوه وياهم.. ههههه.. كالت مرتاحه ست سمر على هلوضعيه موو.. كتلها اني شعليه عمه..

دتشوفيني كدامج لا حول ولا قوه ..رجلي وبايعني وميريدني شبيدي.. كالت ههو ههو تمسكني بت رجاء تمسكني..

لشوي اجو عيال رنا.. اني مطلعت بقيت بالمطبخ بصعوبه اشتغل بتك ايد… همزين اليسره مكسوره مو اليمنه جان شبعت ضيم..

دا اشتغل طب عادل.. كال شوكت اجيتي كتله البارحه.. ضحك.. واشر على وجهي.. كال لازم استلموج..

كتله تفرح.. باوعلي كال لا والله بس معليه بيج.. اني ما رايدج سمر افتهمي.. كتله واني طالبه منك شي ..

كال تردين تريحيني واريحج.. كتله اي.. كال قنعي بكر ينطيني الفلوس باسرع وقت اتزوج والله بعد لا اجي يمج ولا امسج ولا الي شغل بيج..

كتله واني شعندي ويه بكر واقنعه ليش تحسسوني اني الي سلطه على بكر.. اخوك وتعرفه مياخذ من احد..

كال مو اخوي واعرفه ما يردلج طلب..

ردت اشوف عادل عنده خبر بمشاعر بكر لو هيج يحجي.. كتله وليش بكر ميردلي طلب شعنده وياي..

كال بكر صح جامد ومتكبر بس كلبه طيب ما يقبل بالضلم.. وانتي يحسج مظلومه ومتعاطف وياج.. فاي شي طلبيه ينفذه..

بكلبي كلت كرت عيني على هيج رجال.. اخوه شاهر سيفه ويقاتل بحبي علناً ..وهذا ولا حاس بشي يسميها تعاطف خرب بحظي على هيج. قسمه ما بيها خير

كال هاا.. تقنعين بكر بسالفه.. اتقربت لعادل.. كتله تكرهني.. كال لا.. ووعد لو قنعتي بكر بزواجي..

ارجع وياج عادل القديم.. واحسبج اختي من جديد.. وانسى كولشي صار بينه.. صفنت بعيونه كتله اختك..

كال اي.. ما عندي غير هلمشاعر انطيجياها.. ضحكت باستهزاء.. وهزيت راسي.. كتله انشالله..

دخل بكر.. كال هاا.. دار عادل وجهه الي وكال ماكو شي.. كتله لا اكو شي.. وكف عادل..

بكر دار وجها.. كال شكو.. كتله يكول عادل قنعي بكر يزوجني واني ارجع اعتبرج اختي وانسى كولشي بيناتنا..

ابتسم بكر.. وكاله موافق بشرط.. عادل كاله وهوه كاله سمر تشيل ايدك عنها.. يعني تحت وصايتي ما الك اي سلطه عليها..

عادل سوه حركه بحلكه وكال ميهمني المهم اتزوج.. كاله ابشر.. باقرب وقت انشالله.. اجت امه كالتله

يعني عندك فلوس تزوج عادل بس ما عندك تنطيني اجهز اختك.. كال اوووو اجت امي وهلاهيلها اطفر احسن..

ضحكنه اني وعادل ..وبكر شرد للشارع وعمتي تصيح… يتبع

🌺🌺🌺🌺🌺

# حكاية_سمر..

،،،،،،،،،،بقلم الكاتبه زينب ماجد،،،،،،،،،،،

البارت_12

سمر.. بقيت اعزل المسواك.. وعمتي تدخل تحجي تطلع تحجي.. انوب اجت رنا كالت عمتي تسأل عليج تكول جنتكم الجديده وين.

كتلها هسه اروح اسلم.. دا امشي لزمتني من ايدي كالت باعيلي زين.. ديربالج دكولين ايدج شبيها..

يسألوج كوليلهم اتزحلكت وانكسرت ايدي.. كتلها والورم بوجهي والجروح البكصتي..

كالت كوليلهم اتزحلكت من الدرج شيرادلهاا.. لو بس تحبين تشهرين بينه. واطلعين مسكينه.. كتلها ماشي دعوفي ايدي.. جريت ايدي ورحت سلمت..

كلهن كامن يسلمن.. دارن وجهن لعمتي وكاللها يا خيه شمبقين بالبنيه مكسريها تكسر.. دا احجي عمتي كالت ياا هيه ما تكعد راحه.

تجي منا وتروح منا عمه اثبتيلج بمكان ماكو.. لحد ما تزحلكت ووكعت من الدرج وكوه تلاحكنالها..

وهاي صارلها 3 ايام.. المي احنه نشربهيا.. فتحت عيني هيج 😨.. ولله خوش طلع حتى المي يجيبولياه..

كالت عمة رنا وين جنتي صارلنه كومه كاعدين.. سئلنه عليج كنالهم جنتكم وين.. ردت اكولها جنت بالمطبخ..

جان رنا.. تكولها يا عيني متكوم من الفراش ابد نخاف عليها.. كالتلهم عمتها والله عمي مدلله..

جان تكولها اي لعد شلون.. هيه الجنه التدخل البيتنه تصير وحده من عدنه.. ما نعتبرها جنه نعتبرها بتنه واخت اليه..

اباوع للغرفه الحمدلله ما تفلشت من الجذب.. معقوله اني اختها طلعت والله عمي سمر مدلله..

بقيت بس اباوع يسألوني وهمه يجاوبون ابدالي .. انوب اجه بكر.. طب سلم وصاح يمه الاكل جبته كالتله اي..

ردت اكوم ويه عمتي للمطبخ.. جان رنا تلزمني وتكول لج سموره حبيبتي اكوعدي.. انتي منا ايدج تأذيج وين رايحه..

بقيت فاتحه حلكي.. شلون تمثل.. انوب سموره واكوعدي مو اكعدي طكت الثقافه فجأه خرب بهبل

كعدت.. جان شويه ويصيح عليه بكر.. اجيت يمه.. كال ها.. كتله هاا.. كال شو كاعده يمهم.. كتله اسكت غير طلعت مدلله..

كال شنو.. اجت عمتي.. وهو يكول شنو مدلله.. لزمت ايده وضكيت عليها.. اوحيتله انو بعدين.. سكت هوه فهم..

كاللها يمه هاي جبت غداهم كامل حتى الطرشي.. بس سوو زلاطه.. كالت اي سمر كعدي سوي الزلاطه..

كتلها عمه ايد وحده عندي ما اكدر والله.. كالت هسه ايد وحده صارت.. الصبح بيمن ثرمتي الطماطه للبيض يعياره..كتلها بالمثرامه والله..

ضرب على ضهري بكر وغمزلي اطلع.. طلعت.. كال عوفيها.. لا ادخلين المطبخ روحي ارتاحي..

كتله هوه هم هيج ايدي اذتني حيل وجسمي يوجعني.. جاي اروح كال صدك تعاي شكو مساعه ردتي تحجين.. كتله اسكت يمعود راد يطيح البيت من الجذب الا شويه..

ضحك كال شكو.. كتله غير هيج وهيج يكولن.. ولك تاليتها طلعت مدلله.. كال اي وين اكو فايخه مثلج ههه.. دروح ارتاحي لعد اذا هيج مدلله. ضحكت ومشيت

دا اروح لزمني من ايدي.. وهمس والله فرحان لان دا اشوف الضحكه بعيونج.. حجه هيج ومشا بسرعه..

بقيت واكفه صافنه متجمده.. هوه طلع خارج البيت.. احس كزبر جسمي من همس بأذني..

رحت للغرفه.. عادل ديبدل.. ما حجيت كعدت وكلامه يرن بأذني.. مأثر بيه كلامه بكد ما بحة صوته والهمس بقى بذهني..

صاح عادل سمر.. انتبهت.. هااا.. كال كومي اكويلي هذا القميص.. كتله اي كمت.. طلعت الاوتي.. واخذت بطل مي وخليت للاوتي..

ومديت البطانيه وكعدت اكوي بصعوبه من وره ايدي واحرك بايدي المصبوبه شوي.. اعدل بيها باطراف اصابعي..

لان هوا الجبس مسويلياه لحد رلكف.. بس ثكيله حيل تأذي من اشيلها.. .. كملته كوي انطيتهيا.. شفت عادل متأنق وساعه يعدل بتسريحة شعره..

كتله عادل وين رايح.. كال اشوف حنين.. كتله هيه وين.. كال راح اخذها من بيتها ..بحجة رايحه لصديقتها..

كتله وين تاخذها.. عندك سياره.. كال لا طلبت سيارة بكر.. راح اخذها منه ..المغرب ارجعه اله..

كتله وين حترحون.. جان يغمزلي.. ويكولي وين ما الله قاسم.. كتله اذا هيه بنيه حافظ عليها..

وكف كال باعي.. اني احب حنين بس راح اكولج شغله بيناتنا سر.. كتله شنو.. كال اني اخذت عذريتها قبل فتره..

فتحت عيني.. كتله ليش كال مره طلعنه سوه وبستها وفتت زايد بالجو وصار كولشي بسرعه بدون منحس..

كتله هاي قبل لتتزوجني لو بعد.. كال بعد الخطبه.. كتله وليش متراجعت عن خطبتي.. كال حاجيت امي ومقبلت.. بس مكلتلها اني هيج مسوي ويه حنين..

كتله عادل دتغلط.. كال والله احبها شبيج.. كتله وان يكن.. اللي دتسوي حرام.. وعمر الحرام ميدوم لاحد فد يوم يوكعك..

كال راح اخذها بالحلال انشالله.. ابتسمت.. كتله دا اشوف الفرحه بعيونك وانته تحجي.. ضحك كال اي احبها..

ابسمتله وكتله الله يوفقك.. جان يحظني.. ويكولي سمر تصيرين صديقتي.. ضحكت بصوت عالي.. كتله وهوه هيج.. وغمزتله..

اخذ القميص ولبسه وطلع فرحان.. اخذت نفس عميييق وزفرت.. هه شلون دنيا.. الـ اليه مو الي.. والمو اليه ..الي..

بقيت افتر بالغرفه واعزل.. صاحو على غده رحت تغديت.. كملت.. ردت ادخل لغرفتي.. صاح بكر سمر..

درتله هاا.. كال راح انام لل6 العصر كعديني ممكن.. كتله بعيني.. راح نام.. اني غفيت للعصر كعدت الساعه ب5 ونص..

دخلت الحمام.. وغسلت بصعوبه لان بأيد وحده واخاف توصل للكبس مي.. كملت ومشطت بس شعري ما كدرت المه.. بس خليت طوك..

شفتها الساعه 6 الا خمسه.. رحت لغرفة بكر.. دكيتها ماكو.. فتحت الباب.. نايم والغرفه ثلللللج وضلمه.. منزل البردات..

اتقربت منه.. دنكت عليه اصحيه بكر بكر.. وهوه يصيح هممم.. كتله مو كتلي اكعدك ب6..

شال راسه وباوعلي بتك عين والنعاس بعيون.. ودار جسمه وغطا نفسه.. وكال بس خمس دقايق.. ضحكت..

عفته وكمت افتر بالغرفه مالته.. بيها عطر بكر بس شلون عطر يجنن.. ما اعرف عطره هوه مميز شوكت متجيه معطر..

حتى من الزم ايده.. تتعطر ايدي بعطر ايده.. كعد هوه.. باوعتله يفرك بوجها.. ويمد بجسمه..

كال ولو اتعبج فتحي الضوه وطلعيلي ملابس علما اسبح.. كتله يا ملابس تريدها.. كال باللي يعجبج..

كتله اوك.. راح هوه للحمام.. فتحت كنتوره.. الله ارتب من حياتي.. شلون مرتب غراضه.. وطبعا بنفسه يرتب ميكول لاحد نضفلي لو تعال سويلي حاجه ابدا..

طلعتله قميص اسود واحمر مقفل نازك.. وطلعتله بنطرون بيج.. وساعه فضيه.. ونضارت باطار ابيض..

طلع هوا لابس البيجامه والفانيله والخاولي فوك راسه.. كال سمر.. بس محفظتي بالحمام جيبيها.. كتله اي..

رحت اخذت المحفظه و اباوع شلون حمام.. اليشوف غرفته وحمامه يكول كاعد بغير بيت مو ابيت عمتي لان ابدا مو هيج تصميمه..

اجه وراي هوه وفتح الحمام.. كال هاا.. كتله اي هاي.. ابتسم.. كتله تدري احلى شي ابيتكم غرفتك..

مشا للغرفه وصاح كدامج.. كتله لا جديات.. خو غرفة اخشابك ويلي الله تفلج.. ضحك كال ما تغلى عليج..

كتله تسلم.. تتهنى بيها .. كال يله مع السلامه.. اخذي راحتج.. كتله بكر بكر.. دار هاا.. كتله اجيت احاجيك على شغله..

كال وهي ..كتله جامعتي بعد 10 ايام.. كال شبيها.. كتله يعني اجيت احجي ويه عادل.. بس من شفت اليوم كتله ما الك شغل بسمر كلت احاجيك..

كال اي على بالي.. كتله يعني اداوم.. كال طبعا.. جامعتج هاي مال بغداد غير.. كتله ايي هيه..

كال سهله اني اخذج واوديج لتشغلين بالج.. كتله ماشي شكرا.. طلع.. رحت الغرفتي وجان اشوف رنا وعمتي ساميه بغرفتي..

فاتحات كنتوري ويختارن.. ويطلعن بكيفهن.. كلت ها عمه تحتاجين شي.. كالت اي.. نيشانج راح اخذه لرنا..

كتلها ليش.. كالت كلمه وحده اشك راسج.. مثل ما فريتي راس بكر علينه اخذ غراضج كلها.. وكفت اباوعلهم..

شكو شي اليه جديد اخذو ملابس طلعه كلابيات .. مكياج صبغ اضافر شسوار زيوت حتى الملابس الداخليه الممستخدمتهم.. اخذوهم..

صراحه وكفت الدمعه بنص عيني والعبره خنكتني شكد حسيت بضعف بلحظتها.. فعلا تمنيت بكر موجود واروح واشتكي ويجي يوكفهم..

بس بعد اخذو واذا احجي ابتلي.. اخذو كولشي وطلعن.. فتحت الكنتور شبه فرغ.. من غراضي..

ما حجيت شي بس كلت عساها لا تتهنا بيهم.. وعبرتي هاي تطلع حوبتها.. وبقيت ارد حسبي الله ونعم الوكيل بيهم وابجي

الي عرفته عرسها بعد اسبوع.. لليل اجت اميره بنت عمتي هيه وجهالها انوب البنات كلهم اجو صارت هوسه..

اجن قبل العرس باسبوع علمود يحظرن ويه رنا بعتبارها اختهن الصغيره.. اني وكفت علطباخ.. اكلي نواشف ..

اجه بكر.. كال الله يساعدهم.. كتله هله.. دار وجها شبيج.. كتله ما بيه شي.. كال سمر.. العصر عفت عيونج تورد..

هسه شبيج.. نزلت دموعي غصب عني وكتله ماكو شي واحاول اخفي دموعي بس مو بيدي تنزل وحدها بحركه..

لزم ايدي كال شبيج.. دخلت اميره.. صاحت على بكر شلونك خويه.. دارلها هلاااا اميره هاي شوكت اجيتوو وسلم..

بقت اميره واكفه.. واني امسح وانشف بدموعي.. واكلي.. وبكر مشال عينه مني وما كدر يسكت.. كال اميره شبيها سمر..

كالتله والله ما اعرف ..شبيج.. كتلها لا ايدي تأذيني حيل.. العضم ديصل عليه.. كالت امشي روحي اني اكلي..

مشيت للغرفه.. دخل بكر وراي.. كال شكو.. احجي بدون لف. ودوارن.. كمت فتحت كنتوي وكتله شوف بس شوف وين وصلت حالتي..

وانفجرت ابجي.. وامسح بدموعي.. كال بس اهدي وفهميني شكو شنو صاير..

كتله رنا وعمتي ساميه اخذو كولشي مني لان انته منطيتهم فلوس يجهزون رنا.. جهزتها بجهازي..

دار وجها راد يطلع بغضب.. لزمت ايده وكتله الله عليك اسكت.. اني بس ردت احجي لان الهم اكل كلبي ومابيه حيل بعد..

كال وخري اني اتصرف وياهم.. كتله عوفهم بكر الله يخليك والله ما الي خلك.. كال بسيطه..

بدلي واخذي كم غرض و امشي وياي.. كتله وين.. كال ابقيلج كم يوم يم بيت عمه رويده.. ارتاحي هناك..

هنا عرس وهوسه وراح يأذوج بشغل وانتي تعبانه و تك ايد..

كتله لحظه الم غراضي.. لميت كم حاجه خليتها بجنطه وطلعت.. صاحت عمتي ها وين ماخذها.. كاللها تعبانه ايدها وعمتي رويده اليوم كالت جيبلياها..

كالت اخذها.. طلعنه ومشينه لعمه رويده تصير اخت ابويه هم بس احبها اكثر من عمه ساميه لان طيبه..

دخلت استقبلتني وبكر سولفلها علي امه.. كالتله هاي ساميه تخبلت شبيها غير بت اخونه هاي احنه سترها وغطاها..

كاللها امي بعد.. كالتله عوفها هنا ويه البنات ترتاح..

طلع ويوصي عمتي عليها.. يكولها عمهانطيها علاجها من تنام لان العظم يكوم يصل عليها.. بقت تضحك هيه.. كالتله لا تشغل بالك روح

بقيت ابيت عمه ساميه.. هيه ارمله وعدها 3 بنات و2 ولد كبار ولدها متزوجين..

كعدت عدهم بس فعلا ارتاحيت.. جناينها دره مال الله شلون بنات وحتى بناتها.. اني اعرفهم بس ممتخالطه وياهم قبل..

لان بس عمه ساميه وولدها مختلطين وياهم من اهل بابا الباقين ما يردون امي لان اتزوجها بابا غصب عنهم.. بس يحبونه لحب ابويه..

بقيت لحد قبل يوم الحنه مال رنا.. اجيت ويه عمه رويده الصبح لبيت عمه ساميه.. ردت ادخل لغرفتي.. عادل كال بعد ما الج مكان بغرفتي..

راح اتزوج بهاي الغرفه.. انتي روحي بغرفة رنا ما الج نومه بغرفتي.. كتله هاي شبيك عادل ليش هيج تتصرف ويايه..

كال اطلعي سمر لا ادوخيني.. هاي مو غرفتج منا وجاي.. وغراضج شمرتها بغرفة رنا.. ححتزوج انتي اكعدي هناك

كتله عادل شبيك.. ويايه ليش هيج.. ادموعي تجمدت بعيني واني اباوع كولشي الي بالغرفه مطلعيه..

بكر صاح سمررر اتركي عادل وادخلي لغرفة رنا صارت الج.. طلعت اباوع لبكر اشرلي بحاجبه لغرفة رنا.. ومكتف اديه..

اباوع لـ رنا بدها تاكلني بعيونها من الغضب ذوله شبيهم..

شسويتلهم.. اخذت جنطتي ودخلت غرفة رنا ضحكت ههههههه مثل الواحد محترك وشمرو عليه سطل مي ..بقيت اضحك ومخليه ايدي على حلكي

وطلعت البكر وهوه يبتسم.. كتله سويتها..

كال بالعافيه.. غرفتج الجديده بالضبط مثل الديزاين مال غرفتي ايطالي مثل متحبين.. ما اعرف من الفرحه حميت و اخذته بحظني وحظنته واضحك والدموع بعيني..

دخلت فعلا نفس الديزاين. اختلاف قليل بالموديل مال الغرفه.. بس نفس التصميم.. فتحت الكنتور..

مشتريلي ملابس جديده ومخليهم بالكنتور. درتله وهوه منتجي علباب ومكتف اديه ومبتسم.. اتقرب يمي..

كال باعي الملابس علذوقي.. اذا معجبوج عادي ارجعهم وترحين ويايه تختارين اللي يعجبج..

كتله بكر ما اعرف شحجي وشلون اشكرك والله الكلام ديضيع من الساني من الصدمه بس صدوك شكرا هههه..

ضحك هههه واتقرب و همس بأذني فرحتج هاي اللي بعيونج كافيتني ومطيرتني بهواها..

ابتعدت منه.. واني احاول اخفي الابتسامه بس فعلا فرحت من كل كلبي.. صدقا اول مره بحياتي احس انسان مهتملي ويدور سعادتي رغم اذية الكل..

بقيت ساعات بالغرفه انظمها.. طلعت رنا بدها تاكلني.. اللي عرفته من طلعت من البيت بكر متعارك وياهم.. علسووه ويايه وشلون اخذو ملابسي

ومتحاجي ويه رنا ومتعاركين.. وكايللها مدام هيج.. شكو الج بالغرفه اطلعيه انتي هنا خطار وغرفتج السمر.. وشامر غراضها برا..

متعاركه وياه امه.. كايلتله انته ما تستحي تشمر غراض اختك علمود سمر .. كاللها جان استحيتي انتي لما اخذتي غراض البنيه من غرفتها..

ومتعاركين وصايره عركه جبيره وبكر تارك البيت وطالع وكايللهم بعد ما الي عيشه وياكم..

وباقي يومين وراجعين مراضيه وكايليله بعد ما النه شغل ويه سمر بس ارجع.. طبعا مو علموده علمود جيبه.. لان بدونه مستحيل كولشي ما عدهم

عادل عاطل عن العمل وعمو خليل كذالك حتى راتب تقاعدي او اي ما عنده حتى رعايه.. كل شي بحياتهم مرتكز على بكر..

فراجع وطلع غرفة رنا ومنظم الغرفه.. بدون حمام طبعا لان غرفة رنا ازغر من غرفة بكر..

ومسوي كل هشغلات وهمه ميكدرون يحجون.. والعجيب اللي كاتلني ما فد يوم سألو بكر ليش هيج يعاملني.. ومهتم بيه بهشكل

الحب البعيونه الي.. احس العالم كلها تعرفه من نضره بس ليش همه للان معرفوو وما حجو ما اعرف..

كملت العشا وياهم واني احس نفسي طايره فرح.. لشوي.. اجه عادل.. كال سمر كومي.. كتله وين..

كال نفتح الكبس مال ايدج عند الدكتور.. كتله ماشي.. رحت بدلت.. وطلعت.. بكر يسوق وعادل ويانه..

فتح عادل الموضوع على زواجه شوكت.. كاله بكر هسه ما عندي جوه ايدي فلوس.. اللي عندي شمرته على غرفة سمر..

كال عادل.. وشوكت لعد.. كاله انتضر فد شهر شهرين.. كاله بكر هاي مو حاله.. كاله باوعلي عادل..

اني ما اريد اكسر بيك لان انته اخويه.. وما اريد احملك منيه.. انته تريد تتزوج الثانيه.. عندك وضيفه تعيين..

افرض انطيتك ال10 ملايين وتزوجت وتالي.. هم اصرف عليك وعلى مرتك.. كاله جاي تعيرني.. كاله والله ما اعيرك..

بس يا اخي اعقلها.. اتزوجت الاولى واني اتكفلتها الثانيه شلوون.. يعني اني المن اصير الك للبيت لامي لابو لخواتي.. المن فهمني..

يا اخي عين نفسك عاوني.. كاله واني لكيت وضيفه وما تعينت.. كاله تعال هنا يول.. وين تلكه الوضيفه وانته مصفط بفرفتك ومسطول بهلسم التشربه..

شنو يجون لبيتك ويكلولك عادل تتوضف لو لا.. اطلع دور.. حتى لو مو وضيفه.. اي شي اشتغل.. كاله ما اعرف.. كاله عيب عرجال يكول ما اعرف..

اطلع والكه وضيفه.. واحرك شارب ابوي لو ما زوجتك من ثاني يوم.. كاله يعني هاي وكفتها علوضيفه..

كاله اي.. كاله خوش يعني لو لكيت شغل خلال ايام تنطيني ال10 ملايين كاله والله لو اعرف اداينهم ومحمد انطيكياههم..

كاله خوش.. اني كاعده وره وبس استمع.. دخلنه للدكتور يريد يطلع.. سلم عليه بكر وكاله بس افتحلها الجبس مال ايدها وشوفها ولو انزحمك..

كال لا يله تعال… دخلت فتح الصب مال ايدي.. جنت خايفه حيل.. وعادل وبكر ثنينهم يباوعلي..

وعادل الخبل يسوي وووو راح يكصوها وتصيرين عوووبه.. كتله عادل اسكت هوه اني هيج هيج ميته خوف..

ويكول خطيه راح يكصها الدكتور وما يدري يبوووي.. بكر دارله وجها.. كاله شبيك كافي.. كاله انته شعليك العقده دور وجهك..

بقيت اباوع لعادل واضحك.. فتح الجبس زين ما حسيت بالم قوي.. بس من حرك ايدي بعد بيها الم صرخت..

كال ها تأذيج.. كتله اي دكتور.. كال راح نلفها ولازم فتره تبقين معلكتها بركبتج لا تحركيها..

بكر كاله يا ما تحركها.. غير تكول ايد كرندايزر تجيبها منها وتوديها هنا.. كال لا ممنوع الحركه عليها.. لحتى تشفى..

لفها الدكتور.. ودفع بكر الحساب وطلعنه..

رجعت للبيت.. دخلت الغرفه.. واني ابتسم ياااي هاي غرفتي والله حلوه مال احظنها.. وحظنت باب الكنتور..

نمت مرتاحه الحمدلله.. صار ثاني يوم الحنه.. اني بس لافه ايدي ونزلتها.. بيها الم خفيف.. بس عادي..

لبست وتمكيجت.. اجو اهل العريس.. وبقو يصفكون ويهلهلون.. واني اباوع.. حنو العرسان.. انوب رادو يكصون الكيك..

كالت عمتي سمر سجينه جبيره من المطبخ.. هاي صغيره.. رحت جبت سجين واجيت..

وكفت كدام العرسان.. كصصو الكيك.. جان يباوعلي العريس.. كال انتي شايفج بس ما اعرف وين..

كتله ما اعرف مشايفتك.. رنا خازرتني واني احجي ويه احمد عريسها..تكول راح ابوكه كال انتي مو بجامعة بغداد..

كتله اي.. كال عرفتج شايفج هناك.. كتله اذن زميلي.. ضحك كال اتشرف.. قسم شنو انتي..

كتله اداب انكلش.. كال اني هم اداب بس تاريخ.. كتله موفق.. مد ايده.. ويباوعلي.. عزا هذا كدام الناس يسلم..

سلمت عليه وابتسمت.. انوب باوعت الرنا خازرتني بنضره تخوف.. رجعت ليوره وبعد ما دخلت الصاله ابد..

خلصت الحنه وطشت الناس.. جنه كاعدين كلنه بالصاله.. وبكر وعادل وعمو خليل هم..

واجتني رنا تركض وتصيح ام الرجووووله.. شعدج ويه احمد ومنين يعرفج ادب سزززز..

اجتني حاميه تريد تضربني.. صاح بيها بكر.. وكف كدامها كالها شكو.. كالتله هاي الساقطه طلعت عدها علاقه سابقه بخطيبي..يتبع

🌺🌺🌺🌺🌺

هسه غير تكعد وجه الطاوه.. ههه هم عدكم هيج نماذج مثل رنا.. يسوي الحبايه كبايه..

و خاصه سالفة ال ووو اكعوود و الصبووح.. خخخخ تدمير ما الزمهم بسلاح 🔫كاتيوشي..

يا جماعه تره هيه صبح وعادي تخليها ضم تصير صبُح ماكو داعي تسووها صبوح ✮‏​‏​..هٍْـَِ😜ـٌَِْعٍَ..✮

حنكتل اعرف 😁😁😁

شاركوني ارائكم.. و توقعاتكم..

متابعه ممتعه..

# حكاية_سمر..

،،،،،،،،،،بقلم الكاتبه زينب ماجد،،،،،،،،،،،

البارت_13

سمر.. بكر دار وجها اليه.. كال منين تعرفين احمد.. وعادل اجه وكف.. كال احجي.. كتله يابه والله ما اعرفه ولا عندي علاقه وياه..

هوه شايفني وطلعنه زملاء بالجامعه.. كالت رنا.. جذابه هوه كال اعرفها من زمان.. كتلها يجوز شمدريني اني بالنسبه اليه ما اعرفه..

اجت تجرني من شعري.. شمرها بكر.. كالها باجر عروس شوي هدي.. كالتلج ماكو شي كالتله جذابه والله..

كتلها استغفر لا تحلفين والله ما عندي شي وياه.. بكر صاح بيه شششش لتصيحين.. وامشي الغرفتج.. كمت من يمهم ورحت لغرفتي..

انوب احمد عليه يربي كأنو مكافيني الهم العندي.. اتصل بكر.. كلت الو بنرفزه.. كال بويه معصب الحلو..

ضحكت.. كتله لا بس شغله تضوج من واحد يتهمك بشغله انته ممسويها.. كال ليش تهتمين.. البسي..

كتله هوه هم هيج.. كال شفتج اليوم بالحنه كتله وين انته مجنت موجود.. كال شعليج انتي لمحتج.. اوف بس شطالعه فستق لوز..

كتله بكر رجاءا تره ما احب هلكلام.. كال ليش.. كتله شنو ليش.. اني مرت اخوك ميصير تحجي ويايه هشكل وتباوعلي بغير نظره حراام..

كال انتي معتبره عادل رجلج.. كتله مدام الله حاسبه عليه زوج هذا هوه مو بكيفي بعد.. وقت اللي انفصل منه ممكن اتقبل هلكلام منك..

كال تردين اطلكج منه.. كتله طبعا لا.. كال لعد شلون.. كتله ما اعرف نعيش ونشوف وين توصل..

اخذ نفس وكال ماشي.. اعتذر.. كتله عادي.. باي..

حطيت راسي علمخده واني افكر بوضعي ويه بكر.. مستحيل ما اشوف بيه الرجل الممكن احبه.. اعتبره اخويه..

شلون مشاعري تتبدل.. اووف وهذا عادل جنتي تعتبريه اخوج.. وصار رجلج انوب رجع اخويه.. شلون حياة مكلوبه بيها تريله يربي ..انام. احسنلي

نمت لثاني يوم صار عرس رنا ميته فرح واخيرا راح اخلص منها.. لبست وتعدلت.. بكر جان موجود..

ما اعرف ما انتبهلي لو صاحني اليوم ماخذ على خاطره.. واني هم عفته ما حاجيته.. اجت الزفه ودخلو انوب خطيبها احمد تكول يعرفتي اول مشافني..

وكال هلا سموره.. طبعا اللي عرفته هوه ياخذ ميانه بساع ويلغي هواي .. هيه من سلم ضاجت..

رحنا وياهم للقاعه.. وجان عازم هوايه من اصدقائه.. نص اصدقائه اعرفهم زملاء ويايه بالجامعه..

انوب من يشوفوني يرفعون ايدهم ويسلمون واني ابتسم.. وعمتي تخزرني كلساع.. انوب اجت يمي..

كالت منين تعرفيهم.. كتلها عمه والله ويايه زملاء.. بس ما عندي معرفه شخصيه بيهم.. فقط من خلال الكروبات..

كملت العرس كوه ورجعنا.. عمتي خرطت هلحجي كله العادل..كاللها اي وشنو يعني يا امي غير زملاء.. قابل شعدها وياهم..

اني هم عندي الف زميله خوما كلهم عندي علاقه بيهم.. من شافت محد اهتم للموضوع.. سكتت بس بقت وياي مناكر كل يوم..

وتصيحلي ام الرجوله على امج طالعه.. ما ارد عليها خلها تحجي شسويلها..

بكر عادي اتصرف وياه طبيعي.. بس من ذاك الاتصال.. هوه متضايق مني.. واني ما حسسته بشي وكأنو شي لم يكن..

اجه الدوام.. ولبست وحظرت.. دكيت الباب على بكر.. طلع.. كتله ها نروح كال يله.. مشيت.. صعدنه السياره..

وهوه مشغل حسين البصري.. علميني شلون انسى.. فهميني شلون انسى ..انسى الضحكه والهمسه.. حبج بكلبي ليهسه.. علميني علميني..

بقيت استمع واني مبتسمه.. كتله الناس تشغل فيروز الصبح.. كال ماكو مثل حسين البصري يحجي البكلبي..

باوعتله.. دار وجهه عليه بجمود ورجع باوع لكدام ..وصلت.. كتله تجيني بالرجعه.. لو ارجع لوحدي..

كال ممنوع تفكرين تخطين خطوه الوحدج.. حتئ لو اتأخر تنتظرين علاكيييد اجي.. كتله اوك تعبتك .

دار وجها عليه.. كال سمر دخيلج لا تعامليني هيج.. تره دتضايقيني بتصرفاتج والله.. كتله بكر شنو الطالبه مني..

كال مطالب شي.. اذا ما عندج مشاعر اتجاهي.. احترمي مشاعري علاقل.. لتكونين انانيه ترضين بس نفسج..

هزيت راسي.. ونزلت.. لوحتله بأيدي هوه لبس نضارته ومشى.. دخلت الجامعه.. اول كم محاظره ما حظرتهم..

جنه مجتمعين كروبات وسوالف وضحك.. دخلنه كم محاظره وطلعنه.. رحت للسنتر.. خابر بكر.. كتله رايحه للسنتر انتضرك..

كال اني اصلا دا انتضرج هناك.. كتله والله من شوكت اجيت.. كال قبل شوي يله تعاي..

رحت اله.. سلمت كتله هااا نروح لو نكعد.. كال اذا ما عندج شي.. نروح.. كتله يله. طلعنه.. كال جوعانه اشتريلج لفه..

كتله ما اكول لا لان جوعانه فد مره.. ابتسم.. وراح اشترالي لفة كص واجه.. كتله هاي شلون اكلها بالسياره خاف عيب..

كال دكلي يمعوده.. هيه ضهريه وحاره وكلمن ملتهي بروحه.. كعدت اكل.. وهوه كل شوي.. يباوعلي..

تردين بيبسي.. كتله لا.. تردين عصير.. كتله شكرا.. تردين مي.. ضحكت كتله حنوصل علموديش تشتري..

كال وتموتين عطش لحد متوصلين.. كتله معطشانه كولش.. كال براحتج.. وصلنه البيت..

لكيت امه طابخه.. صبيت البكر غدا ووديته لغرفته اخذه مني وهوه مبتسم.. انوب عادل هم كال صبيلي..

صبيتله.. لكيته يحجي بالموبايل عفت الاكل.. وطلعت..

مرت الايام هاديه.. الحمدلله ماكو مشاكل.. صح عمتي تحجي وتلغي على راسي.. بس احسن من قبل..

جانت هيه ورنا يحيرن شيتفقن عليه.. راحت وارتاحيت .. بس يا راحه ما دامت..

من رحت للجامعه وره فتره.. كام احمد زوج رنا هوايه يتردد عليه ويسلم ويضحك وليكول يعرفني وبيناتنا عشرة عمر..

رغم اني مذبيت ميانه وياه على كد السلام.. بس هوه لطش.. حتى صديقاتي كالولي تعرفيه هذا..

كتلهم زوج حماتي.. كالن يمعوده هذا اكبر مرقمجي بالجامعه.. شتحجين.. كلت بكلي حللل والله تستاهل رنا هيج رجال ملطلط..

بس شيخلصني منه ومن لغوته يجي ويوكف ويايه ويسولف.. انوب اخذ رقمي ما اعرف منين ويخابر..

كلت لبكر عليه حتى لا بعدين يطلع عليه كلام.. .. كتله ما عندي شي وياه بس السلام.. بس هوه ذاب ميانه. زايده.. كال معليج بيه..

من تشوفيه ديري وجهج.. ولا تتقربين.. كتله احاول بس يلطش.. كال غلسي.. مابينا حيل مشاكل..

همزين الله كلت لبكر.. وره شهر من زواج رنا اجتنه زعلانه.. وتكول احمد يصاحب عليه.. وحتى مسوي علاقه ويه سمر من وره ضهري..

عاد بكر كاللها رجلج ملطلط يوميه سمر تشكي منه.. يلزمها سوالف بنص الجامعه.. سكتت

بقت هم 3 ايام زعلانه كلبت البيت على راسي سوته جحيم لحد مرجعت.. وزعت جكليت بيومها من راحت من الفرح..

حتى عمتي كالت بمناسبة شنو هلجكليت كتلها ماكو مناسبه تحليه لا اكثر..

خلصت من رنا انوب طلعنه عادل بسالفة زواجه.. اجه لبكر وكاله تعينت بوزارة الماليه. صح الراتب قليل..

لكن يكفيه.. كاله بكر هاي براحتك.. شوكت متريد.. كول نروح نخطبها الك.. حجه ويه امه.. كالتله ما اريدها هاي بت الفكر..

كاللها اني احبها شعليج.. تكله ما اريدها.. متصيرلي جنه الا واني بكبري.. عاد ادخل بكر بسالفه.. وكاللها يمه انتي شعليج بيه..

اثتي الراح تتزوجبها.. راح تنام يمج.. خل شيختار هذا اختياره هوه يتحاسب عليه.. احنه العلينه نروح نسأل علناس شنو سمعتهم..

ان كالو زينه نتوكل.. بعد جر وعر اقتنعت عمتي تروح تخطب لعادل.. ورادت رنا تروح وياها تخطب خابرتها واجت رنا..

ورنا من حقارتها.. كالت خل سمر تروح ويانه نشوف البنيه ونخطبها.. كتلها ما اريد.. كالت مو بكيفج..

روحي ويانه خاف يكولون مرته مموافقه.. انتي جايه ويانه ما الهم كلمه بعد..

صح ما املك لعادل مشاعر كبيره.. لكن تبقى عزة نفسي متقبل انهان بهشكل.. كال بكر روحي..

كتله ما ريد.. كال شنو متضايقه لان عادل راح يتزوج.. كتله مو شغلة متضايقه بس تبقى اهانه الي..

كال لا مابيها شي.. روحي وبيني للعالم انو عادل مو بعينج ولا يهمج.. صيري قويه.. بعد اصرار منهم..

قبلت اروح.. لبست اجمل ملابس عندي.. بنطرون كابوي ثلجي.. وقميص احمر وعليه جاكيت اسود خفيف و كولش نازك.. وجنطه صغيره

واتعطرت ولفيت الحجاب لفه حلوه والكعب عالي.. وحتى نظارت لبست.. رغم رنا شكد حجت وقلدت علنظاره شلون لابستها..

بس مهتميت.. اخذنه بكر بسيارته.. طلعت بيت اهل البنيه تجاوز.. بمنطقه شعبيه اسمها الكياره يمكن..

متعرفه على عادل من خلال الموبايل.. وصار سنتين هيه وياه.. دخلنه.. سلمت.. ودخلنه البيت.. بسيط..

الصاله عباره عن حصير ومدات.. وكلها تراب.. بس كعدت.. دخلت البنيه.. زينه حلوه بس انفها جبير.. ههههه

قدمت العصير.. وكعدت عمتي تحجي وياهم معلك.. وحتى همه.. كعده كلها حزازيات ومو متفقين وكوه طايقين بعض..

وكلمن يكول احنه هيج واحنه هيج.. البنيه ما رفعت عينها مني.. فصلتني تفصيل بنضراتها.. حتى على اصابع رجليه شفتها تباوع.. هههه

حاجتني امها.. كالت انتي ما عندج مانع يتزوج.. كتلها لا ما عندي مانع.. اني كل همي ادرس وابني نفسي.. مو بحاجة زوج وهلشغلات..

كالت لعد ليش ما تطلكين منه.. كتلها لاسباب خاصه.. رنا سألت كالت حنين شمخلصه دراسه.. كالتلها ثالث متوسط.. بس ما نجحت. منه..

كتلها همم يعني خريجة ابتدائيه.. بقت تباوعلي حنين بحقد.. كالت امها الثقافه والشرف مو بالدراسه. وتباوعلي..

بنظراتهم عرفت عادل بايعني كدامهم.. اخذت نفس.. اتصل عادل.. طلعت برا.. كال هاا شنو الاخباره.. حمامه غراب..

كتله دجاجه .. ضحك وكال يعني شنو كتله يعني نص نص بعدها ممبيضه.. كال خرب بعقلج هاي امي عقده مراح تمشيها علخير..

كتله لتخاف.. انشالله خير.. كال ماشي عود طمنيني.. كتله بعيني.. دخلت يمهم.. كالت رنا هاا منو بكر..

كتلها لا هذا عدوله خابرني ديسأل على قميصه.. حنين فارت وتخزر من تباوعلي.. رنا خزرتني.. وكالت شنو ميندل..

كتلها تعرفيه لعدوله.. . كله على ايدي ميكدر يسوي شي.. الا اني يمه.. كالت عمتي اي والله شلون معتمد على سمر.. ميكدر بدونها لحظه..

لو راحت يبقى يصيح علينه سمر وسمر ويغلط باسمها من كد ما متعود عليها وهيه مدللته.. وتلزمني.. وتكلهم بت اخوي هاي الحلوه..

ضحكت بكلبي على سوالف عمتي.. ساندتني لان تتخبل من حنين واهلها.. رنا بقت ساكته.. وحنين طلعت..

هيج هيج كوه اتفقو على الخطبه وكالو بعد جيت زلم يكعدون ويحددون المهر.. كالتلهم عمتي 5 ب 5 من هسه نكلكم..

كالتلها ام حنين.. الفلوس متهمنه قابل احنه نبيع بناتنه.. كولشي منريد بس سعادتهن.. ما حجت عمتي سكتت..

قبل لنطلع خابرت بكر.. كال هاا كتله هلهل.. كال لو اعرف جان هلهلت ضحكت.. كتله يله تعال.. كال لحظات واني يمكم

كالت عمتي ها يمه سموره.. هذا عادل.. كتلها اي يوم عدوله خبلني علمود قميصه.. كاويته ومخليته اله بالكنتور.. ومديندله.. كالت لو باقيه يمه ييمه..

خررب صدك متت ضحك بكلبي على عمتي اول مره احبها من تزوجت لليوم هههههه..

وصل بكر رمشلي.. كالت عمتي يااا شجاه عادل.. كتلها لا يوم هذا بكر وصل يله.. كالت يااا عبالي ذاك الخبل..

دارت وجها.. وتكلها خطيه سموره ما قبلت الا تجي تخطبله بأيدها من كد ممتصافين مو بس زوجين.. اصدقاء تحسهم من هيه وزغيره متعلمين على بعض..

انوب تلزمني وتكلهم هيه طالبة جامعه وشاطره كلش ومعدله.. اني ضحكت ونزلت راسي ولبست نظاراتي.. بيض وكبار فد شي..

طلعنه واحس الناس على ساعه يدفرونه اني وعمتي بچلاق.. من كد ما رفعنه ضغطهم هههههه

صعدنه ويه بكر.. كال هاا.. كالتله عمتي ما ادري هلاغبر شعاجبه بيها بس خشمها.. جنه سيارة بامبو..

خو الكصه ملعب الشعب شكبرها.. ضحكنه اني ورنا وبكر.. كاللها يعني عوبه.. كتله لا زينه حلوه.. مدام عاجبته شنسويله هذا اختياره..

باوعتلي رنا. كالت انتي هم تنحسبين مره وتغارين على رجلج.. كتلها ما اعرف عادل ما احس وياه مشاعر حب وزوجه..

بكر بقى يباوعلي بالمرايا ويضحك.. كال شرايكم.. اطلعكم اوكلكم برا.. كالتله امه اي والله ياريت لعبت نفسي من بيتهم..

شفتنه شكد وصخ.. كالت رنا.. شتحجين.. غير بنطروني اسود صار اجلح من التراب.. كالت اني عباتي انكلبت بيضه..

كال بكر يمه كولي يا الله حرام هلحجي.. اخذنه بكر وطلع بينه للجادريه.. نزلنه عشا كباب.. وهوه عيونه متفارك عيوني..

احاول ما اباوعله وانتبه.. بس احس حبه واضح بعيونه.. نظراته اللي جنت اجهل تفسيرها.. هسه كمت اعرف شنو تقصد وشنو تريد..

كملنه.. طلعنه الجو حلو بليل بيه بروده بداية شتا.. واحنه نمشي.. وبكر مشغل اغنية عمري جزه اتلاثين لحسين البصري.. يموت على هلفنان..

وحتى يغني اغانيه.. وصوت بكر هم حلو وتقريبا بيه من صوت حسين البصري بكد ما يغنيله ومندمج وياه..

يمشي وبكر يغني ويه الاغنيه..🎵.. عمرج عمر قداح صعبه انتوالم ..صعبه انتوالم.. صعبه علي تدرين چلمة العالم.. چلمة العالم..🎵..

بصوت بكر وهوه يجر بيها ببحة صوته تخبببل.. رجعنه للبيت عادل تلكانه.. كال هاا.. كتله هاك هاي لفة كص لحلك بس فكنه..

كال لا صدك شنو.. اخابركم محد يرد.. كال بكر هلهل يخوي راح تتزوج.. عادل ما كال غلط طكها هلهوله خربنه من الضحك عليه..

كتله الله يزيدك عقل.. هههه.. عفتهم ومشيت الغرفتي.. دزلي رساله بكر..💬 لا اتمنى من الله سوه نظرة لعيناكي قبل منامي.. لتحتل احلامي💬..

ضحكت.. دزيتله.. انته فايخ دنام نام يمعود.. كال ماكو احساس.. دزيتله كووولش انعدم من كد الهم..

دز.. وعدتج اخلصج من همومج وهاي كل امورج انحلت بعد يا هم هذا.. كتله انته ورده..

دز لا بلله صدك.. هسه دريتي.. دزيت انته صونده دروح مو صوجك صوجي اني اغازلك

دز.. هههه وهم معتبره نفسها تعرف تغازل.. لج بابا انتي الثلاجه احر من مشاعرج..

كتله عود اشتريلي صوبه ودفي مشاعري.. دزلي بحيل الله هوه لازم نسوي هيج خخخخ..

كتله عابتلك دروح اريد انام.. كال نظره بس قبل ما انام.. طلعت من غرفتي.. والموبايل بيدي..

دزيتله ماكو روح نام.. واني امشي لغرفته.. كال ولا بيج روح دروحي.. فتحت الباب عليه.. كتله هاي عليمن..

كمز.. كال خررب ببليسج فزعتيني.. كتله وهاي باوعتلك بنظراتي يا نزار قباني..

صاح دولي حتى النظره ما اريدها بطلت هههه.. كتله تصبح على خير.. كال انتي الخير يا خير..

عفته ورحت نمت.. دا انام.. خابر احمد رجل رنا.. رديت كتله ها احمد.. بقى يسلم ويضحك ويسولف عشنو ما ادري..

بس اللي افتهمته يريد يطبقني.. لان كال رنا تكول عادل ممعتبر سمر زوجته وميتقربلها.. وعباله صيده سهله اله..

كتله باوعلي احمد.. عادل ولا غيره.. ولا رجال بعيني.. زمرة الرياجيل كلها ما اعترف بيها.. كال هاي اهانه.. كتلهه اني دا اعمم ما دا اخصص..

فلتحاول وعيب هلكلام.. كال اني شسويت. تره مو قصدي شي.. كتله اني وانته كوووولش زين نفتهم القصد..

كال سمر احجيلجياها بصريح العباره والله لو اطلكتي من عادل.. اني اتزوجج لان فعلا انتي انسانه جميله وعفويه وصادقه..

كتله ورنا.. كال بكيفج تردين اطلكها تردين ابقيها.. اللي يعجبج.. كتله انته كلك مو عاجبني بااي.. وقفلت الخط.. ونمت

مشت الايام.. ورنا كل فتره مشاكل ويه زوجها زير نسا اصلي.. ماكو وحده ميخابرها.. حتى هجر رنا وهيه بعدها عروس..

من كد ما يخلص الليل حجي ويه البنات.. وحتى مصرف ما ينطيها مخلصها ارصده لحبيباته..

بكر ينطيها مبلغ مادي كلما تجينه..ومن تجي كلعاده تهجم البيت على راسي.. اطلع كل ضيم احمد بيه..

مرت ايام وصار عرس عادل.. سوينا هوه حنه هوه عرس.. بين الاقارب معزمنه غريب ابببد..

كنت حيل متضايقه.. واني اسمع حجي الناس عروس ليش اتزوج عليها.. شبيها.. يمكن شاف عليها شي..

يمكن عوبه.. يمكن مشوها.. اتضايقت كولش.. لدرجة اكو صرخه بصدري لو اطلعها اخرس العالم بيها..

بس مو كادره انطق حرف.. انتبهلي بكر.. لكأابتي.. وصاح سمر.. بس تعاي اكويلي قميصي..

كتله اي.. اجيت للغرفه. سد الباب وتقرب.. كتله ها.. كال دا اريد احجي وياج.. اتقرب يمي كتله بشنو..

كال باعيلي سمر.. تعرفين الذيب شلون ييسيطر علكبش مالته.. صفنت كال لما يحس الكدامه ضعيف.. وتهزه الاشاره..

راح يتماده ويبدي يأذي الكبش لحد مياكله ويحطمه.. فيا سمورتي.. ذوله الكاعدين بره كلهم ذياب..

لو شافو الضعف بعيونج.. راح يستغلون هلشي ويبقون يأذوج اكثر.. افرحي.. ارقصي .. اكسري قهرك.. وبيني للعالم..

اانو انتي بنت مو بحاجة عادل ولا غيره لحتى تنسعد.. خلي غيرج هوه ينغث بضحكتج.. ودموعج وقهرج.. اتركيها بينج وبين ربج..

الضعف كدام الناس ذل.. والضعف كدام الله.. يعطينا القوه.. بالرحمه الالهيه..

كتله بكر بس مو متحمله.. حجيت هيج وبساع نزلت دموعي.. اخذ ايدي.. ووداني للشباك.. وفتح البرده شويه

كال ذاك عادل فرحاااان ومو هامه اي شي.. ليش انتي تهتمين لشخص مو مهتملج.. وتضرين بصحتج.. وتقهرين نفسج.. على شي ميسوه..

من كال هيج.. صدك تقويت.. واني اشوف عادل كدامي يضحك وفرحان.. واني حزينه.. درت وجهي لبكر ومسحت ادموعي..

كتله وهوه كذلك.. راح اصير اقوه منه.. ومراح استسلمله.. كال عفيه هيج اريدج.. وابتسم وضرب على كتفي..

وكال يله كبل.. اريد اجمل ملابس ومكياج.. وخلي اكبر واحد يحسد ضحكتج وغمازاتج الحلوه.. يله يله دا اشوف كدامي اركضي. بالعجل .

ضحكت.. كتله ماشي.. وفعلا.. رحت لغرفتي.. لبست بنطرون اسود مو جلد وانما قماش مشبه بالجلد..

ولبست بدي ابيض.. وفوكاها فروه رصاصي.. مخصر جسمي.. ولبست بوت ابيض..

ومكيجت.. العيون سود.. والحمره حمره طوخ.. ولميت شعري.. بـ كب صوفي نازك.. لحتى اطلع كدامهم بدون حجاب.. وميبين شعري..

باوعت نفسي بالمرايا.. وكلت سمر انتي كدها.. محد مراح يكسرج.. اتقويي..

طلعت.. يمهم.. وادك بكعب البوت.. بالكاع.. لحتى اجذب نظر الناس.. وابينلهم عدم مبالاتي بعادل..

بكر باوعلي.. ضحك وسوالي هيج 👍 يعني تووب.. ضحكت.. كل اقاربنه جانو موجودين..

ولد عماتي وعمامي.. وبناتهم .. الحفله سويناها بالطرمه بكر شغل عيد وحب هاي الليله.. وكالهم يله يا اخوان چوبي كلها صرخت هيييييي..

ووكفو يركصون جوبي.. بنات وولد كولنه لان ماكو غريب..

صاحلي بكر.. يله سمر تعالي.. وهوه يركص ويفر بالسبحه.. كتله ما اعرف.. كال افه.. تعالي اعلمج..

وكفت وياه.. شبكنا اصابعنه ببعض.. وكفنه متن بمتن.. وكال باعي.. هزت الجتف ساويها ويه هزت جتفي بنفس المستوى..

وراقبي كمزاتي وحركات رجليه واعملي مثلهم.. كمنه نركص واقلدوه وبنات عمتي ويايه ههههه

ونكمز ونرقص مع نغمات القيصر..🎵.. اسمع لغة الحبايب اشكال الوان.. همسه ولهفه ودلال ودلع الخلان.. الورده البيضه بأيدي صارت رمان..🎵..

هههههه فعلا احساس حلو.. واحنه نرقص جماعي ولمة اهل.. وفرح.. ههههههه

اباوع لعادل بده ياكلني بعيونه.. لان واكفه ويه وياهم اركص.. ومو هامني.. ما اعرف يمكن جان مستمتع بعذابي وبكئابتي..

كملت رقص الجوبي.. دا اروح.. جان يلزمني عادل من ايدي بقوه ودخلني للغرفه مالتي.. وعصرني ويه الحايط..

ووكف كبالي.. وهوه لازم اديه بقوه.. ويكول شعندج لاطشه ابكر هااا لا و ترقصين ولا ابالج… يتبع

🌺🌺🌺🌺🌺

اكو ناس.. ما يعرفون قيمتك.. الا لما تتجاهلهم.. يصيرون ينتبهولك.. صح القول اللي يكول.. علاج الجاهل بالتجاهل..

يا جماعه.. انتبهوو.. مو ممكن نقهر حالنه على ناس.. احنه مو ابالهم.. افرحو وارقصو.. حتلكوهم يتراجعو ادراجكم.. كلكلاب.. اجلكم الله..

متابعه ممتعه..

د..

# حكاية_سمر..

،،،،،،،،،،بقلم الكاتبه زينب ماجد،،،،،،،،،،،

البارت_14

سمر.. كملت رقص الجوبي.. دا امشي.. جان يلزمني عادل من ايدي بقوه ودخلني للغرفه مالتي.. وعصرني ويه الحايط..

ووكف كبالي.. وهوه لازم اديه بقوه.. ويكول شعندج لاطشه ابكر هااا لا و ترقصين ولا ابالج..

كتله هاي شبيك عادل تخبلت دووخر.. لزمني من فكي.. كال احجي.. كتله شتريد احجي..

كال متستحين واكفه تركصين وياهم جوبي.. كتله مو بس اني.. البنات كلهم ويايه.. ومحد غريب كلهم اقاربنه.

كال لج لازمه بكر وجتف بجتف وياه شنو ضاعت المستحه.. اباوعله وهوه يحجي بعصبيه.. وواكف كدامي وقريب عليه..

ابتسمت.. وخليت ايدي على اكتافه وكتله غيران يا حلو.. كال ما اريدج توكفين ويه احد..

كتله بكر مو اي. احد.. كال اشوفج هواي مهتمه لبكر شنو القصه.. كتله كل القصه.. انو بكر رجل يختصر كل الرجال بعيني..

رفع حاجبه بتعجب وكال واللهي.. كتله اي طبعا ماكو احد يتقارن بيه.. كال يعني احسن مني مو..

كتله وووو بهواااي.. بقى يرفع بحاجبه.. كتله باوعلي عدوله.. يكولون تعرف ناسك وقت الضيق..

واني لما وكعت كلكم كسرتوني.. ومحد سندني وقواني غير بكر.. ساعدني وحماني منك و من اهلك و من اهلي هم و من العالم اجمع..

ما سمح لاي احد.. يجيب سيرتي بالموزين.. شنو اللي سويته انته وتتقارن ابكر.. غير انك شهرت بيه كدام حنين واهلها ..

هاي اخذتها وهيه مو باكر وعادي سترت عليها..وما حجيت اني شسويتلي.. هاا.. كال حنين اني اخذت بكارتها ومتأكد من شرفها..

كتله واني ممتأكد مني تشك بيه.. بقى يباوع بوجهي.. كتله شوف هذا الفرق بينك وبين بكر.. هوه مشكك بيه ولا لحظه..

ودافع عني وهوه واثق انو اني ما غلطانه.. والفضل اله اليوم اني عايشه واشتم الهوى.. لا جان قتلتوني زور وبدون ذنب..

شوف عادل.. الانسان اللي وكف ويايه هلوكفه وساندني.. ثق لو راد روحي ترخصله..

كال يعني شنو.. كتله عادل مو مثل ميدور ابالك.. بكر بالنسبه اليه اخويه حاله حالك.. كال شنو حاله حالي اني زوجج

كتله انته الكتلي اني اخوج وما عندي غير هلمشاعر اتجاهج.. كال اي بس هذا ميغير الحقيقه.. انو انتي زوجتي و بذمتي..

كتله لا والله تذكرت هسه اتذكرت اني زوجتك وبذمتك وتخصرت.. رفع حاجبه بتكبر و كال بكيفي..

كتله هسه المطلوب جارني للغرفه واكف كدامي.. شنو تريد.. ابتسم.. كال هيج ضايقني رقصج بنص الشباب وبعدين تعاي..

شنو ما عندج غير هلملابس تلبسيها.. كتلها شبيها عاديه.. شال اديه وخلاها على كتفي كال بسسس تفاصيلج مو عاديه.. وعض على شفته وابتسم.. كتله انته عينك وصخه وتضل وصخه دوخر.. هههه

دنضحك بهلوضع فجأه دخل بكر.. سمرر وين الرام.. شافنه انصدم ووكف يباوع علينه.. عادل وخر مني..

كاله غير ادك الباب من تدخل ..كتله ما ادري بالرام بكر انطيته لرنا.. بقى مصدوم وهوه يباوعلنه.. كال اسف دخلت بدون قصد..

وطلع.. عادل كال يله اروح.. كتله ماشي الله وياك.. طلعت وره عادل.. شفت بكر راح الغرفته بسرعه وسد الباب..

عرفته تضايق من منظرنه .. دا امشي شفت امي كبالي.. فرحت حيل حظنتها وكتلها هاي شوكت اجيتي.. كالت هسه..

كتلها منو جابج كالت احمد اخوج.. كتلها شبيج مو على بعظج.. كالت اريد احجي وياج.. كتلها تعالي الغرفتي..

دخلت كالت شنو غيروها غرفتج.. كتلها غرفتي السابقه اخذها عادل يتزوج بيها وهاي بكر جابلياها حتى ما انقهر على غرفتي..

كالت بس هاي احلى.. كتلها عوفينه من الغرفه وسولفيلي شكو.. كالت ليش عادل اتزوج عليج..

ضحكت باستهزاء.. كتلها يريد مره غير.. واني لليوم يعتبرني اخته وميريدني.. كالت شنو معتبرج اخته..

كتلها يوم عادل جان مجبور عليه مرايدني.. وسالفتي جانت حجه حتى يتخلص مني ويتزوج اللي يحبها..

كالت اللي يحبها.. كتلها ايي يحب وحده ساعديه.. وعمتي مجانت قابله وخطبتني اله بالغصب.. من صار ويايه هيج..

اتفق ويه بكر يستر عليه في سبيل بكر يزوجه.. كالت وهسه كتلها شنو هسه هذا حالي..

كالت باعي يمه.. ابوج من سمع بعادل راح يتزوج.. ضل بتعارك وياي.. وكال كولي لبنتج لتفكر بطلاك.. لو رجعتلي مطلكه اذبحها واشمرها للجلاب..

كتلها يمه وتالي ابقى كل عمري هيج.. هم اريد اشوف حياتي.. كالت والله يمه شو عايشه وعيشة خير..

ملابسج واناقتج وغرفه تخبل مدلله.. شتردين اكثر بعد.. كتلها يمه تحجين صدوك.. اني شايف الام تفهم بنتها من نظره.. وانتي تحكمين على حياتي من شكلي..

كالت لعد شبيج ليش ممرتاحه.. صفنت بوجها.. نزلت دموعي بساع.. كتلها بس فكري بوضعي دقايق.. عروس مصارلي 3 اشهر من تزوجت ..

وزوجي اليوم يتزوج عليه.. تشوفين اكو سعاده بالموضوع.. يمه ابين اني قويه وما مهتمه بس ماما من داخلي غيرر..

والله دا تعذب والله.. دنكت ابجي.. خلت ايدها على كتفي وبقت اطبطب وتكلي يمه اني شبيدي..

تعرفين ابوج وعقليته المره يحركها ولا ترجعله مطلكه.. عيب عدنه المره تطلك.. اتحملي شتسوين.. والله يمه هنا ارحملج..

لو اطلكتي ورجعتي يذبحج والله.. واحمد بعد امر منه يوميه يتحلفلج.. وعمج خليل ممقصر يوميه جاي لابوج ومعيره بسالفتج..

ويوميه جاي بشغله يتوسطله ويكله لا تنسى فضلنه عليكم سترنه بتكم.. وما خلينه العار يركبك..

كتلها يوم ما غلطت ويه احد والله.. كالت هذا الحجي ميمشي عد ابوج تعرفينه متعصب وما يتفهم هلكلام ومتحلفلج..

لو رجعتي اله يذبحج ويتخلص منج.. وهوه ساكت هسه.. لان بكر تعارك ويه ابوج وكايله شعره متمس من سمر.. مدامها جنتنه..

من تصير عدك وترجعلك عود اتصرف.. الا هوه لليوم ما ناسي السويتيه.. استري علينه يمه واتحملي..

كتلها الناس ارحم منكم والله.. الغربه سامحوني وانتو لليوم تتوعدولي.. شنو السويته.. وهيج مقاطعيني..

يمه اني بتكم نسيتوني شنو.. عوفيني من الطلاك.. لا فد يوم خابرتوني لا سألتو عليه مو كأني بتكم وكأنو بس ردتو تتخلصون مني..

كالت ابوج ميقبل اخابرج مذممني.. يكول عوفيها تعرف غلطها وتدفع ثمن اخطاءها.. لا تسانديها علغلط..

كتلها يمه هذا اب لو عدو.. كالت شسوي بس اني معليه بيه واحاولت اتصل بيج بدون علمه ورقمج خارج التغطيه.. بعد شسويلج

كتلها اي صح غيرت سيمكارتي.. كالت انطينياه.. طلعت فونيو حولتلها رقمي.. وكالت انشالله اخابرج صيري قويه يمه.. واتحملي وجاري الامور

هزيت راسي بيئس.. كالت يله اني اروح.. كتلها وين بعد.. كالت لا اجيت بس احاجيج واروح.. باوستني وراحت..

اجت لحظات.. بس احس بحنانها من دخلت بيت عيالي.. رغم الكلام النقلته اليه كأنه سم.. بس بمجرد ما طلعت حسيت بفراغ اكثر ..

رجعت للصاله.. لكيتهم يتحظرون.. كتلهم هاا.. كالو يله غير نزفهم للفندق ترحين.. كتلهم ما اعرف.. كالت اميره وج شنو ما اعرف.

دروحي حظري نفسج بساع راح نصعد سياراتنه.. كالت بكر وين.. كالت رنا بكر بغرفته قافل الباب ويكول روحو اني ما اروح..

صاح عادل.. غير عساس هوه يزفني بسيارته.. كالتله ما اعرف عصبي ويكول ما اروح روحو.. كال عاد بس خل ينطينه سويج سيارته..

اني من سمعت هيج.. قررت ما اروح للزفه واشوف بكر شبيه.. دكت الباب عليه اميره..

كالتله بكر بس انطينه سويج سيارتك.. فتح الباب انطاها المفاتيح.. كالتله شبيك خويه.. كاللها ماكو شي بس لزمني صداع قوي..

كالتله خاف من التعب.. هز راسه.. كالتله نام ارتاح.. سد الباب.. دارت كالت ها سمر مترحين..

كتلها لا ..كالت عمتي اي احسن ابقي بالبيت لان عمج خليل هم رايح ويانه.. وبكر نام.. اكعدي بصاله لحد منرجع ..

ميصير نعوف البيت خالي.. كتلها انشالله روحو.. راحو.. مشيت لغرفة بكر.. دكيت الباب مره مرتين ما رد..

فتحته.. لكيته كاعد ؏سرير ويشرب جكاير.. كتله صار ساعه ادك الباب عبالي نايم.. باوعلي انوب دار وجها..

اتقرب يمه.. عيونه حمررر.. ومدمعات.. خليت ايدي على ركبة رجله وهوه كاعد.. كتله شبيك بكر..

كال ماكو شي.. كتله تضايقت من وكفت عادل وياي.. باوع عليه بعصبيه.. انوب رجع دار وجها مني ويهز براسه..

وكال بس اريد عاقل يفهمني ويفهم البيه ماكو.. ويضرب بأيده ويهز برجله بنرفزه..

كتله بكر فهمني انته من شنو مغثوث بالضبط يعني متعرف عادل زوجي.. لو متناسي الشغله ومفكر اني الك..

صرخ بوجهي وكال انتي ليش متفهمين عليه.. عادل مو رجلج افتهمي مو رجلج انتي الي ..اني احق واحد بيج..

ولج حسي بنار كلبي شويه ولج جاي احترررررك تفتهمين لو لا.. جاي اموووت.. ادخل الكاه واكف وياج وعاصرج بالحايط..

لا اكدر اصرخ واكوله وخر منها هاي الي.. ولا اكدر اسكتتتتت.. بقت بس نار تفور جواي.. ويدك على كلبه بقوه بأيده.. ويكولي افهميني لخاطر محمد مو تعبت..

كتله بكر ليش اكولك مشاعرك غلط ومو لازم تنجرف وراها.. بكر اني مو الك.. ولا اكدر بيوم اصير الك..

كال انتي بس سانديني بس كوليلي اريدك وشوفي شلون اجرج من حلك الذيب.. واخذج..

كتله بكر لخاطر الله اصحى اني مرت عادل اخوك من دمك ولحمك صعب صعب شبيك..

كال والله لو اعرف انتي زوجة عادل لو عادل ممكن يصيرلج زوج فلا احجي.. جان خليت هلنار بداخلي وسكتت..

سمر انتي ما يربطج بعادل غير ورقه.. بس اسمحيلي احرك هلورقه وصيري الي..

كتله بكر والناس صرخ خره بالناااااس ولج معليج بالدنيا بس باوعيلي تعبتتتتت..

كتله بكر انته كولشي بالنسبه اليه بس احجيها وياك بصراحه ما عندي مشاعر حب الك ولا اريد تصير عندي هيج مشاعر اتجاهك..

لان هلشي غلط والطريق مستحيل.. انسى بكر انسى لخاطري والله تتعب لو بقيت تفكر بهشكل..

محد راح يقبل بعلاقتنه.. حتى لو اطلقت.. من عادل.. تتوقع امك لو ابوك يقبلون تتزوجني.. لو تتوقع ابويه يقبلها..

يذبحوني من صدك صدكني.. دار وجها.. كال ولج بس بس حسي بيه وسانديني احارب الدنيا واخذج.. حتى لو محد يقبل ما اهتم لاكبر راس

اخذج واعيش وياج بغير ديره.. اطلعج برا ما اخلي اي احد يوصلج بس اوكفي وياي سمر مو تعبت والله..

كتله ههه اشرررد وياك تريدني.. بكر اني ما غلطت ورادو يذبحون واعتبروني عار لو شردت ويه اخو زوجي شيكولون عليه..

والله اللي بلملاهي يطلعوها احسن مني.. كال معليج بالعالم بس فكري بيه ..

كمت منه.. كتله بكر اخاف والله اخاف.. ما اكدر افتهم اعتبرك اخويه.. ولا تلح بهلسالفه.. لان. والله ما املكلك مشاعر .. انسى المشاعر البداخلك انساها.. امحيها لان غلط

باوعلي بنظره يائسه.. وكال حاربت العالم كله وكفت بوجها الخاطرج.. ومستعد اضحي واضحي وانتي مو مستعده حتى تعترفين بحبي.. جر نفس حيل ودار وجها..

كتله لان ما اعتبرك غير اخ ياريت تفهمني.. دار وجها عليه وهز راسه.. والدموع تجمعت بعينه..

كال تشوفين هلكلب.. ويدك على على صدره. ياما وياما تعذب بحبج.. جنت احترك من اشوف لهفتج لاركان وضحكتج وياه..

ويبقى كلبي يفور بسكوت.. واطحن بروحي طحن..تدرين ياما اشوفج تضحكين ويه عادل وغيرتي عليج تذبحني..

مرات اكره حتى اخوي وبدي اكتله.. . لان جنتي تضحكيله وتتحسسين مني وما تضحكين وياي.. تدررررررين شصار بيه من كالولي راح نخطب سمر لعادل..

تدرين شلون متت بيوم زواجج وحركت روحي واشرب بهلعرك بلكي انساج وما نسيت..

تدرين شكم مره اني تلوعت بحبج.. وانتي هسه جايه اتكليلي انسسسسسسى اني اعتبرك اخوي هه..

ولج حبج بكلبي صارله 10 اسنين ربى بداخلي مثل الطفل ولا فد يوم قل ضل يزيد ويزيد.. وج روحي اسئلي شنو عذاب حب من طرف واحد 10 اسنين..

يحجي والدموع كامت تنزل من عينه بحركه بحيث متنزل على خده من عينه للكاع.. ويأشر بأيده بحركه

وج والله لو ميت ارحملي من هلعذاب وانتي تكوليلي انسى رووووحي لاي ام بالعالم وكوليلها اشمري ابنج العمره 10 اسنين بالشارع وانسيه..

شوفيه تكدر.. ولج حبج بكلبي طفل يكبر يوم وره يوم وانتي اتكولي انسى اعتبرني اختك..

مسح دموعه بحركه.. وكال روحي سمر.. ويجرالج الترديه اختي اختي.. كام من مكانه.. وفتح الباب..

وكال اختي لو سمحتي اريد انام.. اني دموعي تصب كمت من مكاني كتله بكر كال هشششش كتلج اختي لو سمحتي اريد انام..

طلعت من غرفته سد الباب وراي بقوه.. رحت الغرفتي انهاريت بالبيجي.. زين ليش ابجي.. اني مو ما اريده.. مو اكوله انسى واعتبرني اختك زين ليش ابجي..

وكفت كدام المرايا.. اباوع لروحي وخليت ايدي علميز وابجي بحركه وما اعرف ليش ابجي..

احس خسرت شي جبير بحياتي.. بقيت ابجي وموكفت دموعي لحد ما سمعت الباب الخارجيه انفتحت..

يعني اجو.. كمت عدلت وجهي ومسحت المكياج لان كله سال بدموعي.. طلعت الهم.. كالت عمتي هااا شبيج..

كتلها كولشي مابيه.. كالت شو عيونج حمر.. كتلها لا بس المسكاره اذتني دخلت ذرات منها لعيني واتأذت..

كالت رنا ههه باع العياره تشمر حجتها بالمسكاره.. كوليها شنو مستحيه.. عادي تره واذا اتزوج عليج لا اول ولا اخر وحده..

كتلها منو قصدج عادل.. كالت غشمي روحج.. كتلها لا والله اصلا عادل مثل اخويه ما معتبرته زوج خو اني رحت خطبتله وركصتله بعرسه على شنو ابجي..

كالت عمتي طايح حظ.. وانتي اكثر منه ما عرفتي شلون تكسبين عادل خليتي هاي الزباله تاخذه..

كتلها غير يريدها يا عمه شسوي.. معتبرني اخته شنو بيدي.. كالت يغبره هوه رجال ودومه يسكر ادلع عليه واصير مرته لو ما ادبريها..

كتلها عشنو.. ليش اريد الميريدني خليه براحته.. كالت اهمداج يلغبره ما بيج. خير.. درت وجهي جاي اروح.. كالت بكر بعده نايم.. كتلها ما اعرف ماشفته طلع من غرفته..

كالت اميره سمر ولو اتعبج نكلي الفراشات تعبنه نريد انام.. كتلها اي .. انوب كتلها صدك لعد عماتي البقيه وين شو رجعتو وحدكم..

كالت من زفيناهم للفندق.. كلها طشت راحت لبيوتها.. صار اليل بعد مو مال يرجعو ويانه وتعبنه من الصبح لحد الان بس ركض هوه عرس هوه حنه..

كتلها هاا اي زين.. رحت شلت الفراشات وفرشت للبنات ولعمتي.. كتلها عمه لعد عمو خليل وينه...افرشله لو لا

كالت لا راح لبيت اخوه مؤيد عازمه على مشويات ويردون يسهرون.. كتلها هااا زين.. عفتهم. ورحت لغرفتي..

بليلتها ما نمت وكلما اتذكر دموع بكر دموعي تنزل.. نسيت عادل اصلا بهاي الليله ولا كأنو زوجي اللي متزوج عليه.. كل فكري كان بكر وكلامه

كعدت الصبح على صوت ضحكات عادل العاليه.. طلعت.. صحت مبروك يا عريس..

كال الله يبارك بيج عيوني.. اتقدمت يمه.. كتله شلونه الزواج.. وغمزتله.. كال يخبل.. كتله يوم الالي واذبح طلي..

ضحك و كال لتخليني افشر ههههه.. كتله خبل مو بيدك.. ولعبت بشعره..

فعلا كمت احس عادل اخويه وما احس بأي مشاعر اتجاها.. واصلا زواجنه غلطه غبيه

من لعبت بشعره حنين كامت بساع.. درت العادل وغمزتله كتله استلم الغيره من الخنزيره.. ضحك وراح وراها..

دخل بكر من بره.. بدون سلام ولا كلام كعد.. كالتله امه وين جنت.. شال راسه.. باوعلها .. رحت بشغل..

كالتله اجه الافندي ما باركتله. ما رد عليها.. ودار وجها لرنا.. كاللها رنا ريوك بسرعه وجيبيلياه للغرفه.. وكام

كالتله اي تدلل.. كمت اني دا اغسل.. كالت رنا سوي الريوك لبكر وصيحيني اخذ الصينيه بساع.. بصيغة امر..

باوعتلهاا استغفر الله واله مال دفره هلبنيه.. عفتها ومشيت سويتله ريوك شفت رنا بالصاله.. اخذت الصينيه ورحت لغرفته..

دخلت باوع ورجع دار وجها للكمبيوتر بعدم مبالاة.. وكال خليه يمج.. خليته وتقربت يمه.. كال جاي اشتغل على مشروع مهم.. ياريت تتركيني لوحدي..

كتله بكر هاي شبي…. قاطعني رجاءا كلت.. لوووو سمحتي.. اخذت نفس وكتله براحتك..

طلعت.. كالت رنا ليش اخذتيله الصينيه.. كتلها ما لكيتج.. بقت تحجي كلعاده.. عفتها ورحت.. طلعت كبالي مرت عادل..

لزمتني.. وتحجي بصوت ناصي.. وتكلي شايفه لو حاولتي توصلين يم عادل شسوي بيج والعباس اذبحج..

كتلها عوفي ايدي وولي مني ولي.. ناقصتج اني.. عفتها ورحت اكلت لفه وبعدها رحت نضفت ورحت لغرفتي اقره..

للضهر صاحتني اميره.. للغده كمت اكلت وياهم وبكر ابد ما طلع ولا كعد ويانه.. كالت عمتي شبيه بكر ليش هيج مهموم وضايج..

ما حجيت.. دارتلي.. كالت سمر احجي ويه بكر وشوفيه شبيه.. هوه يرتاحلج ويعتبرج صديقته يسولفلج..

جاي احجي.. حجه عادل من وراي.. وليش سمر التحجي وياه يله يقنع.. اتركيه يمكن عنده شغل شي..

كتله هوه فعلا عنده مشروع داخل بيه شاغل باله.. كمت عادل جر ايدي ووكفنه بره.. كال سمر احذرج ما الج علاقه ابكر

تره كمت اضوج من علاقتكم .. كتله شبيك عادل..كال لتكليلي اخوي.. هذا الكلام ما اعترف بيه..

جاي احس بكر رجلج مو اخوج. من كد الاحتكاك البينكم.. كتله بسببك.. انته العفته ياخذ دورك..

كال اكلي تبن لا اسطرج .. اذبحج والله واشمرج للكلاب لو حسيت اكو هيج شي وخلي ابالج طلاك ماكو و حتى اخوج البارحه اجه وحجه وياي

كال احركها ولا ترجعلنياها مطلكه.. كتله احمد كالك هيج.. كال اي.. البارحه من جاب امج شفته بالباب..

دمعت عيوني.. من سمعت اخوي هيج كايل لعادل عني.. اجت حنين كالتله شعندك هنا حبيبي ..

كاللها هيج حياتي ماكو شي.. واخذها بحظنها ويبوسها من خدها وراح للغرفه.. صدك كرهت روحي بهلساعه..

احس روحي خسرت كولشي زوج واهل وحتى السند الجان ساندني بكر خسرته.. نزلت دموعي بحركه.. طلع بكر.. مسحتها بساع ودرت وجهي...يتبع

🌺🌺🌺🌺🌺

شتشوفون تصرف سمر.. غباء لو ضعف.. ورأيكم بحب بكر غلط لو صح.. شاركوني توقعاتكم

متابعه ممتعه..

جد

# حكاية_سمر..

،،،،،،،،،،بقلم الكاتبه زينب ماجد،،،،،،،،،،،

البارت_15

سمر.. احس نفسي خسرت كولشي.. اهلي زوجي.. وحتى السند اللي يسندني بكر.. خسرته

بقت تنزل دموعي بحركه.. طلع بكر من غرفته مسحت عيوني ودرت وجهي ومشيت.. صاح شبيج

درتله وجهي.. كتله وياي.. صفن بوجهي.. كتله ما بيه شي.. كال هاا زين.. ومشى..

رحت لغرفتي ساعه ابجي على حالي والوضع الاني بيه وساعه اكول ما الي غير دراستي واقره..

كعدت ادرس.. للمغرب طبت عمتي.. كالت كومي يلسعده شوفي العشا شنو.. كتلها اي عمه.. كالت وصيحي هاي وياج

كتلها منو.. كالت ضرتج الغبره.. ابتسمت.. كتلها عمه عروس خاف عادل ميقبل.. كالت علمود اشك راسه صيحيها..

كتلها انتي صيحيها اني من اصيح هسه يكولون غيرانه منها.. كالت امشي انه اصيحلها..

وصدك راحت لغرفت عادل.. دكت الباب ودخلت.. كالتلها يله عيني ايدج ويانه بالعشا.. خوات رجلج كلهن هنا خطار وبس سمر بالمطبخ..

كاللها عادل يمه بعدها عروس اول يوم.. كالتله خل تكوم تتعود.. معليك انته لتدخل بشغل النسوان عيب..

كالتلها صار عمه ادللي هسه اكوم شنو قابل لشغل يموت.. وكامت اجت يمي.. تباوعلي بنص عين..

كالت شجاي تسوين.. كتلها عجين.. راحت فتحت الثلاجه.. كتلها اذا تردين تساعدين..

سوي الحشوه مال اللحم بعجين.. كالت ما يعجبني انتي سويها.. دخلت عمتي.. كالت ها سمر شراح تسوين للعشا..

كتلها عمه راح اسوي لحم بعجين كالت خاف ميكفي.. كتلها نكلي وياه فنكر وسالكه قطع كنتاكي اعتقد كافي..

كالت وهاي شسوي.. كتلها تكول ما يعجبني اشتغل.. كالت ااي مو احنه نمشي بمزاجها

كالتلها يااا عمه جذب وداعتج اتقشمر وياها.. كالتها يله كومي اشتغلي بساع وبدون لغوه.. كتلها طلعي بتيته وقلميها..

خاف متعرفين لل لحم بعجين.. عمتي بعدها واكفه.. كالت ياااا شلون اسويه يخبل ما ينشبع منه..

كالتلها عمتي ديلا سوي شوفينه.. راحت عمتي.. كالت لا تحجين حجي زايد والله اكول لعادل عليج اخلي يشوفج الويل..

كتلها لا والله صدوك.. طب عادل.. كالتله حبيبي هم زين اجيت.. تره اذا ظلت سمر هيج تعاملني اموت..

كال شكو.. كالتله تكرّه عمتي بيه.. وتغلط عليه كبالها وعمه ما تحجي قابلتلها.. اني مهتميت الحجيها.. توقعت عادل ميسمعلها

بقيت مدنكه اسوي بالعجينه.. جان يدفرني برجله.. ويكول سمر احذرج تستخدمين هلاسلوب اصلخ جلدج والله.. حجه هلكلمه.. وبكر صار فوكانه..

صاح هاي شكو.. اني احك برجلي من الضربه ودنكت عيوني غوركت بدمعها.. كاله عادل ماكو شي.. كاله ليش ضربتها..

كاله وانته شعليك.. كاله لا تخليني اخربط وجهك والله.. اتركني محترمك.. ودار وجها وراد يمشي

صاح عادل وراه شوف بكر سمر انته معليك بيها.. اني رجلها وبكيفي.. دار عليه بوجه جامد.. كاله استرجل وبعدين صير رجلها..

ومشا .. اني بقيت مدنكه.. كال عادل سمعتي الكلته لو لا.. كتله عادل شبيك.. محاجيه وياها والله حنين جذابه..

كال انجبي لا اضربج والله شنو تغارين.. باوعت هذا شبيه ..بيوم واحد كلبته عليه.. الضاهر صدك تكدر تلعب بعقله.. اهمداك كلت بكلبي شكد كرهتك

درت وجهي منه وشلت العجين چيسته وضميته بالفرن مال الطباخ.. درت وجهي.. جان اشوف عادل واكف ويه حنين ويتباوسون..

استغفر الله ربي واتوب اليك.. هزيت راسي..وردت اطلع.. انضربت بكتف بكر.. صاح عادل..

دارله عادل.. كاله من اكلك استرجل تزعل.. شنو معنى هلتصرف التافه بنص البيت..

كاله غير مرتي حلالي شعليك انته وين ميعجبني.. كاله لا تصير حيوان واحترم نفسك ما اريد اهينك..

مرتك عندك مهجوم تاخذها وتروح تسوي اللي يعجبك ممنوع هلتصرف بالبيت.. صار معلوم..

انوب دار وجها.. لمرته.. كاللها.. الخجل حلو للمرأه ياريت تتصفين بيه.. انوب دار وجها عليه باوعلي ومشا..

حنين حجت.. يمه شلون يخوف هذا.. تكول ملك الموت من يوكف فوك الواحد.. شبيه عقده.. كاللها عادل ووو بعدج اشايفه من عقد بكر..

اخذت نفس ودرت عنهم و طلعت المواد وكعدت اثرم دخلت اميره.. كالت هاي جيرانه جايه وتعرف بيج طالبة انكليزي..

تريدج تقرين بتها صف ثالث متوسط عدها امتحان باجر.. كتلها اي عادي.. درت وجهي لحنين كتلها كملي العشا اني رايحه..

عادل صاح ويين تعاي.. كتله المره تريدني اقري بتها.. كال اني وحنين راح نروح للغرفه ..كتله وشسويلك..

عفتهم ورحت.. شفت عمتي.. كتلها وينها المره كالت بالاستقبال كاعده.. كتلها عمه بس وصي حنين تكمل ابدالي..

كالت روحي.. رحت سلمت علمره.. وكعدت اقري البنيه.. طولت بقرايتها.. لحد ما طلعت.. لكيت حنين مبتليه بالعشا..

اتقربت اميره يمي وكالت شلون لحم بعجين سوووووت كتلها زين سوته.. كالت يبووووه جعامير جعامير ونصه محترك..

كتلها حلللل خخخخ وتكول عمه شلون اسوييي ما ينشبع منه.. دخل تشبع بيه هيه.. ضحكنه.. اجت يمي.. وتفور..

مشيت وطلعت الصينيه مال اللحم بعجين.. وكتلها اميره.. ولج شنو هاي مو لحم بعجين هاي كراج العلوه هههه

هيه كالت ميعجبج سم ابطنج لتاكلين.. كتلها لا شلون عروستنه لازم نضوك اكلها.. جريت وحده. جان تجرها مني..

خربت ضحك عناد وياها.. واميره تضحك.. اجت رنا كالت اي عيني يلطباخه الماهره شلونج هسه انتي عاد..

كتلها علاقل اكول ما اعرف مو اسوي نفسي افتهم واخرب الاكل ههههههه..وطلعت جان تصيح عمتي رنا رجلج اجه يمه..

كالتله طب حمودي يمه طب.. دخل صرت كباله.. مد ايده هلا سمووووره شلونج.. من ماتت سموره ولا شافت وجهك.. بس عناد وي رنا كتله هلااااا حمودي شلونك..

وسلمت ايد وياه.. رنا تخبلت.. عفتهم ورحنه نحظر العشا.. مديت السفره.. كلهم تقدمو للسفره..

عمتي كالت سمر صيحي لبكر.. كتلها اي عمه.. جان تكول اميره مو هنا طالع.. عفته واجه عادل واحمد هم كعد كلنه التمينه عسفره.

طبعا عمه ما بقت عللحم بعجين مال حنين دزت دجاج شوي من بره.. اكل واحمد يباوعلي من جوه لجوه ورنا تنتبهله..

بس اني ولا كأنو.. طب بكر كال هلا احمد هنا.. كام احمد.. كاله بكر استريح استريح ما على الاكل سلام..

ودار وجها لعادل كال عادل ابيش الساعه دوامك.. كاله ب8 غير.. كاله الصبح مر عليه اخذ مفاتيح السياره

ووصل سمر بطريقك.. كاله بس شغلي وين جامعة سمر وين.. بعيد كاله اطلع من وكت تلحك..

كاله خوش هاهيه اني الصبح اوصلها.. بداخلي ضجت لان مو مهتم بيه.. ويريد يتخلص مني..

حسيت بنفسي ثقل عليه.. كملت العشا والتنضيف ورحت لغرفتي قريت ونمت.. كعدت الصبح.

دكيت الباب على عادل.. طلع.. كال يله.. طلعت وراه حنين.. تعدل بملابسه وتبوس بيه..

كتله عادل طالعه كدامك يم السياره كال روحي بس اجيب السويج.. رحت صعدت وياه.. مشا.. لهناك شغل الMP3 مال السياره..

طلعت اغنية حسين البصري علميني شلون انسى.. كال خرب عقله بكر شكد لازك بحسين البصري..

ددوري دوري شوفي بالاقراص ماكو سعد الحلي باوعتله هيج😒 كتله سعد الحلي من الصبح..

كاال غير خرافي كتله يابه دكووم.. بقيت اكلب بالاقراص كله حسين البصري 😑 كتله ايّس غير البصراوي ماكوو

كال دسدي يمعوده سدي ..ما بينه حيل لطم من الصبح..هذا بطران بكر.. عقده حتى بأغانيه..

وصلني للجامعه كتله هااا انتضرك تجيني وقت الطلعه لو لــNOـا ..

كال بيش الساعه اطلعين.. كتله بالوحده بالوحده ونص هيج.. كال ما اعرف اني اطلع ب3..

كتله روح اني ارجع.. رحت داومت.. دخلت كالت صديقتي انمار.. هااا شنو الاخبار.. كتلها زي الزفت والحمدلله..

كالت ياا ليش.. كتلها عادل اتزوج وبكر طفر.. كالت بكر ليش طفر.. سولفتلها القصه..

كالت سمر انتي والله جبانه وغبيه.. شبيج اكو وحده تعوف هيج جوهره.. وشنو مثل اخوج بابا اصحي..

كتلها انمار مو بكيفي والله ما عندي احساس اتجاه.. واصلا ما اعرف مشاعري شنو.. تتخيلين بعد الصار تصير عندي مشاعر..

تركت اركان الجنت كل عمري احلم بيه ولليوم احن اله.. واتزوجت عادل اللي تمنيت يباوعلي بنظره وتاليته اتزوج عليه..

ورجعت غيرت مشاعري اتجاها وحسبته ولا شي.. هسه انوب بكر.. كتلها تعبت والله حتى مشاعر ما بقت عندي..

كال اهمداج مثل البعير للمنخل وبرك.. ولج انتي حبيتي هذا وذاك من وصلتي لليحبج صدك بطلتي تحبين..

كتلها انمار مو بس شغلة حب.. انمار صعب وما اريد اورط نفسي.. ولج وين تمشي عدنه اشرد ويه اخو رجلي لو احبه واتزوجه.. شبيج

غير يدكولي طبل.. كالت مو تكولين يسفرج.. كتلها تحجين من كل عقلج انتي غير ابوي يتبعني ويذبحني والله..

كالت لا تخافين بكر وياج.. كتلها عادل ميقبل يطلك وحتى لو اطلكت لازم الزم علاقل عده يله اطلك يحقلي اتزوج..

وتعاي هاي وين احلها.. كالت اي اشردي وياه واهناك خلصي العده واتزوجي.. كتلها لا يمه عزااا اشرد واني متزوجه.. الا ما رايده روحي شبيج عيني لو ما عايشين بالعراق .. يذبحوني والله

كالت ولج اجبن منج ما شفت.. كتلها انمار حياتنه مو لعبه ونغامر بيها ومجتمعنه ما يرحم.. وبكر شغله عقاري هنا..

هناك ما نكدر نعيش.. ما اكدر اصلا مجرد التفكير بهسالفه عيب والله.. كالت امداج لو اني ابمكانج اخخخخ وين الله ووواحد يحبني هيج..

ولج صيري مثل امج جريئه مو عافت اهلها وشردت ويه ابوج وكم سنه ورجعت الامور تمام..

كتلها اخاف ما اكدر والله اخاف.. اصلا امي كل سبب عذابي.. هيه الخلت هيج شخصيتي خوافه..

من كد ما جانت بصغري تخوفني وتكتلني.. ما بقت عند قوه اوجه بيها مصيري واتقوه.. كالت سمر لو راح بكر وخسرتيه والله تتندمين..

كتلها اسكتي انمار فدوه عوفيني اني هيج هيج خسرانه.. وكمت منها.. كملت محاظراتي..

طلع كدامي الاستاذ منير.. كال شلونج سمر.. كتله هلا استاذ.. كال اتزوجتي.. كتله اي.. كال صح زوجج اتزوج عليج..

كتله منو كالك.. كال سألت عليج احمد زوج حماتج مو.. كتله هاا اي.. كال صح ميريدج.. كتله استاذ شنو التريده بالضبط..

كال انتي.. اريدج من زمان عاجبتني.. كتله واني من زمان اعتذرت وكتل ما اكدر.. باوعلي ويباوعلي بابتسامه واحسها كلها حقاره..

مو تتندمين.. كتله عشنو اتندم اني متزوجه.. جان يضحك بستهزاء ويكولي صدوووك ههههه ويمشي ويكول هينه..

هزيت راسي انوب الشايب عليه ياربي.. طلعت رحت ويه خط ولد اعرفه بالمنطقه اسمه علي.. ووصلني للبيت..

كتله علي بعد يوميه تعال عليه ماشي.. كال ادللي.. نزلت.. من السياره سديت الباب لكيت بكر واكف وراي..

كال منو هذا.. كتله خط ..كال ليش وين عادل يحجي ووجها عبوس ما بيه قطره ضحكه جامد..

كتله بشغله غير.. ردت ادخل وكتله هاا صدوك.. وصيت الخط يجي كل يوم اخاف انته ما عندك وقت توديني..

هز راسه وهوه مكتف اديه ليوره ومرد عليه ولا باوعلي. مشا.. دخلت للبيت.. لكيت حنين كبالي.. كالت لا هلا ولا مرحبا.. فڪر

درتلها.. واتقربت يمها.. كتلها باعي تحترمين لا والله اروح لعمتي واكولها عادل اخذ حنين لان نام وياها قبل الزواج وتورط..

فتحت عيونها كالت جذابه.. اطلعين حجي عليه.. كتلها خل احجي لعمتي وشوفي تصدكني لو تصدكج..

كالت بسيطه.. اني الج.. عفتها ورحت للغرفه بدلت ونمت.. غافيه و ما احس الا عادل يدفرني فزيت مرعوبه.. اباوعله فوك راسي وعيونه نار..

كتله شبيك عادل.. كال انتي تهددين تحجين لامي.. جرني من شعري للكاع ورفسات برجله وضرب واني ابجي واصرخ..

عادل الله يخليك عوفني والله ما احجي ويلزمني من شعري وراجديات ويفشر ويغلط بنت الكلب انتي تهددين اموتج والله

دخل بكر بساع دفعه حيل للكاع.. واني كمت وره ضهر بكر وابجي.. كاله لك انته هم رجال حقير شنو انته وتمد ايدك عليها..

كاله عادل انته بالذات ما الك شغل بسمر ..كال تنجب وتاكل نعل.. انته كل سلطه ما الك عليها.. اذبحك والله لو اتقربت يمها..

كاله عادل شعندك ويه مرتي كول مخلي عينك عليها.. كاله ولك انته شنو وتحجي وياي هيج.. دفعه بكر للكاع ونزل بوكسيات ويتضاربون..

عادل يضرب وبكر يضرب.. دخلت عمتي تصرخ يمه ولدي اتذابحو .. وتجر بيهم وتصيح فلك طر امهات السحووووور موتن ولدي..

الله لا ينطيجن.. اني اجر ابكر كوه واعمتي تجر بعادل.. من الضرب والهوسه والصوت العالي.. احس كمت ما اشوف..

اريد الزم ابكر ما اسيطر.. الى ان دارت الدنيا بيه واغمئ عليه ووكعت وراهم.. ما صحيت الا واني بالسياره مال بكر..

امدده وره منوميني وبكر يسوق وعمتي كاعده يمه.. كمت اصيح بكر.. بكر.. بكر ..

وكف السياره وفتح الباب.. وكال هااا سمر بس كوليلي شبيج.. كتله مي.. ما اعرف احس نفسي بين الحلم والخيال ما اعرف اذا صاحيه لو حقيقه..

راح ركض اشتره مي واجه يشربني.. وعمتي كاعده بالصدر وتكول الله لا ينطيجن ناويات تموتن ولدي.. وتحجي تحجي راسي ذبحني منها..

صاح بكر يمه لخاطر الله اسكتيييي.. سكتت.. كال سمر تسمعيني.. كتله راسي راح ينفجر راسي..

رجع ركب السياره وداس بيها.. وصلنه للمستشفى.. نزلني على كيف.. جابولي سكملي متحرك واخذني بيه..

دخلني للدكتور.. اخذولي دم وقاسو ضغطي كالوله ضغطها مصفر هم زين تلاحكتلها.. اني راسي احسه ذابحني وعيوني ما اشوف بيهن من كد الوجع..

كاله الدكتور انته زوجها.. كاله لا حماها.. كاله البنت متعرضه للضرب واكو اثر جروح ودم على وجها كالتله عمتي لا يمه وكعت من الدرج وتخربطت..

كاللها حجيه هذي اثار كف على خدها.. كاله بكر شنو الاجراء التتخذه بهلخصوص..

كاله نسويلها تقرير بالاضرار اللي متعرضه الها.. كاله بكر سوي.. راح الدكتور وعمتي تتعارك ويه بكر وتكله ولك تسجن اخوك يمه شبيكم شجاكم..

يكلها يطبه مرض خل يتأدب ويتعلم. ميمد ايده عليها.. كامت تلطم على خدها وتتعارك وياه وهوه واكف يباوعلي ولا جنها تحجي وتصيح ..مو منتبهلها..

واني بس لازمه راسي واون ..ضربتني عمتي وكالت كومي بت رجاء كومي راح تموتين ولدي الله لا ينطيج..

كاللها بكر يمه كافي لا والله اطردج من المستشفى واخليج ترجعين للبيت.. بقت واكفه ودردم ادردم وووو ذبحت راسي بلغوتها..

عاد اجو ركبولي مغذي وانطوني علاج وبكر طلع يم الدكتور.. اتقرب عمتي يمي.. وكرصتني حيل من خصري..

وكالت سمر والله لو اشتكيتي على عادل وقدمتي التقرير اذبحج واشمرج للجلاب والله ..لو ارجعج لابوج هوه يشوف شغله وياج..

كتلها عمه ما اشتكي والله بس عوفيني.. اجه الدكتور.. وبكر وياه.. كال شلونج باباتي ابتسمت.. كال الحلوه طالبه لو شنو..

كتله اي طالبة اداب.. كال شطوره.. يعني واعيه ومثقفه واكيد مراح تسمحين لاحد ياخذ حقج ويضربج بهلطريقه..

كالتله عمتي دكتور محد ضربها والله.. كاللها الدكتور خلي البنيه هيه تحجي.. كتله دكتور محد ضربني..

كال وهذا الكف اللي على خدج.. كتله دكتور مو ناويه اشتكي دخيلك ما اريد.. كال مو كلنه مثقفه وواعيه.. ليش تقبلين تنهانين بهشكل..

نزلت دموعي.. كتله دكتور ان الله يسمع ويرى وراح ينصفني فد يوم.. كال والنعم بلله بكيفج هذا قرار راجعلج بنتي..

بكر ما حجه بس واكف واديه مكتفه ليوره وبنفس الجمود والوجه العبوس.. رجعني للبيت.. دخلتني عمتي للغرفه.. وهيه تلغي موتتني بحجيها..

اجت عمتي رويده علينه بليل تخبلت من شافتني هيج.. بقت ترزل بعادل وتهين بيه وبعمتي..

خطيه اهتمت بيه شوي وكعدت يمي.. انوب كالتلي كومي اكعدي بالصاله ولدي كلهم جايين غيري جو شوي عمه..

طلعت وياهم.. وسلمت على ولد عمتي .. ابراهيم و ونور.. وكعدت خطيه تحشيش وسوالف وضحك.. كعدتهم حلوه

باوعت عمتي لبكر وكالتله خاله شبيك ليش هيج وجهك ما بيه فرحه.. كاللها تعب خاله تعب.. كالتله لا اكو سالفه متعبتك ..

كاللها دنيا متروسه سوالف واخدي يا سالفه تردين.. كالتله وين جنت وين صرت.. شنو خاله حتى اليشوفك يكول مابيك روح

لا تبتسم لا تسولف تكول شايب شايل قهر الدنيا على ضهره.. بعدك شباب اضحك غير جو ليش تخلي التعب يتغلب عليك..

كاللها انشالله.. بكل يئس.. اني اباوعله دار وجها عليه شافني اباوعله.. رجع رد وجها مني..

كالتله عمتي.. بكر عوف هلحزن هذا واعزفلنه بداعتي اشتاقيت للعود مالتك ولاغاني حسين البصري بصوتك..

كاللها خاله والله تعبان ما الي خلك.. كاله ابراهيم دكوم لك هوه انته عقاري بس كاعد وره المكتب منين تعبان مثل حظي بالجيش مسلوك جد جدي..

كاله لا والله مو هيج بس خلك ماكو… كاله دعزف اعزف بربك خلينه نتونس.. ابتسم.. كال ماشي..

دار وجها لخالد كاله خلودي روح جيبلي العود بغرفتي وتعال.. راح جابه واجه.. كعدنه كلنه نباوعله وهوه يعزف بداية الاغنيه..

انوب غنى.. ردت انساااك واخلص من كلااام الناس والعجيب نسيت كل شي ما نسيتك ..

انا ما ادري ليش لهسه اهواااااك .. واعذرني اذا انا غلطت واجيتك.. يغني وكل شوي يباوعلي..

واني احس كلبي يريد ينفجر من قهره وهوه يغنيها بكل عذوبه وشجن بعزف العود.. احس كل كلمه يقصدني بيها ويوجها اليه..

بعدني اشتاااااك الك واسهر ليااااالي.. واكول للناس خالي كلبي خااااااالي.. ..عجيب امر اليحبووووون عجيب وكييييييف ينسووون..

كتلك نسيتك.. بس يااااا ترى نسييييت.. نسيت اسمي وبقى اسمك على بااااااالي..

يغني وعيونه اتجمعت الدموع بيها وكف عزف وخله ايده على وجها وفرك عيونه. صفكوله وصاحو اااااااااااالله كالتله عمتي عاش الصوت..

بس خاله احسك تغنيها من كل كلبك لدرجة دمعت عيونك .. هلكد التحبها مأذيتك وةا تكدر تنساها.. ابتسم وهوه يفرك بعينه ويرمش سريع

ويحاول يبعد الدموع من عينه ويكلها لا والله بس تعبان والتعب مأثر بيه.. دار وجها عليه. و باوعلي بنظره قهرتني صدك.. اني هم مسحت الدموع التجمدت بعيني وابتسمتله..يتبع

🌺🌺🌺🌺🌺

وهاي ختمت البارت بأبتسامه شتردون بعد😒 حتى لتكولون تخلينه علنار .. سولفولي شرايكم بحسين البصري ااااااقصد ابكر ومكابرته

صدك لو كالت ام كلثوم اهل الحب مساكين😔✋

متابعه ممتعه..

# حكاية_سمر..

،،،،،،،،،،بقلم الكاتبه زينب ماجد،،،،،،،،،،،

البارت_16

يبعد الدموع من عينه ويكول لعمتي لا والله بس تعبان والتعب مأثر بيه.. دار وجها عليه. و باوعلي بنظره قهرتني صدك..

اني هم مسحت الدموع التجمدت بعيني ابتسمتله.. نزل راسه.. كالتله خالتي احنه اجينه نغير جو بأغنيه تالي بجانه وبجه روحه..

كالتله خاله نريد اغنيه بيها حياة امل ضحك واحنه كاتلنه القهر.. ضحك.. كاللها صار خاله صار ورجع لزم العود وعزف..

وغنى ناذر اذا رديتي بالحب والي حنيتي.. ولد خالتي صرخو ايييي ويصفكون وياها صفكه رياضيه..

ازرعلج السچه ورد من بيتج الحد بيتي.. وصارو يضحكون ويغنون.. انوب ولد عمتي حمو بالجو وكامو يركصون بصراوي ..

واحنه نباوع ونضحك.. وبكر انطلق وياهم يعزف ويغني ويضحك.. واحنه نصفك👏.. كمل وكلهم صفقوله.. كاللهم ايناف تعبت ..

ورجع العود.. عمتي كالت يله احنه هم نروح تأخر الوقت.. اني كمت ويه عمتي.. كالت رجعي عمه وبوستني..

وراحت لعمتي ساميه وتكللها وج يا خايبه هاي بت اخونه.. من دمنه ولحمنه لا تنطين بيها عينج عليها..

كالتلها.. وانه شمسويتلها.. كالتلها اوكفي وياها على ضرته تره حنين ما رتاحيتلها ملعبه.. واول يوم دخلت بيه كلبت البيت على سمر..

كالتلها انشالله اربيها والعب بيها طوبه.. كالتلها يله ما اوصيج على سمر بعد اختج تره هاي بت الغالي..

راحت عمتي.. رجعنه باوعت لبكر مدنك يحجي بالموبايل.. عفته ورحت لغرفتي.. اوووف شكد قاهره كلبه..

بس مو بيدي.. حتى لو اعترف بجبه.. اعرف الطريق مستحيل.. ولو حبيته فقط راح ائذي روحي واذيه اكثر..

خليت راسي علمخده.. كمت افكر بعادل وشلون كلب عليه.. وصار محبس بيد حنين.. دمعت عيوني.. واني اتذكر لحظات اليضربني بيها..

ولما يتعارك وبكر يدافعلي.. ما عندي غير بكر بهلدنيا.. بس احس واكفه بين نارين.. لو تقدمت لبكر احترك..

ولو رجعت وتركته هم احترك.. بقت الافكار واني اتذكر بكر وخوفه عليه ودموعه واغانيه.. نمت واني مبتسمه غفيت..

وما احس الا بكر دخل للغرفه.. درتله وجهي.. ها بكر.. كال سمر ارحميني تعبت ما اكدر انساج والله..

اتقربت يمه.. اخذني لحظنه.. لا تركيني سمر.. خليت راسي بحظنه.. كتله بكر ما اريد اتركك.. اريد احبك..

باوعتله خله ايده على خدي ويتحسس وجهي.. ومد وجها وبوسني واني فرحانه بيه ومندمجه وياه ووووو…… وفزيت.. استغفر الله ربي.. كمت اباوع للغرفه الحمدلله ربي حلم..

هاي اني اشلون اتحلم هيج حلم اووف استغفر الله استغفر الله.. كمت اهز براسي.. اندكت الباب..

كمت فتحتها.. صدوك بكر.. بقيت متجمده بمكاني.. يربي شديصير.. اللي داعيشه حلم لو حقيقه..

طب هوه وسد الباب لان الجو جان كولش بارد.. واني اباوعله وخايفه لا انوب يتحقق اللي شفته بالحلم..

لا يتحقق شنو استغفر الله.. الله يلعنك يابليس.. كال شبيج سمر احجي وياج.. كتله هااا.. هوه يحجي واني بس اباوع لوجها ومصدومه..

اتقرب كال شبيج جنج وحده مصدومه.. اكو شي.. رمشت ودنكت عيني وكتله هاا لا لا كولشي ماكو..

كال صار ساعه اكولج هذا دواج جبته الج.. وجبتلج كيك اكلي واشربي الدوه لا ينزل ضغطج مره لخ..

اني بعدني مو واعيه وبالحلم.. شلون هيج اتحلم يتقربلي وليش.. لزم اديه.. كال بيج شي.. وخرت اديه مني بخوف.. ودفعته حيل

رجع ليوره ولزم بالميز.. صرخت بيه اطلع بره لا تتقربلي ولا تلزمني فهمت.. غمض عيونه وهز راسه.. وكال اسف.. وابتعد وطلع وسد الباب وراه..

اتقربت للسرير.. ليش هيج اتحلمت بيه.. معقوله اريده.. وليش صيحت عليه.. اوووف شسويت.. فوك ما نقذني اليوم.. اني هيج اهينه..

يربي شسوي اروح اعتذرله.. لا لا شلون اعوفه احسن ما يتمادى.. بس هوه ما تمادى وجابلي الدوه واكل حتى لا اتمرض..

ربي اريده بس خايفه والله.. اخفي حبه عن نفسي واني اعرف كمت ادوره.. واتابعه بكل نظره.. بس الخوف البداخلي مانعني حتى افكر بهلشي..

مو كادره احبه ولا كادره اتركه.. هوه بالنسبه اليه الحياة بس حرام وغلط بقيت ابجي طفت الكهرباء..

صارت الغرفه ضلممممه.. لفيت رجليه لجسمي وحظنت نفسي وابجي.. اشلون اني بدنياي ما مره صفت وياي..

تعبت كولشي اتركه اخسره واللي اختاره يتعبني.. خايفه اترك بكر واخسر وخايفه اختاره واموت

مو كادره اتحكم بحياتي تعبت اريد اعيش مثل العالم ربي والله تعبت ارحمني.. بقيت ب3 ساعات واني مستمره..

اعاتب نفسي لان هيج اتعامل وياها.. ونفسي تردني وتكولي لا تغلطين لا اطاوعين كلبج وتتندمين..

احس الغرفه صارت ثلج لان مطفيه الكهرباء والهيتر طفه واطرافي كمت ما احس بيها من البرد.. متت ودموعي مو راضيه توكف..

وعيوني مو كادره تنام .. اخر شي كمت.. على ضوه الموبايل اخذت جاكيت لبسته وطلعت بره..

الهوا عااالي كولش ويدوخ وصوت الريح مخيف وضلام.. رحت لغرفة بكر.. دا اريد اافتح الباب..

طفى الموبايل شحن.. فتحت الباب.. ودخلت وسديته. و مو واعيه للي دا اسويه.. احس اني بدوامه ومو فاهمه شديصير..

كال منو.. ما حجيت.. كعدت بمكاني.. هوه سمعته يبحث.. ويكول منو دخل.. اني بس دموعي تجري..

صاح خرب بدين الموبايل هسه غير الكاه.. ويبحث.. ويوكع غرض.. ارتفت شهكاتي بالغرفه واني ابجي..

اجه اتقرب.. كال منو اليبجي.. تلمس راسي.. شافني كاعده.. كعد.. يتلمس شعري اديه كال منو الديبجي..

صرخت ابجي بصوت عالي.. كال سمر.. لزم وجهي.. وكال شبيج فهميني.. كتله بكر خايفه والله خايفه..

كال هسه تجي الكهرباء لتخافين.. كتله بكر خايفه احبك واموت.. شلووون.. سكت.. كتله دا اذيك اعرف..

بس والله دا اتأذه اكثر منك.. اخذني لحظنه كال هشش هش لتبجين.. كتله خايفه احبك والله ما اكدر احبك ولا اكدر اتركك اموت..

ضل يمسح على شعري.. كتله بكر لا تتركني عفيه والله اموت.. كال لتخافين اني يمج ما اتركج.. الحبيتيني او لا.. اني موجود.. ما اتركج والله

اجت الكهرباء.. ابتعدت عنه.. هوه كعد كبالي.. ويمسح بعيونه.. كتله وتالي شلون راح اعيش..

كال سمر لتجبرين نفسج على شي متكدريله.. اذا ما عندج مشاعر الي عادي ما تأملت فد يوم تحبيني بالمقابل..

حبي الج تعود على حب من طرف واحد.. وما بيه مقابل.. اني مرايد شي غير سعادتج..

كتله بكر بس جاي تتأذه.. كال مو شي جديد.. من زمان اني اطحن بروحي وانتي مو داريه.. اركان وعادل وغيره وغيره..

اتعود على اللجمات كلبي.. لزمت ايده.. وكتله بكر.. اني اكذب لو كتلك ما احملك مشاعر بس خايفه اعترف بيها..

صفن بوجهي.. كتله انته صرت جزء من يومي.. لما اكعد افكر بيك ولما اصفن اصفن بيك ولما احلم احلم بيك.. هذا شنو يتسمه..

ضحك.. كال هذا امل.. كتله يعني شنو.. اخذ نفس.. وفرك عيونه.. وكال يعني كدرت ادخل كلبج واسكن تفكيرج..

وهاي البدايه.. كتله والنهايه شلون.. كال محد يعرف النهايات بس الله.. اتركي هلشي على الله وحبي بصدق..

كتله والناس والاهل والعالم.. كال اتركي الكل واتبعيني.. كتله اخاف.. والله اخاف.. كال لعد شلون سمر..

كتله بكر اني زوجة اخوك كدام الناس صعب يرهم شي بينه.. كال سمر يا اخوي هذا اليوم اللي راد يموتج.. وين ناويه توصلين وياه.. ولج ما رايدج هوه..

بس كولي اطلك واني اطلكج. والله.. كتله بكر اخاف.. جر نفس.. كال اعرف ومقدر خوفج والله وبراحتج..

ما اريد اضغط عليج.. شوكت متحسين انتي مستعده تجازفين وياي اعلن حبي واطلكج من عادل..

هسه لتفكرين بأي شي ارتاحي اوك.. ولتبجين تره والله تأذيني.. ابتسمتله.. كتله ليش مخطبتني انته ليش عادل..

كال جنت مفكر رافظه الزواج الا تكملين دراستج.. زين ليش معارضت.. كال كبريائي جان ذابحني.. لحد معرفت انتي وافقتي..

ما تجرئت.. اعلن.. واعرف انتي حترفظيني.. فكتمت حبج بكلبي وسكتت.. كتله ما راح تمل.. كال ابد.. وابتسم.

كمت من مكاني.. كتله حروح انام.. كال لحضه.. ليش من اجيت قبل شوي جنتي مصدومه وتعاملتي ويايه بهشكل.. حسيت هلشي غريب.. ليش..

كتله تحلمت بيك ولما لزمت اديه خفت الحلم يتحقق ودفعتك.. كال شتحلمتي.. صفنت بوجها.. ابتسم.. كال هلكد رايدتني. وخايفه تعترفين..

كاله مو بيدي.. كال افتهم.. روحي.. طلعت من الغرفه.. احس براحه.. احس روحي رجعتلي من ضحك وابتسملي .رضا عليه..

شنو هلشعور ما اعرف.. رجعت الغرفتي وكعت ادفه يم الصوبه الكهربائيه وافكر وابتسم.. لحد ما نمت..

الصبح كعدت على صوت الباب.. كعدت فتحته.. بكر.. كال شنو مترحين للدوام ساعه 7ونص..

كتله لا ما اروح شوف وجهي احمر وحلكي مشكوك.. ما اكدر.. كال هااا خوش اخذلج اجازه..

كتله ماكو داعي.. اني ما اتغيب هوايه.. وما عندي محاظرات قويه.. كال براحتج.. راح..

سديت الباب.. واني فرحانه باهتمامه وبشوفته من الصبح ما ادري ليش باوعت لمرايتي.. شفت وجهي مبتسم..

مشيت اخذت هدوم وطلعت اسبح.. طلعت.. جان يجي بكر ويوكف كدام المرايا.. واني اخلي ملابسي بالغساله..

كال جبت كاهي وكيمر تتريكين وياي.. ابتسمت.. كتله اي.. رحت نشفت شعري ومشطت.. لكيت عمتي كاعده..

كالت هذا منو جايب كاهي وكيمر.. كتلها بكر.. كالت خير ..طب كاللها صباح الخير يمه.. كالتله هله ييمه شو اليوم فرحان ونشط خير..

بس لا تريد تتزوج.. كاللها لا يمه شنو السالفه.. هيج متحبين تشوفيني مرتاح.. كالتله ييمه عساك دوم شتمنه غيرها..

وهوه يباوعلي ويبتسم.. كعدنه وكعد عمو خليل.. كال بكر عادل طلع لو بعده.. كتله ما اعرف.. كال يوم صيحيله خل يجي ياكل..

كالتله البارحه كتلته كتلت موت هسه تريده ياكل.. كاللها يمه قابل اكرها اني.. بس هوه اغبر يمشي وره النسوان.. ويحشر نفسه بسوالفهن..

طبت حنين.. كالت مموجود عادل.. راح لدوامه.. كاللها بكر.. صباح الخير اول ..كالت هاا اعتذر..

كاللها تعاي تريكي.. اجت كعدت يمنه.. عمتي شيلي الكاهي.. والكيمر وكالت اكلي يمه سموره اكلي..

ضحكنه اني وبكر.. انوب عمتي كالت الحنين.. كملي ريوكج.. وتتوجهين للسطح البارحه الهوا العالي موكع الغرض ومتكسره..

اصعدي نضفي.. يبو وهوه الفوك شصاير.. من نضفنه بعرس عادل.. شلنه الغراض كلها فوك وصارت هوسه..

كملنه.. بكر طلع.. اني اجيت اوكف اغسل مواعين.. جان عمتي تكول لا يمه سموره لا اتعبين.. الدكتور مو منعج من الحركه..

همستله عمه قابل حامل.. كرصتني.. كالتلها حنين اخذي ابدال سمر نضفي المطبخ.. كالتلها غير اصعد انضف فوك..

كالتلها اي كملي المطبخ واصعدي شكايليلج قابل.. بقت حنين تزفر وتمشي ما تكدر تحجي.. كتلها عمه خطيه..

كالت خشم المطيه.. ختولي هلجايفه الا اربيها.. واشوف شلون تمشي عادل وتكلبه.. سكتت..

كتلها راح اروح اقره لعد.. كالت روحي.. كملت قرايه لل2 وحنين فوك. تشتغل.. صدك انقهرو عليها لان هوسه هوسه فد مره السطح..

كملت نزلت ادردم بينها وبين حالها.. كالتلها عمتي هم زين نزلتي .. سلكت الفاصوليه بس مركيها..

وبزلت التمن.. هدريه انتي.. كالتلها يمه تعبت.. كالتلها واني شكايلتلج حرري فلسطين.. كتلج بس مركي الفاصولي وهدري التمن..

كتلها عمه اني راح اسويها.. كالت لا انتي غسلي عباتي اريد اروح للعرس مال جيرانه العصر..

كتلها ماشي عمه.. غسلتها وطلعت اشرها عشمس برا.. طب عادل.. صرخ.. شتسوين هناااا..

كتله دا اشر عباة عمتي.. كال طبي لا بالحذاء والله.. دخلت محجيت.. طب هوه وراي.. اول مشافته حنين..

حظنته وكامت تبجي.. كاللها شكو.. كالتله هيج وهيج سمر تحرض عمتي عليه هلكوني هلك..

جاي يتقرب يمي.. دخل بكر.. كال هاا.. عادل مهتم.. كال انتي شلون وياج.. الا اذبحج يله اخلص منج..

ولج مكافي عار وشامريج براسي.. حتى اهلج مرايديج.. كتله شسويت.. دفعني من كتفي..

كال مو اذبحج والله.. بكر كال هااااا.. كاله انته تسكت وما الك اي دخل ..مو رجلها حظرتك اني المسؤل عنها..

كاله تنجب لا بالقندره والله.. تالي وكت صايرلي رجال.. ويصيح مسؤليتي.. دفعه عادل.. كاله كتلك مالك شغل انته شعندك وي سمرر..

كاله سمر تخصني وانته ما يربطك بيها غير ورقه بس.. كال هذا حجي يفيدك لو اذبحها ما الك دخل انته فاهم..

يحجون وصياح.. وعمتي واكفه بينهم.. تهدي بيهم.. كاله بكر هااا هسه صار هيج عادل وين كلامك هذا من زوجتك اني.. شنو جان الشرط..

جان يضحك عادل بأستهزاء كاله زمان اول حول وشتريد تسوي سوي.. الفلوس اخذتها ويا حايط يعجبك.. طخ راسك بيه..

بكر ما تحمل انطاه بوكس على خشمه خلاه ينزف دم.. وكاله ترجع الفلوس فووورا.. ولو ما رجعتها اني اتصرف وياك

عادل ضل يغلط ويفشر ويكله ما ارجع واريد اشوفك شتسوي.. كاله خوش.. غرفتك الكاعد بيها..

اني اشتريتها والعصر اجيب نجار واخذها.. الذهب مال مرتك.. اني شتريته يسلملي فوورا.. وحتى الفون البجيبك الي..

تنطينياهم كله وتطلع من البيت لان البيت بيتي ومسجل بأسمي.. متسوي الاكولك عليه والله اجيب الشرطه هسه. واطلعك بجلاليق..

عمتي بقت تلطم وتصيح ولكم ولدي يتكاتلون من وره النسوان اااااااااااالله اكبر على روسجن هجمتن بيتي الله لا ينطيجن..

بكر يصيح وعادل يكول والله ما اطلع وتضاربو هوه وبكر.. تالي عادل.. شيل الفرن علكاونتر محطوط

وشمره على ضهر بكر.. بكر وكع للكاع وكام بسرعه لعادل بوكسيات..

عادل كام يغلط على بكر ويفشر عليه وعلى امه اللي هيه امه اصلا.. عاد اجه عمو خليل ووكعو عليه ثنينهم بكر وعمي على عادل

وشمرو عادل بالطرمه وكالوله ووجهك ما انشوفه.. بكر كاللها يمه الذهب يجي يمي هسه.. لا والله ادخل اني اخذه..

دخلت عمتي ادور علذهب حنين لامه الملابس بعلاليك وطالعه يم عادل من الباب الخارجي.. .. كاله بكر تسلمني الفون والذهب..

كالت حنين الذهب عد اهلي.. كالتلها عمتي ولج ام السحوره لا تجذبين البارحه لابسته.. لزمتها من ملابسها ودفعتها للصاله

عمو خليل لزم عادل وشمره برااا بالشارع.. وعادل يغلط ويسب ويصيح طلعولي حنين.. ولج سمر الزمج لو لا ومحمد ادفنج سمررررر..

طلعله بكر.. كاله وك سكط تصيح بسمها بالشارع لزمه بوكسات وعادل يضرب.. وعمو خليل التمو الناس عليهم..

واني واكفه بس ابجي وما ادخل ابدد.. عمتي قافله على حنين باب الصاله وتضرب بيها وتكلها طلعي الذهب..

تالي لكته مخليته بجسمها.. نزعتها هدومها واخذت الذهب منها.. وكالتلها برااا واذا رجعتي اذبحج والله بنت السكط الدايحه ال… ال..

طلعت حنين تبجي.. اخذها عادل وراحو.. اني دموعي بس تصب شسوي مصيبه وصارت بس من وراي..

رحت على بكر.. كتله بكر الله يخليك لتخليه برااا وين يروح حتى اجار ميكدر يأجر راتبه 300 الف شيكفي فدوه رجعه..

دارلي بعصبيه كال بعد كل هذا تحنين اله وترديه.. كتله بكر لخاطري والله مو احن اله بس هذا اخوك والمصيبه صارت من وراي..

شيكولون عليه الناس شيشت حماها علي رجلها وطردته من البيت بكر فدوه.. طبت عمتي هم تكله يمه بكر انته الفاهم العاقل..

هذا اخوك فدوه وهوه ورده بس هاي الزياله دمرت عقله. والله ييمه.. صرخ كال والله ما اله رجعه..

عمو خليل ما اله كلمه. وره بكر شيكول بكر عمو خليل ينفذ.. بكر مسيطر عليه تماما.. رحنه عليه..

كال حقه بكر ماكو عادل ما يرجع.. كالتله عمتي ولك هذا ابنك.. كاللها يطبه مرض هلسكير خل يتأدب تاليته يفشر على عرضه..

بكر كام يحجي ويغلط ويكول هلموضوع لو نفتح متلومون الا نفسكم.. عادل ما اله رجعه هنا..

بقيت اني وعمتي نلوب.. وهيه ساعه تفكر وياي وساعه تحجي وتغلط عليه.. كتلها عمه انتو ليش مسجلين البيت بأسم بكر..

هوه مو العمو خليل.. كالت غير يشتغل بيه.. كتلها شلون يعني يشتغل بيه.. كالت من تخرج بكر وما لكه تعيين الي يفيده..

اتفق ويه ابوه ياخذ اللبيت يبيعه ويشتغل بفلوسه ويرجعه.. كتلها شلون يعني.. كالت مثل اليوم اخذ بكر البيت..

وباعه كولي ب500 مليون.. وراح اشتره بمكانه بيت بنفس السعر.. ضربه صبغ علموديل وراقي

وسوه الديكور غربي واشتغل على تعديله كولي شمر بالتعديل.. فد 20 مليون.. يرجع يبيع البيت ب600 مليون واكثر..

بعدها يرجع البيت مالتنه وهوه ربحان فوك ال90 مليون وهكذا.. كتلها يااا واكول منيله كلهلفلوس والفخفخه الضاهر هيج..

كالت اي وينطي لابوه من ربحه فد مبلغ زين يطلع بلمليونين اكثر.. هيج يعني فائده النه والبكر..

كتلها والله يعرف يشتغل هلبكر.. كالت هوه جريئ ومغامر.. الشغله التخطر اباله يسويها بدون خوف ويربح بيها..

ليش احنه اعتمادنه كله عليه.. الا لو نضل عادل جان متنا جوع.. كتلها زين يوم شلون يرجع البيت لو باعه..

كالت هوه يتفق ويه اليبيعه هذا شغله ويفتهم بيه.. كتلها هااا.. حجيت بداخلي شلون شخصيه انوب ذكي ويشتغل.. كولشي بيه كام يعجبني..

خرررب حظي هسه الا عادل يخطبني اي يا بكر دخطبني قبله.. والله حته لو خطبني ما جنت ارضه بيه.. امداني وامده حظي عود هم اعرف اختار

دخل بكر.. بدون كلام كال اتمدد علبطنه بالكاع ومخلي وجهه بالمخده.. اتقربت يمه.. كتله دتوجع..

شال راسه.. انوب هز راسه اي.. كتله بضهرك.. اجت عمتي.. كالتله هااا يمه.. كعدت شالت قميصه..

ضهره احمر كالتله هنا ولزمت ضهر فز.. كاللها اخ يمه اخ.. كالتله ولك لا انوب ضلع مكسور كاللها لا لا رض مو كسر..

شوي واطيب ما عليها شي.. رحت جبت عصاره مسكن للالم.. واجيت ردت اخليله استحيت امد ايدي لضهره..

كتلها عمه انتي خليله استحي.. خلتله عمتي.. خطيه يتوجع الله يكسر ايدك يا عادل..

مر شهر وعادل برا البيت.. وبكر قافل ميرجع رغم كثرة التوسلات مني ومن عمتي..

وياخذني بأيده ويرجعني بأيده خاف عادل يتعرضلي.. لان اتحلفلي يلزمني ويذبحني..

رايح انوب على اهلي اشكال الحجي مطلع عليه.. واجه ابوي للبيت متخبل ويصيح طلعولي سمر..

كالتله عمتي مو هنا.. واني فعلا جنت بالجامعه.. بكر متصديله.. وكايله ما الك بنيه هنا.. مو تريد تذبحها.. اعتبرها ماتت..

باقي ابوي يصيح ويغلط.. ويكولهم انطونياها.. عاد عمتي مكعدته ومفهمته علزواج بكر وشلون يعاملني وبكر يدافعلي لا اكثر..

وماما هم مقنعه بابا.. بس ابوي بقى يتوعدلي واحمد يصيح اذبحها واصلخها ولو اطلكت من عادل طلقه براسها وانموتها.. من اسمع هلحجي روحي تفور..

حتى ككمت من اشوف اب يحب بنته ويداريها ابجي. اكول شبيه ابوي.. من اشوف عمو خليل شلون يعامل بناته.. احترك.. مو حسد وانما تحز بنفسي اني لييش ابويه يكرهني..

من اشوف بكر وحنيته ويه خواته ادمر اكول اخويه شبيه ما فد يوم حن عليه.. ليش اهلي ما بيهم رحمه شسويت..

جان هذا الموضوع ياكل ويشرب وياي.. واتعذب كل يوم من وراه..

فد يوم. خلصت محاظراتي.. وخابرت بكر.. كتله وينك.. كال اني واكع بالازدحام انتضري بالسنتر..

من اوصل اخابرج اطلعيلي.. كتله اوك.. مرت ساعه وبكر ماكو.. كتله شنو السالفه.. كال انفجار صاير ومكلوبه الدنيا..

والازدحام كلش قوي.. كتله راح ارجع اني.. كال لا انتضري اني اوصل.. وارجعج.. اجت انمار..

كالت انتي هم تأخر بكر.. كتلها اي والله كالت اخوي هم عالك بالازدحام.. دنحجي وخابر اخوها.. كالت هذا اجه..

كتلها هم زين.. كالت تعاي احنه نوصلج.. كتلها لاا بكر حيوصل.. كالت دمشي وخابري يرجع..

كتلها هاا.. يله خل نطلع.. اني هم شبعت برد متت وتعبت.. طلعت ويه انمار من الجامعه..

مديت موبايلي.. دا اخابر بكر.. ما احس الا انجرت ايدي.. اباوع عادل.. اخذ الموبايل مني..

احس دمي نشف.. كالتله انمار راح نوصلها بطريقها.. كاللها اني زوجها اني اوصلها.. وجرني من ايدي ومشا… يتبع

🌺🌺🌺🌺🌺

شاركوني توقعاتكم.. 😐😐 متابعه ممتعه..

د

# حكاية_سمر..

،،،،،،،،،،بقلم الكاتبه زينب ماجد،،،،،،،،،،،

البارت_17

مديت موبايلي.. دا اخابر بكر.. ما احس الا انجرت ايدي.. اباوع عادل.. اخذ الموبايل مني..

احس دمي نشف.. كالتله انمار راح نوصلها بطريقنا.. كاللها اني زوجها اني اوصلها.. وجرني من ايدي ومشا..

كتله عادل اوكف عادل.. لحظه شبيك.. دار عليه وجها.. وصرخ امشي شبيج.. كتله منا الطلاب والناس..

اخذ ايدي وصعدني السياره لهناك ونزل.. كتله وين رايح.. كال شبيج ما اذيج بس احجي وياج..

كتله اوك.. مشينه دخلنه مطعم ..كعد كبالي.. واني ايدي ترجف.. وجهي اصفر صار من الخوف..

كعد كبالي.. كال شبيج كتلج بس اريد احجي وياج مراح ائذيج.. مد اديه ولزم اديه.. جريت ايدي منه بخوف..

كتله شرايد.. كال سمر تعبت والله تعبت.. وخله اديه على راسه ويحك ويمسح بوجها..

كتله ليش شبيك.. كال حالي من اسوء الى اسوء.. حنين عد اهلها صار شهر واني متشرد ابيت عمي..

وشغلي فصلوني منه.. تعرفين كوه جاي اطلع فلوس باكيت جكايري والله.. تعبت حيل..

احرك روحي و اطلع حمال بالعلوه بلكت احصل كم فلس اعيش بيه يومي.. تعبت وبكر مو راضي ارجع للبيت..

كتله وليش ما حجيت ويه عمتي ليش ويايه..كال حجت ويه امي مقابل ارجع الا ارجع ال10 ملايين اللي انطانياهن..

كتله زين اني شلون اكدر اقنعه هواي حجيت وياه وما قنع.. كال حاولي راح يقنع منج والله..

كتله وليش يقنع مني.. شعندي ويه بكر اني ..عادل الكلام الطلعته عليه عيب.. كال ادري والله ادري بيج ما عندج شي وياه..

بس اهتمامه بيج ومدافعته عنج تضايقني.. كتله لان يشوفني ما الي احد وانته مستضعفني وتعرف بكر ما يقبل بالظلم.. وانت ظالم يا عادل..

عادل.. عوفينه من هلكلام هسه.. كوليلي شلون دبريني..

سمر.. ليش بطلت من دوامك..

عادل.. اتعاركت ويه مدير الشغل وفصلوني..

سمر.. عادل وتالي.. تره الشرب اذاك.. بليل متعرف ناسك.. وبالنهار مسطور راسك..

ما تعرف ارضك من سماك وتتعارك ويه الرايح والجاي شلون بيك..

عادل.. والله صار اسبوع مشارب.. قطره ممخلي بحلكي..

سمر.. لان ما عندك فلوس غيير..

عادل.. تكدرين تساعديني لو لا سمر.. تره والله تعبان.. والله شايفه هذا الربع.. الربع ما املكه..

سمر.. كتله هلا هلا كول فلوس المطعم عليه..

ضحك كال خرب بعقلج وين تفكرين.. طبطبت على ايده.. كتله لتخاف محلوله انشالله.. بس انطيني موبايلي..

طلعه من جيبه.. وانطانياه مقفول.. فتحته.. وخابرت بكر.. الووو ها بكر.. اول ما حجيت صرخ بوجهي.

لكر.. خره بيج لج صدك تحجين.. والله دمي فار صار ساعه اخابر وموبايلج مغلق.. وانفجار ثاني متت خوف.. لا انتي بيه..

كتله اهدئ يمعود اهدى.. شبيك. كال اجيت ميت امة الثقلين مكلوبه وتالي اجي يكلي الحارس طالعه..

وانفجار ثاني صاير.. وطلاب راحت بيها.. كلت راحت سمر والله.. ضحكت وكتله لا اني بالمطعم..

كال باع شوف من اكول فاهيه هلبنيه محد يصدكني.. مال حركة دمي كلها اطلعها بيج والله.. احركج حرك..

ضحكت كتله دتعال تعال متانيتك بمطعم الورد.. كال جاي.. مو اطلعين ومحمد اذبحج.. كتله لااا ما اطلع والله انتضرك..

اخذله بثلث ساعه يله وصل.. شاف عادل كاعد.. كال شجاي يصير هنا.. كتله بكر اكعد دا افهمك..

كال ما اريد افتهم شي امشي..كتله بكر عادل ندمان وجاي يعتذر منك.. كال يرجعلي ال10 ملايين..

وبعدها يرجع للبيت غير هيج لو الكلاب تنحش بلحمه ما اكلبه.. كتله بكر بس اوكف.. اشرت لعادل كوم..

كام عادل وكف كدامه راد يحجي متحمل اختنك بعبرته و حظن بكر وبجى.. بكر بقى متجمد.. كاله والله اعتذر اذيتك اضربني اذبحني شتريد تسوي سوي..

والله تعبت بكر ..لا ليلي ليل ولا نهاري نهار.. شغلي فصلوني ..مشرد بالشوارع.. نسابتي يتعاركون وياي لان ما اودي لمرتي مصرف

وخر بكر من عنده. كاله انشالله حفظت الدرس زين.. دنك راسه عادل وما حجه.. اخذ نفس..

وكاله امشي.. كاله وين.. كال غير للبيت يعني وين.. امشوو طلعت روحي بالبرد وانتو كاعدين هنا تاكلون..

ضحكت.. ومشيت منه.. صعد عادل وصعدت وره.. ومشا بكر ما حجه اي شي.. بس مشغل قران..

كتله اليوم قران.. كال خررب غير شفت الجثث كبالي راحت روحي والله ادور عليج بينهم..

دم مابقى بجسمي واتصل وحظرتج ماكو.. كتله وقررت اتوب وتسمع قران.. كال لا بس هيج حداد على روح الشهداء..

كتله هااا جيد.. نحجي وعادل داير وجه ما حجه ويانه ابد.. وصلنه للبيت صف السياره ونزلنه.. دخلنه اني وعادل..

عمتي شافت عادل.. ركضتله من باب المطبخ للباب الصاله وتحظن بيه وتبوس.. وهوه عيونه ادمع.. ويبوس براسها..

كالتله هسه ارتاح كلبي.. دخل بكر.. كاللها خو بس هذا يريح كلبج اني كخه.. كالتله والله يمه كلكم ولدي

ما افرق.. بس غائبهم حتى يعود.. كاللها وهاي عاد.. اشبعي بيه.. حجه وراح لغرفته.. وصاح سمر صبيلي اكل ميت جووع..

كتله تدلل.. رحت بملابسي صبيتله ورحت بدلت ونمت.. كعدت العصر.. بكر كاعد علتلفزيون..

وعادل يعمر بنركيلته بالمطبخ.. رحت لمغسله اغسل.. انوب توجهت للمطبخ.. عادل.. واكف يسوي بالفنجان..

اجه بكر.. صاح عادل.. باوعنه ثنينه.. كاله هاك.. هاي 500 الف.. رتّب حالك وروح جيب مرتك من اهلها..

كاله مشكور.. ما اريد اكلفك اني جاي ادور شغل.. كاله عود استشرفت بعدين.. دخذ اخذ.. مد ايده عادل.

بكر ضرب الفلوس بوجه.. ضحك.. وحظنه.. وكاله سكط شعندي غيرك عشره.. بس غير تحترم نفسك..

لك هاي اذا مو مرتك بت خالك.. صديقة طفولتك شلون يطاوعك كلبك هيج تعاملها.. كاله لا والله بعد منا وجاي ما الي شغل بيها.. هيه حره..

كاله غصبا عليك.. واكولها الك سمر ما الك عليها اي حكم.. امرها بأيدي مفهوم.. هز راسه ودنك..

كاله يله هاك هذا مفاتيح السياره وروح جيب مرتك.. كاله بس اخذ اركيلتي.. كاله انطينياها الي.. تلحك عل الاركيله..

عادل ابتسم وكاله ماشي.. مشا كال شلون يقهرني انكساره شصاير بيه .. كتله احم احم منو الكال لو اشوف الكلاب تنحش بلحمه ما اكلبه..

شو هسه ادمع عيونك علموده.. باوعلي.. وكال دنجبي انجبي.. ضلي نايمه بثلاجه تاكلين لحد متصيرين دبه..

كتله هاي اني.. لك لااا والله جاي ادور شاكل كلساع افتح الثلاجه واسدها.. عافني وراح..

خرب انوب يكلي تصيرين دبه.. حتى بعد ما اكل.. وسديت الثلاجه حيل رجع كال اجذب عليج والله اكلي لا هم انوب تتخربطين فوك راسي مابيه حيل اركض..

رحت يمه كتله يعني مخايف عليه.. لا مابيك حيل تركض.. ابتسم ما حجه.. كعد يعدل بفحم الاركيله ويبتسم ويشرب..

دا نحجي طبت رنا.. كلت اهووو لا حلت بركه.. اليوم يلتمن على راسي وينها وينها.. حنين ورنا..

درت وكتلها هلا حبيبتي شلونج.. ما سلمت عليه.. ويطبج مرض.. عفتها ومشيت.. واكف عادل يزين لحيته..

اتقربت يمه وكرصته من ضهره وسويت صوت بالبوسه وكتله ايووووو كدا استمرررري..

واحركله باصبعي واغمزله.. ضحك كال جاي تتحارشين بيه.. مو عيب . اهلج ما علموج شلون تتأدبين ..ولد العالم مو لعبه عندج. .

روحي عساها تطلع باخوانج انشالله ويتحارشون بيهم مثل متتحارشين بيه ويطلع حوبتي..

هههههههههههههههههع ضحكت من كل كلبي..جان يصيح بكر هاي شكووو هم رجعنه لهضحكه الفاكسه.. الجيران اشتهرنه يمعوده..

باوعلي عادل بتك عين وهوه يزين وكال حللل طلعت حوبتي.. كتله لا والله هههههه.. اجه بكر.. كال سمر شبيج.. تره ضحكتج مو راهمه.. فضيحه..

كتله شسوي هاي ضحكتي ما اعرف.. عفتهم ورحت.. غسلت المواعين الباقيه عسنك.. وطلعت..

لكيت عادل مبدل كامل.. ويكول ها شلوني.. كتله اشطه يعسل.. حتجيب حنين.. كال اي.. اتقربت يمه..

اخذت وجها.. بين اديه.. عادل انته طيب وصديقي واخويه من زمان مو اليوم. او البارحه.. لا تتغير عليه فدوه..

هز راسه.. كتله حنين تعتبرني ضرتها وخطر عليها.. تخاف لا اخذك.. فاكيد راح تشوه صورتي كدامك حتى لا تتقربلي..

فمعليك بيها.. لا تسمع الحجيها.. ولو سمعت منها تعال واسمع مني هم وحل القضيه بلاها العصبيه والكفران والغلط.. تره دضيع شباب..

وكله من وره هلمشروب.. كف عنه عاد.. لزم اديه اثنينهم.. كال سمر ما عندي شي وياج والله..

اعرف اذيتج هواي.. واني اسف جرني الحظنه وحظني حيل.. اني هم حظنته وضحكت.. احس روحي ضعت بين اديه..

وهوه طويل وضخم.. شعور كزبر جسمي.. ابتعدت عنه.. ابتسم وطلع.. درت شفت بكر.. يباوع شافني درتله دار وجها..

مشاعري ملخبطه.. عادل احسه اخويه وما احس بحب اتجاها.. بس يعجبني قربه.. وبكر عندي اله مشاعر.. وصرت احبه.. بس ما احب اتقرب يمه..

ياربي انقذني من هلشعور.. حرام ما اكدر اتخطيه.. لا اكدر اتقبل عادل ويتقبلني.. ولا اكدر اصير لبكر..

دا امشي وطبت اميره.. كتلها هلاااا حبيبي.. باوستني.. بس مثكله وجها عليه.. لان عركة عادل وطردته من وراي..

كلت شكو شو اليوم التمن كلهن.. كعدت يمهم.. العرفته علمود العيد جايات يتسوكن عد عيالهن صعبه طلعتهن..

.. كالت عمتي سمر كومي للعشا..كتلها اي عمه.. كمت دا اسوي بالاكل.. اجه بكر من يمي.. اخذ صمون.. وسواله لفه..

صاحت عمتي من ورانه. بكر.. التفتنه اثنينه.. كالها ها يمه.. اتقربت يمه.. كالتله يمه امير رجلها صارله شهر كاعد ما عنده فلس..

وهيه حال الضيم حالها.. وجاينه عيد وجهالها 4 ما عدها تشتريلهم.. كاللها سهله يمه.. كالتله عفيه وليدي ما اوصيك اختك هاي..

هز راسه وهوه ياكل اللفه.. انوب دخل عادل وحنين من بابا المطبخ.. بكر همسلي.. استلمي اجت العروس..

سلمت حنين على عمتي وباست راسها.. وكالتلها عمه اتعذر منج وو الله انه احبكم ومو قصدي اسوي مشاكل..

كالتلها.. شعدي وياج.. هيه الجنه من تخلص شغلها علساكت وما تحجي اكو احد يدنالها.. بس اذا بقت تبحوش مشاكل وتخرب ولدي.. احركها..

كالتلها لا ابد والله بعد ماكو.. وووووومن هسوالف اللي احسها لواكه.. انوب عادل شفته يأشرلها بحاجبه عليه..

اجت تقربت مني.. وكالت سمر اني اتعذر منج واريد ابدي صفحه جديده وياج.. كتلها اهلا وسهلا حنين.. شعندي وياج اني.. ياريت تصفين وتقلبين صفحه..

حجت هيج وراحت للصاله.. عادل اتقرب اخذ صمونه.. ويسوي لفه.. كتله ما طلعت هااي اكلي وانته وبكر تاكلون تراكم شلعتو كلبي..

كال عادل.. احنه مو النه حصه وياكم بالكل عمي منريد ناكل.. انطينه هذا الماعون وكلي الباقي الكم..

كتله عاااادل.. شنو والله تعبت.. بكر يكله جيبه جيبه.. وخلو الماعون مال الكبه علكاونتر ووكفو ياكلون..

كتلهم والله اليتقرب بعد.. بهلخاشوكه الكلها دهن حار اسمطه.. عادل كال بكوري بعدك جوعان تريد بعد..

كاله والله الكبه مينشبع منها.. جيب بعد.. كتلهم حددددددددكم والله اذبحكم وصحت عممممه.. اجت عمتي من وراي.. كال شكو شبيج تصيحين..

كتلها عمه مسلوك جدي واكلي وعادل وبكر ياكلون صيحي بيهم فدوه.. كالتلهم مو حتى البركه الطير..

كاللها عادل يمه البركه بيج مو بالكبه روحي خل ناكل.. كالتله بكر روح جيب فد كيلو كباب ويه العشا ما يكفي..

كاللها عادل.. كاله عادل شنو اني.. مابيه حيل والله هاي جيتي من الثوره والازدحامات.. دك ملاطم ما بيه حيل..

كاله بكر.. خواتك خواتك عيب جايات.. شال ال25 الف وخلاها بجيبه وطلع.. صاح عادل هاي شلون بلوه.. باوعتله حلل هاي حوبتي..

كال والله بيج جلاق.. دطيري حمديه.. عافني وطلع.. كملت العشا وحظرته.. وبقينه متانين عادل علكباب..

طبن خوات عادل البقيه.. رغد وجنان.. اهووو هاي شلون سالفه ما تخلص.. ادري ماكو سواكه يمكم..

طبعا تغريد وجنان ماخذات اخوه.. غرب مو دليم.. كالت عمتي يكفي هلعشا لو شلون.. كلتلها والله يا عمه ما ادري..

كالت طلعي كلي بعد او اكلج لااا اكعدي خل اصيح حنين.. صاحت حنين.. كالتلها طلعي بعد كبه وكلي.. وبيذنجان هم..

اجه عادل وكملنه العشا.. وكعدنه.. وخواته يتلوكن لبكر وكاعدات حواليه ويضحكن.. هوه فاهم الرنه..

كاللهن من الاخير شرايدات.. دوختني انتن وجهالج زنننننن انسطر راسي.. كالتله رنا.. بكر ابو كلب الطيب بحبحها ويانه..

ضحك كال هنا الحجي.. تردن فلوس.. كالتله اميره شعدنه غيرك يا خويه.. وجاينه عيد وباجر حنروح للسوك نريد نتسوك..

طلع محفظته.. اخذ 200 الف.. وانطاهن كل وحده 50.. فرحن وبوسنه وكامن.. كال انهجم بيت المصلحه.. استلمن كامن مني..

كلها ضحكت.. صاح اميره.. كالتله ها عيوني.. كاللها ال50 اشتري بيها النفسج.. ملابس جهالج اني اشتريهم..

اجت بوسته وكالتله يديمك فوك روسنه خويه.. كالتله امه.. انطيها الها هيه تشتريلهم على ذوقها.. كال بكيفها..

شال 150 وانطاها.. اني بس اباوع.. باوعلي.. كال ما ناسيج لتخافين.. راتبج يمي وعليه عيدية العيد ضحكت..

كتله لا ميحتاج كومه عندي ملابس والله.. ما رد كام ومشه.. خطيه مخصصلي راتب بالشهر 300 الف..

باوعته .هوه يمشي وكلت بداخلي الله يحفظه ويخليه..

مرت الايام هاديه ما بيها مشاكل نسبيا.. اجه العيد.. وجانت امنيتي ليلة العيد اهلي يرضون عليه.. وتتصلح الامور بيناتنا..

رحت ليلة العيد دكيت الباب على عادل.. كال ها سمر.. كتله اكدر احجي وياك.. كال اي طبعا.. تعاي..

كتله لا بغرفتي اذا ميضايقك هلشي.. كال اي لحظات وجاي وراج كتله ٱפگـيہ .. مشيت لغرفتي..

اجه دخل وراي.. ولابس جاكيت صوف ومخلي اديه بجيوبه ويصيح اشششاه.. شكد بارده.. كتله تعال هاي صوبه..

كعد.. كال كولي.. كتله عادل اريد اروح اصالح اهلي واقلب صفحه وياهم.. كال اي زين.. كتله وهلشي ميصير الا بوجودك..

اهلي راح يطمنون بعلاقتنه وبلكي يسامحوني.. كال شوكت.. كتله باجر.. كال اني العصر اودي حنين لاهلها..

كتله حتى لو بليل عادي.. كال هاي صار بعيني.. كتله سالمه عينك.. تمدد علسرير.. وكال غرفتج دافيه مال نووم..

كتله نام.. كام كال علمود ابتلي ضحكت.. كرصني من خدي وطلع.. رفعت راسي للسمه.. وكلت يارب ساعدني هيج وترجع علاقتي باهلي والله اشتاقيتلهم..

نمت وكعدت صباحية العيد.. الساعه 6 طلعت من غرفتي.. طلع بكر.. رحت عليه عايدته.. وكتله انشالله تحقيق الاماني..

باوعلي وكال امنيه وطالبها من الباري يحققها ورفع راسه للسمه.. ضحكت.. كتله من الصبح كاعد حتى الشمس بعدها مطالعه

كال جنت متانيج اطلعين.. علمود اعايدج.. هههه ..كال يله رايح.. كتله ويين.. كال ادرك صلاة العيد بالمسجد غير..

طلع عمو خليل عايدنه وكاله لبكر هااا تروح نصلي العيد.. كاله يله.. مشو.. واني اباوع للحمام.. اسبح لو لا..

اووف والله بارده يعني ضروري نسبح بالعيد اخخخ.. غير لازم نطلع غير وجه.. شغلت الهيتر بالحمام..

ورحت حظرت ملابسي ودخلت.. سبحت وركضت لغرفتي.. ضليت كاعده ساعه يم الصوبه واباوع للتلفزيون وبرامج عيد الاضحى..

لحد مندكت الباب.. طلعت.. بكر كال يله.. كاهي وكيمر وعسل.. تتريكين.. كتله طبعا هعع.. طلعت عايدت عمتي..

وكعدنه.. صاح بكر ليش مكعدتو عادل.. كالت امه ما نايمين خاف من العركه.. كاللها يا عركه.. كالتله غير اليل كله صياح ويطابخون..

يمكن كاتل حنين لان سمعت صوت صريخها.. كتلها عمه عليمن كالت والله ما ادري اكيد مضوجته وكاتلها تستاهل..

بكر كال معليكم.. حياتهم تخصهم.. اتركو واكلو.. كعدنه ناكل.. دخلت حنين.. عينها مورمه يمكن ضاربها..

صبحت حتى ما عايدت.. كالتلها عمتي متعرفين تعايدين اهلج ما علموج.. صاح بكر يمممممه..

كالتله وغمه.. هسه احنه شكلنه.. كاللها اكلي.. سمر راح تخلص الكاهي وانتي تباوعين لحنين..

ضحكت.. كالت صدك شنو شو انتي جنج مشايفه بلعتي الكاهي كله.. كتلها عمه والله بس 2 اووف منك بكر.. ضحك..

دخل عادل فرحان ويصبح ويعايد وخبص الدنيا بخباله من الصبح وكل شوي يضربني على ركبتي من وره..

ويصيح اذا وجدت علبة مفتوحها اضربها ولا تخف من صاحبها.. واني اتصايح وياه واصيح بعمه عليه..

وحنين بدها تاكلني بعيونها.. طلع بكر وعادل وعمو خليل يعايدون اقربائهم واصدقاءهم.. اشو هاي هجمت عليه.. وتغلط وتصيح..

والله لا ينطيج ووجه الفكر.. كتله هيي هيي شبيج من يمج انتي.. كالت ام الرجوله.. مخليه بكر محبس بأيدج..

وتردين عادل هم.. والله اذا تقربتي يمه شعرج اكطعه.. كتلها لا والله كيفي.. عادل زوجي وبكر ابن عمتي وحمايه.. انتي شكو..

اجت عمتي كالتلها انتي شو هواي تلغين.. كالتلها عمه البارحه من وراها يضربني ويكلي ترحين فدوه لحذائها..

بلله هاي اني اروحلها فدوه.. لو بيها خير ما تاخذ نفسها.. كتلها هوووب هوب شو انتي ما تعرفين تحجين..

اغلط ويه نفسي ولا اغلط ويه واحد بالحرام.. بس الساقطه تسوي هلشي.. والحليم تكفيه الاشاره..

عمتي صاح اااااااااااالله اكبر على روسجن 24 ساعه مناكر حتى بالعيد معارك.. انطني عباتي اروح اعايد الناس.. احسن ممكابلتجن..

طلعت عمتي.. اني عفت حنين تحجي ودخلت لغرفتي اجت وراي ودخلت.. وكالت باعيلي مو عبالج ما اعرف بسوالفج..

عبالج ما ادري بذيج الليله شسويتي.. باوعتلها باستحقار شسويت.. كالت شفتج لما طلعتي بنص الليل وطافيه الكهرباء..

ورحتي الغرفة بكر.. شفت وجهج بضوه موبايلج.. هم زين الله طلعني للحمام بوكتها.. جان هرمتي براحتج جوه ستر الليل..

كتلها اي وشرايده.. كالت لا عبالج والله سمعت كلشي وسمعت بكر شلون يعترفلج بحبه.. بس متانيه فرصه اوكعج والله ومحد يخلصج من ايدي..

كتلها هااااا والله دطلعي لعد ودوريلج على فرصه حبابه.. يله برا وسدي الباب وراج.. كالت تهون يسمّيره..

سدت الباب وطلعت.. صفنت هاي خاف صدك تحجي.. اي وتحجي شسويلها.. اني ما عندي شي ويه بكر..

وحتى لو حجت بكر موجود وهوه يعرف يحلها.. ما هتميت للموضوع.. وبقيت بغرفتي.. للضهر.. طلعت اكلي سمج للغدا..

اجت عمتي.. كالت ذوله شبيهم عادل ومرته يطابخون.. شجاهم اليوم.. كتلها يطبها مرض تستاهل السانها ينكط سم..

كالت اي والله هيج ويكتلها ويطلكها اخخخ يرادلها بخت.. كتلها شعلينه.. دنحجي طب عادل.. كالتله عمتي شبيكم متستحون اصواتكم طالعه..

كاللها يمه خبلتني من البارحه اتزن وترن براسي شعندك رحت السمر.. كتلها وج ماكو شي بس تريد اوديها لاهلها.. ماكو بس تصركع براسي..

كتلها دتعاي خل اطلع قهري بيج واخذت المقسوم وما تابت وهسه هم ردت نفس الاسطوانه…

كالت عمتي شنو تردين ترحين لاهلج. كتلها اي.. اريد اروح اطلب العذر من ابويه واكطع الزعل.. بلكت يرضون عليه..

كالت.. اني اروح وياج مشتاقه لابوج اريد اشوفه.. كتلها علووا بعد احسن.. دنحجي وطبت حنين تحجي ويه عادل..

كالت عمتي اوي لا هله اروح احسن من صوتها.. وطلعت.. اني واكفه اكلي وهاي تتعارك وياه تكله شعندك واكف يمها..

يكلها بكيفي مرتي وعاجبني اوكف يمها احظنها انتي شكو.. واجه حظني حيل من وره ويشم بركبتي كدامه..

كتله عادل دووخر يمعووود.. همس بربج غلسي خل احرك دمها.. كتله يمعود جاي اكلي السمج راح يحتررررك..

اميل بجسمي منا ومنا واحاول اوخر منه.. وهوه كامشني ويبوس.. وهاي تشيل روحها وتركعها وتجر بيه..

واني لازمه الخاشوكه اطلع سمج وهمه يتعاركو وعادل لازمني.. طلعت السمج كوهوخليت وجبه جديده…

ودرت جسمي.. وخرت من عادل.. كتله يمعود ما النه خلكها هاي دعوفها.. بقت تغلط وتفشر عليه..

باوعت لعادل.. كتله هاي شبيها تخبلت.. احجي ومخليه اديه علكاونتر ومنتجيه عليه..

جان يجي عادل ويكلي معليج بيها تروحلج فدوه حياتي.. ويبوسني من شفتي.. بقيت مجمده بأيده..

وخرت منه بساع.. وحنين شافت الصار كدامها.. كالت والله لو تصير ذهب بعد ما اريدك.. دارت وجها وراحت.. وهوه يصيح درب السد عساه لا رد..

هوه راح.. واني ضليت صافنه ليش هيج عادل يعاملني.. معقوله تقبلني.. وديوحيلي انو يريدني..

اوف يا عادل اني مو لعبه وتلعب بمشاعري.. شوكت ميعجبك تتقرب وشوكت ميعجبك تتركني..

كملت الغدا.. حنين لمت ملابسها.. وطلعت وعادل طلع ياخذها.. خليته وكعدنه اني وعمتي نتغده..

دخل بكر.. سلم وكعد ياكل ويانه.. سولفتله عمتي على مرت عادل بس ما تدري لان باسني كدامها.. كالتله غيرانه من سمر..

كال شعندج ترحين لاهلج.. كتله اريد اتصالح وياهم بلكت من ويايه عادل يخضعون واليوم عيد.. بلكت الله ويقلبون صفحه ويايه..

كال هاا خير انشالله.. بقيت افكر باللي سواه عادل.. وكلما اتذكر السواه يكزبر جسمي..

قررت انطي عادل فرصه.. وارضي ضميري.. ميصير هيج اني معلكه.. كلبي لبكر.. وعقلي لعادل..

لو عادل تقبلني.. اشيل فكرة بكر اساسا واكمل حياتي ويه عادل ولو عادل ما قبل خلص امحيه من حياتي وفعلا اعتبره اخ وما يربطني بيه اي شي..

تانيت عادل يجي ياخذني لاهلي هسه يجي هسه يجي.. ماكو صارت ال10 بليل وهوه ماكو..

لحد ما اجه الساعه 11 بليل نص سكران.. طلعتله كال سمر اسف والله نسيت.. كتله عادي باجر..

رحت للغرفه.. لبست ملابس خفيفه ثوب فانيله ربع اردان ودلعه.. لون اصفر.. وجوه الركبه.. صيفي رغم البرد

قررت اختبر عادل لو رادني اله اليوم زوجه راح اعتبره زوجي وانسى كولشي غيره لحتى ابري ذمتي كدام الله.. وارضه بقسمتي شسوي

خابرت على عادل.. كتله عندك شي.. كال لا ليش.. كتله ضايجه تعال يمي نسولف.. كال اي عادي جيت..

قفله.. اني ركضت للمرايا نثرت شعري وتعطرت.. اندكت الباب.. فتحتله مبتسمه.. وانصدم ابكر ديفتح اباب غرفته..

دار وجها عليه.. بقى صافن وفاتح عيونه.. عادل دخل وسد الباب وراه… يتبع

🌺🌺🌺🌺🌺

مـا ردت غـيرڪ ,, وانتـه غـيري تــريد😔💔✋

الله يعين اليحب من طرف واحد..شاركوني ارائكم

# حكاية_سمر..

،،،،،،،،،،بقلم الكاتبه زينب ماجد،،،،،،،،،،،

البارت_ 18

سمر.. فتحت الباب العادل مبتسمه.. وانصدم ابكر واكف يفتح باب غرفته.. ودار وجها وباوعلنه..

فتح عيونه حيل وبقى واكف.. متجمد بمكانه.. عادل دخل وسد الباب.. ضل بالي ابكر.. شسويت بيه..

اووف.. كعد عادل.. كال هااا ما جايبتلنه كرزات مززز.. كتله مو فاتحتلك طاولة شرب دكعد عيني اكعد..

كعد.. كعدت يمه.. كال اشو غرفتج دافيه.. غرفتي بارده ليش.. رغم. هم مشغل نفس الصوبه..

كتله مو انته غرفتك واجهة هوا مو صفح.. كال حظي غير.. اي شكو ماكو.. كتله شاررب.. كال اي..

كتله مو قررت بعد ما تشرب.. كال غير من وره هاي بنت الكلب طلعت روحي.. كتله عادل انته تتحارش بيها وبللت الطين..

كال يطبها مرض عساها لا ترجع.. كتله متريدها.. كال لا مو ما اريدها بس تعبتني.. كتله عادل واني..

كال شبيج انتي.. كتله شنو تاليتك وياي.. حتخليني هيج طول عمري.. جان مخلي ايده علجربايه ساند جسمه..

مديت ايدي.. وبأصبعي مشيتها على ايده.. كتله لشوكت راح تخليني معلكه.. انصفني عادل..

جر ايده.. كال سمر اتمنى بس والله مو بيدي ما عندي مشاعر اتجاهج.. اصلا مرات احس محرمه عليه.. مثل اختي..

سحبت ايدي.. كتله يعني مو ابالك اني.. كال صعب اتقبل.. حاولت قبل اتقربلج.. ما اعرف متجذبيني لان المشاعر البيناتنا اخوه..

دنكت راسي .. كتله لعد ليش بستني اليوم.. كال هيج دا احرك كلب حنين.. كتله عادل مفكرني لعبه ما عندي احساس..

سكت.. كتله احجي تره تعبت لا انته المتقبلني ولا انته المطلكني شلوون.. كال تردين اطلكج ما عندي مانع.. بس واهلج..

كتله شبيهم.. كال اذا ابوج يحن عليج وما يكتلج احمد يذبحج والله.. وكالها احركها ولا ترجعلنه مره مطلكه.. نعتبرها عار.. وتعرفين هلشي..

كتله وتالي ما اعييش.. كال ما اعرف امرج مو بيدي سمر.. شسوي.. ما اكدر اتقبلج كزوجه والله..

اصلا بليلة العرس كومه شربت والله بس علمود ابعد هلاحساس من داخلي واحسج انتي زوجه صالحه الي.. ما كدرت..

ونمت وتاليتها اتقربتلج واني نايم.. حتى ما احس بشعور الاخوه اتجاهج.. كتله هلكد انته مو متقبلني.. اخذ نفس وسكت..

خابرت عليه حنين.. كال استلم خابرت متتحمل بدوني اعرفها.. وكام من مكانه فرحان وطاير برا يخابرها..

اريد اخذ نفس عبرتي جرحت بلعومي.. ودموعي تجمدت بعيني واني اباوعله يطلع اخر شي صرخت ابجي بركه لييش ربي ليييش

لا اهل لا زوج ولا اي احد ليش محد يتقبلني.. ليش الا اتجه للحرام يله اعيش.. تعبت والله تعبت..

لا اكدر اعيش مثل المزوجات ولا اكدر اعيش مثل البنات.. والله لو مو حرام جان انتحرت ياربي وين اروووح.

الا اصير عار ومو خوش بنيه واقبل بحماي واشرد وياه يله اعيش ليش ربي والله ما سويت شي لييش

اااااه كلبي والله ما عاد اتحمل ربي رحمتك.. بقيت ابجي ساعات على نفس مكاني واعتب ربي ساعه وساعه اعاتب نفسي وشلون ضيعتها بنزواتي..

سمعت باب بكر انطبكت حيل.. هرعت من مكاني جريت البنطرون لبسته ولبست جاكيت صوف

وفتحت الباب.. شفته طلع برا.. جريت الحجاب.. ومشيت وراه.. لكيت يمشي بنص الفرع..

واني امشي وراه.. طللع للساحه.. فااارغه ويادوب يجيها ظوه من البيوت.. كعد علرصيف..

اخذ جكاره واني اباوعله.. الساعه 2 بليل او اكثر ما اعرف بس الجو باااارد يكتتتتل.. كعد يدخن..

ويتحسر ويشيل حصو ويشمر بحركه.. واسمعه ياخذ من ياخذ نفس بيه نشله يعني يبجي..

اتقربت وكعدت يمه عرصيف.. دار وجها بساع.. كتله بكر… قاطعني هشششش ما اريد اسمع..

كمت ابجي.. كتله بكر مصار شي من اللي براسك.. كال قصدج ما استقبلج.. ورجعتيلي.. يحجي وهوه منشول وكوه يجر النفس

وكل ساع يمد ايده ويبعد دموعه.. كتله بكر جان لازم اسوي هيج حتى اكدر.… كال هششش هششش سمر لا تبررين ارجوج..

السويتيه مو غلط.. زوجج وتردين تكسبيه.. بس الغلط مشاعري وكلبي اللي مو كادر اسيطر عليهم..

نزلت راسي ابجي.. بكرر والله احبك والله بس بكر اخاف تفتهم شنو اخاف ما اكدر اغامر بحبك..

كال اذا تخافين شعندج طالعه بهليل وراي بنص الشارع وكاعده تبجين يمي.. كتله بكررر كال سمر ارجعي..

كتله اسمعني.. صرخ شسمع هه سمر عادي تعودت وداعتج.. شفتج لعادل وكبلها لاركان.. عادي كلبي تعود عليج بحظن غيري بس غير يتووب. .

مليت اطلعي من راسي اطلعييي.. ولج تعبت مو حديد هذا دم ولحم يحسسسس والله يحسس.. ويدك على كلبه

امووت واخلص وين اروح اكتل روحي علمود يطلع هلمرض من كلبي اللي اسمه سمر..

مو متحمل حبج بكلي اذاني.. هنتيني هواي سمر هواااي.. شعدي وشعد منهن تعبت مو كادر اتحمل والله..

كام شمر الجكاره ومشا.. كتله بكر الله يخليك لا تعوفني بكررر.. والله احبك بس اخاف اخاف افهمني..

ما سمعني.. مشاا وراح للفرع.. كمت امشي وراه وابجي بكر بس اسمعني.. بكر.. بكررررر..

دار وجها.. كال سمر ارجعي ولا تزيدين القهر عليه ابوس ايدج اتركيني .. حجه ودار وجها لسيارته ركبها ومشا..

بقيت اباوعله ودموعي تنزل واتوسله بعيوني راح.. ركضت لغرفتي سديت الباب ووكعدت ابجي بحرركه..

احس شي بادخلي انكسر.. احس وجع بصدري مو راضي يروح.. افرك بركبتي بس اريد وجع العبره يخف متت مخنوكه اررريد اتنفس.. تعبت..

بقيت ابجي ابجي لحد ما طلعت الصبح واني دموعي بعيني.. ما اعرف شوكت غفيت ما حسيت الا عمتي تكعدني ..

كالت دكومي عيني الساعه 2 الضهر.. اريد اكوم اعضامي مأذيتني.. كتلها عمه عظامي موتتني اخخخ..

اجت لزمتني.. كالت ولج صايره نارر سابحه وطالعه بالبرد.. كتلها عمه غطيني بردانه فدوه.. طلعت غطه وغطتني..

وجابتلي حبوب كالت اشربيها تصيرين زينه.. شربت الحبوب وكعدت ارجف ميته.. للمغرب طلعت كوه للصاله..

سمعت عمتي تحجي هسه منين طلعنه بسالفة السفر هاي.. باوعتلها واحجي وصوتي مطبك كولش من البجي..

كتلها منو حيسافر.. كالت بكر باجر طالع الصبح لاربيل ومن مطار اربيل رايح لدبي.. كتلها ليش..

كالت شمدريني مو قابل يحجي ما ادري شبيه.. رحت لغرفته كوه اجر رجليه بألم..

فتحت الباب.. ماكو.. بس جنطه مفتوحه علسرير وبيها غراض اله.. دخلت اباوع علجنطه.. ودموعي تنزل..

دخل هوه درتله وجهي.. كتله بكر لا ترووح الله يخليك.. كوه تطلع الكلمه بصوت مببحوح..

كال شتردين مني سمر.. خليني اشوف حياتي من دونج الله يخليج متت .. بس حجه نزلن دموعه..

كتله بكر لخاطري والله ما اكدر بدونك لا تروح.. كال لتخافين ادزلج مصرف ووصيت امي وعادل عليج. ما عليج شي..

كتله كل هذا مهامني بكر لا تتركني فدوه.. والله اكدر افهمني.. اني جبانه اعترف جبانه بكر ابقى يمي قويني..

كال واني منو يقويني سمر.. من انجرح منو يداويني.. من اتعب منو يريحني.. سمر رحمه لمحمد اطلعي اطلعي عوفيني..

ومشا كدامي يطلع بملابسه ويشمر بالجنطه ويمسح بدموعه.. كمت ابجي واني اباوعله..

درت وجهي اريد اطلع احس عيوني غوشن.. اريد اشوف ما اكدر احاول افتح عيني واسدها..

غوااش.. اباوع احس الكاع تفتر بيه.. وكعت وبعدها ما حسيت بشي .. الا واني بالمستشفى.. نايمه

وعمتي وبكر ووحده الضاهر ممرضه..اريد افتح عيوني تأذيني وما اشوف زين.. كالت شتحسين..

كتلها وجع بجسمي وما اشوف.. كالت يعني شتشوفيني.. كتلها غواش بعيني.. قاست الضغط..

كالت ضغطها كولش نازل.. ودرجة حرارتها 41 بسرعه انطوها مغذي .. كاللها بكر بلا زحمه بس كوليلي شبيها..

ليش هيج تتخربط.. كالتله ضغطها مصفر وحرارتها جدا عاليه لو بقت هشكل راح تفقد نظرها..

بقت الدكتوره والممرضه فوكاي واني الالم ذابحني وبس اوون من راسي احس ثقل ووجع وعظامي الم الم مو كادره اشيل اصبعي من وراه..

لشوي ما حسيت غفيت.. كعدت الساعه كبالي بالردها ب12 وعشره.. وبكر واكف فوك راسي.. وعمتي كاعده يم رجليه..

كالت ها سمر عمه.. تحسين بشي..كتلها لا احسن.. بس طلعوني منا.. كالت غير الدكتور يكول..

اباوعله.. واكف واديه بجيوبه ويباوعلي.. كتله بكر طلعني منا.. هز راسه ودار وجها. اجت الدكتوره..

كاللها نكدر ناخذها عادي.. كالتله اي بس لازم تاكل.. لان ضغطها مو لازم ينزل ودواها تاخذه..

كاللها انشالله.. دار وجها لامه وكال يله يمه كعديها.. كعدتني عمتي ومشيت ميته من البرد..

صعدنه بالسياره.. كعدت وره.. باوعلي شافني اباوع لعيونه رد نضره عني.. رجعت راسي للكرسي.. واني صافنه بعيونه..

والجو ليل وبارد يكتل.. والسياره متشوف شي منها للخارج من الدخان اللي عزجاج من انفاسنه..

شفته حرك ايده. طلع سي دي.. خلاه .. وكام يبحث بالمحرك.. اشتغلت اغنيه اخذ نفس وباوعلي بالمرايا..

كام يشمر حسرات ويه كلمات الاغنيه.. ياااا ما خبيت بعينيي.. دمعي وهمي الساكن فيي.. ومخليك تحس علييي وداويك وقلبي موجوع..

اذا كنت بعذابي راضي.. وجاي تترجعني.. انا يحبيبي جرح الماضي بعدو عم يوجهني..

اذا شايفني مش عم ابكي.. ليش انته خليت ادموع.. اذا شايفني مش عم اشكي.. فكرك يعني مش موجوع..

اني اسمع ودموعي تنزل علساكت وهوه يباوعلي ويشمر حسرات ويبعد نضره.. واني استمع الكلمات الاغنيه.. اللي احسها يشكيني..

ضيعني حبك ضيعني.. يا ما اشكي وما تسمعني.. حتى الـ ااااه البتوجعني صوتا عندك مش مسموع ..

احس عيونه دمعت.. ويرمش سريع ويحاول يبعد الدموع من عينه.. خلاص حسيت خسرت بكر وما الي امل بيه

وصلت البيت دخلوني للغرفه.. كال لعمتي يمه انطيها علاجها وخل تلتزم ما بينه حيل كل ساع راكضين للمستسفى..

حجاها بصيغة نتر.. احس كلبي ورم منها.. اخذت العلاج ونمت.. كعدت الصبح.. زين احس بتحسن..

جسمي خفيف.. كمت.. لكيت ورقه وفوكاها كلاص.. جريتها.. مكتوبه ديري بالج على نفسج .. بكر..

كمت وخرت الغطا بسرعه.. طلعت اصيح عمه عمه عمه.. كالت هااا ولج شبيييج.. كتلها عمه بكر وين.. كالت طلع.. كتلها وين..

كالت لاربيل غير ومناك يروح لدبي.. كتلها هااا كوه طلعت الكلمه من كد ما اختنكت.. دخلت للحمام اريد اجر الحسره اختنكت بس افرك بركبتي..

العبره تذبحني.. طلعت من الحمام.. رحت للغرفه خابرته.. دك دك دك.. رفعه.. كتله ليش بكر ترووح ليش..

اخذ نفس وكال والله احسن النه ثنينه.. اني ارتاح وانتي ترتاحين ليش نضل نعاني.. كتله ارجع ما اكدر بكر فدوه اررجع..

كال اكلمج بعدين سمر.. اصدقائي يمي.. وقفل الخط.. دنكت ابجي.. يارب عونك اريد اتنفس بكونك.. اريد ارتاح ربي ساعدني ارجووك..

دا ابجي دك عادل الباب.. مسحت دموعي.. كلت تفضل.. دخل.. كال عبالي مقفول.. اكوول ما ترحين لاهلج..

كتله شوكت.. كال هسه تره العصر عندي شغل..كتله ماشي.. رحت سبحت وبدلت.. والغصه بكلبي..

عمتي بدلت.. وعادل كمل صاح هاااا خلصتي كتله اي.. كال يله.. مشينه.. وصلت الباب اهلي.. اختنكت..

عادل باوعلي وغمزلي ويكول خليج قويه.. هزيت راسي اي.. دخلت البيت اهلي.. وعمتي وياي..

ابوي استقبلنه واهلا وعايدهم.. وصل يمي.. دار وجهه.. لزمت ايده.. سحبها.. حضنته حيل وبقيت ابجي ..

وكتله بابا لا تعوفني والله مو بقصد سويت هيج.. بابا لا تعاقبني على ذنب ارتكبته واني طفله.. ابجي واشهك..

بابا حبيبي لا تعوفني والله تعبانه بدونكم بابا.. ارجوك سامحني.. دار وجها.. مسح على راسي وكال طبي يله..

كتله مسامحني.. ما رد عافني وطب جوه.. اجتني ماما حظنتني وعيونها ادمع واتعايد بيه..

انوب اجو اخواني الصغار حظنوني اباوع لنجوى تبوس بيه وتبجي.. وتكلي سمر والله اشتاقلج.

كتلها اني اشوق.. طبيت جوه ويه نجوى كتلها سولفيلي عليكم عليج شلونج بالدراسه..

كالت زينه بالدراسه بس بالبيت زفت.. كتلها ليش شكو كالت احمد شاد وياي كلما كام وضربني كلما حجه وعيرني بيج..

كتلها ليش.. كالت ما يخليني انام حتى سبح 5 دقايق اسبح واطلع وممنوع اكعد وحدي مطين عيشتي..

سمر والله اتمنى اموت هسه واخلص.. كتلها وامي ابويه ميحاجووه.. كالت بابا يكله عفيه ضبها وامي ما الها كلمه..

والله ومحمد لو جلب يجي من الشارع يخطبني هم اوافق ولا ابقى تحت رحمة احمد وابويه..

كتلها لا تكولين هيج يروحي بعدج زغيره.. 5 اعدادي.. كملي كليتج واتزوجي.. لتخليهم يدمرون مستقبلج..

نزلت ادموعها.. كالت سمر مليت 24 ساعه بس يضربني على اقل زله ويعيرني بيج تكول اني سويت ذنبج.. ويكول يجي يوم اذبحج انتي واختج..

تحجي ودموعها تنزل.. ودموعي وياها.. كالت سمر لا ترجعين لهنا ولا تطلكين اببد والله لو تعيشين العمر كله ابيت عمه..

امي تحجي عليج.. تكول هاي بطرانه منطيها غرفة نوم بالملايين وراتب واناقه وشخصيه ومعاجبها سمر لو تجي تشوف حالج شتسوي..

كتلها نجوى تعبت هناك متت.. كالت وهنا اتعس سمر اذا تحبيني لا تطلكين عيشي هناك احسنلج والله.. وعمه طيبه تحبج..

كتلها مو دوم ساعاتها براحاتها.. كالت يمعوده هيه امي وهاج باعي.. طلعتلي ايدها كتلها شنو هاي..

كالت ذاك اليوم جاي انضف الثلاجه بالسجين واطلع الثلج وانزرفت الثلاجه بدون قصد كامت حمت السجينه وخلتها على زندي..

حظنتها… وبجيت.. كتلها نجوى ما الج بس دراستج اجتهدي وحاربي والله ويانه لا تخافين ما يهملنه وربج..

كالت لشوكت سمر لشوكت تعبت اشتغل مثل الخدامه وادرس واحمد كون بس يأمر اكله حاظر واذا اتأخرت ثواني طبك الصونده ودمه جسمي..

دنحجي طب احمد.. كمنه ثنينه.. التفينه ابعضنه من الخوف منه.. كال تعاي ساقطه شعندج جايه.. كتله احمد هذا بيت اهلي..

ضربني اشدي.. صارت نجوى كبالي كالها هله هله ادافعيلها مو اي مو انتي مثلها دتعاي.. ضربها راشدي ولزمها من شعرها وشمرها ودفرها بضلعها..

دفعته منها.. اجاني طاير يريد يضربني صارت امي كبالي.. كالتله كافي رحمه للعباس كافي جوز منهن عدوانك هنه لو خواتك كافي.. ما بكلبك رحمه

اجه ابوي.. كاله احمد مو وكتها اكعد ابني.. يباوعلي ويكلي وين ترحين مني ومحمد لصلخ جلدج.. وطلع

كعدت اخذت نجوى بحظني وابجي.. وابوس بيها واكولها سامحيني غلطت والغلطه انتي دفعتي ثمنها سامحيني نونه سامحيني..

هيه حظنتني وتبجي.. وتكلي سمر تعبت انشالله اموت واخلص.. كتلها لتحجين هشكل هوه يموت ولا انتي.. مسحت دموعها وكتلها كافي يله .. تعاي نكوم

رحنه اني وياها للمطبخ.. غسلنه وجهنه.. اجه عادل كال هذا شبيه مخبل.. كتله اسس عادل فدوه ما بينه حيله..

باوع لنجوى كاللهاا اشو بلله خره بيه.. صالخ وجها. كتله شتسوي هم شايفه القهر خطيه.. كال خل تجي عدنه كم يوم..

كتله علواا يقبل ابويه.. كال بلكت اني وامي نحاجيه ويقنع. اجت عمتي اخذت نجوه بوستها.. وكالت انكسرت ايده انشالله تستاهل هلحبابه هيج يصير بيها.

حاجينه ابويه تروح ويانه قبل بس احمد ما قبل.. فما راحت.. اني من شفت الوضع هيج.. ما كدرت ابات..

خفت ابقى واحمد يخلي عقله ويانه ويضربنه.. وابوي ما منعه كاله مو وكتها.. اوف يابكر.. نارك ولا جنة هلي..

كل شوي اخذ صفنه وافكر بيه.. وين عفتني وي ذوله الميرحمون.. كملنه غدا.. طلعنه اني وعادل وعمتي رجعنه للبيت..

مر شهر وبكر ما رجع.. اخباره انقطعت حتى ميخابر اهله.. عمتي تلوع عليه واني يوميه اذكره وابجي..

بقيت مداومه بجامعتي اروح ويه الخط مال علي وارجع وياه.. فد يوم.. دا اريد اطلع.. لاكاني استاذ منير..

كال شلونج سمر.. كتله زينه كال ما قنعتي.. كتله بشنو ..كال نتواصل.. كتله استاذ عشنو نتواصل..

كال سمر اني رجال مطلك.. وانتي مهجوره خل نلم جرحه على جرح ونتصافه.. كتله انته شو متستحي شنو مهجوره شاكيتلك اني..

وبعدين منين تعرف عني كل هسوالف.. كال بطريقتي الخاصه.. كتله لا طريقه ولا ابد لتسوي روحك ذكي براسي..

هذا كل من وره احمد الكلب ..بس اني اعلمه.. كال سمر تتندمين.. كتله منو يندمني بله حضرتك.. كال اني حذرت وقد اعذر من انذر..

كتله ما تولي من وجهي صوجي اني مضيعه من وقتي ويه واحد شايب مخرف.. كال شوفي هلشايب شراح يسوي بيج..

عفته وطلعت رجعت للبيت.. لثاني يوم اجاني احمد نهاية الدوام كال سمر اريد احجي وياج.. كتله اني هم اريد احجي وياك..

كال ما اريد بره تعاي ندخل هنا بلقاعه محد بيها.. دخل سد باب القاعه.. باوعت كتله ليش سديتها..

كال نريد نحجي منريد احد يسمعنه.. كتله احمد تبطل توصل اخباري لاستاذك التافه لا قسما عضما متلوم الا روحك..

اتقرب يمي.. عقدت حاجبي.. كمت اتراجع ليوره.. كتله اعتقد انتهى الحوار بينه.. لزم ايدي وشمرني علحايط..

كتله هاي شبيك احمد.. وخرر كال سمر صار 3 اسنين بهلمرحله اريد اتخرج مليت.. كتله واني شنو دخلني..

كال ساعديني.. وبدا يتقرب.. ردت اوخر لزم اديه وعصرها ويه الحايط وكف كبالي.. انوب كام يبوسني..

اريد اوخر منه ماكو اخر شي انطيته ضربه برجلي ووخرته وضربته راشدي.. دا اريد اجي ارزله واشوف واحد جاي يصورنه.. شافني وركض..

ركضت وراه حيل .. اباوع منا منا ماكو اختفى .بقيت ادور ماكو ابد ...رجعت للقاعه لكيت احمد هم ماكوو.. خليت ايدي على حلكي يربي شلون مصيبه.. يتبع

🌺🌺🌺🌺🌺

😐😐 متابعه شيقه ..

#

# حكاية_سمر..

،،،،،،،،،،بقلم الكاتبه زينب ماجد،،،،،،،،،،،

البارت_19

ادور ادور اختفو.. خليت ايدي على حلكي وبقيت اباوع ياربي شلون مصيبه هاي.. شسوي..

خليت ورحت لادارة الكليه.. دخلت علعميد.. سولفتله.. كال عندج دليل احمد طعمه معتدي عليج.. كتله لا استاذ.. كال شلون لعد ..

شنو علاقتج بيه.. كتله زوج حماتي.. وكان يتحارش بيه من زمان..بس استاذ اكو واحد وياه جان يصور.. كال تعرفيه.. كتله لــNOـا

كال تعاي وياي.. مشينه للمراقبات.. كال للحررس.. طلعلي تصوير المراقبه لهذي القاعه..

بحث.. كاله استاذ هذي القاعه معطله كاميرات المراقبه بيها.. صرخ بوجها.. شنو يعني معطله..

كاله استاذ البارحه اتعطلت وجاي نعمل على اصلاح العطل.. دار وجها عليه.. كتله استاذ احمد قبل ليعتدي..

كال سمر اريد اتخرج صارله 3 اسنين بمرحلته.. كال شنو قصدج.. كتله استاذ.. احمد دائما يوصل اخباري للاستاذ منير..

والبارحه الاستاذ منير هددني اذا ما اخضعله راح يندمني.. واليوم نفذ تهديده بمساعدة احمد..

صرخ بوجهي لج انتي تعرفين شجاي تحجين منو انتي وتجيبين اسم الاستاذ منير ..كتله استاذ مجاي اتبلى عليه والله..

هوه دوم يتحارش ويعرض عليه علاقات.. عندج دليل.. يحجي بعصبيه.. كتله لــNOـا.. بس هوه واحمد اكيد متفقين..

كال ومنو يكول يمكن هذا مخطط من الاعيبجن علمود توقعن الاساتذه.. حجه الحارس اليمي..

كاله استاذ اسف للمداخله.. بس استاذ منير منتشره عليه هيج سمعه بالكليه.. اكثر من فتاة اشتكت منه.. بس هوه انكر..

صرخ عدكم دليل عليه.. استاذ منير من الاساتذه الاكفاء شلون تسمحون لنفسكم تتبلون عليه وتسمعون هيج اقاويل ..

حجه وراح بعصبيه.. دار وجه الحارس.. كال هم طلب ايدج للزواج.. درتله كتله اي.. ضحك كال يعني نفس الملعوب..

كتله شنو يعني.. كال تعرفين جيهان الكرديه الحلوه الجانت موجوده ذيج السنه.. كتله ما اعرفها.. كال المهم هم نفس سالفتج..

وسرق موبايلها وهددها بالصور ورادها تخضعله.. وتاليتها بطلت من الجامعه كلها.. كتله وبعدين.. محد حجه ويه الاستاذ محد شكى عليه..

كال هيه تايها حتى لو تشتكين ما عندج دليل عليه وينكر ووراه ضهر قوي بالدوله.. كتله والبنت اللي اسمها جيهان..

شنو وضعها هسه.. كال ما اعرف بطلت.. انقطعت اخبارها.. وهوايه بنات شكن منه.. بس منو يسمع هوه صدك استاذ ممتاز.. بس تصرفانه لاكفه..

وعينه زايغه.. اي وحده تعجبه من بنات الكليه يستغلها.. كتله وهسه شلون.. كال والله ما اعرف يا اختي..

طلعت منه.. يربي شسوي بهلمشكله هاي.. شلون لو وزع صوري.. اووف.. رجعت للبيت عقلي مفتر يربي شسوي..

انوب بكر مو هنا وين اروح.. اروح لعادل ..اي اروحله مو الشفيه يسموه زوجي خل ينقذني من هلمصيبه..

دكيت الباب على غرفته الضهر.. طلعت حنين.. كالت شرايده.. كتلها عادل وين.. كالت نايم.. كتلها اريده.. وصحت عااااادل..

صفكت الباب بوجهي ..استغفر الله هاي اشلون بيها.. فتحت الباب ودخلت.. لزمتني من هدومي وين وين..

جريت نفسي.. ورحت لعادل.. شلت البطانيه وكتله اكعد.. كال شكو سمر.. كتله اريدك بموضوع اكعد..

كعد.. وهيه تصرخ اطلعي منا.. كال احجي.. كتله بغرفتي اريدك مو هنا.. كالت فوكها بغرفتها جرتني من ثوبي..

كتله عادل كوووم فضني.. كام.. لبس ملابسه.. وطلع وياي.. دخلت الغرفه.. وكتله عادل مصيبه وكعت على راسي..

كال شكو.. كتله احمد زوج رنا الحقيير.. كال شبيه.. كتله اتعدى عليه اليوم بالكليه وباسني وصورني..

كام وصرخ شتحجين.. كتله اسمعني عادل احمد متفق ويه استاذ منير علمود ينجح.. كال استاذ بطيخ شنوو فهمينييييي..

كتله احمد يحجي للاستاذ انته هاجرني والاستاذ رايدني من زمان وهسه يكولي مدام ما عندج علاقه بزوجج سوي علاقه وياي..

ضربني راشدي.. كتله عادل اني شعليه جاي اكلك انقذني انته تضربني.. كال من وراج لو ما نطيته مجال ماااااااا يتعدى..

وهذا احمد اني اله.. طلع من الغرفه صرخت عااادل يمعوود استر عليه عادل موو هيج.. عادل ما سمع وطلع..

اوف شلون بلوه يربي.. اجت عمتي كالت شكو.. كتلها هيج وهيج بقت تصيح عزا العزاج سمر الله لا ينطيج وتضرب بيه وتكلي بتي راح تطلك من وراج..

كتلها عمه اني راح انفضح وانتي تكليلي رنا.. كالت من ايدج لو خوش بنيه محد يتقربلج وضلت تصرخ وتعيط.. وتضرب..

اني ابجي واكول وينك بكر احتاجيتك ارجع وينك انقذني.. كتلها عمه بكر ما تعرفين رقمه..

كالت لــNOـا وشعندج وي بكر هم تردين تورطينه ابلاج.. كتلها عادل متهور لا انوب يسوي شي..

كالت لو صار بولدي شي والله اذبحج واشمرج للكلاب.. بقيت الوب يا الله شلوون.. بليل اجت رنا وعمتها جايبتها..

وكالتلها هيج نسابه ما نريدها.. تشمرون بلاكم على ابنه ويجي ابنكم يهجم بيتنه.. كالتلها عمتي ابنج المتعدي على مرت ابني..

كالتلها ما متعدي هيه عدها علاقه وياه.. لو شريفه هيه جان ما عافها عادل واتزوج بس زين منه وستر عليها وهسه جاي اطلعوها شريفه براس ابني..

رنا بنتج بنفسها كالت عادل اتزوج على سمر لان بليلة عرسها مو بنيه.. وهسه تريدون اطلعوها شريفه.. شوفو ويامن ترخبط

اني مخليه راسي بين رجليه وقافله الغرفه وابجي وعمتي تتعارك وياها.. طلعت عمتي رنا حارت شسوت بالباب..

كسرته تكسير وما نفتح.. وذاك الغلط والفشار والصياح.. جنيت من البجي وين اروح.. وين انطي وجهي اروح لاهلي اعرفهم اخس وانكس..

بقيت لليل واني بغرفتي مقفوله عليه الباب سمعت عادل هاجم على بيت احمد مكسره. .

واحمد مختفي.. وعمام احمد اجو على عمي خليل.. وبابا هم اجه.. بس عمامي ما سكتو كاللولهم نطحنكم طحن لو ما طلعتولنه احمد..

ولو صوره انتشرت لسمر.. نسوي دمكم للركب.. وصارت جبيره وكل هاي واني قافله الباب وابجي..

شيجيبلي بكر.. والله بس اطلع يذبحوني.. بقيت اصررخ بكر شك الكاع واطلع متت الحكلي.. اجه بابا يضرب بالباب.. ويصرخ ولج سمر ابتليت وخلفتج كللللبه

ولج بلوه انتي على روسنه بلوه وما اخلص منج الا ادفنج بكبرج.. كتله بابا والله ما سويت شي والله راد مني علاقه وما انطيت نفسي..

يعني الا انطي نفسي واصير ساقطه يله اعيش تعبت افهموني.. ما سويت الناقصه وكل البلاوي الدنيا على راسي..

والله ما سويت شي ينزل روسكم.. وكل همي احافظ على سمعتي واني ما خلصانه موتوني وخلصوني تعبتتتتتتتتتت..

احجي واني قافله الباب وهمه يسمعون.. كالت امي.. حرام عليكم كافي دمرتو البنيه الله لا ينطيكم..

رادها وما انطت نفسها وهددها ابتلت لو الا تنطي نفسها.. وتذبحوها.. يحظ هلبنيه هاي الما كعد وياكم..

غيرها تلعب لعب ومحد دره بيها ومحد مس شعرها وهاي هيج مستقوين عليها.. كالتلها رنا سوت بتها شريفه.. لو ما طالعه عليح تبوك زلم..

عاد ابوي ضرب رنا.. وصارت هوسه عمه تحجي وابوي يصرخ وامي تحجي ووو هوسه.. واني مخليه اديه على اذاناتي وابجي..

واتمنى بكر هنا صدك احتاجيته حاجه.. لثاني يوم.. عادل لام جماعته وماخذين الاستاذ منير دك كتل مكسري وشامريه ..

وحالته خطره.. انوب اشتكو على عادل واجو اخذوه الشرطه.. تخبلنه.. ياربي شيحلها تعقدت اكثر.. منين اجيب بكر ويحلها..

ورنا وعمتي وحنين ما خلن كلمه وما حجنها عليه.. اخر شي كتلها عمه فدوه اذا عندج رقم بكر انطينياه بس خل اخبره والله هوه يحلها.. كالت هاج اخذي رقمه هذا دولي..

كتلها يعني عندج وتكولين ما اعرف.. كالت هوه منعني اكول لاي واحد.. اخذت رقمه ورنا تصرخ وتحجي وتغلط وتفشر 24 ساعه..

خابرته يدك وميرد.. كتلها عمه خل اخابره منج.. كالت ما عندي رصيد.. يا ااااالله.. انطيت فلوس لخالد.. كتله روح جيبلي رصيد وتعال..

راح خالد واني علنار بس اتصل ببكر وما يرد. يعرف رقمي.. دزيتله رساله.. بكر جاوب الله يخليك صارت مصيبه الحك علينه..

مجرد ما وصلت الرساله بنفس اللحظه اتصل بكر.. جاوبته اول مكال الووو شكو شصاير.. اريد احجي وكف لساني بس ابجي اريد احجي ماكو..

كال سمر احجي ابوي بيه شي عادل امي شبيهم ..كتله بكر الحك عادل بالسجن.. صرخ شنو ليش شمسوي..

كتله مصيبه بكر.. وسولفتله.. كال باجر من الصبح جاي.. سد الخط.. كالت هاا.. كتلها باجر يحجز على اول طياره ويرجع..

نمت واني املي ابكر يحلها.. اي يحلها.. ساعه اكول لا انوب اورطه هم مثل عادل.. وساعه اكول لا اعرفه تفكيره متزن ويحلها بدون تهور..

نمت.. للصبح ماكو بكر.. اتصل مغلق.. لل10 اتصل هوه من خطه الاسيا.. يعني دخل العراق..

رديت كتله هاا.. كال اني ابمطار بغداد.. ساعه واني يمكم.. اطمني.. كتله توصل بسلامه..

ركضت لعمتي.. كتلها بكر اجه.. كالت وينه كتلها بالمطار.. كالت يا الله بس كون يكدر يحلها..

اجه بكر.. تلكنه خواته وامه.. اني اباوعله اريد دموعي توكف من الدموع ماكو.. باوعلي.. سلم عليه..

واني ساعه امسح الدموع منا وساعه منا.. وبس اباوعله.. احس كلبي صار بأمان.. كال كعدو فهموني السالفه بالتفصيل..

سولفناله الصار والجره.. رنا صرخت كله منها اطلكت كله منها ام الرجوله ما تخلي رجال ما تلعب بعقله وتغلط..ورنا وياها على نفس الغلط صاح بكر..

رناااااااا مو هسه جاي ما اريد ارزل.. وباوع لحنين.. انتي لمي ملابسج اخذج لاهلج.. من يطلع رجلج تجين.. ما ناقص دوخه حته تكمليها علي..

كام هوه راد يمشي.. كال سمر.. كتله هاا.. كال حظري غراضج اوديج لعمتي رويده كتله ليش.. كال بدون ليش وكومي..

حجه وراح.. اختنكت من كلمته.. رحت بدلت بساع والم بغراضي ودمعي يجري.. ما تحملت عفت هدومي ورحت الغرفته..

فتحته.. لبس قميص.. رديت الباب.. كال تعااي.. اجيت كدامه.. دارلي وجها وكتف اديه ليوره بوجه جامد.. تفضلي رايده شي..

بجيت كتله ليش تعاملني هيج.. والله بعدك متت الدقيقه تمر عليه بسنه.. ليش متفهمني.. كال واني شنو سويت.. مو كلتي خايفه احبك..

اني ابتعدت حتى تبطلين تخافين.. وتاخذين راحتج.. كتله بكر تعديت مرحلة احبك او لا.. اني صرت احبك بس بعدني خايفه..

اخذ نفس.. وكال المطلوب سمر شنو.. كتله ليش متريدني بالبيت هلكد انته متضايق تشوفني..

كال ومنو كالج اني متضايق من شوفتج.. بالعكس خفت تتأذين من كلام رنا وامي وتجريحها.. كلت ترحين هناك ترتاحين. لحد ما اشوف حل.. وارجعج..

مسحت دموعي.. كتله يعني مو متضايق مني.. ابتسم.. كال وكل هلدموع والقهر خوف من اتضايق منج..

هزيت راسي..ابتسم.. كال شفتي سمر.. نار الحب تحرك موو.. تأذي وتاكلج وانتي عدله.. سكتت.. اطمني.. اني بالذات ما اكدر على مضايقتج..

اخذ نفس.. ودار وجها.. كال دروحي كملي نفسج دانروح اريد الحك اروح لعادل.. كتله اوك..

رحت لغرفتي اخذ بملابسي ومبتسمه.. اووف قبل لحظات جانت دموعي مو كادره اوكفهن وهسه مو كادره امنع وجهي من التبسم..

اوف يبكر تاليتك وكعتني وصرت بكيفك اضحك وبكيفك ابجي.. رفعت راسي للسما.. ربي لا تؤاخذني بما ليس بيدي..

كلبي مو كادره اسيطر على مشاعره.. والمشاعر مو بأيد احد .. لميت كولشي.. وطلعت.. كالت حنين ولا هامج الضحكه راسمه وجهج..

عساها بحظج وابختج سجنت عادل.. غيرت ملامحي.. هاي هيج فرحتي واضحه..

طلع بكر.. كاللها بلا لغوه واطلعن كدامي.. وصاح يمممه سويج سيارتي يمج.. كلتله بالصيدليه.. كتله اني راح اروح اجيبه..

رحت جبته وطلعنه.. كتله اول وين نروح.. كال اوصلج لبيت عمتي ومناك اودي حنين ومناك اطلع لعادل..

كتله اوك.. مشينه.. وصلني لبيت عمتي.. استقبلتني عمتي.. وكالتله لا تخاف عليها اني يمها..

لليل كالت سمر انتي ما اداومين.. كتلها شداوم عمه غير تخلص هلمصيبه.. كالت معليج انتي راح تثبتيها عليج داومي..

كتلها وكتبي كلها بالبيت.. كالت اخابر بكر يجيبها.. خابرت بكر.. كاللها اني اجيبها فد شوي..

اجه كتله هااا شنو خبر عادل.. كال احمد الكلب مختفي.. وعادل واكعه براسه شغلة الاستاذ..

وهلكلب مو راضي يتنازل عنه.. كتله وهسه.. كال لازم نلكه احمد علمود نأدبه ونجبره يعترف على الاستاذ واللي صور..

غير هيج لا نكدر نطلع عادل ولا نكدر نأمن علتصوير ميطلع.. كتله واحمد وين راح تلكاه..

كال رحت لكم واحد يعرفه من جماعته.. كتلهم اللي ينطيني احمد انطيه مليون.. وجاي ادور على هلكلب

كتله بكر وتالي.. شلون لو نفضحت الصور.. كال لتفكرين بالاسوء .. اتركيها على الله وتفائلوا بالخير تجدوه..

كتله انشالله.. ودوامي.. كال شعليج انتي كتله لو سمعت حجي بالجامعه.. كال سمر لا ادورين سوالف هناك..

كملي محاظراتج.. وقبل لتخلصين خابريني اجيج.. كتله ماشي.. باوعلي كال ديري بالج على نفسج..

ابتسمت.. كام طلع وراح اني نمت.. لثاني يوم الصبح خطيه ابراهيم ابن عمتي وداني للجامعه..

دخلت.. اتلكتني انمار.. كالت هااا كتلها شها.. ابتليت.. كالت لو تسمعين الحجي الصار هنا.. كتلها فدوه ما اريد اسمع.. خليني..

كتلها بس هلكلب ماكو اختفى كالت منو كتلها احمد.. كالت تعاي نسأل عليه ميمي شقاوه هذا كولشي بلكليه يعرفه..

كتلها لا انوب نبتلي.. كالت شنبتلي دمشي.. رحنه اله يحجي معلك.. كال ما اعرف.. كتله كول لجماعتك لو احد عرف احمد وين اله مليون دينار..

باوعلي.. كال تضمنين المليون.. كتله اضمنه.. كال ماشي.. تعاي.. كتله لحظه وين.. كال نحجي.. كتله لاا.. حيجي حماي..

هوه الحدد اللي يلكه احمد ينطي مليون.. اتفق وياه وينطيكياه.. كال خابريه خل يجي.. خابرت بكر..

كال نص ساعه واجي. كتله ماشي.. انتضرنه لحد ما خابر بكر طلعنه.. كال بكر منو هذا.. كاله تريد احمد طعمه..

بكر ابتسم.. كاله اصعد.. صعد وصعدت وياه.. كال تعرف وين هوه.. كال اي بس يكلفك.. كاله شكد..

كاله 3ملايين.. كاله يجرالك بس طلعه.. كاله بشقة جماعتي كاعدين.. كال شقة شنو.. كاله مجموعة شباب سكن كاعدين بيه ..

كاله وين.. كال بالوزيريه.. كاله اوك نوصل بنت خالي ونطلع اني وياك.. وبعد ما استلم احمد اسلمك الفلوس..

كاله ماشي.. وصلوني للبيت.. وراحو.. بقيت علنار.. كالت عمتي رويده هاا كتله ادعي عمه بس كون يلكون احمد..

كالت ان شاء الله.. اتصل ابكر ويرفضه وره ساعه اتصل وهم يرفض.. لليل يله اجاني.. كتله هااا متت تره وماكو شنو الصار..

كال لكينه احمد والتمينه عليه اني ولد عمي كتل لحد ما خلينه يزوع دم ..واعترف وودينه للشرطه..

واعترف على الصورج.. و هم جابوه.. بس المشكله الاستاذ نكر كولشي وكال ما الي علاقه بيهم.. والشرطه خذلتنه ما تقبل تحقق بسالفه.. تكول ما عدكم دليل

كتله ليش.. كال اكيد رشاهم يعني اكو غيرها .. كتله وتالي.. كال التالي.. الله يكول العين بالعين والسن بالسن والجروح قصاص..

احنه بالعراق جروحنه ما عليها قصاص.. كلمن يشيل جرحه. ويبتلي بيه ما يطلعله حق..

فنضطر نستخدم العين بالعين.. ونورط عرضه بسالفه.. كتله بكر صدك تحجي.. كال ابراهيم احسن تفكير..

بس بهاي الطريقه راح تلزمه.. بس وين راح تلكه عرضه.. كال واحد مثل هذا تلكه عرضه سكط.. لان اللي يدك بعرض العالم اكيد عرضه الله داكه..

كاله وشلون راح تعرف.. كال باجر راح اروح افتش على اخت اله بنت اي شي حتى لو امه المهم نكدر نمسكه من هذا الباب..

كال سمر بعد لداومين.. مدام راح ندك عرضه.. راح يتعرضولج.. اكعدي هلاسبوع ٱפگـيہ.. كتله ٱפگـيہ

مشت 4 ايام وبكر كولشي ماكو اتصل يكول لسه ما عرفت غير عنده اخت بالسويد وامه متوفيه..

وماكو.. كتله وتالي كال الله العالي شكول.. جاي ادور وراه.. كتله الله يكون بالعون انشالله..

وره يومين.. خابر بكر كتله هاا.. كال عرفت عنده بنت من مرته المطلقه وسطيت عليها بسيارتي وهددتها .. وبعدين ما نطاني كلبي اخطفها..

بس اخذت موبايلها بيه كل صورها وشمرتها لبيتها وطلعت.. بسيارة حسام ابن عمي طبعا مو بسيارتي.. لان سيارته ما بيها رقم

كتله اي وتالي.. كال هذا موبايلها يمي بيه صورها باجر اروح اهدده بيها االله لا ينطيه من وراه كمت احس بروحي صرت ناقص..

بس شسوي شجابرك علمر غير الامر منه.. كتله هاهيه بكر شتسوي.. بس كون يخضع هلكلب..

كتله بكر ما اعرف شلون اشكرك لو شلون اجازيك.. فعلا ما اكدر اجازيك والله لو ما انته جان اني الله يعلم بحالي..

كال شوكت سمر شوكت.. مليت واني ادافعلج بصفة مرت اخوي او بنت خالي.. سمر اريد احارب لاجلج بصفتج مرتي..

كتله بكر صعب.. كال ماكو شي صعب بس أمني بيه. كتله انطيني وقت .. اكمل دراستي والله كريم..

هسه اذا فتحت الموضوع معناها ارسب وما اتخرج.. كال بس تكملين دراسه.. كتله اي.. كال سمر مستعد انتضرج طول عمري والله بس كون الي امل..

كتله انشالله الله يزرعلنه امل.. صاح اخخخخ شلون ارتاحيت.. لج هم شايله فوك كلبي سنين والله.. لا ليلي ليل ولا نهاري نهار ..سالبه كل عقلي..

كتله بكر.. يكولون متحس بقيمة الشخص الا تفقده.. اني لما فقدتك.. فعلا حسيت بقيمتك وبحبك وبهتمامك..

كال وچ انتي بنت كلبي شلون ما اهتم بيج.. بس تجرحيني هواي وعشكج عذاب..

كتله ماكو عشك ما بيه عذاب.. كال لاول مره بحياتي راح انام واني مرتاح.. انام واني اتأكد حبي دخل بكلب حب عمري..

ضحكت.. كتله هلكد تحبني.. شسويت وليش.. كال هيج بالفطره والله ما ادري ليش جنت مراهق لما حبيتج وشبيت عليج.. وراح اشيب هم عليج .

ضحكت.. كتله يله اروح ..كال براحتج.. مع السلامه.. ديري بالج على نفسج ٱפگـيہ..

كتله انشالله.. رجعت نمت اوووف يلحب تبجينه ساعه وتفرحنه ساعه.. نمت واني اضحك.. ومو مهتمه لاي كلام او خطر ممكن يهدد حياتي..

لان اعرف حياتي بين ادين امينه.. ربي يحفظه ولا يحرمني منه..

مرت ايام وخابر بكر كال سمر ابشري.. كتله شنو.. كال عادل طلع.. هلهلت كلللللللوش كتله شلون..

كال هددته للنذل بصور بنته.. كتله تسلمني صور سمر وتنزل دعوتك على عادل.. ووافق..

كتله ومراح ينسجن.. كال شينسجن يمعوده.. هسه خل نخلص من بلاه حتى لو نسجنه يطلع مدام اله رجل بالسياسه يلغمطها ويطلع..

كال بس راح نكاومه عشائري.. اذا القانون ما ياخذ حق احنه نطلعه من عيونهم.. مدام اعترف على روحه..

كتله المهم عادل طلع وصوري انمحت.. يمه فدوووه لطولك كلت والله محد يحلها غيرك

ضحك وكال الحمدلله.. اخذت عمتي ورجعت لبيت عمتي لكيت عادل رحت حظنته وسلمت عليه..

كتله يلخبل هوه هيج كالوها.. كال شسوي غير من وراج نمت اسبوعين سجن.. رنا كالت حظت برجلها وطلكتني من رجلي عسا الله لا يوفقج انشالله..

صاح بيها بكر.. رنا شنو هلحجي.. لتخليني اهين.. كالتله انته ضل دافع دافع بس والله اله اهجم بيتج يا سمر ولا اخليج تشوفين الراحه اصبريلي... يتبع

🌺🌺🌺🌺🌺

متابعين.. انتبهولي.. اني ممكن اتلاعب بلأسماء وبالأعمار والاماكن.. بس استحاله اتلاعب بالاحداث.. اذا القصه حقيقيه ..

احداث هلقصه جدا متعبه وكثيره .. واكثر قصه تعبت بتسميتها.. لان ما لكيت اسم يناسب موضوعها..

لذلك قررت اسميها حكاية سمر.. ومن فكر حظي 😑 من دخلت الهاشتاك طلع اكو مسلسل لبيرين سات بنفس الاسم😣

فالاحداث الاذكرها هيه منقوله من صاحبتها.. تسموها وادي الذئاب هذا الشي راجعلكم..

اصلا العراق اليوم صاير وادي للـ ذئاب.. فلتستغربون هلقصص بالعراق العظيم ..😊

متابعه ممتعه..

د 🌹

# حكاية_سمر..

،،،،،،،،،،بقلم الكاتبه زينب ماجد،،،،،،،،،،،

البارت_20

الحمدلله طلع عادل فرحت لان بكر حل المشكله باقل الخسائر.. بس رنا تعبتني بكلامها.. حيل اذتني.. تحجي تحجي واسكت بس تعبت

اجو عمامي وعماتي واهلي وكلهم.. يباركون لعادل طلوعه السجن.. وكل اليجي يحجي عليه.. عجيب والله تكول اني انطيت نفسي.

يعني لو منطيه نفسي اله جان مهددني.. لو شارده ويه بكر.. جان عشت غير حياة.. بس لان اخاف على سمعتي طايح حظي..

جانو ديطبخون بالمطبخ.. اجيت اساعد.. كلت هلاو للجميع.. ضحكن نسوان عمي وعماتي..

كالت عمتي الله جابج كعدي ثرمي بصل.. كتلها صار عمه.. كالت عمتي اسمهان.. هذا الاستاذ شيريد منج..

كتلها عمه يريدني قابل شيريد.. قبل لا اتزوج هم عرض عليه يخطبني ورفضت.. وبقى مجلب.. انوب هلكلب احمد يسولفله عني وعن عادل..

بعدني ممكمله كلامي وجان تجي رنا دفعتني دفعه.. وكعت للكاع.. احس مقعدي تكسر..

وتكلي تاج راسج احمد بنت الشوارع.. كتلها نعال احسن.. وبعدين شنو انتي ما عندج احساس..

رجال ميريدج خاينج دايح ساقط شكو لاطشه بيه.. جان تهد عليه وتريد تضربني.. عمتي رويده تبعد بيها.. وتكلها انهجم بيتج على هلقوه..

تكلها عمه عوفيني ابرد ناري بيها.. لو انتي وغيرج يستشرف ما اتقربلها احمد.. كتلها لا والله رديته الف مره.. بس هوه فد واحد سكط ميسوه نعال..

كالت عمه اشو عوفيني عليهااا.. كالتلها شوي هدي شعوفج عليها.. وحجيها صدك فوك ما خانج.. تكلها لا ما خاني مجبور يسوي هلشي علمود ينجح..

كالتلها عمتي ساميه.. ولج انتي شو غبره وينجح بشرف اهلج.. كالتها اهلي شلهم علاقه هاي الماعدها شرف على امها..

كتلها بلله تعاي منو انتي وتحجين على امي.. صدك انحرك دمي.. ولزمتها جر من شعرها من فوك عمتي اخذت كوم شعر بيدي...

هيه سويت هيج يمه تخبلت تريد تهد وتصرخ عوفوووووني.. اجه عادل كال هاي شبيكم صدك جذب صوتكم منا العالم فضحتونه

الله لا ينطيجن العافيه.. وجان تركض لحظن عادل وتكله باع هاي سمر شلون تملش شعري باوع باوع..

وشالت شعرها من الكاع وانطته العادل.. عادل دار وجها عليه بعصبيه.. راد يهد عليه.. وكفته عمتي رويده.. كالتله واختك ما قصرت لا تتخبل اكعد..

كاللها ما اسويلها شي والله بس اتقرب يمها.. كالته امشي عادل عوفها.. كتله تغلط على امي وتكول امج مو شريفه..

صرخ لو امج شريفه جان ربت وحده شريفه.. مو تخلف ساقطه مثلج.. كتله شسويت وساقطه هااا. شسويت..

كل ما كمتو وكلتو عليه ساقطه ساقطه ساقطه.. الا اصير مثل مرتك واروح انام ويه واحد بلحرام يله اصير شريفه..

مرتك ما جنت تاخذها بسيارة بكر تنام وياها قبل الزواج.. اعترررف ما اخذتها لان مو باكر...

كتله مرتك اتضمضملها رغم عمايلها بس اني ساقطه اني كح… لان ما سويت الحرام ..

كاللها عمه لخاطر ربج بس ووووووخري خل اشرب من دمها.. كتله ما بقى دم بيه وتشربه مللليت تعبتتت

انته مو بشر ما عندك رحمه.. بس وقت مصلحتك تجي يمي.. كال اني الي مصلحه يمج بنت الكلب اليوم ابو ابوج اسمطه..

عمتي ساميه. كالتله ولك وتسب ابوي.. دفعته للباب.. لو هذا هاج مثل الثور وكال وخررررو..

ولزمني من شعري.. سحل.. بكر جان برا راح يجيب طرشي والسمج من الفرن.. دخل والسمج بيده..

وشاف عادل يجرني من شعري.. شمر البيده وركض دفعه دفعه وكعه وره للكاع.. كاله كتلك سمر خط احمر ما تتعدا عاااادل..

كاله تعيرني وتريد اسكت.. كاله لانك مو رجال وعاااار.. الف مره كايلك سوالف النسوان لا تدخل بيها..

الخطار البلغرف كلها طلعت وتصيح ذكرو الله يمعودين كافي وهمه يتصايحون بكر يغلط وعادل يغلط..

واني لابده وره ضهر بكر ابجي.. وامي ساكته ما تحجي بس مبينه الحركه بكلبها..

وابوي طلع يشوف السالفه.كاللهم هاي شكو.. جره عمي تحسين للاستقبال كاله ذوله مثل الديوجه معليك تعال اذكر الله وعوفهم..

كاله لا خل نفتهم شكو.. وليش هيج سمر حالتها.. كتله بابا والله ما سويت شي.. رنا كلما تكوم تكلي انتي مو شريفه على امج..

شسوت امي ويعيروني بيها.. بكر دار وجها بعصبيه عليه.. كال شنو معناها تحجين.. الصمي.. سكتت..

ابوي دار وجها لعمتي ساميه.. كاللها ساميه هاي ثاني مره اجي بيتج ومرتي تنهان.. تلزمين بنتج لو احرم بيتج والله ما اطبه..

كالتله يا خويه فداك رنا واهلها والله ضربتها بس محروك كلبها تعرف اطلكت وهيه بعدها عروس.. مصار اشهر من تزوجت..

كاللها قابل احنه طلكناها.. شو انتو ما تستحون.. فوك. سوات رجلها الناقصه.. ابويه صوته. جهوري وخشن من يحجي يصيح صدك مدرب جيش. ماخذ صوته من شغله.. وصوته قوي كلها خلست..

دار وجها بكر.. وكال لغرفتج بساع.. مشيت. عادل يكلي بسيطه.. فضحتيها سمر بسيطه.. ما رديت وطبيت لغرفتي اباوع من الشباك..

كلهم راحو.. اتقرب بكر على عادل.. كاله ما ضربتك لان اليوم طالع سجن.. عادل تحترم نفسك لا ومحمد بالشارع اشمرك انته ومرتك.. ولو تبجي دمم ما ارجعك..

كاله فضحت حنين كبال عماتي.. كاله لو ساكت انته محد اتقرب منك.. بس انته اغبر اذا متنهان مترتاح.. يحجون يم المغاسل قريبه على غرفتي اسمعهم..

عادل راح بعصبيه لغرفته.. بكر دار وجها.. شافني اباوع من الشباك اخذ نفس وهز وراسه ومشا..

دخلت اباوع للمرايا.. اوف شوكت اكدر اعيش براحه وماكو واحد ينكد عليه عيشتي.. بنفسي اعيش بعيده عن العالم.. ما اسمع صوت احد لان تعبتت.

بقيت بغرفتي.. لشوي صاحوني للغدا ما قبلت اجي.. طبت يمي امي.. كتلها شفتي عيشتي شفتي شلون عايشه.. شفتي شلون يعاملوني..

كالت والله يايمه ارحم بالف مره من بيتنه.. ما شفت الصار بكد ما شفت حماية بكر الج تسوه الدينا.. يمه باعي شلون عايشه بخيره..

تطلكين يمه وين ترحين.. اذا ما ذبحج احمد يعيشج بالمهانه ينومج بكتله ويكعدج بكتله.. كتلها وتالي.. كالت الله الوالي يمه..

اتحملي ولا تهتمين وتعاركين لليغلط عليه.. شفتي ابوج شلون واكفلي.. ودافع عليه ..يمه انه اتعودت على عمامج وغلطهم وفشارهم عليه..

مدام عندي ابوج ويباوعلي تسوه الدنيا عندي لو الف عدو يسبني ياخذ من ذنوبي ويريحني.. اسكتي بنيتي..

امامج علي يكول ما ندمت على السكوت مره ولكني ندمت على الكلام مرارا.. يمه السكوت عن الجاهل نعمه..

كتلها انشالله ماما.. دا احجي وخابر بكر.. كالت من صمام الامان.. كتلها ههه بكر.. كالت ليش يتصل بيج..

كتلها لا ديوحيلي انو اطلع اكل.. كالت هيج مهتملج.. كتلها يعني شلون.. كالت لهفته عليج وخوفه ما مرتاحتلها..

كتله يمه بكر الملاك المنقذ اللي الله خلقلياه لو ما هوه اني هسه بعداد الموتى.. كالت متقنعيني.. كتلها ليش..

كالت سمر عندج شي اتجاها.. كتلها ليش.. كالت بمجرد ما اتصل وتحجين بيه عيونج ضحكت.. كتلها هاااا..

كتلها ما عندي شي ماما والله.. كالت لا تغلطين سمر.. هذا حماج.. لو فكرتي محرد تفكير.. فهاي اول خطوه تبنين كبرج بيها..

دنكت راسي.. كالت كومي يله اكلي.. لا تبقين بدون اكل ينزل ضغطج.. كمت وياها.. شافني بكر..

ابتسم.. دارتلي امي تريد تشوف شنو ردة فعلي بابتسامته.. غلست 😐.. مشيت بدون ما اباوعله..

الموبايل بأيدي.. دز بعدك ضايج يا حلو.. دزيتله تعودت.. كال ممنوع تتعودين واني موجود اطيحلج حظهم والله..

دزيتله اطفر.. امي تباوع عليه.. دز كال لييش.. كتله.. شكت بعيونه.. دز.. هههه فرحني هلكلام..

كتله انته يفرحك واني يطيح حظي.. دز.. احرك اهله اليوصل حظج.. كتله وصلو وراحو.. دز وين راحو..

كتله يشربون عرك بغرفتهم..(اقصد عادل).. هوه جان كدامي وهوه يراسل.. جاي يشرب بيبسي.. قراها.. فجر البيبسي بحلكه واختنك.. وكام يكح.. ويضحك

ويكلوله الله الله علكيفك يمعود.. ضحك.. كاللهم ماكو شي بس شركت.. دزيتله عافيه عافيه..

صار ساعه مخليه عيني علبيبسي بيدك الحمدلله عيني ابدااا متحسد.. دز لا اي واضح جدا..

تردين ببسي.. كتله ياريت.. اكلت سمج ولعبت نفسي.. كال جايج هسه.. كام من مكانه اخذ ببسي.. وافتر من وراه الخطار..

اني جنت كاعده قريب من الباب.. شمرها بحظني ومشا.. اباوع لامي عينها عليه.. بلعت بلعومي.. انعلست..

كملت غدا وطلعت اغسل مواعين وياهم.. دا انضف.. كال بكر سمسم خدري جاي.. كتله سمسم 😐

كال اي ناعمه. وفاهيه مثل السمسم ضحكت كتله بلله بربك هذا غززل لو رزاله.. كال الاثنين سوه يلوكلج..

دنحجي وطبت امي.. خرررب شسالفه يمه تمنيتها تروح بساع لان احسها صارت تراقبني.. طلع بكر..

اجت امي.. كالت سمر ما تعلمتي من اغلاطج يمه.. كتلها شسويت يمه.. كالت يمه من اكلج العيب اني مو اكرهج..

بس خوف لا توكعين بيه وما ترحمج الناس.. من تكليلي علحرام والعيب.. يمه الله يسامح ويغفر بس الناس متسامح ولا تغفر انتبهي بنيتي..

ما اريد اقسي عليج.. فلا تجبريني.. كتلها يوم كدرتي تمنعين نفسج من ابويه.. رغم هوه جان رجل دليمي من المستحيل جدوه السيد المعروف يقبل بيه..

كالت فرق ابوج عن بكر.. يمه ابوج غريب.. مو كرايبنا.. بكر حماج يا سمر انتبهي لا تخلين مشاعرج تجرفج..

لنكولين امي ما تفتهمني.. افتهمج حماج واحترمج وقدرج وانتي عايشه ابسببه.. بس لا تنسين موقعج ولا واقعج..

لا تتخطين الواقع وتخلين مشاعرج تحكمج… تاليتج الهاويه يسمر والله.. ميرحموج.. واني اول وحده اتبره منج.. ما ارضى بنتي تقبل بحماها وتكسر عيونه..

لو رجلج ميت بيها بابا وجواب..بس تطلكين وتصيرين للثاني والله ييمه لو يوزنج ذهب هم ما ننطيج. غير العار يركبنه من ساسنه لراسنه..

سكتت.. بس كلامها هذا مثل الصفعه ااجاني وكعدني من حلم وردي معيشه نفسي بيه..

كتلها كلامج ذهب امي.. همزين نبهتيني.. كالت يمه مدام عايشه بهلخير اكتفي لا اطمعين اكثر.. تره الطماع يوكع..

كتلها انشالله يووم.. كملت وطلعت لغرفتي راحو كلهم .. طلعت بليل اغسل ملابس .. واكفه علغساله..

واسمع واحد يحجي بالترك.. تصنتت.. عادل.. تصنتت اكثر.. يكلها يعني باجر مموجود.. اها باجر ب6 الصبح اني يمج..

اي حبيبتي اليوم طلعت من السجن ..شسوي بعد حظي.. يله باجر اجيج من الصبح من يطلع الكديش رجلج.. واجي اضوك العسل ههه ..

طلع من الترك.. شافاني واكفه.. كال ما ناسيها الج بس مو وقتها.. كتله منو مواعدها.. كال اي هم روحي واشهري وكولي عادل هيج خابر..

اتقربت يمه.. عادل انته تضاجع مره متزوجه.. كال ميخصج.. لزمته.. كتله من دق باب الناس دق الله بابه..

عادل خاف الله لا يطلعها بينه.. كال ما الج علاقه ولو حجيتي.. اذبحج.. كتله عادل شلون ادنس بيت رجل وتنام فراشه.. انته شنو من بشر..

دفعني ومشا.. خابرت بكر.. كال ها سمسم.. كتله بكر.. باجر قبل ال6 اروح للدوام.. كال شكو.. كتله افهمك الصبح..كال ٱפگـيہ ..

كعدت الصبح بدلت وخابرت بكر.. رفضه.. يعني كعد.. لبست جاكيتي. وطلعت.. طلع بكر.. كال شكو..

كتله ابعد السياره عن البيت شوي.. كال شكو.. كتله تفتهم فد شوي.. بعدها طلع عادل.. كال هذا شعنده من الصبح..

كتله الحكه بدون متحس.. حرك السياره.. جاي يلحكه.. عادل دخل ابيت الجيران.. طفى السياره بكر..

دار وجها عليه.. كال شديصير.. كتله عادل متفق مع وحده مزوجه .. يضاجعها بعد خروج زوجها من البيت..

كال ولج هذا بيت الحجي سلمان.. صاحب مطعم معروف.. كتله زوجته جبيره لو صغيره.. كال ما اعرف.. بحدود 35 اكبر ما اعرف بس ناعمه..

كتله يعني عادل متفق وياها.. كال لحظه.. خابره.. طلعت حنين.. كالت ها بكر.. كاللها عادل وين..

كالته طلع على شغل متفق ويه صاحبه ليش اكو شي.. كاللها لا.. عود ردته يوصل سمر اني عندي شغل..

يله اخذي راحتج.. سده منها ونزل.. دك باب بيت الحجي يدك ومحد يطلع.. اخر شي طلعت البنيه..

كاللها صيحي عادل.. كالتله يا عادل.. كاللها تصيحي لا اخابر حجي سلمان يصيحه.. كالتله طلع من الباب الخارجي.. كاللها ومحمد لو خابرتي عادل..

لو دعيتيه لبيتج.. اخابر الحجي واكله واحد ابتكم.. ومرتك تخونك وما اخلي يعرف اخوي ونتبره منج ويكتلج.. استشرفي و كفي عن اخوي..

طايش سكير لا تلعبين بعقله.. الا تره اندمج والله.. سدت الباب بوجه.. اجه عادل من راس الفرع..

بكر تخصرله بنص الشارع.. اتقرب عادل.. كاله خير متخصرلي بالدرب شكو شعندك.. انطاها بوكس على خشمه.. كاله هذا العندي..

عادل لزم خشمه.. كاله سكط كسرت خشمي اخ بويه.. لزمه عادل من ياخته.. كاله لو تقربت لبيت حجي سلمان ودست بيته..

ومحمد ادفنك فهمت.. عادل بس لازم خشمه يفض دم.. اني منزله راسي جوه الكشن.. اذا شافني عادل يشمرها براسي..

كاله سمر مووو بسيطه.. كاله نعلللل وتتحلف لسمر ما تتحلف النفسك.. ولك نقذتك من مصيبه اكو واحد يسوي سوايتك..

كاله هاي بس تحب تغثني.. اني الها.. كاله الزم شعره منها وشوف شسوي.. حجه هيج واجه ركب السياره وطلع..

مشا كال شبيج خاتله كتله لا يشوفني… كال عرفج بلا ميشوفج اطلعي.. كتله هم زين تلاحكنه.. كال هذا راح يخبلني بافعاله..

ما افتهم شنو يريده.. يحب حنين ووافق يتزوجج وانوب ساومني عليج واتزوج حنين وهسه يخونها..

ما اعرف شنو يريد شنو مبتغاه ما اعرف خبلني.. لا مره يشمر نفسه بمصيبه ونعجز نحلها اله شلون اتصرف وياه فهميني..

كتله والله ما اعرف يا بكر.. وصلني للجامعه.. نزلت للجامعه.. اووف ششوف وجهي من الحجي والاشاعات الطالعه..

اجت انمار.. كالت هله بالسبعه هلا.. كتلها لعد الثمانيه وين وادور يمنه يسره.. كالت وقت تحشيشج يلسباعيه..

كتلها كل مره الفاهيه الثوله مابيج خير.. اليوم سباعيه شنو الفلم احجيلي.. كالت استاذ منير قدم استقالته..

كتلها جذذذذذذذذب.. هله هله هله.. هاي الاخبار الزينه مال اركص بنص الكليه.. ولو اني ردت فد اعدام مؤبد حرامات.. يله المهم خلصنه منه..

كالت كله من استاذ بكر.. ضوكه من نفس الماعون اليشرب البنات بيه واخذ بنته وصورها.. كتلها ذكي على بنت عمته غير..

كالت جيره احسن.. بنت عمته نعال بعينج.. ولج انتي يحبج واحد مثل بكر.. لا حرام انتي جمعه ابو اللبلبي هواي عليج..

كتلها واللهي😒..كالت سمر.. والله لو اني بمكانج.. من باجر الم غراضي واروح وياه واعيش باقي حياتي بحبه..

كتلها صعب انمار صعب.. كالت مو صعب والله.. بس اتقوي وثقي بيه.. انتي تعرفين من تصيرين بسده اكبر واحد ميأذيج..

كتلها مو بس اذيتي انمار.. خنفكر بواقعيه ونترك مشاعرنه.. اهلي شلون اهله شلون..

كالت شعليج انتي هوه منو اهتملج غيره كلها تنهش بلحمج.. وبس هوه الج.. كتلها اني وياج.. بس هوه حاميني.

تتوقعين اهلي يقبلون بزواجنه.. كالت ما اعرف.. كتلها اني اعرف مستحيييييل وحتى لو اطلكت ما يقبلون بيه لو اوذن..

وبمجرد ما اخلص عده.. اي واحد يتقدملي يجبروني اتزوج.. ما كدامي حل غير اهرب وياه مووو..

ننتقل للقسم الثاني.. اهرب وياه شلوون.. وسمعتي.. وسمعة اهلي.. حتى لو اهلي ضلام وما يرحموني .. ما يصير هيج اسوي.

الله يوضحلنه بقرانه يكول لو جبروك تشرك بيه لا تشرك بس لا تقهرهم وصاحبهما في الدنيا معروفا

تردين اني اجي علمود مصلحتي وحياتي.. اسود وجه ابوي واكسر ضهره واموته بس علمود اني اعيش..

زبن لو سويت هيج وين اروح من الله.. افضح اهلي شلون.. ويكلولهم بتكم شردت ويه حماها هاي جزاة تربيتهم الي ل23 سنه.. انمار انتي دتستوعبين خطورة الموقف..

وبعدين اتركج من اهلي.. اهل بكر.. عايشين على بكر.. رنا مطلقه وعادل سكير و عطال بلبيت وعمي رجال جبير ومريض وعمتي مره جبيره..

شلون اكدر اصير انانيه واسرق ابنهم منهم.. عمتي مراح تدعي عليه.. ابوي ما يغضب عليه.. امي مراح تبجي من وراي.. هاي دموعهم مراح تحرك حياتي..

كالت سمر عقدتيها.. كتلها اني ممعقدتها بس هذا واقعي وما اكدر اتخطاه.. احبه نعم.. لكن شنو تالية هلحب موت ام حياة الله وحده اليحكم..

اتركها للزمن.. كالت وهذا المشلوع كلبه والله يقهرني.. كتلها هذي ثمن المشاعر الغلط.. شنسوي مو بدينه.. عشكنه والعشك مو بالايد بالكلب..

بعدها رحنه. كملت محاظراتنا.. اتصل بكر.. كتله طالعه رجعت للبيت.. وعادل اتوعدلي اتوعدلي بس مسوالي شي..

مرت الايام والشهور.. خلصت دراستي واتخرجت الحمدلله المعدل زين.. بقيت عايشه ابيت عمتي..

لا اني لبكر.. وصايره اله حبيبيه وزوجه ولا اني لعادل زوجه علورق وبس.. بس حبي لبكر يكبر يوم عن يوم..

كمت مو بس احبه لا اعشقه.. وهوه قره العشق بعيوني.. وفرحان.. وحتى مطالبني اشرد وياه او نفتح الموضوع..

باقيين هيج.. نحب بعظنه لدرجه الجنون.. بس بحدود.. مرت سنه وهوه كلمت احبج مكايلياها بصريح العباره..

لليوم ميتجرء يكولي حبي لو حياتي.. او حتى متجرء يوم ومد ايده عليه او ضايقني او حاول يطلب شي نزواني ابدا..

محترم الموقف البيه.. البيناتنا مجرد مشاعر جياشه ما نكدر نعبر بيها غير بفرحة عيونه ابعض .. ننتضر ربنا شوكت ينظر النه.. ويكتبلنه..

اهلي علاقتي بيهم.. جيدا نسبيا.. عادي اروحلهم ساعات.. وما ابات لان احمد اخويه مررر.. مينحمل

فد يوم جان عيد راس السنه.. وسوينه احتفال وفرحانين.. وخالد عيد ميلاده.. 31/12...

فقررنه نحتفل بالاثنين سوه ميلاد عادل ورأس السنه الميلاديه .. وبكر اشترالنه كيك ونفاخ وحلويات.. وشجرة كريسمس..

ونغني وفرحانين.. طلعنه ويه بكر للشارع شفنه الاحتفالات ورجعنه.. بكر اشتره العاب ناريه وشعالات..

وكال وقت الدك ساعة الصفر وندخل سنه جديده.. نطلق الاشعالات الناريه.. جنه امتانين.. لحد مبقت للسنه الجديده 10 ثواني..

حظرنه وكمنه نعد تنازلي 10… ..لحد…. 1 صحنا هييييييييي وكف بكر وعادل لزمو الاشعالات واطلقوها بالجو..

واكفين ونسمع التفجيرات الضوئيه واشكالها الروعه.. تخبببل.. وكلنه واكفين.. واني واكفه يم بكر..

وهوه يهز بالاشعال وييطلع النار منه.. لحد مخلص.. اني ضامه اديه جوه اكتافي من البرد..

باوعلي بكر.. كال كل سنه وانتي سالمه سمسم.. كتله سعيده انشالله هههه.. جاي نحجي وهوه يضرب بالعمود الكارتوني مال الشعال بايده..

كال بردانه.. طبي جوه بساع.. كتله اي والله.. كولش.. مشيت دا اطب.. وما احس الا الاشعال البأيد بكر انفجر..

طلع ممخلص.. وباقي بداخل الانبوبه مال اشعال وانفجرت.. صحت بكررررررر.. شفته مخلي ايده على عينه ومدنك..

كتله بكر بس باوعلي بكر.. كام يصيح وج يمممممه عيني يمممممممه.. اخ يااابه عينيييييييييي..

كتله بس شوفني عينك بكر.. بس اشوفها.. اريد الزمه.. وهوه كدامي يصيح ومدنك.. شال عينه..

وشفتها سوده وتبجي دم.. يمه فرفحت روحي كمت الطم على خدي وابجي راحت عينه رااااحت… يتبع

🌺🌺🌺🌺🌺

بكر بكر.. وهاي طاح الولد من عيونكم 😞..شهد

.. متابعه شيقه..